CNI International News

ဝါရှင်တန်၊ နိုဝင်ဘာ ၈

နိုဝင်ဘာ ၇ ရက်၌ ကောက်ယူခဲ့သော ရိုက်တာ/Ipsos စစ်တမ်းတွင် အမေရိကန်သမ္မတ ဂျိုးဘိုင်ဒန်အပေါ် လူထုထောက်ခံမှုနှုန်းသည် ၃၉ ရာခိုင်နှုန်းသို့ ကျဆင်းသွားခဲ့ကြောင်း ရိုက်တာသတင်းအရ သိရသည်။

ဘိုင်ဒန်၏ ဒီမိုကရက်တစ်ပါတီသည် နိုဝင်ဘာ ၈ ရက် (ယနေ့) တွင် စတင်ကျင်းပမည့် ကြားဖြတ် ရွေးကောက်ပွဲ တွင် မဲအရနည်းလိမ့်မည်ဟု ရွေးကောက်ပွဲအကြိုခန့်မှန်းသူများ၏မျှော်လင့်ချက်ကို အဆိုပါစစ်တမ်းက အားဖြည့် ပေးခဲ့သည်။

ဘိုင်ဒန်၏ လုပ်ကိုင်ဆောင်ရွက်မှု စွမ်းဆောင်ရည်အပေါ် အမေရိကန်လူထု၏ထောက်ခံမှုမှာ သိသာစွာ ကျဆင်း သွားခဲ့ပြီး ၎င်း၏သမ္မတသက်တမ်းအတွင်း အနိမ့်ဆုံးအမှတ်သို့ ရောက်သွားသည်ဟု နှစ်ရက်ကြာ ပြည်လုံးကျွတ် ကောက်ယူခဲ့သော စစ်တမ်းက ပြသခဲ့သည်။

ဘိုင်ဒန်အပေါ် လူထုနှစ်သက်လိုလားမှုအနေအထား ကျဆင်းနေသောကြောင့် ရီပက်ဘလစ်ကန်အမတ်များ အနေဖြင့် အမေရိကန်အောက်လွှတ်တော်နှင့် အထက်လွှတ်တော်တို့တွင် နိုဝင်ဘာ ၈ ရက် ထွက်ပေါ်လာမည့် မဲရလဒ်များအရ အသာစီးရလာနိုင်ကြောင်း ရိုက်တာက ဆက်လက်ရေးသားသည်။

ရီပက်ဘလစ်ကန်များသည် အောက်လွှတ်တော်တွင် အမတ်နေရာ ၂၄ နေရာအထိ အသားတင် ရရှိနိုင်ပြီး အများစု အနိုင်ရမည်ဟု ဗာဂျီးနီးယားတက္ကသိုလ်၊ နိုင်ငံရေးဗဟိုဌာနက ခန့်မှန်းထားကြောင်း နိုဝင်ဘာ ၇ ရက်တွင် သတင်း ထုတ်ပြန်ခဲ့သည်။

ကွန်ကရက်ပူးတွဲ အစည်းအဝေးတစ်ခုတွင် သမ္မတဂျိုးဘိုင်ဒန်ကို တွေ့ရစဉ်(ဓါတ်ပုံ-အေပီ)

ရီပက်ဘလစ်ကန်များသည် အထက်လွှတ်တော်တွင်လည်း ယခင်က ၎င်းတို့လျော့နည်းစွာ ရရှိခဲ့သောနေရာများကို အစားထိုးနိုင်မည်ဟု ၎င်းတက္ကသိုလ်က ခန့်မှန်းသည်။

အမေရိကန်(ကွန်ဂရက်)လွှတ်တော်တစ်ခုတည်းကို ထိန်းချုပ်နိုင်ခဲ့လျှင် ဘိုင်ဒန်၏ ဥပဒေပြုရေးအစီအစဉ်ကို အဟန့်အတားပြုနိုင်ဖို့ ရီပက်ဘလစ်ကန်အမတ်များထံတွင် အခွင့်အာဏာရလာမည်ဖြစ်သည်။

Covid-19 ဖြစ်ပွားနေသည့်ကာလအတွင်း ၂၀၂၁ ခုနှစ်၊ ဇန်နဝါရီလ၌ သမ္မတ တာဝန်ယူခဲ့သည့် ဘိုင်ဒန်၏ ရာထူး သက်တမ်းတလျှောက် ငွေကြေးဖောင်းပွမှုနှုန်း တိုးလာခြင်းအပါအဝင် ကမ္ဘာ့ကျန်းမာရေးအကျပ်အတည်းကြောင့် အမေရိကန်စီးပွားရေးမှာ ဒဏ်ရာဒဏ်ချက်များဖြင့် ပြည့်နှက်နေခဲ့သည်။

ယခုနှစ်တွင်လည်း ဘိုင်ဒန်အပေါ် လူထုထောက်ခံနှုန်းမှာ ပြီးခဲ့သည့် မေလနှင့် ဇွန်လတို့၌ ၃၆ ရာခိုင်နှုန်းအထိ နိမ့်ဆင်းသွားခဲ့သည်။

ယခုသီတင်းပတ်အတွင်း ရိုက်တာ/Ipsos စစ်တမ်းတွင် ပါဝင်ဖြေဆိုသူ သုံးပုံတစ်ပုံခန့်သည် စီးပွားရေးကဏ္ဍကို နိုင်ငံ၏အကြီးမားဆုံးပြဿနာအဖြစ် ရွေးချယ်ဖြေဆိုခဲ့ကြသည်။

အမေရိကန်ပြည်တွင်း၌ ကိုယ်ဝန်ဖျက်ချခွင့်နှင့်ပတ်သက်၍ တရားရုံးချုပ်၏ ပြီးခဲ့သည့်ဇွန်လ ဆုံးဖြတ်ချက် အပြီးတွင်တော့ အဆိုပါအခွင့်အရေးကို အကြီးမားဆုံးပြဿနာအဖြစ် စစ်တမ်းဖြေဆိုသူ ၁၅ ဦးတွင် တစ်ဦးနှုန်း ဖြေဆိုခဲ့ကြောင်း တွေ့ရှိရသည်။

အဆိုပါစစ်တမ်းကို အမေရိကန်ပြည်ထောင်စုတစ်ခုလုံး၌ အွန်လိုင်းမှနေ၍ အင်္ဂလိပ်ဘာသာဖြင့် ကောက်ယူခဲ့ခြင်း ဖြစ်ပြီး ဖြေဆိုသူများထဲတွင် ဒီမိုကရက်တစ်ပါတီဝင် ၄၂၄ ဦးနှင့် ရီပက်လစ်ကန်ပါတီဝင် ၃၉၀ ဦးပါဝင်ခဲ့ကာ အရွယ်ရောက်ပြီးသူ ၁,၀၀၄(တစ်ထောင့်လေး)ဦး၏ သဘောထားများကို စုစည်းထားခြင်းဖြစ်သည်။

Source: Reuters

CNI International News

ပြုံယမ်း၊ နိုဝင်ဘာ ၈

ယူကရိန်းစစ်ပွဲအတွက် ရုရှားနိုင်ငံသို့ လက်နက်များ လျှို့ဝှက်တင်ပို့နေကြောင်း အမေရိကန်၏ ပြောကြားချက်ကို မြောက်ကိုရီးယားက ငြင်းပယ်ခဲ့ပြီး “မော်စကိုထံသို့ မည်သည့်အခါမျှ လက်နက် မရောင်းဖူးသလို ရောင်းချရန် အစီအစဉ်လည်း မရှိကြောင်း” တုံ့ပြန်ခဲ့သည်။

မြောက်ကိုရီးယားသည် ရုရှားကို သိသာထင်ရှားစွာဖြင့် လက်နက်အမြောက်အမြား တင်ပို့နေကြောင်း အိမ်ဖြူ တော် အမျိုးသားလုံခြုံရေးမှ ပြောရေးဆိုခွင့်ရှိသူ ဂျွန်ကာဘီက ယခင်သီတင်းပတ်တွင် ပြောကြားခဲ့သည်။

ထို့နောက် နိုဝင်ဘာ ၈ ရက် (ယနေ့)၌ ပြုံယမ်းအစိုးရပိုင် ကိုရီးယားဗဟိုသတင်းဌာန (KCNA) ၏ ငြင်းပယ်ချက် ပေါ်ထွက်လာခဲ့သည်။

မြောက်ကိုရီးယားသည် အရှေ့အလယ်ပိုင်းနှင့် မြောက်အာဖရိကဒေသများရှိ နိုင်ငံများမှတဆင့် လက်နက် တင်ပို့မှု များကို ဖုံးကွယ်ရန် ကြိုးစားနေကြောင်း၊ လက်နက်တင်ပို့ခြင်းကို ရုရှား လက်ခံရယူမှု ရှိ/မရှိ ဝါရှင်တန်က စောင့် ကြည့်နေကြောင်း ဂျွန်ကာဘီက ဆက်လက်ပြောကြားခဲ့သည်။

မြောက်ကိုရီးယားနဲ့ရုရှား ခေါင်းဆောင် နှစ်ဦးကိုတွေ့ရစဉ် (GETTY IMAGES)

၎င်း၏ ပြောကြားချက်များသည် ကောလာဟလများသာ ဖြစ်သည်ဟု မြောက်ကိုရီးယား ကာကွယ်ရေးဝန်ကြီးဌာန မှ အရာရှိတစ်ဦးက တုံ့ပြန်ခဲ့ပြီး ပြုံယမ်းသည် ရုရှားနှင့် မည်သည့် လက်နက်အမျိုးအစားမျှ ထိတွေ့ဆက်ဆံခြင်း မရှိကြောင်း၊ အနာဂတ်တွင်လည် ထိုသို့ဆက်ဆံရန် အစီအစဉ်မရှိကြောင်း ပြန်လည် ရှင်းလင်းခဲ့သည်။

“အမေရိကန်ရဲ့ ဒီလိုပြောကြားချက်ဟာ နိုင်ငံတကာနယ်ပယ်မှာ မြောက်ကိုရီးယားပုံရိပ်ကို ထိခိုက်စေဖို့အတွက် ရန်လိုတဲ့ ကြိုးပမ်းမှု တစိတ်တပိုင်းအနေနဲ့ တရားမဝင် ပိတ်ဆို့ အရေးယူမှု ဆုံးဖြတ်ချက်ကို ဖော်ညွှန်းတယ်” ဟု အထက်ပါ မြောက်ကိုရီးယား အစိုးရအရာရှိက ပြောကြားခဲ့သည်။

မြောက်ကိုရီးယား၏ တရားဝင် နာမည် အတိုကောက်ဖြစ်သည့် DPRK ဟု ရည်ညွှန်းပြီး KCNA မီဒီယာက ထုတ် လွှင့်ခဲ့သည်။

အိမ်ဖြူ တော် အမျိုးသားလုံခြုံရေးမှ ပြောရေးဆိုခွင့်ရှိသူ ဂျွန်ကာဘီ ကိုတွေ့ရစဉ် (AP)

အမေရိကန်နှင့် တောင်ကိုရီးယားတို့သည် ၎င်းတို့၏ အကြီးဆုံး လေတပ်ချင်း ပူးတွဲစစ်ရေး လေ့ကျင့်နေစဉ် မြောက်ကိုရီးယားကလည်း တိုက်ချင်းပစ် ပဲ့ထိန်းဒုံးကျည် (ICBM) အပါအဝင် လက်နက်စမ်းသပ်မှုများ ဆက်တိုက် ပြုလုပ်ခဲ့သည်။

ထိုကဲ့သို့ ကိုရီးယားကျွန်းဆွယ်များ ပိုမိုတင်းမာလာချိန်၌ အပြန်အလှန် အပြစ်တင် ဝေဖန်မှုများလည်း ပေါ်ပေါက် လာခဲ့သည်။

၂၀၁၇ ခုနှစ်နောက်ပိုင်း ၎င်း၏ ပထမဆုံး နျူကလီးယား စမ်းသပ်မှုအတွက် မြောက်ကိုရီးယား ပြင်ဆင်ကောင်း ပြင်ဆင်နေနိုင်ကြောင်း အမေရိကန်နှင့် တောင်ကိုရီးယားတို့က သတိပေးထားကြသည်။

ပြုံယမ်းအစိုးရ ပေးပို့သည့် သိသာထင်ရှားသော လက်နက်အရေအတွက်သည် ရုရှားကို ၈ လကြာစစ်ပွဲ ဆက်တိုက် နိုင်အောင် အထောက်အကူပြုရန် လုံလောက်သည်ဟု အမေရိကန်အနေဖြင့် ယုံကြည်ကြောင်း ဂျွန်ကာဘီက ဆက်လက်ပြောကြားခဲ့သည်။

Source: Aljazeera

CNI International Article

၂၀၂၂ ခုနှစ်၊ နိုဝင်ဘာ ၆

ယခုရက်ပိုင်းအတွင်း မြောက်ကိုရီးယား အစိုးရအရာရှိများသည် အမေရိကန်-တောင်ကိုရီးယား စစ်ရေးလေ့ကျင့်မှု အပေါ် ပြင်းထန်စွာ တုံ့ပြန်မည်ဟု အခိုင်အမာ ပြောခဲ့ကြသည်။

တောင်ကိုးရီးယား ပင်လယ်ပြင်၏ နှစ်နိုင်ငံနယ်စပ်အနီးတွင် ကျရောက်ခဲ့သော တာတိုပစ် လက်နက် အပါအဝင် ဒုံးကျည်အစင်း ၃၀ နီးပါးကို မြောက်ကိုရီးယားက ယခုသီတင်းပတ်အတွင်း ဆက်တိုက် ပစ်လွှတ်ခဲ့ရာ တောင်ကိုရီးယားဘက်မှ တုံ့ပြန်မှု ထွက်ပေါ်လာခဲ့သည်။

ယခုတစ်ခေါက် မြောက်ကိုရီးယား၏ ဒုံးကျည်စမ်းသပ် ပစ်လွှတ်မှု အများဆုံးအကြိမ် ဖြစ်ခဲ့သဖြင့် တစ်နှစ်တာ အတွင်း သိသာထင်ရှားသော တင်းမာလာမှု တစ်ခုအဖြစ် အရေးတကြီး မေးခွန်းထုတ်စရာ ပေါ်ပေါက်လာခဲ့သည်။

ထိုသို့ လုပ်ဆောင်မှုကို နောက်ထပ် မည်မျှကြာကြာ ဆက်လက် လုပ်ဆောင်မှာလဲဆိုတာ အဓိကဖြစ်သည်။

မြောက်ကိုရီးယား ဒုံးကျည် ပစ်လွှတ်နေသည့် သတင်းကို ကြည့်ရှုနေကြစဉ်(AP)

မြောက်ကိုရီးယား၏ ဖတ်စာအုပ်(ပြဋ္ဌာန်းစာအုပ်)မှာ အစဉ်အလာအားဖြင့် အမေရိကန်၏ အာရုံစိုက်မှုကို မရမချင်း ရန်စမှုများအား အဆက်မပြတ် ထုတ်ပြရန် ဖြစ်နေသည်။

ထို့နောက် ပိတ်ဆို့အရေးယူမှုမှ သက်သာရာ သက်သာကြောင်း (သို့မဟုတ်) အာဏာ၏ ရပ်တည်ချက်အဖြစ် ရှုမြင်သည့် အခြားလိုက်လျောမှုများကို လာရောက်ညှိနှိုင်းနိုင်သည်။

အမေရိကန်သည် လာမည့် ရွေးကောက်ပွဲများကို အာရုံစိုက်နေပြီး ယူကရိန်းစစ်ပွဲကြောင့် ရုရှားနှင့် အနောက်နိုင်ငံ များ၏ ဆုံးရှုံးမှုများကို လတ်တလော အာရုံစိုက်နေရသည်။

ဆိုလိုသည်မှာ မြောက်ကိုရီးယားသည် ၎င်းလိုလားသည့် တုံ့ပြန်မှုကို ရရှိရန် ပိုမိုလုပ်ဆောင်ရမည်ဟု တွက်ဆထား သော်လည်း ပြုံယမ်း၏ တကယ်လုပ်ရပ်များက တောင်ကိုရီးယားနှင့် ဝေးကွာလွန်းအောင် တွန်းပို့နိုင်သည့် အလားအလာကိုလည်း တိုးမြင့်စေသည်။

ပြောရမည်ဆိုလျှင် မြို့တော်ဆိုးလ်တွင် တောင်ကိုရီးယား ပြည်တွင်းဖြစ် နျူကလီးယား အစီအစဉ် ဖန်တီးခြင်းနှင့် ပတ်သက်၍ ဆွေးနွေးမှုများ ကြီးထွားလာနေပြီ ဖြစ်သည်။

အမေရိကန်နဲ့ တောင်ကိုရီးယား ပူးတွဲ စစ်ရေးလေ့ကျင့်နေစဉ် (AP)

မြောက်ကိုရီးယား စစ်ရေးသုံးသပ်သူများက ကင်မ်ဂျုံအန်း၏ ဒေါသကို ဖော်ပြရန်အတွက် ပြုံယမ်း အသုံးပြုသည့် လက်နက်အဆင့်ဆင့်ကို ကာလအတန်ကြာ ပုံကြမ်းဆွဲပြခဲ့ ကြသည်။

အဆိုပါ လက်နက်များ၏ စာရင်းအောက်ခြေအား ကိုးကား၍ မြောက်ကိုရီးယား အစိုးရ ထိန်းချုပ်ထားသော မီဒီယာများတွင် ပြင်းထန်သော စကားလုံးများရှိသည်။

ထို့နောက် နိုဝင်ဘာ ၂ ရက်တွင် မြောက်ကိုရီးယားသည် နိုင်ငံတကာ သတင်းစာ မျက်နှာများတွင် မြင်တွေ့ရသည့် အတိုင်း တာတိုပစ်ဒုံးကျည် အမျိုးအစားကို လွှတ်တင်ပြခဲ့သည်။

နိုဝင်ဘာ ၃ ရက်တွင် ပြုံယမ်းမြို့တော်မှ ပစ်ခတ်သည့် ဒုံးကျည်များ အပါအဝင် တာဝေးပစ် ဒုံးကျည်စမ်းသပ်မှုများ သို့မဟုတ် မြောက်ကိုရီးယားက ယခင်က ဂျပန်ကျွန်းစုကို အပြင်းအထန် ပစ်လွှတ်ခဲ့သော တာလတ်ပစ် ဒုံးကျည် စမ်းသပ်မှုများ ရှိလာခဲ့သည်။

တောင်ကိုရီးယား သမ္မတကို တွေ့ရစဉ် (AP)

ပစိဖတ်သမုဒ္ဒရာထဲ ဖောက်ခွဲပစ်လွှတ်သည့် စာရင်း၏ ထိပ်တွင် မြောက်ကိုရီးယား၏ နျူကလီးယား ကိရိယာများ ထဲမှ တစ်ခုကို စမ်းသပ် ဖောက်ခွဲခြင်း ဖြစ်သည်ဟု အေပီသတင်းက ရေးသားဖော်ပြသည်။

မြောက်ကိုရီးယား၏ လက်နက်စမ်းသပ်မှု အဆင့်သစ် တစ်ခုစီတိုင်းကြောင့် ကမ္ဘာပေါ်တွင် လက်နက် အထူထပ် ဆုံး နယ်စပ်တစ်လျှောက် ကိုရီးယားကျွန်းဆွယ်တွင် တောင်ကိုရီးယား တပ်များနှင့် အမေရိကန်တို့၏ သောင်းနှင့် ချီသော နှစ်ဖက်စလုံးမှ တပ်ဖွဲ့ဝင် ထောင်ပေါင်းများစွာရှိသော တင်းမာမှုများ တိုးလာနေပြီ ဖြစ်သည်။

၎င်းတပ်ဖွဲ့ဝင် အရေအတွက်သည် အကန့်အသတ်ရှိသော ကျွန်းဆွယ် ပထဝီဝင် ဧရိယာတွင် ပြင်းထန်သော လက်နက် အမျိုးအစားများဖြင့် အသုံးချမိသည့်အခါ တွက်ချက်မှု မှားယွင်းပြီး ခိုက်ရန် ဖြစ်ပွားနိုင်ခြေကို တိုးမြင့် စေသည်။

မကြာသေးမီက ရုရှားသည် ဆုတ်ယုတ်မှုများ ဆက်တိုက် ကြုံတွေ့ခဲ့ရသည့် ယူကရိန်းစစ်ပွဲလည်း နမူနာ ရှိနေ သည်။

မြောက်ကိုရီးယားနှင့် ၎င်း၏ စစ်တပ်ကို ဆယ်စုနှစ်များစွာ ထောက်ခံအားပေးခဲ့သည့် မော်စကိုသည် ဝါရှင်တန် အတွက် ဖန်တီးထားသည့် ဒုံးကျည်စမ်းသပ်မှုမှ အာရုံပြောင်း သွားနိုင်သည်ကို မြောက်ကိုရီးယားက သဘော ပေါက်သင့်သည်။

မြောက်ကိုရီးယား ဒုံးကျည်ပစ်လွှတ်နေစဉ် (KCNA)

Hallowen ပျော်ပွဲရွှင်ပွဲများ တဟုန်ထိုး တိုးလာသည့် တောင်ကိုရီးယားတွင် လူပေါင်း ၁၅၀ ကျော် သေဆုံးမှု အတွက် ဝမ်းနည်းပူဆွေးနေခဲ့ရာ အဆိုပါ စစ်ရေး အတားအဆီးသည် မကြုံချင်ဘဲ ကြုံလာရသည်။

သို့သော် မြောက်ကိုရီးယား၏ နောက်ထပ် နျူကလီးယား စမ်းသပ်မှုသည် သူ့အတွက် အန္တရာယ် ဖြစ်စေနိုင်သည် ဟု ယွန်ဆီးတက္ကသိုလ်မှ သံတမန်လေ့လာရေးဆိုင်ရာ တွဲဖက်ပါမောက္ခ ဂျက်ဖရီရောဘတ်ဆင်က မကြာသေးမီက ရေးသားခဲ့သည်။

“ပြီးခဲ့တဲ့ အနှစ် ၃၀ အတွင်းမှာ တောင်ကိုရီးယားရဲ့ သာလွန်တဲ့ စစ်ရေးစွမ်းရည် (အမေရိကန်နဲ့ မဟာမိတ်ဖွဲ့မှု) နဲ့ မြောက်ကိုရီးယားရဲ့ အခြေတည်တဲ့ နျူကလီးယား လက်နက် စွမ်းရည်တို့ကြား ခပ်ကြမ်းကြမ်း ချိန်ညှိမယ့် ချိန်ခွင် လျှာ တစ်ခုကို ထူထောင်ခဲ့ပါတယ်” ဟု ၎င်းက ပြောကြားခဲ့သည်။

သို့သော် တောင်ကိုရီးယားသည် ၎င်း၏ကိုယ်ပိုင် နျူကလီးယား လက်နက်စွမ်းရည်ကို ယုံကြည်မိပြီး လိုက်လျှောက် ပါလျှင် တစ်မျိုးတစ်ဖုံ ပြောင်းလဲသွားနိုင်စရာ ရှိနေသည်။

ပြုံယမ်းသည် ယုံတမ်းစကားတော့ မပြောတတ်ပေ။ ၎င်း၏အလိုဆန္ဒရရှိရန် ၎င်း၏လက်နက် အပြည့်အစုံအား ဖြည့်ပြီး လက်တွေ့အသုံးပြုရန် ကြိုးပမ်းနေသောကြောင့် ရေတိုအတွင်း မြောက်ကိုရီးယား ခွန်အားကို ရပ်တန့်ရန် မျှော်လင့်၍ မရပါကြောင်း။

Source: AP

CNI International News

ဂျကာတာ၊ နိုဝင်ဘာ ၄

အာဆီယံနှင့် သဘောတူခဲ့သည့် ငြိမ်းချမ်းရေးအစီအစဉ် တိုးတက်မှုမရှိသည့်အတွက် နစကတွင် တာဝန်ရှိကြောင်း အင်ဒိုနီးရှား နိုင်ငံခြားရေးဝန်ကြီးက နိုဝင်ဘာ ၃ ရက်တွင် ပြောကြားခဲ့သည်ဟု ရိုက်တာမှ ရေးသား ဖော်ပြထားသည်။

ဒေသတွင်း အစုအဖွဲ့ဖြစ်သော အာဆီယံသည် ပဋိပက္ခဖြစ်ပွားနေသော မြန်မာနိုင်ငံတွင် ရန်လိုမှုများ အဆုံးသတ် နိုင်ရေးအတွက် အဆိုပါ ငြိမ်းချမ်းရေး အစီအစဉ်တွင် အခန်းကဏ္ဍတစ်ခုအဖြစ် ပါဝင်ခဲ့သည်။

၂၀၂၁ ခုနှစ်၊ ဖေဖော်ဝါရီလတွင် ရွေးကောက်ခံအစိုးရ ဖြုတ်ချခံရပြီးနောက် အကြမ်းဖက်မှုများ ရပ်တန့်စေရေး အတွက် ငြိမ်းချမ်းရေးအစီအစဉ်အား အကောင်အထည်ဖော်ဖို့ မြန်မာကို အာဆီယံက တိုက်တွန်းခဲ့သည်။

ပြီးခဲ့သည့် ၁၈ လခန့်က သဘောတူခဲ့သော ယင်းအစီအစဉ်တွင် အပြုသဘောဆောင်သည့် ဆွေးနွေးရေး၊ လူသားချင်း စာနာထောက်ထားမှုဆိုင်ရာ အကူအညီ ရရှိရေးနှင့် အာဆီယံ အထူးသံတမန်တစ်ဦး စေလွှတ်ရေးတို့ ပါဝင်ခဲ့သည်။

အာဆီယံအထူးကိုယ်စားလှယ် ပရတ်ဆိုခွန်နဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

လာမည့်နှစ်တွင် အာဆီယံဥက္ကဋ္ဌ တာဝန်ကို အင်ဒိုနီးရှားက ရယူမည်ဖြစ်သည်။

အင်ဒိုနီးရှား နိုင်ငံခြားရေးဝန်ကြီး ရက်နိုမာစူဒီက အဆိုပါအစီအစဉ် တိုးတက်မှု မရှိခြင်းအတွက် နစကကိုသာ အပြစ်တင်ရမည်ဖြစ်ကြောင်း ရိုက်တာသို့ ပြောကြားခဲ့သည်။

“ဝေဖန်မှုတွေက အာဆီယံကို ရည်ရွယ်တာ မဟုတ်ဘူး။ နစကကိုပဲ ဦးတည်သင့်တယ်” ဟု အင်တာဗျူး တစ်ခု တွင် ၎င်းက ပြောကြားခဲ့သည်။

“ဘယ်သူ့ကို အပြစ်တင် ရမှာလဲ၊ ဘယ်သူက မအောင်မြင်အောင် လုပ်တာလဲဆိုရင် ကျမတို့လည်း မဟုတ်ဘူး။ အာဆီယံလည်း မဟုတ်ဘူး။ ကျမတို့က တခန်းတကဏ္ဍ အနေနဲ့ပဲ လုပ်ပေးခဲ့တာ” ဟု ၎င်းက ဆက်လက် ပြော ကြားခဲ့သည်။

အဆိုပါ သတင်းနှင့်ပတ်သက်၍ ရိုက်တာက သဘောထား မှတ်ချက် တောင်းခံခဲ့သော်လည်း မြန်မာဘက်မှ တုံ့ပြန်ခြင်း မရှိပါ။

၂၀၂၂ ခုနှစ်၊ အောက်တိုဘာ ၂၇ ရက်က အင်ဒိုမှာ အာဆီယံ နိုင်ငံခြားရေးဝန်ကြီးများ အစည်းအဝေး ကျင်းပနေစဉ်

အာဆီယံနှင့် သဘောတူခဲ့သည့် အစီအစဉ် တိုးတက်မှု မရှိခြင်းမှာ ပြည်တွင်း မတည်ငြိမ်မှုများနှင့် ကပ်ရောဂါ ကြောင့်ဟု နစကမှ ယခင်က အကြောင်းပြခဲ့သည်။

လာမည့် သီတင်းပတ် အာဆီယံခေါင်းဆောင်များ ထိပ်သီး အစည်းအဝေး မတိုင်ခင် မြန်မာနိုင်ငံ၏ ငြိမ်းချမ်းရေး အစီအစဉ်အတွက် အကြံပြုချက် အသစ်များ ထွက်ပေါ်လာမည်ဟု ရက်နိုမာစူဒီက ဆက်လက် ပြောကြားခဲ့သည်။

“မြန်မာနိုင်ငံကို နိုင်ငံရေး အကျပ်အတည်းကနေ ရုန်းထွက်နိုင်အောင် ဆွေးနွေးပွဲတွေ အဆင်ပြေချောမွေ့ဖို့ ကျမ တို့ ဆောင်ရွက်ပေးခဲ့ပါတယ်။ နောက်ပြီးတော့ မြန်မာ့ပြဿနာကို ဘယ်သူက ဖြေရှင်းပေးနိုင်မှာလဲဆိုရင် အပြင် လူတွေက မဟုတ်ဘဲ မြန်မာပြည်သူတွေပါပဲ” ဟု သူမက ထပ်လောင်း ပြောကြားခဲ့သည်။

အဖွဲ့ဝင် ၁၀ နိုင်ငံ ပါဝင်သော အာဆီယံသည် နိုင်ငံအချင်းချင်း၏ ပြည်တွင်းရေး ဝင်ရောက် မစွက်ဖက်သည့် မူဝါဒကို ကာလရှည်ကြာ ချမှတ်ခဲ့သော်လည်း တပ်မတော်အပေါ် ဖိအားပေးရန် တက်ကြွလှုပ်ရှားသူများ၏ တောင်းဆိုမှုများနှင့် ရင်ဆိုင်နေရသည်။

Source: Reuters

CNI International News

မော်စကို၊ နိုဝင်ဘာ ၄

အမေရိကန်ဦးဆောင်သော အနောက်အုပ်စု၏လွှမ်းမိုးချုပ်ကိုင်လိုသောဆန္ဒကြောင့် လက်ရှိ ကမ္ဘာလုံးဆိုင်ရာ အကျပ်အတည်းဖြစ်ပေါ်စေခဲ့ကြောင်း ရုရှားလုံခြုံရေးကောင်စီအတွင်းရေးမှူး နီကိုလေပက်ထရူရှက်ဗ် (Nikolay Patrushev) က နိုဝင်ဘာ ၃ ရက်တွင် ပြောကြားခဲ့သည်ဟု တာ့စ်သတင်းဌာနက ရေးသားဖော်ပြသည်။

CIS လုံခြုံရေးကောင်စီအကြီးအကဲများ အစည်းအဝေးတွင် ပက်ထရူရှက်ဗ်က အထက်ပါအတိုင်း ပြောကြားခဲ့ခြင်း ဖြစ်သည်။

“ကမ္ဘာလုံးဆိုင်ရာ အကျပ်အတည်းမှာ ကျနော်တို့မျက်စိရှေ့မှောက်ပဲ မြင်နေရပါတယ်။ အဲဒီအတွက် အဓိက အကြောင်းရင်းကတော့ ကမ္ဘာ့နိုင်ငံအသီးသီးကို လွှမ်းမိုးချုပ်ကိုင်ချင်တဲ့ အနောက်အုပ်စုရဲ့ဆန္ဒကြောင့် ဖြစ်ပါတယ်။ အနောက်အုပ်စုဟာ နိုင်ငံအသီးသီးရဲ့ အမျိုးသားအကျိုးစီးပွား၊ ထူးခြားချက်တွေနဲ့ ဓလေ့ ထုံးတမ်း တွေကို လုံးဝလျစ်လျူရှုထားပါတယ်။ဒါ့အပြင် ဘက်စုံကမ္ဘာ ဖွဲ့စည်းရေးကိုလည်း သူတို့က မျက်ကွယ်ပြုပါတယ်။ အနောက်တိုင်းပုံစံဖော်ဆောင်ဖို့ပဲ ရည်မှန်းလုပ်ဆောင်နေကြတာပါ” ဟု ပက်ထရူရှက်ဗ်က အလေးပေး ပြောကြား ခဲ့သည်။

အမေရိကန်နှင့် အနောက်နိုင်ငံများသည် နိုင်ငံတကာဥပဒေနှင့် ဗျူဟာမြောက် တည်ငြိမ်စေရေး ထိခိုက်စေဖို့ လမ်းစဉ်ကို စတင်ခဲ့ကြောင်း၊ ဘက်ပေါင်းစုံပူးပေါင်းဆောင်ရွက်ရေး အဖွဲ့အစည်းသဏ္ဌာန်ကိုလည်း ဖျက်လို ဖျက်ဆီးပြုခဲ့ကြကြောင်း ၎င်းက မှတ်ချက်ချခဲ့သည်။

ရုရှားလုံခြုံရေးကောင်စီ အတွင်းရေးမှူး ပက်ထရူရှက်ဗ် ထောက်ပြခဲ့သည့်အတိုင်း အဆိုပါလုပ်ရပ်များကို အနောက်နိုင်ငံများက အချိန်ယူ၍ တမင်တကာ ဖန်တီးလုပ်ဆောင်ခဲ့ခြင်းဖြစ်သည်။

၎င်းတို့၏ စစ်ရေးခွန်အားကို ဖြန့်ထုတ်ခြင်းနှင့် စစ်အင်အားအသုံးပြုခြင်းအပြင် ၎င်းတို့အပေါ် ဆန့်ကျင်ပြီး စစ်ရေးတည်ဆောက်သည့်နိုင်ငံများကို တင်းမာသော ပိတ်ဆို့အရေးယူရေးမူဝါဒအောက်သို့ ထားရှိခဲ့ကြသည်။

“ဝါရှင်တန်၊ လန်ဒန်နဲ့ သူတို့ရဲ့မဟာမိတ်တွေဟာ မဆင်မခြင်မူဝါဒကြောင့် ဘော်လကန်ဒေသ၊ အီရတ်၊ လစ်ဗျား၊ ဆီးရီးယား၊ အာဖဂန်နဲ့ ယူကရိန်းတို့မှာ လူပေါင်း သိန်းနဲ့ချီ အသက်ဆုံးရှုံးခဲ့ရတဲ့ သွေးထွက်သံယိုမှုဖြစ်ခဲ့ရပါတယ်” ဟု ပက်ထရူရှက်ဗ်က ပြန်ပြောင်း ပြောကြားခဲ့သည်။

“ရေရှည် ခိုင်မာစေမယ့် လုံခြုံရေးအာမခံချက်တွေနဲ့ပတ်သက်ပြီးတော့ ကျနော်တို့ရဲ့အဆိုပြုချက်တွေကို အနောက် နိုင်ငံတွေက ပယ်ချခဲ့ကြပါတယ်” ဟု ၎င်းက ဆက်လက်ပြောကြားခဲ့သည်။

အပြန်အလှန်လက်ခံနိုင်သော ဆွေးနွေးပွဲနည်းလမ်းကို သုံးစွဲခြင်းအစား တရားမဝင် ဒဏ်ခတ်ပိတ်ဆို့မှုများ ချမှတ်ခြင်းဖြင့် နိုင်ငံတကာစင်မြင့်တွင် ရုရှားကို သီးခြားခွဲထုတ်ဖို့ ကြိုးပမ်းနေကြကြောင်း ၎င်းက ဖြည့်စွက် ပြောကြားခဲ့သည်။

Source: တာ့စ်သတင်းဌာန

CNI International News

အစ္စလာမ်မာဘတ်၊ နိုဝင်ဘာ ၄

ပါကစ္စတန်နိုင်ငံ၏အရှေ့ပိုင်းတွင် နိုဝင်ဘာ ၃ ရက်က ဆန္ဒပြပွဲ၌ သေနတ်သမားတစ်ဦး၏ပစ်ခတ်မှုကြောင့် ဝန်ကြီးချုပ်ဟောင်း အီမရန်ခမ်း၏ခြေထောက်တွင် ဒဏ်ရာရအနည်းငယ် ရရှိသွားကြောင်း အေပီသတင်းအရ သိရသည်။

၎င်းအား ထောက်ခံသူတစ်ဦး သေဆုံးခဲ့ပြီး ဒဏ်ရသူ ၉ ဦးရှိခဲ့ကြောင်း ခမ်း၏ပါတီနှင့် ပါကစ္စတန်ရဲတပ်ဖွဲ့တို့က ပြောကြားခဲ့ကြသည်။

ပစ်ခတ်မှုကျူးလွန်ခဲ့သည့် သေနတ်သမားကို ချက်ချင်းဖမ်းဆီးနိုင်ခဲ့ပြီး ပစ်ခတ်မှုအတွက် ဝန်ခံထွက်ဆိုကြောင်း၊ ၎င်းတစ်ဦးတည်း လုပ်ဆောင်ခြင်းဖြစ်ကြောင်း ရဲတပ်ဖွဲ့က နောက်ပိုင်းတွင် သတင်းထုတ်ပြန်ခဲ့သည်။

မည်ကဲ့သို့သော အခြေအနေမျိုးတွင် ဝန်ခံထွက်ဆိုခြင်းဖြစ်ကြောင်း လတ်တလော ရှင်းရှင်းလင်းလင်း မသိရ သေးပေ။

ပါကစ္စတန် ဝန်ကြီးချုပ်ဟောင်း အီမရန်ခမ်းပါတီကို ထောက်ခံသူများအား တွေ့ရစဉ်(ဓါတ်ပုံ-အေပီ)

“အီမရန်ခမ်းသာ ၎င်း၏ပစ်မှတ်” ဟု ဖိုင်ဇဲဘတ်အမည်ရှိ (Faisal Butt) ပစ်ခတ်မှုသံသယရှိသူက ထွက်ဆို ကြောင်း ပါကစ္စတန်ပြန်ကြားရေးဝန်ကြီး မာယန်အော်ရန်ဇက်ဘ် (Maryam Aurangzeb) က ပြောကြားခဲ့သည်။

အသက် ၇၀ အရွယ်ရှိ အီမရန်ခမ်းသည် လာဟိုးမြို့ရှိ ရှာကက်ခါနမ် (Shaukat Khanum) ဆေးရုံတွင် ခွဲစိတ် ကုသမှုခံယူခဲ့ကြောင်း ၎င်း၏ပါတီမှ ထိပ်တန်းခေါင်းဆောင် အိုမာအေယက်ခမ်းက တွစ်တာလူမှုကွန်ရက်တွင် ရေးသားခဲ့သည်။

ခမ်းသည် ၎င်း၏ညာဘက်ခြေထောက်တွင် ပတ်တီးစည်းထားကြောင်း တွေ့ရှိရသည်ဟု သတင်များအရ သိရသည်။

ခမ်း၏ မဲဆွယ်စည်းရုံးရေးအတွင်း သေနတ်သမားတစ်ဦး၏ ပစ်ခတ်မှုကြောင့် ထောက်ခံသူတစ်ချို့ ဒဏ်ရာရရှိခဲ့စဉ်(ဓါတ်ပုံ-အေပီ)

ယခု ပစ်ခတ်မှုသည် လုပ်ကြံသတ်ဖြတ်ရန် ကြိုးပမ်းခြင်းဟု ပါတီ၏ပြောခွင့်ရသူ ဖာဝပ်ချောင်ဒရီ (Fawad Chaundhry) က နောက်ပိုင်းမှာ ဝီဇီရာဘတ်မြို့ (Wazirabad) ရှိ လူစုလူဝေးတစ်ခုအတွင်း ပြောကြားခဲ့သည်။ ယင်းဖြစ်စဉ်သည် ပါကစ္စတန်တစ်နိုင်ငံလုံးကို တိုက်ခိုက်ခြင်းဖြစ်ကြောင်း၊ ပြည်သူများအတွက် လက်စားချေ ရမည်ဖြစ်ကြောင်း ဆက်လက်ပြောကြားခဲ့သည်။

ပြီးခဲ့သည့် ဧပြီလတွင် လွှတ်တော်အတွင်း အယုံအကြည်မရှိကြောင်း မဲခွဲဆုံးဖြတ်မှုအရ အီမရန်ခမ်းသည် ဝန်ကြီးချုပ်ရာထူးမှ ဖြုတ်ခံရပြီးနောက် ယခုပစ်ခတ်မှုမှာ ပထမဆုံးအကြမ်းဖက်မှုလည်းဖြစ်သည်။

ကာလရှည်ကြာ‌အောင် နိုင်ငံရေးအကြမ်းဖက်မှုများ၊ လုပ်ကြံသတ်ဖြတ်မှုများ သမိုင်းကြောင်းရှိခဲ့သော ပါကစ္စတန်နိုင်ငံတွင် လက်ရှိ မတည်ငြိမ်သည့်အခြေအနေများကြောင့် စိုးရိမ်စရာများ ပိုမိုတိုးပွားလာခဲ့သည်။

Source: AP

CNI International News

ဂျေရုဆလင်၊ နိုဝင်ဘာ ၄

လက်ယာယိမ်း အစ္စရေးဝန်ကြီးချုပ်ဟောင်း ဘင်ဂျမင်နေတန်ယာဟု ဦးဆောင်သော ညွန့်ပေါင်းအဖွဲ့က စုစုပေါင်းနေရာ ၁၂၀ ရှိသော လွှတ်တော်ထဲတွင် အမတ်နေရာအများစုကို ရရှိပြီး ရွေးကောက်ပွဲအောင်ပွဲ ခံခဲ့ကြောင်း အယ်လ်ဂျာဇီးယားသတင်းအရ သိရသည်။ အစ္စရေးနိုင်ငံတွင် အငြင်းပွားဖွယ်ပုဂ္ဂိုလ်တစ်ဦးက ထပ်မံအာဏာပြန်ရစေခြင်းဖြစ်ကြောင်း အယ်လ်ဂျာဇီးယားက ဆက်လက်ရေးသားသည်။

နိုဝင်ဘာ ၃ ရက်တွင် နောက်ဆုံးထုတ်ပြန်ခဲ့သည့် ရွေးကောက်ပွဲရလဒ်များအရ နေတန်ယာဟုနှင့် ၎င်း၏ လက်ယာအစွန်းရောက်အမျိုးသားရေးဝါဒီ မဟာမိတ်များသည် အမတ်နေရာ ၁၂၀ ရှိသော လွှတ်တော်ထဲတွင် ၆၄ နေရာအထိ သိမ်းပိုက်ထားနိုင်ခဲ့သည်။၎င်းအထဲမှ ၃၂ နေရာသည် နေတန်ယာဟု၏ လီကွတ် (Likud) ပါတီမှ ဖြစ်သည်။

နိုဝင်ဘာ ၂ ရက်၌ မဲများ အကြမ်းဖျင်း ၈၅ ရာခိုင်နှုန်း ရေတွက်ပြီးချိန်မှာတော့ နေတန်ယာဟုကို ထောက်ခံကြ သူများက “လွန်စွာကြီးကျယ်ခမ်းနားသော အောင်ပွဲသို့ နီးကပ်လာပြီဖြစ်ကြောင်း” ပြောကြားခဲ့သည်။ ၎င်းတို့သည် တည်ငြိမ်သော အမျိုးသားအစိုးရတစ်ရပ် ဖွဲ့စည်းနိုင်ရေးအတွက် စိတ်အားထက်သန်နေကြသည်။

လက်ရှိဝန်ကြီးချုပ် ယိုင်ယာလာပစ် (Yair Lapid) ဦးဆောင်သော အာဏာရညွန့်ပေါင်းအဖွဲ့က အမတ်နေရာ ၅၁ နေရာ ရရှိခဲ့သည်။ ကျန်နေရာများကိုတော့ အခြားအာရပ်ပါတီငယ်တစ်ခုက ရရှိသွားခဲ့သည်။

အစ္စရေးဝန်ကြီးချုပ် ဘင်ဂျမင်နေတန်ယာဟုသည် အင်္ဂါနေ့တွင် ဂျေရုဆလင်၌ မဲထည့်ခဲ့စဉ်(ဓါတ်ပုံ-Getty Images)

လာပစ်က နေတန်ယာဟုကို ချီးကျူးဂုဏ်ပြုခဲ့ပြီး အာဏာလွှဲပြောင်းပေးရေး ကြားကာလအတွက် ပြင်ဆင်ကြရန် ၎င်း၏ရုံးအဖွဲ့ဝန်ထမ်းများကို ညွှန်ကြားခဲ့သည်ဟု ဝန်ကြီးချုပ်ရုံးထုတ်ပြန်ချက်အရ သိရသည်။

“နိုင်ငံရေးအရ အထူးတလည်ခေါင်းခဲစရာမလိုတော့ဘဲ အစ္စရေးနိုင်ငံတော် ခရီးရောက်လာခဲ့ပါပြီ။ အစ္စရေးပြည်သူ တွေနဲ့ အစ္စရေးနိုင်ငံတော်အတွက် နေတန်ယာဟု အောင်မြင်ပါစေလို့ ဆုတောင်းပါတယ်” ဟု လာပစ်က ထုတ်ဖော်ပြောကြားခဲ့သည်။

အခြားတဖက်တွင်လည်း အကျင့်ပျက်ခြစားမှုဖြင့် တရားရင်ဆိုင်နေရသော နေတန်ယာဟုကို ယခုရွေးကောက်ပွဲ ရလဒ်များအရ အစိုးရဖွဲ့ဖို့ အစ္စရေးသမ္မတ အိုင်ဇက်ဟာဇော့ (Issac Herzog) က လာမည့်သီတင်းပတ်တွင် ဖိတ်ခေါ် ကမ်းလှမ်းဖွယ်ရာရှိသည်။

နေတန်ယာဟုသည် သမိုင်းတလျှောက် လက်ယာအယိမ်းဆုံး အစ္စရေးအစိုးရတစ်ရပ် ပေါ်ပေါက်လာရန်အတွက် ဖွဲ့စည်းနိုင်ဖို့ ၂၈ ရက် အချိန်ယူရမည်ဖြစ်သည်။

၎င်း၏ညွန့်ပေါင်းမဟာမိတ်ဖြစ်သည့် ဘာသာရေးအခြေခံသော ဇီယွန်ဝါဒပါတီက အမတ်နေရာ ၁၄ နေရာ အနိုင် ရခဲ့သည်။

Source: Aljazeera

CNI News

၂၀၂၂ ခုနှစ်၊ နိုဝင်ဘာ ၃

တရုတ် - မြန်မာ နယ်စပ်မှာ အမေရိကန်နိုင်ငံ၏ ဩဇာခံ နိုင်ငံတစ်ခု ပေါ်လာမှာကို တရုတ်မှ စိုးရိမ်သည့်ပုံ ပေါက်နေကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာ အေးမောင်က CNI သတင်းဌာနသို့ ပြောသည်။

ထို့အတူ မြန်မာနိုင်ငံတွင် စစ်ရေး၊ စီးပွားရေး တည်ငြိမ်မှုကို တရုတ်လိုလားကြောင်း၊ မြန်မာနိုင်ငံ အစိတ်စိတ် အမွာမွာ ကွဲသွားမှာကို တရုတ်က လိုလား ပုံ မ‌ပေါ်ကြောင်း ၎င်းက ပြောသည်။

ဒေါက်တာအေးမောင်က “တရုတ်နိုင်ငံဖက်က ပြန်ကြည့်ရင်လည်း မြန်မာနိုင်ငံနဲ့ နယ်ချင်းကပ်နေတဲ့ အရှည်လျား ဆုံး နယ်နိမိတ်ဖြစ်တဲ့အခါမှာ မြန်မာနိုင်ငံ နိုင်ငံရေးတည်ငြိမ်တာ၊ စစ်ရေးတည်ငြိမ်တာ၊ စီးပွားရေး တည်ငြိမ်တာ ကို တရုတ်က လိုလားတယ်၊ မြန်မာနိုင်ငံ အစိတ်စိတ် အမွာမွာ ကွဲသွားမှာကို တရုတ်က လိုလားပုံ မပေါက်ဘူး။ သူ့နိုင်ငံ အကျိုးအတွက်ရော သူ့နယ်စပ်မှာ အမေရိကန် ဩဇာခံ နိုင်ငံတစ်ခု ပေါ်ထွန်းလာမှာကို အင်မတန် စိုးရိမ် တဲ့ပုံ ပေါက်တယ်၊ တစ်ဖက်ဖက်က ပြန်ကြည့်ရင် မြန်မာနိုင်ငံ တည်ငြိမ်အေးချမ်းမှုနဲ့ မပြိုကွဲမှုကို တရုတ်ဖက်က အားပေးတဲ့ပုံ ပေါက်တယ်၊ ဒါလည်း မြန်မာနိုင်ငံ တည်ငြိမ်အေးချမ်းအောင် ဘယ်လို ပေါင်းစည်းမှာလည်း ဆိုတဲ့ အယူအဆကို တကယ်တမ်း ဆောင်ရွက်ကြရမှာက ပြည်ထောင်စုအစိုးရဖက်က တနည်းအားဖြင့် SAC ဖက်က ဖြစ်တဲ့အခါမှာ ဒီပြဿနာရဲ့ ဇစ်မြစ်ကို သူတို့ဖက်က ပြန်သုံးသပ်ဖို့ လိုတာပေါ့” ဟု CNI သတင်းဌာနသို့ ပြော သည်။

UWSA ခေါင်းဆောင် ဦးပေါက်ယူချန်းနဲ့ ဆွန်ကော်ရှန်ကိုတွေ့ရစဉ် (AFP)

လက်ရှိ မြန်မာနိုင်ငံတွင် လက်နက်ကိုင် ပဋိပက္ခများ ဖြစ်ပွားလျက်ရှိနေပြီး၊ နိုင်ငံရေး၊ စီးပွားရေး၊ လူမှုရေး၊ ကျန်းမာရေး၊ ပညာရေး စသည့် အကျပ်အတည်းများဖြင့် ရင်ဆိုင်နေရသည်။

ကချင်လွတ်လပ်ရေးတပ်မတော် (KIA) နှင့် ရှမ်းပြည်ပြန်လည် ထူထောင်ရေး ကောင်စီ (RCSS/SSA) တို့သည် အမေရိကန်နှင့် နီးစပ်ကြောင်း၊ အဆိုပါ ကိစ္စနှင့် ပတ်သက်၍ တရုတ်အစိုးရမှ စိုးရိမ်ပူပန်မှု ရှိသည်ဟု ယူဆ ကြောင်း နိုင်ငံရေးလေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။

၎င်းက “KIA ဆိုတာက အမေရိကန် လိုလားတဲ့လူတွေ ဖြစ်နေတာကို သမိုင်းအဆက်ဆက်က ရှိခဲ့တာကို ဒုတိယ ကမ္ဘာစစ်က အတွေ့အကြုံကရော၊ တရုတ်အစိုးရက အခုမှ နားလည်း သဘောပေါက်ပြီပေါ့နော်၊ ပေါက်တယ်လို့ လည်း ထင်ပါတယ်၊ အဲဒီတော့ ဒီလူတွေ ကြီးထွားလာလို့လည်း မဖြစ်ဘူး။

၂၀၁၆ ခုနှစ်၊ ဇူလိုင်လက မိုင်ဂျာယန်မြို့မှာ မြန်မာနိုင်ငံဆိုင်ရာ တရုတ်အထူးကိုယ်စားလှယ် ဆွန်ကော်ရှန်နဲ့ KIA ခေါင်းဆောင် ဗိုလ်ချုပ်ကြီးအင်ဘန်လကိုတွေ့ရစဉ်

နောက်တစ်ခုက ဦးယွက်စစ်ပေါ့၊ တောင်ပိုင်းက SSA ဆိုရင်လည်း ဒါက ပင်ကိုသဘာဝအရ အမေရိကန်လိုလားသူ ဖြစ်နေတဲ့ အတွက်ကြောင့်မို့လို့ အဲဒီနှစ်ဖွဲ့ကိစ္စနဲ့ ပတ်သက်လို့ကတော့ တရုတ်အစိုးရမှာ စိုးရိမ်ပူပန်မှု ရှိတယ်လို့ ထင်ပါတယ်၊ အဲဒီတော့ ဒီနှစ်ဖွဲ့နဲ့ ပတ်သက်လို့လည်း တရုတ်အစိုးရ အနေနဲ့လည်း မှန်ကန်တဲ့ မူဝါဒတွေ ချမှတ်နိုင်ပါစေလို့ ကျနော့်အနေနဲ့ မျှော် လင့် ပါတယ်” ဟု ပြောသည်။

မြန်မာပြည် နိုင်ငံရေး ပဋိပက္ခများကြောင့် ၎င်းတို့ နိုင်ငံအတွင်း ဒုက္ခသည်များ ရောက်လာမည်ကို တရုတ် မလို လားကြောင်း၊ ၎င်းတို့၏ အကျိုးစီးပွားအတွက် မြန်မာနိုင်ငံ တည်ငြိမ်မှုကိုသာ လိုလားကြောင်း ဒေါက်တာအောင် မျိုးက ပြောသည်။

တရုတ် - မြန်မာ နှစ်နိုင်ငံနယ်နိမိတ်မှာ မိုင်ပေါင်း ၁၃၀၀ ကျော် ထိစပ်လျက်ရှိပြီး နယ်စပ်အနီးတွင် RCSS၊ KIA၊ ရှမ်းပြည်တိုးတက်ရေးပါတီ (SSPP/SSA)၊ ‘ဝ’ ပြည်သွေးစည်းညီညွတ်ရေးပါတီ (UWSA)၊ မြန်မာနိုင်ငံ အမှန်တရား နှင့် မျှတမှု အမျိုးသားပါတီ (MNDAA)၊ အမျိုးသားဒီမိုကရေစီ မဟာမိတ်တပ်မတော် (NDAA)၊ ပလောင်ပြည် လွတ် မြောက်ရေးတပ်ဦး (PSLF/TNLA) စသည့် လက်နက်ကိုင် အဖွဲ့အစည်းများ လှုပ်ရှားလျက်ရှိသည်။

CNI International News

ဝါရှင်တန်၊ နိုဝင်ဘာ ၃

ဆော်ဒီအာရေဗျနှင့် အမေရိကန်တို့ ထောက်လှမ်းရေးသတင်းများ အပြန်အလှန် ဝေငှချက်အရ အီရန်သည် မကြာမီ ဆော်ဒီကို တိုက်ခိုက်ရန် ပြင်ဆင်ကောင်း ပြင်ဆင်လာနိုင်ကြောင်း အမေရိကန်အစိုးရ တာဝန်ရှိသူ ၃ ဦးက နိုဝင်ဘာ ၁ ရက်တွင် ပြောကြားခဲ့သည်ဟု အေပီသတင်းဌာနက ရေးသားဖော်ပြသည်။

ကျယ်ပြန့်စွာ ဖြစ်ပွားခဲ့သော ဆန္ဒပြပွဲများကို တီဟီရန်အစိုးရ ဖြိုခွဲခဲ့ပြီးနောက် ဆော်ဒီသို့ အီရန် တိုက်ခိုက်လာနိုင် သည့် အလားအလာနှင့်ပတ်သက်၍ စိုးရိမ်ပူပန်စရာများ ရှိလာခဲ့ကြောင်း၊ ထို့ပြင် ယူကရိန်းစစ်ပွဲတွင် ရုရှားသုံးရန် အီရန်လုပ် ဒရုန်းများ ပေးပို့ခဲ့ခြင်းအတွက်ကြောင့် ပိုမို၍ စိုးရိမ်စရာ ကောင်းလာကြောင်း ၎င်းတို့က ပြောကြားခဲ့ကြသည်။

“ခြိမ်းခြောက်လာတဲ့ ပုံစံတွေအပေါ် ကျနော်တို့ စိုးရိမ်တယ်။ ပြီးတော့ ကျနော်တို့နဲ့ ဆော်ဒီဟာ စစ်ဘက်နဲ့ ထောက်လှမ်းရေး လမ်းကြောင်းတွေကနေ တဆင့် စဉ်ဆက်မပြတ် အဆက်အသွယ် လုပ်နေပါတယ်” ဟု အမေရိကန် အမျိုးသားလုံခြုံရေးကောင်စီ၏ ထုတ်ပြန်ချက်ထဲတွင် ရေးသားဖော်ပြထားသည်။

အမေရိကန် စစ်ဘက်အကြီးအကဲ တစ်ဦးကိုတွေ့ရစဉ် (AP)

“အဲဒီဒေသတွင်း (အရှေ့အလယ်ပိုင်း)မှာရှိတဲ့ ကျနော်တို့ အကျိုးစီးပွားတွေနဲ့ မိတ်ဖက်တွေကို ကာကွယ်ရေး အတွက် လုပ်ဆောင်စရာ လုပ်ဆောင်ဖို့ ကျနော်တို့ တွန့်ဆုတ်နေမှာ မဟုတ်ပါဘူး” ဟု ထုတ်ပြန်ချက်ထဲတွင် ဆက်လက် ရေးသားထားသည်။

အီရန် တိုက်ခိုက် လာနိုင်သည်ဆိုသော သတင်းအချက်အလက်နှင့်ပတ်သက်ပြီး သဘောထားမှတ်ချက်ပေးရန် အေပီက ဆက်သွယ်ခဲ့သော်လည်း ဆော်ဒီအစိုးရဘက်မှ တုံ့ပြန်ခြင်း မရှိပေ။

အထက်ပါအတိုင်း အမေရိကန်၏ ပြောဆိုချက်များမှာ အခြေအမြစ်မရှိဟု ကုလသမဂ္ဂဆိုင်ရာ အီရန်၏ မစ်ရှင်အဖွဲ့ ကတော့ အေပီသတင်းဌာနသို့ နိုဝင်ဘာ ၂ ရက်တွင် ပြောကြားခဲ့သည်။

“အနောက်အုပ်စုနဲ့ ဇီယွန်ဝါဒီ(အစ္စရေး)လိုလားတဲ့ အစိုးရတွေဟာ အီရန်အစ္စလာမ္မစ်သမ္မတနိုင်ငံအပေါ် အပျက် သဘောဆောင်တဲ့ စိတ်ခံစားချက်တွေ ပေါ်ပေါက်အောင် ဖန်တီးပြီး ဒေသတွင်းနိုင်ငံတွေနဲ့ လက်ရှိ အပြုသဘော ဆောင်တဲ့ လမ်းကြောင်းတွေကို ဖျက်ဆီးဖို့ ရည်ရွယ်တဲ့၊ ဘက်လိုက်တဲ့ သတင်းတွေက ဖြန့်နေတာပါ” ဟု အီရန် မစ်ရှင်က ထုတ်ပြန်ချက် တစ်စောင်ဖြင့် တုံ့ပြန်ခဲ့သည်။

ဆော်ဒီနဲ့ အီရန် ခေါင်းဆောင်များကို တွေ့ရစဉ် (GETTY IMAGES)

ထောက်လှမ်းရေးသတင်း ဝေငှခဲ့မှုကို အတည်ပြုခဲ့သော အမေရိကန်အရာရှိ တစ်ဦးကတော့ “အဆိုပါသတင်းသည် မကြာမီ (သို့မဟုတ်) နောက်ထပ် ၄၈ နာရီအတွင်း တိုက်ခိုက်မည်ဟု ယုံကြည်စိတ်ချရသော ခြိမ်းခြောက်မှု တစ်ရပ်ပင် ဖြစ်ကြောင်း” ပြောကြားခဲ့သည်။

အရှေ့အလယ်ပိုင်း ဒေသတွင်းရှိ အမေရိကန်သံရုံး (သို့မဟုတ်) ကောင်စစ်ဝန်ရုံးမှနေ၍ ဆော်ဒီ (သို့မဟုတ်) ဒေသ တွင်း အခြားနေရာများတွင် အမေရိကန်နိုင်ငံသားများအပေါ် အရေးပေါ် သတိပေးချက် (သို့မဟုတ်) လမ်းညွှန်ချက် ထုတ်ပြန်ထားခြင်းတော့ မတွေ့ရသေးပေ။

အဆိုပါ သတင်းနှင့်ပတ်သက်၍ အမေရိကန် တာဝန်ရှိသူများက အများသိစေရန် သဘောထား မှတ်ချက် ပေးခြင်း မရှိသလို ၎င်းတို့၏ အမည်များကို မဖော်ပြဘဲ ပြောဆိုမှုများသာ ရှိသေးသည်။

ယင်းကဲ့သို့ ဆော်ဒီဘက်မှ ဝေငှလာသည့် ထောက်လှမ်းရေး သတင်းများအကြောင်း မေးမြန်းခဲ့ရာ အမေရိကန် ပင်တဂွန် စစ်ဌာနချုပ်မှ သတင်းပြန်ကြားရေးတာဝန်ခံ ဗိုလ်မှူးချုပ် ပက်ရိုင်ဒါ (Pat Ryder) က “မိမိတို့ အမေရိကန် စစ်ဘက်အရာရှိများ အနေဖြင့် ဒေသတွင်း ခြိမ်းခြောက်မှု အခြေအနေအတွက် စိုးရိမ်မကင်း ဖြစ်မိ နေကြောင်း” အေပီသို့ ပြောကြားခဲ့သည်။

Source: AP