CNI International News

ကိယက်ဗ်၊ ဒီဇင်ဘာ ၂၉

ယူကရိန်းကိုစစ်ဘက်ဆိုင်ရာ ထောက်ပံ့ကူညီမှုများဆက်လက်လုပ်ဆောင်ရန် ပြင်သစ်ကာကွယ်ရေးဝန်ကြီးသည် ဗုဒ္ဓဟူးနေ့တွင် ကိယက်ဗ်မြို့သို့ ရောက်ရှိခဲ့သည်ဟု AP သတင်းတွင်ဖော်ပြသည်။

ကာကွယ်ရေးဝန်ကြီး ဆီဘတ်ဂျန် လုကော်ဟနူ (Sebastien Lecornu) သည် ပိုလန်ခရီးစဉ်ပြီးနောက် ယူကရိန်း သို့ ရောက်ရှိလာခဲ့ခြင်းဖြစ်သည်။ ပိုလန်ခရီးစဉ်တွင် ၎င်းသည် ပြင်သစ်ထုတ် စစ်ဘက်သုံး ဂြိုဟ်တုနှစ်ခုကို ရောင်းရန် သဘောတူညီမှုရရှိခဲ့သည်ဟု ကြေညာခဲ့သည်။

ယူကရိန်းခရီးစဉ်တွင်လည်း ၎င်းသည် ရုရှားနှင့်စစ်ပွဲအတွင်း ကျဆုံးသွားခဲ့သော ယူကရိန်းစစ်သားများကို သွားရောက် ဂါရဝပြုခဲ့ပြီး ယူကရိန်းသမ္မတ၊ ကာကွယ်ရေးဝန်ကြီးတို့အပြင် စစ်ဘက်ဆိုင်ရာအရာရှိများနှင့် တွေ့ဆုံရန် စီစဉ်ထားသည်ဟု သိရသည်။ ပြင်သစ်သည် အမေရိကန်၊ ဗြိတိန်တို့နှင့်ယှဉ်လျှင် ယူကရိန်းကို စစ်ဘက် ဆိုင်ရာထောက်ပံ့မှုများနှင့်ပတ်သက်၍ အသံတိတ်နေခဲ့သော်လည်း ၎င်းတို့သည် ရုရှားဘက်မှ စတင်ကျူးကျော်ခဲ့ သည့် ဖေဖော်ဝါရီ ၂၄ ရက်မှစကာ ယူကရိန်းသို့ လက်နက်များစွာ ထောက်ပံ့ခဲ့သည်။

ယူကရိန်းနိုင်ငံ၊ ခါကိဗ်ဒေသ၊ ခုပီးရန့်စ်ခ်တွင် လေးလကျော်ကြာ လျှပ်စစ်မီးမရှိသောကြောင့် စေတနာ့ဝန်ထမ်း များက အစားအစာများကို လာရောက်ဝေငှပေးနေစဉ်(ဓါတ်ပုံ-အေပီ)

ယခုလအတွင်း ယူကရိန်းကို ကူညီပေးရေး ညီလာခံနှစ်ခုကိုလည်း လက်ခံကျင်းပပေးခဲ့သည်။ သို့သော်သမ္မတ အီမန်နွယ် မက်ခရွန် (Emmanuel Macron) ၏ ရုရှားသမ္မတ ဗလာဒီမာပူတင်နှင့် ဆက်ဆံရေးကို ထိန်းသိမ်း ထားမှု၊ ယူကရိန်းအရေးကို ညှိနှိုင်းအဖြေရှာရန်ကြိုးပမ်းမှုတို့ကြောင့် ယူကရိန်းပြည်သူများသည် ပြင်သစ်နိုင်ငံနှင့် ပတ်သက်၍ အမြင်မကြည်လင်တော့ပေ။

ပြင်သစ်ကာကွယ်ရေးဝန်ကြီး၏ခရီးစဉ်သည် ယူကရိန်းသမ္မတ၏အမေရိကန်ခရီးစဉ်အပြီး၊ ယူကရိန်းအရှေ့ပိုင်း တိုက်ပွဲများတွင် သူမသာ ကိုယ်မသာ အခြေအနေများရှိနေချိန်၌ ပေါ်ပေါက်လာခြင်းဖြစ်သည်။ ထို့ကြောင့် ယခု ခရီးစဉ်အတွင်း လုကော်ဟနူ၏ တွေ့ဆုံမှုများတွင် မည်သည့်ရလာဒ်များ ပေါ်ထွက်လာမည်ကိုတော့ မသိနိုင်သေးပေ။

ခါကိဗ်ဒေသ၊ ခုပီးရန့်စ်ခ်တွင် လေးလကျော်ကြာ လျှပ်စစ်မီးမရှိသောကြောင့် ဒေသခံတစ်ဦး ဖယောင်းတိုင်မီးကို အသုံးပြုနေရစဉ်(ဓါတ်ပုံ-အေပီ)

လက်ရှိအချိန်တွင် ရုရှားနှင့်ယူကရိန်း နှစ်နိုင်ငံစလုံးက ငြိမ်းချမ်းရေးဆွေးနွေးပွဲများ စတင်ရန် စိတ်အားထက်သန် နေကြသော်လည်း ၎င်းတို့၏ ရပ်တည်မှုအသီးသီးက ဆွေးနွေးရန်ပို၍ အလှမ်းဝေးစေလျက် ရှိသည်။ ရုရှားဘက်က ၎င်းတို့တရားမဝင်သိမ်းပိုက်ထားသော ယူကရိန်း၏ဒေသလေးခုကို ရုရှားပိုင်အဖြစ် အသိအမှတ်ပြုမှသာလျှင် ငြိမ်းချမ်းရေးဆွေးနွေးမည်ဟု ပြောဆိုထားပြီး ယင်းကို ယူကရိန်းဘက်က ခါးခါးသီးသီး ငြင်းဆိုထားသည်။

ပြင်သစ်သည် ယူကရိန်းစစ်တပ်အတွက် Caesar(ဆီးဇာ) အမြောက်များ၊ တင့်ကားဖျက်ဒုံးကျည်များ၊ Crotale(ခရိုတဲယ်) လေကြောင်းကာကွယ်ရေးစနစ်များနှင့် ဒုံးပစ်လောင်ချာများကို ထောက်ပံ့ပေးထားသည့်အပြင် ယူကရိန်းစစ်သား ၂၀၀၀ ကိုလည်း ပြင်သစ်မြေသို့ခေါ်ကာ လေ့ကျင့်ပေးခဲ့သည်။ ထို့အပြင် ယူကရိန်းကို လာမည့်နှစ် အစောပိုင်းတွင် လက်နက်များ ထပ်မံထောက်ပံ့ပေးသွားမည်ဟုလည်း သမ္မတ မက်ခရွန်က ကတိ ပေးထားသည်။

ထိုသို့ပြင်သစ်အပါအဝင် အနောက်အုပ်စု၏ လက်နက်ထောက်ပံ့မှုများက ရုရှားကို စိတ်ဆိုးဒေါသဖြစ်စေခဲ့ကာ အမေရိကန်နှင့်နေတိုးအဖွဲ့သည် ယူကရိန်းစစ်ပွဲကို လောင်စာထည့်ပေးနေခြင်းသည် အခြေအနေများကို ထိန်းမနိုင် သိမ်းမရဖြစ်သွားနိုင်သည်ဟု ရုရှားဘက်က သတိပေးထားသည်။

Source:AP

CNI International News

ဆိုးလ်၊ဒီဇင်ဘာ ၂၉

စစ်တပ်အင်အားကို ထပ်မံမြှင့်တင်ရေး စီမံကိန်းသစ်များအား မြောက်ကိုရီးယား ခေါင်းဆောင် ကင်မ်ဂျုံအန် (Kim Jong Un) က ထိပ်တန်းနိုင်ငံရေး အရာရှိများထံ ချပြခဲ့သည်ဟု နိုင်ငံပိုင်မီဒီယာမှ ဗုဒ္ဓဟူးနေ့(ဒီဇင်ဘာ ၂၉ ရက်)တွင် ဖော်ပြခဲ့သည်။

အဆိုပါ စီမံကိန်းသည် ကင်မ်ဂျုံအန်အနေဖြင့် လက်နက်များ စမ်းသပ်မှုဖြင့် ရန်စမှုများကို ဆက်လက် ပြုလုပ်သွား မည်ဆိုသည့် ညွှန်းဆိုချက် ဖြစ်သည်ဟု အေပီသတင်းက ရေးသားဖော်ပြထားသည်။

ကင်မ်၏ စီမံကိန်းအသစ်များမှာ အစဉ်အလာ ရန်ဘက် တောင်ကိုရီးယားနိုင်ငံနှင့် ဆက်ဆံရေး အခြေအနေများ ဆိုးရွားနေချိန်တွင် ပေါ်ထွက်လာခြင်း ဖြစ်သည်။ မြောက်ကိုရီးယား ဒရုန်းများသည် ငါးနှစ်အတွင်း ပထမဆုံး အ နေဖြင့် တောင်ကိုရီးယား ပိုင်နက်တွင်းသို့ ရောက်ရှိလာခဲ့ကြောင်း တောင်ကိုရီးယးဘက်က စွပ်စွဲထားသည်။

မြောက်ကိုရီးယားခေါင်းဆောင် ကင်မ်ဂျုံအန်ကိုတွေ့ရစဉ် (KCNA)

ယခုနှစ်အတွင်း မြောက်ကိုရီးယားသည် ဒုံးကျည်ပစ်လွှတ် စမ်းသပ်မှုများကို စံချိန်တင် ပြုလုပ်ခဲ့သည်။ ထို အခြေအနေသည် နိုင်ငံ၏ လက်နက်စွမ်းရည်ကို အဆင့်မြှင့်ရန်အပြင် ပြိုင်ဘက်များနှင့် ဆွေးနွေးမှုများတွင် အသာစီးရရန် ကြိုးပမ်းမှုဟု ပညာရှင်များက သုံးသပ်ကြသည်။

အာဏာရအလုပ်သမားပါတီ၏ အင်္ဂါနေ့ ဆွေးနွေးမှု အစီအစဉ်တစ်ခုတွင် ကင်မ်က ကိုရီးယား ကျွန်းဆွယ်နှင့် နိုင်ငံတကာ နိုင်ငံရေး စာမျက်နှာ၌ ပေါ်ပေါက်နေသော လုံခြုံရေးဆိုင်ရာ စိန်ခေါ်မှုသစ်များကို ခွဲခြားပြသခဲ့ ကြောင်း နိုင်ငံပိုင် KCNA သတင်းတွင် ဖော်ပြသည်။
ထို့နောက် မြောက်ကိုရီးယား၏ အချုပ်အခြာအာဏာနှင့် အကျိုးစီးပွားကို ကာကွယ်ရေးအတွက် ရန်သူများအား တိုက်ခိုက်ရန်၊ ပြင်ပဆက်ဆံရေးများ ပြုလုပ်ရန် လိုအပ်သော အခြေခံမူဘောင်များနှင့် လမ်းညွှန်ချက်များကို ရှင်းလင်းပြသခဲ့ကြောင်း မြောက်ကိုရီးယားနိုင်ငံပိုင် KCNA သတင်းတွင် ဖော်ပြသည်။

အမေရိကန်သမ္မတဟောင်း ထရမ့်နဲ့ မြောက်ကိုရီးယားခေါင်းဆောင် ကင်မ်ဂျုံအန်ကိုတွေ့ရစဉ် (GATTY IMAGES)

ကင်မ်က ဘက်ပေါင်းစုံ ပြောင်းလဲနိုင်သော အခြေအနေများတွင် ၂၀၂၃ ခုနှစ်အထိ သယ်ဆောင်သွားနိုင်သော ကိုယ့်ကိုယ်ကို ကာကွယ်နိုင်မှု စွမ်းရည်ကို မြှင့်တင်ရေး စတုတ္တမြောက် ပင်မ ရည်မှန်းချက်သစ်ကိုလည်း ချမှတ် ခဲ့သည်ဟု ထိုသတင်းတွင် ဖော်ပြထားသော်လည်း အသေးစိတ်ကိုမူ ရှင်းပြထားခြင်း မရှိပေ။

ယခု ရည်မှန်းချက်သစ်များသည် နျူကလီးယား လက်နက်တိုက်ကို တိုးချဲ့ရေး၊ ဒုံးကျည်ထိပ်ဖူးမျိုးစုံ အသုံးပြု နိုင်သည့် ဒုံးကျည်များ၊ ထောက်လှမ်းရေး ဂြိုဟ်တုနှင့် ခေတ်ရှေ့ပြေး ဒရုန်းများကဲ့သို့ နည်းပညာမြင့် လက်နက်များ ရရှိရေး အစရှိသဖြင့် ကင်မ်ဂျုံအန်၏ ဆောင်ရွက်ချက်များနှင့် ဆက်စပ်မှုရှိနိုင်သည်ဟု လေ့လာသူများက သုံးသပ်သည်။

ကင်မ်ဂျုံအန် အနေဖြင့် နျူကလီးယား လက်နက်တိုက် တိုးချဲ့ခြင်းဖြင့် ၎င်း၏ရန်ဘက်များကို မြောက်ကိုရီးယား သည် တရားဝင် နျူကလီးယားပိုင်နိုင်ငံအဖြစ် အသိအမှတ် ပြုရေးအတွက် အသုံးချလိမ့်မည်ဟုလည်း ၎င်းတို့က သုံးသပ်သည်။

ထိုသို့ အသိအမှတ် ပြုခံရခြင်းသည် မြောက်ကိုရီးယားပေါ် ချမှတ်ထားသော နိုင်ငံတကာ အရေးယူ ပိတ်ဆို့မှု များကို ဖယ်ရှားရေးအတွက် အရေးပါသော ကိစ္စရပ်လည်း ဖြစ်သည်။

Source: AP

CNI International News

ပရစ်တီနာ၊ဒီဇင်ဘာ ၂၈

ဆားဘီးယားအစိုးရသည် ကိုဆိုဗိုနှင့်နယ်စပ်ဒေသရှိ တပ်ဖွဲ့ဝင်များကို တိုက်ခိုက်ရန် အသင့်အနေအထားတွင် ရှိနေ သည်ဟု အေပီက ရေးသားဖော်ပြခဲ့သည်။

တနင်္လာနေ့ဖြစ်ရပ်သည် စစ်ကာလအတွင်း ရန်ဘက်များ ဖြစ်ခဲ့သော နှစ်နိုင်ငံအကြား တင်းမာမှုများ လျော့ချရန် နေတိုးအဖွဲ့၏ တောင်းဆိုမှုများကို လျစ်လျူရှုမှုလည်း ဖြစ်သည်။

ရဲတပ်ဖွဲ့ဝင်များနှင့် တခြား လုံခြုံရေး တပ်ဖွဲ့ဝင်များကို တိုက်ခိုက်ရန် အသင့်အနေထား ရှိနေဖို့ အမိန့်ပေးထား ကြောင်း၊ ၎င်းတို့သည် စစ်ဆင်ရေး အစီအစဉ်အတိုင်း စစ်ဦးစီးချုပ်၏ အမိန့်အောက်တွင် ရှိနေမည်ဖြစ်ကြောင်း ဆားဘီးယားပြည်ထဲရေးဝန်ကြီး ဘရာတီဆလတ်ဗ် ဂါဆစ် (Bratislav Gasic) က ပြောသည်။

ဆားဘီးယားသမ္မတ အလက်ဇန္ဒားဘူချိ ( Aleksandar Vucic)၏ အမိန့်အတိုင်း ယခုကဲ့သို့ ပြုလုပ်ခဲ့ခြင်းဖြစ် ကြောင်း၊ လုပ်ဆောင်မှုအားလုံးသည် ကိုဆိုဗိုရှိ ဆားဘီးယားပြည်သူများကို ကာကွယ်ဆောင်ရွက်ရခြင်း ဖြစ် ကြောင်း ပြည်ထဲရေးဝန်ကြီးက ကြေညာချက် တစ်စောင် ထုတ်ပြန်ခဲ့သည်။

ဆားဘီးယား ကာကွယ်ရေးဝန်ကြီးနှင့် စစ်ဦးစီးချုပ်တို့ ကိုဆိုဗိုနယ်စပ်ကို သွားရောက်စစ်ဆေးစဉ် (AP)

ကိုဆိုဗိုနှင့် နယ်စပ်ဒေသရှိ ဆားဘီးယား တပ်ဖွဲ့များကို ယခင်ကတည်းက တပ်လှန့်ထားခြင်းကြောင့် ယခုကဲ့သို့ အမိန့်ပေးခြင်းမှာ မည်သို့ ရည်ရွယ်သည်လဲ ဆိုသည်ကိုတော့ ရှင်းရှင်းလင်းလင်း မသိရသေးပေ။

ဒေသခံ အယ်လ်ဘေးနီးယားများကြောင့် ကိုဆိုဗိုရှိ ဆားဘီးယား လူမျိုးများ တိုက်ခိုက်ခံနေရကြောင်း အရာရှိ တစ်ချို့က ပြောသည်။

တင်းမာမှုများ မြင့်တက်နေသော ကိုဆိုဗိုဒေသမြောက်ပိုင်းမှ ပစ်ခတ်မှုတစ်ခုကို စုံစမ်းစစ်ဆေးခဲ့သည်ဟု နေတိုး ဦးဆောင်သည့် ငြိမ်းချမ်းမှု ထိန်းသိမ်းရေး တပ်ဖွဲ့များက တနင်္လာနေ့ အစောပိုင်းတွင် ပြောခဲ့သည်။

တိုက်ခိုက်မှု စတင်ရန် အဆင်သင့် ဖြစ်နေမှုကို ပြသခြင်း တစ်ခုအဖြစ် ဆားဘီးယား စစ်ဘက်အရာရှိများက နယ်စပ်ဒေသရှိ တပ်များကို စစ်ဆေးခဲ့သည့်အတွက် တည်တည်ငြိမ်ငြိမ် တုန့်ပြန်ရန် တောင်းဆိုခဲ့သည်။

ပစ်ခတ်မှုသည် တင်းမာမှုများ မြင့်တက်နေသော ဇူဘန်ပိုတော့ခ် (Zubin Potok) မြို့တွင် ဖြစ်ပွားခဲ့ခြင်းဖြစ်ကာ ထိခိုက်ဒဏ်ရာ ရရှိသူမရှိခဲ့ဟု ငြိမ်းချမ်းမှု ထိန်းသိမ်းရေးတပ်ဖွဲ့ KFOR က ပြောသည်။

 ဆားဘီးယားတပ်ဖွဲ့ စစ်ရေးပြင်ဆင်နေမှုကိုတွေ့ရစဉ် (AP) 

ဆားဘီးယား ကာကွယ်ရေးဝန်ကြီးနှင့် စစ်ဦးစီးချုပ်တို့သည် ကိုဆိုဗိုနယ်စပ်သို့ သွားရောက်ကာ တပ်ဖွဲ့ဝင်များ၏ အဆင်သင့်ဖြစ်မှုနှင့် လက်နက် အင်အားတို့ကို ချီးကျူးခဲ့သည်။ ဆားဘီးယားသည် ဟောင်ဝှစ်ဇာများ အပါအဝင် စစ်လက်နက်ကြီးများကို နယ်စပ်တွင် ဖြန့်ကျက်ထားသည်။

ဆားဘီးယားသည် ၎င်းတို့၏ ပြည်နယ်တစ်ခု ဖြစ်ခဲ့ဖူးသော ကိုဆိုဗိုဒေသအပေါ် ကာလရှည် စစ်ရေးအရ ခြိမ်းခြောက်မှု ပြုလုပ်လျက်ရှိသည်။

၁၉၉၈-၉၉ ခုနှစ်တို့တွင် နှစ်ဖက်အကြား စစ်ပွဲဖြစ်ပွားခဲ့ပြီး နေတိုး၏ ကြားဝင်မှုကြောင့် စစ်အဆုံးသတ်နိုင်ခဲ့ သော်လည်း ကိုဆိုဗိုသည် စစ်ပွဲအဖြစ်ပွားနိုင်ဆုံး နေရာများမှ တစ်ခုအဖြစ် တည်ရှိနေဆဲ ဖြစ်သည်။

ကိုဆိုဗို၏ ၂၀၀၈ လွတ်လပ်ရေးကြေညာမှုကို ဆားဘီးယားဘက်မှ အသိအမှတ် ပြုထားခြင်း မရှိဘဲ ထိုကိစ္စအပေါ် အဖြေရှာရန် အနောက်အုပ်စု၏ ကြိုးပမ်းမှုများလည်း လက်ရှိအချိန်အထိ မအောင်မြင်သေးပေ။

Source: AP

CNI International News

ဆိုးလ်၊ ဒီဇင်ဘာ ၂၈

သမ္မတ၏ လွတ်ငြိမ်းချမ်းသာခွင့်ရရှိမှုကြောင့် တောင်ကိုရီးယားသမ္မတဟောင်း လီမြောင်ဘတ် (Lee Myung-bak) ၏ ပြစ်ဒဏ်မှာလျော့ကျသွားခဲ့သည်ဟု Aljazeera သတင်းတွင်ဖော်ပြသည်။

သမ္မတဟောင်းသည် အကျင့်ပျက်ခြစားမှုအတွက် ထောင်ဒဏ် ၁၇ နှစ် ချမှတ်ခံထားရသူဖြစ်သည်။

လက်ရှိတောင်ကိုရီးယားသမ္မတ ယွန်ဆော့ရွဲ (Yoon Seok-yeol) က လွတ်ငြိမ်းချမ်းသာခွင့် အစိတ်အပိုင်း တစ်ခုအဖြစ် သမ္မတဟောင်း၏ ပြစ်ဒဏ်လျော့ပေါ့မှုများကို အင်္ဂါနေ့တွင်ပြုလုပ်ပေးခဲ့သည်။ ယင်းက အရှေ့အာရှ နိုင်ငံများတွင် နိုင်ငံတော်အားလပ်ရက်များအတွက် ပုံမှန်ပြုလုပ်နေကျ အလေ့အထတစ်ခုလည်းဖြစ်သည်။

သမ္မတယွန်သည် ပြန်လည်သင့်မြတ်ခြင်း၊ သည်းခံခြင်း၊ စဉ်းစားပေးခြင်းစသည်တို့ဖြင့် အမျိုးသားညီညွတ်ရေးကို မြှင့်တင်ရန် လူပေါင်း ၁၃၀၀ ကျော်ကို လွတ်ငြိမ်းချမ်းသာခွင့်များထုတ်ပြန်ခဲ့သည်ဟု တောင်ကိုရီးယား ဥပဒေ ရေးရာဝန်ကြီး ဟန်ဒေါင်ဟွန်း (Han Dong-hoon) က ပြောသည်။

သမ္မတဟောင်း လီမြောင်ဘတ်သည် ဆိုးလ်ရှိ တရားရုံးသို့ ရောက်ရှိလာစဉ်(ဓါတ်ပုံ-အေအက်ဖ်ပီ)

ယွန်သည် သမ္မတဟောင်းကို သတ်မှတ်ထားသည့် ပြစ်ဒဏ်အတိုင်း ထောင်ထဲတွင်ထားရှိရန် ယခုနှစ်အစောပိုင်းက ပြောခဲ့ဖူးသည်။ ပြစ်ဒဏ်အတိုင်းဆိုလျှင် လီမြောင်ဘတ်သည် အသက် ၉၀ ကျော်အရွယ်အထိ ထောင်ထဲတွင် နေထိုင်ရမည်ဖြစ်သည်။ အင်္ဂါနေ့က ထုတ်ပြန်ခဲ့သည့် သမ္မတလွတ်ငြိမ်းချမ်းသာခွင့်တွင် ပြည်နယ်အုပ်ချုပ်ရေးမှူး ဟောင်း ကင်ဂျောင်ဆိုး(Kim Kyoung-soo) နှင့် ဘဏ္ဍာရေးဝန်ကြီးဟောင်း ချွိုင်ဂျောင်ဝှမ် (Choi Kyoung-hwan) တို့လည်း ပါဝင်နေသည်။

လီသည် ၂၀၀၈ ခုနှစ်မှ ၂၀၁၃ ခုနှစ်အထိ သမ္မတရာထူးကို ထမ်းဆောင်ခဲ့သူဖြစ်ကာ အကျင့်ပျက်ခြစားမှု၊ အလွဲ သုံးစားမှုတို့ဖြင့် ၂၀၁၈ တွင်ပြစ်ဒဏ်ပေးခံခဲ့ရသည်။ လီသည် ဟွန်ဒိုင်း (Hyundai) ကုမ္ပဏီတွင် အောင်မြင်ခဲ့သော ၎င်း၏ နောက်ခံအင်အားဖြင့် နိုင်ငံရေးလောကတွင်းသို့ ဝင်ရောက်လာခဲ့သူဖြစ်ကာ ဆမ်ဆောင်း (Samsung) အပါ အဝင်ကုမ္ပဏီကြီးများမှ လာဘ်ငွေများရယူခဲ့ခြင်းနှင့် ၎င်း၏ကုမ္ပဏီများမှ ရံပုံငွေများကို အလွဲသုံးစားလုပ်ခြင်း စသည့် ပြစ်မှုများအတွက် စွပ်စွဲခံထားရသည်။ အဆိုပါ စွပ်စွဲထားမှုများကို လီက ငြင်းဆိုခဲ့သည်။

ထိုစွဲချက်များနှင့်ပတ်သတ်၍ အောက်တရားရုံတစ်ခုမှ ၎င်းကိုအာမခံပေးခဲ့သော်လည်း ဗဟိုတရားရုံးချုပ်က ၎င်း ၏ ၁၇ နှစ် ပြစ်ဒဏ်ကို ၂၀၂၀ ခုနှစ်တွင်အတည်ပြုခဲ့သည့်အတွက် ထောင်ထဲသို့ပြန်လည်ရောက်ရှိခဲ့သူဖြစ်သည်။

အသက် ၈၁ နှစ်ရှိပြီဖြစ်သော လီသည် ၎င်း၏ ကျန်းမာရေးအခြေအနေများကြောင့် ဇွန်လတွင် ထောင်မှ ယာယီ လွှတ်ပေးခြင်း ခံခဲ့ရသည်။ သမ္မအဖြစ် တာဝန်ယူနေစဉ်အတွင်း လီသည် တောင်ကိုရီးယားနိုင်ငံကို ကမ္ဘာလုံးဆိုင် ရာ ငွေကြေးပျက်ကပ်အခြေအနေမှ ရုန်းထွက်နိုင်အောင် ကူညီပေးနိုင်ခဲ့သော်လည်း မြောက်ကိုရီးယားနှင့် ပတ်သက်သည့် တင်းမားမှုအခြေအနေများကြောင့် ပြင်းထန်သည့် ဝေဖန်မှုများနှင့် ရင်ဆိုင်ခဲ့ရသည်။

Source:Aljazeera

CNI International News

ထိုင်ဝမ်၊ ဒီဇင်ဘာ ၂၈

၂၀၂၄ ခုနှစ်မှစတင်ကာ ထိုင်ဝမ်၏ စစ်မှုမထမ်းမနေရ ဥပဒေကို လေးလမှ တစ်နှစ်အထိ တိုးမြှင့်သွားမည်ဟု သမ္မတဆိုင်အင်ဝမ် (Tsai Ing-wen)က အင်္ဂါနေ့(ဒီဇင်ဘာ ၂၇ ရက်)တွင် ပြောကြားခဲ့ကြောင်း အယ်ဂျာဇီးယား သတင်းတွင် ဖော်ပြထားသည်။

တရုတ်ဘက်မှ စစ်ဘက်ဆိုင်ရာ ဖိအားများ မြင့်တက်လာချိန်တွင် ထိုသို့ ဆောင်ရွက်ခြင်း ဖြစ်သည်။

အမျိုးသားလုံခြုံရေး အစည်းအဝေးတစ်ခုတွင် ဆိုင်အင်ဝမ်က ထိုင်ဝမ်၏ ကိုယ့်ကိုယ်ကို ကာကွယ်မှုကို မြှ့တင် ရေး ဆွေးနွေးရန် တောင်းဆိုခဲ့ကြောင်း၊ ထိုင်ဝမ်သည် ငြိမ်းချမ်းရေးကိုသာ လိုလားသော်လည်း ကိုယ့်ကိုယ်ကို ကာကွယ်နိုင်ရန် လိုအပ်နေသည်ဟု ဆိုသည်။

ထိုင်ဝမ် အင်အားကောင်းမွန်နေသ၍ လွတ်လပ်မှုနှင့် ဒီမိုကရေစီဝါဒကို ကိုင်စွဲထားနိုင်ကာ စစ်တလင်းမြေ ဖြစ်လိမ့် မည် မဟုတ်ဟု သမ္မတဆိုင်အင်ဝမ်က သတင်းစာ ရှင်းလင်ပွဲတွင် ပြောခဲ့သည်။

သမ္မတဆိုင်အင်ဝမ် မိန့်ခွန်းပြောနေစဉ် (Reuters)

စစ်မှုထမ်းခြင်းကို တိုးမြှင့်ရေး ဆုံးဖြတ်ချက်ကိုလည်း အလွန်ခက်ခဲ့သည့် လုပ်ရပ်ဟု သူမက ညွှန်းဆိုခဲ့သည်။

အရန်တပ်ဖွဲ့များ အပါအဝင် လက်ရှိ စစ်ဘက်စနစ်များက တရုတ်ဘက်မှ မြင့်တက်လာသော စစ်ဘက်ဆိုင်ရာ ခြိမ်းခြောက်မှုများကို ရင်ဆိုင်ရာ ထိရောက်မှု၊ လုံလောက်မှုမရှိဟုလည်း ဆိုင်က ပြောသည်။

ထိုင်ဝမ်အပေါ် တရုတ်၏ ခြိမ်းခြောက်မှုများနှင့် ရန်စမှုများသည် ပို၍ သိသာထင်ရှားလာကြောင်း၊ မည်သူမှ စစ်ကို လိုလားမှု မရှိကြောင်း၊ သို့သော် ငြိမ်းချမ်းရေးဆိုသည်မှာလျှင် သူ့အလိုလို ကောင်းကင်မှ ကျလာမည်မဟုတ် ကြောင်း သူမက ပြောသည်။

ဒီမိုကရေစီနှင့် အာဏာရှင်စနစ်တို့တွင် ထိုင်ဝမ်အနေဖြင့် ဒီမိုကရေစီစနစ်ကိုသာ ယုံကြည်ကြောင်း၊ စစ်နှင့် ငြိမ်းချမ်းရေးတွင် ငြိမ်းချမ်းရေးကိုသာ ရွေးချယ်မည်ဖြစ်ကြောင်း ကမ္ဘာကိုပြလိုသည်ဟု သမ္မတက ပြောသည်။

ထိုင်ဝမ်စစ်တပ်ကိုတွေ့ရစဉ် (GETTY IMAGES)

စစ်မှုထမ်းဥပဒေကို ပြောင်းလဲမှုကြောင့် စစ်မှုမထမ်းမနေရ အခြေအနေကြောင့် စစ်တပ်တွင်း ရောက်ရှိလာ သူများ သည် ပို၍ပြင်းထန်သော လေ့ကျင့်မှုများကို လုပ်ဆောင်ကြ ရမည်လည်း ဖြစ်သည်။

၎င်းတို့တွင် ပစ်ခတ်မှု လေ့ကျင့်ခန်းများ၊ အမေရိကန်တပ်ဖွဲ့ဝင်များ အသုံးပြုသည့် ခြေမှုန်းရေးတို့အပြင် လေယာဉ်ပစ်နှင့် တင့်ကားပစ် ဒုံးကျည်များကို ကိုင်တွယ်မှု အပါအဝင် ပို၍ ပြင်းထန်သော လက်နက်များကို အသုံးပြုခြင်း လေ့ကျင့်ခန်းများလည်း ပါဝင်မည်ဟု သိရသည်။

ထိုင်ဝမ်ကို တရုတ်ဘက်က ၎င်းတို့ပိုင်နက် ဖြစ်သည်ဟု ကြေညာထားသော်လည်း တိုင်ပေဘက်မှ ထိုပြောဆိုချက် ကို ငြင်းဆိုထားသည်။ ထို့အပြင် တနင်္လာနေ့တွင် တရုတ်လေတပ်က ထိုင်ဝမ်၏ လေကြောင်း ကာကွယ်ရေးဇုံ အတွင်းသို့ အင်အားအများဆုံးဖြင့် ရုတ်တရက် ကျူးကျော်ဝင်ရောက်ခဲ့သည်ဟု သတင်းများတွင် ဖော်ပြသည်။ တရုတ်စစ်တပ်မှ လေယာဉ် ၄၃ စင်းသည် နှစ်နိုင်ငံကြား တရားဝင် မဟုတ်သော စစ်မဲ့ဇုန်အတွင်းသို့ ဖြတ်ကျော် လာခြင်းဖြစ်သည်။ ထို့အပြင် တရုတ်သည် ထိုင်ဝမ် ရေပိုင်နက်အနီးတွင်လည်း စစ်ရေးလေ့ကျင့်မှုများကို လုပ်ဆောင်ခဲ့သည်။

Source: အယ်ဂျာဇီးယား

CNI International News

ဆိုးလ်၊ဒီဇင်ဘာ ၂၇

မြောက်ကိုရီးယား ဒရုန်းများ ပိုင်နက်ကျူးကျော်လာမှုကြောင့် ဒီဇင်ဘာ ၂၆ ရက်တွင် တောင်ကိုရီးယားနိုင်ငံက သတိပေး ပစ်ခတ်ခြင်း၊ ဂျက်တိုက်လေယာဉ်များ စေလွှတ်ခြင်းနှင့် နယ်စပ်တလျှောက် ထောက်လှမ်းရေးယာဉ် များ ပျံသန်းခြင်းဖြင့် တုန့်ပြန်ခဲ့သည်ဟု အေပီသတင်းမှာ ဖော်ပြထားသည်။

မြောက်ကိုရီးယား ဒရုန်းများသည် ငါးနှစ်အတွင်း ပထမဆုံးအဖြစ် တောင်ကိုရီးယားဘက်သို့ ကျူးကျော် ဝင်ရောက် လာခဲ့ခြင်း ဖြစ်သည်။

မြောက်ကိုရီးယားဘက်မှ ဒရုန်း ၅ စင်း နယ်စပ်ဖြတ်ကျော်လာခြင်းကို တောင်ကိုရီးယားစစ်တပ်မှ သတိ ပြုမိခဲ့ ကြောင်း၊ ထိုအထဲမှ တစ်စင်းမှာ နယ်စပ်ကနေ တစ်နာရီနီးပါး ပျံသန်းရသည့် မြို့တော် မြောက်ဘက်အထိပင် ရောက်ရှိလာခဲ့ကြောင်း တောင်ကိုရီးယားပူးတွဲစစ်ဦးစီးချုပ်က ပြောသည်။

၎င်းကို တုန့်ပြန်ရန် သတိပေးပစ်ခတ်မှုများအပြင် ဒရုန်းများကို ပစ်ချရန် ဂျက်တိုက်လေယာဉ်များနှင့် တိုက်ခိုက် ရေး ရဟတ်ယာဉ်များကိုပါ စေလွှတ်ခဲ့သည်ဟု သိရသည်။

မြောက်ကိုရီးယား နိုင်ငံဘက်ခြမ်းကိုတွေ့ရစဉ် (AP)

တိုက်ခတ်ရေး ရဟတ်ယာဉ်များမှ စုစုပေါင်းအကြိမ် ၁၀၀ ခန့် ပစ်ခတ်ခဲ့ပြီး ထိုပစ်ခတ်မှုများတွင် မြောက်ကိုရီးယား ဒရုန်းများကို ပစ်ခတ်နိုင်ခဲ့သလားဆိုသည်ကိုတော့ မသိရသေးပေ။ ထိုအဖြစ်အပျက်များကြောင့် အရပ်သားများ ထိခိုက်မှုနှင့်ပတ်သက်သည့် သတင်းပေးပို့မှုများလည်း မရှိသေးကြောင်း တောင်ကိုရီယား ကာကွယ်ရေးဌာနက ပြောသည်။

ဒရုန်းများ မစေလွှတ်ခင် မြောက်ကိုရီးယားသည် တာတိုပစ် ပဲ့ထိန်းဒုံးကျည် နှစ်စင်းကိုလည်း ပစ်လွှတ်ခဲ့သေး သည်။ တောင်ကိုရီးယား - အမေရိကန် ပူးတွဲစစ်ရေး လေ့ကျင့်မှုကို တုန့်ပြန်ရန် ပစ်လွှတ်စမ်းသပ်ခဲ့ခြင်း ဖြစ်သည်။

ဒီဇင်ဘာ ၂၆ ရက်နေ့က ဖြစ်စဉ်တွင် တောင်ကိုရီးယား ဂျက်တိုက်လေယာဉ် တစ်စင်းဖြစ်သော KA-1 တိုက်ခိုက် ရေး လေယာဉ်သည် ပျံတက်စဉ် ပျက်ကျမှုဖြစ်ပွားခဲ့ပြီး လေယာဉ်မှူးနှစ်ဦး စလုံးမှာ ဘေးကင်စွာ ခုန်ထွက်နိုင်ခဲ့ ကြောင်း ကာကွယ်ရေးဌာနက ပြောသည်။

မြို့တော် ဆိုးလ် အနီးတစ်ဝိုက်ရှိ အရပ်ဘက်သုံး လေဆိပ်များမှ လေယာဉ်ပျံတက်မှုများကို ယာယီရပ်နားရန် တောင်ဆိုထားသည်ဟုလည်း ပြောသည်။

တောင်ကိုရီးယားဘက်မှ တုန့်ပြန်မှုများတွင် နယ်စပ်အနီးနှင့် နယ်စပ်တလျှောက်ရှိ မြောက်ကိုရီးယား၏ စစ်ဘက်ဆိုင်ရာ အဆောက်အဦ များကို ဓာတ်ပုံရိုက်ရန် ထောက်လှမ်းရေးယာဉ်များကိုလည်း စေလွှတ်ခဲ့သည်ဟု ပူးတွဲစစ်ဦးစီးချုပ်က ပြောသည်။

မြောက်ကိုရီးယား ဒရုန်းကိုတွေ့ရစဉ် (AP)

ထိုကိစ္စအပေါ် အသေးစိတ် ရှင်းပြခြင်းမျိုး မရှိသော်လည်း မြောက်ကိုရီးယား ပိုက်နက်အတွင်းသို့ လူမဲ့ဒရုန်းများစေ လွှတ်ခြင်းမျိုး ဖြစ်နိုင်သည်ဟု လေ့လာသူတချို့က သုံးသပ်သည်။

တနင်္လာနေ့ဖြစ်စဉ်သည် ၂၀၁၇ ခုနှစ်နောက်ပိုင်း ပထမဆုံးအဖြစ် တောင်ကိုရီးယား လေပိုင်နက်အတွင်းသို့ မြောက်ကိုရီးယား ဒရုန်းများ ဝင်ရောက်လာခြင်းဖြစ်သည်။

၂၀၁၇ ခုနှစ်တွင် မြောက်ကိုရီးယားဘက်မှဟု သံသရရှိသော ဒရုန်းတစ်စင်း တောင်ကိုရီးယားတွင် ပျက်ကျနေ သည်ကို တွေ့ခဲ့ရသည်။ ထိုဒရုန်းသည် ဆိုနီကုမ္ပဏီထုတ် ကင်မရာဖြင့် တောင်ကိုရီးယားရှိ အမေရိကန်ဒုံးကျည် ကာကွယ်ရေးစနစ်များကို ဓာတ်ပုံရိုက်ခဲ့ခြင်းဖြစ်သည်ဟု တောင်ကိုရီးယား စစ်ဘက်အရာရှိများက ပြောသည်။

Source: AP

CNI International News

မင့်ခ်၊ ဒီဇင်ဘာ ၂၇

ဘယ်လာရုစ်နိုင်ငံတွင် ရုရှားဘက်က တပ်ဆင်ထားသော Iskander တာတိုပစ် ဒုံးကျည်စနစ်နှင့် S-400 ကာကွယ် ရေးစနစ်တို့မှာ ပစ်ခတ်ရန် အသင့်အနေအထား၌ ရှိနေပြီဖြစ်ကြောင်း ဘယ်လာရုစ်ထိပ်တန်း အရာရှိတစ်ဦးက ပြောသည်ဟု အယ်ဂျာဇီးယားသတင်းတွင် ဖော်ပြထားသည်။

ရုရှားနှင့် ဘယ်လာရုစ်မှ လက်နက်ကိုင်တပ်ဖွဲ့များ၏ ပူးတွဲတိုက်ခိုက်ရေး လေ့ကျင့်မှုများအတွင်း ဘယ်လာရုစ် စစ်သားများနှင့် အမှုထမ်းများသည် ၎င်းတို့၏ လေ့ကျင့်ရေးလုပ်ငန်းများကို ပြီးမြောက်အောင် ဆောင်ရွက်နိုင်ခဲ့ သည်ဟု ဘယ်လာရုစ်ကာကွယ်ရေးဌာန၏ အရာရှိတစ်ဦးဖြစ်သူ လီယိုနစ်ကာဆင်စကီ (Leonid Kasinsky) က ပြောသည်။

တနင်္ဂနွေနေ့(ဒီဇင်ဘာ ၂၅ ရက်)က အွန်လိုင်းပေါ် ရောက်ရှိလာသော ဗွီဒီယိုတစ်ခုတွင် ထိုသို့ ပြောဆိုခဲ့ခြင်း ဖြစ်သည်။

ပူတင်နဲ့ လူကာရှန်ကို ကိုတွေ့ရစည် (GETTY IMAGES)

Iskandar နှင့် S-400 စနစ်များမှာ ယနေ့မှစ၍ ၎င်းတို့၏ သက်ဆိုင်ရာတာဝန် အသီးသီးကို ထမ်းဆောင်ရန် အသင့် အနေအထားတွင် ရှိနေသည်ဟုလည်း ၎င်း၏ပြောဆိုမှုတွင် ပါဝင်သည်။

ဘယ်လာရုစ်ကို ၎င်းတို့၏ Iskander နှင့် လေကြောင်းကာကွယ်ရေးစနစ်များ ထောက်ပံ့ပေးမည်ဟု ရုရှားသမ္မတ ပူတင် (Putin)က ဇွန်လတွင် ပြောဆိုခဲ့သည်။

Iskander စနစ်များသည် နျူကလီးယား ထိပ်ဖူးများကို သယ်ဆောင်နိုင်သည့် စွမ်းရည်မျိုးရှိပြီး ဘယ်လာရုစ်တွင် ရုရှားဘက်မှ အဆိုပါ ဒုံးကျည်စနစ် မည်မျှ တပ်ဆင်ထားသည်ကိုတော့ မသိရသေးပေ။

အဆိုပါ သတင်းများသည် ယူကရိန်းကျူးကျော်မှုတွင် ပါဝင်ကူညီရေး ဘယ်လာရုစ်ကို ရုရှားဘက်က ဖိအားများ တိုးမြှင့်လာချိန်၌ ပေါ်ပေါက်လာခဲ့ခြင်း ဖြစ်သည်။

S-400 လေကြောင်းရန်ကာကွယ်ရေးစနစ်ကိုတွေ့ရစဉ် (AFP)

ဖော်ဖော်ဝါရီလ ယူကရိန်းကျူးကျော်မှု စတင်ချိန်တွင် ရုရှားတပ်များက ယူကရိန်းမြို့တော်ကို တိုက်ခိုက်ရန် ဘယ်လာရုစ်နယ်မြေအား ၎င်းတို့၏ လေကြောင်း ပစ်ခတ်ရေးစင်တာအဖြစ် အသုံးပြုခဲ့သည်။

ပြီးခဲ့သည့် လများအတွင်း ရုရှားနှင့်ဘယ်လာရုစ်တို့အကြား စစ်တပ်ခြင်း ပူးတွဲဆောင်ရွက်ချက်များ ပိုများလာ သည်ကိုလည်း တွေ့ရသည်။ Iskander-M သည် ရွေ့လျားနိုင်သည့် ပဲ့ထိန်းဒုံးကျည်စနစ် တစ်ခုဖြစ်ပြီး ၎င်းကို နေတိုးဘက်မှ SS-26 Stone ဟု အမည်ပေးထားသည်။

ထိုစနစ်သည် ဆိုဗီယက်ခေတ် Scud များ နေရာတွင် အစားထိုး ဝင်ရောက်လာခြင်း ဖြစ်သည်။ စနစ်တွင် ပါဝင် သော ဒုံးကျည်နှစ်စင်းသည် အများဆုံး ၅၀၀ ကီလိုမီတာအထိ ပျံသန်းနိုင်ကာ သမားရိုးကျ ဒုံးလက်နက် သို့မဟုတ် နျူကလီးယား လက်နက်ကို တပ်ဆင်အသုံး ပြုနိုင်သည်။

ဒုံးကျည်၏ ပျံသန်းနိုင်မှုက ဘယ်လာရုစ် နယ်နိမိတ်ကို ကျော်လွန်နေပြီး ယူကရိန်းနှင့် နေတိုးအဖွဲ့ဝင် ပိုလန်နိုင်ငံ အထိပါ ရောက်ရှိနိုင်ခြင်းကြောင့် ထိုနိုင်ငံများနှင့် ဘယ်လာရုစ်တို့အကြား ဆက်ဆံရေးကို ထိခိုက်စေခဲ့သည်။

S-400 သည် ရုရှား၏ မြေပြင်မှဝေဟင်ပစ် လေကြောင်း ကာကွယ်ရေးစနစ်ဖြစ်ကာ ဘယ်လာရုစ် စစ်တပ်မှ လေယာဉ်များသည်လည်း နည်းပညာမြင့် လေကြောင်း လက်နက်များကို တပ်ဆင်နိုင်ရန် အသွင်ပြောင်းထား သည်ဟု ကာစင်စကီက ပြောသည်။

Source: အယ်ဂျာဇီးယား

CNI International News

ဘေဂျင်း၊ဒီဇင်ဘာ ၂၆

ထိုင်ဝမ်အနီး ရေပြင်နှင့် လေပိုင်နက်အတွင်းမှာ ပစ်ခတ်လေ့ကျင့်မှုများကို လုပ်ဆောင်ခဲ့သည်ဟု တရုတ်စစ်တပ် က တနင်္ဂနွေနေ့(ဒီဇင်ဘာ ၂၅ ရက်)တွင် ထုတ်ပြန်ခဲ့ကြောင်း ရိုက်တာသတင်းတွင် ဖော်ပြထားသည်။

အဆိုပါ စစ်ရေးလေ့ကျင့်မှုက ထိုင်ဝမ်နှင့်အမေရိကန်တို့၏ ခြိမ်းခြောက်မှုအပေါ် တုန့်ပြန်မှု ဖြစ်သည်ဟု တရုတ်စစ်တပ်က ပြောသည်။

တရုတ်ဘက်က ထိုင်ဝမ်သည် ၎င်းတို့ပိုင်နက် ဖြစ်သည်ဟု ပြောကြားထားသည်။ သို့သော် တရုတ်၏ လုပ်ရပ်များ သည် ဒေသတွင်း ငြိမ်းချမ်းရေးကို ဖျက်ဆီးနေကြောင်း၊ ၎င်းတို့သည် ထိုင်ဝမ်ပြည်သူများကို ခြိမ်ခြောက် နေသည် ဟု ထိုင်ဝမ်ဘက်က ပြောသည်။

တိုင်ပေ(ထိုင်ဝမ်)ကို ထိုစဉ်က အမေရိကန်လွှတ်တော်ဥက္ကဋ္ဌ နန်စီပလိုစီ ရောက်ရှိလာခဲ့ပြီးနောက် သြဂုတ်လတွင် တရုတ်ဘက်က ထိုင်ဝမ်အနီး၌ စစ်ရေးလေ့ကျင့်မှုများ လုပ်ဆောင်ခဲ့သေးသည်။

ထိုင်ဝမ်ကို စစ်ရေး အကူအညီများ မြှင့်တင်ပေးမည့် ကာကွယ်ရေးဆိုင်ရာ ဥပဒေသစ်နှင့် ပတ်သက်၍လည်း တရုတ်က စနေနေ့တွင် အမေရိကန်ကို ပြစ်တင်ရှုတ်ချခဲ့သည်။

ထိုင်ဝမ် သတင်းများ ဖော်ပြထားသည်ကိုတွေ့ရစဉ်(Reuters)

ထုတ်ပြန်ခဲ့သော ကြေညာချက် တစ်စောင်တွင် တရုတ်ပြည်သူ့ လွတ်မြောက်ရေးပါတီ၏ အရှေ့ပိုင်းစစ်ဌာနချုပ်မှ ပူးတွဲတိုက်ခိုက်ရေး အဆင်သင့် ဖြစ်မှုဆိုင်ရာ ကင်းလှည့်မှုနှင့် ပူးတွဲပစ်ခတ်မှုဆိုင်ရာ လေ့ကျင့်မှုတို့ကို ထိုင်ဝမ် အနီးတစ်ဝိုက်တွင် ပြုလုပ်ခဲ့သည်ဟု ဖော်ပြထားသော်လည်း နေရာအတိအကျကို မဖော်ပြထားပေ။

၎င်းက ထိုင်ဝမ်နှင့် အမေရိကန်တို့၏ ရန်လိုမှုနှင့် ပွတ်တိုက်မှုများ မြင့်တက်လာစေခြင်းပေါ် တုန့်ပြန်မှုဟုလည်း ဖော်ပြထားပြီး အသေးစိတ်ကိုမူ မရှင်းလင်းထားပေ။

ထိုင်ဝမ်ဘက်ကလည်း ၎င်းတို့တပ်များ အနေဖြင့် အချုပ်အခြာ အာဏာကို ကာကွယ်ရန်အတွက် လိုအပ်သော ဆောင်ရွက်ချက်များ အာလုံးကို လုပ်ဆောင်သွားမည်ဖြစ်ကြောင်း၊ တရုတ်၏ လုပ်ရပ်များသည် ကွဲပြားမှုများကို အင်အားသုံး ဖြေရှင်းလိုသည့် ၎င်းတို့၏သဘောထားကို ထပ်မံဖော်ပြခြင်းဖြစ်ကြောင်း၊ ဒေသတွင်း တည်ငြိမ်မှုနှင့် ငြိမ်းချမ်းရေးကို ဖျက်ဆီးနေကြောင်း တုန့်ပြန်ထားသည်။

ထိုင်ဝမ်-အမေရိကန် ပူးပေါင်းမှုသည် အင်ဒို-ပစိဖိတ်ဒေသအတွက် လွတ်လပ်မှု၊ ပွင့်လင်းမှု၊ ငြိမ်းချမ်းမှု နှင့် တည်ငြိမ်မှုတို့ကို ဖြစ်စေပြီး ထိုင်ဝမ်အနေဖြင့် ကိုယ့်ကိုယ်ကို ကာကွယ်ရေး လိုအပ်ချက်၊ ရန်သူဘက်မှ ခြိမ်း ခြောက် မှုများနှင့်အညီ စစ်အင်အားကို ဆက်လက် တိုးချဲ့သွားမည်ဟု ထိုင်ဝမ်ကာကွယ်ရေးဌာနက ပြောသည်။

တရုတ်နိုင်ငံကိုတွေ့ရစဉ်(Reuters)

တရုတ်စစ်တပ်သည် ပြီးခဲ့သည့် သုံးနှစ်အတွင်း ထိုင်ဝမ်အနီး စစ်ရေးလှုပ်ရှားမှုများကို ဆက်တိုက်လုပ်ဆောင်ခြင်း သို့မဟုတ် တရုတ်နိုင်ငံပိုင်အဖြစ် လက်ခံရေး တိုင်ပေကို ဖိအေားပးရန် တရုတ်ဘက်က ခြိမ်းခြောက်မှုများ လုပ် ဆောင်နေသည်ဟု ထိုင်ဝမ်ဘက်က ထုတ်ဖော် ပြောဆိုထားသည်။

နှစ်နိုင်ငံကြား သံတမန်ဆက်ဆံရေး မရှိသော်လည်း အမေရိကန်သည် ထိုင်ဝမ်၏ အရေးပါဆုံး နိုင်ငံတကာ မိတ်ဆွေ တစ်ဦးဖြစ်သလို လက်နက်ထောက်ပံ့သူလည်း ဖြစ်သည်။

တရုတ်အစိုးရသည် ထိုင်ဝမ်ကို ၎င်းတို့နိုင်ငံ ပိုက်နက်အဖြစ် သိမ်းသွင်းရေးအတွက် အင်အားသုံးမည်ဆိုခြင်းကို လုံးဝ ငြင်းပယ်ထားခြင်း မရှိပေ။

သို့သော် ထိုင်ဝမ်ဘက်မှ တရုတ်၏ ပြောဆိုချက်များကို ပြင်းပြင်းထန်ထန် ငြင်းဆိုထားကာ ၎င်းတို့၏ အနာဂတ်ကို ပြည်သူ ၂၃ သန်းကသာ ဆုံးဖြတ်မည်ဟု ပြောဆိုထားသည်။

Source: ရိုက်တာ

CNI International News

ဘေဂျင်း၊ဒီဇင်ဘာ ၂၆

ယူကရိန်းစစ်ပွဲနှင့် ပတ်သက်သည့် တရုတ်နိုင်ငံ၏ ရပ်တည်ချက်ကို တရုတ်နိုင်ငံခြားရေးဝန်ကြီး ဝမ်ယိ( Wang Yi) က ကာကွယ်ပြောဆိုခဲ့သလို လာမည့်နှစ်တွင် ရုရှားနှင့်ဆက်ဆံရေးကို ပို၍ခိုင်မာအောင် ဆောင်ရွက်သွားမည်ဟု ပြောကြားခဲ့ကြောင်း အယ်ဂျာဇီးယားသတင်းမှာ ဖော်ပြထားသည်။

ဒီဇင်ဘာ ၂၅ ရက်နေ့က တရုတ်မြို့တော်တွင် ပြုလုပ်ခဲ့သော ဗွီဒီယိုကွန်ဖရင့်ညီလာခံတစ်ခုတွင် ဝမ်ယိ က အမေရိကန်နိုင်ငံကိုလည်း အပြစ်တင်ခဲ့သည်။

အမေရိကန်သည် ကမ္ဘာ့အကြီးဆုံး စီးပွားရေးအင်အားကို ပိုင်ဆိုင်ထားသည့် နှစ်နိုင်ငံကြားတွင် ဆက်ဆံရေး ဆိုး ရွားအောင် ဆောင်ရွက်နေကြောင်း၊ တရုတ်နိုင်ငံအနေဖြင့် အမေရိကန်၏ မှားယွင်းသော တရုတ်နိုင်ငံဆိုင်ရာ မူဝဒါ ကို ပြင်းပြင်းထန်ထန် ကန့်ကွက်ကြောင်း ဝမ်ယိ က ပြောသည်။

ဝမ်ယိ နဲ့ ဘလင်ကင်ကိုတွေ့ရစဉ် (GETTY IMAGES)

တရုတ်အစိုးရသည် ကုန်သွယ်ရေး၊ နည်းပညာ၊ လူ့အခွင့်အရေးနှင့် အနောက် ပစိဖိတ်ဒေသအတွင်း နယ်မြေများ ပိုင်ဆိုင်ကြောင်း ကြေညာခြင်း စသည်တို့နှင့် ပတ်သက်၍ ၎င်းတို့အပေါ် ကျရောက်လာသော အနောက်အုပ်စု၏ ဖိအားကို ဖယ်ရှားရန် ကြိုးပမ်းနေခြင်းဖြစ်သည်။

ထို့နောက် အမေရိကန်နိုင်ငံသည် ၎င်းတို့အပေါ် အနိုင်ကျင့်နေသည်ဟု တရုတ်နိုင်ငံခြားရေးဝန်ကြီး ဝမ်ယိ က စွပ်စွဲထားသည်။

ထို့အပြင် ယူကရိန်းအရေးနှင့်ပတ်သက်၍ ရုရှားနိုင်ငံအပေါ် ပြစ်တင်ရှုတ်ချရန်နှင့် တခြားနိုင်ငံများကဲ့သို့ ပိတ်ဆို့ အရေးယူမှုများ လုပ်ဆောင်ရ န်ငြင်းဆိုထားခြင်းကလည်း တရုတ်နှင့် ဥရောပအုပ်စုတို့အကြား ဆက်ဆံရေးကို ပိုမို ဆိုးရွားစေခဲ့ကာ ကွဲလွဲမှုများလည်း ပိုများစေလျက်ရှိသည်။

တရုတ်နိုင်ငံအနေဖြင့် ယူကရိန်းအရေးနှင့်ပတ်သက်၍ မှန်ကန်သည့် တရားစီရင်ခြင်းနှင့် သမာသမတ် ကျခြင်း ဆိုင်ရာ အခြေခံ သဘောတရားများကို ခိုင်မာစွာ လက်ကိုင်ထားကြောင်း၊ တစ်ဘက်ဘက်ကို အလေးပေး ဆောင် ရွက်ထားခြင်း သို့မဟုတ် လက်ရှိ အခြေအနေကို ပို၍ ဆိုးရွာလာအောင် ဆောင်ရွက်ခြင်းမျိုး မရှိဘဲ ထိုအခြေအနေ ကို တစ်ကိုယ်ကောင်းဆန်ဆန် ကိုယ်ကျိုးစီးပွားအတွက် ဆောင်ရွက်ခြင်းမျိုး မလုပ်ကြောင်း ဝမ်ယိ က ပြောသည်။

ဘိုင်ဒန်နဲ့ ဇာလန်းစကီးကိုတွေ့ရစဉ် (Biden-fb)

တရုတ်နိုင်ငံသည် ရုရှားနှင့် မဟာဗျူဟာမြောက် ယုံကြည်မှု၊ အပြန်အလှန်အကျိုး ဖြစ်ထွန်းစေသော ပူးပေါင်း ဆောင်ရွက်မှုများကို ပိုမိုခိုင်မာအောင် ဆောင်ရွက်သွားမည်ဟုလည်း ၎င်းက ထပ်လောင်း ပြောဆိုသည်။

တရုတ်နှင့်ရုရှားတို့မှ စစ်ရေယာဉ်များသည် ပြီးခဲ့သည့် သီတင်းပတ်တွင် အရှေ့တရုတ်ပင်လယ်အတွင်း ပူးတွဲ စစ်ရေး လေ့ကျင့်မှုများ လုပ်ဆောင်ခဲ့သည်။

ထို့အပြင် တရုတ်-ရုရှား အပြန်အလှန် ကုန်သွယ်ရေးသည် ဒေါ်လာ ဘီလီယံ ၂၀၀ သတ်မှတ်ချက်သို့ အရှိန်အဟုန် ကောင်းကောင်းဖြင့် ချဉ်းကပ်လာပြီဖြစ်ကာ အရေးပါသော ရင်းနှီးမြုပ်နှံမှု စီမံကိန်းများလည်း ကောင်းမွန်စွာ လည်ပတ်လျက်ရှိကြောင်း ဝမ်ယိ က ပြောည်။

Source: အယ်ဂျာဇီးယား