CNI News

၂၀၂၂ ခုနှစ်၊ ဇူလိုင် ၂၉

မိမိတို့အနေဖြင့် ဖွဲ့စည်းပုံအခြေခံဥပဒေနှင့်အညီ အတတ်နိုင်ဆုံး ဆောင်ရွက်လျက်ရှိပြီး ဒီမိုကရေစီဆန်သည့် နိုင်ငံရေး ထွက်ပေါက်များ ခွင့်ပြုပေးထားကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

ယနေ့ (ဇူလိုင် ၂၉ ရက်)တွင် ကျင်းပသည့် နစက၏ အစည်းအဝေးတွင် ၎င်းက အထက်ပါ အတိုင်းပြောကြားခဲ့ခြင်း ဖြစ်သည်။

နစကဥက္ကဋ္ဌက “ ၂၀၂၀ ပြည့်နှစ် ပါတီစုံဒီမိုကရေစီ အထွေထွေရွေးကောက်ပွဲ ရလဒ်ကြောင့် နိုင်ငံရေးအရ မတည်ငြိမ်မှုများ ဖြစ်ပေါ်ခဲ့သဖြင့် ဖွဲ့စည်းပုံအခြေခံဥပဒေနှင့်အညီ တပ်မတော်က တာဝန်ယူ ဆောင်ရွက်ခဲ့ရကြောင်း၊ မိမိတို့ အနေဖြင့် ဖွဲ့ စည်းပုံ အခြေခံဥပဒေနှင့်အညီ အတတ်နိုင်ဆုံး ဆောင်ရွက်လျက်ရှိပြီး နိုင်ငံရေးနှင့်ပတ်သက်၍ ထွက်ပေါက်များ ပေးထား ကြောင်း၊ နိုင်ငံမငြိမ်သက်မှုများ ဖြစ်ပေါ်အောင် ဆောင်ရွက်မှုများမှလွဲ၍ ပါတီညီလာခံများ၊ အစည်းအဝေးများနှင့် ပါတီ အချင်းချင်း တွေ့ဆုံပွဲများကို ခွင့်ပြုပေးထားကြောင်း၊ ဒီမိုကရေစီဆန်သည့် နိုင်ငံရေးထွက်ပေါက်များ ခွင့်ပြုပေးထားတယ်” ဟု ပြောသည်။

နိုင်ငံရေးထွက်ပေါက်ပေးသည့်အနေဖြင့် ပါတီညီလာခံများ၊ အစည်းအဝေးများ၊ ပါတီ အချင်းချင်း တွေ့ဆုံပွဲများကို ခွင့်ပြုပေး ထားသည်ဆိုသည်မှာ မည်သည့် အခြေအနေကို ရည်ညွန်းကြောင်း နစကဥက္ကဋ္ဌက ပြောမထားပေ။

မွန်ညီညွတ်ရေးပါတီ(MUP) ပါတီညီလာခံ ကျင်းပစဉ်

သို့သော် ၂၀၂၂ ခုနှစ်၊ မတ်လ ၁၈ ရက်မှ ၂၀ ရက်အထိ မွန်ညီညွတ်ရေးပါတီ(MUP) ပါတီညီလာခံ ကျင်းပခဲ့သလို ၂၀၂၂ ခုနှစ်၊ မေလ ၂၆ ရက်မှ ၂၇ ရက်အထိ ရှမ်းတိုင်းရင်းသားများဒီမိုကရေစီအဖွဲ့ချုပ်(SNLD)လည်း ပါတီညီလာခံ ကျင်းပခဲ့ သည်။

ထို့နောက် ဒီမိုကရေစီဆိုသည်မှာ တွေ့ဆုံ ဆွေးနွေးညှိနှိုင်း၍ အများ၏ သဘောတူညီမှုဖြင့်သာ ဆောင်ရွက်ရခြင်း ဖြစ်ကြောင်း၊ ယင်းသည် ဒီမိုကရေစီယဉ်ကျေးမှုဟု ဆိုနိုင်ကြောင်း၊ အဆိုပါ ဒီမိုကရေစီနိုင်ငံရေး ယဉ်ကျေးမှုများ ပျက်စီး သွားပါက နိုင်ငံ၏ တည်ငြိမ်မှုပျက်ပြားသွားမည်ဖြစ်ကြောင်း၊ ထို့ကြောင့် ယခုဖြစ်နေသည့် နိုင်ငံရေး အခြေအနေများသည် ရှိနေသည့် နိုင်ငံရေး ထွက်ပေါက်များကို မှန်မှန်ကန်ကန် အသုံးမချမှုများကြောင့် ဖြစ်ပေါ်လာခြင်း ဖြစ်သည်ကို တွေ့ရှိရ ကြောင်း ၎င်းက ပြောသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က “နိုင်ငံတကာဆက်ဆံရေးနှင့် ပတ်သက်၍ မိမိတို့ တာဝန်ယူ ဆောင်ရွက်ချိန် တွင် နိုင်ငံတကာ အသိုင်းအဝိုင်း၌ မိမိတို့ကို ဘေးဖယ်ရန် ကြိုးပမ်းခဲ့မှုများရှိကြောင်း၊ ၂၀၁၁ ခုနှစ် ပါတီစုံဒီမိုကရေစီ လမ်း ကြောင်းပေါ်၌ လျှောက်လှမ်းချိန်တွင် အချို့နိုင်ငံကြီးများက ၎င်းတို့အလိုကျ ဆောင်ရွက်နိုင်မည့်သူများကို မြန်မာ့နိုင်ငံရေး ၏ အရေးပါသည့် နေရာများတွင် ပါဝင်နိုင်ရေး အချိန်ယူစိမ့်ဝင်၍ ရည်ရွယ်ချက် ရှိရှိကြံစည် လုပ်ဆောင်ခဲ့သည်ကို တွေ့ရှိ ရကြောင်း၊ ၎င်းတို့လိုလားသည့်သူများ နိုင်ငံရေးစင်မြင့်ပေါ်တွင် တည်မြဲစေရေး ငွေအား၊ လူအားနှင့် အကြံပေးများဖြင့် အဘက်ဘက်မှ ကူညီဆောင်ရွက်ပေးခဲ့သည်ကို တွေ့ရှိရကြောင်း၊ အကူအညီများပေးရာတွင်လည်း အရောင်အသွေးများ ဖြင့် ကူညီဆောင်ရွက်ပေးခဲ့ခြင်းဖြစ်သည်ကို ယခုအချိန်တွင် သိရှိရကြောင်း၊  မိမိတို့ နိုင်ငံ၏ နိုင်ငံရေးစင်မြင့်ပေါ် တွင် ၎င်းတို့လိုလားသည့်သူများ မရှိတော့သည့် အချိန်တွင် ကူညီမှုများ အကြောင်းအမျိုးမျိုးပြ၍ ရပ်တန့်သွားခဲ့တယ်”ဟု ပြောသည်။

ရှမ်းတိုင်းရင်းသားများဒီမိုကရေစီအဖွဲ့ချုပ်(SNLD) ပါတီညီလာခံကျင်းပစဉ်

ထို့နောက် ၂၀၀၈ ဖွဲ့စည်းပုံအခြေခံဥပဒေသည် ပြည်သူများ အသိအမှတ်ပြုထားသည့် ဥပဒေဖြစ်ပြီး မဲပေးခွင့်ရှိသူ၏ ၉၂ ဒသမ ၄၈ ရာခိုင်နှုန်းဖြင့် အတည်ပြုပြဋ္ဌာန်းခဲ့ခြင်းဖြစ်ကြောင်း၊ ဖွဲ့စည်းပုံအခြေခံဥပဒေကို မျက်ကွယ်ပြု၍ မိမိတို့အပေါ်တွင် ခွဲခြားဆက်ဆံမှုများ ကြုံတွေ့ရကြောင်း၊ အလားတူ နိုင်ငံတကာ ဆက်ဆံရေးများတွင်လည်း မိမိတို့နိုင်ငံ၏ ပကတိ အရှိ တရားကို မျက်ကွယ်ပြု၍ ဆောင်ရွက်လျက်ရှိကြောင်း ၎င်းက ပြောသည်။

မိမိတို့၏ နိုင်ငံရေး ဦးတည်ချက်တွင် နိုင်ငံရေး ထွက်ပေါက်များပေးထားပြီး အဆိုပါ နိုင်ငံရေးထွက်ပေါက်များကို အသုံးချ၍ ငြိမ်းချမ်းရေး ရရှိအောင် ကြိုးပမ်းဆောင်ရွက်ရန်လိုကြောင်း၊ ရွေးကောက်ပွဲများကို လေ့လာကြည့်ပါက ရွေးကောက်ပွဲများကို မြို့နယ်များအားလုံးတွင် အပြည့်အဝ မပြုလုပ်နိုင်ခဲ့ကြောင်း၊ နိုင်ငံရေးရလဒ်များကို တိုးတက်အောင် ဆောင်ရွက်ပေးရမည် ဖြစ်ကြောင်း၊ ထို့ကြောင့် မိမိတို့ ဆောင်ရွက်နေသည့် အခြေခံအချက်များ အခြေခိုင်မာစေရေး အစိုးရအဖွဲ့အနေဖြင့် ကြိုးပမ်း ဆောင်ရွက်ရမည်ဟု နစကဥက္ကဋ္ဌ ပြောသည်။

CNI News

၂၀၂၂ ခုနှစ်၊ ဇူလိုင် ၂၉

နစက ကျင်းပမည့် ရွေးကောက်ပွဲကို ပူးပေါင်းပါဝင်ခြင်း မပြုရန် အမျိုးသားညီညွတ်ရေးအစိုးရ (NUG) ၏ ယာယီသမ္မတ ဒူဝါလရှီးလက ဇူလိုင် ၂၈ ရက်တွင် ပြောကြားခဲ့သည်။

နစက၏ နိုင်ငံရေး ထွက်ပေါက်အဖြစ် ကြိုးစားနေသည့် ၂၀၂၃ ရွေးကောက်ပွဲကို အားဖြည့်ပါဝင်ခြင်း လုံးဝမပြုလုပ်ရန် နိုင်ငံရေးပါတီများအား တိုက်တွန်းကြောင်း ယာယီသမ္မတ ဒူဝါလရှီးလ၏ အရေးပေါ်နိုင်ငံတော် အခြေပြ မိန့်ခွန်းတွင် ထည့်သွင်း ပြောကြားခဲ့သည်။

NUG ၏ ယာယီသမ္မတ ဒူဝါလရှီးလက “နောက်ဆုံးအနေအဖြင့် နိုင်ငံရေးပါတီများကို အထူးပန်ကြားလိုသည်မှာ မင်းအောင်လှိုင် နဲ့ စစ်အုပ်စု၏ နိုင်ငံရေး ထွက်ပေါက်အဖြစ် ကြိုးပမ်းနေတဲ့ ၂၀၂၃ ရွေးကောက်ပွဲကို အားဖြည့်ပါဝင်ခြင်း လုံးဝမပြုလုပ်ကြဖို့ အထူးမေတ္တာရပ်ခံ တိုက်တွန်းလိုပါတယ်”ဟု ပြောသည်။

ရွေးကောက်ပွဲမှာ ငြိမ်းချမ်းစွာ အဖြေရှာနည်း တစ်ခုဖြစ်ကြောင်း၊ မိမိတို့ ပအိုဝ်းအမျိုးသားအဖွဲ့ချုပ်(PNO) အနေဖြင့် နိုင်ငံတော်မှ သတ်မှတ်ထားသည့် ရွေးကောက်ပွဲကို ယှဉ်ပြိုင်သွားမည်ဖြစ်ကြောင်း PNO မှ အတွင်းရေးမှူး - ၂ ခွန်ထွန်းရွှေက CNI သို့ ပြောသည်။

ခွန်ထွန်းရွှေက “ကျနော်တို့က ပအိုဝ်း PNO ကတော့ ငြိမ်းချမ်းစွာ အဖြေရှာတဲ့ နည်းနဲ့ပဲ ကျနော်တို့ သွားမှာပေါ့။ သွားတယ်ဆို တော့ ရွေးကောက်ပွဲ ငြိမ်းချမ်းစွာ အဖြေရှာနည်း တစ်ခုပဲပေါ့။ ဘာလို့လဲဆိုတော့ ရွေးကောက်ပွဲ လုပ်မှပဲ ကျနော်တို့ ပြည်သူ တွေ အရင်ကလို ဖြည်းဖြည်းချင်း ပါဝင်လာနိုင်တာပေ့ါ။ ကျနော်တို့ကတော့ အေးအေးချမ်းချမ်း တည်တည်ငြိမ်ငြိမ် အမြန်ဆုံး ရသွားရင်တော့ ရွေးကောက်ပွဲ အမြန်ဆုံးလုပ်ပေး၊ ရွေးကောက်ပွဲကနေ လူထုအစိုးရတစ်ရပ် ဖြစ်ပေါ်အောင် ပြန်လုပ်ပေး၊ အဲဒါ မှ တပ်က ခွာလို့ရမှာလေ။ ဟုတ်ပါတယ်ဗျ။ တကယ်လို့ ရွေးကောက်ပွဲ လုပ်ရင်တော့ နိုင်ငံတော်ရဲ့ သတ်မှတ်ထားတဲ့ ရွေးကောက်ပွဲကိုတော့ ကျနော်တို့ ယှဉ်ပြိုင်သွားမှာပါခင်ဗျ” ဟု ပြောသည်။

 ရခိုင်အမျိုးသားပါတီ(ANP)

ထို့အတူ နိုင်ငံရေးပါတီများ မှတ်ပုံတင်ဥပဒေအရ ရွေးကောက်ပွဲတွင် အနည်းဆုံး ၃ နေရာ ဝင်ရောက် ယှဉ်ပြိုင်ခြင်း မရှိပါက ပါတီရပ်တည်ပိုင်ခွင့် ပယ်ဖျက်ခံရမည်ဖြစ်ကြောင်း ရခိုင်အမျိုးသားပါတီ (ANP) မှ မူဝါဒရေးရာ ဦးဆောင် ကော်မတီဝင် ဦးထွန်းအောင်ကျော်က CNI သို့ ပြောသည်။

ဦးထွန်းအောင်ကျော်က “ဒါကတော့ ကျနော်တို့က ဥပဒေအမြင်နဲ့ပဲ ပြောလိုပါတယ်ခင်ဗျ။ ကျနော်တို့မှာ အစိုးရရဲ့ အဆက်ဆက် ပြဋ္ဌာန်းထားတဲ့ နိုင်ငံရေးပါတီများ မှတ်ပုံတင် ဥပဒေဆိုတာ ရှိပါတယ်။ အဲဒီနိုင်ငံရေးပါတီ မှတ်ပုံတင်ဥပဒေမှာ နိုင်ငံရေး ပါတီတစ်ရပ်ဟာ ဥပဒေအရ မှတ်ပုံတင်ပြီးတော့ နိုင်ငံရေးပါတီ ထူထောင်တယ် ဆိုလို့ရှိရင် အထွေထွေရွေးကောက်ပွဲမှာ ဘယ်လိုပဲဖြစ်ဖြစ် နေရာ ၃ နေရာကတော့ ပါဝင်ယှဉ်ပြိုင်ရပါလိမ့်မယ်၊ အဲဒီလို မယှဉ်ပြိုင်ဘူး။ နေရာ ၃ နေရာလည်း ရွေးကောက်ပွဲမှာ မပါဝင်ဘူး ဆိုလို့ရှိရင် အဲဒီနိုင်ငံရေးပါတီကို နိုင်ငံရေးပါတီ မှတ်ပုံတင်ဥပဒေအရ နိုင်ငံရေးပါတီများ ရပ်တည် ပိုင်ခွင့်မှ ပယ်ဖျက်ခြင်း ခံရပါလိမ့်မယ်ခင်ဗျ၊ အဲဒီဥပဒေတစ်ခုတော့ ရှိပါတယ်” ဟု ပြောသည်။

လာမည့် ၂၀၂၃ ခုနှစ်၊ ဩဂုတ်လအတွင်း ရွေးကောက်ပွဲ ကျင်းပသွားမည်ဖြစ်ကြောင်း နစက ဥက္ကဋ္ဌမှ ပြောကြားထားသည်။

မွန်ညီညွတ်ရေးပါတီ

မိမိတို့ မွန်ညီညွတ်ရေးပါတီ (MUP) အနေဖြင့် တရားဝင် မှတ်ပုံတင်ထားသော နိုင်ငံရေးပါတီ ဖြစ်သည့်အတွက် ရွေးကောက်ပွဲ မဝင်ပါက ဖျက်သိမ်းခံရမည်ဖြစ်ကြောင်း၊ ရွေးကောက်ပွဲရှိပါက ဝင်ပြိုင်ရမည့် အနေအထားတွင် ရှိနေကြောင်း MUP မှ ပြောရေးဆိုခွင့်ရှိသူ နိုင်သန်းရွှေက CNI သို့ ပြောသည်။

နိုင်သန်းရွှေက “အဓိကက ကျနော်တို့က အရင်က ပြောသွားသလိုပေါ့။ ကျနော်တို့က ဒီပြည်တွင်းမှာ ရှိတဲ့ တရားဝင် နိုင်ငံရေး ပါတီ မှတ်ပုံတင် ထားတယ်ဆိုတော့ ကျနော်တို့ ရွေးကောက်ပွဲ မဝင်လို့ရှိရင် ကျနော်တို့ ပါတီ ဖျက်သိမ်းခံရမယ်လေ။ အဲဒါကို ကျနော်တို့ပါတီ ရပ်တည်ဖို့ အတွက်ကတော့ ဒီရွေးကောက်ပွဲ ရှိရင်တော့ ဘယ်သူပဲ ကျင်းပ ကျင်းပပေါ့နော်၊ ရွေးကောက်ပွဲ ရှိရင်တော့ ကျနော်တို့က ဝင်ရမယ့် အနေအထားတော့ ရှိတယ်ပေါ့” ဟု ပြောသည်။

လက်ရှိ မြန်မာနိုင်ငံတွင် တရားဝင် ရပ်တည်ပိုင်ခွင့် ရရှိသည့် နိုင်ငံရေးပါတီ (၉၂) ပါတီရှိကြောင်း ပြည်ထောင်စု ရွေးကောက်ပွဲ ကော်မရှင်၏ ထုတ်ပြန်ချက်အရ သိရသည်။

CNI News

၂၀၂၂ ခုနှစ်၊ ဇူလိုင် ၂၈

ပွင့်လင်းမျှတသော တရားစီရင်မှု အခွင့်အရေးကိုမပေးပဲ တရားလက်လွတ် သေဒဏ်များ ချမှတ်နေခြင်းသည် နိုင်ငံတကာ မိသားစု အပါအဝင် ပြည်သူတစ်ရပ်လုံးအား စိန်ခေါ်ခြင်းဖြစ်သည်ဟု ပအိုဝ်းအမျိုးသားဖက်ဒရယ်ကောင်စီ(PNFC)က ဇူလိုင် ၂၇ ရက်နေ့စွဲဖြင့် ထုတ်ပြန် ကြေညာခဲ့သည်။

ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်၊ ကိုအောင်သူရဇော်တို့ကို သေဒဏ်ကျခံထားရမှုကို ဆောင်ရွက်ပြီးစီး ကြောင်း နစက-က ၂၀၂၂ ခုနှစ်၊ ဇူလိုင် ၂၅ ရက်တွင် နိုင်ငံပိုင်သတင်းစာကနေ ထုတ်ပြန် ကြေညာခဲ့သည်။

PNFC က “ဥပဒေနှင့်မညီပဲ အာဏာသိမ်းခဲ့သော စစ်ကောင်စီသည် တရားမဝင် အဖွဲ့အစည်းဖြစ်၍ ပြည်တွင်းနှင့် နိုင်ငံ တကာဥပဒေများအရ ကြိုးပေးကွပ်မျက် ပိုင်ခွင့်မရှိသောကြောင့် လူသတ်မှု(ရာဇဝတ်မှု)ကို ကျူးလွန်ခြင်းသာ ဖြစ်သည်။ ပွင့်လင်းမျှတသော တရားစီရင်မှု အခွင့်အရေးကိုမပေးပဲ တရားလက်လွတ် သေဒဏ်များ ချမှတ်နေခြင်း၊ ကွပ် မျက်နေခြင်း၊ သေဒဏ်ချမှတ်ခံထားရသူများအား ထပ်မံ၍ ကွပ်မျက်ရန် ပြင်ဆင်နေခြင်းတို့သည် နိုင်ငံတကာ မိသားစု အပါအဝင် ပြည်သူ တစ်ရပ်လုံးအား စိန်ခေါ်ခြင်းလည်း ဖြစ်သည်”ဟု ထုတ်ပြန်ချက်တွင် ပြောထားသည်။

ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်၊ ကိုအောင်သူရဇော်တို့ကို ပုဂ္ဂိုလ်ရေးအရ သေဒဏ် စီရင်ခြင်းမဟုတ်ဘဲ ၎င်းတို့၏ လူသတ်ခြင်း၊ အစိုးရ အဆောက်အဦးများ ပေါက်ကွဲခြင်း၊ ခြိမ်းခြောက်ခြင်းများ ကျူးလွန်ခဲ့ခြင်းကြောင့် ဖြစ်သည် ဟု နစက၏ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ၂၀၂၂ ခုနှစ်၊ ဇူလိုင် ၂၆ ရက်က ကျင်းပခဲ့သည့် ၁၈ ကြိမ် မြောက် သတင်းစာ ရှင်းလင်းပွဲမှာ ပြောသွားသည်။

ဗိုလ်ချုပ်ဇော်မင်းထွန်းက “ ပြည်သူအများအပြား တရားမျှတမှု ရှိစေရေးနဲ့ ပြည်သူနဲ့နိုင်ငံကြားမှာ တရားမျှတမှု ရှိစေရေး အတွက် အပြစ်မဲ့ ပြည်သူတွေကို အကြမ်းဖက် ရက်စက်စွာ သတ်ဖြတ်ခဲ့တဲ့သူများကို နစ်နာသူများ ကိုယ်စား တရားရုံး အဆင့်ဆင့်က လုပ်ထုံးလုပ်နည်း ဥပဒေပြဋ္ဌာန်းချက်များနဲ့အညီ ဒီတရားခံတွေကို ခုခံချေပခွင့် ကျနော်တို့ ပေးခဲ့ပါတယ်။ ပြီးရင် သက်သေ အထောက်အထား အပြည့်အစုံအပေါ် အခြေပြု ဆုံးဖြတ်ခဲ့ခြင်းလည်း ဖြစ်ပါတယ်။ ပြည်တွင်းဥပဒေများ နဲ့ အညီ စစ်ဆေး စီရင်ပြီး ပြစ်ဒဏ်ချမှတ်ခဲ့တဲ့ ကိစ္စနဲ့ပတ်သက်ပြီး ဝေဖန်မှုတွေ ကန့်ကွက်မှုတွေ ဖြစ်ပေါ်လာနိုင်တယ်ဆိုတာ ကျနော်တို့ သိပါတယ်။ သို့သော် ပြည်တွင်း တည်ငြိမ် အေးချမ်းရေး တရားဥပဒေစိုးမိုးရေး လုံခြုံရေးအရ မဖြစ်မနေ ကျနော် တို့ ဆောင်ရွက်ခဲ့ရခြင်း ဖြစ်ပါတယ်။ ထပ်ပြီး ပြောချင်တာက သူတို့စွပ်စွဲနေသလို ပုဂ္ဂိုလ်ရေးအရ ဆောင်ရွက်ခဲ့တာမဟုတ် ပါဘူး။ ပုဂ္ဂိုလ်ရေးအရ ဆောင်ရွက်ခဲ့တာမဟုတ်ပါဘူး။ ဒါတရားဥပဒေနဲ့အညီပဲ ဆောင်ရွက်ခဲ့ခြင်း ဖြစ်ပါတယ်”ဟု ပြော သည်။

ထို့နောက် နစက-က ပြည်သူကို ရန်သူသတ်မှတ်၍ မှားပြီးသား အမှားများကို နောက်ထပ် အမှားများ ကျူးလွန်ပြီး ဖုံးကွယ်ရန် ကြိုးစားနေခြင်းဖြင့် နွေဦးတော်လှန်ရေး အရှိန်အဟုန်သည် ရပ်တန့်သွားမည် မဟုတ်ဘဲ ပြည်သူလူထု၏ နားကျည်းမုန်းတီးမှု၊ ရွံရှာမှုများနှင့်အတူ တိုင်းရင်းသား လူမျိုးပေါင်းစုံ ပါဝင်ဆင်နွှဲနေသော ပြည်သူ့တော်လှန်ရေး၏ အရှိန် အဟုန်သည် အင်နှင့်အားနှင့် ပိုမိုမြင့်မားလာမည်သာ ဖြစ်ကြောင်း PNFC က ထုတ်ပြန်ခဲ့သည်။

အလားတူ နစက ပြောကြားနေသော ငြိမ်းချမ်းရေးနှင့် နိုင်ငံရေး ဆွေးနွေးရေးဆိုသည်မှာ တိုက်မလား၊ လိုက်မလားဟု စိန်ခေါ်ခြင်းသာဖြစ်ပြီး တွေ့ဆုံ ဆွေးနွေးဖြေရှင်းရေး လမ်းကြောင်းကို နစက-က အဆုံးစွန် ဖျက်ဆီးပစ်လိုက်ခြင်းလည်း ဖြစ်သည်ဟု အဆိုပါ ထုတ်ပြန်ချက်တွင် ဖော်ပြထားသည်။

နစက-က ဒုတိယအကြိမ် ငြိမ်းချမ်းရေး ဖိတ်ခေါ်ထားချက်ကို ယခုအကောင်အထည်ဖော် ဆောင်ရွက်နေပြီး ဖြစ်ကြောင်း ၂၀၂၂ ခုနှစ်၊ ဇူလိုင် ၂၆ ရက်က ပြုလုပ်ခဲ့သည် ၁၈ ကြိမ်မြောက် သတင်းစာ ရှင်းလင်းပွဲမှာ ဗိုလ်ချုပ်ဇော်မင်းထွန်းက ပြော သွားသည်။

CNI News

၂၀၂၂ ခုနှစ်၊ ဇူလိုင် ၂၈

ရန်ကုန်တိုင်းဒေသကြီးအတွင်း ညမထွက်ရအမိန့် ထပ်မံ ထုတ်ပြန်ထားခြင်းမရှိကြောင်း နစက သတင်းထုတ်ပြန်ရေး အဖွဲ့က ပြောသည်။

ရန်ကုန်တိုင်းဒေသကြီးအတွင်းမှာ ည ၈ နာရီနောက်ပိုင်း ညမထွက်ရ၊ ထွက်ပါက ပစ်ခတ်ခံရမည်ဖြစ်ကြောင်း သတင်းများ ထွက်ပေါ်ခဲ့သည်။

အဆိုပါ သတင်းထွက်ပေါ်မှုနှင့်ပတ်သက်ပြီး ညမထွက်ရအမိန့် ထပ်မံ ကြေညာခြင်း မရှိကြောင်း နစက သတင်းထုတ်ပြန် ရေးအဖွဲ့က ပြောသည်။

ရန်ကုန်တိုင်းဒေသကြီး၊ ဗဟန်းမြို့နယ်နှင့် လမ်းမတော်မြို့နယ်များကိုတော့ ည ၁၂ နာရီမှ မနက် ၄ နာရီအတွင်း ညမထွက်ရအမိန့်ကို ပြီးခဲ့သည့် ရက်ပိုင်းက ထုတ်ပြန် ကြေညာထားသည်။

CNI News

၂၀၂၂ ခုနှစ်၊ ဇူလိုင် ၂၈

နစက၏ ဒုတိယအကြိမ် စတင်မည့် ငြိမ်းချမ်းရေးဆွေးနွေးပွဲသို့ မိမိတို့ အနေဖြင့် တက်ရေး/မတက်ရေးကို ဆုံးဖြတ်ထားခြင်း မရှိသေးဘူးဟု KIA နှင့် NDAA မှ CNI သို့ပြောသည်။

ကချင်လွတ်လပ်ရေး တပ်မတော် (KIA) ၏ ဗဟိုကော်မတီတွင် ဆုံးဖြတ်ချက် မရှိသေးကြောင်း၊ မေလ ၅ ရက် ထုတ်ပြန်ချက် အတိုင်း သဘောထားရှိကြောင်း KIA ပြောရေးဆိုခွင့်ရှိသူ ဗိုလ်မှူးကြီးနော်ဘူက ပြောသည်။

၎င်းက “ဟုတ်ကဲ့ လောလောဆယ်ကတော့ ကျနော်တို့ ဗဟိုကော်မတီက ဘာမှ ဆုံးဖြတ်ချက်မရှိဘူး။ မေလ ၅ ရက်နေ့မှာ ထုတ်ပြန် ကြေညာထားတဲ့ ကျ‌နော်တို့ အဲဒီ ထုတ်ပြန်ကြေညာချက် အတိုင်းပဲ ဖြစ်မှာပါ။ ဘာမှ အပြောင်းအလဲ မရှိသေးဘူး” ဟု ပြောသည်။

နစက၏ ငြိမ်းချမ်းရေးဆွေးနွေးရန် ကမ်းလှမ်းချက်သည် နိုင်ငံရေးပြဿနာများကို ဆွေးနွေးရန်နှင့် ပါဝင်သင့် ပါဝင်ထိုက်သူ များအား ထည့်သွင်း မထားသောကြောင့် KIO အနေနှင့် တက်ရောက်မှာ မဟုတ်ကြောင်း မေလ ၅ ရက်က ထုတ်ပြန်ခဲ့သည်။

နစက အနေဖြင့် အမျိုးသားညီညွတ်ရေးအစိုးရ (NUG)၊ ပြည်သူ့ကာကွယ်ရေးတပ် (PDF) တို့ကို အကြမ်းဖက် အဖွဲ့အစည်းဖြင့် ကြေညာထားသည်။

အမျိုးသားဒီမိုကရက်တစ် မဟာမိတ်တပ်မတော်(NDAA- မိုင်းလား)မှ ဒုတိယအကြိမ် ငြိမ်းချမ်းရေး ဆွေးနွေးပွဲကိစ္စကို ဆွေးနွေးထားခြင်း မရှိသေးကြောင်း NDAA မှ အထွေထွေအတွင်းရေးမှူး ဦးကြည်မြင့်က CNI သတင်းဌာနသို့ ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ UWSA ဒုဥက္ကဋ္ဌ   တွေ့ဆုံစဉ်

ဦးကြည်မြင့်က “ကျနော်တို့ မဆွေးနွေးရသေးဘူး။ အခုထက်ထိကတော့။ အခု ထပ်ထွက်လာတာကို မဆွေးနွေးရသေးဘူး။ အဲဒါ ကျနော်တို့ ဒီတစ်လောက ကိုဗစ်ရောဂါနဲ့ ကာကွယ်တဲ့ လုပ်ငန်းတွေ အလုပ်တစ်ခြား၊ လုပ်တာတခြား ဆက်သွယ်ထား တာ မရှိသေးဘူး” ဟု ပြောသည်။

ပထမအကြိမ် နစက ဖိတ်ခေါ်သည့် ငြိမ်းချမ်းရေးဆွေးနွေးပွဲကို NDAA၊ သျှမ်းပြည်ပြန်လည်ထူထောင်ရေး ကောင်စီ (RCSS/SSA)၊ မွန်ပြည်သစ်ပါတီ (NMSP)၊ ‘ဝ’ ပြည် သွေးစည်းညီညွတ်ရေး တပ်မတော် (UWSA)၊ ဒီမိုကရေစီ အကျိုးပြု ကရင်တပ်မတော် (DKBA)၊ ရခိုင်ပြည် လွတ်မြောက်ရေးပါတီ (ALP)၊ ကရင်အမျိုးသားအစည်းအရုံး/ ကရင်အမျိုးသား လွတ်မြောက်ရေး တပ်မတော်/ငြိမ်းချမ်းရေးကောင်စီ (KNU/KNLA-PC)၊ ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO)နှင့် လားဟူဒီမိုကရက်တစ်အစည်းအရုံး(LDU) တို့ တက်ရောက် ဆွေးနွေးထားသည်။

ထို့အတူ KIA၊ ရှမ်းပြည်တိုးတက်ရေးပါတီ (SSPP/SSA)၊ ကရင်အမျိုးသားအစည်းအရုံး (KNU)၊ ချင်းအမျိုးသားတပ်ဦး (CNF)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး(ABSDF)၊ ကရင်နီအမျိုးသားတိုး တက်ရေးပါတီ (KNPP)၊ ညီနောင်မဟာမိတ်ဖြစ်ကြတဲ့ မြန်မာအမျိုးသား ဒီမိုကရက်တစ် မဟာမိတ်တပ်မတော် – ကိုးကန့်တပ်ဖွဲ့ (MNDAA)၊ ပလောင်ပြည် လွတ်မြောက်ရေးတပ်ဦး (PSLF/TNLA)နှင့် ရက္ခိုင့်တပ်တော် (AA)တို့ တက်ရောက်ခြင်းမရှိပေ။

၂၀၂၂ ခုနှစ်၊ ဇူလိုင် ၂၆ ရက်က ပြုလုပ်သည့် နစက၏ ၁၈ ကြိမ်မြောက် သတင်းစာ ရှင်းလင်းပွဲတွင် ဒုတိယအကြိမ် ငြိမ်းချမ်း ရေး ဆွေးနွေးပွဲများအတွက် ပြင်ဆင်ဆောင်ရွက်နေပြီဖြစ်ကြောင်း ဗိုလ်ချုပ်ဇော်မင်းထွန်းက ပြောသွားခဲ့သည်။

သို့သော် ယနေ့အချိန်ထိ မည်သည့် အဖွဲ့အစည်းများ တက်ရောက်ရန် ရှိကြောင်းကိုတော့ ထုတ်ဖော် ပြောကြား သွားခြင်း မရှိပေ။

CNI News

၂၀၂၂ ခုနှစ်၊ ဇူလိုင် ၂၇

ဖက်ဒရယ်ဒီမိုကရေစီ အင်အားစုများ၏ ထုတ်ပြန်ချက်ကို ကြည့်ပါက ငြိမ်းချမ်းရေးလုပ်ငန်းစဉ်ကို ဦးစားမပေးတော့ဘူးဆို သည့် သဘောဖြစ်ကြောင်း တိုင်းရင်းသား ခေါင်းဆောင်တစ်ဦးဖြစ်သူ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

ဖက်ဒရယ်ဒီမိုကရေစီ အင်အားစုများမှ ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်နှင့် ကိုအောင်သူရဇော်တို့ကို ပြစ်ဒဏ် စီရင်မှုသည် ပြဋ္ဌာန်းထားသော ဥပဒေများ၊ လုပ်ထုံးလုပ်နည်းနှင့် ညီညွတ်မှု မရှိကြောင်း၊ ထို့အတွက်ကြောင့် နစက၏ သဘော ထား အမှန်ကို နားလည် သဘောပေါက်သင့်ကြောင်း ဇူလိုင် ၂၆ ရက် ထုတ်ပြန်ချက်တွင် ဖော်ပြထားသည်။

ဗိုလ်မှူးကြီး ခွန်ဥက္ကာက “ဒီ NCA လက်မှတ်ထိုးထားတဲ့ အဖွဲ့တွေက အဲဒီထဲမှာ ပါနေတဲ့ အခါကြတော့ ဒီအဖွဲ့တွေက ငြိမ်းချမ်းရေး လုပ်ငန်းစဉ်မှာတော့ အဓိက ဦးစားမပေးတော့ဘူး ဆိုတာတော့ ပြတာပေါ့။ တခြားသော နည်းလမ်းတွေ ဥပမာ သူတို့ နိုင်ငံရေးပြဿနာကို နိုင်ငံရေးနည်းနဲ့ ရှင်းဖို့ဆိုတဲ့ နည်းလမ်းတွေကို မစဉ်းစားတော့ဘူးဆိုတဲ့ သဘောမျိုး ဖြစ်သွားတာ ပေါ့” ဟု CNI သတင်းဌာနသို့ ပြောသည်။

 ဖက်ဒရယ်ဒီမိုကရေစီအင်အားစုများ၏ ထုတ်ပြန်ချက်

နိုင်ငံရေးပါတီများ၊ တော်လှန်ရေး အင်အားစုများနှင့် ပြည်တွင်း/ပြည်ပရှိ ပြည်ထောင်စုဖွားအားလုံး နစကကို မိမိတို့နှင့် ပူးပေါင်းပြီး တော်လှန်ကြရန် ဖက်ဒရယ်ဒီမိုကရေစီ အင်အားစုများမှ ‌တောင်းဆိုခဲ့သည်။

အဆိုပါ ဖက်ဒယ်ဒီမိုကရေစီအင်အားစုတွင် အမျိုးသားညီညွတ်ရေးအစိုးရ (NUG)၊ ပြည်ထောင်စုလွှတ်တော် ကိုယ်စားပြု ကော်မတီ (CRPH)၊ ကရင်အမျိုးသားအစည်းအရုံး (KNU)၊ ကရင်နီအမျိုးသား တိုးတက်ရေးပါတီ (KNPP)၊ ချင်းအမျိုးသား တပ်ဦး (CNF)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) နှင့် အမျိုးသားဒီမိုကရေစီအဖွဲ့ချုပ် (NLD) တို့ ပါဝင်သည်။

လက်ရှိ အခြေအနေကို ကြည့်မည်ဆိုပါက တိုင်းပြည်၏ အခြေအနေမှာ ၇၀ ရာခိုင်နှုန်း ပျက်စီးသွားနိုင်ကြောင်း၊ တိုင်းပြည်ကို မြတ်နိုးသူ မည်သူမဆို ပြန်ပြီး ကယ်တင်ရန် လိုအပ်ကြောင်း ဗိုလ်မှူးကြီး ခွန်ဥက္ကာက ပြောသည်။

၎င်းက “အလုံးစုံ မရပ်ရင်တောင်မှ ရာခိုင်နှုန်း တော်တော်များများက ပျက်သုန်းရေးကို သွားနိုင်တာပေါ့။ 100 % မဟုတ်တာတောင်မှ ကျ‌နော်တို့ ၇၀ ရာခိုင်နှုန်းလောက်အထိ ပျက်သွားနိုင်တာပေါ့၊ သို့သော်လည်းပဲ တချိန်ချိန်မှာတော့ တိုင်းပြည်ကို မြတ်နိုးတဲ့ စိတ်ရှိကြရင်ပေါ့၊ ဘယ်သူမဆို ပြန်ပြီးတော့ ကယ်တင်ဖို့ ပြည်ထောင်စု ပြန်လည်ဖော်ထုတ်ဖို့ စဉ်းစား ပြီးတော့ လုပ်ရမယ်လို့တော့ မြင်တာပေါ့ဗျာ။ အခုလို အားပြိုင်နေတဲ့ အချိန်မှာတော့ ပြိုင်ကြမှာပဲ ဒါသူ့သဘောတရား က တော့ ဒါပေမဲ့ သိပ်ပျက်စီးဆုံးရှုံးတဲ့ ရာခိုင်နှုန်း များလာရင်တော့ Second thought ပေါ့ဗျာ။ တခြားအတွေးတွေ ဝင်လာနိုင် တာပေါ့။ ကျနော်တို့တော့ အဲဒီလို ထင်ပါတယ်” ဟု ပြောသည်။

 ၂၀၁၅ ခုနှစ်က NCA စာချုပ် လက်မှတ်ထိုးကြစဉ်

ဖက်ဒယ်ဒီမိုကရေစီအင်အားစုများ အနေဖြင့် ပြည်သူလူထု၏ ပူးပေါင်းပါဝင်မှုဖြင့် နိုင်ငံရေး၊ စစ်ရေး၊ သံတမန်ရေး၊ အုပ်ချုပ် ရေး စစ်မျက်နှာစုံတွင် ဖြစ်နိုင်သည့် နည်းလမ်းအားလုံးကို အသုံးပြုကာ စစ်အာဏာရှင်စနစ် အမြစ်ဖြတ်ရေး ဆန့်ကျင် တွန်းလှန် တိုက်ပွဲဝင်သွားမည်ဖြစ်ကြောင်း ထုတ်ပြန်ခဲ့သည်။

ဇူလိုင် ၂၆ ရက်က ၁၈ ကြိမ်မြောက် နစက၏ သတင်းစာ ရှင်းလင်းပွဲတွင် ငြိမ်းချမ်းရေး လုပ်ငန်းစဉ်များကို ဆက်လက် ဖော်ဆောင်နေကြောင်း၊ ဒုတိယအကြိမ် တွေ့ဆုံ ဆွေးနွေးမှုများ ဖြစ်ပေါ်လာရေး ဆောင်ရွက်နေကြောင်း ဗိုလ်ချုပ်ဇော် မင်းထွန်းက ပြောသွားခဲ့သည်။

နိုင်ငံရေး၊ စစ်ရေး၊ သံတမန်ရေး၊ အုပ်ချုပ်ရေး စစ်မျက်နှာစုံ ဖွင့်၍ နစကကို တိုက်ခိုက်ရန် တောင်းဆိုသည့် ဖက်ဒရယ် ဒီမိုကရေစီ အင်အားစုများ၏ ထုတ်ပြန်ချက်တွင် ပါဝင်နေသည့် KNU၊ ABSDF၊ CNF တို့သည် တစ်နိုင်ငံလုံး ပစ်ခတ်တိုက်ခိုက် မှု ရပ်စဲရေးသဘောတူစာချုပ် (NCA)ထိုးထားသော လက်နက် ကိုင်အဖွဲ့များ ဖြစ်သည်။

CNI News

၂၀၂၂ ခုနှစ်၊ ဇူလိုင် ၂၆

ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်၊ ကိုအောင်သူရဇော်တို့ကို ပုဂ္ဂိုလ်ရေးအရ သေဒဏ်စီရင်ခြင်းမဟုတ်ဘဲ ၎င်းတို့ သတ်ဖြတ်ခြင်းနှင့် ဖောက်ကွဲမှုလုပ်ရပ်များအပေါ် စီရင်ဆုံးဖြတ်ခြင်း ဖြစ်ကြောင်း နစက သတင်းထုတ်ပြန်ရေး အဖွဲ့ ခေါင်းဆောင် ဗိုလ်ချုပ်ဇော်မင်းထွန်းက ပြောသည်။

ယနေ့ (ဇူလိုင် ၂၆ ရက်) နေ့လယ် ၁ နာရီက နေပြည်တော်မှာ ကျင်းပသည့် နစက၏ (၁၈)ကြိမ်မြောက် သတင်းစာ ရှင်းလင်းပွဲမှာ ဗိုလ်ချုပ်ဇော်မင်းထွန်းက ပြောသွားခဲ့ခြင်း ဖြစ်သည်။

ကိုဂျင်မီနဲ့ ကိုဖြိုးဇေယျာသော်

ဗိုလ်ချုပ်ဇော်မင်းထွန်းက “ ပြည်သူအများအပြား တရားမျှတမှု ရှိစေရေးနဲ့ ပြည်သူနဲ့နိုင်ငံကြားမှာ တရားမျှတမှု ရှိစေရေး အတွက် အပြစ်မဲ့ ပြည်သူတွေကို အကြမ်းဖက် ရက်စက်စွာ သတ်ဖြတ်ခဲ့တဲ့သူများကို နစ်နာသူများ ကိုယ်စား တရားရုံး အဆင့်ဆင့်က လုပ်ထုံးလုပ်နည်း ဥပဒေပြဋ္ဌာန်းချက်များနဲ့အညီ ဒီတရားခံတွေကို ခုခံချေပခွင့် ကျနော်တို့ ပေးခဲ့ပါတယ်။ ပြီးရင် သက်သေ အထောက်အထား အပြည့်အစုံအပေါ် အခြေပြု ဆုံးဖြတ်ခဲ့ခြင်းလည်း ဖြစ်ပါတယ်။ ပြည်တွင်းဥပဒေများ နဲ့ အညီ စစ်ဆေး စီရင်ပြီး ပြစ်ဒဏ်ချမှတ်ခဲ့တဲ့ ကိစ္စနဲ့ပတ်သက်ပြီး ဝေဖန်မှုတွေ ကန့်ကွက်မှုတွေ ဖြစ်ပေါ်လာနိုင်တယ်ဆိုတာ ကျနော်တို့ သိပါတယ်။ သို့သော် ပြည်တွင်း တည်ငြိမ် အေးချမ်းရေး တရားဥပဒေစိုးမိုးရေး လုံခြုံရေးအရ မဖြစ်မနေ ကျနော် တို့ ဆောင်ရွက်ခဲ့ရခြင်း ဖြစ်ပါတယ်။ ထပ်ပြီး ပြောချင်တာက သူတို့စွပ်စွဲနေသလို ပုဂ္ဂိုလ်ရေးအရ ဆောင်ရွက်ခဲ့တာမဟုတ် ပါဘူး။ ပုဂ္ဂိုလ်ရေးအရ ဆောင်ရွက်ခဲ့တာမဟုတ်ပါဘူး။ ဒါတရားဥပဒေနဲ့အညီပဲ ဆောင်ရွက်ခဲ့ခြင်း ဖြစ်ပါတယ်”ဟု ပြော သည်။

ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်၊ ကိုအောင်သူရဇော်တို့သည် ၂၀၂၁ ခုနှစ်၊ အောက်တိုဘာလနှင့် နိုဝင်ဘာလ များအတွင်းက ဖမ်းဆီးခံခဲ့ရခြင်း ဖြစ်သည်။

 အကျဉ်းထောင်လက်စွဲ အပိုဒ် ၆၆၀

၎င်းတို့သည် အုပ်ချုပ်ရေးမှူး၊ ဆရာ/ဆရာမများ၊ အရပ်သားများ၊ အစိုးရ အဆောက်အဦများ၊ လုံခြုံရေးတပ်ဖွဲ့ဝင်များ စသည်တို့ကို တိုက်ခိုက် သတ်ဖြတ်ခဲ့ခြင်းကြောင့် နစက-က အကြမ်းဖက်မှု တိုက်ဖျက်ရေးဥပဒေ ပုဒ်မ ၄၉(က)၊ ၅၀(ဈ)နှင့် ၅၀ (ည)တို့ဖြင့် ၂၀၂၂ ခုနှစ်၊ ဇန်နဝါရီ ၂၁ ရက်တွင် သေဒဏ် အမိန့်ချမှတ်ခဲ့သည်။

ထို့နောက် နစက-က အင်းစိန်အကျဉ်းထောင်မှာ ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်၊ ကိုအောင်သူရဇော်တို့ကို သေဒဏ်ပြစ်ဒဏ် ဆောင်ရွက်ပြီးစီးကြောင်း ၂၀၂၂ ခုနှစ်၊ ဇူလိုင် ၂၅ ရက်တွင် ထုတ်ပြန် ကြေညာခဲ့သည်။

အဆိုပါ ဆုံးဖြတ်ချက်နှင့်ပတ်သက်ပြီး ပြည်တွင်း/ပြည်ပ အဖွဲ့အစည်းများက ကန့်ကွက် ရှုတ်ချကြောင်း ထုတ်ပြန်ခဲ့သည်။

အလားတူ မိသားစုဝင်များက ရုပ်အလောင်း ပြန်လည်ထုတ်ပေးရန် တောင်းဆိုခဲ့သော်လည်း ဆူပူဆန္ဒပြမှုများ ဖြစ်ပွားမည် စိုးရိမ်သည့်အတွက် ထုတ်ပေးရန် မဖြစ်နိုင်ကြောင်း ပြန်လည် ပြောကြားခဲ့သည်။

အကျဉ်းထောင်လက်စွဲ အပိုဒ် ၆၆၀

အကျဉ်းထောင်လက်စွဲ ဥပဒေတွင် အပိုဒ် ၆၆၀ တွင် ခန္ဓာကိုယ်အား နာရီဝက်တွဲလောင်း ရှိနေစေပြီးနောက် ဆရာဝန်ဖြင့် စစ်ဆေးကြည့်ရှု စေရမည်၊ ဆရာဝန်မှ အသက်မရှိတော့ကြောင်းကို ကြေညာသည်အထိ ခန္ဓာကိုယ်အား ဖြုတ်ယူခြင်းမပြုရ၊ သေဒဏ်ကြိုး ပေးခံရသော ရာဇဝတ်သား၏ ခန္ဓာကိုယ်အား ၎င်း၏ ဆွေမျိုးသားချင်းများ (သို့) မိတ်ဆွေများမှ တောင်းဆို ခြင်း မပြုမှသာ မြှုပ်နှံပစ်ရမည်၊ ခန္ဓာကိုယ်အား ဆွေမျိုးများ(သို့)မိတ်ဆွေများမှ တောင်းဆိုလာလျှင် ငြင်းဆိုရန် အထူး အကြောင်း ကိစ္စမရှိ လျှင် (အပိုဒ် ၁၀၁၉ ကြည့်ရန်) တံခါးကြီး၏ ပြင်ပသို့ သယ်ဆောင်သွားပြီးနောက် ထိုနေရာ ၎င်းတို့အား ပေးအပ်လိုက်ရ မည်ဟု ပြဋ္ဌာန်းထားသည်။

အကျဉ်းထောင်လက်စွဲ ဥပဒေ အပိုဒ် ၁၀၁၉ ၌ အကျဉ်းထောင်တွင် သေဆုံးသွားသော (သို့) သေဒဏ် အပေးခံရသော အကျဉ်းသား၏ ရုပ်ကလာပ်ကို ထိုအကျဉ်းသား၏ မိတ်ဆွေများမှ တောင်းဆိုလာလျှင် ပေးအပ်နိုင်သည်။ အထူး ဆန့်ကျင်ဘက်အကြောင်း တစ်စုံတစ်ရာ နှင့် အကျိုးယုတ်နိုင်သော အကြောင်းများ ရှိလျှင် မပေးအပ်ရ (ဥပမာ- အကျဉ်းသားသည် ကူးစက်ရောဂါကြောင့် သေဆုံး ခြင်း (သို့) အကျဉ်းထောင်တွင်း သေဒဏ်ပေး၍ သေဆုံးသော အကျဉ်းသားဖြစ်လျှင်၊ ၎င်း၏ ရုပ်အလောင်းကို သင်္ဂြိုလ် သည့်အခါ ဆန္ဒပြမှုများ ဖြစ်ပေါ်လာနိုင်သည်ဟု မှတ်ယူနိုင်ရန် အကြောင်းရှိသည်ဟု ထင်မြင်လျှင် မပေးအပ်ရ)ဟု ပြဋ္ဌာန်း ထားသည်။

CNI News

၂၀၂၂ ခုနှစ်၊ ဇူလိုင် ၂၆

ကိုဂျင်မီ၊ ကိုဖြိုးဇေယျာသော် အပါအဝင် လူလေးဦးကို သေဒဏ်စီရင်မှုကြောင့် နိုင်ငံ‌ရေးဆွေးနွေးပွဲများကို ထိခိုက်စေကြောင်း ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST) မှ ပြောရေးဆိုခွင့်ရှိသူ ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။

ဒီမိုကရေစီနှင့် ဖက်ဒရယ်ပြည်ထောင်စုကို သွားမည်ဆိုပါက ပြည်သူလူထု၏ လိုလားချက်ကို အလေးထားရမှာ ဖြစ်ကြောင်း ၎င်းက ပြောသည်။

ကိုဂျင်မီနဲ့ ကိုဖြိုးဇေယျာသော် တို့ကိုတွေ့ရစဉ်

ဗိုလ်မှူးကြီးစောကျော်ညွန့်က “ဒီမိုကရေစီနဲ့ ဖက်ဒရယ်ပြည်ထောင်စု သွားမယ်ဆိုရင် ဒီမိုကရေစီ အစုအဖွဲ့တွေ အားလုံး ဒီမိုကရေစီ အစုအဖွဲ့လို့ ပြောလိုက်မယ်ဆိုရင် ဒီမိုကရေစီလို့ ပြောလိုက်ရင် ကျနော်တို့က ပြည်သူလူထုကို အရင်ဆုံး သတိရဖို့ ပြည်သူလူထုမှာ ဖြစ်ပေါ်နေတဲ့ ခံစားမှုတွေ ပြည်သူလူထုရဲ့ လိုလားချက်တွေကို ကျနော်တို့ အလေးထားရမှာ ဖြစ်ပြီးတော့ ဖက်ဒရယ်လို့ ပြောလိုက်မယ်ဆိုရင်လည်း တိုင်းရင်းသားများအားလုံး လိုလားတောင်းတနေတဲ့ ကိုယ်ပိုင်ပြဋ္ဌာန်းခွင့် စသဖြင့် ပေါ့လေ၊ ဒါတွေလည်း ကျနော်တို့ အလေးထားရမှာ ဖြစ်တဲ့အတွက်ကြောင့်မို့လို့ ခုနက ပြောတဲ့ အချက်ထဲမှာဆိုရင် လက်ရှိ ကတော့ ဒီလိုမျိုး ဖြစ်ပျက်နေတဲ့ ကိစ္စရပ် တစ်ခုကတော့ ချုပ်ပြီးတော့ ပြောလိုက်မယ်ဆိုရင် ကျ‌နော်တို့ ပြောနေတဲ့ အားလုံး ပါဝင်တဲ့ နိုင်ငံရေး တွေ့ဆုံဆွေးနွေးပွဲဖြစ်ဖို့ လက်ရှိ နိုင်ငံရေးအကျပ်အတည်းကို ကျော်လွှားနိုင်မယ့် နည်းလမ်းကို အဖြေရှာတဲ့ နိုင်ငံရေးဆွေးနွေးပွဲ အတွက်ကတော့ တစ်စုံတစ်ရာ အတိုင်းအတာ တစ်ခုအထိတော့ ကြန့်ကြာမှုတွေ ထိခိုက်မှုတွေ အဲဒီလိုမျိုး ရှိမယ်ဆိုတာကတော့ ကျနော်တို့ အဲဒီလိုပဲ သုံးသပ်မိပါတယ်ခင်ဗျ” ဟု ပြောသည်။

ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်၊ ကိုအောင်သူရဇော်တို့ လေးဦးကို ဥပဒေလုပ်ထုံး လုပ်နည်းများနှင့်အညီ ပြစ်ဒဏ်စီရင် ဆောင်ရွက်ပြီးစီးကြောင်း ဇူလိုင် ၂၅ ရက်တွင် နစက၏ ပြန်ကြားရေးဝန်ကြီးဌာနပိုင် သတင်းစာများတွင် ဖော်ပြခဲ့သည်။

အဆိုပါ သေဒဏ်စီရင်မှုကို အရပ်ဖက် အဖွဲ့အစည်းများ၊ နိုင်ငံရေးပါတီအချို့၊ တိုင်းရင်းသား လက်နက်ကိုင် အဖွဲ့အစည်းအချို့၊ နိုင်ငံတကာအဖွဲ့အစည်းများမှ ရှုတ်ချခဲ့ကြသည်။

 RCSS ဗိုလ်ချုပ်ကြီး ယွက်စစ် နဲ့ ဗိုလ်ချုပ်မှူးကြီး မင်းအောင်လှိုင်တွေ့ဆုံစဉ်

ဗိုလ်မှူးကြီး စောကျော်ညွန့်က “ဒီလိုမျိုး နိုင်ငံရေးအခြေအနေက ပုံမှန်မရှိတဲ့ ကာလမှာ PPST အနေနဲ့ကတော့ တွေ့ဆုံညှိနှိုင်း အဖြေရှာတဲ့ နည်းကပဲ ဆက်လက် ဆောင်ရွက်သွားဖို့က အဲဒီကဏ္ဍမှာ ရပ်တည်ချက်ရှိတယ်၊ အဲဒီအပေါ်မှာ ခုနက ဆရာပြော တဲ့ သေဒဏ် ချမှတ်ခံထားရတဲ့ တခြားသူတွေလည်း ရှိသေးတယ်၊ အဲဒီလူတွေ အပေါ်မှာလည်းပဲ လက်ရှိကလည်း တစ်တိုင်း ပြည်လုံးကလည်း အသံတွေ အမျိုးမျိုး ထွက်နေတယ်ဆိုတာလည်း ကျ‌နော်တို့ ကြားသိရပြီး ဖြစ်တယ်။ ကျနော်တို့ အနေနဲ့ ကတော့ တစ်တိုင်းပြည်လုံးကို လွှမ်းခြုံတဲ့ ပြည်ထောင်စုငြိမ်းချမ်းရေးရရှိဖို့ ကြိုးပမ်းတည်ဆောက်တဲ့ အချိန်မှာ တစ်တိုင်း ပြည်လုံးမှာ ဖြစ်တည်နေတဲ့ ပြည်သူလူထုရဲ့ လိုလားချက် အစုအဖွဲ့ အသီးသီးတွေရဲ့ လိုလားချက် အပေါ်မှာ အခြေခံပြီးတော့ ကျ‌နော်တို့ အနေနဲ့ ဒီကိစ္စရပ်တွေကို တားဆီးနိုင်ဖို့အတွက် တွေ့ဆုံဆွေးနွေး၊ အပြန်အလှန် ညှိနှိုင်းခြင်းနဲ့ပဲ ကျနော်တို့ ဆက် လက် ဆောင်ရွက် သွားသင့်တယ်ဆိုတာ အမြင်ရှိပါတယ်” ဟု ပြောသည်။

လက်ရှိ PPST ကို တစ်နိုင်ငံလုံးပစ်ခတ်တိုက်ခိုက်မှု ရပ်စဲရေးသဘောတူစာချုပ်(NCA)ထိုးထားသည့် တိုင်းရင်းသား လက်နက် ကိုင် ၇ ဖွဲ့ဖြင့် ဖွဲ့စည်းထားသည်။

အဆိုပါ PPST အဖွဲ့အစည်းများနှင့် နစကကြား မေလ ၂၂ ရက်မှ ဇူလိုင် ၇ ရက်အတွင်း တွေ့ဆုံ ဆွေးနွေးထားကြသည်။

CNI News

၂၀၂၂ ခုနှစ်၊ ဇူလိုင် ၂၅

ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်၊ ကိုအောင်သူရဇော်တို့ လေးဦးကို နစက-က သေဒဏ်စီရင်ခြင်းသည် လူ့ဂုဏ်သိက္ခာကို လေးစားသမှု မရှိသလို တိုင်းပြည်၏ ဂုဏ်သိက္ခာကိုပါ အကြီးအကျယ် ညှိုးနွမ်းစေပါသည်ဟု စည်းလုံး ညီညွတ်သော တိုင်းရင်းသားလူမျိုးများမဟာမိတ် (UNA)က ယနေ့ (ဇူလိုင် ၂၅ ရက်) ထုတ်ပြန် ကြေညာခဲ့သည်။

အဆိုပါ ထုတ်ပြန်ချက်တွင် ယနေ့ (ဇူလိုင် ၂၅ ရက်)ထုတ် မြန်မာ့အလင်းနှင့်ကြေးမုံ သတင်းစာတွင် ကိုဂျင်မီ၊ ကိုဖြိုးဇေယျာ သော်၊ ကိုလှမျိုးအောင်၊ ကိုအောင်သူရဇော် တို့အား လုပ်ထုံးလုပ်နည်းများအတိုင်း ပြစ်ဒဏ်စီရင်ဆောင်ရွက်ပြီးဖြစ်ကြောင်း ဖော်ပြပါရှိကြောင်း၊ ကိုဂျင်မီ၊ ကိုဖြိုးဇေယျာသော်၊ ကိုလှမျိုးအောင်၊ ကိုအောင်သူရဇော် တို့အပေါ် သေဒဏ်ချမှတ်ခြင်းသည် ပင်လျှင် တရားနည်းလမ်းကျသည့် ကိစ္စရပ်မဟုတ်သည့်အပြင် ယခုကဲ့သို့ မတရား အမိန့်ချမှတ်ထားသည့် သေဒဏ်အား ပြစ်ဒဏ်စီရင် ဆောင်ရွက်ခြင်းသည်သာ၍ နည်းလမ်းလည်းမကျ တရားဥပဒေနှင့်လည်း ကိုက်ညီမှု မရှိပါကြောင်း ဖော်ပြ ထားသည်။

UNA ထုတ်ပြန်ချက်

UNA က “ ဒီမိုကရေစီတိုင်းပြည် တည်ဆောက်ရန် ရည်သန်နေသော နိုင်ငံတစ်ခုအနေဖြင့် ဤသို့သော ပြစ်ဒဏ် စီရင်ခြင်း သည် မဖြစ်သင့်သည့် ကိစ္စဖြစ်သကဲ့သို့ ယဉ်ကျေးသည့် လူ့အသိုင်းအဝိုင်းနှင့်လည်း လျော်ညီအပ်စပ်မှုမရှိပါ။ လူ့ဂုဏ် သိက္ခာကို လေးစားသမှု မရှိသလို တိုင်းပြည်၏ ဂုဏ်သိက္ခာကိုပါ အကြီးအကျယ် ညှိုးနွမ်းစေပါသည်။ နိုင်ငံ့အာဏာကို မတရားသိမ်းယူထားသည့် စစ်ကောင်စီ၏ တိုင်းသူပြည်သားတို့အပေါ် ပြစ်မှု ကျူးလွန်သော လူမဆန်သည့် လုပ်ရပ်အဖြစ် မှတ်ကျောက်တင်ထားရမည်ပင် ဖြစ်သည်”ဟု ပြောသည်။

ထို့နောက် ကိုဖြိုးဇေယျာသော်၊ ကိုဂျင်မီ၊ ကိုလှမျိုးအောင်၊ ကိုအောင်သူရဇော်တို့အား မတရားသေဒဏ်ချမှတ်ပြီး ပြစ်ဒဏ် စီရင်ခြင်းအပေါ် အပြင်းအထန် ကန့်ကွက်ရှုတ်ချကြောင်း UNA က ထုတ်ပြန်ခဲ့သည်။

ကိုဂျင်မီ၊ ကိုဖြိုးဇေယျာသော်တို့ကို အကြမ်းဖက်မှု တိုက်ဖျက်ရေး ဥပဒေပုဒ်မ ၄၉(က)၊ ၅၀(ဈ)နှင့် ၅၀(ည)တို့ဖြင့် ၂၀၂၂ ခုနှစ်၊ ဇန်နဝါရီ ၂၁ ရက်က သေဒဏ် အမိန့်ချမှတ်လိုက်ကြောင်း နစက-က ထုတ်ပြန်ခဲ့သည်။

ထို့နောက် ဇူလိုင် ၂၅ ရက်တွင် သေဒဏ်ကျခံနေသူ လေးဦးကို ဥပဒေလုပ်ထုံးလုပ်နည်းနှင့်အညီ ပြစ်ဒဏ် စီရင်ပြီးစီး ကြောင်း ထုတ်ပြန် ကြေညာသွားခဲ့သည်။