CNI International News

ဂျကာတာ၊ အောက်တိုဘာ ၂၈

မြန်မာနိုင်ငံအတွင်း ပြည်တွင်းအကြမ်းဖက်မှုများ အဆုံးသတ်ရေး အစီအစဉ် တိုးတက်လုပ်ဆောင်နိုင်အောင် မထုတ်ပြန်ရသေးသည့် အချိန်ဇယားတစ်ခုကို အာဆီယံနိုင်ငံခြားရေးဝန်ကြီးများ အစည်းအဝေးက အောက်တိုဘာ ၂၇ ရက်တွင် ချမှတ်ခဲ့ကြောင်း ဘန်ကောက်ပို့စ်က ရေးသားဖော်ပြသည်။

ထို့နောက် မြန်မာနိုင်ငံကို ခိုင်မာသည့်ပုံစံတစ်ခုဖြင့် ထိန်းထားရေးအတွက် အာဆီယံနိုင်ငံခြားရေးဝန်ကြီးများကြား သဘောတူညီခဲ့ကြသည်ဟု သိရသည်။

ယမန်နှစ်က NLD အစိုးရ ဖြုတ်ချခံရပြီးနောက် မြန်မာ့တပ်မတော် လက်ခံခဲ့သည့် သဘောတူညီမှု အချက် ၅ ချက် ကို အပြည့်အဝ အကောင်အထည်ဖော်ရန် ဂျကာတာတွင် ယခုကျင်းပသည့် အစည်းအဝေး၌ အာဆီယံ နိုင်ငံခြား ရေးဝန်ကြီးများက အကြံပြု ဆွေးနွေးခဲ့ကြသည်။

အာဆီယံအလှည့်ကျဥက္ကဋ္ဌ တာဝန်ယူထားသည့် ကမ္ဘောဒီးယား ထုတ်ပြန်သော ကြေညာချက် တစ်စောင်တွင် လာမည့် အာဆီယံထိပ်သီး အစည်းအဝေးကို ရှေ့လ နိုဝင်ဘာ ၁၁ ရက်မှ ၁၃ ရက်အထိ ကျင်းပမည် ဖြစ်ပြီး ဒေသတွင်း၊ ကမ္ဘာ့ခေါင်းဆောင်များကို ဖိတ်ကြားနိုင်မည်ဟု မျှော်လင့်ထားကြောင်း ပါရှိသည်။

၂၀၂၂ ခုနှစ်၊ အောက်တိုဘာ ၂၇ ရက်က ကျင်းပသည့် အာဆီယံနိုင်ငံခြားရေးဝန်ကြီးများ အစည်းအဝေး ကိုတွေ့ရစဉ် (GETTY IMAGES)

“တကယ်တော့ မြေပြင် ပကတိ အခြေအနေဟာ အတိမ်းအစောင်း မခံနိုင်ဘဲ ထိရှလွယ်တုန်းပါ။ ဒါဟာ အာဆီယံ အသင်းနဲ့ အထူးသံတမန်တို့က ကတိကဝတ် ကင်းမဲ့မှုကြောင့် မဟုတ်ဘဲ မြန်မာနိုင်ငံမှာ ဆယ်စုနှစ်များစွာ တိုင်အောင် ကြာရှည်ခဲ့တဲ့ ပဋိပက္ခတွေနဲ့ ရှုပ်ထွေး ခက်ခဲမှုတွေကြောင့်ဆိုတာ သံသယဖြစ်စရာ မရှိပါဘူး”ဟု ၎င်း ကြေညာချက်တွင် ဆက်လက် ဖော်ပြထားသည်။

“အာဆီယံအနေနဲ့ စိတ်ဓာတ် မကျသင့်ဘဲ ငြိမ်းချမ်းတဲ့နည်းနဲ့ ဖြေရှင်းဖို့ မြန်မာနိုင်ငံကို ဆက်လက် ကူညီသွားနိုင်အောင် စိတ်ပိုင်းဖြတ်ထားပါတယ်” ဟု မြန်မာနိုင်ငံဆိုင်ရာ အာဆီယံ အထူးသံတမန်လည်းဖြစ်သည့် ကမ္ဘောဒီးယား နိုင်ငံခြားရေးဝန်ကြီး ပရတ်ဆိုခွန် (Prak Sokhonn) က ပြောသည်။

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က အရပ်သားအစိုးရကို ယမန်နှစ်၌ ဖြုတ်ချပြီးကတည်းက အကြမ်းဖက်မှုနဲ့ မတည်ငြိမ်မှုများ အဆုံးသတ်စေဖို့ နစကကို စည်းရုံးရန် အာဆီယံအသင်းအပေါ် ဖိအားကျရောက်လာခဲ့ သည်။

မြန်မာနိုင်ငံမှ နိုင်ငံရေးနယ်ပယ် တာဝန်မယူထားသူ ကိုယ်စားလှယ် တစ်ဦးဦးကို အောက်တိုဘာ ၂၇ ရက် အာဆီယံဝန်ကြီးအဆင့် အစည်းအဝေးသို့ ဖိတ်ကြားခဲ့သော်လည်း အပြုသဘော တုံ့ပြန်မှု မရှိကြောင်း ကြေညာ ချက်တွင် ဆက်လက် ရေးသားထားသည်။

ယမန်နှစ် ဧပြီလတွင် ကျင်းပခဲ့သည့် အာဆီယံထိပ်သီး အထူးအစည်းအဝေးသို့ ဗိုလ်ချုပ်မှူးကြီး မင်းအောင်လှိုင် တက်ရောက်ခဲ့ပြီး အရပ်သားများနှင့် ပဋိပက္ခများ ရပ်တန့်စေရေး အစီအမံများကို အာဆီယံအဖွဲ့ဝင်နိုင်ငံ အသီးသီး က သဘောတူ လက်ခံခဲ့ကြသည်။

Source: Bangkok Post

CNI International News

ကိယက်ဗ်၊ အောက်တိုဘာ ၂၇

ယူကရိန်းစစ်တပ်ကို ထောက်လှမ်းရေး အချက်အလက်များ မျှဝေရန်နှင့် သမ္မတ ဗိုလိုဒီမီယာ ဇာလန်းစကီးနှင့် ဆွေးနွေးရန် အမေရိကန်ထောက်လှမ်းရေးအေဂျင်စီ (စီအိုင်အေ) ညွှန်ကြားရေးမှူး ဝီလျံဘန့်စ် (William Burns) သည် ယူကရိန်းနိုင်ငံသို့ ကြိုတင်ကြေညာခြင်းမရှိဘဲ ရောက်ရှိလာခဲ့ကြောင်း သိရသည်။

၎င်း၏ခရီးစဉ်အတွင်း ကိယက်ဗ်အစိုးရကို ကာလရှည်ကြာစွာ ကျောထောက် နောက်ခံပြုရန် ဝါရှင်တန်၏ ကတိကဝတ်များကို ထပ်လောင်း ပြောကြားခဲ့ကြောင်း စီအင်န်အင်န် သတင်းကို ကိုးကား၍ အာရ်တီ သတင်းဌာနက ရေးသားဖော်ပြသည်။

၎င်းသည် ယခုလအတွင်း စစ်ဘေးဒဏ် ခံစားနေရသည့် ယူကရိန်းသို့ သွားရောက်ခဲ့ကြောင်း အမည်မဖော်လိုသူ အမေရိကန်အရာရှိတစ်ဦးက အတည်ပြုသည်ဟု စီအင်န်အင်န်က သတင်းရေးသားခဲ့သည်။

“သူ့ခရီးစဉ်မှာ ရုရှားရဲ့ရန်လိုမှုတွေကို ခုခံကာကွယ်ရာမှာ ယူကရိန်းကို ကူညီဖို့ အမေရိကန် ကတိကဝတ်တွေကို ထပ်ပြီး ခိုင်မာစေခဲ့တယ်” ဟု အဆိုပါအရာရှိက ပြောကြားသည်။

အမေရိကန်ထောက်လှမ်းရေးအေဂျင်စီ (စီအိုင်အေ)ရုံးချုပ်အတွင်းကိုတွေ့ရစဉ် (GETTY IMAGES)

သို့သော် ခရီးစဉ်နှင့်စပ်လျဉ်း၍ အခြားအသေးစိတ် အချက်အလက်များကိုတော့ ထုတ်ဖော်ပြောကြားခြင်း မရှိပေ။

ဘန့်စ်သည် ယခုနှစ် အစောပိုင်းတွင် ယူကရိန်းသို့ နောက်ဆုံး လာရောက်ခဲ့သည်။ ထိုစဉ်က ရုရှားသည် အိမ်နီးချင်း ယူကရိန်း တိုက်ခိုက်မှု မစတင်ရသေးပေ။ ယင်းအချိန်၌ ဖြစ်ပေါ်လာနိုင်သည့် စစ်ရေး အခြေအနေများကို ဘန့်စ်က ယူကရိန်း အစိုးရ တာဝန်ရှိသူများနှင့် ဆွေးနွေးခဲ့သည်။

စီအိုင်အေညွှန်ကြားရေးမှူး၏ အဆိုပါ ခရီးစဉ်များသည် အမေရိကန်နှင့် ယူကရိန်းအကြား ထောက်လှမ်းရေး အပြန်အလှန် ဖလှယ်မှုကို ပြသနေခဲ့ကြောင်း၊ ယင်းပူးပေါင်း ဆောင်ရွက်မှုသည် ယူကရိန်းတပ်များ စစ်မြေပြင်တွင် များစွာ အကျိုးရှိစေခဲ့ကြောင်း အမေရိကန် အထက်လွှတ်တော် ထောက်လှမ်းရေးဆိုင်ရာ ကော်မတီအကြီးအကဲ၊ ဗာဂျီးနီးယားအထက်လွှတ်တော်အမတ် မာ့ခ်ဝါနာက ယခင်လတွင် ပြောကြားခဲ့သည်။

အမေရိကန်နှင့် ဗြိတိန် ထောက်လှမ်းရေး အရာရှိများသည် ယူကရိန်းအရာရှိများနှင့် လက်တွဲလုပ်ကိုင်ခဲ့ ကြ ကြောင်း၊ စစ်တပ်ချင်း ပေါင်းစပ်စွမ်းရည်ကို ဆက်လက် အသိအမှတ် ပြုပါကြောင်း ၎င်းက ဆက်လက် ပြောကြား ခဲ့သည်။

မော်စကိုသည် ယူကရိန်းတွင် ဗျူဟာမြောက် နျူကလီးယားလက်နက် ဖြန့်ကြက်လာနိုင်သည်ဟု အနောက်အုပ်စု ထင်ကြေးပေးနေချိန်တွင် ယခုကဲ့သို့ ဘန့်စ်၏ ကိယက်ဗ်မြို့တော် ခရီးစဉ်သတင်း ထွက်ပေါ်လာခဲ့သည်။

Source: အာရ်တီသတင်းဌာန

CNI International News

ဘန်ကောက်၊ အောက်တိုဘာ ၂၇

လာမည့် ထိုင်းရွေးကောက်ပွဲအပြီး အဓိကအတိုက်အခံ ဖူထိုင်းပါတီ (Pheu Thai Party) နှင့် အစိုးရသစ်ဖွဲ့ရေး ဆွေးနွေးရန် အချိန်မတန်သေးကြောင်း လက်ရှိအာဏာရ ပလန်ပရာချာရတ်ပါတီ (PPRP)၏ လက်ထောက် ခေါင်းဆောင် ချိုင်ဝပ်သနက်မနူဆွန်က ပြောကြားခဲ့သည်ဟု ဘန်ကောက်ပို့စ်တွင် တွေ့ရသည်။

ဖူထိုင်းပါတီ၏ အလားအလာ ရှိသော မဟာမိတ်များသည် ဝန်ကြီးချုပ် ပရာယွတ်ချန်အိုချာအပေါ် ထောက်ခံမှု ရုပ်သိမ်းခြင်း အပါအဝင် အချို့သော ကြိုတင်သတ်မှတ်များနှင့် ပြည့်မီရမည်ဟု ဖူထိုင်းခေါင်းဆောင် ချော်နန် စရီကော၏ မှတ်ချက်ကို အထက်ပါအတိုင်း ချိုင်ဝပ်သနက်မနူဆွန်က တုံ့ပြန်ပြောကြားခဲ့ခြင်း ဖြစ်သည်။

မစ္စတာချိုင်ဝပ်သည် လက်ရှိအစိုးရအဖွဲ့တွင် ဒစ်ဂျစ်တယ် စီးပွားရေးနှင့် လူ့အဖွဲ့အစည်းဝန်ကြီး အဖြစ်လည်း တာဝန်ထမ်းဆောင်နေသည်။

ပလန်ပရာချာရတ်ပါတီ (PPRP)ကိုတွေ့ရစဉ်

“အစိုးရဖွဲ့ဖို့ ဆွေးနွေးရေးက စောလွန်းပါသေးတယ်။ ကျနော်တို့မှာ လွှတ်တော်ကိုယ်စားလှယ် ဘယ်လောက်ရှိလဲ ဆိုတာ စောင့်ကြည့်ရမှာဖြစ်သလို နိုင်ငံရေးရာသီဥတု အခြေအနေကို ထည့်သွင်းစဉ်းစားပြီး တခြားပါတီတွေရဲ့ မူဝါဒတွေကိုလည်း ကြည့်ရဦးမှာပါ” ဟု မစ္စတာ ချိုင်ဝပ်က ရှင်းပြသည်။

“ဒါပေမယ့် ကျနော်တို့ အဓိကအာရုံစိုက်တာက ပြည်သူတွေရဲ့အကျိုးအတွက် လုပ်ဆောင်ဖို့ပါ။ ပြည်သူတွေကြား မှာ စိတ်ဝမ်းကွဲစေမယ့် ဘယ်ကိစ္စမျိုးမဆို အားပေးမှာ မဟုတ်ပါဘူး” ဟု ၎င်းက ဆက်လက် ပြောကြားခဲ့သည်။
စိစစ်လုပ်ကိုင်မှုနှင့် ထိန်းကျောင်းမှုစနစ် လိုအပ်နေသေးသဖြင့် လက်ရှိအဓိက နိုင်ငံရေးပါတီများနှင့် မဟာမိတ် ဖွဲ့ရန် မဖြစ်နိုင်သေးကြောင်း မစ္စတာချိုင်ဝပ်က အကြောင်းပြခဲ့သည်။

လာမည့် ရွေးကောက်ပွဲတွင် ထိုင်းလွှတ်တော်အမတ်များ အစုလိုက်အပြုံလိုက် ‘ဘက်ပြောင်း’ သွားပါက အာဏာရ ပါတီအပေါ် သက်ရောက်မှု ရှိ/မရှိ ဆက်လက်မေးမြန်းရာ မစ္စတာချိုင်ဝပ်က “ရွေးကောက်ပွဲမတိုင်မီ ဘက်ပြောင်းမှု များသည် ပုံမှန်ပင်ဖြစ်ကြောင်း” ဖြေကြားခဲ့သည်။

ဖူထိုင်းခေါင်းဆောင် ချော်နန်စရီကောကိုတွေ့ရစဉ်

ဘက်ပြောင်းသွားသည့်တိုင် မဲဆန္ဒရှင်ပြည်သူများသည် PPRP ပါတီ ဆိုင်းဘုတ်အောက်မှ ဝင်ရောက် ယှဉ်ပြိုင်ကြ သည့် ရွေးကောက်ပွဲ ကိုယ်စားလှယ်လောင်းများကို ဆက်လက် ထောက်ခံကြမည်ဟု မိမိယုံကြည်ကြောင်း ၎င်းက ပြောကြားခဲ့သည်။

ပါတီတွင်း အကွဲအပြဲများကြောင့် လွှတ်တော်ကိုယ်စားလှယ်များ ဘက်ပြောင်းလေ့ ရှိသည့်ကိစ္စကို အပြစ်ပုံချခြင်း သာ ဖြစ်ကြောင်း၊ လမ်းလွှဲနေသော လွှတ်တော်ကိုယ်စားလှယ်များ အနေဖြင့်လည်း ၎င်းတို့နှစ်သက်ရာ ပါတီများ နှင့်သာ ဆက်လက် လုပ်ကိုင်နိုင်ကြောင်း ၎င်းက မှတ်ချက်ချခဲ့သည်။

PPRP တွင် ဗိုလ်ချုပ်ကြီးပရာယွတ် ဆက်လက် ပါဝင်ရန် ရှိ/မရှိ ရှင်းရှင်းလင်းလင်း မသိရသဖြင့် ပါတီအတွက် အားနည်းချက် ဖြစ်သွားနိုင်သလား မေးခွန်းကိုလည်း မစ္စတာချိုင်ဝပ်က “ဗိုလ်ချုပ်ကြီး ပရာယွတ်ကို ၂၀၁၉ ခုနှစ် ရွေးကောက်ပွဲတွင် ပါတီ၏ တစ်ဦးတည်းသော ဝန်ကြီးချုပ်အဖြစ် အမည်စာရင်း တင်သွင်းခဲ့ပြီး ယခုအထိ ပါတီက ၎င်းကို ထောက်ခံဆဲဖြစ်ကြောင်း၊ လာမည့် ရွေးကောက်ပွဲတွင်လည်း ဝန်ကြီးချုပ်လောင်းအဖြစ် ၎င်းကပင် ဆက်ရှိ နေဦးမည်”ဟု အတိအလင်း ပြောကြားခဲ့သည်။

Source: Bangkok Post

CNI International News

ဂျကာတာ၊ အောက်တိုဘာ ၂၇

မြန်မာနိုင်ငံတွင် ရပ်တန့်နေသော ငြိမ်းချမ်းရေးလုပ်ငန်းစဉ်အား မည်ကဲ့သို့ စတင် လုပ်ဆောင်သင့်လဲ ဆွေးနွေးရန် အင်ဒိုနီးရှားနိုင်ငံ၊ ဂျကာတာမြို့ တွင် အောက်တိုဘာ ၂၇ ရက်က အရှေ့တောင်အာရှနိုင်ငံများအသင်း (အာဆီယံ) နိုင်ငံခြားရေးဝန်ကြီးများ၏ အစည်းအဝေး စတင်ကျင်းပနေပြီဖြစ်ကြောင်း ရိုက်တာသတင်းကို ကိုးကား၍ Channel News Asia ဝက်ဘ်ဆိုက်တွင် ဖော်ပြထားသည်။

မြန်မာနိုင်ငံတွင် မကြာသေးမီ ရက်သတ္တပတ်များအတွင်း အကြမ်းဖက်မှုများ အရှိန်မြှင့်လာသဖြင့် လူပေါင်း ဆယ်ဂဏန်းမျှ ထပ်မံသေဆုံးခဲ့ရသည်။

ယခု အင်ဒိုနီးရှားနိုင်ငံ၏မြို့တော်၊ အာဆီယံအတွင်းရေးမှူးချုပ်ရုံးတွင် ကျင်းပနေသည့် နိုင်ငံခြားရေးဝန်ကြီးများ အစည်းအဝေးသို့ မြန်မာနိုင်ငံမှ ကိုယ်စားလှယ်များ တက်ရောက်ခဲ့ကြခြင်း မရှိပေ။

နိုဘယ်ငြိမ်းချမ်းရေးဆုရှင် ဒေါ်အောင်ဆန်းစုကြည်၏ ရွေးကောက်ခံအစိုးရကို စစ်တပ်က ဖြုတ်ချလိုက်ပြီးနောက် ထောင်နှင့်ချီ၍ တက်ကြွလှုပ်ရှားသူများကို ဖြိုခွင်းလျက် ဖမ်းဆီးနှိပ်ကွပ်ခဲ့ရာ လက်နက်ကိုင်တော်လှန်ရေးလည်း အရှိန်မြင့်လာသည်။

ထိုအဖြစ်အပျက်များကြောင့် မြန်မာနိုင်ငံမှ ဗိုလ်ချုပ်ကြီးများကို အာဆီယံအဆင့်မြင့် အစည်းအဝေးများသို့ တက်ရောက်စေခြင်းအား ယမန်နှစ်ကတည်းက ပိတ်ပင်ခဲ့သည်။

အာဆီယံအလှည့်ကျဥက္ကဋ္ဌ ကမ္ဘောဒီးယားဝန်ကြီးချုပ် ဟွန်ဆန်နဲ့ နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ကို တွေ့ရစဉ်

မကြာသေးမီ ရက်သတ္တပတ်များအတွင်း မြန်မာနိုင်ငံ၏ အကြီးဆုံး အင်းစိန် အကျဉ်းထောင်ကို ဗုံးခွဲတိုက်ခိုက်ခြင်း၊ ကချင်ပြည်နယ်တွင် အောက်တိုဘာ ၂၃ ရက် လေကြောင်းမှ တိုက်ခိုက်ခြင်း ဖြစ်စဉ်များကြောင့် လူ ၅၀ ထက် မနည်း သေဆုံးခဲ့ရကြောင်း ပြည်တွင်းမီဒီယာများက သတင်းဖော်ပြခဲ့ကြသည်။

မကြာခင် ကျင်းပမည့် အာဆီယံထိပ်သီး အစည်းအဝေးမတိုင်မီ မြန်မာ့ငြိမ်းချမ်းရေး လုပ်ငန်းစဉ်ကို မည်ကဲ့သို့ တွန်းအားပေးရမည်ကို အကြံပြုချက်များ ထွက်ပေါ်လာစေရန် ရည်ရွယ်၍ ယခုအစည်းအဝေး ခေါ်ယူကျင်းပခြင်း ဖြစ်ကြောင်း လက်ရှိအာဆီယံဥက္ကဋ္ဌ ကမ္ဘောဒီးယားက ပြောကြားထားသည်။

ယခု အင်ဒိုနီးရှားနိုင်ငံတွင် စတင်နေသည့် အစည်းအဝေးသို့ မြန်မာနိုင်ငံမှ နိုင်ငံရေးတာဝန် ယူထားခြင်းမရှိသည့် ကိုယ်စားလှယ်တစ်ဦး စေလွှတ်ပေးရန် ဖိတ်ကြားခဲ့သော်လည်း နစက-က သဘောမတူခဲ့ကြောင်း အိမ်ရှင် အင်ဒိုနီးရှား၏ ပြောကြားချက်ကို ရိုက်တာက ကိုးကားရေးသားသည်။

အာဆီယံသည် နိုင်ငံတကာ ငြိမ်းချမ်းရေး ကြိုးပမ်းမှုကို ဦးဆောင်နေသော်လည်း ယမန်နှစ်က အာဆီယံနှင့် သဘောတူခဲ့သည့် ငြိမ်းချမ်းရေးလုပ်ငန်းစဉ် အချက် ၅ ချက်ပါ ကတိကဝတ်များကို နစကဘက်က အနည်းငယ် အလေးထား၍ လုပ်ဆောင်ခဲ့ကြောင်း ရိုက်တာက ဆက်လက်ရေးသားထားသည်။

Source: Reuters, Channel News Asia

CNI International News

ဝါရှင်တန်၊ အောက်တိုဘာ ၂၇

ထိုင်ဝမ်ကို ဆယ်စုနှစ်များစွာ စစ်မတိုက်ဘဲ ရပ်တည်လာသည့်အနေအထားမှ တရုတ်ပြောင်းလဲလာခဲ့ကြောင်း၊ အဆိုပါကျွန်းကို သိမ်းယူရန် တရုတ်သည် အရှိန်မြှင့်တင်ပြီး ကြိုးပမ်းနေကြောင်း အမေရိကန်နိုင်ငံခြားရေးဝန်ကြီး အန်တိုနီဘလင်ကင်က ပြောကြားခဲ့သည်ဟု Bloomberg မီဒီယာကို ကိုးကားလျက် ဟိန္ဒူစတန်တိုင်းမ် ဝက်ဘ်ဆိုက်တွင် ဖော်ပြထားသည်။

“ဒီလို ပြောင်းလဲသွားတဲ့အနေအထားကို လက်ခံနိုင်စရာမရှိပါဘူး။ ဘေဂျင်းဟာ ဒီကျွန်းကို ပြန်လည်ပေါင်းစည်းဖို့ အရှိန်မြှင့်ချင်နေပါတယ်” ဟု အောက်တိုဘာ ၂၆ ရက်၌ ဝါရှင်တန်ရှိ Bloomberg မီဒီယာနှင့်ပြုလုပ်သည့် အင်တာဗျူးတွင် ဘလင်ကင်က ပြောကြားခဲ့သည်။

“သူတို့ဟာ ထိုင်ဝမ်ကို ဖိအားပိုပေးဖို့အပါအဝင် ဘာတွေဆက်လုပ်မယ်ဆိုတဲ့ဆုံးဖြတ်ချက်ချခဲ့တယ်လို့ ကျနော် ထင်ပါတယ်။ ပြန်လည်ပေါင်းစည်းရေး မြန်ဆန်ဖို့ မျှော်လင့်ချက်နဲ့ နည်းလမ်းအမျိုးမျိုးသုံး အကျပ်ကိုင်တော့ ထိုင်ဝမ်အတွက် အခက်အခဲဖြစ်စေပါတယ်” ဟု ၎င်းက မှတ်ချက်ချခဲ့သည်။

အထက်ပါမှတ်ချက်မှာ ထိုင်ဝမ်နှင့်ပတ်သက်၍ တရုတ်အပေါ် အမေရိကန်ထိပ်တန်းသံတမန်တစ်ဦး၏ နောက်ဆုံး အပြစ်တင်ရှုတ်ချမှုဖြစ်သည်။ တရုတ်သည် ယခင်က ထင်ထားသည်ထက် အချိန်ပိုစောပြီး ထိုင်ဝမ်ကို သိမ်းယူနိုင် ခြေကိုလည်း ဘလင်ကင်က စောဒကတက်ခဲ့သည်။

အမေရိကန်နိုင်ငံခြားရေးဝန်ကြီး အန်တိုနီဘလင်ကင်(ဓါတ်ပုံ-AFP)

ဝါရှင်တန်နှင့် ဘေဂျင်းတို့အကြား ပိုမိုကျယ်ပြန့်သော စကားစစ်ထိုးမှု၏ တစိတ်တပိုင်းအဖြစ် ယခုကဲ့သို့ ဘလင်ကင်၏မှတ်ချက်သည် တရုတ်ကွန်မြူနစ်ပါတီ ကွန်ဂရက်(အစည်းအဝေး)အပြီးတွင် ထွက်ပေါ်လာခဲ့သည်။

မကြာသေးမီကပင် တရုတ်ခေါင်းဆောင် ရှီကျင့်ဖျင်သည် ၎င်း၏အာဏာကို ပိုမိုခိုင်မာအောင် ချဲ့ထွင်စုစည်းခဲ့ပြီး ဖြစ်သည်။

တရုတ်နှင့်ထိုင်ဝမ်တို့ကတော့ အချိန်မရွေး ဝင်ရောက်ကျူးကျော်နိုင်ခြေကို ကျယ်ကျယ်လောင်လောင် ပြောဆို ကြခြင်း မရှိသေးပေ။

ပြီးခဲ့သော ဩဂုတ်လ၌ သတင်းထောက်များနှင့် တွေ့ဆုံရာတွင် အမေရိကန်ဆိုင်ရာ တရုတ်သံအမတ် ချီဂန် (Qin Gang) က “ဘေဂျင်းသည် တိုက်ခိုက်မှုစတင်ရန် အချိန်ဇယားမြှင့်တင်လိုက်သည့် ဝါရှင်တန်၏ပြောကြားချက်မှာ အခြေအမြစ်မရှိကြောင်း” ငြင်းဆိုခဲ့သည်။

တိုင်ပေရှိ တာဝန်ရှိသူများကလည်း တရုတ်ပြည်သူ့လွတ်မြောက်ရေးတပ်သည် လိုအပ်သည့်စစ်စွမ်းရည်များ ထုတ်ဖော်ပြသမှု နည်းပါးသေးကြောင်း ပြောကြားခဲ့ကြသည်။

Source: Hindustan Times

CNI International News

မော်စကို၊ အောက်တိုဘာ ၂၆

ရုရှားသည် ၎င်း၏ နျူကလီးယားတပ်ဖွဲ့များဖြင့် နှစ်စဉ်စစ်ရေး လေ့ကျင့်မည်ဟု မိမိတို့ကို အသိပေးခဲ့ကြောင်း အမေရိကန်အစိုးရက အောက်တိုဘာ ၂၅ ရက်တွင် ပြောကြားခဲ့သည်ဟု ရိုက်တာသတင်းဌာနမှာ ရေးသား ဖော်ပြသည်။

ယခုကဲ့သို့ အသိပေးမှုသည် ရုရှား၏ နျူကလီးယား အပြောအဆို များနေချိန်တွင် မှားယွင်းတွက်ချက်မှု အန္တရာယ်ကို လျှော့ချပေးသည့် အပြုအမူဖြစ်ကြောင်း၊ မဟာဗျူဟာမြောက် နျူကလီးယား တပ်ဖွဲ့များ၏ နှစ်စဉ် Grom စစ်ရေး လေ့ကျင့်မှုအတွင်း ရုရှားသည် ဒုံးကျည်များ စမ်းသပ်ပစ်လွှတ်မည်ဟု မျှော်မှန်းမိကြောင်း အမေရိကန် အစိုးရက ဆက်လက် ပြောကြားခဲ့သည်။

ယခင်က ရုရှား၏ တိုက်ချင်းပစ် ဒုံးကျည်များ (inter-continental ballistic missiles) ကို ရည်ညွှန်း၍ အမေရိကန် အစိုးရက ထိုသို့ ပြောကြားခဲ့ခြင်း ဖြစ်သည်။

New START စာချုပ်အရ ရုရှားသည် အဆိုပါ ဒုံးကျည်အမျိုးအစား ပစ်လွှတ်မှုနှင့်ပတ်သက်၍ ကြိုတင် အသိပေး ရန် တာဝန်ရှိကြောင်း အမေရိကန်အစိုးရအရာရှိများက ဖြည့်စွက်ပြောကြားခဲ့ကြသည်။

ရုရှား ဒုံးကျည်နဲ့ ပေါက်ကွဲမှုဒဏ်ကို ညွန်းပြခြင်း (GETTY IMAGES)

“အရင်က ကျနော်တို့ မီးမောင်းထိုးပြခဲ့သလို အမေရိကန်ဘက်ကို သူတို့ အသိပေးထားပြီး ဖြစ်ပါတယ်။ ဒါဟာ နှစ်စဉ် လုပ်နေကျ လေ့ကျင့်မှုဖြစ်ပါတယ်” ဟု အမေရိကန်စစ်ရေး ပြောခွင့်ရသူ လေတပ်ဗိုလ်မှူးချုပ် ပက်ထရစ် ရိုင်ဒါ (Patrick Ryder) က သတင်းစာ ရှင်းလင်းပွဲတစ်ရပ်တွင် ပြောကြားခဲ့သည်။
နောက်ထပ် အသေးစိတ် အချက်အလက်များကိုတော့ ၎င်းက ထုတ်ဖော် ပြောကြားခြင်း မရှိပါ။

ရုရှား၏ စစ်ရေး လေ့ကျင့်မှုသည် အမေရိကန်နှင့် ၎င်း၏မဟာမိတ်များအတွက် အလားအလာရှိသော စိန်ခေါ်မှု တစ်ရပ်ဖြစ်ကြောင်း၊ ယူကရိန်းကို ရုရှားသမ္မတ ဗလာဒီမာပူတင် ကျူးကျော်ချိန်မှစ၍ ၎င်း၏ တိုင်းပြည်အတွက် ကာကွယ်ရန် နျူကလီးယား လက်နက်သုံးမည်ဟု အတိအလင်း ခြိမ်းခြောက်ထားကြောင်း ရိုက်တာက ဆက်လက် ရေးသားသည်။

ယူကရိန်းသည် ၎င်း၏ပိုင်နက် နယ်မြေအတွင်း မလျော်ကန်သည့် ဗုံးအမျိုးအစား သုံးရန် ပြင်ဆင်နေကြောင်း ရုရှား နိုင်ငံက ကုလသမဂ္ဂလုံခြုံရေးကောင်စီ (UNSC) ထံသို့ အောက်တိုဘာ ၂၅ ရက်တွင် စွပ်စွဲတင်ပြခဲ့သည်။

ထိုစွပ်စွဲချက်ကို သတင်းအမှားသာ ဖြစ်ကြောင်းနှင့် စစ်ပွဲအရှိန်မြှင့်ရန် အကြောင်းပြချက်ဖြစ်ကြောင်း အနောက် အုပ်စုနှင့် ယူကရိန်းတို့က ပြတ်ပြတ်သားသား ပယ်ချခဲ့ကြသည်။

Source: Reutuers

CNI International News

ဝါရှင်တန်၊ အောက်တိုဘာ ၂၆

အမေရိကန်သမ္မတ အိမ်ဖြူတော်သည် ကြားဖြတ်ရွေးကောက်ပွဲနှင့်ပတ်သက်၍ အစောပိုင်းက အကောင်းမြင်မှုကို ယခုအခါ လျှော့ချလာခဲ့ပြီး ကွန်ဂရက်(လွှတ်တော်)နှစ်ရပ်စလုံး၌ ဒီမိုကရက်တစ်ပါတီဝင်များ ထိန်းချုပ်ထားမှု ဆုံးရှုံးသွားနိုင်ခြေကို စိုးရိမ်နေမိကြောင်း ဘိုင်ဒန်အစိုးရတာဝန်ရှိသူများက ပြောကြားခဲ့သည်။

တစ်ချိန်က အထက်လွှတ်တော်အတွင်း အကြိတ်အနယ် ယှဉ်ပြိုင်ခဲ့ဖူးသော ဒီမိုကရက်တစ်အမတ်များသည် လက်ရှိ ငွေကြေးဖောင်းပွမှု များပြားနေချိန်၌ ရီပက်ဘလစ်ကန်ကို အားကိုးနေမှုနှင့် ပါတီနှစ်ရပ်အကြား အထက် လွှတ်တော် ရွေးကောက်ပွဲအား ပြန်လည်သင့်မြတ်ရေးအဖြစ် ယူဆရကြောင်း မကြာသေးမီက ကောက်ယူခဲ့သော စစ်တမ်းများကို ကိုးကား၍ ရိုက်တာက ရေးသားဖော်ပြသည်။

ယခုနှစ် အစောပိုင်း ဘိုင်ဒန်၊ မဟာမိတ်အချို့နှင့် အကြံပေးပုဂ္ဂိုလ်များက ဒီမိုကရက်တစ်ပါတီဝင်များ ချုပ်ကိုင် နိုင်မည်ဟု ခန့်မှန်းထားသည့် အောက်လွှတ်တော်တွင် ရီပက်ဘလစ်ကန်များအပေါ် ထင်ရှားသိသာစွာ လှည့်ဖျား မှုများ ရှိနေကြောင်း Five Thirthy Eight အပါအဝင် စစ်တမ်းများက ပြသနေကြသည်။

ကွန်ဂရက်(လွှတ်တော်) တစ်ရပ် (သို့မဟုတ်) နှစ်ရပ်စလုံးကို ချုပ်ကိုင်နိုင်မှု ဆုံးရှုံးခြင်းသည် ဂျိုးဘိုင်ဒန်၏ သမ္မတ သက်တမ်း နှစ်နှစ်အတွင်း ပေါ်လွင်လာတော့မည် ဖြစ်သည်။

အမေရိကန်သမ္မတ ဘိုင်ဒန်ကိုတွေ့ရစဉ် (GETTY IMAGES)

ရီပက်ဘလစ်ကန် ပါတီဝင်များက အမေရိကန်ပြည်တွင်း၌ မိသားစုများ တကွဲတပြား နေထိုင်ရခြင်း၊ ကိုယ်ဝန်ဖျက် ချခြင်းနှင့် ရဲတပ်ဖွဲ့ကို တားမြစ်ကန့်သတ်ခြင်းများ စသည့် အရေးကိစ္စများကို ပိုမိုဆောင်ရွက်လာမည်ဟု မျှော်လင့် ရသည်။

လွှတ်တော်အတွင်း ကြွေးမြီကိစ္စလည်း လွှမ်းမိုးနေခဲ့၍ လူဝင်မှုကြီးကြပ်ရေးနှင့် အခြားအသုံးစရိတ်များ ကန့်သတ် ရန် ဥပဒေသစ်များကို တွန်းအားပေးမှုလည်း ရှိနေသည်။

ရီပတ်ဘလစ်ကန်များသည် ဒီမိုကရက်တစ်များ၏ အသုံးစရိတ်နှင့် သမ္မတဂျိုးဘိုင်ဒန်၏ သားဖြစ်သူ ဟန်တာ (Hunter) ၏ ကိုယ်ပိုင်ဘဝနှင့် စီးပွားရေး ဆက်ဆံရေးများနှင့် ဆက်စပ်သည့် စုံစမ်းစစ်ဆေးရေးများ စတင်လာမည်ဟုလည်း မျှော်လင့်ရသည်။

ဘိုင်ဒန်၊ ၎င်း၏အစိုးရအဖွဲ့ဝင်များ (သို့မဟုတ်) ဒုတိယသမ္မတ ကာမယ်လာဟားရစ်တို့ကို အပြစ်တင် စွပ်စွဲနိုင်ရန် မိမိတို့ မျှော်မှန်းထားကြောင်း လွှတ်တော်အမတ်အချို့က ပြောကြားခဲ့ကြသည်။

အထက်လွှတ်တော်ကို ချုပ်ကိုင်နိုင်ရန် ဒီမိုကရက်တစ် ပါတီဝင်များက ၅၀-၅၀ ရှုမြင်ထားကြောင်း အိမ်ဖြူတော် အတွင်းမှ အယူအဆများနှင့် နီးစပ်သူတစ်ဦးက ပြောကြားခဲ့သည်။

Source: Reuters

CNI International News

တိုကျို၊အောက်တိုဘာ ၂၆

မြောက်ကိုရီးယား၏ စစ်ရေးအရှိန် မြှင့်လာမှုကြောင့် အမေရိကန်သည် ၎င်း၏မဟာမိတ် ဂျပန်နှင့်တောင်ကိုရီးယား တို့ကို အကာအကွယ်ပေးရန်အတွက် နျူကလီးယား၊ သမားရိုးကျ လက်နက်များနှင့် ဒုံးကျည်စနစ်များ အပါအဝင် မိမိတို့ စစ်ရေးစွမ်းရည် အပြည့်အဝ အသုံးချမည်ဖြစ်ကြောင်း အမေရိကန် ဒုတိယနိုင်ငံခြားရေးဝန်ကြီး ဝင်ဒီရှား မန်း (Wendy Sherman) က အောက်တိုဘာ ၂၅ ရက်တွင် ပြောကြားခဲ့သည်။

မကြာသေးမီ ရက်သတ္တပတ်များအတွင်း မြောက်ကိုရီးယားသည် ပဲ့ထိန်းဒုံးကျည်များနှင့် အမြောက်များ ထပ်တ လဲလဲ ပစ်ခတ်စမ်းသပ်မှုသည် ရန်စသည့် စစ်ရေး လုပ်ဆောင်ချက်ဖြစ်ကြောင်း ရှားမန်းက ထပ်လောင်း ပြောကြား ခဲ့သည်။

တောင်ကိုရီးယား ဒုတိယနိုင်ငံခြားရေးဝန်ကြီး ချိုဟွန်ဒေါင်းကိုတွေ့ရစဉ် (AP)

မြောက်ကိုရီးယားကတော့ ၎င်း၏ အပြုအမူများကို နည်းဗျူဟာမြောက် နျူကလီးယား လက်နက်များ အသုံးပြုရန် စမ်းသပ်လေ့ကျင့်မှုဟု အကြောင်းပြထားသည်။

“ဒီလိုလုပ်ရပ်ဟာ တာဝန်မဲ့ပြီး အန္တရာယ်များပါတယ်။ အတိအလင်း မတည်မငြိမ် ဖြစ်စေပါတယ်” ဟု တောင်ကိုရီးယား ဒုတိယနိုင်ငံခြားရေးဝန်ကြီး ချိုဟွန်ဒေါင်း (Cho Hyundong) နှင့် ဂျပန်နိုင်ငံ၊ တိုကျိုမြို့တွင် တွေ့ဆုံဆွေးနွေးမှုတွင် ရှားမန်းက မှတ်ချက်ချခဲ့သည်။
၎င်းတို့နှစ်ဦးသည် အောက်တိုဘာ ၂၆ ရက် (ယနေ့) ဂျပန်နိုင်ငံခြားရေးဝန်ကြီး အပါအဝင် သုံးနိုင်ငံ တွေ့ဆုံမှု မတိုင်မီ အကြိုဆွေးနွေးခဲ့ကြခြင်း ဖြစ်သည်။

မြောက်ကိုရီးယားခေါင်းဆောင် ဒုံးကျည်ပစ်လွှတ်ဖို့လုပ်နေစဉ် (KCNA)

ပြီးခဲ့သည့် မေလ၌ ကွန်ဆာဗေးတစ် ခေါင်းဆောင်ဖြစ်သူ တောင်ကိုရီးယားသမ္မတ ယွန်ဆော့ရွဲ အာဏာရလာပြီး ကတည်းက ယခုကဲ့သို့ သုံးနိုင်ငံအစိုးရ၏ အဆင့်မြင့်အရာရှိများ လူချင်းတွေ့ဆုံမှုသည် ဒုတိယအကြိမ် ဖြစ်သည်။

ထို့ပြင် ဂျပန်နှင့် တောင်ကိုရီးယားတို့အကြား လိပ်ခဲတည်းလည်း ဖြစ်နေခဲ့သော ဆက်ဆံရေး ပိုမိုတိုးတက်လာ ခြင်းကိုလည်း ပြသနေသည်။

လွန်ခဲ့သော တစ်နှစ်၌ ဝါရှင်တန်တွင် သုံးနိုင်ငံ ဆွေးနွေးပြီးနောက် ဂျပန်နှင့် တောင်ကိုရီးယားတို့မှ ဒုတိယဝန်ကြီး များသည် ပူးတွဲ သတင်းစာ ရှင်းလင်းပွဲ၌ အတူပါဝင်ရန် ငြင်းဆိုခဲ့ကြသဖြင့် ရှားမန်းသာလျှင် တစ်ကိုယ်တော် မီဒီယာများနှင့် တွေ့ဆုံရှင်းလင်းခဲ့ရသည်။

ဂျပန်နှင့်တောင်ကိုရီးယားတို့၏ လုံခြုံရေးအတွက် အမေရိကန်၏ ကတိကဝတ်မှာ အလေးအနက် ရှိကြောင်း မြောက်ကိုရီးယား သဘောပေါက်နားလည်ရန် လိုကြောင်း ရှားမန်းက ပြောကြားခဲ့သည်။

Source: AP

CNI International News

နယူးယောက်၊ အောက်တိုဘာ ၂၆

ယူကရိန်းနိုင်ငံရှိ အမေရိကန်ဇီဝဓာတ်ခွဲခန်းများ၏ လုပ်ဆောင်ချက်များကို စုံစမ်းစစ်ဆေးရေးကော်မရှင် ဖွဲ့စည်းရန် ကုလသမဂ္ဂ (UN) လုံခြုံရေးကောင်စီထံ ဆုံးဖြတ်ချက်မူကြမ်းကို ရုရှားက အဆိုပြုတင်သွင်းခဲ့ကြောင်း မော်စကိုအခြေစိုက် တာ့စ်သတင်းဌာနက ရေးသားဖော်ပြသည်။

အဆိုပါမူကြမ်းထဲတွင် ရုရှားဖက်ဒရေးရှင်း၏ တိုင်ကြားချက်အရ အမေရိကန်နှင့် ယူကရိန်းတို့အပေါ် စွပ်စွဲချက် များကို စုံစမ်းစစ်ဆေးရန်အတွက် UN လုံခြုံရေးကောင်စီအဖွဲ့ဝင်အားလုံး ပါဝင်သော ကော်မရှင်တစ်ရပ် ဖွဲ့စည်း သင့်ကြောင်း တောင်းဆိုထားသည်။ စွပ်စွဲချက်များထဲတွင် ယူကရိန်းပိုင်နက်အတွင်း ဇီဝဓာတ်ခွဲခန်း လှုပ်ရှား လုပ် ဆောင်နေသည့်ကိစ္စမှာ အဓိကပါဝင်သည်။

ထို့ပြင် ၂၀၂၂ ခုနှစ်၊ နိုဝင်ဘာလ ၃၀ ရက် နောက်ဆုံးထားပြီး အကြံပြုချက်များပါရှိသော အစီရင်ခံစာတစ်စောင်ကို လုံခြုံရေးကောင်စီထံ တင်သွင်းရမည်ဖြစ်ကြောင်း၊ စုံစမ်းစစ်ဆေးမှုရလဒ်များကို ၂၀၂၂ ခုနှစ်၊ နိုဝင်ဘာ ၂၈ ရက်မှ ဒီဇင်ဘာ ၁၆ ရက်အထိ ဆွစ်ဇာလန်နိုင်ငံ၊ ဂျနီဗာမြို့တွင် ကျင်းပမည့်ကောင်စီ၏ နဝမအကြိမ်မြောက် ပြန်လည် သုံးသပ်ခြင်းညီလာခံ(ကွန်ဗင်းရှင်း)သို့ အသိပေးရန်ဖြစ်ကြောင်း ရုရှားက အဆိုပြုထားသည်။

Source: တာ့စ်သတင်းဌာန