CNI International News

ဝါရှင်တန်၊ အောက်တိုဘာ ၂၂

အမေရိကန်နိုင်ငံ၌ လာမည့်နိုဝင်ဘာလတွင် လွှတ်တော်(ကွန်ဂရက်)၏ အခွင့်အာဏာကို ရီပက်ဘလစ်ကန် အမတ်များက အလှည့်ကျ ရယူမည်ဖြစ်ပြီး ၎င်းတို့သည် ယူကရိန်းအပေါ် ထောက်ခံမှု လျှော့ချမည်ဟု ကြွေးကြော် နေကြသဖြင့် ထွက်ပေါ်လာမည့် အကျိုးရလဒ်များအား ယူကရိန်းအစိုးရအရာရှိများ၊ လွှတ်တော်အမတ်များနှင့် ကျွမ်းကျင်ပညာရှင်များအကြား စိုးရိမ်ပူပန်နေကြကြောင်း နယူးစ်ဝိခ်မီဒီယာက ရေးသားဖော်ပြသည်။

“ယူကရိန်းကို စစ်ရေးနဲ့ငွေကြေး ထောက်ပံ့မှု ဖြတ်တောက်ဖို့ အမေရိကန် ကွန်ဂရက်ထဲမှာ အထူးသဖြင့် သမ္မတ ဟောင်း ထရမ့်ကို ထောက်ခံသူတွေကြားထဲမှာ ရီပက်ဘလစ်ကန်အမတ်တွေ ပြောဆိုနေမှုဟာ ယူကရိန်းဘက်ကို အများကြီး စိုးရိမ်လာစေပါတယ်” ဟု ယူကရိန်းရေးရာကျွမ်းကျင်သူ မက်ဇင်ယာလီ (Maxim Yali) က နယူးစ်ဝိခ် သို့ ပြောသည်။

ထိုသို့ သဘောထား မှတ်ချက်မျိုးကို အမေရိကန်မီဒီယာများတွင် မကြာခဏ တွေ့ရလေ့ရှိသဖြင့် ၎င်းအနေဖြင့် စိတ်အနှောင့်အယှက် ဖြစ်မိကြောင်း ယာလီက ဆက်ပြောသည်။

ထရမ့်နဲ့ ရီပက်လလစ်ကန်ပါတီဝင်များကိုတွေ့ရစဉ်

အောက်တိုဘာ ၁၈ ရက်တွင် အောက်လွှတ်တော် ခေါင်းဆောင်တစ်ဦးဖြစ်သူ ကီဗင်မက်ကာသီက “၎င်းတို့ ရီပက်ဘလစ်ကန်ပါတီ အနေဖြင့် မကြာခင် ကျင်းပတော့မည့် ကြားဖြတ်ရွေးကောက်ပွဲတွင် အောက်လွှတ်တော် အမတ်နေရာ အများစုကို ပြန်လည်ရယူနိုင်ခဲ့လျှင် မော်စကို၏ ကျူးကျော်စစ်အတွက် ချက်လက်မှတ် အလွတ်များ (ငွေကြေးကုန်ကျခံခြင်းသဘော) ရေးပေးနေမည် မဟုတ်ကြောင်း” ပြောကြားခဲ့သည်။

စံချိန်တင် မြင့်မားနေသည့် အမေရိကန်ပြည်တွင်း ငွေကြေးဖောင်းပွမှုနှုန်းသည် မော်စကို၏ ကျူးကျော်စစ်ကို ဆန့်ကျင်ပြီး ယူကရိန်းအစိုးရအား ကူညီနေခြင်းအတွက် အမေရိကန်လူထု၏ဆန္ဒအပေါ် ပြောင်းလဲစေဖို့ ကီဗင်မက်ကာသီက အကြံပြုခဲ့သည်။

ထရမ့်ထောက်ခံသူ မာဂျိုရီ တေလာ ဂရင်းနီကိုတွေ့ရစဉ်

“လူထုက စီးပွားရေး ကျဆင်းမှုကြားမှာ နေထိုင်နေရတော့ သူတို့က ယူကရိန်းအတွက် ချက်လက်မှတ် အလွတ်တွေ ရေးပေးချင်မှာ မဟုတ်ဘူးလို့ ကျနော်ထင်ပါတယ်။ ယူကရိန်းကိစ္စ အရေးကြီးပါတယ်။ ဒါပေမယ့် တစ်ချိန် တည်းမှာပဲ သူတို့(လက်ရှိ အစိုးရနှင့်ဒီမိုကရက်တစ် အမတ်များ) လုပ်နေတာကို လူထုက လွတ်လွတ်လပ်လပ် စစ်ဆေးလို့လည်း မရဘူးဖြစ်နေတယ်” ဟု ၎င်းက မှတ်ချက်ချခဲ့သည်။

၎င်း၏ သဘောထား မှတ်ချက်သည် ရီပက်ဘလစ်ကန်ပါတီ၏ အတိအလင်း အပြောင်းအလဲ လိုလားမှုကို ထင်ဟပ် စေခဲ့သည်။

မကြာသေးမီအထိ လက်ယာစွန်းနှင့် ထရမ့်ကို ထောက်ခံကြသည့် မက်ဂေးတစ်ဇ် (Matt Gaetz) နှင့် မာဂျိုရီ တေ လာ ဂရင်းနီ (Marjorie Taylor Greene) တို့ကဲ့သို့ ရီပက်ဘလစ်ကန် အမတ်များသည် ယူကရိန်းသို့ အမေရိကန် ကူညီမှုကို ပြတ်ပြတ်သားသား ဆန့်ကျင်နေခဲ့ကြသည်။

ပြီးခဲ့သည့် မေလတွင် အောက်လွှတ်တော် အမတ်ဖြစ်ကြသည့် ရီပက်ဘလစ်ကန်ပါတီဝင် ၅၇ ဦးတို့က ယူကရိန်း သို့ ဒေါ်လာ ဘီလီယံ ၄၀ အထိ အကူအညီပေးပို့ရေး အစီအစဉ်ကို လွှတ်တော်အတွင်း ကန့်ကွက်မဲ ပေးခဲ့ကြသည်။

Source: News Week

CNI International News

အန်ကာရာ၊ အောက်တိုဘာ ၂၂

အမေရိကန် ကန့်ကွက်နေသည့်ကြားမှ ရေနံထုတ်လုပ်မှု ဖြတ်တောက်ကြောင်း OPEC+ ရေနံထုတ်လုပ်သည့် နိုင်ငံ များက စုပေါင်းကြေညာပြီးနောက် ၎င်း၏မဟာမိတ် ဆော်ဒီအာရေဗျကို အမေရိကန်အနိုင်ကျင့်ကြောင်း တူရကီက ပြောကြားခဲ့သည်ဟု အယ်လ်ဂျာဇီးယားသတင်းဌာနက ရေးသားဖော်ပြသည်။

OPEC+ သည် လာမည့် နိုဝင်ဘာလမှစတင်၍ တစ်ရက်လျှင် ရေနံစိမ်းစည် အရေအတွက် နှစ်သန်း လျှော့ပေါ့ ထုတ်လုပ်မည်ဟု မကြာသေးမီက ကြေညာခဲ့သည်။

ဈေးကွက် တင်းကျပ်နေချိန်၌ ရောင်းလိုအား လျှော့ချခြင်းဖြစ်သော်လည်း အမေရိကန်နှင့်အခြားနိုင်ငံများက တိုးမြှင့်ထုတ်လုပ်စေ၍ အထွက်တိုးဖို့ OPEC+ ကို ဖိအားပေးမှုများလည်း ရှိနေသည်။

OPEC+ ကြေညာချက် ထွက်ပေါ်လာပြီးနောက် ဆော်ဒီအာရေဗျနှင့် အမေရိကန် ဆက်ဆံရေးအတွက် အကျိုး ဆက်ရှိလာမည်ဟု သမ္မတဂျိုးဘိုင်ဒန်က ယခင်သီတင်းပတ်တွင် ပြောကြားခဲ့သည်။

“အထူးသဖြင့် မကြာသေးခင်ကပဲ နိုင်ငံတစ်နိုင်ငံကနေ ဆော်ဒီကို ခြိမ်းခြောက်တာ ကျနော်တို့ တွေ့လိုက်ရပါ တယ်။ ဒီလို အနိုင်ကျင့်တာဟာ မမှန်ပါဘူး” ဟု တူရကီနိုင်ငံခြားရေးဝန်ကြီး မက်ဗလက်ကာဗူဆိုကလူး (Mevlüt Çavuşoğlu) တူရကီနိုင်ငံတောင်ပိုင်းတွင် ကျင်းပသော သတင်းစာ ရှင်းလင်းပွဲမှာ ပြောကြားခဲ့သည်။

တူရကီနိုင်ငံခြားရေးဝန်ကြီး မက်ဗလက်ကာဗူဆိုကလူး

“ဆော်ဒီအာရေဗျ (ဒါမှမဟုတ်) တခြားနိုင်ငံတွေကို တစိတ်တပိုင်း ဖိအားပေးတဲ့သဘောနဲ့ အမေရိကန်က ဒီလို နည်းလမ်းသုံးစွဲတာဟာ မှန်ကန်တဲ့လုပ်ရပ်လို့ ကျနော်တို့ မထင်ပါဘူး” ဟု ၎င်းက ဆက်လက် ပြောကြားခဲ့သည်။

နှစ်ပေါင်း ၄၀ အတွင်း အမေရိကန်၏ အမြင့်ဆုံး ငွေကြေးဖောင်းပွမှုနှုန်း လျှော့ချနိုင်ရန်အတွက် ဆော်ဒီအာရေဗျ နှင့် OPEC နိုင်ငံများ ရေနံပိုမို ထုတ်လုပ်ပေးရေးကို အမေရိကန်က စိတ်အားထက်သန်နေခဲ့သည်။

ဆော်ဒီဦးဆောင်သော OPEC အဖွဲ့နှင့် ရုရှားဦးဆောင်သော အခြား ရေနံထုတ်လုပ်သူများ ၁၀ နိုင်ငံအဖွဲ့တို့သည် လာမည့်လတွင် ကမ္ဘာလုံးဆိုင်ရာ ရေနံထုတ်လုပ်မှုပမာဏကို လျှော့၍ ထုတ်လုပ်ရန် ဆုံးဖြတ်ခဲ့ကြပြီး ဖြစ်သည်။

အဆိုပါ ဆုံးဖြတ်ချက်ကြောင့် ယူကရိန်းသို့ ကျူးကျော်စစ်ကြောင့် ရုရှားအတွက် ကာမိစေဖို့ ရေနံဈေးနှုန်း တက် လာ စေရေးကို မြင့်မားလာစေမည်ဟု မျှော်လင့်ရသည်။

OPEC+ ၏ ဆုံးဖြတ်ချက်သည် စီးပွားရေးအရ သီးသန့်ဖြစ်ပြီး အဖွဲ့ဝင်နိုင်ငံအားလုံး တညီတညွတ်တည်း ချမှတ် ခဲ့ကြောင်း ဆော်ဒီနိုင်ငံခြားရေးဝန်ကြီး (မင်းသား) ဖိုင်ဇယ်ဘင်ဖာဟန် (Faisal bin Farhan) က ပြောကြားခဲ့ သည်။

ထို့ပြင် အနောက်အုပ်စု ကျောထောက် နောက်ခံပြုပေးနေသည့် ယူကရိန်းနိုင်ငံအပေါ် ရုရှားကျူးကျော်စစ် ဆင်နွှဲနေခြင်းနှင့်စပ်လျဉ်း၍ ရုရှားဘက်မှ မိမိတို့ မပါဝင်ကြောင်း ဆော်ဒီအာရေဗျက ငြင်းဆိုထားပြီးလည်း ဖြစ်သည်။

နိုင်ငံတကာ စည်းမျဉ်းဥပဒေများကို ထောက်ခံသည့် မူလ ရပ်တည်ချက်အတိုင်း ရှိနေကြောင်း ဆော်ဒီက တုံ့ပြန်ခဲ့သည်။

Source: Aljazeera

CNI International News

၂၀၂၂ ခုနှစ်၊ အောက်တိုဘာ ၂၂

ပါကစ္စတန်ဝန်ကြီးချုပ်ဟောင်း အီမရန်ခန်းကို နိုင်ငံရေးရာထူးအတွက် ရွေးကောက်ခံမည့် အရည်အချင်း မပြည့်မီကြောင်း ပါကစ္စတန်ရွေးကောက်ပွဲကော်မရှင်က အောက်တိုဘာ ၂၁ ရက်က ဆုံးဖြတ်ခဲ့သည်။

ပါကစ္စတန် ရဲတပ်ဖွဲ့က မျက်ရည်ယိုဗုံးများပစ်နေစဉ် (AFP)

အဆိုပါ ဆုံးဖြတ်ချက်ကို ဆန့်ကျင်သည့် ဆန္ဒပြပွဲတစ်ခုကို အီမရန်ခန်းအား ထောက်ခံသူများနှင့် Pakistan Tehreek-e-Insaf (PTI) က မြို့တော် အစ္စလာမ်ဘတ်မှာ ကျင်းပခဲ့သည်။

ထိုဆန္ဒပြပွဲကို ပါကစ္စတန် ရဲတပ်ဖွဲ့များက မျက်ရည်ယိုဗုံးများ ပစ်၍ လူစုလူဝေးကို ဖြိုခွင်းခဲ့သည်။

CNI International News

မင့်ခ်၊ အောက်တိုဘာ ၂၂

မိမိနိုင်ငံကို အခြားနိုင်ငံများ လာရောက် မတိုက်ခိုက်လျှင် ဘယ်လာရုစ်နှင့်ပတ်သက်သည့် စစ်ပွဲဖြစ်လာမည် မဟုတ်ဟု သမ္မတ အလက်ဇန္ဒားလူကာရှန်ကာကိုက အောက်တိုဘာ ၂၁ ရက်တွင် သတင်းထောက်များကို ပြောကြားခဲ့ကြောင်း ရုရှားအခြေစိုက် အာရ်တီသတင်းဌာနက ရေးသားဖော်ပြသည်။

ယူကရိန်းစစ်ပွဲ၌ ဘယ်လာရုစ်တပ်များ ရုရှားဘက်မှ ပါဝင်နိုင်ကြောင်း စွပ်စွဲမှုအကြား ယခုကဲ့သို့ လူကာရှန်ကိုက သဘောထားမှတ်ချက်ပေးခဲ့ခြင်းဖြစ်သည်။

“ဒီလိုမျိုး ပြောသံဆိုသံတွေကို ဂရုမစိုက်ပါနဲ့” ဟု လူကာရှန်ကို၏ ပြောကြားချက်ကို ဘယ်လာရုစ်အစိုးရပိုင် မီဒီယာဖြစ်သော ဘယ်လ်တာ (Belta) က ကိုးကားဖော်ပြခဲ့သည်။ ဘယ်လာရုစ်နိုင်ငံ၊ အနောက်ပိုင်း ဘရက်စ် ဒေသရှိ စစ်ရေးပြလေ့ကျင့်ရေးကွင်းသို့ သွားရောက်စဉ်က ၎င်းက ထိုသို့ ပြောကြားခဲ့ခြင်းဖြစ်သည်။

“ဒီနေ့ဆိုရင် ကျနော်တို့က ဘယ်ကိုသွားတာမဟုတ်ဘူး။ လောလောဆယ် စစ်ဆိုတာ ကျနော်တို့မှာ မရှိဘူး။ တိုက်ဖို့လည်း မလိုအပ်ဘူး” ဟု ၎င်းက ဆက်လက်ပြောကြားခဲ့သည်။

လူကာရှန်ကိုက စိတ်အေးအေးထားကြရန်နှင့် မိမိတို့ဆောင်ရွက်နေကျ လုပ်ငန်းဆောင်တာများ ဆက်လက် ဆောင်ရွက်ကြရန် နိုင်ငံသူ၊ နိုင်ငံသားများကို တိုက်တွန်းခဲ့သည်။

ရုရှားနှင့် ဘယ်လာရုစ်တပ်များ ၂၀၁၉ ခုနှစ်တွင် ဘယ်လာရုစ်နိုင်ငံ Muchavec အနီး၌ စစ်ရေးလေ့ကျင့်မှုများ ပြုလုပ်ခဲ့ကြစဉ်(ဓါတ်ပုံ-Getty)

မဝေးလှသည့်အနာဂတ်တွင် တတိယကမ္ဘာစစ် ဖြစ်ပွားနိုင်ခြေ ထင်ကြေးများကိုလည်း ၎င်းက ရှုတ်ချခဲ့သည်။ ကမ္ဘာစစ်ကဲ့သို့ ပဋိပက္ခသည် လူသားအားလုံး ပျက်သုဉ်းနိုင်သည့် အလားအလာကို ဆိုလိုနေသည်။

သို့သော် ကမ္ဘာကြီးသည် ထိုသို့အလားအလာ ယခင်ကထက် ပိုမိုနီးကပ်လာသည်ဟု ၎င်းက သတိပေးခဲ့သည်။

ယခင်သီတင်းပတ်၌ လူကာရှန်ကိုသည် ရုရှား-ဘယ်လာရုစ်နှစ်နိုင်ငံနယ်စပ်တွင် ပူးတွဲတပ်များ ဖြန့်ကြက်ချ ထားကြောင်း ကြေညာခဲ့သည်။ တပ်များ အရွှေ့အပြောင်းလုပ်ရခြင်း၏ အကြောင်းရင်းအဖြစ် နယ်နမိတ်ကိစ္စ တင်းမာမှုတိုးလာသည်ဟု ၎င်းက ရည်ညွှန်းပြောကြားခဲ့သည်။ ဘယ်လာရုစ်တပ်များအကြား အမာခံတပ်သားများ ပါဝင်ကြောင်း ၎င်းက ဆက်လက်ပြောကြားခဲ့သည်။

အောက်တိုဘာ ၁၇ ရက်တွင် ဘယ်လာရုစ်ကာကွယ်ရေးဝန်ကြီး၏ လက်ထောက်တစ်ဦးဖြစ်သူ ဗယ်လာရီရီဗန်ကို (Valery Revenko) က ရုရှားစစ်တပ်ထံမှ တင့်ကားအစီးရေ ၁၇၀၊ သံချပ်ကာ ကားအစီးရေ ၂၀၀ နှင့် အမြောက် အလက် ၁၀၀ တို့ကို ၎င်းတို့ပြည်တွင်း၌ ဖြန့်ကြက်ချထားမည်ဟု တွစ်တာလူမှုကွန်ရက်တွင် ရေးသားခဲ့သည်။

“တွေ့ဆုံဆွေးနွေးမှု ကင်းမဲ့နေတဲ့ကြားက နေတိုးတပ်တွေ ကျနော်တို့နိုင်ငံရဲ့နယ်နမိတ်အနားမှာဖြန့်ပြီး မဟာ မိတ်တပ်အဖြစ် ထူထောင်လာပါတယ်” ဟု ၎င်းက ရှင်းပြခဲ့သည်။

Source: အာရ်တီသတင်းဌာန

CNI International News

ကွာလာလမ်ပူ၊ အောက်တိုဘာ ၂၁

မလေးရှားနိုင်ငံတွင် ယခုနှစ် မုတ်သုံရာသီ အကုန်ပိုင်း မိုးသည်းထန်စွာ ရွာသွန်း၍ ရေကြီးရေလျှံသဖြင့် မဲဆန္ဒရှင် ပြည်သူများ အခက်အခဲ တွေ့မည်ကို စိုးရိမ်နေသည့်ကြားမှ အမျိုးသားရွေးကောက်ပွဲကို နိုဝင်ဘာ ၁၉ ရက်တွင် ကျင်းပမည်ဟု ရွေးကောက်ပွဲကော်မရှင်က အောက်တိုဘာ ၂၀ ရက်တွင် ကြေညာခဲ့ကြောင်း အေပီသတင်းအရ သိရသည်။

မုတ်သုံရာသီ အကုန်ပိုင်းတွင် ရွေးကောက်ပွဲနှင့်ပတ်သက်၍ အစိုးရမဟာမိတ်များအပြင် အတိုက်အခံများ၏ ဆန့်ကျင် ကန့်ကွက်မှုများကို မလေးရှားဝန်ကြီးချုပ် အစ္စမေးဆာဘရီယာကွပ် လျစ်လျူရှုထားခဲ့သည်။

၎င်းသည် အောက်တိုဘာ ၁၀ ရက်တွင် လွှတ်တော်ကို ဖျက်သိမ်းခဲ့သည်။

လွှတ်တော်၏ သက်တမ်းသည် လာမည့် ၂၀၂၃ ခုနှစ်၊ ဇူလိုင်လကျမှ ကုန်ဆုံးမည်ဖြစ်သော်လည်း မလေးရှား အမျိုးသားညီညွတ်ရေးအဖွဲ့(UMNO) ပါတီသည် အာဏာရညွန့်ပေါင်း အဖွဲ့ထဲတွင် မဟာမိတ်များနှင့် မသင့်မတင့် ဖြစ်နေပြီး ရွေးကောက်ပွဲ အဆောတလျင် ကျင်းပရန် စိတ်အားထက်သန်နေသည်။

လာမည့်နှစ် စီးပွားရေးမျှော်မှန်းချက် အားပျော့လာမည်ဟု ယူဆနေချိန်၌ UMNO သည် မလေးရှားနိုင်ငံသားများ၏ ထောက်ခံမှု ပြန်လည်ရရှိရန်နှင့် အတိုက်အခံများကို ပြန်လည်စုစည်းရန် အင်အားဖြည့်တင်း လျက်ရှိသည်။

မလေးရှား ရွေးကောက်ပွဲကော်မရှင် ဥက္ကဋ္ဌ အဗ္ဗဒူဂါနီဆဲလက် (AP)

ရွေးကောက်ပွဲဝင်ကြမည့် ကိုယ်စားလှယ်လောင်းများ အမည်စာရင်း တင်သွင်းရမည့် ရက်မှာ နိုဝင်ဘာ ၅ ရက် ဖြစ်ပြီး တရားဝင် မဲဆွယ်စည်းရုံးမှုများကို ရက်သတ္တနှစ်ပတ်ကြာ သတ်မှတ်ထားသည်ဟု ရွေးကောက်ပွဲကော်မရှင် ဥက္ကဋ္ဌ အဗ္ဗဒူဂါနီဆဲလက် (Abdul Ghani Salleh) က ပြောကြားခဲ့သည်။
မဲပေးကြမည့် မဲဆန္ဒရှင်ဦးရေမှာ ၂၁ ဒသမ ၁၇ သန်းဖြစ်ကြောင်း ၎င်းက ဆက်လက် ပြောကြားခဲ့သည်။

လာမည့်နိုဝင်ဘာ ၁၉ ရက်တွင် ပြည်နယ် ၃ ခုရှိ မဲရုံများတွင် စတင်မဲပေးနိုင်မည်ဟု ၎င်းက ရှင်းပြသည်။

မလေးရှားနိုင်ငံရှိ ပြည်နယ် ၁၃ ခုအနက် ၄ ခုတွင် ကြိုတင်မဲပေးမှုများ အစောပိုင်း ရှိနိုင်ကြောင်း သိရသည်။

၁၉၅၇ ခုနှစ်တွင် မလေးရှားသည် ဗြိတိန်ထံမှ လွတ်လပ်ရေးရပြီးနောက် UMNO ပါတီက အမျိုးသားတပ်ဦး ညွန့်ပေါင်းအဖြစ် တိုင်းပြည်ကို တောက်လျှောက် ဦးဆောင်ခဲ့သော်လည်း ၂၀၁၈ ခုနှစ် ရွေးကောက်ပွဲတွင် ဒေါ်လာ ဘီလီယံနှင့်ချီ၍ ငွေကြေး အရှုပ်တော်ပုံကြောင့် အဆိုပါညွန့်ပေါင်းအဖွဲ့ ပြုတ်ကျသွားခဲ့သည်။
ထို့နောက် ဝန်ကြီးချုပ်ဟောင်း နာဂျစ်ရာဇက်ကို အကျင့်ပျက် ခြစားမှု စွဲချက်ဖြင့် ထောင်ဒဏ် ၁၂ နှစ် စီရင်ခဲ့သည်။

UMNO မှ လက်ရှိသမ္မတ အာမက်ဇာဟစ်ဟာမီဒီသည်လည်း ယခုအခါ အကျင့်ပျက်ခြစားမှုဖြင့် တရားရင်ဆိုင် နေရသည်။

CNI International News

ဝါရှင်တန်၊ အောက်တိုဘာ ၂၁

ယူကရိန်းဓာတ်အားပေးစက်ရုံများနှင့် အခြားအရေးပါသော အခြေခံ အဆောက်အအုံများကို ရုရှားမောင်းသူမဲ့ လေယာဉ်(ဒရုန်း)ဖြင့် တိုက်ခိုက်ခြင်းအတွက် ခရိုင်းမီးယားရှိ အီရန်တပ်များ မြေပြင်၌ တိုက်ရိုက် ပါဝင်ပတ်သက် နေကြောင်း အမေရိကန်သမ္မတ၏ အိမ်ဖြူတော်က အောက်တိုဘာ ၂၀ ရက်တွင် ပြောကြားခဲ့သည်။

အီရန်သည် ရုရှားကို ထဲထဲဝင်ဝင် ကူညီနေသည့် သက်သေ အထောက်အထားများ ခိုင်လုံစွာ ရှိကြောင်း အိမ်ဖြူတော်က ဆက်လက် ပြောကြားခဲ့သည်။

ခရိုင်းမီးယား၌ အီရန်လုပ် မောင်းသူမဲ့ လေယာဉ် (ဒရုန်းများ) ပစ်လွှတ်ရာတွင် ရုရှားတပ်များကို ကူညီဖို့ အီရန် စစ်မှုထမ်းများ စေလွှတ်ခဲ့ကြောင်း၊ ထို လုပ်ရပ်သည် ၂၀၁၄ ခုနှစ် နိုင်ငံတကာဥပဒေကို ဆန့်ကျင်ခြင်းဖြစ်ကြောင်း အိမ်ဖြူတော်မှ အမျိုးသားလုံခြုံ‌ရေးကောင်စီ ပြောခွင့်ရသူ ဂျွန်ကာဘီ (John Kirby) က ပြောကြားခဲ့သည်။

ဒရုန်းများ သုံးစွဲရာတွင် ရုရှားတပ်များအား အကူအညီပေးရန် အီရန်တော်လှန်ရေး အစောင့်တပ်၏ တပ်ခွဲတစ်ခွဲမှ စစ်မှုထမ်းများကို စေလွှတ်ခဲ့ကြောင်း မိမိတို့ သိရှိရသည်ဟု ဗြိတိန်အစိုးရကလည်း ပြောကြားခဲ့သည်။

ယူကရိန်းကို တိုက်ခိုက်ခဲ့တဲ့ အီရန်ဒရုန်း (AP)

အီရန်လုပ် ဒရုန်းများ အကူအညီဖြင့် ယူကရိန်း အရပ်သား ပစ်မှတ်များကို ရုရှားတိုက်ခိုက်နေကြောင့် ဘိုင်ဒန် သည် အီရန်အပေါ် နိုင်ငံတကာမှ ဖိအားပေးနိုင်ရန် ကြိုးပမ်းနေသည်။ ထိုအချိန်မှာပဲ အထက်ပါအတိုင်း အမေရိကန်ထောက်လှမ်းရေး၏ တွေ့ရှိချက်များ ထွက်ပေါ်လာခဲ့သည်။

မကြာသေးမီ ရက်များအတွင်း ရုရှားသည် ယူကရိန်း၏ စစ်ဘက်ဆိုင်ရာ မဟုတ်သော ပစ်မှတ်များကို တိုက်ခိုက် ရာတွင် အီရန်မှ ပို့ပေးသည့် ဒရုန်းများအပြင် ကာလီဘာ (Kalibr) နှင့် အစ္စကန်ဒါ (Iskander) ခရုဇ်ဒုံးကျည်များပါ တိုးမြှင့် သုံးစွဲလာခဲ့သည်။

ရုရှားတပ်များသည် ပြီးခဲ့သည့် အောက်တိုဘာ ၁၀ ရက်ကတည်းက ယူကရိန်းဓာတ်အားပေး စက်ရုံများ၏ ၃၀ ရာခိုင်နှုန်းကို တိုက်ခိုက်ဖျက်ဆီးခဲ့ကြောင်း သမ္မတ ဗိုလိုဒီမီယာ ဇာလန်းစကီးက ယခုသီတင်းပတ်တွင် ပြောကြား ခဲ့သည်။

“ကျနော်တို့ ရရှိထားတဲ့ သတင်းအချက်အလက်တွေအရ အီရန်တွေဟာ ခရိုင်းမီးယားက စစ်သင်တန်း နည်းပြတွေ နဲ့ နည်းပညာပံ့ပိုးမှု လုပ်ခဲ့ပေမယ့် ပစ်လွှတ်ရေးကိုတော့ ရုရှားတွေ လုပ်နေတယ်လို့ သိရပါတယ်” ဟု ဂျွန်ကာဘီ က သတင်းထောက်များကို ရှင်းပြခဲ့သည်။

ဘိုင်ဒန်အစိုးရသည် အီရန်အပေါ် ပိတ်ဆို့အရေးယူမှု အသစ်များ ချမှတ်ရန် ကြိုးပမ်းနေပြီး ယင်းကဲ့သို့ ရုရှားထံသို့ အီရန်ရောင်းချရန် ခက်ခဲစေမည့် နည်းလမ်းများ ရှာဖွေသွားမည်ဟု အိမ်ဖြူတော်က ပြောကြားခဲ့သည်။

Source: AP

CNI International News

လန်ဒန်၊ အောက်တိုဘာ ၂၁

စီးပွားရေး မူဝါဒများကြောင့် သမိုင်းတလျှောက် အရှုပ်အထွေးဆုံး အခြေအနေတစ်ရပ်ကို ရင်ဆိုင်ရပြီးနောက် ဗြိတိန်ဝန်ကြီးချုပ် လစ်ဇ်ထရက်စ်သည် ရာထူးမှ နုတ်ထွက်သွားခဲ့ရပြီ ဖြစ်သော်လည်း ဗြိတိန်၏ နိုင်ငံရေး၊ စီးပွား ရေး မတည်ငြိမ်သေးကြောင်း အေပီသတင်းက ရေးသားထားသည်။

သူမသည် ငွေကြေးဈေးကွက် ဂယက်ရိုက်ခတ်မှုနှင့် ၎င်း၏ပါတီအတွင်း ဆန့်ကျင်သူများကို ကြုံတွေ့ခဲ့ရသည်။

ဝန်ကြီးချုပ်ရာထူးကို ၄၅ ရက်သာ ရခဲ့သူ ထရက်စ်သည် နှစ်ပေါင်းများစွာအတွင်း ဖြုတ်ချခံရသော တတိယ မြောက် ကွန်ဆာဗေးတစ် ဝန်ကြီးချုပ် ဖြစ်ခဲ့သလို ဗြိတိန်သမိုင်းတွင် သက်တမ်းအတိုဆုံး ခေါင်းဆောင်တစ်ဦး အဖြစ်လည်း စာရင်းဝင်သွားခဲ့သည်။

၎င်း၏ နုတ်ထွက်လွှာသည် ဗြိတိန် မတည်မငြိမ် ဖြစ်နေမှုကို ပိုမိုကြာရှည်စေခဲ့သည်။

ဗြိတိန်ဝန်ကြီးချုပ် ရာထူး ယှဉ်ပြိုင်မယ့် အောက်လွှတ်တော်ခေါင်းဆောင် ပဲန်နီမောဒန့် (GETTY IMAGES)

ဗြိတိန်သည် ဥရောပသမဂ္ဂ (EU) ကို ကျောခိုင်း ထွက်ခွာပြီးကတည်းက လူနေမှုစရိတ် အကျပ်အတည်းနှင့် စတင် ရင်ဆိုင်လာခဲ့ရပြီး စီးပွားရေး ကျဆင်းမှုနှင့်အတူ လစ်ဇ်ထရက်စ်၏ ဦးဆောင်မှု အခန်းကဏ္ဍမှာလည်း ယုတ်လျော့ သွားခဲ့သည်။

“ကွန်ဆာဗေးတစ်ပါတီက ရွေးကောက်တင်မြှောက်ပြီး အပ်နှင်းထားတဲ့ လုပ်ပိုင်ခွင့်ကို ကျမ မဆောင်ရွက်နိုင် တော့ဘူး” ဟု အသက် ၄၇ နှစ်ရှိ ထရက်စ်က အမှတ် ၁၀၊ ဒေါင်းနင်းလမ်း ရုံးခန်းအပြင်ဘက်တွင် ပြောကြား ခဲ့သည်။

ယခုအခါ ငွေကြေး ဈေးကွက်များအပေါ် သက်ပြင်းချနိုင်သော်လည်း သဘောထား ကွဲလွဲနေသည့် အာဏာရပါတီ အတွင်း နောက်ထပ် ခေါင်းဆောင်တစ်ဦးကို အလျင်အမြန် ရှာဖွေရမည်ဖြစ်သည်။

အာဏာရ ကွန်ဆာဗေးတစ်ပါတီသည် လာမည့် သီတင်းပတ် အကုန်ပိုင်း၌ ကမ္ဘာ့စီးပွားရေး အကြီးဆုံး နိုင်ငံ တစ်နိုင်ငံဖြစ်သည့် ဗြိတိန်အတွက် ခေါင်းဆောင်သစ်တစ်ဦး အစားထိုး ရွေးချယ်ပြီးချိန်အထိ လက်ရှိ ဝန်ကြီးချုပ် ရာထူးကို ဆက်လက် ထမ်းဆောင်သွားမည်ဖြစ်ကြောင်း ထရက်စ်က ပြောကြားခဲ့သည်။

ဗြိတိန်နိုင်ငံသားများကိုတွေ့ရစဉ် (GETTY IMAGES)

ပါတီခေါင်းဆောင်သစ်အတွက် ဖြစ်နိုင်ခြေရှိသော ပြိုင်ဘက်များ စာရင်းတွင် ယခင်ယှဉ်ပြိုင်မှု၌ ထရက်စ်ကို ရှုံးနိမ့်ခဲ့သော ဘဏ္ဍာရေးအကြီးအကဲဟောင်း ရီရှီဆန်းနက်၊ အောက်လွှတ်တော်ခေါင်းဆောင် ပဲန်နီမောဒန့်၊ ကာကွယ်ရေးအတွင်းဝန် ဘန်ဝေါလက်နှင့် ပြီးခဲ့သည့် ဇူလိုင်လတွင် ကျင့်ဝတ်ရေးရာ အရှုပ်တော်ပုံကြောင့် ဖြုတ်ချခံခဲ့ရသည့် ဝန်ကြီးချုပ်ဟောင်း ဘောရစ်ဂျွန်ဆင်တို့ တန်းစီပြီး ရှိနေကြသည်။

ထရက်စ်သည် အခွန်ကိစ္စနှင့် မအောင်မြင်ခဲ့သော စီးပွားရေးမူဝါဒများကြောင့် ငွေကြေးဖောင်းပွမှုနှင့် ဖွံ့ဖြိုးမှု အားနည်းခြင်း ဖြစ်ပေါ်စေခဲ့ကြောင်း ဝေဖန်အပြစ် တင်ခံခဲ့ရသည်။

သူမ တာဝန်ယူစဉ်အတွင်း ကပ်ရောဂါဒဏ်ကြောင့် ရုန်းကန်နေရသော စီးပွားရေး လုပ်ငန်းများအတွက် ထိခိုက် စေခဲ့သည်ဟု အေပီသတင်းတွင် ဖော်ပြထားသည်။

Source: AP

CNI International News
၂၀၂၂ ခုနှစ်၊ အောက်တိုဘာ ၂၀

မစ္စလစ်ဇ်ထရပ်စ်သည် ဗြိတိန်ဝန်ကြီးချုပ် ရာထူးကနေ နုတ်ထွက်ကြောင်း ယနေ့ (အောက်တိုဘာ ၂၀ ရက်)တွင် ဒေါင်းနင်းလမ်းနေအိမ်ရှေ့သို့ ထွက်လာပြီး ကြေညာသွားခဲ့သည်။

မစ္စလစ်ဇ်ထရပ်စ်သည် စက်တင်ဘာလက ဘောရစ်ဂျွန်ဆင်၏ နေရာမှာ တာဝန်ထမ်းဆောင်ရန်အတွက် ဝန်ကြီးချုပ်အဖြစ် ရွေးချယ်ခံခဲ့ရခြင်းဖြစ်သည်။

ထို့နောက် ၄၅ ရက်တာ ဝန်ကြီးချုပ် တာဝန်ကို ထမ်းဆောင်ခဲ့ပြီးနောက် ကွန်ဆာဗေးတစ်ပါတီ အမတ်များက ဝန်ကြီးချုပ် ရာထူးကနေ နုတ်ထွက်ရန် တောင်းဆိုခဲ့ကြခြင်းကြောင့် ယနေ့မှာ နုတ်ထွက် ကြောင်း ကြေညာသွားခဲ့သည်။

သို့သော် သူမ၏ နေရာကို တာဝန်ယူမည့် ဝန်ကြီးချုပ် အသစ် မရွေးချယ်နိုင်သေးခင်အထိ ဆက်လက် တာဝန်ထမ်းဆောင်နေမည်ဖြစ်သည်။

CNI International News

မော်စကို၊ အောက်တိုဘာ ၂၀

ရုရှားပိုင်ဆိုင်သည်ဟု အဆိုရှိသည့် နယ်မြေဒေသ ၄ ခု၌ စစ်အုပ်ချုပ်ရေးဥပဒေ (မာရှယ်လော) အမိန့် ထုတ်ပြန် ကြေညာပြီးဖြစ်ကြောင်း သမ္မတ ဗလာဒီမာပူတင်က ရုရှားလုံခြုံရေးကောင်စီသို့ အောက်တိုဘာ ၁၉ ရက်တွင် ပြောကြားခဲ့သည်။

သမ္မတ၏ အမိန့်အရ ဒွန်နက်စ်နှင့် လူဟန့်စ် ပြည်သူ့သမ္မတနိုင်ငံများနှင့် ဇာပိုရေဇီးယား (Zaporozhye) ၊ ခါဆွန် (Kherson) စသည့် ဒေသများတွင် အောက်တိုဘာ ၂၀ ရက်မှစ၍ မာရှယ်လော စတင်ကျင့်သုံးနေပြီဖြစ်ကြောင်း ရုရှားနိုင်ငံအခြေစိုက် တာ့စ်သတင်းဌာနက ရေးသားဖော်ပြသည်။

ထို့နောက် ယူကရိန်းနှင့် နယ်နိမိတ်ချင်း ထိစပ်နေသော ရုရှား၏ဒေသများမှ အလယ်အလတ် တုံ့ပြန်မှုအဆင့်ကို စောင့်ကြည့်သွားမည်ဖြစ်သည်။

 ဒွန်နက်စ်၊ လူဟန့်စ်၊ ခါဆွန်၊ ဇာပိုရေဇီးယား တို့ကိုတွေ့ပြသထားစဉ် (GETTY IMAGES)

လုံခြုံရေးကောင်စီသို့ ပူတင်ပြောကြားခဲ့သော မိန့်ခွန်းနှင့် အဆိုပါ ဒေသများအတွက် လတ်တလော ချမှတ်ထား သော ဥပဒေနှင့်အမိန့်များကို တာ့စ်သတင်းတွင် အနှစ်ချုပ် ဖော်ပြထားသည်။

“မော်စကို ဦးစီးကျင်းပခဲ့သော လူထုဆန္ဒခံယူပွဲတွင် ဒွန်နက်စ်နှင့် လူဟန့်ပြည်သူ့သမ္မတ နှစ်နိုင်ငံ၊ ဇာပိုရေဇီးယား၊ ခါဆွန်ဒေသများတွင် နေထိုင်သူများက ၎င်းတို့၏ဆန္ဒကို ပြတ်သားစွာ ထုတ်ဖော်ခဲ့ကြကြောင်း၊ ၎င်းတို့က ရုရှား နိုင်ငံနှင့် အတူပူးပေါင်း နေထိုင်လိုကြသည်ဟု ထုတ်ဖော်ခဲ့ကြကြောင်း” တာ့စ်သတင်းအရ သိရသည်။

ထို့ပြင် နာဇီလက်သစ်များသည် အကြမ်းဖက် နည်းလမ်းများကို ပြောင်ပြောင်တင်းတင်း အသုံးချ၍ အသက်ကယ် ထောက်ပံ့ရေး အဆောက်အအုံများကို ဖြိုခွင်းခဲ့ကြကြောင်း ပူတင်၏ ပြောကြားချက်တွင် ဖော်ပြထားသည်။

အဆိုပါ မာရှယ်လောအမိန့်ကို ပူတင်က လက်မှတ်ရေးထိုးပေးခဲ့ပြီး အတည်ပြုချက်ရယူရန် ရုရှားဖက်ဒရေး ကောင်စီ ထံသို့ ချက်ချင်းပေးပို့မည် ဖြစ်သည်။ တဆက်တည်းတွင် ဆုံးဖြတ်ချက် ချမှတ်ရန်အတွက် ရုရှားနိုင်ငံ၏ ဒူးမားလွှတ်ထံသို့ အကြောင်းကြား ပေးပို့ရမည်ဟု သိရသည်။

 ပူတင်နဲ့ ရုရှားလိုလာသော ဒေသလေးခုမှ ခေါင်းဆောင်များကိုတွေ့ရစဉ်

စစ်အုပ်ချုပ်ရေး စတင်ကျင့်သုံးသော နယ်မြေများအလိုက် အရေးယူ ဆောင်ရွက်မှုများ မကြာမီ လာမည်ဖြစ်၍ နယ်မြေအသီးသီးရှိ အာဏာပိုင်များအနေဖြင့် ၎င်းတို့၏ အဆိုပြုချက်များကို ၃ ရက် နောက်ဆုံးထား၍ တင်ပြသွား ရမည်ဖြစ်သည်။

ယနေ့ ရုရှားနိုင်ငံသည် အဆင့်တိုင်းမှ အာဏာပိုင်များ၊ အထူးသဖြင့် နယ်မြေဆိုင်ရာ အကြီးအကဲများ ကိုယ်တိုင် အာရုံစူးစိုက်၍ ဆောင်ရွက်သွားကြရန် လိုအပ်ကြောင်း သမ္မတက မှတ်ချက်ချခဲ့သည်။

“ကျနော်တို့ အားသွန်စိုက်၊ မှန်မှန်ကန်ကန်နဲ့ ဟန်ချက်ညီညီ လုပ်သွားမှာဖြစ်တယ်။ အရေးကြီးဆုံးနဲ့ ဦးစားပေး နယ်မြေတွေမှာ ဖြည့်စွက် ညှိနှိုင်းမှုများနှင့် ကြိုးစား အားထုတ်မှုတွေကို အာရုံစိုက် ဆောင်ရွက်ကြဖို့က လိုအပ် ချက် တစ်ခုဖြစ်ပါတယ်” ဟု ဗလာဒီမာပူတင်က ပြောကြားခဲ့သည်။

Source: တာ့စ်သတင်းဌာန