CNI News

၂၀၂၃ ခုနှစ်၊ နိုဝင်ဘာ ၂၀

ပလောင်ပြည်လွတ်မြောက်ရေးတပ်ဦး (PSLF/TNLA) ကို မြန်မာ့တပ်မတော်အနေဖြင့် အဆိပ်ငွေ့ဗုံးဖြင့် တိုက်ခိုက် ခဲ့ခြင်း မရှိကြောင်း နစကသတင်းထုတ်ပြန်ရေး အဖွဲ့ခေါင်းဆောင် ဗိုလ်ချုပ်ဇော်မင်းထွန်းက နိုဝင်ဘာ ၁၉ ရက်က ထုတ်ပြန် ပြောကြားခဲ့သည်။

နိုဝင်ဘာ ၁၈ ရက်နေ့က ရှမ်းပြည်နယ်မြောက်ပိုင်း နမ့်ခမ်းမြို့နယ် မြန်မာ့တပ်မတော်၏ စခန်းသစ် လက်နက်ကြီး ကုန်းအား TNLA က ရယူစိုးမိုးထားစဉ် တပ်မတော်မှ အဆိပ်ငွေ့ဗုံးဖြင့် တိုက်ခိုက်ခဲ့ကြောင်း TNLA က နိုဝင်ဘာ ၁၉ ရက်မှာ ထုတ်ပြန်ခဲ့သည်။

ထို့အတူ နိုဝင်ဘာ ၄ ရက်က လားရှိုးမြို့နယ် မိုင်းကျက်တပ်စခန်း တိုက်ပွဲအတွင်း မြန်မာ့တပ်မတော်ဘက်မှ  အဆိပ်ငွေ့ဗုံးကို အသုံးပြုခဲ့ကြောင်း ဖော်ပြထားသည်။

TNLA တပ်ဖွဲ့များကို တွေ့ရစဉ်

ဗိုလ်ချုပ်ဇော်မင်းထွန်းက “ကျနော်တို့ မနေ့တုန်းက ပြောခဲ့တဲ့ နမ့်ခမ်း၊ နမ့်ခမ်းမှာဆိုရင် ကာကင်းကုန်းကို တိုက်ခိုက်ခဲ့တယ်၊ တပ်မတော်က ပြန်လည်တိုက်ခိုက်တယ်၊ ပြန်လည်တိုက်ခိုက်တာမှာ TNLA အနေနဲ့ အကျ အဆုံး များစွာရှိခဲ့တယ်၊ ထုံးစံအတိုင်းပါပဲ သူတို့အကျအဆုံးရှိပြီဆိုရင် တော်တော်လေး အကျအဆုံးများတယ်၊ TNLA အနေနဲ့ သူတို့အကျအဆုံးရှိပြီ ယခင်တုန်းကတိုင်း သုံးနေကျအသံပေါ့ ထွက်လာတယ်၊ အဆိပ်ဓာတ်ငွေ့နဲ့ တိုက်ခိုက်တယ်တို့၊ ဘာတို့ ဒါတွေ တွေ့ရတာ ဖြစ်ပါတယ်၊ နစလမှာ ရှိနေတဲ့ တပ်ရင်း၊ တပ်ခွဲတွေအနေနဲ့ နမ့်ခမ်း မှာ ရှိနေတဲ့ ရှေ့တန်းလုံခြုံရေး စခန်းအနေနဲ့ ရန်သူကို ရွပ်ရွပ်ချွံချွံ ခုခံတိုက်ခိုက် တန်ပြန်ချေမှုန်းခဲ့တဲ့အတွက် ရန်သူ အကျအဆုံးများစွာ ရှိပါတယ်။ ဒီအတွက်လည်း ကြံ့ကြံ့ခံ ခုခံ တန်ပြန်တိုက်စစ် ဆောင်ရွက်ခဲ့တဲ့ အရာရှိ၊ စစ်သည်၊ ရဲမေအားလုံးကို နိုင်ငံတော်အကြီးအကဲ၊ တပ်မတော်အကြီးအကဲများ အားလုံးက အသိအမှတ်ပြု ဂုဏ်ယူ ကြောင်း ပြောကြားလိုပါတယ်” ဟု ပြောသည်။
မြန်မာ့တပ်မတော် အနေဖြင့် ကျူးကျော်သူများကို ချေမှုန်းသွားမည်ဖြစ်သလို နယ်မြေတည်ငြိမ်ရေး လုပ်ဆောင် သွားမည်ဟု ဗိုလ်ချုပ်ဇော်မင်းထွန်းက ထုတ်ပြန်ပြောကြားထားသည်။

နိုင်ငံတကာမှ တားမြစ်ပိတ်ပင်ထားသည့် အဆိပ်ငွေ့ဗုံးဖြင့် တိုက်ခိုက်ခဲ့သော တပ်မတော်ကို အိမ်နီးချင်းနိုင်ငံ အပါအဝင် နိုင်ငံတကာမှ အရေးယူရန် TNLA က တောင်းဆိုထားသည်။

အဆိုပါ တိုက်ခိုက်မှုကြောင့် TNLA ရဲဘော်အချို့သည် ပုံစံတူ အဆိပ်သင့်ပြီး ခန္ဓာကိုယ်တွင် ထိရှဒဏ်ရာ တစ်စုံတစ်ရာ မရရှိဘဲ မူးဝေခြင်း၊ အသက်ရှုမြန်ဆန်ခြင်း၊ မအီမသာခံစားရခြင်း၊ စိတ်လှုပ်ရှား မြန်ဆန်ခြင်း၊ မောပန်းခြင်း၊ အောက်စီဂျင် ကျခြင်းများကို ပြင်းထန်စွာ ခံစားနေကြရကြောင်း၊ ထိုရဲဘော်များကို TNLA ကျန်းမာရေးဌာနက ဆေးဝါးကုသမှု ပေးနေကြောင်း ဖော်ပြထားသည်။

TNLA ရဲ့ ထုတ်ပြန်ချက်ကို တွေ့ရစဉ်

အဆိပ်ငွေ့ဗုံး အသုံးပြုသည်ဟု ပြောဆိုချက်နှင့် ပတ်သက်၍ သက်သေပြနိုင်ရန် ခက်ခဲကြောင်း၊ သို့သော်လည်း တပ်မတော်အနေဖြင့် အသုံးပြု၍ရသော လက်နက်မှန်သမျှ အသုံးပြုတိုက်ခိုက်တိုက်ခိုက်သွားမှာဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “ဒီဟာနဲ့ ပတ်သက်လို့ကတော့ ပြောဖို့ အခက်အခဲရှိပါတယ်။ ဒါပေမဲ့ စစ်ကောင်စီကတော့ သုံးလို့ ရသမျှ လက်နက်မှန်သမျှ သုံးမှာပါပဲ၊ ဟိုတလောကလည်း ကလပ်စတာဗုံးတွေ သုံးတယ်လို့တော့ ပြောတာပေါ့ဗျာ၊ ဒါပေမဲ့ အဲဒီဟာက နည်းပညာနဲ့ ပတ်သက်တဲ့ အချက်အလက် အထောက်အထား မတွေ့ရှိရပါဘူး။ သက်ရောက်မှု အပေါ်မှာ ကျနော်တို့ ထင်ကြေးပေးနိုင်တာပဲရှိပါတယ်။ KIA ဒုက္ခသည်စခန်းကို ပစ်ချလိုက်တဲ့ ဗုံးကိုလည်း ဒီနေ့ အထိ ကျနော်တို့ ဘာဗုံးလဲဆိုတာ ဖော်ထုတ်လို့ မရသေးပါဘူး။ ဒါကြောင့် အဲဒီကိစ္စတွေနဲ့ ပတ်သက်လို့ရှိရင် ကျနော် ထင်မြင်ချက်ပေးဖို့ အခက်အခဲရှိတဲ့အကြောင်း ရှင်းပြတာပါ”ဟု ပြောသည်။

TNLA သည် ညီနောင်မဟာမိတ်များဖြစ်ကြသော ရက္ခိုင့်တပ်တော်(ULA/AA)၊ မြန်မာအမျိုးသား ဒီမိုကရက်တစ် တပ်မတော် (MNDAA) တို့ဖြင့် ၁၀၂၇ စစ်ဆင်ရေးကို ရှမ်းပြည်နယ်မြောက်ပိုင်းတွင် ဖော်ဆောင်လျက်ရှိပြီး မြန်မာ့ တပ်မတော်နှင့် တိုက်ပွဲများ ဖြစ်ပွားလျက်ရှိနေသည်။