CNI International News

ဝါရှင်တန်၊ နိုဝင်ဘာ ၁၄

အမေရိကန်ရွေးကောက်ခံသမ္မတ ဒေါ်နယ်ထရမ့် (Donald Trump)က ကမ္ဘာ့အချမ်းသာဆုံးပုဂ္ဂိုလ် အီလွန်မာ့စ် (Elon Musk) ကို အသစ်ဖွဲ့စည်းမည့် အစိုးရအဖွဲ့ စွမ်းဆောင်မှုကောင်းမွန်စေရေးဌာနတွင် အကြီးအကဲအဖြစ် ခန့်အပ်ကြောင်း နိုဝင်ဘာ ၁၂ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။

မာ့စ်နှင့် ရီပတ်ဘလစ်ကန် သမ္မတရွေးကောက်ပွဲဝင် ကိုယ်စားလှယ်လောင်းဟောင်း ဗီဗက် ရာမာဆွာမိ (Vivek Ramaswamy) တို့သည် ထိုဌာနကို ပူးတွဲကြီးကြပ်ရမည်ဖြစ်သည်။

အဆိုပါဌာနသည် အစိုးရအဖွဲ့ လက်အောက်တွင် ရှိမည်မဟုတ်ဘဲ အစိုးရပြင်ပတွင် လည်ပတ်သွားလိမ့်မည် ဖြစ်ကြောင်း ထရမ့်က ပြောကြားခဲ့သည်။

မာ့စ်နှင့် ရာမာဆွာမိတို့သည် အစိုးရ၏ ဗျူရိုကရေစီစနစ်ကို ဖျက်သိမ်းရန်၊ မလိုအပ်သည့် စည်းမျဉ်းစည်းကမ်း များကို ပယ်ဖျက်ရန်၊ အသုံးမဝင်သည့် ကုန်ကျစရိတ်များကို လျှော့ချရန်နှင့် ဖက်ဒရယ် အေဂျင်စီများကို ပြန်လည် ဖွဲ့စည်း တည်ဆောက်မည့် မိမိ၏ အစိုးရအဖွဲ့အတွက် လမ်းခင်းပေးလိမ့်ဖြစ်ကြောင်း ထရမ့်က ထုတ်ပြန်ခဲ့သည်။

ထိုဌာနအသစ်သည် ရီပတ်ဘလစ်ကန်တို့ ကာလကြာရှည် မျှော်လင့်ခဲ့သည့် မျှော်လင့်ချက်များကို အကောင် အထည် ပေါ်စေမည်ဖြစ်ပြီး အစိုးရအဖွဲ့ပြင်ပတွင် အကြံပေးခြင်း၊ လမ်းညွှန်ခြင်းများကို ပြုလုပ်လိမ့်မည်ဖြစ် ကြောင်း ထရမ့်က ပြောသည်။

ဒေါ်နယ်ထရမ့်နဲ့ အီလွန်မာ့စ်ကို တွေ့ရစဉ်

ထို့ကြောင့် မာ့စ်နှင့် ရာမာဆွာမိတို့၏ ရာထူးများသည် တရားဝင်အစိုးရ ရာထူးများ မဟုတ်သဖြင့် လွှတ်တော်၏ ထောက်ခံမှုလည်း လိုအပ်မည်မဟုတ်ပေ။

မာ့စ် အနေနှင့်လည်း အစိုးရ ရာထူးနေရာကို ရယူခြင်း မဟုတ်သဖြင့် Tesla ကားကုမ္ပဏီ၊ X လူမှုမီဒီယာနှင့်  SpaceX အာကာသကုမ္ပဏီများတွင်လည်း အကြီးအကဲအဖြစ် ဆက်လက် တာဝန်ယူနိုင်မည်ဖြစ်သည်။

ထိုဌာနအသစ်သည် အိမ်ဖြူတော်၊ စီမံခန့်ခွဲရေးနှင့် အသုံးစရိတ်ရုံးတို့နှင့်လည်း လက်တွဲ လုပ်ဆောင်သွားမည်ဖြစ် ပြီး ယခင်က မမြင်တွေ့ဖူးသည့် ပြုပြင်ပြောင်းလဲမှုများ အစိုးရအဖွဲ့အတွက် ဆန်းသစ်တီထွင်သော ချဉ်းကပ် ဆောင်ရွက်ပုံများအတွက် မောင်းနှင်အားတစ်ခု ဖြစ်လာလိမ့်မည်ဟု ထရမ့်က ပြောသည်။

ထိုလုပ်ငန်းစဉ်များကို အမေရိကန်၏ နှစ်ပေါင်း ၂၅၀ ပြည့် လွှတ်လပ်ရေးနေ့ဖြစ်သည့် ၂၀၂၆ ခုနှစ် ဇူလိုင် ၄ ရက် တွင် အပြီးသတ် လုပ်ဆောင်လိမ့်မည်ဟု ၎င်းက ဆိုသည်။

Forbes မဂ္ဂဇင်း၏ ကမ္ဘာ့အချမ်းသာဆုံးပုဂ္ဂိုလ် မာ့စ်သည် ထရမ့်၏ မဲဆွယ်စည်းရုံးပွဲအတွင်း ဒေါ်လာ သန်းချီ ထောက်ပံ့ပေးခဲ့ကာ လူကိုယ်တိုင်လည်း မဲဆွယ်စည်းရုံးမှုများ ပြုလုပ်ခဲ့သည်။

Source: ရိုက်တာ

CNI International News

နယူးဒေလီ၊ နိုဝင်ဘာ ၁၄

အိန္ဒိယနိုင်ငံ၊ မဏိပူရ (Manipur) ပြည်နယ်တွင် ကူကီးတပ်ဖွဲ့နှင့် အိန္ဒိယလုံခြုံရေးတပ်ဖွဲ့ကြား တိုက်ပွဲပြင်းထန်စွာ ဖြစ်ပွားပြီး သေဆုံးမှုများလည်းရှိခဲ့ကြောင်း UCA News မှ ဖော်ပြခဲ့သည်။

ထိုအခြေအနေသည် ယခင်ကတည်းက တည်ငြိမ်မှုမရှိသည့် အိန္ဒိယအရှေ့မြောက်ပိုင်း ပြည်နယ်တွင် အကြမ်းဖက် မှုများ မြင့်တက်လာမည့် အခြေအနေသို့ ရောက်ရှိသွားနိုင်မည့် အရေးကို စိုးရိမ်ကြောင်း ဘုရားကျောင်း ခေါင်းဆောင်တစ်ဦးက ပြောကြားခဲ့သည်။

ကိုယ်ထူကိုယ်ထ လက်နက်ကိုင်များဟု ကူကီးလူမျိုးစုက သုံးနှုန်းဖော်ပြထားသည့် ကူကီးလက်နက်ကိုင်များသည် နိုဝင်ဘာ ၁၁ ရက်က ရဲစခန်းကို ဝင်ရောက် တိုက်ခိုက်ချိန်တွင် အိန္ဒိယလုံခြုံရေးတပ်ဖွဲ့များနှင့် အပြန်အလှန် ပစ်ခတ်မှု ဖြစ်ပွားရာ ကူကီးလက်နက်ကိုင် ၁၁ ဦး သေဆုံးခဲ့သည်။

ထိုတိုက်ခိုက်မှုသည် ပြိုင်ဘက်လူမျိုးစု အဖွဲ့များအကြား ရန်လိုမုန်းထားမှုများကို ပိုမိုမြင့်တက်စေနိုင်ပြီး မဏိပူရ ပြည်နယ်အတွင်း ငြိမ်းချမ်းရေးအား ပြန်လည်ထိန်းသိမ်းလိုသည့် ဗဟိုအစိုးရ၏ အားထုတ်ကြိုးပမ်းမှုကို လျော့ကျ စေကြောင်း အမည်မဖော်လိုသည့် ဘုရားကျောင်းခေါင်းဆောင်တစ်ဦးက ပြောကြားခဲ့သည်။

ကူကီးလက်နက်ကိုင်တပ်ဖွဲ့ကိုတွေ့ရစဉ်

ဂျီရီဘမ် (Jiribam) ခရိုင်ရှိ Borobekra ရဲစခန်းတွင် ဖြစ်ပွားခဲ့သည့် ထိုတိုက်ခိုက်မှုအတွင်း ဗဟိုအရန် ရဲတပ်ဖွဲ့ (CRPF) ၏ တပ်ဖွဲ့ဝင် ၂ ဦး ဒဏ်ရာရခဲ့ပြီး ကူကီးတပ်ဖွဲ့သည် ခေတ်မီဆန်းပြားသည့် လက်နက်များ အသုံးပြုခဲ့ သည်ဟု ရဲတပ်ဖွဲ့က ပြောသည်။

တိုင်းရင်းသားလူမျိုးစု ခေါင်းဆောင်များဖိုရမ် (ITLF) ကမူ လူမျိုးစုဝင်များအား သတ်ဖြတ်မှုကို ရှုတ်ချခဲ့ပြီး ထိုလက်နက်ကိုင်များသည် အစိုးရက ထုတ်ပြန်သကဲ့သို့ စစ်သွေးကြွများ မဟုတ်ကြောင်း ငြင်းဆိုခဲ့သည်။

အဆိုပါ တိုက်ခိုက်မှုအတွင်း ရဲဝံ့သည့် ကိုယ်ထူကိုယ်ထ လက်နက်ကိုင် ၁၁ ဦး ဝမ်းနည်းဖွယ် ကျဆုံးမှုအတွက် အလွန်ဝမ်းနည်းကြောင်း (ITLF) က ထုတ်ပြန်ခဲ့သည်။

ပြီးခဲ့သည့် သီတင်းပတ်အတွင်း ဂျီရီဘမ်ခရိုင်တွင် မီးရှို့ခံထားရသည့် ကူကီးအမျိုးသမီးတစ်ဦး၏ ရုပ်အလောင်းကို တွေ့ရှိခဲ့ပြီးနောက် ယခုတိုက်ခိုက်မှု ဖြစ်ပွားခဲ့ခြင်းဖြစ်သည်။

နိုဝင်ဘာ ၇ ရက်က ဇိုင်ရာဝမ် (Zairawan) ကျေးရွာတွင် ကသည်းလက်နက်ကိုင်များက ထိုအမျိုးသမီးကို သတ်ဖြတ်ခဲ့ခြင်းဖြစ်ကြောင်း သတင်းများလည်း ထွက်ပေါ်နေသည်။

Source: UCA News

CNI International News

တိုကျို၊ နိုဝင်ဘာ ၁၃

တရုတ်နိုင်ငံတောင်ပိုင်း၊ ကျူဟိုင်း (Zhuhai) မြို့တွင် နိုဝင်ဘာ ၁၂ ရက်က လေကြောင်းပြပွဲတစ်ခု ပြုလုပ်ခဲ့ပြီး နောက်ဆုံးပေါ် ကိုယ်ပျောက် တိုက်လေယာဉ်ဖြစ်သည့်  J-35 တိုက်လေယာဉ်ကို ပြသခဲ့ကြောင်း Nikkei Asia မှ ဖော်ပြခဲ့သည်။

တရုတ်နိုင်ငံတကာလေကြောင်းနှင့် လေကြောင်းအာကာသပြပွဲ အမည်ရှိ ထိုပွဲတွင် ရေဒါထောက်လှမ်းမှုကို ရှောင်ရှားနိုင်သည့် J-35 တိုက်လေယာဉ်ကို ယာယီပျံသန်းပြခဲ့ပြီး ပရိသတ်၏ အာရုံကို ဖမ်းစားနိုင်ခဲ့သည်ဟု ဆိုသည်။

အင်ဂျင် ၂ လုံး တပ်ထားသည့် ထိုလေယာဉ်သည် တပ်တော်ဝင်မည်ဆိုပါက တရုတ်သည် အမေရိကန်ပြီးလျှင် ကိုယ်ပျောက် တိုက်လေယာဉ် အမျိုးအစား ၂ မျိုးကို ပိုင်ဆိုင်ထားသည့် ဒုတိယမြောက်နိုင်ငံ ဖြစ်လာမည်ဖြစ်သည်။

တရုတ်သည် ၂၀၁၇ ခုနှစ်က ၎င်း၏ ပထမဆုံး ကိုယ်ပျောက် တိုက်လေယာဉ်ဖြစ်သည့် J-20 တိုက်လေယာဉ်ကို တပ်တော်ဝင်ခဲ့သည်။

အမေရိကန်စစ်တပ်ကမူ Lockheed Martin ကုမ္ပဏီက ထုတ်လုပ်ထားသည့် F-22 Raptor နှင့် F-35 Lightning II ကိုယ်ပျောက် တိုက်လေယာဉ်များကို လေတပ်တွင် အသုံးပြုနေသည်။

တရုတ်ရဲ့ J-35  ကိုယ်ပျောက်တိုက်လေယာဉ်ကိုတွေ့ရစဉ်

J-35 ကိုယ်ပျောက် တိုက်လေယာဉ် ပိုင်ဆိုင်မှုသည် တရုတ်အနေဖြင့် ခြေထောက် ၂ ချောင်းဖြင့် လမ်းလျှောက်နိုင် ပြီဆိုသည့် အဓိပ္ပာယ်မျိုးဖြစ်ကြောင်း ရှန်ဟိုင်းအခြေစိုက် စစ်ရေးကျွမ်းကျင်သူ နီ လီရှုံ (Ni Lexiong) က ပြောကြား ခဲ့သည်။

နီက တရုတ်၏ J-20 တိုက်လေယာဉ်နှင့် J-35 တိုက်လေယာဉ်တို့ကို ခြေထောက် ၂ ချောင်းအဖြစ် တင်စားပြောဆို ခဲ့ခြင်းဖြစ်ကာ ထိုလေယာဉ်များသည် ရန်ဘက်များ၏ ခြိမ်းခြောက်မှုများကို ဟန့်တားရာတွင် ကြီးမားစွာ အထောက်အကူ ဖြစ်စေလိမ့်မည်ဟု ပြောကြားခဲ့သည်။

J-35 ကိုယ်ပျောက် တိုက်လေယာဉ်၏ အချို့နေရာ အစိတ်အပိုင်းများသည် အမေရိကန်၏ အင်ဂျင် ၁ လုံးတပ် F-35 ကိုယ်ပျောက် တိုက်လေယာဉ်နှင့် အနည်းငယ် ဆင်တူနေကြောင်း လေ့လာသူများက ပြောသည်။

သို့သော် တရုတ်၏ J-35 ကိုယ်ပျောက် တိုက်လေယာဉ်သည် အမေရိကန်၏ F-35 ကိုယ်ပျောက် တိုက်လေယာဉ် ကဲ့သို့ ဒေါင်လိုက် အတက်၊ အဆင်း ပြုလုပ်နိုင်ခြင်း မရှိကြောင်း ကျွမ်းကျင်သူများက ထောက်ပြခဲ့သည်။

Source: Nikkei Asia

CNI International News

ဝါရှင်တန်၊ နိုဝင်ဘာ ၁၃

အမေရိကန်သမ္မတလောင်း ဒေါ်နယ်ထရမ့် (Donald Trump) သည် အထက်လွှတ်တော်အမတ် မာကို ရူဘီယို (Marco Rubio) ကို နိုင်ငံခြားရေးဝန်ကြီးရာထူး ခန့်အပ်ဖွယ်ရှိကြောင်း ရိုက်တာမှ ဖော်ပြခဲ့သည်။

ထို့ကြောင့် ဖလော်ရီဒါ (Florida) ဇာတိ ရူဘီယိုသည် လာမည့်နှစ် ဇန်နဝါရီလတွင် ထရမ့်၏ သမ္မတကျမ်းသစ္စာ ကျိန်ဆိုမှုအပြီး၌ အမေရိကန် နိုင်ငံခြားရေးဝန်ကြီး တာဝန်ကို ထမ်းဆောင်ရမည့် ပထမဆုံး လက်တင် အမေရိကန် တိုက်သား ဖြစ်လာမည်ဖြစ်သည်။

ထိုအကြောင်းအရာနှင့်ပတ်သက်ပြီး ထရမ့်နှင့် ရူဘီယိုတို့၏ ကိုယ်စားလှယ်များက မှတ်ချက်ပေးရန် တောင်းဆို ချက်ကို ချက်ချင်းတုန့်ပြန်ခဲ့ခြင်းမရှိပေ။

ရူဘီယိုသည် နိုင်ငံခြားရေးဝန်ကြီးရာထူး ခန့်အပ်ခံရဖွယ်ရှိသူများ စာရင်းတွင် သဘောထား အတင်းမာဆုံး နိုင်ငံရေးသမားတစ်ဦး ဖြစ်သည်။

ဒေါ်နယ်ထရမ့်နဲ့ ရူဘီယိုကို တွေ့ရစဉ်

သူသည် မကြာသေးမီ နှစ်များအတွင်း တရုတ်၊ အီရန်နှင့် ကျူးဘား အပါအဝင် အမေရိကန်၏ ပထဝီနိုင်ငံရေး ရန်ဘက်များအပေါ် တင်းမာသည့် နိုင်ငံခြားရေးမူဝါဒ ချမှတ်ကျင့်သုံးရန် တိုက်တွန်းခဲ့ဖူးသည်။

ထို့နောက် သူသည် ထရမ့်၏ သဘောထားနှင့် ပိုမိုလိုက်လျောညီထွေ ရှိစေရန်အတွက် ၎င်း၏ သဘောထား အချို့ကို ဖြေလျှော့ပေးခဲ့သည်။

ထရမ့်ကမူ ယခင် အမေရိကန်သမ္မတများသည် အမေရိကန်နိုင်ငံကို ထိခိုက်နစ်နာစေသည့် စစ်ပွဲများအတွင်းသို့ ဆွဲခေါ်ခဲ့ကြောင်း စွပ်စွဲခဲ့ပြီး ထိန်းထိန်းသိမ်းသိမ်း ဆောင်ရွက်သည့် နိုင်ငံခြားရေးမူဝါဒကို ကျင့်သုံးရန် တိုက်တွန်း ခဲ့သည်။

ထရမ့်၏ အစိုးရအဖွဲ့သစ်သည် ယခင် ထရမ့်၏ ပထမသက်တမ်းဖြစ်သည့် ၂၀၁၇ ခုနှစ်ကနှင့်  နှိုင်းယှဉ်ပါက ပိုမိုကြီးမားသည့် စိန်ခေါ်မှုများကို ရင်ဆိုင်ဖြေရှင်းရမည်ဖြစ်သည်။

အထူးသဖြင့် ယူကရိန်းပဋိပက္ခ၊ အရှေ့အလယ်ပိုင်းပဋိပက္ခ၊ တရုတ်-ရုရှား-အီရန်တို့ ဆက်ဆံရေး ပိုမို မြင့်တက်လာ မှုများကို အဓိကထား ဖြေရှင်းရမည်ဖြစ်ကြောင်း ကျွမ်းကျင်သူများက ပြောကြားခဲ့သည်။

Source: Reuters

CNI International News

ကင်ဘာရာ ၊ နိုဝင်ဘာ ၁၃

တောင်တရုတ်ပင်လယ်တွင် ဖိလစ်ပိုင်၏ အချုပ်အခြာ အာဏာပိုင်ကြောင်း ထွက်ဆိုချက်များကို စွန့်လွှတ်စေရန် အတွက် တရုတ်က ဖိလစ်ပိုင်အပေါ် ဖိအားများတိုးမြှင့်နေကြောင်း ဖိလစ်ပိုင်ကာကွယ်ရေးဝန်ကြီး ဂီဘာတို တီအိုဒိုရို (Gilberto Teodoro) က ပြောသည်ဟု ရိုက်တာမှ ဖော်ပြခဲ့သည်။

တီအိုဒိုရိုသည် နိုဝင်ဘာ ၁၂ ရက်က ဩစတြေးလျနိုင်ငံ၊ ကန်ဘာရာ (Canberra)  မြို့တော်တွင် ဩစတြေးလျ ကာကွယ်ရေးဝန်ကြီး ရစ်ချက် မာလက်စ် (Richard Marles) နှင့် အစည်းအဝေး ပြုလုပ်ချိန်တွင် ထိုသို့ ပြောကြား ခဲ့ခြင်းဖြစ်သည်။

၂၀၂၃ ခုနှစ်နောက်ပိုင်း ပဉ္စမအကြိမ်မြောက် ပြုလုပ်သည့် ထိုအစည်းအဝေးအရ ဖိလစ်ပိုင်နှင့် တရုတ်အကြား လုံခြုံရေးဆက်ဆံမှုများ မြင့်တက်လာသော အခြေအနေကို ပြသရာရောက်ခဲ့သည်။

တောင်တရုတ်ပင်လယ်တွင် တရုတ်နှင့် အာဆီယံနိုင်ငံအချို့အကြား နယ်နိမိတ်ပိုင်ဆိုင်မှု အငြင်းပွားနေသည့် နေရာများတွင် တရုတ်၏ လှုပ်ရှားမှုများနှင့်ပတ်သက်ပြီး ဖိလစ်ပိုင်နှင့် ဩစတြေးလျတို့က စိုးရိမ်ခဲ့ကြသည်။

ဖိလစ်ပိုင်နဲ့ ဩစတြေးလျ ကာကွယ်ရေးဝန်ကြီးတို့ကို တွေ့ရစဉ်

"တရုတ်ဟာ ပိုင်ဆိုင်မှု အငြင်းပွားနေတဲ့ နေရာတွေမှာ ကျနော်တို့ရဲ့ အချုပ်အခြာ အာဏာပိုင်မှုရှိတဲ့ အခွင့်အရေး တွေကို စွန့်လွှတ်ဖို့ တောင်းဆို လှုပ်ရှားနေတာကို တွေ့ရပါတယ်" ဟု တီအိုဒိုရိုက ပြောကြားခဲ့သည်။

ဖိလစ်ပိုင်နှင့် ဩစတြေးလျတို့သည် ၂၀၂၃ ခုနှစ်၊ စက်တင်ဘာလက မဟာဗျူဟာမြောက် မိတ်ဖက်ဆက်ဆံရေး သဘောတူညီချက်ကို လက်မှတ်ရေးထိုးခဲ့ပြီး လအနည်းငယ်အကြာတွင် တောင်တရုတ်ပင်လယ်၌ ၎င်းတို့ ၂ နိုင်ငံ အကြား ပထမဆုံးအကြိမ်အဖြစ် လေကြောင်းနှင့်ရေကြောင်း ပူးတွဲကင်းလှည့်မှု ပြုလုပ်ခဲ့သည်။

ယခုနှစ်တွင်လည်း ဖိလစ်ပိုင်နှင့် ဩစတြေးလျသည် ပထမဆုံးအကြိမ်အဖြစ် ပူးတွဲစစ်ရေး လေ့ကျင့်မှုများ ပြုလုပ်ခဲ့ သည်။

တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူက ဖိလစ်ပိုင်သည် နယ်မြေကျူးကျော်မှုများ ပြုလုပ်ခဲ့သဖြင့် တရုတ်၏ မိမိတို့ အခွင့်အရေးအတွက် လိုအပ်သည့် အစီအမံများကို လုပ်ဆောင်ရခြင်းဖြစ်ကြောင်း တုန့်ပြန် ပြောကြားခဲ့သည်။

"ဖိလစ်ပိုင်အနေနဲ့ နယ်မြေကျူးကျော်မှု၊ ရန်စမှုတွေ မလုပ်ဘူးဆိုရင် ပင်လယ်ရေကြောင်း အခြေအနေဟာလည်း တင်းမာလာမှာ မဟုတ်ပါဘူး" ဟု တရုတ်နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ လင်ကျန်း (Lin Jian) က ပြောကြားခဲ့သည်။

Source: ရိုက်တာ

CNI International News

ဘန်ကောက်၊  နိုဝင်ဘာ ၁၃

ထိုင်းဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) သည် ကနေဒါ၊ အာဂျင်တီးနား၊ မက္ကဆီကို၊ ဘရာဇီးလ်နှင့် ချီလီနိုင်ငံဆိုင်ရာ ထိုင်းသံအမတ်များနှင့် အစည်းအဝေး ပြုလုပ်ချိန်အတွင်း ထိုင်း၏ အာဏာအပျော့ (Soft Power) ကို မြှင့်တင်ရန် တိုက်တွန်းခဲ့သည်ဟု The Nation မှ ဖော်ပြခဲ့သည်။

ကနေဒါ-ထိုင်း တိုက်ရိုက်လေကြောင်း ခရီးစဉ်များအတွက် ကနေဒါ ခရီးသွားများထံမှ တောင်းဆိုမှုများ မြင့်တက် နေကြောင်း ကနေဒါနိုင်ငံဆိုင်ရာ ထိုင်းသံအမတ် ကလာယာန(Kallayana Vipattipumiprates) က ပေတုန်တန် ကို တင်ပြခဲ့သည်။

တောင်အမေရိကနိုင်ငံများတွင် ထိုင်းရုပ်ရှင်များနှင့် အစားအစာများလည်း ရေပန်းစားနေကြောင်း သံတမန်တစ်ဦး ဖြစ်သည့် ဝိမွန်ပချာရ ရက်ဆကီယက် (Vimonpachara Raksakiat) က ပြောကြားခဲ့သည်။

အမေရိကန်ဆိုင်ရာ ထိုင်းသံအမတ် သူရိယ ဂျင်ဒါဝေါင် (Suriya Jindawong) ကလည်း ထိုင်းစီးပွားရေး လုပ်ငန်း များသည် အမေရိကန်တွင် ရင်းနှီးမြှုပ်နှံမှု ပိုမိုကြီးမားလာလိမ့်မည်ဟု ခန့်မှန်းခဲ့သည်။

ထိုင်းဝန်ကြီးချုပ် ပေတုန်တန်နဲ့ ထိုင်းသံအမတ်များကို တွေ့ရစဉ်

ထိုင်းနိုင်ငံ၏ အမေရိကန်ဆိုင်ရာ အထူးလုပ်ငန်း တာဝန်များကို ပေတုန်တန်က "ထိုင်း အသင်း" (Team Thailand)ဟု အမည်တပ်ခဲ့ပြီး ထိုင်း၏ စီးပွားရေးကို ခိုင်မာစေရန် နိုင်ငံတကာ မိတ်ဖက်ဆက်ဆံမှုများ တည်ဆောက်ရန် ညွှန်ကြားခဲ့သည်။

ထို့ပြင် ပြည်ပတွင် အလုပ်လုပ်ကိုင်နေသည့် ပါရမီရှိသည့် ထိုင်းနိုင်ငံသားများအနေဖြင့် ထိုင်းနိုင်ငံကို ပြန်လာပြီး ဖွံ့ဖြိုးတိုးတက်ရေး လုပ်ငန်းစဉ်များကို မြှင့်တင်ရန်လည်း ပေတုန်တန်က ပြောကြားခဲ့သည်။

မိမိတို့ အစိုးရအဖွဲ့သည် ဖျော်ဖြေရေးကဏ္ဍ စီးပွားရေး လုပ်ငန်းများကဲ့သို့ နယ်ပယ်ကဏ္ဍများကို ကမ္ဘာအထိ ပျံ့နှံ့စေရန် အာဏာအပျော့ကို ကျင့်သုံးရေး အာရုံစိုက်ထားကြောင်း ပေတုန်တန်က အတည်ပြုခဲ့သည်။

ဆောင်းရာသီသည် ထိုင်းသို့ ခရီးသွားများ အများအပြား လာရောက်သည့် ရာသီဖြစ်သဖြင့် တာဝန်ရှိသူများ အနေဖြင့် ခရီးသွားများ ဝင်ရောက်လာမည့် အခြေအနေအတွက် အသင့်ပြင်ထားရန်လည်း ၎င်းက တိုက်တွန်းခဲ့ သည်။

Source: The Nation

CNI International News

ဘန်ကောက်၊ နိုဝင်ဘာ ၁၂

ထိုင်းအစိုးရသည် အောက်လွှတ်တော်တွင် နေရာအများစု ရရှိထားမှုနှင့်အတူ ထိုင်းနိုင်ငံရေး အခြေအနေသည် ကောင်းမွန်နေသည်ဟု ယူဆရဖွယ်ရှိနေသော်လည်း နားလည်မှုသဝဏ်လွှာ ၄၄ (MoU 44) ဟု လူသိများသည့် အငြင်းပွားဖွယ် သဘောတူညီချက်ကြောင့် ထိုင်းနိုင်ငံရေး အခြေအနေသည် စိန်ခေါ်မှုနှင့်ရင်ဆိုင်နေရသည်ဟု ဘန်ကောက်ပို့စ်မှ ဖော်ပြခဲ့သည်။

ထိုနားလည်မှု သဝဏ်လွှာကို ၂၀၀၁ ခုနှစ်က ဝန်ကြီးချုပ် သက်ဆင်ရှင်နာဝပ် (Thaksin Shinawatra) လက်ထက် နှင့် ကမ္ဘောဒီးယားဝန်ကြီးချုပ် ဟွန်ဆန် (Hun Sen) လက်ထက်တွင် လက်မှတ် ရေးထိုးခဲ့ခြင်းဖြစ်သည်။

ထိုသဝဏ်လွှာအရ ထိုင်းနှင့် ကမ္ဘောဒီးယားအကြား နယ်မြေပိုင်ဆိုင်မှု အငြင်းပွားမှုများ ဖြစ်ပွားနေသည့် ထိုင်း ပင်လယ်ကွေ့တွင် ပူးတွဲဖွံ့ဖြိုးတိုးတက်ရေး အစီအစဉ်တစ်ခုကို သဘောတူခဲ့ခြင်းဖြစ်သည်။

ထိုသဘောတူညီချက်အရ ဒေသတွင်း တူးဖော်ရရှိသည့် ရေအောက် ဓာတ်ငွေ့များ၊ ရေနံများနှင့် သတ္တုများကို ထိုင်းနှင့် ကမ္ဘောဒီးယားတို့က ထက်ဝက်စီ ခွဲဝေရယူရမည်ဖြစ်သည်။

မကြာသေးမီက ထိုင်းဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) သည် ပူးတွဲ လုပ်ငန်းစဉ် ကော်မတီတစ်ခုကို ကြေညာပြီး ထိုင်းပင်လယ်ကွေ့တွင် ကမ္ဘောဒီးယားနှင့် သဘောတူညီချက်အတွက် ညှိနှိုင်းမှု များကို စတင်လုပ်ဆောင်ရန် ကြိုးပမ်းခဲ့သော်လည်း အတိုက်အခံများ၏ ဝေဖန်မှုများနှင့် ရင်ဆိုင်ခဲ့ရသည်။

ထိုင်းဝန်ကြီးချုပ်ဟောင်း သက်ဆင်ကို တွေ့ရစဉ်

Palang Pracharath ပါတီနှင့် Thai Pakdee တို့ကမူ MoU 44 ကို ဖျက်သိမ်းရန် တိုက်တွန်းခဲ့ပြီး ၂၀၀၁ ခုနှစ်က ထိုနားလည်မှု သဝန်လွှာအား ရက်ပေါင်း ၄၄ ရက်အတွင်း အလောတကြီး လက်မှတ်ရေးထိုးခဲ့ခြင်းဖြစ်ကြောင်း ဝေဖန်ခဲ့ကြသည်။

ထို့ပြင် ထိုနားလည်မှု သဝဏ်လွှာသည် ပင်လယ်ရေကြောင်းဆိုင်ရာ ဥပဒေနှင့်ပတ်သက်သည့် ကုလသမဂ္ဂ၏ သဘောတူညီချက်ကို ချိုးဖောက်နေကြောင်းလည်း အတိုက်အခံများက ပြောကြားခဲ့သည်။

အထူးသဖြင့် ကမ္ဘောဒီးယား၏ ကမ်းဦးရေတိမ်ပိုင်း နယ်နိမိတ် ပိုင်ဆိုင်မှု ကြေညာချက်သည် ထိုင်း၏ အထူးစီးပွားရေးဇုန်နှင့် ခိုကွတ် (Koh Kut) ကျွန်းတို့၏ နယ်မြေကို ထိပါးနေကြောင်းလည်း အတိုက်အခံများက ပြောကြားခဲ့သည်။

ဖျက်သိမ်းခံခဲ့ရသည့် Move Forward ပါတီ (MFP) ဝင်များကနေ အသစ်ဖွဲ့စည်းခဲ့သော ပြည်သူ့ပါတီကမူ ထိုအကြောင်းအရာနှင့်ပတ်သက်ပြီး နုတ်ဆိပ်နေသော်လည်း ထိုနားလည်မှု သဝဏ်လွှာအပေါ် အချေအတင် ငြင်းခုံမှုများက ပေတုန်တန်အစိုးရအဖွဲ့ကို ဖိအားများအောက် ရောက်ရှိစေခဲ့သည်ဟု ကျွမ်းကျင်သူများက ပြောကြားခဲ့သည်။

Source: ဘန်ကောက်ပို့စ်

CNI International News

ကိယက်ဗ်၊ နိုဝင်ဘာ ၁၂

ယူကရိန်းတွင် ရုရှားနှင့် ဖြစ်ပွားနေသည့်စစ်ပွဲ အဆုံးသတ်ရန်အပြင် အနာဂတ်တွင် ထိုကဲ့သို့ ပဋိပက္ခ ထပ်မံ မဖြစ်ပွား စေရေးအတွက် အင်အားနှင့် သံတမန်နည်းလမ်းတို့ အတူတကွ ပေါင်းစည်းလုပ်ဆောင်ရမည် ဖြစ်ကြောင်း ယူကရိန်းသမ္မတ ဇာလန်းစကီး(Volodymyr  Zelensky)က ပြောကြားခဲ့သည်ဟု ရိုက်တာမှ ဖော်ပြခဲ့သည်။

"သံတမန်ရေးရာမှာ အင်အားမရှိရင် အလားအလာ မရှိဘူးဆိုတာကို ကျနော်တို့ ရှင်းရှင်းလင်းလင်း နားလည်ထား ပါတယ်"ဟု ဇာလန်းစကီးက ဗွီဒီယိုမိန့်ခွန်းတွင် ပြောကြားခဲ့သည်။

"ဒါပေမဲ့ သံတမန်ရေးရာ ရည်ရွယ်ချက်တွေကို ရှင်းရှင်းလင်းလင်း သဘောမပေါက် ဘူးဆိုရင်လည်း လက်နက် တစ်ခုတည်းကပဲ အလုပ်မဖြစ်ပါဘူး။ အဲဒါကြောင့် အင်အားနဲ့ သံတမန်နည်းလမ်းကို အတူပေါင်းစည်း လုပ်ဆောင် ရမှာ ဖြစ်ပါတယ်"ဟု ၎င်းက ပြောသည်။

ထိုမှသာ ရုရှားက ယူကရိန်းကို ကျူးကျော်စစ် ဆင်နွှဲသည့်ပုံစံမျိုး ထပ်မံ မဖြစ်ပွားစေဘဲ ငြိမ်းချမ်းရေးတည်မြဲပြီး စစ်ပွဲဖြစ်ပွားမှုများမှ ကာကွယ်နိုင်သည့် တစ်ခုတည်းသော နည်းလမ်းဖြစ်ကြောင်း ၎င်းက ထပ်မံပြောကြားခဲ့သည်။

ဇာလန်းစကီးက ယူကရိန်းကို လက်နက်များ ထောက်ပံ့ပေးရန်အပြင် ငြိမ်းချမ်းရေးအတွက် ရုရှားသမ္မတ ပူတင် (Vladimir Putin)ကို ဖိအားပေးရန် အမေရိကန်နှင့် ၎င်း၏ နေတိုးမဟာမိတ်များကို တိုက်တွန်းပြောကြားခဲ့သည်။

ဇာလန်းစကီးနဲ့ ထရမ့်ကို တွေ့ရစဉ်

ယူကရိန်းသည် ရိုးသားသော သံခင်းတမန်ခင်းကိုသာ ဖွင့်လှစ်ထားကြောင်း ဇာလန်းစကီးက ထပ်မံပြောကြားခဲ့ သည်။

ယူကရိန်းက ရုရှားနယ်မြေအတွင်းသို့ ထိုးစစ်ဆင်ရန်နှင့် မော်စကို၏ စစ်ပွဲအတွက် လိုအပ်သည့် အခြေခံ အဆောက်အအုံများ အားနည်းသွားစေရန်အတွက် အနောက်နိုင်ငံများ၏ တာဝေးပစ် လက်နက်များ အသုံးပြုမှုကို ထောက်ပံ့ကူညီပေးရန် ၎င်း၏မဟာမိတ်များအား တိုက်တွန်းပြောကြားခဲ့သည်။

အမေရိကန်ရွေးကောက်ပွဲတွင် ရီပတ်ဘလစ်ကန်သမ္မတ ဒေါ်နယ်ထရမ့် (Donald Trump)သည် ယူကရိန်း လိုလာသော ဒီမိုကရက်တစ်ပြိုင်ဘက် ကာမယ်လာဟားရစ်(Kamala Harris) ကို အနိုင်ရရှိခဲ့ပြီးနောက် ဇာလန်းစကီးက သံတမန်အင်အား ပိုမိုအားကောင်း ခိုင်မာလာစေရန် တိုက်တွန်း ပြောကြားခဲ့ခြင်းဖြစ်သည်။

ထရမ့်က မဲဆွယ်စည်းရုံး လှုပ်ရှားမှုအတွင်း ၎င်းအနေဖြင့် ယူကရိန်းတွင် ဖြစ်ပွားနေသော စစ်ပွဲကို အဆုံးသတ် နိုင်ရသည်ဟု ထပ်တလဲလဲ ပြောကြားခဲ့သော်လည်း မည်သည့် နည်းလမ်းဖြင့် အဆုံးသတ်မည့်အကြောင်းကိုမူ ပြောကြားခဲ့ခြင်းမရှိပေ။

Source: ရိုက်တာ

CNI International News

အစ္စလာမ်မာဘက်၊ နိုဝင်ဘာ ၁၁

ပါကစ္စတန်နိုင်ငံ အနောက်တောင်ပိုင်း ဘာလိုချီစတန်ပြည်နယ်(Balochistan)ရှိ ရထားဘူတာရုံ တစ်ရုံတွင် ဗုံးဖောက်ခွဲ တိုက်ခိုက်မှုကြောင့် စစ်သား ၁၄ ဦး အပါအဝင် လူ ၂၆ ဦး သေဆုံးခဲ့ကြောင်း ဆေးရုံပြောရေးဆိုခွင့်ရှိသူ တစ်ဦးက နိုဝင်ဘာ ၉ ရက်တွင် ပြောကြားခဲ့သည်ဟု CNA မှ ဖော်ပြခဲ့သည်။

ပြည်နယ်မြို့တော် ကက်တာရှိ အဓိက မီးရထားဘူတာရုံ ပလက်ဖောင်းပေါ်တွင် ခရီးသည်များက စောင့်ဆိုင်းနေ စဉ် ပေါက်ကွဲမှု ဖြစ်ပွားခဲ့ခြင်းဖြစ်သည်။

"စစ်သား ၁၄ ယောက်နဲ့ အရပ်သား ၁၂ ယောက် သေဆုံးသွားပါတယ်"ဟု ကက်တာ၏ ဆန်ဒီမန်ပြည်နယ်ဆေးရုံမှ ပြောရေးဆိုခွင့်ရှိသူ ဝါဆင်ဘိတ်(Wasim Baig)က ပြောကြားခဲ့သည်။

လုံခြုံရေးတပ်ဖွဲ့ဝင် ၄၆ ဦးနှင့်အရပ်သား ၁၄ ဦး ထိခိုက်ဒဏ်ရာ ရရှိခဲ့သည်ဟု ဆိုသည်။ 

အခင်းဖြစ်ပွားရာ နေရာတွင် သွေးအိုင်များနှင့် သွေးစွန်းနေသော လွယ်အိတ်များကို အေအက်ဖ်ပီ သတင်းထောက် တစ်ဦးက မြင်တွေ့ခဲ့သည်။

ပါကစ္စတန် ဗုံးပေါက်ကွဲသည့် နေရာကိုတွေ့ရစဉ်

ဘာလိုချီစတန်တွင် တိုက်ခိုက်မှုများ မကြာခဏ ဖြစ်ပွားလေ့ရှိသော်လည်း နိုဝင်ဘာ ၉ ရက်က ဖြစ်ပွားသည့် ပေါက်ကွဲမှုသည် အာဖဂန်နစ္စတန်နှင့် အီရန် နယ်စပ်တို့နှင့် ထိစပ်နေသော ထိုပြည်နယ်အတွက် သေဆုံးမှုအလွန် များပြားသော ပမာဏဖြစ်သည်။

ရထားဘူတာရုံတွင် ဒေသစံတော်ချိန် နံနက် ၈ နာရီ ၄၅ မိနစ်ခန့်က ပေါက်ကွဲမှု ဖြစ်ပွားခဲ့ခြင်းဖြစ်ပြီး ထိုတိုက်ခိုက် မှုကို ၎င်းတို့ လုပ်ဆောင်ခြင်းဖြစ်ကြောင်း ဘာလို့ချ် လွတ်မြောက်ရေးတပ်မတော် (BLA) က တာဝန်ခံ ထွက်ဆိုခဲ့ သည်။

"ခြေလျင်တပ်ဖွဲ့ စစ်သင်တန်းကျောင်းမှာ စစ်ပညာတွေ လေ့ကျင့် သင်ယူခဲ့ပြီးနောက် ကက်တာ ရထားဘူတာရုံမှာ ရထားစောင့်နေတဲ့ ပါကစ္စတန်စစ်တပ်ရဲ့ တပ်ဖွဲ့တစ်ဖွဲ့ကို ပစ်မှတ်ထား တိုက်ခိုက်ခဲ့ပါတယ်" ဟု BLA က ကြေညာ ခဲ့သည်။

ဗုံးပေါက်ကွဲမှုသည် ရထား ၂ စင်း ထွက်ခွာမည့် အချိန်တွင် လက်မှတ်ရောင်းသည့် ရုံအနီးတွင် ဖြစ်ပွားခဲ့ခြင်း ဖြစ်ကြောင်း မီးရထားအာဏာပိုင်များက ပြောကြားခဲ့သည်။

Source: CNA