CNI News
၂၀၂၄ ခုနှစ်၊ မတ်လ ၁၃

မတ်လ ၁၃ ရက်နေ့တွင် ကျရောက်သည် ၄၉၇ နှစ်မြောက် ရှမ်းနီအမျိုးသားနေ့ကို ရှမ်းနီအမျိုးသားများတပ်မ တော်(SNA)ထိန်းချုပ်နယ်မြေများအတွင်းမှာ ယနေ့ (မတ်လ ၁၃ ရက်)မှာ ကျင်းပခဲ့ကြသည်။

အထူးသဖြင့် SNA ထိန်းချုပ်ထားသော နယ်မြေများအနက် ဗန်းမောက်မြို့နယ်၊ ပင်လည်ဘူးမြို့နယ်၊ ဟုမ္မလင်း မြို့နယ်များတွင် ကျင်းပခဲ့ခြင်းဖြစ်သည်။

SNA သည် ရှမ်းနီအမျိုးသားနေ့ ရည်ရွယ်ချက် (၄)ချက်ကို ထုတ်ပြန် ကြေညာထားသည်။

ထိုအချက် ၄ ချက်မှာ (က) ရှည်လျားလှသော သမိုင်းကြောင်းတစ်လျှောက် ရှမ်းနီအမျိုးသား ဘိုးဘေးများ တည်ဆောက်ခဲ့သော မြို့ပြပြည်ထောင်များနှင့် ရိုးမြေကျနေထိုင်ခဲ့ကြသော လယ်ယာမြစ်ချောင်း၊ အင်းအိုင် တောတောင်ရေမြေတို့အား မြတ်နိုးတန်ဖိုးထားတတ်ကြစေရန်၊ (ခ) သမိုင်းအစဉ်အဆက် ခိုင်မာသော ယဉ်ကျေးမှု ထုံးတမ်းဓလေ့များ အမွေအနှစ်များ၊ စာပေဂီတနှင့် အနုသုခုမပညာ ရပ်များ မပျောက်ပျက်အောင် ထိန်းသိမ်း စောင့်ရှောက်လိုစိတ်များနှင့် တိုးတက်ပြန့်ပွားအောင် ကြိုးစားကြံဆောင် တီထွင်လို စိတ်များပေါ် ထွန်းစေရန်တို့ ဖြစ်သည်။

ထို့နောက် (ဂ) ကျယ်ပြန့်များပြားလှသော ရှမ်းနီဒေသတစ်ခုလုံး၏ အသီးသီးသော ရှမ်းနီအမျိုးနွယ်များအား စည်းလုံးညီညွတ်သော ခိုင်မာကျစ်လစ်သော၊ တူညီမျှတသော ဘုံသဘောဆန္ဒများပေါင်းစည်းကာ ရှမ်းနီ အမျိုးသားထု တစ်ရပ်အဖြစ် ချစ်ကြည်ရင်းနှီးစွာ တည်ဆောက်နိုင်ရန်၊ (ဃ) ခိုင်မာကျစ်လစ်သော ရှမ်းနီ အမျိုးသားထု တစ်ရပ်သည် ပြည်ထောင်စု၏ ပြည်နယ်အစိတ်အပိုင်းတစ်ခုအဖြစ် လည်းကောင်း၊ အားတစ်ရပ် အဖြစ် လည်းကောင်း တက်ကြွစွာပါဝင် ဆောင်ရွက်နိုင်မည့် နိုင်ငံ့အရင်းအမြစ်တစ်ခုအဖြစ် တည်ဆောက်နိုင်ရန် တို့ဖြစ်သည်ဟု SNA က ထုတ်ပြန်ခဲ့သည်။

ရှမ်းနီအမျိုးသားများတပ်မတော်(SNA)သည် စစ်ကိုင်းတိုင်းဒေသကြီးအတွင်းပါဝင်သွားသော တမူးခရိုင်၊ ဟုမ္မလင်း ခရိုင်၊ ခန္တီးခရိုင်၊ ကသာခရိုင်၊ ဗန်းမောက်ခရိုင်၊ မော်လိုက်ခရိုင်၊ ကလေးခရိုင်နှင့် ကချင်ပြည်နယ်အတွင်း ပါဝင် သွားသည့် မြစ်ကြီးနားခရိုင်၊ မိုးညှင်းခရိုင်၊ မိုးကောင်းခရိုင်၊ ဗန်းမော်ခရိုင်၊ ကားမိုင်း၊ အင်းတော်ကြီး ဒေသများကို စုစည်း၍ ရှမ်းနီပြည်နယ်ရရှိရေး ကြိုးပမ်းနေသော ရှမ်းနီလက်နက်ကိုင်ဖြစ်သည်။

လက်ရှိတွင် တမူး၊ ဖောင်းပြင်၊ ခန္တီး၊ ဟုမ္မလင်း၊ မော်လိုက်၊ ပင်လည်ဘူး၊ ကသာ၊ ဗန်းမောက်၊ အိန္ဒိယနယ်စပ်၊ ဖားကန့်၊ ကာမိုင်း၊ မိုးညှင်း၊ မိုးကောင်း၊ သံလမ်းရိုးတစ်လျှောက်မှာ အခြေပြုလှုပ်ရှားလျက်ရှိသည်။