CNI Sport News
၂၀၂၃ ခုနှစ်၊ ဒီဇင်ဘာ ၉

အာဆင်နယ်အသင်းနည်းပြ အာတီတာဟာ ၁ ပွဲ ပယ်ပြစ်ဒဏ် ချမှတ်ခံထားရပေမယ့် ကွင်းဘေးစည်းမှာ ခံစားချက်ပြသတာကို ရပ်တန့်သွားမှာ မဟုတ်ဘူးလို့ ပြောလိုက်ပါတယ်။

အာတီတာက “ဒါကို ဘယ်လိုရပ်တန့် ရမလဲဆိုတာကို ကျနော်မသိပါဘူး။ အားလုံး ခုန်ပေါက်ပျော်ရွှင်နေကြပြီး စိတ်လှုပ်ရှားစရာကောင်းတဲ့ အခိုက်အတန့်မှာ ခံစားချက်တွေကို မထိန်းချုပ်နိုင်ခဲ့ပါဘူး။ အခုတော့ အသင်းကို မကြီးကြပ်နိုင်တဲ့အတွက် ကံမကောင်းပေမယ့် တင်းကြပ်တဲ့စည်းမျဉ်းကြောင့် ဒါတွေက ဖြစ်လာတာပါ”လို့ ပြောခဲ့ ပါတယ်။

အာတီတာဟာ အာဆင်နယ်အသင်းက လူတန်အသင်းကို ၄ ဂိုး- ၃ ဂိုးနဲ့ အနိုင်ရခဲ့တဲ့ပွဲမှာ ဒီကလန်ရိုက်စ် အနိုင် ဂိုးသွင်းယူပြီးနောက် အကြီးအကျယ် အောင်ပွဲခံမှုကြောင့် ကွင်းလယ်ဒိုင်လူကြီးရဲ့ အဝါကတ် ပြသတာခံခဲ့ရတာ ဖြစ်ပါတယ်။

အဲ့ဒါကြောင့် အာတီတာဟာ ဒီရာသီ အဝါကတ် ၃ ကြိမ် ပြသခံရပြီးဖြစ်လို့ ပရီးမီးယားလိဂ် စည်းမျဉ်းအရ ၁ ပွဲပယ် ပြစ်ဒဏ်ကျခံရမှာ ဖြစ်တဲ့အတွက် အက်စတွန်ဗီလာအသင်းနဲ့ပွဲမှာ အာဆင်နယ်အသင်းကြီး ကြီးကြပ်နိုင်မှာ မဟုတ်ပါဘူး။

အာဆင်နယ်အသင်းဟာ လူတန်အသင်းကို အနိုင်ရခဲ့တာကြောင့် ပရီးမီးယားလိဂ် အမှတ်ပေးဇယားကို ဦးဆောင် နိုင်ခဲ့တာပါ။ အာတီတာဟာ ပွဲပယ်ပြစ်ဒဏ် ကျခံရမှာဖြစ်ပေမယ့် အောင်ပွဲခံဖို့ အခွင့်အရေးရလာရင်တော့ ထပ်ပြီး လုပ်ဆောင်သွားမယ်လို့ ပြောခဲ့ပါတယ်။

အာတီတာက “ကျနော်တို့ဟာ လိုချင်တဲ့အရာကို ရရှိဖို့အတွက် ကစားသမားတွေနဲ့ နီးနီးကပ်ကပ် လုပ်ဆောင်ချင် ပါတယ်။ ဒါက ပွဲတွေကို အနိုင်ရယူဖို့ အတွက်ဖြစ်ပြီး ဒီလိုအခိုက်အတန့်တွေကို လုပ်ဆောင်ရမှာပါ။ အဝေးကွင်းမှာ လေးစားမှု ရှိရမယ်ဆိုတာ သိပါတယ်။ ဒါပေမယ့် အခွင့်အရေး ရလာရင်တော့ ကျနော် ခုန်ပေါက်နေဦးမှာ”လို့ ပြော ခဲ့ပါတယ်။

အာတီတာဟာ နိုဝင်ဘာလက နယူးကာဆယ်အသင်းကို အာဆင်နယ်အသင်း အရေးနိမ့်ခဲ့တဲ့ပွဲအပြီးမှာ ဒိုင်လူကြီး အဖွဲ့ကို ဝေဖန်တဲ့မှတ်ချက်ကြောင့် FA ရဲ့ စွဲချက်တင်ခံထားရပြီး ပွဲပယ်ပြစ်ဒဏ် ချမှတ်ခံရဖွယ်ရှိနေတယ်လို့ သိရပါတယ်။

Source: BBC

CNI Sport News
၂၀၂၃ ခုနှစ်၊ ဒီဇင်ဘာ ၉

ရော်နယ်ဒိုဟာ အယ်လ်နာဆာအသင်းက အယ်လ်ရီယက်ဒ်အသင်းကို အနိုင်ရခဲ့တဲ့ ဆော်ဒီပရိုလိဂ်ပွဲစဉ်မှာ ပရော်ဖက်ရှင်နယ် ကစားသမားဘဝ ပွဲပေါင်း ၁၂၀၀ ပြည့်အဖြစ် ပါဝင်ကစားခဲ့ပြီး ဂိုးသွင်း၊ ဂိုးဖန်တီးမှု ပြုလုပ်နိုင် ခဲ့ပါတယ်။

အယ်လ်နာဆာအသင်းက အယ်လ်ရီယက်ဒ်အသင်းကို ၄ ဂိုး- ၁ ဂိုးနဲ့ အနိုင်ရခဲ့တဲ့ ဒီပွဲမှာ ရော်နယ်ဒိုဟာ အသင်း အတွက် ၁ ဂိုး သွင်းယူပေးခဲ့ပြီး အော်တာဗီယို သွင်းယူခဲ့တဲ့ဂိုးကို ဖန်တီးပေးနိုင်ခဲ့ပါတယ်။

ရော်နယ်ဒိုဟာ ဒီရာသီ ဆော်ဒီပရိုလိဂ်ပြိုင်ပွဲမှာ ၁၅ ပွဲ ပါဝင်ကစားထားပြီး ၁၆ ဂိုးသွင်းယူကာ လိဂ်ပြိုင်ပွဲရဲ့ ဂိုးသွင်း အများဆုံး ကစားသမားအဖြစ် ရပ်တည်နေတာ ဖြစ်ပါတယ်။ 

အမျိုးသားဘောလုံးသမိုင်းမှာ ပရော်ဖက်ရှင်နယ်ပွဲ အများဆုံး ကစားထားတဲ့ ကစားသမားအဖြစ် အင်္ဂလန်ဂိုးသမား ပီတာရှဲလ်တန်က ၁၃၈၇ ပွဲနဲ့ စံချိန်တင်ထားတာပါ။ 

အဲ့ဒါကြောင့် ရော်နယ်ဒိုအနေနဲ့ ဒီစံချိန်ကိုချိုးဖျက်ဖို့ နောက်ထပ်ပွဲပေါင်း ၁၈၇ ပွဲ ပါဝင်ကစားဖို့ လိုအပ်နေတာ ဖြစ်ပါတယ်။ 
ရော်နယ်ဒိုက “ပွဲပေါင်း ၁၂၀၀ ပြည့်အောင် ကူညီပေးခဲ့ကြတဲ့ အသင်းဖော်တွေအားလုံးကို ကျေးဇူးတင်ပါတယ်။ ဒါက အလွန်ကောင်းမွန်ပေမယ့် မပြီးဆုံးသေးပါဘူး”လို့ အင်စတာဂရမ်မှာ ရေးသားထားတာ ဖြစ်ပါတယ်။

ရော်နယ်ဒိုဟာ ဂျူဗင်တပ်စ်အသင်းမှာ ကစားချိန် ပွဲပေါင်း ၁၀၀၀ ပြည့်ခဲ့တုန်းကလည်း ဂိုးသွင်းယူနိုင်ခဲ့တာပါ။ 

အသက် ၃၈ နှစ်အရွယ်ရှိ ရော်နယ်ဒိုဟာ နိုင်ငံတကာပွဲ အများဆုံးကစားသမား၊ နိုင်ငံတကာသွင်းဂိုး အများဆုံးဆို တဲ့ ဂုဏ်ပုဒ်တွေကိုလည်း ပိုင်ဆိုင်ထားတာ ဖြစ်ပါတယ်။ 

ရော်နယ်ဒိုဟာ ကစားသမားဘဝ ပွဲပေါင်း ၁၂၀၀ အဖြစ် စပို့တင်းလစ္စဘွန်းမှာ ၃၁ ပွဲ၊ ယူနိုက်တက်မှာ ၃၄၆ ပွဲ၊ ရီးရယ်လ်မှာ ၄၃၈ ပွဲ၊ ဂျူဗင်တပ်စ်မှာ ၁၃၄ ပွဲ၊ အယ်လ်နာဆာမှာ ၄၆ ပွဲနဲ့ ပေါ်တူဂီအသင်းမှာ ၂၀၅ ပွဲကစား ထားတာပါ။

အယ်လ်နာဆာ အသင်းဟာ အယ်လ်ရီယက်ဒ်အသင်းကို အနိုင်ရခဲ့ပေမယ့် ထိပ်ဆုံးနေရာက အယ်လ်ဟီလယ် အသင်းနဲ့ ၇ မှတ်အကွာ ဆော်ဒီပရိုလိဂ် အမှတ်ပေးဇယား ဒုတိယနေရာမှာ ရပ်တည်နေတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဒီဇင်ဘာ ၈

ကိုပါအမေရိကဖလားပြိုင်ပွဲရဲ့ လက်ရှိချန်ပီယံဖြစ်တဲ့ အာဂျင်တီးနားအသင်းဟာ ၂၀၂၄ ပြိုင်ပွဲမှာလည်း ချန်ပီယံဆု ကို ထပ်ပြီးရယူနိုင်ဖို့ မျှော်လင့်တယ်လို့ နည်းပြစကာလိုနီက အုပ်စုမဲခွဲတဲ့ အခမ်းအနားမှာ ပြောခဲ့ပါတယ်။

စကာလိုနီက “ကိုပါအမေရိကဖလားဟာ ကျနော်တို့ရဲ့ လှပတဲ့ခေတ်အတွက် အစဖြစ်ခဲ့ပါတယ်။ အားလုံးဟာ ဒီဆုဖလားကနေပဲ စတင်ခဲ့တယ်လို့ ပြောလို့ရပါတယ်။ ဒီဆုဖလားက အရမ်းလှသလို အလွန်လည်း ထူးခြားပါ တယ်။ ကျနော်တို့တွေဟာ ထူးခြားတဲ့ အခိုက်အတန့်တွေကို ခံစားခဲ့ရပါတယ်။ ဒီဆုဖလားကို ရယူဖို့က အလွန်ခက် ခဲပေမယ့် အာဂျင်တီးနား ထပ်ပြီးရယူနိုင်ဖို့ ကျနော်မျှော်လင့်ပါတယ်”လို့ ပြောခဲ့ပါတယ်။

၂၀၂၄ ကိုပါအမေရိက ဖလားပြိုင်ပွဲအတွက် အုပ်စုမဲခွဲမှုမှာ အာဂျင်တီးနားအသင်းဟာ အုပ်စု A မှာ ပီရူး၊ ချီလီ၊ ကနေဒါနဲ့ ထရီနီဒတ်တို့ပွဲစဉ်က အနိုင်ရတဲ့အသင်းတို့နဲ့ ကျရောက်နေတာ ဖြစ်ပါတယ်။ 

ကိုပါအမေရိကဖလား အုပ်စုပွဲစဉ်တွေကိုတွေ့ရစဉ်

အုပ်စု B မှာ မက္ကဆီကို၊ အီကွေဒေါ၊ ဗင်နီဇွဲလားနဲ့ ဂျမေကာ၊ အုပ်စု C မှာ အမေရိကန်၊ ဥရုဂွေး၊ ပနားမားနဲ့ ဘိုလီးဗီးယား၊ အုပ်စု D မှာ ဘရာဇီးလ်၊ ကိုလံဘီယာ၊ ပါရာဂွေး၊ ဟွန်ဒူးရပ်စ်နဲ့ ကော်စတာရီကာတို့ ပွဲစဉ်က အနိုင်ရတဲ့အသင်းတို့နဲ့ ကျရောက်နေပါတယ်။

မဲခွဲမှုလမ်းကြောင်းအရ အာဂျင်တီးနားနဲ့ ဘရာဇီးလ်အသင်းတို့ဟာ ဗိုလ်လုပွဲရောက်မှ တွေ့ဆုံနိုင်ဖွယ်ရှိနေတာ ဖြစ်ပါတယ်။ 

၂၀၂၄ ကိုပါအမေရိက ဖလားပြိုင်ပွဲကို ဇွန်လ ၂၀ ရက်ကနေ ဇူလိုင် ၁၄ ရက်အထိ အမေရိကန်နိုင်ငံက အိမ်ရှင် အဖြစ် လက်ခံကျင်းပသွားမှာပါ။ 

ဒီပြိုင်ပွဲရဲ့ ဗိုလ်လုပွဲကို မိုင်ယာမီရှိ Hard Rock Stadium မှာ ကျင်းပသွားမှာ ဖြစ်ပါတယ်။ 

ကိုပါအမေရိက ဖလားပြိုင်ပွဲရဲ့ အအောင်မြင်ဆုံး အသင်းကတော့ အာဂျင်တီးနားနဲ့ ဥရုဂွေးအသင်းတို့ဖြစ်ပြီး ၁၅ ကြိမ်စီ ဗိုလ်စွဲထားပါတယ်။

Source: AP

CNI Sport News

 ၂၀၂၃ ခုနှစ်၊ ဒီဇင်ဘာ ၈

ယူနိုက်တက်နည်းပြရာထူးဟာ မဖြစ်နိုင်တဲ့အလုပ်လို့ ထင်တဲ့အတွက် သူငယ်ချင်းတွေက သူ့ကို ဒီရာထူးမရယူဖို့ ကြိုးစားခဲ့ကြတယ်လို့ အဲရစ်တန်ဟတ်က ဖွင့်ဟခဲ့ပါတယ်။

အဲရစ်တန်ဟတ်က “လူတိုင်းက ခင်ဗျားဒီအလုပ်မှာ မအောင်မြင်နိုင်သလို မဖြစ်နိုင်ဘူးလို့ ပြောခဲ့ကြပါတယ်။ ကျနော်ကတော့ စိန်ခေါ်မှုတွေကို ရယူချင်တယ်ဆိုပြီး ပြန်ပြောခဲ့ကြောင်း”United We Stand က ဖော်ပြခဲ့တာပါ။

ယူနိုက်တက်အသင်းကို ကိုင်တွယ်ဖို့အတွက် ၂၀၂၂ ခုနှစ်က အေဂျက်ဇ်အသင်းကနေ ထွက်ခွာခဲ့တဲ့ အဲရစ်တန်ဟတ် ဟာ ဒုတိယရာသီမှာ ဖိအားဒဏ်တွေကို ခံစားနေရတာဖြစ်ပါတယ်။ ဒတ်ချ်လူမျိုးနည်းပြဟာ ယူနိုက်တက် အသင်း နည်းပြဘ၀ ပထမဆုံးရာသီမှာ ကာရာဘောင်းဖလား ရယူပေးနိုင်ခဲ့ပြီး ၆ နှစ်ကြာဆုဖလားနဲ့ ဝေးကွာနေတာကို အဆုံးသတ်ပေးခဲ့တာပါ။ ဒါပေမယ့် ယူနိုက်တက်အသင်းဟာ ဒီရာသီမှာ ရလဒ်ပိုင်းတွေမတည်မငြိမ်ဖြစ်နေပြီး ချန်ပီယံလိဂ်မှာလည်း အုပ်စုက ထွက်ခွာရဖို့ နီးစပ်နေတာဖြစ်ပါတယ်။

ယူနိုက်တက်အသင်းဟာ ဆာအဲလက်စ်ဖာဂူဆန်အနားယူခဲ့တဲ့ ၂၀၁၃ ခုနှစ်ကတည်းက ပရီးမီးယားလိဂ်ဖလားနဲ့ ဝေးကွာနေတာပါ။ အဲရစ်တန်ဟတ်ဟာ ဒေးဗစ်မိုယက်စ်၊ ဗန်ဟားလ်၊ မော်ရင်ဟို၊ ဆိုးလ်ရှားနဲ့ ရက်ဂ်နစ်တို့ မရယူပေးနိုင်ခဲ့တဲ့ ချန်ပီယံလိဂ်နဲ့ ပရီးမီးယားလိဂ်ဖလားကို ယူနိုက်တက်အသင်းအတွက် ရယူပေးနိုင်ဖို့ ကြိုးစားနေတာဖြစ်ပါတယ်။ လက်ရှိအချိန်မှာတော့ ယူနိုက်တက်အသင်းဟာ ဒီဆုဖလားတွေကို ပြန်ရယူနိုင်ဖို့ ဝေးကွာနေသေးတာပါ။

အဲရစ်တန်ဟတ်က “ဒါက မလွယ်ကူဘူးဆိုတာ ကျနော်သိပါတယ်။ ဒါပေမယ့် ယူနိုက်တက်အသင်းဟာ ပရိသတ် အခိုင်အမာရှိတဲ့ အသင်းကြီးပါ။ လူတွေက ယူနိုက်တက်ကို ချစ်ကြသလို၊ မချစ်ကြတဲ့သူတွေလည်း ရှိပါတယ်။ ကျနော်ကတော့ ဒီလိုကလပ်မျိုးတွေကို နှစ်သက်ပါတယ်။ အေဂျက်ဇ်ကလည်း ဒီလိုအသင်းပါပဲ” လို့ ပြောခဲ့ပါ တယ်။

ယူနိုက်တက်အသင်းဟာ ချယ်လ်ဆီးအသင်းကို ၂ ဂိုး-၁ ဂိုးနဲ့ အနိုင်ရခဲ့ပြီးနောက် နည်းပြ အဲရစ်တန်ဟတ်အတွက် ဖိအားအနည်းငယ်လျော့သွားခဲ့တာဖြစ်ပြီး ပရီးမီးယားလိဂ်အဆင့် ၆ နေရာကို ပြန်လည်တက်လှမ်းနိုင်ခဲ့တာပါ။ ယူနိုက်တက်အသင်းဟာ ဒီနေ့မှာ ပရီးမီးယားလိဂ်ပွဲစဉ်အဖြစ် ဘုန်းမောက်အသင်းနဲ့ ယှဉ်ပြိုင်ရမှာဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဒီဇင်ဘာ ၈

ဂရီမီယိုအသင်းနဲ့အတူ ခြေစွမ်းပြသနိုင်ခဲ့တဲ့ ဝါရင့်တိုက်စစ်မှူး ဆွာရက်ဇ်ဟာ ဘရာဇီးလ်လိဂ်ရဲ့ အကောင်းဆုံးကစားသမားဆုနဲ့ အကောင်းဆုံးတိုက်စစ်မှူးဆုကို ရရှိသွားခဲ့ပါတယ်။

အသက် ၃၆ နှစ်အရွယ်ရှိ ဆွာရက်ဇ်ဟာ ဂရီမီယိုအသင်းအတွက် လိဂ်ပွဲပေါင်း ၃၃ ပွဲမှာ ၁၇ ဂိုးသွင်းယူခဲ့ပြီး အသင်းကို အမှတ်ပေးဇယားဒုတိယနေရာရပ်တည်နိုင်အောင် စွမ်းဆောင်ပေးနိုင်ခဲ့တာပါ။ ဆွာရက်ဇ်ဟာ ဂရီမီယိုအသင်းက ဖလူမီနက်စ်အသင်းကို ၃ ဂိုး- ၂ ဂိုးနဲ့ အနိုင်ရခဲ့တဲ့ ဘရာဇီးလ်လိဂ်နောက်ဆုံးပွဲစဉ်မှာ အသင်းအတွက် ၂ ဂိုးသွင်းယူပေးနိုင်ခဲ့တာဖြစ်ပါတယ်။ ဆွာရက်ဇ်ဟာ ပြီးခဲ့တဲ့ ဘရာဇီးလ်လိဂ်ရဲ့ ထိပ်တန်း ဂိုးသွင်းရှင်စာရင်းထဲ ပါဝင်ခဲ့ပြီး အကောင်းဆုံးဆု ၂ ခုကို ရယူနိုင်ခဲ့တာပါ။

ဆွာရက်ဇ်က “ကျနော်ဟာ အသက် ၃၇ နှစ်နီးပါးရှိနေပါပြီ။ ဒါက ကျနော့်ကစားသမားဘဝမှာ အများဆုံး ကစားရတဲ့နှစ်ပါ။ ကျနော့် ဇနီး၊ သားသမီးတွေနဲ့ ဝေးကွာခဲ့ရတဲ့ နှစ်တစ်နှစ်လည်းဖြစ်ပါတယ်။ ဒီဆုက သူတို့အတွက်ပါ”လို့ ဆုယူအပြီးမှာ ပြောခဲ့တာဖြစ်ပါတယ်။

ဆွာရက်ဇ်ဟာ ဂရီမီယိုအသင်းအတွက် ပြိုင်ပွဲစုံပွဲပေါင်း ၅၄ ပွဲကစားခဲ့ပြီး ၂၉ ဂိုးသွင်းယူကာ အသင်းကနေ ထွက်ခွာခဲ့ပြီဖြစ်တာပါ။ ဆွာရက်ဇ်ဟာ မေဂျာလိဂ်ကလပ် အင်တာမိုင်ယာမီအသင်းထံ ပြောင်းရွှေ့ဖို့ နီးစပ် နေတယ်လို့ သတင်းတွေထွက်နေပေမယ့် ဥရုဂွေးကစားသမားကတော့ အနာဂတ်နဲ့ ပတ်သက်ပြီး ဖြေဆိုခဲ့ခြင်း မရှိပါဘူး။ ဆွာရက်ဇ်ဟာ ဂရီမီယိုအသင်းပရိသတ်တွေတင်မဟုတ်ဘဲ သူ့ကို လေးစားတဲ့ အခြားကလပ် တွေကိုလည်း သတိရနေမယ်လို့ ပြောခဲ့ပါတယ်။

ဆွာရက်ဇ်ဟာ ဂရီမီယိုအသင်းရဲ့ သမိုင်းမှာ ဘရာဇီးလ်လိဂ်ပြိုင်ပွဲရဲ့ အကောင်းဆုံးကစားသမားဆုကို ရရှိတဲ့ ၄ ဦးမြောက်ကစားသမားအဖြစ် မှတ်တမ်းဝင်ခဲ့တာလည်း ဖြစ်ပါတယ်။ 

Source:ESPN

CNI Sport News

၂၀၂၃ ခုနှစ်၊ ဒီဇင်ဘာ ၈

စပါးအသင်းခေါင်းဆောင် ဆွန်ဟောင်မင်က ဝက်စ်ဟမ်းအသင်းကို အရေးနိမ့်ခဲ့တာဟာ လက်ခံနိုင်စရာမရှိဘဲ ကစားသမားတွေအနေနဲ့ တာဝန်ယူဖို့ လိုအပ်တယ်လို့ ပြောလိုက်ပါတယ်။ 

ဆွန်ဟောင်မင်က “ကျနော်တို့ဟာ ပွဲကိုရှုံးနိမ့်သွားပါပြီ။ ဒါဟာ လက်ခံနိုင်စရာကိုမရှိပါဘူး။ ကစားသမားတွေ အနေနဲ့ ဒီရလဒ်ကိုတာဝန်ယူရမှာပါ။ တိုက်စစ်ကစားသမားတွေအနေနဲ့ ပွဲကိုဖြတ်ပစ်လို့ရတဲ့ အခွင့်အရေးတွေ ရှိတာကြောင့် သူတို့အနေနဲ့ ပိုပြီးတာဝန်ယူမှုရှိသင့်ပါတယ်။ ပရီးမီးယားလိဂ်မှာ ၂ ဂိုး- ဂိုးမရှိ၊ ၃ ဂိုး- ဂိုးမရှိနဲ့ အနိုင်ရနေရင်တောင် အဆုံးသတ်မှာ ဘာဖြစ်မလဲဆိုတာ ခင်ဗျားတို့ မသိနိုင်ဘူး” လို့ Amazon Prime ကို ပြောခဲ့တာပါ။

ပြီးခဲ့တဲ့အပတ်ကမှ မန်စီးတီးအသင်းနဲ့ ၃ ဂိုးစီသရေကျခဲ့တဲ့ စပါးအသင်းဟာ ပရီးမီးယားလိဂ်ပွဲစဉ် ၁၅ အဖြစ် ကစားခဲ့တဲ့ပွဲစဉ်မှာတော့ ဝက်စ်ဟမ်းအသင်းကို ၂ ဂိုး- ၁ ဂိုးနဲ့ အရေးနိမ့်ခဲ့တာဖြစ်ပါတယ်။ စပါးအသင်းဟာ ဒီပွဲမှာ ရိုမဲရိုးရဲ့ သွင်းဂိုးနဲ့ ဦးဆောင်နိုင်ခဲ့ပေမယ့် ဘိုဝင်၊ ဝါတ်ပရောက်စ်တို့ရဲ့ သွင်းဂိုးတွေကြောင့် ဝက်စ်ဟမ်းအသင်းကို အရေးနိမ့်ခဲ့တာပါ။ စပါးအသင်းအတွက်တော့ ပွဲကိုဦးဆောင်ထားပြီးမှ ၅ ပွဲဆက်တိုက် အမှတ်လျော့ခဲ့တာလည်း ဖြစ်ပါတယ်။

စပါးအသင်းဟာ ဒီရှုံးပွဲကြောင့် ၂၀၀၈ ခုနှစ်နောက်ပိုင်း ပထမဆုံးအကြိမ်အိမ်ကွင်း ၃ ပွဲဆက် ရှုံးပွဲကြုံတွေ့ခဲ့တာ ဖြစ်ပြီး အောက်တိုဘာ ၂၇ ရက်ကတည်းက နိုင်ပွဲတွေနဲ့ ဝေးကွာနေတာပါ။ အဲဒါကြောင့် ဆွန်ဟောင်မင်ဟာ အသင်းရဲ့ ရလဒ်တွေကို စိတ်ပျက်နေခဲ့တာဖြစ်ပါတယ်။ စပါးအသင်းနည်းပြ ပိုစတီကိုဂလူးက အသင်းဟာ ဖျော်ဖြေမှုပေးနိုင်တဲ့ ဘောလုံးကစားတာထက် နိုင်ပွဲရယူနိုင်ဖို့ ပိုပြီးအာရုံစိုက်ထားတယ်လို့ ပြောခဲ့တာပါ။

ပိုစတီကိုဂလူးက “ဒီပွဲဟာ ကျနော်တို့အတွက် ဘောလုံးပွဲတစ်ပွဲကို လွှမ်းမိုးထားနိုင်တဲ့ နောက်ထပ်ပွဲဖြစ်ခဲ့ပါတယ်။ ဒါပေမယ့် နိုင်ပွဲတော့မရယူနိုင်ခဲ့ပါဘူး။ ကျနော်တို့ဟာ ပွဲတိုင်းကို အနိုင်ရယူချင်နေတာဖြစ်ပြီး ဒီပွဲမှာဆိုရင် ပထမပိုင်းမှာကတည်းက ဂိုးပြတ်နိုင်ပွဲ ရယူသင့်တာပါ။ ဘောလုံးပွဲတစ်ပွဲမှာ အခွင့်အရေးပေးမိပြီဆိုရင် အသင်း တွေက ခင်ဗျားတို့ကို ပြန်ပြီးအပြစ်ပေးသွားမှာပါ” လို့ ပြောခဲ့ပါတယ်။

စပါးအသင်းဟာ ဒီတစ်ပတ်ပရီးမီးယားလိဂ်ပွဲစဉ်အဖြစ် နယူးကာဆယ်အသင်းနဲ့ ယှဉ်ပြိုင်ရမှာဖြစ်ပါတယ်။

Source:BBC

CNI Sport News
၂၀၂၃ ခုနှစ်၊ ဒီဇင်ဘာ ၈

လီဗာပူးလ်အသင်း နောက်ခံလူ မာတစ်ဟာ ဒူးအရွတ်ဒဏ်ရာကြောင့် အခုရာသီအကုန်ထိ အနားယူရဖွယ် ရှိတယ်လို့ သိရပါတယ်။

မာတစ်ဟာ လီဗာပူးလ်အသင်းက ဖူလ်ဟမ်အသင်းကို ၄ ဂိုး- ၃ ဂိုးနဲ့ အနိုင်ရရှိခဲ့တဲ့ ပရီးမီးယားလိဂ်ပွဲစဉ်ရဲ့ ပွဲပြီးဆုံးဖို့ မိနစ် ၂၀ အလိုမှာ ဒဏ်ရာ ရရှိသွားခဲ့ပါတယ်။

လီဗာပူးလ်အသင်းက ရှက်ဖီးယူနိုက်တက်အသင်းကို ၂ ဂိုး- ဂိုးမရှိနဲ့ အနိုင်ရခဲ့တဲ့ ပရီးမီးယားလိဂ် ပွဲစဉ်အပြီးမှာ နည်းပြကလော့ပ်က နောက်ခံလူ မာတစ်ဟာ ဒူးအရွတ်ဒဏ်ရာ ရရှိသွားခဲ့တယ်လို့ အတည်ပြုခဲ့တာ ဖြစ်ပါတယ်။ 

မာတစ်နဲ့ လီဗာပူးလ်အသင်းတို့ ချုပ်ဆိုထားတဲ့ စာချုပ်ဟာ နောက်ဆုံးနှစ်ထဲကို ရောက်ရှိနေတာဖြစ်လို့ ဖူလ်ဟမ် အသင်းနဲ့ ပွဲစဉ်ဟာ သူ့ရဲ့နောက်ဆုံးပွဲစဉ် ဖြစ်လာနိုင်တာပါ။ 

မာတစ်ဟာ လီဗာပူးလ်အသင်းကို ၂၀၁၆ ခုနှစ်က ရှော်လ်ကေးအသင်းကနေ ရောက်ရှိလာခဲ့တာဖြစ်ပြီး ပွဲပေါင်း ၂၀၁ ပွဲ ပါဝင်ကစားထားကာ ၁၁ ဂိုး သွင်းယူထားတာ ဖြစ်ပါတယ်။

မာတစ်ဟာ လီဗာပူးလ်အသင်းနဲ့အတူ ပရီးမီးယားလိဂ်၊ ချန်ပီယံလိဂ်၊ FA ဖလား၊ ကာရာဘောင်းဖလားနဲ့ ဥရောပ စူပါဖလားတို့ကို ရယူနိုင်ခဲ့ပါတယ်။

မာတစ်ရဲ့ ဒဏ်ရာကြောင့် လီဗာပူးလ်အသင်းဟာ လာမယ့် ဇန်နဝါရီလ အပြောင်းအရွှေ့မှာ ဗဟိုနောက်ခံလူ တစ်ဦးကို ခေါ်ယူဖို့ ပြင်ဆင်နေတယ်လို့ သိရပါတယ်။ 

လီဗာပူးလ်အသင်းဟာ ဒီရာသီမှာ ရလဒ်ကောင်းတွေ ရရှိနေပြီး ပရီးမီးယားလိဂ်ပြိုင်ပွဲမှာ ထိပ်ဆုံးနေရာက အာဆင်နယ်အသင်းနဲ့ ၂ မှတ်အကွာ အဆင့် ၂ နေရာမှာ ရပ်တည်နေသလို ယူရိုပါလိဂ်ပြိုင်ပွဲမှာလည်း နောက် တစ်ဆင့်ကို တက်ရောက်နိုင်ခဲ့ပြီ ဖြစ်ပါတယ်။

လီဗာပူးလ်အသင်းဟာ ပရီးမီးယားလိဂ်ပွဲစဉ် ၁၆ အဖြစ် ပဲလေ့စ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News
၂၀၂၃ ခုနှစ်၊ ဒီဇင်ဘာ ၈

ပေါင်ခြံဒဏ်ရာကြောင့် ဖေဖော်ဝါရီလကတည်းက ဘောလုံးပွဲတွေနဲ့ ဝေးကွာနေတဲ့ အဲဗာတန်အသင်း ကွင်းလယ်လူ ဒယ်လီအလီဟာ မြက်ခင်းပြင်မှာ လေ့ကျင့်မှုတွေ စတင်နေပြီလို့ နည်းပြ ရှောင်ဒိုက်က ပြောပါတယ်။

ရှောင်ဒိုက်က “ဒယ်လီအလီ ကောင်းမွန်နေပါပြီ။ ကြံ့ခိုင်မှုပိုင်း ပြန်လည် ရရှိနိုင်ဖို့အတွက် မြက်ခင်းပြင်မှာ ဘောလုံးနဲ့ ပတ်သက်တဲ့ လေ့ကျင့်မှုတွေ ပြုလုပ်နေပါတယ်။ ဒါပေမယ့် သူဟာ ကျနော်တို့နဲ့ ပူးပေါင်းနိုင်ဦးမှာ မဟုတ်သေးပါဘူး။ နောက်လာမယ့် အပတ်တွေမှာ တဖြည်းဖြည်းနဲ့ ပါဝင်လာနိုင်မယ်လို့ မျှော်လင့်ပါတယ်။ သူဟာ အနားယူတာကြာပြီဖြစ်လို့ လုပ်စရာ အနည်းငယ်ရှိနေသေးပြီး သူ့အတွက် ဂိမ်းအစီအစဉ်လိုပါတယ်”လို့ ပြောခဲ့ပါ တယ်။

ဒယ်လီအလီဟာ သူ့ရဲ့ငယ်စဉ်ဘဝက ဖြစ်ပျက်ခဲ့တဲ့ ဆိုးရွားတဲ့ အကြောင်းအရာတွေနဲ့ အိပ်ဆေးစွဲလန်းနေမှုကို နွေရာသီက ဖွင့်ဟခဲ့တာ ဖြစ်ပါတယ်။ 

အင်္ဂလန်ကစားသမားဟာ ပြီးခဲ့တဲ့ရာသီက တူရကီကလပ် ဘက်ဆီးတပ်စ် အသင်းမှာ အငှားနဲ့ သွားရောက် ကစား ပြီးနောက် အဲဗာတန်အသင်းထံ ပြန်လည်ရောက်ရှိလာခဲ့ပါတယ်။

ဒါပေမယ့် ဒယ်လီအလီဟာ ဒဏ်ရာကြောင့် အဲဗာတန်အသင်းအတွက် ဒီရာသီမှာ ပါဝင်ကစားနိုင်ခဲ့ခြင်း မရှိတာ ဖြစ်ပါတယ်။
ဒယ်လီအလီဟာ အဲဗာတန်အသင်းကို ၂၀၂၂ ခုနှစ်က စပါးအသင်းကနေ ပြောင်းရွှေ့လာခဲ့တာဖြစ်ပြီး ၁၃ ပွဲသာ ပါဝင်ကစားထားပါတယ်။

ပြီးခဲ့တဲ့ရာသီက ဘက်ဆီးတပ်စ်အသင်းမှာ အငှားသွားရောက် ကစားချိန်မှာတော့ ဒယ်လီအလီဟာ တူရကီ ကလပ်အတွက် ၁၅ ပွဲ ပါဝင်ကစားပြီး ၃ ဂိုး သွင်းယူနိုင်ခဲ့တာ ဖြစ်ပါတယ်။ 

အသက် ၂၇ နှစ်အရွယ်ရှိ ဒယ်လီအလီဟာ စပါးအသင်းမှာ သူ့ရဲ့ကစားသမားဘဝ အကောင်းဆုံးပုံစံ ရရှိခဲ့ပေမယ့် နောက်ပိုင်းမှာ ခြေစွမ်းကျဆင်းသွားခဲ့ပါတယ်။

အဲဗာတန်အသင်းကတော့ ဘဏ္ဍာရေးစည်းမျဉ်း ချိုးဖောက်ခဲ့တယ်ဆိုပြီး ပရီးမီးယားလိဂ်ရဲ့ ၁၀ မှတ်လျှော့ ပြစ်ဒဏ် ချမှတ်ခဲ့တဲ့အပေါ် ပြီးခဲ့တဲ့ရက်ပိုင်းက တရားဝင် အယူခံဝင်ထားတာ ဖြစ်ပါတယ်။

Source: Daily Mail

CNI Sport News
၂၀၂၃ ခုနှစ်၊ ဒီဇင်ဘာ ၇

မန်စီးတီးအသင်းဟာ ဗီလာအသင်းကို အရေးနိမ့်ပြီး ပရီးမီးယားလိဂ်မှာ ၄ ပွဲဆက်တိုက် နိုင်ပွဲပျောက်ဆုံးခဲ့တာကြောင့် ရုန်းကန်နေရပြီလို့ နည်းပြ ဂွာဒီယိုလာက ဝန်ခံလိုက်ပါတယ်။

ဂွာဒီယိုလာက “ပိုကောင်းတဲ့အသင်းက အနိုင်ရရှိခဲ့ပါတယ်။ ဗီလာက ကျနော်တို့ထက် ပိုပြီးကောင်းပါတယ်။ သူတို့ဟာ နေရာစုံကို ထိန်းချုပ်ကစားနိုင်ခဲ့တာကြောင့် ခက်ခဲခဲ့ပြီး ကျနော်တို့ဒီလိုမျိုးမလုပ်နိုင်ခဲ့ပါဘူး။ အသင်းပြန်လာနိုင်ဖို့အတွက် နည်းလမ်းရှာဖွေဖို့က ကျနော့်တာဝန်နဲ့ ကျနော့်အလုပ်ပါ။ ကျနော်တို့ဟာ ရလဒ်ကောင်းတွေပြန်ရဖို့ အမြဲတမ်းနည်းလမ်း တွေ့ခဲ့ပေမယ့် အခုတော့ရုန်းကန်နေရပြီ”လို့ ပြောပါတယ်။ 

ပရီးမီးယားလိဂ် လက်ရှိ ချန်ပီယံ မန်စီးတီးအသင်းဟာ ရလဒ်ဆိုးတွေကြောင့် အဆင့် ၄ နေရာ ရောက်ရှိသွားခဲ့ပြီး အဆင့် ၁ နေရာက အာဆင်နယ်အသင်းနဲ့ ၆ မှတ် ကွာဟသွားခဲ့ပြီဖြစ်ပါတယ်။ 

မန်စီးတီးအသင်းဟာ ကွင်းလယ်လူ ရိုဒရီ မပါဝင် နိုင်တဲ့ပွဲတွေမှာ ရလဒ်ဆိုးနေတဲ့ အစဉ်အလာကို ဆက်ထိန်းသိမ်းနိုင်ခဲ့တာဖြစ်ပြီး ဒီရာသီ သူမပါဝင်တဲ့ ပြည်တွင်းပွဲ ၄ ပွဲစလုံး ရှုံးနိမ့်ခဲ့တာပါ။ 

ရိုဒရီဟာ ပွဲပယ်ကြောင့် ဒီပွဲကို မပါဝင်နိုင်ခဲ့ပေမယ့် လာမယ့် လူတန်အသင်းနဲ့ ပွဲမှာ မန်စီးတီးအသင်းအတွက် ပြန်လည်ပါဝင်နိုင်မှာဖြစ်ပါတယ်။

ဂွာဒီယိုလာက “ရိုဒရီဟာ အရေးပါတဲ့သူဖြစ်ပေမယ့် ကျနော်တို့ဟာ ဒီပွဲမှာ အကန်ဂျီ၊ ဂျွန်စတုန်းစ်တို့နဲ့အတူ ကြိုးစားခဲ့ပါတယ်။ ရိုဒရီ ပါဝင်ခဲ့ပေမယ့် ကျနော်တို့ စပါးနဲ့ လီဗာပူးလ်ကို အနိုင်မယူနိုင်ခဲ့ပါဘူး။ သူဟာ အရေးပါတဲ့သူဖြစ်ပေမယ့် နည်းလမ်းရှာဖွေရမှာက ကျနော့်ရဲ့အလုပ်ပါ။ ဒီပွဲကတော့ ရိုးရှင်းပါတယ်။ ပိုကောင်းတဲ့အသင်းက အနိုင်ရခဲ့တာဖြစ်ပြီး ဒါကို ကျနော်တို့ လက်ခံရမှာပါ”လို့ ပြောခဲ့တာပါ။

ဗီလာအသင်းဟာ နည်းပြ အူနှိုင်းအမ်မရီလက်ထက်မှာ ရလဒ်ကောင်းတွေ ဆက်တိုက်ရရှိနေပြီး ၁၄ ပွဲဆက် အိမ်ကွင်းနိုင်ပွဲနဲ့အတူ ပရီးမီးယားလိဂ်အဆင့် ၃ နေရာမှာ ရပ်တည်နေပါတယ်။ 

ဗီလာအသင်းဟာ ဒီတစ်ပတ်မှာတော့ အာဆင်နယ်အသင်းနဲ့ ယှဉ်ပြိုင်ရမှာဖြစ်ပါတယ်။

Source: ESPN