CNI News

၂၀၂၂ ခုနှစ်၊ မေလ ၂၂

မွန်ပြည်သစ်ပါတီ(NMSP)နှင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်တို့ မနက်ဖြန် (မေလ ၂၂ ရက်) နေပြည်တော်မှာ တွေ့ဆုံ၍  ငြိမ်းချမ်းရေး လုပ်ငန်းစဉ်များကို ဆွေးနွေးကြမည် ဖြစ်ကြောင်း သိရသည်။

အဆိုပါ တွေ့ဆုံ ဆွေးနွေးမှုကို မွန်ပြည်သစ်ပါတီ(NMSP)ဒုဥက္ကဋ္ဌ နိုင်အောင်မင်း ဦးဆောင်သည့်  ကိုယ်စားလှယ်အဖွဲ့နှင့်  နစက ဘက်မှ  ဗိုလ်ချုပ်မှူးကြီး မင်းအောင်လှိုင် ဦးဆောင်သည့်  ကိုယ်စားလှယ်အဖွဲ့တို့ တက်ရောက်ကြမည် ဖြစ်သည်။

ငြိမ်းချမ်းရေးလုပ်ငန်းစဉ်တွင် ပါဝင်နေသူတစ်ဦးက “ဒုဥက္ကဋ္ဌ နိုင်အောင်မင်း ဦးဆောင်တဲ့  ကိုယ်စားလှယ်အဖွဲ့ အခု နေပြည်တော်ကို ဒီနေ့ ရောက်တယ်။ မြန်မာ တွေ့လိမ့်မယ်။ မွန်ပြည်သစ်အနေနဲ့ လက်ရှိ အခြေအနေက ဒီတွေ့ဆုံမှုဟာ အရေးပါလိမ့်မယ်”ဟု ပြောသည်။

မွန်ပြည်သစ်ပါတီ(NMSP)သည် ဦးသိန်းစိန်အစိုးရလက်ထက် ၂၀၁၂  ခုနှစ်၊ ဖေဖော်ဝါရီလက ပြည်နယ်-ပြည်ထောင်စု  ပဏာမအဆင့် ပစ်ခတ် တိုက်ခိုက်မှုရပ်စဲရေး(Bilateral) ရေးထိုးထားပြီး  NLD အစိုးရလက်ထက် ၂၀၁၈ ခုနှစ်၊ ဖေဖော်ဝါရီ ၁၃  ရက်တွင် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ကို လက်မှတ်ရေးထိုးခဲ့သည်။

NMSP ဒုဥက္ကဋ္ဌ နိုင်အောင်မင်း ဦးဆောင်သည့် ကိုယ်စားလှယ်အဖွဲ့ ငြိမ်းချမ်းရေးဆွေးနွေးရန် ၂၀၂၂ ခုနှစ်၊ မေလ ၂၂  ရက်က နေပြည်တော်ရောက်

နစကသတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက “မွန်ပြည်သစ်ပါတီဒုဥက္ကဋ္ဌ ဦးဆောင်သည့် ကိုယ်စားလှယ်အဖွဲ့ မော်တော်ယာဉ်များဖြင့် နေပြည်တော်ကို ရောက်ရှိလာကြောင်း၊ မနက်ဖြန် တွေ့ဆုံဆွေးနွေးမည် ဖြစ်ကြောင်း” ထုတ်ပြန်ခဲ့သည်။

လက်ရှိတွင် မွန်ပြည်သစ်ပါတီ(NMSP) လှုပ်ရှားနယ်မြေများနှင့် မွန်ပြည်နယ်သည် နိုင်ငံရေးနှင့်စစ်ရေးအရ ကြည့်မည်ဆို လျှင်  ကရင်တိုင်းရင်းသားများ၏ ဝိုင်းရံခြင်းခံထားရသလို နွေဦးတော်လှန်ရေးကနေ ပေါက်ဖွားလာသော PDF များ အား ကောင်းလာနေခြင်းကြောင့် နည်းလမ်းသစ်များ ရှာဖွေရန် လိုအပ်လာသည့်အတွက် နစက၏ ငြိမ်းချမ်းရေး ဆွေးနွေးပွဲကို သွားရောက်ခြင်း ဖြစ်နိုင်ကြာင်း ငြိမ်းချမ်းရေးလုပ်ငန်းစဉ်တွင် ပါဝင်နေသူ တချို့ က ပြောသည်။

CNI News

၂၀၂၂ ခုနှစ်၊ မေလ ၂၂

ဖက်ဒရယ်မူနှင့် ၂၀၀၈ ဖွဲ့စည်းပုံအခြေခံဥပဒေကို ပြင်ဆင်သွားနိုင်ရေး ဝိုင်းဝန်းကြိုးပမ်းရမည်ဟု  ရှမ်းပြည် ပြန်လည်ထူ ထောင်ရေးကောင်စီ(RCSS/SSA)ဥက္ကဋ္ဌ ဗိုလ်ချုပ်ကြီး ယွက်စစ်က ပြောသည်။

နစက အဖွဲ့ဝင်များ ပါဝင်သည့် အမျိုးသားစည်းလုံးညီညွတ်ရေးနှင့်ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC) ဥက္ကဋ္ဌ ဒုတိယဗိုလ်ချုပ်ကြီးရာပြည့် ဦးဆောင်သည့် ကိုယ်စားလှယ်အဖွဲ့နှင့် RCSS/SSA ဥက္ကဋ္ဌ ဗိုလ်ချုပ်ကြီး ယွက်စစ် ဦးဆောင်သော ကိုယ်စားလှယ်အဖွဲ့ မေလ ၂၁ ရက်က တွေ့ဆုံ ဆွေးနွေးစဉ် ၎င်းက အထက်ပါအတိုင်း ပြောခဲ့ခြင်း ဖြစ်သည်။

ဗိုလ်ချုပ်ကြီးယွက်စစ်က “ အားလုံး လက်ခံသဘောတူတဲ့  ဖက်ဒရယ်မူနဲ့ ၂၀၀၈  ဖွဲ့စည်းပုံ အခြေခံဥပဒေကို ပြင်ဆင်ခြင်း၊  အုပ်ချုပ်ရေး စနစ်ကို ပြုပြင်ပြောင်းလဲခြင်း၊ လုံခြုံရေးစနစ် ပြုပြင်ပြောင်းလဲခြင်း စသည်တို့ကို အဆင့်ဆင့် ဆောင်ရွက်သွား နိုင်ရေး ဝိုင်းဝန်းကြိုးပမ်းရမှာ ဖြစ်ပါတယ်။ ပြည်ထောင်စုကြီးကို စုပေါင်းတာဝန်ယူ တာဝန်ခံမှုနဲ့ ကာကွယ်စောင့်ရှောက်ရမှာ ဖြစ်ပါတယ်”ဟု ပြောသည်။

ထို့နောက် နိုင်ငံရေးပြဿနာကို နိုင်ငံရေးနည်းနှင့် ဖြေရှင်းရေး၊ တန်းတူရည်တူပြီး ကိုယ်ပိုင်ပြဋ္ဌာန်းခွင့် အပြည့်အဝရှိသည့် ဖက်ဒရယ် ဒီမိုကရေစီ ပြည်ထောင်စု တည်ဆောက်ရေး၊ လက်ရှိနိုင်ငံရေး အကျပ်အတည်း ဖြေရှင်းရေးတို့ကို ရည်မှန်း၍ မိမိ တို့ RCSS သည် ဖိတ်ကြားမှုကို လက်ခံပြီး ယနေ့ ဆွေးနွေးပွဲအား တက်ရောက်ဆွေးနွေးခြင်းဖြစ်ကြောင်း  ၎င်းက ပြောသည်။

ဗိုလ်ချုပ်ကြီးယွက်စစ်က “ မိမိနဲ့ နစကဥက္ကဋ္ဌတို့ တွေ့ဆုံ ဆွေးနွေးပွဲဟာ အပြုသဘောဆောင်ပြီး အပြန်အလှန် ယုံကြည်မှု တွေကို ထပ်မံတိုးမြှင့် တည်ဆောက်နိုင်ခဲ့ပါတယ်။ ဖက်ဒရယ်ကိစ္စ၊ ဒီမိုကရေစီကိစ္စ၊  ပါတီစုံနိုင်ငံရေးစနစ်၊ အနာဂတ် ပြည် ထောင်စုကို ပုံဖော်ခြင်းကိစ္စ၊ လက်ရှိ နိုင်ငံရေး အကျပ်အတည်း ဝိုင်းဝန်းပူးတွဲ ဖြေရှင်းရေးကိစ္စ အပါအဝင် အရေးကြီးတဲ့ အနာဂတ် နိုငငံရေးဆွေးနွေးပွဲများကိစ္စ၊ လုပ်ငန်းစဉ်နဲ့ အချိန်ဇယားတို့ကို ရင်းနှီးပွင့်လင်းစွာ အမြင်ချင်း ဖလှယ်နိုင်ခဲ့ပါတယ်။ အနာဂတ် ဖက်ဒရယ်ဒီမိုကရေစီ ပြည်ထောင်စုအတွက် ရှေ့လုပ်ငန်းစဉ်မှာ ပါတဲ့  အစီအမံ အစီအစဉ်တွေကို  အပြန်အလှန် ဆွေးနွေးနိုင်ခဲ့ခြင်းဟာ  ကောင်းမွန်တဲ့ ဆွေးနွေးမှုဖြစ်ပြီး နိုင်ငံရေးဆွေးနွေးပွဲနဲ့ ငြိမ်းချမ်းရေး လုပ်ငန်းစဉ် အဖို့ အရေးပါတဲ့ ခြေလှမ်းတလှမ်းကို စတင်လှမ်းနိုင်ခြင်းပဲ ဖြစ်ပါတယ်”ဟု ပြောသည်။

ထို့နောက် နိုင်ငံရေး ဆွေးနွေးပွဲ ကျင်းပခြင်းနှင့် ငြိမ်းချမ်းရေးလုပ်ငန်းစဉ် ဆောင်ရွက်ရာမှာ အချိန်အလွန်ကြာပါက မထင်မှတ် သည့် ပြင်ပ အမှောင့်ပယောကများ ဝင်လာတတ်ပြီး အထစ်အငေါ့များ ဖြစ်စေနိုင်၍ အချိန်တိုတောင်းကာ ပြီးပြည့်စုံသော ရလဒ် ထွက်သည့် နည်းလမ်းများကို ရှာဖွေရမှာ ဖြစ်ကြောင်း ၎င်းက ပြောသည်။

အလားတူ နောက်နောင် ဆွေးနွေးပွဲများတွင် အစုအဖွဲ့ အသီးသီး တစ်ဖွဲ့ချင်းစီ၏ ဖက်ဒရယ်မူများကို အပြန်အလှန်ချပြပြီး တိုက်ရိုက် ညှိနှိုင်းဆွေးနွေးမည် ဆိုခြင်းသည်လည်း ထည့်သွင်းစည်းစားရမှာ ဖြစ်ကြောင်း ဗိုလ်ချုပ်ကြီး ယွက်စစ်က ပြော သည်။

ဗိုလ်ချုပ်ကြီးယွက်စစ်က “မိမိတို့တိုင်းပြည် နိုင်ငံရေး အကျပ်အတည်းဖြစ်နေချိန်မှာ မိမိတို့ အနေနဲ့လျစ်လျူရှု မျက်ကွယ်မပြု နိုင်လို့ ဒီဆွေးနွေးပွဲကို လာတက်တာဖြစ်ပါတယ်။ ဒီတွေ့ဆုံ ဆွေးနွေးပွဲမှ အားလုံးအတွက် အောင်မြင်တဲ့ Win-Win Solution ရလဒ်ရရှိအောင် ကြိုးပမ်းဆောင်ရွက် ရပါမယ်။  တွေ့ဆုံ ဆွေးနွေးခြင်း နည်းလမ်းနဲ့ နိုင်ငံရေး  ပြဿနာများကို ဖြေရှင်းနိုင်ရေး အားသွန်ခွန်စိုက် ဆောင်ရွက်သွားမှာဖြစ်ပါတယ်”ဟု ပြောသည်။

ထို့နောက် ယနေ့ ဆွေးနွေးပွဲသည် ကနဦး ဆွေးနွေးပွဲသာဖြစ်ပြီး ယနေ့မှစ၍ စဉ်ဆက်မပြတ် Process လုပ်ငန်းစဉ် တစ်ခု အဖြစ် စီစဉ်ဆောင်ရွက်သွားရန် လိုအပ်ကြောင်း၊ အနှစ်သာရပြည့်ဝပြီး ပြီးပြည့်စုံသည့် ဆွေးနွေးပွဲဖြစ်ရန် လိုအပ်သော  အခင်း အကျင်း များကို စီစဉ်ဆောင်ရွက်ပေးရမှာဖြစ်ကြောင်း  ၎င်းက ပြောသည်။

ကမ္ဘာကြီး၏  အခြေအနေသည် အချိန်နှင့်အမျှ ပြောင်းလဲနေ၍ မိမိတို့အားလုံး အနေဖြင့် နိုင်ငံရေး၊ စစ်ရေး၊ ငြိမ်းချမ်းရေး အပါအဝင် အခြားအရေးကြီးသည့် ကိစ္စရပ်များကို စီမံဆောင်ရွက်ရာမှာ ခေတ်စနစ် ကာလ၊  ဒေသ၊  ပုဂ္ဂလိက အခြေအနေ များနှင့်အညီ သူ့ဖက်ကိုယ်ဖက် မျှမျှတတ ဆောင်ရွက်ပြီး အေးချမ်းသာယာဝပြော ခေတ်မီ ဖွံ့ဖြိုးတိုးတက်သော တိုင်းပြည် ဖြစ်အောင် ဝိုင်းဝန်းကြိုးပမ်း တည်ဆောက်ကြရန် ဗိုလ်ချုပ်ကြီးယွက်စစ်က ပြောသည်။

RCSS သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ထိုးထားသည့် ရှမ်းလက်နက်ကိုင် အဖွဲ့ ဖြစ်သည်။ တခြား တစ်ဖက်မှာတော့ ရှမ်းပြည်နယ် မြောက်ပိုင်းနှင့် တောင်ပိုင်းတွင်  မြောက်ပိုင်းမဟာမိတ်အဖွဲ့ (TNLA၊ SSPP) တို့နှင့် စစ်ရေး တင်းမာလျက်ရှိပြီး လှုပ်ရှားနယ်မြေများ လက်လွှတ်ပေးလိုက်ရသည့် အခြေအနေများရှိနေသည်။

CNI News

၂၀၂၂ ခုနှစ်၊ မေလ ၂၁

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ငြိမ်းချမ်းရေးလုပ်ငန်းစဉ် ဦးဆောင်အဖွဲ့(PPST) အစုအဖွဲ့အားလုံး တွေ့ဆုံနိုင်ရေး တောင်းဆိုသွားမည်ဖြစ်ကြောင်း PPST မှ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

လက်ရှိတွင် အပစ်ရပ် ၁၀ ဖွဲ့ဖြင့် ဖွဲ့စည်းထားသော PPST ထဲမှ ၇ ဖွဲ့သည် တစ်ဖွဲ့ချင်းအနေဖြင့် နစကဥက္ကဋ္ဌနှင့် တွေ့ဆုံ၍ ငြိမ်းချမ်းရေး လုပ်ငန်းစဉ်ကို ဆွေးနွေးသွားကြမည်ဖြစ်ကြောင်း၊ ထိုအခြေအနေကနေတဆင့် ငြိမ်းချမ်းရေး ဆွေးနွေးပွဲသွားမည့် ၇ ဖွဲ့ စုစည်း၍ နစကဥက္ကဋ္ဌနှင့် တွေ့ဆုံနိုင်ရေးကိုလည်း ကြိုးပမ်းသွားမည်ဟု ၎င်းက ပြောသည်။

ဗိုလ်မှူးကြီး ခွန်ဥက္ကာက “ထူးထူးခြားခြားတော့ မရှိပါဘူး၊ ဖြစ်နိုင်ရင်တော့ တစ်ဖွဲ့ချင်း အရင်တွေ့လိုက်၊ တစ်ဖွဲ့ချင်းတွေ့လို့ ပြီးရင် အစုအဖွဲ့နဲ့ပေါ့။ တွေ့ဖို့၊ တွေ့ခွင့်ကို တောင်းပါလို့ အဖွဲ့တိုင်းက တစ်ဖွဲ့ထဲတွေ့ ဒါပေမဲ့ ကျနော်တို့ စုတွေ့ချင်ပါတယ်လို့ ပြောလို့ အဲဒီလိုလေးတော့ မှာတာပေါ့ဗျာ” ဟု ပြောသည်။

နစက ဥက္ကဋ္ဌမှ တိုင်းရင်းသား ခေါင်းဆောင်များနှင့် ငြိမ်းချမ်းရေး တွေ့ဆုံဆွေးနွေးလိုကြောင်း ဖိတ်ခေါ်ခဲ့ပြီးနောက် မေလ ၂၀ ရက်က သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) မှ ဥက္ကဋ္ဌ စဝ်ယွက်ဆစ်နှင့် ဗိုလ်ချုပ်မှူးကြီး မင်းအောင်လှိုင်တို့ တွေ့ဆုံဆွေးနွေးခဲ့ ကြသည်။

အဆိုပါ ငြိမ်ချမ်းရေး ဆွေးနွေးပွဲကို ၃ ရက်ခြား တစ်ဖွဲ့နှုန်းဖြင့် တွေ့ဆုံဆွေးနွေး သွားမည်ဖြစ်ကြောင်း နစက၏ သတင်း ထုတ်ပြန်ရေးအဖွဲ့ ခေါင်းဆောင် ဗိုလ်ချုပ် ဇော်မင်းထွန်းက မေလ ၁၉ ရက်က ပြောထားသည်။

ဗိုလ်ချုပ်ကြီးယွက်စစ်နှင့် ဗိုလ်ချုပ်မှူးကြီးမင်းအောင်လှိုင်တို့ ၂၀၂၂ ခုနှစ်၊ မေလ ၂၀ ရက်က တွေ့ဆုံစဉ်

ဗိုလ်မှူးကြီး ခွန်ဥက္ကာက “အစည်းအဝေး မဟုတ်ပါဘူး၊ ဗိုလ်ချုပ်မှူးကြီး မင်းအောင်လှိုင်နဲ့ သွားတွေ့မယ့် ၆ ဖွဲ့ပေါ့၊ ၆ ဖွဲ့ ကိုယ်စားလှယ်တွေ ညှိနှိုင်းတဲ့ ပွဲပါ၊ ၆ ဖွဲ့ ကိုယ်စားလှယ်တွေ သွားမယ်၊ တစ်ဖွဲ့ချင်းတော့ တွေ့မယ်၊ ဒါပေမဲ့ ပြောစရာရှိတာ တွေ တိုင်ပင်ကြဖို့ အဲဒီသဘောပါ။ ကျနော်ထင်တယ် မပြောင်းတော့ဘူး ထင်တယ်။ ဥက္ကဋ္ဌ ကိုယ်တိုင်သွားမှာက DKBA နဲ့ Peace Council (KNU/KNLA/PC) ပဲရှိမယ်လေ။ ကျန်တာတော့ ဒုဥက္ကဋ္ဌပေါ့။ မွန်နဲ့ ALP က ဒုဥက္ကဋ္ဌ၊ ကျန်တဲ့ LDU နဲ့ PNLO က တွဲဖက်အတွင်းရေးမှူး အဲဒီလိုပဲ Level ၃ ခု ဖြစ်သွားတယ်” ဟု CNI သတင်းဌာနသို့ ပြောသည်။

နစက၏ ငြိမ်းချမ်းရေး ဆွေးနွေးပွဲသို့ ရှမ်းပြည်ပြန်လည်ထူထောင်ရေးကောင်စီ (RCSS/SSA)၊ ‘ဝ’ ပြည် သွေးစည်း ညီညွတ်ရေး တပ်မတော် (UWSA)၊ အမျိုးသားဒီမိုကရေစီ မဟာမိတ် တပ်မတော်(NDAA-မိုင်းလားအဖွဲ့)၊ ရှမ်းပြည်တိုးတက်ရေးပါတီ (SSPP/ SSA)၊ ဒီမိုကရေစီ အကျိုးပြု ကရင်တပ်မတော် (DKBA)၊ မွန်ပြည်သစ်ပါတီ(NMSP)၊ ရခိုင်ပြည် လွတ်မြောက်ရေးပါတီ (ALP)၊ ကရင်အမျိုးသား အစည်းအရုံး/ ကရင်အမျိုးသား လွတ်မြောက်ရေး တပ်မတော်- ငြိမ်းချမ်းရေးကောင်စီ (KNU/ KNLA-PC)၊ ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO)၊ လားဟူဒီမိုကရက်တစ် အစည်အရုံး(LDU)တို့ တက်ရောက်မည် ဖြစ်ကြောင်း နစက၏ သတင်းထုတ်ပြန်ရေးအဖွဲ့ခေါင်းဆောင်က ပြောသည်။

သို့သော်လည်း ကချင်လွတ်လပ်ရေးအဖွဲ့ (KIO)၊ ကရင်အမျိုးသားအစည်းအရုံး(KNU)၊ ကရင်နီ အမျိုးသားတိုး တက်ရေးပါတီ (KNPP)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး(ABSDF)၊ ညီနောင်မဟာမိတ် ၃ ဖွဲ့ ဖြစ်သည့် မြန်မာအမျိုးသား ဒီမိုကရက်တစ် မဟာမိတ်တပ်မတော် – ကိုးကန့်တပ်ဖွဲ့ (MNDAA)၊ ပလောင်ပြည် လွတ်မြောက်ရေး တပ်ဦး (PSLF/TNLA)နှင့် ရက္ခိုင့်တပ်တော် (AA)တို့ တက်ရောက်မည် မဟုတ်ကြောင်း သိရသည်။

ထို့နောက် ချင်းအမျိုးသားတပ်ဦး (CNF)ကိုတော့ နစကဘက်က ဖိတ်ကြားထားခြင်းမရှိကြောင်း သိရသလို CNF ကလည်း တက်ရောက်မည် မဟုတ်ကြောင်း ထုတ်ပြန်ထားသည်။

CNI News

၂၀၂၂ ခုနှစ်၊ မေလ ၂၁ 

ယနေ့ (မေလ ၂၁ ရက်)တွင် ကျရောက်သည့် (၆၄) ကြိမ်မြောက် ရှမ်းတော်လှန်ရေးနေ့ အခမ်းအနားကို ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ၏ ဌာနချုပ် တည်ရှိရာ ဝမ်းဟိုင်းတွင် ကျင်းပခဲ့သည်။

Photo-SSPP Info

CNI News

၂၀၂၂ ခုနှစ်၊ မေလ ၂၀

ရခိုင်ပြည်နယ်တွင် ပြဿနာဖြစ်လာပါက တပ်မတော်ကို အဆိုးမဆိုနှင့်ဟု ပြောခြင်းမှာ ဖိအားပေး ခြိမ်းခြောက်ခြင်း ဖြစ်ကြောင်း ရခိုင်နိုင်ငံရေး သမားတစ်ဦးဖြစ်သူ ဦးဖေသန်းက CNI သတင်းဌာနသို့ ပြောသည်။

မေလ ၁၉ ရက်က ပြုလုပ်သည့် နစက သတင်းထုတ်ပြန်ရေးအဖွဲ့၏ (၁၄)ကြိမ်မြောက် သတင်းစာ ရှင်းလင်းပွဲတွင် ဗိုလ်ချုပ် ဇော်မင်းထွန်းက AA ကို တော်တော်သည်းခံနေရကြောင်းနှင့် ပြဿနာဖြစ်လာပါက တပ်မတော်ကို အဆိုးမဆိုနှင့်ဟု ပြောကြားသွားခဲ့သည်။

ဦးဖေသန်းက “ဒီဖက်မှာလည်းပဲ ULA/AA ရဲ့ တရားစီရင်ရေးတို့၊ အုပ်ချုပ်ရေးတို့ ULA/AA ရဲ့ အမာခံဆိုပြီး ဖမ်းဆီးတာတို့ နောက်တစ်ခါ ကုန်စည်စီးဆင်းမှုကို တားတာတို့ အဲဒီလိုကြောင့် ပြည်သူတွေက နစ်နာတဲ့ အဲဒီ အကြောင်းပြချက်တွေနဲ့ပေါ့။ ဒီဖက်နဲ့ အဆင်မပြေတာတွေ ရှိတယ်၊ ဒီဖက် ULA/AA ဖက်က ကြေညာချက် ထုတ်ပြီးတော့ ပြည်သူတွေကို အချိန်မရွေး တိုက်ပွဲတွေ ဖြစ်လာနိုင်တယ်ဆိုပြီး သတိပေးတာရှိတယ်၊ နောက်ပြီးတော့ နပခတိုင်းမှူးကို ပေါ့နော်၊ ဒီဖက်က ရာဇသံပေးတဲ့ သဘောမျိုး တွစ်တာမှာ ပြောတာတွေ ရှိတယ်၊ အဲဒါတွေပေါင်းပြီးတော့ သူတို့က ULA/AA က စစ်ခေါ်နေတယ်၊ စစ်ကို လိုလား နေတယ်ပေါ့။ ဘယ်လောက်ပဲ အပြုသဘောနဲ့ လုပ်လုပ် ဒီဖက်က စစ်ကို လိုလားနေတဲ့အတွက် ဒါက စစ်ဖြစ်လာနိုင်တယ်ပေါ့။ သူတို့က ပြည်သူကို ထိန်းထိန်းသိမ်းသိမ်းနဲ့ ပြည်သူကို ငဲ့ညာလို့ ဒီလို ထိန်းထိန်းသိမ်းသိမ်းနေတာ အခုဖြစ်လာရင်ပေါ့နော်၊ ညှာမယ့်သဘော မဟုတ်တော့ဘူးဆိုတဲ့ သဘောပေါ့၊ ဖြစ်လာရင် မညှာတော့ဘူး။ ဒါနောက်ဆိုရင် ငါတို့အဆိုးမဆိုနဲ့ဆိုတာ အဲဒါ ပြောတာပေ့ါ၊ အဲဒီလို ကိစ္စမျိုးက အရင်လည်း ဖြစ်ပြီးပြီ။ တိုက်ပွဲဖြစ်လာပြီဆိုရင် နှစ်ဖက်တိုက်ကြတာ မဟုတ်ဘဲနဲ့ ရွာတွေကို ပစ်တာတို့၊ မီးရှို့တာတို့ အဲဒီလိုလည်း ဖြစ်ခဲ့တယ်၊ ဘာလို့လဲဆိုတော့ ရွာထဲမှာ AA အမာခံတွေ ရှိတယ်ပေ့ါ။ အဲဒီ အကြောင်းပြချက်တွေနဲ့၊ အခုလည်းပဲ တိုက်ပွဲတွေ ဖြစ်လာရင် ပြည်သူတွေ နစ်နာမယ်ဆိုတဲ့ သဘောမျိုးပေ့ါ၊ တဖက်က ခြိမ်းခြောက်ပြီးတော့ ဖိအားပေးတယ်လို့ ပြောလို့ရတာပေါ့”ဟု ပြောသည်။

ထို့နောက် လက်နက်ကိုင်ထားသည့် တပ် အချင်းချင်း မဟုတ်ဘဲ ပြည်သူလူထုကို ခေါင်းစဉ်တပ် ခြိမ်းခြောက်သည့် သဘော မျိုး ဖြစ်ကြောင်း၊ နိုင်ငံရေးအရ ပြေပြေလည်လည် ဆွေးနွေးခြင်းမျိုး မဟုတ်ဘဲ ယခင်က ဆိုးခဲ့သည့် ပုံရိပ်ကို ထပ်ပြီး လုပ်ဆောင်မည်ဆိုသည့် သဘောဖြစ်နေကြောင်း ၎င်းက ပြောသည်။

ရခိုင်ပြည်နယ်ဒေသကိုတွေ့ရစဉ်

AA သည် အစိုးရ၏ အုပ်ချုပ်ရေး ယန္တရားများကို လုပ်လာသလို တိုင်းစစ်ဌာနချုပ်ကို ထိခိုက်စေရန် ပြောဆိုမှုများ ရှိလာခြင်း ကြောင့် တော်တော် သည်းခံနေရကြောင်း၊ ပြဿနာဖြစ်လာပါက တပ်မတော်ကို အဆိုးမဆိုပါနှင့်ဟု ဗိုလ်ချုပ်ဇော်မင်းထွန်းက ပြောသည်။

ဗိုလ်ချုပ်ဇော်မင်းထွန်းက “ဒီအချိန်မှာ ကျနော်တို့ လုပ်နေတာက ထိန်းသိမ်းနေတာက ရခိုင်ပြည်သူလူထု ဒုက္ခမရောက်စေ ချင်လို့ ထိန်းသိမ်းနေတာပဲ ဖြစ်ပါတယ်၊ ထပ်ပြောပါမယ် ရခိုင်ပြည်သူလူထု ဒုက္ခမရောက်စေချင်လို့ ထိန်းသိမ်းနေတာ ဖြစ်ပါတယ်၊ စိတ်ရှည်သည်းခံပြီးတော့ ပြည်ထောင်စုနဲ့ ငြိမ်းချမ်းရေးအတွက် ကျနော်တို့ လုပ်နေတာ ဖြစ်ပါတယ်၊ အဲဒီအတွက် အခု ဖြစ်နေတဲ့ဟာတွေနဲ့ ပတ်သက်ပြီးတော့က ပြဿနာဖြစ်လာရင်တော့ တပ်မတော်ကို အဆိုးမဆိုပါနဲ့လို့ပဲ ကျနော်ပြော ချင်ပါတယ်” ဟု ပြောသည်။

အဆိုပါ ပြောဆိုချက်သည် ပြည်သူလူထုများ အနေဖြင့် စစ်ခေါ်သံဟု မြင်မိကြောင်း၊ လက်ရှိ နစကဥက္ကဋ္ဌက ငြိမ်းချမ်းရေး ဖိတ်ခေါ်ထားသည့်အတွက် ငြိမ်းချမ်းရေးကို အထောက်အကူ ပြုစေမည် စကားလုံးများကို ပြောပါက ပို၍ ကောင်းမည် ဖြစ်ကြောင်း ရခိုင်းအမျိုးသားပါတီ (ANP)မှ မူဝါဒရေးရာ ဦးဆောင်ကော်မတီဝင် ဦးထွန်းအောင်ကျော်က CNI သတင်းဌာနသို့ ပြောသည်။

ရခိုင်ပြည်နယ်က တိုက်ပွဲရှောင်များကို တွေ့ရစဉ်

ဦးထွန်းအောင်ကျော်က “အဲဒါကတော့ စစ်သားက စစ်သားလို ပြောတယ်လို့ မြင်ပါတယ်။ ဒါပေမဲ့ ပြည်သူလူထုရဲ့ ရင်ထဲမှာ ကတော့ စစ်ခေါ်သံလို့ မြင်ပါတယ်၊ အဲဒါကြောင့် ဒီအခြေအနေမှာ နှစ်ဖက်အနေနဲ့ ငြိမ်းချမ်းရေးလည်း နိုင်ငံတော် အကြီးအကဲက ခေါ်ထားတာပဲ။ အဲဒါကြောင့် ငြိမ်းချမ်းရေးကို အထောက်အကူ ပြုစေတဲ့ စကားလုံးကလေးတွေနဲ့ ပြည်သူလူထုကို ဆွဲဆောင် တတ်ရင်တော့ ပိုကောင်းပါတယ်၊ အခုလို စစ်ခေါ်သံပေးပြီးတော့မှ ပြည်သူလူထုရဲ့ ရင်ထဲကို ထပ်ပြီးတော့ လှုပ်ခါအောင် ပြောလိုက်တဲ့ စကားလေးတွေကို နောက်နောင် အဲဒီလို မဟုတ်ဘဲနဲ့ ငြိမ်းချမ်းရေးကို ဦးစားပေးတဲ့ စကားတွေနဲ့ ပြည်သူလူထုကို ဆွဲဆောင်နိုင်မယ်ဆိုရင်တော့ ပိုပြီးတော့ သင့်မြတ်မယ်လို့ ယူဆပါတယ်” ဟု ပြောသည်။

၂၀၂၀ အထွေထွေရွေးကောက်ပွဲအပြီး ULA/AA နှင့် တပ်မတော်တို့အကြား ရခိုင်ပြည်နယ်နှင့် ချင်းပြည်နယ်တောင်ပိုင်း ပလက်ဝတို့တွင် လက်နက်ကိုင်ပဋိပက္ခများ လုံးဝရပ်တန့်ခဲ့သည်။

လက်ရှိ ရခိုင်ပြည်နယ်တွင် တပ်မတော်နှင့် AA တို့အကြား နားလည်မှုဖြင့် အပစ်ရပ်စဲထားသည်။

CNI News

၂၀၂၂ ခုနှစ်၊ မေလ ၂၀

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ရှမ်းပြည်ပြန်လည်ထူထောင်ရေးကောင်စီ(RCSS)ဥက္ကဋ္ဌ ဗိုလ်ချုပ်ကြီး ယွက်စစ်တို့ ယနေ့ (မေလ ၂၀ ရက်) နေပြည်တော်မှာ တွေ့ဆုံ၍ ငြိမ်းချမ်းရေး လုပ်ငန်းစဉ်များကို ဆွေးနွေးကြကြောင်း သိရသည်။

အဆိုပါ တွေ့ဆုံမှုတွင် နစကဘက်မှ နစကဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်၊ နစကဒုဥက္ကဋ္ဌ ဒုတိယ တပ်မတော်ကာကွယ်ရေးဦးစီးချုပ် ဒုတိယဗိုလ်ချုပ်မှူးကြီး စိုးဝင်း၊ နစကအဖွဲ့ဝင်များဖြစ်သည့် ကာကွယ်ရေးဝန်ကြီး ဗိုလ်ချုပ်ကြီး မြထွန်းဦး၊ NSPNC ဥက္ကဋ္ဌ ဒုတိယဗိုလ်ချုပ်ကြီး ရာပြည့်နှင့် နစကအဖွဲ့ဝင် တစ်ဦးတို့ တက်ရောက်ခဲ့သည်။

အလားတူ RCSS ဘက်မှ ဥက္ကဋ္ဌဖြစ်သူ ဗိုလ်ချုပ်ကြီး ယွက်စစ်၊ အတွင်းရေးမှူး(၁) ဗိုလ်မှူးကြီးစိုင်းငင်း နှင့် နောက်တစ်ဦး တက်ရောက်ခဲ့သည်။

ထို့နောက် နစကအဖွဲ့ဝင် သုံးဦးပါသည့် ကော်မတီနှင့် RCSSမှ ကိုယ်စားလှယ်များ ထပ်မံ တွေ့ဆုံ ဆွေးနွေးကြမည် ဖြစ်ကြောင်း သိရသည်။

CNI News

၂၀၂၂ ခုနှစ်၊ မေ ၁၉

နစကမှ ဖိတ်ခေါ်ထားသည့် ငြိမ်းချမ်းရေးဆွေးနွေးပွဲကို မနက်ဖြန် မေလ ၂၀ ရက်တွင် စတင်မည်ဖြစ်ကြောင်း နစက သတင်း ထုတ်ပြန်ရေးအဖွဲ့ ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

အဆိုပါ ဆွေးနွေးပွဲကို တိုင်းရင်းသား လက်နက်ကိုင်အဖွဲ့အစည်း (၁၀) ဖွဲ့ တက်ရောက် မည်ဖြစ်ကြောင်း သိရသည်။

မေလ ၂၀ ရက်နေ့ ငြိမ်းချမ်းရေးဆွေးနွေးပွဲကို သျှမ်းပြည်ပြန်လည်ထူထောင်ရေးကောင်စီ (RCSS/SSA) နှင့် အရင်ဆုံး တွေ့ဆုံ ဆွေးနွေးမည်ဖြစ်ကြောင်း၊ ၃ ရက်ခြား တစ်ဖွဲ့နှင့် တွေ့ဆုံသွားမည်ဖြစ်ကြောင်း ဗိုလ်ချုပ်ဇော်မင်းထွန်းက ပြောသည်။

PPST ကိုယ်စားလှယ်များနဲ့ ဗိုလ်ချုပ်မှူးကြီးမင်းအောင်လှိုင် ၂၀၁၈ ခုနှစ်၊ ဇူလိုင် ၁၂ ရက် တွေ့ဆုံစဉ်

နစက၏ ငြိမ်းချမ်းရေး ဆွေးနွေးပွဲသို့ တက်ရောက်မည့် လက်နက်ကိုင်အဖွဲ့များမှာ ဒီမိုကရေစီ အကျိုးပြု ကရင်တပ်မတော် (DKBA)၊ ရခိုင်ပြည် လွတ်မြောက်ရေးပါတီ (ALP)၊ ကရင်အမျိုးသား အစည်းအရုံး/ ကရင်အမျိုးသား လွတ်မြောက်ရေး တပ်မတော်- ငြိမ်းချမ်းရေးကောင်စီ (KNU/ KNLA-PC)၊ ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO)၊ မွန်ပြည်သစ် ပါတီ (NMSP)၊ ရှမ်းပြည်ပြန်လည်ထူထောင်ရေးကောင်စီ(RCSS)၊ လားဟူဒီမိုကရက်တစ် အစည်းအရုံး(LDU)၊ ‘ဝ’ ပြည် သွေးစည်းညီညွတ်ရေး တပ်မတော် (UWSA)၊ အမျိုးသားဒီမိုကရေစီ မဟာမိတ် တပ်မတော်(NDAA-မိုင်းလားအဖွဲ့)၊ ရှမ်းပြည် တိုးတက်ရေးပါတီ(SSPP) တို့ ဖြစ်ကြသည်။

CNI News

၂၀၂၂ ခုနှစ်၊ မေလ ၁၉

ရှမ်းပြည်ပြန်လည်ထူထောင်ရေးကောင်စီ(RCSS/SSA)မှ ကိုယ်စားလှယ်အဖွဲ့နှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင် လှိုင် တို့ မေလ ၂၀ ရက်(မနက်ဖြန်) တွေ့ဆုံ ဆွေးနွေးမည် ဖြစ်ကြောင်း နစကသတင်းထုတ်ပြန်ရေးအဖွဲ့ ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

အဆိုပါ တွေ့ဆုံ ဆွေးနွေးပွဲကို နေပြည်တော်မှာ ကျင်းပမည်ဖြစ်ကြောင်း ယနေ့ (မေလ ၁၉ ရက်) (၁၄)ကြိမ်မြောက် နစက သတင်းထုတ်ပြန်ရေးအဖွဲ့ သတင်းစာ ရှင်းလင်းပွဲမှာ ၎င်းက ပြောသွားခြင်း ဖြစ်သည်။

ဗိုလ်ချုပ်ဇော်မင်းထွန်းက “ ငြိမ်းချမ်းရေး ဆွေးနွေးပွဲကို မနက်ဖြန် စတင် ဆွေးနွေးပါမယ်၊ တစ်ဖွဲ့ချင်း ဆွေးနွေးမှာဖြစ်ပါ တယ်။ မနက်ဖြန် ပထမဦးဆုံး RCSS/SSA နဲ့ စဆွေးနွေးမည် ဖြစ်ပါတယ်။ ဒီနေ့ သူတို့ ရောက်နေပါပြီ။ ပြီးရင် နိုင်ငံတော် စီမံအုပ်ချုပ်ရေးကောင်စီ အဖွဲ့ဝင် ၃ ဦးပါတဲ့ ကိုယ်စားလှယ်အဖွဲ့နဲ့ ဆက်ဆွေးနွေးမှာ ဖြစ်ပါတယ်”ဟု ပြောသည်။

၂၀၁၈ ခုနှစ်၊ဇူလိုင် ၁၂ ရက်နေ့က ဗိုလ်ချုပ်မှူးကြီးမင်းအောင်လှိုင်နဲ့ RCSS အတွင်းရေးမှူး(၁) ဗိုလ်မှူးကြီးစိုင်းငင်း နှုတ်ဆက်နေစဉ်

RCSS နှင့် ဗိုလ်ချုပ်မှူးကြီး မင်းအောင်လှိုင် တို့ တွေ့ဆုံသည့်အခါ နံပါတ်တစ် EAO များ၏ လိုအင်ဆန္ဒ၊ နံပါတ်နှစ် နိုင်ငံ တော်အစိုးရက လိုလားချက်၊ နံပါတ်သုံး EAO များ လိုအင်ဆန္ဒနှင့် နိုင်ငံတော်အစိုးရ လိုလားချက် ညှိနှိုင်းခြင်း၊ နံပါတ် လေး နောင်အနာဂတ်တွင် မည်သည့် ကိစ္စများ လုပ်ကိုင်ဆောင်ရွက်မည်လဲ စသည့် အကြောင်းအရာများကို အခြေခံ ဆွေးနွေးမည် ဖြစ်ကြောင်း ၎င်းက ပြောသည်။

ထို့နောက် ၃ ရက်ခြား တစ်ခါ နောက်ထက် တိုင်းရင်းသား လက်နက်ကိုင်အဖွဲ့များဖြင့် ဆက်လက် ဆွေးနွေးသွားမည် ဖြစ် ကြောင်း ဗိုလ်ချုပ်ဇော်မင်းထွန်းက ပြောသည်။

ဗိုလ်ချုပ်မှူးကြီး မင်းအောင်လှိုင် ကိုယ်တိုင် တွေ့ဆုံ ဆွေးနွေးမည့် ငြိမ်းချမ်းရေး ဆွေးနွေးပွဲသို့ တက်ရောက်မည်ဟု RCSS ၊ NMSP၊ PNLO၊ DKBA၊ KNU/KNLA-PC၊ ALP၊ LDU၊ UWSA၊ NDAA၊ SSPP စသည့် လက်နက်ကိုင် အဖွဲ့အစည်းများ တက် ရောက်ကြမည် ဖြစ်သည်။

အဆိုပါ တိုင်းရင်းသား လက်နက်ကိုင်အဖွဲ့ ၁၀ ဖွဲ့ထဲမှ ၃ ဖွဲ့သာ ဥက္ကဋ္ဌများ တက်ရောက်မည်ဖြစ်ပြီး ကျန်အဖွဲ့များက ဒုဥက္ကဋ္ဌ နှင့် တွဲဖက်အတွင်းရေးမှူးများသာ တက်ရောက်ကြမည်ဖြစ်ကြောင်း သိရသည်။

CNI News

၂၀၂၂ ခုနှစ်၊ မေလ ၁၉

ရှမ်းပြည်နယ်မြောက်ပိုင်းရှိ မြို့နယ် ၉ မြို့နယ်တွင် ဇွန်လ ပထမအပတ်၌ စတင်ပြီး တ‌အာင်းအမျိုးသား ကိုယ်ပိုင်ကျောင်း ဖွင့်လှစ်သွားမည်ဟု ပလောင်ပြည်လွတ်မြောက်ရေးတပ်ဦး (PSLF/TNLA) မှ ပြောရေးဆိုခွင့်ရှိသူ ဗိုလ်မှူး မိုင်းအိုက်ကျော် က CNI သတင်းဌာနသို့ ပြောသည်။

အဆိုပါ တအာင်းကိုယ်ပိုင် ကျောင်းများကို တအာင်းအမျိုးသား ပညာရေးကော်မတီ (TNEC) မှ ဦးဆောင် ဖွင့်လှစ်မည် ဖြစ်ကြောင်း သိရသည်။

ဗိုလ်မှူးမိုင်းအိုက်ကျော်က “မြို့နယ် အတိအကျတော့ ကျနော်မသိရဘူး။ ဘယ်နှစ်ကျောင်းလဲဆိုတာ၊ အဓိကတော့ ကျနော်တို့ နမ့်ခမ်းရယ်၊ ဒီမူဆယ်ရယ်၊ ကွတ်ခိုင်ရယ်၊ လားရှိုး အချို့တစ်ဝက်ပါမယ်၊ နမ္မတူ၊ မန်တုံ၊ နမ့်ဆန်၊ ကျောက်မဲ၊ မိုင်းမောဖက် အဲဒီ မြို့နယ်တွေ ပါတာပေါ့နော်၊ ကျေးရွာကတော့ ကျောင်းပေါင်းကတော့ ဘယ်လောက်ဆိုတာ မသိရသေးဘူး” ဟု CNI သတင်းဌာနသို့ ပြောသည်။

တအာင်းကိုယ်ပိုင်ကျောင်း ဖွင့်လှစ်ရခြင်း၏ ရည်ရွယ်ချက်မှာ ၂၀၂၀ ခုနှစ်မှ စတင်ကာ အခြေခံပညာကျောင်းများ ပိတ်ထားရ သည့်အတွက် ဖွင့်လှစ်ခြင်းဖြစ်ကြောင်း၊ ကျောင်းဖွင့်လှစ်သည့်အခါ တအာင်းစာပေအပြင် အခြားဘာသာရပ်များ၊ အခြား လူမျိုးစုများ၏ ကျေးရွာများတွင် ၎င်းတို့၏ စာပေများကို သင်ကြားသွားမည်ဟု သိရသည်။

အဆိုပါ တအာင်းကိုယ်ပိုင်ကျောင်းကို တအာင်းအမျိုးသားပညာရေးကော်မတီ(TNEC) မှ ပထဆုံးအကြိမ် ဖွင့်လှစ်ရန် ကြိုးပမ်း ခြင်းဖြစ်ကြောင်း၊ ကျောင်းပေါင်း ၅၀၀ ဖွင့်လှစ်ရန် ခန့်မှန်းထားကြောင်း တအာင်းအမျိုးသမီးအဖွဲ့အစည်း (TWO) မှ ပြောရေး ဆိုခွင့်ရှိသူ လွေးချီဆငါးက CNI သတင်းဌာနသို့ ပြောသည်။

တအာင်း အဖွဲ့အစည်းများ စာပေ သင်ကြားနိုင်ရေး ကြိုးပမ်းနေစဉ်

လွေးချီဆငါးက “ဟုတ်ကဲ့ ကျောင်းဖွင့်တာကတော့ ကောင်းတယ်လို့တော့ ကျမတို့မြင်တယ်၊ ဘာဖြစ်လို့လဲဆိုတော့ ဒီအတိုင်း ထားနေမယ့်အစား ကျမတို့ကလေး ဒီနေရာမှာ ပြန်ကြည့်မယ်ဆိုရင်တော့ ၂၀၂၀ နဲ့ ဒီနှစ်ဆက်ပြီးမှ ကျောင်းမဖွင့်ရရင် ၃ နှစ် လောက် ရှိတော့မယ်ဆိုတော့ ကလေးတွေလည်း တော်တော်များများက စာမသင်တဲ့ကလေးတွေ အများကြီး တွေ့နေရတာ ပေါ့၊ တချို့ကလေးတွေဆိုလည်း စောစောစီးစီး အိမ်ထောင်ကျ သွားတာတွေ ရှိတယ်၊ တချို့ကလေးတွေဆိုလည်း တခြား ဒေသမှာ အလုပ်သွားလုပ်ရတဲ့ ဟာတွေလည်း ရှိနေတယ်၊ တချို့ကလေးတွေဆိုလည်း လုံးဝကို ဒီစာပိုင်းမှာ မေ့ပျောက်ပြီး တော့ စာမတတ်တဲ့ ကလေးတွေလည်း အများကြီး တွေ့နေရတာပေ့ါနော်၊ ဒီလို ကျောင်းပြန်ဖွင့်တာက တကယ်ဝမ်းသာစရာ သတင်းတစ်ခု ဖြစ်တယ်” ဟု ပြောသည်။

TNEC က ဖွင့်လှစ်ရန် ပြင်ဆင်နေသည့် ကျောင်းများတွင် သင်ကြားမည့် သင်ရိုးညွန်းတန်းမှာ ယခင်အစိုးရ လက်ထက်က သင်ရိုးညွှန်းတမ်းများနှင့် အမျိုးသားညီညွတ်ရေးအစိုးရ(NUG)မှ ပြုလုပ်နေသည့် သင်ရိုးညွှန်းတမ်းကို အခြေခံပြီး သင်ကြား သွားမည်ဖြစ်ကြောင်း လွေးချီဆငါးက ပြောသည်။

ပထမဆုံးအကြိမ် ဖွင့်လှစ်ခြင်း ဖြစ်သည့်အတွက် ငွေကြေးပိုင်းဆိုင်ရာတွင် အခက်အခဲများ ရှိနေကြောင်း၊ အခြားသော အဖွဲ့အစည်းများ အနေဖြင့်လည်း ပညာရေးနှင့် ပတ်သက်၍ အကူအညီပေးရန် တောင်းဆိုကြောင်း ၎င်းက ပြောသည်။