CNI Sport News

၂၀၂၄ ခုနှစ်၊ ဒီဇင်ဘာ ၁၃

အာဆင်နယ်အသင်းဟာ ကွင်းလယ်လူ ပါတေးနဲ့ စာချုပ်သစ်အတွက် ဆွေးနွေးမှု ပြုလုပ်တာမှာ ရပ်တန့်သွား ခဲ့တာကြောင့် အလွတ်နဲ့ ဆုံးရှုံးရဖွယ် ရှိနေပါတယ်။ 

၂၀၂၀ ခုနှစ်က အသလက်တီကို အသင်းကနေ ပေါင် ၄၅ သန်းနဲ့ ရောက်ရှိလာခဲ့တဲ့ ပါတေးဟာ အာဆင်နယ် အသင်းမှာ အဓိက ကစားသမားအဖြစ် ခြေစွမ်းပြသနေတာပါ။ 

ပါတေးဟာ ပြီးခဲ့တဲ့ရာသီက ဒဏ်ရာတွေကြောင့် အာဆင်နယ်အသင်းကနေ ထွက်ခွာဖို့ ချိတ်ဆက်မှုတွေ ခံခဲ့ရပေမယ့် ဒီရာသီမှာ ပုံစံကောင်းတွေနဲ့ ပြန်လာနိုင်ခဲ့တာ ဖြစ်ပါတယ်။

ပါတေးဟာ ကွင်းလယ်အပြင် ညာနောက်ခံလူအဖြစ် ကစားခဲ့ရတဲ့ ပွဲတွေမှာလည်း ခြေစွမ်းပြသနိုင်ခဲ့တာပါ။ 

အာဆင်နယ်အသင်း နည်းပြ အာတီတာက ကလပ်အသင်းဟာ ပါတေးနဲ့ စာချုပ်သစ်အတွက် မကြာခင်မှာ ဆွေးနွေးမှုပြုလုပ်ဖို့ စီစဉ်ထားတယ်လို့ ပြီးခဲ့တဲ့လက ပြောထားခဲ့ပါတယ်။ 

ဒေးလီးမေးလ်ကတော့ အပြောင်းအရွှေ့ ဈေးကွက် ပြန်ဖွင့်မယ့် ရက်အနည်းငယ်အထိ အာဆင်နယ်အသင်းနဲ့ ပါတေးတို့ဟာ စာချုပ်သစ်အတွက် တိုးတက်မှု မရှိခဲ့ဘူးလို့ ဖော်ပြထားပါတယ်။ 

ပါတေးကိုတွေ့ရစဉ်

ဒီအခြေအနေကို မပြောင်းလဲနိုင်ရင် ပါတေးဟာ ဇန်နဝါရီ အပြောင်းအရွှေ့မှာ ပြင်ပကလပ် အသင်းတွေနဲ့ အကြို စာချုပ်ချုပ်ဆိုလို့ရမှာ ဖြစ်ပါတယ်။ 

ဒီရာသီအကုန်မှာ အာဆင်နယ်အသင်းနဲ့ စာချုပ်ကုန်ဆုံးမယ့် ပါတေးကို ခေါ်ယူဖို့ စီးရီးအေ ကလပ်အသင်းတွေနဲ့ ဆော်ဒီပရိုလိဂ် ကလပ်အသင်းတွေက စိတ်ဝင်စားပြီး စောင့်ကြည့်နေကြတာပါ။ 

အာဆင်နယ်အသင်း တိုက်စစ်မှူးဟောင်း အလန်စမစ်က ပါတေး ထွက်ခွာခဲ့ရင် အသင်းအနေနဲ့ အေစီမီလန် အသင်း ကွင်းလယ်လူ ရိုင်ဒါကို ခေါ်ယူဖို့ ပြောထားပါတယ်။

ရိုင်ဒါဟာ အေစီမီလန်အသင်းမှာ ပြသနေတဲ့ ခြေစွမ်းတွေကြောင့် ဥရောပထိပ်သီး ကလပ်တွေရဲ့ ပစ်မှတ် အဖြစ်ရှိနေတာပါ။

အာဆင်နယ်အသင်းဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် အဲဗာတန်အသင်းကို အိမ်ကွင်းယှဉ်ပြိုင်ရမှာ ဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ ဒီဇင်ဘာ ၁၃

အာဂျင်တီးနား ထိပ်သီးကလပ် ဘိုကာဂျူနီယာအသင်းဟာ စပိန်နဲ့ ရီးရယ်လ်အသင်း ဂန္ထဝင် ရာမို့စ်ကို ဇန်နဝါရီမှာ ခေါ်ယူနိုင်ဖို့ မျှော်လင့်နေပါတယ်။ 

ဝါရင့်နောက်ခံလူ ရာမို့စ်ဟာ ဆီဗီလာအသင်းနဲ့ စာချုပ် ကုန်ဆုံးပြီးနောက် ထွက်ခွာခဲ့တဲ့ ပြီးခဲ့တဲ့ ရာသီအကုန် ကတည်းက အသင်းလက်မဲ့အဖြစ် ရှိနေတာပါ။

ရာမို့စ်ဟာ နောက်ခံလူ မီလီတာအိုရဲ့ ကာလရှည်ကြာ အနားယူရမယ့် ဒဏ်ရာကြောင့် ရီးရယ်လ်အသင်းထံ ပြန်လာဖို့ ချိတ်ဆက်မှုတွေ ရှိခဲ့ပေမယ့် စပိန်ကလပ်က ဒီသတင်းတွေကို ငြင်းဆန်ခဲ့တာ ဖြစ်ပါတယ်။ 

TYC Sports က ဘိုကာဂျူနီယာအသင်းဟာ ရာမို့စ်ကို ၂၀၂၅ ခုနှစ်၊ ဇန်နဝါရီမှာ ခေါ်ယူနိုင်ဖို့ ကြီးကြီးမားမား ပြင်ဆင်နေတာကြောင့် ရာမို့စ်ဟာ ၂၀၂၅ ခုနှစ်ထဲမှာ ကစားသမားဘဝ ပြန်လည်စတင်နိုင်မယ်လို့ ဖော်ပြထား တာပါ။ 

ရာမို့စ်ကို တွေ့ရစဉ်

ဘိုကာဂျူနီယာအသင်းဟာ ရာမို့စ်ကို ခေါ်ယူဖို့ ကမ်းလှမ်းမှု မရှိသေးပေမယ့် အသင်းဥက္ကဋ္ဌ ရီကွယ်လ်မီဟာ မကြာခင်မှာ တရားဝင် ကမ်းလှမ်းမှုတွေ ပြုလုပ်ပြီး ခေါ်ယူဖို့ အဆင်သင့်ဖြစ်နေပြီလို့ သိရပါတယ်။ 

ရာမို့စ်အနေနဲ့ ဘိုကာဂျူနီယာအသင်းထံ ပြောင်းရွှေ့ဖို့ ဆုံးဖြတ်ခဲ့ရင် အာဂျင်တီးနား ကလပ်အသင်းနဲ့အတူ နွေရာသီမှာ ကျင်းပမယ့် ဖီဖာကလပ် ကမ္ဘာ့ဖလားပြိုင်ပွဲကို ပါဝင်ခွင့်ရရှိမှာပါ။

ဘိုကာဂျူနီယာအသင်းဟာ ဖီဖာကလပ် ကမ္ဘာ့ဖလားပြိုင်ပွဲရဲ့ အုပ်စု C မှာ ဘိုင်ယန်မြူးနစ်၊ အော့ကလန်စီးတီး၊ ဘင်ဖီကာ အသင်းတို့နဲ့ တစ်အုပ်စုတည်း ကျရောက်နေပါတယ်။ 

ဘိုကာဂျူနီယာအသင်းဟာ ဒီရာသီ အာဂျင်တီးနား လိဂ်ပြိုင်ပွဲမှာ အမှတ်ပေးဇယား အဆင့် ၆ နေရာ ရပ်တည် နေကာ ဒီတစ်ပတ်ပွဲစဉ်အဖြစ် အင်ဒီပန်ဒီယန်ဒီအသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ ဒီဇင်ဘာ ၁၃

ရီးရယ်လ်အသင်း တိုက်စစ်မှူး ဘတ်ပီဟာ ပေါင်ဒဏ်ရာကြောင့် ၁၀ ရက်ကြာ အနားယူရဖွယ်ရှိတယ်လို့ ESPN က ဖော်ပြထားပါတယ်။ 

ဘတ်ပီဟာ ရီးရယ်လ်အသင်းက အတ္တလန်တာအသင်းကို ၃ ဂိုး-၂ ဂိုးနဲ့ အနိုင်ရခဲ့တဲ့ ချန်ပီယံလိဂ်ပွဲစဉ်မှာ ဒဏ်ရာ ရရှိခဲ့တာကြောင့် ပွဲချိန် ၃၅ မိနစ်မှာ လူစားလဲခံခဲ့ရတာပါ။ 

ရီးရယ်လ်အသင်းဟာ ဘတ်ပီရဲ့ ဒဏ်ရာကို စစ်ဆေးမှုတွေ ပြုလုပ်အပြီးမှာ ပေါင်ဒဏ်ရာ ရရှိကြောင်း တွေ့ရှိခဲ့ရပြီး သူ့ရဲ့တိုးတက်မှု အခြေအနေကို စောင့်ကြည့်ရမယ်လို့ ကြေညာချက် ထုတ်ပြန်ထားပါတယ်။ 

သတင်းတွေမှာ ဘတ်ပီဟာ ၁၀ ရက်ကြာ အနားယူရမယ်လို့ ဖော်ပြထားတာကြောင့် ဗယ်လက်ကာနိုအသင်းနဲ့ ယှဉ်ပြိုင်မယ့် လာလီဂါပွဲစဉ်မှာ ရီးရယ်လ်အသင်းအတွက် ပါဝင်နိုင်တော့မှာ မဟုတ်ပါဘူး။ 

ဒါအပြင် ဘတ်ပီဟာ ဖီဖာရဲ့ Intercontinental Cup ပြိုင်ပွဲကိုလည်း ပါဝင်နိုင်ဖို့ မသေချာဘူးလို့ သိရပါတယ်။ 

ဘတ်ပီကို တွေ့ရစဉ်

ရီးရယ်လ်အသင်းဟာ ပြီးခဲ့တဲ့ရာသီက ချန်ပီယံလိဂ်ပြိုင်ပွဲမှာ ဗိုလ်စွဲထားတာကြောင့် ဒီပြိုင်ပွဲကို ဝင်ရောက် ယှဉ်ပြိုင်ခွင့် ရရှိထားတာပါ။

ရီးရယ်လ်အသင်းဟာ Intercontinental Cup ပြိုင်ပွဲမှာ ဗိုလ်လုပွဲ တစ်ပွဲတည်းကိုသာ ယှဉ်ပြိုင်ရမှာဖြစ်ပြီး ပါချူကာအသင်းနဲ့ အယ်လ်အာလီအသင်းတို့ ပွဲစဉ်က အနိုင်ရတဲ့ အသင်းနဲ့ ဒီဇင်ဘာ ၁၈ ရက်ကျရင် ယှဉ်ပြိုင်ရမှာ ဖြစ်ပါတယ်။ 

ပြီးခဲ့တဲ့ နွေရာသီက ပီအက်စ်ဂျီအသင်းကနေ အလွတ်နဲ့ ပြောင်းရွှေ့လာခဲ့တဲ့ ဘတ်ပီဟာ ရီးရယ်လ်အသင်းမှာ ပုံမှန်ခြေစွမ်း မပြသနိုင်တာကြောင့် ဝေဖန်မှုတွေ ခံထားရပေမယ့် ပါဝင်ကစားထားတဲ့ ၂၂ ပွဲမှာ ၁၂ ဂိုး သွင်းယူထား တာပါ။ 

ဒဏ်ရာကြောင့် အနားယူနေရတဲ့ ရီးရယ်လ်အသင်း နောက်ခံလူ ကာဗာဟယ်လ်က ဘတ်ပီဟာ အသင်းကို ဆုဖလားတွေ ရယူပေးနိုင်မယ်ဆိုတာ ယုံကြည်မှုရှိတယ်လို့ ပြောထားပါတယ်။ 

ရီးရယ်လ်အသင်းဟာ ဒီရာသီ လာလီဂါပြိုင်ပွဲမှာ ထိပ်ဆုံးနေရာက ဘာစီလိုနာ အသင်းထက် ၁ ပွဲလျော့ ကစား ထားပြီး ရမှတ် ၂ မှတ်အကွာ အဆင့် ၂ နေရာမှာ ရပ်တည်နေကာ ချန်ပီယံလိဂ် ပြိုင်ပွဲမှာတော့ အဆင့် ၂၀ နေရာမှာ ရပ်တည်နေတာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဒီဇင်ဘာ ၁၃

ယူနိုက်တက်အသင်းဟာ ဗစ်တိုးရီးယားပယ်လ်ဇန်အသင်းကို ၂ ဂိုး-၁ ဂိုးနဲ့ အနိုင်ရခဲ့ပြီးနောက် နည်းပြ အာမိုရင်က အခုအချိန်မှာ နိုင်ပွဲရယူနိုင်ဖို့က အရေးကြီးတယ်လို့ ပြောခဲ့ပါတယ်။

အာမိုရင်က “ပွဲကစားချိန်အတွင်းမှာ ကျနော်တို့ တိုးတက်မှုတွေရှိခဲ့ပါတယ်။ ပထမပိုင်းမှာ ပွဲကိုထိန်းချုပ်နိုင်ခဲ့ ပေမယ့် အခွင့်အရေးကောင်းတွေတော့ မရခဲ့ပါဘူး။ ဒုတိယပိုင်းမှာ ကျနော်တို့ဟာ ဂိုးပေးခဲ့ရပေမယ့် ကောင်းမွန်စွာ တုန့်ပြန်နိုင်ခဲ့ပါတယ်။ ကျနော်တို့ဟာ ပြိုင်ဘက်အသင်းကို ဖိအားပေးပြီး ဂိုးတွေသွင်းနိုင်ခဲ့ပါတယ်။ အခုအချိန်မှာ နိုင်ပွဲက အရေးကြီးပြီး နောက်ပွဲအတွက် ပြင်ဆင်ရတာ ကောင်းပါတယ်”လို့ TNT Sports ကို ပြောခဲ့တာပါ။

ယူနိုက်တက်အသင်းဟာ ဒီပွဲမှာ ဂိုးသမား အိုနာနာရဲ့ အမှားကနေ ချက်ကလပ်ကို ဦးဆောင်ဂိုး ပေးခဲ့ရပေမယ့် တိုက်စစ်မှူး ဟော့ဂျ်လန်းရဲ့ ချေပဂိုးနဲ့ အနိုင်ဂိုးတွေကြောင့် ယူရိုပါလိဂ်ပြိုင်ပွဲမှာ ၃ ပွဲဆက်တိုက် နိုင်ပွဲရယူနိုင်ခဲ့ တာပါ။ 

ယူနိုက်တက်အသင်းဟာ ဒီနိုင်ပွဲကြောင့် ဒီရာသီ ယူရိုပါလိဂ်ပွဲစဉ် ၆ ပွဲ ကစားအပြီးမှာ ရမှတ် ၁၂ မှတ်နဲ့ အမှတ်ပေး ဇယား အဆင့် ၇ နေရာမှာ ရပ်တည်နေတာ ဖြစ်ပါတယ်။ 

ယူနိုက်တက်အသင်း အောင်ပွဲခံနေစဉ်

ယူနိုက်တက်အသင်းဟာ နောက်ဆုံးကစားမယ့် ၂ ပွဲမှာ ရလဒ်ကောင်း ရယူနိုင်ရင် နောက်တဆင့်ကို တိုက်ရိုက် တက်နိုင်မှာပါ။

ဒီပွဲအပြီးမှာ ယူနိုက်တက်အသင်း ကစားသမားတွေဖြစ်တဲ့ ဟော့ဂျ်လန်းနဲ့ အာမတ်တို့ဟာ တင်းမာမှုတွေရှိခဲ့ကြပြီး နည်းပြအာမိုရင်က ဒီလိုမြင်တွေ့ရတာဟာ ကောင်းမွန်တဲ့ လက္ခဏာဖြစ်တယ်လို့ ပြောခဲ့ပါတယ်။

အာမိုရင်က “ကျနော့်အတွက်တော့ ဒီလိုမြင်တွေ့ရတာဟာ ပြီးပြည့်စုံပါတယ်။ ဒီလိုအခိုက်အတန့်မှာ ကျနော်တို့ တစ်ခုခုခံစားရမှာပါ။ တစ်ဦးနဲ့တစ်ဦး ရန်ဖြစ်ရင် ဒါဟာမိသားစုလိုပါပဲ။ ကျနော့်အတွက်တော့ ဒါဟာ အလွန် ကောင်းတဲ့ လက္ခဏာပါ”လို့ ပြောခဲ့တာပါ။

ယူရိုပါလိဂ်ပြိုင်ပွဲမှာ ၃ ပွဲဆက်တိုက် နိုင်ပွဲရရှိခဲ့တဲ့ ယူနိုက်တက်အသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် မန်စီးတီးအသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: CNA

CNI Sport News

၂၀၂၄ ခုနှစ်၊ ဒီဇင်ဘာ ၁၂

အင်္ဂလန်နောက်ခံလူ ဂျိုးဂိုးမက်ဇ်က သူဟာ ပြီးခဲ့တဲ့နွေရာသီမှာ လီဗာပူးလ်အသင်းကနေ ထွက်ခွာပြီး နယူးကာဆယ်အသင်းထံ ပြောင်းရွှေ့ဖို့ နီးစပ်ခဲ့တယ်လို့ ဝန်ခံခဲ့ပါတယ်။ 

ဂျိုးဂိုးမက်ဇ်က “ကျနော် လီဗာပူးလ်ကနေ ထွက်ခွာဖို့ နီးစပ်ခဲ့တယ်ဆိုတာ ဟုတ်ပါတယ်။ ဒါပေမယ့် ကျနော်ဟာ ကလပ်အပေါ်မှာ အမြဲတမ်း အာရုံစိုက်ခဲ့ပါတယ်။ ဒီမှာရှိနေရတာဟာ ဘယ်လောက်ကောင်းမွန်လဲဆိုတာကို သိပြီး လာမယ့် နွေရာသီဆိုရင် ဒီမှာရှိတာ ၁၀ နှစ်ရှိသွားပါပြီ။ အပြောင်းအရွှေ့ မဖြစ်ခဲ့ပြီးနောက်မှာ ကျနော်ဟာ အသင်းနဲ့အတူ လျင်မြန်စွာ လိုက်လျောညီထွေဖြစ်အောင် လုပ်ခဲ့ရပါတယ်”လို့ ပြောခဲ့တာပါ။ 

ပြီးခဲ့တဲ့ နွေရာသီ အပြောင်းအရွှေ့က ဂျိုးဂိုးမက်ဇ်ဟာ နယူးကာဆယ်အသင်းထံ ပြောင်းရွှေ့ပြီး နယူးကာဆယ် အသင်းက ဂေါ်ဒွန်ဟာ လီဗာပူးလ်အသင်းထံ ပြန်လည်ပြောင်းရွှေ့လာမယ့် အပြောင်းအရွှေ့ ဖြစ်ပေါ်ဖို့ ရှိခဲ့ပါတယ်။ 

ဒါပေမယ့် ဒီအပြောင်းအရွှေ့ဟာ ပျက်ပြယ်သွားခဲ့ပြီးနောက် ဂျိုးဂိုးမက်ဇ်ဟာ လီဗာပူးလ်အသင်းမှာ ဆက်ပြီး ရှိနေခဲ့တာပါ။

ဂျိုးဂိုးမက်ဇ်ကို တွေ့ရစဉ်

ဂျိုးဂိုးမက်ဇ်ဟာ ဗန်ဒိုက်၊ ကိုနာတေး၊ ကွမ်ဆက်တို့ရဲ့ အနောက်မှာသာ ရာသီအသစ်ကို စတင်ခဲ့ရတာဖြစ်ပါတယ်။ 

ဒါပေမယ့် လီဗာပူးလ်အသင်းရဲ့ အဓိက နောက်ခံလူတွေရဲ့ ဒဏ်ရာကြောင့် ဂျိုးဂိုးမက်ဇ်ဟာ အသင်းအတွက် ပါဝင်ခွင့်ရခဲ့ပြီး အခုဆိုရင် ပြိုင်ပွဲစုံ ၁၁ ပွဲအထိ ပါဝင်ကစားထားတာပါ။ 

အသက် ၂၇ နှစ်အရွယ်ရှိ ကစားသမားဟာ ပြီးခဲ့တဲ့ လီဗာပူးလ်အသင်းရဲ့ ပွဲစဉ် ၃ ပွဲစလုံး ပွဲထွက်လူစာရင်း ပါဝင်ခဲ့ပြီး လာမယ့် ပွဲတွေမှာလည်း ဗန်ဒိုက်နဲ့အတူ တွဲဖက်ပြီး ပွဲထွက်ခွင့်ရဖို့ မျှော်လင့်နေတာ ဖြစ်ပါတယ်။ 

ဂျိုးဂိုးမက်ဇ်နဲ့ လီဗာပူးလ်အသင်းတို့ရဲ့ စာချုပ်ဟာ ၂၀၂၇ ခုနှစ် ရာသီအကုန်ထိ သက်တမ်းရှိနေတာပါ။ 

ပရီးမီးယားလိဂ်နဲ့ ချန်ပီယံလိဂ် ပြိုင်ပွဲမှာ အဆင့် ၁ နေရာ ရပ်တည်နေတဲ့ လီဗာပူးလ်အသင်းဟာ ဒီတစ်ပတ် လိဂ်ပွဲစဉ်အဖြစ် ဖူလ်ဟမ်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ ဒီဇင်ဘာ ၁၂

နာပိုလီအသင်းနည်းပြ ကွန်တီဟာ ယူနိုက်တက်အသင်း တိုက်စစ်မှူး ဇက်ခ်ဇီကို အသင်းအတွက် ခေါ်ယူချင် နေတယ်လို့ အီတလီမီဒီယာတွေက ဖော်ပြထားပါတယ်။ 

ဇက်ခ်ဇီဟာ ပြီးခဲ့တဲ့ နွေရာသီကမှ ဘိုလော့ဂ်နာ အသင်းကနေ ယူနိုက်တက်အသင်းထံ ပေါင် ၃၆.၅ သန်းနဲ့ ပြောင်းရွှေ့ လာခဲ့ပေမယ့် သူ့ရဲ့ ယူနိုက်တက်အသင်း အနာဂတ်နဲ့ ပတ်သက်ပြီး ထင်ကြေးတွေ အများအပြား ထွက်ပေါ်နေတာပါ။

ဂျူဗင်တပ်စ်အသင်းဟာ ဇက်ခ်ဇီကို ခေါ်ယူဖို့ ချိတ်ဆက်မှု ပြုလုပ်နေသလို နောက်ထပ် အီတလီကလပ်ဖြစ်တဲ့ နာပိုလီအသင်းကလည်း သူ့ကို ခေါ်ယူဖို့စဉ်းစားမှုတွေ ပြုလုပ်နေတာ ဖြစ်ပါတယ်။ 

အီတလီသတင်း Il Mattino က ကွန်တီဟာ ယူနိုက်တက်အသင်းကနေ ဇက်ခ်ဇီကို ခေါ်ယူနိုင်မယ့် ဒီပြိုင်ဆိုင်မှု ထဲမှာ ပါဝင်ဖို့ နာပိုလီအသင်းကို မီးစိမ်းပြခဲ့တယ်လို့ ဖော်ပြထားတာပါ။ 

တော်မီနေးကို တွေ့ရစဉ်

ဇက်ခ်ဇီ ကိုယ်တိုင်ကလည်း လာမယ့် ဇန်နဝါရီ အပြောင်းအရွှေ့မှာ စီးရီးအေထံ ပြန်လာဖို့ စိတ်ဝင်စားနိုင်တယ်လို့ ဒီသတင်းထဲမှာ ထပ်မံဖော်ပြထားတာ ဖြစ်ပါတယ်။ 

ကွန်တီဟာ ဇက်ခ်ဇီရဲ့ ပရိသတ်တစ်ဦးဖြစ်ပြီး ယူနိုက်တက်အသင်းထံ သူမပြောင်းရွှေ့ခင် ပြီးခဲ့တဲ့ နွေရာသီက နာပိုလီအသင်းအတွက် ခေါ်ယူချင်ခဲ့တာပါ။ 

နာပိုလီအသင်းဟာ ပြီးခဲ့တဲ့ နွေရာသီ အပြောင်းအရွှေ့က ယူနိုက်တက်အသင်းကနေ တော်မီနေးကို ခေါ်ယူပြီး နောက် နောက်ထပ် ယူနိုက်တက် ကစားသမားတစ်ဦးကို ပစ်မှတ်ထားနေတာ ဖြစ်ပါတယ်။ 

တော်မီနေးဟာ နာပိုလီအသင်းမှာ ပရိသတ်အကြိုက် ကစားသမားတစ်ဦးအဖြစ် ခြေစွမ်းပြသနေပြီး နာပိုလီ အသင်းအတွက် ၁၄ ပွဲ ကစားထားတာမှာ ၄ ဂိုးသွင်းပြီး ၂ ဂိုးဖန်တီးထားတာပါ။ 

နာပိုလီအသင်းဟာ ဒီရာသီ စီးရီးအေပြိုင်ပွဲမှာ ရလဒ်ကောင်းတွေ ရရှိနေပြီး အမှတ်ပေးဇယား အဆင့် ၂ နေရာမှာ ရပ်တည်နေပါတယ်။

နာပိုလီအသင်းဟာ ဒီတစ်ပတ် စီးရီးအေပွဲစဉ်အဖြစ် အူဒီးနီးစ်အသင်းနဲ့ အဝေးကွင်းပွဲစဉ် ယှဉ်ပြိုင်ရမှာ ဖြစ်ပါ တယ်။

Source: Metro

CNI Sport News

၂၀၂၄ ခုနှစ်၊ ဒီဇင်ဘာ ၁၂

ကမ္ဘာ့ဘောလုံးအဖွဲ့ချုပ်(ဖီဖာ)က ၂၀၃၄ ကမ္ဘာ့ဖလားပြိုင်ပွဲကို ဆော်ဒီနိုင်ငံက အိမ်ရှင်အဖြစ် ကျင်းပမယ်လို့ ဗုဒ္ဓဟူးနေ့က ပြုလုပ်ခဲ့တဲ့ ကွန်ဂရက်မှာ အတည်ပြုခဲ့ပါတယ်။

၂၀၃၀ ကမ္ဘာ့ဖလားပြိုင်ပွဲကိုတော့ မော်ရိုကို၊ ပေါ်တူဂီနဲ့ စပိန်နိုင်ငံတို့က ပူးတွဲအိမ်ရှင်အဖြစ် ကျင်းပမှာဖြစ်ပြီး တောင်အမေရိကနိုင်ငံတွေဖြစ်တဲ့ အာဂျင်တီးနား၊ ဥရုဂွေးနဲ့ ပါရာဂွေးနိုင်ငံတို့မှာ တစ်ပွဲစီကျင်းပသွားမှာပါ။ 

ဒီဆုံးဖြတ်ချက်ကို ဖီဖာဥက္ကဋ္ဌ အင်ဖန်တီနိုက ကွန်ဂရက်အပြီးမှာ ကြေညာခဲ့တာ ဖြစ်ပါတယ်။ 

ကမ္ဘာ့ဖလားပြိုင်ပွဲကို ၁၉၃၀ က စတင်ခဲ့တာကြောင့် ၂၀၃၀ မှာ ဒီပြိုင်ပွဲရဲ့ သက်တမ်းဟာ နှစ် ၁၀၀ ပြည့်ခဲ့ပြီ ဖြစ်တာပါ။

အဲဒါကြောင့် နှစ် ၁၀၀ ပြည့် အထိမ်းအမှတ်အဖြစ် ကမ္ဘာ့ဖလားပြိုင်ပွဲကြီး စတင်ခဲ့တဲ့ တောင်အမေရိကနိုင်ငံမှာ ၃ ပွဲ ကျင်းပသွားမှာ ဖြစ်ပါတယ်။

ဆော်ဒီနိုင်ငံဟာ ၂၀၃၄ ကမ္ဘာ့ဖလားပြိုင်ပွဲကို အိမ်ရှင်အဖြစ် လျှောက်ထားတဲ့ တစ်နိုင်ငံတည်းသော နိုင်ငံဖြစ်လို့ အိမ်ရှင်ပြုလုပ်ခွင့် ရရှိသွားခဲ့တာပါ။ 

ဆော်ဒီကို ရည်ညွန်းထားစဉ်

ဆော်ဒီအိုလံပစ်နဲ့ မသန်စွမ်း အားကစားကော်မတီ အကြီးအကဲကတော့ ဒါက ဆော်ဒီနိုင်ငံရဲ့ သမိုင်းဝင် အခိုက်အတန့်ဖြစ်ပြီး ဒီနိုင်ငံမှာရှိတဲ့ လူသားအားလုံးအတွက် အိပ်မက်တစ်ခု ဖြစ်လာပြီလို့ ပြောခဲ့ပါတယ်။ 

အယ်လ်နာဆာ အသင်းခေါင်းဆောင် ရော်နယ်ဒိုက အခြေခံ အဆောက်အဦတွေ၊ အားကစားကွင်းတွေ၊ ပရိသတ် တွေအတွက် အခြေအနေနဲ့ အရာအားလုံးကြောင့် ၂၀၃၄ ဟာ အကောင်းဆုံး ကမ္ဘာ့ဖလားပြိုင်ပွဲ ဖြစ်လာမယ်လို့ ယုံကြည်ကြောင်း ပြောထားတာပါ။

ဖီဖာက ဆော်ဒီနိုင်ငံကို ၂၀၃၄ ကမ္ဘာ့ဖလားပြိုင်ပွဲ အိမ်ရှင်အဖြစ် ကြေညာပြီးနောက်မှာ လူ့အခွင့်အရေး အဖွဲ့အစည်းတွေ  အပါအဝင် အဖွဲ့အစည်းပေါင်း ၂၁ ဖွဲ့က ဒါကို ရှုတ်ချတဲ့ ပူးတွဲကြေညာချက် ထုတ်ပြန်ခဲ့ပါတယ်။ 

ဆော်ဒီနိုင်ငံဟာ ကမ္ဘာ့ဖလားပြိုင်ပွဲကို ပထမဆုံးအကြိမ် ကျင်းပခွင့်ရမှာဖြစ်လို့ ပြိုင်ပွဲအတွက် အသုံးပြုမယ့် အားကစားကွင်း ၈ ကွင်းကို တည်ဆောက်သွားဖို့ရှိနေတာပါ။ 

၂၀၃၀ နဲ့ ၂၀၃၄ ကမ္ဘာ့ဖလားပြိုင်ပွဲတွေကို အိမ်ရှင်အဖြစ် ကျင်းပမယ့်နိုင်ငံတွေဟာ ပြိုင်ပွဲကို အလိုအလျောက် ဝင်ရောက် ယှဉ်ပြိုင်ခွင့်ရရှိမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဒီဇင်ဘာ ၁၂

မန်စီးတီးအသင်းဟာ ချန်ပီယံလိဂ်ပွဲစဉ်မှာ ဂျူဗင်တပ်စ်အသင်းကို ၂ ဂိုး-ဂိုးမရှိနဲ့ အရေးနိမ့်ပြီးနောက် နည်းပြ ဂွာဒီယိုလာက အသင်းအနေနဲ့ ဒီပြိုင်ပွဲမှာ ဆက်ရှိနေဖို့ တိုက်ပွဲဝင်ရမယ်လို့ ပြောခဲ့ပါတယ်။

ဂွာဒီယိုလာက “နောက်တဆင့် တက်နိုင်ဖို့က ကျနော်တို့ရဲ့ ပစ်မှတ်ပါ။ ကျနော်တို့အတွက် ၁ မှတ်၊ ၃ မှတ်ရဖို့ လိုအပ်ပါတယ်။ ကျနော်တို့ ဒါကိုလုပ်နိုင်ဖို့အတွက် ကြိုးစားဖို့ ပဲရစ်ကိုသွားမှာပါ။ ပြီးရင် အိမ်ကွင်းမှာ နောက်ဆုံးပွဲ ကစားပါမယ်။ ကျနော်တို့ဟာ ရလဒ်ကောင်းတွေ ပြန်ရယူနိုင်ခဲ့ရင် ဒီကာလကိုမေ့မှာ မဟုတ်ပါဘူး။ ကျနော်တို့လုပ် ခဲ့တာတွေနဲ့ အနာဂတ်မှာ ကျနော်တို့လုပ်ရမယ့် အရာတွေအပေါ် ပိုပြီးတန်ဖိုးထားလာမှာပါ”လို့ ပြောခဲ့တာပါ။

မန်စီးတီးအသင်းဟာ ဂျူဗင်တပ်စ်အသင်းကို အရေးနိမ့်ခဲ့တာကြောင့် လက်ကျန်ပွဲစဉ် ၂ ပွဲပဲ ကစားဖို့ ကျန်ရှိတော့ တဲ့ အချိန်မှာ အမှတ်ပေးဇယားအဆင့် ၂၂ နေရာကို ရောက်ရှိသွားခဲ့တာ ဖြစ်ပါတယ်။

မန်စီးတီးအသင်းဟာ ချန်ပီယံလိဂ်ပွဲစဉ် ၆ ပွဲ ကစားအပြီးမှာ ရမှတ် ၈ မှတ်သာ ရရှိထားတာကြောင့် လက်ကျန် ၂ ပွဲစလုံး ရလဒ်ကောင်းရယူနိုင်ရင်တောင် နောက်တဆင့်ကို တိုက်ရိုက် တက်ရောက်နိုင်ဖွယ်မရှိဘဲ ပလေးအော့ဖ် အဆင့် ယှဉ်ပြိုင်ရဖို့ရှိနေတာပါ။ 

မန်စီးတီးအသင်းကို တွေ့ရစဉ်

မန်စီးတီးအသင်းဟာ ချန်ပီယံလိဂ်နောက်ဆုံး ၂ ပွဲအဖြစ် ပီအက်စ်ဂျီ၊ ကလပ်ဘရုဂေးအသင်းတို့နဲ့ ယှဉ်ပြိုင်ရမှာ ဖြစ်ပါတယ်။ 

မန်စီးတီးအသင်းဟာ ဂျူဗင်တပ်စ် အသင်းနဲ့ပွဲစဉ် အပါအဝင် နောက်ဆုံးကစားခဲ့တဲ့ ပြိုင်ပွဲစုံ ၁၀ ပွဲမှာ ၁ ပွဲသာ အနိုင်ရခဲ့ပြီး ၇ ပွဲအထိ အရေးနိမ့်ကာ အဆိုးရွားဆုံး အခြေအနေကို ရောက်ရှိနေတာပါ။ 

မန်စီးတီးအသင်း ကွင်းလယ်လူ ဂွန်ဒိုဂန်က အသင်းရဲ့ ရုန်းကန်ရမှုတွေမှာ ယုံကြည်မှုက ကြီးမားတဲ့ အစိတ်အပိုင်း ဖြစ်ပြီး စိတ်ပိုင်းဆိုင်ရာ ပြဿနာလည်း ဖြစ်နိုင်တယ်လို့ ပွဲအပြီးမှာ ပြောခဲ့ပါတယ်။ 

ရလဒ်ဆိုးတွေကြောင့် ပရီးမီးယားလိဂ် ပြိုင်ပွဲမှာ အဆင့် ၄ နေရာအထိ ရောက်ရှိနေတဲ့ လက်ရှိ ချန်ပီယံ မန်စီးတီး အသင်းဟာ ဒီဇင်ဘာ ၁၅ ရက်မှာ လိဂ်ပွဲစဉ်အဖြစ် ယူနိုက်တက်အသင်းနဲ့ မန်ချက်စတာဒါဘီပွဲစဉ် ယှဉ်ပြိုင်ရမှာ ဖြစ်ပါတယ်။ 

Source: Dailymail

CNI Sport News

၂၀၂၄ ခုနှစ်၊ ဒီဇင်ဘာ ၁၁

ဖီနာဘာချီအသင်းနည်းပြ မော်ရင်ဟိုက ဥရောပထိပ်သီးကလပ် အများအပြားရဲ့ ပစ်မှတ်ဖြစ်နေတဲ့ စပိန်ကြယ်ပွင့် နီကိုဝီလီယံစ်ကို ရီးရယ်လ်အသင်းထံ ပြောင်းရွှေ့ဖို့ တိုက်တွန်းမှု ပြုလုပ်ခဲ့ပါတယ်။ 

မော်ရင်ဟိုက “နီကိုက အံ့သြဖွယ်ကောင်းတဲ့ ကစားသမားပါ။ ပြီးခဲ့တဲ့ ယူရိုပြိုင်ပွဲမှာ လူတိုင်းက ယာမဲလ် အကြောင်းကို ပြောနေကြပါတယ်။ ကျနော်ကတော့ နီကို-ကို ပိုပြီးကြိုက်ပါတယ်။ သူဟာ အလွန်ကောင်းတဲ့ ဘောလုံးသမားတစ်ဦးပါ။ တူရကီကလပ်က သူ့ကိုခေါ်ယူနိုင်မယ်လို့ မထင်ပါဘူး။ ကျနော်ကတော့ သူ ရီးရယ်လ် အသင်းမှာ အဆုံးသတ်ဖို့ မျှော်လင့်တယ်”လို့ ပြောခဲ့တာပါ။ 

နီကိုဝီလီယံစ်ဟာ စပိန်အသင်း ချန်ပီယံဖြစ်ခဲ့တဲ့ ယူရို ၂၀၂၄ ပြိုင်ပွဲမှာ ခြေစွမ်း ပြသနိုင်ခဲ့တာကြောင့် ပြီးခဲ့တဲ့ နွေရာသီ အပြောင်းအရွှေ့မှာ ဥရောပထိပ်သီး ကလပ်တွေက သူ့ကိုခေါ်ယူဖို့ ကြိုးစားခဲ့တာ ဖြစ်ပါတယ်။ 

ယူရို ၂၀၂၄ ဗိုလ်လုပွဲမှာ အင်္ဂလန်အသင်းဘက်ကို ဂိုးသွင်းခဲ့တဲ့ နီကိုဝီလီယံစ်ကို ပရီးမီးယားလိဂ် ကလပ်တွေဖြစ်တဲ့ အာဆင်နယ်နဲ့ ချယ်လ်ဆီးအသင်းတို့က ချိတ်ဆက်မှုတွေ ပြုလုပ်ခဲ့ပြီး ဘာစီလိုနာအသင်းရဲ့ ပစ်မှတ်လည်း ဖြစ်ခဲ့တာပါ။ 

နီကိုဝီလီယံစ်ကို တွေ့ရစဉ်

ဒါပေမယ့် နီကိုဝီလီယံစ်ဟာ ဘီလ်ဘာအိုအသင်းမှာပဲ ဆက်နေဖို့ ဆုံးဖြတ်ခဲ့တာဖြစ်ပါတယ်။

မော်ရင်ဟိုကတော့ နီကိုဝီလီယံစ်ကို ခေါ်ယူမယ့် ပြိုင်ဆိုင်မှုထဲမှာ သူ့ရဲ့အသင်းဟောင်း ရီးရယ်လ်အသင်း အနိုင် ရယူနိုင်ဖို့ မျှော်လင့်နေတာပါ။

နီကိုဝီလီယံစ်နဲ့ ဘီလ်ဘာအိုအသင်းတို့ရဲ့ စာချုပ်ထဲမှာ စာချုပ်ဖျက်သိမ်းကြေး ယူရို ၅၈ သန်းသာရှိတဲ့အတွက် လာမယ့်နွေရာသီ အပြောင်းအရွှေ့မှာ အသင်းကြီး အများအပြားက သူ့ကိုခေါ်ယူဖို့ ထပ်ပြီးကြိုးစားဖို့ရှိနေတာ ဖြစ်ပါတယ်။ 

အသက် ၂၂ နှစ်အရွယ်ရှိ နီကိုဝီလီယံစ်နဲ့ ဘီလ်ဘာအိုအသင်းတို့ရဲ့ စာချုပ်ဟာ ၂၀၂၇ နွေရာသီအထိ သက်တမ်း ရှိနေတာပါ။ 

ဘီလ်ဘာအို အကယ်ဒမီထွက် နီကိုဝီလီယံစ်ဟာ လက်ရှိအချိန်ထိ သူ့ရဲ့ကလပ်အသင်းအတွက် ပွဲပေါင်း ၁၄၂ ပွဲ ပါဝင်ကစားထားပြီး ၂၂ ဂိုး သွင်းယူကာ ကိုပါဒယ်ရေးဖလား ၁ ကြိမ် ရယူထားနိုင်တာဖြစ်ပါတယ်။ 

Source: Metro