CNI Sport News

၂၀၂၄ ခုနှစ်၊ ဧပြီ ၁၂

ပြီးခဲ့ရက်ပိုင်းက ချယ်လ်ဆီးအသင်းကို အရေးနိမ့်ခဲ့တဲ့ ပရီးမီးယားလိဂ်ပွဲစဉ်မှာ ကြွက်သားဒဏ်ရာရရှိခဲ့တဲ့ နောက်ခံလူ ဗာရန်းဟာ ရက်သတ္တပတ်အနည်းငယ်အနားယူရမယ်လို့ ယူနိုက်တက်အသင်းက အတည်ပြု ခဲ့ပါတယ်။

ဗာရန်းဟာ ချယ်လ်ဆီးအသင်းကို ၄ ဂိုး-၃ ဂိုးနဲ့ အရေးနိမ့်ခဲ့တဲ့ ပထမပိုင်းအပြီးမှာ လူစားလဲခံခဲ့ရပြီး လီဗာပူးလ်အသင်းနဲ့ ၂ ဂိုးစီသရေကျခဲ့တဲ့ ပွဲစဉ်မှာ ယူနိုက်တက်အသင်းအတွက် ပါဝင်နိုင်ခဲ့ခြင်းမရှိတာပါ။ 

ယူနိုက်တက်အသင်းကတော့ ဗာရန်းဟာ ဧပြီလအတွင်း ကစားမယ့် ပွဲတွေမှာ ပါဝင်နိုင်ဖို့ မရှိပေမယ့် မေလမှာပြန်လည်ပါဝင်နိုင်ဖို့ မျှော်လင့်တယ်လို့ အတည်ပြုထားတာဖြစ်ပါတယ်။

ယူနိုက်တက်အသင်းဟာ ဒီရာသီ ပရီးမီးယားလိဂ်ကစားဖို့ (၇)ပွဲသာ ကျန်ရှိတော့သလို FA ဖလား ဆီမီးဖိုင်နယ် ပွဲစဉ်အဖြစ် ကိုဗင်ထရီအသင်းနဲ့ ကစားရဖို့ ရှိနေတာပါ။

 ဗာရန်းနဲ့ ယူနိုက်တက်အသင်းတို့ချုပ်ဆိုထားတဲ့ စာချုပ် ဟာ ဒီရာသီအကုန်မှာ ကုန်ဆုံးမှာဖြစ်ပြီး မန်ချက်စတာကလပ်ကတော့ သူ့ကို လက်ရှိပေးချေနေရတဲ့ လုပ်ခလစာ ထက်လျော့နည်းပြီး စာချုပ်သစ်ကမ်းလှမ်းဖို့ ရှိနေတာဖြစ်ပါတယ်။

သတင်းတွေမှာတော့ ဗာရန်းဟာ ယူနိုက်တက်အသင်းနဲ့ စာချုပ်သစ်ချုပ်မှာမဟုတ်ဘဲ ထွက်ခွာဖွယ်ရှိနေတယ်လို့ ဖော်ပြထားတာပါ။ ဗာရန်းအပြင် ဒဏ်ရာရရှိနေတဲ့ နောက်ခံလူ ဂျွန်နီအီဗန်စ်လည်း ဘုန်းမောက်အသင်းနဲ့ ပွဲစဉ်ကို လွဲချော်မယ်လို့ သိရပါတယ်။

 ယူနိုက်တက်အသင်းဟာ လက်ရှိအချိန်မှာ ‌သူတို့ နှစ်ဦးအပြင် နောက်ခံလူတွေဖြစ်တဲ့ လီဆန်ဒရိုမာတီနက်စ်၊လင်ဒီလော့ဖ်၊မာလာစီယာနဲ့ လုပ်ခ်ရှောတို့ကို ဒဏ်ရာတွေကြောင့် အနားပေးထားရတာပါ။

ယူနိုက်တက်အသင်းဟာ ဘုန်းမောက်အသင်းနဲ့ ပွဲစဉ်မှာ ပြီးခဲ့တဲ့ လီဗာပူးလ်အသင်းနဲ့ ပွဲစဉ်လိုပဲ မက်ဂွဲယားနဲ့ လူငယ်နောက်ခံလူ ကမ်ဘွာလာတို့ကို တွဲဖက်အသုံးပြုဖို့ ရှိနေတာဖြစ်ပါတယ်။

Source:Metro

CNI Sport News

၂၀၂၄ ခုနှစ်၊ ဧပြီ ၁၂ 

ဝက်စ်ဟမ်းအသင်းဟာ ယူရိုပါလိဂ်ကွာတားဖိုင်နယ် ပထမအကျော့ပွဲစဉ်မှာ လေဗာကူဆင်အသင်းကို အရေးနိမ့် ခဲ့ပေမယ့် ဆီမီးဖိုင်နယ်တက်ဖို့ အခွင့်အရေး တစ်ဝက်ရှိသေးတယ်လို့ နည်းပြ ဒေးဗစ်မိုယက်စ်က ပြောခဲ့ပါတယ်။

ဒေးဗစ်မိုယက်စ်က “လေဗာကူဆင်ဟာ နောက်ကျ သွင်းဂိုးတွေအတွက် စံချိန်မှတ်တမ်းကောင်းရှိပါတယ်။ ကျနော် တို့ဟာ ဒီပွဲမှာ ကောင်းမွန်စွာ လုပ်နိုင်ခဲ့ပေမယ့် ချန်ပီယံလိဂ်အသင်းနဲ့ ကစားခဲ့ရတာပါ။ ကျနော်တို့ဟာ ဒီအဆင့်ကို မရောက်ရှိသေးပေမယ့် နောက်တစ်ပွဲကစားဖို့ ကျန်ရှိနေသေးတဲ့အတွက် ဒုတိယအကျော့မှာ အခွင့်အရေး တစ်ဝက်ရှိပါတယ်။ ကျနော်တို့လိုချင်တဲ့ ရလဒ်ကို ရယူနိုင်ဖို့အတွက် ထူးခြားကောင်းမွန်စွာ လုပ်ဆောင်ရပါလိမ့် မယ် “လို့ TNT Sports ကို ပြောပါတယ်။

ဝက်စ်ဟမ်းအသင်းဟာ အဝေးကွင်းမှာ ကစားခဲ့ရတဲ့ ဒီပွဲစဉ်မှာ ဟော့ဖ်မန်း၊ ဘိုနီဖေ့စ်တို့ရဲ့ သွင်းဂိုးတွေကြောင့် လေဗာကူဆင်အသင်းကို ၂ ဂိုး- ဂိုးမရှိနဲ့ အရေးနိမ့်ခဲ့တာ ဖြစ်ပါတယ်။ 

ဒီပွဲမှာ လေဗာကူဆင်အသင်းဟာ ဘောလုံးပိုင်ဆိုင်မှု ၇၃ ရာခိုင်နှုန်းအထိရှိခဲ့ပြီး ဂိုးပေါက်ကန်သွင်းမှု ၃၃ ကြိမ်နဲ့ ဂိုးပေါက်တည့်မှု ၁၃ ကြိမ်အထိ ရှိခဲ့တာပါ။

ဒေးဗစ်မိုယက်စ်ကို တွေ့ရစဉ်

ဝက်စ်ဟမ်းအသင်းကတော့ ဘောလုံးပိုင်ဆိုင်မှု ၂၇ ရာခိုင်နှုန်း၊ ဂိုးပေါက်ကန်သွင်းမှုနဲ့ ဂိုးပေါက်တည့်မှု ၁ ကြိမ်သာ ရှိခဲ့တာဖြစ်ပါတယ်။

ဒီရာသီ နည်းပြ ဇာဘီအလွန်ဆို လက်ထက်မှာ အကောင်းဆုံး ပုံစံရရှိနေတဲ့ လေဗာကူဆင်အသင်းဟာ အခုဆိုရင် ပြိုင်ပွဲစုံ ရှုံးပွဲမရှိတာ ၄၂ ပွဲအထိ ရှိလာခဲ့ပြီဖြစ်ပါတယ်။ 

လေဗာကူဆင်အသင်းဟာ ဒီရာသီ ဆုဖလား ၃ လုံး ရယူနိုင်မယ့် လမ်းကြောင်းပေါ်မှာ ရှိနေတာဖြစ်ပြီး ကွင်းလယ် လူ ရှာကာကတော့ အသင်းဟာ မိနစ်တိုင်း ဂိုးသွင်းနိုင်တဲ့ အရည်အသွေး ရှိတယ်ဆိုတာ ကိုယ့်ကိုယ်ကို ယုံကြည်မှု ရှိတယ်လို့ ပွဲအပြီး အင်တာဗျူးမှာ ပြောခဲ့ပါတယ်။

လေဗာကူဆင်အသင်းဟာ လာမယ့် ဘွန်ဒစ်လီဂါပွဲစဉ်အဖြစ် ဝါဒါဘရီမင်အသင်းနဲ့ ယှဉ်ပြိုင်ရမှာဖြစ်ပြီး ဒီပွဲမှာ အနိုင်ရခဲ့ရင် အသင်းသမိုင်းတစ်လျှောက် ပထမဆုံးအကြိမ်အဖြစ် ဂျာမန်အမှတ်ပေးဖလားကို ရရှိတော့မှာပါ။ 

ဝက်စ်ဟမ်းအသင်းကတော့ ဒီတစ်ပတ် ပရီးမီးယားလိဂ် ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: beinsports

CNI Sport News

၂၀၂၄ ခုနှစ်၊ ဧပြီ ၁၂

လီဗာပူးလ်အသင်းဟာ အိမ်ကွင်းမှာကစားခဲ့တဲ့ ယူရိုပါလိဂ်ကွာတားဖိုင်နယ် ပထမအကျော့ပွဲစဉ်မှာ အတ္တလန်တာ အသင်းကို အရေးနိမ့်ပြီးနောက် နည်းပြ ကလော့ပ်က အသင်းအနေနဲ့ ဒီပွဲမှာရှုံးနိမ့်ဖို့ ထိုက်တန်တယ်လို့ ပြောခဲ့ပါ တယ်။

ကလော့ပ်က “ကျနော်တို့ ဆိုးရွားတဲ့ ပွဲတစ်ပွဲ ကစားခဲ့ပြီး ရှုံးနိမ့်ဖို့ ထိုက်တန်တာကြောင့် ဒါကို ကျနော်တို့ ခံစားရ ပါမယ်။ ဒီပွဲနဲ့ ပတ်သက်ပြီး တကယ်ကို အပြုသဘောဆောင်တဲ့ ပြောစရာ ဘာမှမရှိပါဘူး။ ကျနော်တို့ အဝေးကွင်း မှာ ပြန်နိုင်မလားဆိုရင်တော့ ကောင်းမွန်စွာ ကစားခဲ့ရင် အနိုင်ရနိုင်ပါတယ်။ ၃ ဂိုး- ဂိုးမရှိနဲ့ ပြန်အနိုင်ရမလား ဆိုတာတော့ မပြောတက်ပါဘူး။ အခုကတော့ ဆိုးဆိုးရွားရွား ခံစားနေရပြီး ဒါက အရေးကြီးပါတယ်”လို့ TNT Sports ကို ပြောပါတယ်။

လီဗာပူးလ်အသင်းဟာ ဒီပွဲစဉ်မှာ အတ္တလန်တာအသင်းကို ၃ ဂိုး- ဂိုးမရှိနဲ့ ဂိုးပြတ် အရေးနိမ့်ခဲ့တာ ဖြစ်ပါတယ်။ 

အတ္တလန်တာအသင်းအတွက် ဂိုးတွေကို ဆကာမာကာက ၂ ဂိုးနဲ့ ပါဆာလစ်က ၁ ဂိုးသွင်းယူခဲ့တာပါ။ 

လီဗာပူးလ်အသင်း အတွက်တော့ ၂၀၂၃ ခုနှစ်၊ ဖေဖော်ဝါရီက ရီးရယ်လ်အသင်းကို ၅ ဂိုး-၂ ဂိုးနဲ့ ချန်ပီယံလိဂ်ပြိုင်ပွဲ မှာ အရေးနိမ့်ပြီးနောက် ပထမဆုံးအကြိမ်အဖြစ် အန်ဖီးလ်မှာ ရှုံးပွဲပြန်လည် ကြုံတွေ့ခဲ့ရတာ ဖြစ်ပါတယ်။ 

အတ္တလန်တာအသင်းနဲ့ လီဗာပူးလ်အသင်း ယှဉ်ပြိုင်နေစဉ်

အတ္တလန်တာအသင်းကို အရေးနိမ့်ခဲ့တာကြောင့် နည်းပြ ကလော့ပ်ရဲ့ နောက်ဆုံးရာသီမှာ ဆုဖလား ၃ လုံး ရယူချင်နေတဲ့ လီဗာပူးလ်အသင်းရဲ့ မျှော်လင့်ချက်ကို အနည်းငယ် ထိခိုက်စေခဲ့တာပါ။

လီဗာပူးလ်အသင်း ခေါင်းဆောင် ဗန်ဒိုက်က သူတို့ဟာ ပေါ့လျော့ခဲ့တဲ့ အမှားတွေကြောင့် အပြစ်ပေးခံခဲ့ရတယ်လို့ ပွဲအပြီး အင်တာဗျူးမှာ ဝန်ခံခဲ့ပါတယ်။

ဗန်ဒိုက်က “အလွန်စိတ်ပျက်ဖို့ ကောင်းခဲ့ပါတယ်။ တစ်ဦးချင်း အမှားတွေများခဲ့လို့ ကျနော်တို့ အပြစ်ပေးခံခဲ့ရပါ တယ်။ ခံစားချက် မကောင်းပေမယ့် ရလဒ်ကောင်းတွေ ပြန်ရအောင် ကျနော်တို့ လုပ်ရမှာပါ။ ဒီပွဲမှာ ကျနော်တို့ ၁ ဂိုး ဒါမှမဟုတ် ၂ ဂိုးလောက်သွင်းဖို့ အခွင့်အရေး ရှိခဲ့ပေမယ့် မလုပ်နိုင်ခဲ့ပါဘူး။ အန်ဖီးလ်မှာ မရှုံးတာကြာပြီဖြစ်လို့ ဒီရှုံးပွဲကြောင့် နာကျင်တယ်”လို့ ပြောပါတယ်။

အတ္တလန်တာနဲ့ လီဗာပူးလ်အသင်းတို့ရဲ့ ယူရိုပါလိဂ်ကွာတားဖိုင်နယ် ဒုတိယအကျော့ ပွဲစဉ်ကို ဧပြီ ၁၉ ရက်မှာ ယှဉ်ပြိုင်သွားမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဧပြီ ၁၁

အင်တာမိုင်ယာမီအသင်းနည်းပြ မာတီနိုက မွန်တာရေးအသင်းကို အရေးနိမ့်ခဲ့တဲ့ ကွန်ကာကပ်ဖ် ချန်ပီယံများ ဖလားပြိုင်ပွဲ ဒုတိယအကျော့ပွဲစဉ်မှာ လူစားလဲမှုတစ်ဦးမှ မပြုလုပ်ခဲ့တဲ့ အကြောင်းကို ပြောခဲ့ပါတယ်။

မာတီနိုက “ကျနော်တို့ အရန်ခုံမှာရှိတဲ့ ကစားသမားတွေ အားလုံးဟာ လူငယ်ကစားသမားတွေပါ။ ကျနော်တို့ သူတို့ကို အသုံးပြုလို့ရတဲ့ အခြေအနေမျိုးမှာ ရှိမနေပါဘူး။ ဆိုးရွားတဲ့ အခြေအနေတွေမှာ သူတို့ကို ထည့်မသွင်း ချင်တာကြောင့် ပွဲထွက်လူစာရင်းမှာ ပါဝင်ခဲ့တဲ့ သူတွေနဲ့ပဲ ပွဲကိုပြီးဆုံးအောင်လုပ်တာ အကောင်းဆုံးလို့ ထင်ခဲ့ ကြောင်း”သတင်းထောက်တွေကို ပြောခဲ့တာပါ။

အင်တာမိုင်ယာမီအသင်းဟာ ဒီပွဲမှာ မွန်တာရေးအသင်းကို ၃ ဂိုး-၁ ဂိုးနဲ့ အရေးနိမ့်ခဲ့တာ ဖြစ်ပါတယ်။ 

ပထမအကျော့ပွဲစဉ်ကလည်း အင်တာမိုင်ယာမီအသင်းဟာ မွန်တာရေးအသင်းကို ၂ ဂိုး-၁ ဂိုးနဲ့ အရေးနိမ့်ခဲ့တာ ကြောင့် နှစ်ကျော့ပေါင်းရလဒ် ၅ ဂိုး-၂ ဂိုးနဲ့ အရေးနိမ့်ပြီး ပြိုင်ပွဲကနေ ထွက်ခွာခဲ့ရတာပါ။ 

အင်တာမိုင်ယာမီအသင်းနဲ့ မွန်တာရေးအသင်းတို့ ယှဉ်ပြိုင်နေစဉ်

ဒဏ်ရာကနေ သက်သာလာပြီးနောက် အင်တာမိုင်ယာမီအသင်းရဲ့ ပွဲထွက်လူစာရင်းမှာ ပထမဆုံးအကြိမ် ပါဝင်ခဲ့တဲ့ မက်ဆီဟာ ဒီပွဲမှာ အသင်းကို နိုင်ပွဲရရှိအောင် စွမ်းဆောင်ပေးနိုင်ခဲ့ခြင်းမရှိပါဘူး။ 

အင်တာမိုင်ယာမီအသင်းဟာ ဒီပွဲ အပါအဝင် နောက်ဆုံးကစားခဲ့တဲ့ ပြိုင်ပွဲစုံ ၅ ပွဲစလုံး နိုင်ပွဲပျောက်ဆုံးခဲ့ပြီး ရလဒ်တွေ ဆိုးရွားနေတာပါ။

အင်တာမိုင်ယာမီအသင်းဟာ ဧပြီ ၁၃ ရက်မှာ မေဂျာလိဂ်ပွဲစဉ်အဖြစ် စပို့တင်းကန်ဆပ်စီးတီးအသင်းနဲ့ ယှဉ်ပြိုင်ရမှာ ဖြစ်ပါတယ်။

အင်တာမိုင်ယာမီအသင်းဟာ ဒီရာသီ မေဂျာလိဂ်ပွဲစဉ် ၈ ပွဲ ကစားအပြီးမှာ ရမှတ် ၁၂ မှတ်နဲ့ အရှေ့ပိုင်းဇုန် အမှတ်ပေးဇယား အဆင့် ၃ နေရာမှာ ရပ်တည်နေတာပါ။

အင်တာမိုင်ယာမီအသင်းကို ကွန်ကာကပ်ဖ် ချန်ပီယံများဖလားပြိုင်ပွဲမှာ အနိုင်ရခဲ့တဲ့ မွန်တာရေးအသင်းဟာ ဆီမီးဖိုင်နယ်အဆင့်မှာ မေဂျာလိဂ်ကလပ် ကိုလံဘက်စ်ခရူအသင်းနဲ့ ယှဉ်ပြိုင်ရမှာဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဧပြီ ၁၁

မန်စီးတီးအသင်းဟာ ဆုဖလား ၃ လုံးကို ၂ နှစ်ဆက်တိုက်ရယူဖို့ ပြင်ဆင်နေပေမယ့် ကွင်းလယ်လူ ရိုဒရီကတော့ သူဟာ အနားယူဖို့ လိုအပ်တယ်လို့ ဝန်ခံခဲ့ပါတယ်။

ရိုဒရီက “ကျနော်ကိုယ်တိုင် အပါအဝင် လူတိုင်းဟာ ပိုပြီးကောင်းမွန်အောင် လုပ်ဆောင်ချင်ကြပါတယ်။ ဒါပေမယ့် အရိုးသားဆုံးပြောရရင် ကျနော်တို့ အနားယူဖို့ လိုအပ်ပါတယ်။ ကျနော်လည်း အနားယူဖို့ လိုအပ်ပါတယ်။ ကျနော်တို့ဟာ ဘယ်လိုအခြေအနေမျိုးမှာ ရှင်သန်နေထိုင်လဲဆိုတာ ကြည့်ရမှာပါ။ ကျနော်တို့ စီစဉ်ထားသလို အနားယူဖို့လိုအပ်ပါတယ်”လို့ ပြောပါတယ်။

အသက် ၂၇ နှစ်အရွယ်ရှိ ရိုဒရီဟာ ရီးရယ်လ်အသင်းနဲ ၃ ဂိုးစီ သရေကျတဲ့ပွဲမှာ မန်စီးတီးအသင်းအတွက် ပါဝင် ကစားပေးပြီးနောက် ဒီရာသီမှာ မန်ချက်စတာကလပ်အတွက် ပြိုင်ပွဲစုံ ၄၁ ပွဲအထိပါဝင် ကစားထားတာ ဖြစ်ပါတယ်။

ရိုဒရီဟာ လက်ရှိအချိန်မှာ ကလပ်နဲ့ နိုင်ငံအသင်းအတွက် နောက်ဆုံး ပါဝင်ကစားထားတဲ့ ပြိုင်ပွဲစုံ ၆၆ ပွဲ ဆက်တိုက် ရှုံးပွဲမရှိသေးတဲ့ စံချိန်ကောင်းတစ်ခုကိုလည်း ပိုင်ဆိုင်ထားတာပါ။

ရိုဒရီကို တွေ့ရစဉ်

ဒါပေမယ့် မန်စီးတီးအသင်းဟာ ဒီရာသီမှာ ရိုဒရီမပါဝင်တဲ့ လိဂ်ပွဲစဉ် ၃ ပွဲစလုံး အရေးနိမ့်ထားတာ ဖြစ်ပါတယ်။

ဒါအပြင် နယူးကာဆယ်အသင်းကို အရေးနိမ့်ခဲ့တဲ့ ကာရာဘောင်းဖလား ပွဲစဉ်မှာလည်း ရိုဒရီဟာ ပွဲပယ်ကြောင့် မန်စီးတီးအသင်းအတွက် ပါဝင်နိုင်ခဲ့ခြင်း မရှိပါဘူး။

မန်စီးတီးအသင်းဟာ ရီးရယ်လ်အသင်းနဲ့ ချန်ပီယံလိဂ် ကွာတားဖိုင်နယ် ဒုတိယအကျော့ ပွဲစဉ်မတိုင်ခင် ဒီတစ်ပတ် ပရီးမီးယားလိဂ်ပွဲစဉ်အဖြစ် လူတန်အသင်းနဲ့ ယှဉ်ပြိုင်ရမှာ ဖြစ်ပါတယ်။ 

အဲဒါကြောင့် မန်စီးတီးအသင်းဟာ လူတန်အသင်းနဲ့ ပွဲစဉ်မှာ ရိုဒရီကို အနားပေးဖွယ်ရှိနေတာပါ။

ရိုဒရီဟာ ဒီရာသီမှာ မန်စီးတီးအသင်းအတွက် ၃,၄၉၇ မိနစ် ပါဝင်ကစားထားပြီး ဥရောပထိပ်တန်း ၅ လိဂ်ထဲမှာ ပွဲအများဆုံး ကစားထားတဲ့ ၂၃ ဦးမြောက် ကစားသမားအဖြစ် ရပ်တည်နေတာဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဧပြီ ၁၁

အသလက်တီကိုအသင်း တိုက်စစ်မှူး ဂရစ်ဇ်မန်းက ချန်ပီယံလိဂ်ပြိုင်ပွဲ ကွာတားဖိုင်နယ်မှာ အနိုင်ရဖို့က အလွန် အရေးကြီးတယ်လို့ ဒေါ့မွန်အသင်းကို အနိုင်ရတဲ့ပွဲအပြီးမှာ ပြောခဲ့ပါတယ်။

ဂရစ်ဇ်မန်းက “ကျနော်တို့ အနိုင်ရရှိခဲ့ပါတယ်၊ ဒါက အရေးကြီးဆုံး အရာပါပဲ။ ပွဲအပြီးမှာ ဘာဖြစ်လဲဆိုတာ အရေး မကြီးပါဘူး။ ဒေါ့မွန်ကို ဂိုးပြန်ပေးခဲ့ရလို့ စိတ်ပျက်မိပေမယ့် ချန်ပီယံလိဂ်ပြိုင်ပွဲရဲ့ ကွာတားဖိုင်နယ်မှာ အနိုင်ဖို့က အလွန်အရေးကြီးပါတယ်။ ကျနော်တို့ဟာ ဆီမီးဖိုင်နယ်ကို ရောက်ရှိဖို့ ကြိုးစားသွားမှာဖြစ်ပေမယ့် လွယ်ကူမှာ တော့ မဟုတ်ဘူး”လို့ Movistar ကို ပြောပါတယ်။

အသလက်တီကိုအသင်းက ဒေါ့မွန်အသင်းကို ၂ ဂိုး-၁ ဂိုးနဲ့ အနိုင်ရရှိခဲ့တဲ့ ချန်ပီယံလိဂ် ကွာတားဖိုင်နယ် ပထမ အကျော့ ပွဲစဉ်မှာ ဂရစ်ဇ်မန်းဟာ အသင်းအတွက် ၁ ဂိုး ဖန်တီးခဲ့ပြီး ဒီပွဲရဲ့ အကောင်းဆုံး ကစားသမားဆုကို ရရှိခဲ့ပါတယ်။ 

ဒီပွဲမှာ အသလက်တီကို အသင်းအတွက် ဂိုးတွေကို ဒီပေါလ်နဲ့ လီနိုတို့က သွင်းယူခဲ့ပြီး ဒေါ့မွန်အသင်းအတွက် ချေပဂိုးကို ဟော်လာက သွင်းယူခဲ့တာ ဖြစ်ပါတယ်။ 

အသလက်တီကိုအသင်းနဲ့ ဒေါ့မွန်အသင်း ယှဉ်ပြိုင်နေစဉ်

ဂရစ်ဇ်မန်းဟာ ပွဲအပြီးမှာ သူ့ရဲ့ ညာဘက်ခြေချင်းဝတ်ကို ရေခဲအိတ် ကပ်ထားခဲ့ပေမယ့် လာမယ့် ဂျီရိုနာအသင်းနဲ့ ပွဲစဉ်မှာ ကြံ့ခိုင်မှုအပြည့်နဲ့ ပါဝင်နိုင်မယ်လို့ ပြောခဲ့တာပါ။

အသလက်တီကို အသင်းနည်းပြ ဆီမြွန်နီက ဒေါ့မွန်အသင်းကို အနိုင်ရယူနိုင်ခဲ့တဲ့ အသင်းရဲ့ စွမ်းဆောင်ရည်ကို ချီးကျူးခဲ့ပေမယ့် ဂိုးအများအပြား မသွင်းနိုင်ခဲ့တာကြောင့် စိတ်ပျက်နေတာ ဖြစ်ပါတယ်။ 

အသလက်တီကိုအသင်းဟာ ဒီပွဲမှာ ဘောလုံးပိုင်ဆိုင်မှု ၃၄ ရာခိုင်နှုန်းသာ ရယူနိုင်ခဲ့ပေမယ့် ဂိုးပေါက်ကန်သွင်းမှု ၁၄ ကြိမ်နဲ့ ဂိုးပေါက်တည့်မှု ၉ ကြိမ်အထိရှိခဲ့ပြီး ဂိုးသွင်းနိုင်မယ့် အခွင့်အရေးအချို့ လွဲချော်ခဲ့ပါတယ်။ 

ဒေါ့မွန်နဲ့ အသလက်တီကိုအသင်းတို့ရဲ့ ချန်ပီယံလိဂ်ကွာတားဖိုင်နယ် ဒုတိယအကျော့ပွဲစဉ်ကို ဧပြီ ၁၇ ရက်မှာ ယှဉ်ပြိုင်သွားမှာပါ။

အသလက်တီကိုအသင်းဟာ ဒီရာသီ လာလီဂါပြိုင်ပွဲမှာ အဆင့် ၄ နေရာ ရပ်တည်နေပြီး အဆင့် ၃ နေရာက ဂျီရိုနာအသင်းနဲ့ ၇ မှတ် ကွာဟနေတာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဧပြီ ၁၁

ဘာစီလိုနာအသင်းဟာ ချန်ပီယံလိဂ် ကွာတားဖိုင်နယ် ပထမအကျော့ အဝေးကွင်းပွဲစဉ်မှာ ပီအက်စ်ဂျီအသင်းကို အနိုင်ရခဲ့ပေမယ့် နည်းပြ ဇာဗီက ဆီမီးဖိုင်နယ်တက်ဖို့ ပီအက်စ်ဂျီအသင်းက ရေပန်းစားတယ်လို့ ပြောခဲ့ပါတယ်။

ဇာဗီက “ပီအက်စ်ဂျီက နောက်တစ်ဆင့်တက်ဖို့ ရေပန်းစားနေဆဲပါ။ ဒီပွဲမှာ ကျနော်တို့ ကောင်းမွန်စွာ ကစားနိုင် ခဲ့ပြီး နိုင်ပွဲအတွက် ဂုဏ်ယူပါတယ်။ ကျနော်တို့ဟာ ဒုတိယပိုင်းအစတွေမှာ အာရုံစူးစိုက်မှုကို ပိုကောင်းအောင် လုပ်ရမှာပါ။ ဘာစီလိုနာအသင်းဟာ ရင့်ကျက်လာပြီး ခက်ခဲတဲ့ပွဲကနေ ပြန်ကောင်းအောင် စွမ်းဆောင်နိုင်ခဲ့ပါ တယ်။ ကျနော်တို့ဟာ ချန်ပီယံလိဂ်ပြိုင်ပွဲမှာ ခက်ခဲတဲ့နှစ်တွေကို ဖြတ်ကျော်ခဲ့ပြီးပြီဖြစ်လို့ ဒီနိုင်ပွဲက ဘာစီလိုနာ ရှင်သန်နေသေးတယ်ဆိုတာ ပြသခဲ့တာ”လို့ ပြောပါတယ်။

ချန်ပီယံလိဂ် ကွာတားဖိုင်နယ် ပထမအကျော့ပွဲစဉ်မှာ ဘာစီလိုနာအသင်းက ပီအက်စ်ဂျီအသင်းကို ၃ ဂိုး-၂ ဂိုးနဲ့ အနိုင်ရရှိခဲ့တာ ဖြစ်ပါတယ်။ 

ဒီပွဲစဉ်ရဲ့ပထမပိုင်းမှာ ဘာစီလိုနာအသင်းဟာ ရာဖင်ဟာရဲ့ သွင်းဂိုးနဲ့  ဦးဆောင်နိုင်ခဲ့ပေမယ့် ဒုတိယပိုင်းအစမှာ ဒမ်ဘီလီ၊ ဗီတင်ဟာတို့ရဲ့ သွင်းဂိုးတွေကြောင့် ပီအက်စ်ဂျီအသင်းကို ပြန်ဦးဆောင်ခွင့် ပေးခဲ့ရပါတယ်။

ဘာစီလိုနာအသင်း နည်းပြ ဇာဗီကို တွေ့ရစဉ်

ဒါပေမယ့် ရာဖင်ဟာနဲ့ ခရစ္စတန်ဆန်တို့က ချေပဂိုးနဲ့ အနိုင်ဂိုးသွင်းယူပေးခဲ့လို့ ဘာစီလိုနာအသင်း နိုင်ပွဲရရှိခဲ့ တာပါ။ 

ဘာစီလိုနာအသင်းဟာ ဒီနိုင်ပွဲကြောင့်၂၀၁၉ ခုနှစ်နောက်ပိုင်း ပထမဆုံးအကြိမ် ချန်ပီယံလိဂ် ဆီမီးဖိုင်နယ်ကို တက်နိုင်ဖို့ မျှော်လင့်နေတာ ဖြစ်ပါတယ်။ 

၂၀၁၅ ခုနှစ်က ဘာစီလိုနာအသင်းကို ဆုဖလား ၃ လုံး ရယူပေးနိုင်ခဲ့တဲ့ ပီအက်စ်ဂျီအသင်းနည်းပြ လူးဝစ်အင်းနရစ် က ဒီရှုံးပွဲကြောင့် စိတ်ပျက်မိပေမယ့် နောက်တစ်ဆင့် တက်နိုင်မယ်ဆိုတာ ယုံကြည်မှုရှိတယ်လို့ ပြောခဲ့ပါတယ်။

လူးဝစ်အင်းနရစ်က “ရှုံးပွဲကြောင့် ကျနော်တို့ မပျော်ရွှင်ပါဘူး။ ဒုတိယအကျော့က ဗိုလ်လုပွဲလိုဖြစ်ပြီး ကျနော်တို့ရဲ့ ရည်မှန်းချက်ပါ။ ကျနော်တို့ နောက်တစ်ဆင့် တက်နိုင်တယ်ဆိုတာ သံသယမရှိပါဘူး။ ဒီရလဒ်အတွက် ကျနော့်မှာ တာဝန်ရှိပါတယ်။ နိုင်ပွဲနဲ့ သူတို့ရဲ့ စွမ်းဆောင်ရည်အတွက် ဘာစီလိုနာအသင်းကို ဂုဏ်ပြုပါတယ်”လို့ ပြောပါ တယ်။

ဘာစီလိုနာနဲ့ ပီအက်စ်ဂျီအသင်းတို့ရဲ့ ချန်ပီယံလိဂ် ကွာတားဖိုင်နယ် ဒုတိယအကျော့ပွဲစဉ်ကို ဧပြီ ၁၇ ရက်မှာ ယှဉ်ပြိုင်မှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဧပြီ ၁၀

ရိုးမားအသင်းနောက်ခံလူ မန်စီနီဟာ လာဇီယိုအသင်းကို အနိုင်ရခဲ့တဲ့ ရောမဒါဘီပွဲစဉ်အပြီးမှာ ကြွက်ပုံပါဝင်တဲ့ အလံဝှေ့ယမ်းအောင်ပွဲခံခဲ့ပေမယ့် ပွဲပယ်ခံရခြင်းမရှိဘဲ ဒဏ်ကြေးယူရို ၅,၀၀၀ ချမှတ်ခံခဲ့ရပါတယ်။

ရိုးမားအသင်းက လာဇီယိုအသင်းကို ၁ ဂိုး-ဂိုးမရှိအနိုင်ရတဲ့ပွဲစဉ်မှာ ရိုးမားအသင်းအတွက်ဂိုးကို မန်စီနီက သွင်းယူ ခဲ့တာ ဖြစ်ပါတယ်။ မန်စီနီဟာ ပွဲအပြီးမှာ ရိုးမားအသင်းဖော်တွေနဲ့အတူ အသင်းပရိသတ်တွေ ရှေ့ကို သွားရောက် ကာ လာဇီယိုအရောင်ပေါ်မှာ ကြွက်ကြီးတစ်ကောင်ပါဝင်တဲ့ အလံကို ဝှေ့ယမ်းအောင်ပွဲခံခဲ့တာကြောင့် အငြင်းပွား စရာတွေဖြစ်ခဲ့တာပါ။ အဲဒါကြောင့် အီတလီဘောလုံးအဖွဲ့ချုပ်ဟာ ဒီဖြစ်ရပ်နဲ့ပတ်သက်ပြီး စုံစမ်းစစ်ဆေးမှုတွေ ပြုလုပ်ခဲ့တာဖြစ်ပါတယ်။

ဒါပေမယ့် မန်စီနီဟာ ပွဲပယ်ပြစ်ဒဏ်က လွတ်မြောက်ခဲ့ပြီး ဒဏ်ကြေးငွေသာ ချမှတ်ခံခဲ့ရတာပါ။ မန်စီနီကတော့ သူဟာ ဘယ်သူ့ကိုမှ စော်ကားဖို့ ရည်ရွယ်ခဲ့တာမဟုတ်ဘဲ သူတို့ပေးခဲ့တဲ့ ပထမဆုံးအလံကို ယူခဲ့တာလို့ ပွဲအပြီးမှာ ပြောခဲ့တာပါ။ ရိုးမားနဲ့ လာဇီယိုအသင်းတို့ရဲ့ ရောမဒါဘီပွဲစဉ်ဟာ ကမ္ဘာပေါ်မှာ ပြိုင်ဆိုင်မှုအပြင်းထန်ဆုံး ဒါဘီ ပွဲစဉ်တွေထဲက တစ်ပွဲဖြစ်ပြီး နှစ်သင်းတွေ့ဆုံတဲ့ပွဲတိုင်း ကစားသမားတွေကြား ပြဿနာတွေ ဖြစ်ပွားလေ့ ရှိတာ ဖြစ်ပါတယ်။

၂၀၂၃-၂၄ ရာသီ စီးရီးအေပွဲစဉ် ၃၁ ပွဲကစားအပြီးမှာ ရိုးမားအသင်းက ရမှတ် ၅၅ မှတ်နဲ့ အဆင့် ၅ နေရာမှာ ရပ်တည်နေပြီး လာဇီယိုအသင်းက ရမှတ် ၄၆ မှတ်နဲ့ အဆင့် ၈ နေရာမှာရပ်တည်နေတာပါ။ ရိုးမားအသင်းဟာ ဧပြီ ၁၂ ရက်မှာ ယူရိုပါလိဂ်ကွာတားဖိုင်နယ်ပထမအကျော့ ပွဲစဉ်အဖြစ် အေစီမီလန်အသင်းနဲ့ အဝေးကွင်းမှာ ယှဉ်ပြိုင်ရမှာဖြစ်ပါတယ်။

Source:ESPN

CNI Sport News

၂၀၂၄ ခုနှစ်၊ ဧပြီ ၁၀

ယူနိုက်တက်နဲ့ အာဆင်နယ်အသင်း ကစားသမားဟောင်း ဗန်ပါစီဟာ နယ်သာလန်ကလပ် ဟီရန်ဗင်းအသင်းကို ဒီရာသီအကုန်မှာ နည်းပြသစ်အဖြစ် ကိုင်တွယ်ဖို့ ဆွေးနွေးမှုတွေ ပြုလုပ်ခဲ့ပါတယ်။

အသက် ၄၀ နှစ်အရွယ်ရှိ ဗန်ပါစီဟာ လူငယ်အသင်းတွေကိုသာ ကိုင်တွယ်ထားရသေးပြီး သူ့ရဲ့ပထမဆုံး အသင်းကြီး နည်းပြအဖြစ် ဟီရန်ဗင်းအသင်းကို ကိုင်တွယ်ရဖို့ ရှိနေတာပါ။ 

ဗန်ပါစီဟာ ဖီယင်နုအသင်းမှာ ကစားသမားဘဝကို အဆုံးသတ်ပြီးနောက် ၂၀၂၀ ခုနှစ်မှာ ဖီယင်နုအသင်းရဲ့ လက်ထောက်နည်းပြအဖြစ် ဆောင်ရွက်ခဲ့ပါတယ်။ 

နောက်ပိုင်းမှာ ဗန်ပါစီဟာ ဖီယင်နု ယူ-၁၆၊ ယူ-၁၈နဲ့ ယူ-၁၉ အသင်းတွေမှာ ပူးတွဲနည်းပြချုပ်အဖြစ် တာဝန်ယူ ခဲ့တာ ဖြစ်ပါတယ်။

ဗန်ပါစီဟာ ဒီရာသီအစောပိုင်းက သူ့ရဲ့ UEFA ပရိုလိုင်စင် အစိတ်အပိုင်း ပြီးမြောက်ဖို့အတွက် အသင်းဟောင်း ယူနိုက်တက်အသင်းဆီ ရောက်ရှိလာခဲ့ကာ လေ့ကျင့်ခန်း အစီအစဉ်တွေကို ကြည့်ရှုပြီး နည်းပြအဖွဲ့ဝင်တွေနဲ့ စကားပြောဆိုခဲ့တာပါ။ 

 ဗန်ပါစီကို တွေ့ရစဉ်

ဗန်ပါစီဟာ ဟီရန်ဗင်းအသင်း ဒါရိုက်တာနဲ့ ဆွေးနွေးမှုတွေ ပြုလုပ်ခဲ့အပြီးမှာ နည်းပြလောကထဲကို ဝင်ရောက်ဖို့ ရည်ရွယ်ထားတာ ဖြစ်ပါတယ်။ ဟီရန်ဗင်းအသင်းရဲ့ နည်းပြလောင်း စာရင်းထဲမှာ ယူနိုက်တက်အသင်း တိုက်စစ်မှူးဟောင်း နစ္စတယ်ရွိုင်းလည်း ပါဝင်နေတာပါ။

နစ္စတယ်ရွိုင်းဟာ ဒတ်ချ်ကလပ် PSV အသင်းကို ကိုင်တွယ်ခဲ့တုန်းက အောင်မြင်မှုတွေ ရယူနိုင်ခဲ့တာကြောင့် သူဟာ ဟီရန်ဗင်းအသင်းကို ကိုင်တွယ်ဖို့မရှိဘဲ ထိပ်တန်းအသင်းကြီးတွေကို ကိုင်တွယ်ဖို့ ရှာဖွေနေတာ ဖြစ်ပါတယ်။

ဟီရန်ဗင်းအသင်းဟာ ဒီရာသီ ဒတ်ချ်လိဂ် အမှတ်ပေးဇယား အဆင့် ၁၁ နေရာမှာ ရပ်တည်နေပြီး နည်းပြဖြစ်သူ ဗန်ဝန်ဒီရန်ဟာ ဒီရာသီအကုန်မှာ ထွက်ခွာဖို့ စီစဉ်ထားတာပါ။ 

ဗန်ပါစီဟာ ၂၀၂၂ ခုနှစ်နွေရာသီက ယူနိုက်တက်အသင်းကို စတင်ကိုင်တွယ်ခဲ့တဲ့ နည်းပြ အဲရစ်တန်ဟတ်ရဲ့ နည်းပြ အဖွဲ့ဝင်ထဲမှာပါဝင်ဖို့ ချဉ်းကပ်မှုတွေ ပြုလုပ်ခြင်းခံခဲ့ရသေးပါတယ်။

ဒါပေမယ့် ဗန်ပါစီဟာ မိသားစု အကြောင်းပြချက်နဲ့ ဒီအခွင့်အရေးကို ငြင်းပယ်ခဲ့တာပါ။ ဗန်ပါစီဟာ လက်ရှိအချိန် မှာ ဖီယင်နု လူငယ်အသင်းတွေကို ကိုင်တွယ်နေတာ ဖြစ်ပါတယ်။

Source: Metro