CNI News
၂၀၂၄ ခုနှစ်၊ မေလ ၃

စစ်မှန်သော ပြည်ထောင်စု ဒီမိုကရေစီ ရရှိရန် နိုင်ငံရေးစားပွဲဝိုင်းတွင် အဖြေရှာသည့်နည်းလမ်းမရှိတော့ခြင်း ကြောင့် တိုက်ပွဲဖြစ်ရတော့မည်ဟု ရှမ်းပြည်တိုးတက်ရေးပါတီ/ရှမ်းပြည်တပ်မတော်(SSPP/SSA)ဒုဥက္ကဋ္ဌ ဒုဗိုလ်ချုပ်ကြီး စဝ်ခွန်ဆိုင်က ပြောသည်။

၂၀၂၄ ခုနှစ်၊ ဧပြီ ၂၄ ရက်နေ့က SSA တည်ထောင်ခြင်း နှစ် ၆၀ ပြည့် အခမ်းအနားမှာ အထက်ပါအတိုင်း ၎င်းက ပြောကြားခဲ့ခြင်း ဖြစ်သည်ဟု SSPP/SSA မှ မေလ ၃ ရက်နေ့တွင် ထုတ်ပြန်ခဲ့သည်။

စစ်မှန်သည့် ပြည်ထောင်စုနိုင်ငံတော်ကြီး တည်ထောင်နိုင်ရန်ချုပ်ဆိုခဲ့သော ပင်လုံစာချုပ်ကို မဟာလူမျိုးကြီးဝါဒ ကျင့်သုံးသည့် စစ်အုပ်စု အဆက်ဆက်က လစ်လျူရှုပစ်ပယ်ကာ တစ်ပြည်ထောင်စနစ် တည်ဆောက်ခဲ့သော ကြောင့် ယခုလို ဆုံးဖြတ်ရခြင်းဖြစ်ကြောင်း ဒုဗိုလ်ချုပ်ကြီး စဝ်ခွန်ဆိုင်က ပြောသည်။

၎င်းက “ နိုင်ငံရေးကို နိုင်ငံရေး လမ်းစဉ်နဲ့ စားပွဲဝိုင်းပေါ်မှာ တွေ့ ဆုံဆွေးနွေးခဲ့တာ ပင်လုံစာချုပ် စချုပ်ကထဲ ကနေဆို နှစ်ပေါင်း ၇၇ နှစ်ကြာပါပြီ။ စစ်အုပ်စု အဆက်ဆက်က တိုင်းရင်းသား လူနည်းစုတွေကို ဝါးမြိုပြီး ပင်လုံ စာချုပ်မှာ သဘောတူ လက်မှတ်ရေးထိုးထားတဲ့ အချက်တွေကို မလိုက်နာခဲ့ကြပါဘူး။ စစ်ကောင်စီတွေ အာဏာသိမ်း ပြီး နောက်မှာလည်း မြန်မာနိုင်ငံရဲ့ နိုင်ငံရေးအခြေအနေဟာ စားပွဲဝိုင်းပေါ် ဆွေးနွေးညှိနှိုင်း အဖြေရှာဖို့ နည်းလမ်းတွေ လုံးဝ မဖြစ်နိုင်တော့တဲ့ အနေအထား ဖြစ်ခဲ့ပါတယ်။ အခြေအနေ လုံးဝ မပေး နိုင်တော့တဲ့အဆုံး လက်နက်ကိုင် တော်လှန်မယ့်လမ်းစဉ်ကို ရွေးချယ်ခဲ့ရတာ ဖြစ်ပါတယ်” ဟု ပြောသည်။

SSPP နဲ့ ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ်

စစ်အာဏာရှင်စနစ်ကို တိုက်ဖျက်ဖို့အတွက် ရှမ်းပြည်တိုးတက်ရေးပါတီ/ရှမ်းပြည်တပ်မတော် ဉီးဆောင်မှု အောက်ကနေ ပြတ်ပြတ်သားသား လုပ်ဆောင်ကြရန်နှင့် တော်လှန်ရေးတပ်ဖွဲ့များ အပါအဝင် ပြည်သူလူထု အားလုံး ကြိုးစားတိုက်ပွဲဝင်ကြရန် ဒုဗိုလ်ချုပ်ကြီး စဝ်ခွန်ဆိုင်က ပြောသည်။

၎င်းက “တွေဝေနေလို့ မဖြစ်တော့ပါဘူး ၊ အခု ကျနော်တို့ ဖြစ်ချင်တာက နိုင်ငံရေး ပြဿနာကို နိုင်ငံရေး နည်းလမ်းနဲ့ တွေ့ဆုံဆွေးနွေး အဖြေရှာတာ ဖြစ်ပါတယ်။ အခုချိန်မှာတော့ အဖြေရှာဖို့ လမ်းစဉ်ဟာ လုံးဝ မရှိတော့ပါဘူး။ ဒါကြောင့် တိုက်ပွဲ ဖြစ်ရပါတော့မယ်။ မနက်ဖြန် စစ်မဖြစ်ချင်ရင် ဒီနေ့ စစ်ဖြစ်ရပါမယ်။ မနက်ဖြန် အခက်မကြုံဖို့အတွက် ဒီနေ့ ရုန်းကန်ရပါမယ်” ပြောသည်။

SSPP/SSA သည် ဉီးသိန်းစိန် အစိုးရလက်ထက် ၂၀၁၂ ခုနှစ်တွင် ပြည်နယ် အဆင့်နှင့် ပြည်ထောင်စု အဆင့် ပ ဏာမ အပစ်ရပ်စာချုပ်(Bilateral)များ လက်မှတ်ရေးထိုးထားသည့် ရှမ်းလက်နက်ကိုင်ဖြစ်သည်။

SSPP တပ်ဖွဲ့ကို တွေ့ရစဉ်

သို့သော် မြန်မာ့တပ်မတော် တိုက်ပွဲများ တခါတရံ ဖြစ်ပွားခဲ့ပြီး လက်ရှိမှာလည်း ရှမ်းပြည်နယ်မြောက်ပိုင်း၊ နမ့်ခမ်း မြို့နယ်အတွင်းမှာ တအာင်းအမျိုးသားလွတ်မြောက်ရေးတပ်မတော်(TNLA)နှင့် နယ်မြေအငြင်းပွား၍ စစ်ရေးတင်း မာလျက်ရှိသည်။
၂၀၁၅ ခုနှစ်မှ ၂၀၁၇ ခုနှစ်များအတွင်း SSPP/SSA ဌာနချုပ်ရှိရာ ဝမ်ဟိုင်းကို မြန်မာ့တပ်မတော်က ထိုးစစ်ဆင်ခဲ့ရာ တိုက်ပွဲများ အပြင်းအထန် ဖြစ်ပွားခဲ့ဖူးသည်။

SSPP/SSA သည် UWSA၊ KIA၊ MNDAA၊ AA၊ TNLA၊ NDAA တို့ ပါဝင်သည့် ပြည်ထောင်စုနိုင်ငံရေးဆွေးနွေး ညှိနှိုင်းရေးကော်မတီ(FPNCC)အဖွဲ့ဝင်ဖြစ်သည်။

CNI News

၂၀၂၄ ခုနှစ်၊ မေလ ၃

နစကမှ ပြည်ပထွက်ခွာ အလုပ်လုပ်ကိုင်ခွင့်ကို ရပ်ဆိုင်းလိုက်ရခြင်းသည့် မည်သည့်အရေးကိစ္စများကြောင့် ဖြစ်နိုင်သလဲဆိုသည့်အပေါ် နိုင်ငံရေးအသိုင်းအဝိုင်းနှင့် လူငယ်များကြား မေးခွန်းထုတ်လျက်ရှိနေသည်။

အမျိုးသားများ ပြည်ပကို တရားဝင်ထွက်ခွာပြီး အလုပ်လုပ်ကိုင်ခွင့်ကို ရပ်ဆိုင်းကြောင်း နစကမှ မီဒီယာများထံ  တရားဝင်ထုတ်ဖော် ပြောကြားခဲ့သည်။

ပြည်ပထွက်ခွာ အလုပ်လုပ်ခွင့် ရပ်ဆိုင်းခြင်းက ပြည်သူ့စစ်မှုထမ်းဥပဒေ၊ ပြည်တွင်းမှာ အလုပ်အကိုင် ရှားပါးမှု၊ နယ်မြေမတည်ငြိမ်မှုများနှင့် ဆက်စပ်နိုင်ကြောင်း နိုင်ငံရေးသမားတစ်ဦးက CNI သတင်းဌာနသို့ ပြောသည်။

၎င်းက “အဲဒါကတော့ အကြောင်းအမျိုးမျိုးတော့ ရှိနိုင်ပါတယ်၊ ရှိနိုင်ပါတယ်ဆိုတာက လက်ရှိမှာ ကျနော်တို့က ပြောရလို့ရှိရင်တော့ စစ်မှုထမ်းဥပဒေကိုလည်း ရှောင်တဲ့လူတွေများတယ်လေ၊ နောက်မှ မင်းတို့ ပြန်အမှုထမ်း ရမယ်ဆိုတာ အပ(သာ)ထား လက်ရှိမှာတော့ လူတွေက မရှိလို့ရှိရင် ပြီးတာပဲဆိုပြီးတော့ ရှောင်တဲ့သဘော ပေါ့နော်၊ ဒုတိယတစ်ချက်က အလုပ်အကိုင် အခွင့်အလမ်းပေါ့၊ တတိယအချက်ကတော့ နယ်မြေမငြိမ်းချမ်းမှုပေါ့၊ အခုကျနော်တို့ မုံရွာ၊ ပုလဲဖက်ကလူတွေဆိုရင် တချို့တော်တော်များများ အကြောင်းအမျိုးမျိုးကြောင့် ပြောရလို့ရှိ ရင်တော့ NLD မထောက်ခံတဲ့ လူတွေပေါ့နော်၊ သူတို့ရွာမှာ အခုသူတို့ နေလို့မရတော့ဘူး။ ရွာကို ပြန်ပြီး အလည် လာမယ်၊ မန္တလေးမှာ ရွေ့နေပြီးတော့ အလည်ခဏလာမယ်ဆိုရင် တစ်သိန်းခွဲ တောင်းတယ်ပေါ့၊ မြိုင်နဲ့ ပုလဲအစပ် ပေါ့နော်၊ ဒေသန္တရ PDF တွေက တောင်းတာ၊ ရွာက PDF တွေက တောင်းတာ တစ်သိန်း၊ တစ်သိန်းခွဲတောင်းတာ၊ ပြီးလို့ရှိရင် လစဉ်အခွန်ဆောင်ရတယ်၊ တစ်လကို အနည်းဆုံး ၃ သောင်းဆောင်ရတယ်၊ ကျန်တဲ့အာမခံချက်လည်း ဘာမှမရှိဘူး။ ဒီလိုပဲ တည့်အောင်နေရတယ်ဆိုတော့ အဲဒီမှာ တော်တော်များများက မပြန်ကြဘူးပေါ့နော်၊ အဲဒီ တော့ နယ်မြေမအေးချမ်းမှု ဒီဒုက္ခတွေကြောင့်ပါတယ်၊ နောက်တစ်ခုကတော့ စစ်မှုထမ်းဥပဒေကို ရှောင်ချင်တဲ့သူ ကြောင့်ပါတယ်၊ အဓိကအချက်ကတော့ အဲဒီနှစ်ချက်၊ သုံးချက်ပါပဲ” ဟု ပြောသည်။

ပြည်သူ့စစ်မှုထမ်ဥပဒေအရ စစ်သင်တန်းတက်ရောက်နေကြစဉ်

၂၀၂၁ ခုနှစ်၊ ဖေဖော်ဝါရီ ၁ ရက်နေ့က ဖြစ်ပေါ်ခဲ့သော နိုင်ငံရေး အပြောင်းအလဲများကြောင့် လူငယ်အများအပြား နေရပ်စွန့်ကာ ပြည်ပသို့ ထွက်ခွာ အလုပ်လုပ်ကိုင်ခဲ့ကြသည်။

ထို့နောက် နစကမှ ပြဋ္ဌာန်းလိုက်သည့် ပြည်သူ့စစ်မှုထမ်းဥပဒေကြောင့် ပြည်သူလူထုအကြား စိုးရိမ်မှု မြင့်တက် လာပြီး တရားဝင် လမ်းကြောင်းသာမကဘဲ တရားမဝင် နယ်စပ်ဖြတ်ကျော်မှု နေ့စဉ်နှင့်အမျှ ဖြစ်ပေါ်လျက်ရှိ နေသည်။

နစကမှ ထုတ်ပြန်ထားသည့် ပြည်သူ့စစ်မှုထမ်းဥပဒေကြောင့် လူငယ်များ ပြည်ပသို့ သွားရောက်မှု မြင့်တက် ခဲ့ခြင်းကြောင့် ယခုကဲ့သို့ ပြည်ပအလုပ်လုပ်ကိုင်ခွင့် ရပ်ဆိုင်းခြင်းဖြစ်နိုင်ကြောင်း နိုင်ငံရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

၎င်းက “အဲဒါက ရုရှားမှာ ဖြစ်ပြီးပြီလေ၊ ရုရှားမှာ အဲဒီလိုပဲ စစ်မှုထမ်းဥပဒေပြဋ္ဌာန်းလိုက်တာ အကုန်ထွက်ပြေးတာ၊ တစ်နေ့ကို လူသိန်းနဲ့ ချီထွက်ပြေးတာ သိန်းဂဏန်း ထွက်ပြေးတာ နယ်စပ်မှာ ကားတန်းကြီးတွေနဲ့ လူတန်းကြီး တွေနဲ့ အရှည်ကြီး ရုရှားအစိုးရကတော့ မင်းတို့ ပြေးစမ်း ပြေးစမ်း မနေနဲ့တော့ သွားကြ မျိုးချစ်စိတ်မရှိတဲ့ကောင် တွေလို့ ဒါပေမဲ့ နှစ်ပတ်လောက်လည်း ကြာရော လူငယ်အင်အားက ကုန်သလိုဖြစ်လည်း လာရော ဘယ်သူမှ မထွက်ရလို့ အမိန့်ထုတ်ချလိုက်တာပဲ၊ အခုလည်း ဒီလိုပဲလေ သွားကြလေ ရီတောင်ရီချင်သေးတယ်၊ ငါ့မှာပေါ့လို့ မိန်းကလေးအင်အားက ၇.၆ သန်း၊ ယောကျာ်းလေးက ၆ သန်း ၁၄ သန်းလောက်ရှိတယ် အခုလည်းကြတော့ အကုန်ထွက်ပြေးကုန်တော့ တစ်လကို ၅၀၀၀ ခေါ်တာ မပြည့်တော့ဘူး။ စစ်မှုထမ်းကို မဟုတ်တော့ဘူး။ အတင်း လိုက်ဆွဲ၊ အိမ်ပေါ်တက်ဆွဲ အဲဒီလို အဆင့်ရောက်သွားပြီ လမ်းတွေ့ဖမ်း ပေါ်တာဆွဲ အဲဒီလိုဖြစ်သွားပြီ နောက်ဆုံး လည်းကျရော ဘယ်လိုမှ မရတော့ဘူး။ မထွက်တော့နဲ့ဆိုပြီး ရုရှားလို ဖြစ်တော့တာပဲ။ ရုရှားကတော့ ယူကရိန်းနဲ့ ဖြစ်လို့ တစ်မျိုးပေါ့ကွာ၊ တို့ကြတော့ ကိုယ့်ပြည်သူပြည်သား အချင်းချင်း ပြန်တိုက်ရမယ့် စစ်ပွဲကြတော့ ဘယ်သူ က တိုက်ချင်မှာလဲ၊ သေတာများတယ်လေ” ဟု ပြောသည်။

 ပြည်သူ့စစ်မှုထမ်ဥပဒေအရ စစ်သင်တန်းတက်ရောက်နေကြစဉ်

နစကသည် ပြည်သူ့စစ်မှုထမ်းဥပဒေကို အာဏာတည်စေကြောင်း ထုတ်ပြန်ခဲ့ပြီးနောက် ဧပြီလက စတင်ကာ စစ်မှုထမ်းရန် လူအင်အား ၅၀၀၀ ကို စုဆောင်းခဲ့ရာ ၅၀၀၀ ကျော်အထိ စုဆောင်းရရှိခဲ့ပြီး စစ်သင်တန်းများ ပေးလျက်ရှိနေသည်။

ပြည်တွင်းမှာ ဖြစ်ပေါ်နေသော လက်နက်ကိုင်ပဋိပက္ခ၊ နိုင်ငံရေး သဘောထားကွဲလွဲမှု၊ အလုပ်အကိုင်ရှားပါးမှု၊ အခြေခံလုပ်ခလစာ နည်းပါးမှုများကြောင့် လူငယ်အများအပြား ပြည်ပကို သွားရောက် အလုပ်လုပ်ကိုင်နေ ကြောင်း၊ ထို့ကြောင့် မြန်မာနိုင်ငံအနေဖြင့် လူသားအရင်းအမြစ်ရှားပါးမှု ပြဿနာများ ရင်ဆိုင်ရနိုင်ကြောင်း နိုင်ငံရေးသမားတစ်ဦးက ထောက်ပြထားသည်။

CNI News

၂၀၂၄ ခုနှစ်၊ မေလ ၃

အမျိုးသားညီညွတ်ရေးအစိုးရ(NUG)သည် စာနယ်ဇင်းလွတ်လပ်ခွင့်နှင့် သတင်းမီဒီယာဆိုင်ရာ သဘောထားရပ် တည်ချက်ကို ၂၀၂၄ ခုနှစ်၊ မေလ ၃ ရက်နေ့တွင် ထုတ်ပြန်ခဲ့သည်။

NUG သည် ဖက်ဒရယ်ဒီမိုကရေစီပဋိညာဉ် အစိတ်အပိုင်း(၁) ပုဒ်မ ၄၂ ပါ “သတင်းမီဒီယာများ၏ လွတ်လပ်စွာ ရပ်တည်ပိုင်ခွင့်၊ လွတ်လပ်စွာ သတင်းရယူပိုင်ခွင့်၊ လွတ်လပ်စွာ သတင်းတင်ပြပိုင်ခွင့်တို့အား အကာအကွယ် ပေးရမည်”ဟူသည့် အခြေခံမူဝါဒနှင့်အညီ အထက်ပါ သဘောထားကို ထုတ်ပြန်ခဲ့သည်ဟု ဖော်ပြထားသည်။

NUG က “ပြည်သူလူထု အနေဖြင့် တိုင်းရေးပြည်ရာကိစ္စအဝဝကို သေချာစွာ သိရှိနားလည် သဘောပေါက်ပြီး အရေးကြီးသည့် ဆုံးဖြတ်ချက်များကို မှန်ကန်စွာ ရွေးချယ် ချမှတ်နိုင်စေရန် စာနယ်ဇင်းလွတ်လပ်ခွင့်နှင့် လွတ် လပ်၍ တာဝန်ယူမှု၊ တာဝန်ခံမှုရှိသော သတင်းမီဒီယာများ၏ အခန်းကဏ္ဍ အထူးအရေးပါသည်ကိ လေးနက်စွာ အသိအမှတ်ပြုသည်”ဟု ပြောထားသည်။

ထို့နောက် ဒေသဆိုင်ရာ တိုင်းရင်းသား မီဒီယာများ အပါအဝင် လွတ်လပ်၍ တာဝန်ယူမှု၊ တာဝန်ခံမှုရှိသော သတင်းမီဒီယာများ ခိုင်မာအားကောင်းစွာ ရပ်တည်နိုင်ရေး အားပေးထောက်ခံသည်ဟု NUG က ထုတ်ပြန်ခဲ့ သည်။

သတင်းမီဒီယာများ၏ သီးခြားလွတ်လပ်မှု၊ ဘက်မလိုက်မှုနှင့် ဓမ္မဓိဋ္ဌာန်ကျမှုတို့ကို ထိခိုက်စေမည့် ကန့်သတ် တားဆီးချုပ်ခြယ်မှု မှန်သမျှကို ပြတ်သွားစွာ ဆန့်ကျင်ကြောင်း၊ စာနယ်ဇင်းလွတ်လပ်ခွင့် အားကောင်းခိုင်မာ စေရေး အားပေးထောက်ခံသွားမည်၊ သတင်းမီဒီယာသမားများအား ခြိမ်းခြောက် နှောင့်ယှက်သည့် မည်သည့် လုပ်ရပ်မျိုးကိုမဆို ပြတ်သားစွာ ဆန့်ကျင်ပြီး ထိုလုပ်ရပ်များ ပပျောက်သွားစေရန်နှင့် သတင်းသမားများကို ကာ ကွယ်ပေးနိုင်ရန် ကြိုးပမ်းလုပ်ဆောင်သွားမည်ဟု NUG ၏ ထုတ်ပြန်ချက်တွင် ဖော်ပြထားသည်။

NUG ၏ သတင်းသမားဆိုင်ရာ သဘောထားကိုတွေ့ရစဉ်

ပြည်တွင်းရှိ သတင်းသမားတစ်ဦးက “ အခုက သတင်းသမားတွေကို ဘက်တွေရွေးခိုင်းကြတယ်။ မင်းဘယ် ဘက်ကနေ ရပ်တည်မှာလဲပေါ့။ ပြည်တွင်းမှာနေပြီး သတင်းကျင့်ဝတ်အတိုင်း လိုက်နာရေးသားတင်ဆက်သူ ဖြစ်နေတာတောင်မှ ပေးစားခံရတယ်။ ပြီးတော့ ဝိုင်းပြီ တိုက်ခိုက်ကြတယ်။ တချို့ဆို ခြိမ်းခြောက်ခံရတာတွေ တောင်ရှိတယ်။ ဒါတွေကို ဘယ်လို ထိန်းကြောင်းမလဲ၊ လက်တွေ့မှာတော့ ထိန်းကြောင်းနိုင်မှာမဟုတ်ပါဘူး။ သူ့မှာ အကြောင်းတစ်ခုခုရှိလို့ ဒီဟာကို ထုတ်ပြန်တာဖြစ်ပါလိမ့်မယ်”ဟု ပြောသည်။

ထို့နောက် ပြည်ပတွင် အခြေစိုက်၍ သတင်းသမားအဖြစ် လုပ်ကိုင်နေသူ တစ်ဦးကတော့ မိမိတို့သည် ပြည်ပကို ထွက်ပြီး ကိုယ်ဝါသနာပါသည့် သတင်းလုပ်ငန်းကို လုပ်ကိုင်ရာမှာ တော်လှန်ရေး အားပေးသူဆိုကာ အာဏာ ပိုင်အဖွဲ့အစည်းများ၏ ဖမ်းဆီးခြင်းကို ခံရမည့် ဘေးအန္တရာဖြင့် ရင်ဆိုင်နေရသည်ကို NUG က ဘယ်လိုကာ ကွယ်ပေးမလဲဟု ဆိုသည်။

 မြန်မာသတင်းသမားတွေကိုတွေ့ရစဉ် (Frontier)

၎င်းက “ ကျနော်ဆိုရင် ကိုယ်လုပ်တဲ့ သတင်းဌာနက ပြည်တွင်းမှာမရှိတော့ဘူး ပြည်ပ ထွက်သွားရတော့ ပြည်ပကို လိုက်သွားရတာပဲ။ ဒါပေမဲ့ သတင်းကျင့်ဝတ်အတိုင်း ရေးသားတင်ဆက်တယ်။ သို့သော် စကစ ဘက်က တော်လှန်ရေးအားပေးဆိုပြီး ဖမ်းဆီးဖို့လုပ်မှာပဲ၊ ဒါတွေကို ဘယ်လိုထိန်းကြောင်းမလဲ၊ အခုက သတင်း သမားတွေ ကြားညှပ်သွားတယ်။ သတင်းသမားတွေဟာ စာမေးပွဲ စစ်ခံနေရတာနဲ့တူတယ်”ဟု ပြောသည်။

မြန်မာနိုင်ငံသတင်းမီဒီယာကျင့်ဝတ်တွင် ဘက်မလိုက်ရ၊ ပုဂ္ဂိုလ်-ဘာသာ- ပါတီ- အဖွဲ့အစည်း မစွဲရ၊ တရားမျှတ စွာ ရပ်တည်ရမည်၊ ဝါဒမစွဲရ၊ သတင်းအမှန်ကို တင်ပြရမည် စသဖြင့် အခြေခံများကို သတ်မှတ်ပြဋ္ဌာန်းထား သည်။

သို့သော်လည်း ၂၀၂၁ ခုနှစ်၊ ဖေဖော်ဝါရီ ၁ ရက်နေ့ နောက်ပိုင်း ဖြစ်ပေါ်လာသော မြန်မာ့နိုင်ငံရေး ပဋိပက္ခ ကြားထဲမှာ သတင်းမီဒီယာများနှင့်သတင်းသမားများသည် သတင်းကျင့်ဝတ်များ စောင့်ထိန်းမှုအားနည်းလာပြီး ဘက်ရွေး ရပ်တည်လာကြသလို သတင်းသမား ကျင့်ဝတ်အတိုင်း နေထိုင်လုပ်ကိုင်ကြသူများဆိုလျှင်လည်း ခြိမ်းခြောက်မှုများစွာဖြင့် ရင်ဆိုင်လာခဲ့ကြရသည်။

CNI News
၂၀၂၄ ခုနှစ်၊ မေလ ၂

ရှမ်းနီအမျိုးသားများတပ်မတော်(SNA)၏ တပ်မဟာ ၆၁၄ သည် လွတ်မြောက်နယ်မြေ တစ်နေရာမှာ အမှတ်စဉ် ၂ အပတ်စဉ် ၉ အခြေခံ စစ်သင်တန်းဆင်းပွဲကို ၂၀၂၄ ခုနှစ်၊ မေလ ၂ ရက်နေ့တွင် ကျင်းပခဲ့ကြောင်း သိရသည်။

SNA သည် စစ်ကိုင်းတိုင်းဒေသကြီးအတွင်းရှိ ကလေး၊ တမူး၊ ဟုမ္မလင်း၊ ကသာ၊ မော်လိုက်၊ ဗန်းမောက်၊ ဖောင်းပြင်၊ ကောလင်း၊ ဝန်းသို၊ ပင်လည်ဘူး အပါအဝင် ကချင်ပြည်နယ်အတွင်းက ဗန်းမော်၊ မြစ်ကြီးနား၊ မိုးညှင်း၊ မိုးကောင်း၊ အင်းတော်ကြီး စသည့် ဒေသများကို စုစည်း၍ ရှမ်းနီပြည်နယ် ရရှိရေး ကြိုးပမ်းနေသော ရှမ်းနီလက်နက်ကိုင်ဖြစ်သည်။

လက်ရှိတွင် SNA လှုပ်ရှားနေသော ဒေသများထဲက ဟုမ္မလင်း၊ ဗန်းမောက်၊ ရွှေပြည်အေး၊ ဖောင်းပြင်၊ မိုးညှင်း၊ မိုးကောင်း၊ အင်းတော်၊ ဖားကန့်တို့၌ KIA-PDF ပူးပေါင်းတပ်ဖွဲ့များဖြင့် တိုက်ပွဲများ မကြာခဏ ဖြစ်ပွားနေသည်။

CNI News

၂၀၂၄ ခုနှစ်၊ မေလ ၂

ချင်းပြည်နယ်၊ တီးတိန်မြို့နယ်မှာ ဇိုမီးတော်လှန်ရေးတပ်မတော်(ZRA) နှင့် ချင်းအမျိုးသားတပ်ဦး (CNF/CNA) တို့ အကြား တိုက်ပွဲဖြစ်ပွားနေကြောင်း သိရသည်။

အဆိုပါ တိုက်ပွဲမှာ မြန်မာ-အိန္ဒိယ မီဇိုရမ်ပြည်နယ်(အိန္ဒိယ) ကုန်သွယ်ရေး လမ်းကြောင်းတစ်လျှောက်နှင့် လိုင်သွီး ကျေးရွာအနီးတွင် ဖြစ်ပွားခဲ့ကြောင်း၊ ယနေ့အထိ ဖြစ်ပွားနေကြောင်း ZRA မှ အရှေ့ပိုင်းဒါရိုက်တာ ပူဇိုထန်က CNI သတင်းဌာနသို့ ပြောသည်။

၎င်းက “အခြေအနေကတော့ သူတို့ လာပြီးတော့ လာတိုက်တာပေါ့လေ၊ ကျနော်တို့ရဲ့ နယ်မြေကို ကျူးကျော်ပြီး တော့ လာတိုက်တာပါ၊ ကျနော်တို့က သူတို့ (CNF) ကို တိုက်ချင်လို့ မဟုတ်ဘူး။ ကိုယ့်နေရာမှာ ကိုယ့်ဒေသမှာ နေပြီးတော့ ကိုယ့်နယ်မြေလုံခြုံရေး ယူတဲ့အချိန်မှာ သူတို့က လာတိုက်တာ။ ကျနော်တို့ အပိုင်းမှာတော့ ထိခိုက်မှု တချို့တော့ ဒဏ်ရာရတဲ့သူတချို့တော့ ရှိတယ်၊ အခု စကားပြောတဲ့ အချိန်မှာလည်း တိုက်ပွဲဖြစ်နေတယ်၊ အခု ဗုံးတွေ ဘာတွေ အသံကြားရတာပေါ့၊ ဒီလိုဖြစ်တဲ့ အချိန်မှာတော့ ဒဏ်ရာရတဲ့သူတော့ သူတို့ဖက်မှာတော့ ကျနော် တို့ Confirm လုပ်တာ ၂ ယောက်တော့ သေတယ်လို့ ကြားတယ်၊ ကျနော်တို့ အပိုင်းမှာတော့ နှစ်ယောက်တော့ ဒဏ်ရာရတယ်၊ အပြင်းအထန် မဟုတ်ဘူးပေါ့နော်၊ ရှေ့ဦးသူနာပြုနဲ့ လုပ်ပြီးတော့ ဖြေရှင်းရတာပေါ့၊ သူတို့အပိုင်း မှာတော့ သူတို့က အိန္ဒယပြည်မှာ သယ်သွားတဲ့ဟာကြတော့ သတင်းအတိအကျ မသိဘူးပေါ့နော်၊ ကျနော်တို့ အပိုင်းမှာတော့ နှစ်ယောက် ဒဏ်ရာရသွားတယ်” ဟု ပြောသည်။

ဒီမိုကရေစီတော်လှန်ရေး လုပ်ဆောင်မှုမှာ ကောင်းမွန်ကြောင်း၊ သို့သော်လည်း နယ်မြေကျူးကျော်ပြီး တိုက်ခိုက်မှု ကတော့ ကောင်းသည့်လက္ခဏာ မဟုတ်ကြောင်း ZRA မှ အရှေ့ပိုင်းဒါရိုက်တာ ပူဇိုထန်က ပြောသည်။

လက်ရှိ တိုက်ပွဲဖြစ်နေသော ကာလကို အခွင့်ကောင်းယူကာ CNF ဦးဆောင်သည့် Chinland Council တပ်ဖွဲ့ဝင် များသည် ဒေသခံတော်လှန်ရေးအဖွဲ့များ၏ ခွင့်ပြုချက်မပါဘဲ ချင်းညီနောင်၏ ထိန်းချုပ်နယ်မြေများကို သိမ်းပိုက် ရန် စစ်ရေးလှုပ်ရှားမှုများ လုပ်ဆောင်နေကြောင်း၊ နယ်မြေကျူးလွန်မှုများ ဆက်လုပ်ဆောင်နေပါက ချင်းပြည်သူ များအကြား စည်းလုံးမှု ပြိုကွဲစေပြီး သွေးထွက်သံယိုမှုများကို ဦးတည်နိုင်စေကြောင်း ချင်းညီနောင်(၆ ဖွဲ့)က မေလ ၁ ရက်တွင် သတင်းထုတ်ပြန်ခဲ့သည်။

CNF တပ်ဖွဲ့ကို တွေ့ရစဉ်

ချင်းပြည်နယ်မှာ တော်လှန်ရေးအင်အားစု အချင်းချင်းကြား နယ်မြေအငြင်းပွားမှု ဖြစ်ပွားနေသည့်ကိစ္စမှာ နွေဦး တော်လှန်ရေးအတွင်း ချင်းပြည်နယ်၏ ပါဝင်မှုကို အားနည်းသွားစေကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “ပြောရလို့ရှိရင်တော့ ချင်းပြည်နယ်မှာ လှုပ်ရှားနယ်မြေ အတော်များများ ချင်းအင်အားစုတွေက စိုးမိုးထား တာတော့ မှန်ပါတယ်။ သို့သော် ချင်းပြည်နယ်မှာ ရှိနေတဲ့ စစ်ကောင်စီရဲ့ တပ်ဖွဲ့တွေ အပြီးသတ် မောင်းမထုတ် နိုင်ဘဲ၊ အဲဒီကြားမှာ ချင်းအမျိုးသား အချင်းချင်းကြားမှာ အဖွဲ့ ၁၄ ဖွဲ့လောက် ကွဲနေပြီးတော့ သဘောထား မတိုက်ဆိုင်တာနဲ့ အငြင်းပွားမှုတွေ များနေတဲ့အတွက် ချင်းပြည်နယ်ရဲ့ စစ်ကောင်စီအပေါ်မှာ စစ်ရေးထိုးနက်မှု အရှိန်အဟုန်ဟာ သိသိသာသာ လျော့ကျလာတာ တွေ့ရပါတယ်။ နောက်တစ်ခုက ချင်းပြည်နယ်နဲ့ ဆက်စပ်နေတဲ့ ရခိုင်ပြည်နယ်က ပလက်ဝကို သိမ်းထားတဲ့ ကိစ္စအတွက် ချင်းအဖွဲ့အစည်းတချို့က သဘောမကျကြပါဘူး။ အဲဒီလို ပြဿနာတွေ ပေါ်လာတာဟာ နွေဦးတော်လှန်ရေးမှာ ချင်းပြည်နယ်ရဲ့ ပါဝင်မှု တော်တော်လေး အားနည်းသွားစေ တဲ့ အကြောင်းအချက်တွေ ဖြစ်တယ်”ဟု ပြောသည်။

တီးတိန်မြို့နယ်မှာ ZRA နှင့် CNF တို့ တိုက်ပွဲဖြစ်ပွားမှု အခြေအနေကို သိရှိနိုင်ရန် CNF ၏ ပြောရေးဆိုခွင့်ရှိသူ ဆလိုင်းထက်နီထံ CNI က ဖုန်းဆက်သွယ်ခဲ့သော်လည်း ဆက်သွယ်၍ မရသေးပေ။

ZRA မှ အရှေ့ပိုင်းဒါရိုက်တာ ပူဇိုထန်က “တကယ့် ချင်းပြည်နယ်မှာနေတဲ့ ညီကိုရင်းတွေကြီးပဲ ကိုယ့်နေရာမှာ နေပြီးတော့ တော်လှန်ရေး တိုက်ပွဲဝင်မယ်ဆိုရင်တော့ ကျနော်တို့ရဲ့ မျှော်မှန်းထားတဲ့ စစ်အာဏာရှင် ချုပ်ငြိမ်း သွားရမှာပေါ့ဗျာ၊ ဒီလို မဟုတ်ဘဲနဲ့ စစ်တပ်ကို တိုက်မယ့်အစား ကိုယ့်အချင်းချင်း တိုက်မယ်ဆိုရင်တော့ ကျနော် တို့ မျှော်မှန်းထားတဲ့ ငြိမ်းချမ်းရေးတော့ ဖြစ်လာမှာ မဟုတ်ဘူး။ ဒီတိုက်ပွဲက‌တော့ ကျနော်တို့က နောက်ထပ် မဖြစ်ရအောင်တော့ ဘယ်အဖွဲ့အစည်းမဆို ကြိုးပမ်းသင့်တယ်လေ၊ ဒါပေမယ့် တစ်ဖက်သတ် CNA အနေနဲ့ သူတို့ နယ်မြေကျော်ပြီးတော့ လာလုပ်တာတော့ သိပ်မကောင်းဘူးလေ၊ နောက်ကျရင် ရေရှည်မှာ ကျနော်တို့ အခုက တော့ ပေါ်လစီပုံစံနဲ့ သွားနေသေးတယ်၊ လာမယ့်လောက်ဆိုရင် လူမျိုးစု၊ လူမျိုးစွဲစု စိတ်ဓါတ်နဲ့ ပါလာရင်တော့ မဟုတ်တဲ့ အနေအထားရောက်နိုင်တယ်၊ အခုလောလောဆယ်တော့ မီဒီယာပေါ်မှာတော့ စစ်အစိုးရနဲ့ ပူးပေါင်း တယ်ဆိုပြီးမှ သူ့ရဲ့ အကျိုးစီးပွားအတွက်ပေါ့ သူ့နိုင်ငံရေး အကျိုးအမြတ်ရအောင် လုပ်တာတော့ အတိုင်းအတာ တစ်ခုအထိ အောင်မြင်ချင်မှ အောင်မြင်မယ်လေ၊ နောက်ကျရင် သူလုပ်သမျှ သူပြန်ခံရမှာပဲ ဆိုတာတော့ သူတို့ကို နုတ်ဆက်စကား ပြောချင်တယ်” ဟု ပြောသည်။

ZRA တပ်ဖွဲ့ကို တွေ့ရစဉ်

ချင်းပြည်နယ်တွင် ZRA နှင့် CNF/CNA တို့အကြား မကြာခဏ တိုက်ပွဲများ ဖြစ်ပွားလေ့ရှိသည်။

ZRA သည် မြန်မာနိုင်ငံအတွင်းရှိ ချင်းပြည်နယ် တွန်းဇံမြို့နယ်၊ တီးတိန်မြို့နယ်၊ စစ်ကိုင်းတိုင်း ဒေသကြီး၊ ကလေးမြို့နယ်၊ တမူးမြို့နယ်၊ ကဘော်ချိုင့်ဝှမ်းဒေသ၊ မြန်မာ-အိန္ဒိယနယ်စပ် စသည့် နေရာ ဒေသများတွင် လှုပ် ရှား လျက်ရှိသည်။

CNF သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) လက်မှတ်ရေးထိုးထားသော ချင်းလက်နက်ကိုင်တပ်ဖွဲ့ဖြစ်ပြီး ထန်တလန်မြို့နယ်တွင် ဌာနချုပ်ထားရှိကာ ဟားခါး၊ တီးတိန်၊ မတူပီတို့တွင် လှုပ်ရှားလျက်ရှိသည်။

CNI News

၂၀၂၄ ခုနှစ်၊ ဧပြီ ၃၀

ပြည်တွင်းလက်နက်ကိုင်ပဋိပက္ခ ဖြေရှင်းနိုင်ရေး အိမ်နီးချင်းနိုင်ငံများအပေါ် မူတည်နေသလားဆိုပြီး နိုင်ငံရေးအသိုင်းအဝိုင်းကြား သုံးသပ်မှုများ ရှိနေသည်။

မြန်မာအိမ်နီးချင်းနိုင်ငံများ အနေဖြင့် အင်အားကြီး တရုတ်၊ အိန္ဒိယ၊ ထိုင်း စသည့် နိုင်ငံများ တည်ရှိပြီး ထိုနိုင်ငံများ၏ နယ်စပ်တစ်လျှောက်၍ မြန်မာ့တပ်မတော်ကို တိုက်ခိုက်လျက်ရှိသော လက်နက်ကိုင်များ လှုပ်ရှားလျက်ရှိသည်။

မြန်မာ့နိုင်ငံရေးပြဿနာကို ပြည်တွင်းအားဖြင့် ဖြေရှင်းရမှာ ဖြစ်ကြောင်း၊ နိုင်ငံတကာ အဖွဲ့အစည်းက လာရောက် ဖြေရှင်းပါက ၎င်းတို့၏ ဩဇာလွမ်းမိုးမှုကို ခံရမှာဖြစ်ကြောင်း ကရင်အမျိုးသား ဒီမိုကရက် တစ်ပါတီဥက္ကဋ္ဌ မန်းအောင်ပြည်စိုးက CNI သတင်းဌာနသို့ ပြောသည်။

PDF တပ်ဖွဲ့ကိုတွေ့ရစဉ်

၎င်းက “ခင်ဗျားတို့ ကျနော်တို့ ထည့်သွင်းစဉ်းစားဖို့က ကိုယ့်အင်အားဟာ ကိုယ့်ပြည်တွင်းမှာပဲ ရှိတယ်၊ ကိုယ့်ပြည်တွင်း အခြေအနေကို ကိုယ်ပဲ ဖြေရှင်းတာက အကောင်းဆုံးပဲပေါ့၊ နိုင်ငံခြားက လာရောက် ဖြေရှင်းမယ် ဆိုလို့ရှိရင် နိုင်ငံခြားရဲ့ အရိပ်အငွေ့တွေ သက်ရောက်မှုတွေ နိုင်ငံခြားရဲ့ ဩဇာတွေကို ကိုယ် တို့က ခံရမယ်၊ ကျနော်မြင်တာကတော့ ဒါက‌တော့ မဖြစ်သင့်ဘူး။ မဖြစ်သင့်ဘူးထင်တယ်၊ ကိုယ့်ဟာ ကိုယ်ပဲရှင်း၊ သူတို့ဟာ သူတို့ လာရောက် ရှင်းပေးမယ်ဆိုလို့ ရှိရင်လည်း ကျနော် ထင်တာကတော့ မပြီးနိုင်ဘူး။ မပြီးနိုင်ဘူး။ ကိုယ့်ဟာနဲ့ကိုယ် ဖြေရှင်းကြ၊ အဲဒါတော့ အကောင်းဆုံးပဲ ဖြေရှင်းနိုင်ရင် အကောင်းဆုံးပဲ၊ မဖြေရှင်းနိုင်သေးတာ တစ်ခုကတော့ ဒါလည်း မကောင်းဘူးပေါ့ဗျာ” ဟု ပြောသည်။

မြန်မာနိုင်ငံမှာ ၁၉၄၈ ခုနှစ်၊ လွတ်လပ်ရေးရပြီးနောက် တိုင်းရင်းသားများ၏ တန်းတူရေး၊ ကိုယ်ပိုင်ပြဋ္ဌာန်းခွင့် ရရှိရေး တောင်းဆိုမှုကနေ လက်နက်ကိုင်ပဋိပက္ခ ဖြစ်ပွားခဲ့သည်မှာ နှစ်ပေါင်း ၇၅ နှစ်ကျော်ကြာမြင့်လာသည့် တိုင် မပြီးဆုံးသေးပေ။

ထို့အတူ ၂၀၂၁ ခုနှစ်၊ ဖေဖော်ဝါရီ ၁ ရက်နေ့က နိုင်ငံရေးသဘောထား ကွဲလွဲမှုများကြောင့် ဖြစ်ပေါ်လာသော ပဋိပက္ခမှာ နယ်စပ်ဒေသများတွင်သာမက ပြည်မဒေသများအထိ တိုက်ပွဲများ ဖြစ်ပေါ်ခဲ့သည်။

ပြည်ထောင်စုဆိုသည့် သဘောတရား၊ ဖက်ဒရယ်၊ ဒီမိုကရေစီ စသည်တို့၏ သဘောတရားများကို အမြင်ရှိရန် လိုအပ်ကြောင်း၊ မြန်မာ့နိုင်ငံရေးပြဿနာကို ဖြေရှင်းနိုင်ရန် ပြည်ပက ဝင်ရောက်ညှိနှိုင်းပေးလျှင်လည်း ပြေလည် မှာမဟုတ်ကြောင်း နိုင်ငံရေးလေလာသုံးသပ်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။

မြန်မာ့တပ်မတော်ကို တွေ့ရစဉ်

၎င်းက “ကိုယ့်မှာလည်း ဘာမှ မရှိဘူး။ အကျိုးစီးပွားပဲရှိတယ်၊ တိုက်ဖို့ပဲ ရှိတယ်ဆိုတဲ့ အခါမှာကြတော့ ဆရာထင်တယ်၊ ပြည်ပဝင်ညှိလည်း ပြေလည်မှာ မဟုတ်ဘူး။ အဲဒီတော့ ပြည်ပဆိုတာက ပြဿနာက ဘာလဲဆိုတော့ ဗမာပြည်ရဲ့ အနေအထားသည် ပြည်ပက လူတွေ ဗမာပြည်က လူတွေလောက်တော့ နားမလည်ဘူး။ ဗမာပြည်ရဲ့ အတွေ့အကြုံရှိတဲ့ လူတွေက concept (အယူအဆ) မရှိဘူး။ ပြဿနာက ဒါပဲ၊ ဗမာပြည်ရဲ့ ပြဿနာလိုရင်းက concept ဆိုတာ အိန္ဒိယ သူတို့ ဘာလို့ ရပ်တည်နိုင်တာလဲ၊ ဗမာပြည်ရဲ့ စဉ်းစားလို့ ရတဲ့ နိုင်ငံရေးမော်ဒယ် သုံးနိုင်ငံပဲ ရှိတယ်။ အိန္ဒိယမော်ဒယ်ကို ကြည့်ရမယ်၊ နောက်တစ်ခု အင်ဒိုနီးရှားမော်ဒယ်ကို ကြည့်ရမယ်၊ နောက်တစ်ခုက ထိုင်းမှာ ယနေ့အချိန်ထိ ဘာဖြစ်လို့ ဘုရင်စနစ် ရှိနေသလဲဆိုတဲ့ဟာကို နိုင်ငံရေး သိပ္ပံအမြင်အရ ကြည့်ရမယ်၊ အဲဒီသုံးခုသိရင် ဗမာပြည် ဘာလုပ်ရမလဲဆိုတာ ပေါ်သွားပြီ” ဟု ပြောသည်။

လက်ရှိ နစကနှင့် NUG၊ EAO(လက်နက်ကိုင်)တို့သည် နောင်တွင် ဒီမိုကရေစီဖက်ဒရယ်ပြည်ထောင်စု တည်ဆောက်မည်ဟု အသီးသီး ပြောဆိုနေကြသော်လည်း လက်ရှိမှာတော့ တစ်ဖက်နှင့်တစ်ဖက် တိုက်ခိုက် လျက်ရှိနေသည်။

နိုင်ငံအနှံ့ ဖြစ်ပေါ်နေသော တိုက်ပွဲများကြောင့် ပြည်သူလူထုများမှာ လမ်းပန်းဆက်သွယ်မှု အခက်အခဲများ ကြုံ တွေ့နေရသလို ကုန်ဈေးနှုန်းမြင့်မားမှု၊ ငွေကြေးဖောင်းပွမှု၊ နယ်မြေမလုံခြုံမှုများဖြင့် ရင်ဆိုင်နေကြရသည်။

CNI News
၂၀၂၄ ခုနှစ်၊ ဧပြီ ၂၉

နစကဒုဥက္ကဋ္ဌ ဒုတိယတပ်မတော်ကာကွယ်ရေးဦးစီးချုပ် ဒုတိယဗိုလ်ချုပ်မှူးကြီး စိုးဝင်းသည် ၂၀၂၄ ခုနှစ်၊ ဧပြီ ၂၉ ရက်နေ့တွင် လူမြင်ကွင်းကို ပြန်လည်ထွက်ပေါ်လာခဲ့သည်။

ဒုတိယဗိုလ်ချုပ်မှူးကြီးစိုးဝင်းသည် လူမြင်ကွင်းကနေ ပျောက်ကွယ်နေသည်မှာ တစ်လနီးပါးကြာခဲ့ပြီးဖြစ်ရာ ယနေ့ (ဧပြီ ၂၉ ရက်)တွင် မွန်ပြည်နယ်၊ မော်လမြိုင်ရှိ တပ်မတော်ဆေးရုံမှာ တက်ရောက်ဆေးကုသမှုခံယူ နေသည့် အရာရှိ/စစ်သည်များကို သွားရောက် တွေ့ဆုံခဲ့သည်။

အဆိုပါ တွေ့ဆုံမှုကို နစက-က ဧပြီ ၂၉ ရက်နေ့ ည ၈ နာရီတွင် သတင်းထုတ်လွှင့်သွားခဲ့သည်။

ဒုတိယဗိုလ်ချုပ်မှူးကြီးစိုးဝင်းနှင့်အတူ အမှတ်(၂)စစ်ဆင်ရေးအထူးအဖွဲ့မှူး ဒုတိယဗိုလ်ချုပ်ကြီး ညွန့်ဝင်းဆွေ၊ ဒုတိယစစ်ဘက်ရေးရာလုံခြုံရေးအရာရှိချုပ်၊ အရှေ့တောင်တိုင်းစစ်ဌာနချုပ်တိုင်းမှူး အပါအဝင် အရာရှိကြီးများ ကို အတူတူ တွေ့ရသည်။

ကရင်ပြည်နယ်၊ မြဝတီမြို့သိမ်း တိုက်ပွဲကို KNLA-PDF ပူးပေါင်းတပ်ဖွဲ့က ဖော်ဆောင်ခဲ့ရာကို ပြန်လည် ထိန်းချုပ်နိုင်ရေးအတွက် ဒုတိယဗိုလ်ချုပ်မှူးကြီး စိုးဝင်း ကိုယ်တိုင် ဦးဆောင်၍ စစ်ဆင်ရေးကွပ်ကဲခဲ့သည်။

အဆိုပါ စစ်ဆင်ရေးကို ကွပ်ကဲရန် မော်လမြိုင်မှာ အစည်းအဝေး လုပ်နေစဉ် တော်လှန်ရေးတပ်ဖွဲ့များက ဒရုန်းနှင့် တိုက်ခိုက်ခဲ့ကြောင်း၊ ထိုတိုက်ခိုက်မှုကြောင့် ဒုတိယဗိုလ်ချုပ်ကြီးစိုးဝင်း ဒဏ်ရာရရှိခဲ့ကြောင်း တော်လှန်ရေးအဖွဲ့များက သတင်းထုတ်ပြန်ခဲ့သည်။

နစက၏ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းကတော့ ဒုတိယဗိုလ်ချုပ်မှူးကြီး စိုးဝင်း သည် ကျန်းမာစွာရှိပြီး တာဝန်များကို ပုံမှန်အတိုင်း ထမ်းဆောင်လျက်ရှိသည်ဟုဆိုကာ ဒဏ်ရာရ၍ လူမြင်ကွင်း က ပျောက်နေသည်ဆိုသော ထောက်ပြနေမှုများကို တုန့်ပြန် ဖြေရှင်းခဲ့သည်။

CNI News

၂၀၂၄ ခုနှစ်၊ ဧပြီ ၂၉

ပအိုဝ်းကိုယ်ပိုင်အုပ်ချုပ်ခွင့်ရဒေသမှာ မြန်မာ့တပ်မတော်နှင့် တော်လှန်ရေး အင်အားစုများကြား တိုက်ပွဲဖြစ်ပွားမှု ရပ်တန့်လာပြီး တည်ငြိမ်လာသော်လည်း တိုက်ပွဲရှောင်များ နေရပ်မပြန်နိုင်သေးကြောင်း သိရသည်။

တိုက်ပွဲကြောင့် ပျက်စီးသွားသော ဆီဆိုင်မြို့ကို ရှင်းလင်းရေးများ လုပ်ဆောင်နေကြောင်း၊ နယ်စပ်ဒေသများမှာ သာ တိုက်ပွဲအချို့ရှိနေကြောင်း ပအိုဝ်းအမျိုးသားအဖွဲ့ချုပ်(PNO)မှ ဗဟိုအလုပ်အမှုဆောင် စောခွန်ကျော်ဝင်းက CNI သတင်းဌာနသို့ ပြောသည်။

၎င်းက “လောလောဆယ်တော့ နယ်မြေအနေအထား အများစုတော့ တည်တည်ငြိမ်ငြိမ်တော့ ပြန်ဖြစ်ပြီပေါ့၊ ဆီဆိုင်တို့ ဘာတို့ မဲနယ်တောင်တို့ အခု တည်တည်ငြိမ်ငြိမ်တော့ ဟိုအစပ်လေးတွေမှာတော့ တိုက်ပွဲလေးတွေ တော့ ရှိသေးတာပေါ့နော်၊ ကျနော် အတိအကျတော့ မသိဘူး။ လောလောဆယ်တော့ ကျနော်သိရလောက် တချို့ တော့ ပြန်တယ်၊ တချို့တော့ တရားဝင်ပြန်နေဖို့တော့ မပေးပြန်သေးဘူးဆိုတာ အခု ရှင်းလင်းရေး လုပ်နေတယ် နောက်တစ်ခုက တချို့က မိုင်းတွေ ရှင်းဖို့ကိစ္စမှာ အဲဒီလိုမျိုးပေါ့နော်၊ ရှင်းလင်းရေး လုပ်တာ အကုန်လုံး စိတ်မချ ရသေးဘူးပေါ့နော်” ဟု ပြောသည်။

လက်ရှိ ဆီဆိုင်မြို့ကို PNO နှင့် မြန်မာ့တပ်မတော်တို့က ထိန်းချုပ်ထားကြောင်း၊ PNO အနေဖြင့် အထူးဒေသ ၆ ထိန်းချုပ်နယ်မြေအတွင်းသာ စစ်ရေးလှုပ်ရှားမှု ရှိကြောင်း၊ မိမိတို့ ဒေသအတွင်း အခြားလက်နက်ကိုင်တပ်ဖွဲ့ ရှိနေပါက တိုက်ပွဲရှိလာနိုင်ကြောင်း ၎င်းက ပြောသည်။

ဆီဆိုင်မြို့ ပျက်စီးသွားသည်ကို တွေ့ရစဉ်

၂၀၂၄ ခုနှစ်၊ ဇန်နဝါရီလအတွင်းက ဟိုပုံးမြို့နယ်၊ စံဖူးကျေးရွာတွင် ပအိုဝ်းအမျိုးသား လွတ်မြောက်ရေး တပ်မတော် (PNLA/PNLO) နှင့် PNO တို့အကြား တိုက်ပွဲ စတင်ဖြစ်ပွားခဲ့သည်။

ထို့နောက် မြန်မာ့တပ်မတော်၊ PNO နှင့် PNLO မဟာမိတ် ပူးပေါင်းတပ်တို့အကြား ဆီဆိုင်၊ ပင်လောင်း၊ ဟိုပုံးတို့ တွင် ဖြစ်ပွားခဲ့သော တိုက်ပွဲများကြောင့် ဒေသခံများ ဘေးလွှတ်ရာသို့ ထွက်ပြေးတိမ်းရှောင်ခဲ့ရပြီး ဆီဆိုင်မြို့မှာ လည်း မီးလောင်ပျက်စီးခဲ့သည်။

လက်ရှိတွင် ပြည်သူလူထုများ အနေဖြင့် သွားလာရခက်ခဲနေပြီး အကျပ်အတည်းများဖြင့် ရင်ဆိုင်နေရကြောင်း၊ ငြိမ်းငြိမ်းချမ်းချမ်း ဖြစ်စေချင်ကြောင်း ပအိုဝ်းဒေသခံ တစ်ဦးက CNI သတင်းဌာနသို့ ပြောသည်။

၎င်းက “အဓိကတော့ ပြည်သူတွေ ကောင်းကောင်းမွန်မွန် သွားလာလှုပ်ရှားလို့ ရအောင်တော့ ဘာလို့လဲဆိုတော့ အခုက ခက်ခဲနေတော့လေ၊ ကျနော်တို့တောင်မှ ရွာမှာရှိတဲ့ အချိန်တောင်မှ လမ်းပန်းဆက်သွယ်ရေးအနေနဲ့ သွားလာရခက်တယ်၊ ပြီးတော့ ကုန်ကူးသန်းဖို့ကလည်း အရမ်းခက်ခဲတော့ ကျနော်တို့ ပြည်သူ အနေနဲ့ကတော့ ငြိမ်းချမ်းတာပဲ ဖြစ်စေချင်ပါတယ်။ ဒီအတိုင်းပဲ ဘာလို့လဲဆိုတော့ သွားလာရ အရမ်းခက်တယ်၊ ပြည်သူတွေက လည်း တစ်ခုခုဝယ်ဖို့တောင်မှ အခုဆို မိုးတွင်းရောက်တော့မှာဆိုတော့ စိုက်ချိန်ပျိုးချိန်လည်း ရောက်တော့မှာ ဆိုတော့ ဝယ်ခြမ်းရမှာနဲ့ ပစ္စည်းတွေ စိုက်ဖို့ပျိုးဖို့ ဝယ်ရတာလည်း အရမ်းခက်တော့လေ အားကြောင့်မို့ ငြိမ်းငြိမ်း ချမ်းချမ်းလေးတော့ ဖြစ်စေချင်ပါတယ်” ဟု ပြောသည်။

PNLO ရဲဘော်ကိုတွေ့ရစဉ်

ဒေသခံလူထုများ နေရပ်ပြန်ရန် စိတ်ချရသော အနေအထားတွင် မရှိသေးကြောင်း၊ သို့သော်လည်း ဒေသခံ အချို့မှာ နေရပ်ပြန်မှု ရှိနေကြောင်း စောခွန်ကျော်ဝင်းက ပြောသည်။

၎င်းက “ဆီဆိုင်မြို့ကတော့ တစ်မျိုးလုံး နီးနီးပါးပါး ပျက်စီးသွားတာပေါ့၊ ကျေးလက်ဒေသနဲ့ ရွာဘက်များများနဲ့ ရာခိုင်နှုန်းနဲ့ အခုကျနော်တော့ မမှန်းနိုင်သေးဘူး၊ အပျက်အစီးတော့များတယ်၊ ပအိုဝ်းဒေသမှာဆို အဓိကဖြစ် နေတာ ဆီဆိုင်မြို့နယ်ပေါ့နော်၊ ဥပမာ ပင်လောင်းတောင်ဖက်ခြမ်း ပင်လောင်းတောင် နည်းနည်း ပျက်စီးနိုင်တယ်၊ အနည်းအကျဉ်းရှိနိုင်တယ်၊ အထူးသဖြင့် ဆီဆိုင်မြို့ပေါ့၊ ဟိုပုံးမှာဆိုရင်လည်း မဲနယ်တောင်မှာဆိုရင်လည်း ဘုန်းကြီးကျောင်း၊ ရွာ ၄၊ ၅ ရွာ ပျက်သွားတာတော့ ရှိတယ်၊ ဘုန်းကြီးကျောင်းတွေ မီးရှို့ခံရတာတို့ပေါ့နော်၊ ရာခိုင်နှုန်းကတော့ မမှန်းနိုင်သေးဘူးပေါ့နော်” ဟု CNI သတင်းဌာနသို့ ပြောသည်။

၂၀၀၈ ဖွဲ့စည်းပုံအခြေခံဥပဒေအရ ရှမ်းပြည်နယ်အတွင်းရှိ ပင်လောင်း မြို့နယ်၊ ဆီဆိုင်မြို့နယ်၊ ဟိုပုန်းမြို့နယ် တို့ကို ပအိုဝ်းကိုယ်ပိုင်အုပ်ချုပ်ခွင့်ရဒေသအဖြစ် သတ်မှတ်ခဲ့သည်။

CNI News

၂၀၂၄ ခုနှစ်၊ ဧပြီ ၂၉

မြန်မာ့တပ်မတော်အား လက်နက်မထောက်ပံ့ဖို့ တရုတ်အစိုးရကို အမျိုးသားညီညွတ်ရေးအစိုးရ(NUG)၏ နိုင်ငံခြားရေးဝန်ကြီး ဒေါ်ဇင်မာအောင်က South China Morning Post သတင်းဌာနနှင့် တွေ့ဆုံ အင်တာဗျူး တွင် တိုက်တွန်း ပြောကြားသွားခဲ့သည်။

ဒေါ်ဇင်မာအောင်က “တရုတ်ရဲ့ လက်နက်ပစ္စည်းတွေနဲ့ မြန်မာစစ်တပ်ဟာ ကိုယ့်လူမျိုး၊ ကိုယ့်ပြည်သူတွေကို သတ်ဖြတ်နေတယ်။ ဒါကြောင့် တရုတ်အနေနဲ့ လက်နက်ထောက်ပံ့တာ ရပ်တန့်ပေးဖို့လိုတယ်”ဟု ပြောသည်။

ထို့နောက် NUG သည် မြန်မာ့တပ်မတော်ကို လက်နက်မထောက်ပံ့ဖို့ တရုတ်အစိုးရထံ စာတစ်စောင် ပေးပို့ခဲ့ရာ တရုတ်အစိုးရဘက်က စာလက်ခံရရှိကြောင်းကလွဲပြီး တစ်စုံတစ်ရာ တုန့်ပြန်ပြောကြားခြင်း မရှိဘူးဟု ၎င်းက ပြောသည်။

 ဗိုလ်ချုပ်မှူးကြီးမင်းအောင်လှိုင်နဲ့ တရုတ်သံအမတ်ကြီးကို တွေ့ရစဉ်

တရုတ်သံအမတ်ကြီးသည် ယခုလ (ဧပြီလ)ထဲမှာ ယခင်က မြန်မာ့တပ်မတော် ခေါင်းဆောင်များဖြစ်ခဲ့ကြသည့် ဗိုလ်ချုပ်မှူးကြီးသန်းရွှေ(ငြိမ်း)၊ ဒုတိယဗိုလ်ချုပ်မှူးကြီးမောင်အေး(ငြိမ်း)၊သမ္မတ ဦးသိန်းစိန်(ငြိမ်း) တို့အပါအဝင် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်၊ နိုင်ငံခြားရေးဝန်ကြီး ဦးသန်းဆွေ၊ အမျိုးသားလုံခြုံရေးအကြံပေး ပုဂ္ဂိုလ် ဗိုလ်ချုပ်ကြီးမိုးအောင်၊ ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးကိုကိုတို့၊ ပြည်ထဲရေးဝန်ကြီး ဒုတိယဗိုလ်ချုပ်ကြီးရာပြည့်၊ NSPNC ဥက္ကဋ္ဌ ဒုတိယဗိုလ်ချုပ်ကြီးထွန်းထွန်းနောင် တို့ကို တွေ့ဆုံမှုများ ပြုလုပ် ခဲ့သည်။

ထို့နောက် ပြည်ထဲရေးဝန်ကြီး ဒုတိယဗိုလ်ချုပ်ကြီးရာပြည့်သည် တရုတ်နိုင်ငံသို့ သွားရောက်၍ တရုတ်ပြည်သူ့ လုံခြုံရေးဝန်ကြီးနှင့် တွေ့ဆုံ၍ အမျိုးသားလုံခြုံရေးကိစ္စရပ်များကို ဆွေးနွေးခဲ့သည်။

လက်ရှိတွင် တရုတ်အစိုးရနှင့် နစကကြား ပူးပေါင်း၍ ကျားဖြန် အွန်လိုင်းငွေလိမ် လုပ်ငန်းများနှင့် အွန်လိုင်း လောင်းကစားလုပ်ငန်းများကို နှိမ်နင်းလျက်ရှိနေသည်။