CNI News

၂၀၂၂ ခုနှစ်၊ စက်တင်ဘာ ၂၂

ရခိုင်ပြည်နယ် မြောက်ပိုင်းဒေသများတွင် တပ်မတော်နှင့် ရက္ခိုင့်တပ်တော် ULA/AA တို့အကြား တိုက်ပွဲ ဖြစ်ပွားခြင်းနှင့် စစ်ရေးတင်းမာမှုတို့ကြောင့် ကန့်သတ်ပိတ်ပင်မှု အများအပြားရှိလာသဖြင့် ဒေသခံများမှာ စားဝတ်နေရေးအပါအဝင် ဘက်ပေါင်းစုံ၌ ဒုက္ခကြုံတွေ့နေကြရသည်ဟု ရခိုင်ပြည်သူများထံမှ သိရသည်။

ယခုကဲ့သို့ ကန့်သတ်ပိတ်ပင်ခြင်းများ လုပ်ဆောင်ခြင်းသည် ပြည်သူများ အဆင်ပြေပါက AA အဆင်ပြေသည်ဟု မှတ်ယူပြီး ဒေသခံပြည်သူများအား ပိတ်ပင်ခြင်းဖြစ်သည်ဟု ရခိုင်ပြည်နယ် မြောက်ဦးမြို့ဒေသခံ ကိုဇော်ထွန်းက CNI သတင်းဌာနသို့ ပြောသည်။

“မြောက်ဦးမြို့ကတော့ နေရာပေါင်းစုံမှာ သူတို့အစစ်အဆေးတွေ လုပ်တယ်။ ကားရော၊ ဆိုင်ကယ်ရော၊ လူရော။ စီးပွားရေးကအစ နေထိုင်ရေးကအစ သိပ်ဒုက္ခရောက်တယ် ဒီတလောတော့။ ပြေလည်ဖို့ဆိုတာ သိပ်မရှိတော့ဘူး ကြည့်ရတာလေ။ သူတို့ကလည်း နောက်ဆုတ်မယ့် အခြေအနေမျိုး မရှိဘူး။ သူတို့အချင်းချင်း မလုပ်နိုင်တဲ့အခါ ကျတော့ ဒေါက်တိုင်တွေကို သူတို့ဖြုတ်ချချင်တဲ့ သဘောပေါ့။ ဒီပြည်သူတွေ အဆင်ပြေလို့ AA အဆင်ပြေတယ် ပေါ့လေ။ အဲဒီသဘောနဲ့ ဗျူဟာတစ်ခုနဲ့ အဲဒီလိုဒုက္ခပေးတဲ့ပုံစံမျိုးလို့ ကျနော်နားလည်တယ်။ ပြည်သူကတော့ ဆုံးရှုံးစရာမရှိတဲ့အချိန်ကို ရောက်လာပြီ။ ဘာလို့လဲဆိုရင် ကိုယ့်အလုပ် ကိုယ်မလုပ်နိုင်၊ ကိုယ့်စီးပွား ကိုယ်မလုပ် နိုင်၊ ကိုယ့်အိမ်မှာကိုယ် ပျော်ပျော်ရွှင်ရွှင်နဲ့ မိသားစုနဲ့ မနေနိုင်။ ဒါမျိုးက နေ့စဉ်ရက်ဆက်ဆိုသလို ဖြစ်လာတာကို။ ပြည်သူတွေ အခက်အခဲက လမ်းပန်းဆက်သွယ်ရေးကို သူတို့ စစ်ဆေးတာတွေကို ဘာမှမဆိုင်တဲ့နေရာတွေမှာ ဥပမာ မြို့ပေါ် ရပ်ကွက်တွေမှာ သူတို့လုပ်ချင်တိုင်းလုပ်နေတဲ့ ကိစ္စမျိုးတွေကို သူတို့ရပ်တန့်ဖို့လိုတယ်။ ပြီးရင် ကုန်သွယ်ရေးလမ်းကြောင်းတွေကိုလည်း သူတို့ ပြန်ဖွင့်ပေးဖို့လိုမယ်”ဟု ၎င်းက ပြောသည်။

ထို့အပြင် INGO/NGO အဖွဲ့အစည်းများအား ရခိုင်ပြည်နယ်မြောက်ပိုင်းမှ ၆ မြို့နယ်သို့ ကူညီထောက်ပံ့ခြင်းနှင့် ခရီးသွားလာခြင်းကို ကန့်သတ်ထားသည့်အတွက် စားနပ်ရိက္ခာအခက်အခဲများ ကြုံတွေ့နေရကြောင်း ဝံလက် ဖောင်ဒေးရှင်းမှ ဒါရိုက်တာ ဦးခိုင်ကောင်းစံ က CNI သတင်းဌာနသို့ ပြောသည်။

ရခိုင်ပြည်နယ်အတွင်းရှိ လက်ရှိတိုက်ပွဲရှောင်များ၏အခြေအနေ(ဓါတ်ပုံ-သဘာဝနဒီဆရာတော်)

“ဒီလကုန်ရင်တော့ ဘယ်လိုဖြစ်မယ်ဆိုတာတော့ မသိသေးဘူး။ ပြီးခဲ့တဲ့လက ရရှိထားတဲ့ ရိက္ခာတွေ၊ ထောက်ပံ့ ထားတာတွေနဲ့ပဲ အခုလောလောဆယ် စားသောက်နေကြရတာပေါ့။ ပြည်တွင်း အရပ်ဖက် အဖွဲ့အစည်းတွေ ကလည်း မလှူဒါန်းနိုင်ဘူးပေါ့ တကယ်တမ်းပြောရရင်။ အခိုက်အတန့်အားဖြင့်သာ မြို့ပေါ်ရောက်လာတဲ့ IDP တွေလောက်ပဲ လှူဒါန်းနိုင်ကြတာပေါ့။ လှူဒါန်းတယ်ဆိုတာကလည်း အလှူခံလို့ရတဲ့အခါမှပေါ့။ ဒေသမှာ အလှူခံဖို့ဆိုတာကလည်း အခက်အခဲရှိတယ်။ နောက် အရင်တုန်းကတော့ တချို့အဖွဲ့အစည်းတွေ မြို့ပေါ်မှာ အလှူခံတာရှိတယ်။ အဲဒါကတော့ ဟန့်တားတာတွေလည်း ရှိတာပေါ့။ ပြည်ပရောက်နေတဲ့ တိုင်းရင်းသားတွေရဲ့ လှူဒါန်းမှုဆိုတာကလည်း အရင်က ရခိုင်တစ်ခုတည်းဖြစ်တဲ့အခါကျတော့ အကုန်ဝိုင်းပြီးလှူကြတာပေါ့။ အခုကျတော့ နေရာတိုင်းလိုလို ဖြစ်နေတဲ့အခါကျတော့ ပြည်ပကအလှူရှင်တွေရဲ့ အလှူငွေကလည်း ရေရှည် ရပ်တည်လို့ရတဲ့ဟာမဟုတ်ဘူး။ နိုင်ငံတကာ လူသားချင်းစာနာတဲ့အဖွဲ့အစည်းတွေ၊ အရပ်ဖက်အဖွဲ့အစည်းတွေက စနစ်တကျလုပ်ဆောင်တဲ့ နိုင်ငံတကာအဖွဲ့အစည်းတွေနဲ့ ပူးပေါင်းလုပ်ဆောင်မှသာ အဆင်ပြေမယ့်သဘောမှာ ရှိနေတာပေါ့” ဟု ၎င်းက ပြောသည်။

တိုက်ပွဲရှောင်စခန်းများတွင် ဆေးဝါး၊ အဝတ်အထည်စသည်တို့ကအစ ပြတ်လပ်နေသည့်အတွက် လူသားချင်း စာနာထောက်ပံ့မှု အကူအညီတွေ အရေးပေါ်လိုအပ်နေသည့်အတွက်ကြောင့် INGO/NGO အဖွဲ့အစည်းတွေ၊ အရပ်ဖက် လူမှုအဖွဲ့အစည်းများအနေဖြင့် အဖွဲ့လိုက်ဖြစ်စေ၊ လူပုဂ္ဂိုလ်လိုက်ဖြစ်စေ လာရောက်လှူဒါန်းပေးရန် အထူးအလေးထားတိုက်တွန်းလိုကြောင်း AA ပြောရေးဆိုခွင့်ရှိသူ ဦးခိုင်သုခက စက်တင်ဘာ ၁၉ ရက်နေ့က ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။

လက်ရှိတွင် ရခိုင်ပြည်နယ်အတွင်း ကန့်သတ်ပိတ်ပင်ထားမှုများကြောင့် ဒေသတွင်း၌ ကုန်ဈေးနှုန်းများ မြင့်တက် လျက်ရှိပြီး ယခင်ကထက် နှစ်ဆခန့်မြင့်တက်နေကြောင်း ရခိုင်ပြည်သူများက CNI သတင်းဌာနသို့ ပြောသည်။

ရခိုင်ပြည်နယ်အတွင်းရှိ လက်ရှိတိုက်ပွဲရှောင်များ၏အခြေအနေ(ဓါတ်ပုံ-သဘာဝနဒီဆရာတော်)

မောင်တောဒေသခံ ကိုမောင်မောင်ထွန်းက “ကျနော်တို့ မောင်တောမြောက်ပိုင်း၊ တောင်ပိုင်းပြည်သူတွေ ဘယ်မှ သွားလို့မရဘူး။ စားနပ်ရိက္ခာပိုင်းဆိုင်ရာလည်း တော်တော်လေး အခက်အခဲဖြစ်နေတာပေါ့။ ကျနော်တို့ ဒီနေ့နဲ့ ဆိုရင် တစ်လကျော်လောက်ဖြစ်သွားပြီ။ စကစက လမ်းတွေပိတ်ထားတာလေ။ ဆန်တို့ ဆီတို့ စားကုန်တွေ ဘာမှမသယ်ရဘူး။ စစ်ဖြစ်တဲ့နေရာဆိုရင် စစ်ဖြစ်တဲ့နေရာက စစ်ဘေးရှောင်တွေလည်း ဘယ်မှသွားလို့မရဘူး။ အခုဖြေရှင်းနေရတာက ဟိုဘက် ဒီဘက် မရှိတဲ့လူက ရှိတဲ့လူဆီကနေ တောင်းစား ဒီလိုမျိုးဖြစ်နေတာပေါ့။ ဒီကုန်ဈေးနှုန်းအနေအထားမှာဆိုရင်လည်း တော်တော်လေး ဈေးတက်နေတာပေါ့။ အခုရှိတဲ့လူလည်း ပိုက်ဆံ ပေးပြီးတော့ ဝယ်လို့မရတဲ့ဟာတွေ အများကြီးပေါ့။ ကူညီကယ်ဆယ်ရေးတွေကျတော့လည်း ဘယ်မှ မသွားရဘူး အဲဒီလိုဖြစ်နေတာပေါ့။ကျနော်တို့ ပြည်သူလူထုတွေ လမ်းတွေသွားလာရေး၊ စားဝတ်နေရေး အခက်အခဲကြောင့်နဲ့ ဆန်တို့ ဆီတို့ တင်သွင်းရချင်တာပေါ့နော်။ ဒီလိုဖြစ်နေတာကတစ်ပိုင်း။ ကျနော်တို့ ပြည်သူလူထုက အခု ဒီလိုမျိုး နှိပ်စက်ရာကျနေတာပေါ့” ဟု ပြောသည်။

လက်ရှိတွင် ရခိုင်ပြည်နယ်အတွင်းရှိ မောင်တော၊ ဘူးသီးတောင်၊ ရသေ့တောင်၊ ကျောက်တော်၊ မြောက်ဦးနှင့် ချင်းပြည်နယ် ပလက်ဝမြို့နယ်တို့၌ တပ်မတော်နှင့် AA အကြား နှစ်ဖက်တိုက်ပွဲဖြစ်ပွားမှုများရှိနေကြောင်း ရခိုင်ပြည်နယ်အခြေစိုက်သတင်းဌာနများ၏ ရေးသားဖော်ပြချက်များအရ သိရသည်။

၎င်းတိုက်ပွဲများကြောင့် နေရပ်စွန့်ခွာကာ ဘေးလွတ်ရာသို့ ထွက်ပြေးတိမ်းရှောင်လာကြသည့် တိုက်ပွဲရှောင် ဦးရေ မှာလည်း ပိုမိုများပြားလာကာ လက်ရှိအချိန်ထိ တိုက်ပွဲရှောင် တစ်သောင်းကျော်ခန့် ရှိလာကြောင်း အရပ်ဖက် အဖွဲ့အစည်းများ၏ စာရင်းများအရ သိရသည်။

ဒေသခံများ ထွက်ပြေးတိမ်းရှောင်ကြရာတွင် ယခင်ရှိနေသည့် တိုက်ပွဲရှောင်စခန်းများသို့ ထွက်ပြေးတိမ်းရှောင်သူ များ ရှိသကဲ့သို့ အနီးရှိ ဘုန်းကြီးကျောင်းများ၊ စာသင်ကျောင်းများသို့ ထွက်ပြေးတိမ်းရှောင်သူများလည်းရှိကြောင်း အရပ်ဖက်အဖွဲ့အစည်းများထံက သိရသည်။

CNI News

၂၀၂၂ ခုနှစ်၊ စက်တင်ဘာ ၂၂

စစ်ကိုင်းတိုင်းဒေသကြီးနှင့် ကချင်ပြည်နယ်အတွင်းရှိ ရှမ်းနီဒေသများရှိ ရှမ်းနီလူမျိုးများသည် ကချင်လွတ်လပ် ရေးတပ်မတော်(KIO/KIA)၏ လူမျိုးသုဉ်းသတ်ဖြတ်မည့် ကြိုးပမ်းဆောင်ရွက်နေမှုများဖြင့် ရင်ဆိုင်နေရခြင်း ကြောင့် ပြည်တွင်း/ပြည်ပက လူ့အခွင့်အရေးအဖွဲ့အစည်းများက တားဆီးပေးရန် ရှမ်းနီအမျိုးသားများတပ်မ တော် (SNA)က စက်တင်ဘာ ၂၁ ရက်နေ့စွဲဖြင့် ထုတ်ပြန်ထားသည်။

SNA ထုတ်ပြန်ချက် 

SNA ထုတ်ပြန်ချက်

SNA ထုတ်ပြန်ချက်

CNI News

၂၀၂၂ ခုနှစ်၊ စက်တင်ဘာ ၂၁

ရှမ်းပြည်နယ်တောင်ပိုင်း၊ မိုင်းနောင်၊ မိုင်းရဲအုပ်စု နမ့်တောင်းတံတားအနီးတွင် ရှမ်းပြည်တိုးတက်ရေးပါတီ(SSP P/SSA)နှင့် ရှမ်းပြည်ပြန်လည်ထူထောင်ရေးကောင်စီ(RCSS/SSA)တို့ ယနေ့ (စက်တင်ဘာ ၂၁ ရက်)တွင် တိုက်ပွဲ ဖြစ်ပွားခဲ့ကြသည်။

RCSS သည် လဲချား- မိုင်းနောင် ကားလမ်း၏ အရှေ့ဘက်တွင် လှုပ်ရှားနေပြီး SSPP ကမူ ကားလမ်း၏ အနောက်ဘက်၌ လှုပ်ရှားလျက်ရှိသည်။

SSPP က “ စက်တင်ဘာ ၂၁ ရက်နေ့ နံနက် အစောပိုင်းအချိန်မှာ လဲချား- မိုင်းနောင် ကားလမ်းရဲ့ အရှေ့ဘက် မှာ လှုပ်ရှားနေတဲ့ RCSS တပ်ဖွဲ့သည် SSPP/SSA လှုပ်ရှားနေတဲ့ ကားလမ်းရဲ့ အနောက်ဘက်ထဲထိကို အင်အား ၂၀ ဝန်းကျင်လောက်နဲ့ ဝင်ရောက်လာပြီး RCSS ဘက်က စတင်ပစ်ခတ်လို့ နံနက် ၇ နာရီ ၃၀ မိနစ်က နေ ၇ နာရီ ၄၈ မိနစ်အထိ မိုင်းနောင် မိုင်းရဲအုပ်စု နမ့်တောင်းတံတားအနီးမှာ နှစ်ဖက် ထိတွေ့တိုက်ပွဲဖြစ်ပွားခဲ့ သည်”ဟု ထုတ်ပြန်ခဲ့သည်။

SSPP ဒုဥက္ကဋ္ဌ(၁) စဝ်ခေးတိုင်းနှင့် ဗိုလ်ချုပ်မှူးကြီးမင်းအောင်လှိုင်

ထို့နောက် RCSS သည် မိုင်းနောင်-လဲချား ကားလမ်း၏ အရှေ့ဘက်သို့ ပြန်ဆုတ်သွား၍ တိုက်ပွဲပြန်ငြိမ်သွား ကြောင်း၊ တိုက်ပွဲအတွင်း နှစ်ဖက် ထိခိုက် သေဆုံးမှုမရှိကြောင်း SSPP က ထုတ်ပြန်ခဲ့သည်။

SSPP သည် ရှမ်းပြည်နယ်မြောက်ပိုင်း၊ မိုးမိတ်မြို့နယ်အတွင်းမှာ စက်တင်ဘာ ၁၇ ရက်နှင့် ၂၀ ရက်နေ့များက မြန်မာ့တပ်မတော်နှင့် တိုက်ပွဲဖြစ်ပွားခဲ့သေးပြီး ယနေ့အထိ စစ်ရေးတင်းမာလျက်ရှိကြောင်း သိရသည်။

SSPP သည် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ၂၀၂၂ ခုနှစ်၊ သြဂုတ် ၄ ရက်နေ့က နေပြည်တော် မှာ တွေ့ဆုံ၍ ငြိမ်းချမ်းရေးလုပ်ငန်းစဉ်များကို ဆွေးနွေးခဲ့သည်။ ထို့နောက် ဒုတိယအကြိမ်ကို ယခုလထဲမှာ တွေ့ ဆုံ ဆွေးနွေးမည်ဖြစ်သည်။

SSPP သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)မထိုးရသေးသည့် ရှမ်းလက် နက်ကိုင် အဖွဲ့ဖြစ်ပြီး RCSS ကမူ NCA ထိုးထားသော ရှမ်းလက်နက်ကိုင်အဖွဲ့ဖြစ်သည်။

CNI News

၂၀၂၂ ခုနှစ်၊ စက်တင်ဘာ ၂၁

ရှမ်းပြည်နယ်တောင်ပိုင်းရှိ ကယား(ကရင်နီ)ပြည်နယ်အစပ်က မိုးဗြဲမြို့အတွင်းမှာ ကရင်နီလက်နက်ကိုင်အဖွဲ့များ နှင့် မြန်မာ့တပ်မတော်ကြား တိုက်ပွဲများ ပြင်းထန်စွာဖြစ်ပွားခဲ့ရာ မိုးဗြဲမြို့အတွင်း၌ ဒေသခံ ၅၀၀ နီးပါး ပိတ်မိနေ၍ ကျန်ရှိနေကြောင်း ကရင်နီလူ့အခွင့်အရေးအဖွဲ့မှ ကိုဗညားက CNI သတင်းဌာနသို့ ပြောသည်။

ပြီးခဲ့သည့် စက်တင်ဘာ ၈ ရက်နေ့က စတင်ကာ တပ်မတော်နှင့် ကရင်နီအမျိုးသား ကာကွယ်ရေးတပ်ဖွဲ့ (KNDF)၊ ကရင်နီတပ်မတော်(KA) အပါအဝင် ကယားပြည်နယ်အတွင်းက PDF ပူးပေါင်းတပ်ဖွဲ့ကြား တိုက်ပွဲဖြစ်ပွားခဲ့ကြသည်။

ထို့နောက် မြို့နေလူထုများ နီးစပ်ရာ ဆွေမျိုး အသိုင်းအဝိုင်းများထံသို့ လည်းကောင်း၊ လွိုင်ကော်မြို့ပေါ်သို့ လည်းကောင်း တိမ်းရှောင်ခဲ့ကြသည်။

ကိုဗညားက “ကျ‌‌နော်တို့ တွက်ထားတာလေ၊ အနည်းဆုံး လူထု အပါအဝင် အားလုံးကျန်မယ်ဆိုရင်တော့ ၄၊ ၅ ရာတော့ ကျန်နိုင်ပါသေးတယ်၊ ဘာဖြစ်လို့လဲဆိုတော့ တိုက်ပွဲ ဒီလ ၈ ရက်နေ့ကတည်းကနေ စတဲ့ဟာက ပထမ ပိုင်းက လူတော်တော်လေး စွန့်ခွာခဲ့ရတာကိုနော်၊ ပြီးတော့ ဒုတိယအကြိမ်က ၁၂ နေ့မှာ သူတို့ နားလိုက်တယ်၊ ပြီးတော့မှ ၁၅ ဝန်းကျင်မှာ ပြန်ထိုးလာတယ်ပေါ့နော်၊ ၁၅ ဝန်းကျင်မှာ ပြန်ထိုးတဲ့ အချိန်မှာလည်း တစ်ဖက် တော်လှန်ရေး အင်အားစုတွေက သက်ဆိုင်ရာ လူတွေကို ရွှေ့ခိုင်းဖို့အတွက်ပေါ့နော်၊ ရွာသားတွေ ရွှေ့ခိုင်းဖို့ အတွက် ပြောပါတယ်၊ အစကတည်းက သူတို့ ရွှေ့ထားတာရှိပါတယ်၊ မရှိဘူးဆိုရင်‌တောင် သေချာတာ တစ်ခု ကတော့ ၄၊ ၅ ရာကတော့ မြို့တချို့ရပ်ကွက်မှာ ကျန်နေတာရှိပါတယ်” ဟု ပြောသည်။

မိုးဗြဲတိုက်ပွဲရှောင်များ (ကရင်နီပြည်စစ်ဘေးရှောင်ကူညီစောင့်ရှောက်ရေးကွန်ရက်)

အဆိုပါ တိုက်ပွဲကြောင့် အရပ်သား ထိခိုက်သေဆုံးမှုရှိခဲ့ပြီး မိုးဗြဲမြို့နယ်မှ ဒေသခံ လေးထောင်(၄၀၀၀) ကျော်မှာ ဘေးလွတ်ရာသို့ ထွက်ပြေးတိမ်းရှောင် နေရကြောင်း သိရသည်။

လက်ရှိတွင် လွိုင်ကော်မြို့သို့ ရောက်ရှိလာသော မိုးဗြဲတိုက်ပွဲရှောင်များမှာ ၎င်းတို့၏ နီးစပ်ရာ ဆွေမျိုးများ၊ ဘုန်းတော်ကြီးကျောင်းများတွင် ခိုလှုံနေကြကြောင်း ရွှေလွိုင်ကော် (ကယား) ပရဟိတအသင်း နာယက (၁) ဦးသန်းစိုးက CNI သတင်းဌာနသို့ ပြောသည်။

၎င်းက “တချို့လည်း လွိုင်ကော်ပြောင်း၊ တချို့လည်း ဖယ်ခုံဖက် ပြောင်းပေါ့၊ အဲဒီလို သွားကြတာပေါ့၊ အဲဒီလို ပြောင်းသွားတာရှိတာပေါ့၊ မြို့ထဲမှာတော့ မနေလောက်တော့ဘူး၊ နေလို့ ပိုပြီးတော့ မလုံခြုံလို့ပေါ့၊ တချို့လည်း မိုးဗြဲ၊ တချို့လည်း ဖယ်ခုံ၊ တချို့လည်း လွိုင်ကော်ဖက် ပြောင်းကြတာပေါ့၊ နီးစပ်ရာ၊ နီးစပ်ရာပေါ့လေ၊ သွားကြတာ ပေါ့၊ သူတို့ အမျိုးတွေ၊ ဘာတွေ ရှိတဲ့နေရာ၊ သူတို့ တချို့တွေက လာခေါ်ပေးပါဆိုလို့ရှိရင်လည်း သွားခေါ်ပေးတာ ပေါ့၊ ဘယ်မှာ ရှိနေတယ် သူတို့လာခေါ်ပေးပါဆို သွားခေါ်ပေးတာပေါ့၊ သွားခေါ်ပြီးတော့ သူတို့ လိုချင်တဲ့ နေရာပို့ ပေးတာပေါ့၊ အဲဒီလောက်ကတော့ ရှိပါတယ်” ဟု ပြောသည်။

မိုးဗြဲတိုက်ပွဲရှောင်များ (ကရင်နီပြည်စစ်ဘေးရှောင်ကူညီစောင့်ရှောက်ရေးကွန်ရက်)

မိုးဗြဲမြို့အတွင်း ဖြစ်ပွားသည့် တိုက်ပွဲကြောင်း လူနေအိမ် ၁၀၀ ကျော် ပျက်စီးဆုံးရှုံးခဲ့သလို လက်နက်ကြီး ကျရောက်ပေါက်ကွဲမှုကြောင့် အမျိုးသားနှစ်ဦး၊ ကလေးငယ် ၃ ဦး ထိခိုက်သေဆုံးခဲ့သည်။

ကိုဗညားက “တချိန်တည်းမှာပဲ လူထုတွေအပေါ်မှာ သတ်ဖြတ်မှုတွေလည်း အစိုးရတစ်ရပ်အနေနဲ့ပဲ ပြောပြော စစ်တပ်အနေနဲ့ ရက်ရက်စက်စက် သတ်ဖြတ်တာကတော့ ကမ္ဘာမှာ ကိုယ့်လူထုကို သတ်တာ အများဆုံး စစ်အစိုးရ တစ်ရပ်လို့တောင်မှ ပြောလို့ရတဲ့ အခြေအနေ ရှိလာပါတယ်၊ အဲဒီကိစ္စနဲ့ ပတ်သက်လို့ ကျနော်တို့ကတော့ မျှော်လင့်တာက တချိန်ကြရင်တော့ ဒီကျူးလွန်မှု အားလုံးကို ဒီစစ်ကောင်စီကနေ ပြန်ပြီးတော့မှ ဥပဒေကြောင်း အရ တာဝန်ယူမှု၊ တာဝန်ခံမှု အပြည့်နဲ့ ဖြစ်ကိုဖြစ်ရမယ် အဲဒီအတွက်လည်း အားလုံးကြိုးစားနေကြတာတော့ ရှိပါတယ်” ဟု ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်တွင် မြန်မာ့တပ်မတော်က အာဏာယူပြီးနောက်ပိုင်း ကယား (ကရင်နီ) ပြည်နယ် တွင် မြန်မာ့တပ်မတော်နှင့် ကရင်နီအမျိုးသားများ ကာကွယ်ရေးတပ် (KNDF)၊ ကရင်နီ တပ်မတော် (KA)၊ မိုးဗြဲ (PDF)၊ ဖယ်ခုံ(PDF)၊ ကရင်နီ တော်လှန်ရေး တပ်ပေါင်းစု (KRU) တို့ကြား တိုက်ပွဲများ ဖြစ်ပွားခဲ့သည်။

အဆိုပါ တိုက်ပွဲများကြောင့် ကယား(ကရင်နီ)ပြည်နယ်တွင် တိုက်ပွဲရှောင် လူဦးရေ ၁၆၃,၆၀၀(သုံးသိန်းကျော်) ရှိပြီး နေအိမ် ပျက်စီးမီးလောင်မှု ၄၃၆ လုံးထက်မနည်း ရှိနေကြောင်း ISP – Myanmar ၏ နောက်ဆုံး ထုတ်ပြန် ချက်အရ သိရသည်။

CNI News

၂၀၂၂ စက်တင်ဘာ ၂၁

ကရင်ပြည်နယ်၊ ကော့ကရိတ်မြို့နယ်အတွင်းရှိ တပ်မတော်၏ ခြေကုတ်စခန်းဖြစ်သည့် ကြိတ်စခန်းကို ကရင်အမျိုးသား လွတ်မြောက်ရေး တပ်မတော် (KNLA)နှင့် ပူးပေါင်းတပ်ဖွဲ့တို့ တိုက်ခိုက် သိမ်းပိုက်နိုင်ခဲ့ကြောင်း ယနေ့ (စက်တင်ဘာ ၂၁ ရက်)တွင် ထုတ်ပြန်ခဲ့သည်။

စက်တင်ဘာ ၂၀ ရက်နေ့ မွန်းလွဲ ၂ နာရီခန့်က စတင်တိုက်ခိုက်ခဲ့ပြီး နာရီဝက်အတွင်း ခမရ- ၅၅၇ စခန်း ကြိတ်စခန်း တစ်ခုလုံးကို သိမ်းပိုက်နိုင်ခဲ့ကြောင်း၊ ၎င်းတိုက်ပွဲတွင် တပ်မတော်ဘက်မှ ၇ ဦး ကျဆုံးပြီး ၂ ဦး ဒဏ်ရာနှင့် ဖမ်းဆီးရမိခဲ့ကြောင်း ထုတ်ပြန်ခဲ့သည်။

ကြိတ်စခန်း သိမ်းပိုက်ပြီးနောက် သိမ်းဆည်းရမိခဲ့သော လက်နက်များနဲ့အတူ KNLA နှင့်ပူးပေါင်းအဖွဲ့ကိုတွေ့ရစဉ် (KNU)

အဆိုပါ တိုက်ပွဲအတွင်း MA ကျည်ဘောက်- 17၊ 9MM-44၊ 16 ကျည်ဘောက်- 4၊ sinper ကျဥ်ဘောက်-3၊ 60MM-12၊ 73MM-11၊ အီနာဂါ-1၊ 40MM-10၊ BA109 လက်ပစ်ဗုံး- 2၊ 73ယမ်းတောင့် -5၊ စက်လက်ကျည်-229၊ AK ကျည် ဘောက်ဝိုင်း- 1၊ စကားပြောစက်- 2၊ ဖုန်း-3၊ ကပစ 5.56- 2223၊ စိန်ပြောင်းချိန်သီး- 1၊ MA5 ကျည်- 2 တို့ သိမ်း ဆည်းခဲ့သလို RPG- 2၊ BA 100 စိန်ပြောင်း-1၊ ငါးကြင်းမြီး စက်လက်- 1၊ ပြောင်းပို-1၊ AK-1၊ MAS sinper- 1၊ MA4.MAK ပူးတွဲ-1၊ MA1-2၊ MA3-2၊ MA5-2၊ MG3-1 လက်နက်များ သိမ်းဆည်းရမိကြောင်း ထုတ်ပြန်ချက်တွင် ဖော်ပြထားသည်။

ထို ကြိတ်စခန်းကို သြဂုတ်လ ၈ ရက်နေ့ကစပြီး ပိတ်ဆို့ကာ ရိက္ခာဖြတ်တောက်ပြီး တိုက်ခိုက်ခဲ့ရာ ယမန်နေ့တွင် စခန်းတစ်ခုလုံးကို သိမ်းပိုက်နိုင်ခဲ့ကြောင်း ဖော်ပြထားသည်။

အဆိုပါ ကြိတ်စခန်း တိုက်ခိုက်သိမ်းပိုက်ခံရသည့် ကိစ္စနှင့် ပတ်သက်၍ နစက ဘက်မှ တစ်စုံတစ်ရာ ထုတ်ပြန်ခြင်း မရှိသေးပေ။

CNI News

၂၀၂၂ ခုနှစ်၊ စက်တင်ဘာ ၂၁

စစ်ကိုင်းတိုင်းဒေသကြီး၊ ဒီပဲယင်းမြို့နယ်၊ လက်ယက်ကုန်းကျေးရွာရှိ စာသင်ကျောင်း တစ်ကျောင်းသည် မြန်မာ့ တပ်မတော် တိုက်ခိုက်မှုကြောင့် ကလေးငယ် ၁၁ ဦး အပါအဝင် အနည်းဆုံး အရပ်သား ၁၃ ဦး သေဆုံးခဲ့ရမှု အပေါ် ပြင်းပြင်းထန်ထန် ကန့်ကွက် ရှုတ်ချကြောင်း ကုလသမဂ္ဂအထွေထွေအတွင်းရေးမှူးချုပ် အန်တိုနီဂူတာ ရက်စ်က စက်တင်ဘာ ၂၀ ရက်တွင် ပြောကြားခဲ့သည်။

အဆိုပါ ပြောကြားချက်နှင့်ပတ်သက်ပြီး UNICFE Myanmar က ထုတ်ပြန်ခဲ့သည်။

အန်တိုနီဂူတာရက်စ်က “ လက်နက်ကိုင် ပဋိပက္ခအချိန်များတွင်ပင် ကျောင်းများသည် ကလေးငယ်များအတွက် အကာအကွယ်ပေးနိုင်ပြီး သင်ယူလေ့လာရန် ဘေးကင်းလုံခြုံသော နေရာများအဖြစ် ရှိနေရပါမည်။ စစ်ပွဲများ အတွင်း ကျောင်းများနှင့် ဆေးရုံများအား အပြည်ပြည်ဆိုင်ရာ လူသားချင်း စာနာထောက်ထားမှု ဥပဒေများနှင့် ဆန့်ကျင်ကာ တိုက်ခိုက်မှုများသည် ကုလသမဂ္ဂလုံခြုံရေးကောင်စီမှ ပြစ်တင်ကန့်ကွက်ထားသည့် ကလေး သူငယ်များအပေါ် ကြီးလေးသော ချိုးဖောက်မှု ခြောက်ခုထဲတွင် တစ်ခုပါဝင် ပါသည်”ဟု ပြောသည်။

လက်ယက်ကုန်းကျေးရွာက စာသင်ကျောင်း တိုက်ခိုက်ခံရမှုကြောင့် ပျက်စီးနေမှု

ထို့နောက် နိုင်ငံတကာ လူသားချင်းစာနာထောက်ထားရေး ဥပဒေအရ လက်နက်ကိုင် တပ်ဖွဲ့များသည် ကလေး သူငယ်များ အပါအဝင် အရပ်သား ပြည်သူများ၊ အရပ်ဖက် ဆိုင်ရာ အဆောက်အအုံများအား တိုက်ခိုက်ခြင်းမပြု ရန် ကုလသမဂ္ဂအထွေထွေအတွင်းရေးမှူးချုပ် အန်တိုနီဂူတာရက်စ်က ပြောသည်။

မြန်မာနိုင်ငံအတွင်းရှိ နိုင်ငံတကာ ရာဇဝတ်မှုများကို ကျူးလွန်ခဲ့သူများအားလုံးအား တာဝန်ခံမှု ရှိစေရန် ဆောင်ရွက်ရမည်ဟုလည်း ၎င်းက ပြောသည်။

လက်ရှိတွင် စစ်ကိုင်းတိုင်းဒေသကြီးအတွင်းမှာ အမျိုးသားညီညွတ်ရေးအစိုးရ (NUG) က ဖွဲ့စည်းပေးထားသော ပြည်သူ့ကာကွယ်ရေးတပ်ဖွဲ့(PDF)၊ မိမိဆန္ဒဖြင့် တပ်မတော်ဆန့်ကျင်တော်လှန်ရေးအတွက် ဖွဲ့စည်းထားသော ဒေသကာကွယ်ရေးတပ်ဖွဲ့(LDF) တို့နှင့် မြန်မာ့တပ်မတော်ကြား လက်နက်ကိုင် ပဋိပက္ခများ ဖြစ်ပွားနေသည်။

အဆိုပါ လက်နက်ကိုင် ပဋိပက္ခများကြောင့် နေရပ်စွန့်ခွာ ထွက်ပြေးတိမ်းရှောင်နေရသူ သိန်းချီရှိပြီး နေအိမ် အလုံးပေါင်း ၂၀၀၀၀ ကျော် မီးလောင် ပျက်စီးခဲ့ကြောင်း လူ့အခွင့်အရေး စောင့်ကြည့်လေ့လာနေသော အဖွဲ့ အစည်းများက ထုတ်ပြန်ထားသည်။

CNI News

၂၀၂၂ ခုနှစ်၊ စက်တင်ဘာ ၂၀

ရှမ်းပြည်နယ်မြောက်ပိုင်း၊ မိုးမိတ်မြို့နယ်၊ ဟွေခမ်းတောင်၏ မြောက်ဘက်တောင်ကြော တစ်လျောက်မှာ ယနေ့ (စက်တင်ဘာ ၂၀ ရက်)တွင် ရှမ်းပြည်တိုးတက်ရေးပါတီ(SSPP/SSA)နှင့် မြန်မာ့တပ်မတော်တို့ တိုက်ပွဲဖြစ်ပွားခဲ့ ကြောင်း SSPP/SSA က ထုတ်ပြန်ခဲ့သည်။

တပ်မတော်သည် အင်အား ၇၀ ခန့်ဖြင့် ဝမ်အုံကျေးရွာအုပ်စု၊ ဝမ်အုံရွာ၏မြောက်ဘက် အရပ်တည်ရှိရာ ရွာနှင့် ၁ မိုင်ခွဲခန့်ကွာဝေးသည့် ဟွေခမ်းတောင်ကနေ SSPP/SSA တပ်ဖွဲ့လှုပ်ရှားသော နေရာသို့ ထိုးစစ်ဆင်လာသည့် အတွက် စက်တင်ဘာ ၂၀ ရက်နေ့ နံနက် ၁၁ နာရီ ၁၀ မိနစ်ကနေ နေ့လယ်ပိုင်းအထိ တိုက်ပွဲပြင်းထွန်စွာ ဖြစ်ပွားခဲ့သည်ဟု SSPP က ပြောသည်။

မိုးမိတ်မြို့နယ်အဝင်ကိုတွေ့ရစဉ်

ပြီးခဲ့သည့် စက်တင်ဘာ ၁၇ ရက်နေ့ကလည်း မိုးမိတ်မြို့နယ်ထဲမှာ တပ်မတော်၏ ခမရ ၃၄၈၊ ခလရ ၂၇၆ တို့ ပူးပေါင်းစစ်ကြောင်း အင်အား ၆၀ ခန့်နှင့် SSPP တို့ တိုက်ပွဲဖြစ်ပွားခဲ့ရာ တပ်မတော်ဘက်က ၃ ဦးကျဆုံးပြီး ၅ ဦး ဒဏ်ရာရရှိခဲ့သည်။

အဆိုပါ တိုက်ပွဲများနှင့်ပတ်သက်ပြီး နစကဘက်က တစ်စုံတစ်ရာ ထုတ်ပြန်ထားခြင်း မရှိပေ။

CNI News

၂၀၂၂ ခုနှစ်၊ စက်တင်ဘာ ၂၀

ရခိုင်ပြည်နယ်၊ မောင်တောမြို့နယ်တွင် ရက္ခိုင့်တပ်တော်(AA)နှင့် မြန်မာ့တပ်မတော်တို့ကြား တိုက်ပွဲများ ဖြစ်ပွား နေသည့်အတွက် တောင်ပြိုကျေးရွာမှ ဒေသခံများသည် မောင်တောမြောက်ပိုင်းဘက်သို့ တိမ်းရှောင်သွားကြသော် လည်း ကြိမ်ချောင်းကျေးရွာအနီးတွင် သက်ဆိုင်ရာအာဏာပိုင်များက ဖြတ်သန်းခွင့် မပေး၍ ဒေသခံများ ပိတ်မိ နေကြောင်း သိရသည်။

မောင်တောမြို့နယ်၊ တောင်ပြိုကျေးရွာမှ ထွက်ပြေးတိမ်းရှောင်လာသူ ၁၀၀ ကျော်ရှိပြီး ကြိမ်ချောင်းကျေးရွာအနီး မှာ လမ်းပိတ်ထားခြင်းကြောင့် ပိတ်မိနေကြောင်း၊ အဆိုပါ လမ်းကြောင်းများကို ပိတ်ထားခြင်းသည် ကုန်စည် စီးဆင်းသည့် လမ်းကြောင်းများဖြစ်ကြောင်း၊ ထို့ကြောင့် ဒေသခံများသည် စားနပ်ရိက္ခာ ပြတ်လပ်မှုနှင့် ကြုံတွေ့ နေရကြောင်း မောင်တောဒေသခံ ကိုမောင်မောင်ထွန်းက CNI သတင်းဌာနသို့ ပြောသည်။

၎င်းက “တိုက်ပွဲ အခြေအနေကြောင့်လည်း ရှိတယ်။ စားနပ်ရိက္ခာကြောင့်လည်း ရှိတယ်။ အဘက်ဘက်ကပေါ့။ ရွာ ပေါင်း မနည်းဘူးပေါ့။ ကျနော်တို့ မီးတိုက်၊ သင်္ဘောလှ၊ ဒီဘက်ကဆိုရင် သမန်းသား၊ မင်္ဂလာညွန့်၊ ရွာပေါင်း မနည်း ဘူးပေါ့။ လူကလည်း ၁၀၀ ကျော် နီးပါးလောက် ရှိတာပေါ့”ဟု ပြောသည်။

ကြိမ်ချောင်းလမ်းဆုံမှာ စစ်ဆေးနေမှု

တောင်ပြိုကျေးရွာမှ မောင်တောမြို့သို့ သွားမည့်သူများနှင့် မောင်တောမြို့မှ တောင်ပြိုကျေးရွာသို့ သွားရောက် မည့် သူများသည် ကြိမ်ချောင်းစစ်ဆေးဂိတ်တွင် ဖြတ်သန်းသွားလာခွင့် ပိတ်ထားခြင်းကြောင့် နီးစပ်ရာ ဘုန်းကြီး ကျောင်းနှင့် လူမနေသည့် အိမ်များတွင် နေထိုင်နေကြရကြောင်း သိရသည်။

အဆိုပါ တိုက်ပွဲရှောင်ရန်အတွက် ထွက်ခွာလာသူများသည် လက်ရှိတွင် ကြိမ်ချောင်း၌ ပိတ်မိနေသည်မှာ ၄ ရက် ခန့် ရှိနေပြီဖြစ်ကြောင်း၊ လူမှုကူညီရေး အဖွဲ့အစည်းများနှင့်လည်း ချိတ်ဆက်မှုများ လုပ်ဆောင်ထားကြောင်း၊ သို့သော် တစ်စုံတရာ လာရောက်ကူညီသူများ မရှိသေးကြောင်း သိရသည်။

ထို့အထဲတွင် ဝန်ထမ်းများလည်း ပါဝင်နေပြီး စားနပ်ရိက္ခာ အခက်အခဲကြောင့် တိုက်ပွဲရှောင်အနေဖြင့် သွားရောက် ကြခြင်းဖြစ်ကြောင်း တောင်ပြိုကျေးရွာမှ ဒေသခံတစ်ဦးက ပြောသည်။

၎င်းက “အခုချိန်ထိ ဒီမှာ ကျနော်ကလည်း သောင်တင်နေတာပဲ။ တောင်ပြိုကနေ မောင်တောသွားဖို့ဆိုတာ သိပ် ကို အဆင်မပြေဘူး။ သူတို့က မလွှတ်ဘူးပေါ့။ လူလည်း သွားလို့မရဘူး။ ကားလည်း သွားလို့မရဘူး။ ဆိုင်ကယ် လည်း သွားလို့မရဘူး။ ကျနော်တို့ ဝန်ထမ်းတွေရော၊ အရပ်သားပြည်သူတွေရော၊ အခြေအနေဆိုးလို့ ဘယ်မှ မသွားရဘူး။ စားနပ်ရိက္ခာဆိုလည်း ပြတ်လပ်ပြီးတော့ စားစရာမရှိတော့ စစ်ရှောင်အနေနဲ့ သွားတာပေါ့နော်။ ပြည်သူတွေက တောင်ပြိုကနေ လာတယ်ဆိုရင် ဟိုဘက်ကိုလည်း တက်လို့မရဘူး။ ဒီဘက်ကိုလည်း ဆင်းလို့ မရဘူး အဲလိုဖြစ်နေတယ်” ဟု CNI သတင်းဌာနသို့ ပြောသည်။

AA တပ်ဖွဲ့ကိုတွေ့ရစဉ်

မောင်တောမြောက်ပိုင်း၌ AA နှင့် မြန်မာ့တပ်မတော်တို့ကြား တိုက်ပွဲများ ဖြစ်ပွားနေပြီး တချို့သော ကျေးရွာများ တွင် လက်နက်ကြီးသံများလည်း ကြားရသည့်အတွက် တိုက်ပွဲဖြစ်ပွားမှု နည်းပါးသော ကျေးရွာတချို့ရှိ ဘုန်းကြီး ကျောင်းများသို့ တိမ်းရှောင်လာကြကြောင်း အထက်ပါ တောင်ပြိုကျေးရွာမှ ဒေသခံတစ်ဦးက ပြောသည်။

၎င်းက “ကျနော်တို့ တောင်ပြိုကျတော့ ၂၄ နာရီပေါ့နော် လက်နက်ကြီးသံတွေ၊ နေလို့ထိုင်လို့ မရဘူး။ ညအိပ်လို့ မရဘူး။ သွားတဲ့သူတွေ အကုန်လုံးက စစ်ရှောင်အနေနဲ့ သွားကြတာပေါ့နော်။ ဘုန်းကြီးကျောင်းတွေမှာ မောင်တောမြို့ဆိုရင်လည်း စစ်ဘေးရှောင်စခန်းတော့ မရှိသေးဘူး။ နီးစပ်ရာ နီးစပ်ရာ ဘုန်းကြီးကျောင်းတို့၊ အခက်အခဲ ကြားထဲကနေပြီးတော့ သွားနေကြတာ” ဟု ပြောသည်။

မောင်တောမြို့ရှိ ကျေးရွာများသည် မြို့ပေါ်တွင်စျေးဝယ်၍ စားသောက်နေကြရကြောင်း၊ ယခုအခါမှာတော့ မောင်တောမြို့ပေါ်သို့ သွားသည့် လမ်းများကို ပိတ်ဆို့လိုက်ခြင်းကြောင့် ဒေသခံများ စားဝတ်နေရေး အခက်အခဲ ကြုံနေရကြောင်း သိရသည်။