- By CNI
- Category: နိုင်ငံရေး
- Hits: 959
CNI News
၂၀၂၂ ခုနှစ်၊ ဧပြီ ၂၇
ရှမ်းပြည်နယ်မြောက်ပိုင်း နမ့်ဆန်မြို့နယ်တွင် ပလောင်ပြည် လွတ်မြောက်ရေးတပ်ဦး(PSLF/TNLA)က ဖမ်းဆီးသွားသည့် ကျောက်မဲခရိုင် တရားသူကြီးချုပ် အပါအဝင် လူ ၉ ဦးကို စစ်ဆေးနေဆဲဖြစ်ကြောင်း TNLA မှ ပြောရေးဆိုခွင့်ရှိသူ ဗိုလ်မှူး မိုင်းအိုက်ကျော်က CNI သတင်းဌာနသို့ ပြောသည်။
ပြီးခဲ့သည့် ဧပြီ ၁၉ ရက်က TNLA တပ်ဖွဲ့ဝင်များသည် နမ့်ဆန်မြို့နယ်အတွင်းမှာ မူးယစ်ဆေးဝါး ရောင်းဝယ်ဖောက်ကားရေး အခြေအနေများကို စစ်ဆေးနေစဉ် ကျောက်မဲခရိုင်တရားသူကြီးချုပ် အပါအဝင် လူ ၉ ဦးက နမ့်ဆန်မြို့သို့ ရုံးဖွင့်ပွဲ တစ်ခုကို တက်ရောက်ရန်အလာ လမ်းမှာ တွေ့ရှိ၍ ဖမ်းဆီး ခေါ်ဆောင်သွားကြောင်း သိရသည်။
“လောလောဆယ်တော့ ဘာမှ စိစစ်တာတော့ အသေးစိတ် ပြန်မတက်သေးဘူး၊ သူတို့ရဲ့ ဒီကျန်းမာရေး၊ လုံခြုံမှုကတော့ ဘာမှ စိုးရိမ်စရာ မရှိဘူး၊ စီစဉ်ဆုံးဖြတ် ထားတာလည်း မရှိသေးဘူး၊ အသေးစိတ်ကတော့ မတက်လာသေးဘူး။ ဆုံးဖြတ်ချက် ဘယ်လိုချမလဲ မသိသေးဘူး” ဟု ပြောသည်။
TNLA တပ်ဖွဲ့ကိုတွေ့ရစဉ်
ဖမ်းဆီး ထိန်းသိမ်း ခံထားရသူများမှာ ကျောက်မဲခရိုင် တရားသူကြီးချုပ် ဦးမောင်မောင်အေးနှင့် ဇနီးဖြစ်သူ ဒေါ်ခင်ဌေးရီ၊ တရားသူကြီး ၂ ဦး၊ ဥပဒေအရာရှိ ၁ ဦး၊ ဦးစီးရုံးစာရေး ၁ ဦး၊ ရှေ့နေ ၂ ဦး၊ အငယ်တန်း စာရေး ၁ ဦးတို့ ဖြစ်ကြောင်း သိရသည်။
TNLA သည် ရှမ်းပြည်နယ်မြောက်ပိုင်း၊ နမ့်ခမ်း၊ မူဆယ်၊ ကွတ်ခိုင်၊ သီပေါ၊ လားရှိုး၊ ကျောက်မဲ၊ နမ့်ဆန်၊ နမ္မတူ စသည့် မြို့နယ် များ အပါအဝင် မန္တလေး တိုင်းဒေသကြီး၊ မိုးကုတ်မြို့နယ်တို့တွင် လှုပ်ရှားလျက်ရှိသော ပလောင်လက်နက်ကိုင်အဖွဲ့ ဖြစ် သည်။
အဆိုပါ TNLA အဖွဲ့သည် အစိုးရနှင့် ပဏာမ အပစ်အခတ်ရပ်စဲရေး သဘောတူစာချုပ် (Bilateral) ထိုးနိုင်ရေး ဆွေးနွေးညှိနှိုင်း မှုများ ရှိနေသော အဖွဲ့ဖြစ်သည်။
- By CNI
- Category: နိုင်ငံရေး
- Hits: 567
CNI News
၂၀၂၂ ခုနှစ်၊ ဧပြီ ၂၇
ရန်ကုန်တိုင်းဝန်ကြီးချုပ်ဟောင်း ဦးဖြိုးမင်းသိန်းထံမှ ရွှေနှင့်ဒေါ်လာငွေ ယူခဲ့သည်ဟူသည့် အဂတိမှုဖြင့် ဒေါ်အောင်ဆန်းစုကြည်အား ဧပြီ ၂၇ ရက်နေ့တွင် နေပြည်တော်ရှိ အထူးတရားရုံး၌ ထောင်ဒဏ် ၅ နှစ်ချမှတ်လိုက်ကြောင်း နီးစပ်သည့် ရှေ့နေအသိုင်းအဝိုင်းမှ CNI သတင်းဌာနသို့ အတည်ပြုသည်။
အမှုအတွက် ဦးဖြိုးမင်းသိန်းနှင့် ဇနီးဖြစ်သူ ဒေါ်ခင်မိမိကြွယ်တို့ပါ တရားလိုဘက်မှ သက်သေအဖြစ် ထွက်ဆိုခဲ့ကြထားပြီးဖြစ်သည်။
ဒေါ်အောင်ဆန်းစုကြည်အနေဖြင့် ယခုအမှုအပါအဝင် ၎င်းအားစွဲဆို ချမှတ်ထားသည့် အမှုအားလုံးကို နောက်ဆုံးအဆင့်ထိ အယူခံဝင်သွားမည်ဖြစ်ကြောင်း သိရသည်။
ယခင်က ချမှတ်ခံထားရသည့် အမှုများအား အယူခံဝင်သော်လည်း အပယ်ခံရကြောင်း၊ အပယ်ခံရသော်လည်း အယူခံဝင်ခြင်းကို ထပ်မံလုပ်ဆောင်သွားမည်ဖြစ်ကြောင်းသိရသည်။
ယခုထောင်ဒဏ် ၅ နှစ်ချမှတ်ခံရသည့်အမှုသည် အဂတိလိုက်စားမှု တိုက်ဖျက်ရေးဥပဒေ ပုဒ်မ ၅၅ ဖြင့် စွဲဆိုခံထားရခြင်းဖြစ်ကာ အဂတိလိုက်စားမှု တိုက်ဖျက်ရေးကော်မရှင် စုံစမ်းရေးအရာရှိတစ်ဦးမှ တရားလိုအဖြစ် တိုင်တန်းထားသည့်အမှုလည်း ဖြစ်သည်။
ဒေါ်အောင်ဆန်းစုကြည်အနေဖြင့် ပို့ကုန်သွင်းကုန်ဥပဒေပုဒ်မ ၈၊ ဆက်သွယ်ရေးဥပဒေပုဒ်မ ၆၇ နှင့် သဘာဝဘေးအန္တရာယ်ဆိုင်ရာ စီမံခန့်ခွဲရေးဥပဒေပုဒ်မ ၂၅ ဖြင့် ၂ မှု၊ ရာဇသတ်ကြီးဥပဒေပုဒ်မ ၅၀၅-ခ စသည့် အမှု ၅ မှုအတွက် ထောင်ဒဏ် ၈ နှစ်ချမှတ်ခံထားရသည့်အပေါ် နစက မှ ထောင်ဒဏ် ၂ နှစ်လျော့ပေါ့ပေးထားသည်။
ယင်းအတွက် ယခုအသစ်ချမှတ်လိုက်သည့် ထောင်ဒဏ် ၅ နှစ်ပါဝင်ပါက ဒေါ်အောင်ဆန်းစုကြည်အပေါ် နစက မှ ချမှတ်ခဲ့ပြီးဖြစ်သည့် ထောင်ဒဏ်စုစုပေါင်းမှာ ၁၁ နှစ်ရှိပြီဖြစ်သည်။
အခြားသောအမှုများအနေဖြင့်လည်း မစ္စတာရှောင်တာနယ်နှင့်အတူ အစိုးရလျှို့ဝှက်ချက်အက်ဥပဒေပုဒ်မ ၃-၁(ဂ)၊နှင့် အဂတိမှုများအား ဆက်လက်တရားရင်ဆိုင်ရလျက်ရှိသည်။
- By CNI
- Category: နိုင်ငံရေး
- Hits: 691
CNI News
၂၀၂၂ ခုနှစ်၊ ဧပြီ ၂၆
အမျိုးသားညီညွတ်ရေးအစိုးရ(NUG)သည် ကရင်နီ(ကယား)ပြည်နယ်အတွင်း အုပ်ချုပ်ရေးအဖွဲ့အစည်းများ ဖွဲ့စည်းခြင်းမှာ NUCC မှာ ရေးဆွဲထားသည့် ဖက်ဒရယ်ပဋိဥာဉ် အစိတ်အပိုင်း-၂ ကို ဆန့်ကျင်နေခြင်းကြောင့် လက်မခံနိုင်ဘူးဟု ကရင်နီအမျိုးသားတိုးတက်ရေးပါတီ(KNPP)က ယနေ့ (ဧပြီ ၂၆ ရက်)ထုတ်ပြန်ခဲ့သည်။
အဆိုပါ ထုတ်ပြန်ချက်ကို KNPP ၏ ပြည်ထဲရေးဝန်ကြီးဌာန ဝန်ကြီး ခူးညေးရယ်က ထုတ်ပြန်ခဲ့သည်။
KNPP သည် NUG နှင့်မဟာမိတ်ဖြစ်ပြီး NUCC တွင် ပါဝင်၍ ဖက်ဒရယ်ပဋိဥာဉ်ကို အတူတူရေး ဆွဲခဲ့သော လက်နက်ကိုင်အဖွဲ့အစည်း ဖြစ်သည်။
- By CNI
- Category: နိုင်ငံရေး
- Hits: 757
CNI News
၂၀၂၂ ခုနှစ်၊ ဧပြီ ၂၆
ဧဒင်အုပ်စု ဥက္ကဋ္ဌဖြစ်သူ စီးပွားရေးလုပ်ငန်းရှင် ဦးချစ်ခိုင်ကို နစက၏ လုံခြုံရေးတပ်ဖွဲ့ဝင်များက ဖမ်းဆီးထိန်းသိမ်းထားကြောင်း စီးပွားရေးလုပ်ငန်းရှင်များ အသိုင်းအဝန်းမှ သိရသည်။
ဦးချစ်ခိုင်ကို ဧပြီ ၂၅ ရက်နေ့ ညပိုင်းက ခေါ်ဆောင်သွားခြင်းဖြစ်ကြောင်း သိရသည်။ လက်ရှိတွင် ဦးချစ်ခိုင်ကို မည်သည့် နေရာမှာ ထားထားကြောင်းကိုတော့ မသိရသေးပါ။
ဦချစ်ခိုင်အား ဖမ်းဆီးခေါ်ဆောင်ထားခြင်းနှင့်ပတ်သက်ပြီး နစက-က တစ်စုံတစ်ရာ ဖြေကြားခြင်းမရှိသေးပေ။
ဦးချစ်ခိုင်သည် စွမ်းအင်၊ ဆောက်လုပ်ရေး၊ ဟိုတယ်၊ ဘဏ် စသည့် လုပ်ငန်းများကို လုပ်ဆောင်နေသည့် မြန်မာပြည်၏ စီးပွားရေးလုပ်ငန်းရှင်ကြီး တစ်ဦးဖြစ်သည်။
Denko နှင့် မြန်မာ့ရှေ့ဆောင်ဘဏ်တို့သည် ဧဒင်အုပ်စုပိုင် လုပ်ငန်းစုများဖြစ်သည်။
- By CNI
- Category: နိုင်ငံရေး
- Hits: 730
CNI News
၂၀၂၂ ခုနှစ်၊ ဧပြီ ၂၆
ဒီမိုကရေစီအကျိုးပြုကရင်တပ်မတော်(DKBA)မှ အင်အား ၃၀၀ ဝန်းကျင်သည် ကရင်အမျိုးသားကာကွယ်ရေးတပ်ဖွဲ့(KND O)မှ ဗိုလ်မှူးချုပ် စောနယ်ဒါးမြနှင့် လာရောက်ပူးပေါင်းခဲ့ကြောင်း ဗိုလ်မှူးချုပ် စောနယ်ဒါးမြက CNI သို့ ပြောသည်။
ဗိုလ်စလုံး ဦးဆောင်သည့် DKBA အင်အား ၃၀၀ ဝန်းကျင်ဖြစ်ကြောင်း သိရသည်။
ဗိုလ်မှူးချုပ် စောနယ်ဒါးမြက “ဟုတ် အခု သူတို့လာနေထားတာကတော့ အားလုံး ၃၀၀ နီးပါးပေါ့နော်။ သူတို့က လာပြီး တော့ သူတို့က DKBA မလုပ်တော့ဘူး။ KNDO နဲ့ပြန်ပူးပေါင်းမယ်။ ပြန်ပူးပေါင်းပြီးတော့ အလုပ်တွေကတော့ ဆက်လုပ် မှာပေါ့။
ယနေ့ KNDO သို့ လာရောက်ပူးပေါင်းသည့် ဗိုလ်စလုံး ဦးဆောင်သည့် DKBA အင်အား ၃၀၀ ဝန်းကျင်ကို KNDO ၏ ကွန်မန်ဒို တပ်ရင်းအဖြစ် ဖွဲ့စည်းပေးသွားမည်ဖြစ်ကြောင်း သိရသည်။
ဗိုလ်မှူးချုပ် စောနယ်ဒါးမြက “KNDO ၏ ကွန်မန်ဒိုတပ်ရင်းအနေဖြင့် ပြန်လည် ဖွဲ့စည်းပေးမည်၊ သူတို့လူအင်အားလည်း များ တယ်။ သေနတ်လည်း ရှိတယ်။ သူတို့ပေါင်းတော့လည်း ကောင်းပါတယ်။ သူတို့စိတ်ဓာတ်ကတော့ အပြည့်အဝပဲ၊ တိုင်းပြည်နဲ့ လူမျိုးအတွက် ဆက်တိုက်ဖို့ တော်လှန်ရေးစိတ်သဘောထားကတော့ အပြည့်အဝပါပဲ။ KNDO အောက်မှာ ဆက်လုပ်မယ်။ အခု KNDO ပဲပေါ့”ဟု ပြောသည်။
ဗိုလ်မှူးချုပ် စောနယ်ဒါးမြနဲ့ပူးပေါင်းသွားသည့် ဗိုလ်စလုံးဦးဆောင်သည့် DKBA(KNDO)
ဗိုလ်စလုံး ဦးဆောင်သည့် DKBA အင်အား ၃၀၀ ဝန်းကျင်သည် နစက (စစ်ကောင်စီ)ကို တိုက်ခိုက်ရန်အတွက် KNDO နှင့် လာရောက် ပူးပေါင်းခြင်း ဖြစ်ကြောင်း သိရသည်။
လက်ရှိတွင် ဗိုလ်မှူးချုပ် စောနယ်ဒါးမြ ဦးဆောင်သည့် KNDO သည် နွေဦးတော်လှန်ရေးမှာ ပါဝင်လျက်ရှိပြီး တပ်မတော် ဖြုတ်ချရေး တစ်ဖက်တစ်လှမ်းက ပါဝင်ဆောင်ရွက်လျက်ရှိသည်။
ကရင်အမျိုးသားအစည်းအရုံး(KNU) တပ်မဟာ(၁) နယ်မြေအတွင်းရှိ တပ်မတော် စစ်စခန်းများ ဆုတ်ခွာရန်နှင့် မဆုတ်ခွာ ပါက အရေးယူဆောင်ရွက်မည်ဟု KNDO ၏ တပ်ရင်း(၂)က ထုတ်ပြန်ထားသည်။
ဗိုလ်မှူးချုပ်စောနယ်ဒါးမြသည် KNDO စစ်ဦးစီးချုပ် ရာထူးဖြင့် ယခင်က တာဝန်ထမ်းဆောင်ခဲ့သော်လည်း ၂၀၂၁ ခုနှစ်၊ မေလက လူ ၂၅ ဦး သတ်ဖြတ်ခံရမှုနှင့်ပတ်သက်၍ KNU ကာကွယ်ရေးဌာနမှ ရာထူးတာဝန်မှ ရပ်ဆိုင်းကြောင်း ၂၀၂၁ ခုနှစ်၊ ဇူလိုင်လတွင် ထုတ်ပြန်ခဲ့သည်။
- By CNI
- Category: နိုင်ငံရေး
- Hits: 1338
CNI News
၂၀၂၂ ခုနှစ်၊ ဧပြီ ၂၆
UPDJC နိုင်ငံရေးပါတီများ အစုအဖွဲ့ ရွေးချယ်မှုကို တစ်ပါတီလျှင် တစ်မဲစနစ်ဖြင့် ရွေးချယ်ရန် သတ်မှတ်ထားချက်အပေါ် နိုင်ငံရေးပါတီများ သဘောထားကွဲလွဲနေကြသည်။
ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ (UPDJC)၏ နိုင်ငံရေးပါတီများ အစုအဖွဲ့ ရွေးချယ်မှုကို ဧပြီ ၂၇ ရက် တွင် ကျင်းပမည်ဖြစ်ကြောင်း သိရသည်။
ဦးရွှေမင်းက “ကျနော်တို့ လိုချင်တာတော့ ကြိုတင် စည်းကမ်းသတ်မှတ်ချက် မရှိဘဲနဲ့ ညှိနှိုင်းဆွေးနွေးပြီးတော့ အဖြေရှာပြီးတော့မှပဲ ဆောင်ရွက်ရင်တော့ ပိုသင့်တော်တာပေါ့ဗျာ၊ အဲလိုလေး မြင်တယ်ခင်ဗျ၊ သူတို့ကတော့ တစ်ပါတီကို တစ်မဲစနစ်နဲ့ ပြောနေတာတော့ ကြားပါတယ်၊ အကယ်၍ အဲဒါသာ သွားမယ်ဆိုရင် ကျနော်တို့ UPDJC Political party ပုံစံမသွားဘဲနဲ့ YP များ ဖြစ်သွားမလားပေါ့၊ YP ဆိုတာ ရန်ကုန်ပါတီပေါ့နော်၊ အဲပုံစံများ ဖြစ်သွားမလား၊ ပြီးရင် ကျနော်တို့ စဉ်းစားရမှာက လက်တွေ့ ဖြစ်ပေါ်နေတဲ့ ပဋိပက္ခဖြစ်ပေါ်နေတဲ့ ဒေသတွေနဲ့ ပတ်သက်တဲ့ တကယ့်ကို လုပ်ဆောင်နိုင်တဲ့ ပုဂ္ဂိလ်တွေကို ပါဝင် ခိုင်းစေချင်တယ်၊ ဥပမာ ကျနော်တို့က ဟိုနေရာ၊ ဒီနေရာ ယူထားပြီးတော့ လက်တွေ့ ဆောင်ရွက်နိုင်မှုမှာ စွမ်းဆောင်နိုင်မှုမှာ အားနည်းတယ်ဆိုရင် ကျနော်တို့ အဲ impact ကို ဖြစ်ပေါ်လာမှာ မဟုတ်ဘူး”ဟု ပြောသည်။
ထို့နောက် မဲစနစ်ဖြင့် ရွေးချယ်မှုသည် လူဦးရေများသည့် လူမျိုးများနှင့် ပါတီများ၏ မဟာမိတ်များက အနိုင်ရရှိသွားနိုင်ပြီး လူမျိုးစု ပါတီများအတွက် အခက်အခဲဖြစ်နိုင်သည်ဟု ၎င်းက ပြောသည်။
ဦးရွှေမင်းက “အခု မဲစနစ်နဲ့ကြတော့ လူဦးရေများတဲ့ လူမျိုးတွေ၊ ပါတီတွေက ခုနပြောသလိုပေါ့၊ မဟာမိတ်တွေကပဲ အနိုင် ရရှိသွားမယ်၊ ကျနော်တို့က ပါဝင်နိုင်ခြင်းမရှိတဲ့အတွက် ပြောနေတာ မဟုတ်ပါဘူး၊ ပါဝင်နိုင်ခြင်း ရှိ၊မရှိက အရေးမကြီးဘူး၊ ပါဝင်မှုက အရေးမကြီးဘူး၊ လုပ်ဆောင်နိုင်မှုက အရေးကြီးတယ်၊ အဲတော့ တိုင်းရင်းသားဒေသတွေမှာ ဖြစ်နေတဲ့ စစ်ရေး ပဋိပက္ခကို လျော့ချနိုင်ဖို့အတွက် အဲဒီတိုင်းရင်းသားဒေသတွေ လက်နက်ကိုင် EAO တွေနဲ့ ချိတ်ဆက် ဆောင်ရွက်ပြီးတော့ ကျနော်တို့ ကြားခံသဘော၊ အပြုသဘော ဆောင်ရွက်နိုင်တဲ့ ပုဂ္ဂိုလ်တွေ ပါဝင်လာဖို့ အရေးကြီးတယ်လို့ ကျနော် ဒီအတိုင်း သုံးသပ်တယ်”ဟု ပြောသည်။
အဆိုပါ UPDJC နိုင်ငံရေးပါတီများ အစုအဖွဲ့ ရွေးချယ်မှုကို နိုင်ငံရေးပါတီ ၉၂ ပါတီအနက် ပါတီ ၄၀ ကျော်မှ ကိုယ်စားလှယ် များ တက်ကြမည် ဖြစ်ကြောင်း သိရသည်။
UPDJC နိုင်ငံရေးပါတီ ရွေးချယ်ပွဲတစ်ခုကို ၂၀၁၅ ခုနှစ်က ကျင်းပနေစဉ်
မြန်မာနိုင်ငံတွင် မျှတမှုမရှိသည့် အလွှမ်းမိုးခံ နိုင်ငံရေးကြောင့်၊ လက်နက်ကိုင်ပဋိပက္ခများ ပေါ်ပေါက်ခဲ့ကြောင်း၊ လက်ရှိ UPDJC ရွေးချယ်မှုကို ညီမျှမှုရှိရန် ဖြစ်သင့်ကြောင်း ရခိုင်အမျိုးသားပါတီ (ANP)မှ မူဝါဒရေးရာဦးဆောင်ကော်မတီဝင် ဦးထွန်းအောင်ကျော်က ပြောသည်။
၎င်းက “ညီမျှမှုရှိအောင်တော့ တန်းတူရည်တူနဲ့ စေတနာကို ထင်ဟပ်ပေါ်လွင်တဲ့ ရွေးချယ်တင်မြောက်မှုကတော့ ဖြစ်သင့် တာပေါ့ ခင်ဗျား၊ အဲဒါကိုလည်း ကျနော်တို့ ညီကို တိုင်းရင်းသားပါတီတွေ အနေနဲ့ကတော့ ဒီကိစ္စကို ကြိုပြီးတော့ မြင်ရမယ်၊ ကြည့်ကြမယ်၊ အဲဒါကြောင့်လည်း ကြိုတင်ပြီးတော့ ပြင်ဆင်လိမ့်မယ်လို့ လေးလေးနက်နက် ကျနော် ယူဆပါတယ်၊ အဲဒါ ကြောင့် အကောင်းဆုံးတစ်ခုတော့ ဖြစ်အောင်တော့ ကြိုးစားကြမှာပဲ အဲဒီတော့ မြန်မာနိုင်ငံရဲ့ အကျိုးစီးပွားအတွက် မြန်မာ နိုင်ငံသူ၊ နိုင်ငံသား အားလုံးရဲ့ အကျိုးစီးပွားနဲ့ တိုင်းရင်းသား နိုင်ငံရေးပါတီတွေရဲ့ အခန်းကဏ္ဍ ပျောက်ကွယ် မသွားဖို့အတွက် အလွှမ်းမိုး မခံရဖို့ အတွက်ကတော့ ရိုးရိုးသားသားနဲ့ စေတနာရှေ့ထားပြီး လုပ်ကြလိမ့်မယ်လို့ ကျနော်တို့ ယူဆပါတယ် ခင်ဗျ၊ မဟုတ်ရင်ကတော့ တော်တော်ကို အခြေအနေဆိုးတဲ့ နိုင်ငံရေး အကျပ်အတည်းတစ်ခု ပေါ်ပေါက်လိမ့်မယ်လို့ ယူဆ ပါတယ်”ဟု ပြောသည်။
UPDJC နိုင်ငံရေးပါတီများ အစုအဖွဲ့ကို တရားဝင် မှတ်ပုံတင်ထားသည့် နိုင်ငံရေးပါတီ ၉၂ ပါတီထဲကနေ အမြဲတမ်းကော်မတီ ဝင် ၁၆ ဦးနှင့် အရန်ကော်မတီဝင် ၁၆ ဦးကို ရွေးချယ်မည်ဖြစ်ကြောင်း သိရသည်။
UPDJC နိုင်ငံရေးပါတီ အစုအဖွဲ့ ပြန်လည်ရွေးချယ်ပွဲ မဲခွဲရွေးချယ်မှုကို ကန့်သတ်ချက်ဖြင့် မလုပ်သင့်ကြောင်း၊ တိုင်းရင်းသား ပါတီနှင့် အင်အားကြီးပါတီများ အချိုးကျပါဝင်မှုကို ညှိနှိုင်းသင့်ကြောင်း မွန်ညီညွတ်ရေးပါတီ(MUP)မှ ဒုဥက္ကဋ္ဌ (၂) နိုင်တလညီ က ပြောကြားခဲ့သည်။
လက်ရှိ ယာယီဖွဲ့စည်းထားသည့် UPDJC နိုင်ငံရေးပါတီ အစုအဖွဲ့
လက်ရှိ UPDJC နိုင်ငံရေးပါတီများ အစုအဖွဲ့ကို ပြည်သူများ စိတ်ဝင်စားမှု မရှိကြောင်း၊ သံတမန် အသိုင်းအဝိုင်းမှလည်း စိတ်ဝင်စားမှု မရှိသလိုဖြစ်နေကြောင်း ပြည်သူ့ပါတီ(PP)မှ ဥက္ကဋ္ဌ ဦးကိုကိုကြီးက ပြောသည်။
ဦးကိုကိုကြီးက “အဲဒီ UPDJC နိုင်ငံရေးပါတီ အစုအဖွဲ့က (၁)အချက် အများပြည်သူရဲ့ ယုံကြည်မျှော်လင့်မှု တည်ဆောက်နိုင် ရမယ်၊ နောက်တစ်ခုကတော့ ကျနော်တို့က တစ်နိုင်ငံတည်း နေလို့မရဘူး၊ အခုဆိုရင် အာဆီယံ အထူးကိုယ်စားလှယ်၊ ကုလ သမဂ္ဂ အထူးကိုယ်စားလှယ်၊ EU၊ တရုတ်၊ ဂျပန် အစရှိသဖြင့် အထူးကိုယ်စားလှယ်တွေရှိတယ်၊ ကျနော်တို့ အာဆီယံ သူတို့ တွေရဲ့ ယုံကြည်မျှော်လင့်မှု ဖြစ်လာဖို့လိုတယ်၊ ဒါကြောင့်မို့လို့ ဒီ UPDJC နိုင်ငံရေးပါတီ အစုအဖွဲ့ ရွေးချယ်တဲ့ နေရာမှာ လက်ရှိ ဒီလောက် ခက်ခဲပင်ပန်းနေတဲ့၊ အကျပ်အတည်းဖြစ်နေတဲ့ ကာလမှာ အဖြေထုတ်နိုင်မယ့် မျှော်လင့်ချက် ဖြစ်လာဖို့လိုမယ်၊ အဲဒီ UPDJC ရဲ့ နိုင်ငံရေး ဥပတိရုပ် တိုးတက်လာဖို့ လိုတယ်၊ ဒါကြောင့်မို့လို့ ရွေးချယ်တင်မြောက်ပွဲမှာ အခုနိုင်ငံရေးပါတီတွေ လာကြမယ်၊ ရွေးချယ်ကြမယ် ဆိုတဲ့အခါမှာ ကျနော်ကတော့ ဖြစ်စေချင်တာ ဘယ်သူ၊ ဘယ်ဝါလို့ ကျနော်မပြောဘူး၊ ဒီ UPDJC ကနေပြီးတော့ နိုင်ငံရေးပြဿနာကို၊ လက်ရှိ အကျပ်အတည်းကို ကျော်လွှားနိုင်မယ့် အများပြည်သူ ယုံကြည် မျှော် လင့်မယ့်၊ နိုင်ငံတကာက ယုံကြည်မျှော်လင့်မယ့် ပုဂ္ဂိုလ်၊ အဖွဲ့အစည်းများ ပါလာမှ UPDJC ရဲ့ နိုင်ငံရေး ဥပတိရုပ်တက်လာ မယ်လို့ ကျနော်က မြင်တယ်” ဟု ပြောသည်။
UPDJC ကို အစိုးရ၊ လွှတ်တော်နှင့် တပ်မတော် ကိုယ်စားလှယ် ၁၆ ဦး၊ NCA ထိုးထားသည့် လက်နက်ကိုင် အဖွဲ့အစည်းများမှ ကိုယ်စားလှယ် ၁၆ ဦး၊ နိုင်ငံရေးပါတီများ အစုအဖွဲ့မှ ကိုယ်စားလှယ် ၁၆ ဦးတို့ဖြင့် ဖွဲ့စည်းရန် NCA စာချုပ်တွင် ပြဋ္ဌာန်းထား သည်။
လက်ရှိတွင် UPDJC နိုင်ငံရေးပါတီ အစုအဖွဲ့ကို ၂၀၂၁ ခုနှစ်၊ နိုဝင်ဘာလက ယာယီ ၄ လတာ ကာလအနေဖြင့် ဖွဲ့စည်းခဲ့ရာ မတ်လက ပြည့်သွားသည့်အတွက် နောက်ထပ် ၂ လသက်တမ်းတိုးပေးထားကြောင်း၊ ထို့နောက် ဧပြီ ၂၇ ရက်တွင် စုဖွဲ့မှု အသစ်ကို ပြန်လည်ရွေးချယ်ကြမည်ဖြစ်သည်။
- By CNI
- Category: နိုင်ငံရေး
- Hits: 1451
CNI News
၂၀၂၂ ခုနှစ်၊ ဧပြီ ၂၆
နစက-၏ ငြိမ်းချမ်းရေးဆွေးနွေးရန် တိုင်းရင်းသား လက်နက်ကိုင်အဖွဲ့များကို ဖိတ်ခေါ်မှုက နိုင်ငံရေး ရည်ရွယ်ချက်နှင့် ဟန်ပြ ဖိတ်ခေါ်မှု မဖြစ်ရန်လိုအပ်ကြောင်း လွှတ်တော်ကိုယ်စားလှယ်ဟောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။
နစက-ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်မှ ဧပြီလ ၂၂ ရက်က တိုင်းရင်းသား လက်နက်ကိုင်အဖွဲ့များကို ငြိမ်းချမ်းရေး အတွက် ဖိတ်ခေါ်ကြောင်း နိုင်ငံပိုင်ရုပ်သံလိုင်းမှ တစ်ဆင့် မိန့်ခွန်းပြော၍ ကမ်းလှမ်းခဲ့ခြင်း ဖြစ်သည်။
အဆိုပါ ကမ်းလှမ်းချက်မှာ ယေဘုယျဆန်သည့် ကမ်းလှမ်းချက်ဖြစ်ကာ နိုင်ငံရေးအရ နှစ်ဖက်အားပြိုင်၍ တိုင်းရင်းသား လက်နက်ကိုင်များကို စည်းရုံးနေသည့် ဟန်ပြဆွေးနွေးမှု မဖြစ်ရန် လိုသည်ဟု ဦးဖေသန်းက ပြောသည်။
ဦးဖေသန်းက “အရင်တုန်းကလို ပုံစံမျိုးတော့ ရတော့မှာ မဟုတ်ဘူး၊ တော်လှန်ရေးက တော်တော် ဇာတ်ရှိန်မြင့်လာပြီ၊ အဲဒီ တော့ ပေးနိုင်တဲ့ဟာကို သူတို့ဘက်က ချပြလိုက်မယ်ဆိုရင် တိုင်းရင်းသားတွေလည်း ဈေးညှိဖို့ လွယ်သွားတာပေါ့ဗျာ၊ အစ ကတည်းက နိဒါန်းတို့ မာတိကာတို့ သွားလုပ်နေလို့ကတော့ အချိန်တွေလည်း ကြာတယ်၊ ဖြစ်လည်းဖြစ်လာမှာ မဟုတ်ဘူး၊ နောက်ဆုံးတော့ ဘယ်လိုမြင်လာမလဲ၊ ငါတို့ကို အသုံးချတယ်၊ အဲဒီလို တိုင်းရင်းသားတွေက မြင်သွားလိမ့်မယ်၊ အဲဒီ သံသယ တွေကလည်း ရှိပြီးဖြစ်တယ်၊ ဆိုတော့ လက်တွေ့ကျကျ လုပ်ကြပါ၊ ဆွေးနွေးတာ ကောင်းတယ်၊ ဒါပေမယ့် အပျက် သဘော မျိုးနဲ့ တိုင်းရင်းသားတွေကို ငါတို့ ဘက်ပါအောင်၊ သူ့ဘက်ပါအောင် အဲဒီလို နိုင်ငံရေးကစားကွက်မျိုး လုပ်တာမဟုတ်ဘဲနဲ့ တကယ့် လက်တွေ့ကျကျ လုပ်မယ်ဆိုရင်တော့ တိတိကျကျ ကမ်းလှမ်းပြီးတော့ ဆွေးနွေးဖို့လိုတယ်လို့ ပြောချင်ပါတယ်”ဟု ပြောသည်။
အမျိုးသားညီညွတ်ရေးအစိုးရ(NUG) အနေနှင့်လည်း ရက္ခိုင့်တပ်တော်(AA)ကို အလွတ်သဘော တွေ့ဆုံဆွေးနွေးလိုကြောင်း ပြီးခဲ့သည့် မတ်လ ၂၄ ရက်နေ့က အကြောင်းကြားစာ ပေးပို့ခဲ့သော်လည်း လက်ရှိအချိန်ထိ တရားဝင် တွေ့ဆုံနိုင်ခြင်းတော့ မရှိသေးပေ။
ဗိုလ်ချုပ်မှူးကြီးမင်းအောင်လှိုင်
လက်ရှိ နစက-၏ ငြိမ်းချမ်းရေး ကမ်းလှမ်းလာမှုအပေါ် တက်ရောက်မည် မတက်ရောက်မည်ကို ရက္ခိုင့်တပ်တော်(AA) အနေ နှင့် မြောက်ပိုင်းမဟာမိတ်အဖွဲ့(FPNCC)၏ ဆုံးဖြတ်ချက်အတိုင်း ဆုံးဖြတ်သွားရန် ရှိသော်လည်း တောင်းဆိုချက်များမှာ တူညီနိုင်မည် မဟုတ်ကြောင်း ဦးဖေသန်းက ပြောသည်။
ဦးဖေသန်းက “ကျနော်ထင်ပါတယ် အစည်းအဝေး တက်၊မတက်ကတော့ မဟာမိတ်အဖွဲ့တွေနဲ့ ဆုံးဖြတ်မယ်လို့ ပြောတယ်၊ ဒါပေမယ့် တောင်းဆိုချက်ကတော့ တူနိုင်မှာ မဟုတ်ဘူး၊ မဟာမိတ်အဖွဲ့တွေနဲ့ တလေသံတည်းတော့ ဖြစ်မှာမဟုတ်ဘူး၊ ဘာလို့လဲဆိုတော့ ကိုယ့်အခြေအနေနဲ့ ကိုယ်ပေါ့နော်၊ ဒါကတော့ ကိုယ့်ရပိုင်ခွင့် ကိုယ်တောင်းဆိုတဲ့ အခါမှာ မိမိဒေသရဲ့ ပထဝီနိုင်ငံရေးအပေါ်လည်း စကားပြောပါလိမ့်မယ်၊ နောက်ပြီးတော့ မိမိဒေသရဲ့ ပြည်သူလူထုထောက်ခံမှု၊ အဲဒါလည်း စကားပြောမှာပေါ့၊ မိမိအင်အားကလည်း စကားပြောမှာပေါ့၊ တောင်းဆိုချက်ကတော့ တစ်ဖွဲ့နဲ့တစ်ဖွဲ့ မတူနိုင်ဘူး၊ ဒါပေမယ့် အစည်းအဝေး တက်မတက်ကတော့ အကုန်လုံး ညှိနှိုင်းပြီး ဆုံးဖြတ်မယ်လို့ ပြောထားတာ ဖြစ်ပါတယ်”ဟု ပြောသည်။
ဗိုလ်ချုပ်မှူးကြီးမင်းအောင်လှိုင်က ၂၀၂၂ ခုနှစ်ကို ငြိမ်းချမ်းရေးနှစ်ဟု သတ်မှတ်ထားသည့်အတွက် တိုင်းရင်းသား လက်နက် ကိုင်အဖွဲ့ ခေါင်းဆောင်များအား တွေ့ဆုံ ဆွေးနွေးနိုင်ရေး ဖိတ်ခေါ်ပါကြောင်း၊ တွေ့ဆုံ ဆွေးနွေးမှုကို မိမိကိုယ်တိုင် တွေ့ဆုံ ဆွေးနွေးမည်ဖြစ်ကြောင်း၊ ငြိမ်းချမ်းရေး ဆွေးနွေးပွဲကို တက်ရောက်မည့် လူပုဂ္ဂိုလ်များ အနေဖြင့် မေလ ၉ ရက်တွင် နောက် ဆုံးထား စာရင်းပေးပို့ စေလိုပါကြောင်း ဧပြီလ ၂၂ ရက်နေ့က ပြောကြားခဲ့ခြင်းဖြစ်သည်။
- By CNI News
- Category: နိုင်ငံရေး
- Hits: 1094
CNI News
၂၀၂၂ ခုနှစ်၊ ဧပြီ ၂၅
သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီးအဖြစ် တာဝန်ယူခဲ့သူ သူရဦးအောင်ကိုအား ပြစ်ဒဏ် ၁၂ နှစ် ကျခံစေရန် ရန်ကုန်တိုင်းဒေသကြီးတရားလွှတ်တော်က အမိန့်ချခဲ့ရာ ၂၀၂၂ ခုနှစ်၊ မတ်လ ၁၄ ရက်တွင် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်မှ ပြစ်ဒဏ်ထက်ဝက် လွတ်ငြိမ်းခွင့်ပေးကြောင်း ထုတ်ပြန်ကြေညာခဲ့သည်။
အဆိုပါ ထုတ်ပြန် ကြေညာချက်ကို မြန်မာနိုင်ငံပြန်တမ်းမှာ တွေ့ရသည်။
ထိုထုတ်ပြန်ချက်တွင် နစကဥက္ကဋ္ဌသည် အင်းစိန်ဗဟိုအကျဉ်းထောင်တွင် အကျဉ်းကျခံနေရသည့် ဦးအောင်ကို(ဘ) ဦးဘဇံအား ရာဇဝတ်ကျင့်ထုံးဥပဒေပုဒ်မ ၄၀၁၊ ပုဒ်မခွဲ(၁)အရ ၎င်းကျခံရမည့် ပြစ်ဒဏ်များ၏ ထက်ဝက်ကာလအား လွတ် ငြိမ်းသက်သာခွင့်ပြုလိုက်သည်ဟု ဖော်ပြထားသည်။
ရန်ကုန်တိုင်းဒေသကြီးတရားလွှတ်တော်က ၂၀၂၂ ခုနှစ်၊ မတ်လ ၁၄ ရက်နေ့တွင် ပြည်ထောင်စုဝန်ကြီးဟောင်း သူရဦးအောင် ကိုအား ရာဇဝတ်ကြီးမှု အမှတ် ၅/၂၀၂၁၊ ၆/၂၀၂၁၊ ၇/၂၀၂၁ နှင့် ၃၂/၂၀၂၁ တို့အတွက် အလုပ်နှင့် ထောင်ဒဏ် ၃ နှစ်စီဖြင့် စုစု ပေါင်း အလုပ်နှင့်ထောင်ဒဏ် ၁၂ နှစ် ကျခံစေရန် အပါအဝင် Ford Everest Titanium မော်တော်ယာဉ် တစ်စီး၊ ငွေကျပ် သိန်း ၁၀၀ နှင့် ရွှေပန်းကန်ပြားတို့အား ပြည်သူ့ဘဏ္ဍာအဖြစ် သိမ်းဆည်းစေရန် အမိန့်ချမှတ်ခဲ့သည်။
သူရဦးအောင်ကိုသည် အမျိုးသားဒီမိုကရေစီအဖွဲ့ချုပ်(NLD) အစိုးရလက်ထက်တွင် သာသနာရေးနှင့်ယဉ်ကျေးမှုဝန်ကြီး ဌာန ပြည်ထောင်စုဝန်ကြီးအဖြစ် တာဝန်ထမ်းဆောင်ခဲ့သူဖြစ်သည်။
၂၀၂၁ ခုနှစ်၊ ဖေဖော်ဝါရီ ၁ ရက်နေ့ NLD အစိုးရ ဖြုတ်ချခံရပြီးနောက် ဖမ်းဆီးခံထားရသည်မှာ ယနေ့အထိ ဖြစ်သည်။
ဆက်စပ်သတင်း----https://cnimyanmar.com/index.php/political-2/politics-local/4935-2022-03-14-15-34-34
- By CNI
- Category: နိုင်ငံရေး
- Hits: 1229
CNI News
၂၀၂၂ ခုနှစ်၊ ဧပြီ ၂၅
ပြိုင်ဘက်များ၏ တပ်တွင်းကိုဖြိုခွဲနိုင်မှ တော်လှန်ရေး အောင်မြင်မည်ဖြစ်ကြောင်း ရှမ်းပြည်တိုးတက်ရေးပါတီ (SSPP/SSA) မှ ပြောခွင့်ရပုဂ္ဂိုလ် ဗိုလ်မှူး စိုင်းဖုန်းဟန်က ပြောသည်။
၂၀၂၂ ခုနှစ်၊ ဧပြီ ၂၄ ရက်နေ့သည် SSPP တည်ထောင်ခြင်း ၅၈ နှစ်ပြည့်ဖြစ်ကာ ယင်းနေ့ ထုတ်ပြန်ချက်တွင် မိဘပြည်သူနှင့် တပ်မတော် စည်းလုံးညီညွတ်ရေး၊ တပ်မှူးတပ်သားများ စည်းလုံးညီညွတ်ရေး၊ ပြိုင်ဘက်များကို စည်းရုံးနိုင်ရေး စသည့် အောင်ပွဲခံနိုင်ရေးများကိုလည်း အစဉ်တစိုက် လုပ်ဆောင်ရမည်ဖြစ်ကြောင်း ဖော်ပြထားသည်။
ဗိုလ်မှူး စိုင်းဖုန်းဟန်က “ကျနော်တို့ တော်လှန်ရေးအောင်နိုင်ဖို့က ပါတီ၊ တပ်မတော်၊ တပ်ပေါင်းစု ရှိတယ်လေဗျာ၊ ဒီဟာက အဓိက အားဖြင့်တော့ Directions (လမ်းညွန်ချက်များ) ၃ လုံးပေါ့၊ ဒါလည်း လက်ကိုင်ထားပြီးမှ ကျနော်တို့ ပီပီပြင်ပြင် ကျင့် သုံးနိုင်မှ ဟိုဟာဖြစ်တယ်၊ နောက်တစ်ခုက ပြည်သူလူထုနဲ့ တော်လှန်ရေး အဖွဲ့အစည်း ကျနော်တို့ တပ်မတော်ပေါ့လေ၊ စည်း လုံး ညီညွတ်ဖို့လိုတယ်၊ နောက်ပြီးတော့ ကျနော်တို့ တပ်မှူး၊ တပ်သားတွေ စည်းလုံးဖို့လိုတယ်၊ ပြီးတော့ အဓိက အားဖြင့် တော့ ရန်သူရဲ့ တပ်တွင်း ဖြိုခွဲနိုင်ရေးပေါ့လေ၊ ဒါက အဓိကကျတယ်၊ ဒီဟာကို လုပ်နိုင်မှ ကျနော်တို့ တော်လှန်ရေးရဲ့ အဓိက ရည်မှန်းချက်ကို ကျနော်တို့ ရောက်နိုင်မှာ ဖြစ်တယ်၊ အဓိက ဒီဟာကို ဆိုလိုတာ ဖြစ်တယ်ဗျ၊ ဒါပေမဲ့ ကျနော်တို့က အမျိုးသား ညီညွတ်ရေးကို ရည်ညွန်းသောအားဖြင့် ရန်သူလို့ သုံးမယ်ဆို သိပ်အဆင်မပြေဘူးလေ၊ အဲဒါကြောင့်မို့ ကျနော်တို့က ပြိုင်ဘက် ကို စည်းရုံးနိုင်ဖို့က၊ ဖြိုခွဲစည်းရုံးနိုင်ဖို့က လိုတယ်ဆိုတဲ့ဟာ ကျနော်တို့ ရည်ညွန်းတာ ဖြစ်တယ်ဗျ”ဟု ပြောသည်။
SSPP ခေါင်းဆောင်များကိုတွေ့ရစဉ်
SSPP သည် ပြည်သူအတွင်းမှ ပေါက်ဖွားလာသည့် တပ်မတော် ဖြစ်သည့်အလျောက် ပြည်သူများ၏ အကျိုးစီးပွား ကာကွယ် ရန်နှင့် အလုပ်အကျွေးပြုရမည့် တာဝန်ရှိကြောင်း ဆိုသည်။
ရှမ်းပြည်ပြန်လည် ထူထောင်ရေးကောင်စီ (RCSS/SSA) မှ ဗိုလ်ကြီးအဆင့်ရှိသူ နှစ်ဦး SSPP ထံ လာရောက် ခိုလှုံခဲ့ကြောင်း သိရသည်။ ထို့အပြင် RCSS မှ တပ်ဖွဲ့ဝင် ၃၀၀ ကျော် SSPP ထံ လာရောက် ပူးပေါင်းခဲ့ကြောင်း သတင်းမီဒီယာများတွင် ရေးသားဖော်ပြခဲ့ကြသည်။
အဆိုပါ ကိစ္စနှင့် ပတ်သက်၍ SSPP မှ သွားရောက်စည်းရုံးခြင်း မဟုတ်ကြောင်း၊ ၎င်းတို့၏ သဘောထားအတိုင်း လာရောက် ပူးပေါင်းခြင်းဖြစ်ကြောင်း ဗိုလ်မှူးစိုင်းဖုန်းဟန်က ပြောသည်။
SSPP တပ်ဖွဲ့ကိုတွေ့ရစဉ်
ဗိုလ်မှူး စိုင်းဖုန်းဟန်က “လောလောဆယ်တော့ ကျနော်တို့ ထုတ်ပြန်ကြေညာချက် ထုတ်ပြန်ထားတဲ့ အတိုင်းပါပဲ၊ ဘယ်လို ပြောပြော တော်လှန်ရေး တစ်ရပ်အနေနဲ့ လုပ်ရမယ် ဆိုလို့ရှိရင်တော့ ဒီဟာတွေက အဓိက လိုအပ်ချက်တွေ ဖြစ်တယ်၊ ဒီဟာ ကို အကောင်အထည်ဖော်မှပဲ ကျနော်တို့ ရည်မှန်းထားတဲ့ ရည်မှန်းချက်ကို ရောက်နိုင်မှာ ဖြစ်တဲ့အတွက်မို့လို့ ကျနော်တို့ အကောင်အထည်ဖော်ဖို့ လိုပါတယ်၊ ပြီးတော့ ပိုပြီးတော့ ကျစ်လစ်အောင်လုပ်ဖို့ လိုပါတယ်ဆိုတဲ့ဟာလေ၊ ကျနော်တို့ ထုတ် ပြန် ကြေညာချက်ထားတဲ့အတိုင်း ရှင်းရှင်းလင်းလင်း၊ တိတိကျကျ ရှိပြီးသား ဖြစ်တယ်ဗျ” ဟု ပြောသည်။
မြန်မာနိုင်ငံ၏ ပထမဆုံးသမ္မတ ညောင်ရွှေစော်ဘွားကြီး စဝ်ရွှေသိုက်၏ မဟာဒေဝီ စဝ်မယ်နန်းဟိန်းခမ်းက ၁၉၆၄ ခုနှစ်၊ ဧပြီ ၂၄ ရက်တွင် ရှမ်းပြည်တပ်မတော်(SSA)ကို စတင် တည်ထောင်ခဲ့ပြီးနောက် ၁၉၇၁ ခုနှစ်၌ ရှမ်းပြည်တိုးတက်ရေးပါတီ (SSPP) အား တည်ထောင်ခဲ့သည်။
ထို့နောက် ၁၉၈၉ ခုနှစ်တွင် တပ်မတော်နှင့် ငြိမ်းချမ်းရေး ရယူခဲ့သလို ဦးသိန်းစိန်အစိုးရလက်ထက် ၂၀၁၂ ခုနှစ်၊ ဇန်နဝါရီ ၁ ရက်က ပြည်နယ်/ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးသဘောတူစာချုပ်(Bilateral) လက်မှတ်ရေး ထိုးထား သည်။