CNI International News

အေသင်၊ မတ်လ ၉

နိုင်ငံ၏အဆိုးရွားဆုံးသော ရထားလမ်းမတော်တဆမှုအတွင်း လူ ၅၇ ဦးသေဆုံးခဲ့ရမှုနှင့်ပတ်သက်၍ တာဝန်ယူမှု ရှိစေရေး တောင်းဆိုရန် ဂရိမြို့တော် အေသင် (Athens) နှင့် မြို့ကြီးများတွင် လူပေါင်းသောင်းနှင့်ချီ စုဝေးဆန္ဒ ပြခဲ့သည်ဟု အယ်လ်ဂျာဇီးယား သတင်းတွင် ဖော်ပြသည်။

ဗုဒ္ဓဟူးနေ့တွင် မြို့တော်အေသင်၌ လူ ၄၀၀၀၀(လေးသောင်း)နီးပါး ချီတက်ဆန္ဒပြခဲ့ကြပြီး အလုပ်သမားသမဂ္ဂများ နှင့် ကျောင်းသားအဖွဲ့အစည်းများက ဦးဆောင်ခဲ့သည်။ သပိတ်မှောက်မှုများကြောင့် ကျွန်းများသို့ ဖယ်ရီခရီးစဉ် များနှင့် နိုင်ငံပိုင်သယ်ယူပို့ဆောင်ရေးလုပ်ငန်းများလည်း ရပ်တန့်သွားခဲ့သည်။

မြို့လယ်ခေါင်မှ လွှတ်တော်ချီတက် ဆန္ဒပြသူများက မတော်တဆမှု မဟုတ်ကြောင်း၊ ရာဇဝတ်မှုဖြစ်ကြောင်း အော်ဟစ်ချီတက်ခဲ့ကြပြီး နိုင်ငံ၏ဒုတိယအကြီးဆုံး သက်ဆာလိုနီကိုင် (Thessaloniki) မြို့တွင်လည်း လူ ၂၀၀၀၀(နှစ်သောင်း)ကျော် ဆန္ဒပြခဲ့ကြသည်ဟု သိရသည်။ သက်ဆာလိုနီကိုင် ဆန္ဒပြပွဲများတွင် ရဲတပ်ဖွဲ့နှင့် ဆန္ဒပြလူငယ်များအကြား ပဋိပက္ခများ ဖြစ်ပွားခဲ့သည်။

ပြီးခဲ့သည့် သီတင်းပတ်က ရထားနှစ်စင်း ခေါင်းချင်းဆိုင်တိုက်မှုတွင် မြို့၏တက္ကသိုလ်မှ ကျောင်းသား ၁၂ ဦးလည်း သေဆုံးခဲ့ရသည်။ နိုင်ငံတောင်ပိုင်း ပါထရတ်စ် (Patras) မြို့ ဆန္ဒပြပွဲများတွင် ရဲတပ်ဖွဲ့က မျက်ရည်ယိုဗုံးများ သုံး ကာ လူစုခွဲခဲ့ပြီး မတော်တဆမှုဖြစ်ပွားရာနေရာအနီးရှိ လာရစ်ဆာ (Larissa) မြို့တွင် ကျောင်းသားများက အနက် ရောင် ပူဖောင်းများ ကိုင်ဆောင်ကာ “အသက်များအပေါ် အမြတ်မထုတ်ပါနှင့်”ဟု အော်ဟစ်ချီတက်ခဲ့ကြသည်။

ဂရိနိုင်ငံ လာရစ်စာမြို့အနီးတွင် ဖေဖော်ဝါရီလ ၂၈ ရက်နေ့က ရထားနှစ်စင်း တိုက်မိပြီး လူ ၅၇ ဦး သေဆုံးခဲ့စဉ်(ဓါတ်ပုံ-ရိုက်တာ)

ဖေဖော်ဝါရီလ ၂၈ ရက်တွင် ဖြစ်ပွားခဲ့သော ရထားမတော်တဆမှုသည် ဟောင်းနွမ်းနေပြီဖြစ်သော ဂရိနိုင်ငံ၏ မီးရထားလမ်းစနစ်များအပေါ် ပြည်သူများ၏ အမျက်ဒေါသကို ကြီးထွားလာစေခဲ့သည်။ လူများစွာ သေဆုံးခဲ့ရ သည့် မတော်တဆမှုသည် ဂရိနိုင်ငံ၏ ကာလရှည်ကြွေးမြီပြဿနာ၏အရင်းခံ နှစ်ပေါင်းများစွာ လျစ်လျူရှုမှု၊ ရင်းနှီးမြှုပ်နှံမှုနည်းပါးမှု၊ ဝန်ထမ်းအင်အားနည်းပါးမှုတို့ကို အပြစ်တင်ရမည်ဟု သပိတ်မှောက်ဝန်ထမ်းများက ပြောသည်။

မတော်တဆမှုဖြစ်စဉ်သည် လူပေါင်း ၃၅၀ ကို တင်ဆောင်လာသည့် ရထားသည် ကုန်တင်ရထားတစ်စင်းနှင့် တိုက်မိခဲ့ခြင်းဖြစ်သည်။ လူစီးရထားသည် ပိတ်ရက်ရှည်အတွက် အေသင်မှ သက်ဆာလိုနီကိုင်မြို့သို့ သွားမည့် တက္ကသိုလ်ကျောင်းသားများ လိုက်ပါလာသည့် ရထားလည်းဖြစ်သည်။

အဆိုပါဖြစ်ရပ်ကြောင့် ဂရိတစ်နိုင်ငံလုံးတွင် ဆန္ဒပြပွဲများ ဖြစ်ပွားခဲ့ပြီး တနင်္ဂနွေနေ့တွင် လူပေါင်း ၁၀၀၀၀ (တစ်သောင်း)ကျော်က မြို့တော် အေသင်တွင် စုဝေးကာ အနက်ရောင် ပူဖောင်း ရာပေါင်းများစွာကို ကောင်းကင်သို့ လွှတ်တင်ခဲ့ကြသည်။

မီးရထားဝန်ထမ်းများ၏ သပိတ်မှောက်မှုကြောင့် ရထားလမ်းကြောင်းများ ရပ်တန့်သွားခဲ့ပြီး ဝန်ထမ်းများ၏ လုံခြုံရေးကိုမြှင့်တင်ပေးရန် တောင်းဆိုမှုသည် နှစ်ပေါင်းများစွာကြာလာသည့်တိုင် ဖြည့်ဆည်းပေးနိုင်မှုမရှိသေးဟု ပြောသည်။

Source:Aljazeera

CNI International News

လာဟိုး၊ မတ်လ ၉

ဝန်ကြီးချုပ်ဟောင်း အီမရန်ခမ်း (Imram Khan) အား ထောက်ခံသူများနှင့် ပါကစ္စတန်ရဲတပ်ဖွဲ့တို့ကြား ပဋိပက္ခ ဖြစ်ပွားခဲ့ရာ နှစ်ဖက်စလုံး ထိခိုက်ဒဏ်ရာ ရရှိမှုများ ရှိခဲ့ကြောင်း ရိုက်တာ သတင်းတွင် ဖော်ပြထားသည်။

ရဲတပ်ဖွဲ့ဝင်များက မျက်ရည်ယိုဗုံးများ သုံးခြင်း၊ တုတ်ဖြင့်ရိုက်ခြင်းတို့ ရှိခဲ့သည်ဟုလည်း သိရသည်။

ပဋိပက္ခများသည် ပါကစ္စတန်အရှေ့ပိုင်း လာဟိုး (Lahore) မြို့တွင် ရွေးကောက်ပွဲ မဲဆွယ်မှု စတင်ရေး စီစဉ်ထား သည့် လူထူစုဝေးပွဲတစ်ခု မစတင်ခင် ပေါ်ပေါက်ခဲ့ခြင်း ဖြစ်သည်။

ပါကစ္စတန်အစိုးရက မဲဆွယ်စည်းရုံးမှုကို ပိတ်ပင်ထားသည်။ ဝန်ကြီးချုပ်ဟောင်း အီမရန်ခမ်းသည် ပြီးခဲ့သည့်နှစ် က အယုံအကြည် မရှိကြောင်း လွှတ်တော်မဲခွဲမှုကြောင့် နှုတ်ထွက်ခဲ့ရပြီး ကတည်းက ကြားဖြတ် ရွေးကောက်ပွဲ ကျင်းပပေးရန် တောင်းဆိုခဲ့သူ ဖြစ်သည်။

သို့သော် ဝန်ကြီးချုပ်သစ်က ထိုတောင်းဆိုချက်ကို ငြင်းပယ်ခဲ့ပြီး ရွေးကောက်ပွဲကို စီစဉ်ထားသည့်အတိုင်း ယခုနှစ် ကုန်ပိုင်းမှသာ ကျင်းပမည်ဟု ပြောခဲ့သည်။

အီမရန်ခမ်းကိုတွေ့ရစဉ်(GETTY IMAGES)

အီမရန်ခမ်းသည် ပြီးခဲ့သည့်နှစ်က ကျင်းပခဲ့သော နိုင်ငံရေး စုဝေးပွဲတစ်ခုတွင်လည်း သေနတ်ဖြင့် ပစ်ခတ်ခံရ၍ ဒဏ်ရာ ရရှိခဲ့သည်။

လူထုစုဝေးပွဲ ကျင်းပမည့် နေရာတွင် အပြည်ပြည်ဆိုင်ရာ အမျိုးသမီးများနေ့ အခမ်းအနား ကျင်းပရန် ရှိနေသဖြင့် ဥပဒေစိုးမိုးရေးဆိုင်ရာ ခြိမ်းခြောက်မှုများ ရှိလာနိုင်သောကြောင့် ယင်းကို တားမြစ်ခဲ့ခြင်း ဖြစ်သည်ဟု ပြည်နယ် သတင်းအချက်အလက်ဝန်ကြီး အေမာ မား(Amir Mir)က ပြောသည်။

အီမရန်ခမ်းအား ထောက်ခံသူများသည် လူစုခွဲရန် ပြောသော ရဲများကို တိုက်ခိုက်ခဲ့သည်ဟုလည်း ၎င်းက ပြော သည်။

ယင်းကို တုန့်ပြန်သည့် အနေဖြင့် ရဲတပ်ဖွဲ့က ရေအမြောက်များ၊ မျက်ရည်ယိုဗုံးများနှင့် တုတ်များသုံးကာ လူစု ခွဲခဲ့ကြောင်း၊ ပဋိပက္ခအတွင်း ရဲတပ်ဖွဲ့ဝင်တစ်ဦး ဒဏ်ရာရရှိခဲ့ကာ ခမ်း၏ PTI ပါတီမှ ဝန်ထမ်း ၁၂ ဦးကို ဖမ်းဆီး ခဲ့သည်ဟု မားက ပြောသည်။

ပါကစ္စတန်ရဲတပ်ဖွဲ့နဲ့ အီမရန်ခမ်း ထောက်ခံသူများ ထိပ်တိုက်တွေ့စဉ် (AFP)

ပဋိပက္ခများအတွင်း အလုပ်သမားတချို့ ဒဏ်ရာ ရရှိခဲ့ကြောင်း၊ ရဲတပ်ဖွဲ့သည် ဖက်ဆစ်နည်းလမ်းများကို သုံးခဲ့ ကြောင်း ခမ်း၏ လက်ထောက်ဖြစ်သူ ရှာကွတ် မာမွတ် (Shafqat Mahmood)က ပြောသည်။

ရုပ်သံထုတ်လွှင့် မှုများတွင်လည်း ခမ်း၏ လာဟိုးမြို့ရှိ အိမ်အနီး နေရာများကို ရဲများက မျက်ရည်ယိုဗုံးများဖြင့် ပစ်နေသည်နှင့် အလုပ်သမားတချို့ သွေးထွက်သံယို ဖြစ်နေသည်ကို တွေ့ခဲ့ရသည်။

ခမ်းသည် တာဝန်ယူခဲ့စဉ် ၂၀၁၈ မှ ၂၀၂၂ ခုနှစ်အတွင်း ရရှိခဲ့သော နိုင်ငံတော် လက်ဆောင်များကို တရားမဝင် ရောင်းချမှု စွပ်စွဲချက်များကို ခုခံချေပရန် မတ်လ ၁၃ ရက်နေ့ တရားရုံးသို့ ဆင့်ခေါ်ခံထားရသူ ဖြစ်သည်။

Source: Reuters

CNI International News

ကိယက်ဗ်၊ မတ်လ ၉

ယူကရိန်းတို့ တပ်စွဲထားရာ ဘက်ခ်မွတ် (Bakhmut) မြို့အရှေ့ပိုင်းအစိတ်အပိုင်းများကို သိမ်းပိုက်နိုင်ခဲ့ပြီဟု ရုရှား၏ ဝဂ်နာကြေးစားစစ်ဘက်ဆိုင်ရာ ကန်ထရိုက်တာက ပြောကြောင်း AP သတင်းတွင် ဖော်ပြသည်။

ဘက်ခ်မွတ်မြို့သည် ယူကရိန်းနှင့်ရုရှားနှစ်ဘက်စလုံးအတွက် ရန်သူများကို အင်အားချည့်နဲ့လာစေရေး ဆောင်ရွက်ရန် အချက်အခြာကျသောစစ်မျက်နှာပြင်တစ်ခုဖြစ်လာခဲ့သည်။ ရုရှားတပ်ဖွဲ့များအတွက် ၎င်းတို့ မထိန်းချုပ်နိုင်သေးသည့် ဒွန်းနက်ခ် (Donetsk) ပြည်နယ်မှ ဧရိယာများသို့ ဝင်ရောက်နိုင်ရန်အတွက် ဘက်ခ်မွတ် မြို့ကို မဖြစ်မနေသိမ်းပိုက်နိုင်ရန် လိုအပ်နေသည်။

သို့သော် ရှရှားအနေဖြင့် မြို့ကိုသိမ်းပိုက်နိုင်သည့်တိုင် ယူကရိန်းစစ်ပွဲ၏ လားရာပြောင်းလဲသွားခြင်း ရှိမည် မဟုတ်ဟု အနောက်အုပ်စုက ပြောသည်။ ပြီးခဲ့သည့် လများအတွင်း ယူကရိန်းတွင် ဖြစ်ပွားခဲ့သော တိုက်ပွဲ အများစုသည် ဘက်ခ်မွတ်မြို့နှင့် ပတ်သက်နေခဲ့ပြီး နှစ်ဖက်စလုံးမှ ရန်သူ့အင်အားကျဆင်းလာစေရန်၊ ထိုးစစ်ဆင်မှုအသစ်များ လုပ်ဆောင်ရေး ပြင်ဆင်ချိန်ရရှိရန် အသုံးချလျက်ရှိသည်။

လက်ရှိအချိန်အထိ ဘက်ခ်မွတ်တိုက်ပွဲအတွင်း မည်သည့်ဘက်မှ အထိအခိုက်အကျအဆုံး များနေသည်ကို ကွဲကွဲ ပြားပြားမသိရသေးဘဲ ခြောက်လကြာ တိုက်ပွဲအတွင်း စစ်မဖြစ်ခင် ဒေသခံ ၇၀၀၀၀(ခုနှစ်သောင်း) ကျော် ရှိသော မြို့သည် မြို့ပျက်ကြီးတစ်ခုကဲ့သို့ ပြောင်းလဲလာခဲ့ပြီ ဖြစ်သည်။

ဝဂ်နာတပ်သားများသည် ဘက်ခ်မွတ်တိုက်ပွဲများအတွင်း ရှေ့တန်းနေရာမှ ပါဝင်လျက်ရှိကာ ၎င်းတို့သည် မြို့ကို ဖြတ်သန်းစီးဆင်းသွားသော ဘက်ခ်မွတ်ကာ (Bakhmutka) မြစ်၏ အရှေ့ခြမ်းမှ ခရိုင်အားလုံးကို အပြည့်အဝ ထိန်းချုပ်ထားနိုင်ခဲ့ပြီဟု ဝဂ်နာပိုင်ရှင် ယက်ဗ်ဂန်နီ ပရီဂိုရှင်း (Yevgeny Prigozhin) က ပြောသည်။ မြို့လယ်သည် မြစ်အနောက်ဘက်တွင် ရှိသည်။

ယူကရိန်းနိုင်ငံ ကိယက်ဗ်ရှိ စိန့်မိုက်ကယ်ဘုရားရှိခိုးကျောင်းတွင် ဈာပနအခမ်းအနားကျင်းပနေစဉ် ယူကရိန်း စစ်မှုထမ်းဟောင်း Oleksiy Sokolovskyi ၏ ရုပ်အလောင်းအား လူများက အလေးပြုကြစဉ်(ဓါတ်ပုံ-အေပီ)

လက်ရှိအချိန်အထိ ဘက်ခ်မွတ်အရှေ့ခြမ်းအား ထိန်းချုပ်နိုင်သည်ဆိုသော စကားကို ရုရှားနှင့်ယူကရိန်းစစ်ဘက် အရာရှိများက တစ်စုံတစ်ရာပြောဆိုခြင်း မရှိသေးသော်လည်း ယူကရိန်းတပ်များ ဆုတ်ခွာမှုကြောင့် ပရီဂိုရှင်း ၏ ပြောဆိုချက်သည် မှန်ကန်နိုင်ဖွယ်ရှိသည်ဟု ဝါရှင်တန်အခြေစိုက် Study of War ပညာရှင်များအဖွဲ့က သုံးသပ် သည်။

ရုရှားတပ်များသည် မြို့ကိုသုံးဘက်သုံးတန်မှ ဝိုင်းထားသောကြောင့် အနောက်ဘက်သို့သွားရန် ကျဉ်းမြောင်းသည့် လမ်းကြောင်းတစ်ခုသာ ရှိသည်။ မြို့အနောက်ပိုင်းသို့ ရောက်ရှိနိုင်သည့် တစ်ခုတည်းသော လမ်းကြောင်းကို ရုရှားဘက်မှ ပစ်မှတ်ထားတိုက်ခိုက်နေမှုကြောင့် မြို့ကိုကာကွယ်နေသော ယူကရိန်းတပ်များသည် ရွှံ့ထူသော ကျေးလက်လမ်းများကိုသာ မှီခိုနေရသည်။

ဘက်ခ်မွတ်မြို့ကို စွန့်ခွာသွားမည်မဟုတ်ဟု ယူကရိန်း သမ္မတက တနင်္လာနေ့တွင်ပြောခဲ့ပြီး ဘက်ခ်မွတ်မြို့ကို သိမ်းနိုင်လျှင် ဒွန်နက်ခ် (Donetsk) သို့ ထိုးစစ်ဆင်မှုများ လုပ်ဆောင်ရန် လမ်းပွင့်သွားစေမည်ဟု ရုရှား ကာကွယ် ရေးဝန်ကြီးက ပြောသည်။

ဘက်ခ်မွတ်မြို့သည် မကြာခင်အချိန်အတွင်းမှာပင် ရုရှားတို့လက်သို့ ရောက်ရှိသွားမည့် အရိပ်အယောင်မျိုး ရှိသည်ဟုလည်း နေတိုးအဖွဲ့ အထွေထွေအတွင်းရေးမှူး စတိုတန်ဘာ့ဂျ်(Jens Stoltenberg )က ပြောသည်။

Source:AP

CNI International News

ကိုပင်ဟေဂင်၊ မတ်လ ၈

ဆွီဒင်၏ နေတိုးအဖွဲ့သို့ ဝင်ရောက်ခွင့် လျှောက်ထားမှုကို ထောက်ခံကြောင်း ဟန်ဂေရီလွှတ်တော် ကိုယ်စားလှယ် အဖွဲ့ တစ်ခုက အင်္ဂါနေ့တွင် ပြောခဲ့သည်ဟု အေပီသတင်းမှ ဖော်ပြခဲ့သည်။

ဟန်ဂေရီ အာဏာရပါတီက နိုင်ငံရေး အငြင်းပွားမှုဟု သတ်မှတ်ထားသော ကိစ္စရပ်များကို ဖြေရှင်းရေး ဆွီဒင် လွှတ်တော်ဥက္ကဋ္ဌနှင့် တွေ့ဆုံခဲ့ပြီးနောက် ထိုသို့ ပြောခဲ့ခြင်း ဖြစ်သည်။

ဆွီဒင်နှင့် ဖင်လန်နိုင်ငံတို့၏ နေတိုးအဖွဲ့တွင်းသို့ ဝင်ရောက်နိုင်ရန် ကြိုးပမ်းမှုနှင့်ပတ်သက်၍ ဟန်ဂေရီ လွှတ်တော် အမတ်များသည် အစောပိုင်းတွင် သံသယရှိခဲ့သည်။

သို့သော် ဟန်ဂေရီ လွှတ်တော်အနေဖြင့် ဆွီဒင်၏ နေတိုးအဖွဲ့တွင်းသို့ ဝင်ရောက်ရန် ကြိုးပမ်းမှုကို အတည်ပြု ပေးသွားမည်ဟု ဟန်ဂေရီလွှတ်တော် ကိုယ်စားလှယ်အဖွဲ့က အင်္ဂါနေ့တွင် ပြောခဲ့သည်။

ဆွီဒင်၏ နေတိုးအဖွဲ့ဝင်အဖြစ် လျှောက်ထားခြင်းကို ထောက်ခံပါသည်ဟု ဟန်ဂေရီလွှတ်တော်၏ ဒုတိယဥက္ကဋ္ဌ ဆာဘာ ဟန်ဒီ (Csaba Hende)က ဆွီဒင်သတင်းသို့ ပြောသည်။

ဟန်ဂေရီအစိုးရ၊ သမ္မတ၊ ဝန်ကြီးချုပ်နှင့် လွှတ်တော်ကိုယ်စားလှယ် အများစုသည် ဆွီဒင်၏ ကြိုးပမ်းမှုကို ပြတ်ပြတ်သားသား ထောက်ခံသည်ကို သေချာအောင် ပြသခဲ့ပြီး ဖြစ်သည်ဟု ၎င်းက ပြောကြောင်းလည်း သတင်းတွင် ဖော်ပြသည်။

 ဟန်ဂေရီလွှတ်တော်ကိုယ်စားလှယ်အဖွဲ့ကိုတွေ့ရစဉ်(AP)

ဘရပ်ဆဲလ် (Brussels) မြို့ရှိ နေတိုး အထွေထွေအတွင်းရေးမှူး ဂျန်းစ် စတိုတန်ဘာ့ဂျ်(Jens Stoltenberg) ကလည်း ဟန်ဂေရီလွှတ်တော်အမတ်များ၏ ထုတ်ပြန်ချက်ကို ကြိုဆိုသည်ဟု ပြောသည်။

၎င်းတို့သည် အပြုသဘောဆောင်သည့် မက်ဆေ့စ်နှင့် အတည်ပြု လက်မှတ် ရေးထိုးရန် ထောက်ခံချက်ကို ပေးခဲ့ကြောင်း၊ အဖွဲ့ဝင်ဖြစ်ရန် ကြာမြှင့်မည်ဖြစ်သည့်တိုင် ယင်းက တိုးတက်မှုများကို ဖြစ်စေကြောင်းလည်း ၎င်း က ပြောသည်။

လွှတ်တော်ကိုယ်စားလှယ်အဖွဲ့သည် ဆွီဒင်နိုင်ငံခြားရေးဝန်ကြီး တိုဘီရက်စ် ဘီလ်စတောင်း (Tobias Billstrom) နှင့်တွေ့ဆုံခဲ့သည်။ အတည်ပြု လက်မှတ် ရေးထိုးခြင်းသည် မကြာခင် ပေါ်ပေါက်လာဖွယ်ရှိသည်ဟု ၎င်းက ပြော သည်။

တူရကီပြီးနောက် ဟန်ဂေရီနိုင်ငံသည် ဆွီဒင်နှင့်ဖင်လန်တို့၏ နေတိုးအဖွဲ့သို့ ဝင်ရောက်ရေး ပူးတွဲတောင်းဆိုမှုအား အတည်မပြုပေးသည့် တစ်ခုတည်းသော နေတိုးအဖွဲ့ဝင်နိုင်ငံ ဖြစ်သည်။

ထို့နောက် ဥရောပနှစ်နိုင်ငံသည် ရုရှား၏ ယူကရိန်းအပေါ် ကျူးကျော်မှုကို တုန့်ပြန်ရေးအတွက် မေလတွင် နေတိုးအဖွဲ့သို့ ဝင်ရောက်ရေး ကြိုးပမ်းခဲ့သည်။

နေတိုးအထွေထွေအတွင်းရေးမှူးကိုတွေ့ရစဉ်(AP)

ကာလရှည်ကျင့်သုံးခဲ့သော စစ်ရေးကြားနေဝါဒမှ စွန့်ခွာလာခြင်း ဖြစ်သည်။ ဝန်ကြီးချုပ် ဗစ်တာအော်ဘန် (Viktor Orban) အစိုးရလက်ထက် ဟန်ဂေရီ၏ ဒီမိုကရေစီ အခြေအနေအပေါ် စိုးရိမ်မိကြောင်း အီးယူအဖွဲ့က အကြိမ်ကြိမ် ပြောခဲ့ဖူးသည်။

အော်ဘန်သည် ဟန်ဂေရီ၏ နိုင်ငံရေး အခြေအနေနှင့်ပတ်သက်၍ အလိမ်အညာများ ပြောဆိုခဲ့သော ဆွီဒင်နှင့် ဖင်လန်တို့၏ နေတိုးအဖွဲ့ဝင်ဖြစ်ရေး လျှောက်ထားမှုတွင် ပါဝင်ကူညီဆောင်ရွက်လိုခြင်း မရှိဟုလည်း ကနဦးတွင် ပြောဆိုခဲ့ဖူးသည်။

ဟန်ဂေရီ ကိုယ်စားလှယ်အဖွဲ့သည် ဆွီဒင်ပြီးနောက် ဖင်လန်နိုင်ငံသို့ သွားရောက်မည် ဖြစ်သည်။

Source: AP

CNI International News

၂၀၂၃ ခုနှစ်၊ မတ်လ ၈

ဖိလစ်ပိုင်နိုင်ငံ နီဂရိအိုရီရယ်တယ်ပြည်နယ်၊ ဘာယာဝမ်မြို့ရဲစခန်းရှိ လက်နက်သစ်များ၊ ခဲယမ်းများနှင့်တခြား သော ပစ္စည်းများကို ရဲချုပ်သစ်က ကြည့်ရှုစစ်ဆေးခဲ့သည်။

မတ်လ ၄ ရက်နေ့တွင် ပြည်နယ်အကြီးအကဲ ရိုဝယ်ဒီဂါမို အသတ်ခံခဲ့ရပြီးနောက် ဘာယာဝမ်မြို့ရဲစခန်းတွင် အဆင့်မြှင့်တင်မှုများစွာ လုပ်ဆောင်ထားသည်။

CNI International News

မင့်ခ်၊ မတ်လ ၈

ယူကရိန်းအစိုးရသည် အမေရိကန်၏ ခိုင်းစေမှုကြောင့် ဘယ်လာရုစ်နိုင်ငံအား ယူကရိန်းနှင့်ရုရှားကြား ဖြစ်ပွား နေသည့် ပဋိပက္ခအတွင်းသို့ ဆွဲသွင်းရန် ကြိုးစားနေကြောင်း ဘယ်လာရုစ်သမ္မတ အလက်ဇန္ဒား လူကာရှန်ကို (Alexander Lukashenko)က အင်္ဂါနေ့တွင် ပြောကြားခဲ့သည်ဟု တာ့စ်သတင်းတွင် ဖော်ပြထားသည်။

သို့သော်လည်း အမေရိကန် မျှော်လင့်သလို ဖြစ်လာမည်မဟုတ်ကြောင်း ၎င်းက ဆက်လက် ပြောကြားခဲ့သည်။

ယခုလို စီစဉ်နေခြင်းဖြင့် ဥရောပတစ်တိုက်လုံးနှင့် ပတ်သက်နေသော စစ်ပွဲအတွင်းသို့ ဘယ်လာရုစ်အား ဆွဲထည့် မည်ဆိုလျှင် မှားသွားလိမ့်မည်ဟု လူကာရှန်ကိုက ပြောကြောင်း BelTA သတင်းတွင် ဖော်ပြသည်။

A-50 တာဝေးရေဒါ ထောက်လှမ်းရေးနှင့် ရုရှားလေတပ်၏ လေကြောင်း ထိန်းချုပ်ရေး လေယာဉ်တို့အား ဖျက်ဆီးရန် ကြိုးပမ်းခဲ့သည့် ယူကရိန်အထူးတပ်ဖွဲ့မှ အေးဂျင်တစ်ဦးနှင့် ၎င်း၏ အပေါင်းအပါ ၂၀ ကျော်တို့ကို ဘယ်လာရုစ် တွင် ဖမ်းဆီးထိန်းသိမ်းခဲ့သည်ဟု လူကာရှန်ကိုက အင်္ဂါနေ့ အစောပိုင်းတွင် ပြောသည်။

အမေရိကန်သမ္မတ ဘိုင်ဒန်နဲ့ ယူကရိန်းသမ္မတ ဇာလန်းစကီး (GETTY IMAGES)

အဆိုပါ ဖျက်ဆီးရေ အစီအစဉ်သည် မအောင်မြင်ခဲ့ကြောင်း၊ ဆိုးဆိုးရွားရွား ပျက်စီးမှု မရှိခဲ့ကြောင်း၊ သို့သော် လေယာဉ် ကိုယ်ထည်တွင် ခြစ်ရာများနှင့် အပေါက်တစ်ပေါက် ဖြစ်ခဲ့ကြောင်း ဘယ်လာရုစ်သမ္မတက ပြောသည်။

ထိုဖြစ်ရပ်ကြောင့် ဘယ်လာရုစ် အစိုးရသည် ပျက်စီးသွားသော လေယာဉ်အား ရုရှားသို့ ပြင်ပေးရန် ပို့ခဲ့သလို ယင်းအစား နောက်ထပ် တစ်စီးကို ရယူခဲ့သည်ဟုလည်း သိရသည်။

Source: တာ့စ်

CNI International News

ဘေဂျင်း၊ မတ်လ ၈

အမေရိကန်အနေဖြင့် ဦးတည်ချက် မပြောင်းလဲဘူးဆိုလျှင် တရုတ်နှင့် အမေရိကန်တို့သည် ပဋိပက္ခနှင့် ထိပ်တိုက် တွေ့ဆုံနိုင်သည့် အခြေအနေတွင် ရှိနေကြောင်း တရုတ်နိုင်ငံခြားရေးဝန်ကြီး ကျင်ဂန်း (Qin Gang)က အင်္ဂါနေ့ တွင် ပြောခဲ့သည်ဟု အေပီသတင်းတွင် ဖော်ပြသည်။

နှစ်နိုင်ငံကြား ဆက်ဆံရေး အဆိုးရွားဆုံး အခြေအနေ ဖြစ်နေချိန်တွင် ယခုကဲ့သို့ တိုက်ခိုက်သော စကားလုံးအသုံးအနှုန်းများကို ပြောဆိုခဲ့ခြင်း ဖြစ်သည်။

ပြီးခဲ့သည်နှစ် ဝန်ကြီးရာထူးကို ရရှိပြီးနောက် ပထမဆုံးသော သတင်းစာ ရှင်းလင်းပွဲတွင် ကျင်၏ ခက်ထန်သော စကားလုံး အသုံးအနှုန်းများက နှစ်နိုင်ငံကြား ဆက်ဆံရေး တင်းမာမှုများ ရှိနေချိန်တွင် တရုတ်အစိုးရသည် ၎င်းတို့ ၏ ရန်လိုသော wolf warrior သံတမန်ရေးကို စွန့်လွှတ်၍ ပို၍ပျော့ပြောင်းသော မူဝါဒမျိုးဖြင့် ချဉ်းကပ်မည် ဟူ သော ယူဆချက်များနှင့် ဆန့်ကျင့်ဘက်လည်း ဖြစ်သည်။

အမေရိကန်၏ တရုတ်မူဝါဒသည် လမ်းကြောင်း လွဲနေသည်ဟု ကျင်က ပြောသည်။

တရုတ်လွှတ်တော်၏ နှစ်ပတ်လည် အစည်းအဝေး သတင်းထောက်များနှင့် တွေ့ဆုံစဉ် ပြောခဲ့ခြင်း ဖြစ်သည်။

တရုတ်နိုင်ငံခြားရေးဝန်ကြီး ကျင်ဂန်းကိုတွေ့ရစဉ် (EPA)

အမေရိကန်အနေဖြင့် ဘရိတ်မသုံးဘဲ လမ်းမှားအတိုင်း ဆက်သွားနေမည်ဆိုလျှင် မည်သည့် အကူပစ္စည်းကမှ လမ်းလွဲနေခြင်းကို တားဆီးနိုင်မည် မဟုတ်ဘဲ ပဋိပက္ခနှင့် ထိပ်တိုက် တွေ့ဆုံမှုများ သေချာပေါက် ရှိလာလိမ့်မည် ဟု ကျင်က ပြောသည်။

ထိုကဲ့သို့ ယှဉ်ပြိုင်မှုမျိုးသည် နှစ်နိုင်ငံ ပြည်သူများနှင့် အနာဂတ် လူသားမျိုးနွယ်များ၏ အကျိုးစီးပွားကို လောင်းကြေး ထပ်ထားသည့် လက်လွတ်စပယ် လောင်းကစားမှုသာဖြစ်ကြောင်း ၎င်းက ပြောသည်။

ကျင်၏ ပြောစကားများသည် တရုတ်သမ္မတ ရှီကျင့်ဖျင် (Xi Jinping) ၏ တနင်္လာနေ့က မိန့်ခွန်းနှင့် တူညီမှုများ ရှိနေသည်။

အမေရိကန် ဦးဆောင်သည့် အနောက်နိုင်ငံများသည် တရုတ်နိုင်ငံအား ပိတ်ဆို့၊ ဖိနှိပ်မှုများ လုပ်ဆောင်နေ ကြောင်း၊ ယင်းက တရုတ်နိုင်ငံ၏ တိုးတက်မှုအတွက် ကြီးမားသည့် စိန်ခေါ်မှုများကို ဖြစ်စေကြောင်းနှင့် ယင်းကို ရဲဝံ့စွာဖြင့် ကြံ့ကြံ့ခံ ကျော်ဖြတ်သွားရမည်ဖြစ်ကြောင်း ရှီက ပြောခဲ့သည်ဟု Xinhua သတင်းတွင် ဖော်ပြထား သည်။

 အမေရိကန်ခေါင်းဆောင် ဘိုင်ဒန်ကိုတွေ့ရစဉ်(GETTY IMAGES)

တစ်ဖက်တွင်လည်း အမေရိကန်အရာရှိများသည် တရုတ်၏ နိုင်ငံရေးနှင့်စီးပွားရေးဆိုင်ရာ ချဲ့ထွင်လာမှု၊ ထိုင်ဝမ် သို့ ကျူးကျော်နိုင်ခြေရှိမှု စသည်တို့ကြောင့် စိုးရိမ်မှုများ မြင့်တက်လျက်ရှိနေပြီး တရုတ်၏ အခြားနိုင်ငံများအပေါ် လွှမ်းမိုးမှုများကို တန်ပြန်ရန် အမေရိကန် အစိုးရအနေဖြင့် ကြီးမားသည့် ကြိုးပမ်းမှုများ ချမှတ်ဆောင်ရွက်ရမည် ဟု အရာရှိအများစုက တောင်းဆိုထားသည်။

ပြီးခဲ့သည့် သီတင်းပတ်များတွင်လည်း နှစ်နိုင်ငံကြား ဆက်ဆံရေး အဆင်မပြေမှုများကြောင့် စိုးရိမ်မှုများကို မြင့်တက်စေခဲ့ပြီး နှစ်နိုင်ငံ အရာရှိများသည် မကြာခဏ ဆိုသလိုပင် တစ်ဖက်နှင့်တစ်ဖက် အပြန်အလှန် စွပ်စွဲမှု များ လုပ်ဆောင်ခဲ့ကြသည်။

Source: AP

စမ်းသပ်ဒုံးကျည်များကို ပစ်ချလျှင် စစ်ကြေညာခြင်းဟု အမေရိကန်ကို မြောက်ကိုရီးယား သတိပေး

CNI International News

ပြုံယမ်း၊ မတ်လ ၈

မြောက်ကိုရီးယားတို့ စမ်းသပ်ပစ်လွှတ်သော ဒုံးကျည်များကို ကြားဖြတ်ခြင်းနှင့်ပစ်ခတ်ခြင်းတို့လုပ်မည်ဆိုလျှင် ယင်းကို စစ်ကြေညာမှုအဖြစ် မှတ်ယူမည်ဟု မြောက်ကိုရီးယားဘက်က ပြောကြောင်း အယ်လ်ဂျာဇီးယား သတင်းတွင် ဖော်ပြသည်။

ခေါင်းဆောင်ကင်ဂျုံအန်း၏ ညီမဖြစ်သူ ကင်ယိုဂျုံ (Kim Yo Jong) က အင်္ဂါနေ့က ထုတ်ပြန်ချက်တစ်စောင်တွင် ထိုသို့ ပြောဆိုခဲ့ခြင်းဖြစ်သည်။ မြောက်ကိုရီးယားဘက်မှ ပစိဖိတ်သမုဒ္ဒရာသို့ စမ်းသပ်ပစ်လွှတ်ခဲ့လျှင် ယင်းတို့၏ တိုက်ချင်းပစ် ပဲ့ထိန်းဒုံးကျည် (ICBM) များကို အမေရိကန်ဘက်က ပစ်ချရန် စီစဉ်နေသည်ဆိုသည့် တောင်ကိုရီးယားဘက်မှ သတင်းကိုကိုးကား၍ ယင်းသို့ပြောဆိုခဲ့ခြင်းဖြစ်သည်။

ဒုံးကျည်စမ်းသပ်မှုတိုင်းကို အိမ်နီးချင်းများသို့ မရောက်စေရန် သတ်မှတ်လုပ်ဆောင်ခဲ့ခြင်းအပြင် အမေရိကန်နှင့် တောင်ကိုရီးယားတို့ဘက်မှ မြောက်ကိုရီးယား၏ စမ်းသပ်ဒုံးကျည်များကို ပစ်ချခဲ့မှု မရှိသည့်အခြေနေအတွင် မြောက်ကိုရီးယား၏ ယခုလိုထုတ်ပြန်မှုက မေးခွန်းသစ်များကို ဖြစ်စေသည်။

ဂျပန်သို့ ဒုံးကျည်ဖြင့် ပစ်မည်ဟုလည်း မြောက်ကိုရီးယားက ပြောခဲ့ဖူးသည်။ လက်နက်စမ်းသပ်မှုများအပေါ် အမေရိကန်စစ်တပ်၏ တုန့်ပြန်မှုတိုင်းကို စစ်ကြေညာခြင်းဟု မှတ်ယူမည်ဖြစ်ကြောင်း ကင်ယိုဂျုံက ပြောသည်။ ပစိဖိတ်သမုဒ္ဒရာသည် အမေရိကန် (သို့မဟုတ်) ဂျပန်၏ထိန်းချုပ်မှုအောက်တွင် မရှိဟုလည်း သူမက ပြောသည်။

ပြီးခဲ့သည့်နှစ် မြောက်ကိုရီးယား၏စံချိန်တင် ဒုံးကျည်စမ်းသပ်မှုများကြောင့် အမေရိကန်နှင့်တောင်ကိုရီးယားတို့၏ ပူးတွဲ စစ်ရေးလေ့ကျင့်မှုများ မြင့်တက်လာသည်။ ထိုအခြေအနေတွင် မြောက်ကိုရီးယားဘက်က ယခုကဲ့သို့ ခြိမ်းခြောက်ပြောဆိုခဲ့ခြင်းဖြစ်သည်။

၂၀၁၉ ခုနှစ်က မြောက်ကိုရီးယားတွင် စစ်ရေးလေ့ကျင့်မှုအတွင်း ဒုံးကျည်များ ပစ်လွှတ်ခဲ့စဉ်(ဓါတ်ပုံ-KCNA/Reuters)

မဟာမိတ်နှစ်နိုင်ငံသည် တနင်္လာနေ့တွင် ဗုံးကြဲလေယာဉ်များ ပါဝင်သော လေတပ်စစ်ရေးလေ့ကျင့်မှု လုပ်ဆောင်ခဲ့ပြီး ယခုလကုန်ပိုင်းတွင်လည်း အကြီးမားဆုံးစစ်ရေးလေ့ကျင့်မှုများ လုပ်ဆောင်ရန်စီစဉ်ထားသည်။ Warrior Shield FTX နှင့် Freedom Shield ကဲ့သို့ ကာကွယ်ရေးနှင့် တုန့်ပြန်နိုင်မှုစွမ်းရည်ကို မြှင့်တင်ရန် ရည်ရွယ်သည့် လေ့ကျင့်မှုများ ဖြစ်သည်။

စစ်ရေးလေ့ကျင့်မှုများနှင့် ပတ်သက်၍ မြောက်ကိုရီးယားဘက်က ပြင်းထန်သောဆောင်ရွက်ချက်များ လုပ်ဆောင် သွားရန် အဆင်သင့်ရှိသည်ဟုလည်း ကင်ယိုဂျုံက ပြောသည်။ ကင်ယိုဂျုံသည် ကိုရီးယားကျွန်းဆွယ်တွင် အမေရိကန်တပ်အင်အားတိုးမြှင့်လာမှုနှင့် ပတ်သက်၍ မကြာခဏဆိုသလို သတိပေးလျက်ရှိပြီး ပစိဖိတ်သမုဒ္ဒရာ တွင်းသို့ ပစ်လွှတ်စမ်းသပ်မှုများ မကြာခဏ လုပ်ဆောင်ခြင်းသည် အမေရိကန်တပ်ဖွဲ့များပေါ် မူတည်သည်ဟု လည်း ပြီးခဲ့သည့်လတွင် ပြောသည်။

တနင်္လာနေ့ စစ်ရေးလေ့ကျင့်မှုတွင် အမေရိကန်၏ B-52 ဗုံးကြဲလေယာဉ်များ ပျံသန်းခြင်းသည် အဆင်အခြင်မဲ့ သည့် ရန်စမှုဖြစ်ကာ ကျွန်းဆွယ်၏အခြေအနေကို ဆိုးရွားသည်ထက် ဆိုးရွားစေလာနိုင်ကြောင်း အင်္ဂါနေ့တွင် မြောက်ကိုရီးယားနိုင်ငံခြားရေးဌာနက သီးခြားကြေညာချက်တစ်စောင်ထုတ်ပြန် ပြောဆိုခဲ့သည်။

Source:Aljazeera

CNI International News

တယ်လင်း၊ မတ်လ ၇

နိုင်ငံတွင်းမှ ထွက်ပြေးနေရသော အတိုက်အခံခေါင်းဆောင် ဆဗီယက်လာနာ ဆစ်ဟာနိုဆကာယာ (Sviatlana Tsikhanouskaya) အား ဘယ်လာရုစ် တရားရုံးတစ်ခုက တနင်္လာနေ့တွင် ထောင်ဒဏ် ၁၅ နှစ် ပြစ်ဒဏ် ချမှတ်ခဲ့ သည်ဟု AP သတင်း၌ ဖော်ပြသည်။

အစိုးရအား ဖြုတ်ချရန် အပါအဝင် စွပ်စွဲချက်များကို သူမ မတက်ရောက်နိုင်ခဲ့သော တရားခွင်အတွင်း စစ်ဆေးခဲ့ ခြင်းဖြစ်ကာ ယင်းက ဘယ်လာရုစ်အစိုးရ၏ အတိုက်အခံများအပေါ် ဖိနှိပ်မှုများမှ နောက်ဆုံး တစ်ခုလည်း ဖြစ်သည်။

ဆစ်ဟာနိုဆကာယာသည် ၂၀၂၀ ခုနှစ်၊ သြဂုတ်လ ရွေးကောက်ပွဲတွင် လက်ရှိသမ္မတ အလက်ဇန္ဒား လူကာရှန်ကို အား ယှဉ်ပြိုင်ခဲ့ဖူးသူ ဖြစ်သည်။

သူမအပေါ် တရားစီရင်မှု၊ ပြစ်ဒဏ်ချမှတ်မှုသည် ဘယ်လာရုစ်အစိုးရ၏ လက်စားချေမှုသာဖြစ်ပြီး လွတ်လပ်မှု အတွက် ဆက်လက် တိုက်ပွဲဝင်သွားမည်ဟု သူမက ပြောသည်။

ဘယ်လာရုစ်သမ္မတ လူကာရှန်ကို ကိုတွေ့ရစဉ် (Reuters)

ပြီးခဲ့သည့် သြဂုတ်လ ရွေးကောက်ပွဲ ရလဒ်များကြောင့် နိုင်ငံသမိုင်းတွင် အကြီးမားဆုံးသော ဆန္ဒပြပွဲများ ပေါ်ပေါက် ခဲ့ရသည်။ လူကာရှန်ကိုသည် ဆန္ဒပြသူများကို အရက်စက်ဆုံး ချေမှုန်းခဲ့ပြီး အတိုက်အခံများသည် အစိုးရအား ဖြုတ်ချရန် စီစဉ်နေသည်ဟု စွပ်စွဲခဲ့သည်။

ဆစ်ဟာနိုဆကာယာသည် လစ်သူယေးနီးယားသို့ ထွက်ပြေးခဲ့ရပြီး ထင်ရှားသော နိုင်ငံရေးသမားများနှင့် တက်ကြွ လှုပ်ရှားသူများသည်လည်း ဖမ်းဆီးခြင်း သို့မဟုတ် နိုင်ငံမှထွက်ခွာရန် ဖိအားပေးခြင်းများဖြင့် ရင်ဆိုင်ခဲ့ရသည်။

ဆစ်ဟာနိုဆကာယာနှင့် တခြားသော အတိုက်အခံလေးဦးကို ဘယ်လာရုစ် မြို့တော်မင့်ခ် (Minsk) မြို့တွင် အမိန့် ချမှတ်ခဲ့ခြင်း ဖြစ်သည်။

နိုင်ငံပိုင် Belta သတင်း အေဂျင်စီမှ ထုတ်ပြန်ထားသော ဓာတ်ပုံများတွင်လည်း တရားခံများ၏ နေရာ လွတ်နေ သည်ကို မြင်တွေ့ခဲ့ရသည်။ ၎င်းတို့အပေါ် ချမှတ်ထားသည့် စွပ်စွဲချက်များတွင် အစွန်းရောက် အဖွဲ့တစ်ခုကို ဖွဲ့စည်း တည်ထောင်ကာ အမျိုးသားလုံခြုံရေးကို ထိခိုက်စေမှုလည်း ပါဝင်သည်။

နိုဘယ်လ် ငြိမ်းချမ်းရေးဆုရှင် အဲလက်ဘီယာလီယတ်စကီကိုတွေ့ရစဉ်(GETTY IMAGES)

စစ်ဆေးမှုများအတွင်း သူမသည် တရားခံ ရှေ့နေဖြစ်သူအား ဆက်သွယ်၍ပင် မရခဲ့ဟု ဆစ်ဟာနိုဆကာယာ က ပြောသည်။ ဘယ်လာရုစ်တွင် တရားဥပဒေနှင့် တရားစီရင် စနစ်များ အလုပ်မလုပ်တော့ကြောင်း နိုင်ငံသည် အကြီးစား KGB အဖြစ်သို့ ပြောင်းလဲလာကြောင်းလည်း သူမက ပြောခဲ့သည်။

ဆစ်ဟာနိုဆကာယာသည် ထောင်ဒဏ်အပြင် ဒဏ်ငွေ ဒေါ်လာ ၁၁၀၀၀ ပေးဆောင်ရန်လည်း အမိန့်ချ မှတ်ခံခဲ့ ရပြီး တခြားသော အတိုက်အခံများသည်လည်း ထောင်ဒဏ် ၁၈ နှစ်၊ ၁၂ နှစ် အသီးသီး ချမှတ်ခံခဲ့ရသည်။

၂၀၂၀ ခုနှစ်၊ သြဂုတ်လ ရွေးကောက်ပွဲကြောင့်ဖြစ်သော ဆန္ဒပြမှုများကို ဘယ်လာရုစ် အစိုးရက ပြင်းပြင်းထန်ထန် နှိပ်ကွပ်ခဲ့ပြီး လူပေါင်း ၃၅၀၀၀ ကျော်ကို ဖမ်းဆီးထိန်းသိမ်းခဲ့သည်။

ထိန်းသိမ်းခံရသူများတွင် ၂၀၂၀ ခုနှစ် နိုဘယ်လ် ငြိမ်းချမ်းရေးဆုရှင် အဲလက်ဘီယာလီယတ်စကီ (Ales Bialiatski) လည်း ပါဝင်ခဲ့ပြီး ၎င်းကို ပြီးခဲ့သည့် သီတင်းပတ်တွင် ထောင်ဒဏ် ၁၀ နှစ် ချမှတ်ခဲ့သည်။

ဆစ်ဟာနိုဆကာယာသည် ၎င်း၏ ခင်ပွန်းဖြစ်သူအစား လူကာရှန်ကို နှင့် ရွေးကောက်ပွဲတွင် ယှဉ်ပြိုင်ခဲ့ခြင်း ဖြစ် သည်။ သူမ၏ ခင်ပွန်းဖြစ်သူ ထက်ရှားသည့် အတိုက်အခံနိုင်ငံရေးသမား ဆီယာဟိုင် ဆီဟာနိုစကီသည် ရွေးကောက်ပွဲ မဲဆွယ်ကာလတွင် ဖမ်းဆီးခြင်းခံခဲ့ရပြီး ထောင်ဒဏ် ၁၈ နှစ် ချမှတ် ခံထားရသည်။

Source: AP