CNI International News

ဘန်ကောက်၊ ဧပြီ ၅

ထိုင်းနိုင်ငံ၊ ဘန်ကောက်မြို့တော်တွင် ဧပြီ ၄ ရက်က ပြုလုပ်သည့် BIMSTEC အစည်းအဝေးကို တက်ရောက်ခဲ့ သည့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ထိုင်းဝန်ကြီးချုပ် ပေတုန်တန်တို့ တွေ့ဆုံ၍ နယ်စပ်အရေး ဆွေးနွေးခဲ့သည်ဟု The Nation မှ ဖော်ပြခဲ့သည်။

၎င်းတို့နှစ်ဦးသည် နယ်စပ်ဖြတ်ကျော် ရာဇဝတ်မှုများ၊ မူးယစ်ဆေးဝါးပြဿနာ၊ PM 2.5 လေထုညစ်ညမ်းမှုနှင့် ရေလွှမ်းမိုးမှု တားဆီးရေး စီမံချက်များနှင့်ပတ်သက်ပြီး ဆွေးနွေးခဲ့ကြသည်။

ပေတုန်တန်သည် ဘန်ကောက်မြို့တော်ရှိ ရှန်ဂရီလာဟိုတယ်တွင် ဆဋ္ဌမအကြိမ်မြောက် BIMSTEC အစည်းအဝေးနှင့် ဆက်စပ် အစည်းအဝေးများကို သဘာပတိအဖြစ် ကြီးမှူးကျင်းပခဲ့သည်။

ထိုအစည်းအဝေးသည် (၇)နှစ်အတွင်း ပထမဆုံးအကြိမ်အဖြစ် အဖွဲ့ဝင် နိုင်ငံခေါင်းဆောင်များကိုယ်တိုင် တက်ရောက်သည့် အစည်းအဝေး ဖြစ်ခဲ့သည်။

ကဏ္ဍစုံ နည်းပညာနှင့် စီးပွားရေးပူးပေါင်းဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) အဖွဲ့ထဲတွင် ထိုင်း၊ မြန်မာ၊ အိန္ဒိယ၊ ဘင်္ဂလားဒေ့ရှ်၊ နီပေါ၊ သီရိလင်္ကာနှင့် ဘူတန်နိုင်ငံတို့ ပါဝင်သည်။

BIMSTEC အစည်းအဝေးကို တက်ရောက်လာသည့် ခေါင်းဆောင်များကို တွေ့ရစဉ် 

၁၉၉၇ ခုနှစ်ကတည်းက ထူထောင်ခဲ့သည့် ထိုအဖွဲ့သည် ကုန်သွယ်ရေး၊ ရင်းနှီးမြှုပ်နှံရေး၊ ချိတ်ဆက် ဆောင်ရွက် ရေး၊ လုံခြုံရေးနှင့် ယဉ်ကျေးမှု ဖလှယ်ရေးတို့ကို အာရုံစိုက် လုပ်ဆောင်ခဲ့သည်။

BIMSTEC အစည်းအဝေး မတိုင်မီ ပေတုန်တန်က ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံခဲ့ပြီး သဘာဝ ဘေးအန္တရာယ် ကာကွယ်တားဆီးရေး၊ နယ်စပ်ဖြတ်ကျော် ရာဇဝတ်မှုများ၊ မူးယစ်ဆေးဝါးနှင့် တရားမဝင် မှောင်ခို ကူးမှုတို့ အပါအဝင် နှစ်နိုင်ငံကြား ပူးပေါင်းဆောင်ရွက်ရေး ကိစ္စများကို ဆွေးနွေးခဲ့သည်။

ထို့ပြင် ကျားဖြန့်လုပ်ငန်းများကို တိုက်ဖျက်ရေး၊ ကျားဖြန့်စင်တာများတွင် အတင်းအဓမ္မ စေခိုင်းခံခဲ့ရသည့် နစ်နာ သူများကို နေရပ်ပြန်ပို့ရေး ကိစ္စများ၌ ပူးပေါင်းဆောင်ရွက်မှုများကိုလည်း ဆွေးနွေးခဲ့ကြသည်။

လိမ်ညာပြီး ဖုန်းခေါ်ဆိုမှုများနှင့် မက်ဆေ့ချ် ပေးပို့မှုများကို သိသာစွာ လျှော့ချနိုင်ခဲ့သည့် ထိုင်းနိုင်ငံ၏ တင်းကျပ် သော စီမံကိန်းများအကြောင်းကို ပေတုန်တန်က အသားပေးပြောဆိုခဲ့သည်။

ထို့နောက် ဆိုက်ဘာရာဇဝတ်မှုများကို ထိရောက်စွာ နှိမ်နင်းသည့် အားထုတ် ကြိုးပမ်းမှုများကိုလည်း ဆက်လက် လုပ်ဆောင်ကြရန် လုံခြုံရေးအေဂျင်စီများကို ညွှန်ကြားထားသည်။

ထို့ပြင် ခေါင်းဆောင်နှစ်ဦးသည် တောမီးလောင်ကျွမ်းမှု၊ ဖုန်ထူထပ်မှုနှင့် မီးခိုးမြူများကို တားဆီးဖြေရှင်းရန် အတွက် "Clear Sky Strategy" ဟုခေါ်သည့် အစီအစဉ်၏ အရေးကြီးပုံကိုလည်း အလေးထား ပြောဆိုခဲ့သည်။

BIMSTEC အစည်းအဝေး ကျင်းပနေစဉ်

လေထုညစ်ညမ်းမှုများကို လျှော့ချရန် ရည်ရွယ်ထားသည့် ထိုအစီအစဉ်တွင် ထိုင်း၊ လာအိုနှင့် မြန်မာနိုင်ငံတို့ ပါဝင်သည်။

ထို့ပြင် လာမည့် မိုးရာသီအတွက် ကြိုတင်ပြင်ဆင်မှု အနေဖြင့် နှစ်နိုင်ငံကြားရှိ မြစ်ချောင်းများနှင့် ရေလမ်းကြောင်း များတွင် ပိတ်ဆို့နေသည့် အရာများကို ဖယ်ရှားရှင်းလင်းရေး လုပ်ငန်းစဉ်အား အရှိန်မြှင့် လုပ်ဆောင်ခြင်းဖြင့် ရေကြီးရေလျှံမှုများ မဖြစ်စေရန် နှစ်နိုင်ငံအစိုးရကြား ပူးပေါင်းဆောင်ရွက်ရန် သဘောတူခဲ့ကြသည်။

ဆက်လက်ပြီး  နှစ်နိုင်ငံအကြား စပါးအထွက်နှုန်းတိုးရေး၊ သဘာဝပတ်ဝန်းကျင်ထိခိုက်မှု လျှော့ချရေးနှင့် စိုက်ခင်း များ မီးရှို့ရှင်းလင်းမှုများ လျှော့ချရေးကဲ့သို့ စိုက်ပျိုးရေးကဏ္ဍ တိုးတက်ကောင်းမွန်လာစေရန် အသိပညာများ ဖလှယ်သွားမည်ဖြစ်သည်။

မွေးမြူရေးကဏ္ဍတွင်လည်း ကြက်၊ ကျွဲ၊ နွားနှင့် ဝက် မွေးမြူရေး လုပ်ငန်များကို မြှင့်တင်ခြင်းတို့ ပါဝင်ပြီး တောင်သူလယ်သမားများ၏ ဝင်ငွေနှင့် ဘေးကင်းလုံခြုံမှုကို မြှင့်တင်ပေးရန် ပူးပေါင်းဆောင်ရွက်သွားကြမည်ဟု သတင်းတွင် ဖော်ပြခဲ့သည်။

Source: The Nation

CNI News
၂၀၂၅ ခုနှစ်၊ ဧပြီ ၄

ပြီးခဲ့သည့် သီတင်းပတ်က အရှေ့တောင်အာရှတွင် မြန်မာနိုင်ငံ အလယ်ပိုင်းအား ဗဟိုပြု၍ ပြင်းထန်စွာ ငလျင်လှုပ်ခတ်ခဲ့ပြီး ထိုင်းနိုင်ငံနှင့် အခြားနေရာ‌ ဒေသများတွင် ထိခိုက်ပျက်စီးမှုများရှိခဲ့ကြောင်း ကုလသမဂ္ဂ အထွေထွေ အတွင်းရေးမှူးချုပ် အန်တိုနီယို ဂူတာရက်စ်က ၂၀၂၅ ခုနှစ်၊ ဧပြီလ ၃ ရက်နေ့တွင် သတင်းစာ ရှင်းလင်းပွဲ၌ ပြောကြားခဲ့သည်။

ထိုသို့ ပြင်းထန်စွာ ငလျင်လှုပ်ခတ်မှုကြောင့် ယခုမြန်မာနိုင်ငံသည် ထိခိုက်ပျက်စီးမှုများ ဖြစ်ပေါ်ခဲ့ရပြီး သေဆုံးသူ ဦးရေ ၃၀၀၀ နှင့် ဒဏ်ရာရရှိသူ အများအပြား ရှိနေပြီး အပျက်အစီးများအောက်တွင် ပိတ်မိနေသူများလည်း ရှိနေ သေးကြောင်း ၎င်းက ပြောသည်။

ထို့ပြင် မြန်မာနိုင်ငံ၏ လူဦးရေ ၃ ပုံ ၁ ပုံခန့် (သန်း ၂၀)သည် လူသားချင်းစာနာ ‌ထောက်ထားမှုဆိုင်ရာ အကူအညီ များ လိုအပ်နေသလို သန်းနှင့်ချီ နေအိမ်များအား စွန့်ခွာခဲ့ရကြောင်း ဂူတာရက်စ်က ပြောကြားခဲ့သည်။

ထို့ကြောင့် ကုလသမဂ္ဂ၏ အရေးပေါ်ကယ်ဆယ်ရေး ညှိနှိုင်းရေးမှူး တွန်မ် ဖလက်ချာအား မြန်မာနိုင်ငံသို့ စေလွှတ် လိုက်ကြောင်း အထွေထွေအတွင်းရေးမှူးချုပ်က ပြောကြားခဲ့သည်။

အလားတူ ငလျင်ဘေးဒဏ်သင့် ဒေသများအတွက် ရန်ပုံ‌ငွေများ လိုအပ်နေ၍ အကူအညီပေးကြရန် နိုင်ငံတကာ အသိုင်းအဝိုင်းအား ကုလသမဂ္ဂမှ ‌တောင်းဆိုပါကြောင်း ကုလသမဂ္ဂအထွေထွေအတွင်းရေးမှူးချုပ် အန်တိုနီယို ဂူတာရက်စ်က ပြောကြားခဲ့သည်။

မြန်မာနိုင်ငံရှိ ပြည်သူများအတွက် အကူအညီများ လိုအပ်နေသည့် အချိန်အတွင်း ငြိမ်းချမ်‌ရေးနှင့် အသက်ကယ် ထောက်ပံ့ကူညီမှုများအား ဆက်လက် တွန်းအားပေးသွားမည် ဖြစ်ကြောင်း၊ အလားတူ ကုလသမဂ္ဂ၏ မြန်မာနိုင်ငံ အထူးကိုယ်စားလှယ် Julie Bishop ကိုလည်း လာမည့်ရက်ပိုင်းအတွင်း မြန်မာနိုင်ငံသို့ စေလွှတ်သွားမည်ဟု ၎င်းက ပြောကြားခဲ့သည်။

မြန်မာနိုင်ငံတွင် မတ်လ ၂၈ ရက်က ပြင်းအား ၇ ဒသမ ၇ အဆင့်ရှိ အလွန်အားပြင်းသော ငလျင်ကြီး တစ်ခုနှင့် နောက်ဆက်တွဲ ငလျင်ငယ်များ လှုပ်ခတ်ခဲ့သောကြောင့် လူပေါင်း ၃၀၀၀ ကျော်သေဆုံးပြီး ၄၀၀၀ ကျော်ဒဏ်ရာ ရရှိခဲ့ကာ လူသားချင်းစာနာမှုဆိုင်ရာ အကူအညီများလည်း လိုအပ်လျက် ရှိသည်။

မြန်မာငလျင်ဘေးသင့် ပြည်သူများကို ကူညီကယ်ဆယ်နိုင်ရေးအတွက် အမေရိကန်၊ အိန္ဒိယ၊ ဩစတြေးလျ၊ ဂျပန် လေးနိုင်ငံပါဝင်သည့် Quad အဖွဲ့က အမေရိကန် ဒေါ်လာ သန်း ၂၀ ထောက်ပံ့မည်ဟု ဧပြီ ၄ ရက်တွင် ထုတ်ပြန်ခဲ့ သည်။

CNI International News

ဝါရှင်တန်၊ ဧပြီ ၄

အမေရိကန်သမ္မတ ဒေါ်နယ်ထရမ့် (Donald Trump) သည် အမေရိကန်သို့ တင်ပို့သည့် ကုန်စည်များ အားလုံး အပေါ်  အပြန်အလှန် အကောက်ခွန်များ တိုးမြှင့်ကောက်ခံမည်ဟု ဧပြီ ၂ ရက်က ကြေညာခဲ့သည်ဟု ရိုက်တာမှ ဖော်ပြခဲ့သည်။

ထို့ကြောင့် အမေရိကန် ကုန်စည်များကိုလည်း အခွန်များ ပြန်လည်ကောက်ခံမည့် ခြိမ်းခြောက်မှုများ ထွက်ပေါ် လာခဲ့သည်ဟု ရိုက်တာမှ ဖော်ပြခဲ့သည်။

ကမ္ဘာတစ်ဝန်းရှိ ကုမ္ပဏီများနှင့်အစိုးရများသည် ကမ္ဘာလုံးဆိုင်ရာ မဟာမိတ်ဆက်ဆံရေးကို ထိခိုက်သွားစေနိုင် သည့် ကုန်သွယ်ရေးစစ်ပွဲ အရှိန်မြင့်တက်လာမှု၏ ဂယက်ရိုက်ခတ်မှုများကြောင့် ထိခိုက်နစ်နာမှုများ ရှိလာနိုင်မည့် အခြေအနေကို လေ့လာသုံးသပ်နေကြသည်။

ထရမ့်၏ အလုံးစုံ အခွန်ကောက်ခံမှု ကြေညာချက်ကြောင့် ကမ္ဘာလုံးဆိုင်ရာ အခင်းအကျင်းကို ဆယ်စုနှစ် များစွာကြာ ပုံဖော်ပေးခဲ့သည့် ကုန်သွယ်ရေးတွင် အစိုးရ၏ထိန်းချုပ်မှု လျှော့ချသည့်ခေတ် အဆုံးသတ် သွားစေနိုင်သည်ဟုလည်း ကျွမ်းကျင်သူများက ပြောကြားခဲ့သည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

ထို့ပြင် ထရမ့်၏ ကြေညာချက်ကြောင့် ကမ္ဘာတစ်ဝန်းရှိ စျေးကွက်များ ကမောက်ကမ ဖြစ်သွားခဲ့ပြီး အခြားနိုင်ငံ များမှ ခေါင်းဆောင်များ၏ ဝေဖန်ရှုတ်ချမှုများလည်း ထွက်ပေါ်လာခဲ့သည်။

အမေရိကန်သို့ တင်ပို့သည့် ကုန်စည်အားလုံးအပေါ် အခြေခံ အကောက်ခွန် ၁၀ ရာခိုင်နှုန်း စည်းကြပ်ကောက်ခံ မည်ဖြစ်ပြီး အမေရိကန်၏ အဓိကကုန်သွယ်ဖက် နိုင်ငံအချို့အပေါ် အခွန်များကို ၁၀ ရာခိုင်နှုန်းထက် ပိုပြီး တိုးမြှင့် ကောက်ခံမည်ဟု ထရမ့်က ကြေညာခဲ့ခြင်းဖြစ်သည်။

အမေရိကန်၏ သွင်းကုန်အပေါ် စည်းကြပ်ကောက်ခံသည့် အခွန်များသည် ရာစုနှစ် တစ်စုကျော်အတွင်း အမြင့်ဆုံး နှုန်းထားဖြစ်ကြောင်း အမေရိကန်၏ ဘဏ္ဍာရေးနှင့် ဘဏ်လုပ်ငန်း စီးပွားရေးလုပ်ငန်းစုဖြစ်သည့် Fitch Ratings ကုမ္ပဏီက ပြောကြားခဲ့သည်။

ထရမ့်၏ ကြေညာချက်ကို ရင်းနှီးမြှုပ်နှံသူများက ဧပြီ ၃ ရက်တွင် ကြားသိခဲ့ရပြီးနောက် ဘေဂျင်းနှင့် တိုကျိုရှိ စတော့ရှယ်ယာ စျေးကွက်များအပြင် ဥရောပ၏ စတော့ရှယ်ယာများလည်း ကျဆင်းသွားခဲ့သည်။

ထရမ့်၏ အခွန်ကောက်ခံမှုကြောင့် ဥရောပသမဂ္ဂ စီးပွားရေးသည် ယူရို ၇၅၀ ဘီလျံ (ဒေါ်လာ ၈၃၃ ဒသမ ၆၃) ထိခိုက်နစ်နာသွားလိမ့်မည်ဟု ဂျာမနီနိုင်ငံ၏ IW သုတေသနအင်စတီကျုက ခန့်မှန်းခဲ့သည်။

အမေရိကန်ကို တင်သွင်းသည့် ကုန်စည်များအတွက် အခွန် ၅၄ ရာခိုင်နှုန်း ပေးဆောင်ရတော့မည့် ကမ္ဘာ့ ဒုတိယစီးပွားရေး အင်အားအကြီးဆုံး တရုတ်နိုင်ငံကမူ အမေရိကန်၏ ပို့ကုန်များအပေါ်ကိုလည်း တန်ပြန် အခွန်ကောက်ခံသည့် အစီအစဉ်များ ပြုလုပ်သွားမည်ဟု ပြောကြားခဲ့သည်။

Source: ရိုက်တာ

CNI International News

၂၀၂၅ ခုနှစ်၊ ဧပြီ ၄

အိန္ဒိယဝန်ကြီးချုပ် မိုဒီနှင့် ထိုင်းဝန်ကြီးချုပ်ဟောင်း သက်ဆင် ရှင်နာဝပ်တို့ ၂၀၂၅ ခုနှစ်၊ ဧပြီ ၃ ရက်က ထိုင်းနိုင်ငံ၊ ဘန်ကောက်မြို့မှာ တွေ့ဆုံ ဆွေးနွေးခဲ့ကြသည်။

ဝန်ကြီးချုပ် မိုဒီက “ထိုင်းဝန်ကြီးချုပ်ဟောင်း မစ္စတာ သက်ဆင်ရှင်နာဝပ်နဲ့ တွေ့ဆုံရတာ ဝမ်းသာပါတယ်။ သူဟာ  အုပ်ချုပ်ရေးနဲ့ မူဝါဒချမှတ်ခြင်းဆိုင်ရာ ကိစ္စရပ်တွေမှာ အတွေ့အကြုံများစွာရှိပါတယ်။ သူဟာ အိန္ဒိယရဲ့ မိတ်ဆွေ ကောင်း တစ်ဦးဖြစ်ပြီး Atal Ji နဲ့ အလွန်နွေးထွေးသော ဆက်ဆံရေးရှိပါတယ်”ဟု သူ၏ လူမှုကွန်ရက်မှာ ရေးသား ထုတ်ပြန်ခဲ့သည်။

ထို့နောက် မစ္စတာသက်ဆင်ရှင်နာဝပ်နှင့် တွေ့ဆုံစဉ် အိန္ဒိယ-ထိုင်း ပူးပေါင်းဆောင်ရွက်မှုနှင့် သက်ဆိုင်ရာ နိုင်ငံများ၏ ပြည်သူများကို ဘယ်လို အကျိုးကျေးဇူးများ ပေးမလဲဆိုခြင်းကို အကျယ်တဝင့် ဆွေးနွေးခဲ့ကြောင်း၊  ကာကွယ်ရေး၊ ကုန်သွယ်မှု၊ ယဉ်ကျေးမှုနှင့် အခြားအရာများကဲ့သို့သော နယ်ပယ်များတွင် ကြီးမားသော အလားအလာများကိုလည်း ဆွေးနွေးခဲ့ကြောင်း အိန္ဒိယဝန်ကြီးချုပ် မိုဒီက ပြောသည်။

ဝန်ကြီးချုပ် မိုဒီသည် ထိုင်းနိုင်ငံက အိမ်ရှင်အဖြစ် လက်ခံကျင်းပသည့် BIMSTEC ထိပ်သီး အစည်းအဝေးကို တက်ရောက်ရန် ရောက်ရှိနေစဉ် ထိုင်းဝန်ကြီးချုပ်ဟောင်း သက်ဆင်နှင့် တွေ့ဆုံ ဆွေးနွေးခဲ့ခြင်း ဖြစ်သည်။

ထိုင်းဝန်ကြီးချုပ်ဟောင်း သက်ဆင်နဲ့ အိန္ဒိယဝန်ကြီးချုပ် မိုဒီတို့တွေ့ဆုံစဉ် 

သက်ဆင်သည် လက်ရှိ ထိုင်းဝန်ကြီးချုပ် ပေတုန်တန်၏ ဖခင်ဖြစ်သလို ထိုင်းအစိုးရအဖွဲ့ကို နောက်ကွယ်ကနေ ဩဇာလွှမ်းမိုးထားသူလည်း ဖြစ်သည်။

အလားတူ အာဆီယံအလှည့်ကျဥက္ကဋ္ဌ မလေးရှားဝန်ကြီးချုပ်ကလည်း သက်ဆင်ကို အကြံပေးအဖြစ် ခန့်အပ်ထား သည်။

အိန္ဒိယဝန်ကြီးချုပ် မိုဒီသည် ထိုင်းဝန်ကြီးချုပ် ပေတုန်တန်နှင့်လည်းကောင်း၊ မြန်မာနိုင်ငံ၏ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့်လည်းကောင်း သီးသန့်စီ တွေ့ဆုံ၍ ဆွေးနွေးခဲ့သေးသည်။

အိန္ဒိယဝန်ကြီးချုပ် မိုဒီ တက်ရောက်နေသည့် BIMSTEC အဖွဲ့ထဲတွင် ထိုင်း၊ မြန်မာ၊ အိန္ဒိယ၊ ဘင်္ဂလားဒေ့ရှ်၊ နီပေါ၊ သီရိလင်္ကာနှင့် ဘူတန်နိုင်ငံတို့ ပါဝင်သည်။

အဆိုပါ အဖွဲ့ဝင်နိုင်ငံများအကြား စီးပွားရေး ပူးပေါင်းဆောင်ရွက်မှုများကို မြှင့်တင်ရန် ရည်ရွယ်ချက်ဖြင့် BIMSTEC အစည်းအဝေးများ ပြုလုပ်လေ့ရှိသည်။

CNI News

၂၀၂၅ ခုနှစ်၊ ဧပြီ ၄

ထိုင်းနိုင်ငံ၊ ဘန်ကောက်မြို့မှာ ဧပြီ ၄ ရက်က ကျင်းပနေသည့် ကဏ္ဍစုံ နည်းပညာနှင့် စီးပွားရေး ပူးပေါင်း ဆောင်ရွက်ရေးဆိုင်ရာ ဘင်္ဂလားပင်လယ်အော် အစီအစဉ် (BIMSTEC) ထိပ်သီးခေါင်းဆောင်များ အစည်းအဝေး တွင် အချက် ၇ ချက် ဆွေးနွေးခဲ့ကြောင်း သိရသည်။

BIMSTEC ထိပ်သီးခေါင်းဆောင်များ အစည်းအဝေးကို ထိုင်းနိုင်ငံက အိမ်ရှင်အဖြစ် လက်ခံ ကျင်းပနေခြင်း ဖြစ်သည်။ 

BIMSTEC ထိပ်သီး ခေါင်းဆောင်များ အစည်းအဝေးတွင် (၁) ကုန်သွယ်ရေး၊ ရင်းနှီးမြှုပ်နှံမှုနှင့် ဖွံ့ဖြိုးတိုးတက်မှု အခြေအနေများ၊ (၂) ပတ်ဝန်းကျင်နှင့် ရာသီဥတုပြောင်းလဲမှု အခြေအနေများ၊ (၃) လုံခြုံရေး အခြေအနေများ၊ (၄) စိုက်ပျိုးရေးနှင့် အစားအသောက်လုံခြုံရေး အခြေအနေများ၊ (၅) လူချင်း(နိုင်ငံချင်း) ထိတွေ့ဆက်ဆံမှု အခြေအနေ များ၊ (၆) သိပ္ပံ၊ နည်းပညာနှင့် တီထွင်ဆန်းသစ်မှု အခြေအနေများ၊ (၇) အလှည့်ကျ အိမ်ရှင်အဖြစ် လက်ခံရေး အခြေအနေများ စသည့် အချက် ၇ ချက်ကို ဆွေးနွေးခဲ့ကြသည်။

အဆိုပါ အစည်းအဝေးသို့ အိန္ဒိယ၊ မြန်မာ၊ ထိုင်း၊ ဘင်္ဂလားဒေ့ရှ်၊ နီပေါ၊ ဘူတန်၊ သီရိလင်္ကာ စသည့် နိုင်ငံပေါင်း ၇ နိုင်ငံမှ ခေါင်းဆောင်များ တက်ရောက်ခဲ့သည်။

မြန်မာနိုင်ငံကတော့ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ကိုယ်တိုင် တက်ရောက်ခဲ့သည်။

BIMSTEC အဖွဲ့ထဲတွင် ထိုင်း၊ မြန်မာ၊ အိန္ဒိယ၊ ဘင်္ဂလားဒေ့ရှ်၊ နီပေါ၊ သီရိလင်္ကာနှင့် ဘူတန်နိုင်ငံတို့ ပါဝင်ပြီး အဖွဲ့ဝင်နိုင်ငံများအကြား စီးပွားရေး ပူးပေါင်းဆောင်ရွက်မှုများကို မြှင့်တင်ရန် ရည်ရွယ်ချက်ဖြင့် အစည်းအဝေးများ ပြုလုပ်လေ့ရှိသည်။

CNI International News

တိုကျို၊ ဧပြီ ၄

ဂျပန်နိုင်ငံရှိ အများပြည်သူသုံး သန့်စင်ခန်းများတွင် အမျိုးသမီးလစဉ်သုံးပစ္စည်းများ အခမဲ့ထားရှိပေးရန် တောင်းဆိုသည့် အမျိုးသမီးနိုင်ငံရေးသမားတစ်ဦးသည် အသက်အန္တရာယ်ကို ခြိမ်းခြောက်သည့်စာများ အပါအဝင် အီးမေးလ် အစောင် ၈၀၀၀ ခန့် ရရှိခဲ့သည်ဟု South China Morning Post မှ ဖော်ပြခဲ့သည်။

Mie(မိဏ်း)စီရင်စုဆိုင်ရာ အဖွဲ့အစည်း၏ အဖွဲ့ဝင်တစ်ဦးဖြစ်ပြီး ဂျပန်ကွန်မြူနစ်ပါတီဝင် တစ်ဦးဖြစ်သည့် အသက် ၂၇ နှစ်အရွယ် အာရာကာယိုရှီဒါ (Ayaka Yoshida)က အများပြည်သူ သန့်စင်ခန်းများတွင် အိမ်သာသုံးစက္ကူများ အပြင် လစဉ်သုံးပစ္စည်းများကို ထားရှိစေချင်သည်ဟု မတ်လ ၂၅ ရက်က လူမှုမီဒီယာ၌ တင်ခဲ့ပြီးနောက် ဝေဖန်မှု များနှင့် ကြုံတွေ့ခဲ့ရခြင်းဖြစ်သည်။

၎င်း၏ လူမှုမီဒီယာပို့စ်ကို ဒေါသတကြီး တုန့်ပြန်မှုများရှိခဲ့ပြီး စာတစ်စောင်ထဲတွင် “သူ့ရဲ့ အသက်အရွယ်အရဆိုရင် အရေးပေါ် လစဉ်သုံးပစ္စည်းကို သွားလေရာ သယ်သွားသင့်တယ်ဆိုတာ သိထားသင့်တယ်”ဟု မှတ်ချက်ပြု ရေးသားခဲ့သည်။

ဂျပန်နိုင်ငံအတွင်းက တစ်နေရာကိုတွေ့ရစဉ်

ယိုရှီဒါ၏ ပို့စ်ကြောင့် မတ်လ ၂၈ ရက် ည ၈ နာရီအချိန်အထိ လေးရက်နီးပါး အချိန်အတွင်း ဝေဖန်ခြိမ်းခြောက် သည့် အီးမေးလ်အစောင်ရေ ၈၀၀၀ နီးပါး ရရှိခဲ့သည်။

ထိုအီးမေးလ်များသည် လိပ်စာတစ်ခုတည်းမှဖြစ်ကာ ၎င်း၏စာထဲတွင် “အရေးပေါ် လစဉ်သုံးပစ္စည်းကို ဆောင်မသွားတတ်တဲ့ အာရာကာယိုရှီဒါကို ငါ သတ်ပစ်ချင်တယ်။ သူ့အသက်အရွယ် အရဆိုရင် ဒီပစ္စည်းကို ဘယ်သွားသွား ယူသွားရမယ်ဆိုတာ သိသင့်နေပြီလေ”ဟု ရေးသားထားကြောင်း Mainichi သတင်းစာတွင် ဖော်ပြထားသည်။

မတ်လ ၃၁ ရက်တွင် ပြုလုပ်သော သတင်းစာရှင်းလင်းပွဲ၌ ယိုရှီဒါက ထိုခြိမ်းခြောက်မှုများသည် ၎င်းကို တိုက်ရိုက် ခြိမ်းခြောက်ခြင်းဖြစ်ပြီး စီရင်စုအဖွဲ့အစည်း၏ အဖွဲ့ဝင်တစ်ဦးဖြစ်သည့် ၎င်း၏လှုပ်ရှားမှုများကို ထိခိုက်စေရန် ရည်ရွယ်ခြင်းဖြစ်ကြောင်း ပြောကြားခဲ့သည်။

ယိုရှီဒါက ခြိမ်းခြောက် စာများနှင့်ပတ်သက်ပြီး ရဲတပ်ဖွဲ့ကို တိုင်ကြားသွားမည်ဖြစ်ကာ ထိုဖြစ်စဉ်ကို စုံစမ်းစစ်ဆေး သွားမည်ဖြစ်ကြောင်း အတည်ပြုခဲ့သည်။

ဂျပန်အမျိုးသမီး နိုင်ငံရေးသမား အာရာကာယိုရှီဒါကို တွေ့ရစဉ်

ဟီရိုရှီးမားတက္ကသိုလ်မှ လူမှုဗေဒဆိုင်ရာ တွဲဖက်ပါမောက္ခ တစ်ဦးဖြစ်သည့်အပြင် တက္ကသိုလ်၏ နှောင့်ယှက်မှု ဆိုင်ရာ အတိုင်ပင်ခံရုံးမှ အကြံပေးတစ်ဦးဖြစ်သူ ချီဆာတိုကီတာနာကာ(Chisato Kitanaka)က ထိုကဲ့သို့ အသက်အန္တရာယ် ခြိမ်းခြောက်မှုသည် အမျိုးသမီး လစဉ်သုံး ပစ္စည်းများနှင့်ပတ်သက်ပြီး အလွန်အဆိုးမြင်သည့် ရည်ရွယ်ချက်မျိုးဖြစ်ကြောင်း ပြောကြားခဲ့သည်။

ထို့ပြင် အမျိုးသမီးထု၏ လိုအပ်ချက်များကို ဖွင့်ဟပြောကြားလေ့ရှိသော အမျိုးသမီးများကို ရိုင်းစိုင်းသည့် စာများ ပေးပို့မှုသည် မကြာခဏ ဖြစ်ပွားလေ့ရှိသည်ဟု ၎င်းက သတိပေး ပြောကြားခဲ့သည်။

“ဒီလိုကိစ္စတွေ ခဏခဏ ဖြစ်နေတာကို တွေ့နေရပါတယ်။ အမျိုးသမီး နိုင်ငံရေးသမားတစ်ဦးက တစ်ခုခုကို အဆိုပြုလိုက်တိုင်း အမြဲတမ်းလိုလို တိုက်ခိုက်ခံနေရပါတယ်”ဟု ကီတာနာကာက ပြောကြားခဲ့သည်။

Source: South China Morning Post

CNI International News

ဘန်ကောက်၊ ဧပြီ ၄

အမေရိကန်သို့ တင်ပို့သည့် ထိုင်းပို့ကုန်များအပေါ် အပြန်အလှန် အကောက်ခွန်(reciprocal tariffs) ၃၆ ရာခိုင်နှုန်း ကောက်ခံမည့် အမေရိကန်သမ္မတ ဒေါ်နယ်ထရမ့် (Donald Trump) ၏ ကြေညာချက်နှင့်ပတ်သက်ပြီး ပြင်ဆင် ထားကြောင်း ထိုင်းဝန်ကြီးချုပ် ပေတုန်တန်က ပြောကြားခဲ့သည်ဟု Thai PBS World သတင်း ဝက်ဘ်ဆိုက်မှ ဖော်ပြခဲ့သည်။

မိမိတို့ အစိုးရအနေဖြင့် ဆွေးနွေးညှိနှိုင်းမှုများ၊ သွင်းကုန် အခွန်များ ပြန်လည်ပြင်ဆင်မှု အပါအဝင် အစီအမံများကို ပြင်ဆင်ထားပြီးဖြစ်ကြောင်း သူမက ပြောသည်။

ဧပြီ ၂ ရက်က ထရမ့်သည် အမေရိကန်သို့ တင်ပို့သည့် တစ်ကမ္ဘာလုံးမှ ကုန်စည်များအားလုံးအပေါ် အပြန်အလှန် အကောက်ခွန် ၁၀ ရာခိုင်နှုန်း ကောက်ခံမည်ဖြစ်ကြောင်း၊ အဓိက ကုန်သွယ်ဘက် နိုင်ငံများအပေါ် အခွန်များ ၁၀ ရာခိုင်နှုန်းထက်ပိုပြီး တိုးမြှင့်ကောက်ခံမည်ဖြစ်ကြောင်း ကြေညာခဲ့သည်။

ထို့နောက် ထိုင်းသည် အမေရိကန်သို့ တင်ပို့သည့် ပို့ကုန်များအတွက် အခွန် ၃၆ ရာခိုင်နှုန်း ပေးဆောင်ရတော့မည် ဖြစ်သည်။

အမေရိကန်သမ္မတ ဒေါ်နယ်ထရမ့်ကို တွေ့ရစဉ်

ထို့ကြောင့် အမေရိကန်စျေးကွက်သို့ တင်ပို့နေသည့် ထိုင်းပို့ကုန်လုပ်ငန်းများအပေါ် ထိခိုက်မှုများကို လျော့ပါး သက်သာစေရန်အတွက် ဘဏ္ဍာရေးနှင့် ကုန်သွယ်ရေးဝန်ကြီးများက အစီအမံများ လုပ်ဆောင်နေကြောင်း ပေတုန်တန်က ပြောသည်။

ပို့ကုန်အခွန် ၃၆ ရာခိုင်နှုန်းသည် အလွန်များပြားကြောင်း၊ သို့သော် အမေရိကန်၏ ကုန်သွယ်ရေးစစ်ပွဲသည် ထိုင်းနိုင်ငံ၏ စီးပွားရေး တိုးတက်မှုအပေါ် သက်ရောက်မှု အနည်းငယ်သာ ရှိလိမ့်မည်ဟု ယုံကြည်ကြောင်း၊ ထိုင်း ပို့ကုန်များအပေါ် အမှန်တကယ် အခွန်တိုးခြင်းသည် ပျမ်းမျှ ၉ ရာခိုင်နှုန်းသာဖြစ်ကြောင်း ပေတုန်တန်က ပြောကြားခဲ့သည်။

ဆွေးနွေးညှိနှိုင်းရေး အဖွဲ့များနှင့်ပတ်သက်ပြီး ကုန်သွယ်ရေး အမြဲတမ်းအတွင်းဝန်၏ တာဝန်ဖြစ်ကြောင်း၊  အလွှာ ပေါင်းစုံ ဆွေးနွေးမှုများ ပြုလုပ်ရန်အတွက် ဆွေးနွေးညှိနှိုင်းရေးအဖွဲ့များ ဖွဲ့စည်းရန် လိုအပ်ကြောင်းလည်း ပေတုန်တန်က ပြောကြားခဲ့သည်။

ထိုင်းဝန်ကြီးချုပ် ပေတုန်တန်ကို တွေ့ရစဉ်

အမေရိကန်၏ အပြန်အလှန် အကောက်ခွန် တိုးမြှင့်ကောက်ခံမည့် ကုန်စည်စာရင်းတွင် မည်သည့် ပို့ကုန် အမျိုးအစားများ ပါဝင်နေသည်ဆိုခြင်းကို မသိရသေးကြောင်း၊ ပို့ကုန် အမျိုးအစားနှင့်ပတ်သက်ပြီး ရှင်းလင်းစွာ သိရပြီဆိုပါက ထိုင်း၏ ဆွေးနွေးညှိနှိုင်းသူများသည် အမေရိကန်နှင့် ကုန်သွယ်ရေး ထိန်းညှိရန် အလျှော့၊အတင်း များဖြင့် ညှိနှိုင်းသွားမည်ဖြစ်ကြောင်း ၎င်းက ပြောသည်။

ထိုသို့ လုပ်ဆောင်ရာတွင် လက်ရှိ နိုင်ငံ့ဂျီဒီပီ ဖွံ့ဖြိုးတိုးတက်ရေး ခန့်မှန်းချက်ကို ပြည့်မြောက်စေရန် အရေးကြီး ကြောင်းနှင့် အမေရိကန်၏ အခွန်တိုးကောက်မှုကြောင့် ဂျီဒီပီ ဖွံ့ဖြိုးတိုးတက်မှုအား မထိခိုက်စေရန် စနစ်တကျ လုပ်ဆောင်သွားရမည်ဖြစ်ကြောင်း ပေတုန်တန်က ပြောကြားခဲ့သည်။

ရှင်းလင်းစွာ ဖော်ပြရမည်ဆိုပါက အပြန်အလှန် အကောက်ခွန် (reciprocal tariffs) သည် နှစ်နိုင်ငံအကြား ပို့ကုန်၊ သွင်းကုန်များအပေါ် အပြန်အလှန် ကောက်ခံသည့် အခွန်အမျိုးအစားဖြစ်ပြီး၊ သွင်းကုန်အပေါ် စည်းကြပ် ကောက်ခံသော အခွန်(tariffs)သည် တစ်နိုင်ငံက အခြားတစ်နိုင်ငံ၏ ပို့ကုန်အပေါ် တစ်ဖက်သတ် စည်းကြပ် ကောက်ခံသည့် အခွန်အမျိုးအစားဖြစ်သည်။

Source: Thai PBS World

CNI International News

တိုင်ပေ၊ ဧပြီ ၄

တရုတ်ပြည်မကြီးက ဒုတိယနေ့ စစ်ရေးလေ့ကျင့်မှုကို ဧပြီ ၂ ရက်က လုပ်ဆောင်ခဲ့ပြီးနောက် တရုတ်စစ်တပ်၏ လှုပ်ရှားမှုများ အရှိန်မြင့်လာကြောင်း ထိုင်ဝမ်ကာကွယ်ရေးဝန်ကြီးဌာနက ဧပြီ ၃ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထိုင်ဝမ်ကျွန်း၏ အနီးတစ်ဝိုက်တွင် တရုတ်၏ စစ်လေယာဉ် ၅၉ စင်းနှင့် စစ်သင်္ဘော ၂၃ စင်းကို ထောက်လှမ်း တွေ့ရှိခဲ့သည်ဟု ထိုင်ဝမ်က ထုတ်ပြန်ထားသည်။

ထိုစစ်ရေး လေ့ကျင့်မှုသည် ပြီးခဲ့သည့်နှစ် သမ္မတရွေးကောက်ပွဲက အနိုင်ရခဲ့သော ထိုင်ဝမ်သမ္မတ လိုင်ချင်တေ (Lai Ching-te) ၏ ရန်စမှုများကို တုန့်ပြန်ခြင်းဖြစ်ကြောင်း တရုတ်ပြည်မကြီးက ပြောကြားခဲ့သည်။

တရုတ်စစ်တပ်ကမူ Strait Thunder-2025A  ဟု အမည်ပေးထားသည့် စစ်ရေးလေ့ကျင့်မှုများကို ဧပြီ ၁ ရက်နှင့် ၂ ရက်တွင် ထိုင်ဝမ်ရေလက်ကြား၏  အလယ်ပိုင်းနှင့် တောင်ပိုင်းရေပြင်များ၊ အရှေ့တရုတ်ပင်လယ်တို့တွင် ပြုလုပ် ခဲ့ခြင်းဖြစ်ပြီး ကျည်အစစ်များကိုလည်း အသုံးပြုခဲ့ကြောင်း ကြေညာခဲ့သည်။

ထိုင်ဝမ် ခေါင်းဆောင်များအနေဖြင့် တရုတ်လက်အောက်မှ လွတ်လပ်ရေးရယူရန် အားထုတ်ကြိုးပမ်းမှုများကို မရပ်တန့်မချင်း ထိုင်ဝမ်ကို အပြစ်ပေးမှုများသည် ရပ်တန့်သွားမည် မဟုတ်ကြောင်း တရုတ်နိုင်ငံခြားရေးဝန်ကြီး ဌာနက သတိပေးခဲ့သည်။

တရုတ်နဲ့ထိုင်ဝမ်ကို တွေ့ရစဉ်

ပြီးခဲ့သည့် ၂၄ နာရီအတွင်း တရုတ်စစ်တပ်၏ စစ်လေယာဉ် အရေအတွက်သည် ယခင်နေ့နှင့် နှိုင်းယှဉ်ပါက အရေအတွက် လျော့ကျသွားသော်လည်း ရေတပ်သင်္ဘော အရေအတွက် ပိုမိုများပြားလာကြောင်း တွေ့ရှိခဲ့သည်ဟု ထိုင်ဝမ်ကာကွယ်ရေးဝန်ကြီးဌာနက ဧပြီ ၃ ရက်တွင် ထုတ်ပြန်ခဲ့သည်။

စစ်လေယာဉ် ၁၈ စင်းသည် ထိုင်ဝမ်ရေလက်ကြား၏ အလယ်စည်းကို ဖြတ်သန်းခဲ့ကြောင်းလည်း ထိုင်ဝမ် ကာကွယ်ရေးဝန်ကြီးဌာနက ထုတ်ပြန်ခဲ့သည်။

ထိုင်ဝမ်သမ္မတ လိုင်ချင်တေက တရုတ်ကို “ရန်လိုသည့် ပြည်ပအင်အားစု”ဟု ခေါ်ဆိုခဲ့ပြီးနောက် တစ်လမပြည့်မီ အချိန်အတွင်းမှာပင် တရုတ်က စစ်ရေးလေ့ကျင့်မှုများ ပြုလုပ်ခဲ့ခြင်းဖြစ်သည်။

တရုတ်၏ စစ်ရေးလေ့ကျင့်မှုများသည် အမေရိကန်၊ ဂျပန်၊ ဥရောပသမဂ္ဂနှင့် ဗြိတိန်တို့ကိုလည်း စိုးရိမ်မှုများ  ဖြစ်ပေါ်စေခဲ့သည်။

Source: ရိုက်တာ

CNI International News

၂၀၂၅ ခုနှစ်၊ ဧပြီ ၃

မြန်မာနိုင်ငံတွင် မတ်လ ၂၈ ရက်က အင်အားပြင်းငလျင် လှုပ်ခတ်ခဲ့ပြီးနောက် နစကသည် ပိတ်ထားသည့် သံတမန်ဆက်ဆံရေး လမ်းကြောင်းများကို ပြန်လည်ဖွင့်လှစ်ခဲ့သဖြင့် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင် ၏ အနေအထားကို ပိုမိုခိုင်မာ ထင်ရှားလာစေကြောင်း ရိုက်တာမှ ဖော်ပြခဲ့သည်။

ငလျင်မလှုပ်ခတ်မီက နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ထိုင်းနိုင်ငံတွင် ပြုလုပ်မည့် BIMSTEC အစည်းအဝေးကို တက်ရောက်ရန် ပြင်ဆင်ခဲ့ပြီး အခြားအဖွဲ့ဝင်နိုင်ငံများမှ ခေါင်းဆောင်များနှင့် တွေ့ဆုံရန် စီစဉ်ခဲ့သည်။

ထို့နောက် ငလျင်လှုပ်ခတ်မှုကြောင့် ဗိုလ်ချုပ်မှူးကြီးမင်းအောင်လှိုင်သည်  ဘန်ကောက်တွင် ပြုလုပ်မည့် BIMSTEC အစည်းအဝေးကို တက်ရောက်ရန် မသေချာ မရောရာမှုများရှိကြောင်း သံတမန်အသိုင်းအဝိုင်းက ပြောသည်။

ငလျင်ကြောင့် ပြိုကျနေတဲ့ အဆောက်အအုံကို တွေ့ရစဉ်

သို့သော်လည်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် BIMSTEC အစည်းအဝေးကို တက်ရောက်မည် ဖြစ်ကြောင်းနှင့် ဧပြီ ၃ ရက်တွင် ထိုင်းနိုင်ငံသို့ သွားရောက်မည်ဖြစ်ကြောင်း နစက-က သတင်းထုတ်ပြန်ခဲ့သည်။

ထိုငလျင်လှုပ်ခတ်မှုသည် လူပေါင်း ၃ သန်းခွဲကို အိမ်ပစ်ရာပစ် စွန့်ခွာထွက်ပြေးခဲ့ရသည့် လက်နက်ကိုင်ပဋိပက္ခ ကြောင့် နိုင်ငံတကာနှင့် အဆက်အသွယ် ဖြတ်ထားသော အခြေအနေကို အဆုံးသတ်ရာတွင် အထောက်အကူ ဖြစ်စေခဲ့သည်ဟု ကျွမ်းကျင်သူများက ပြောကြားခဲ့သည်။

“အိန္ဒိယ၊ တရုတ်နဲ့ ရုရှားနိုင်ငံတွေလိုမျိုး ဒေသတွင်း အင်အားကြီးနိုင်ငံတွေဟာ မြန်မာနိုင်ငံမှာ သူတို့ရဲ့ အနေ အထားကို ပိုမိုခိုင်မာစေဖို့ ဒီအခွင့်အလမ်းကို အသုံးချပြီး ဩဇာလွှမ်းမိုးအောင် လုပ်ဆောင်ကြလိမ့် မယ်ဆိုတာကို တပ်မတော်က သိထားပါတယ်”ဟု စင်္ကာပူအခြေစိုက် နိုင်ငံ‌ရေးကျွမ်းကျင်သူ အန်ရှူမန် ချောင်ဒရီ (Angshuman Choudhury) က ပြောကြားခဲ့သည်။

“ဒေသတွင်း အစိုးရတွေနဲ့ လူသိရှင်ကြား တိုက်ရိုက် ထိတွေ့ဆက်ဆံခြင်းအားဖြင့် တပ်မတော်ဟာ မြန်မာနိုင်ငံရဲ့ အဓိက အာဏာပိုင် အဖွဲ့အစည်းအဖြစ် မရှိမဖြစ် နေရာမှာ ရှိနေတယ်ဆိုတာကို ပြသနိုင်ပါလိမ့်မယ်”ဟု ၎င်းက ပြောကြားခဲ့သည်။

မလေးရှားကယ်ဆယ်ရေးအဖွဲ့ မြန်မာငလျင်ကို ကယ်ဆယ်နေစဉ်

၎င်း၏ ပြောကြားချက်နှင့်ပတ်သက်ပြီး ရိုက်တာသတင်းဌာန၏ မှတ်ချက်ပေးရန် တောင်းဆိုချက်ကို တပ်မတော် ၏ ပြောရေးဆိုခွင့်ရှိသူက တုန့်ပြန်ခဲ့ခြင်းမရှိပေ။

ပြီးခဲ့သည့် သီတင်းပတ်အတွင်းက ဗိုလ်ချုပ်မှူးကြီးမင်းအောင်လှိုင်သည် တရုတ်သမ္မတ ရှီကျင့်ဖျင် (Xi Jinping) ၊ အိန္ဒိယဝန်ကြီးချုပ် မိုဒီ (Narendra Modi) ၊ မလေးရှားဝန်ကြီးချုပ် အန်ဝါ အီဘရာဟင် ( Anwar Ibrahim) တို့နှင့် ဆွေးနွေးမှုများ ပြုလုပ်ခဲ့သည်။

လက်တလောတွင်လည်း တရုတ်၊ အန္ဒိယ၊ ရုရှားနှင့် အရှေ့တောင်အာရှ နိုင်ငံများသည် ဒေါ်လာသန်းနှင့်ချီသည့် အကူအညီများနှင့် ကယ်ဆယ်ရေးအဖွဲ့များကို စေလွှတ်ပြီး မြန်မာနိုင်ငံတွင် ကယ်ဆယ်ရေးနှင့် ပြန်လည်ထူထောင် ရေး လုပ်ငန်းများကို လုပ်ဆောင်လျက်ရှိသည်။

Source: ရိုက်တာ