CNI International News

မော်စကို၊ နိုဝင်ဘာ ၃

ရုရှားနိုင်ငံ၏အနောက်ဘက် နယ်စပ်အနီးတွင် တပ်စွဲထားသည့် မြောက်အတ္တလန္တိတ်စစ်စာချုပ်အဖွဲ့(နေတိုး) တပ်အင်အားသည် ၃ သောင်းကျော် ရှိသွားပြီဟု ရုရှားကာကွယ်ရေးဝန်ကြီး ဆာဂျေရွှိုင်ဂု (Sergey Shoigu) က ပြောကြားခဲ့ကြောင်း မော်စကိုအခြေစိုက် အာရ်တီသတင်းဌာနက ရေးသားဖော်ပြသည်။

အမေရိကန်ဦးဆောင်သော နေတိုးစစ်အုပ်စုသည် ဥရောပအလယ်ပိုင်းနှင့် အရှေ့ပိုင်းတို့အပြင် ဘော်လကန်ဒေသ နှင့် ဘော်လ်တစ်ပင်လယ်ဒေသနိုင်ငံများတွင်လည်း တပ်ဖွဲ့များ တိုးချဲ့လာကြောင်း ရွှိုင်ဂုက ဆက်လက်ပြောကြား ခဲ့သည်။

“ပြီးခဲ့တဲ့ ဖေဖော်ဝါရီလကတည်းက အခုဆိုရင် တပ်အင်အား ၃ သောင်းကျော်အထိ နှစ်ဆခွဲလောက် တိုးလာတာ တွေ့ရပါတယ်။ မဝေးတော့တဲ့အနာဂတ်ဆိုရင် ဒီထက် ပိုတိုးလာနိုင်ပါတယ်” ဟု ဘယ်လာရုစ်နိုင်ငံမှ စစ်တပ် အရာရှိများ၊ ပူးတွဲဝန်ကြီးများနှင့် အစည်းအဝေး၌ ရွှိုင်ဂုက မှတ်ချက်ချခဲ့သည်။

အနောက်အုပ်စုတပ်များ ထိုသို့စုစည်းနေခြင်းသည် မော်စကိုအတွက်သာမက ရုရှား၏မဟာမိတ် ဘယ်လာရုစ် အတွက်ပါ ခြိမ်းခြောက်လာကြောင်း ၎င်းက ပြောကြားခဲ့သည်။

 နေတိုးအဖွဲ့ဝင် ပေါ်တူဂီ စစ်သားများ စစ်ရေးလေ့ကျင့်နေစဉ်(ဓါတ်ပုံ-AFP)

မိမိတို့နှစ်နိုင်ငံစလုံး၏ ကာကွယ်ရေးသည် ရုရှားဖက်ဒရေးရှင်းနှင့် ဘယ်လာရုစ်တို့အတွက် ဦးစားပေးတာဝန်များ ဖြစ်ကြကြောင်း ၎င်းက ထပ်လောင်းပြောကြားခဲ့သည်။

“ရုရှားနှင့် ထိပ်တိုက်တွေ့မှုအတွက် အနောက်အုပ်စု၏ အဆုံးစွန်ဆုံးရည်ရွယ်ချက်မှာ ရုရှား၏ စီးပွားရေးနှင့် စစ်ရေးအလားအလာများကို ဖျက်ဆီးရန်ဖြစ်ကြောင်း၊ ထို့ပြင် လွတ်လပ်သော နိုင်ငံခြားရေးမူဝါဒ ကျင့်သုံး နိုင်စွမ်းကို ဆုံးရှုံးစေရန်လည်း ၎င်းတို့ကြံရွယ်ထားကြောင်း” ရွှိုင်ဂုက ရှင်းပြခဲ့သည်။

ယူကရိန်းသို့ ရုရှား၏ထိုးစစ်ကို တုံ့ပြန်သည့်အနေဖြင့် နေတိုးသည် ဥရောပအရှေ့ဘက်ပိုင်းတွင် တပ်ဖွဲ့ဝင် အင်အားနှင့် လက်နက်သိုလှောင်ရေးတို့ကို ရုရှားဟန့်တားသည့်အတိုင်းအတာအဖြစ် တိုးမြှင့်ခဲ့သည်။

ပြီးခဲ့သည့် ဇွန်လတွင် ထုတ်ပြန်ခဲ့သော မဟာဗျူဟာစာတမ်းထဲတွင် ရုရှားသည် ငြိမ်းချမ်းရေးနှင့် လုံခြုံရေးတို့ အတွက် အထင်ရှားဆုံးနှင့် တိုက်ရိုက်အကျဆုံး ခြိမ်းခြောက်မှုအဖြစ် နေတိုးကို ရည်ညွှန်းဖော်ပြခဲ့သည်။

ထိုစဉ်က နေတိုးအထွေထွေအတွင်းရေးမှူးချုပ် ဂျန့်စ်စတိုလန်ဘတ်က “၎င်းတို့စစ်ရေးအစုအဖွဲ့၏ လျင်မြန်သော တုံ့ပြန်နိုင်စွမ်းအင်အားသည် ၇ ဆတိုးလာကြောင်း၊ တပ်အင်အား ၃ သိန်းကျော်အထိ မြှင့်တင်သွားမည် ဖြစ်ကြောင်း” ပြောကြားခဲ့ဖူးသည်။

Source: အာရ်တီသတင်းဌာန

CNI International News

မွန်းစတား (ဂျာမနီ)၊ နိုဝင်ဘာ ၃

စက်မှုဖွံ့ဖြိုးပြီး ဒီမိုကရေစီ ၇ နိုင်ငံ (G-7) မှ ထိပ်တန်း သံတမန်များသည် ယူကရိန်းသို့ ရုရှားကျူးကျော်စစ် ဂယက် ရိုက်မှုများနှင့် တရုတ် စီးပွားရေးဩဇာ ကြီးထွားလာမှုတို့ကို ဆွေးနွေးကြမည် ဖြစ်ကြောင်း အေပီသတင်းတစ်ပုဒ် တွင် တွေ့ရသည်။

ယခုသီတင်းပတ်အတွင်း ဂျာမနီနိုင်ငံတွင် နှစ်ရက်ကြာ ဆွေးနွေးပွဲ စတင်သည့်အခါ G-7 အုပ်စုဝင်နိုင်ငံများမှ နိုင်ငံခြားရေးဝန်ကြီးများက ထိုင်ဝမ်နှင့် အီရန်တို့အပေါ် ဆက်ဆံရေးကိုလည်း ထည့်သွင်း ဆွေးနွေးမည်ဟု မျှော်မှန်းရသည်။

ဂျာမနီနိုင်ငံ အနောက်ပိုင်း မွန်းစတား (Munster) မြို့တွင် G-7 အုပ်စုဝင်များ ဖြစ်ကြသည့် ဗြိတိန်၊ ကနေဒါ၊ ပြင်သစ်၊ ဂျာမနီ၊ အီတလီ၊ ဂျပန်နှင့် အမေရိကန် စသည့် ၇ နိုင်ငံတို့သည် တစ်နှစ်နီးပါးကြာ ဖြစ်ပွားနေသော ယူကရိန်းအရေးကို မည်သို့ ဆက်လက် ထိန်းကျောင်းမလဲဆိုသည်ကို အဓိကထား ဆွေးနွေးကြရန် လျာထားသည်။

ယူကရိန်းအလံကို လွှင့်ထားသော အမျိုးသမီးကိုတွေ့ရစဉ် (AP)

ယခင် ဆိုဗီယက်ပြည်ထောင်စုဝင်ဟောင်း ဖြစ်ခဲ့သည့် ယူကရိန်းသို့ ဆက်လက် ကျူးကျော်စစ် ဖြစ်နေမည်ဆိုပါက နောက်ထပ် ကြီးမားသော အကျိုးဆက် ရှိလာမည့်အကြောင်း ရုရှားကို ထပ်မံ သတိပေးရန် ၎င်းတို့က ရည်ရွယ် ထား ကြသည်။

အလားတူ သတိပေးမှုကိုလည်း ကျူးကျော်စစ် အမှန်တကယ် မစတင်မီက G-7 အုပ်စုအတွင်း ရုရှားကို ဒဏ်ခတ် အရေးယူရန် ကတိပြုဖူးခဲ့ကြပြီး G-7 နိုင်ငံအများစုက ထိုကတိအတိုင်း လိုက်နာဆောင်ရွက်ခဲ့ကြသည်။

ယခုအခါ ယူကရိန်း၏ အရပ်ဘက် အခြေခံ အဆောက်အအုံကို မော်စကိုက တိုးမြှင့်တိုက်ခိုက်လာခဲ့ပြီး နယ်မြေ သိမ်းပိုက်ခြင်းနှင့်အတူ ဗျူဟာမြောက် နျူကလီးယား လက်နက်သုံးစွဲရန် အလားအလာ များလာကြောင်း အေပီက ဆက်လက် ရေးသားခဲ့သည်။

ထို့အတွက် မော်စကိုအပေါ် G-7 ၏ ဒဏ်ခတ်ပိတ်ဆို့မှုများမှာ အနည်းငယ် ထိရောက်ခဲ့သည်။

G-7 နိုင်ငံခြားရေးဝန်ကြီးများ ဆွေးနွေးပွဲတက်ဖို့ရောက်လာတဲ့ အမေရိကန်နိုင်ငံခြားရေး၀န်ကြီး (AP)

၎င်းအစည်းအဝေးတွင် ဝန်ကြီးများ ကိုင်တွယ်ဖြေရှင်းရန် မူလက မျှော်လင့်ထားသည့် အကျပ်အတည်း တစ်ခုကို တော့ နိုဝင်ဘာ ၂ ရက်တွင် ရှောင်ရှားခဲ့ကြသည်။

ယင်းသို့ ရှောင်ရှားခဲ့ခြင်းမှာ ယူကရိန်း၏ ဂျုံစပါးနှင့် အခြား ကောက်ပဲသီးနှံများကို ကမ္ဘာ့ဈေးကွက်ထဲသို့ ပို့နိုင် အောင် စစ်အတွင်း သဘောတူညီချက်အား ပြန်လည်စတင်ရန် ရုရှားက လက်ခံလိုက်၍ ဖြစ်ကြောင်း အေပီသတင်း အရ သိရသည်။

သို့သော်လည်း ယူကရိန်းအရေးအတွက် ၎င်းတို့စဉ်းစားကြရာတွင် စွမ်းအင်ထောက်ပံ့မှု အပါအဝင် အခြား အဟန့် အတား ရှိသော ရှုထောင့်များလည်း ကျန်ရှိနေသေးသည်။

ယခုအခါ ယူကရိန်းသည် ဓာတုဗုံး (dirty bomb) ကို သုံးစွဲရန် ပြင်ဆင်နေသဖြင့် မိမိတို့ဘက်မှ နျူကလီးယားဖြင့် တုံ့ပြန်ကောင်း တုံ့ပြန်နိုင်သည်ဟု ရုရှားက ပြောကြားထားသည်။

Source: AP

CNI International News

ဝါရှင်တန်၊ နိုဝင်ဘာ ၃

ယခု နိုဝင်ဘာ ၈ ရက်နေ့ ရွေးကောက်ပွဲမှ ထွက်ပေါ်လာမည့် ရလဒ်များကို လက်ခံရန် ငြင်းဆန်သည့် ရီပက်ဘလီကန် အမတ်လောင်းတချို့၏ ခြိမ်းခြောက်မှုများ ရှိနေကြောင်း အမေရိကန်သမ္မတ ဂျိုးဘိုင်ဒန်က နိုဝင်ဘာ ၂ ရက်တွင် ပြောကြားခဲ့သည်။

အကယ်၍ ၎င်းတို့ ရှုံးနိမ့်ခဲ့ပါက ဒီမိုကရေစီအတွက် ခြိမ်းခြောက်မှုဖြစ်ပြီး ရီပက်ဘလီကန် အမတ်များအား လှုံ့ဆော်ပေးခဲ့သည့် သမ္မတဟောင်း ဒေါ်နယ်ထရမ့်ကို ဘိုင်ဒန်က အပြစ်တင်ခဲ့သည်။

“မဲပေး မမှားကြပါစေနဲ့။ ဒီမိုကရေစီဆိုတာ ကျနော်တို့ အားလုံးအတွက်ပါ”ဟု ဘိုင်ဒန်က ဆက်လက် ပြောကြားခဲ့ သည်။

အမေရိကန်သမ္မတဟောင်း ထရမ့်ကိုတွေ့ရစဉ် (GETTY IMAGES)

ဒီမိုကရက်တစ် အမတ်များက အမေရိကန် အထက်လွှတ်တော်နှင့် အောက်လွှတ်တော်ကို ချုပ်ကိုင်ထားမလား (သို့မဟုတ်) ရီပက်ဘလစ်ကန်တွေကို အာဏာလွှဲပြောင်းပေးမှာလား စသည်ဖြင့် အဆုံးအဖြတ် မထွက်ပေါ်လာခင် ရက်ပိုင်းအလိုတွင် ၎င်း၏မိန့်ခွန်းထဲတွင် ဘိုင်ဒန်က အထက်ပါအတိုင်း ထည့်သွင်းပြောကြားခဲ့သည်။

လွှတ်တော်အမတ်များ စုဝေးလေ့ရှိရာ ကာပီတယ်(လွှတ်တော်)အဆောက်အအုံနှင့် အတော်အတန် မဝေးလှသည့် ဝါရှင်တန်မြို့တော်ရှိ Union Station တွင် မိန်ခွန်းပြောကြားရာ၌ ဘိုင်ဒန်က “မကြာသေးမီက ဆန်ဖရန်စစ္စကို နေအိမ်ရှိ အောက်လွှတ်တော်ဥက္ကဋ္ဌ နန်စီပလိုစီ၏ ခင်ပွန်း ပေါလ်ပလိုစီ တိုက်ခိုက်ခံရမှုဖြစ်စဉ်” ကိုလည်း ထည့် သွင်း ပြောကြားသည်။

ထိုဖြစ်စဉ်သည် ပြီးခဲ့သည့် ၂၀၂၁ ခုနှစ်၊ ဇန်နဝါရီ ၆ ရက် အမေရိကန် ကာပီတယ်(လွှတ်တော်) အဆောက်အအုံ အဓိကရုဏ်းအပြီး နှစ်နှစ်မပြည့်သေးမီ ထပ်မံ၍ ဒီမိုကရေစီ ခြိမ်းခြောက်ခံရမှု သက်သေ ထောက်အထားဖြစ် ကြောင်း ဘိုင်ဒန်က ထပ်လောင်း ပြောကြားခဲ့သည်။

 အမေရိကန် လွှတ်တော်အဓိကရုဏ်း (GETTY IMAGES)

“အိမ်ထဲဝင်လာတဲ့သူက နန်စီ ဘယ်မှာလဲ၊ ဘယ်မှာလဲလို့ မေးတယ်‌ဗျ။ အဲဒီလေသံဟာ မနှစ်က ဇန်နဝါရီ ၆ ရက် ကာပီတယ်ကို ဝင်စီးတုန်းက လူအုပ်ကြီး အော်တဲ့လေသံမျိုးနဲ့ အတူတူပဲလေ” ဟု ၎င်းက ဖြည့်စွက် ပြောကြား ခဲ့သည်။

“ကျနော်တို့ အခုရောက်နေတဲ့ အခိုက်အတန့်ကို ရှည်ရှည်ဝေးဝေး တွေးခေါ်မြော်မြင်ကြပါ” ဟု မဲဆန္ဒရှင် ပြည်သူ များကို ဘိုင်ဒန်က တိုက်တွန်းခဲ့သည်။

ယခုအခါ ဘိုင်ဒန်သည် နောက်ထပ် ၄ နှစ် ရာထူးသက်တမ်း ရနိုင်ခြင်း ရှိ/မရှိ အဆုံးအဖြတ် တစ်ရပ် ထွက်ပေါ်လာ ဖို့ လုပ်ဆောင်နေသည်။

တစ်ချိန်တည်းမှာပင် ၂၀၂၄ ခုနှစ်တွင် သမ္မတရွေးကောက်ပွဲ ဝင်ရန် စဉ်းစားနေသည့် ထရမ့်သည် ယခု ရွေးကောက်ပွဲမှ ထွက်ပေါ်လာမည့် ရလဒ်များကို ငြင်းဆန်သူ များပြားလာအောင် လှုံ့ဆော်နေသည်ဟုလည်း ဘိုင်ဒန်က အပြစ်တင်ခဲ့ကြောင်း ရိုက်တာက ဖော်ပြခဲ့သည်။

Source: Reuters

CNI International News

ဆိုးလ် နိုဝင်ဘာ ၂

တောင်ကိုရီးယားနိုင်ငံ၊ ဆိုးလ်မြို့တော်တွင် လူပေါင်း ၁၅၀ ကျော် သေဆုံးခဲ့ရသည့် Halloween ပါတီပွဲ မတိုင်ခင် နာရီပိုင်းအတွင်း အရေးပေါ် ဖုန်းခေါ်မှုများကို လက်ခံရရှိခဲ့ပြီးနောက် ရဲတပ်ဖွဲ့အနေဖြင့် မည်ကဲ့သို့ တုံ့ပြန်ခဲ့ ကြောင်း ရှင်းပြရန် တာဝန်ပေးခဲ့ကြောင်း တောင်ကိုရီးယားဝန်ကြီးချုပ် ဟန်ဒေါက်ဆိုးက နိုဝင်ဘာ ၂ ရက် (ယနေ့) ပြောကြားခဲ့သည်။

အောက်တိုဘာ ၂၉ ရက် ညပိုင်း ဖြစ်ရပ်ဆိုးကြောင့် လူ ၁၅၆ ဦးသေဆုံးပြီး ၁၇၂ ဦး ဒဏ်ရာရခဲ့သည်။ ဒဏ်ရာ ရသူများအနက် ၃၃ ဦးမှာ စိုးရိမ်ရသည့် အခြေအနေတွင် ရှိနေသည်။

၃ နှစ်အတွင်း Covid-19 ကန့်သတ်ချက်များ ကင်းစင်လုနီးပါး အချိန်၌ ပထမဆုံး ဆင်နွှဲခဲ့ကြသည့် Halloween ပွဲတော်ကို အကြောင်းပြု၍ ဖျော်ဖြေရေး လုပ်ငန်းများ တည်ရှိသည့် အီထယ်ဝမ်ခရိုင်ရှိ ကျဉ်းမြောင်းသော လမ်း ကြားများထဲတွင် လူငယ်ထောင်နှင့်ချီ၍ စုဝေးခဲ့ကြသည်။

တောင်ကိုရီးယားက Halloween ပွဲတော်ကျင်းပသည့် လမ်းကြားကိုတွေ့ရစဉ် (AFP)

အခင်းဖြစ်ပွားပြီးနောက် နိုဝင်ဘာ ၁ ရက်တွင် ရဲတပ်ဖွဲ့က ထုတ်ပြန်ခဲ့သော အရေးပေါ် ဖုန်းခေါ်ဆိုမှု မှတ်တမ်းများ အရ ဖြစ်ရပ်ဆိုးမတိုင်မီ လူသေဆုံးနိုင်သည့် ဖိစီးထိခိုက်မှုများအတွက် ပထမဆုံး သတိပေးချက် ထွက်ပေါ်လာခဲ့ သည်။

ရဲတပ်ဖွဲ့ဝင်များကို ဟိုဘက်သည်ဘက် အုတ်နံရံကြားတွင် ပိတ်မိနေခြင်းမှ ကယ်တင်ရန်အတွက် ဖုန်းခေါ်ဆိုသူ တစ်ဦးက ကနဦး အကြောင်းကြား၍ အကူအညီ တောင်းခံခဲ့သည်။

ထို့နောက် ရဲတပ်ဖွဲ့သည် အလားတူ ဖုန်းခေါ်ဆိုမှု ၁၀ ခုကို ဆက်တိုက် ရရှိခဲ့ပြီး ခေါ်ဆိုသူများက အရေးပေါ် အခြေအနေနှင့် စိတ်ပျက်အားငယ်မှုများအတွက် အသိပေး မေတ္တာရပ်ခံခဲ့ကြသည်။

ကျဉ်းမြောင်းပြီး မတ်စောက်သော လမ်းကြားထဲတွင် လူအချင်းချင်း လဲပြိုတက်နင်းမှုများ မရှိသေးမီ မိနစ်ပိုင်း အလိုတွင် နောက်ဆုံး ဖုန်းခေါ်ဆိုမှုများကို ရဲတပ်ဖွဲ့က လက်ခံဖြေဆိုခဲ့သေးသည်။

တောင်ကိုရီးယားက Halloween ပွဲတော်မှာ သေဆုံးသွားသူများစီးခဲ့သော ဖိနပ်များကိုတွေ့ရစဉ် (AFP)

လမ်းမကြီးပေါ်တွင် ရဲအချို့က ယာဉ်ကြော အသွားအလာများအတွက် လမ်းညွှန်ပေးနေကြောင်း သက်သေခံ မှတ်တမ်းများအရ တွေ့ရသော်လည်း လူစည်ကားရာ လမ်းကြားများနှင့် လမ်းဘေးဝဲယာ တဖက်တချက်တို့တွင် ရဲ အနည်းငယ် (သို့မဟုတ်) မရှိသလောက်ဖြစ်ကြောင်း မျက်မြင်တွေ့ရှိသူများက ရိုက်တာသို့ ပြောကြားခဲ့ကြသည်။

အခင်းဖြစ်ပွားရာ အီထယ်ဝမ်ခရိုင်သို့ လာရောက် စုဝေးသူပေါင်း ၁ သိန်းခန့် ရှိမည်ဟု ခန့်မှန်းရသည်။ ထိုအချိန် တွင် ရဲဦးရေ ၁၃၇ ဦးရှိကြောင်း အာဏာပိုင်များက ပြောကြားခဲ့ကြသည်။

ဖုန်းခေါ်ဆိုမှု ၁၁ ခုအနက် ၄ ခုအတွက် ရဲက အခင်းဖြစ်ပွားရာသို့ သွားရောက်ခဲ့ကြောင်း ရဲအရာရှိတစ်ဦးက သတင်းထောက်များကို ရှင်းပြခဲ့သည်။

အခြားခေါ်ဆိုမှုများကိုတော့ ရဲများ ရောက်မလာခြင်း (သို့မဟုတ်) ရောက်ရှိလာပြီးနောက် မည်သို့ ဘေးကင်းစေ ရေး စီမံပေးခဲ့သည်ကို လတ်တလော ရှင်းရှင်းလင်းလင်း မသိရသေးပေ။

Source: Reuters, Channel News Asia

CNI International News

ဆိုးလ်၊ နိုဝင်ဘာ ၂

ပြီးခဲ့သည့် အောက်တိုဘာ တစ်လတည်း အတွင်းမှာပင် အာရှ၌ လူစုလူဝေး များပြားလွန်းသဖြင့် ဖြစ်ရပ်ဆိုး ၃ ခု ဖြစ်ပွားခဲ့ပြီး လူရာနှင့်ချီ သေဆုံးခဲ့ရကြောင်း အေပီသတင်းက ဖော်ပြခဲ့သည်။

အဆိုပါ ဖြစ်ရပ်ဆိုး ၃ ခုမှာ အိန္ဒိယနိုင်ငံတွင် ပျော်ပွဲရွှင်ပွဲကာလ၌ တံတားကျိုးကျခဲ့ခြင်း၊ တောင်ကိုရီးယားနိုင်ငံ၊ ဆိုးလ်မြို့တော်တွင် Helloween ပွဲတော် ဆင်နွှဲသူများ လူအုပ်ကြားတွင် အချင်းချင်း ထိခိုက်သေဆုံးခဲ့ခြင်းနှင့် အင်ဒိုနီးရှားနိုင်ငံရှိ အားကစားရုံတွင် ပရိသတ်ကို ထိန်းမရဖြစ်၍ ရဲများက မျက်ရည်ယိုဗုံးသုံး၍ ဖြိုခွင်းခဲ့ရခြင်းတို့ ဖြစ်သည်။

ထိုဖြစ်ရပ်ဆိုးများကြောင့် လူ စုစုပေါင်း ၄၀၀ ကျော် သေဆုံးခဲ့ရသည်။

လူစုလူဝေးဆိုင်ရာ စီမံခန့်ခွဲမှု ညံ့ဖျင်းခြင်းကြောင့် အင်ဒိုနီးရှားနှင့် တောင်ကိုရီးယားတို့တွင် ဖြစ်ရပ်ဆိုး ဖြစ်ပွား စေသည်ဟု ကျွမ်းကျင်သူများက ပြောကြသော်လည်း ဖြစ်ပွားပုံများမှာ ကွဲပြားခြားနားကြသည်။

အိန္ဒိယနိုင်ငံတွင် မကြာသေးမီက ပြုပြင်ထားသော တံတားကို လူအများ ဖြတ်သန်းခွင့် တားမြစ်စဉ် အာဏာပိုင် များက တိကျမှန်ကန်စွာ စစ်ဆေးခြင်း ရှိ/မရှိ စုံစမ်းစစ်ဆေးနေသည်။

တောင်ကိုရီးယားနိုင်ငံ၊ ဆိုးလ်မြို့တော်တွင် Halloween ပွဲတော်၌ လူ ၁ သိန်းကျော်ခန့် အောက်တိုဘာ ၂၉ ရက် တွင် ညပိုင်းစုဝေးခဲ့ကြရာ လူ ၁၅၆ ဦးအထိ သေဆုံးခဲ့ရသည်။

အိန္ဒိယနိုင်ငံတွင် ပျော်ပွဲရွှင်ပွဲကာလ၌ တံတားကျိုးကျ(AP)

အီထယ်ဝမ်ခရိုင်ရှိ ကျဉ်းမြောင်းလှသော လမ်းကြားများထဲတွင် လူအများ ပြွတ်သိပ် ပိတ်ဆို့နေသဖြင့် အချင်းချင်း ထိခိုက်မိပြီး ရုန်းရင်းဆန်ခတ် ဖြစ်စေခဲ့ကြောင်း ကျွမ်းကျင်သူများက ကောက်ချက်ချကြသည်။

အခင်းဖြစ်ပွားချိန်တွင် လူအများသည် ၎င်းတို့ကိုယ်လက်အင်္ဂါ လှုပ်ရှားမှုများအပေါ် အပြည့်အဝ ထိန်းချုပ်နိုင်စွမ်း မရှိတော့၍ လူတန်းရှည်ကြီး ဆက်တိုက်ရွေ့လျားနေသည့် သဏ္ဌာန် ဖြစ်ပေါ်လာခဲ့သည်။

လူအုပ်ထဲတွင် ပိတ်မိနေသူများမှာ ၎င်းတို့၏ခြေလက်များ လှုပ်မရတော့သည့် အနေအထား ဖြစ်ခဲ့သည်။

“ဘယ်သူ့ကိုမှ အပြစ်တင်စရာ မလိုပါဘူး။ ရန်လိုတဲ့ သဘောမျိုး ရည်ရွယ်ချက်ရှိရှိ တွန်းအားပေးဖို့လည်း မလိုအပ်ဘူးလို့ မြင်ပါတယ်” ဟု ဩစတြေးလျနိုင်၊ ဆစ်ဒနီမြို့ နယူးဝေလတောင်ပိုင်းတက္ကသိုလ်မှ သုတေသီ မီလက်ဟာ ဂါနီ (Milad Haghani) က ပြောကြားခဲ့သည်။

အင်ဒိုနီးရှား ဘောလုံးကွင်အဓိကရုန်းဖြစ်(AP)

အီထယ်ဝမ် ဖြစ်စဉ်တွင် လူစုလူဝေး ပမာဏသည် ခန့်မှန်းခြေ အဆင့်ဖြင့် ကောင်းစွာ မှတ်တမ်းတင်ထားနိုင်ခဲ့ပြီး လူအများ လဲပြိုခဲ့ခြင်းကြောင့် ဒိုမိုနို (တစ်ခုလဲလျှင် ကျန်သည့်အရာ ဆက်တိုက် လဲပြိုသည့် သဘောတရား) အကျိုးသက်ရောက်မှုကို ဖြစ်ပေါ်စေလိမ့်မည်ဟု မီလက်ဟာဂါနီက သုံးသပ်ပြသည်။

၎င်းသည် ၁၉၀၂ ခုနှစ်မှ စတင်၍ ထိုကဲ့သို့ လူစုလူဝေး ဖြစ်ရပ်ဆိုးပေါင်း ၂၇၅ ခုကို စူးစမ်းလေ့လာခဲ့သည့် သုတေသီ ဖြစ်သည်။

“ဒါပေမယ့် တားဆီးလို့ ရပါတယ်” ဟု ၎င်းက ဆက်လက် ပြောကြားခဲ့သည်။

အဆိုပါ လူအုပ်ကြီးကို ကိုင်တွယ် ဖြေရှင်းရန်အတွက် အောက်တိုဘာ ၂၉ ရက်တွင် လုံခြုံရေးတာဝန်ရှိသူ ၁၃၇ ဦး သာ ထားရှိခဲ့ခြင်းအတွက် ဆိုးလ်အာဏာပိုင်များမှာ အပြစ်တင် ဝေဖန်ခြင်း ခံခဲ့ရသည်။

ထိုဖြစ်စဉ်၏ နောက်ဆက်တွဲ ပေါ်ပေါက်လာသော ဆိုးလ်မြို့တော်ရှိ ဆန္ဒပြပွဲများကို ထိန်းချုပ်ရန်အတွက် အာဏာပိုင်များက နောက်ထပ် ရဲအများအပြားကို ပုံမှန်စေလွှတ်၍ တာဝန်ချထားခဲ့သည်။

Source: AP

CNI International News

ဂျေရုဆလင်၊ နိုဝင်ဘာ ၂

အစ္စရေးဝန်ကြီးချုပ်ဟောင်း ဘင်ဂျမင်နေတန်ယာဟုသည် နိုဝင်ဘာ ၂ ရက် (ယနေ့) အစောပိုင်း၌ သိုသိပ် ကျစ်လစ်စွာဖြင့် ကျင်းပခဲ့သော ရွေးကောက်ပွဲများတွင် ရှေ့ဆုံးမှ ဦးဆောင်ခဲ့ကြောင်း အကြိုစစ်တမ်းများကို ကိုးကားပြီး အေပီသတင်းဌာနက ရေးသားဖော်ပြသည်။

ယခုရွေးကောက်ပွဲ အလားအလာမှာ အာရပ်ဆန့်ကျင်ရေး သဘောထားများအတွက် ထင်ရှားသည့် အစွန်းရောက် လက်ယာယိမ်း မဟာမိတ်များ အားကောင်းနေပြီး အာဏာ ပြန်ရနိုင်ခြေများနေသည်ဟု စစ်တမ်းများအရ သိရသည်။

သို့သော် စစ်တမ်းများတွင် အစ္စရေးမဲဆန္ဒရှင်များ အပြောင်းအလဲ ရှိစေလိုခြင်းကို ထောက်ပြခဲ့ကြသည်။

ပါလက်စတိုင်းများနှင့် ငြိမ်းချမ်းရေးမျှော်လင့်ချက် ပိုမိုမှေးမှိန်သွားခဲ့ပြီး ဘိုင်ဒန်အစိုးရနှင့် အမေရိကန်နိုင်ငံရှိ အစ္စရေး ထောက်ခံသူများကြောင့် ဖြစ်နိုင်ခြေရှိသော ပဋိပက္ခများကို စစ်တမ်းများတွင် အဆင့် သတ်မှတ်ထားခဲ့သည်။

ယခုနိုဝင်ဘာလ ရွေးကောက်ပွဲသည် ၄ နှစ်အတွင်း အစ္စရေးနိုင်ငံ၏ ပဉ္စမမြောက် ရွေးကောက်ပွဲဖြစ်သည်။ အဆိုပါ ရွေးကောက်ပွဲအားလုံးတွင် နေတန်ယာဟု၏ အုပ်ချုပ်ရေး ခိုင်မာစေရန် ဦးတည်ခဲ့ကြသည်။

 အစ္စရေးနိုင်ငံမှာ ကျင်းပတဲ့ ရွေးကောက်ပွဲ (AP)

အကျင့်ပျက်ခြစားမှု စွဲချက်အချို့အတွက် ရုံးတင်စစ်ဆေးခြင်းအပေါ် နေတန်ယာဟုကို ထောက်ခံသူများက မကောင်းသူ ပယ်သည်ဟု ရှုမြင်ခဲ့ကြသော်လည်း အတိုက်အခံများကတော့ လူထုကို လှည့်စားခြင်းနှင့် ဒီမိုကရေစီ ကို ခြိမ်းခြောက်ခြင်းအဖြစ် ရှုတ်ချခဲ့ကြသည်။

ယခုရွေးကောက်ပွဲတွင်လည်း ယခင်ရွေးကောက်ပွဲများ အလားတူ မဲများ တင်းကျပ်ခဲ့သည်။

အစ္စရေးနိုင်ငံ၏ အဓိကရုပ်သံလိုင်း ၃ လိုင်းစလုံးက ကောက်ခံခဲ့သော စစ်တမ်းများတွင် နေတန်ယာဟုနှင့် ၎င်း၏ သဘောထား တင်းမာသော မဟာမိတ်များက လွှတ်တော်ထဲတွင် အမတ်နေရာ ၆၁ နေရာ (သို့မဟုတ်) ၆၂ နေရာ ရရှိမည်ဟု ခန့်မှန်းတွက်ဆထားသည်။

အစ္စရေးလွှတ်တော်ထဲတွင် အမတ်နေရာ ၁၂၀ အများစု ရရှိမှသာ အစိုးရဖွဲ့နိုင်မည် ဖြစ်သည်။

သို့သော် လွှတ်တော်ထဲ ရောက်ရှိရေး လိုအပ်သည့် သတ်မှတ်ချက်ကို ကျော်လွှားနိုင်ရန် နီးစပ်သည့် အာရပ်ပါတီ ငယ်တစ်ခုသည် ၎င်း၏ ထိုးဖောက်တိုးတက်မှုကို ပြသခဲ့သေးသည်။

ရွေးကောက်ပွဲ တာဝန်ရှိသူများသည် ညလုံးပေါက် မဲရေတွက်ခြင်း ဆောင်ရွက်ခဲ့ကြသည်။

နိုဝင်ဘာ ၂ ရက် (ယနေ့) အစောပိုင်းအထိ မဲစုစုပေါင်း ၂၅ ရာခိုင်နှုန်း ရေတွက်ပြီးစီးသော်လည်း နောက်ဆုံး ရလဒ် မှာ ရှင်းရှင်းလင်းလင်း မထွက်ပေါ်လာသေးပေ။

Source: AP

CNI International News

ဆိုးလ်၊ နိုဝင်ဘာ ၂

မြောက်ကိုရီးယား၏ ဒုံးကျည်စမ်းသပ်ပစ်လွှတ်မှုများကို တုံ့ပြန်သည့်အနေဖြင့် ဝေဟင်မှ မြေပြင်ပစ် ဒုံးကျည် စမ်းသပ်မှုများ လုပ်ဆောင်ခဲ့ကြောင်း တောင်ကိုရီးယားက ပြောကြားခဲ့သည်ဟု အေပီသတင်းဌာနက ရေးသား ဖော်ပြသည်။

နှစ်နိုင်ငံ၏အရှေ့ဘက်နယ်စပ်အနီးတွင် တောင်ကိုရီးယားဘက်မှ တိုက်လေယာဉ်များသည် တိကျသည့် ပဲ့ထိန်း ဒုံးကျည် ၃ စင်းကို နိုဝင်ဘာ ၂ ရက် (ယနေ့)တွင် ပစ်ခတ်ခဲ့ကြောင်း တောင်ကိုရီးယားစစ်တပ်က ပြောကြားခဲ့သည်။

အဆိုပါပစ်လွှတ်မှုသည် နိုဝင်ဘာ ၂ ရက်အစောပိုင်း မြောက်ကိုရီးယား ဒုံးကျည်စမ်းသပ်မှုကို တုံ့ပြန်ခြင်းဖြစ်သည်။ မြောက်ကိုရီးယားဒုံးကျည် ၁ စင်းသည် ပင်လယ်နှင့်နှစ်နိုင်ငံနယ်စပ်အနီး ကျရောက်ခဲ့ကြောင်း တောင်ကိုရီးယား က သတင်းထုတ်ပြန်ခဲ့သည်။

တောင်ကိုရီးယားနိုင်ငံ ဆိုးလ်မီးရထားဘူတာရုံတွင် နိုဝင်ဘာလ ၂ ရက်နေ့က မြောက်ကိုရီးယားခေါင်းဆောင် ကင်ဂျုံအန်း၏ ရုပ်သံဖိုင်ကို တီဗွီဖန်သားပြင်တွင် ပြသထားစဉ်(ဓါတ်ပုံ-အေပီ)

မြောက်ကိုရီးယားသည် ၎င်းဦးတည်ရာဘက်သို့ နိုဝင်ဘာ ၂ ရက်တွင် ဒုံးကျည်ပစ်ခတ်ခဲ့ပြီးနောက် ပင်လယ်ထဲသို့ ကျရောက်ပေါက်ကွဲခဲ့ရာ လေကြောင်းအရေးပေါ်သတိပေးမှု ဥဩသံများ ဆူညံသွားခဲ့သည်။

အမေရိကန်နှင့်တောင်ကိုရီးယားတို့ကို အဆိုးရွားဆုံးဖြစ်အောင် နျူကလီးယားလက်နက်သုံးမည်ဟု မြောက်ကိုရီးယားက ခြိမ်းခြောက်ခဲ့ပြီးနောက် နာရီပိုင်းအကြာတွင် အဆိုပါပစ်လွှတ်စမ်းသပ်မှု ပေါ်ထွက်လာခဲ့ သည်။

နှစ်နိုင်ငံ ပြိုင်ဘက်များအကြား အကြီးစားစစ်ရေးလေ့ကျင့်မှုကို ပစ်မှတ်ထားလုပ်ဆောင်လာကြသဖြင့် ကြွေးကြော် သံများကိုလည်း အသီးသီး ပြင်းထန်လာစေခဲ့သည်။

မြောက်ကိုရီးယားသည် ၎င်းနိုင်ငံ၏အရှေ့ဘက်နှင့် အနောက်ဘက်ကမ်းရိုးတန်းသို့ ဒုံးကျည်အမျိုးစုံ ၁၀ စင်းကျော် ပစ်လွှတ်ခဲ့ကြောင်း တောင်ကိုရီးယားစစ်တပ်က အတည်ပြုထုတ်ပြန်ခဲ့သည်။

တောင်ကိုရီးယားသမ္မတ ယွန်ဆော့ရွဲသည် ဆိုးလ်မြို့ရှိ အမျိုးသားလုံခြုံရေးကောင်စီ (NSC) အစည်းအဝေးသို့ တက်ရောက်ခဲ့စဉ်(ဓါတ်ပုံ-အေပီ)

မြောက်ကိုရီးယား၏ အရှေ့ဘက်ကမ်းရိုးတန်းရှိ ဝန်ဆန် (Wonsan) မှ ပစ်ခတ်ခဲ့သည့် ပဲ့ထိန်းဒုံးကျည် ၃ စင်းကို မိမိတို့တွေ့ရှိခဲ့ကြောင်း တောင်ကိုရီးယား ပူးတွဲစစ်ဦးစီးချုပ်ရုံးက နိုဝင်ဘာ ၂ ရက် အစောပိုင်းတွင် သတင်းထုတ် ပြန်ခဲ့သည်။

အဆိုပါဒုံးကျည်များအနက် တစ်လုံးသည် နှစ်နိုင်ငံနယ်စပ် ပင်လယ်အနီးရှိ ၂၆ ကီလိုမီတာ (၁၆ မိုင်) အကွာ အဝေးသို့ ကျရောက်ခဲ့ကြောင်း သိရသည်။

၎င်းဒုံးကျည်ကျရောက်ခဲ့သော နေရာသည် နိုင်ငံတကာရေပိုင်နက်အတွင်း တည်ရှိသော်လည်း နယ်စပ်၏ တောင်ဘက်နှင့် အလှမ်းဝေးသေးသည်။ မြောက်ကိုရီးယား ဒုံးကျည်ကျရောက်မှုမှာ ၁၉၄၈ ခုနှစ် နှစ်နိုင်ငံပြိုကွဲ သွားပြီးနောက် ပင်လယ်ပြင်နယ်စပ်အနီး ပထမဆုံး ကျရောက်မှုဖြစ်ကြောင်း တောင်ကိုရီးယားစစ်တပ်က ပြောကြားခဲ့သည်။

Source: AP

CNI International News

ဘန်ကောက်၊ နိုဝင်ဘာ ၁

လာမည့်ရွေးကောက်ပွဲ ပြန်လည် အရွေးခံရပါက ဝန်ကြီးချုပ် ပရာယွတ်ချန်အိုချာ၏ ရာထူးသက်တမ်းသည် ၂၀၂၅ ခုနှစ်တွင် ကုန်ဆုံးမည်ဖြစ်ကြောင်း ဒုတိယဝန်ကြီးချုပ် ဝစ်စနူကရီယာနမ် (Wissanu Krea-ngam)က အောက်တို ဘာ ၃၁ ရက်တွင် သတင်းထောက်များကို ပြောကြားခဲ့သည်ဟု ဘန်ကောက်ပို့စ် သတင်းအရ သိရသည်။

ဗိုလ်ချုပ်ကြီး ပရာယွတ်၏ ရာထူးသက်တမ်း ကန့်သတ်ချက်အပေါ် ပြီးခဲ့သည့် စက်တင်ဘာ ၃၀ ရက်တွင် စီရင် ချက် ချခဲ့ခြင်းသည် ဝန်ကြီးချုပ်အဖြစ် မည်မျှကြာကြာ ဆက်လက် ထမ်းဆောင်နိုင်ခြင်းအား အဓိပ္ပါယ် အကောက် အယူ လွဲမှားစေခြင်း မရှိကြောင်း မစ္စတာ ဝစ်စနူက ဆက်လက် ပြောကြားခဲ့သည်။

ထိုင်း ဒုတိယဝန်ကြီးချုပ် ဝစ်စနူကရီယာနမ် သတင်းထောက်များကို ရှင်းပြနေစဉ် (GETTY IMAGES)

ဗိုလ်ချုပ်ကြီး ပရာယွတ်၏ ရာထူးသက်တမ်း မည်သည့်ကာလတွင် ကုန်ဆုံးမည်ကို အတိအကျ မဖော်ပြထားသော် လည်း လက်ရှိ ပဋိညာဉ်စာတမ်း အတည်ပြု ပြဋ္ဌာန်းလိုက်သည့် ၂၀၁၇ ခုနှစ်၊ ဧပြီလတွင် ၎င်း၏ ဝန်ကြီးချုပ် ရာထူး သက်တမ်း စတင်ခဲ့ကြောင်း သိရသည်။

ထို့ကြောင့် ဗိုလ်ချုပ်ကြီး ပရာယွတ်သည် လာမည့်နှစ်တွင် ဝန်ကြီးချုပ်အဖြစ် ပြန်လည် အရွေးခံရပါက ဖွဲ့စည်းပုံ အခြေခံဥပဒေ၏ ပုဒ်မ ၁၅၈ ပါ ပြဋ္ဌာန်းချက်ကြောင့် ၎င်းအနေဖြင့် ၂၀၂၅ ခုနှစ်ထက် ကျော်လွန်၍ ၎င်းရာထူး၌ ဆက်ရှိ နေနိုင်မည် မဟုတ်ကြောင်း မစ္စတာ ဝစ်စနူက ထပ်လောင်း ပြောကြားခဲ့သည်။

ဖွဲ့စည်းပုံအခြေခံဥပဒေ ပုဒ်မ ၁၅၈ တွင် ပုဂ္ဂိုလ်တစ်ဦးတစ်ယောက်သည် ၄ နှစ်တာ တာဝန်ထမ်းဆောင်သည် ဖြစ် စေ၊ ရှေ့ဆင့်နောက်ဆင့် ထမ်းဆောင်သည်ဖြစ်စေ ထိုအခြေအနေနှင့် မသက်ဆိုင်ဘဲ အများဆုံး ၈ နှစ်အထိ ဝန်ကြီးချုပ်ရာထူး ထမ်းဆောင်နိုင်ကြောင်း ပြဋ္ဌာန်းထားသည်။

မစ္စတာ ဝစ်စနူက “နောက်ထပ် စီရင်ချက်တစ်ခု ထပ်မလိုပါဘူး။ ဒါပေမယ့် ပုဒ်မ ၁၅၈ မှာ ဝန်ကြီးချုပ်က အိမ်စောင့်အစိုးရ ဝန်ကြီးချုပ်အဖြစ် ထမ်းဆောင်တဲ့ ကာလနဲ့ပတ်သက်ပြီး ဘာမှ မပြောထားတဲ့အတွက် ဘယ်လိုပဲဖြစ်ဖြစ် ဆက်လက် ထမ်းဆောင်နိုင်ခြေရှိတယ်။ ၈ နှစ်ကြာပြီးရင်တော့ ရာထူးက ချက်ချင်းထွက်ရ မယ်လို့ တချို့က အခိုင်အမာ‌ ပြောနိုင်တယ်” ဟု ရှင်းပြသည်။

ဖူထိုင်းပါတီခေါင်းဆောင် ချော်နန်စရီကောကိုတွေ့ရစဉ် (GETTY IMAGES)

ထို့နောက် ပုဒ်မ ၁၅၉ နှင့်ပတ်သက်၍ သတင်းထောက်များမှ ဆက်လက်မေးမြန်းခဲ့ရာ မစ္စတာ ဝစ်စနူက “ဝန်ကြီး ချုပ် ရွေးချယ်ခြင်းရာတွင် အချို့သော ဥပဒေပညာရှင်များအနေဖြင့် ပရာယွတ် ရာထူးသက်တမ်းနှင့် ပတ်သက်၍ ငြင်းခုံစရာအဖြစ် ထိုပုဒ်မကို သုံးနိုင်ကြောင်း ပြောကြားမှုရှိသော်လည်း မိမိက အသေးအဖွဲဟု ယူဆ ကြောင်း” ဖြေကြားခဲ့သည်။

တစ်ချိန်တည်းမှာပင် ဖူထိုင်းပါတီခေါင်းဆောင် ချော်နန်စရီကောက “ဝန်ကြီးချုပ်သည် လာမည့်နှစ်၊ မတ်လတွင် ကျင်းပမည့် အစည်းအဝေးများကို စောင့်ဆိုင်းခြင်းထက် အောက်လွှတ်တော်ကို ဖျက်သိမ်းမည်ဟု ယုံကြည် ကြောင်း” အောက်တိုဘာ ၃၁ ရက်တွင် ပြောကြားခဲ့သည်။

ဖူထိုင်းသည် အစောပိုင်း ရွေးကောက်ပွဲအတွက် ပြင်ဆင်ထားပြီး ပါတီ၏ ဝန်ကြီးချုပ်လောင်း ၃ ဦးကို ကြေညာ မည်ဟု ၎င်းက ဆက်လက် ပြောကြားခဲ့သည်။

Source: Bangkok Post

CNI International News

မော်စကို၊ နိုဝင်ဘာ ၁

တစိတ်တပိုင်း စစ်ရေးလှုပ်ရှားမှုများနှင့် စစ်မှုထမ်းဆင့်ခေါ်စာများကို ရပ်ဆိုင်းလိုက်ပြီဖြစ်ကြောင်း ရုရှား ကာကွယ်ရေးဝန်ကြီးဌာနက အောက်တိုဘာ ၃၁ ရက်တွင် သတင်းထုတ်ပြန်ခဲ့သည်ဟု မော်စကိုအခြေစိုက် တာ့စ်သတင်းဌာနက ရေးသားဖော်ပြသည်။

“စစ်မှုထမ်းရုံးတွေနဲ့ ဒေသန္တရအစိုးရအသီးသီးတွေမှာ အရန်တပ်အင်အား စစ်မှုထမ်းဖို့ဆင့်ခေါ်တဲ့ လှုပ်ရှားမှု အားလုံးကို ရပ်ဆိုင်းလိုက်ပါပြီ။ ပြင်ဆင်ရေးနဲ့ ဆင့်ခေါ်စာပေးပို့တာတွေကိုလည်း အခု ရပ်ဆိုင်းထားပါတယ်” ဟု ဝန်ကြီးဌာန၏ထုတ်ပြန်ချက်တွင် ရေးသားထားသည်။

တစိတ်တပိုင်း စည်းရုံးသိမ်းသွင်းမှု အပြီးသတ်အစီရင်ခံစာများကို နိုဝင်ဘာ ၁ ရက် (ယနေ့) နောက်ဆုံးတင်ပြ ကြရမည်ဖြစ်ပြီး ယင်းကိစ္စနှင့်စပ်လျဉ်းသည့် ညွှန်ကြားချက်များကို စစ်တိုင်းနှင့်ခရိုင်အလိုက် တပ်မှူးများနှင့် မြောက်ပိုင်းတိုင်း ရေတပ်မှ တပ်မှူးထံသို့ ပေးပို့ထားကြောင်း ဝန်ကြီးဌာန၏ထုတ်ပြန်ချက်ထဲတွင် ဆက်လက် ရေးသားထားသည်။

မော်စကိုရှိ စစ်ပညာကျောင်းဆင်း တပ်သားများကိုတွေ့ရစဉ်(ဓါတ်ပုံ-Victor Berzkin/ZUMA)

စည်းရုံးသိမ်းသွင်းရေးလုပ်ငန်းစဉ်အရ အသုံးပြုခဲ့သော အစည်းအဝေးပွဲနေရာများနှင့် အခြားအဆောက်အအုံများကို ယခုအခါ ၎င်းတို့၏ယခင်မူလရည်ရွယ်ချက်များအတိုင်း အသုံးပြုသွားရမည်ဖြစ်ဖြစ်ပြီး စစ်မှုရေးရုံးများကို လည်း မူလလုပ်ငန်းဆောင်တာများအတိုင်း ပြန်လည်တာဝန်ထမ်းဆောင်သွားစေမည်ဖြစ်ကြောင်း ဝန်ကြီးဌာနက ပြောသည်။

စစ်မှုထမ်းရေးအတွက် စစ်သားစုဆောင်းရေးရုံးခွဲအသီးသီးမှာ တပ်ဖွဲ့ဝင်သစ်များအဖြစ် စေတနာ့ဝန်ထမ်းနှင့် စာချုပ်ချုပ်ထားသည့် တပ်သားများကိုသာ ဆက်လက်ခေါ်ယူသွားမည်ဟု သိရသည်။

ပြီးခဲ့သည့် စက်တင်ဘာ ၂၁ ရက်တွင် စတင်ခဲ့သည့် တစိတ်တပိုင်း စစ်မှုထမ်းစည်းရုံးသိမ်းသွင်းရေးလှုပ်ရှားမှုကို အပြီးသတ်လိုက်ပြီဖြစ်ကြောင်း ရုရှားကာကွယ်ရေးဝန်ကြီး ဆာဂျေရွှိုင်ဂု (Sergey Shoigu) က သမ္မတဗလာ ဒီမာပူတင်ထံသို့ အစီရင်ခံတင်ပြပြီးဖြစ်သည်။

လူသစ် ၃၀၀,၀၀၀(သုံးသိန်း) ဆင့်ခေါ်ထားပြီးဖြစ်သည်ဟု ရွှိုင်ဂုက ပြောကြားထားပြီး တစိတ်တပိုင်း စည်းရုံးခြင်း အတွက် နောက်ထပ်ရည်မှန်းချက်များ ချမှတ်ထားမှု မရှိကြောင်း သိရသည်။

Source: တာ့စ်သတင်းဌာန