CNI News

၂၀၂၂ ခုနှစ်၊ စက်တင်ဘာ ၆

ကုလသမဂ္ဂတွင် မြန်မာကိုယ်စားလှယ်အဖြစ် အမျိုးသားညီညွတ်ရေးအစိုးရ(NUG)ဘက်မှ ရပ်တည်နေသော ဦးကျော်မိုးထွန်းကို UN က ကိုယ်စားလှယ်အနေနှင့် ဆက်လက် ထားရှိရေး ဆောမြို့နယ်၌ စက်တင်ဘာ ၆ ရက်နေ့က ဆန္ဒပြတောင်းဆို ခဲ့ကြသည်။

အဆိုပါ ဆန္ဒပြ တောင်းဆိုမှုကို ယောလူထုတိုက်ပွဲကော်မတီနှင့် YDF SAW တို့မှ ဦးဆောင်၍ ဒေသခံများ စုပေါင်း ဆောင်ရွက်ခဲ့ကြခြင်း ဖြစ်သည်။

ဆောမြို့နယ်က ဆန္ဒပြ သပိတ် (ယောလူထုတိုက်ပွဲကော်မတီ)

ထို့နောက် NUG ကို ထောက်ခံကြောင်းလည်း တောင်းဆိုခဲ့ကြသည်။

ထိုဆန္ဒပြ တောင်းဆိုမှုကို YDF SAW က လက်နက်များ ကိုင်ဆောင်၍ လုံခြုံရေး ရယူကာ ဝန်းရံပေးခဲ့သည်။

CNI News

၂၀၂၂ ခုနှစ်၊ စက်တင်ဘာ ၆

စစ်ကိုင်းတိုင်းဒေသကြီး၊ ဗန်းမောက်မြို့နယ် နောင်ပတ်ကျေးရွာမှ ရှမ်းနီဆရာတော်တစ်ပါးကို ကချင်လွတ်လပ် ရေးတပ်မတော်(KIA)၊ ဒေသကာကွယ်ရေးတပ် (PDF) ပူးပေါင်းတပ်ဖွဲ့တို့မှ သတ်ဖြတ်လိုက်ကြောင်း ဒေသခံများက ပြောသည်။

ဖမ်းဆီး သတ်ဖြတ်ခံရသူမှာ နောင်ပတ်ဆရာတော် ဦးဂန္ဓမာ ဖြစ်ကြောင်း၊ စက်တင်ဘာ ၄ ရက်နေ့ ညနေပိုင်းက KIA၊ PDF ပူးပေါင်းအဖွဲ့က လာရောက် ခေါ်ဆောင်သွားပြီးနောက် သတ်ဖြတ်ခံရခြင်း ဖြစ်ကြောင်း လုံခြုံရေး အရအမည်မဖော်လိုသူ ဒေသခံတစ်ဦးက ပြောသည်။

ရှမ်းနီစာပေသင်တန်းဆင်းပွဲတွင် တွေ့ရသော ဦးဂန္ဓမာ

၎င်းက “ဖြစ်စဉ်ကတော့ ၉ လပိုင်း ၄ ရက်နေ့ ညနေပိုင်း ၆ နာရီလောက်မှာ လာခေါ်သွားတယ်လို့ ပြောတယ်။ လာခေါ်တဲ့ အချိန်မှာ အင်အားက ကျောင်းထဲဝင်လာတာ ၁၀ ကျော်၊ အပြင်မှာ စောင့်နေတာလည်း ရှိတယ်။ သူတို့ ခေါ်သွားတဲ့ အချိန်မှာ ကြိုးတုတ်သွားတာတော့ မရှိဘူး။ ဘာကြောင့် ညာကြောင့် ခေါ်တယ်ဆိုတာလည်း မရှိဘူး။ ဒီအတိုင်းပဲ လာခေါ်သွားတယ်၊ ခေါ်သွားပြီးတော့မှ ရွာထဲမှာ ပုဆိုးနဲ့ အဝတ်အစား တောင်းတယ်လို့ ပြောတယ်၊ သူတို့ ခေါ်သွားတာ နောင်ပတ်ရွာနဲ့ ဆိုလို့ရှိရင် အနောက်တောင်ဖက် သွားကျမှာပေါ့။ နောင်ပတ်ရွာနဲ့ နမ့်စက် ကြားမှာ ၆ နာရီခွဲလောက်မှာ သေနတ်တစ်ချက် ဖောက်သံ ကြားတယ်ပေါ့လေ၊ ညပိုင်းမှာ ရှမ်းနီအမျိုးသားရေး လုပ်နေတဲ့ တခြားပုဂ္ဂိုလ်တွေကို ခေါ်ပြီးတော့မှ သွားပြတယ်တဲ့ မြေစာပုံကို၊ မြေစာပုံက ကျင်းသုံးကျင်း တူးထား တယ်တဲ့ တစ်ကျင်းက ဖို့ပြီးသား၊ ၂ ကျင်းက ကျန်သေးတယ်ပေ့ါ၊ သူတို့လာခေါ်သွားတဲ့ ၃၊ ၄ ယောက်ကို မင်းတို့ လည်း ဒီလမ်းစဉ်အတိုင်းပဲ လိုက်ရမယ်တဲ့ ကြည့်ထားဆိုပြီး အဲဒီပုံစံနဲ့ ပြောတယ်တဲ့ ပြီးတော့မှ အဲဒီလူတွေကို ရိုက်ပြီးမှ ပြန်လွတ်ခဲ့တယ်လို့ ပြောတယ်” ဟု ပြောသည်။

 ဖမ်းဆီးခံရပြီးနောက် ပြန်လွတ်လာသော စိုင်းကျန်အောင် 

ယနေ့(စက်တင်ဘာ ၆ ရက်) နံနက်ပိုင်းတွင် အဆိုပါ မြေစာပုံအား သွားဖော်ရာ သင်္ကန်းစများ မြင်တွေ့ခဲ့ရကြောင်း သိရသည်။

အဆိုပါ ဖြစ်စဉ်နှင့်ပတ်သက်ပြီး KIA မှ ပြောရေးဆိုခွင့်ရှိသူ ဗိုလ်မှူးကြီးနော်ဘူကို ဆက်သွယ် မေးမြန်းသော် ဖုန်း လက်ခံဖြေကြားခြင်းမရှိပေ။

ထို့နောက် ၂၀၂၂ ခုနှစ်၊ ဇွန်လ ၁၅ ရက်ကလည်း ဗန်းမောက် ရှမ်းနီလူငယ်ကွန်ရက် ဒုဥက္ကဋ္ဌဖြစ်သူ စိုင်းကျန်အောင် (ခ) စိုင်းဆေလိုင်းကို KIA၊ PDF များ ဖမ်းဆီးသွားခဲ့သေးသည်။

၂၀၂၂ ခုနှစ်၊ ဇွန်လ ၂၅ ရက်က သတ်ခံလိုက်ရသော ဦးသန်းဖေ 

အဆိုပါ ဖမ်းဆီးသွားသည်ကို သိရှိပြီးနောက် ရှမ်းနီ အရပ်ဖက် အဖွဲ့အစည်းများ၊ ရှမ်းအရပ်ဖက် အဖွဲ့အစည်းများ၊ ရှမ်းနီနိုင်ငံရေးပါတီများ၏ တောင်းဆိုမှုကြောင့် ဇွန်လ ၂၄ ရက်တွင် စိုင်းကျန်အောင် (ခ) စိုင်းဆေလိုင်းကို KIA၊ PDF ပူးပေါင်းအဖွဲ့က ပြန်လွှတ်ပေးခဲ့သည်။

အလားတူ ဗန်းမောက်မြို့နယ် ကြောင်လည်ကျေးရွာ ဘုန်းတော်ကြီးကျောင်းမှာ သီတင်းသုံးနေသည့် ဆရာတော် အရှင်သူရိယနှင့် ပင်ပုံရွားသား ၁၅ ဦးကိုလည်း KIA ၊PDF များမှ ဩဂုတ်လ ၂၁ ရက်နေ့ ညပိုင်းမှာ ဖမ်းဆီး ခေါ် ဆောင် သွားခဲ့ပြီး ဩဂုတ်လ ၂၄ ရက်နေ့ ညနေပိုင်းမှာ ပြန်လွှတ်ပေးခဲ့ကြောင်း သိရသည်။

၂၀၂၂ ခုနှစ်၊ ဇွန်လ ၂၅ ရက်က ကချင်ပြည်နယ်၊ မိုးညှင်းခရိုင်၊ ဖားကန့်မြို့နယ်၊ ဟောင်ပါးကျေးရွာတွင် နေထိုင် သော ရှမ်းနီစာပေနှင့်ယဉ်ကျေးမှုကော်မတီ နာယကဖြစ်သူ ဦးသန်းဖေ လုပ်ကြံသတ်ဖြတ်ခံခဲ့ရသေးသည်။

CNI News

၂၀၂၂ ခုနှစ်၊ စက်တင်ဘာ ၆

နစကသည် တရုတ်နှင့်ဆက်ဆံရေး တင်းမာလာသည့်အတွက် ရုရှားနိုင်ငံသို့ အခေါက်ခေါက် အခါခါသွားကာ ရုရှားနှင့် နီးစပ်သွားခြင်း ဖြစ်နိုင်သည်ဟု တရုတ်အရေး ကျွမ်းကျင်သူ ဒေါက်တာလှကျော်ဇောက CNI သတင်း ဌာနသို့ ပြောသည်။

ဒေါ်အောင်ဆန်းစုကြည် ဦးဆောင်သည့် အမျိုးသားဒီမိုကရေစီအဖွဲ့ချုပ်(NLD)နှင့် တရုတ်သည် ဆက်ဆံရေး ကောင်းမွန်သည့်အတွက် မြန်မာ့တပ်မတော်မှ အမြင်ကြည်ပုံမရကြောင်း ၎င်းက ပြောသည်။

ဒေါက်တာလှကျော်ဇောက “ဒါက ဒီလိုရှိတယ်ဗျ။ ဟိုနှစ်များက ဒေါ်အောင်ဆန်းစုကြည်တို့ NLD နဲ့ တရုတ်နဲ့ ဆက်ဆံရေးက သိပ်ကောင်းနေတာ ဖြစ်တာကို။ အဲဒီကတည်းက တော်တော်ကို မကြည်ဘူး။ တရုတ်ကလည်း ဦးသိန်းစိန်ခေတ်မှာ မြစ်ဆုံကိစ္စကို ဖျက်လိုက်တာကို တရုတ်ကလည်း တော်တော်စိတ်ဆိုးပုံရတယ်၊ အဲဒီ ကတည်း က စစ်တပ်နဲ့ အဖုအထစ် ဖြစ်သွားတယ်ထင်တယ်။ ဒေါ်‌အောင်ဆန်းစုကြည်နဲ့လည်း တရုတ်နဲ့က ဆက်ဆံရေး သိပ်ကောင်းသွားတဲ့ အခါကြတော့ သူတို့က သိပ်မကြည်ဘူး။ ဒါကြောင့်မို့လို့ သူတို့က တကယ်‌‌တော့ သူအာဏာ သိမ်းဖို့ စီစဉ်ကတည်းကိုက ရုရှားမှာ ပထမဦးဆုံးပြောတာလည်း ခင်ဗျား ကြားဖူးမှာပေါ့။ ရုရှားမှာ သူ့ရဲ့ သတင်းစာ ရှင်းလင်းပွဲမှာ သူပြောတာပဲ။ သူက နိုင်ငံရေးမှာ ဆက်လက်ပြီး ပါဝင်ဖို့ သူစဉ်းစားတယ်တို့၊ ဘာတို့ နောက် တရုတ် ကိုတောင်မှ စောင်းပြီး အဲဒီမှာ သွားချနေသေးတယ်လေ။ တချို့နိုင်ငံကြီးတွေက ကူညီနေတယ်တို့ ဘာတို့ သူသွား တွယ်နေသေးတာပဲ။ အဲဒီတော့ သူ့စိတ်ထဲမှာ နိုင်ငံတစ်နိုင်ငံကို ကပ်ဖို့ လိုတယ်လို့ တွက်မှာပေါ့။ တရုတ်နဲ့ကဆို သိပ် အဆင်မပြေဘူး ထင်တယ်။ နိုင်ငံခြားရေးဝန်ကြီး ဝမ်ယိလာတုန်းက သူတိုင်သေးတာပဲလေ။ မဲခိုးတာတွေ၊ ဘာတွေ အဲဒီတုန်းကလည်း တရုတ်က သူ့ဘက် မလိုက်တဲ့အခါကြတော့ သူက ရုရှားကို လှမ်းဖက်ထားပုံရပါ တယ်။ သူ့ကို ဖိတ်လည်း မဖိတ်ဘူး။ တရုတ်က ဒီတစ်ခေါက် နိုင်ငံခြားရေးဝန်ကြီး ဝမ်ယိလာတာလည်း သူ့ကို နေပြည်တော်မှာ လာမှ မတွေ့တာ၊ အဲဒါကြောင့် သူက တရုတ်နဲ့ ဆက်ဆံရေး နည်းနည်း တင်းမာလာတဲ့ အခါမှာ ရုရှားဖက်ကို သူတို့က အတင်းဝင်တိုးတာနဲ့ တူပါတယ် ကြည့်ရတာ” ဟု CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ ရှီကျင့်ဖျင်ကိုတွေ့ရစဉ်

နစကနှင့် ရုရှားသမ္မတတို့ တွေ့ဆုံဖြစ်ပါက သံခင်းတမန်ခင်းအရ အောင်မြင်မှုဟု ပြောနိုင်ကြောင်း၊ သို့သော် လည်း စီးပွားရေးဖိုရမ် တက်ရောက်ရန် ဖြစ်သည့်အတွက် မည်သည့် ခေါင်းဆောင်နှင့်မဆို တွေ့ဆုံရမည် ဖြစ် ကြောင်း ၎င်းက ပြောသည်။

စွမ်းအင်ကဏ္ဍအရ ရုရှားနှင့် ပူးပေါင်းရမှာ ဖြစ်သလို လူသုံးကုန်ပစ္စည်း တင်ပို့ရောင်းချရေးနှင့် တိုင်းရင်းသား လက်နက်ကိုင် အရေးများတွင် တရုတ်နှင့် ချစ်ကြည်ရင်းနှီးမှု တည်ဆောက်ရမည်ဖြစ်ကြောင်း နိုင်ငံရေးလေ့လာ သုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

ရုရှားရောက်နေသော ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

ဒေါက်တာအောင်မျိုးက “ရုရှားကို သွားတယ်၊ ရုရှားဆီက ကျနော်တို့က သိပ်ပြီးတော့ အဆင့်မြင့်တဲ့ ကျနော်တို့ က နည်းပညာပိုင်းဆိုင်ရာတွေ ကျနော်တို့က ရုရှားဆီက ရမယ်၊ ပူးပေါင်းဆောင်ရွက်မှုရမယ်၊ အထူးသဖြင့်တော့ စွမ်းအင်ကဏ္ဍပေါ့နော်၊ စွမ်းအင်ကဏ္ဍမှာတော့ ကျ‌နော်တို့က တရုတ်ကို မှီခိုလို့မရဘူး။ ရုရှားကို ကျနော်တို့က မှီခို ရမှာပဲ။ အရေးကြီးဆုံး စွမ်းအင်ကဏ္ဍပေါ့နော်၊ ဒီအတွက်ကြောင့် ကျနော်တို့က ရုရှားကို သွားတာကို ကျနော်တို့ ကြိုက်တယ်။ ဒါပေမဲ့ တစ်ဖက်ကြတော့လည်း ကျနော်တို့က လူသုံးကုန်ပစ္စည်း ထုတ်လုပ်မှုပေါ့နော်၊ စစ်ရေး နည်းပညာ မပါပေါ့နော်၊ လူသုံးကုန်ပစ္စည်းထုတ်လုပ်မှု အပါအဝင် အပိုင်းတွေမှာကြတော့ ကျနော်တို့ တရုတ် ပြည် ဈေးကွက်ကြီးက သန်းတစ်ထောင်ကျော်ကြီး ရှိနေတဲ့ အခါကြတော့ တရုတ်အစိုးရနဲ့ ကျနော်တို့ ချစ်ကြည် ရင်းနှီးမှုဆိုတာက ကျနော်တို့က တည်ဆောက်ရမှာပဲ” ဟု ပြောသည်။

နစကဥက္ကဋ္ဌသည် ရုရှားနိုင်ငံမှာ စက်တင်ဘာ ၇ ရက်နေ့တွင် ကျင်းပမည့် အရှေ့ဖျားစီးပွားရေးဖိုရမ်(EEF)ကို တက်ရောက်ရန် စက်တင်ဘာ ၄ ရက်နေ့က ရုရှားနိုင်ငံသို့ ရောက်ရှိနေပြီ ဖြစ်သည်။

ရုရှားသမ္မတ ဗလာဒီမာပူတင်ကလည်း အရှေ့ဖျားစီးပွားရေးဖိုရမ်(EEF)ကို တက်ရောက်ကြမည့် မြန်မာ၊ အာမေးနီးယား၊ မွန်ဂိုလီယား၊ တရုတ် တို့မှ ခေါင်းဆောင်များဖြင့် တွေ့ဆုံ ဆွေးနွေးသွားရန်ရှိကြောင်း ရုရှားသတင်းဌာန တာ့စ်က ဖော်ပြထားသည်။

CNI News

၂၀၂၂ ခုနှစ်၊ စက်တင်ဘာ ၆

ကရင်ပြည်နယ်၊ မူတြော်ခရိုင် (ဖာပွန်ခရိုင်)အတွင်းမှာ ကရင်အမျိုးသားလွတ်မြောက်ရေးတပ်မတော်(KNLA)၏ တပ်မဟာ ၅ နှင့် မြန်မာ့တပ်မတော်ကြား တိုက်ပွဲပေါင်း ၁၁၈ ကြိမ် ဖြစ်ပွားခဲ့ကြောင်း မူတြော်သတင်းစဉ်က စက်တင်ဘာ ၅ ရက်နေ့တွင် ထုတ်ပြန်ထားသည်။

အဆိုပါ တိုက်ပွဲအတွင်း မြန်မာ့တပ်မတော်ဘက်မှ ပူးပေါင်း တိုက်ခိုက်သူ BGF ၈၄ ဦး ကျဆုံးပြီး ၄၇ ဦး ထိခိုက် ဒဏ်ရာရရှိခဲ့ကြောင်း၊ KNLA တပ်မဟာ ၅ ဘက်မှ တစ်ဦး ကျဆုံးခဲ့ကြောင်း ထုတ်ပြန်ချက်တွင် ဖော်ပြထား သည်။

ထို့နောက် သြဂုတ်လတွင် ဖြစ်ပွားခဲ့သော တိုက်ပွဲများအတွင်း အရပ်သား နေအိမ် ၂၄ လုံး ထိခိုက်ပျက်စီးခဲ့ကြောင်း၊ မြန်မာ့တပ်မတော်ဘက်ကမှ လေယာဉ်ဖြင့် ၃ ကြိမ် ဗုံးကြဲကြောင်း၊ အရပ်သား တစ်ဦး သေဆုံးပြီး ၅ ဦး ဒဏ်ရာ ရရှိခဲ့ကြောင်း မူတြော်သတင်းစဉ်က ဖော်ပြထားသည်။

KNLA သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ထိုးထားသည့် ကရင်အမျိုးသား အစည်းအရုံး(KNU)၏ စစ်ရေးလက်အောက်ခံ အဖွဲ့ဖြစ်သည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် နိုင်ငံရေးအပြောင်းအလဲနှင့်အတူ ပေါ်ပေါက်လာသော နွေဦးတော်လှန် ရေးမှာ ပါဝင်၍ မြန်မာ့တပ်မတော်နှင့် တိုက်ပွဲများ ဖြစ်ပွား လျက်ရှိသည်။

CNI News

၂၀၂၂ ခုနှစ်၊ စက်တင်ဘာ ၅

ရခိုင်ပြည်နယ်တွင် တပ်မတော်နှင့် ရက္ခိုင့်တပ်တော် (ULA/AA) တို့ တိုက်ပွဲကြောင့် ဒေသခံပြည်သူ ၁ သောင်း ကျော် ထပ်တိုး တိမ်းရှောင်လာကြောင်း တိုက်ပွဲရှောင်များကို ကူညီဆောင်ရွက်ပေးနေသည့် သဘာဝနဒီ ဆရာတော်က CNI သတင်းဌာနသို့ မိန့်ကြားသည်။

၂၀၂၂ ခုနှစ်၊ ဩဂုတ်လ စတုတ္ထအပတ်မှ စတင်ပြီး တိုက်ပွဲရှောင်များ တိုးလာကြောင်း၊ လက်ရှိ စာရင်းကောက် နေဆဲဖြစ်ကာ လာမည့်ပတ်တွင် ထုတ်ပြန်နိုင်မည်ဖြစ်ကြောင်း ဆရာတော်က ဆက်လက် မိန့်ကြားသည်။

ဆရာတော်က “အရေအတွက် တိတိကျကျ ပြောဖို့တော့ ခက်တယ်ဗျ။ စာရင်းတွေက လိုက်နေတုန်း၊ စစ်တမ်း ကောက်နေတုန်းပဲ မို့လို့လေ။ လောလောဆယ် ရွာထဲက ဘယ်ရွာမှာ အိမ်ထောင်စု ဘယ်လောက်ရှိတယ်၊ လူဦးရေ ဘယ်လောက်ရှိတယ်၊ ရနိုင်သလောက်ကို အကြမ်းဖျင်း စာရင်းပဲ ရှိတယ်။ အသေးစိတ်ကတော့ ကျုပ်တို့ လုပ်နေ တုန်းဗျ။ ထုတ်ပြန်နိုင်ဖို့ကတော့ နောက်ပတ်လောက်မှ ဖြစ်မယ်ထင်တယ်။ ခန့်မှန်းခြေက လောလောဆယ် ကျုပ် တို့ သိရလောက်ကတော့ တစ်သောင်း ခြောက်ထောင်ဝန်းကျင် လောက်ဖြစ်နေပြီ တစ်သောင်းကျော်နေပြီပေါ့” ဟု ပြောသည်။

မောင်တောမြို့ သာသနာ့ဗိမာန် ယာယီတိုက်ပွဲရှောင်စခန်းကိုတွေ့ရစဉ် (သဘာဝနဒီဆရာတော်)

ပြီးခဲ့သည့် သြဂုတ်လအတွင်းက ရခိုင်ပြည်နယ်ရှိ မောင်တော၊ ရသေ့တောင်၊ တောင်ကုတ်၊ မြောက်ဦးနှင့် ချင်း ပြည်နယ် ပလက်ဝ ဒေသတို့တွင် တပ်မတော်နှင့် AA တို့ကြား တိုက်ပွဲကြောင့် ထွက်ပြေးတိမ်းရှောင်ခဲ့ကြ သူများ ဖြစ်ကြောင်း သိရသည်။

အဆိုပါ တိုက်ပွဲရှောင်များကို အကူအညီပေးနိုင်ရေး စီစဉ်နေကြ‌ကြောင်း ရခိုအမျိုးသားပါတီ (ANP) မှ မူဝါဒ ရေးရာဦးဆောင်ကော်မတီဝင် ဦးထွန်းအောင်ကျော်က CNI သတင်းဌာနသို့ ပြောသည်။

၎င်းက “ကျနော်တို့ ဒီနေ့ အထွေထွေအတွင်းရေးမှူး အပါအဝင် အဖွဲ့အစည်းတွေနဲ့ ဆုံပြီးတော့ ဒါတစ်ခုခု‌တော့ ကျ‌နော်တို့ လုပ်ရမယ်၊ သိသင့်သိထိုက်တဲ့ အခြေအနေတွေကိုလည်း ကျ‌နော်တို့ ပါတီအနေနဲ့ စာရင်းဇယား ပြုစု ပြီးတော့မှ တင်ပြသင့်တယ်ဆိုပြီးမှ ပြောဆိုပြီးတော့ အခုစာရင်းဇယားတွေ လုပ်နေကြပါတယ်။ မကြာခင်တော့ ဒီစာရင်းဇယား အတိအကျနဲ့ ပါတီကနေ ထုတ်ပြန်ပြီးတော့ အသိပေးပြီးတော့မှ ရရှိတဲ့ ပံ့ပိုးအလှူငွေတွေနဲ့ နိုင် သလောက် အကူအညီ ပေးသွားဖို့ အကူအညီရှိပါတယ်။ ထပ်ပြောချင်တာက ကျနော်တို့က အာဏာရတဲ့ အဖွဲ့အစည်းလည်း မဟုတ်ဘူး။ စီးပွား‌ရေးလုပ်နေတဲ့ အဖွဲ့အစည်းလည်း မဟုတ်ဘူး။ အမျိုးသားရေး အခြေခံ ပြီးတော့မှ ဖွဲ့စည်းထားတဲ့ နိုင်ငံရေးပါတီ တစ်ခုဖြစ်တဲ့အတွက် မိမိတို့မှာ ငွေကြေးအခိုင်အမာ ကျနော်တို့မှာ မရှိဘူး။ အဲဒါကြောင့် အလှူငွေတွေ ရအောင်ကြိုးစားပြီးတော့မှ ရရှိတဲ့ ခြေအနေပေါ်မှာ မူတည်ပြီးတော့မှ ကျနော်တို့ ထောက်ပံ့ကူညီသွားဖို့ စီစဉ်နေကြပါတယ်ခင်ဗျ” ဟု ပြောသည်။

တိုက်ပွဲကြောင့် နေရပ်စွန့်ခွာ ထွက်ပြေးလာသည့် တိုက်ပွဲရှောင်များကို လက်ရှိ အာဏာရ အဖွဲ့အစည်း အနေဖြင့် အကူအညီများ ပေးသင့်ကြောင်း ဦးထွန်းအောင်ကျော်က ပြောသည်။

သဘာဝနဒီဆရာတော် တိုက်ပွဲရှောင်များကို အကူအညီပေးနေစဉ် (သဘာဝနဒီဆရာတော်)

သဘာဝနဒီဆရာတော်က “တိုက်ပွဲဖြစ်တာက သိပ်မပြောလိုဘူး။ လက်နက်ကိုင်အဖွဲ့အချင်းချင်း ပဋိပက္ခဖြစ်တာ၊ ဒါပေမဲ့ အရပ်သားပြည်သူတွေကို ပစ်မှတ်ထားပြီးတော့မှ တိုက်ခိုက်တာတွေ၊ အရပ်သားပြည်သူတွေ ထိခိုက် နစ်နာလာပြီဆိုရင် အရပ်သားပြည်သူတွေကို အရပ်သား CSO တွေက လွတ်လပ်စွာ ကူညီထောက်ပံ့ခွင့် ရဖို့ကို အစိုးရအနေနဲ့ ခွင့်ပြုသင့်တယ်၊ လွတ်လပ်စွာ သွားလာခွင့်ကိုလည်း ပေးဖို့လိုတယ်၊ ဒါက အစိုးရပိုင်းတော့ ပေးရ မယ့် အပိုင်းတွေ ဖြစ်တယ်၊ အဲဒါမှသာလျှင် ဒီတိုက်ပွဲကြားမှာ ပိတ်မိနေတဲ့ ပြည်သူတွေကို ကျုပ်တို့ အရပ်ဖက် ဘက်က စစ်ဘေးကူညီရေး အဖွဲ့တွေ၊ စစ်ဘေးရှောင်အရေး ကူညီဆောင်ရွက်တဲ့ သူတွေ၊ လူမှုရေးသမားတွေက ဝင်ရောက်ပြီးတော့ ကူညီကယ်ဆယ်နိုင်မယ်၊ အဲဒါကြောင့် လွတ်လပ်စွာ သွားလာလှူဒါန်းခွင့်နဲ့ လွတ်လပ်စွာ လှုပ်ရှားခွင့်ပေးဖို့ အစိုးရအနေနဲ့ လုပ်ချင်တယ်ဆိုရင် စစ်ဆေးစရာရှိရင် စစ်ဆေးပါ။ လွတ်လပ်စွာ သွားလာခွင့် ပေးပြီးတော့ စစ်ဆေးစရာရှိတာ စစ်ဆေး၊ ဥပဒေငြိစွန်းတာရှိရင် အရေးယူပေါ့ဗျာ၊ အခုက အဲဒီလို မဟုတ်ဘဲနဲ့ လုံးဝသွားလာခွင့် မပေးတော့ဘူး။ ပိတ်လိုက်တာကကြ‌တော့ ဒါလုံးဝ မဖြစ်သင့်တဲ့ ကိစ္စလို့ ပြောချင်တယ်ဗျ” ဟု ပြောသည်။

တပ်မ‌တော်နှင့် AA တို့ ပလက်ဝ (ချင်းပြည်နယ်)၊ မောင်တော (ရခိုင်ပြည်နယ်)တို့တွင် တိုက်ပွဲ စတင် ဖြစ်ပွား ခဲ့ပြီးနောက် ဘူးသီးတောင်၊ ရသေ့တောင်၊ မြောက်ဦး စသည့် မြို့နယ်များအတွင်းမှာပါ ဆက်စပ် ဖြစ်ပွားလာခဲ့ ကြသည်။

ရခိုင်ပြည်နယ်တွင် ယခင်တိုက်ပွဲရှောင် ၄၂၀၀၀ ကျော်ရှိပြီး လတ်တလော တိုက်ပွဲရှောင် ၁ သောင်းကျော် တိုးလာကာ စုစုပေါင်း ရခိုင်ပြည်နယ်တွင် တိုက်ပွဲရှောင် ၆ သောင်းနီးပါး ရှိနေကြောင်း သိရသည်။

CNI News

၂၀၂၂ ခုနှစ်၊ စက်တင်ဘာ ၃

ရက္ခိုင့်တပ်တော်(ULA/AA) အနေဖြင့် လွတ်လပ်ရေးအထိ သွားနိုင်ကြောင်း ရခိုင်နိုင်ငံရေးသမား ဦးဖေသန်း က CNI သတင်းဌာနသို့ ပြောသည်။

ရခိုင်ပြည်သစ် (သို့) အနာဂတ် ဖက်ဒရယ်ဒီမိုကရေစီ ပြည်ထောင်စု တည်ဆောက်ရာတွင် အခြေခံရမည့် လူသား လုံခြုံရေးဆိုင်ရာ အခြေခံမူနှင့် အကြံပြုချက်များဆိုသည့် ခေါင်းစဉ်ဖြင့် ရခိုင်အမျိုးသားအဆင့် မူဝါဒရေးရာ ညှိနှိုင်း ရေးဆွဲရေးအဖွဲ့ (ANPCC)က ‌ဆွေးနွေးရာတွင် ULA/AA ကို ဖိတ်ခေါ်ခဲ့သော်လည်း ULA/AA အနေဖြင့် တက်ရောက် ခြင်း မရှိကြောင်း သိရသည်။

ရခိုင်ပြည်နယ်ရှိ မိုင်တိုင်အမှတ် ၄၀ စခန်းကို ULA/AA တိုက်ခိုက်မှု နစကထုတ်ပြန်ချက်

ဦးဖေသန်းက “ULA/AA အနေနဲ့တော့ အဲဒီလိုမဟုတ်ဘူး။ သူ့အနေနဲ့ အနည်းဆုံး ကွန်ဖက်ဒရိတ်အဆင့်လောက်ကို သူ့ဖက်က တောင်းထားတာ ရှိတယ်။ အဲဒါကြတော့ ဒီဖက်က လက်ခံနိုင်တဲ့ အခြေအနေမရှိဘူး။ ပြီးတော့ သူတို့နဲ့ ပေါင်းပြီးတော့ တကယ်တမ်း ဆွေးနွေးမယ် ဆိုရင်တောင်မှ ULA/AA အနေနဲ့ ပါတီတွေ၊ ALP တွေ သူတို့လိုပေါ့ နော်၊ ရောရောသောသော သူတို့ ဆွေး‌နွေးလို့ ဆွေးနွေးချင်ပုံ မရဘူး။ တကယ်တမ်း ဆွေးနွေးချင်ရင် သီးသန့် ဆွေး နွေးလို့ ရနိုင်တဲ့ အခွင့်အရေးတွေ လည်း ရှိတယ်။ သီးသန့်လည်း ဖိတ်ခေါ်ထားတာလည်း ရှိတယ်၊ ဒါကြောင့် အင်အား မရှိဘဲနဲ့ သွားပြီးတော့၊ ကိုယ့် မှာ ဘာမှ အင်အားမရှိဘဲ သွားပြီးတော့ တောင်းရတာဆိုတာက လက်ဖြန့် တောင်းရသလိုမျိုး ဖြစ်နေတာပေါ့။ ပြော ရ၊ ဆိုရ ဆွေးနွေးရတာဟာ သူတို့ပေးဖို့အတွက် ကိုယ့်ဖက်က လက်ဖြန့် တောင်းသလိုမျိုး ဖြစ်နေတယ်၊ ULA/AA ရဲ့ သဘောထားကတော့ ကိုယ့်အင်အားကို အပြတ်အသတ် တည်ဆောက် မယ်၊ ပြီးတော့မှ အင်အားအပေါ်မှာ မူတည် ပြီးတော့ သူတို့ ကိုယ်လိုချင်ရတာ ရအောင် ပုံဖော်မယ်ပေါ့။ အဲဒီ သဘောမျိုး ဖြစ်တဲ့အတွက်နဲ့ ဒါက သူတို့နဲ့ မဆွေးနွေးတာ သူတို့ဆွေးနွေးပွဲကို စိတ်မဝင်စားတာလည်း ဖြစ်နိုင် တယ်၊ ဖက်ဒရယ်ဆိုတာကတော့ ပြောနေကြ တာပဲလေ ဟိုကလည်း ဖက်ဒရယ်၊ ဒီကလည်း ဖက်ဒရယ်၊ ဒါပေမဲ့ ဘယ်လို ဖက်ဒရယ်မျိုး ဆိုတာလည်း ဘယ် ဘက်ကမှ မချပြဘူး။ ဒီဘက်ကလည်း ULA/AA ဘက်ကတော့ ပြော ပြီး သားလေ၊ သူတို့ကတော့ ကွန်ဖက်ဒရိတ် ဆိုပြီး ပြောပြီးသား။ ဆိုတော့ အဲဒီထက် အောက်ဈေးလို့ပဲ ပြောလို့ရ တယ်၊ အပေါ်ဈေးကတော့ လွတ်လပ်ရေးအထိ သွားနိုင်တယ်၊ ဒါကြောင့် သူတို့ ဒီဆွေးနွေးပွဲတွေကို စိတ်မဝင်စား တာ ဖြစ်နိုင်တယ်” ဟု ပြောသည်။

ANPCC ထုတ်ပြန်ချက်

ANPCC ၏ “လူသားလုံခြုံရေး အခြေခံမူများနှင့် အကြံပြုချက်များဆိုင်ရာ အလုပ်ရုံဆွေးနွေးပွဲ”ကို ၂၀၂၂ ခုနှစ်၊ ဩဂုတ်လ ၁၉ ရက်နေ့မှ ၂၁ ရက်နေ့ထိ ကျင်းပခဲ့ပြီး အလုပ်ရုံဆွေးနွေးပွဲကို ANPCC အဖွဲ့ဝင်များအား ကိုယ်စားပြု သော ရခိုင်တော်လှန်ရေးပါတီ (၂) ဖွဲ့ ရခိုင်ပြည်လွတ်‌မြောက်ရေးပါတီ (ALP)၊ ရခိုင်ပြည်အမျိုးသားကောင်စီ (ANC) အပါအဝင် ရခိုင်နိုင်ငံရေးပါတီများဖြစ်သည့် ရခိုင်အမျိုးသားပါတီ(ANP)၊ ရခိုင်ဦးဆောင်ပါတီ(AFP)၊ ရခိုင်ဒီမိုကရေစီ အဖွဲ့ချုပ်ပါတီ(ALD) နှင့် ဌာနေတိုင်းရင်းသားပါတီ ၃ ပါတီ၊ အရပ်ဖက် အဖွဲ့အစည်းများမှ တရားဝင် ကိုယ်စားလှယ် (၁၈) ဦး၊ တသီးပုဂ္ဂလိက ကိုယ်စားလှယ် (၃) ဦး၊ စုစုပေါင်း (၃၂) ဦး တက်ရောက်ခဲ့ကြောင်း သိရသည်။

အဆိုပါ ဆွေးနွေးပွဲကို ရခိုင်ပြည်နယ်အတွင်းရှိ အဖွဲ့အစည်းများအားလုံးကို ဖိတ်ကြားခဲ့ကြောင်း၊ တက်လာသည့် အဖွဲ့အစည်းများ ရှိသလို၊ မတက်လာသည့် အဖွဲ့အစည်းများလည်းရှိကြောင်း ANPCC မှ ညှိနှိုင်းရေးမှူး ဦးခင်မောင်ထွန်းက CNI သတင်းဌာနသို့ ပြောသည်။
၎င်းက “ကျနော်တို့‌ ဆွေးနွေးပွဲထဲမှာ မပါတာ မဟုတ်ဘူး။ ကျ‌နော်တို့က အကုန်လုံးကို ဖိတ်ခဲ့ပါတယ်။ အကုန်လုံး ကျနော်တို့ ANPCC လုပ်ကတည်းက အကုန်လုံးပါပါတယ်၊ သူတို့ မအားလို့ မတက်ကြတာလားဆိုတဲ့ အခြေအနေ မှာ ဖြစ်ချင်ဖြစ်မှာပေါ့၊ ကျ‌နော်တို့ကတော့ ဒီအစည်းအဝေး စတင်ကတည်းက ရခိုင်အမျိုးသားအဆင့် ဆွေး‌နွေးပွဲ ကို စတင်ကတည်းကပေါ့နော် ANPCC စတင်ကတည်းက နိုင်ငံရေးပါတီ အကုန်လုံးပါတယ်၊ တော်လှန်ရေးပါတီ အားလုံးပါတယ်၊ အရပ်ဖက် အဖွဲ့အစည်း တော်တော်များများကို ကျနော်တို့ ဖိတ်ပါတယ်။ အမျိုးသမီးကဏ္ဍရော၊ မသန်စွမ်းတွေရော၊ အကုန်လုံး သဘာဝပတ်ဝန်းကျင်ဆိုင်ရာတွေရော ပြောမယ်ဆိုရင် အဖွဲ့အစည်းပေါင်းစုံ၊ သူကဏ္ဍနဲ့ သူ့လုပ်ငန်းမှာ အဖွဲ့အစည်းပေါင်းစုံ အကုန်လုံး ဖိတ်ခဲ့ပါတယ်။ အဲဒီတုန်းက မတက်တဲ့ အဖွဲ့အစည်း တွေလည်း ရှိတယ်၊ တက်လာတဲ့ အဖွဲ့အစည်းတွေလည်း ရှိတာပေါ့နော်” ဟု ပြောသည်။

ရခိုင်ပြည်နယ်အတွင်းက လမ်းဆုံတစ်ခုကိုတွေ့ရစဉ်

ULA/AA သွားချင်သည့် နိုင်ငံ‌ရေးလမ်းကြောင်းနှင့် အဆိုပါ အဖွဲ့အစည်းများ၏ နိုင်ငံရေး ချည်းကပ်ပုံ၊ ချည်းကပ် နည်း မတူကြောင်း၊ ULA/AA အနေဖြင့် မိမိတို့ အင်အားကို တည်ဆောက်ကာ မိမိရည်မှန်းချက်အတိုင်း လုပ်ဆောင် သွားမည်ဟု မြင်မိကြောင်း ဦးဖေသန်းက ပြောသည်။

ရှမ်းပြည်နယ်အတွင်းက ‘ဝ’ ကိုယ်ပိုင်အုပ်ချုပ်ခွင့်ရတိုင်းနှင့်အလားတူ ကိုယ်ပိုင်အုပ်ချုပ်ခွင့် အဆင့်အတန်းမျိုးကို ရလိုကြောင်း ULA/AA ၏ တပ်မှူးချုပ် ဗိုလ်ချုပ်ထွန်းမြတ်နိုင်က ထုတ်ဖော် ပြောကြားထားသည်။

လက်ရှိတွင် ရခိုင်ပြည်နယ်၌ ULA/AA သည် လူထုထောက်ခံမှု ပိုမိုရရှိနေပြီး မြန်မာ့တပ်မတော်နှင့်လည်း တိုက်ပွဲ များ ဖြစ်ပွားနေသည်။

CNI News

၂၀၂၂ ခုနှစ်၊ စက်တင်ဘာ ၂

ရန်ကုန်တိုင်းဒေသကြီး၊ လှည်းကူးမြို့အနီးရှိ ဝက်အင်းပေါက် တိုက်ပွဲရှောင်စခန်းတွင် စားနပ်ရိက္ခာနှင့် ဆေးဝါး အကူများ လိုအပ်နေကြောင်း တိုက်ပွဲရှောင် တစ်ဦးဖြစ်သူ ဒေါ်အေးမြစိန်က CNI သတင်းဌာနသို့ ပြောသည်။

ထို့နောက် အဆိုပါ တိုက်ပွဲရှောင်စခန်းရှိ ကလေးငယ်များအတွက် ကျန်းမာရေး စောင့်ရှောက်မှုများလည်း လိုအပ် နေကြောင်း ၎င်းက ပြောသည်။

ဒေါ်အေးမြစိန်က “ခုလောလောဆယ်က စားဝတ်နေရေး အဆင်မပြေဘူး ၊ ဆန်ရယ်၊ ဆားရယ်၊ ဆီရယ် လိုတာ ပေါ့နော်။ ပြီးတော့ ကလေးတွေ နေမကောင်းဖြစ်တဲ့ အချိန်မှာလည်း ဆေးခန်းသွားရ လာရတာက အဝေးကြီး ဆိုတော့ မသွားနိုင်ဘူးပေါ့‌။ ဒီမှာ ဆေးရုံဆေးခန်းရှိရင် ပိုကောင်းတယ်၊ ဆေးရုံဆေးခန်း မရှိရင်တောင်မှ ဆေးတွေ ဘာတွေ လှူပေးရင်ပိုကောင်း လိမ့်မယ်လို့ ထင်တယ်” ဟု CNI သတင်းဌာနသို့ ပြောသည်။

ဝက်အင်းပေါက်တိုက်ပွဲရှောင်စခန်းကို တွေ့ရစဉ် (လှည်းကူးလူမှုပလက်ဖောင်း)

ဝက်အင်းပေါက် တိုက်ပွဲရှောင်စခန်းသည် ၂၀၁၉ ခုနှစ်၊ ဒီဇင်ဘာလထဲက ရှိနေခြင်းဖြစ်ပြီး မြိုလူမျိုး အများစု နေထိုင် ကာ ချင်း၊ ကရင် ၊ ဗမာ ၊ရခိုင် အစရှိသော တိုင်းရင်းသားများလည်း နေထိုင်ကြကြောင်း သိရသည်။

အဆိုပါ တိုက်ပွဲရှောင်များသည် ရခိုင်ပြည်နယ်တွင် တပ်မတော်နှင့် AA ကြား ၂၀၁၈ ခုနှစ်၊ နိုဝင်ဘာလမှ ၂၀၂၀ ခုနှစ်၊ စက်တင်ဘာလအထိ ဖြစ်ပွားသော တိုက်ပွဲများကြောင့် ထွက်ပြေး တိမ်းရှောင်လာခဲ့ကြသူများ ဖြစ်ကြသည်။

ထိုတိုက်ပွဲရှောင် စခန်းတွင် ၂၀၂၁ ခုနှစ်၊ သြဂုတ်လက လူဦးရေ ၇၀၀ ကျော်ရှိသော်လည်း လက်ရှိတွင် တိုးချဲ့ ကုက္ကိုလ်တောင်ဘက်သို့ တိုက်ပွဲရှောင် ပြည်သူတချို့ ပြောင်းရွှေ့သွားကြောင်း သိရသည်။
ထို့နောက် ၂၀၂၂ ခုနှစ်၊ မေလ စာရင်းအရ ဝက်အင်းပေါက် တိုက်ပွဲရှောင်စခန်းတွင် အိမ်ခြေ ၁၄၆ အိမ်ရှိပြီး လူဦီးရေ ၅၃၀ ဦး ရှိကြောင်း သိရသည်။

ဝက်အင်းပေါက်တိုက်ပွဲရှောင်စခန်းမှ ကလေးငယ်များကို တွေ့ရစဉ် (လှည်းကူးလူမှုပလက်ဖောင်း)

အဆိုပါ တိုက်ပွဲရှောင်များ နေထိုင်နေသော နေရာများသည် မြေပိုင်ရှင်များရှိကြောင်း၊ ထိုမြေပိုင်ရှင်များက ခေတ္တ နေခွင့်ပြုထား၍ နေထိုင်ရေးအတွက် အဆင်ပြေသော်လည်း စားသောက်ရေးအတွက် အခက်အခဲ ရှိနေကြောင်း ဝက်အင်းပေါက် တိုက်ပွဲရှောင်စခန်း၏ လက်ရှိတာဝန်ခံ ဦးကျော်လှထွန်းက ပြောသည်။

ဦးကျော်လှထွန်းက “အမှန်တော့ ကိုယ့်ဒေသ ကိုယ့်ရွာမှာတော့ ပြန်တော့ ပြန်ချင်ကြတာပေါ့၊ စိတ်တွေကလေ။ ဒါပေမယ့် အဲ့လိုဖြစ်လာပြီဆိုတော့ အသက်လုံခြုံရေး မရှိဘူးလေ၊ ဒါကြောင့် လူတွေက မပြန်ရဲတော့ဘူးပေါ့။ တချို့လူတွေကြတော့ ဘာပဲဖြစ်ဖြစ် လုံးဝမပြန်တော့ဘူး အဲ့လိုဖြစ်လာတယ်။ တချို့ကကြတော့ မီးမလောင်ဘဲ အဲ့လို ပြန်လေ့လာတဲ့လူတွေ ရှိတယ်။ သူတို့ကြတော့ ပြန်တဲ့လူတွေပြန်တယ်။ တစ်ရွာလုံး မီးလောင်တဲ့ ဟာတွေက တော့ အဲ့မှာကျ ပြန်သွားလို့ မရတော့ဘူး။ သွားလို့မရတော့ အဲ့လူတွေကျ မပြန်ရဲတော့ဘူး” ဟု CNI သတင်းဌာန သို့ ပြောသည်။၊

တိုက်ပွဲရှောင် စခန်းအတွင်းရှိသူများကို ကျန်းမာရေးနှင့် ပတ်သက်ပြီး အသိပညာပေး သင်တန်းပို့ချပေးရန် ပြင်ဆင်နေသော်လည်း ဆေးဝါးလိုအပ်ချက်၊ ငွေကြေး လိုအပ်ချက်များ ရှိနေသည့်အတွက် အကောင်အထည် မဖော်နိုင်သေးကြောင်း ၎င်းက ပြောသည်။

CNI News

၂၀၂၂ ခုနှစ်၊ စက်တင်ဘာ ၂

နစက၏ ငြိမ်းချမ်းရေးဆွေးနွေးရေးအဖွဲ့က ဆွေးနွေးသည့် ၂၀၀၈ ဖွဲ့စည်းပုံအခြေခံဥပဒေ ပြင်ဆင်ခြင်းအပေါ် RCSS ကိုယ်စားလှယ်အဖွဲ့က ပြန်လည် ဆွေးနွေးရန် အဆင်သင့် မဖြစ်သေးဟု ရှမ်းပြည်ပြန်လည်ထူထောင် ရေးကောင်စီ(RCSS/SSA)က စက်တင်ဘာ ၂ ရက်တွင် ထုတ်ပြန်ခဲ့သည်။

နစက၏ ငြိမ်းချမ်းရေး ဖိတ်ခေါ်မှုအရ ၂၀၂၂ ခုနှစ်၊ သြဂုတ် ၂၉ ရက်တွင် RCSS ဥက္ကဋ္ဌ ဗိုလ်ချုပ်ကြီးယွက်စစ် ဦးဆောင်သည့် ကိုယ်စားလှယ်အဖွဲ့သည် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့်လည်းကောင်း၊ နစက ၏ ငြိမ်းချမ်းရေးဆွေးနွေးရေးအဖွဲ့နှင့် သြဂုတ် ၃၀ ရက်မှ စက်တင်ဘာ ၁ ရက်နေ့အထိ လည်းကောင်း တွေ့ဆုံ ဆွေးနွေးခဲ့ကြသည်။

RCSS က “ ထိုသို့ တွေ့ဆုံဆွေးနွေးရာတွင် အနာဂတ် ဖက်ဒရယ် ပြည်ထောင်စုတည်ဆောက်ရေးဆိုင်ရာ အခြေ ခံမူများအပေါ် နှစ်ဖက် ရပ်တည်ချက်များနှင့် ပတ်သက်၍ ညှိနှိုင်းရန် အချိန်လိုအပ်ခြင်း၊ နိုင်ငံတော်ငြိမ်းချမ်းရေး ဆွေးနွေးရေးအဖွဲ့က ဆွေးနွေးသည့် ၂၀၀၈ ဖွဲ့စည်းပုံအခြေခံဥပဒေ ပြင်ဆင်ခြင်းအပေါ် RCSS ကိုယ်စားလှယ် အဖွဲ့က ပြန်လည်ဆွေးနွေးရန် အဆင်သင့်မဖြစ်ခြင်း၊ RCSS ၏ အဆိုပြုချက်များကိုလည်း ပြန်လည် ဆွေးနွေးရန် အတွက် နိုင်ငံတော်ငြိမ်းချမ်းရေး ဆွေးနွေးရေးအဖွဲ့က ပြင်ဆင်ချိန်လိုအပ်သဖြင့် နောင်တွေ့ဆုံပွဲများတွင် နှစ်ဖက် အဆိုပြုချက်များအား ဆက်လက် တွေ့ဆုံ ဆွေးနွေးညှိနှိုင်းသွားရန် သဘောတူ လက်မှတ်ရေးထိုးခဲ့သည်”ဟု ထုတ်ပြန်ချက်တွင် ပြောကြားထားသည်။

RCSS ကိုယ်စားလှယ်အဖွဲ့နဲ့ NSPNC ကိုယ်စားလှယ်အဖွဲ့ ဆွေးနွေးစဉ်

ထို့နောက် ၃ ရက်တာ တွေ့ဆုံ ဆွေးနွေးမှုတွင် လက်ရှိ နိုင်ငံရေး အထွေထွေ အကျပ်အတည်း ဖြေရှင်းရေး အတွက် RCSS ၏ ငြိမ်းချမ်းရေးလမ်းပြမြေပုံ၊ အနာဂတ် ဖက်ဒရယ် ပြည်ထောင်စု တည်ဆောက်ရေးဆိုင်ရာ RCSS ၏ ဖက်ဒရယ်အခြေခံမူများ၊ ယုံကြည်မှု တည်ဆောက်ရေးဆိုင်ရာ လုပ်ငန်းများ၊ ဒေသခံ ပြည်သူလူထု အတွက် ဖွံ့ဖြိုးရေးလုပ်ငန်းများ စသည့် အခြေအနေများကို RCSS ဥက္ကဋ္ဌ ဗိုလ်ချုပ်ကြီး ယွက်စစ် ဦးဆောင်သည့် ကိုယ်စားလှယ်အဖွဲ့က ဆွေးနွေးခဲ့သည်။

အလားတူ နစက၏ ငြိမ်းချမ်းရေးဆွေးနွေးရေးအဖွဲ့က ၂၀၀၈ ဖွဲ့စည်းပုံအခြေခံဥပဒေပါ ဇယား(၁) ပြည်ထောင်စု ဥပဒေပြုစာရင်း၊ ဇယား(၂) ပြည်နယ် သို့မဟုတ် တိုင်းဒေသကြီး ဥပဒေပြုစာရင်း၊ ပြည်ထောင်စု သဘောတူ စာချုပ် အစိတ်အပိုင်း(၁၊ ၂၊ ၃)ပါ သဘောတူညီချက်များအား ၂၀၀၈ ဖွဲ့စည်းပုံအခြေခံဥပဒေ၊ တည်ဆဲဥပဒေ များနှင့် ကိုက်ညီမှု ရှိ/မရှိ လေ့လာသုံးသပ်ချက်များနှင့် အခြား အကြောင်းအရာများကို ဆွေးနွေးရှင်းလင်းခဲ့ သည်ဟု RCSS က ထုတ်ပြန်ခဲ့သည်။

ဗိုလ်ချုပ်ကြီး ယွက်စစ်က ငြိမ်းချမ်းရေး ဆွေးနွေးပွဲများကို အလွတ်သဘော ဆွေးနွေးပွဲများလည်း ပြုလုပ်သင့်ကြောင်း၊ သူ့ဘက်ကိုယ့်ဘက် မျှမျှတတဖြစ်သည့် ဆွေးနွေးပွဲများ ဖြစ်ရန်လိုအပ်ကြောင်း၊ ပါဝင်သင့် ပါဝင်ထိုက် သူများ အားလုံးပါဝင်သော ဆွေးနွေးပွဲဖြစ်ရန်လည်း လိုအပ်ကြောင်း စက်တင်ဘာ ၁ ရက်နေ့က ဒုတိယဗိုလ်ချုပ် ကြီး ရာပြည့် ဦးဆောင်သော ကိုယ်စားလှယ်အဖွဲ့နှင့်တွေ့ဆုံစဉ် ပြောကြားခဲ့သည်။

RCSS သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)ကို လက်မှတ်ရေးထိုးထားသည့် ရှမ်းလက်နက်ကိုင် အဖွဲ့ဖြစ်သည်။

CNI News

၂၀၂၂ ခုနှစ်၊ စက်တင်ဘာ ၂

ငြိမ်းချမ်းရေး လုပ်ငန်းစဉ် ဦးဆောင်အဖွဲ့(PPST)၏ ဦးဆောင် နာယက အဖြစ် လက်ခံထားမှုကို ပြန်လည် ရုပ်သိမ်းပါကြောင်း ကရင်အမျိုးသားအစည်းအရုံး(KNU) ဥက္ကဋ္ဌ ဗိုလ်ချုပ်ကြီး စောမူတူးစေးဖိုးက ပြောသည်။

၂၀၂၂ ခုနှစ်၊ ဩဂုတ် ၃၁ ရက်နေ့က KNU ၏ ဗဟိုအလုပ်အမှုဆောင်ကော်မတီ အစည်းအဝေး ကျင်းပခဲ့ရာ PPST ၏ ဦးဆောင်နာယကအဖြစ် တာဝန်မယူသင့်ကြောင်း ဆုံးဖြတ်ခဲ့သည်ကို လိုက်နာခဲ့သည်ဟု PPST သို့ ပေးပို့သော စာတွင် ဖော်ပြထားသည်။

PPST က အဖွဲ့အစည်းကို ကိုယ်စားမပြုဘဲ ပုဂ္ဂိုလ်ရေးအရ ဦးဆောင်နာယကအဖြစ် တာဝန်ယူပေးရန် ကမ်း လှမ်းခဲ့ခြင်းကို လက်ခံကြောင်း KNU ဥက္ကဋ္ဌ ဗိုလ်ချုပ်ကြီးစောမူတူးစေးဖိုးက ဩဂုတ် ၄ ရက်နေ့စွဲဖြင့် PPST ထံ စာပေးပို့ခဲ့သည်။

ဗိုလ်ချုပ်ကြီးစောမူတူးစေးဖိုး (EPA)

ဗိုလ်ချုပ်ကြီး စောမူတူးစေးဖိုးက "ကျနော်၏ ကိုယ်ပိုင်သဘောထား ဆုံးဖြတ်ချက်ဖြင့် အဖွဲ့အစည်းကိုယ်စားမပြု ဘဲ ပုဂ္ဂိုလ်အရလွတ်လပ်စွာ ပါဝင်ရန် ပြန်ကြားစာပေးပို့ခဲ့သော်လည်း ဩဂုတ် ၃၁ ရက်တွင် ကျင်းပသော KNU ဗဟိုအလုပ်အမှုဆောင်ကော်မတီ အစည်းအဝေးတွင် ကျနော်သည် PPST ၏ ဦးဆောင်နာယကအဖြစ် တာဝန် မယူသင့်ကြောင်း ဆုံးဖြတ်ခဲ့ပါသည်”ဟု PPST သို့ ပေးပို့သော စာတွင် ဖော်ပြထားသည်။

ထို့နောက် KNU ၏ ဥက္ကဋ္ဌတစ်ဦးဖြစ်သော ကျနော်သည် ဒီမိုကရေစီစနစ်ကို လက်ခံယုံကြည်သူဖြစ်ပြီး KNU က ချမှတ်ထားသော ဖွဲ့စည်းပုံအခြေခံဉပဒေ၊ နည်းဉပဒေများကို တာဝန်ခံထိန်းသိမ်းရန် တာဝန်ရှိသည့်အလျောက် ပုဂ္ဂိုလ်ရေးအမြင်ထက် အဖွဲ့အစည်း၏ “မူ”၊ လမ်းစဉ်အား ဦးစားပေး ရှေ့ဆောင်မှုပြုရန် ရည်ရွယ်၍ PPST ၏ ဦးဆောင်နာယက အဖြစ် တာဝန်ယူရန် သဘောတူသည့် ပေးစာအား ပြန်လည် ရုပ်သိမ်းပါကြောင်း ဗိုလ်ချုပ်ကြီး စောမူတူးစေးဖိုးက PPST သို့ စာတစ်စောင် ပေးပို့ခဲ့သည်။

ဗိုလ်ချုပ်ကြီးစောမူတူးစေးဖိုးကို NCA-S EAO Summit မှာတွေ့ရစဉ် (NCA-S EAO)

ဗိုလ်ချုပ်ကြီးစောမူတူးစေးဖိုးသည် PPST ကို စတင် ဖွဲ့စည်းသည့် ၂၀၁၇ ခုနှစ်မှ ၂၀၁၉ ခုနှစ်အထိ ဥက္ကဋ္ဌအဖြစ် တာဝန်ယူပြီးနောက် နုတ်ထွက်သွားခဲ့သည်။

လက်ရှိတွင် PPST ကို ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)၊ ရခိုင်ပြည်လွတ်မြောက်ရေးပါတီ(AL P)၊ လားဟူဒီမိုကရက်တစ် အစည်းအရုံး (LDU)၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ် တပ်ဦး (ABSDF)၊ ဒီမိုကရေစီအကျိုးပြုကရင်တပ်မတော်(DKBA)၊ ကရင်အမျိုးသားအစည်းအရုံး/ကရင်အမျိုးသား လွတ်မြောက်ရေးတပ်မတော်- ငြိမ်းချမ်းရေးကောင်စီ(KNU/KNLA-PC)၊ မွန်ပြည်သစ်ပါတီ(NMSP)တို့ဖြင့် ဖွဲ့စည်း ထားသည်။

ကျန် ရှမ်းပြည်ပြန်လည်ထူထောင်ရေးကောင်စီ(RCSS/SSA)၊ ကရင်အမျိုးသားအစည်းအရုံး(KNU)၊ ချင်းအမျိုး သားတပ်ဦး(CNF)တို့က အဖွဲ့အဝင်များအဖြစ် ပါဝင်မှုကနေ ရပ်နားထားကြောင်း သိရသည်။