CNI International News
ဘန်ကောက်၊ မတ်လ ၂၂
ထိုင်းရွေးကောက်ပွဲကော်မရှင် (EC) သည် အထွေထွေရွေးကောက်ပွဲကို မေလ ၁၄ ရက် တနင်္ဂနွေနေ့တွင် ကျင်းပသွားမည်ဖြစ်ကာ ကြိုတင်မဲပေးမှုများကို ရွေးကောက်ပွဲမတိုင်ခင် တစ်ပတ်အလို မေလ ၇ ရက်နေ့၌ စတင်သွားမည်ဟု Bangkok Post သတင်းတွင် ဖော်ပြသည်။
ရွေးကောက်ပွဲနှင့််ပတ်သက်သည့် အချိန်စာရင်းကို ကော်မရှင်နာများက အတည်ပြုခဲ့ပြီးနောက် EC သည် ရွေးကောက်ပွဲကျင်းပမည့်နေ့ကို လွှတ်တော်ဖျက်သိမ်းပြီး တစ်ရက်အကြာ အင်္ဂါနေ့တွင် ထုတ်ပြန်ကြေညာ ခဲ့ခြင်းဖြစ်သည်။
ရွေးကောက်ပွဲအတွက် မဲဆန္ဒနယ်ကိုယ်စားလှယ်လောင်း မှတ်ပုံတင်ခြင်းဆိုင်ရာလုပ်ငန်းစဉ်များကို ဧပြီ ၄ ရက်မှ ၇ ရက်အတွင်း ဆောင်ရွက်သွားရမည်ဖြစ်သည်။ ဧပြီ ၄ ရက်မှ ၇ ရက်အတွင်း ပါတီကိုယ်စားလှယ်လောင်း လျှောက်လွှာများကို တင်သွင်းခြင်းနှင့် ဝန်ကြီးချုပ်ရာထူးအတွက် ပါတီကိုယ်စားလှယ်လောင်းများ တင်သွင်းခြင်း တို့ကို ဘန်ကောက်မြို့ ဒင်းဒန်း (Din Daeng) ခရိုင်ရှိ မြို့တော်ခန်းမတွင် လုပ်ဆောင်သွားရမည်ဖြစ်သည်။
ကြိုတင်မဲပေးလိုသူများသည် မတ် ၂၇ ရက်မှ ဧပြီ ၁၃ ရက်အတွင်း လျှောက်ထားမှုလုပ်ဆောင်ရမည်ဖြစ်ပြီး မဲပေးရန် အဆင်မပြေသူများသည်လည်း ၎င်းတို့၏ ပျက်ကွက်မှုအတွက် အကြောင်းပြချက်ကို မေလ ၇ ရက်မှ ၁၃ ရက်အတွင်းနှင့် မေလ ၁၅ ရက်မှ ၂၁ ရက်အတွင်းတင်သွင်းရမည်ဖြစ်သည်။
ရွေးကောက်ပွဲဆီသို့ ရှေ့ဆက်သွားမည့်အချိန်ဖြစ်သည်ဟု အသက် ၆၉ နှစ်ပြည့်မွေးနေ့ကျင်းပချိန်တွင် ဝန်ကြီးချုပ် ပရာယွတ်ချန်အိုချာ (Prayut Chan-o-cha) က သတင်းထောက်များကို ပြောခဲ့သည်။ အစိုးရအဖွဲ့သည် အိမ်စောင့်အစိုးရအဖြစ် ဆက်လက်တာဝန်ယူထားဆဲဖြစ်သည်ဟုလည်း ၎င်းက ပြောသည်။
ဝန်ကြီးချုပ်သစ်ဖြစ်လာမည်ဟု ရေပန်းအစားဆုံးဖြစ်နေသည့် ဖြူးထိုင်းပါတီမှ ပေတုန်တန်၏ ရုပ်ပုံကတ်ပြားကို ကိုင်ဆောင်ထားစဉ်(ဓါတ်ပုံ-ရိုက်တာ)
သီတင်းပတ်များစွာကြာအောင် တရားမဝင်မဲဆွယ်မှုများကိုလုပ်ဆောင်ခဲ့ပြီး နိုင်ငံရေးပါတီများသည် စီးပွားရေးဆိုင်ရာ အကြောင်းအရာများကို ဦးစားပေးခြင်းဖြင့် ၅၂ သန်းသော မဲဆန္ဒရှင်များ၏ မဲကိုရရှိရန် ကြိုးပမ်းခဲ့ကာ လက်ရှိအချိန်တွင် မဲဆွယ်မှုများကို အရှိန်မြှင့်တင်ဆောင်ရွက်နိုင်တော့မည်ဖြစ်သည်။
အတိုက်အခံ ဖြူးထိုင်း (Pheu Thai) ပါတီသည် နိုင်ငံတစ်လွှား နေ့ စဉ်အခမ်းအနားများဖြင့် မဲဆွယ်မှု လုပ်ဆောင် မည်ဟု ယူဆရပြီး ယင်းကို ဝန်ကြီးချုပ်အဖြစ် ရေပန်းစားနေသူ ပေတုန်တန် ရှင်နာဝပ်ထရာ (Paetongtarn Shinawatra) က ဦးဆောင်သွားမည်ဖြစ်သည်။ သူမသည် ကိုယ်ဝန် ခုနှစ်လနှင့်ဖြစ်သည်။
ထိုင်းအမျိုးသားဖွံ့ဖြိုးတိုးတက်မှုဆိုင်ရာ စီမံခန့်ခွဲရေးအဖွဲ့ (Nida) မှနောက်ဆုံးလုပ်ဆောင်ခဲ့သော ရွေးကောက်ပွဲ ဆိုင်ရာ စစ်တမ်းကောက်ယူမှုတွင် ဖြူးထိုင်းပါတီသည် အနိုင်ရရှိရန် ရေပန်းအစားဆုံးဖြစ်ကာ ဝန်ကြီးချုပ် အဖြစ် ရေပန်းစားသူစာရင်းတွင်လည်း ပေတုန်တန်က ဦးဆောင်နေသည်။
