CNI International News

ဆိုးလ်၊ နိုဝင်ဘာ ၇

အမေရိကန်အစိုးရအဖွဲ့သစ်နှင့် ပြည့်စုံသည့် လုံခြုံရေးမိတ်ဖက်ဆက်ဆံမှု တည်ထောင်သွားမည်ဟု တောင်ကိုရီးယားသမ္မတရုံးက နိုဝင်ဘာ ၆ ရက်တွင် ထုတ်ပြန်ခဲ့ကြောင်း ရိုက်တာမှ ဖော်ပြခဲ့သည်။

တောင်ကိုရီးယားသမ္မတ ယွန်းဆော့ရွဲ(Yoon Suk Yeol) သည် လာမည့် ရက်ပိုင်းအတွင်း အမေရိကန်သမ္မတအဖြစ် ရွေးကောက်ခံရသည့် ဒေါ်နယ်ထရမ့် (Donald Trump) နှင့် စကားပြောဆိုသွားမည်ဟု သမ္မတရုံးအရာရှိတစ်ဦးက သတင်းထောက်များကို ပြောကြားခဲ့သည်။

တောင်ကိုရီးယားသည် ဒေသတွင်း အမေရိကန်၏ ခိုင်မာသည့် မဟာမိတ်ဖြစ်ပြီး မြောက်ကိုရီးယား၏ ခြိမ်းခြောက် မှုကို တုန့်ပြန်ရန် တောင်ကိုရီးယားတွင် အမေရိကန်စစ်သား ၂၈,၅၀၀ ခန့် တပ်စွဲထားသည်။

ယွန်းဆော့ရွဲ သမ္မတဖြစ်လာခဲ့သည့် လွန်ခဲ့သည့် ၂ နှစ်ခွဲတာ ကာလအတွင်း နှစ်နိုင်ငံ ခေါင်းဆောင်များသည် အမေရိကန်-တောင်ကိုရီးယား မဟာမိတ်ဆက်ဆံရေးနှင့် ကမ္ဘာလုံးဆိုင်ရာ ဖွံ့ဖြိုးတိုးတက်မှုတို့၏ အရေးကြီးပုံကို ခိုင်မာစွာ ထောက်ခံခဲ့ရသည်။

ရွေးကောက်ပွဲအနိုင်ရ အမေရိကန်သမ္မတ ဒေါ်နယ်ထရမ့်ကို တွေ့ရစဉ်

ပြီးခဲ့သည့်လကလည်း တောင်ကိုရီးယားတွင် အမေရိကန်စစ်သားများ ထားရှိသည့် ကုန်ကျစရိတ်များကို မျှခံရန် ၅ နှစ်သက်တမ်း သဘောတူညီမှု ရရှိခဲ့သည်။

ဒေါ်နယ်ထရမ့်ကမူ တောင်ကိုရီးယားသည် အမေရိကန်၏ အကာအကွယ်ကို အခမဲ့ရယူနေကြောင်း စွပ်စွဲခဲ့ပြီး တောင်ကိုရီးယားတွင် အမေရိကန်စစ်သားများ ထားရှိမှုအတွက် တစ်နှစ်ကို ဒေါ်လာ ၅ ဘီလျံအထိ ပေးရမည်ဟု တောင်းဆိုခဲ့ဖူးသည်။

ရီပတ်ဘလစ်ကန် ကိုယ်စားလှယ်လောင်း ထရမ့်သည် ၂၀၂၄ ခုနှစ် သမ္မတရွေးကောက်ပွဲတွင် ဒီမိုကရက်တစ် ကိုယ်စားလှယ်လောင်း ကာမယ်လာဟားရစ်ကို အနိုင်ရရှိခဲ့ကြောင်း ကြေညာခဲ့သည်။

 တောင်ကိုရီးယားသမ္မတရုံးမှ အမည်မဖော်လိုသည့် အရာရှိတစ်ဦးကမူ ရုရှားရှိ မြောက်ကိုရီးယား စစ်သားများ သည် ယူကရိန်းတပ်ဖွဲ့များကို တိုက်ခိုက်နေသော စစ်မြေပြင်တွင် အပြည့်အဝ ပါဝင်တိုက်ခိုက်ခြင်း မရှိသေး ကြောင်း ပြောကြားခဲ့သည်။

တောင်ကိုရီးယားအတွက် ယူကရိန်းစစ်ပွဲ၏ အခြေအနေကို လေ့လာစောင့်ကြည့်ရေးအတွက် အဖွဲ့တစ်ဖွဲ့ စေလွှတ် ရန် အရေးကြီးကြောင်းနှင့် ထိုသို့ စေလွှတ်ရန်အတွက် လွှတ်တော်၏ အတည်ပြု ထောက်ခံချက်ကို မလိုကြောင်း ထိုအရာရှိက ထပ်လောင်းပြောကြားခဲ့သည်။

Source: ရိုက်တာ

CNI International News

မော်စကို၊ နိုဝင်ဘာ ၇

အမေရိကန်သမ္မတရွေးကောက်ပွဲတွင် ဒေါ်နယ်ထရမ့် (Donald Trump) အနိုင်ရခဲ့ပြီးနောက် ယူကရိန်းစစ်ပွဲ အဆုံးသတ်မည် ဟုတ်/မဟုတ် စောင့်ကြည့်ရမည်ဟု ရုရှားက နိုဝင်ဘာ ၆ ရက်တွင် ပြောကြားခဲ့ကြောင်း ရိုက်တာမှ ဖော်ပြခဲ့သည်။

ထရမ့်သည် မဲဆွယ်စည်းရုံးရေး ကာလက သူသာ သမ္မတအဖြစ် ရွေးကောက်ခံရလျှင် ယူကရိန်းစစ်ပွဲကို အမြန်ဆုံး အဆုံးသတ်မည်ဟု ပြောကြားခဲ့ဖူးသည်။

ထရမ့်သည် ပထမသက်တမ်းအပြီး ၂၀၂၀ ရွေးကောက်ပွဲတွင် ဂျိုဘိုင်ဒန် (Joe Biden) ကို ရှုံးနိမ့်ခဲ့ပြီးနောက် ၂၀၂၄ ရွေးကောက်ပွဲတွင် အနိုင်ပြန်ရမှုသည် ပြောစမှတ်တွင်လောက်သည့် တစ်ကြော့ပြန် အောင်မြင်မှုဖြစ်သည်။

ထရမ့်သည် ယူကရိန်းစစ်ပွဲနှင့် ပတ်သက်ပြီး အရေးကြီးသည့် မှတ်ချက်စကားများ ပြောကြားခဲ့ကြောင်း၊ သို့သော် အပြောနှင့်အလုပ် ညီ/မညီကို အချိန်က စကားပြောသွားလိမ့်မည်ဖြစ်ကြောင်း ကရင်မလင်ပြောရေးဆိုခွင့်ရှိသူ ပက်စ်ကော့ဗ် (Dmitry Peskov) က ပြောကြားခဲ့သည်။

ပူတင်ကို တွေ့ရစဉ်

"ကျနော်တို့ဟာ ယူကရိန်းစစ်ပွဲမှာ တိုက်ရိုက်တစ်မျိုး၊ သွယ်ဝိုက်တစ်မျိုး ဝင်ရောက်စွက်ဖက်နေတဲ့ မိတ်ဆွေ မဟုတ်တဲ့ နိုင်ငံအကြောင်းကို ပြောနေတယ်ဆိုတာကို မမေ့စေချင်ပါဘူး" ဟု ပက်စ်ကော့ဗ်က သတင်းထောက် များကို ပြောကြားခဲ့သည်။

ထို့ပြင် သမ္မတပူတင် (Vladimir Putin) သည်လည်း ထရမ့်ကို ဂုဏ်ပြုစကား ပြောကြားရန် အစီအစဉ် ရှိ/မရှိ မသိရသေးကြောင်း၊ နှစ်နိုင်ငံ ဆက်ဆံရေးသည် ကျဆင်းနေကြောင်း ပက်စ်ကော့ဗ်က ပြောသည်။

"အမေရိကန်ဟာ ယူကရိန်းစစ်ပွဲကို အဆုံးသတ်အောင် လုပ်ဆောင်နိုင်လိမ့်မယ်လို့ ကျနော်တို့ ထပ်တလဲလဲ ပြောခဲ့ပြီးပါပြီ။ ဒါပေမယ့် စစ်ပွဲပြီးအောင် ညတွင်းချင်း မလုပ်ဆောင်နိုင်ပါဘူး။ အမေရိကန်ဟာ သူ့ရဲ့ နိုင်ငံခြားရေး မူဝါဒကို ပြောင်းလဲနိုင်စွမ်း ရှိပါတယ်။ ထရမ့် ကျမ်းသစ္စာကျိန်ဆိုတဲ့ ဇန်နဝါရီလ အပြီးမှာတော့ ဘာဆက်ဖြစ်မလဲ ဆိုတာ ကျနော်တို့ တွေ့ရမှာပါ" ဟု ပက်စ်ကော့ဗ်က ပြောကြားခဲ့သည်။

ရုရှားသမ္မတ ပူတင်ကမူ အမေရိကန်ရွေးကောက်ပွဲတွင် မည်သူပဲ အနိုင်ရရှိသည် ဆိုစေကာမူ ရုရှားအတွက် ထူးမခြားနားပင်ဖြစ်ကြောင်း ရွေးကောက်ပွဲမတိုင်မီက ပြောကြားခဲ့သည်။

Source: ရိုက်တာ

CNI International News

ပြုံယမ်း၊ နိုဝင်ဘာ ၇

မြောက်ကိုရီးယားသည် အမေရိကန်ရွေးကောက်ပွဲမတိုင်မီ နာရီပိုင်းအလို နိုဝင်ဘာ ၅ ရက်တွင် တာတိုပစ် ဒုံးကျည်များ ပစ်လွှတ်ခဲ့ကြောင်း Nikkei Asia မှ ဖော်ပြခဲ့သည်။

ထိုဒုံးကျည်များ ပစ်လွှတ်မှုသည် အမေရိကန်ရွေးကောက်ပွဲတွင် အနိုင်ရရှိမည့် သမ္မတသစ်ကို ရည်ရွယ်ပြီး သွေးတိုးစမ်းသည့် သဘောမျိုးဖြစ်သည်ဟု ကျွမ်းကျင်သူများက ပြောကြားခဲ့သည်။

မြောက်ကိုရီးယားသည် အောက်တိုဘာ ၃၁ ရက်ကလည်း တိုက်ချင်းပစ် ပဲ့ထိန်းဒုံးကျည် တစ်စင်းကို စမ်းသပ် ပစ်လွှတ်ခဲ့ပြီးနောက် အမေရိကန်ရွေးကောက်ပွဲ မကျင်းပမီ တာတိုပစ်ဒုံးကျည်များကို ပစ်လွှတ်ခဲ့ခြင်းဖြစ်သည်။

မြောက်ကိုရီးယားသည် ယူကရိန်းစစ်ပွဲတွင် ရုရှားသို့ စစ်သားများ စေလွှတ်နေသည်ဆိုသည့် သတင်းများကြောင့် နိုင်ငံတကာ၏ စိုးရိမ်မှု မြင့်တက်နေချိန်တွင် ထိုသို့ စစ်ရေးအရ ရန်စမှုများကို ပြုလုပ်ခဲ့ခြင်းဖြစ်သည်။

မြောက်ကိုရီးယားသည် အမေရိကန်၊ တောင်ကိုရီးယားနှင့် ဂျပန်တို့၏ စစ်ရေး လေ့ကျင့်မှုများကို ရှုတ်ချခဲ့ပြီး နောက် အရှေ့ဘက်ကမ်းလွန် ရေပြင်အတွင်းသို့ တာတိုပစ်ဒုံးကျည် ၇ စင်း ပစ်လွှတ်ခဲ့ခြင်းဖြစ်ကြောင်း ဂျပန် ကာကွယ်ရေးဝန်ကြီးဌာနက ပြောကြားခဲ့သည်။

မြောက်ကိုရီးယား ခေါင်းဆောင် ကင်မ်ကို တွေ့ရစဉ်

ထိုဒုံးကျည်များသည် အမြင့် ၁၀၀ ကီလိုမီတာတွင် အကွာအဝေး ၄၀၀ ကီလိုမီတာအထိ ပျံသန်းခဲ့ပြီး ဂျပန်၏ အထူးစီးပွားရေးဇုန် အပြင်ဘက်ရှိ သမုဒ္ဒရာအတွင်းသို့ ကျသွားခဲ့ကြောင်း ဂျပန်ကာကွယ်ရေးဝန်ကြီး ဗိုလ်ချုပ်ကြီး နာကာတာနီ (Gen Nakatani) က ပြောကြားခဲ့သည်။

ထိုဒုံးကျည်များ ဒေသစံတော်ချိန် နံနက် ၇ နာရီခွဲအချိန်က မြောက်ကိုရီးယား၏ မြောက်ဟွမ်ဟေး (North Hwanghae) ပြည်နယ်၊ ဆာရီဝန် (Sariwon) မြို့အနီးမှ ပစ်လွှတ်ခဲ့ခြင်းဖြစ်သည်ဟု တောင်ကိုရီးယား ပူးတွဲ စစ်ဦးစီးချုပ်များအဖွဲ့ (JCS) က ထုတ်ပြန်ခဲ့သည်။

ထိုဒုံးကျည်ပစ်လွှတ်မှုကို တောင်ကိုရီးယား၊ ဂျပန်နှင့် အခြားဒေသတွင်း မဟာမိတ်များနှင့်အတူ စောင့်ကြည့် နေကြောင်း အမေရိကန်စစ်တပ်က ထုတ်ပြန်ခဲ့သည်။

အောက်တိုဘာ ၂၉ ရက်က တိုက်ချင်းပစ် ဒုံးကျည် ပစ်လွှတ်မှုသည် အမေရိကန်ကို ရည်ရွယ်ခြင်းဖြစ်နိုင်ပြီး ယခု ပဲ့ထိန်းဒုံးကျည်များ ပစ်လွှတ်မှုသည် တောင်ကိုရီးယားကို ရည်ရွယ်ခြင်း ဖြစ်နိုင်သည်ဟု တောင်ကိုရီးယားနိုင်ငံ ဆိုးလ်မြို့တော်ရှိ မြောက်ကိုရီးယားလေ့လာရေးတက္ကသိုလ်၏ ဥက္ကဋ္ဌ ယန်းမူဂျင်း  (Yang Moo-jin) က ပြောကြား ခဲ့သည်။

Source: Nikkei Asia

CNI International News

ဝါရှင်တန်၊ နိုဝင်ဘာ ၆

အမေရိကန်တွင် နိုဝင်ဘာ ၅ ရက်က ပြုလုပ်ခဲ့သည့် သမ္မတရွေးကောက်ပွဲ၌  ရီပတ်ဘလစ်ကန် ကိုယ်စားလှယ် လောင်း ဒေါ်နယ်ထရမ့် (Donald Trump) က ဒီမိုကရက်တစ် ကိုယ်စားလှယ်လောင်း ကာမယ်လာဟားရစ် (Kamala Harris) ကို အနိုင်ရရှိသွားခဲ့ကြောင်း ဘီဘီစီမှ ဖော်ပြခဲ့သည်။

သမ္မတဟောင်း ထရမ့်သည် ရွေးကောက်ပွဲအနိုင်ရရန် လိုအပ်သည့် ကိုယ်စားလှယ်မဲ ၂၇၀ ထက် ကျော်လွန်ပြီး ၂၇၉ မဲရရှိခဲ့သည်။

ဒုသမ္မတ ဟားရစ်သည် ကိုယ်စားလှယ်မဲ ၂၂၃ မဲသာ ရရှိခဲ့သည်ဟု မြန်မာစံတော်ချိန် ည ၇ နာရီခွဲအထိ ရရှိထား သည့် ရလဒ်များအရ သိရသည်။

တစ်နိုင်ငံလုံး အတိုင်းအတာနှင့် ပြည်သူများပေးသည့် မဲအရေအတွက်အရ ထရမ့်သည် မဲ ၇၁ သန်းကျော် ရရှိခဲ့ပြီး ဟားရစ်သည် ၆၆ သန်းကျော်သာ ရရှိခဲ့သည်။

ရာခိုင်နှုန်းအရ ထရမ့်သည် မဲ ၅၁ ရာခိုင်နှုန်း ရရှိထားပြီး ဟားရစ်သည် ၄၇ ဒဿမ ၄ ရာခိုင်နှုန်း ရရှိထားသည်ဟု နောက်ဆုံးရ သတင်းများတွင် ဖော်ပြထားသည်။

Source: BBC

CNI International News

၂၀၂၄ ခုနှစ်၊ နိုဝင်ဘာ ၆

အမေရိကန်သမ္မတရွေးကောက်ပွဲ အနိုင်ရသည်ဟု ရလဒ်များထွက်ပေါ်လာပြီးနောက် ဒေါ်နယ်ထရမ့်ကို အိန္ဒိယဝန် ကြီးချုပ် မိုဒီက ကြိုဆိုဂုဏ်ပြုကြောင်း နိုဝင်ဘာ ၆ ရက်နေ့မှာ သူ၏ ဖေ့စ်ဘွတ်ခ်မှာ ရေးသားထုတ်ပြန်ခဲ့သည်။

မိုဒီက “ ကျနော့်မိတ်ဆွေ ဒေါ်နယ်ထရမ့်ရဲ့ သမိုင်းဝင် ရွေးကောက်ပွဲ အောင်မြင်မှု ရရှိခဲ့တဲ့အပေါ် လှိုက်လှိုက်လှဲလှဲ ကြိုဆို ဂုဏ်ပြုပါတယ်။ သင့်ရဲ့ အရင်သမ္မတ သက်တမ်းကာလမှာ အောင်မြင်မှုတွေ တည်ဆောက်ခဲ့သလို အိန္ဒိယ-အမေရိကန် ပြည့်စုံကျယ်ပြန့်တဲ့ ကမ္ဘာလုံးဆိုင်ရာနဲ့ မဟာဗျူဟာမြောက် မိတ်ဖက်ဆက်ဆံရေးကို ပိုမိုခိုင်မာ အောင် တည်ဆောက်ဖို့ ကျနော်တို့ရဲ့ ပူးပေါင်းဆောင်ရွက်မှုတွေကို ပြန်လည်ဆန်းသစ်စေဖို့ မျှော်မှန်းထားပါတယ်။ ကျနော်တို့ ပြည်သူတွေကို ကောင်းကျိုးတွေ ပိုမိုရရှိစေဖို့နဲ့ ကမ္ဘာလုံးဆိုင်ရာ ငြိမ်းချမ်းရေး၊ တည်ငြိမ်ရေးနဲ့ ချမ်းသာ ကြွယ်ဝရေးကို မြှင့်တင်ဖို့ အတူတကွ ဆောင်ရွက်ကြပါစို့လေ”ဟု ရေးသားထားသည်။

အဆိုပါ ရေးသားထုတ်လွှင့်မှုကို မိုဒီက ဒေါ်နယ်ထရမ့်နှင့် အတူရိုက်ကူးထားသော ဓာတ်ပုံများဖြင့် တင်ခဲ့သည်။

အမေရိကန်သမ္မတရွေးကောက်ပွဲကို နိုဝင်ဘာ ၅ ရက်နေ့မှာ ကျင်းပခဲ့ပြီး ဒေါ်နယ်ထရမ့်က ပြိုင်ဘက် ဟားရစ်ကို အနိုင်ရခဲ့ခြင်းဖြစ်သည်ဟု ဖော်ပြနေကြသည်။

CNI International News

တိုင်ပေ၊ နိုဝင်ဘာ ၆

အမေရိကန်ရွေးကောက်ပွဲတွင် မည်သူပဲ အနိုင်ရသည်ဖြစ်စေ ထိုင်ဝမ်သည် မိမိကိုယ်ကိုယ် ခုခံကာကွယ်ရန် သန္နိဋ္ဌာန်ချထားကြောင်း ထိုင်ဝမ်ကာကွယ်ရေးဝန်ကြီး ဝယ်လင်တန် ကူး (Wellington Koo) က နိုဝင်ဘာ ၅ ရက်တွင် ပြောကြားခဲ့သည်။

ရီပတ်ဘလစ်ကန် ကိုယ်စားလှယ်လောင်း ဒေါ်နယ်ထရမ့် (Donald Trump) ကမူ ထိုင်ဝမ်အနေဖြင့် အမေရိကန်၏ အကာအကွယ်ကို ရယူမှုအတွက် အခကြေးငွေ ပေးသင့်ကြောင်းနှင့် ထိုင်ဝမ်သည် အမေရိကန်၏ တစ်ပိုင်းလျှပ်ကူး ပစ္စည်းစျေးကွက်ကို ခိုးယူနေကြောင်း စွပ်စွဲခဲ့ဖူးသည်။

"အမေရိကန်ရွေးကောက်ပွဲမှာ ဘယ်သူပဲအနိုင်ရရ ကိစ္စမရှိပါဘူး။ ထိုင်ဝမ်ဟာ ကိုယ့်ကိုယ်ကို ကာကွယ်သွားဖို့ သန္နိဋ္ဌာန် ချထားတယ်ဆိုတာကို သူတို့သိထားပါတယ်။ ထိုင်ဝမ်ရဲ့ စီးပွားရေး၊ လုံခြုံရေးနဲ မဟာဗျူဟာမြောက် ပထဝီနိုင်ငံရေး ရပ်တည်ချက်ကိုလည်း ကာကွယ်သွားမှာပါ" ဟု ကူးက လွှတ်တော်တွင် သတင်းထောက်များကို ပြောကြားခဲ့သည်။

ထိုင်ဝမ်သည် မိမိကိုယ်ကိုယ် ကာကွယ်ရေး စွမ်းဆောင်ရည်များကို အဆက်မပြတ် မြှင့်တင်ရန် အစိုးရက လုပ်ဆောင်နေသည်ဟုလည်း ၎င်းက ဆိုသည်။

"ထိုင်ဝမ်ရေလက်ကြားမှာ ငြိမ်းချမ်းရေးနဲ့ တည်ငြိမ်းရေးကို ထိန်းသိမ်းမယ့် ကျနော်တို့ရဲ့ ခံယူချက်ကို ကမ္ဘာက သိအောင်ပြခဲ့ပြီး ဖြစ်ပါတယ်။ ထိုင်ဝမ်ရဲ့ မဟာဗျူဟာမြောက် အရေးပါတဲ့ တန်ဖိုးကိုလည်း ကမ္ဘာက သိရှိခဲ့ပြီး ဖြစ်ပါတယ်" ဟု ကူးက ပြောကြားခဲ့သည်။

ထိုင်ဝမ် ကာကွယ်ရေးဝန်ကြီး ဝယ်လင်တန်ကူးကို တွေ့ရစဉ်

အမေရိကန်သည် သမ္မတရွေးကောက်ပွဲ ပြုလုပ်ပြီးပါက ထိုင်ဝမ်အပေါ် ထောက်ခံမှု ပြောင်းလဲဖွယ်ရှိသဖြင့် ထိုင်ဝမ်သည် အစွန့်ပစ်ခံ အစိတ်အပိုင်းတစ်ခု ဖြစ်လာလိမ့်မည်ဟု တရုတ်က ဝါဒဖြန့်နေကြောင်း ထိုင်ဝမ်၏ လုံခြုံရေး စာတမ်းတွင် ဖော်ပြသည်။

ပြီးခဲ့သည့် သီတင်းပတ်ကလည်း တရုတ်၏ ထိုင်ဝမ်ရေးရာရုံးက ထရမ့်သာ သမ္မတဖြစ်လာမည်ဆိုပါက ထိုင်ဝမ်သည် စွန့်ပစ်ခံရလိမ့်မည်ဖြစ်ကြောင်း ပြောကြားခဲ့သည်။

ထိုအကြောင်းအရာနှင့်ပတ်သက်ပြီး ရိုက်တာသတင်းဌာန၏ မှတ်ချက်ပေးရန် တောင်းဆိုမှုကို တုန့်ပြန်ခဲ့ခြင်း မရှိပေ။

ထိုင်ဝမ်သည် ဂျပန်နှင့် တောင်ကိုရီးယားတို့နည်းတူ အမေရိကန်နှင့် တရားဝင် ကာကွယ်ရေး သဘောတူစာချုပ် ချုပ်ဆိုထားခြင်း မရှိသော်လည်း အမေရိကန်သည် ထိုင်ဝမ်အတွက် အရေးအကြီးဆုံး နိုင်ငံတကာ ထောက်ခံသူ ဖြစ်ပြီး လက်နက်များ ရောင်းချပေးနေသည့် နိုင်ငံဖြစ်သည်။

ထို့ပြင် ထိုင်ဝမ်တပ်ဖွဲ့ လက်နက်စနစ်များနှင့် စစ်သင်တန်းများ လေ့ကျင့်သင်ကြားပေးရန် ထိုင်ဝမ်ကျွန်းပေါ်တွင် အမေရိကန်တပ်ဖွဲ့ဝင် အနည်းငယ်ရှိကြောင်း ထိုင်ဝမ်အစိုးရက ပြောကြားခဲ့သည်။

Source: ရိုက်တာ

CNI International News

၂၀၂၄ ခုနှစ်၊ နိုဝင်ဘာ ၆

အမေရိကန်တွင် ပြုလုပ်နေသည့် သမ္မတရွေးကောက်ပွဲတွင် ရီပတ်ဘလစ်ကန် ကိုယ်စားလှယ်လောင်း ဒေါ်နယ်ထရမ့်နှင့် ဒီမိုကရက်တစ် ကိုယ်စားလှယ်လောင်း ကာမယ်လာဟားရစ်တို့အကြား ပြိုင်ဆိုင်မှု ပြင်းထန်နေသည်။

မြန်မာစံတော်ချိန် နံနက် ၁၁ နာရီ ၅၀ မိနစ်အချိန်တွင် ရရှိထားသည့် သတင်းများအရ ထရမ့်က သမ္မတရွေးချယ် ရေးအဖွဲ့ (electoral college) ၏ မဲ ၂၃၀ ရရှိထားပြီး ဟားရစ်က မဲ ၂၁၀ ရရှိထားသည်။

ကိုယ်စားလှယ်လောင်း တစ်ဦးအနေဖြင့် ရွေးကောက်ပွဲတွင် အနိုင်ရရှိရန်အတွက် electoral college မဲ ၂၇၀ ရရှိရန်လိုအပ်သည်။ 

Source: AP

CNI International News

ဆစ်ဒနီ၊ နိုဝင်ဘာ ၆

ကနေဒါနိုင်ငံတွင် နိုဝင်ဘာ ၅ ရက်က ဟိန္ဒူဘုရားကျောင်းတစ်ကျောင်း ဖျက်ဆီးခံရမှုအပေါ် အလွန်စိုးရိမ်ကြောင်း အိန္ဒိယနိုင်ငံခြားရေးဝန်ကြီး ဂျိုင်ရှန်ကာ(Jaishankar)က ပြောကြားခဲ့သည်ဟု ရိုက်တာမှ ဖော်ပြခဲ့သည်။

"ကနေဒါက ဟိန္ဒူဘုရားကျောင်းမှာ မနေ့က ဖြစ်သွားခဲ့တဲ့ အဖြစ်အပျက်ဟာ အရမ်းစိုးရိမ်စရာ ကောင်းပါတယ်" ဟု ဂျိုင်ရှန်ကာက ဩစတြေးလျနိုင်ငံ ကန်ဘာရာ (Canberra) မြို့တော်သို့ ရောက်ရှိနေချိန်  သတင်းထောက်များ ကို ပြောကြားခဲ့သည်။

ကနေဒါနိုင်ငံတွင် ၂၀၂၃ ခုနှစ်၌ ဆစ်ခ်ခွဲထွက်ရေး ခေါင်းဆောင်တစ်ဦး သတ်ဖြတ်ခံရမှုနှင့် ပတ်သက်ပြီး ကနေဒါ အစိုးရက အိန္ဒိယသံတမန် ၆ ဦးကို နယ်နှင်ခဲ့ပြီးနောက် သီတင်းပတ် အနည်းငယ်အကြာမှာပဲ ထိုဖြစ်စဉ် ဖြစ်ပွားခဲ့ ခြင်းဖြစ်သည်။

ကနေဒါအစိုးရကမူ ကနေဒါရှိ ဆစ်ခ်တက်ကြွ လှုပ်ရှားသူများကို အိန္ဒိယအစိုးရက ပစ်မှတ်ထား နှိမ်နင်းနေကြောင်း စွပ်စွဲခဲ့ပြီး အိန္ဒိယအစိုးရကမူ ထိုစွပ်စွဲချက်ကို ငြင်းဆိုခဲ့သည်။

ထိုဖြစ်စဉ်များကြောင့် ကနေဒါနှင့် အိန္ဒိယအကြား၊ ဆစ်ခ်တက်ကြွ လှုပ်ရှားသူများနှင့် အိန္ဒိယသံတမန်များအကြား တင်းမာမှုများ မြင့်တက်ခဲ့သည်။

 ဩစတြေးလျ နိုင်ငံခြားရေးဝန်ကြီး ပန်နီဝေါင်ကို တွေ့ရစဉ်

ပြီးခဲ့သည့်လကလည်း ကန်ဘာရာမြို့ရှိ ဟိန္ဒူဘုရားကျောင်း ၂ ကျောင်း ဖျက်ဆီးခံခဲ့ရသည်။

ထိုဖြစ်စဉ်သည် အိန္ဒိယအသိုင်းအဝိုင်းကို စိတ်ပျက်စေခဲ့ကြောင်း ဩစတြေးလျ နိုင်ငံခြားရေးဝန်ကြီး ပန်နီ ဝေါင် (Penny Wong) က ပြောကြားခဲ့သည်။

"ဩစတြေးလျ နိုင်ငံမှာနေတဲ့ လူတိုင်းဟာ ဘေးကင်းလုံခြုံခွင့်နဲ့ လေးစားခံရတဲ့ အခွင့်အရေးတွေ ရှိပါတယ်။ လူတိုင်းဟာ ငြိမ်းချမ်းစွာ ဆန္ဒပြခွင့်၊ ငြိမ်းချမ်းစွာ ထုတ်ဖော် ပြောဆိုခွင့်တွေရှိပါတယ်" ဟု ဝေါင်က သတင်းထောက်များကို ပြေကြားခဲ့သည်။

"အကြမ်းဖက်မှု၊ သွေးထိုးလှုံ့ဆော်မှု၊ အမုန်းတရားပွားမှု ဒါမှမဟုတ် လက်သရမ်း ဖျက်ဆီးမှုတွေ အတွက်တော့ အခွင့်အရေး မရှိပါဘူး" ဟု ၎င်းက ပြောသည်။

ဆစ်ခ်တက်ကြွ လှုပ်ရှားသူများ ပစ်မှတ်ထားခံရသည့် ကနေဒါ၏ စွပ်စွဲချက်နှင့်ပတ်သက်ပြီး ဩစတြေးလျက ကနေဒါ၏ တရားရေး လုပ်ထုံးလုပ်နည်းကို လေးစားမှုရှိကြောင်း ဝေါင်က ပြောကြားခဲ့သည်။

ဂျိုင်ရှန်ကာကမူ အိန္ဒိယသံတမန်များကို နှင်ထုတ်မှုနှင့် သံတမန်များကို အနီးကပ် စောင့်ကြည့်နေသည့် ကနေဒါ၏ လုပ်ဆောင်ချက်များကို လက်မခံနိုင်ကြောင်း ပြောကြားခဲ့သည်။

Source: ရိုက်တာ

CNI International News

ဂျာကာတာ၊ နိုဝင်ဘာ ၅

အင်ဒိုနီးရှားသမ္မတသစ် ပရာဘိုဝို (Prabowo Subianto) သည် နိုင်ငံခြားရေးမူဝါဒ အပြောင်းအလဲ တစ်ခုအနေဖြင့် ယခုသီတင်းပတ်အတွင်း ရုရှားနှင့် ပထမဆုံးအကြိမ် ပူးတွဲစစ်ရေးလေ့ကျင့်မှုကို စတင်ပြုလုပ်ခဲ့ ကြောင်း Nikkei Asia မှ ဖော်ပြခဲ့သည်။

အင်ဒိုနီးရှားသည် ကြားနေ နိုင်ငံခြားရေးမူဝါဒကို ကာလကြာရှည် ကျင့်သုံးခဲ့ပြီး ရုရှား-ယူကရိန်းစစ်ပွဲ သို့မဟုတ် အမေရိကန်-တရုတ် အားပြိုင်မှုတွင် မည်သည့်ဘက်မှ ရပ်တည်ခဲ့ခြင်းမရှိပေ။

သို့သော် သမ္မတသစ် ပရာဘိုဝိုသည် အနောက်နိုင်ငံများ၏ ဖိအားများရှိနေသည့်တိုင် ရုရှားနှင့်ဆက်ဆံရေး မြှင့်တင်မည်ဟု ပြောကြားခဲ့သည်။

"အင်ဒိုနီးရှားနိုင်ငံအတွက် အကျိုးရှိနေသမျှ ကာလပတ်လုံး အခုလို ပထဝီနိုင်ငံရေး အင်အားစုနဲ့ပတ်သက်ပြီး အင်ဒိုနီးရှားဟာ မိတ်ဖက်ဆက်ဆံမှုတွေ ပြုလုပ်သွားပါလိမ့်မယ်" ဟု မဟာဗျူဟာနှင့် နိုင်ငံတကာလေ့လာရေး စင်တာ၏ သုတေသီတစ်ဦးဖြစ်သူ ပီတာ ပန်ဒီ (Pieter Pandie) က ပြောကြားခဲ့သည်။

အင်ဒိုနီးရှားနိုင်ငံ ပါဝင်သည့် အာဆီယံအဖွဲ့သည် ၂၀၂၁ ခုနှစ်ကလည်း ရုရှားနှင့် ပူးတွဲစစ်ရေး လေ့ကျင့်မှုများ ပြုလုပ်ခဲ့သော်လည်း အင်ဒိုနီးရှားသည် ယခင်က ယခုကဲ့သို့ ရုရှားနှင့် တိုက်ရိုက် ပူးတွဲစစ်ရေး လေ့ကျင့်မှုမျိုး ပြုလုပ်ခဲ့ဖူးခြင်း မရှိပေ။

အင်ဒိုနီးရှားစစ်ရေး ပူးတွဲလေ့ကျင့်ရန် ရုရှားစစ်‌သင်္ဘောကို တွေ့ရစဉ်

အင်ဒိုနီးရှားသည် ရုရှားနှင့် ဒေါ်လာ ဘီလျံချီ တန်ကြေးရှိသည့် ကုန်သွယ်ဖက် ဆက်ဆံရေး ရှိသော်လည်း ရုရှား အပေါ် အနောက်နိုင်ငံများ၏ ပိတ်ဆို့မှုများကြောင့် မကြာသေးမီက ရုရှားထံမှ လက်နက်ဝယ်ယူမှုများ လျော့ကျခဲ့ ကြောင်း လေ့လာသူများက ပြောကြားခဲ့သည်။

လက်ရှိတွင် ပရာဘိုဝိုသည် ၂၀၁၈ ခုနှစ်က သဘောတူညီမှု ရရှိခဲ့သည့် ဒေါ်လာ ၁ ဒသမ ၁ ဘီလျံ တန်ကြေးရှိသည့် ရုရှားလုပ် တိုက်လေယာဉ်များ ဝယ်ယူရေး သဘောတူညီချက်ကို ထိန်းသိမ်းထားဆဲဖြစ်သည်။

ထိုအချိန်က ပရာဘိုဝိုသည် ကာကွယ်ရေးဝန်ကြီးအဖြစ် တာဝန်ထမ်းဆောင်ချိန်ဖြစ်ပြီး အမေရိကန်၏ သတိပေး ချက်များ ရှိခဲ့သည့်တိုင် ရုရှားနှင့် တိုက်လေယာဉ် ဝယ်ယူရေး သဘောတူညီချက်ကို ချုပ်ဆိုခဲ့ခြင်းဖြစ်သည်။

ထို့ပြင် ၂၀၂၂ ခုနှစ်တွင် အင်ဒိုနီးရှားက အိမ်ရှင်အဖြစ် လက်ခံကျင်းပသည့် စက်မှုထိပ်သီးနိုင်ငံ ၂၀ (G-20) အစည်းအဝေး၌ ရုရှားကိုမဖိတ်ရန် အနောက်နိုင်ငံများမှ တိုက်တွန်းခဲ့သော်လည်း အင်ဒိုနီးရှားမှ  ရုရှားကို တက်ရောက်ရန် ဖိတ်ကြားခဲ့သည်။

Source: Nikkei Asia