CNI International News

ဖနွမ်ပင်၊ နိုဝင်ဘာ ၁၅

ပြီးခဲ့သည့် ရက်ပိုင်းက ကျင်းပ ပြီးစီးခဲ့သော အာဆီယံထိပ်သီး ခေါင်းဆောင်များ အစည်းအဝေးတွင် မြန်မာနိုင်ငံကို အာဆီယံအဖွဲ့ဝင် အဖြစ်ကနေ ထုတ်ပယ်ပစ်ဖို့ နိုင်ငံတချို့က အဆိုပြု၍ အငြင်းပွားစရာ ဆွေးနွေးမှုများ ရှိခဲ့သည် ဟု ဖိလစ်ပိုင်သမ္မတ ဖာဒီနန်မားကို့စ်ဂျူနီယာက ပြောသည်။

ကမ္ဘောဒီးယားနိုင်ငံတွင် ကျင်းပခဲ့သည့် အကြိမ် ၄၀ နှင့် ၄၁ ကြိမမြောက် အာဆီယံထိပ်သီးအစည်းအဝေးများ၌ အာဆီယံအနေဖြင့် မြန်မာနိုင်ငံနှင့် မည်သို့ဆက်ဆံသင့်ကြောင်း ဆွေးနွေးမှုများအနက် အနည်းငယ် အငြင်းပွား စရာ ဖြစ်လာကြောင်း ဖိလစ်ပိုင်သမ္မတ ဖာဒီနန်မားကို့စ်ဂျူနီယာက နိုဝင်ဘာ ၁၃ ရက်တွင် ပြောကြားခဲ့သည်။

၂၀၂၁ ခုနှစ်၊ ဖေဖော်ဝါရီလတွင် ဒေါ်အောင်ဆန်းစုကြည်၏ အရပ်သားအစိုးရကို စစ်တပ်က ဖြုတ်ချပြီး ကတည်းက မြန်မာပြည်တွင်း နိုင်ငံရေးအကျပ်အတည်းနှင့် ရင်ဆိုင်ခဲ့ရသလို တိုက်ပွဲများ ဖြစ်ပွားခဲ့ခြင်းကြောင့်လည်း လူထောင် ပေါင်းများစွာ သေကြေပျက်စီးခဲ့ရသည်။

အာဆီယံ ထိပ်သီး ခေါင်းဆောင်များ အစည်းအဝေးတွင် ထိုင်ခုံအလွတ်ဖြစ်နေသော မြန်မာ(Reusters)

မြန်မာ့အကျပ်အတည်းသည် အာဆီယံထိပ်သီး အစည်းအဝေးသို့ တက်ရောက်လာသည့် အာဆီယံ ခေါင်းဆောင် များအတွက် အဓိကစိုးရိမ်ပူပန်စရာ ဖြစ်ခဲ့ရသည်ဟု မားကို့စ်က ဆက်လက် ပြောကြားခဲ့သည်။

“အဲဒီနေရာမှာ နည်းနည်းတော့ ငြင်းစရာဖြစ်ပါတယ်။ ဘာဖြစ်လို့လဲဆိုတော့ အာဆီယံထဲမှာ မြန်မာနိုင်ငံကို ဖယ်ချန်ထားချင်တဲ့ နိုင်ငံတွေ (ဒါမှမဟုတ်) အစည်းအဝေး မဖိတ်ချင်တဲ့နိုင်ငံတွေ ရှိနေပါတယ်။ တချို့နိုင်ငံတွေ ကလည်း မြန်မာကို ထုတ်ပစ်သင့်တယ်လို့ ပြောကြတယ်။ တချို့ကလည်း မြန်မာစစ်တပ် ထိပ်ပိုင်းကို တင်မကဘဲ အောက်ခြေတပ်သားတွေအထိပါ ပြောသင့်တယ်လို့ ဆွေးနွေးကြတယ်” ဟု အစည်းအဝေးအတွင်း အတွေ့အကြုံ ကို ၎င်းက ရှင်းပြသည်။
“ကျနော်တို့အားလုံး အမြင်ချင်း မတူကြပါဘူး။ အာဆီယံကနေ မြန်မာကို လုံးဝထုတ်ပစ်ဖို့ အဆိုလည်း ရှိပါတယ်။ အပြည့်အဝ ထိတွေ့ဆက်ဆံမယ်ဆိုရင်လည်း အနည်းငယ် ကွဲပြားတဲ့ ရပ်တည်ချက်တွေ ရှိပါတယ်” ဖိလစ်ပိုင် သမ္မတ မားကို့စ်က ထပ်လောင်း ပြောကြားခဲ့သည်။

၎င်း၏ ရပ်တည်ချက် အပိုင်းနှင့်ပတ်သက်၍ မားကို့စ်က “စစ်တပ်အုပ်ချုပ်သူများနှင့် အတိုက်အခံ လှုပ်ရှားသူများ အပါအဝင် သက်ဆိုင်သူ အားလုံးနှင့် အာဆီယံ တိုက်ရိုက် ထိတွေ့ဆက်ဆံခြင်းအားဖြင့် မြန်မာပြည်တွင်း အကြမ်း ဖက်မှုများ အဆုံးသတ်ပေးဖို့ အရေးကြီးကြောင်း” ထုတ်ဖော်ပြောကြားခဲ့သည်။

အာဆီယံ ထိပ်သီး ခေါင်းဆောင်များ အစည်းအဝေး ကျင်းပနေသည်ကိုတွေ့ရစဉ်

“သူတို့ဆီက အားလုံးနဲ့ စကားပြောသင့်တယ်လို့ ကျနော် ချပြခဲ့ပါတယ်။ ပါဝင်ပတ်သက်သူတိုင်းနဲ့ စိတ်ပါဝင်စားသူ တိုင်းနဲ့ ဆွေးနွေးကြပါစို့လို့ ကျနော် ပြောခဲ့ပါတယ်။ အခုဖြစ်နေတာက ဘယ်သူကမှ စစ်ဗိုလ်ချုပ်တွေကို မဆက်ဆံ ချင်ကြဘူး။

ဘယ်သူကမှ အစိုးရအဆင့်မြင့် တာဝန်ရှိသူတွေနဲ့ မဆက်ဆံချင်ကြပါဘူး။ ဒါပေမယ့် သေချာတာက တော့ ကွဲပြားခြားနားတဲ့ ထိတွေ့ဆက်ဆံမှု အဆင့်တွေကို အဆိုပြု ထားတယ်ဆိုတာပါ” ဟု မားကို့စ် ပြောသည်။

နိုဝင်ဘာ ၁၂ ရက်တွင် အာဆီယံခေါင်းဆောင်များသည် ၎င်းတို့ အစုအဖွဲ့နှင့် မြန်မာနိုင်ငံတို့ သဘောတူ လက်ခံ ထားသည့် အချက် ၅ ချက်ကို အလုံးစုံ အကောင်အထည် ဖော်သင့်ကြောင်း ကြေညာချက်တစ်စောင် ထုတ်ပြန်ခဲ့ သည်။

အဆိုပါ အချက် ၅ ချက်တွင် မြန်မာနိုင်ငံ၌ အကြမ်းဖက်မှုများ ရပ်တန့်ရန်နှင့် သက်ဆိုင်ရာ အဖွဲ့အစည်း အားလုံး အကြား အပြုသဘောဆောင် ဆွေးနွေးကြဖို့ တောင်းဆိုထားသည်။

Source: ABS/CBN News

CNI International News

မော်စကို၊ နိုဝင်ဘာ ၁၅

ယူကရိန်းအရေးနှင့်ပတ်သက်၍ ရုရှားလျော်ကြေးပေးရန် ကုလသမဂ္ဂ (UN) ဆုံးဖြတ်ချက်ကို အတည်ပြု လိုက်ပြီးနောက် UN အထွေထွေညီလာခံအနေဖြင့် ကိုရီးယား၊ ဗီယက်နမ်၊ အီရတ်၊ ယူဂိုဆလားဗီးယားနှင့် အခြားနိုင်ငံတို့၏ ပျက်စီးဆုံးရှုံးမှုများအတွက်လည်း အမေရိကန်လျော်ကြေးပေးဖို့ ဆက်လက်ဆုံးဖြတ်ပေးရန် ရုရှားလုံခြုံရေးကောင်စီ ဒုတိယဥက္ကဋ္ဌ ဒီမီထရီမက်ဗီဒက်က နိုဝင်ဘာ ၁၄ ရက်တွင် တောင်းဆိုခဲ့သည်။

“ကိုရီးယား၊ ဗီယက်နမ်၊ အီရတ်၊ ယူဂိုဆလားဗီးယားနဲ့ အမေရိကန်၊ နေတိုးတို့ကြောင့် ထိခိုက်နစ်နာခဲ့ရတဲ့ တခြားနိုင်ငံတွေအပေါ် အမေရိကန်ရဲ့ စုစုပေါင်းလျော်ကြေးကို နစ်နာမှုနဲ့ထပ်တူ ဆုံးဖြတ်ချက်ချသင့်ပါတယ်” ဟု မက်ဗီဒက်က ၎င်း၏တယ်လီဂရမ်ချန်နယ်ပေါ်တွင် ရေးသားလွှင့်တင်ခဲ့သည်။

ယူကရိန်းနိုင်ငံ၏ပျက်စီးဆုံးရှုံးမှုများအတွက် ရုရှားလျော်ကြေးပေးဖို့ ယန္တရားတစ်ခုထူထောင်ရန် လိုအပ်ကြောင်း အသိအမှတ်ပြုသည့်ဆုံးဖြတ်ချက်အပေါ် ကုလသမဂ္ဂတွင် မဲခွဲဆုံးဖြတ်ခဲ့ရာ၌ မက်ဗီဒက်က အထက်ပါအတိုင်း သဘောထားမှတ်ချက်ပေးခဲ့ခြင်းဖြစ်သည်။

“အဲဒီလိုမှမဟုတ်ရင် ပြန်လည်သင့်မြတ်ရေးအတွက် အဓိကနိုင်ငံတကာအဖွဲ့အစည်းတစ်ခုအနေနဲ့ UN ဟာ နာကျင်စရာတစ်ခု အစပျိုးလိုက်ပုံရပါတယ်” ဟု ၎င်းက အလေးအနက် ပြောကြားခဲ့သည်။

ရုရှားလုံခြုံရေးကောင်စီ ဒုတိယဥက္ကဋ္ဌ ဒီမီထရီမက်ဗီဒက် (ဓါတ်ပုံ-TASS)

“အဆုံးသတ်အကျိုးအနေနဲ့ နိုင်ငံတကာအသိုင်းအဝိုင်းတစ်ခုလုံးကို နာကျင်စေပါလိမ့်မယ်” ဟု ၎င်းက ဆက်လက်ပြောကြားခဲ့သည်။

အဆိုပါ UN ဆုံးဖြတ်ချက်သည် သိမ်းဆည်းခံထားရသော ရုရှား၏ပိုင်ဆိုင်မှုများကို အနောက်အုပ်စုများက အသုံးချဖို့ အစီအစဉ်များကို တရားဝင်ဖြစ်စေဖို့ ရည်ရွယ်သည်ဟု မက်ဗီဒက်၏အဆိုအရ သိရသည်။

“သူတို့တတွေဟာ တရားမဝင် ချုပ်ကိုင်သိမ်းဆည်းထားတဲ့ ရုရှားပိုင်ဆိုင်မှုတွေကို ခိုးထုတ်ဖို့ တရားဝင် အခြေခံတစ်ရပ် ကြိုးပမ်းနေတယ်ဆိုတာ ထင်ရှားပါတယ်” ဟု ၎င်းက ထပ်လောင်းပြောကြားခဲ့သည်။

နိုဝင်ဘာ ၁၄ ရက်၌ UN အထွေထွေညီလာခံ၏ အရေးပေါ်အစည်းအဝေးတွင် ယူကရိန်းအပေါ် ရုရှား ထိခိုက် နစ်နာစေခဲ့သည်ဟူ၍ စွပ်စွဲထားသည့် နိုင်ငံတကာအဆိုပြုချက်တစ်ရပ်နှင့်အတူ ပြန်လည်ထူထောင်ရေး နှင့်ဆုံးရှုံးမှုလျော်ကြေးပေးရေး ယန္တရားလိုအပ်ချက် အသိအမှတ်ပြုကြောင်း အတည်ပြုခဲ့သည်။

အဆိုပါဆုံးဖြတ်ချက်အတွက် နိုင်ငံပေါင်း ၉၄ နိုင်ငံက မဲပေးခဲ့ကြပြီး ၁၄ နိုင်ငံက ကန့်ကွက်မဲ၊ ကြားနေ ၇၃ မဲရရှိခဲ့သည်။

Source: တာ့စ်သတင်းဌာန

CNI International News

ဘန်ကောက်၊ နိုဝင်ဘာ ၁၄

ထိုင်းလူဝင်မှုကြီးကြပ်ရေးဗျူရို (IB) သည် ယခုသီတင်းပတ် နှောင်းပိုင်း ကျင်းပမည့် အာရှ-ပစိဖိတ် စီးပွားရေး ပူးပေါင်း ဆောင်ရွက်မှု (APEC-အေပက်) ထိပ်သီး အစည်းအဝေး(ဖိုရမ်)ကြောင့် ပြည်တွင်းရှိ နိုင်ငံတကာ လေဆိပ် အားလုံး၌ လုံခြုံရေးတင်းကျပ်ထားကြောင်း ဘန်ကောက်ပို့စ်က ရေးသားဖော်ပြသည်။

IB ဗျူရိုအကြီးအကဲ ဒုတိယရဲချုပ် ပက်ဖန်ပီပက်ဆာဂျာပန်က “အာဏာပိုင်များ အနေဖြင့် အဆိုပါ ထိပ်သီး အစည်းအဝေးအတွက် လုံခြုံရေးခြိမ်းခြောက်လာ၍ ပြည်ပမှ ဝင်ရောက်လာသူများကို အနီးကပ် စောင့်ကြည့်နေ ကြောင်း” နိုဝင်ဘာ ၁၃ ရက်တွင် ပြောကြားခဲ့သည်။

ပြီးခဲ့သည့် အောက်တိုဘာလ ကတည်းက ထိုင်းအာဏာပိုင်များသည် လူဝင်မှုကြီးကြပ်ရေး အမည်ပျက် စာရင်း တွင် ပါရှိသူ ၂ သောင်းကျော် ပြည်တွင်းသို့ ဝင်ရောက်ခွင့် ပိတ်ပင်ထားကြောင်း ၎င်းက ဆက်လက် ပြောကြားခဲ့ သည်။

နိုင်ငံခြားသားများကို ထိုင်းလေဆိပ်တွင် စစ်ဆေးနေစဉ် (GETTY IMAGES)

“သံသယဖြစ်စရာ လှုပ်ရှားမှုတွေမှာ ပါဝင်ပတ်သက်သူတွေကို စစ်ဆေးမေးမြန်းပြီး ပြည်နှင်ဒဏ် ပေးသွားမယ်” ဟု ပက်ဖန်ပီပက်က ရှင်းပြသည်။  

IB ဗျူရိုသည် ပြည်တွင်းသို့ ဝင်ရောက်ရန် ကြိုးစားလာနိုင်လာသည့် သံသယရှိသူ (သို့မဟုတ်) သက်ဆိုင်ရာမှ အလို ရှိ နေသည့် ဒုစရိုက်သမားများ၏ နောက်ဆုံး သတင်းအချက်အလက်များ ရရှိနိုင်ဖို့ ထိုင်းနိုင်ငံခြားရေးဝန်ကြီးဌာန ဝန်ထမ်းများနှင့်လည်း ညှိနှိုင်းဆောင်ရွက်နေကြောင်း ၎င်းက ထပ်လောင်း ပြောကြား ခဲ့သည်။

ထိပ်သီးအစည်းအဝေး ကျင်းပမည့်ရက် နီးကပ်လာသည်နှင့်အမျှ လေဆိပ်အသီးသီးရှိ အဝင်အထွက်၌ တိုးပွားလာ သော ခရီးသည်ဦးရေကို စိစစ်နေပြီး သုဝဏ္ဏဘူမိလေဆိပ်ရှိ လူဝင်ကြီးကြပ်ရေး ဂိတ်များတွင် တာဝန်ချထားမည့် လုံခြုံရေးအရာရှိများကို ထပ်မံစေလွှတ်မည်ဟု သိရသည်။

အောက်တိုဘာ ၁၀ ရက်မှ ယခုနိုဝင်ဘာ ၁၂ ရက်အထိ ဗီဇာသက်တမ်း ကျော်လွန်နေထိုင်မှုဖြင့် နိုင်ငံခြားသား ၇၈၅ ဦးကို ထိုင်းအာဏာပိုင်များက ဖမ်းဆီးခဲ့ကြောင်း၊ ထို့အပြင် ပြည်ပမှ တရားမဝင် ဝင်ရောက်လာမှုဖြင့် ဖမ်းဆီး ထားသူ ၁၂၄၉ ဦးအနက် လာအို ၇၇၀ ဦး၊ မြန်မာမှ ၃၄၉ ဦး၊ ကမ္ဘောဒီးယားမှ ၁၀၈ ဦးနှင့် အခြားနိုင်ငံများမှ ၂၂ ဦး တို့ ဖြစ်ကြောင်း ဘန်ကောက်ပို့စ်က ဆက်လက် ရေးသားထားသည်။

Source: Bangkok Post

CNI International News

နူဆာဒူအာ (အင်ဒို)၊ နိုဝင်ဘာ ၁၄

ဂျိုးဘိုင်ဒန်နှင့် ဗလာဒီမာပူတင်တို့အကြား ထိပ်တိုက်ရင်ဆိုင်မှု ဖြစ်မလာခဲ့သော်လည်း ယူကရိန်းသို့ ရုရှား ကျူး ကျော်စစ်၊ တရုတ်နှင့်အနောက်အုပ်စုအကြား တင်းမာမှုများသည် ကမ္ဘာ့စီးပွားရေးအင်အားအကြီးဆုံး နိုင်ငံ့ ခေါင်းဆောင်များ တွေ့ဆုံကြသော အင်ဒိုနီးရှားနိုင်ငံ၊ ဘာလီကျွန်း G-20 ထိပ်သီး အစည်းအဝေး၌ ဦးစားပေး ဆွေးနွေးကြသည့် ရေပန်းအစားဆုံး ကိစ္စရပ်များဖြစ်နေကြောင်း အေပီသတင်းအရ သိရသည်။

G-20 အုပ်စုဝင် နိုင်ငံ့ခေါင်းဆောင်များသည် အင်ဒိုနီးရှား၏ အပန်းဖြေ ကျွန်းပေါ်သို့ စုဝေးရောက်ရှိလာကြပြီး နိုဝင်ဘာ ၁၅ ရက်တွင် အတူတကွ အသစ်တဖန် တည်ဆောက်ကြဖို့၊ ပြန်လည် အင်အားတောင့်တင်းလာစေဖို့ စသည့် ဦးတည်ချက်များဖြင့် အစည်းအဝေး စတင်ရန် မျှော်လင့်ထားသည်။

ဘာလီကျွန်းနှင့် ဝေးရာတွင် ပူတင်ရှိနေစဉ် ဘိုင်ဒန်သည် တရုတ်သမ္မတ ရှီကျင့်ဖျင်နှင့် လူချင်းတွေ့ဆုံမည်ဖြစ်ပြီး ဗြိတိန်ဝန်ကြီးချုပ်သစ် ရီရှီဆန်းနက်၊ အီတလီဝန်ကြီးချုပ် ဂျော်ဂျီယာမယ်လိုနီ (Giorgia Meloni) တို့နှင့်လည်း ဆွေးနွေးရန် စီစဉ်ထားသည်။

G-20 အစည်းအဝေး တက်ဖို့ရောက်လာတဲ့ ဘိုင်ဒန်ကို ကြိုဆိုနေစဉ် (AP)

အဆိုပါ ထိပ်သီး အစည်းအဝေး၏ တရားဝင် ဦးစာပေးကဏ္ဍများမှာ ကျန်းမာရေး၊ ရေရှည်တည်တံ့ ခိုင်မြဲသော စွမ်းအင်ကိစ္စနှင့် ဒစ်ဂျစ်တယ် အသွင်ကူးပြောင်းမှုတို့ဖြစ်ကြပြီး ယူကရိန်းစစ်ကို ဗဟိုပြုနေသည့် ကမ္ဘာ့စီးပွားရေး နှင့် ပထဝီဝင်နိုင်ငံရေး တင်းမာမှုများက ဖုံးလွှမ်းသွားနိုင်သည့် အလားအလာလည်း မြင်နေရသည်။

ထိုစစ်ပွဲဂယက်ကြောင့် ရေနံ၊ သဘာဝဓာတ်ငွေ့နှင့် ကောက်ပဲသီးနှံ ကုန်သွယ်ရေး ထိခိုက်နစ်နာခဲ့ရသဖြင့် ယခု ထိပ်သီး အစည်းအဝေး၌ ဦးစားပေး ဆွေးနွေးစရာမှာ စားနပ်ရိက္ခာနှင့် စွမ်းအင်ဖူလုံရေးတို့အဖြစ် အသွင်ပြောင်း လာစေခဲ့သည်။

တစ်ချိန်တည်းမှာပင် ဥရောပနှင့်အာရှတို့ရှိ အမေရိကန်နှင့်၎င်း၏ မဟာမိတ်များသည် တန်ခိုးဩဇာကြီးထွားလာ သော တရုတ်ကို ပိုမိုဆန့်ကျင်ရန် ဖြစ်လာခဲ့သည်။ ထွန်းသစ်စ G-20 စီးပွားရေး နိုင်ငံများဖြစ်ကြသည့် အိန္ဒိယ၊ ဘရာဇီးနှင့် အိမ်ရှင်အင်ဒိုနီးရှားတို့မှာ အင်အားကြီး နိုင်ငံအချင်းချင်း အားပြိုင်မှုအကြား ကျပ်တည်းကျဉ်းမြောင်း သော လမ်းကြောင်းကို လျှောက်လှမ်းနေရသည်။

အင်ဒိုနီးရှားသမ္မတ ဂျိုကိုဝီဒိုဒိုက ယူကရိန်းစစ်ပွဲနှင့်ပတ်သက်၍ G-20 အုပ်စုဝင် အချင်းချင်း သဘောထား ကွဲလွဲ နေမှုများကို စေ့စပ်ပေါင်းကူးပေးရန် ကြိုးစားခဲ့သဖြင့် ၎င်းကို ပြီးခဲ့သည့် နွေရာသီ၌ ယူကရိန်းသို့ ရုရှားကျူးကျော် ပြီးနောက် ကမ္ဘာ့အရေး ဝင်ရောက်စေ့စပ်ဖျန်ဖြေရန် ကြိုးစားသည့် ပထမဆုံး အာရှခေါင်းဆောင်အဖြစ် သတ်မှတ် ကြသည်။

Source: AP

CNI International News

ဝါရှင်တန်၊ နိုဝင်ဘာ ၁၄

အမေရိကန်သမ္မတဟောင်း ဒေါ်နယ်ထရမ့်သည် နိုဝင်ဘာ ၁၅ ရက် (မနက်ဖြန်) တွင် အိမ်ဖြူတော်သို့ နောက်ထပ် ကမ်းလှမ်းမှုတစ်ခု တရားဝင်စတင်မည်ဟု မျှော်လင့်ရကြောင်း AFP သတင်းကို ကိုးကားလျက် CNA သတင်း တစ်ပုဒ်တွင် တွေ့ရသည်။

၎င်းအပေါ် သစ္စာခံသူများသည် ယခုနှစ်ကြားဖြတ်ရွေးကောက်ပွဲများ၌ စွမ်းဆောင်ရည် ကျဆင်းခဲ့ရာ ထရမ့်၏ ရီပက်ဘလစ်ကန်ပါတီအတွင်း၌ အငြင်းပွားမှုများလည်း ပေါ်ပေါက်လာခဲ့သည်။

၂၀၁၆ ခုနှစ်တွင် အသက် ၇၆ နှစ်အရွယ်ရှီ ဘီလီယံသူဌေးကြီး ထရမ့်က သမ္မတရာထူး ရရှိခဲ့ရာ အမေရိကန်နှင့် ကမ္ဘာကို တုန်လှုပ်ခြောက်ခြားသွားစေခဲ့သည်။

၎င်းသည် နိုဝင်ဘာ ၁၅ ရက် (မနက်ဖြန်) ည ၉ နာရီတွင် ဖလော်ရီဒါပြည်နယ်ရှိ ၎င်းပိုင်ဆိုင်သော ထည်ဝါလှသည့် နေအိမ်၌ သတင်းစာရှင်းလင်းပွဲတစ်ရပ် ကျင်းပရန် စီစဉ်ခဲ့သည်။

“ထရမ့်ဟာ နိုဝင်ဘာ ၁၅ ရက်ရောက်ရင် သမ္မတလောင်းအဖြစ် အရွေးခံတော့မှာဖြစ်ပါတယ်။ သူဟာ အင်မတန် ကျွမ်းကျင်ပြီး ထိရောက်တဲ့ခလုတ်ကို နှိပ်တော့မှာပါ” ဟု ၎င်း၏အကြံပေးပုဂ္ဂိုလ်တစ်ဦးဖြစ်သူ ဂျက်ဆင်မေလာ (Jason Miller) က ခန့်မှန်းပြောကြားခဲ့သည်။

၎င်း၏ခြေလှမ်းကို အခြားသူများ တွက်ဆနိုင်ခြင်းမရှိသည့်နေရာတွင် နာမည်ကြီးသူ ထရမ့်သည် နောက်ဆုံး မိနစ်ပိုင်းအထိ စိတ်အပြောင်းအလဲရှိနိုင်သော်လည်း ၂၀၂၄ ခုနှစ်တွင် သမ္မတရာထူးအတွက် ထပ်မံယှဉ်ပြိုင်လိုသည့် ဆန္ဒကို လပေါင်းများစွာ သိုသိပ်စွာ ဖုံးဖိထားခဲ့သည်။

၂၀၁၇ ခုနှစ် ဖေဖော်ဝါရီ ၂၈ ရက်က ဝါရှင်တန်ဒီစီ၌ ကျင်းပသည့် အမေရိကန်ကွန်ဂရက်လွှတ်တော်၏ ပူးတွဲအစည်းအဝေးတွင် သမ္မတ ဒေါ်နယ်ထရမ့် မိန့်ခွန်းပြောကြားခဲ့စဉ်(ဓါတ်ပုံ-Getty Images)

ယခုကဲ့သို့ သတင်းစာရှင်းလင်းပွဲကျင်းပ၍ ထုတ်ဖော်ကြေညာလိုခြင်းအား မကြာသေးမီအထိ ဆိုင်းငံ့ထားခဲ့ခြင်း သည် အမေရိကန်သမိုင်းအတွက် အရေးအကြီးဆုံးမိန့်ခွန်းအဖြစ် သတ်မှတ်ပြောကြားရန်ဖြစ်ကြောင်း ထရမ့်၏ အကြံပေးများက ဆော်ဩနေကြသည်။

၂၀၂၄ ခုနှစ်အတွက် အိမ်ဖြူတော် တက်နိုင်ရေး/မတက်နိုင်ရေးကိစ္စမှာ ထရမ့်အတွက် တတိယအကြိမ်မြောက် သမ္မတလောင်းမဲဆွယ်နိုင်ခြင်းအပေါ် မူတည်နေပြီး ပါတီအမည်စာရင်း တင်သွင်းနိုင်ခဲ့လျှင် ၎င်းနှင့်အတူ ရီပက်ဘလစ်ကန်များ ရေကုန်ရေခမ်း ကြိုးစားရမည့် ပဉ္စမအကြိမ်မြောက် အမျိုးသားရွေးကောက်ပွဲ ဖြစ်လာမည်ဟု AFP က ဆက်လက်ရေးသားသည်။

၂၀၁၆ ခုနှစ်တုန်းကလည်း ထရမ့်နှင့် ရီပက်ဘလစ်ကန်ပါတီဝင်များသည် အိမ်ဖြူတော်ကို သိမ်းပိုက်နိုင်ခဲ့ပြီး (ကွန်ဂရက်) လွှတ်တော်နှစ်ရပ်စလုံးတွင် အမတ်နေရာအများစုကို ထိန်းသိမ်းထားခဲ့ကြသည်။

သို့သော် ထရမ့်၏ ထေ့ငေါ့ပြောဆိုတတ်သည့် ဟန်ပန်ကြောင့် ထောက်ခံမှုကျဆင်းလာခဲ့ရာ ၂၀၁၈ ခုနှစ်တွင် အောက်လွှတ်တော်ကို ဒီမိုကရက်တစ်ပါတီဝင်များက မဲအပြတ်အသတ်ဖြင့် အောင်ပွဲခံလာခဲ့သည်။

ထို့နောက် ၂၀၂၀ ပြည့်နှစ်တွင် ဒီမိုကရက်တစ်ပါတီခေါင်းဆောင် ဂျိုးဘိုင်ဒန်က သမ္မတအဖြစ် ရွေးချယ်ခံခဲ့ရသော် လည်း ထိုစဉ်က အရေးနိမ့်ခဲ့မှုက ထရမ့်က ယနေ့ထက်တိုင် အပြင်းအထန် ငြင်းဆန်နေဆဲဖြစ်သည်။

၂၀၂၁ ခုနှစ် နှစ်ဦးပိုင်းတွင် ထရမ့်၏ပါတီဝင်များသည် လွှတ်တော်အမတ်များ စုဝေးလေ့ရှိရာ ကာပီတယ် အဆောက်အအုံ(US Capitol) ကို ဝင်ရောက်စီးနင်းခဲ့ပြီး မရှေးမနှောင်းမှာပင် ဝါရှင်တန်မြို့တော်၌ ရုန်းရင်း ဆန်ခတ်ဖြစ်ပွားခဲ့သည်။

ယင်းဖြစ်စဉ်များအပြီး ထရမ့်သည် နိုင်ငံရေးနယ်ပယ်၌ ဆက်လက်ကျင်လည်ကျက်စားရန် ရွေးချယ်ခဲ့၍ နိုင်ငံ တဝန်း လူစုလူဝေးပွဲများ ပြုလုပ်နေခဲ့သည်။

Source: AFP, Channel News Asia

CNI International News

ဖနွမ်ပင်၊ နိုဝင်ဘာ ၁၂

နိုဝင်ဘာ ၁၂ ရက် (ယနေ့)တွင် အာရှသို့ ရောက်ရှိလာခဲ့သော အမေရိကန်သမ္မတ ဂျိုးဘိုင်ဒန်သည် လာမည့် သီတင်းပတ်တွင် ကျင်းပမည့် G-20 ထိပ်သီးအစည်းအဝေး၌ တရုတ် သမ္မတ ရှီကျင့်ဖျင်နှင့် တွေ့ဆုံသည့်အခါ မြောက်ကိုရီးယားကို ထိန်းချုပ်ရန် တိုက်တွန်း ဆွေးနွေးသွားမည်ဟု ကတိပြုခဲ့ကြောင်း AFP သတင်းကို ကိုးကား၍ CNA က ရေးသားဖော်ပြသည်။

ဘိုင်ဒန်သည် အင်ဒိုနီးရှားနိုင်ငံ၊ ဘာလီကျွန်းတွင် ရှီကျင့်ဖျင်နှင့် နိုဝင်ဘာ ၁၄ ရက်တွင် တွေ့ဆုံရန် စီစဉ်ထား ကြောင်း၊ ထိုသို့ မတွေ့ဆုံမီ ယနေ့ (နိုဝင်ဘာ ၁၂ ရက်)တွင် အရှေ့တောင်အာရှ(အာဆီယံ) ခေါင်းဆောင်များနှင့် တွေ့ဆုံရန် ကမ္ဘောဒီးယားနိုင်ငံ၊ ဖနွမ်ပင်မြို့သို့ ရောက်ရှိလာခဲ့သည်။

မြောက်ကိုရီးယား၏ စံချိန်တင် ဒုံးကျည်စမ်းသပ်မှုများကြောင့် ၇ ကြိမ်မြောက် နျူကလီးယား စမ်းသပ်မှု မကြာမီ ပြုလုပ်လာတော့မည့်အရေး စိုးရိမ်နေကြချိန်တွင် ယခုကဲ့သို့ စူပါပါဝါ အင်အားကြီးနှစ်နိုင်ငံ တွေ့ဆုံရန် ဖြစ်ပေါ်လာ ခဲ့သည်။

နိုဝင်ဘာ ၁၄ ရက်တွင် ကျင်းပမည့် G-20 ထိပ်သီး အစည်းအဝေး၌ ဘိုင်ဒန်သည် မြောက်ကိုရီးယား၏ အကြီးဆုံး မဟာမိတ်ဖြစ်သော တရုတ်နှင့်ပတ်သက်၍ ပြုံယမ်းအစိုးရ၏ အဆိုးဆုံး သဘောထားများကို တားမြစ်ရန်နှင့် အပြု သဘောဆောင်သည့် အခန်းကဏ္ဍမှ ပါဝင်လုပ်ဆောင်ရန် အာရုံစိုက်ထားကြောင်း ရှီကျင့်ဖျင်အား ပြောကြားဖို့ ပြင်ဆင်ထားသည်ဟု အမေရိကန်အမျိုးသားလုံခြုံရေးအကြံပေး ဂျက်ဆူလီဗန်က သတင်းထောက်များသို့ အသိ ပေးခဲ့သည်။

တရုတ်သမ္မတ ရှီကျင့်ဖျင်ကိုတွေ့ရစဉ်

မြောက်ကိုရီးယား၏ ဒုံးကျည်နှင့် နျူကလီးယား တည်ဆောက်မှုသည် ယခုပုံစံအတိုင်း ရှေ့ဆက်သွားနေလျှင် ဒေသတွင်း၌ အမေရိကန်၏စစ်ရေးနှင့် လုံခြုံရေးကို ပိုမိုတိုးမြှင့်သွားမည်ဟု ဘိုင်ဒန်က ရှီကို ပြောကြားသွားမည် ဖြစ်သည်။

ဘိုင်ဒန်သည် တရုတ်ကို အထွေအထူး တောင်းဆိုမှု ပြုမည်မဟုတ်သော်လည်း ၎င်း၏အမြင်ကို ရှီကျင့်ဖျင်နှင့် ဖလှယ်ရန်ရှိကြောင်း ဆူလီဗန်က ဆက်လက် ပြောကြားခဲ့သည်။

ဘိုင်ဒန်၏အမြင်မှာ “မြောက်ကိုရီးယားသည် အမေရိကန်၊ တောင်ကိုရီးယားနှင့် ဂျပန်တို့ကိုသာမက ဒေသတွင်း တစ်ခုလုံး၏ ငြိမ်းချမ်းရေးနှင့်တည်ငြိမ်ရေးကိုပါ ခြိမ်းခြောက်နေခြင်းအား ကိုယ်စားပြုကြောင်း” ဟူ၍ ဖြစ်သည်။

“မြောက်ကိုရီးယားအပေါ် တရုတ် ဖိအားတိုးချင်သလား ဆိုတာကတော့ သူတို့အပေါ်မှာပဲ မူတည်ပါတယ်” ဟု ဆူလီဗန်က ရှင်းပြသည်။

သို့သော် မြောက်ကိုရီးယားသည် ဒုံးကျည်စွမ်းရည် အလျင်အမြန် မြှင့်တင်ခြင်းဖြင့် စစ်ဆင်ရေး အခြေအနေမှာ လက်ရှိ အခိုက်အတန့်တွင် ပိုမိုစိုးရိမ်စရာ ကောင်းလာကြောင်း ၎င်းက ဖြည့်စွက်ပြောကြားခဲ့သည်။

Source: AFP, Channel News Asia

CNI International News

ဖနွမ်ပင်၊ နိုဝင်ဘာ ၁၂

မြန်မာနိုင်ငံ၏ အခြေအနေ ပိုဆိုးလာနေသဖြင့် အရှေ့တောင်အာရှနိုင်ငံများအသင်း (အာဆီယံ) သည် နောင်လာ မည့် အစည်းအဝေးများ၌ မြန်မာကို ဖယ်ထုတ်၍ ပါဝင်ပတ်သက်မှု လျှော့ချရန် စဉ်းစားနေကြောင်း Channel News Asia သတင်းဝက်ဘ်ဆိုက်တွင် ဖော်ပြထားသည်။

အာဆီယံခေါင်းဆောင်များက နိုဝင်ဘာ ၁၁ ရက်က ကြေညာချက်တစ်စောင် ထုတ်ပြန်ခဲ့ရာတွင် “အခြေအနေ လိုအပ်ပါက နောင်လာမည့် အစည်းအဝေးများသို့ မြန်မာနိုင်ငံကိုယ်စားပြု တက်ရောက်မှုကို ထပ်မံ သုံးသပ် စဉ်းစားရန် အာဆီယံညှိနှိုင်းရေးကောင်စီအား တာဝန်ပေးအပ်လိုက်ကြောင်း” ထည့်သွင်းရေးသားထားသည်။

အာဆီယံထိပ်သီး အစည်းအဝေးနှင့် အာဆီယံနိုင်ငံများမှ နိုင်ငံခြားရေးဝန်ကြီးများ၏ အစည်းအဝေးများသို့ မြန်မာမှ နိုင်ငံရေးမဟုတ်သော ကိုယ်စားလှယ်များကို ဖိတ်ကြားသည့် လက်ရှိရပ်တည်ချက်အား ဆက်လက် ထားရှိမည် ဖြစ်သည်။

အာဆီယံခေါင်းဆောင်များသည် မြန်မာ့အရေးနှင့်ပတ်သက်၍ အချက် ၅ ချက် သဘောတူညီချက်ဟု ခေါ်ဆိုသည့် ငြိမ်းချမ်းရေးအစီအစဉ် အကောင်အထည်ဖော်သွားမည့် အချိန်ဇယားကိုလည်း တောင်းဆိုခဲ့သည်။

အင်ဒိုနီးရှားသမ္မတ ဂျိုကိုဝီဒိုဒိုကို တွေ့ရစဉ် 

မြန်မာနိုင်ငံကလည်း ၎င်းသဘောတူလက်ခံခဲ့သည့် အဆိုပါအစီအစဉ်ကို လွန်ခဲ့သည့် ၁၈ လကတည်းက စတင် လုပ်ဆောင်ခဲ့သော်လည်း တိုးတက်မှု အနည်းငယ်ရှိခဲ့သည်။

တိကျသည့် အချိန်ဇယားဖြင့် လက်တွေ့အကောင်အထည် ဖော်သွားမည့် အစီအစဉ်တစ်ခု လိုအပ်ကြောင်း နိုဝင်ဘာ ၁၁ ရက်၌ ထုတ်ပြန်သော ကြေညာချက်ထဲတွင် အာဆီယံခေါင်းဆောင်များက ပြောကြားထားသည်။

အဆိုပါ အကောင်အထည်ဖော်မှု အစီအစဉ်ကို ရေးဆွဲရန် အာဆီယံနိုင်ငံခြားရေးဝန်ကြီးများကို တာဝန် ပေးအပ် သွားမည်ဟု အာဆီယံခေါင်းဆောင်များက ဆက်လက် ပြောကြားခဲ့သည်။

၂၀၂၃ ခုနှစ်တွင် အာဆီယံဥက္ကဋ္ဌ တာဝန်ကို လွှဲပြောင်းရယူမည့် အင်ဒိုနီးရှားသမ္မတ ဂျိုကိုဝီဒိုဒိုက နစကကို ထိပ်သီးအစည်းအဝေးများအပြင် အသင်းအဖွဲ့ဆိုင်ရာ အစည်းအဝေးများမှလည်း ပိတ်ပင်ရန် အဆိုပြုခဲ့သည်။

မြန်မာ့အရေးကိစ္စကို အာဆီယံခေါင်းဆောင်များ အကျယ်တဝင့် ဆွေးနွေးခဲ့ကြကြောင်း မစ္စတာဝီဒိုဒို၏ ပြောကြား ချက်အား Bloomberg မီဒီယာက သတင်းဖော်ပြထားသည်။

အာဆီယံထိပ်သီး အစည်းအဝေး ကျင်းပနေစဉ်

“မြန်မာနိုင်ငံကနေ နိုင်ငံရေး မဟုတ်တဲ့အဆင့် ကိုယ်စားပြုပါဝင်မှုကို အာဆီယံထိပ်သီး အစည်းအဝေးနဲ့ နိုင်ငံခြား ရေးဝန်ကြီးတွေ အစည်းအဝေးထက် ကျော်လွန်ပြီး ကျင့်သုံးသင့်တယ်လို့ အင်ဒိုနီရှားက အဆိုပြုခဲ့ပါတယ်” ဟု ဝီဒိုဒိုက ပြောကြားခဲ့သည်။

မစ္စတာဝီဒိုဒိုနှင့်အတူ မိမိလည်း သဘောတူလက်ခံကြောင်း စင်ကာပူဝန်ကြီးချုပ် လီရှန်လွန်းကလည်း ပြောကြားခဲ့ သည်။

ဖနွမ်ပင်မြို့တွင် ကျင်းပသည့် ၄၁ ကြိမ်မြောက် အာဆီယံထိပ်သီး အစည်းဝေးမှာ မစ္စတာလီက “မြန်မာစစ်တပ် အာဏာပိုင်တွေဆီ ပြတ်ပြတ်သားသား အချက်ပြဖို့ နောက်ထပ်ခြေလှမ်းတွေ အလေးအနက် စဉ်းစားသင့်ပါတယ်” ဟု ပြောကြားခဲ့သည်။

Covid-19 ကပ်ရောဂါနောက်ပိုင်း ပထမဆုံးအကြိမ် လူကိုယ်တိုင် တက်ရောက်ကြသည့် အာဆီယံထိပ်သီး အစည်းအဝေး၌ အရှေ့တောင်အာရှဒေသတွင်းမှ ခေါင်းဆောင်များ ကမ္ဘောဒီးယားနိုင်ငံ၊ ဖနွမ်ပင်မြို့တော်၌ တွေ့ဆုံခဲ့ကြသည်။

Source: Channel News Asia

CNI International News

ဖနွမ်ပင်၊ နိုဝင်ဘာ ၁၂

ရုရှားနိုင်ငံခြားရေးဝန်ကြီး ဆာဂျေလာဗရော့သည် ကမ္ဘောဒီးယားနိုင်ငံတွင် ကျင်းပသည့် ၁၇ ကြိမ်မြောက် အရှေ့ အာရှထိပ်သီးအစည်းအဝေးသို့ နိုဝင်ဘာ ၁၂ ရက် (ယနေ့) နှင့် ၁၃ ရက်တို့တွင် တက်ရောက်မည်ဖြစ်ကြောင်း မော်စကိုအခြေစိုက် တာ့စ်သတင်းဌာနက ရေးသားဖော်ပြသည်။

လာဗရော့သည် အဆိုပါထိပ်သီးအစည်းအဝေးသို့ တက်ရောက်သည့် ရုရှားကိုယ်စားလှယ်အဖွဲ့ကို ဦးဆောင်ခဲ့ပြီး နိုင်ငံအသီးသီးမှ ခေါင်းဆောင်များနှင့် နှစ်နိုင်ငံချင်း သီးခြားတွေ့ဆုံမှုများလည်း ပြုလုပ်မည်ဟု သိရသည်။

ထို့နောက် ၎င်းသည် ကမ္ဘောဒီးယားနိုင်ငံမှ ထွက်ခွာပြီး အင်ဒိုနီးရှားနိုင်ငံ၊ ဘာလီကျွန်းတွင် ကျင်းပမည့် ကမ္ဘာ့ ထိပ်တန်းစက်မှုနိုင်ငံများ (G-20) ထိပ်သီးအစည်းဝေးသို့ ရုရှားကိုယ်စားလှယ်အဖွဲ့၏အကြီးအကဲအဖြစ် ဆက်လက်တက်ရောက်မည်ဖြစ်သည်။

ရုရှားနိုင်ငံခြားရေးဝန်ကြီး ဆာဂျေလာဗရော့(ဓါတ်ပုံ-TASS)

အရှေ့အာရှထိပ်သီးအစည်းအဝေး၏မူဘောင်အတွင်း အာရှ-ပစိဖိတ်ဒေသတွင် ကြုံတွေ့နေရသော စိန်ခေါ်မှုများ ကို ရုရှားဘက်မှ အသေးစိတ်ဆွေးနွေးရန် ရည်ရွယ်ထားသည်။

ထိုသို့ဆွေးနွေးရာ၌ အဓိကအချက်များမှာ အမေရိကန်နှင့် ၎င်း၏မဟာမိတ်များအနေဖြင့် ဒေသတွင်း နိုင်ငံ ဖြတ်ကျော်ဆက်ဆံရေးစနစ်၏ ချိန်ခွင်လျှာကို ကမောက်ကမဖြစ်စေရန် ကြိုးပမ်းနေကြောင်း၊ အာရှဒေသကို ကျဉ်းမြောင်းသော ထိပ်တိုက်ရင်ဆိုင်မှုပြဿနာများ ၎င်းတို့ဆောင်ကြဉ်းနေကြောင်း၊ အစုအဖွဲ့လိုက် လွှမ်းမိုး ချုပ်ကိုင်သည့် ယန္တရားများ သုံးစွဲနေကြောင်း စသည်ဖြင့် ချပြဆွေးနွေးရန်ဖြစ်သည်ဟု မော်စကိုအစိုးရ၏အဆိုအရ သိရသည်။

AUKUS (ဩစတြေးလျ၊ ဗြိတိန်နှင့် အမေရိကန်)အပါအဝင် အမေရိကန်၏မဟာမိတ်များ၏ အာရှဒေသရှိ အလားအလာနှင့် မြောက်အတ္တလန္တိတ်စစ်စာချုပ်အဖွဲ့ (နေတိုး) စစ်ရေးနည်းပညာတည်ဆောက်မှုတို့ကိုလည်း အန္တရာယ်ရှိသော လမ်းကြောင်းအဖြစ် ရုရှားက ချပြဆွေးနွေးသွားမည်ဖြစ်သည်။
တောင်တရုတ်ပင်လယ်သည် နေတိုး၏ ကာကွယ်ရေးမျဉ်းဖြစ်လာမည်ဟု လာဗရော့က ယခင်ကပင် ထပ်ခါ တလဲလဲ အလေးပေးပြောကြားခဲ့ပြီးဖြစ်သည်။

Source: တာ့စ်သတင်းဌာန

CNI International News

ကွာလာလမ်ပူ၊ နိုဝင်ဘာ ၁၁

မလေးရှားနိုင်ငံ၏ ၁၅ ကြိမ်မြောက် အထွေထွေရွေးကောက်ပွဲ (GE15) ဝင်ကြမည့် ကိုယ်စားလှယ်များသည် မဲဆန္ဒရှင်ပြည်သူများ အထူးသဖြင့် လူငယ်လူရွယ်များထံမှ ထောက်ခံမှု ရရှိရန် TikTok ပလက်ဖောင်းကို မဲဆွယ်စည်းရုံးရေးအဖြစ် အသုံးချနေကြောင်း Channel News Asia မီဒီယာက ရေးသားဖော်ပြသည်။

ထိုသို့ အသုံးချရာတွင် စင်ကာပူအဆိုတော် Alyph ၏ ဟစ်ဟော့သီချင်း တစ်ပုဒ်ဖြစ်သော Swipe ဖြင့် TikTok အွန်လိုင်း ပလက်ဖောင်းသို့ လွှင့်တင်ခဲ့ရာတွင် ပါဝင်ခဲ့သူမှာ ပါရီကာတန်အမျိုးသား (PN) ညွန့်ပေါင်းအဖွဲ့ ဥက္ကဋ္ဌ မူဟစ်ဒင်ယက်ဆင် ဖြစ်သည်။

TikTok သည် ၎င်း၏ ပလက်ဖောင်းတွင် နိုင်ငံရေးကြော်ငြာများကို ခွင့်မပြုကြောင်း ယခင်က ကြေညာခဲ့ဖူးသော် လည်း ယခု မလေးရှား ရွေးကောက်ပွဲတွင် ဝင်ရောက်ယှဉ်ပြိုင်ကြသည့် ကိုယ်စားလှယ်လောင်းများကတော့ TikTok ပေါ်သို့ မဲဆွယ်စည်းရုံးရေး ဗွီဒီယိုဖိုင်များ လွှင့်တင်ခြင်းဖြင့် လူငယ်လူရွယ်များကို ထိတွေ့ဆက်ဆံ လျက်ရှိ သည်။

TikTok သုံးစွဲသူတစ်ဦးဖြစ်သော @abahkitemuhyiddin ၏ ပို့စ်တစ်ခုတွင် Alyph က ဟစ်ဟော့သီချင်း အလိုက် နှင့်အတူ မလေးရှားလွှတ်တော် အမတ်နေရာအတွက် အရွေးခံနေသည့် ဝန်ကြီးချုပ်ဟောင်းကို BN ပါတီနှင့် Pakatan Harapan (PH) ညွန့်ပေါင်းအဖွဲ့တို့၏ နိုင်ငံရေးအဖွဲ့အစည်း အမှတ်တံဆိပ် (logo) များဖြင့် မြင်တွေ့ရ သည်။

မလေးရှား ပြည်သူနှစ်ဦးနဲ့ မလေးအလံကိုတွေ့ရစဉ် (BLOOMBERG)

၁၅ စက္ကန့်ကြာသည့် အဆိုပါ ဗွီဒီယိုဖိုင်သည် ၄ ရက်အတွင်း ကြည့်ရှုမှု ၄ သန်းနီးပါးနှင့် အင်တာနက် သုံးစွဲသူများ ထံမှ like စုစုပေါင်း ၃၂၂,၀၀၀ ကျော် ရရှိခဲ့သည်။

အခြား ဗွီဒီယိုတစ်ခုတွင် @abahkitemuhyiddin ဆိုသည့် account ပိုင်ရှင်က PH ညွန့်ပေါင်းအဖွဲ့၏ ဥက္ကဋ္ဌ အန်နဝါအီဘရာဟင်ကို ထောက်ခံကြဖို့ ဆော်ဩနေခဲ့သည်။

မစ္စတာအန်နဝါသည် ဒီမိုကရက်တစ် စွမ်းဆောင်မှု ပါတီ (DAP) တစ်ခုတည်း သာမကဘဲ ၎င်းကို ကျောထောက် နောက်ခံ ပြုပေးသည့် ငယ်ရွယ်ဖျတ်လတ်ပြီး ယုံကြည်စိတ်ချရသော နိုင်ငံရေးသမားများလည်း ရှိနေကြောင်း ယင်းဗွီဒီယိုဖိုင်ထဲတွင် ဝါဒဖြန့်ထားသည်။

ထို့ပြင် နောက်ထပ် ညွန့်ပေါင်းအဖွဲ့တစ်ဖွဲ့ဖြစ်သည့် BN အဖွဲ့အတွင်း ခေါင်းဆောင်များ အချင်းချင်း မသင့်မြတ်မှု ဖြစ်နေမှုများကို ထောက်ပြထားပြီး သဘောထား ကွဲလွဲနေပုံများကို ဝေဖန်ပုတ်ခတ်ထားသည့် ဗွီဒီယိုဖိုင်ကိုတော့ TikTok ပလက်ဖောင်းတွင် ကြည့်ရှုမှုပေါင်း ၁ ဒသမ ၈ သန်းအထိ ရှိခဲ့သည်။

Source: Channel News Asia