CNI International News

လန်ဒန်၊ အောက်တိုဘာ ၂၀

ဗြိတိန်ဝန်ကြီးချုပ် လစ်ဇ်ထရက်စ်သည် တိုင်းပြည်စီးပွားရေးအစီအစဉ်နှင့်ပတ်သက်၍ ၎င်း၏အာဏာရ ကွန်ဆာဗေးတစ်ပါတီမှ ရန်လိုသောအတိုက်အခံပြုသူများထံမှ ဒေါသနှင့် ရင်ဆိုင်နေရစဉ်အတွင်း အောက်တိုဘာ ၁၉ ရက်တွင် သူ့ကိုယ်သူ တိုက်ခိုက်လိုသူနှင့်စွန့်စားသူမဟုတ်ကြောင်း ထုတ်ဖော်ပြောကြားခဲ့သည်။

အံတုရင်ဆိုင်သော ကြေညာချက် ပြောကြားအပြီး နာရီပိုင်းအတွင်း ထရက်စ်၏အစိုးရသည် ပြိုလဲလုနီးနီး အခြေအနေသို့ ဆိုက်ရောက်လာခဲ့သည်။

ထရက်စ်အပေါ် ဝေဖန်မှုများ စုပြုံနေချိန်အတွင်း အစိုးရအဖွဲ့ဝင်တစ်ဦးလည်း ရာထူးမှ နုတ်ထွက်သွားခဲ့သည်။

ဗြိတိန်အောက်လွှတ်တော်မဲခွဲဆုံးဖြတ်မှုတွင် ရာဇဝတ်မှုနှင့် အနိုင်ကျင့်ခံရမှု စွပ်စွဲချက်များမှာလည်း ကျဆင်း သွားခဲ့သည်။

ပြည်ထဲရေးအတွင်းဝန် ဆူလာဘရေဗာမန်း (Suella Braverman) သည် ၎င်း၏ကိုယ်ရေးကိုယ်တာအီးမေးလ် account အစိုးရဆိုင်ရာစာရွက်စာတမ်းပေးပို့မိသဖြင့် စည်းမျဉ်းချိုးဖောက်မိ၍ ရာထူးမှ နုတ်ထွက်ကြောင်း ပြောကြားခဲ့သည်။ ၎င်းသည် ထရက်စ်အပေါ် ဝေဖန်ရန်အတွက် ၎င်း၏နုတ်ထွက်လွှာကို အသုံးချခဲ့ပြီး အစိုးရ ဦးတည်ချက်များကို စိုးရိမ်မိကြောင်း ဆက်လက်ပြောကြားခဲ့သည်။

ပြည်ထဲရေးအတွင်းဝန် ဆူလာဘရေဗာမန်း အောက်တိုဘာလ ၁၈ ရက်နေ့က လန်ဒန်မြို့၊ ဒေါင်းနင်းလမ်းသို့ ရောက်ရှိလာစဉ်(ဓါတ်ပုံ-အေပီ)

“အစိုးရရဲ့စီးပွားရေးဦးတည်ချက်ဟာ အမှားတွေရှိနေပြီး တာဝန်ရှိတယ်လို့ ပြည်သူတွေ ယုံကြည်လက်ခံထား ကြပါတယ်။ တကယ်တော့ ကျမတို့ အစိုးရကလည်း အမှားတွေမလုပ်မိခဲ့ဘူးဆိုပြီး ဟန်ဆောင်နေတာရှင့်။ ကျမတို့ လုပ်ထားမိတာတွေကို ပြည်သူတွေ မမြင်သလိုလို ဆက်လုပ်နေတာ။ မှော်ဆန်တဲ့အရာတွေ အမှန်ဖြစ်လာလိမ့် မယ်လို့ မျှော်လင့်နေတာဟာ လေးနက်တဲ့နိုင်ငံရေး မဟုတ်ပါဘူး” ဟု ဆူလာဘရေဗာမန်းက ဆက်လက် ပြောကြားခဲ့သည်။

ဘရေဗာမန်းသည် ကွန်ဆာဗေးတစ်ပါတီထဲတွင် လက်ယာယိမ်းသည်ဟု ရေပန်းစားသူတစ်ဦးဖြစ်ပြီး ယခုနွေရာသီ ၌ ပါတီခေါင်းဆောင်ပိုင်းကို လူဝင်မှုကြီးကြပ်ရေးမူဝါဒများဖြင့် ထိုးနှက်ခဲ့သော်လည်း မအောင်မြင်ခဲ့ပေ။ အဆိုပါ ထိုးနှက်မှုတွင် ထရက်စ်က အနိုင်ရခဲ့သည်။
ထို့နောက် အစိုးရအဖွဲ့ဝင်များအတွင်း ဘရေဗာမန်းကို လူဝင်မှုကြီးကြပ်ရေးနှင့်တရားဥပဒေစိုးမိုးရေးဆိုင်ရာ ဝန်ကြီးဟောင်း ဂရန့်ရှက်စ်က ပြည်ထဲရေးအတွင်းဝန်အဖြစ် ပြောင်းလဲခန့်အပ်ခဲ့သည်။

ဘရေဗာမန်းသည် ကွန်ဆာဗေးတစ်ခေါင်းဆောင်နေရာအတွက် ယှဉ်ပြိုင်ကြရာတွင် နောက်ဆုံးအကျော့၌ ထရက်စ်ကို ရှုံးနိမ့်ခဲ့သော ဘဏ္ဍာရေးအဆင့်မြင့်အရာရှိဟောင်း ရီရှီဆန်းနက်ကို တခဲနက်ထောက်ခံခဲ့သူ တစ်ဦးလည်းဖြစ်သည်။

ကွန်ဆာဗေးတစ်လွှတ်တော်အမတ်များ၏ဆန့်ကျင်ဝေဖန်ခံနေရသူ ထရက်စ်သည် လွှတ်တော်အတွင်း အောက်တိုဘာ ၁၉ ရက်၊ ညနေပိုင်း၌ ကမောက်ကမနိုင်လှသော မဲခွဲဆုံးဖြတ်မှုနှင့်အတူ နိုင်ငံရေးအရှုပ်အထွေး များနှင့် ရင်ဆိုင်နေရသည်။

Source: AP

CNI International News

ဝါရှင်တန်၊ အောက်တိုဘာ ၂၀

ထိုင်ဝမ်နှင့်လက်နက်များ ပူးတွဲထုတ်လုပ်ရန် အစီအစဉ်ကို အမေရိကန်အစိုးရက စဉ်းစားနေကြောင်း စီးပွားရေးဆိုင်ရာလှုံ့ဆော်ပေးသူ(လော်ဘီ)တစ်ဦးက အောက်တိုဘာ ၁၉ ရက်တွင် ပြောကြားခဲ့သည်ဟု ရိုက်တာသတင်းဌာနက ရေးသားဖော်ပြသည်။

တရုတ်သည် ဒီမိုကရေစီနည်းကျ အုပ်ချုပ်နေသော ထိုင်ဝမ်ကျွန်းကို ၎င်း၏ပိုင်နက်နယ်မြေ အစိတ်အပိုင်းအဖြစ် မှတ်ယူထားပြီး စစ်ရေးဖိအားပေးမှု အရှိန်မြှင့်လာသဖြင့် ကျွန်းပေါ်သို့ ဒေါ်လာ ၂၀ ဘီလီယံကျော် လက်နက် ရောင်းချပေးရေးကို အမေရိကန်သမ္မတ အဆက်ဆက် ၂၀၁၇ ခုနှစ်ကတည်းက စတင်ခွင့်ပြုပေးခဲ့သည်။

သို့သော် ယူကရိန်းစစ်ကြောင့် အချို့သော လက်နက်စနစ်များ ဝယ်လိုအား တိုးလာ၍ ထောက်ပံ့ပို့ဆောင်ရေး ကွင်းဆက် အခက်အခဲများနှင့် နောက်ကျ ကျန်နေမှုများကြောင့် ပစ္စည်းရောက်ရှိချိန် နှောင့်နှေးမည်ကို ထိုင်ဝမ်နှင့် အမေရိကန်ကွန်ဂရက်(လွှတ်တော်)တို့က သတိပေးထားကြသည်။

အမေရိကန်-ထိုင်ဝမ်စီးပွားရေးကောင်စီ ဥက္ကဋ္ဌ ရူးဘတ်ဟမ်မွန်ချိန်ဘာ့စ် (GETTY IMAGES)

“ပူးတွဲထုတ်လုပ်ရေး လုပ်ငန်းစဉ် စတော့မယ်ဆိုတာ မှန်ပါတယ်” ဟု အမေရိကန်-ထိုင်ဝမ်စီးပွားရေးကောင်စီ ဥက္ကဋ္ဌ ရူးဘတ်ဟမ်မွန်ချိန်ဘာ့စ် (Rupert Hammond-Chambers) က အတည်ပြုပြောကြားခဲ့သည်။

လုပ်ငန်းစဉ်အရ အမေရိကန် ကာကွယ်ရေးပစ္စည်း ကန်ထရိုက်တာများလည်း အကျုံးဝင်ကြောင်း ၎င်းက ဆက်လက် ပြောကြားခဲ့သည်။

ထိုင်ဝမ်သို့ ခဲယမ်းမီးကျောက်နှင့် တာရှည်အသုံးခံမည့် ဒုံးကျည်နည်းပညာများ ပေးအပ်ရန် အာရုံစိုက်ထားသော် လည်း မည်သည့် လက်နက်အမျိုးအစားအား တစိတ်တပိုင်း အနေဖြင့် ထည့်သွင်းစဉ်းစားမလဲကို မဆုံးဖြတ်ရသေး ကြောင်း ရူးဘတ်ဟမ်မွန်ချိန်ဘာ့စ်က ရှင်းပြသည်။
သို့ရာတွင် ယခုအစီအစဉ် နိုင်ငံတော်အဆင့်နှင့် ကာကွယ်ရေးဌာနဆိုင်ရာများထံမှ ပူးတွဲထုတ်လုပ်ခွင့် လိုင်စင် ထုတ်ပေးရန် လက်နက်ထုတ်လုပ်သူများအတွက် လိုအပ်မည်ဖြစ်ကြောင်း ၎င်းက သတိပေးခဲ့သည်။

ပြည်ပတစ်နေရာ(ပလက်ဖောင်းတစ်ခု)အတွက် အမေရိကန်၏ အရေးကြီးသော နည်းပညာကို အတည်ပြုရန်မှာ အဆင်မပြေသဖြင့် ပူးတွဲထုတ်လုပ်ခွင့်လိုင်စင် ထုတ်ပေးခြင်းကို အမေရိကန်အစိုးရအတွင်း ခုခံချေပမှုများ ပေါ် ပေါက်လာ နိုင်ကြောင်း ၎င်းက ထပ်လောင်း ပြောကြားခဲ့သည်။

ထိုင်ဝမ်စစ်သားများကိုတွေ့ရစဉ် (GETTY IMAGES)

အမည်မဖော်လိုသူ သတင်းရင်းမြစ် ၃ ခုကို ကိုးကား၍ ဂျပန်နစ်ကိုင်းအေးရှား သတင်းစာက အဆိုပါအစီအစဉ်ကို စတင်ရေးသားဖော် ပြခဲ့သည်။

“ဒါဟာ ပဟေဠိတစ်ခုပါပဲ” ဟု ဟမ်မွန်ချိန်ဘာ့စ်က ရိုက်တာသို့ ပြောကြားခဲ့သည်။

အဆိုပါ သတင်းနှင့်ပတ်သက်၍ ထိုင်ဝမ်နိုင်ငံခြားရေးဝန်ကြီးဌာနသို့ နစ်ကိုင်းအေးရှားက သဘောထား မှတ်ချက် တောင်းခံခဲ့ရာ မှတ်ချက်ပေးရန် ငြင်းဆိုခဲ့သည်။

သို့သော်လည်း ထိုင်ဝမ်-အမေရိကန် ဆက်ဆံရေးအရ အမေရိကန်သည် ထိုင်ဝမ်တွင် လက်နက်ထုတ်လုပ်ရန် နည်း ပညာပံ့ပိုးပေးခြင်း (သို့မဟုတ်) ထိုင်ဝမ် နယ်မြေ အစိတ်အပိုင်းကို သုံး၍ လက်နက်ထုတ်လုပ်ခြင်း အကျုံးဝင်မည် ဖြစ်ကြောင်း နစ်ကိုင်းအေးရှားသတင်းတွင် ဆက်လက် ဖော်ပြထားသည်။

ထို အစီအစဉ်နှင့်ပတ်သက်၍ မေးမြန်းရာ အမေရိကန် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက “ထိုင်ဝမ်သို့ ခုခံကာကွယ်ရေးစွမ်းရည် အလျင်အမြန် လွှဲပြောင်းပေးရေး သေချာစေဖို့ အမေရိကန်က ရွေးချယ်စရာအားလုံးကို စောင့်ကြည့်နေပါတယ်” ဟု ပြန်လည် ဖြေကြားခဲ့သည်။

Source: Reuters

CNI International News

နယူးယောက်၊ အောက်တိုဘာ ၁၉

Lafarge အမည်ရှိ ပြင်သစ်ဘိလပ်မြေကုမ္ပဏီသည် ဆီးရီးယားနိုင်ငံတွင် စက်ရုံလည်ပတ်နိုင်ရေး IS အဖွဲ့ကို ဒေါ်လာသန်းနှင့်ချီ၍ ပေးခဲ့ခြင်းအတွက် အပြစ်ရှိကြောင်း အောက်တိုဘာ ၁၈ ရက်တွင် ဝန်ခံခဲ့သည်ဟု အေပီ သတင်းအရ သိရသည်။

ဆီးရီးယားတွင် ပြန်ပေးဆွဲခံခဲ့ရသော အနောက်တိုင်းသားများအပေါ် နှိပ်စက်ညှင်းပန်းမှု၌ IS စစ်သွေးကြွနှင့်အတူ ပါဝင်ပတ်သက်သဖြင့် ဒဏ်ငွေအကြမ်းဖျင်း ဒေါ်လာ ၇၇၈ သန်း ပေးဆာင်ရန် အဆိုပါကုမ္ပဏီက သဘောတူ လက်ခံခဲ့သည်။

Lafarge ကုမ္ပဏီသည် နယ်မြေသစ်များ ရယူပြီး ဆီးရီးယားပြည်တွင်းစစ် ပြင်းထန်နေချိန်၌ စစ်သွေးကြွအဖွဲ့နှင့် ဝင်ငွေခွဲဝေယူခဲ့သည့်အပြင် ရက်စက်ကြမ်းကြုတ်သော IS အဖွဲ့၏ အပြုအမူများကို မျက်ကွယ်ပြုခဲ့ကြောင်း အမေရိကန်တရားရေးဌာနက စွပ်စွဲထားသည်။

ကုမ္ပဏီသည် ဆွစ်ဇာလန်မှ Holcim ဘိလပ်မြေကုမ္ပဏီနှင့် မပူးပေါင်းမီ အဆိုပါလုပ်ရပ်များကို ဆီးရီးယားတွင် ဖော်ဆောင်ခဲ့ကြောင်း ပြင်သစ်ဥပဒေစိုးမိုးရေး အာဏာပိုင်များက စုံစမ်းတွေ့ရှိခဲ့သည်။

Lafarge ကုမ္ပဏီအနေဖြင့် ပြည်ပအကြမ်းဖက်အဖွဲ့နှင့် ထောက်ပံ့ရေးပစ္စည်းများ ပူးပေါင်းကြံစည်မှုတွင် အပြစ် ရှိကြောင်း ဝန်ခံခဲ့သော ပထမဆုံး အမှုဖြစ်ကြောင်း တရားရေးဌာန တာဝန်ရှိသူများက ဆက်လက် ပြောကြားခဲ့သည်။

ပြင်သစ်ဘိလပ်မြေ Lafarge ကုမ္ပဏီကိုတွေ့ရစဉ် (AP)

Lafarge နှင့် တွဲဖက် လုပ်ကိုင်မှု မပြုသည်မှာ နှစ်အတန်ကြာပြီဖြစ်သည့် ဆီးရီးယားလုပ်ငန်းခွဲ တစ်ခုကလည်း ရာဇဝတ်မှုဒဏ်ငွေ ဒေါ်လာ ၉၀ ဒသမ ၇၈ သန်းနှင့် လျော်ကြေးငွေ ဒေါ်လာ ၆၈၇ သန်းကို ပေးဆောင်ရမည့် ကိစ္စ အတွက် ဘရွတ်ကလင်းရှိ ဗဟိုတရားရုံးသို့ အယူခံဝင်ခဲ့သည်။

“နိုင်ငံပေါင်းစုံ ကော်ပိုရေးရှင်း တစ်ခုအနေဖြင့် အကြမ်းဖက်ဟု သတ်မှတ်ထားသော အဖွဲ့တစ်ဖွဲ့အတွက် ငွေပေး ချေမှုမှာ တရားမျှတမှု မရှိပါ။ ထိုသို့ ပေးချေမှုများသည် ဥပဒေများကို ချိုးဖောက်ခြင်းဖြစ်ပြီး အမေရိကန် အာဏာပိုင်များ၏ အမြင့်ဆုံး စိစစ်ဆုံးဖြတ်မှုအပေါ် မူတည်၍ ပြင်းထန်သော ပြစ်ဒဏ်ချမှတ်သင့်ကြောင်း အာမခံ တင်ပြ ပါသည်” ဟု တရားရေးဌာန၊ အမျိုးသားထိပ်တန်းလုံခြုံရေး အရာရှိဖြစ်သူ လက်ထောက်ရှေ့နေချုပ် မက်သရူး အော်ဆန်က ပြောကြားခဲ့သည်။

အဆိုပါကုမ္ပဏီသည် ကြားခံအဖွဲ့များမှတဆင့် IS နှင့် အယ်လ်နူရက်တပ်ဦး စသည့် စစ်သွေးကြွအဖွဲ့များထံသို့ ၂၀၁၃ ခုနှစ်နှင့် ၂၀၁၄ ခုနှစ်တို့တွင် ဒေါ်လာ ၆ သန်းနီးပါး ပေးအပ်ခဲ့ကြောင်း အမေရိကန် အစိုးရရှေ့နေများက ပြောကြားခဲ့ကြသည်။

၎င်းတို့ သတ်မှတ်ထားသော လစဉ်ပေးချေသည့် ငွေများမှာ အုပ်စုအသီးသီးနှင့် ကုမ္ပဏီ၏ နားလည်မှုကြောင့် မဟုတ်ဘဲ စီးပွားရေးအရ အမြတ်ထုတ်ရန် သက်သက်ဖြစ်ကြောင်း တရားရေးဌာနက သတင်းထုတ်ပြန်ခဲ့သည်။

Source: AP

CNI International News

ဘန်ကောက်၊ အောက်တိုဘာ ၁၉

ထိုင်းစစ်တပ် အရာရှိတစ်ဦးကို ရန်ပုံငွေ လိမ်လည်မှုဖြင့် စွပ်စွဲပြီးနောက် ထိုင်းစစ်တပ်က ၎င်းနှင့်ပတ်သက်နေသည့် ချေးငွေစနစ်အား စုံစမ်းစစ်ဆေးသွားမည်ဖြစ်ကြောင်း ဘန်ကောက်ပို့စ် သတင်းတစ်ပုဒ်တွင် တွေ့ရသည်။

စစ်တပ်အရာရှိများအတွက် အိမ်များဆောက်ရန် ထိုင်းစစ်တပ်နှင့် စာချုပ်ချုပ်ထားသည့် စီးပွားရေးလုပ်ငန်းရှင် နှစ်ဦးဖြစ်သော မစ္စကွိုင် (Ms Koi) နှင့် မစ္စဘတ် (Ms Bird) တို့ကို စုံစမ်းစစ်ဆေးရန် အဆိုပြုပြီးနောက် တဆက် တည်းတွင် ထိုင်းစစ်တပ်အရာရှိ၏ ချေးငွေစနစ်သတင်း ပေါ်ပေါက်လာခဲ့သည်။

၎င်းတို့ကို ထိုင်းစစ်တပ် ထိပ်တန်းအရာရှိတစ်ဦးက ခြိမ်းခြောက်မှုရှိခဲ့ကြောင်း ၎င်းတို့က ထွက်ဆိုကြသည်။

ကွိုင်နှင့်ဘတ် နှစ်ဦးစလုံးသည် စွပ်စွဲခြိမ်းခြောက်မှုများကို ထုချေရှင်းလင်းရန်အတွက် အောက်တိုဘာ ၁၈ ရက် တွင် တရားရုံးသို့ သွားရောက်ခဲ့ကြသည်။

ရှေ့နေ ပိုင်ဆန်ရူရန်ဂရစ်ကိုတွေ့ရစဉ် (GETTY IMAGES)

ချေးငွေများ၊ ရန်ပုံငွေများ လိမ်လည်ရယူကြောင်း မိမိသိရှိသွားသဖြင့် အဆိုပါ စစ်တပ်အရာရှိ၏ ခြိမ်းခြောက်ခြင်း ခံခဲ့ရကြောင်း အဆိုပါအမျိုးသမီးများက ထွက်ဆိုကြသည်။

အတိုးနည်းသည်ဟု ယူဆရသော ချေးငွေများကို စစ်တပ်သက်သာချောင်ချိရေး စနစ်အောက်တွင် အိမ်ဆောက်ရန် အတွက် ငွေကြေးလိုအပ်သော စစ်မှုထမ်းများအတွက် ထိုင်းနိုင်ငံ၌ ထုတ်ပေးလေ့ရှိသည်။

အဆိုပါ အမျိုးသမီးများနှင့်အတူ လိုက်ပါဆောင်ရွက်သည့် ရှေ့နေ ပိုင်ဆန်ရူရန်ဂရစ် (Paisarn Ruangrit)က “စစ်တပ် သက်သာချောင်ချိရေးဌာနမှ ရယူသည်ဟု ယူဆရသော ချေးငွေများကို ၅ ရာခိုင်နှုန်း ပေးရမည်ဟု ဆို၍ ယခုအမှုတွင် စွပ်စွဲခံရသော စစ်တပ်အရာရှိက ချေးငွေအချို့ လိမ်လည်ခဲ့ကြောင်း” ပြောကြားခဲ့သည်။

ချေးငွေရယူသည် စစ်မှုထမ်းများသည် ၅ ရာခိုင်နှုန်း ပေးရမည်ဆိုသဖြင့် အထိတ်တလန့် ဖြစ်သွားခဲ့ကြောင်း ရှေ့နေ မစ္စတာ ပိုင်ဆန်က ဆက်လက် ပြောကြားခဲ့သည်။

မစ္စကွိုင်နှင့် မစ္စဘတ်တို့ အပါအဝင် ဆောက်လုပ်ရေး လုပ်ငန်းရှင်များက ချေးငွေအတွက် အခကြေးငွေ ကောက်ခံ ခြင်းဖြစ်သည်ဟု မှားယွင်းစွာ ထင်မြင်ခဲ့ကြသည်။

ထိုင်းတရားရေးဝန်ကြီးဌာန အစည်းအဝေးလုပ်နေစဉ် (GETTY IMAGES)

ထို့နောက် ချေးငွေလက်ခံသူများက အဆိုပါ အမျိုးသမီးများကို ဘာကြောင့် ချေးငွေအတွက် အခကြေးငွေ ကောက်ခံရသလဲဟု ရှင်းလင်းပြောကြားရန် တောင်းဆိုခဲ့ကြသည်။

ချေးငွေထဲမှ ဖြတ်တောက် ကောက်ခံခြင်းသည် အကျင့်ပျက် ခြစားမှုတစ်ခုဖြစ်ကြောင်း သတိပြုမိခဲ့သည်ဟု ထို အမျိုးသမီးက အခိုင်အမာ ပြောကြားခဲ့ကြောင်း ၎င်းတို့ရှေ့နေက ရှင်းပြသည်။

စစ်သား အများအပြား၏ ချေးငွေများသည် ထိုင်းစစ်တပ် ထိပ်တန်းအရာရှိ၏ အိတ်ကပ်ထဲသို့ အများဆုံး ဝင်သွား ခဲ့ပြီး တရားမဝင် ဖြတ်တောက် ကောက်ခံခြင်းသာဖြစ်ကြောင်း ရှေ့နေက စွပ်စွဲခဲ့သည်။

ယခုအတောအတွင်း တရားရေးဝန်ကြီး၏ အတွင်းရေးမှူး သနာရစ်ဂျီတားရက်က ၎င်းတို့ဝန်ကြီးဌာန အနေဖြင့် ယခုအမှုကို စုံစမ်းစစ်ဆေးနေသည့် သက်ဆိုင်ရာ အာဏာပိုင်များနှင့် ဆက်သွယ်ဆောင်ရွက်ပြီးပြီဟု ပြောကြား ခဲ့သည်။

၂၀၂၀ ပြည့်နှစ်၌ လူ ၂၉ သေဆုံးပြီး ၅၀ ကျော် ဒဏ်ရာရခဲ့သော နခွန်ရက်ချာစီ ချေးငွေစနစ် အရေးအခင်းတွင် အကျင့်ပျက် ခြစားမှု ရှိနေနိုင်ကြောင်း သဘောထား မှတ်ချက်ကို ထိုင်းစစ်တပ်ပြောရေးဆိုခွင့်ရှိသူ ဒုတိယ ဗိုလ်ချုပ်ကြီး နီရန်ဒွန်စရိကာချာက အောက်တိုဘာ ၁၈ ရက်မှာ ငြင်းဆိုခဲ့သည်။

Source: Bangkok Post

CNI International News

တီဟီရန်၊ အောက်တိုဘာ ၁၉

ရုရှားထံသို့ မောင်းသူမဲ့ လေယာဉ်များ (ဒရုန်းများအပြင်) မြေပြင်မှ မြေပြင်ပစ် ဒုံးကျည်များ ထပ်မံ ပို့ဆောင်ပေး မည်ဟု အီရန်သဘောတူ ကတိပြုထားကြောင်း အီရန်အစိုးရ အဆင့်မြင့် အရာရှိနှစ်ဦးနှင့် အီရန်သံတမန်နှစ်ဦး တို့က ရိုက်တာသတင်းဌာနကို ပြောကြားခဲ့သည်။

ထိုလုပ်ရပ်သည် အမေရိကန်နှင့် အခြားအင်အားကြီး နိုင်ငံများကို ဒေါသထွက်စေနိုင်စရာ ရှိနေသည်။

အီရန်ဒုတိယသမ္မတ မိုဟာမက်မိုကာဘာ၊ အီရန်တော်လှန်ရေး အစောင့်တပ်မှ ထိပ်တန်း အရာရှိနှစ်ဦးနှင့် အမျိုသားလုံခြုံရေးကောင်စီ ထိပ်တန်းအရာရှိ တစ်ဦးတို့သည် ရုရှားနှင့် ဆွေးနွေးရန်အတွက် အောက်တိုဘာ ၆ ရက်တွင် မော်စကိုမြို့သို့ သွားရောက်ခဲ့ကြပြီး လက်နက်များ ပေးအပ်သွားရန် သဘောတူခဲ့ကြသည်။

“ရုရှားဘက်က ဒရုန်းတွေနဲ့ ပိုပြီးတိကျတဲ့ အီရန်ပဲ့ထိန်းဒုံးကျည်တွေ၊ အထူးသဖြင့် ဖာတာ (Fateh) နဲ့ ဇွယ်ဖာဂါ (Zolfaghar) ဒုံးကျည်အုပ်စုတွေ ထပ်လိုချင်တယ်လို့ တောင်းဆိုခဲ့ပါတယ်” ဟု ၎င်းတို့၏ မော်စကို ခရီးစဉ်နှင့် ပတ်သက်၍ အီရန်သံတမန်တစ်ဦးက ရှင်းပြခဲ့သည်။

အီရန်ရဲ့ ဖာတာ (Fateh) ဒုံးကျည်ကိုတွေ့ရစဉ် (GETTY IMAGES)

ဇွယ်ဖာဂါ အပါအဝင် မြေပြင်မှမြေပြင်ပစ် တာတိုပဲ့ထိန်းဒုံးကျည်များ ပေးအပ်ရန် အီရန်နှင့်ရုရှားတို့အကြား သဘောတူညီမှု ရရှိထားကြောင်း အနောက်အုပ်စု နိုင်ငံတစ်နိုင်ငံမှ အရာရှိတစ်ဦးက အတည်ပြုခဲ့သည်။

အီရန်ပံ့ပိုးပေးမည့် မောင်းသူမဲ့လေယာဉ် (ဒရုန်း) များအနက် တစ်ခုမှာ ရှာဟက်-၁၃၆ (Shahed-136) ဖြစ်ပြီး ခါမိခါဇီ (kamikaze) အမည်ရှိ ဝေဟင်မှ မြေပြင်သို့ တိုက်ခိုက်နိုင်သော ဒယ်လ်တာ (delta) အတောင်ပံပါသည့် လက်နက်အမျိုးအစား ဖြစ်သည်။

၎င်းသည် ပေါက်ကွဲလွင့်စဉ်နိုင်သော ခဲယမ်းထိပ်ဖူးငယ် တစ်ခုကို တပ်ဆင် သယ်ဆောင်သွားနိုင်သည်။

Fateh-110 နှင့် Zolfaghar တို့သည် အီရန်၏ တာတိုပစ် ဒုံးကျည်များဖြစ်ပြီး မြေပြင်ပစ်မှတ်များကို ကီလိုမီတာ ၃၀၀ နှင့် ကီလိုမီတာ ၇၀၀ (၁၈၆ မိုင် နှင့် ၄၃၅ မိုင်) အကြား အကွာအဝေးအထိ ပစ်ခတ်နိုင်သည်။

ထိုသို့ လက်နက်ပေးပို့ လွှဲပြောင်းမှုသည် ၂၀၁၅ ခုနှစ် ကုလသမဂ္ဂ လုံခြုံရေးကောင်စီ၏ ဆုံးဖြတ်ချက်ကို ချိုးဖောက်သည်ဟု အနောက်အုပ်စု၏ ပြောကြားချက်ကို အီရန်သံတမန်က ပယ်ချခဲ့သည်။

Source: Reuters

CNI International News

ဘာလင်၊ အောက်တိုဘာ ၁၈

ဂျာမနီနိုင်ငံရှိ ဟမ်းဘတ်ဆိပ်ကမ်းမှာ တရုတ်သင်္ဘောကုမ္ပဏီ တစ်ခုဖြစ်သည့် COSCO ကို ရင်းနှီးမြှုပ်နှံခွင့်ပြုရန် သင့်/မသင့် ကိစ္စနှင့်စပ်လျဉ်း၍ ဘာလင်မြို့တော်၌ အခြေအတင် အငြင်းပွားနေသည့်ကြားမှ “တရုတ်သည် ဂျာမနီ၏ အရေးကြီးသော အခြေခံ အဆောက်အုံများ၌ အစုရှယ်ယာ အသုံးချလာနိုင်ကြောင်း ဂျာမနီ ထောက်လှမ်းရေး အကြီးအကဲများက အောက်တိုဘာ ၁၇ ရက်တွင် သတိပေးခဲ့သည်ဟု ရိုက်တာသတင်းအရ သိရသည်။

အဆိုပါ အငြင်းပွားမှုမှာ နိုင်ငံရေး ရည်မှန်းချက်များ အကောင်အထည် ဖော်ရန်အတွက် အရှိန်အဟုန်ဖြင့် ဆောင်ရွက်နေခြင်းနှင့်လည်း ဆက်စပ်နေသည်။

နိုင်ငံ၏ အရေးပါဆုံး ဆိပ်ကမ်း ၃ ခုအနက်မှ အစုရှယ်ယာတစ်ခုကို ဝယ်ယူရန် COSCO ၏လေလံဆွဲမှုကို ဂျာမနီ စီးပွားရေးဝန်ကြီးဌာနက ဗီတိုအာဏာ သုံးဖို့ လိုလားနေကြောင်း၊ ယင်းကိစ္စအတွက် ဝန်ကြီးချုပ်(အဓိပတိ)ဖြစ်သူ ဆိုရှယ်ဒီမိုကရက် (SPD) ပါတီခေါင်းဆောင်က မျက်နှာသာပေးခဲ့ကြောင်း အစိုးရသတင်းရင်းမြစ်များ ကိုးကား၍ ရိုက်တာက ဆက်လက် ရေးသားသည်။

ဆိပ်ကမ်းအရေး အငြင်းပွားမှုသည် ဂျာမနီ၏ ထိပ်တန်း ကုန်သွယ်ဘက်ဖြစ်သော တရုတ်နိုင်ငံအပေါ် မှီခိုအားထား နေရမှု လျှော့ချရေးနှင့်ပတ်သက်၍ ဂျာမနီပြည်တွင်း၌ အပြင်းအထန် သဘောထား ကွဲလွဲနေကြခြင်းကို ထင်ဟပ် စေသည်။

ယူကရိန်းကို ရုရှားကျူးကျော်ဝ င်ရောက်ပြီးနောက် အင်အားကြီး အာဏာရှင်နိုင်ငံ တစ်နိုင်ငံအပေါ် မှီခိုအားထားမိ သည့် အန္တရာယ်များမှာ မီးမောင်းထိုးပြစရာ ဖြစ်လာခဲ့သည်။

တရုတ်နဲ့ ဂျာမနီ အလံကိုတွေ့ရစဉ် (Reuters)

စီးပွားရေးအရ ဆက်ဆံမှုကို နိုင်ငံရေးအရ မဝေဖန်ရန် (သို့မဟုတ်) အမျိုးသားလုံခြုံရေးအရ အကာအကွယ်ပေး ရေးကိုသာ ပါဝင်ဆောင်ရွက်ကြရန် တရုတ်က ဂျာမနီကို လတ်တလော တိုက်တွန်းထားသည်။

လုံခြုံရေး ကိစ္စရပ်များနှင့်ပတ်သက်၍ လွှတ်တော်အတွင်း ကြားနာကြစဉ် ဂျာမနီ ပြည်တွင်း/ပြည်ပ ထောက်လှမ်း ရေး အေဂျင်စီ အကြီးအကဲများက COSCO အနေဖြင့် ဆိပ်ကမ်း လေလံဆွဲမှုကို အများသူငှါ အနေဖြင့် အကဲမဖြတ် နိုင်သော်လည်း ယေဘုယျအားဖြင့် သတိထားကြဖို့ လိုကြောင်း ထောက်ပြကြသည်။

“တိုင်းပြည်ရဲ့ အရေးကြီးတဲ့ အခြေခံ အဆောက်အုံတွေမှာ တရုတ် ပါဝင်ပတ်သက်နေတာကို ကျနော်တို့အတွက် သိပ်ကို ဝေဖန်စရာဖြစ်ပါတယ်” ဟု ဂျာမနီပြည်ပ ထောက်လှမ်းရေးဌာန (BND) အကြီးအကဲ ဘရူနိုခဲက ပြော ကြားခဲ့သည်။

ဆိပ်ကမ်းတစ်ခုကို အရေးပါသော အခြေခံ အဆောက်အအုံအဖြစ် သတ်မှတ်သင့်ကြောင်း လွှတ်တော်အတွင်း ကြားနာမှု တစ်ခုအတွင်း ၎င်းက အထက်ပါအတိုင်း ပြောကြားခဲ့ခြင်း ဖြစ်သည်။ တစ်ဆက်တည်းမှာပင် ရင်းနှီး မြှုပ်နှံမှုမှန်သမျှကို ဂရုတစိုက် ပြန်လည် သုံးသပ်သင့်ကြောင်း ၎င်းက ဆက်လက် ပြောကြားခဲ့သည်။

ဂျာမနီသည် 5G အခြေခံ အဆောက်အအုံ (သို့မဟုတ်) ၎င်း၏ အကြံဉာဏ်များ ယူ၍ အကောင်အထည် ဖော်ရန် အတွက် စီးပွားရေး အင်အား အပါအဝင် နည်းပညာကို တရုတ်ထံမှ ယူငင်သုံးစွဲရန် မျှော်လင့်သင့်ကြောင်း ဘရူနိုခဲ က ဖြည့်စွက် ပြောကြားခဲ့သည်။

“တကယ်လို့ တရုတ်နဲ့ဂျာမနီကြားမှာ နိုင်ငံရေးအရ သဘောထား ကွဲလွဲမှုတွေ ကြုံလာတဲ့ အခါကျရင် အခု ဆိပ်ကမ်းလို ကိစ္စမျိုး လက်နက်သဖွယ် သုံးလာလိမ့်မယ်” ဟု ၎င်းက ထပ်လောင်း ပြောကြားခဲ့သည်။

Source: Reuters

CNI International News

လန်ဒန်၊ အောက်တိုဘာ ၁၈

ဗြိတိန်ဝန်ကြီးချုပ် လစ်ဇ်ထရက်စ်သည် ၎င်းအစိုးရ၏ စီးပွားရေးမဟာဗျူဟာတခုလုံးကို ဖျက်သိမ်းလျက် ပြည်သူများသို့ တောင်းပန်လွှာထုတ်ပြန်ခဲ့ရကြောင်း သည်တိုင်းမ် (The Times) မီဒီယာက ရေးသားဖော်ပြသည်။

ဗြိတိန်နိုင်ငံရှိ အိမ်ထောင်စုများသည် အဆိုပါမဟာဗျူဟာကြောင့် ပြီးခဲ့သည့် ဧပြီလမှစ၍ ပျမ်းမျှစွမ်းအင်ကုန်ကျ စရိတ် ပေါင် ၅,၀၀၀(ငါးထောင်) အကျပ်အတည်းနှင့် ရင်ဆိုင်နေရကြောင်း သည်တိုင်းမ်က ဆက်လက်ရေးသား သည်။

ပျမ်းမျှစွမ်းအင်ကုန်ကျစရိတ်ကို ပေါင် ၂,၅၀၀ အထိသာ ကန့်သတ်ထားသော စွမ်းအင်ဆိုင်ရာအာမခံချက်မှာ လာမည့်နှစ်၊ ဧပြီလတွင်မှ ရရှိနိုင်မည်ဟု အဓိပတိသစ်ဖြစ်သော ဂျယ်ရမီဟန့် (Jeremy Hunt) က ပြောကြားခဲ့ သည်။ ထို့နောက် ဗြိတိန်နိုင်ငံတဝန်းရှိ အိမ်ထောင်စုများအတွက် စွမ်းအင်သုံးစွဲမှု ငွေတောင်းခံလွှာများ နှစ်ဆ မတက်စေရေးအတွက် ကိုင်တွယ်ဖြေရှင်းရာတွင် ထိခိုက်အလွယ်ဆုံးအုပ်စုများအတွက် အစိုးရပံ့ပိုးမှုကို ပစ်မှတ်ထားမည်ဟု သိရသည်။

အဓိပတိဟန့်သည် ဈေးကွက်များ အဆင်ပြေချောမွေ့စေရေးအတွက် လစ်ဇ်ထရက်စ်၏ ဆိုးရွားလှသော အသေးစားဘတ်ဂျက်ထဲမှ အခွန်ဖြတ်တောက်မှု ပေါင် ၃၂ ဘီလီယံကို ပြောင်းပြန်လှန်ခဲ့သည်။ အဆိုပါ အခွန် ဖြတ်တောက်မှုတွင် အစိုးရက အကန့်အသတ်မရှိ သိမ်းဆည်းထားမည့် အခြေခံဝင်ငွေခွန် ဖြတ်တောက်မှုလည်း ပါဝင်သည်။

The Guardian သတင်းစာ၏ ခေါင်းကြီးပိုင်းတွင် ဝန်ကြီးချုပ် ထရက်စ်၏ စီးပွားရေးမဟာဗျူဟာနှင့် ပတ်သက်လို့ ဖော်ပြကြစဉ်

သို့ဖြစ်၍ ဗြိတိန်ပြည်တွင်း၌ အခွန်ဝန်ထုပ်ဝန်ပိုးသည် ၁၉၅၀ ပြည့်နှစ်နောက်ပိုင်း အမြင့်ဆုံးအဆင့်သို့ ရောက်ရှိရန် ဦးတည်လာခဲ့သည်။

အခွန်ကိစ္စကို ချိန်ခွင်လျှာညှိရန်အတွက် လက်ရှိအစိုးရသည် မျက်ရည်ကျလောက်အောင် ခက်ခဲသော ဆုံးဖြတ် ချက်များ ချမှတ်ရမည်ဟု ပြောကြားရင်း အခွန်တိုးမြင့်လာပြီး အသုံးစရိတ်ကြီးလာခြင်း၏အန္တရာယ်ကို လွှတ်တော် အမတ်များထံသို့ ဟန့်က သတိပေးခဲ့သည်။

ဟန့်သည် ရေနံနှင့်သဘာဝဓာတ်ငွေ့ကုမ္ပဏီများ၏ အမြတ်အစွန်းအပေါ် နောက်ထပ်အကျုံးဝင်နိုင်မည့် အခွန်ကို ချိန်ဆနေသည်။ အစိုးရအနေဖြင့် ငွေကြေးဖောင်းပွမှုနှင့်အညီ နိုင်ငံတော်ပင်စင်လစာကို မြှင့်တင်ပေးမည်ဟု ၎င်း၏ကတိကဝတ်ကိုလည်း ချိုးဖောက်နိုင်ဖွယ်ရှိကြောင်း ဟန့်က ထောက်ပြခဲ့သည်။

ဝန်ကြီးချုပ် ထရက်စ်သည် တစ်ရက်အတွင်း ၎င်းအစိုးရကို ထောက်ခံမှုအားကောင်းစေရန် မျှော်လင့်မိသော စီးပွားရေးမဟာဗျူဟာကို စွန့်လွှတ်ခဲ့ရပြီး ၎င်း၏နိုင်ငံရေးရှင်သန်မှုအတွက် တိုက်ပွဲဝင်နေရပြီ ဖြစ်သည်။

နိုင်ငံရေးအရ ဆက်လက်ရပ်တည်ရန် ထရက်စ်က စိတ်ပိုင်းဖြတ်ထားပြီး ကွန်ဆာဗေးတစ်အမတ်များ၏ ထောက်ခံမှုကို မြှင့်တင့်ရေးမှအပ အလားအလာရှိသော အခြားရွေးချယ်စရာမရှိတော့ကြောင်း ထရက်စ်၏ နိုင်ငံရေးမဟာမိတ်များကို ရင်ဖွင့်ခဲ့သည်။

Source: The Times

CNI International News

မော်စကို၊ အောက်တိုဘာ ၁၈

ကိယက်ဗ်အစိုးရနှင့် အကျဉ်းသားလဲလှယ်ရေးအစီအစဉ်၏ တစိတ်တပိုင်းအဖြစ် ရုရှားနိုင်ငံသား စုစုပေါင်း ၁၁၀ သည် ယူကရိန်းမှ မော်စကိုသို့ ပြန်လာနိုင်ခဲ့ကြောင်း ရုရှားကာကွယ်ရေးဝန်ကြီးဌာနက အောက်တိုဘာ ၁၇ ရက် တွင် သတင်းထုတ်ပြန်ခဲ့သည်။

အဆိုပါလွတ်မြောက်လာသူများထဲတွင် ၂၀၂၂ ခုနှစ်၊ ဖေဖော်ဝါရီလကတည်းက ယူကရိန်းတွင် ဖမ်းဆီးခံထားရသည့် အရပ်ဘက်မှ သင်္ဘောသား ၇၂ ဦးလည်း ပါဝင်ကြောင်း ၎င်းသတင်းထုတ်ပြန်ချက်အရ သိရသည်။

အပြန်အလှန်အားဖြင့် မော်စကိုသည် ယူကရိန်းဘက်သို့ အမျိုးသမီးစစ်သည် ၁၀၈ ဦးကို ပြန်လွှတ်ပေးခဲ့သည်။ အကျဉ်းသားလဲလှယ်ရေးတွင် စီစဉ်ထားသည့် အမျိုးသမီးနှစ်ဦးကို ပြန်လွှတ်ပေးရန် ကမ်းလှမ်းချက်ကို ပယ်ချခဲ့ပြီး ၎င်းတို့သည် ရုရှားနိုင်ငံတွင် ဆက်လက်ဖမ်းဆီးရန် လိုအပ်ကြောင်း ကာကွယ်ရေးဝန်ကြီး၏ထုတ်ပြန်ချက်ထဲတွင် ဖော်ပြထားသည်။

နေရပ်သို့ ပြန်လာကြသော ရုရှားနိုင်ငံသားအားလုံးသည် ဆေးဝါးကုသမှုနှင့် စိတ်ပိုင်းဆိုင်ရာအကူအညီများအားလုံး ရရှိကြမည်ဟု ၎င်းထုတ်ပြန်ချက်ထဲတွင် ဆက်လက်ဖော်ပြထားသည်။

အကျဉ်းသားလဲလှယ်ရေးအစီအစဉ်မှ ပြန်လည်လွတ်မြောက်လာခဲ့သည့် ရုရှား သင်္ဘောသားများကို တွေ့ရစဉ် (ဓါတ်ပုံ-Sputnik)

အဆိုပါအကျဉ်းသားလဲလှယ်ရေးအစီအစဉ်ကို နောက်ထပ်အကြီးစားနှစ်ဘက်ဖလှယ်မှုဟူ၍ ကိယက်ဗ်အစိုးရက လည်း အတည်ပြုခဲ့သည်။ အောက်တိုဘာ ၁၇ ရက်အစောပိုင်းတွင် ဒွန်နက်စ်ပြည်သူ့သမ္မတနိုင်ငံ DPR (ရုရှား အဆိုအရ သီးခြားသမ္မတနိုင်ငံ၊ ယူကရိန်းအဆိုအရ ခွဲထွက်နယ်မြေ)၏ အကြီးအကဲဖြစ်သူ ဒင်းနစ်ပွတ်သျှလင် (Denis Pushilin) က အဆိုပါလဲလှယ်ရေးအစီအစဉ်ကို လူမှုကွန်ရက်မီဒီယာတွင် ကြေညာခဲ့သည်။

DPR နှင့် အိမ်နီးချင်း လူဟန့်စ် (Lugansk) ပြည်သူ့သမ္မတနိုင်ငံ (LPR) အပါအဝင် ရုရှားဒေသအသီးသီးမှ တပ်ဖွဲ့ဝင် ဦးရေ ၃၀ ခန့် ပါဝင်မည်ဟု ရုရှားတူဒေး (အာရ်တီ) သတင်းဌာနက ရေးသားဖော်ပြသည်။

ယူကရိန်းသို့ မော်စကို၏စစ်ဆင်ရေးစတင်ချိန် ပြီးခဲ့သည့်ဖေဖော်ဝါရီနှောင်းပိုင်း၌ ယူကရိန်းဆိပ်ကမ်းများတွင် ရပ်နားထားသော သင်္ဘောများပေါ် လိုက်ပါလာသည့် ရုရှားအရပ်သားဆယ်ဂဏန်းများကို ကိယက်ဗ်အစိုးရက ဖမ်းဆီးထိန်းသိမ်းထားခဲ့သည်။

မာရီယူပေါလ်ဆိပ်ကမ်းမြို့ကို ရုရှား သိမ်းပိုက်ပြီးနောက် ၎င်း၏တပ်ဖွဲ့ဝင်အချို့ လွတ်မြောက်လာခဲ့သော်လည်း အချို့မှာ ယူကရိန်းတွင် ဖမ်းဆီးထိန်းသိမ်းခံထားရဆဲဖြစ်သည်။

Source: အာရ်တီသတင်းဌာန

CNI International News

အစ္စလာမ္မာဘတ်၊ အောက်တိုဘာ ၁၈

ပြီးခဲ့သည့် ၆ လခန့်က ရာထူးမှ ဖယ်ရှားခံရသော ဝန်ကြီးချုပ်ဟောင်း အီမရန်ခမ်းသည် ယခု ပါကစ္စတန် ကြားဖြတ်ရွေးကောက်ပွဲကို လွှမ်းမိုးထားပြီး အသာစီးရနေခဲ့ကြောင်း အယ်လ်ဂျာဇီးယားသတင်းအရ သိရသည်။

အောက်တိုဘာ ၁၆ ရက်က ကျင်းပခဲ့သော ကြားဖြတ်ရွေးကောက်ပွဲတွင် အမျိုးသားလွှတ်တော်အတွက် လစ်လပ် နေသော အမတ်နေရာ ၈ နေရာအတွက် ယှဉ်ပြိုင်ကြခြင်း ဖြစ်သည်။

ခိုင်ဘာပက်ထန်ခဝါ (Khyber Pakhtunkhwa) နှင့် ပန်ဂျပ် (Punjab) ပြည်နယ်များတွင် ၃ နေရာစီနှင့် ကရာချိမြို့ တွင် ၂ နေရာ ယှဉ်ပြိုင်ရွေးချယ်ခဲ့ရာ အသက် ၇၀ နှစ်အရွယ်ရှိ အီမရန်ခမ်း ဦးဆောင်သည့် ပါကစ္စတန် သီဟက် အီအင်ဆက်ဖ် (PTI) ပါတီက လစ်လပ် ၇ နေရာ ဝင်ရောက်ယှဉ်ပြိုင်ခဲ့ပြီး ၆ နေရာ အနိုင်ရခဲ့သည်။

အခြားနှစ်နေရာကိုတော့ လက်ရှိအာဏာရ မဟာမိတ်အဖွဲ့၏ တစိတ်တပိုင်းဖြစ်သော ပါကစ္စတန်ပြည်သူ့ပါတီ (PPP) မှ ကိုယ်စားလှယ်လောင်းများက အနိုင်ရသွားခဲ့သည်။

ပါကစ္စတန်ဥပဒေအရ ကိုယ်စားလှယ်လောင်း တစ်ဦးသည် နေရာအများအပြားကို ဝင်ရောက်ယှဉ်ပြိုင်နိုင်သည်။ သို့သော် နေရာတစ်ခုထက်ပို၍ နိုင်နေလျှင် တစ်ခုကို ရွေးချယ်ပြီး ကျန်တစ်ခုကို စွန့်လွှတ်ရန် ဖြစ်သည်။

ပါကစ္စတန် ရွေးကောက်ပွဲ မဲပေးနေစဉ် (GETTY IMAGES)

ပြီးခဲ့သည့် ဧပြီလတွင် လွှတ်တော်အတွင်း အယုံအကြည်မရှိ အဆိုကို မဲခွဲဆုံးဖြတ်ကြပြီးနောက် အီမရန်ခမ်းနှင့် ၎င်း၏အစိုးရကို ဖယ်ရှားခဲ့ရာ PTI ပါတီမှ အမတ်အချို့၏နေရာများ လစ်လပ်သွားခဲ့သည်။

ထိုလစ်လပ်နေရာများအတွက် ယခု အောက်တိုဘာ ၁၆ ရက်၌ ကျင်းပသည့် ရွေးကောက်ပွဲ၌ ပါကစ္စတန်နိုင်ငံသား များ မဲပေးခဲ့ကြခြင်း ဖြစ်သည်။

ထိုအချိန်မှစ၍ အီမရန်ခမ်းသည် နိုင်ငံခြားနှင့်ပူးပေါင်းကြံစည်မှု၏ သားကောင်အဖြစ် အစွပ်စွဲခံခဲ့ရပြီး အမေရိကန် ကို အပြစ်တင်ရန် လက်ညှိုးထိုးခဲ့ကြသည်။ ထိုစွပ်စွဲချက်များကိုတော့ ဝါရှင်တန်အစိုးရက ငြင်းဆိုခဲ့ပြီးဖြစ်သည်။

ခမ်းသည် ၎င်း၏နိုင်ငံရေး ကျဆုံးခဲ့ရချိန်တွင် ပါကစ္စတန်၏ စစ်ရေးထူထောင်မှု အခန်းကဏ္ဍ မကြာခဏဆိုသလို ထုတ်ဖော်ပြောဆိုခဲ့ဖူးသည်။

စစ်တပ်သည် ပါကစ္စတန်နိုင်ငံ၏ အဓိကအာဏာရှင်အဖြစ် သတ်မှတ်ခံထားရပြီး ၇၅ နှစ်တာ ကာလအထိ ကြာရှည်အောင် လူဦးရေ သန်း ၂၂၀ ရှိသော နိုင်ငံကို အုပ်ချုပ်ခဲ့သည်။

၂၀၁၈ ခုနှစ်တွင် အီမရန်ခမ်း အာဏာရလာရေးအတွက် စစ်တပ်သည် အဓိက ဗိသုကာတစ်ဦးဖြစ်ကြောင်း စွပ်စွဲချက်များလည်း ပေါ်ပေါက်ခဲ့ရာ ခုခံချေပခဲ့ရသည်။

ရာထူးမှ ဖယ်ရှားခံရပြီးကတည်းက ခမ်းသည် ၎င်း၏ဝန်ကြီးချုပ်နေရာကို အစားထိုးခဲ့သည့် ပါကစ္စတန် ဒီမိုကရက်တစ်လှုပ်ရှားမှု (PDM) ကို ဆန့်ကျင်သည် လူထုစုဝေးပွဲများ ပြုလုပ်ခဲ့သည်။

Source: Aljazeera