CNI News

၂၀၂၃ ခုနှစ်၊ ဇွန်လ ၂၂

ထိုင်း - မြန်မာနယ်စပ်တွင် ရှိနေသော “ဝ”ပြည်သွေးစည်းညီညွတ်ရေးတပ်မတော် (UWSA)၏ တပ်စခန်း ၅ ခု ဆုတ်ခွာပေးရန် ထိုင်းဘက်က တောင်းဆိုခဲ့သော်လည်း နှစ်ဖက်စစ်ရေး ဖြစ်လာစရာမရှိဘူးဟု နိုင်ငံရေးလေ့လာ သုံးသပ်သူများက ပြောသည်။

ပြီးခဲ့တဲ့ရက်ပိုင်းက တာချီလိတ်မြို့မှာ ကျင်းပခဲ့သည့် မြန်မာ-ထိုင်း နယ်စပ်ကော်မတီ မြို့နယ်အဆင့် အစည်း အဝေးမှာ ထိုင်းဘက်က မြန်မာအာဏာပိုင်များထံ တောင်းဆိုခဲ့ခြင်းဖြစ်သည်။

အဆိုပါ တောင်းဆိုချက်ကို UWSA ဘက်ကလည်း လက်ခံမှာ မဟုတ်ကြောင်း ပြောကြားထားသည်။

UWSA စခန်း တည်နေရာများမှာ မြန်မာအစိုးရနှင့် သဘောတူညီမှုယူ၍ နေရာချထားသည့်အတွက် ထိုင်းက တောင်းဆို၍ ရမည်မဟုတ်ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “အစဉ်အလာအရ ပြောရလို့ရှိရင် ထိုင်းနိုင်ငံဘက်က ‌တောင်းဆိုခွင့် မရှိပါဘူး။ ဒီစစ်တပ်ဖက် စကစ ဘက် ကလည်း အဲဒီလို တောင်းဆိုလည်း ရမှာမဟုတ်ပါဘူး။ သူက အဲဒီနေရာတွေကို အရင်တုန်းက ခွန်ဆာရဲ့ ဘိန်းချက် စခန်းနဲ့ ဘိန်းအရောင်းအဝယ်လုပ်တဲ့ နေရာတွေ ရွှေတြိဂံရဲ့ အသည်းနှလုံးပေါ့ဗျာ၊ အဲဒီနေရာတွေကို တပ်မတော်နဲ့ ပေါင်းပြီးတော့ စစ်ဆင်ရေး လုပ်ခဲ့တယ်၊ တပ်မတော်နဲ့ ပေါင်းလုပ်ခဲ့တဲ့အတွက် ဗိုလ်ခင်ညွန့်တို့က UWSA ကို အဲဒီ ဒေသလွှဲပေး၊ ဒါကြောင့် အဲဒီနေရာတွေက ကျနော်တို့ UWSA က အုပ်စိုးပြီးတော့ ဘိန်းစိုက်ပျိုးရေးတွေ၊ ဘိန်းချက် စခန်းတွေ အကြီးအကျယ် လုပ်နေခဲ့တာ၊ ထိုင်းပိုင်နက်လည်း မဟုတ်ဘဲနဲ့ မြန်မာပိုက်နက်ထဲမှာ ရှိနေတဲ့ဟာကို နောက်ပြီးတော့ မြန်မာအစိုးရက သဘောတူပြီးတော့ နေရာချထားပေးတဲ့ ကိစ္စကို ထိုင်းကတောင်းဆိုလို့ မရဘူး ထင်ပါတယ်။ ဒီကိစ္စကနေ စစ်ရေးအရ ပဋိပက္ခတွေ ဖြစ်လာနိုင်စရာ အနေအထားလည်း မရှိပါဘူး။ ဒါကတော့ ကျနော့်အမြင် ဖြစ်ပါတယ်” ဟု ပြောသည်။

၂၀၂၃ ခုနှစ်၊ ဇွန်လ တတိယက မြန်မာ-ထိုင်း ဆွေးနွေးပွဲကိုတွေ့ရစဉ်

UWSA စခန်း ၅ ခု ဆုတ်ခွာခိုင်းမှုနှင့် တိုက်ပွဲ ဖြစ်လာစရာ မရှိကြောင်း၊ UWSA ၏ အနောက်မှာ တရုတ်ရှိနေ ကြောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။

၎င်းက “ဒါကတော့ စစ်ကောင်စီဘက်က အမြဲတမ်း သွေးတိုးစမ်းတယ်ဗျ၊ ဆုတ်ပေးဖို့၊ အင်အား မရှိရင်တော့ သူတို့ တိုက်တာပေါ့၊ “ဝ”ကတော့ သိတဲ့အတိုင်းပဲလေ၊ သူ့အင်အားနဲ့သူ ရပ်တည်နေတဲ့ အဖွဲ့အစည်းဖြစ်တယ်၊ လွတ်မြောက်နယ်မြေ တစ်ခုဖြစ်နေပြီ။ အဲဒီလိုသွားပြီးတော့ အမိန့်ပေးပြီးတော့ သူတို့က လက်မခံဘူး။ အဲဒီလို လက်မခံလို့ သူတို့ဘက်က တိုက်မယ်ဆိုတာလည်း မဖြစ်နိုင်ဘူး။ ဘာလို့လဲဆိုတော့ “ဝ”ကို သူတို့က စစ်ရေးအရ မယှဉ်ပြိုင်နိုင်သူတို့က မယှဉ်ပြိုင်လိုတဲ့ ဆန္ဒတွေရှိတာပေါ့နော်၊ ယှဉ်ပြိုင်ရင်လည်းပဲ သူ့အနေနဲ့ တော်တော့ကို တာဝန်တစ်ခု ကြီးကျယ်သွားမယ်၊ နောက်ပြီးတော့ တရုတ်နဲ့လည်း ထိပ်တိုက်တွေ့ကောင်း တွေ့နိုင်တယ်၊ အဲဒီလို “ဝ”ကို သူမတိုက်တာလည်း ဖြစ်တာပေါ့၊ အဲဒီအချိန်မှာ စခန်း ၅ ခုလောက်နဲ့ သူသွားပြီး တိုက်မယ်ဆိုတာတော့ မဖြစ်နိုင်ဘူး ထင်ပါတယ်” ဟု ပြောသည်။

မိမိတို့၏ တပ်စခန်းများမှာ မြန်မာနယ်နိမိတ်အတွင်းမှာသာ တည်ရှိနေကြောင်း၊ ထိုင်းအနေဖြင့် ဖိအားပေးစရာ မလိုသလို တပ်မတော်ဘက်ကလည်း တောင်းဆိုစရာမရှိကြောင်း UWSA ၏ တောင်ပိုင်းဆက်ဆံရေးရုံး တာဝန်ခံ က ပြောကြားထားသည်ဟု Wa Channel တွင် ဖော်ပြထားသည်။ 

နိုင်ငံတစ်ခုနှင့် တစ်ခုအကြား နယ်စပ်ပြဿနာများ ရှိနေမှာဖြစ်ကြောင်း၊ အဆိုပါ ပြဿနာများကို ဖြေရှင်းရန် လည်း ခက်ခဲကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြော သည်။

ဗိုလ်ချုပ်မှူးကြီးမင်းအောင်လှိုင်နဲ့ UWSA ဒုဥက္ကဋ္ဌ ဦးလော့ယာကုကို တွေ့ရစဉ်

၎င်းက “နယ်နိမိတ်ပြဿနာကိုက ကျနော်တို့နဲ့ ထိုင်းနဲ့ကြားထဲမှာ အပီအပြင် ရှင်းမရမှာကိုက ရှိတဲ့အခါကြတော့ သူက နယ်နိမိတ်မျဉ်းပေါ်မှာ လာနေပါတယ်တို့ ဘာတို့ဆိုတာက ပြောဖို့ခက်နေတယ်၊ တချို့ကကြတော့ နယ်နိမိတ်မျဉ်းပေါ် ဟုတ်ချင်မှ ဟုတ်မယ်၊ နယ်နိမိတ် ရေဝင်ကျောရဲ့ ဟိုဖက်ဖြစ်ချင်လည်း ဖြစ်နေမှာပေါ့နော်၊ ရေဝင်ကျော ကုန်းတန်းရဲ့ ဒီဖက်ဖြစ်ချင်ဖြစ်နေမယ်၊ နယ်နိမိတ်ကို ခွပြီးတော့ ထိုင်းမြေထဲ သူကတော့ ယူထားပုံ မပေါ်ဘူး။ တချို့ နှစ်နိုင်ငံ တပ်စခန်းတွေတောင်မှ ဟိုဖက်ဒီဖက် ခြံစည်းရိုးလေးပဲ ခြားတဲ့ ပုံစံမျိုးလေးတွေလည်း ရှိတာကိုး။ “ဝ”ထဲမှာ အဲဒီပြဿနာတွေ အများကြီးရှိနေတယ်၊ “ဝ”ကလည်း တရုတ်ရဲ့ ကျောထောက် နောက်ခံ ဖြစ်နေတယ်၊ ထိုင်းနိုင်ငံကလည်း ဘာပဲပြောပြော အမေရိကန်ရဲ့ ဩဇာလွမ်းမိုးမှုက ရှိနေတဲ့အခါကြတော့ ဒီပြဿနာလေးတွေက ဒါကတော့ ရှိနေမှာ ဖြစ်ပါတယ်၊ ဒါက ရှင်းလို့လည်း မရပါဘူး” ဟု ပြောသည်။

ထိုင်းက နောက်ဆုတ်ခိုင်းသည့် နေရာများမှာ UWSA ၏ အမှတ် ၁၇၁ စစ်ဒေသ တောင်ပိုင်းအနေဖြင့် ၁၉၉၁ ခုနှစ် ကတည်းက ရောက်ရှိ ခြေကုတ်ယူထားသော နေရာဖြစ်ကြောင်း၊ တပ်မဟာ ၂၄၈၊ ၅၁၈၊ ၇၇၂၊ ၇၇၅၊ ၇၇၈ တို့ဖြင့် ထိုင်းနယ်စပ်တွင် စခန်းချ နေရာယူထားကြောင်း သိရသည်။ 

၂၀၀၈ ဖွဲ့စည်းပုံ အခြေခံ ဥပဒေအရ ရှမ်းပြည်နယ်ရှိ ဟိုပန်၊ မိုင်းမော၊ ပန်ဝိုင်၊ နားဖန်း၊ မက်မန်းနှင့် ပန်ခမ်း (ပန်ဆန်း) မြို့နယ် ခြောက်ခုအား ခရိုင်နှစ်ခုဖွဲ့ကာ “ဝ” ကိုယ်ပိုင်အုပ်ချုပ်ခွင့်ရတိုင်းအဖြစ် သတ်မှတ် ပေးထား သည်။

CNI News

၂၀၂၃ ခုနှစ်၊ ဇွန်လ ၂၁

ထိုင်းနိုင်ငံတွင် တောင်ပေါ်သားကဒ် (ခေါ်) ဆယ်နှစ်ခံကဒ်အား လာဘ်ထိုးပြုလုပ်ထားသည့် မြန်မာနိုင်ငံသား ၇၀၀ ကျော်၏ ကဒ်များ ဖျက်သိမ်းခံရနိုင်ခြေရှိကြောင်း မြန်မာရွှေ့ပြောင်းလုပ်သားအရေး ကူညီဆောင်ရွက်ပေးနေသူ များက CNI သတင်းဌာနသို့ ပြောသည်။

မြန်မာ-ထိုင်းနယ်စပ် တာ့ခ်ခရိုင်၊ မဲဆောက်မြို့ စည်ပင်သာယာရေးရုံးတွင် အလုံးအရင်းဖြင့် မြန်မာနိုင်ငံသားများ အား ဆယ်နှစ်ခံကဒ် ထုတ်ပေးနေသည့် သတင်းများ ပေါက်ကြားခဲ့သဖြင့် ထိုင်းအာဏာပိုင်များက ဝင်ရောက် စစ်ဆေးမှုများ ပြုလုပ်ခဲ့သည်။

ထိုသို့ စစ်ဆေးရာတွင် မြန်မာနိုင်ငံသား ၇၀၀ ကျော်ထံမှ အခကြေးငွေများ(ဘတ်သန်းချီ)စွာယူ၍ ဆယ်နှစ်ခံကဒ် ထုတ်ပေးခဲ့သည့် ထိုင်းဝန်ထမ်း ၃ ဦးအား အလုပ်နေရာ ရွှေ့ပြောင်းခြင်းဖြင့် အပြစ်ပေးခဲ့ကြောင်း ထိုင်းသတင်းများ က ဖော်ပြထားသည်။

ထို့ကြောင့် လာဘ်ထိုး၍ ဆယ်နှစ်ခံကဒ် ပြုလုပ်ခဲ့သည့် မြန်မာနိုင်ငံသား ၇၀၀ ကျော်အား ထိုင်းဘက်မှ အရေးယူ ဆောင်ရွက်မှုများလည်း ရှိလာနိုင်ကြောင်း FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြော သည်။

၎င်းက “အဲဒါကတော့ ဘယ်လိုလာမလဲ ပြောလို့မရဘူး။ ဒီနေရာမှာက နှစ်မျိုးရှိမှာပေါ့။ တစ်မျိုးကကြတော့ သူတို့ တွေဟာ သက်သေအနေနဲ့ ပါသွားတယ်ဆိုရင် တစ်မျိုးဖြစ်မယ်။ ဒါမှမဟုတ်ရင် ကဒ်ပြားက ဒါက အတုလို့ ပြောလို့ မရဘူး။ 

ထိုင်းအာဏာပိုင်ကိုတွေ့ရစဉ်

ဘာလို့ဆို သူတို့မြို့နယ်ထွေအုပ်ရုံးကနေ တရားဝင် အထောက်အထား နံပါတ်နဲ့ ရက်စွဲတွေ ဘာတွေနဲ့ ထုတ်ထားတာလေ။ ကဒ်ပြားက အတုမဟုတ်ဘူး။ ကဒ်ပြား အတုကြောင့်ဆိုပြီးတော့ ကျနော်တို့ အလုပ်သမား တွေ၊ ကဒ်ပြား ကိုင်ဆောင်တဲ့ လူတွေကို တရားစွဲလို့မရဘူး။ တရားစွဲလို့ရမှာက ဘာရမလဲဆိုတော့ ဒီဟာကိုလုပ် တာ အရည်အသွေးမမီဘူးပေါ့။ ပြောရမယ်ဆိုရင် တကယ် နှစ်ဘယ်လောက်ကြာကြာ ရောက်နေတဲ့လူတွေ မဟုတ်ဘဲနဲ့ ဆိုပြီးတော့ပေါ့။ ဒါမှမဟုတ်လည်း အစားထိုးတဲ့ဟာပေါ့။ တစ်ယောက်နဲ့တစ်ယောက် သူတို့ဝင်လာတဲ့ အိမ်ထောင်စုစာရင်းနဲ့ နေရာတွေအပေါ် မူတည်မှာပဲ။ အဲဒီမှာရှိတဲ့ ဆင့်ပွားဆိုရင် သူကြီးတွေ ဘာတွေပေါ့ အိမ်ထောင်စု နာမည်ခံထားတဲ့သူတွေ၊ အဲဒီလူတွေကို အကုန်လုံးစစ်မှာပေါ့။ စစ်ပြီးတော့မှ အဲဒီရလဒ်အပေါ် မူတည်ပြီး တရားစွဲတာလား ဘာလား အဲဒီလိုလုပ်လို့ရမှာ။ တရားစွဲတဲ့အဆင့်တော့ လုပ်လို့မရဘူး။ အဓိကက တော့ ကျနော်တို့ဘက်က ဘာဆုံးရှုံးလဲ။ အဲဒီကဒ်တွေကို သူတို့ပြောပုံအရဆိုရင် ၇၀၀ ဝန်းကျင်လောက် ရှိတဲ့ သုံးလအတွင်းက ဟာတွေကို သူတို့က Cancel လုပ်ပစ်လိုက်ရင် ဒီလူတွေက ပိုက်ဆံကုန်ထားရတယ်လေ။ အဲဒါနာတာပေါ့ မဟုတ်ဘူးလား။ အဲဒါပဲ အဓိကကတော့” ဟု ပြောသည်။

မြန်မာနိုင်ငံသား တချို့သည် ထိုကဒ်အား ငွေကြေး တတ်နိုင်သောကြောင့် ပြုလုပ်ကြခြင်း မဟုတ်သော်လည်း ကဒ် ဖျက်သိမ်းခံရပါက အထောက်အထားမဲ့ အဖြစ်သို့ ရောက်ရှိပြီး ရိုက်ခတ်မှုများ ရှိလာနိုင်ကြောင်း မြန်မာရွှေ့ပြောင်း လုပ်သားအရေး ကူညီဆောင်ရွက်ပေးနေသူများက ပြောသည်။

အဆိုပါ မြန်မာနိုင်ငံသား ၇၀၀ ကျော်သည် ၁၀ နှစ်ခံကဒ် အထောက်အထား တစ်ခုရှိရန်အတွက် ဘတ် တစ်သိန်း ဝန်းကျင်အထိ ပေးထားရခြင်းဖြစ်ကြောင်း၊ ထိုင်းသတင်းများ၏ ဖော်ပြချက်အရ မဲဆောက်(မြို့) စည်ပင်ရုံးမှ ကဒ် ထုတ်ပေးသူ ထိုင်းအစိုးရဝန်ထမ်းများမှာ ဘတ်သန်းပေါင်း ၂၀ ကျော်၊ ၃၀ ခန့် ရရှိခဲ့ကြောင်း သိရသည်။

ထို့အပြင် ၁၀ နှစ်ခံကဒ် ရရှိသွားသည့် မြန်မာနိုင်ငံသား ၇၀၀ ကျော်ထဲတွင် နိုင်ငံရေး အခြေအနေများကြောင့် မဲဆောက်ဘက်ခြမ်းသို့ တိမ်းရှောင်နေသူများအပြင် သာမန်လူများလည်း ပါဝင်ကြောင်း ထိုင်းသတင်းများက ရေးသား ဖော်ပြထားကြသည်။

ထိုင်းလူဝင်မှုကြီးကြပ်ရေးဌာနကိုတွေ့ရစဉ်

ရွှေ့ပြောင်း အလုပ်သမားအရေး ကူညီဆောင်ရွက်ပေးနေသူ ကိုသားကြီးက “ဖျက်သိမ်းလိုက်မယ်ဆိုရင် မြန်မာ တွေပေးထားတဲ့ ဘတ် သန်းနှစ်ဆယ်ကျော်က ဘယ်လိုလုပ်မတုန်း။ ဘယ်သူ ပြန်ပေးမတုန်း။ ကွန်ပျူတာ ထဲမှာ သူတို့ လုံးဝကို ဖျက်သိမ်းလိုက်မယ်လေ။ ဒီကဒ် အလွတ်ကြီးက ဘာမှလုပ်လို့ မရဘူးလေ။ လူ ၇၀၀ ကျော် ထုတ် ပေး လိုက်တာကို ဝန်ခံပါတယ်တဲ့ လူကြီးက ပြန်ပြောတယ်။ ဒါပေမယ့် ဆက်ပြီးတော့ လုပ်လို့မရအောင် တား လိုက်ပြီဆိုတော့ ဒီပိုက်ဆံ သန်း နှစ်ဆယ်ကျော်လေ။ သိန်း နှစ်ဆယ် မဟုတ်ဘူး သန်းနှစ်ဆယ်ကျော်။ ဒါအခု သူ့နိုင်ငံသား အချင်းချင်းတိုင်လို့ ဒါဖမ်းတာပေါ့။ သန်းနှစ်ဆယ်ကျော်လေ နှမြောစရာ ကြီးလေ။ ကိုယ်တွေက တော့ ကိုယ့်နိုင်ငံသားတွေ မလုပ်နဲ့ ဒါကတော့ မလုပ်သင့်ဘူး။ ဘတ်လုပ်ပေါ့။ ဘတ်လုပ်လိုက်လေ။ အဲဒီ ဆယ်နှစ် ခံ ကဒ်ပြားထဲမှာ ဘာရေးထားတယ်မှတ်လဲ နိုင်ငံမရှိတဲ့ လူမျိုးတဲ့။ ထိုင်းလို ရေးထားတာကတော့ နိုင်ငံ မရှိဘူး၊ နေရာ အတည်တကျမရှိတဲ့ လူလို့ ပြောတာလေ” ဟု CNI သတင်းဌာနသို့ ပြောသည်။

ယခု မြန်မာနိုင်ငံသား ၇၀၀ ကျော် ကိစ္စနှင့်ပတ်သက်၍ ၁၀ နှစ်ခံကဒ် လုပ်ပေးရန် ဆောင်ရွက်ပေးသူ၏ အိမ်ထောင်စု စာရင်းအား စစ်ဆေးရာမှာတော့ ထိုသူ၏ အိမ်ထောင်စုစာရင်းထဲတွင် ကဒ်လုပ်သူ အယောက် တစ်ရာနီးပါး ထည့်သွင်းထားကြောင်း သိရသည်။

ထို့နောက် တောင်ပေါ်သားကဒ် (ခေါ်) ၁၀ နှစ်ခံကဒ် ပြုလုပ်ရာတွင် သတ်မှတ်ထားသည့် စံနှုန်းများ ရှိသော်လည်း ယခုကဲ့သို့ လာဘ်ထိုး၍ တစ်စတစ်စ ပြုလုပ်နေကြခြင်း ဖြစ်ကြောင်း၊ ယခုစစ်ဆေး ရမိသွားခြင်းသည် လူဦးရေ ပမာဏ များပြားကာ ထိုင်းလူမျိုးများနှင့် ဌာနဆိုင်ရာ လူအချို့တို့မှ သိရှိသဖြင့် တိုင်ကြားလိုက်ခြင်းကြောင့် ဖြစ်ကြောင်း သိရသည်။

CNI News

၂၀၂၃ ခုနှစ်၊ ဇွန်လ ၂၁ 

လာမည့် ၂၀၂၄ ခုနှစ်မှ စတင်ကာ တအာင်းဒေသအတွင်း တအာင်းမြေတက္ကသိုလ်ကို ဖွင့်လှစ်သွားမည်ဖြစ်ကြောင်း တအာင်းအမျိုးသားပညာရေးကော်မတီ (TNEC) က ဇွန်လ ၂၀ ရက်မှာ ထုတ်ပြန်ခဲ့သည်။

လက်ရှိ ပြည်တွင်းမှာ ဖြစ်ပေါ်နေသော နိုင်ငံရေး အခြေအနေများအရ CDM ပြုလုပ်ထားသော တအာင်းဒေသတွင်း ကျောင်းသူ/သားများအနေဖြင့် တက္ကသိုလ်ပညာရပ်များကို ဆက်လက် သင်ယူနိုင်ရန် ဖွင့်လှစ်ခြင်းဖြစ်ကြောင်း ဖော်ပြထားသည်။

တအာင်းဒေသ၏ အဆင့်မြင့်ပညာရေးကို ခေတ်နှင့်အညီ ပြောင်းလဲတိုးတက် မြှင့်တင်နိုင်ရန်နှင့် ကျောင်းသူ/သား တိုင်းအတွက် လက်လှမ်းမှီနိုင်သော အရည်အသွေးပြည့် အဆင့်မြင့် ပညာရေးစနစ် ပေါ်ထွန်းလာစေရန် ဉီးတည် ကြောင်း ပြောသည်။

ပြီးခဲ့သည့် နှစ်များက ကိုဗစ်ကပ်‌ရောဂါနှင့် နိုင်ငံ‌ရေး အပြောင်းအလဲများကြောင့် လူငယ်များ ပညာရေးမှာ နောက်ကျခဲ့ရကြောင်း၊ ယခုကဲ့သို့ ဖွင့်လှစ်ခြင်းကို ကြိုဆိုကြောင်း တအာင်းနိုင်ငံရေးသမား မိုင်းအုဏ်းခိုင်က CNI သတင်းဌာနသို့ ပြောသည်။

၎င်းက “ဒါကတော့ ပညာရေးပိုင်းကို မြှင့်တင်အားပေးတယ်ဆိုတော့ ကျနော်တို့ကတော့ ဒါကတော့ ကြိုဆိုရမှာ ပေါ့ဗျာ၊ ဒီပညာရေးပိုင်းကို မြှင့်တင်ပေးတယ်၊ အားပေးတယ်၊ နောက်တစ်ခါ လူငယ်တွေကို ပညာရေးမှာ ဆက်ပြီး မှ လေ့လာဆည်းပူးနိုင်အောင် ဆောင်ရွက်ပေးတယ်ဆိုတာ အများကြီး ဝမ်းသာပါတယ်။ လူငယ်တွေ အတွက် တော့ အများကြီး ပညာရေးအပိုင်းမှာတော့ ထိခိုက်နစ်နာသွားတာပေါ့ဗျာ၊ ဒီကိုဗစ် ကာလမှာရော၊ နိုင်ငံ‌ရေး အပြောင်းအလဲမှာရော ပညာရေးမှာ တော်‌တော်လေးကို ခါးပြတ်သွားတာပေါ့ဗျာ၊ အခုလို ပညာရေး တစ်ပိုင်းတစ်စ နဲ့ သွားနေရတဲ့ လူငယ်တွေ အများကြီးရှိနေတာ၊ ပညာရေးကို ပြန်ပြီး အားပေးမြှင့်တင် ပေးတယ်ဆိုတော့ ဒါတော့ ကြိုဆိုရမှာပေါ့ဗျာ” ဟု ပြောသည်။

TNEC စာသင်သားများကိုတွေ့ရစဉ်

တအာင်းမြေတက္ကသိုလ်ကို အမျိုးသားညီညွတ်ရေးအစိုးရ (NUG) ၏ ပညာရေးဝန်ကြီးဌာနမှ ကြီးမှူးကျင်းပခဲ့သော အခြေခံပညာ ပြီးမြောက်ကြောင်း စစ်ဆေးအကဲဖြတ် စာမေးပွဲ (BECA) - ၂၀၂၃ ကို ဖြေဆိုအောင်မြင်ပြီးသူများနှင့် ၂၀၂၁ ခုနှစ် မြန်မာ့တပ်မတော် အာဏာယူခဲ့သည့်အချိန် မတိုင်မီတွင် အခြေခံပညာ ပြီးမြောက်သူများကို ရည်ရွယ် ၍ ပထမနှစ်သင်တန်းအား ၂၀၂၃ ခုနှစ်၊ ဒီဇင်ဘာလတွင် စတင်လက်ခံမည်ဖြစ်ကြောင်း TNEC ၏ ထုတ်ပြန်ချက် တွင် ဖော်ပြထားသည်။

သင်ကြားပို့ချမည့် ဘာသာရပ်များ ဝိဇ္ဇာဘာသာရပ်များ၊ သိပ္ပံဘာသာရပ်၊ နိုင်ငံရေးသိပ္ပံနှင့် စိုက်ပျိုးမွေးမြူရေး ဘာသာရပ်များကို သင်ကြားသွားမည်ဖြစ်ပြီး ကုန်ကျစရိတ်ကို တက္ကသိုလ်ကျောင်းသူ/သားကိုယ်တိုင် တာဝန်ယူ ရမည်ဖြစ်ကြောင်း ဖော်ပြထားသည်။

ကိုဗစ်ကာလနှင့် နိုင်ငံရေး အခြေနေများကြောင့် တအာင်းဒေသ လူငယ်အများစု ပညာရေးကို စွန့်ခွာပြီး တရုတ် ပြည်သို့ ထွက်ခွာမှု များလာကြောင်း တက္ကသိုလ်ဖွင့်နိုင်ပါက တအာင်းလူငယ်များ တက်လှမ်းရှိလာမည် ဖြစ် ကြောင်း လားရှိုးမြို့နယ် တအာင်းရိုးရာစာပေယဉ်ကျေးမှု ဒုဥက္ကဋ္ဌ ဦးအိုက်ချာက CNI သတင်းဌာနသို့ ပြောသည်။

တအာင်းပညာရေးသင် ဆရာ/ဆရာမများကိုတွေ့ရစဉ်

၎င်းက “လူငယ်‌လေးတွေက ဒီလိုမျိုး ကာလမှာ တချို့လည်း ကျောင်းမတက်နိုင်တာလည်း ရှိတယ်၊ ဒီလိုမျိုး တက္ကသိုလ်လေး ဖွင့်ထားနိုင်တယ်ဆိုတော့ တအာင်းလူငယ်လေးတွေအတွက်‌တော့ ပိုပြီးမှ တက်လမ်းရမယ်လို့ မြင်မိတယ်၊ လူငယ်တွေအတွက်လည်း ဒီအပေါ်မှာ စိတ်ဝင်တစားနဲ့ ပါဝင်ပြီးမှ တက်‌ရောက်ဖို့ရန်လည်း လိုအပ် တာပေါ့နော်၊ အဲဒီလိုမျိုး စိတ်ဝင်စားစွာနဲ့ တက်တက်ကြွကြွပေါ့၊ အဲဒီလိုမျိုးလေးတော့ ဖြစ်စေချင်တယ်ပေါ့နော်၊ ဒီလိုမျိုး ပညာရေးကာလမှာ လူငယ်တွေက ခပ်များများ ပညာရေး အခြေအနေ ဒီလိုမျိုး ဖြစ်နေတဲ့အချိန်မှာ အပြင် လောကရောက်သွားတဲ့ လူငယ်လေးတွေက ခပ်များများ ဖြစ်နေတယ်၊ အဲဒီအပိုင်းလေး မရောက်ပဲနဲ့ ပညာရေးကို ပြန်ပြီးတော့ ဦးစားပေးဖို့ကိုလည်း မှာကြားချင်တာပေါ့နော်” ဟု ပြောသည်။

တအာင်းမြေတက္ကသိုလ်ကို လာမည့် ၂၀၂၄ ခုနှစ်တွင် ဖွင့်လှစ်သွားမည်ဖြစ်ပြီး တက္ကသိုလ် အောင်မြင်ပြီးမြောက် သူများအား ဒီဂရီဘွဲ့၊ ဒီပလိုမာ အောင်လက်မှတ် အသီးသီး ပေးအပ်သွားမည်ဖြစ်ကြောင်း ဖော်ပြထားသည်။

CNI News

၂၀၂၃ ခုနှစ်၊ ဇွန်လ ၂၀

မြန်မာနိုင်ငံအတွင်း ဖြစ်ပွားနေသည့် လက်နက်ကိုင်ပဋိပက္ခကို ဖြေရှင်းရန် မြန်မာ့တပ်မတော်တွင် တာဝန်အရှိ ဆုံးဖြစ်ကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

လက်ရှိ နိုင်ငံတော်အာဏာကို ရယူထားသည့် တပ်မတော်အနေဖြင့် နိုင်ငံရေးပြဿနာအား နိုင်ငံရေးနည်းလမ်းဖြင့် ဖြေရှင်းနိုင်သည်ဆိုသော အခြေအနေကို မြင်သာအောင်ပြသရန် လိုအပ်ကြောင်း ၎င်းက ပြောသည်။

ဦးကိုကိုကြီးက “အဓိက-ကတော့လေ လက်ရှိ နိုင်ငံတော်အာဏာကို ရယူကျင့်သုံးနေတဲ့ အဖွဲ့ကတော့ ပြောရရင် တပ်မတော်ကတော့ တာဝန်အရှိဆုံးပဲပေါ့၊ သူက ဒီပြဿနာတွေရဲ့ အခြေခံက နိုင်ငံရေး ပြဿနာဖြစ်တယ်၊ ဒါကို နိုင်ငံရေးနည်းလမ်းနဲ့ လက်နက်မကိုင်ဘဲနဲ့ နိုင်ငံရေးနည်းလမ်းနဲ့ ဖြေရှင်းနိုင်မယ့် သိသာထင်ရှားတဲ့ ပြောင်းလဲ တိုးတက်မှုတွေ ဖြစ်မယ်ဆိုတာကို မြင်သာထင်သာအောင် ပြသနိုင်ဖို့ လိုတယ်လို့ မြင်တယ်။ အဲဒါမှာ ကျနော်တို့ အကုန်လုံးကို မဖြေရှင်းနိုင်ပေမယ့်လို့ ပြည်သူတွေကြားထဲမှာပါ လက်နက်ကိုင် လှုပ်ရှားမှုထက်စာရင် နိုင်ငံရေး အရ မျှော်လင့်ချက်ရှိတဲ့ အဖြေထွက်နိုင်မယ် ဆိုတာမျိုးကို ယုံကြည်လာအောင် လုပ်ဖို့ လိုတယ်လို့ မြင်ပါတယ်။ ဒါကြောင့်မို့လို့ အဓိက-ကတော့ တပ်မတော်ရဲ့ နိုင်ငံရေးဆန္ဒ အဲဒါက အရေးကြီးတယ်၊ အကြမ်းဖက် လှုပ်ရှားမှု တွေနဲ့ ပတ်သက်လို့ကတော့ ကျနော်တို့ ကိုယ်တိုင်လည်း နိုင်ငံရေးနည်းလမ်းကို ရွေးပြီးဖြစ်တဲ့ အတွက်ကြောင့် နိုင်ငံရေးပါတီတွေ နောက်တစ်ခါ လက်ရှိ နစကနဲ့ ထိတွေ့ဆွေးနွေးနေတဲ့ တိုင်းရင်းသားလက်နက်ကိုင် အဖွဲ့ အစည်းတွေ နောက် NCA မထိုးသေးတဲ့ အဖွဲ့အစည်းတွေ အဲဒီအဖွဲ့အစည်းတွေနဲ့ နိုင်ငံရေး တွေ့ဆုံဆွေးနွေးမှု ကနေတဆင့် သိသာမြင်သာတဲ့ ပြောင်းလဲတိုးတက်မှုကို ပြသနိုင်ဖို့က အရေးကြီးတယ်၊ တဖြည်းဖြည်းနဲ့မှ အားလုံး ပါဝင်တဲ့ နိုင်ငံရေးဖြေရှင်းမှု ဖြစ်လာအောင် ကြိုးစားသင့်တယ်လို့ မြင်ပါတယ်” ဟု CNI သတင်းဌာနသို့ ပြောသည်။

ဒီမိုကရေစီအရေးတောင်းဆိုနေကြစဉ်

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် မြန်မာ့တပ်မ‌တော်က ဒေါ်အောင်ဆန်းစုကြည် ဦးဆောင်သည့် NLD အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချ၍ နိုင်ငံတော်ကို အရေးပေါ် ကြေညာထားသည်။

ထို့နောက် တပ်မတော်အား ပြန်လည်ဖြုတ်ချနိုင်ရေး ဒီမိုကရေစီအင်အားစုများမှ ပြည်သူ့ကာကွယ်ရေးတပ် (PDF) ကို ဖွဲ့စည်းကာ နွေဦးတော်လှန်ရေးကို ဆင်နွှဲလျက်ရှိသည်။

လက်ရှိ မြန်မာ့နိုင်ငံရေး အကျပ်အတည်းကို ဖြေရှင်းနိုင်ရေးမှာ ပဋိပက္ခတွင် ပါဝင်နေသည့် အဖွဲ့အစည်းများ အားလုံး ပါဝင်သော တွေ့ဆုံဆွေးနွေးမှုဖြစ်မှသာ ဖြေရှင်းနိုင်မည်ဖြစ်ကြောင်း ငြိမ်းချမ်းရေး လုပ်ငန်းစဉ် ဦးဆောင် အဖွဲ့(PPST)မှ ပြောခွင့်ရပုဂ္ဂိုလ် ဗိုလ်မှူးကြီးစောကျော်ညွန့်က CNI သတင်းဌာနသို့ ပြောသည်။

၎င်းက “အရင်တုန်းက ကျနော်တို့ ကြုံခဲ့ဖူးတဲ့ နိုင်ငံရေး အကျပ်အတည်းတွေနဲ့ စာလိုက်လို့ရှိရင် ဒီတစ်ကြိမ်က တော့ အင်မတန်မှ ခက်ခဲ၊ နက်နဲကျယ်ပြန့်တဲ့ အခင်းအကျင်းတစ်ခုလို့ ပြောလို့ရတယ်၊ ဘယ်လိုပဲဖြစ်ဖြစ် ဘယ်လိုပဲ ခက်ခက် ဘယ်လောက်ပဲ အကျပ်အတည်း ရှိနေပါစေ၊ ဘယ်လောက်ပဲ စိန်ခေါ်မှုတွေ ရှေ့မှာ ရှိနေပါစေ၊ ကျနော်တို့ နားလည်တာက ဒါနိုင်ငံရေးကြောင့် ဖြစ်ပေါ်လာတဲ့ အခက်အခဲတွေ၊ စိန်ခေါ်မှုတွေ ပြဿနာတွေလို့ အဲဒီလိုပဲ ခံယူ တယ်၊ နိုင်ငံရေးပြဿနာကို နိုင်ငံရေး တွေ့ဆုံဆွေးနွေးခြင်းနည်းနဲ့ ဖြေရှင်းခြင်း နည်းကသာလျှင် နိုင်ငံတကာရဲ့ လက်ရှိ အခင်းအကျင်း အရသော်လည်းကောင်း အတွေ့အကြုံ ဖြတ်သန်းမှု အရသော်လည်းကောင်း ကျနော်တို့ ပြည်ထောင်စုအတွက် ထိခိုက်နစ်နာမှု အနည်းဆုံးနဲ့ ကျော်ဖြတ်နိုင်မယ့် နည်းလမ်းတစ်ခုလို့ ကျနော်တို့ နားလည် တဲ့ အတွက်ကြောင့်မို့လို့ ကျနော်တို့ အရင်တုန်းကလည်း သဘောတူခဲ့ပြီးသား အကုန်လုံးပါပဲ” ဟု ပြောသည်။

လက်နက်ကိုင်အဖွဲ့ တစ်ဖွဲ့ကိုတွေ့ရစဉ်

လက်ရှိ အနေအထားအရ အားလုံးပါဝင်သည့် နိုင်ငံရေး တွေ့ဆုံဆွေးနွေးမှု အခင်းအကျင်း ဖြစ်ပေါ်လာရန် အခက် အခဲများ ရှိနေကြောင်း သို့သော်လည်း ပြည်ထောင်စုအကျိုးကို ရှေ့ရှုပြီး အားလုံးဝိုင်းဝန်း လုပ်ဆောင်ကြရန် လိုအပ်ကြောင်း ၎င်းက ပြောသည်။

၂၀၂၁ ခုနှစ်၊ ဖေဖော်ဝါရီအတွင်း ပြောင်းလဲခဲ့သည့် နိုင်ငံရေး ပဋိပက္ခများကြောင့် နိုင်ငံတစ်ဝှမ်း လက်နက်ကိုင် ပဋိပက္ခများ ကျယ်ကျယ်ပြန့်ပြန့် ဖြစ်‌ပေါ်နေသည်။ ထိုလက်နက်ကိုင် ပဋိပက္ခကြောင့် တိုင်းပြည်၏ နိုင်ငံရေး၊ ငြိမ်းချမ်းရေး၊ စီးပွားရေး၊ ပညာရေး၊ ကျန်းမာရေး စသော ကဏ္ဍများမှာလည်း အဖက်ဖက်က ယိုယွင်းကျဆင်း လျက်ရှိနေသည်။

အဆိုပါ ကိစ္စရပ်များအား ဖြေရှင်းနိုင်ရေး ပြည်တွင်းရှိ အဖွဲ့အစည်းအချို့၊ နိုင်ငံရေးပါတီများ၊ တိုင်းရင်းသား လက်နက်ကိုင် အဖွဲ့အစည်းများ၊ နိုင်ငံတကာ အဖွဲ့အစည်းများက ဖြေရှင်းနိုင်ရေး ကြိုးပမ်းလျက်ရှိသည်။

CNI News

၂၀၂၃ ခုနှစ်၊ ဇွန်လ ၁၉

ထိုင်းနိုင်ငံက ကမကထ ပြုလုပ်သည့် မြန်မာ့အရေး အလွတ်သဘော ဆွေးနွေးပွဲသို့ နစက၏ နိုင်ငံခြားရေးဝန် ကြီး ဦးသန်းဆွေ တက်ရောက် ဆွေးနွေးခဲ့သလို တရုတ်နှင့် အိန္ဒိယမှ ကိုယ်စားလှယ်များလည်း တက်ရောက်ခဲ့ ကြောင်း သိရသည်။

ထိုင်းနိုင်ငံ ဒုတိယဝန်ကြီးချုပ်နှင့် နိုင်ငံခြားရေးဝန်ကြီးဖြစ်သူ မစ္စတာ ဒွန်ပရာမွန်းဝီနိုင်း ဦးဆောင်၍ မြန်မာ့အရေး အလွတ်သဘော ဆွေးနွေးပွဲကို ၂၀၂၃ ခုနှစ်၊ ဇွန်လ ၁၉ ရက်နေ့က ထိုင်းနိုင်ငံ၊ ပတ္တရားမြို့၌ ကျင်းပခဲ့သည်။

အဆိုပါ ဆွေးနွေးပွဲသို့ နစက၏ နိုင်ငံခြားရေးဝန်ကြီး ဦးသန်းဆွေ တက်ရောက်ခဲ့ပြီး အာဆီယံ၏ တူညီဆန္ဒ ၅ ချက် အကောင်အထည်ဖော်မှု၊ နိုင်ငံအတွင်း တည်ငြိမ်အေးချမ်းရေး၊ ဒီမိုကရေစီ ပြန်လည်ထူထောင်ရေးကိစ္စ များကို နစက၏ ရှေ့လုပ်ငန်းစဉ် ၅ ရပ်နှင့်အညီ ဆောင်ရွက်နေမှုများအား ရှင်းလင်းပြောကြားခဲ့ကြောင်း၊ ထိုဆောင်ရွက် နေမှု များအပေါ် တက်ရောက်လာသည့် နိုင်ငံအသီးသီးမှ ကိုယ်စားလှယ်များက အပြန်အလှန် ဆွေးနွေးခဲ့သည်ဟု သတင်းထုတ်ပြန်လာခဲ့သည်။

ထိုင်းနိုင်ငံ ဒုတိယဝန်ကြီးချုပ်နှင့် နိုင်ငံခြားရေးဝန်ကြီးဖြစ်သူ မစ္စတာ ဒွန်ပရာမွန်းဝီနိုင်

မြန်မာ့အရေး ဆွေးနွေးပွဲသို့ တရုတ်၊ အိန္ဒိယ အပါအဝင် အာဆီယံ အဖွဲ့ဝင်နိုင်ငံများဖြစ်သည့် ဘရူနိုင်း၊ ကမ္ဘော ဒီးယား၊ လာအို၊ ဖိလစ်ပိုင်၊ ဗီယက်နမ်တို့မှ နိုင်ငံခြားရေးဝန်ကြီးများ၊ အထူးကိုယ်စားလှယ်၊ သံအမတ်ကြီးများ တက်ရောက်ခဲ့ကြကြောင်း သိရသည်။

ဒေါ်အောင်ဆန်းစုကြည် ဦးဆောင်သည့် NLD အစိုးရသည် ၂၀၂၀ အထွေထွေရွေးကောက်ပွဲ၌ မဲစာရင်း အငြင်းပွား မှုများ ရှိနေသည့်အပေါ် စစ်ဆေးပေးရန် မြန်မာ့တပ်မတော်၏ တောင်းဆိုမှုကို လျစ်လျူရှု၍ အစိုးရဖွဲ့စည်းရေး ကြိုးပမ်းခြင်းကြောင့် ၂၀၂၁ ခုနှစ်၊ ဖေဖော်ဝါရီ ၁ ရက်တွင် ဖြုတ်ချခံခဲ့ရသည်။

၂၀၂၃ ခုနှစ်က မြန်မာနိုင်ငံကို ရောက်လာတဲ့ တရုတ်နိုင်ငံခြားရေးဝန်ကြီးနဲ့ နိုင်ငံခြားရေးဝန်ကြီး ဦးသန်းဆွေကိုတွေ့ရစဉ်

ထို့နောက် မြန်မာနိုင်ငံအား အရေးအပေါ် အခြေအနေ ကြေညာကာ မြန်မာ့တပ်မတော်က နိုင်ငံတော်စီမံ အုပ်ချုပ် ရေးကောင်စီကို ဖွဲ့စည်း၍ အုပ်ချုပ်ရေး၊ တရားစီရင်ရေး၊ ဥပဒေပြုတို့ကို ဆောင်ရွက်နေသည်။

တခြားတစ်ဖက်မှာတော့ မြန်မာ့တပ်မတော်၏ ဒေါ်အောင်ဆန်းစုကြည် အစိုးရအား ဖြုတ်ချခြင်းကို ဆန့်ကျင် ကန့်ကွက်မှုများနှင့်အတူ မြန်မာ့တပ်မတော်ကို ပြန်လည်ဖြုတ်ချနိုင်ရေး လက်နက်ကိုင် တော်လှန်ရေး ဆင်နွှဲနေ ကြသည်။

ထို့ကြောင့် မြန်မာနိုင်ငံအတွင်းမှာ လူသေဆုံးမှုများနှင့် နေရပ်စွန့်ခွာ ထွက်ပြေး တိမ်းရှောင်နေကြရမှုများ ပေါ်ပေါက်နေသလို နေအိမ်များ မီးရှို့ဖျက်ဆီးခံနေရသည်။

CNI News

၂၀၂၃ ခုနှစ်၊ ဇွန်လ ၁၉

မြောက်ဥက္ကလာပမြို့နယ် (ဈ)ရပ်ကွက်၊ မေဒါဝီလမ်းရှိ မြတ်မောင် စိန်ရွှေရတနာဆိုင်သို့ ဓားပြတိုက်ခဲ့သူများကို ဇွန်လ ၁၈ ရက်နေ့မှာပဲ ဖမ်းဆီးရမိခဲ့သည်ဟု နစက-က သတင်း ထုတ်ပြန်သွားသည်။

၂၀၂၃ ခုနှစ်၊ ဇွန်လ ၁၈ ရက်နေ့ ညနေပိုင်းက မြောက်ဥက္ကလာပမြို့နယ်၊ (ဈ)ရပ်ကွက်၊ မေဒါဝီလမ်းရှိ မြတ်မောင် စိန်ရွှေရတနာဆိုင်ကို အမျိုးသား ၃ ဦးမှ ပစ္စတို ၂ လက်ဖြင့် ဝင်ရောက်လာပြီး ရွှေထည်ပစ္စည်းမျိုးစုံ (ကာလတန်ဖိုး ငွေကျပ် သိန်း ၁၆,၆၀၀ ခန့်)တို့အား ဓားပြတိုက်လုယက် ယူဆောင်သွားခဲ့သည်။

ထို့နောက် ဇွန်လ ၁၈ ရက် ညပိုင်းတွင် ဓားပြတိုက် လုယက်မှုတွင် ပါဝင်သည့် ကိုကိုအောင်နှင့် ပပလှိုင် ဆိုသူတို့ ၂ ဦးအား ဗဟန်းမြို့နယ်၊ ငါးထပ်ကြီးဘုရား အနောက်ရပ်ကွက်၊ ရွှေဂုံတိုင်လမ်းရှိ အကယ်ဒမီ ဟိုတယ်၌ ဖမ်းဆီးရမိခဲ့သည်။

ဖမ်းဆီးခံရသည့် ကိုကိုအောင်၏ ထွက်ဆိုချက်အရ ကောင်းထက်စံ(ခ)တရုတ်ကြီး၊ ကျော်ဇင်လတ်၊ ကောင်းမြတ် (ခ) Blank၊ ဖြိုးကိုကို၊ ကျော်ဇင်ဝေတို့အား M4A1 သေနတ် ၂ လက်၊ Sig Sauer ပစ္စတို ၂ လက်၊ ကျည် အိမ်မျိုးစုံ ၈ ခု၊ 91 လက်ပစ်ဗုံး ၂ လုံး၊ ၅.၅၆ ကျည် ၃၄၀ တောင့်၊ 9 MM Luger ကျည် ၂၁၀ တောင့် အပါအဝင် ရွှေထည်ပစ္စည်း များနှင့်အတူ မြောက်ဥက္ကလာပမြို့နယ်တွင် ဖမ်းဆီးရမိခဲ့သည်ဟု နစက၏ ထုတ်ပြန် ချက်မှာ ဖော်ပြထားသည်။

အလားတူ ဓားပြတိုက်ခံရာတွင် ပါဝင်သည့် စောဂျိုးဇက်(ခ)ချိုတိုးနှင့် ထွန်းထွန်းနိုင်တို့အား မအူပင်မြို့နယ်၊ ခနောင်အုပ်စု၊ ကျွဲလန်းကျေးရွာ၌ M-16 ၁ လက်နှင့်အတူ ဖမ်းဆီးရမိခဲ့ကြောင်း သိရသည်။

ထို့ကြောင့် မြတ်မောင်ရွှေဆိုင်အား ဓားပြတိုက်ရာတွင် ပါဝင်ကြသည့် အမျိုးသား ၈ ဦးနှင့် အမျိုးသမီး ၁ ဦးအား M-4A1 သေနတ် ၂ လက်၊ M-16 ၁ လက်၊ Sig Sauer ပစ္စတို ၂ လက်၊ ကျည်အိမ်မျိုးစုံ ၈ ခု၊ 91 လက်ပစ်ဗုံး ၂ လုံး၊ ၅.၅၆ ကျည် ၃၄၀ တောင့်၊ 9MM Luger ကျည် ၂၁၀ တောင့် အပါအဝင် ရွှေထည်ပစ္စည်းများနှင့်အတူ ဖမ်းဆီးရမိခဲ့ ကြောင်း သိရသည်။

CNI News

၂၀၂၃ ခုနှစ်၊ ဇွန်လ ၁၉

မြန်မာပြည်သူများ လိုလားတောင့်တသော ဒီမိုကရေစီရေး၊ လူ့အခွင့်အရေး၊ ငြိမ်းချမ်းရေး ပန်းတိုင်သို့ ရောက်ရှိရေး ကြိုးပမ်းအားထုတ်ရာတွင် ဒေါ်အောင်ဆန်းစုကြည်သည် နိုင်ငံရေးနည်းလမ်းကိုသာ တစိုက် မတ်မတ် စွဲကိုင်ခဲ့ပါ သည်ဟု အမျိုးသားဒီမိုကရေစီအဖွဲ့ချုပ်(NLD)၏ ဗဟိုအလုပ်ကော်မတီက ဇွန်လ ၁၉ ရက် တွင် ထုတ်ပြန်ခဲ့သည်။

ဇွန်လ ၁၉ ရက်နေ့တွင် ကျရောက်သည့် NLD ဥက္ကဋ္ဌ ဒေါ်အောင်ဆန်းစုကြည်၏ အသက် ၇၈ နှစ်ပြည့် မွေးနေ့ အထိမ်းအမှတ် သဝဏ်လွှာပေးခဲ့သူများကို ပြန်လည် ကျေးဇူးတင်ကြောင်း ထုတ်ပြန်သည့် ထုတ်ပြန်ချက်တွင် အထက်ပါ အတိုင်းဖော်ပြထားသည်။

 NLD CWC ထုတ်ပြန်ချက်ကိုတွေ့ရစဉ်

NLD ဗဟိုအလုပ်ကော်မတီက “ မြန်မာပြည်သူများ လိုလားတောင့်တသော ဒီမိုကရေစီရေး၊ လူ့အခွင့်အရေး၊ ငြိမ်းချမ်းရေး ပန်းတိုင်သို့ ရောက်ရှိရေးကြိုးပမ်း အားထုတ်ရာတွင် ဒေါ်အောင်ဆန်းစုကြည်သည် နိုင်ငံရေးနည်း လမ်းကိုသာ တစိုက်မတ်မတ် စွဲကိုင်ခဲ့ပါသည်။ ယနေ့ထက်တိုင် ပြည်သူလူထု တစ်ရပ်လုံး၏ ချစ်ခင်မြတ်နိုးမှု၊ ယုံကြည်အားကိုးမှုတို့ဖြင့် လူထုခေါင်းဆောင်ဟု သတ်မှတ်ခံထားရသူဖြစ်သလို အနိုင်ရပါတီ ခေါင်းဆောင် လည်း ဖြစ်သော ဒေါ်အောင်ဆန်းစုကြည်သည် မြန်မာ့အရေး ပြဿာနာများကို ဖြေရှင်းရာတွင် ခြွင်းချန်းထား၍ မရသော၊ အရေးပါဆုံးသော ပုဂ္ဂိုလ်တစ်ဦးလည်း ဖြစ်သည်ဟု မိမိတို့ အမျိုးသားဒီမိုကရေစီအဖွဲ့ချုပ်မှ ရှုမြင်ပါ သည်”ဟု ပြောသည်။

ဒေါ်အောင်ဆန်းစုကြည်သည် နိုင်ငံရေးနည်းလမ်းကိုသာ တစိုက်မတ်မတ် စွဲကိုင်ခဲ့သည်ဆိုသော NLD ဗဟိုအလုပ် ကော်မတီ၏ ထုတ်ပြန်ချက်သည် လက်ရှိ NUG- PDF- CRPH တို့ လျှောက်လှမ်းနေသည့် လမ်းစဉ်နှင့် ဆန့်ကျင် ဘက်ဖြစ်နေသည်ကို ထောက်ပြနေသလိုဖြစ်နေကြောင်း၊ NUG- PDF- CRPH လျှောက်လှမ်းနေသည့် လက်နက် ကိုင် လမ်းစဉ်ကို ဒေါ်အောင်ဆန်းစုကြည်က လက်ခံမှာမဟုတ်ဟု သွယ်ဝှိုက်၍ ပြောနေသကဲ့ သို့ ဖြစ်နေကြောင်း၊ လက်ရှိ မြန်မာပြည်သူ အများစုသည် လက်နက်ကိုင် တော်လှန်ရေးဖြင့် မြန်မာ့တပ်မတော် ကို ဖြုတ်ချလိုသော စိတ်ဆန္ဒက ပြင်းပြနေသည့်အပေါ်မှာလည်း ယခု ထုတ်ပြန်ချက်က တွေ့ဆုံ ဆွေးနွေးရေး လမ်းကြောင်းကို အစပျိုး နေသကဲ့သို့ ဖြစ်နေကြောင်း နိုင်ငံရေးလေ့လာသုံးသပ်သူ တစ်ဦးက ပြောသည်။

NLD လွှတ်တော်အမတ်ဖြစ်တဲ့ NUG ရဲ့ ကာကွယ်ရေး၀န်ကြီး ဦးရည်မွန်နဲ့ PDF ရဲဘော်များကိုတွေ့ရစဉ်

၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆို ကာ ဒေါ်အောင်ဆန်းစုကြည် ဦးဆောင်သည့် NLD အစိုးရအား မြန်မာ့တပ်မတော်က ဖြုတ်ချ၍ နိုင်ငံတော်ကို အရေး ပေါ် ကြေညာထားသည်။

ထို့နောက် ဦးဝင်းမြင့်၊ ဒေါ်အောင်ဆန်းစုကြည်၊ ဦးဝင်းထိန်၊ ဒေါက်တာဇော်မြင့်မောင်တို့ကို ဖမ်းဆီး ထိန်းသိမ်းခဲ့သည်။

အဆိုပါ အခြေအနေမှာပဲ NLD မှ ဗဟိုအလုပ်အမှုဆောင် တချို့နှင့် လွှတ်တော်အမတ် တချို့သည် အမျိုးသား ညီညွတ်ရေးအစိုးရ(NUG)နှင့် ပြည်သူ့ကာကွယ်ရေးတပ်ဖွဲ့(PDF)ကို ဖွဲ့စည်း၍ မြန်မာ့တပ်မတော်အား ဖြုတ်ချ ရေး လက်နက်ကိုင် တော်လှန်ရေးကို ဆင်နွှဲလျက်ရှိသည်။

အလားတူ NUG ထဲတွင် ဖမ်းဆီးထိန်းသိမ်းခံထားရသော ဒေါ်အောင်ဆန်းစုကြည်နှင့် ဦးဝင်းမြင့်တို့ကိုလည်း ထည့်သွင်းထားသည်။

CNI News 

၂၀၂၃ ခုနှစ်၊ ဇွန်လ ၁၉

မြန်မာ့နိုင်ငံရေး ပြဿနာများကို ဖြေရှင်းရာတွင် ဒေါ်အောင်ဆန်းစုကြည်နှင့် တွေ့ဆုံ ဆွေးနွေးမှ လမ်းစရရှိနိုင် မည်ဟု အဝေးရောက်များဖြင့် ဖွဲ့စည်းထားသည့် အမျိုးသားဒီမိုကရေစီအဖွဲ့ချုပ်(NLD) ဗဟိုအလုပ်ကော်မတီက ဇွန်လ ၁၉ ရက်နေ့တွင် ထုတ်ပြန်ခဲ့သည်။

ယနေ့ (ဇွန်လ ၁၉ ရက်)သည် ဒေါ်အောင်ဆန်းစုကြည်၏ ၇၈ နှစ်ပြည့် မွေးနေ့ဖြစ်ရာ မွေးနေ့ဆုတောင်း ထုတ်ပြန်ရင် အထက်ပါအတိုင်း ထည့်သွင်း ဖော်ပြခဲ့ခြင်း ဖြစ်သည်။

ယနေ့ထက်တိုင် ပြည်သူလူထုတစ်ရပ်လုံး၏ ချစ်ခင်မြတ်နိုးမှု၊ ယုံကြည်အားကိုးမှု တို့ဖြင့် လူထုခေါင်းဆောင်ဟု သတ်မှတ်ခံထားရသူဖြစ်သလို အနိုင်ရပါတီ ခေါင်းဆောင်လည်း ဖြစ်သော ဒေါ်အောင်ဆန်းစုကြည်သည် မြန်မာ့အရေးပြဿနာများကို ဖြေရှင်းရာတွင် ခြွင်းချန်ထား၍မရသော အရေးပါဆုံးသော ပုဂ္ဂိုလ်တစ်ဦးဖြစ်သည် ဟု NLD ဗဟိုအလုပ်ကော်မတီက ထုတ်ပြန်ခဲ့သည်။

မြန်မာ့ဒီမိုကရေစီ တောင်းဆိုနေကြစဉ်

၎င်းတို့က “သို့ဖြစ်ပါ၍ စစ်အာဏာသိမ်းမှုကြောင့် ပေါ်ပေါက်လာသော မြန်မာ့နိုင်ငံရေး ပြဿာနများကို ဖြေရှင်း ရာတွင် ဒေါ်အောင်ဆန်းစုကြည်နှင့် တွေ့ဆုံ ဆွေးနွေးမှု မပါဝင်ဘဲ ပြေလည်ရေး လမ်းစ ရရှိနိုင်မည်မဟုတ်ဟု ယုံကြည်ပါသောကြောင့် ဒေါ်အောင်ဆန်းစုကြည် အပါအဝင် မတရား ဖမ်းဆီးထိန်းသိမ်းခံထားရသော နိုင်ငံရေး အကျဉ်းသားများ အားလုံး ခြွင်းချက်မရှိ အမြန်ဆုံး လွတ်မြောက်နိုင်ရေးအတွက် မိတ်ဆွေနိုင်ငံများနှင့်အတူ ပြည်တွင်းပြည်ပ မိတ်ဖက်အင်အားစုများ အားလုံးနှင့်ထိရောက်စွာ ပူးပေါင်းဆောင်ရွက်သွားမည်”ဟု ထုတ်ပြန် ချက်တွင် ပြောထားသည်။

၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆို ကာ ဒေါ်အောင်ဆန်းစုကြည် ဦးဆောင်သည့် NLD အစိုးရအား မြန်မာ့တပ်မတော်က ဖြုတ်ချ၍ နိုင်ငံတော်ကို အရေးပေါ် ကြေညာထားသည်။

မြန်မာ့တပ်မတော်ကို တိုက်ခိုက်နေသည့် တော်လှန်ရေးတပ်ဖွဲ့ကိုတွေ့ရစဉ်

ထို့နောက် ဦးဝင်းမြင့်၊ ဒေါ်အောင်ဆန်းစုကြည်၊ ဦးဝင်းထိန်၊ ဒေါက်တာဇော်မြင့်မောင်တို့ကို ဖမ်းဆီး ထိန်းသိမ်းခဲ့ သည်။

လက်ရှိ မြန်မာ့နိုင်ငံရေး အကျပ်အတည်းကို ဒေါ်အောင်ဆန်းစုကြည်နှင့် မြန်မာ့တပ်မတော် ဆွေးနွေးဖြေရှင်းပါ ကလည်း အလုံးစုံ ဖြေလည်နိုင်ခြေနည်းပါးကြောင်း၊ တိုင်းရင်းသား အင်အားစုများနှင့် ပြည်သူလူထုကို ကိုယ်စား ပြုသော အင်အားစုများ ပါဝင်သည့် ဆွေးနွေးရေး အခင်းအကျင်းကို ဖန်တီးမှ အဆင်ပြေနိုင်မည် ဖြစ်ကြောင်း၊ တပ်မတော်သည် ဒေါ်အောင်ဆန်းစုကြည်ကို နိုင်ငံရေးထဲ ပြန်လည် ခေါ်သွင်းရန် အစီအစဉ် မရှိ တော့သည့် အခြေအနေဖြစ်နေကြောင်း မြန်မာ့နိုင်ငံတွင် ပါဝင်ဆောင်ရွက်နေသူ တစ်ဦးက ပြောသည်။

CNI News

၂၀၂၃ ခုနှစ်၊ ဇွန်လ ၁၉

မြန်မာပြည်ကို မည်ကဲ့သို့သော ဖက်ဒရယ်ပုံစံဖြင့် တည်ဆောက်မလဲဆိုသည်ကို နိုင်ငံရေးအဖွဲ့အစည်း အပါအဝင် တိုင်းရင်းသား အင်အားစုများနှင့် နိုင်ငံရေး အသိုင်းအဝိုင်းကြား ဆွေး‌နွေး ငြင်းခုံနေကြသည်။

ကမ္ဘာပေါ်တွင် ဖက်ဒရယ်စနစ်ကို မတူညီသော ပုံစံမျိုးဖြင့် ကျင့်သုံးလျက်ရှိနေကြောင်း၊ မြန်မာနိုင်ငံကို အိန္ဒိယက ကျင့်သုံးနေသည့် ဖက်ဒရယ်စနစ်ဖြင့် သွားမည်ဆိုပါက လွယ်ကူမည်ဖြစ်ကြောင်း မြန်မာ့နိုင်ငံရေး လေ့လာသုံးသပ် သူ ဦးရဲထွန်းက CNI သတင်းဌာနသို့ ပြောသည်။

“ကိုက်ညီမှု ရှိလားဆိုတော့ အခု ၂၀၀၈ အခြေခံဥပဒေက အဲဒီ အိန္ဒိယအခြေခံဥပဒေနဲ့ အိန္ဒိယက ကျင့်သုံးနေတဲ့ စနစ်နဲ့ အများဆုံး တူတယ်လို့ ပြောရမှာပေါ့၊ သူက ဖက်ဒရယ်စနစ်မှာ ၃ မျိုးရှိတယ်၊ ဒေသ၊ ပထဝီကို အခြေခံတဲ့ ယူနစ်တွေရဲ့ နာမည်ပေါ့၊ ယူနစ်တွေ ပါဝင်တဲ့ ဒေသ၊ ပထဝီကို အခြေခံတဲ့ အမျိုးအစားရယ်၊ နောက်တစ်ခါ တိုင်းရင်းသားလူမျိုးတွေကို အခြေခံတဲ့ ethnic ဖက်ဒရယ်မော်ဒယ်ပေါ့နော်၊ အဲဒါရယ် နောက်တစ်ခါ ပေါင်းစပ် ထားတဲ့ စနစ်ရယ်၊ ဆိုတော့ အခုအိန္ဒိယက ပေါင်းစပ်ထားတဲ့ စနစ်ပေါ့၊ တချို့ ပြည်နယ်တွေက လူမျိုးနာမည်ကို ကိုယ်စားပြုတယ်၊ တချို့နာမည်တွေက ဒေသ၊ ပထဝီဒေသန္တရ နာမည်ကိုပဲ ကိုယ်စားပြုတာ၊ ဆိုတော့ မြန်မာက ၂၀၀၈ အခြေခံဥပဒေကလည်း အဲဒီပုံစံဖြစ်နေတယ်၊ တချို့ပြည်နယ်တွေက တိုင်းရင်းသား လူမျိုးနာမည်ကို ကိုယ်စားပြုပြီးတော့ တချို့ တိုင်းဒေသကြီးတွေကတော့ တချို့ယူနစ်တွေဖြစ်တဲ့ တိုင်းဒေသကြီးတွေကကြတော့ ကျနော်တို့ ပထဝီဒေသနာမည်ကို ကိုယ်စားပြုတာပေါ့၊ ဆိုတော့ အိန္ဒိယနဲ့ တော်တော်လေး နီးစပ်နေတော့ ပြင်မယ် ဆိုလို့ရှိရင်လည်း အိန္ဒိယပုံစံရောက်အောင် ပြင်မယ်ဆိုလို့ရှိရင် လွယ်မှာပေါ့ဗျာ၊သိပ်ပြီးတော့ အခက်အခဲမရှိဘူးပေါ့၊ အဲဒီလိုပြောလို့ ရပါတယ်” ဟု ပြောသည်။

ပြီးခဲ့သည့် ဇွန်လ ၆ ရက်နှင့် ၈ ရက်နေ့များက အပစ်ရပ် တိုင်းရင်းသား လက်နက်ကိုင် ၇ ဖွဲ့၊ နစက ကိုယ်စားလှယ် များ၊ အိန္ဒိယအစိုးရတို့ ပူးပေါင်း၍ အိန္ဒိယနိုင်ငံတွင် ကျင့်သုံးနေသည့် ဖက်ဒရယ်စနစ်အပေါ် လေ့လာဆွေးနွေးရေး ဖက်ဒရယ်ရေးရာ အလုပ်ရုံ ဆွေးနွေးပွဲ တစ်ရပ်ကို ကျင်းပခဲ့သေးသည်။

၂၀၂၃ ခုနှစ်၊ ဇွန်လ ၈ ရက်နေ့က အိန္ဒိယဖက်ဒရယ်အရေး အလုပ်ရုံ ဆွေးနွေးပွဲ ကျင်းပနေစဉ်

အနာဂတ် တိုင်းပြည်ကို ဖက်ဒရယ်ပြည်ထောင်စု တည်ဆောက်ရာတွင် တိုင်းရင်းသားများအား လုပ်ပိုင်ခွင့် များများ ပေးထားသင့်ကြောင်း လီဆူအမျိုးသားဖွံ့ဖြိုးတိုးတက်ရေးပါတီ (ဒူးလေးပါတီ) မှ ဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။

၎င်းက “ကျနော်တို့ နိုင်ငံကတော့ ဖက်ဒရယ်ဆိုရင်တော့ ဗဟိုအစိုးရအနေနဲ့ သူ့ရဲ့ လုပ်ပိုင်ခွင့်တွေကို တကယ် တမ်း အရေးကြီးတဲ့ ကဏ္ဍလောက်ပဲ ယူပြီးမှ ကျန်တာတော့ ပြည်နယ်ရဲ့ လုပ်ပိုင်ခွင့်တွေ၊ တိုင်း‌ဒေသကြီးတွေရဲ့ လုပ်ပိုင်ခွင့်တွေကို များများပေးတဲ့ အဲဒီလိုမျိုး ဖက်ဒရယ်စနစ် ဖြစ်နိုင်ရင်‌တော့ ကျနော်တို့ တိုင်းပြည်က ပိုပြီးမှ ငြိမ်းချမ်းမယ်လို့ မြင်တယ်လေ၊ မဟုတ်ဘူးဆိုရင်တော့ အကုန်လုံးက ဖက်ဒရယ်ဆိုတာတော့ ရှိတယ်လေ၊ လုပ်ပိုင် ခွင့်တွေ ဗဟိုအစိုးရက အများကြီး ထိန်းချုပ်ပြီးမှ ပြည်နယ်တွေ ကျန်တဲ့ ဒေသတွေ နယ်မြေတွေကိုတော့ နည်း နည်းလေး ခွဲဝေပေးတဲ့ ဖက်ဒရယ်မျိုးကြတော့လည်း အဆင်မပြေနိုင်ဘူးပေါ့နော်၊ အခု လက်နက်ကိုင် အဖွဲ့အစည်း တွေကလည်း တချို့က လုံးဝ ဖက်ဒရိတ်(ကွန်ဖက်ဒရိတ်)ပုံစံသွားချင်တဲ့ ပုံစံမျိုးလည်း ရှိတယ်၊ ဖက်ဒရယ်နဲ့ သွား ချင်တဲ့ သူလည်း ရှိတယ်၊ ဖက်ဒရိတ်(ကွန်ဖက်ဒရိတ်)ပုံစံ မဟုတ်ရင်တောင်မှ အနည်းဆုံး ဖက်ဒရယ်နဲ့ လုပ်ပိုင်ခွင့် များများနဲ့ ပေးတဲ့ စနစ်ကိုတော့ ကျနော်တို့ နိုင်ငံကိုတော့ ပိုပြီးဖြစ်သင့်တယ်လို့ ကျနော်တော့ မြင်တယ်” ဟု ပြော သည်။

မိမိတို့ တိုင်းရင်းသား လက်နက်ကိုင် အဖွဲ့အစည်းမှ ဖက်ဒရယ်စနစ်များကို လေ့လာနေကြကြောင်း၊ မိမိတို့ဘက်မှ လည်း ဖွဲ့စည်းပုံအတွက် ပြင်ဆင်မှု ရှိထားကြောင်း ရခိုင်ပြည်လွတ်မြောက်ရေးပါတီ (ALP) မှ ဥက္ကဋ္ဌ ဒေါ်စောမြရာ ဇာလင်းက CNI သတင်းဌာနသို့ ပြောသည်။

၂၀၂၃ ခုနှစ်၊ ဇွန်လ ၈ ရက်နေ့က အိန္ဒိယဖက်ဒရယ်အရေး အလုပ်ရုံ ဆွေးနွေးပွဲ ကျင်းပနေစဉ်

၎င်းက “ဖက်ဒရယ်နိုင်ငံ ပေါင်းစုံကိုတော့ EAO တွေက လေ့လာကြပါတယ်၊ ဆွစ်ဇာလန်နိုင်ငံကိုလည်း လေ့လာကြ တယ်၊ ဂျာမဏီနိုင်ငံကိုလည်း လေ့လာကြတယ်၊ ပြီးလို့ရှိရင် အမေရိကန်နိုင်ငံရဲ့ ဖွဲ့စည်းပုံကိုလည်း လေ့လာကြပါ တယ်။ 

လေ့လာကြတော့ ဘယ်နိုင်ငံရဲ့ ဖွဲ့စည်းပုံကတော့ ကျမတို့နဲ့ သင့်တော်ပြီးတော့ တစ်သားတည်း ကျတယ် လို့ ဆိုတာထက် ကျမတို့ကတော့ ဖွဲ့စည်းပုံကို အကြမ်းတစ်ခုခုတော့ ပြင်ဆင်ထားကြတာရှိပါတယ်၊ EAO က ကျမ တို့ နိုင်ငံနဲ့ သင့်တော်မယ့် အနေအထား တစ်ခုပေါ့လေ၊ အဲဒီလို အချက်တွေကိုတော့ ကောက်နုတ်ပြီး ပြင်ဆင်ထား ကြတာရှိတယ်၊ နိုင်ငံတစ်နိုင်ငံရဲ့ ဖွဲ့စည်းပုံဟာဆိုလို့ရှိရင် တခြားနိုင်ငံတစ်ခုနဲ့ ထပ်တူကျရမယ် ဆိုတာလည်း ဖြစ်ချင်မှ ဖြစ်မှာပါ၊ ဒါပေမဲ့ လေ့လာနေကြဆဲဖြစ်တယ်၊ ယတိပြတ်က‌တော့ ကျမတို့ ပြောလို့မရသေးဘူး။ ကျမတို့ EAO ၁၂ ဖွဲ့ကြားမှာ ဖွဲ့စည်းပုံတစ်ခု ပြင်ဆင်ထားတာတော့ ရှိပါတယ်၊ အဲဒီအထဲက အချက် ၂၃ ချက်ကိုတော့ ကျမတို့ ပြင်ဆင်ပြီးတော့ ဆွေးနွေးနေရတဲ့ အပိုင်းတွေလည်း ရှိပါတယ်” ဟု ပြောသည်။

လက်ရှိတွင် ဖက်ဒရယ်စနစ်ကို အမေရိကန်၊ ဂျာမနီ၊ ကနေဒါ၊ ဆွစ်ဇာလန်၊ ဩစတေးလျ၊ မက္ကဆီကို၊ နိုင်ဂျီးရီးယာ၊ စပိန်၊ အိန္ဒိယ၊ နီပေါနှင့် သီရိလင်္ကာ အပါအဝင် နိုင်ငံပေါင်း ၈၈ နိုင်ငံက မတူညီသော ပုံစံများဖြင့် ကျင်းသုံးကြ‌ ကြောင်း သိရသည်။