- By CNI News
- Category: နိုင်ငံရေး
- Hits: 654
CNI News
၂၀၂၂ ခုနှစ်၊ ဇွန်လ ၃၀
ရှမ်းပြည်နယ်အရှေ့ပိုင်း မိုင်းလား အထူးဒေသ(၄)ဟု အများသိကြသည့် အမျိုးသားဒီမိုကရေစီမဟာမိတ်တပ်မတော် (NDAA)သည် ယနေ့ (ဇွန်လ ၃၀ ရက်) ငြိမ်းချမ်းရေးယူခဲ့သည်မှာ ၃၃ နှစ်ပြည့် အခမ်းအနားများကို ကျင်းပခဲ့သည်။
ယခင်က NDAA သည် ငြိမ်းချမ်းရေး နှစ်များကို အကျယ်တဝံ့ ကျင်းပခဲ့သော်လည်း ယခုနှစ်မှာတော့ ငြိမ်းချမ်းရေး ၃၃ နှစ်ပြည့် အခမ်းအနားကို အကျယ်တဝံ့ ကျင်းပခဲ့ခြင်းမဟုတ်ဘဲ သက်ဆိုင်ရာ တပ်ရင်း၊ တပ်ဖွဲ့များနှင့် စာသင်ကျောင်းများမှ ကျောင်းသားများက အသီးသီး ကျင်းပခဲ့ကြသည်။
၂၀၂၂ ခုနှစ်၊ ဇွန်လ ၃၀ ရက် NDAA ငြိမ်းချမ်းရေး ၃၃ နှစ်ပြည့် အထိမ်းအမှတ် အလေးပြုနေစဉ်
NDAA သည် ဗမာပြည်ကွန်မြူနစ် ပါတီကနေ ခွဲထွက်၍ တပ်မတော်နှင့် ၁၉၈၉ ခုနှစ်၊ ဇွန်လ ၃၀ ရက်တွင် ငြိမ်းချမ်းရေး ယူခဲ့ရာ တပ်မတော်က ရှမ်းပြည်နယ် (အရှေ့ပိုင်း)ရှိ မိုင်းလားဒေသကို ဗဟိုပြု၍ အထူးဒေသ(၄) အဖြစ် သတ်မှတ်ပေးခဲ့သည်။
- By CNI
- Category: နိုင်ငံရေး
- Hits: 590
CNI News
၂၀၂၂ ခုနှစ်၊ ဇွန်လ ၃၀
မြန်မာပြည်ကို ရောက်ရှိနေသည့် အာဆီယံ အထူးကိုယ်စားလှယ်အနေဖြင့် နစကကို မျက်နှာသာပေးခြင်းမျိုး မဖြစ်ရန် လိုအပ်ကြောင်း မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး(ABSDF) မှ ပြောရေးဆိုခွင့်ရှိသူ ရဲဘော် ဆန်နီက CNI သတင်းဌာနသို့ ပြောသည်။
မြန်မာ့နိုင်ငံရေး အကျပ်အတည်းကို ဖြေရှင်းရာမှာ အင်အားစု အားလုံးပါဝင်ရန် လိုအပ်ကြောင်း၊ နစကကို မျက်နှာသာ ပေးခြင်းမျိုး မဟုတ်ဘဲ ပြည်သူတစ်ရပ်လုံးအတွက် ပူးပေါင်းပါဝင်ပြီး ဆောင်ရွက်မည့် အခွင့်အလမ်းများရှိရန် လိုအပ်ကြောင်း ၎င်းက ပြောသည်။
ရဲဘော်ဆန်နီက “နံပါတ်တစ်ကတော့ ဒီအာဆီယံ အထူးကိုယ်စားလှယ် အနေနဲ့ ဘာလုပ်နိုင်မလဲပေါ့။ ဒီနေ့ မြန်မာ့နိုင်ငံရေး အကျပ်အတည်းကို ဖြေရှင်းနိုင်ဖို့က နံပါတ်တစ် အာဆီယံရဲ့ ကြိုးပမ်းချက်က အင်အားစုအားလုံး လက်ခံနိုင်တဲ့ ကြိုးပမ်းမှု ဖြစ် ဖို့လိုတယ်။ နံပါတ်နှစ် စစ်ကောင်စီကို မျက်နှာသာပေးတဲ့ဟာမျိုး မဟုတ်ဘဲနဲ့ ပြည်သူလူထု တစ်ရပ်လုံးအတွက်ကို ပူးပေါင်း ပါဝင်ပြီးတော့ ဆောင်ရွက်မယ့် အခွင့်အလမ်းတွေ ရှိဖို့လိုတယ်။ နောက်တစ်ချက်က ဒီနေ့ လတ်တလော လိုအပ်နေတဲ့ တိုင်း ပြည်ရဲ့ အဓိက အတိဒုက္ခ ရောက်စေခဲ့တဲ့ ဒီနေ့ ကိုဗစ် ပြဿနာရယ်၊ ကျနော်တို့ ဒီရွေးကောက်ပွဲ မဲမသာမှုဆိုပြီး အကြောင်း ပြပြီးတော့ စစ်တပ်က အာဏာသိမ်းခဲ့တဲ့ နောက်ဆက်တွဲ ဖြစ်ပေါ်လာတဲ့ နိုင်ငံတွင်း မတည်ငြိမ်မှုတွေ၊ စစ်ရေး ဆိုင်ရာ ပဋိပက္ခတွေ၊ စီးပွားရေး အတိ ဒုက္ခရောက်နေတာတွေ၊ လူသားချင်းစာနာမှု ထောက်ထားရေး အကူအညီ ရရှိနိုင်ရေး ကိစ္စတွေ ကို အဓိကထားပြီး နံပါတ်တစ် ဆောင်ရွက်ဖို့ လိုတယ်လို့ ကျနော်မြင်ပါတယ်” ဟု CNI သတင်းဌာနသို့ ပြောသည်။
မစ္စတာပရတ်ဆိုခွန် မြန်မာပြည်သို့ ဇွန်လ ၂၉ ရက်က ထွက်ခွာလာစဉ်
အာဆီယံ အထူးကိုယ်စားလှယ် မစ္စတာပရတ်ဆိုခွန်သည် ဇွန်လ ၂၉ ရက်မှ ဇူလိုင် ၃ ရက်အထိ လာရောက်သော မြန်မာပြည် ခရီးစဉ်အတွင်း လူသားချင်း စာနာမှုဆိုင်ရာ အကူအညီပေးရေး၊ အာဆီယံ ဘုံသဘောတူညီမှု (၅)ရပ် အကောင်အထည် ဖော် ရေး၊ အားလုံးပါဝင်သော နိုင်ငံရေးတွေ့ဆုံ ဆွေးနွေးမှု ဖြစ်ပေါ်လာရေး စသည်တို့ကို ဆွေးနွေးသွားမည်ဖြစ်ကြောင်း သိရသည်။
ပြည်တွင်းမှာ ဖြစ်ပွားနေသည့် လက်နက်ကိုင် ပဋိပက္ခနှင့် ပတ်သက်၍ အာဆီယံ အထူးကိုယ်စားလှယ် အနေဖြင့် စွမ်းဆောင် နိုင်ဦးမည် မဟုတ်ကြောင်း၊ အာဆီယံအနေဖြင့် လက်ရှိ မြန်မာပြည် အနေအထားကို တစ်စုံတစ်ခု အကူအညီ အထောက်အပံ့ ပေးနိုင်မည်ဟု မျှော်လင့်ကြောင်း ကရင်အမျိုးသား ဒီမိုကရတ်တစ်ပါတီဥက္ကဋ္ဌ မန်းအောင်ပြည်စိုးက CNI သတင်းဌာနသို့ ပြောသည်။
မန်းအောင်ပြည်စိုးက “သူကတော့ ကျနော်တို့ နှစ်ဖက်စလုံးပေါ့လေ။ ဒီဖက်က တပ်မတော်ရော ဒီဖက်က တိုင်းရင်းသား လက်နက်ကိုင် အဖွဲ့အစည်းရောရဲ့ အပေါ်မှာ သူဘယ်လောက် Image ရှိသလဲပေါ့။ ဘယ်လောက်ထိ လွှမ်းမိုးနိုင်မှု ရှိသလဲပေါ့။ ဒီပြည်တွင်း ကိစ္စထက်ကို ကျနော်မြင်တာက ကျနော်တို့ နိုင်ငံကို အာဆီယံ တချို့သောနိုင်ငံတွေက ပစ်ပယ်ထားချင်သလို ဆိုတဲ့ အပေါ်မှာ သူက ဘယ်လောက် စွမ်းဆောင် ပေးနိုင်မလဲ ဆိုတဲ့ဟာကို ကျနော်တို့က အဲဒါကို ပိုပြီးတော့ လေ့လာသုံးသပ် သင့်တာပေါ့လေ။ ကျနော်ထင်တာကတော့ ဒီငြိမ်းချမ်းရေး နှစ်ဖက် လက်နက်ကိုင် ကိစ္စကိုတော့ သူဒီလောက်အထိ စွမ်း ဆောင် နိုင်ဦးမှာ မဟုတ်ဘူး။ ဒါပေမဲ့ ဒီဖက် အာဆီယံမှာ ကျနော်တို့ အနေအထားကို သူတို့ တစ်စုံတစ်ခုသော အတိုင်းအတာ အထိ အကူအညီ အထောက်အပံ့ ပေးနိုင်လိမ့်မယ်လို့ ကျနော်ကတော့ နည်းနည်း မျှော်လင့်ချင်တာပေါ့လေ” ဟု ပြောသည်။
ယခုလာရောက်သည့် အာဆီယံ အထူးကိုယ်စားလှယ် မစ္စတာပရတ်ဆိုခွန်၏ ခရီးစဉ်သည် ဒုတိယအကြိမ်မြောက်ဖြစ် ကြောင်း၊ ထို့နောက် နစကဥက္ကဋ္ဌ၊ တိုင်းရင်းသား လက်နက်ကိုင် အဖွဲ့အစည်းတချို့၊ နိုင်ငံရေးပါတီတချို့ တို့ဖြင့် တွေ့ဆုံ သွားမည်ဖြစ်ကြောင်း သိရသည်။
- By CNI
- Category: နိုင်ငံရေး
- Hits: 624
CNI News
၂၀၂၂ ခုနှစ်၊ ဇွန်လ ၃၀
ထိုင်း-မြန်မာ နှစ်နိုင်ငံ နယ်စပ်ဒေသ တည်ငြိမ်အေးချမ်းရေးနှင့် တရားဥပဒေစိုးမိုးရေး ထိုင်းဘုရင့်တပ်မတော်မှ ဒုတိယ ဗိုလ်ချုပ်ကြီး အဖိချေ့ဆူဆက် (Lt.Gen.Apichet Suesat) နှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်တို့ ဇွန်လ ၂၉ ရက်က တွေ့ဆုံ ဆွေးနွေးခဲ့ကြောင်း သိရသည်။
ရှမ်းပြည်နယ်(တောင်ပိုင်း) တောင်ကြီးမြို့တွင် ထိုင်း-မြန်မာ ဒေသဆိုင်ရာ နယ်ခြားကော်မတီ အစည်းအဝေးကို တက်ရောက်အပြီး နေပြည်တော်သို့ လာရောက်၍ နစကဥက္ကဋ္ဌနှင့် တွေ့ဆုံခြင်း ဖြစ်သည်။
နစက-က “နှစ်နိုင်ငံ တပ်မတော် နှစ်ရပ်အကြား ရှိရင်းစွဲ ချစ်ကြည်ရင်းနှီးမှုများနှင့် ပူးပေါင်းဆောင်ရွက်မှုများကို ပိုမို တိုးမြှင့် ခိုင်မာအောင် ဆက်လက် ဆောင်ရွက်သွားမည့် အခြေအနေများ၊ နယ်စပ်ဒေသ တည်ငြိမ်အေးချမ်းရေး၊ တရားဥပဒေ စိုးမိုး ရေးနှင့် မူးယစ်ဆေးဝါး တားဆီးနှိမ်နင်းရေးဆိုင်ရာများနှင့် အခြား ကဏ္ဍပေါင်းစုံတွင် ပူးပေါင်း ဆောင်ရွက်မှုများကို တိုးမြှင့် ဆောင်ရွက်သွားမည့် အခြေအနေများ၊ မြန်မာနိုင်ငံ၏ နိုင်ငံရေး ဖြစ်ပေါ်ပြောင်းလဲမှု အခြေအနေများကို ဆွေးနွေးခဲ့သည်” ဟု ပြောသည်။
ထိုင်းတပ်မတော် ကိုယ်စားလှယ်များနှင့် မြန်မာ့တပ်မတော် ခေါင်းဆောင်များ
ထို့နောက် နှစ်နိုင်ငံ တပ်မတော်နှစ်ရပ်အကြား ပူးပေါင်း ဆောင်ရွက်ခြင်းဖြင့် နယ်စပ် ဒေသ တည်ငြိမ်အေးချမ်းရေး၊ ဖွံ့ဖြိုး တိုးတက်ရေး၊ နှစ်နိုင်ငံ တပ်မတော်နှစ်ရပ်အကြား ယဉ်ကျေးမှု ဖလှယ်ရေး၊ ချစ်ကြည်ရေး အားကစားပြိုင်ပွဲများ ကျင်းပရေး၊ အကြမ်းဖက်မှုတိုက်ဖျက်ရေး ဆိုင်ရာများကို အောင်မြင်စွာ ဆောင်ရွက်နိုင်မည့် အခြေအနေများ စသည့် အကြောင်းအရာ များကိုလည်း ဆွေးနွေးခဲ့ကြကြောင်း သိရသည်။
မြန်မာ့တပ်မတော်အနေဖြင့် တစ်နိုင်ငံလုံး ငြိမ်းချမ်းရေး ရရှိရန် ရည်ရွယ်၍ တိုင်းရင်းသား လက်နက်ကိုင် အဖွဲ့များကို ငြိမ်းချမ်းရေး ကမ်းလှမ်း ဖိတ်ခေါ်ပြီး တွေ့ဆုံ ဆွေးနွေးမှု အခြေအနေများ၊ နစကမှ ထုတ်ပြန်ထားသည့် ပြည်တွင်း/ပြည်ပရှိ အချို့သော ကျောင်းသား/သူ၊ လူငယ်လူရွယ်နှင့် CDM ဝန်ထမ်းများအား ဥပဒေဘောင်အတွင်း ပြန်လည် ဝင်ရောက်နိုင် ရေး အသိပေး ထုတ်ပြန်ထားမှုကို ထိုင်းတပ်မတော်မှလည်း ၎င်းတို့၏ နယ်စပ်ဒေသများမှ မြန်မာနိုင်ငံသို့ အလွယ်တကူ ပြန်လည် ဝင်ရောက်နိုင်ရေး လိုအပ်သည်များကို ကူညီဆောင်ရွက်ပေးသွားမည့် အခြေအနေးများကိုလည်း ဆွေးနွေးခဲ့ ကြောင်း နစကဘက်က ထုတ်ပြန်လာခဲ့သည်။
ထိုင်းနိုင်ငံနှင့် မြန်မာနိုင်ငံသည် အိမ်နီးချင်း နိုင်ငံများဖြစ်သည့်အလျောက် နယ်စပ်ကုန်သွယ်ရေးကို ချိတ်ဆက် ဆောင် ရွက် လျက်ရှိသလို မူးယစ်ဆေးဝါး ထိန်းချုပ်နိုင်ရေးကိုလည်း ပူးပေါင်း ဆောင်ရွက်လျက်ရှိသည်။
ထို့ပြင် ထိုင်း-မြန်မာ နယ်စပ်တွင် တိုင်းရင်းသား လက်နက်ကိုင်အဖွဲ့အစည်း တချို့အခြေစိုက် လှုပ်ရှားလျက်ရှိခြင်းကြောင့် တည်ငြိမ်ရေးကိုလည်း ပူးပေါင်းဆောင်ရွက်လျက်ရှိသည်။
လက်ရှိ မြန်မာနိုင်ငံတွင် နိုင်ငံရေး မတည်မငြိမ်ဖြစ်ကာ လက်နက်ကိုင် ပဋိပက္ခများ ကျယ်ကျယ်ပြန့်ပြန့် ဖြစ်ပွားနေခြင်း ကြောင့် ထိုင်း-မြန်မာ နယ်စပ် ကုန်သွယ်ရေးဂိတ်များ မဖွင့်လှစ်နိုင်ဘဲ ဖြစ်နေသလို မြန်မာရွှေ့ပြောင်း အလုပ်သမားများ ပြန်လည် ခေါ်ယူရေးကိုလည်း မလုပ်နိုင်သေးဘဲ ဖြစ်နေသည်။
- By CNI
- Category: နိုင်ငံရေး
- Hits: 652
CNI News
၂၀၂၂ ခုနှစ်၊ ဇွန်လ ၃၀
နစကအနေဖြင့် နေရပ်ပြန်လာလိုသည့် CDM လုပ်နေသူများကို ကြိုဆိုလက်ခံရန် နယ်စပ်ဒေသအသီးသီးတွင် ကြိုဆို လက်ခံရေး စခန်းများဖွင့်လှစ်ဆောင်ရွက်ပေးသွားမည်ဖြစ်ကြောင်း ထုတ်ပြန်ထားသည်။
သို့သော် CDM သမားများ နေရပ်သို့ ပြန်လည်ဝင်ရောက်ချိန်တွင် နစကအနေဖြင့် ၎င်းတို့၏ အချက်အလက်များကို အတိအကျ ထုတ်ပြန်လိုက်ပါက ထိုသူတို့သည် လူတစ်စု၏ ပစ်မှတ်ဖြစ်သွားနိုင်သည်ဟု သေနင်္ဂ မဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ပြောသည်။
“အစိုးရဘက်ကကျတော့လည်း ဖိတ်ခေါ်ပြီးတဲ့အချိန်မှာ ဘယ်သူတွေ ဘယ်လောက် ဖိတ်ခေါ်ပါတယ် ဆိုတာကတော့ သိပ်ပြီး တော့ detail ကြီး ထုတ်ပြန်တာတော့ အဆင်မပြေလောက်ဘူးထင်တယ်။ ဘာကြောင့်လဲဆိုတော့ ခုနကပြောတဲ့ social media က ဘဝပဲ ဒီလူတွေကို နာမည်ပြန်တပ်တယ်။ ပြီးရင် ဒီလူတွေကတော့ ငါတို့ကို သစ္စာဖောက်တယ် ဘာညာဆိုပြီး ပစ်မှတ်အဖြစ်နဲ့ လုပ်စရာဖြစ်သွားနိုင်တယ်။ ဒါကတော့ စိုးရိမ်စရာပေါ့။ အစိုးရအနေနဲ့ကလည်း ဖြစ်နိုင်၊ တတ်နိုင်တဲ့ အတိုင်း အတာ တစ်ခုထိ လုံခြုံရေးပိုင်းဆိုင်ရာ အသိပညာပေးတာပဲဖြစ်ဖြစ်၊ နောက်တစ်ခါကျတော့ ဘယ်လိုကာကွယ်မလဲဆိုတဲ့ နည်းလမ်းတွေပေါ့နော်။ ဒါတွေကတော့ စဉ်းစားပြီးအဖြေရှာသင့်တဲ့အရာလို့ မြင်ပါတယ်။ လောလောဆယ်မှာတော့ လုံခြုံရေး အရ ဘယ်လိုပဲလုပ်လုပ် တစ်နိုင်ငံလုံးကို လွှမ်းခြုံကာကွယ်ဖို့ဆိုတာကတော့ detail ကတော့ မဖြစ်နိုင်တဲ့အနေအထား။ ဒါကျနော်တို့လည်း သိတော့ မိမိကိုယ်ကိုယ် ကာကွယ်နိုင်ဖို့ကတော့ ပထမအရေးကြီးတာ first priority ပေါ့” ဟု ပြောသည်။
တပ်မတော် ဆန့်ကျင်ရေး လှုပ်ရှားမှု တစ်ခုကိုတွေ့ရစဉ် (AFP)
လက်ရှိ နိုင်ငံရေး အခြေအနေကြောင့် ပြည်တွင်း/ပြည်ပသို့ ရောက်ရှိသွားသည့် CDM သမားများထဲတွင် နိုင်ငံရေးပိုင်းဆိုင်ရာ ဗဟုသုတ အားနည်းသဖြင့် သူများ ဦးဆောင်သည့် နောက်သို့ နားမလည်ဘဲ လိုက်ပါသွားသူများ၊ ဇဝေဇဝါဖြင့် လုပ်ဆောင် မိသွားသူများအတွက် နစကဘက်မှ ယခုကဲ့သို့ အခွင့်အရေးပေးခြင်းသည် ကောင်းမွန်ကြောင်းနှင့် လက်ခံကြိုဆိုကြောင်း ၎င်းက ပြောသည်။
နေရပ်ပြန်လာမည့် CDM သမားများအား လက်ခံကြိုဆိုရေး စခန်းသို့ ၎င်းတို့ ရောက်ရှိပါက နစကအနေဖြင့် ထိုသူများအား အိမ်တိုင်ရာရောက် ပြန်ပို့ပေးခြင်းမျိုး လုပ်ဆောင်သင့်ကြောင်း၊ နေရပ်ပြန်လည် ဝင်ရောက်သည့် အခါတွင် ၎င်းတို့၏ နာမည် နှင့် ပုံတို့အား မဖော်ပြသင့်ကြောင်း နိုင်ငံရေးလေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။
ဦးရဲထွန်းက “အစိုးရကတော့ ပြန်လာတဲ့ လူရှိတယ်ဆိုရင်တော့ သတင်းကတော့ သူတို့က လုပ်လိမ့်မယ်လေ။ ဘာလို့ဆို ဒါက နိုင်ငံရေးအရ အမြတ်ကို။ အဲဒီတော့ သူတို့ ထုတ်ပြန်မှာပဲ ဆိုရင်တော့လည်း နာမည်တွေဘာတွေ မဖော်ပြဘဲနဲ့ပေါ့။ လူဦးရေ ဘယ်လောက်၊ ဘယ်နေ့ကနေ ဘယ်ရက်အတွင်း ဘယ်လောက် ပြန်လာတယ် ဆိုတာမျိုးလောက် ဆိုရင်တော့ ဒါဟာ လုံ လောက် မယ်ထင်တယ်။ ကာယကံရှင်တွေကလည်း အဲဒါမျိုး တောင်းဆိုတယ်ဆိုရင်တော့ မလုပ်ပေးနိုင်စရာ အကြောင်း မရှိ ဘူးလို့ ထင်ပါတယ်။ သူတို့ ဝင်လာပြီးတော့ သူတို့ဘာသာ သူတို့ ပြန်လွှတ်လိုက်ရင်ကျတော့ အဆင်မပြေဘူးပေါ့။ တချို့ကို ကန့်သတ်ပြီးတော့ စုလိုက်။ ဥပမာ တစ်ပတ်စာ၊ တစ်ပတ်စာပေါ့။ တစ်ပတ်အတွင်း ဝင်လာတဲ့လူ ဘယ်လောက်ဆိုတာ တစ်ခါ၊ တစ်ခေါက် အဲဒီလိုမျိုး လိုက်ပို့တာမျိုးပေါ့။ စုစည်းပြီးတော့ပေါ့။ အဲဒီလိုမျိုး လုပ်ပေးရင်တော့ အဆင်ပြေမှာပေါ့” ဟု ပြော သည်။
တပ်မတော် ဆန့်ကျင်ရေး ဆေးကျောင်းသားများကိုတွေ့ရစဉ် (GETTY IMAGES)
နစက-က ပြည်တွင်း/ပြည်ပရှိ CDM ဝန်ထမ်းများ၊ ကျောင်းသား၊ ကျောင်းသူများနှင့် လူငယ် လူရွယ်များထဲမှ နေရပ် အသီးသီး သို့ ပြန်လည် ဝင်ရောက်လိုသူများအား ကြိုဆို လက်ခံရေးစခန်းများ ဖွင့်လှစ် ပေးသွားမည် ဖြစ်သည့်အပြင် နီးစပ်ရာ တပ်မတော်နှင့် မြန်မာနိုင်ငံ ရဲတပ်ဖွဲ့ စခန်းအသီးသီးသို့လည်း ဆက်သွယ် ဆောင်ရွက်နိုင်ကြောင်း ထုတ်ပြန်ထားသည်။
ထိုသို့ သတင်းပို့ ဆက်သွယ်လာသူများကို သတ်မှတ် စည်းကမ်းချက်များနှင့်အညီ နေ့စဉ် ပြည်သူ့ဘဝတွင် အေးချမ်းစွာ နေထိုင်နိုင်ရေး အာမခံချက် ပေးသွားမည်ဖြစ်ကြောင်း အဆိုပါ ထုတ်ပြန်ချက်တွင် ပါရှိသည်။
- By CNI
- Category: နိုင်ငံရေး
- Hits: 648
CNI News
၂၀၂၂ ခုနှစ်၊ ဇွန်လ ၂၉
မြန်မာပြည်ကို ရောက်ရှိလာသည့် အာဆီယံအထူးကိုယ်စားလှယ် မစ္စတာပရတ်ဆိုခွန်နှင့် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA)ထိုးထားသည့် တိုင်းရင်းသား လက်နက်ကိုင် ၇ ဖွဲ့တို့ ဇူလိုင် ၁ ရက်နေ့တွင် နေပြည်တော် မှာ တွေ့ဆုံ ဆွေးနွေးကြမည် ဖြစ်သည်။
အာဆီယံအထူးကိုယ်စားလှယ် မစ္စတာပရတ်ဆိုခွန်သည် ယနေ့ (ဇွန်လ ၂၉ ရက်)တွင် မြန်မာပြည် ခရီးစဉ်ကို စတင်ခဲ့ပြီး ဇူလိုင် ၃ ရက်နေ့တွင် ပြန်လည် ထွက်ခွာမည် ဖြစ်သည်။
PPST ပြောရေးဆိုခွင့်ရှိသူ ဗိုလ်မှူးကြီးစောကျော်ညွန့် “အဲဒါ မှန်ပါတယ်။ ကျနော်တို့ ၂၉ ရက်နေ့ကျရင် အာဆီယံအထူး ကိုယ်စားလှယ် ရောက်မယ်၊ ရောက်လာတဲ့အခါကျရင် လည်း တွေ့ခွင့်ရှိကောင်း ရှိမယ်လို့ ကြားထားတာတော့ ကြာပါပြီ။ သို့သော်လည်းပဲ ပြီးခဲ့တဲ့ ၂၇ ရက်နေ့ကနေပြီးတော့ ကျနော်တို့ကို အကြောင်းကြားစာ ရောက်တာပေါ့လေ။
စာကတော့ ကျနော်တို့ကို NSPNC ကနေပြီးတော့ တစ်ဖွဲ့ချင်းစီ ဖိတ် တာပေါ့နော်။ အာဆီယံအထူးကိုယ်စားလှယ် ၂၉ ရက်နေ့ ရောက် မယ်။ နေပြည်တော်မှာ သူ့ရဲ့ လုပ်ငန်း ဆောင်တာတွေ လုပ်ကိုင်နေစဉ် အချိန်အတောအတွင်းမှာ တိုင်းရင်းသား လက်နက် ကိုင် အဖွဲ့အစည်းတွေနဲ့ တွေ့ဖို့ရှိတဲ့အတွက်ကြောင့်မလို့ တစ်ဖွဲ့ကို ၂ ယောက်၊ ၂ ယောက် တက်ရောက်ပေးဖို့ တစ်ဖွဲ့ချင်းစီ ကို အကြောင်းကြားပြီးတော့ ဖိတ်လာတဲ့အတွက် အဲဒါ ပြီးခဲ့တဲ့ ၂၉ ရက်နေ့က ရတာပေါ့လေ။ ကျနော်တို့က လာမယ့် ဇူလိုင်လ ၁ ရက်နေ့ကျရင် တွေ့ဖို့ ကျနော်တို့ တိုင်းရင်းသား လက်နက်ကိုင် ခေါင်းဆောင်တွေနဲ့ တွေ့ဖို့ဆိုတာကတော့ Comfirm ဖြစ်ပါတယ်”ဟု ပြောသည်။
ပရတ်ဆိုခွန် မြန်မာပြည်သို့ ဇွန်လ ၂၉ ရက်တွင် ထွက်ခွာလာစဉ်
အာဆီယံ အထူးကိုယ်စားလှယ် မစ္စတာ ပရတ်ဆိုခွန်နှင့် တွေ့ဆုံပွဲသို့ ရှမ်းပြည်ပြန်လည်ထူထောင်ရေးကောင်စီ(RCSS)၊ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)၊ ကရင်အမျိုးသားအစည်းအရုံး/ကရင်အမျိုးသားလွတ်မြောက်ရေး တပ်မတော်-ငြိမ်းချမ်းရေးကောင်စီ(KNU/KNLA-PC)၊ ရခိုင်ပြည်လွတ်မြောက်ရေးပါတီ(ALP)၊ ဒီမိုကရေစီအကျိုးပြု ကရင် တပ်မတော်(DKBA)၊ လားဟူဒီမိုကရက်တစ် အစည်းအရုံး(LDU)၊ မွန်ပြည်သစ်ပါတီ(NMSP)တို့ တက်ရောက်ကြမည် ဖြစ်သည်။
အဆိုပါ တွေ့ဆုံတွင် တိုင်းရင်းသား လက်နက်ကိုင်အဖွဲ့များက NCA အနှစ်သာရ သုံးချက်အပေါ် အခြေခံ ဆွေးနွေးမည် ဖြစ်ကြောင်း၊ နိုင်ငံရေး ပြဿနာဖြစ်၍ နိုင်ငံရေး စားပွဲဝိုင်းမှာ အဖြေရှာရေး၊ ပါဝင်သင့် ပါဝင်ထိုက်သူများ ပါဝင်သည့် စားပွဲဝိုင်းဖြစ်ရေး၊ အရပ်သားများကို အကာကွယ်ပေးရေး စသည်တို့ကို ဆွေးနွေးမည်ဟု ဗိုလ်မှူးကြီး စောကျော်ညွန့်က ပြောသည်။
အာဆီယံအထူးကိုယ်စားလှယ် မစ္စတာ ပရတ်ဆိုခွန်သည် ယခုလာရောက်သည့် မြန်မာပြည်ခရီးစဉ်မှာ ဒုတိယအကြိမ်ဖြစ် သည်။
ထိုခရီးစဉ်တွင် တိုင်းရင်းသားလက်နက်ကိုင် အဖွဲ့အစည်းများ၊ နစက အဖွဲ့ဝင်များ၊ နိုင်ငံရေးပါတီများ၊ တွေ့သင့် တွေ့ထိုက် သူများကို တွေ့ဆုံသွားမည် ဖြစ်ကြောင်း သိရသည်။
- By CNI
- Category: နိုင်ငံရေး
- Hits: 1283
CNI News
၂၀၂၂ ခုနှစ်၊ ဇွန်လ ၂၉
ထိုင်းနိုင်ငံသား သေဆုံးမှုနှင့်လက်ဗွေတွေ့ရှိထားသည့် ရခိုင်လူငယ်၏ မိသားစုဝင်များသည် သားဖြစ်သူ၏ အမှု အား ဖြေရှင်းရန် ငွေကြေးမတတ်နိုင်သည့်အတွက် အကူအညီလိုအပ်နေကြောင်း ၎င်း၏ မိဘနှစ်ပါးက CNI သတင်းဌာနသို့ ပြောသည်။
“ရှေ့နေငှားရမ်းတဲ့ကိစ္စမှာ ဘတ်သုံးသောင်း (မြန်မာငွေ ဆယ်ငါးသိန်းကျော်) ရှေ့နေကို ပေးရမယ်။ နောက် ဘတ်က တစ်သိန်းလောက်(မြန်မာငွေ ငါးဆယ့်နှစ်သိန်းကျော်)လက်ထဲမှာ လိုတယ်လို့ ပြောတယ်။ လိုလည်း လိုမယ်လေ။ အမှုလိုက်တယ်ဆိုတော့ လိုမှာပေါ့။ ငါတို့ ဘတ် သုံးသောင်းလောက်ကို ထည့်ပေးတယ်။ ငါတို့မှာ ဘတ် သုံးသောင်းထက်ပိုလို့မရှိတော့ ကုန်ပြီ။ အခု ဘတ်သုံးသောင်းထည့်ဖို့ ပိုက်ဆံက အဲဒီအိမ်ပေါင်ထားတဲ့ အထဲက အိမ်နဲ့မြေကို ရောင်းပြီးတော့ နင်တို့ကိုပေးမှာ။ မဟုတ်ရင်အပ်မှာ။ အဲဒီလို အတောင်းပန်ခံပြီးတော့ နောက်ထပ် အမေတို့ကျန်တာတွေကို ကိုက်ပြီးတော့ ထုတ်ပေးပါလို့ ချေးထားတာ အဲ့ဒါကို လွှဲလိုက်တာ”ဟု ပြောသည်။
လက်ဗွေတွေ့ရှိထားသည့် ရခိုင်လူငယ်၏ မိသားစုများသည် ရခိုင်ပြည်နယ် စစ်တွေမြို့ရှိ ကြွီတဲရွာတွင် နေထိုင်နေခြင်းဖြစ်ကာ ဖခင်ဖြစ်သူမှာ လက်သမားအလုပ်လုပ်ကိုင်နေကြောင်း၊ သားဖြစ်သူနှစ်ဦးသည် ရွာမှ လူတချို့နှင့် မလေးရှားသို့ သွားရောက်အလုပ်လုပ်ကိုင်ရန်အတွက် နေအိမ်အားပေါင်နှံကာ ပေးလိုက်ခြင်း ဖြစ်ကြောင်း သိရသည်။
လက်ဗွေတွေ့ရှိသည့် ရခိုင်လူငယ်၏ မိဘများကိုတွေ့ရစဉ်
ထိုင်းနိုင်ငံတွင် အမှုတစ်ခုလိုက်လျှင် ရှေ့နေတစ်ဦးအား ဝန်ဆောင်ခအဖြစ် ဘတ်ငွေ သိန်းဂဏာန်းပေးရသော် လည်း ယခုအမှုတွင်လိုက်ပေးနေသည့် ရှေ့နေသည် ကူညီသည့်အနေဖြင့် ဘတ်ငွေသုံးသောင်းသာ ယူကြောင်း သိရသည်။
သို့သော် အမှုအတွက် ရှေ့နေနှင့် သွားရေးလာရေးတို့တွင် ကုန်ကျမှုများအပြင် အမှုမှာ မည်သည့်ကာလတွင် ပြီးစီးမည်ကို မသိရှိရသေးဖြင့် မည်မျှကုန်ကျမည်ကိုမပြောနိုင်သော်လည်း ဘတ်ငွေ သိန်းဂဏန်းခန့်ကုန်ကျနိုင် သည်ဟု အဖမ်းခံရချိန်မှ စတင်ကာ ယနေ့အထိ လိုက်ပါကူညီပေးနေသည့် MWRN မှ မြန်မာအလုပ်သမားတာဝန်ခံ ကိုသိန်းထွန်းက CNI သတင်းဌာနသို့ပြောသည်။
“သူတို့ဆီကပေးတဲ့ ပိုက်ဆံက နှစ်သောင်းကျော်(ဘတ်ငွေ) ပဲ ပေးသေးတယ်။ ရှေ့နေကို ပေးဖို့တောင် မလောက်ဘူး။ အခုကျနော့်ဆီက စိုက်ထားတာ ရှစ်ထောင်စိုက်ထားရပြီးပြီ။ ကျနော့်မှာလည်း နောက်ထပ်စိုက်ဖို့ အတွက် အဆင်မပြေဘူးလေ။ ဒီအမှုနဲ့ပတ်သက်လို့ ဘယ်သူတစ်ဦးတစ်ယောက်ကမှ ကူညီထောက်ပံ့တာမရှိဘူး။ ဆက်သွယ်လာတာလည်း မရှိသေးဘူး။ ကိုယ့်ဘာသာကိုယ် မရှိလည်း ဆွဲငှားပြီးတော့ အမှုကို ဆက်လုပ် နေရတယ်။ မိသားစုကလည်း အဆင်မပြေဘူးဆိုတော့ အခက်အခဲတွေက များတယ်။ အမှုရဲ့အတိုင်းအတာက ဘယ်လောက်ကြာမလဲဆိုတာကတော့ အမှုလိုက်တဲ့အခါမှ သိရမှာပေါ့။ အခုကတည်းက ဘာမှပြောလို့မရဘူး။ ဘယ်လောက်ကုန်မယ်ဆိုတာလည်း ပြောလို့မရဘူး။ အာမခံကနေပြီးတော့ အမှန်တကယ် အာမခံလို့ရမယ်ဆိုရင် ငွေကြေးက ဘယ်လောက်ကုန်မယ်ဆိုတာ ကျနော်တို့မသိရဘူး။ ဒါပေမယ့် ခန့်မှန်းခြေကတော့ သိန်းဂဏာန်း ရှိတယ်” ဟု ပြောသည်။
အဆိုပါ ရခိုင်လူငယ်သည် အလောင်းနှင့်ဆက်စပ်ပြီး လက်ဗွေတွေ့ရှိခဲ့ခြင်းဖြစ်ကာ အာမခံရရှိရန် ရှေ့နေနှင့် ဆောင်ရွက်လုပ်ဆောင်နေကြောင်း သိရသည်။
လက်ဗွေတွေ့ရှိသည့် ရခိုင်လူငယ်ကို လက်ထိပ်ခတ်ကာ ခေါ်ဆောင်လာစဉ်
ထို့အပြင် အဆိုပါအမှုမှ မျက်မြင်သက်သေတို့အား ဇွန်လ ၃၀ ရက်နေ့တွင် စတင်စစ်ဆေးမည်ဖြစ်ကြောင်း လည်း ကိုသိန်းထွန်းက ဆက်ပြောသည်။
၎င်းက“အခုက အမှုနဲ့ပတ်သက်တဲ့သူတွေကို စစ်ဆေးဖို့အတွက် တရားရုံးမှာစာသွားတင်တာ။ ခွင့်ပြုချက်က ဒီနေ့မှရတယ်။ အဲဒီတရားရုံးက ခွင့်ပြုချက်ရမှ အဲဒီသက်သေတွေကို ကျနော်တို့က စစ်ခွင့်ရှိမှာ။ မနက်ဖြန် သွားစစ်မယ်။ ပြီးလို့ရှိရင် လူသတ်မှုဖြစ်တဲ့ အခင်းဖြစ်ပွားတဲ့နေရာ အဲဒီနေရာတွေကိုပါ ကျနော်တို့သွားမယ်။ အကုန်လုံးအသေးစိတ်ပြန်ပြီးတော့” ဟု ပြောသည်။
ထိုင်းနိုင်ငံသားသေဆုံးမှုနှင့်ပတ်သက်၍ မလေးရှားသို့ တရားမဝင်ဝင်ရောက်မည့် မြန်မာအလုပ်သမား ၄၀၀ ကျော် အား ဖမ်းဆီးထိန်းသိမ်းကာ စစ်ဆေးခဲ့ပြီးနောက် ယခုကဲ့သို လက်ဗွေတွေ့ရှိသူနှင့် မျက်မြင်သက်သေများ ထွက်ပေါ်လာခဲ့ခြင်းဖြစ်သည်။
လက်ဗွေတွေ့ရှိသည့် ရခိုင်လူငယ်၏ မိသားစုဝင်များက ၎င်းသည် လူသတ်မှု ကျူးလွန်သည့် တရားခံ မဖြစ်နိုင် ကြောင်း၊ ဝင်းနှင့်ဇော်ကဲ့သို့ ဖြစ်သွားမည်ကို စိုးရိမ်ကြောင်း ပြောသည်။
- By CNI
- Category: နိုင်ငံရေး
- Hits: 684
CNI News
၂၀၂၂ ခုနှစ်၊ ဇွန်လ ၂၉
လက်ရှိ ရခိုင်ပြည်နယ်မှာ ဖြစ်ပွားနေသော တပ်မတော်နှင့် ရက္ခိုင့်တပ်တော် (ULA/AA)ကြား အပြန်အလှန် ဖမ်းဆီးမှုများကို ဆွေးနွေးညှိနှိုင်းခြင်းဖြင့် အဖြေရှာကြရန် ရခိုင်အမျိုးသားပါတီ (ANP) မှ မူဝါဒရေးရာ ဦးဆောင်ကော်မတီဝင် ဦးထွန်းအောင် ကျော်က CNI သတင်းဌာနသို့ ပြောသည်။
ထို့နောက် ပြဿနာကို ဆွေးနွေးညှိနှိုင်း ဖြေရှင်းခြင်းမှတစ်ပါး တည်တံ့ခိုင်မြဲသည့် အဖြေကို ရနိုင်မှာ မဟုတ်ကြောင်း၊ ပြဿနာများ ဖြစ်ပွားလာပါက အပြစ်မဲ့သည့် ပြည်သူလူထု ထိခိုက်မှု ရှိလာကြောင်း ၎င်းက ပြောသည်။
ဦးထွန်းအောင်ကျော်က “အပြစ်မဲ့တဲ့ ပြည်သူတွေ ပါသွားရင်လည်း သူတို့ရဲ့ သူတို့ အဖမ်းဆီးခံရတဲ့ လူတွေမကပါဘူး။ သူတို့နဲ့ ဆက်နွယ်တဲ့ မိသားစုတွေ မိဘတွေအားလုံး ပူဆွေးသောက ရောက်ကြရမှာပဲ။ အချုပ်အနှောင်ခံရတယ် ဆိုကတည်းက လူ တစ်ယောက်ရဲ့ ဘဝဟာ အကန့်သတ် ခံလိုက်ရတာပေါ့။ နောက်တစ်ခုက ဖမ်းတယ်၊ ဆီးတယ်၊ လုပ်ပြီဟေးဆိုတာနဲ့ ဘယ် အချိန်မှာ ပြန်ထွက်မလဲ သဘောတစ်ခုက။ ကျနော်တို့ ဝမ်းနည်းစရာ ကြားတာက တစ်ခါတစ်လေ၊ ဖမ်းဆီးသွားပြီးသွားရင် ဒဏ်ရာ ပြင်းပြင်းထန်ထန် ရတာတို့၊ အသက်တွေ သေဆုံးသွားရတာတို့ အဲဒါတွေလည်း ရှိတတ်တဲ့အတွက် မိဘတွေ ဆွေမျိုး တွေ အသိုင်းအဝိုင်းတွေက ပြည်သူလူထုက စိုးရိမ်သောက ရောက်တာလည်း အပြစ်ဆိုလို့ မရဘူးခင်ဗျ။ အဲဒီလို အခြေအနေ တော့ ရှိတာပေါ့။ အဲဒါကြောင့် ဒီပြဿနာတွေ ပြေလည်နိုင်ဖို့ အတွက်တော့ နှစ်ဖက်အနေနဲ့ အခြေခံ အချက်အလက်တွေကို ဆွေးနွေးညှိနှိုင်း တိုင်ပင်ပြီးတော့မှ သူတို့အနေနဲ့ ဒီပြဿနာကို ဘယ်လို ဖြေရှင်းကြမလဲဆိုတာတော့ တစ်ဖက်နဲ့ တစ်ဖက် ဆွေးနွေးညှိနှိုင်း အဖြေရှာခြင်းက အကောင်းဆုံးနဲ့ ပြည်သူလူထု အတွက်လည်း ရိုက်ခတ်မှု အနည်းဆုံး ဖြစ်မယ်လို့ ထင်ပါ တယ်”ဟု ပြောသည်။
ရခိုင်ပြည်နယ်ရှိ စစ်တွေ၊ မြောက်ဦး၊ ပုဏ္ဏားကျွန်း၊ ကျောက်တော်တို့တွင် တပ်မတော်မှ အရပ်သား ၄၅ ဦးကို ဖမ်းဆီးသွား ကြောင်း AA က ထုတ်ပြန်ခဲ့သည်။
တပ်မတော်နဲ့ AA ကိုယ်စားလှယ်များကိုတွေ့ရစဉ်
အလားတူ AA ဘက်ကလည်း တပ်မတော်မှ ဗိုလ်ကြီးအဆင့်ရှိသူ အပါအဝင် တပ်ကြပ်များ၊ တပ်သားများနှင့် ရဲတပ်သားများ ကို ဖမ်းဆီးမှုများ ရှိနေသည်။
ရခိုင်ပြည်နယ်မှာ တပ်မတော် အနေဖြင့် စစ်မျက်နှာ ထပ်ဖွင့်ပါက ဆိုးရွားသည့် အခြေအနေများ ကြုံတွေ့နိုင်ကြောင်း၊ ဆွေးနွေးညှိနှိုင်းခြင်းက အကောင်းဆုံး ဖြစ်လိမ့်မည်ဟု ယူဆကြောင်း နိုင်ငံရေးလေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။
ဦးရဲထွန်းက “ဒီဟာတွေကြတော့ လက်နက်ကိုင် တိုက်ပွဲတွေ ပြင်းပြင်းထန်ထန် မဖြစ်ချင်ဘူးဆိုရင်တော့ အဲဒီလို ညှိနှိုင်း ပြီးတော့ပဲ ဖြေရှင်းရမှာပဲလေ။ တပ်မတော်ဘက်က အနေနဲ့ကတော့ သူတို့က အဲဒီဖက်က တစ်ခါ တိုက်ပွဲတွေ ပြန်ပေါ်လာ တယ်ဆိုရင်တော့ စစ်မျက်နှာ အစုံဖြန့်ပြီးတော့ တိုက်နေရသလို ဖြစ်တော့ ပိုဆိုးမှာပေါ့။ အခြေအနေကနော်။ တတ်နိုင်သမျှ တော့ ဆွေးနွေးညှိနှိုင်းတဲ့နည်းနဲ့ ဖြေရှင်းတာကတော့ တပ် အတွက်ကတော့ ကောင်းမယ်လို့ ထင်တယ်” ဟု ပြောသည်။
တပ်မတော်မှ ဖမ်းဆီးသွားသည့် ၄၅ ဦးတွင် အသက် မပြည့်သေးသူ ၅ ဦး ပါဝင်ကြောင်း AA ၏ ထုတ်ပြန်ချက်တွင် ဖော်ပြ ထားသည်။
လက်ရှိတွင် ရခိုင်ပြည်နယ်မှာ တပ်မတော်နှင့် AA တို့ အကြား နားလည်မှုဖြင့် အပစ်အခတ်ရပ်စဲထားသည်။
- By CNI
- Category: နိုင်ငံရေး
- Hits: 549
CNI News
၂၀၂၂ ခုနှစ်၊ ဇွန်လ ၂၉
မြန်မာနိုင်ငံဆိုင်ရာ အာဆီယံ အထူးကိုယ်စားလှယ် မစ္စတာ ပရတ်ဆိုခွန်သည် မြန်မာနိုင်ငံသို့ လာရောက်မည့် ခရီးစဉ်ကို ယနေ့ (ဇွန်လ ၂၉ ရက်) စတင်ပြီး ဖြစ်ကြောင်း ကမ္ဘောဒီးယားအစိုးရက ထုတ်ပြန်ခဲ့သည်။
မစ္စတာ ပရတ်ဆိုခွန်သည် မြန်မာနိုင်ငံသို့ ဇွန်လ ၂၉ ရက်မှ ဇူလိုင် ၃ ရက်အထိ လာရောက်မည်ဖြစ်ပြီး ဇူလိုင် ၂ ရက်မှ ၅ ရက်နေ့အထိ ကျင်းပမည့် မဲခေါင်-လန်ချန်း ညီလာခံကိုလည်း တက်ရောက်မည် ဖြစ်ကြောင်း သိရသည်။
ထို့ပြင် နစက အဖွဲ့ဝင်များ၊ တိုင်းရင်းသား လက်နက်ကိုင် အဖွဲ့အစည်းများ၊ နိုင်ငံရေးပါတီများ စသည့် အလွှာ အသီးသီးမှ ပုဂ္ဂိုလ်များဖြင့် တွေ့ဆုံသွားရန် ရှိကြောင်း သိရသည်။
ယနေ့ စတင်သည့် မြန်မာပြည်ခရီးစဉ်သည် အာဆီယံအထူးကိုယ်စားလှယ်၏ ဒုတိယအကြိမ်မြောက် ခရီးစဉ်ဖြစ်သည်။
- By CNI
- Category: နိုင်ငံရေး
- Hits: 1277
CNI News
၂၀၂၂ ခုနှစ်၊ ဇွန်လ ၂၉
တရုတ်နိုင်ငံခြားရေးဝန်ကြီး မစ္စတာဝမ်ယိသည် မြန်မာနိုင်ငံသို့ ယခု သီတင်းပတ်အတွင်း လာရောက်မည်ဖြစ်သည့် အတွက် မြန်မာ့နိုင်ငံရေး အပြောင်းအလဲ ဖြစ်မလား သို့မဟုတ် ပိုမို ဆိုးဝါးလာ မလားဆိုသည်ကို စောင့်ကြည့်ရမည်ဟု တရုတ်အရေးကျွမ်းကျင်သူ ဒေါက်တာလှကျော်ဇောက CNI သတင်းဌာနသို့ ပြောသည်။
မစ္စတာ ဝမ်ယိသည် ဇူလိုင် ၂ ရက်မှ ၅ ရက်နေ့အထိ ကျင်းပမည့် မြန်မာ-ထိုင်း၊ ကမ္ဘောဒီးယား- လာအို- ဗီယမ်နမ်- တရုတ် ကိုယ်စားလှယ်များ တက်ရောက်မည့် မဲခေါင်-လန်ချန်း ညီလာခံသို့ တက်ရောက်ရန် မြန်မာပြည်သို့ လာရောက်မည် ဖြစ် သည်။
ဒေါက်တာလှကျော်ဇောက “ ဝမ်ယိရဲ့ ခရီးစဉ်အရကတော့ စစ်ကောင်စီအတွက် အသက်ရှုပေါက် ချောင်ဖို့လာကူတဲ့ သဘောပဲ။ စစ်ကောင်စီကလည်း သူ့ဘာသာသူ အသက်ရှုပေါက် ချောင်ဖို့ဆိုရင် ပြည်တွင်းမှာရှိတဲ့ နိုင်ငံရေး အင်အား တွေနဲ့ တစ်စုံတစ်ရာ စေ့စပ်ဖို့၊ ဖြေရှင်း ဖို့ အပေးအယူလုပ်ဖို့ လိုတာပဲလေ။ အဲတော့ ဘယ်ဘက်က ကြည့်လဲအပေါ် မူတည်တာပေါ့။ ဥပမာ အားဖြင့် စစ်ကောင်စီ တစ်စုံတစ်ရာ လိုက်လျောလာနိုင်အောင် ဝမ်ယိက ပြောနိုင်တယ်ဆိုရင် တရုတ်ဘက်က ပြောနိုင်တယ်ဆိုရင်တော့ ဗမာပြည်မှာ ဒီလောက်တောင် ရက်ရက်စက်စက် လုပ်နေတာကနေ တစ်စုံ တစ်ရာတွေ လျော့သွား တာလည်း ဖြစ်ချင်ဖြစ်မယ်။ သို့မဟုတ် သူတို့အတွက် ထွက်ပေါက်ရပြီလို့ ထင်လို့ စစ်အုပ်စုက ပိုကြမ်းရမ်းလာရင်တော့ ကျမတို့အတွက် ကောင်းတဲ့လာခြင်း မဖြစ်နိုင်ဘူး။ အဲတော့ သူတို့လာတာ တရုတ်က လာလာ၊ အာဆီယံကလည်း အခု ရောက်နေတယ်။ တရုတ်ကလည်း ရောက်လာတာပဲ။ သူတို့ ရောက်လာတာ ကောင်းခြင်း မကောင်းခြင်းဟာ ကျမတို့ ပြည်သူတွေက ဒီစစ်ကောင်စီအပေါ်မှာ ပိုမို ဖိအားပေးနိုင်တဲ့အပေါ် မူတည်တယ်။ စစ်ကောင်စီ ကို ကျမတို့က များများ ဖိအားပေးနိုင်လေ၊ စစ်ကောင်စီက နည်းနည်း နောက်ဆုတ်ပြီးတော့ စီးပွားရေးဘက် နည်းနည်း လှည့်လာတာတို့။ နိုင်ငံရေးအရ တစ်စုံတစ်ရာ ဟိုတင်ပြုတာတွေ ဖြစ်ကောင်း ဖြစ်လာနိုင်တယ်”ဟု CNI သတင်းဌာနသို့ ပြောသည်။
တပ်မတော် ဆန့်ကျင်ရေး ဆန္ဒပြနေသူများနှင့်လုံခြုံရေးအဖွဲ့ကိုတွေ့ရစဉ်
တရုတ်နိုင်ငံခြားရေးဝန်ကြီး မစ္စတာ ဝမ်ယိ မြန်မာပြည်ကို လာရောက်မည်ဖြစ်သလို မဲခေါင်-လန်ချန်း ညီလာခံသို့ တက် ရောက်မည် ဖြစ်ကြောင်း နစက ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကလည်း မီဒီယာများသို့ ပြောကြားထားသည်။
မစ္စတာ ဝမ်ယိသည် ၂၀၂၁ ခုနှစ်၊ ဇန်နဝါရီ ၁၂ ရက်က ပထမအကြိမ် မြန်မာနိုင်ငံသို့ လာရောက်ခဲ့ပြီးနောက် ဖေဖော်ဝါရီ ၁ ရက်နေ့ တပ်မတော်မှ ဒေါ်အောင်ဆန်းစုကြည် ဦးဆောင်သည့် အစိုးရကို ဖြုတ်ချ၍ အာဏာရယူပြီးနောက် ပထမဆုံး အကြိမ် မြန်မာပြည်သို့ လာရောက်မည် ဖြစ်သည်။
ထို့ကြောင့် မစ္စတာ ဝမ်ယိ၏ ခရီးစဉ်သည် နစကကို အသိအမှတ်ပြုရာ ရောက်နေသလို နစက ကြုံတွေ့နေရသော ဖိအား များကို တစ်စုံတစ်ရာ ဖယ်ရှားပေးသလိုဖြစ်သွားနိုင်ကြောင်း ပြည်တွင်း နိုင်ငံရေးအသိုင်းအဝန်းက သုံးသပ်နေကြသည်။
တရုတ်နိုင်ငံသည် မြန်မာ့တပ်မတော်နှင့် ရင်းနှီးသော ဆက်ဆံရေး တစ်ရပ်ကို ထူထောင်ထားသလို မြန်မာ့တပ်မတော် အတွက် ယခင်က လက်နက်များ အဓိက ရောင်းချပေးနေသော နိုင်ငံလည်းဖြစ်သည်။
တခြားတစ်ဖက်မှာတော့ မြန်မာနိုင်ငံဆိုင်ရာ အာဆီယံအထူးကိုယ်စားလှယ် မစ္စတာ ပရတ်ဆိုခွန်လည်း မြန်မာနိုင်ငံသို့ ဇူလိုင် ၂၉ ရက်မှ ၃ ရက်အထိ လာရောက်မည်ဖြစ်သလို ဇူလိုင် ၂ ရက်မှ ၅ ရက်အထိ ကျင်းပမည့် မဲခေါင်-လန်ချန်း ညီလာခံသို့လည်း တက်ရောက်ရန် ရှိကြောင်း သိရသည်။