CNI Sport News

၂၀၂၃ ခုနှစ်၊ နိုဝင်ဘာ ၁၀

အသလက်တီကိုအသင်းဟာ နည်းပြ ဆီမြွန်နီကို အသင်းမှာ ၂၀၂၇ ခုနှစ်၊ ဇွန်လအထိရှိမယ့် သက်တမ်းတိုး စာချုပ်ချုပ်လိုက်ပြီလို့ တရားဝင်ထုတ်ပြန်လိုက်ပါတယ်။

အာဂျင်တီးနားလူမျိုးနည်းပြဟာ အသလက်တီကိုအသင်းကို ၂၀၁၁ ခုနှစ်၊ ဒီဇင်ဘာလက စတင်တာဝန် ယူခဲ့တာဖြစ်ပြီး သူကိုင်တွယ်ခဲ့တဲ့ ၆၄၂ ပွဲမှာ အသင်းဟာ ၃၈၀ ပွဲအထိ အနိုင်ရလဒ် ရယူနိုင်ခဲ့တာဖြစ်ပါတယ်။ ဆီမြွန်နီဟာ အသလက်တီကိုအသင်းကို ဆုဖလား ၈ လုံးအထိ ရယူပေးနိုင်ခဲ့ပြီး အသင်းရဲ့ အအောင်မြင်ဆုံး နည်းပြအဖြစ်လည်း မှတ်တမ်းတင်ထားတာပါ။ အသက် ၅၃ နှစ်အရွယ်ရှိနည်းပြဟာ စပိန်ကလပ်ကို ၂၀၁၄ နဲ့ ၂၀၂၁ ခုနှစ်မှာ လာလီဂါဆုဖလား၊ ၂၀၁၂ နဲ့ ၂၀၁၈ ခုနှစ်မှာ ယူရိုပါလိဂ်ဆုဖလားတွေ ရယူပေးနိုင်ခဲ့တာဖြစ်ပါတယ်။

ဆီမြွန်နီဟာ အသလက်တီကိုအသင်းကို ၂၀၁၄ နဲ့ ၂၀၁၆ ခုနှစ်တွေမှာ ချန်ပီယံလိဂ်ဗိုလ်လုပွဲရောက်အောင် ပို့ဆောင်ပေးနိုင်ခဲ့ပေမယ့် ၂ ကြိမ်စလုံး ရီးရယ်လ်အသင်းကို အရေးနိမ့်ကာ ဒုတိယနဲ့ ကျေနပ်ခဲ့ရတာပါ။ ဆီမြွန်နီ ဟာ အသလက်တီကိုအသင်းကို ကိုင်တွယ်နေချိန်မှာ ယူနိုက်တက်၊ ချယ်လ်ဆီးအသင်းတို့ရဲ့ နည်းပြရာထူးတွေ အတွက် ချိတ်ဆက်မှုတွေခံခဲ့ရပေမယ့် သူကတော့ စပိန်ကလပ်မှာပဲ ဆက်ရှိနေခဲ့တာဖြစ်ပါတယ်။ 

အသလက်တီကိုအသင်းဟာ ဒီရာသီ စပိန်လာလီဂါပြိုင်ပွဲမှာ စတုတ္ထနေရာ ရပ်တည်နေပြီး ထိပ်ဆုံးက ဂျီရိုနာ အသင်းနဲ့ ၆ မှတ်ကွာဟနေတာပါ။ အသလက်တီကိုအသင်းဟာ ချန်ပီယံလိဂ်ပြိုင်ပွဲမှာတော့ ၄ ပွဲကစားပြီး ရမှတ် ၈ မှတ်နဲ့ အုပ်စုထိပ်ဆုံးနေရာမှာ ရပ်တည်နေကာ လက်ကျန်ပွဲစဉ်တွေအဖြစ် ဖီယင်နု၊လာဇီယိုအသင်းတို့နဲ့ ယှဉ်ပြိုင်ရမှာဖြစ်ပါတယ်။

အသလက်တီကိုအသင်းဟာ နိုဝင်ဘာ ၁၂ ရက်မှာ လာလီဂါပွဲစဉ်အဖြစ် ဗီလာရီးရယ်လ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ နိုဝင်ဘာ ၁၀

တူးလူးစ်နဲ့ ယူရိုပါလိဂ်ပွဲစဉ်က ခွင့်ပြုမခံခဲ့ရတဲ့ ကွင်းဆက်ချ်ရဲ့ သွင်းဂိုးမှာ မက်အယ်လစ္စတာ လက်နဲ့ ထိခဲ့ခြင်းမရှိဘူးလို့ လီဗာပူးလ်အသင်းနည်းပြ ကလောပ့်က ပြောလိုက်ပါတယ်။

ကလော့ပ်က “ဒီရုပ်သံကို အခုပဲကြည့်ခဲ့ပြီး ကျနော့်အတွက်တော့ ဒါက လက်ထိဘောမဟုတ်ပါဘူး။ ဒါပေမယ့် ကျနော်က ဘယ်လိုဆုံးဖြတ်လို့ရမှာလဲ။ ရိုးရိုးသားသားပြောရရင် ဘောလုံးကို ရင်ဘတ်နဲ့ ထိန်းခဲ့တာဖြစ်ပြီး လက်မောင်းနဲ့ ထိခဲ့တာကို မမြင်တွေ့ခဲ့ရပါဘူး။ ဒါပေမယ့် သူတို့ဘက်မှာ ကျနော်နဲ့ မတူညီတဲ့ ပုံရှိကောင်း ရှိနိုင်ပါတယ်။ ကျနော်တို့ဟာ ဒီပွဲမှာ ရှုံးနိမ့်ဖို့တော့ ထိုက်တန်ပါတယ်။ ကျနော်တို့ဟာ ဘောလုံးရသင့်တဲ့ အခြေအနေတွေအများကြီးရှိပေမယ့် မလုပ်နိုင်ခဲ့ပါဘူး”လို့ ပြောခဲ့တာပါ။

ဒီပွဲကို ကိုင်တွယ်ခဲ့တဲ့ ကွင်းလယ်ဒိုင်လူကြီးဟာ အစောပိုင်းက လီဗာပူးလ်အသင်းနောက်ခံလူ ကွင်းဆက်ချ်ရဲ့ နောက်ကျချေပဂိုးကို ခွင့်ပြုခဲ့ပေမယ့် နောက်ပိုင်းမှာ VAR ပြန်ကြည့်ကာ မက်အယ်လစ္စတာ လက်ထိခဲ့တယ်ဆိုပြီး သွင်းဂိုးကို ပယ်ဖျက်ခဲ့တာ ဖြစ်ပါတယ်။ အဲဒါကြောင့် လီဗာပူးလ်အသင်းဟာ ဒီပွဲမှာ တူးလူးစ်အသင်းကို ၃ ဂိုး- ၂ ဂိုး နဲ့ အရေးနိမ့်ပြီး ဒီရာသီယူရိုပါလိဂ်ပြိုင်ပွဲမှာ ပထမဆုံးရှုံးပွဲ ကြုံတွေ့ခဲ့ရတာပါ။ 

ဒီပွဲစဉ်ရဲ့ ပွဲအပြီးသတင်းစာရှင်းလင်းပွဲပြုလုပ်တဲ့အချိန်မှာ တူးလူးစ်အသင်းပရိသတ်တွေက နှောက်ယှက်မှုတွေ ပြုလုပ်ခဲ့တာကြောင့် လီဗာပူးလ်အသင်းနည်းပြ ကလောပ့်က ဒီလိုနေရာမှာ ဘယ်လိုလုပ် သတင်းစာရှင်းလင်းပွဲ လုပ်တာလဲလို့ ဒေါသထွက်နေခဲ့တာဖြစ်ပါတယ်။ 

လီဗာပူးလ်အသင်းဟာ ဒီပွဲအရေးနိမ့်ခဲ့ပေမယ့် အုပ်စုတွင်း ၄ ပွဲကစားအပြီးမှာ ၃ ပွဲနိုင်၊ ၁ ပွဲရှုံး၊ ရမှတ် ၉ မှတ်နဲ့ အုပ်စုတွင်းကို ဦးဆောင်နေတာပါ။ တူးလူးစ်အသင်းက ၇ မှတ်နဲ့ ဒုတိယ၊ ယူနီယံSG အသင်းက ၄ မှတ်နဲ့ တတိယ၊ LASK အသင်းက ၃ မှတ်နဲ့ စတုတ္ထနေရာမှာ ရပ်တည်နေတာဖြစ်ပါတယ်။ အဲဒါကြောင့် လီဗာပူးလ်အသင်းအနေနဲ့ လက်ကျန် ၂ ပွဲမှာ ၁ ပွဲအနိုင်ရတာနဲ့ ၁၆ သင်းအဆင့်ကို တက်ရောက်နိုင်မှာလည်း ဖြစ်ပါတယ်။ 

ပရီးမီးယားလိဂ် အဆင့် ၃ နေရာမှာရပ်တည်နေတဲ့ လီဗာပူးလ်အသင်းဟာ ဒီတစ်ပတ်လိဂ်ပွဲစဉ်အဖြစ် ဘရန်ဖိုဒ့် အသင်းနဲ့ ယှဉ်ပြိုင်ရမှာဖြစ်ပါတယ်။ 

Source:DailyMail

CNI Sport News

၂၀၂၃ ခုနှစ်၊ နိုဝင်ဘာ ၉

ရီးရယ်လ်အသင်းဟာ လာမယ့်နွေရာသီမှာ အလွတ်ပြောင်းရွှေ့ကြေးနဲ့ ခေါ်ယူလို့ ရမယ့် ပီအက်စ်ဂျီအသင်း တိုက်စစ်မှူး ဘတ်ပီကို ခေါ်ယူမှာ မဟုတ်တော့ဘူးလို့ စပိန်သတင်းတွေမှာ ဖော်ပြထားပါတယ်။

နွေရာသီ အပြောင်းအရွှေ့ ရောက်ရှိဖို့ အချိန်တွေအများကြီး ကျန်ရှိနေသေးပေမယ့် ဘတ်ပီနဲ့ ရီးရယ်လ်အသင်း တို့ရဲ့ အပြောင်းအရွှေ့ သတင်းတွေဟာ ဒီရက်ပိုင်းပြန်ပြီး ထွက်ပေါ်နေပါတယ်။

ရီးရယ်လ်အသင်းဟာ ဘတ်ပီကို ခေါ်ယူဖို့ လွန်ခဲ့တဲ့နှစ်တွေထဲက ကြိုးစားခဲ့တာဖြစ်ပေမယ့် Cadena Ser ကတော့ စပိန်ကလပ်ဟာ အခုရာသီအကုန်မှာ အလွတ်ပြောင်းရွှေ့ကြေးနဲ့ ခေါ်ယူလို့ရနိုင်မယ့် ပြင်သစ်တိုက်စစ်မှူးကို ခေါ်ယူဖို့ ငြင်းဆန်ထားတယ်လို့ ဖော်ပြခဲ့ပါတယ်။

Cadena Ser က ဘတ်ပီကို ရီးရယ်လ်အသင်း မခေါ်ယူတဲ့ အဓိကအကြောင်းအရင်း ၃ ချက်ကိုလည်း ဖော်ပြထားခဲ့ ပါတယ်။ 

ပထမအချက်ကတော့ ဘတ်ပီရဲ့ လုပ်ခလစာ မြင့်မားမှုဖြစ်ပြီး သူ့ကို ခေါ်ယူမယ်ဆိုရင် လက်မှတ်ထိုးကြေးကို လည်း မြင့်မားစွာပေးချေရဖို့ ရှိနေတာ ဖြစ်ပါတယ်။ 

ဘတ်ပီကိုတွေ့ရစဉ်

ဒုတိယအချက်ကတော့ ဘတ်ပီဟာ လူတိုင်းချစ်ခင်ကြတဲ့ လူငယ်ကစားသမား မဟုတ်တော့တာပါ။ ရီးရယ်လ် အသင်းဟာ ကာမာဗင်ဂါ၊ ဗီနီစီးယက်စ်၊ ဘယ်လင်ဂမ်၊ ရိုဒရီဂိုတို့လို လူငယ်တွေနဲ့ အသင်းကို နှစ်ပေါင်းများစွာကြာ ဦးဆောင်ဖို့ စီစဉ်နေတာ ဖြစ်ပါတယ်။

နောက်ဆုံးအချက်ကတော့ ဘတ်ပီဟာ ၂၀၂၂ ခုနှစ်မှာ ရီးရယ်လ်အသင်းကို ပြောင်းဖို့ ငြင်းဆန်ပြီး ပီအက်စ်ဂျီနဲ့ စာချုပ် သက်တမ်းတိုးခဲ့တာကို ကလပ်အသင်းက ဒေါသထွက်နေဆဲ ဖြစ်တယ်လို့ သိရပါတယ်။

စပို့တင်းဘရာဂါအသင်းနဲ့ ချန်ပီယံလိဂ် ပွဲစဉ်အပြီးမှာ ရီးရယ်လ်အသင်းနည်းပြ အန်ဆယ်လော့တီဟာ ဘတ်ပီနဲ့ ပတ်သက်ပြီး မေးမြန်းခံခဲ့ရပေမယ့် ဘာမှတ်ချက်မှ မပေးချင်ဘူးလို့ ဖြေသွားခဲ့ပါတယ်။ 

ဘတ်ပီနဲ့ ပီအက်စ်ဂျီအသင်းတို့ ချုပ်ဆိုထားတဲ့ စာချုပ်ဟာ ၂၀၂၄ ခုနှစ်၊ ဇွန်လမှာ ကုန်ဆုံးတော့မှာဖြစ်ပြီး ကစားသမားကတော့ ပြင်သစ်ကလပ်နဲ့ စာချုပ်သက်တမ်းတိုးဖို့ ရည်ရွယ်ထားခြင်း မရှိဘူးလို့ သိရပါတယ်။

Source: Besoccer

CNI Sport News

၂၀၂၃ ခုနှစ်၊ နိုဝင်ဘာ ၉ 

ယူကရိန်းလက်ဝှေ့သမား အူဆက်ခ်ဟာ ဗြိတိန်လက်ဝှေ့သမား တိုင်ဆန်ဗျူရီနဲ့ ထိုးသတ်မယ့်ပွဲကို ဖေဖော်ဝါရီလ ဆော်ဒီနိုင်ငံမှာ ကျင်းပဖို့ မျှော်လင့်တယ်လို့ ပြောခဲ့ပါတယ်။

အူဆက်ခ်က “ကျနော်ဟာ ပွဲအတွက်အဆင်သင့်ဖြစ်နေပေမယ့် တိုင်ဆန်ဗျူရီဟာ နောက်ဆုံးထိုးသတ်ထား တဲ့ပွဲမှာ ဒဏ်ရာတချို့ရရှိခဲ့တာကြောင့် နောက်နှစ်ကို ရွှေ့ဆိုင်းဖို့ဖြစ်နိုင်ပါတယ်။ ကျနော်ဟာ ပြိုင်ဘက် အကြောင်းကို စဉ်းစားခြင်းမရှိပါဘူး။ ကျနော်သူနဲ့အတူရှိပြီး ထိုးသတ်ပွဲဖြစ်ဖို့ပဲလိုအပ်တယ်”လို့ ပြောခဲ့တာပါ။

အူဆက်ခ်ဟာ တိုင်ဆန်ဗျူရီနဲ့ပွဲကို ဒီဇင်ဘာ ၂၃ ရက်မှာ ကျင်းပဖို့ စီစဉ်ထားပေမယ့် လက်ဝှေ့ပွဲစီစဉ်သူ ဖရန့်ခ်ဝါရမ်ကတော့ အဆိုပါနေ့မှာ ပွဲဖြစ်မြောက်နိုင်ဖွယ်မရှိဘူးလို့ ပြီးခဲ့တဲ့အပတ်က ပြောထားပါတယ်။ တိုင်ဆန်ဗျူရီဟာ ပြီးခဲ့တဲ့လကမှ ပင်လယ်ကွေ့နိုင်ငံမှာ UFC ဟဲဗီးဝိတ်ချန်ပီယံဟောင်း အန်ဂါနူကို အနိုင်ရရှိ ထားတာပါ။ အသက် ၃၆ နှစ်အရွယ်ရှိ အူဆက်ခ်ကတော့ ဒီဇင်ဘာပွဲအတွက် အဆင်သင့်ဖြစ်နေပေမယ့် ထိုးသတ် မယ့် ရက်စွဲအသစ်ကို လာမယ့်အပတ်မှာ ဆုံးဖြတ်နိုင်ဖွယ်ရှိနေပါတယ်။ 

ဖရန့်ခ်ဝါရမ်က “ခက်ခဲတဲ့ ထိုးသတ်ပွဲအပြီးမှာ တိုင်ဆန်ဗျူရီအနေနဲ့ စခန်းသွင်းလေ့ကျင့်မှုတွေပြုလုပ်လို့ မရပါဘူး။ သူ့ရဲ့ပုံစံကို ပြန်ပြီးရဖို့အတွက် အချိန်အနည်းငယ်လိုပါတယ်။ လာမယ့်နှစ်အစောပိုင်းမှာ ပွဲဖြစ်နိုင်ပါတယ်”လို့ BBC Radio 5 Live ကို ပြောခဲ့တာပါ။

အူဆက်ခ်နဲ့ တိုင်ဆန်ဗျူရီတို့ရဲ့ပွဲမှာ အနိုင်ရတဲ့သူဟာ ၁၉၉၉ ခုနှစ်က လူးဝစ်နောက်ပိုင်း အငြင်းပွားဖွယ်မရှိ ချန်ပီယံအဖြစ်သတ်မှတ်ခံရမှာဖြစ်သလို ချန်ပီယံခါးပတ် ၄ ခုကို ပိုင်ဆိုင်မှာလည်း ဖြစ်ပါတယ်။ အူဆက်ခ်ဟာ ပြီးခဲ့တဲ့ သြဂုတ်လကမှ နောက်ဆုံးပွဲထိုးသတ်ထားတာဖြစ်ပြီး ပရော်ဖက်ရှင်နယ်ကစားသမားဘ၀ ထိုးသတ်ထား တဲ့ ၂၁ ပွဲစလုံးနိုင်ပွဲရရှိထားပါတယ်။

Source:BBC

CNI Sport News

၂၀၂၃ ခုနှစ်၊ နိုဝင်ဘာ ၉

ကိုပေဟေဂင်အသင်းကို အရေးနိမ့်ခဲ့တဲ့ ချန်ပီယံလိဂ်ပွဲမှာ ရက်ရှ်ဖို့ဒ်ရဲ့ အနီကတ်က အရာအားလုံးကို ပြောင်းလဲ သွားခဲ့တယ်လို့ ယူနိုက်တက်အသင်းနည်းပြ အဲရစ်တန်ဟတ်က ပြောလိုက်ပါတယ်။

အဲရစ်တန်ဟတ်က “အနီကတ် မထိခင်အထိ ကျနော်တို့ဟာ အလွန်ကောင်းမွန်စွာ ကစားခဲ့တယ်လို့ ထင်ပါတယ်။ အနီကတ်ကတော့ အရာအားလုံးကို ပြောင်းလဲသွားစေခဲ့ပါတယ်။ ဒီဆုံးဖြတ်ချက်က ပြင်းထန်ပြီး ကျနော်တို့ အတွက် ကွဲပြားခြားနားတဲ့ ပွဲတစ်ပွဲ ဖြစ်လာစေခဲ့ပါတယ်။ ပထမပိုင်း မပြီးခင်မှာ ပေးခဲ့ရတဲ့ ဂိုး ၂ ဂိုးက ခွင့်မပြုသင့် ပါဘူး။ ပထမဂိုးဆိုရင် လူကျွံဘောဖြစ်ပြီး ကစားသမားက အိုနာနာရဲ့ အရှေ့မှာရှိနေတာပါ။ ဒုတိယဂိုးဖြစ်တဲ့ ပင်နယ်တီကလည်း အလွန်ပြင်းထန်ပါတယ်။ ဒီဆုံးဖြတ်ချက်တွေကို ကျနော်အလွန်စိတ်ပျက်မိပါတယ်”လို့ ပြောခဲ့ပါတယ်။

ယူနိုက်တက်အသင်းဟာ ကိုပေဟေဂင် အသင်းကို ၄ ဂိုး- ၃ ဂိုးနဲ့ အရေးနိမ့်ခဲ့တာဖြစ်ပြီး ရက်ရှ်ဖို့ဒ် တိုက်ရိုက် အနီကတ်နဲ့ မထုတ်ပယ်ခံရခင် အချိန်ထိ ဟော့ဂျ်လန်းရဲ့ သွင်းဂိုး ၂ ဂိုးနဲ့ ဦးဆောင်နေခဲ့တာ ဖြစ်ပါတယ်။

အဲရစ်တန်ဟတ်ကို တွေ့ရစဉ်

ရက်ရှ်ဖို့ဒ် ထုတ်ပယ်ခံရအပြီးမှာ ကိုပေဟေဂင်အသင်းက ချေပဂိုး ၂ ဂိုး ဆက်တိုက် သွင်းယူခဲ့လို့ ပထမပိုင်းအပြီးမှာ ၂ ဂိုးစီ သရေကျနေခဲ့တာ ဖြစ်ပါတယ်။

ဒုတိယပိုင်းမှာ ဘရူနိုဖာနန်ဒက်စ်က ယူနိုက်တက်အသင်းအတွက် ပင်နယ်တီကနေ ဦးဆောင်ဂိုး သွင်းယူခဲ့ပေမယ့် ကိုပေဟေဂင်အသင်းက ချေပဂိုးနဲ့ အနိုင်ဂိုးတွေ သွင်းယူသွားခဲ့လို့ ယူနိုက်တက်အသင်း ရှုံးပွဲကြုံတွေ့ခဲ့တာ ဖြစ်ပါ တယ်။

ယူနိုက်တက်အသင်းဟာ ဒီရှုံးပွဲကြောင့် အုပ်စုတွင်း ၄ ပွဲ ကစားအပြီးမှာ ၁ ပွဲနိုင်၊ ၃ ပွဲရှုံး၊ ရမှတ် ၃ မှတ်နဲ့ နောက်ဆုံး နေရာမှာ ရပ်တည်နေပါတယ်။

အဲ့ဒါကြောင့် ယူနိုက်တက်အသင်းအနေနဲ့ ချန်ပီယံလိဂ်ပြိုင်ပွဲမှာ နောက်တစ်ဆင့် တက်ချင်တယ်ဆိုရင် ဘိုင်ယန်မြူးနစ်၊ ဂါလာတာစာရေးအသင်းတို့နဲ့ ကစားရမယ့်ပွဲတွေမှာ မဖြစ်မနေ နိုင်ပွဲရယူဖို့ လိုအပ်နေပြီဖြစ် ပါတယ်။ 

ဟော့ဂျ်လန်းက “ကျနော်တို့ဟာ ကောင်းမွန်စွာ စတင်နိုင်ခဲ့ပြီး အနီကတ်မပြသခံရခင်အချိန်ထိ ပွဲကို ထိန်းချုပ်နိုင် ခဲ့ပါတယ်။ ဒုတိယပိုင်းအစမှာလည်း ကျနော်တို့ဟာ အလွန်ကောင်းမွန်ခဲ့ပေမယ့် ကံမကောင်းစွာနဲ့ပဲ ရှုံးပွဲထပ်ပြီး ကြုံတွေ့ခဲ့ရပါတယ်”လို့ ပြောခဲ့ပါတယ်။

ယူနိုက်တက်အသင်းဟာ နိုဝင်ဘာ ၁၁ ရက်မှာ ပရီးမီးယားလိဂ်ပွဲစဉ်အဖြစ် လူတန်အသင်းကို အိမ်ကွင်းမှာ ယှဉ်ပြိုင်ရမှာ ဖြစ်ပါတယ်။

Source:Daily Mail

CNI Sport News

၂၀၂၃ ခုနှစ်၊ နိုဝင်ဘာ ၉

အာဆင်နယ်အသင်းနည်းပြ အာတီတာက ဆီဗီလာအသင်းကို ထိန်းချုပ်ပြီး အနိုင်ရလဒ်ရအောင် ယူနိုင်ခဲ့တဲ့ အသင်းသားတွေရဲ့ စွမ်းဆောင်ရည်ကို ပျော်ရွှင်တယ်လို့ ပြောလိုက်ပါတယ်။ 

အာတီတာက “အသင်းရဲ့ စွမ်းဆောင်ရည်ကို ကျနော်အလွန် ပျော်ရွှင်မိပါတယ်။ သူတို့တွေဟာ ဘောလုံးဆုံးရှုံး သွားချိန်မှာတောင် ပြန်ရဖို့အတွက် မယုံနိုင်လောက်အောင် ကောင်းမွန်ခဲ့ကြတာပါ။ ဒီလိုအရာတွေကြောင့်လည်း ကျနော်တို့ နိုင်ပွဲရယူနိုင်ခဲ့တာ ဖြစ်ပါတယ်။ ခင်ဗျားအနေနဲ့ ဆီဗီလာကို အခွင့်အရေး ပေးလိုက်မယ်ဆိုရင် သူတို့ ဟာ အန္တရာယ်ရှိတဲ့ အသင်းဖြစ်ကြောင်း ပြသသွားပါလိမ့်မယ်။ ဒီပွဲအနိုင်ရတာက ကျနော်တို့အတွက် အရေးကြီးပါ တယ်”လို့ TNT Sports ကိုပြောခဲ့ပါတယ်။

အာဆင်နယ်အသင်းဟာ ဆီဗီလာအသင်းကို ၂ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး ထရိုဆာ့ဒ်နဲ့ ဆာကာတို့က အနိုင် ဂိုးတွေ သွင်းယူပေးခဲ့တာ ဖြစ်ပါတယ်။ 

 ဆာကာကို တွေ့ရစဉ်

အာဆင်နယ်အသင်းဟာ ဒီနိုင်ပွဲကြောင့် အုပ်စုတွင်း ၄ ပွဲ ကစားအပြီးမှာ ၃ ပွဲနိုင်၊ ၁ ပွဲရှုံး၊ ရမှတ် ၉ မှတ်နဲ့ ထိပ်ဆုံး နေရာမှာ ရပ်တည်နေပြီး နောက်တစ်ဆင့်တက်ဖို့ အခြေအနေကောင်းတွေ ပိုင်ဆိုင်နေပါတယ်။

အာဆင်နယ်အသင်းရဲ့ အုပ်စုတွင်းမှာ ပီအက်စ်ဗွီနဲ့ လန်းစ်တို့က ၅ မှတ်စီရရှိထားပြီး ဆီဗီလာက ၂ မှတ်သာ ရရှိထားတာ ဖြစ်ပါတယ်။

အာဆင်နယ်အသင်းအတွက် ဂိုးသွင်းယူပေးခဲ့တဲ့ ထရိုဆာ့ဒ်က ပြီးပြည့်စုံတဲ့ ညဖြစ်ခဲ့တယ်လို့ ပြောခဲ့ပါတယ်။

အာဆင်နယ်အသင်းဟာ ဆီဗီလာအသင်းနဲ့ ပွဲမတိုင်ခင် နောက်ဆုံးကစားခဲ့တဲ့ ၂ ပွဲဆက် ရှုံးပွဲကြုံတွေ့ခဲ့တာ ဖြစ်ပါတယ်။

ထရိုဆာ့ဒ်က “ကျနော်တို့ဟာ အလွန်ကောင်းမွန်စွာ ကစားနိုင်ခဲ့ပြီး အခွင့်အရေးတွေလည်း အများကြီး ဖန်တီးနိုင်ခဲ့ ပါတယ်။ ဒါဟာ ကျနော်တို့အတွက် ပြီးပြည့်စုံတဲ့ညပါ။ လူအုပ်ကြီးက ကျနော်တို့အတွက် မယုံနိုင်လောက်အောင် ဖြစ်ခဲ့ပြီး သူတို့ကို တစ်ခုခု ပြန်ပေးချင်တာကြောင့် ဒါက ကျနော်တို့အတွက် ကြီးကျယ်တဲ့ နိုင်ပွဲကြီးပါ။ ကစားဖို့ ကျန်ရှိနေတဲ့ ၂ ပွဲစလုံးကိုလည်း ကျနော်တို့ အနိုင်ရယူသွားမှာပါ”လို့ ပြောခဲ့ပါတယ်။

အာဆင်နယ်အသင်းဟာ နိုဝင်ဘာ ၁၁ ရက်မှာ ပရီးမီးယားလိဂ်ပွဲစဉ်အဖြစ် ဘန်လေအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Football364

CNI Sport News

၂၀၂၃ ခုနှစ်၊ နိုဝင်ဘာ ၈

ဆော်ဒီပရိုလိဂ်ပြိုင်ပွဲရဲ့ လက်ရှိချန်ပီယံ အယ်လ်အစ်တီဟတ်အသင်းဟာ ရလဒ်ဆိုးတွေကြောင့် နည်းပြဖြစ်သူ နူနိုဆန်တိုကို ရာထူးကနေ ထုတ်ပယ်လိုက်ပါတယ်။

အယ်လ်အစ်တီဟတ်အသင်းဟာ ဒီရာသီလိဂ်ပွဲ ၁၂ ပွဲကစားအပြီးမှာ ၆ ပွဲသာအနိုင်ရရှိထားကာ နောက်ဆုံး ကစား ခဲ့တဲ့ အာရှချန်ပီယံလိဂ်ပွဲစဉ်မှာလည်း အီရတ်ကလပ်ကို အရေးနိမ့်ခဲ့တာပါ။ အယ်လ်အစ်တီဟတ်အသင်းဟာ နောက်ဆုံးကစားခဲ့တဲ့ လိဂ်ပွဲစဉ် ၅ ပွဲဆက်တိုက်နိုင်ပွဲပျောက်ဆုံးခဲ့တာကြောင့်  ထိပ်ဆုံးနေရာရပ်တည်နေတဲ့ အယ်လ်ဟီလယ်အသင်းနဲ့ ၁၁ မှတ်အထိကွာဟသွားတာဖြစ်ပါတယ်။ 

အသက် ၄၉ နှစ်အရွယ်ရှိ နူနိုဆန်တိုဟာ အယ်လ်အစ်တီဟတ်အသင်းကို ၂၀၂၂ ခုနှစ်၊ ဇူလိုင်လမှ စတင်ကိုင်တွယ် ခဲ့တာပါ။ နူနိုဆန်တိုဟာ ပြီးခဲ့တဲ့ရာသီက အယ်လ်အစ်တီဟတ်အသင်းကို ဆော်ဒီပရိုလိဂ်ပြိုင်ပွဲမှာ ချန်ပီယံ ဖြစ်အောင် စွမ်းဆောင်ပေးနိုင်ခဲ့ပေမယ့် ဒီရာသီမှာ ရလဒ်ဆိုးတွေအပြင် တိုက်စစ်မှူး ဘန်ဇီမာနဲ့ ဆက်ဆံရေး တင်းမာမှုတွေကြောင့် ဆော်ဒီကလပ်ရဲ့ ထုတ်ပယ်ခြင်းခံခဲ့ရတယ်လို့ သတင်းတွေမှာ ဖော်ပြထားပါတယ်။ 

လက်ရှိအချိန်မှာ အယ်လ်အစ်တီဟတ်အသင်းကို လက်ထောက်နည်းပြ အယ်လ်ခါလီဖာက ယာယီနည်းပြအဖြစ် ကိုင်တွယ်သွားမှာပါ။ အယ်လ်အစ်တီဟတ်အသင်းဟာ ပြင်သစ်လူမျိုးနည်းပြတစ်ဦး ရှာဖွေနေတယ်လို့ သိရပြီး သူတို့ရဲ့ စာရင်းထဲမှာ လောရင့်ဘလန့်နဲ့ ဇီဒန်းတို့ ပါဝင်နေတာဖြစ်ပါတယ်။ ဆော်ဒီကလပ်ဟာ ပြီးခဲ့တဲ့နွေရာသီ အပြောင်းအရွှေ့တုန်းက ဘန်ဇီမာအပြင် ချယ်လ်ဆီးအသင်းက ကန်တီ၊ လီဗာပူးလ်အသင်းက ဖာဘင်ဟိုနဲ့ ဆဲလ်တစ်အသင်းက ဂျိုတာတို့ကို ခေါ်ယူခဲ့ပြီး အမှတ်ပေးချန်ပီယံဆု ဆက်ထိန်းသိမ်းဖို့နဲ့ အာရှချန်ပီယံလိဂ် ပြိုင်ပွဲမှာ အောင်မြင်မှုရယူနိုင်ဖို့ ပစ်မှတ်ထားခဲ့တာပါ။

အယ်လ်အစ်တီဟတ်အသင်းဟာ နိုဝင်ဘာ ၉ ရက်မှာ ဆော်ဒီပရိုလိဂ်ပွဲစဉ်အဖြစ် အက်ဘာအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ နိုဝင်ဘာ ၈

ဝါရင့်ဂိုးသမားတစ်ဦးဖြစ်တဲ့ နူအာဟာ မကြာသေးခင်က ဒဏ်ရာကနေ အပြည့်အဝပြန်လည်ကောင်းမွန်ပြီး ဘိုင်ယန်မြူးနစ်အသင်းအတွက် ပါဝင်ကစားပေးခဲ့ပေမယ့် ဂျာမနီအတွက် ပြန်လည်ပါဝင်ဖို့ စောလွန်းတယ်လို့ ပြောခဲ့ပါတယ်။

နူအာက “ကျနော်အချိန်လိုအပ်နေသေးပြီး ပွဲတွေက စောလွန်းပါတယ်။ အခုဖြစ်နေတဲ့အရာတွေက ကျနော့် အတွက် အပိုဆုပါ။ ကျနော်ဟာ အလွန်ပြင်းထန်တဲ့ ဒဏ်ရာကနေ ပြန်လာနိုင်ခဲ့တာပါ။ ကျနော်က ရည်မှန်းချက် ကြီးမားတဲ့သူဖြစ်ပြီး အသင်းကို အကောင်းဆုံးဆိုတဲ့အရာတွေပေးချင်တာပါ။ လာမယ့်နှစ်မှာတော့ အကောင်းဆုံး ပုံစံနဲ့အတူ အရာတွေအားလုံးကို ပေးသွားပါမယ်”လို့ ပြောခဲ့တာပါ။

ခြေထောက်ကျိုးတာကို ခွဲစိတ်မှုခံယူပြီးနောက် တစ်နှစ်နီးပါးကြာအနားယူခဲ့ရတဲ့ နူအာဟာ ပြီးခဲ့တဲ့ ဒမ်စတက် အသင်းနဲ့ ပွဲစဉ်ကမှ ဘိုင်ယန်မြူးနစ်အသင်းအတွက် ပြန်လည်ပါဝင်ကစားပေးနိုင်ခဲ့တာဖြစ်ပါတယ်။ အသက် ၃၇ နှစ်အရွယ်ရှိ နူအာဟာ အခုဆိုရင် ဘိုင်ယန်မြူးနစ်အသင်းအတွက် ၃ ပွဲအထိပါဝင်ကစားပေးထားပြီးပြီဖြစ်လို့ ဂျာမနီလက်ရွေးစင်အသင်းအတွက် ပြန်ပါဝင်လာနိုင်ဖွယ်ရှိတယ်လို့ သတင်းတွေထွက်ပေါ်နေခဲ့တာပါ။

ဂျာမနီအသင်းနည်းပြ နာဂျယ်လ်စမန်းနဲ့ ပုံမှန်အဆက်အသွယ်ရှိနေတဲ့ နူအာဟာ လာမယ့်နိုင်ငံတကာပွဲစဉ်တွေမှာ နိုင်ငံအသင်းအတွက် ပါဝင်မှာမဟုတ်ဘူးလို့ ပြောခဲ့ပါတယ်။ ဂျာမနီအသင်းဟာ နူအာမပါဝင်နိုင်တဲ့အချိန်တွေမှာ ဘာစီလိုနာအသင်းဂိုးသမား တာစတီဂျန်ကို နံပတ်တစ်ဂိုးသမားအဖြစ် အသုံးပြုနေတာဖြစ်ပေမယ့် ဘိုင်ယန်မြူးနစ်အသင်းဂိုးသမားကတော့ ယူရို ၂၀၂၄ ပြိုင်ပွဲမှာ လက်ရွေးစင်အသင်းအတွက် ပါဝင်နိုင်ဖို့ အာရုံစိုက်နေတာပါ။

ပြီးခဲ့တဲ့ စက်တင်ဘာလကမှ ဂျာမနီအသင်းကို နည်းပြသစ်အဖြစ် စတင်တာဝန်ယူနေတဲ့ နာဂျယ်လ်စမန်းဟာ နိုဝင်ဘာလထဲမှာ ကစားမယ့် နိုင်ငံတကာခြေစမ်းပွဲတွေအတွက် အသင်းလူစာရင်းကို မကြာခင်ရက်ပိုင်းအတွင်းမှာ ထုတ်ပြန်သွားဖို့ ရှိနေပါတယ်။ နူအာဟာ ဂျာမနီအသင်းရဲ့ အသင်းခေါင်းဆောင်ဖြစ်ခဲ့ပေမယ့် သူမပါဝင်နိုင်တဲ့ အချိန်တွေမှာ အသင်းခေါင်းဆောင်အဖြစ် တာဝန်ယူနေတဲ့ ဂန်ဒိုဂန်ဟာ နူအာပြန်ပါဝင်လာရင်လည်း လက်ရွေးစင် အသင်းခေါင်းဆောင်လက်ပတ်ကို ဆက်ဝတ်ဆင်ရမယ်လို့ နာဂျယ်လ်စမန်းက ပြောထားတာပါ။

ဂျာမနီအသင်းဟာ နိုဝင်ဘာ ၁၈ ရက်မှာ တူရကီ၊ ၂၁ ရက်မှာ သြစတြီးယားအသင်းတို့နဲ့ ခြေစမ်းပွဲယှဉ်ပြိုင် သွားမှာဖြစ်ပါတယ်။

Source:Besoccer

CNI Sport News

၂၀၂၃ ခုနှစ်၊ နိုဝင်ဘာ ၈

ပေါ်တူဂီအသင်းနောက်ခံလူ ပီပီဟာ အန့်ဝပ်အသင်းကို အနိုင်ရတဲ့ပွဲမှာ ပေါ်တိုအသင်းအတွက် အနိုင်ဂိုး သွင်းယူပေးခဲ့ပြီးနောက် ချန်ပီယံလိဂ်ပြိုင်ပွဲရဲ့ အသက်အကြီးဆုံးဂိုးသွင်းသူအဖြစ် စံချိန်သစ်တင်နိုင်ခဲ့ပါတယ်။

ပေါ်တိုအသင်းက အန့်ဝပ်အသင်းကို ၂ ဂိုး- ဂိုးမရှိနဲ့ အနိုင်ရခဲ့တဲ့ ချန်ပီယံလိဂ်အုပ်စုပွဲစဉ်မှာ ပီပီဟာ ပွဲချိန် ၉၁ မိနစ်မှာ ဒုတိယသွင်းဂိုးကို သွင်းယူပေးခဲ့တာပါ။ ပီပီဟာ ဒီဂိုးသွင်းယူတဲ့အချိန်မှာ သူ့ရဲ့အသက်ဟာ ၄၀ နှစ်နဲ့ ၂၅၄ ရက်ရှိပြီဖြစ်ပါတယ်။ အရင်က ချန်ပီယံလိဂ်ပြိုင်ပွဲမှာ အသက်အကြီးဆုံးဂိုးသွင်းသူအဖြစ် စံချိန်တင်ထားတဲ့ ကစားသမားကတော့ ရိုးမားအသင်း ဂန္ထဝင် တော့တီပါ။ တော့တီဟာ ၂၀၁၄ ခုနှစ်၊ နိုဝင်ဘာလက CSKA အသင်းနဲ့ ပွဲမှာ ရိုးမားအသင်းအတွက် ဂိုးသွင်းယူပေးခဲ့ချိန်က သူ့ရဲ့အသက်ဟာ ၃၈ နှစ်နဲ့ ၅၉ ရက်ဖြစ်ပါတယ်။

အဲဒါကြောင့် ပီပီက တော့တီရဲ့စံချိန်ကို ချိုးဖျက်ပြီး စံချိန်သစ်တင်နိုင်ခဲ့သလို သူဟာ ချန်ပီယံလိဂ်ပြိုင်ပွဲမှာ ဂိုးသမားမဟုတ်တဲ့ အသက်အကြီးဆုံးကစားသမားအဖြစ်လည်း စံချိန်တင်ထားနိုင်ခဲ့တာပါ။ ပီပီကတော့ ဒီသွင်းဂိုးက သူ့အမေအတွက်မွေးနေ့လက်ဆောင်လို့ ပွဲအပြီးမှာ ပြောခဲ့ပါတယ်။

ပီပီက “ဒီနေ့က ကျနော့်အတွက် အထူးနေ့တစ်နေ့ပါပဲ။ ကျနော်အမေရဲ့မွေးနေ့ဖြစ်တဲ့အတွက် ဂိုးသွင်းပြီး လက်ဆောင်ပေးဖို့ အကောင်းဆုံးလုပ်ခဲ့မယ်ဆိုပြီး ကျနော်ပြောခဲ့ပါသေးတယ်။ ခံစားချက်ကတော့ မယုံနိုင်လောက်အောင်ပါပဲ။ ပေါ်တိုလိုအသင်းကြီးတစ်သင်းအတွက် ဒီလိုအသက်အရွယ်နဲ့ ဒီအဆင့်မှာ ကစားပေးနိုင်ဖို့က အလုပ်ကြိုးစားမှုနဲ့ အားကစားအပေါ် စိတ်အားထက်သန်မှုတွေ အများကြီးပါဝင်ပါတယ်”လို့ ပြောခဲ့တာပါ။

ပေါ်တိုအသင်းဟာ အန့်ဝပ်အသင်းကို အနိုင်ရခဲ့တာကြောင့် ချန်ပီယံလိဂ်အုပ်စုပွဲစဉ် ၄ ပွဲကစားအပြီးမှာ ၃ ပွဲနိုင် ရမှတ် ၉ မှတ်နဲ့ ဘာစီလိုနာအသင်းရဲ့နောက် ဒုတိယနေရာမှာ ရပ်တည်နေတာဖြစ်ပါတယ်။ ပေါ်တိုအသင်းအနေနဲ့ ဘာစီလိုနာ၊ ရှက်တာဒိုးနက်အသင်းတို့နဲ့ ပွဲစဉ် ၂ ပွဲမှာ ၁ ပွဲအနိုင်ရတာနဲ့ ၁၆ သင်းအဆင့်ကို တက်ရောက်နိုင်မှာ ဖြစ်ပါတယ်။

Source:BBC