CNI International News

ဘန်ကောက်၊ ဧပြီ ၃

၂၀၂၅ ခုနှစ်၊ မတ်လ ၂၈ ရက်က မြန်မာနိုင်ငံတွင် လှုပ်ခတ်ခဲ့သော အင်အားပြင်း ငလျင်နှင့် နောက်ဆက်တွဲ ငလျင်များအကြောင်းကို ယခုသီတင်းပတ်အတွင်း ထိုင်းနိုင်ငံ၌ ပြုလုပ်မည့် BIMSTEC အစည်းအဝေးမှာ အဓိကထားပြီး ဆွေးနွေးဖွယ်ရှိကြောင်း Nikkei Asia မှ ဖော်ပြခဲ့သည်။

ကဏ္ဍစုံ နည်းပညာနှင့် စီးပွားရေး ပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) အဖွဲ့ဝင်နိုင်ငံများမှ ခေါင်းဆောင်များသည် ဘန်ကောက်မြို့တော်တွင် ဧပြီ ၃ ရက်နှင့် ၄ ရက်၌ တွေ့ဆုံပြီး အစည်းအဝေး ပြုလုပ်မည်ဖြစ်သည်။

ငလျင်ဘေးကို ခံခဲ့ရသည့် မြန်မာနိုင်ငံ၏ လတ်တလော အခြေအနေများကြောင့် မြန်မာခေါင်းဆောင် ဗိုလ်ချုပ်မှူးကြီးမင်းအောင်လှိုင်လည်း တက်ရောက်မည်ဖြစ်သည်။

ထိုအစည်းအဝေးတွင် ငလျင်ဒဏ်ကို ဆိုးရွားစွာခံခဲ့ရသည့် နေရာဒေသများထဲတွင် ပါဝင်သည့် မြန်မာနိုင်ငံ၏ စစ်ကိုင်းတိုင်းဒေသကြီးမှ အခြေအနေကို အာရုံစိုက်ဆွေးနွေးသွားမည်ဖြစ်သည်။

ငလျင်ခံဒေသများကို သွားစစ်နေတဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

စစ်ကိုင်းတိုင်းဒေသကြီးသည် အိန္ဒိယ၊ မြန်မာနှင့် ထိုင်းနိုင်ငံတို့ကို ဆက်သွယ်မည့် အဝေးပြေးလမ်းမတစ်ခုကို ဖောက်လုပ်ရေး စီမံကိန်းတွင် အရေးအကြီးဆုံး အစိတ်အပိုင်းတစ်ခု ဖြစ်နေခြင်းကြောင့် ဖြစ်သည်။

ထို့ပြင် မြန်မာနိုင်ငံတွင် ဖြစ်ပွားနေသည့် ပဋိပက္ခများနှင့် သဘာဝဘေးတို့ကြောင့် အိုးမဲ့အိမ်မဲ့ဖြစ်မှုနှင့် လူသားချင်း စာနာထောက်ထားမှုဆိုင်ရာ အခြေအနေများကိုလည်း ဆွေးနွေးသွားဖွယ်ရှိသည်။

မြန်မာနိုင်ငံ၏ ပြည်တွင်းရေး မငြိမ်မသက်ဖြစ်မှုသည် ဒေသတွင်း တည်ငြိမ်မှုကိုပါ ရှုပ်ထွေးစေသဖြင့် ထိုအချက်ကို ပါ အဓိကထားပြီး ဆွေးနွေးဖွယ် ရှိသည်ဟုလည်း ကျွမ်းကျင်သူများက ပြောကြားခဲ့သည်။

BIMSTEC အဖွဲ့ထဲတွင် ထိုင်း၊ မြန်မာ၊ အိန္ဒိယ၊ ဘင်္ဂလားဒေ့ရှ်၊ နီပေါ၊ သီရိလင်္ကာနှင့် ဘူတန်နိုင်ငံတို့ ပါဝင်ပြီး အဖွဲ့ဝင်နိုင်ငံများအကြား စီးပွားရေး ပူးပေါင်းဆောင်ရွက်မှုများကို မြှင့်တင်ရန် ရည်ရွယ်ချက်ဖြင့် အစည်းအဝေးများ ပြုလုပ်လေ့ရှိသည်။

Source: Nikkei Asia

CNI International News

မော်စကို၊ ဧပြီ ၂

တရုတ်နှင့် ရုရှားတို့သည် ထာဝရမိတ်ဆွေများဖြစ်ပြီး မည်သည့်အခါကမျှ ရန်သူများမဟုတ်ကြောင်း တရုတ်နိုင်ငံ ခြားရေးဝန်ကြီး ဝမ်ယိ ( Wang Yi ) က ဧပြီ ၁ ရက်တွင် ပြောကြားခဲ့ကြောင်း ရိုက်တာမှ ဖော်ပြခဲ့သည်။
ဝမ်သည် ရုရှားနိုင်ငံ၊ မော်စကိုမြို့တော်သို့ သွားရောက်သည့် ခရီးစဉ်တွင် ထိုကဲ့သို့ ပြောကြားခဲ့ခြင်းဖြစ်သည်။

ထို့နောက် အမေရိကန်နှင့် ရုရှားအကြား ဆက်ဆံရေးများ ပြန်လည်ထူထောင်နေသည့် လက္ခဏာများကိုလည်း ကြိုဆိုကြောင်း ဝမ်ယိက ပြောကြားခဲ့သည်။

“ထာဝရမိတ်တွေ၊ ဘယ်တော့မှ ရန်သူမဟုတ်ဆိုတဲ့ မူဝါဒဟာ ဗျူဟာမြောက် ပူးပေါင်းဆောင်ရွက်မှုကို မြှင့်တင် ဖို့အတွက် ခိုင်မာပြီး တရားဝင်မှုရှိတဲ့ အခြေခံအုတ်မြစ် ဖြစ်ပါတယ်”ဟု ဝမ်ယိက ရုရှားနိုင်ငံပိုင် RIA သတင်း အေဂျင်စီနှင့် ပြုလုပ်သည့် အင်တာဗျူးတစ်ခုတွင် ပြောကြားခဲ့သည်။

ယူကရိန်း-ရုရှား အပစ်အခတ်ရပ်စဲရေး ဆွေးနွေးပွဲများသည် သေချာရေရာမှု မရှိသေးဘဲ အမေရိကန်သမ္မတ ဒေါ်နယ်ထရမ့် (Donald Trump) က ယူကရိန်းနှင့် ရုရှားခေါင်းဆောင်များကို ဝေဖန်နေချိန်တွင် ဝမ်သည် မော်စကိုသို့ ၃ ရက်ကြာ ခရီးစဉ်အဖြစ် ရောက်ရှိနေခြင်းဖြစ်သည်။

ရုရှားနဲ့ တရုတ် နိုင်ငံခြားရေးဝန်ကြီးများ တွေ့ဆုံ ဆွေးနွေးနေစဉ်

ရုရှားသမ္မတ ပူတင် (Vladimir Putin) သည် ၂၀၂၂ ခုနှစ်၊ ဖေဖော်ဝါရီလက ယူကရိန်းသို့ တပ်ဖွဲ့ဝင်များ မစေလွှတ် ခင်အချိန်က တရုတ်နှင့် ရုရှားအကြား အကန့်အသတ်မရှိ မဟာဗျူဟာမြောက် မိတ်ဖက်ဆက်ဆံရေးကို ကြေညာခဲ့ သည်။

တရုတ်သမ္မတ ရှီကျင့်ဖျင် (Xi Jinping) သည် လွန်ခဲ့သည့် ဆယ်စုနှစ်များအတွင်း ပူတင်နှင့် အကြိမ်ပေါင်း ၄၀ ကျော် တွေ့ဆုံခဲ့ပြီး ၎င်းတို့နှစ်ဦးသည် ထိုင်ဝမ်အရေး၊ ယူကရိန်းအရေး၊ ရုရှားနှင့် တရုတ်တို့၏ ပြိုင်ဘက်ဖြစ်သည့် အမေရိကန်အရေး ကိစ္စများတွင် နှစ်နိုင်ငံအကြား ဆက်ဆံရေး ပိုမိုမြှင့်တင်ပြီး ပူးပေါင်းဆောင်ရွက်ရန် သဘောတူညီခဲ့ကြသည်။

ဝမ်ကို ပူတင်က ကြိုဆိုတွေ့ဆုံမည်ဖြစ်ပြီး ဝမ်သည် ရုရှားနိုင်ငံခြားရေးဝန်ကြီး ဆာဂျေ လာဗရော့ (Sergei Lavrov) နှင့်လည်း တွေ့ဆုံလိမ့်မည်ဟု ကရင်မလင်နန်းတော်က ပြောကြားခဲ့သည်။

လက်ရှိ ကမ္ဘာ့အခြေအနေများ တည်ငြိမ်မှုရှိစေရန် အင်အားကြီး နိုင်ငံများက အဓိကအခန်းကဏ္ဍမှ ပါဝင် လုပ်ဆောင်နေပြီး ရုရှားနှင့်အမေရိကန်အကြား ဆက်ဆံရေးများ မြှင့်တင်ရေးကိုလည်း တိုက်တွန်းကြောင်း ဝမ်က ပြောကြားခဲ့သည်။

ရုရှားနှင့် အမေရိကန်သည် ယူကရိန်းစစ်ပွဲကို ငြိမ်းချမ်းစွာ အဆုံးသတ်စေရန်နှင့် နှစ်နိုင်ငံ ဆက်ဆံရေး ပြန်လည် ထူထောင်ရန် နည်းလမ်းများကို ရှာဖွေနေကြောင်း ကရင်မလင်က ထုတ်ပြန်ခဲ့သည်။

Source: ရိုက်တာ

CNI International News

ဘန်ကောက်၊ ဧပြီ ၂

ထိုင်းနိုင်ငံ၊ ဘန်ကောက်မြို့တော်တွင် မတ်လ ၂၈ ရက်က လှုပ်ခတ်ခဲ့သည့် အင်အားပြင်း ငလျင်ကြောင့် နိုင်ငံတော် စာရင်းစစ်ရုံး (SAO) အနေဖြင့် အဆောက်အအုံ ပြိုကျမှုနှင့်ပတ်သက်ပြီး စေ့စေ့စပ်စပ် စုံစမ်းစစ်ဆေးရန် ဝန်ကြီးချုပ် ပေတုန်တန်(Paetongtarn Shinawatra) က ဧပြီ ၁ ရက်တွင် အမိန့်ထုတ်ပြန်ခဲ့သည်ဟု The Nation မှ ဖော်ပြခဲ့သည်။

မတ်လ ၂၈ ရက်က ငလျင်လှုပ်ခတ်မှုကြောင့် ဘန်ကောက်မြို့ ချာတူချက် (Chatuchak) ရပ်ကွက်ရှိ အထပ် ၃၀ အမြင့်ရှိ ဆောက်လုပ်ဆဲ အဆောက်အအုံ ပြိုကျခဲ့ပြီး ဒဏ်ရာရသူများ၊ သေဆုံးသူများနှင့် ပျောက်ဆုံးသူများ အများအပြား ရှိခဲ့ပြီးနောက် ပေတုန်တန်က ထိုကဲ့သို့ အမိန့်ထုတ်ခဲ့ခြင်းဖြစ်သည်။

ဝန်ကြီးဌာန အများအပြားသည် ထိုအဆောက်အအုံ ပြိုကျသည့် အဖြစ်အပျက်ကို ဆွေးနွေးခဲ့ကြောင်း ပေတုန်တန် က အပတ်စဉ် ပြုလုပ်သည့် အစိုးရအဖွဲ့ အစည်းအဝေး အပြီးတွင် ပြောကြားခဲ့သည်။

ငလျင်ကြောင့် ပြိုကျသွားတဲ့ ဘန်ကောက်က ဆောက်လုပ်ဆဲ အဆောက်အအုံကို တွေ့ရစဉ်

အစိုးရအဖွဲ့ အစည်းအဝေးတွင် တာဝန်ရှိသူများက စီမံချက်များကို အဆိုပြုခဲ့ပြီး ဆောက်လုပ်ရေးလုပ်ငန်း တာဝန်ယူသည့် ကုမ္ပဏီကို အမြန်ဆုံး စုံစမ်းစစ်ဆေးမည်ဟု ပြောကြားခဲ့သည်။

အလားတူ အဖြစ်ဆိုးမျိုး ထပ်မဖြစ်စေရန် ထိုကုမ္ပဏီကို ပေးထားသည့် ဆောက်လုပ်ရေး ပရောဂျက်အားလုံးကို စစ်ဆေးမှုများပြုလုပ်ရန် ဝန်ကြီးဌာနများအား ညွှန်ကြားထားကြောင်း ပေတုန်တန်က ပြောကြားခဲ့သည်။

ဆောက်လုပ်ရေးတွင် အသုံးပြုသည့် စံချိန်မမီသော သံမဏိများသည် လုံခြုံရေးနှင့် တိုက်ရိုက်သက်ဆိုင်သော ကြောင့် စုံစမ်းစစ်ဆေးမှုများ ပြုလုပ်မည်ဖြစ်ကြောင်း ပေတုန်တန်က အတည်ပြုခဲ့သည်။

“ဒါဟာ အဆောက်အအုံ တစ်ခုတည်း ထိခိုက်တာ မဟုတ်ဘဲ ထိုင်းနိုင်ငံရဲ့ ပုံရိပ်ကိုပါ ထိခိုက်စေတဲ့ အထင်ကရ ဖြစ်ရပ်တစ်ခု ဖြစ်ပါတယ်။ ပြည်သူတွေကို ရှင်းရှင်းလင်းလင်း ဖြေရှင်းပေးရပါမယ်” ဟု ၎င်းက ပြောကြားခဲ့သည်။

 ပြိုကျသွားတဲ့ အဆောက်အအုံကို ပေတုန်တန် လာစစ်ဆေးစဉ်

အထူးစုံစမ်းစစ်ဆေးရေးဌာနသည် ထိုဖြစ်စဉ်ကို အထူးစုံစမ်းစစ်ဆေးရမည့် အမှုအဖြစ် သတ်မှတ်ထားကြောင်း လည်း ပေတုန်တန်က ဆိုသည်။

အစိုးရသည် ခရီးသွားများနှင့် ရင်းနှီးမြှုပ်နှံသူများအကြား ယုံကြည်မှု တိုးမြင့်လာစေရန် လုပ်ဆောင်နေကြောင်း၊ နိုင်ငံခြားရေး၊ ခရီးသွားလာရေးနှင့် အားကစားရေးရာဝန်ကြီးများက ထိုအဆောက်အအုံ ပြိုကျမှုဖြစ်စဉ်ကို ခရီးသွား ကဏ္ဍ၊ ရင်းနှီးမြှုပ်နှံမှုကဏ္ဍတို့နှင့် သက်ဆိုင်မှု မရှိစေဘဲ သီးခြားဖြစ်စဉ်အဖြစ် ခွဲထားကြောင်း ပေတုန်တန်က ပြောကြားခဲ့သည်။ 

ပြိုကျခဲ့သည့် အဆောက်အအုံကို ထိုင်းနှင့်တရုတ်တို့က အကျိုးတူပူးပေါင်းပြီး ဆောက်လုပ်နေခြင်း ဖြစ်သော် လည်း စုံစမ်းစစ်ဆေးမှုသည် နိုင်ငံသား အရေးကိစ္စ မဟုတ်ဘဲ၊ တာဝန်ခံမှု အပိုင်းကိုသာ အာရုံစိုက်မည်ဖြစ်ကြောင်း ထိုင်းဝန်ကြီးချုပ်က ပြောကြားခဲ့သည်။

Source: The Nation

CNI International News

ဘန်ကောက်၊ ဧပြီ ၂

ဘန်ကောက် (Bangkok)မြို့တော်တွင် ပြုလုပ်မည့် ကဏ္ဍစုံနည်းပညာနှင့် စီးပွားရေး ပူးပေါင်းဆောင်ရွက်ရေး ဆိုင်ရာ ဘင်္ဂလားပင်လယ်အော် အစီအစဉ် (BIMSTEC) အစည်းအဝေးကို နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင် တက်ရောက်ရန် မသေချာကြောင်း အိမ်ရှင်အဖြစ် လက်ခံကျင်းပမည့် ထိုင်းနိုင်ငံ က ဧပြီ ၁ ရက်တွင် ပြောကြားခဲ့ကြောင်း The Nation မှ ဖော်ပြခဲ့သည်။

BIMSTEC အစည်းအဝေးကို ယခုသီတင်းပတ်အတွင်း ပြုလုပ်ရန် ထိုင်းအစိုးရက စီစဉ်ထားသည်။

သို့သော်လည်း မြန်မာနိုင်ငံတွင် အင်အားပြင်း ငလျင်လှုပ်ခတ်ခဲ့သဖြင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် ထိုအစည်းအဝေးကို တက်ရောက်ရန် မသေချာဘဲ ဖြစ်လာခဲ့သည်။

 မြန်မာမှာ ငလျင်ဒဏ်ခံရတဲ့ နေရာတွေကို ကယ်ဆယ်ရေးလုပ်နေကြစဉ်

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ထိုအစည်းအဝေးကို ဗွီဒီယို ဆက်သွယ်မှုမှတဆင့် တက်ရောက် နိုင်သေးသည်ဟုလည်း ထိုင်းနိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူက ပုံမှန်ပြုလုပ်နေကျ သတင်းစာ ရှင်းလင်းပွဲတွင် ပြောကြားခဲ့သည်။

BIMSTEC အစည်းအဝေးကို ဘန်ကောက်မြို့တော်၌ ဧပြီး ၂ ရက်မှ ၄ ရက်အထိ ပြုလုပ်ရန် စီစဉ်ထားသည်။

BIMSTEC အဖွဲ့ထဲတွင် ထိုင်း၊ မြန်မာ၊ အိန္ဒိယ၊ ဘင်္ဂလားဒေ့ရှ်၊ နီပေါ၊ သီရိလင်္ကာနှင့် ဘူတန်နိုင်ငံတို့ ပါဝင်သည်။

Source: The Nation

CNI International News

ဘန်ကောက်၊ မတ်လ ၃၁

ထိုင်းဝန်ကြီးချုပ် ပေတုန်တန်သည် မကြာသေးမီက ပြုလုပ်သည့် လူထုသဘောဆန္ဒ ကောက်ယူမှု စစ်တမ်းတွင် ထောက်ခံမဲ အများဆုံးဖြင့် နံပါတ် ၁ နေရာ၌ ဆက်ရှိနေကြောင်း The Nation မှ ဖော်ပြခဲ့သည်။

ထိုစစ်တမ်းကို အမျိုးသားဖွံ့ဖြိုးတိုးတက်ရေး အုပ်ချုပ်မှုအင်စတီကျူ (Nida) က မတ်လ ၂၄ ရက်မှ ၂၇ ရက်အတွင်း ကောက်ခံခဲ့ခြင်း ဖြစ်သည်။

စစ်တမ်းတွင် ပါဝင်ဖြေဆိုသူ ၂၀၀၀ ခန့်ရှိခဲ့ပြီး ၃၀ ဒသမ ၉၀ ရာခိုင်နှုန်းက လက်ရှိဝန်ကြီးချုပ် ပေတုန်တန် (aetongtarn Shinawatra) ကို ထောက်ခံကြောင်း ဖြေဆိုခဲ့ကြသည်။

စစ်တမ်းတွင် ပါဝင်ဖြေဆိုသူများက ပေတုန်တန်အား နိုင်ငံအုပ်ချုပ်ရေးကဏ္ဍ၌ ကျွမ်းကျင်မှု ရှိ/မရှိ ပြသရန် အတွက် အခွင့်အရေး ပေးချင်ကြောင်း ပြောကြားခဲ့သည်။

အတိုက်ခံဖြစ်သည့် ပြည်သူ့ပါတီခေါင်းဆောင် နက်သာဖွန် ရူအန်ပန်ယာဝတ် (Natthaphong Ruengpanyawut) ကိုမူ စစ်တမ်းတွင် ပါဝင်ဖြေဆိုသူ ၂၅ ဒသမ ၈၀ ရာခိုင်နှုန်းက ထောက်ခံကြောင်း ဖြေဆိုခဲ့ကြသည်။

ထိုင်းဝန်ကြီးချုပ် ပေတုန်တန်ကို တွေ့ရစဉ်

နက်သာဖွန်၏ ဆန်းသစ်သည့် အတွေးအခေါ်များ၊ ရိုးသားမှု၊ ပွင့်လင်းမြင်သာမှုနှင့် လူထုကို အကျိုးရှိစေမည့် မူဝါဒများကြောင့် ၎င်းအား ထောက်ခံခြင်းဖြစ်ကြောင်း စစ်တမ်းတွင် ဖြေဆိုခဲ့ကြသည်။

သို့သော် ပါတီထောက်ခံမှုချင်း ယှဉ်ကြည့်ပါက ပေတုန်တန်၏ အာဏာရပါတီသည် နက်သာဖွန်၏ ပြည်သူ့ပါတီ လောက် လူထုထောက်ခံမှု မများကြောင်း တွေ့ရှိခဲ့သည်။

စစ်တမ်းအရ အတိုက်အခံဖြစ်သည့် ပြည်သူ့ပါတီသည် ထောက်ခံမဲ ၃၇ ဒသမ ၁၀ ရာခိုင်နှုန်းဖြင့် နံပါတ် ၁ နေရာ တွင် ရပ်တည်နေပြီး အာဏာရ ဖြူးထိုင်းပါတီသည် ၂၈ ဒသမ ၀၅ ရာခိုင်နှုန်းဖြင့် ဒုတိယနေရာ၌ ရပ်တည်ခဲ့သည်။

Source: The Nation

CNI International News

ကိုင်ရို၊ မတ်လ ၃၁

ဆူဒန်စစ်တပ်နှင့် စစ်ပွဲဖြစ်ပွားနေသည့် စစ်ပွဲသည် အဆုံးမသတ်သေးကြောင်း အရန်တပ်ဖွဲ့ (RSF) ခေါင်းဆောင် မိုဟာမက် ဟမ်ဒန် ဒါဂလို (Mohamed Hamdan Dagalo)က မတ်လ ၃၀ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ဆူဒန်စစ်တပ်သည် ခါတွန် (Khartoum) မြို့တော်ကို ထိန်းချုပ်ထားသည့် RSF တပ်ဖွဲ့ဝင်များအား မြို့တော်တွင်းမှ မောင်းထုတ်ခဲ့ပြီးနောက် ဒါဂလို၏ ပြောကြားချက် ထွက်ပေါ်လာခြင်းဖြစ်သည်။

၂ နှစ်ကြာ ဖြစ်ပွားနေသော ဆူဒန်စစ်ပွဲအတွင်း ပြီးခဲ့သည့် သီတင်းပတ်က စစ်တပ်သည် အသာစီးရလာခဲ့ပြီး ခါတွန်မြို့တော်၏ နေရာဒေသအများစုကို ထိန်းချုပ်ထားသည့် RSF တပ်ဖွဲ့ဝင်များအား မောင်းထုတ်နိုင်ခဲ့သည်။

ဒါဂလိုကမူ ၎င်းတို့ တပ်ဖွဲ့ဝင်များသည် ပြီးခဲ့သည့် သီတင်းပတ်က  ခါတွန်မြို့တော်မှ ဆုတ်ခွာခဲ့ရပြီး စစ်တပ်က အသာစီးရခဲ့ကြောင်း ဝန်ခံခဲ့သည်။

“ပြီးခဲ့တဲ့ရက်ပိုင်းက ကျနော်တို့ တပ်ဖွဲ့တွေ ခါတွန်က ပြန်ဆုတ်ခဲ့ရပြီး အွန်ဒါမန် (Omdurman) မြို့မှာ ခံစစ်ထိုင်ခဲ့ ရတယ်ဆိုတာ ဟုတ်ပါတယ်။ ဒါက ခေါင်းဆောင်တွေရဲ့ သဘောဆန္ဒတွေနဲ့အတူ ချမှတ်ခဲ့တဲ့ ဆုံးဖြတ်ချက် ဖြစ်ပါ တယ်”ဟု ဒါဂလိုက ပြောကြားခဲ့သည်။

ဆူဒန်စစ်တပ်နဲ့ ခေါင်းဆောင်ကို တွေ့ရစဉ်

သို့သော် ခါတွန်မြို့တော်ကို ယခုထက်ပိုပြီး အင်အားပြင်းထန်သည့် ပုံစံဖြင့် ပြန်လည်ဝင်ရောက်မည်ဟု ၎င်းက ကတိပြု ပြောကြားခဲ့သည်။

ဆူဒန်စစ်တပ်သည် မတ်လ ၂၉ ရက် ကြီးမားသည့် စစ်စခန်း ၂ ခုရှိသော အွန်ဒါမန်မြို့၏ အဓိက စျေးတစ်ခုကို ထိန်းချုပ်နိုင်ခဲ့သည်။

ဆူဒန်စစ်တပ်၏ အကြီးအကဲ အဗ္ဗဒယ် ဖာတာ အယ်ဘာဟန် (Abdel Fattah al-Burhan) ကမူ RSF နှင့် ပြန်လည် ပေါင်းစည်းမည် မဟုတ်ကြောင်း ပြောကြားခဲ့ပြီး RSF ကို အပြီးသတ် ချေမှုန်းသွားမည်ဟု ပြောကြားခဲ့သည်။

ဆူဒန်စစ်တပ်နှင့် RSF အကြား အရပ်ဘက် အုပ်ချုပ်ရေးအတွက် ပြင်ဆင်မှုများ ပြုလုပ်ရာမှ အာဏာလွန်ဆွဲမှု ဖြစ်ပွားခဲ့ပြီးနောက် စစ်ပွဲ စတင်ဖြစ်ပွားခဲ့ခြင်းဖြစ်သည်။

Source: ရိုက်တာ

CNI International News

တိုကျို၊ မတ်လ ၃၁

တရုတ်၏ ရန်လိုမှုကို ကိုင်တွယ်ဖြေရှင်းရာတွင် ဂျပန်သည် မရှိမဖြစ်လိုအပ်ကြောင်း အမေရိကန် ကာကွယ်ရေး ဝန်ကြီး ပိဟက်ဆက် (Pete Hegseth)က မတ်လ ၃၀ ရက်၌ ပြောကြားခဲ့ကြောင်း ရိုက်တာမှ ဖော်ပြခဲ့သည်။

အမေရိကန်သည် ထိုင်ဝမ်ရေလက်ကြား အပါအဝင် ဒေသတွင်း၌ ယုံကြည်စိတ်ချရသည့် အခြိမ်းအခြောက် အဟန့် အတားကို ထူထောင်နေချိန်တွင် ဂျပန်၏အခန်းကဏ္ဍကို ထိုကဲ့သို့ ပြောကြားခဲ့ခြင်းဖြစ်သည်။

“ကျနော်တို့ဟာ ကျနော်တို့ရဲ့ တပ်ဖွဲ့တွေကို အဓိပ္ပာယ်ဖွင့်ဆိုပေးတဲ့ စစ်သူရဲကောင်း စိတ်ဓာတ်ကို မျှဝေထားပါ တယ်”ဟု ဟက်ဆက်က  ဂျပန်ကာကွယ်ရေးဝန်ကြီး ဂျန် နာကာတာနီ (Gen Nakatani) နှင့် တိုကျိုတွင် ပြုလုပ်သည့် အစည်းအဝေး၌ ပြောကြားခဲ့သည်။

ဂျပန်သည် အင်ဒို-ပစိဖိတ်ဒေသတွင်း ငြိမ်းချမ်းရေးနှင့် လုံခြုံရေးအတွက် အခြေခံအုတ်မြစ်ဖြစ်ကြောင်း ဟက်ဆက် က ပြောကြားခဲ့ပြီး သမ္မတဒေါ်နယ်ထရမ့် (Donald Trump) ၏ အစိုးရသည် ယခင်က အစိုးရများကဲ့သို့ပင် ၎င်း၏ အဓိကအာရှမဟာမိတ်ဖြစ်သည့် ဂျပန်နှင့် နီးကပ်စွာ ဆက်လက် ဆောင်ရွက်သွားမည်ဟု ဆိုသည်။

ဂျပန်ကာကွယ်ရေးဝန်ကြီး ဂျန် နာကာတာနီနဲ့ အမေရိကန်ကာကွယ်ရေးဝန်ကြီး ပိဟက်ဆက်ကို တွေ့ရစဉ်

ဂျပန်တွင် အမေရိကန် စစ်သား ၅၀,၀၀၀ ဝန်းကျင်နှင့် တိုက်လေယာဉ်အုပ်စုများ တပ်စွဲထားပြီး တရုတ် စစ်အင်အားကို တန်ပြန်သည့် အနေဖြင့် ကီလိုမီတာ ၃၀၀၀ ခန့်ရှိသော ဂျပန်ကျွန်းစုတစ်လျှောက် လေယာဉ်တင် သင်္ဘော ဦးဆောင်သည့် တိုက်ခိုက်ရေး စစ်သင်္ဘောအုပ်စုကို ဖြန့်ကြက်ချထားသည်။

ဟက်ဆက်သည် ဖေဖော်ဝါရီလက ဥရောပမဟာမိတ် နိုင်ငံများကို ဝေဖန်ခဲ့ပြီး အမေရိကန်၏ လုံခြုံရေး ထောက်ပံ့မှုသည် အမြဲရှိနေလိမ့်မည်ဟု မယူဆထားသင့်ကြောင်း ဥရောပနိုင်ငံများကို ပြောကြားခဲ့ပြီးနောက် ယခုအခါတွင် ဂျပန်အား ချီးကျူးခဲ့ခြင်းဖြစ်သည်။

ပထမဆုံး တရားဝင် ခရီးစဉ်အဖြစ် အာရှသို့ ရောက်ရှိနေသည့် ဟက်ဆက်သည် ဖိလစ်ပိုင်နိုင်ငံသို့ သွားရောက်ခဲ့ ပြီးနောက် ဂျပန်နိုင်ငံသို့ ရောက်ရှိလာခဲ့ခြင်းဖြစ်သည်။

မတ်လ ၂၉ ရက်က ဟက်ဆက်သည် ဒုတိယကမ္ဘာစစ်အတွင်း အမေရိကန်နှင့် ဂျပန်တပ်ဖွဲ့များအကြား တိုက်ပွဲများ ပြင်းထန်စွာ ဖြစ်ပွားခဲ့သည့် အိုင်ဝို ဂျီးမား (Iwo Jima) ကျွန်းပေါ်တွင် ပြုလုပ်သော အောက်မေ့ဖွယ် အခမ်းအနား ကို တက်ရောက်ခဲ့သည်။

Source: ရိုက်တာ

CNI International News

ပဲရစ်၊ မတ်လ ၂၈

ဥရောပခေါင်းဆောင် ၃၀ ခန့်သည် မတ်လ ၂၇ ရက်က ပြင်သစ်နိုင်ငံ၊ ပဲရစ် (Paris) မြို့တော်တွင် ယူကရိန်းသမ္မတ ဇာလန်းစကီး (Volodymyr Zelenskiy) နှင့် တွေ့ဆုံခဲ့ကြသည်ဟု ရိုက်တာမှ ဖော်ပြခဲ့သည်။
ထို့နောက် ပြင်သစ်က ယူကရိန်းအား စစ်ရေးအကူအညီ ယူရို ၂ ဘီလီယံ ထောက်ပံ့ပေးမည်ဟု ကတိပြုခဲ့သည်။

“ဆန္ဒတူညီသော ညွန့်ပေါင်းအဖွဲ့”ဟု ပြင်သစ်နှင့် ဗြိတိန်တို့က ခေါ်ဆိုထားသည့် တတိယအကြိမ်မြောက် ညီလာခံ တွင် ဗြိတိန်ဝန်ကြီးချုပ် ကီယာ စတာမာ (Keir Starmer) ၊ နေတိုးအတွင်းရေးမှူးချုပ် မာ့ခ် ရူတီ (Mark Rutte) ၊ ပိုလန်ဝန်ကြီးချုပ် ဒေါ်နယ် တာ့စ် (Donald Tusk) ၊ အီတလီဝန်ကြီးချုပ် ဂျော်ဂျီယာ မယ်လိုနီ (Giorgia Meloni) နှင့် တူရကီ ဒုတိယသမ္မတ ဆက်ဗ်ဒက် ယီလ်မက်ဇ် (Cevdet Yılmaz) တို့ အပါအဝင် အခြားဥရောပခေါင်းများ လည်း စုရုံးရောက်ရှိလာခဲ့ကြသည်။

ပြင်သစ်သမ္မတ မက်ခရွန်နဲ့ ယူကရိန်းသမ္မတ ဇာလန်းစကီးကို တွေ့ရစဉ်

အမေရိကန်၏ အကူအညီနှင့် ထောက်လှမ်းရေး အချက်လက်များ မျှဝေသုံးစွဲရေးကို ပြန်လည်စတင်နိုင်ရေး အတွက် အပစ်အခတ်ရပ်စဲရေး ဆွေးနွေးပွဲများ ဆက်လက် လုပ်ဆောင်ရန် ဇာလန်းစကီးက ယခုလ အစောပိုင်း တွင် သဘောတူညီခဲ့သည်။

ထို့နောက် ဇာလန်းစကီးသည် ဥရောပခေါင်းဆောင်များနှင့်တွေ့ဆုံပြီး အစည်းအဝေး ပြုလုပ်ခဲ့သည်။

သို့သော် ရုရှားက အပစ်အခတ်ရပ်စဲရေး သဘောတူညီချက်ကို အကောင်အထည်ဖော်ရန်နှင့် ပင်လယ်နက်တွင် တိုက်ခိုက်မှုများနှင့် စွမ်းအင် အဆောက်အအုံများအပေါ် တိုက်ခိုက်မှုများကို ရပ်တန့်ရန် တောင်းဆိုချက်များ အဆိုပြုထားသဖြင့် အလုံးစုငြိမ်းချမ်းရေး သဘောတူညီချက်သည် ဝေးကွာနေသေးသည်ဟု ဥရောပနိုင်ငံ အများအပြားက ယုံကြည်နေကြသည်။

“ယူကရိန်းအတွက် အရေးအကြီးဆုံး အထောက်အပံ့ကို အဓိကထားပြီး ဆွေးနွေးသွားမှာ ဖြစ်ပါတယ်။ ယူကရိန်း အနေနဲ့ ရုရှားကို ဆက်လက်ပြီး ခုခံတွန်းလှန်ဖို့ အထောက်အပံ့တွေက မရှိမဖြစ် လိုအပ်ပါတယ်” ဟု ပြင်သစ် သမ္မတ မက်ခရွန် (Emmanuel Macron)က မတ်လ ၂၆ ရက် မွန်းလွဲပိုင်းက ဇာလန်းစကီးနှင့် ပူးတွဲပြုလုပ်သည့် သတင်းစာ ရှင်းလင်းပွဲတွင် သတင်းထောက်များကို ပြောကြားခဲ့သည်။

ယူကရိန်းသမ္မတ ဇာလန်းစကီး၊ ဗြိတိန်ဝန်းကြီးချုပ်နဲ့ နေတိုးအတွင်းရေးမှူးချုပ်တို့ကို တွေ့ရစဉ်

မက်ခရွန်သည် ဒုံးကျည်များ၊ စစ်လေယာဉ်များနှင့် လေကြောင်းရန် ကာကွယ်ရေးပစ္စည်းများ အပါအဝင် ပြင်သစ် ၏ နောက်ထပ် စစ်ရေး အကူအညီအဖြစ် ယူရို ၂ ဘီလီယံ ထောက်ပံ့ရန် ကတိပြုခဲ့သည်။

ထို့ကြောင့် အခြား ဥရောပခေါင်းဆောင်များ အနေနှင့်လည်း ယူကရိန်းအတွက် အကူအညီပေးရေး အစီအစဉ်များ ကို  ကြေညာနိုင်ကြောင်း ဇာလန်းစကီးက ပြောကြားခဲ့သည်။

ယူကရိန်း-ဥရောပ အစည်းအဝေးများသည် ယူကရိန်းပဋိပက္ခ အဆုံးသတ်ရေး ဆွေးနွေးပွဲတိုင်းတွင် ဥရောပ၏ အခန်းကဏ္ဍကို ပုံဖော်ရန် ရည်ရွယ်လုပ်ဆောင်ခဲ့ခြင်းဖြစ်သည်။

ထိုအစည်းအဝေးကို အမေရိကန်က တက်ရောက်ခြင်း မရှိခဲ့သော်လည်း အစည်းအဝေး၏ ရလဒ်များကို အမေရိကန်အစိုးရထံ မျှဝေပေးမည်ဖြစ်ကြောင်း ပြင်သစ်တာဝန်ရှိသူများက ပြောကြားခဲ့သည်။

Source: ရိုက်တာ

CNI International News

ဘန်ကောက်၊ မတ်လ ၂၈

ထိုင်းနိုင်ငံတွင် မေလ ၁ ရက်မှစပြီး နိုင်ငံတစ်ဝန်း အနိမ့်ဆုံး တစ်ရက်လုပ်ခကို ဘတ် ၄၀၀ အထိ တိုးမြှင့်ပေးသွား မည်ဟု အလုပ်သမားရေးဝန်ကြီး ဖီဖတ် ရတ်ချာကစ်ပရာကန်း (Phiphat Ratchakitprakarn)က ကတိပြုခဲ့ ကြောင်း ဘန်ကောက်ပို့စ်မှ ဖော်ပြခဲ့သည်။

မတ်လ ၂၆ ရက်က လွှတ်တော်တွင်း စကားစစ်ထိုးပွဲအတွင်း အတိုက်အခံ ပြည်သူ့ပါတီ လွှတ်တော်အမတ် သီရိကန်ယာ တန်ဆာကူလ် (Sirikanya Tansakul) က  ဖြူးထိုင်းပါတီသည် ၂၀၂၃ ရွေးကောက်ပွဲ မဲဆွယ်ကာလ အတွင်း ကတိပြုထားသည့် အနိမ့်ဆုံး တရက်လုပ်အားခ ဘတ် ၄၀၀ မြှင့်တင်ရေးကို အကောင်အထည်ဖော်ရန် ပျက်ကွက်ခဲ့ကြောင်း ဝေဖန်ခဲ့သည်။

“အဲဒီကတိက နိုင်ငံရေး အကျိုးအမြတ်အတွက် လူထုကို လိမ်ညာခဲ့တာ ဖြစ်ပါတယ်” ဟု သီရိကန်ယာက ပြော သည်။

ဝန်ကြီးချုပ် ပေတုန်တန်(Paetongtarn Shinawatra) ၏ အစိုးရအဖွဲ့ စတင် တာဝန်ထမ်းဆောင်ချိန်မှစပြီး စီးပွားရေးလုပ်ငန်းများ ပိတ်သိမ်းမှုသည် ၁၁ ရာခိုင်နှုန်း မြင့်တက်လာခဲ့ကြောင်း မစ္စ သီရိကန်ယာက ပြောကြားခဲ့ သည်။

အတိုက်အခံ ပြည်သူ့ပါတီ လွှတ်တော်အမတ် သီရိကန်ယာ တန်ဆာကူလ်ကို တွေ့ရစဉ်

 ထို့နောက် လုပ်ငန်းသစ်များ မှတ်ပုံတင်ခြင်းသည် ၄ ရာခိုင်နှုန်းသာ မြင့်တက်လာခဲ့သည် ၎င်းက ပြောသည်။

အလုပ်သမား အများအပြားသည် လျော်ကြေး အနည်းငယ်ဖြင့် အလုပ်မှ ထုတ်ပယ်ခံခဲ့ရကြောင်းလည်း မစ္စ သီရိကန်ယာက ဆက်လက် ပြောကြားသည်။

မေလ ၁ ရက်တွင် ကျရောက်သည့် အလုပ်သမားနေ့အတွက် နိုင်ငံလုံးဆိုင်ရာ လုပ်ခလစာ ညှိနှိုင်းရေးအတွက် နောက်တဆင့်ကို ဆုံးဖြတ်ရန် အမျိုးသားလုပ်အားခကော်မတီသည် ဆောင်ခရမ် (Songkran) ရေကစားပွဲတော် မတိုင်မီ တွေ့ဆုံမည်ဖြစ်ကြောင်း မစ္စတာ ဖီဖတ်က မတ် ၂၆ ရက်တွင် တုန့်ပြန်ပြောကြားခဲ့သည်။

တစ်ရက်လျှင် အနိမ့်ဆုံးလုပ်အားခ ဘတ် ၄၀၀ တိုးမြှင့်ပေးမည့် အစီအစဉ်ကို ဖူးခက် (Phuket) ၊ ချောင်ဘူရီ (Chon Buri) ၊ ရာယောင်း (Rayong) ၊ ချာချောင်ဆာအို (Chachoengsao) နှင့် ခိုစမူအီ (Koh Samui) တို့တွင် ယခုနှစ် အစောပိုင်း၌ စတင် အကောင်အထည်ဖော်ခဲ့သည်။

အခြားနေရာများတွင် ပြည်နယ်အလိုက် ၃၃၇ ဘတ်မှ ၃၈၀ ဘတ်အထိ နေ့စားလုပ်အားခ နှုန်းထားများ သတ်မှတ် ထားသည်။

အလုပ်သမားရေးဝန်ကြီး ဖီဖတ် ရတ်ချာကစ်ပရာကန်းကို တွေ့ရစဉ်

အလုပ်ရှင်များကမူ နိုင်ငံတစ်ဝှမ်း စီးပွားရေးအခြေအနေ ကွာခြားမှုကြောင့် တစ်နိုင်ငံလုံး အတိုင်းအတာဖြင့် အနိမ့်ဆုံး နေ့စားလုပ်အားခကို နှုန်းထားတစ်ခုတည်းဖြင့် သတ်မှတ်ထားခြင်းသည် လက်တွေ့မကျကြောင်း စောဒကတက်ခဲ့ကြသည်။

လုပ်အားခ အပြောင်းအလဲကြောင့် ထိုင်းစီးပွားရေး၏ ကျောရိုးဖြစ်သည့် အသေးစားနှင့်အလတ်စား စီးပွားရေး လုပ်ငန်းများ(SME)ကဏ္ဍရှိ အလုပ်သမား ၅ ဒသမ ၈ သန်းနှင့် အလုပ်ရှင် ၅၀၀,၀၀၀ ကို သက်ရောက် စေလိမ့် မည်ဖြစ်ကြောင်း မစ္စတာဖီဖတ်က ပြောသည်။

အခြေခံလုပ်ခလစာ တိုးမြင့်ခြင်းသည် အသေးစား လုပ်ငန်းများအတွက် ဝန်ပိစေနိုင်သည်ကို သိရှိနားလည် ထားကြောင်း၊ ထို့ကြောင့် အစိုးရသည် လုပ်ငန်းများ ထိခိုက်မှုကို လျှော့ချရန် နည်းလမ်းများ ရှာဖွေနေကြောင်း ဖီဖတ်က ပြောကြားခဲ့သည်။

အစိုးရ၏ စီးပွားရေး ဖွံ့ဖြိုးတိုးတက်ရေး မျှော်မှန်းချက် နှုန်းထားဖြစ်သည့် ၃ ရာခိုင်နှုန်းကို ထည့်သွင်းစဉ်းစား ရမည်ဖြစ်ပြီး ရလဒ်အနေဖြင့် အချို့လုပ်ငန်းများသည် ဝန်ထုပ်ဝန်ပိုးများကို လျှော့ချရန် မတူကွဲပြားသည့် လုပ်ခလစာများအား သတ်မှတ်ဖွယ်ရှိကြောင်း မစ္စတာဖီဖတ်က ပြောကြားခဲ့သည်။

Source: ဘန်ကောက်ပို့စ်