CNI Sport News
၂၀၂၃ ခုနှစ်၊ နိုဝင်ဘာ ၁၉

မန်စီးတီးအသင်း ကွင်းလယ်ဖန်တီးရှင် ဒီဘရိုင်းဟာ ကနေဒါရက်ပ် အဆိုတော် Darke ရဲ့ သီချင်းသစ် Wick Man မှာ သီချင်းပူးတွဲ ရေးသားသူအဖြစ် ဖော်ပြခြင်း ခံခဲ့ရတာနဲ့ ပတ်သက်ပြီး ငြင်းဆန်လိုက်ပါတယ်။

Darke ရဲ့ သီချင်းအသစ်ဟာ သောကြာနေ့က ထွက်ရှိခဲ့တာဖြစ်ပြီး သီချင်းရေးသားသူတွေထဲက တစ်ဦးအဖြစ် ဒီဘရိုင်းရဲ့နာမည်ကို ဖော်ပြထားတာပါ။ 

ဘယ်လ်ဂျီယံ လက်ရွေးစင် ကစားသမားဟာ ဒဏ်ရာကြောင့် အနားယူနေရချိန်မှာ ဂီတဘက်ကို ပြောင်းပြီး လုပ်ကိုင်နေတယ်လို့ ဘောလုံးပရိသတ်တွေက ထင်မြင်သွားခဲ့တာ ဖြစ်ပါတယ်။ 

ဒီဘရိုင်းကတော့ သူဟာ Darke ကို အကူအညီမပေးခဲ့ဘူးလို့ ဖြေရှင်းချက်ပေးခဲ့ရတာပါ။

ဒီဘရိုင်းဟာ အခုရာသီ ပရီးမီးယားလိဂ် အဖွင့်ပွဲစဉ်ဖြစ်တဲ့ ဘန်လေအသင်းနဲ့ ပွဲမှာရရှိခဲ့တဲ့ တံကောက်ကြော ဒဏ်ရာကို ခွဲစိတ်ကုသမှု ခံယူထားရပြီး ပြန်လည်ထူထောင်ရေး လုပ်ငန်းစဉ်တွေကို ပြုလုပ်နေရပါတယ်။ 

အသက် ၃၂ နှစ်အရွယ်ရှိ ဒီဘရိုင်းဟာ မန်စီးတီးအသင်းအတွက် ပါဝင်ကစားထားတဲ့ အချိန်အတွင်း ဂိုးဖန်တီးမှု ၁၅၃ ဂိုး ပြုလုပ်ထားပြီး ဒီထဲက ပရီးမီးယားလိဂ်မှာ ၁၀၂ ဂိုး ဖန်တီးထားတာပါ။

အဲ့ဒါကြောင့် ဒီဘရိုင်းဟာ ပရီးမီးယားလိဂ်သမိုင်းမှာ ဂိုးဖန်တီးမှု အများဆုံး ပြုလုပ်ထားတဲ့ စာရင်းရဲ့ နံပတ် ၄ နေရာမှာ ရပ်တည်နေတာ ဖြစ်ပါတယ်။ 

ဘယ်လ်ဂျီယံ ကစားသမားရဲ့ ဂိုးဖန်တီးမှုတွေကြောင့် ပြီးခဲ့တဲ့ရာသီက တိုက်စစ်မှူး ဟာလန်းဟာ ဂိုးအများအပြား သွင်းယူနိုင်ခဲ့သလို မန်စီးတီးအသင်းကလည်း ချန်ပီယံလိဂ် အပါအဝင် ဆုဖလား ၃ လုံးကို ရယူနိုင်ခဲ့တာပါ။

မန်စီးတီးအသင်းကတော့ ဒီဘရိုင်းကို အသင်းအတွက် အမြန်ဆုံး ပါဝင်ကစားပေးနိုင်ဖို့ မျှော်လင့်နေတာ ဖြစ်ပါတယ်။

မန်စီးတီးအသင်းဟာ ဒီရာသီ ပရီးမီးယားလိဂ်ပြိုင်ပွဲမှာ ထိပ်ဆုံးနေရာ ဦးဆောင်နေသလို ချန်ပီယံလိဂ်ပြိုင်ပွဲမှာ လည်း ၁၆ သင်းအဆင့်ကို တက်ရောက်နိုင်ခဲ့ပြီ ဖြစ်ပါတယ်။

Source: CAN 

CNI Sport News
၂၀၂၃ ခုနှစ်၊ နိုဝင်ဘာ ၁၉

ပီအက်စ်ဂျီအသင်း တိုက်စစ်မှူး ဘတ်ပီက အနာဂတ်နဲ့ ပတ်သက်ပြီး ထွက်ပေါ်နေတဲ့ ထင်ကြေးတွေဟာ သူ့ရဲ့ ကွင်းအတွင်း စွမ်းဆောင်ရည်ကို ထိခိုက်မှာ မဟုတ်ဘူးလို့ ပြောလိုက်ပါတယ်။

ဘတ်ပီက “အနာဂတ်နဲ့ ပတ်သက်တဲ့ မေးခွန်းတွေက ကျနော့်အတွက် လေးနက်တဲ့အရာ မဟုတ်ပါဘူး။ ကျနော် ကွင်းထဲမှာ ဒါတွေကို မစဉ်းစားပါဘူး။ ကစားပုံ၊ စွမ်းဆောင်ရည်နဲ့ ဆုဖလားတွေ ရယူနိုင်ဖို့ အကြောင်းကိုပဲ စဉ်းစား ပါတယ်။ ကျနော်အမြဲတမ်း ဒီလိုပဲ လုပ်ခဲ့တာပါ။ ကွင်းပြင်ပမှာ ဖြေရှင်းစရာတွေ အများကြီးရှိပေမယ့် ကျနော့်ကို အောင်မြင်မှု မရအောင် မတားဆီးနိုင်ပါဘူး။ ကျနော့်အတွက် အရေးကြီးဆုံးက အကောင်းဆုံး ကစားဖို့ပါပဲ”လို့ ပြောခဲ့ပါတယ်။

ဘတ်ပီဟာ ပီအက်စ်ဂျီအသင်းနဲ့ စာချုပ်သစ် ချုပ်ဆိုဖို့ အစီအစဉ်မရှိတာကြောင့် အခုရာသီအကုန်မှာ ပြင်သစ် ကလပ်ကနေ အလွတ်နဲ့ ထွက်ခွာလို့ရမှာ ဖြစ်ပါတယ်။

အဲ့ဒါကြောင့် ဘတ်ပီနဲ့ ရီးရယ်လ်အသင်းတို့ရဲ့ အပြောင်းအရွှေ့ သတင်းတွေ ထွက်ပေါ်နေတာ ဖြစ်ပေမယ့် ပြင်သစ် အသင်း ခေါင်းဆောင်ကတော့ အနာဂတ်နဲ့ ပတ်သက်ပြီး ဘာမှပြောဆိုခဲ့ခြင်း မရှိပါဘူး။ 

ဘတ်ပီကတော့ သူဟာ ကွင်းအတွင်းမှာ အကောင်းဆုံး စွမ်းဆောင်နိုင်ဖို့ကိုပဲ အာရုံစိုက်ထားတယ်လို့ ပြောထား ပါတယ်။
ရီးရယ်လ်အသင်းဟာ ဘတ်ပီနဲ့ အပြောင်းအရွှေ့အတွက် ချိတ်ဆက်မှု ပြုလုပ်ခဲ့တယ်ဆိုတဲ့ သတင်းတွေကို မကြာသေးခင်က ငြင်းဆန်ထားသလို ပြင်သစ်တိုက်စစ်မှူးကို ခေါ်ယူဖွယ်မရှိဘူးလို့ စပိန်မီဒီယာတွေက ဖော်ပြ ထားပါတယ်။

လက်ရှိအချိန်မှာ ဘတ်ပီကို ခေါ်ယူနိုင်ဖို့အတွက် လီဗာပူးလ်နဲ့ ဘိုင်ယန်မြူးနစ် အသင်းတို့ကလည်း စိတ်ဝင် စားနေတယ်လို့ သတင်းတွေ ထွက်ပေါ်နေပါတယ်။

အသက် ၂၄ နှစ်အရွယ်ရှိ ဘတ်ပီဟာ ဒီရာသီမှာ ပီအက်စ်ဂျီအသင်းအတွက် ၁၅ ပွဲ ပါဝင်ကစားထားပြီး ၁၅ ဂိုး သွင်းယူထားကာ အသင်းကို လီဂူးဝမ်းပြိုင်ပွဲရဲ့ ထိပ်ဆုံးနေရာကို ပြန်လည်ရောက်ရှိအောင် ပို့ဆောင် ပေးထားတာ ဖြစ်ပါတယ်။

Source: CNA

CNI Sport News
၂၀၂၃ ခုနှစ်၊ နိုဝင်ဘာ ၁၈

ချယ်လ်ဆီးနဲ့ မန်စီးတီးအသင်းတို့ဟာ ဘဏ္ဍာရေးစည်းမျဉ်း ချိုးဖောက်မှုကြောင့် ပရီးမီးယားလိဂ်ကနေ တန်းဆင်း ရဖွယ်ရှိတယ်လို့ ကျွမ်းကျင်သူတွေက သတိပေးလိုက်ပါတယ်။

ပြီးခဲ့တဲ့ရက်ကမှ အဲဗာတန်အသင်းဟာ ပရီးမီးယားလိဂ်ရဲ့ ဘဏ္ဍာရေး စည်းမျဉ်း ချိုးဖောက်ခဲ့တဲ့အတွက် ရမှတ် ၁၀ မှတ် လျှော့ချခံလိုက်ရပြီး တန်းဆင်းဇုန်ထဲ ကျရောက်သွားခဲ့တာပါ။

အဲဗာတန်အသင်းကတော့ ပရီးမီးယားလိဂ်ရဲ့ ဒီပြစ်ဒဏ်အပေါ် အယူခံဝင်သွားမယ်လို့ ပြောထားပါတယ်။ 

အရင်က မန်စီးတီးအသင်းကို အကြံပေးခဲ့ဖူးတဲ့ ရှေ့နေ ဘော်ဆွန်က ချယ်လ်ဆီးနဲ့ မန်စီးတီးအသင်းတို့ဟာ ဘဏ္ဍာရေး စည်းမျဉ်း ချိုးဖောက်ခဲ့ကြောင်း တွေ့ရမယ်ဆိုရင် တန်းဆင်းရနိုင်တယ်လို့ ယုံကြည်နေတာပါ။

အဲဗာတန်အသင်းကို တွေ့ရစဉ်

ချယ်လ်ဆီးအသင်းဟာ ပိုင်ရှင်ဟောင်း အေဘရာမိုဗစ်ချ် လက်ထက်က ငွေပေးချေမှုနဲ့ ပတ်သက်ပြီး စုံစမ်း စစ်ဆေးခံနေရသလို မန်စီးတီးအသင်းကလည်း ပရီးမီးယားလိဂ်ရဲ့ ဘဏ္ဍာရေးစည်းမျဉ်း ချိုးဖောက်မှု စွပ်စွဲချက် ၁၁၅ ချက်နဲ့ ရင်ဆိုင်နေရတာ ဖြစ်ပါတယ်။

အဲဗာတန်အသင်းရဲ့ အယူခံ အောင်မြင်ခဲ့မယ်ဆိုရင် ချယ်လ်ဆီးနဲ့ မန်စီးတီးအသင်းတို့အတွက် သက်သာရာ ရနိုင် ပါတယ်။

ဘော်ဆွန်က “စီရင်ချက်ကို မတွေ့ရဘဲ ဘဏ္ဍာရေးစည်းမျဉ်း ချိုးဖောက်မှုကြောင့် အဲဗာတန်ကို ၁၀ မှတ်လျှော့ ပြစ်ဒဏ် ချမှတ်တာဟာ ကျနော့်အတွက် ကြမ်းတမ်းတယ်လို့ ခံစားရပါတယ်။ ချယ်လ်ဆီးနဲ့ မန်စီးတီးအသင်းတို့ ကသာ ဘဏ္ဍာရေးစည်းမျဉ်း ချိုးဖောက်ကြောင်းတွေ့ရရင် တန်းဆင်းသွားရဖွယ်ရှိပါတယ်”လို့ X မှာ ရေးသားထား တာ ဖြစ်ပါတယ်။

အဲဗာတန်အသင်းဟာ ဒီရာသီ ပရီးမီးယားလိဂ်ပွဲစဉ် ၁၂ ပွဲ ကစားအပြီးမှာ ရမှတ် ၁၄ မှတ် ရရှိထားပေမယ့် ၁၀ မှတ် အလျှော့ ခံခဲ့ရတာကြောင့် ရမှတ် ၄ မှတ်နဲ့ အဆင့် ၁၉ နေရာကို ရောက်ရှိသွားခဲ့တာ ဖြစ်ပါတယ်။ 

Source: Goal

CNI Sport News
၂၀၂၃ ခုနှစ်၊  နိုဝင်ဘာ ၁၈

အင်္ဂလန်နဲ့ ရီးရယ်လ်အသင်း ကွင်းလယ်လူ ဘယ်လင်ဂမ်ဟာ ဥရောပထိပ်တန်းလိဂ်တွေရဲ့ အကောင်းဆုံး အသက် ၂၁ နှစ်အောက် ကစားသမားတွေကို ချီးမြှင့်တဲ့ ၂၀၂၃ ခုနှစ် Golden Boy ဆုကို ရရှိသွားခဲ့ပါတယ်။

ပြီးခဲ့တဲ့နွေရာသီက ဒေါ့မွန်အသင်းကနေ ပြောင်းရွှေ့လာခဲ့တဲ့ ဘယ်လင်ဂမ်ဟာ ဒီရာသီမှာ ရီးရယ်လ်အသင်း အတွက် ၁၄ ပွဲ ပါဝင်ကစားထားပြီး ၁၃ ဂိုး သွင်းယူထားပါတယ်။ 

အသက် ၂၀ နှစ်အရွယ်ရှိ ဘယ်လင်ဂမ်ဟာ ပြီးခဲ့တဲ့ ဘောလွန်းဒီအောဆု ပေးပွဲမှာလည်း အသက် ၂၁ နှစ်အောက် အကောင်းဆုံး ကစားသမားဆုကို ရယူနိုင်ခဲ့ပါတယ်။

ဘယ်လင်ဂမ်က “ဘာမင်ဂမ်၊ ဒေါ့မွန်နဲ့ အခု ရီးရယ်လ်အတွက် ကျနော့်ရဲ့ခရီးစဉ်မှာ ပါဝင်ခဲ့တဲ့သူတွေ အားလုံးကို ကျေးဇူးတင်ပါတယ်။ သူတို့သာမရှိရင် ကျနော့်အတွက် ဒီလိုအရာတွေက ဖြစ်မလာနိုင်ပါဘူး။ ကျနော့်အတွက်  အရေးကြီးဆုံးက နေ့တိုင်းအားပေးမှုတွေ၊ လှုံ့ဆော်မှုတွေနဲ့ ချစ်ခြင်းတွေပေးတဲ့ မိသားစုပါ။ ဒီလိုဂုဏ်သိက္ခာရှိတဲ့ ဆုနဲ့အတူ ဆုဖလားတွေ အများကြီးရယူနိုင်ဖို့ ကျနော်မျှော်လင့်ပါတယ်”လို့ ပြောခဲ့ပါတယ်။

ဟာလန်းကို တွေ့ရစဉ်

ဘယ်လင်ဂမ်ဟာ ၂၀၁၄ ခုနှစ်က စတာလင် ရရှိပြီးနောက် ဒီဆုကိုရရှိတဲ့ ပထမဆုံး အင်္ဂလန်ကစားသမား ဖြစ်လာ ခဲ့ပါတယ်။
 
အရင်က Golden Boy ဆုတွေကို ဝိန်းရွန်နီ၊ မက်ဆီ၊ ဘတ်ပီနဲ့ ဟာလန်းတို့က ရယူနိုင်ခဲ့တာပါ။ 

Golden Girl ဆုကိုတော့ ကိုလံဘီယာနဲ့ ရီးရယ်လ် ရှေ့တန်းကစားသမား လင်ဒါကိုင်စီဒိုက ရရှိခဲ့တာ ဖြစ်ပါတယ်။

မန်စီးတီးအသင်း တိုက်စစ်မှူး ဟာလန်းက Golden Player Man ဆုနဲ့ ဘာစီလိုနာအသင်း ကွင်းလယ်လူ ဘွန်မာတီက Golden Player Woman ဆုတွေကို ရရှိခဲ့တာပါ။

အာဆင်နယ်အသင်း အားကစားဒါရိုက်တာ အီဒူးက ဥရောပရဲ့ အကောင်းဆုံး ဒါရိုက်တာဆုကို ရရှိခဲ့ပြီး ဘရိုက်တန် အသင်းဥက္ကဋ္ဌ တွန်နီဘလွန်းက ဥရောပအကောင်းဆုံး ဥက္ကဋ္ဌဆု ရရှိခဲ့တာဖြစ်ပါတယ်။ 

Source: BBC

CNI Sport News

၂၀၂၃ ခုနှစ်၊ နိုဝင်ဘာ ၁၇

အသလက်တီကိုအသင်းဥက္ကဋ္ဌ ဆီရီဇိုက ဘာစီလိုနာအသင်းအနေနဲ့ လာမယ့်နွေရာသီ အပြောင်းအရွှေ့မှာ ဂျာအိုဖီးလစ်ကို အပြီးသတ်ခေါ်ယူဖို့ အခွင့်အရေးရှိတယ်လို့ ပြောလိုက်ပါတယ်။

ဆီရီဇိုက “ဂျာအိုဖီးလစ်က ဥရောပရဲ့ အကောင်းဆုံး ကစားသမားတွေထဲက တစ်ဦးဖြစ်လာမှာပါ။ ကျနော်သူ့ကို ဘာစီလိုနာမှာ အကောင်းဆုံး ဖြစ်စေချင်ပါတယ်။ သူဟာ အငှားနဲ့ သွားရောက် ကစားနေပေမယ့် ဘာစီလိုနာက သူ့ကို အပြီးသတ် ခေါ်ယူချင်တယ်ဆိုရင်တော့ သူတို့အနေနဲ့ အပြောင်းအရွှေ့ ဖြစ်အောင်လုပ်နိုင်တဲ့ ရွေးချယ်ခွင့် ရှိမယ်ဆိုတာ သေချာပါတယ်။ ဒီလိုမှမဟုတ်ရင် သူပြန်လာရမှာပါ”လို့ COPE Partidazo ကို ပြောခဲ့ပါတယ်။

ဂျာအိုဖီးလစ်နဲ့ အသလက်တီကို အသင်းနည်းပြ ဆီမြွန်နီတို့ရဲ့ ဆက်ဆံရေးဟာ တင်းမာနေတာကြောင့် ပေါ်တူဂီ ကစားသမားဟာ ပြီးခဲ့တဲ့ ဇန်နဝါရီလ အပြောင်းအရွှေ့က ချယ်လ်ဆီးအသင်းထံ အငှားနဲ့ သွားရောက် ကစားခဲ့ရ တာ ဖြစ်ပါတယ်။

ဂျာအိုဖီးလစ်ကို တွေ့ရစဉ်

ဂျာအိုဖီးလစ်ဟာ ပြီးခဲ့တဲ့နွေရာသီက ဘာစီလိုနာအသင်းထံ အငှားနဲ့ မလာရောက်ခင် အသင်းအများအပြားနဲ့ သတင်းတွေ ထွက်ပေါ်ခဲ့ပါသေးတယ်။ 

ဂျာအိုဖီးလစ်ဟာ ဒီရာသီမှာ ဘာစီလိုနာအသင်းအတွက် ခြေစွမ်းပြသနေပြီး ပါဝင်ကစားထားတဲ့ ၁၄ ပွဲမှာ ၃ ဂိုးသွင်းယူကာ ၄ ဂိုးဖန်တီးထားတာ ဖြစ်ပါတယ်။

ဘာစီလိုနာအသင်း အားကစားဒါရိုက်တာ ဒေကိုက ဂျာအိုဖီးလစ်အပြင် မန်စီးတီးအသင်းကနေ အငှားနဲ့ ခေါ်ယူထားတဲ့ ကန်ဆယ်လိုတို့ကို အပြီးသတ် ခေါ်ယူချင်တယ်လို့ ပြောထားပါတယ်။

အသလက်တီကိုအသင်း အကြီးအကဲ ဆီရီဇိုက ဂျာအိုဖီးလစ်ကို ရောင်းချဖို့ အဆင်သင့် ဖြစ်နေပေမယ့် သူတို့လိုချင် တဲ့ ပြောင်းရွှေ့ကြေး ပမာဏကိုပေးချေမှသာ အပြောင်းအရွှေ့ ဖြစ်နိုင်မယ်လို့ ပြောခဲ့တာ ဖြစ်ပါတယ်။ 

၂၀၁၉ ခုနှစ်က ဘင်ဖီကာအသင်းကနေ ရောက်ရှိလာခဲ့တဲ့ ဂျာအိုဖီးလစ်ဟာ ဘာစီလိုနာအသင်းထံ အငှားနဲ့ မထွက်ခွာခင် အသလက်တီကိုအသင်းနဲ့ ၂၀၂၉ ခုနှစ်၊ ဇွန်လအထိ စာချုပ်သက်တမ်းတိုးခဲ့တယ်လို့ သိရပါတယ်။

Source: Sportsmole

CNI Sport News

၂၀၂၃ ခုနှစ်၊ နိုဝင်ဘာ ၁၇

တောင်ကိုရီးယား အသင်းခေါင်းဆောင် ဆွန်ဟောင်မင်ဟာ စင်္ကာပူအသင်းကို ၅ ဂိုး- ဂိုးမရှိနဲ့ အနိုင်ရတဲ့ပွဲမှာ ထိခိုက်ဒဏ်ရာ ရခဲ့ပေမယ့် စိုးရိမ်စရာမရှိဘူးလို့ ပြောလိုက်ပါတယ်။ 

ဆွန်ဟောင်မင်က “ကျနော်တို့ ကမ္ဘာ့ဖလားပြိုင်ပွဲအတွက် အသင်းတစ်သင်းကို ဖန်တီးနေပြီး နာကျင်မှုကို ခံစား နေရတယ်ဆိုပြီး ပွဲတစ်ပွဲကို လက်လွှတ်လို့ မရပါဘူး။ မပြေးနိုင်ဘူးဆိုရင် ဘာမှလုပ်လို့ရမှာ မဟုတ်ပေမယ့် ပြေးနိုင်ရင်တော့ အသင်းအတွက် ရာနှုန်းပြည့်ပေးသွားမှာပါ။ အခုအဆင်ပြေပါတယ်။ ဆောင်းရာသီမှာ ကွင်းထဲ အိပ်ရတာကို ကျနော်မကြိုက်ပါဘူး။ ကျနော်အခု အဆင်ပြေနေပြီး၊ ဒဏ်ရာမရှိပါဘူး”လို့ သတင်းထောက်တွေကို ပြောခဲ့ပါတယ်။

တောင်ကိုရီးယားအသင်းက စင်္ကာပူအသင်းကို ၅ ဂိုး- ဂိုးမရှိနဲ့ အနိုင်ရခဲ့တဲ့ ၂၀၂၆ ကမ္ဘာ့ဖလားခြေစစ်ပွဲ (အာရှဇုန်) ဒုတိယအဆင့်ပွဲစဉ်မှာ ဆွန်ဟောင်မင်ဟာ အသင်းအတွက် ၁ ဂိုး သွင်းယူပေးခဲ့ပါတယ်။ 

ဆွန်ဟောင်မင်ကို တွေ့ရစဉ်

ဒါပေမယ့် ဆွန်ဟောင်မင်ဟာ ပွဲပြီးဖို့ နီးကပ်တဲ့အချိန်မှာ ဒဏ်ရာရရှိခဲ့တာဖြစ်ပြီး ညာဘက်ခြေကျင်းဝတ်ကို ကိုင်ထားကာ ဆေးကုသမှုခံယူခဲ့ရပါတယ်။ 

စပါးအသင်း တိုက်စစ်မှူးဟာ ဒဏ်ရာရခဲ့ပေမယ့် တောင်ကိုရီးယားအသင်းက လူစားလဲသူ အရေအတွက် ပြည့်သွားခဲ့လို့ ပွဲချိန်ပြည့်တဲ့အထိ ပါဝင်ကစားသွားခဲ့ရပါတယ်။

စပါးအသင်း ပရိသတ်တွေဟာ အဓိက ကစားသမားတွေ ဒဏ်ရာကြောင့် အနားယူနေရတဲ့ အချိန်မှာ ဆွန်ဟောင်မင်ရဲ့ ဒဏ်ရာကိုမြင်ပြီး စိုးရိမ်မှုတွေရှိခဲ့ကြပါတယ်။ 

ဆွန်ဟောင်မင်ကတော့ ဒီဒဏ်ရာဟာ စိုးရိမ်စရာမရှိဘူးလို့ စပါးအသင်းပရိသတ်တွေကို သတင်းစကားပေးပို့ခဲ့တာ ဖြစ်ပါတယ်။ 

တောင်ကိုရီးယားအသင်းဟာ ခြေစစ်ပွဲအုပ်စု ဒုတိယပွဲစဉ်အဖြစ် တရုတ်နိုင်ငံမှာ သွားရောက်ယှဉ်ပြိုင်ရမှာပါ။

တရုတ်အသင်းကတော့ ခြေစစ်ပွဲအုပ်စု အဖွင့်ပွဲစဉ်မှာ ထိုင်းအသင်းကို ၂ ဂိုး- ၁ ဂိုးနဲ့ နိုင်ပွဲရယူနိုင်ခဲ့တာ ဖြစ်ပါ တယ်။

Source: Talk Sport 

CNI Sport News

၂၀၂၃ ခုနှစ်၊ နိုဝင်ဘာ ၁၇

အာဆင်နယ်အသင်းနည်းပြ အာတီတာဟာ နယူးကာဆယ်အသင်းကို ၁ ဂိုး- ဂိုးမရှိနဲ့ အရေးနိမ့်ခဲ့တဲ့ပွဲအပြီးမှာ ပြောခဲ့တဲ့ မှတ်ချက်စကားနဲ့ ပတ်သက်ပြီး အင်္ဂလန်ဘောလုံးအဖွဲ့ချုပ်(FA)ရဲ့ စွဲချက်တင်ခြင်းကို ခံလိုက်ရပါတယ်။

အာဆင်နယ်အသင်းနည်းပြ အာတီတာက ဒီပွဲမှာ နယူးကာဆယ်အသင်းရဲ့ သွင်းဂိုးကို ခွင့်ပြုခဲ့တဲ့ VAR ရဲ့ ဆုံးဖြတ်ချက်ဟာ ရှက်ဖို့ကောင်းတယ်လို့ ပွဲအပြီးမှာ ပြောခဲ့တာပါ။ ဒီပွဲစဉ်က နယူးကာဆယ်အသင်းကစားသမား ဂေါ်ဒွန်ရဲ့ သွင်းဂိုးနဲ့ပတ်သက်ပြီး VAR ဟာ ဘောလုံးစည်းကျော်မှုရှိ၊မရှိ၊ ပြစ်ဒဏ်ဘောကျူးလွန်ခြင်းရှိ၊မရှိနဲ့ လူကျွံဘောဖြစ်၊မဖြစ် စစ်ဆေးမှုပြုလုပ်ခဲ့ပြီးနောက် ဂိုးကို ခွင့်ပြုခဲ့တာဖြစ်ပါတယ်။ အဲဒါကြောင့် စပိန်လူမျိုး နည်းပြဟာ VAR နဲ့ ကွင်းလယ်ဒိုင်လူကြီးရဲ့ ဆုံးဖြတ်ချက်ကို ပြင်းထန်စွာဝေဖန်ခဲ့တာပါ။

FA ကတော့ “အာတီတာရဲ့ မှတ်ချက်တွေဟာ ပွဲကိုကိုင်တွယ်ခဲ့တဲ့ တာဝန်ရှိဒိုင်လူကြီးတွေကို စော်ကားပြီး၊ ပွဲကို ထိခိုက်စေတာကြောင့် မှားယွင်းတဲ့အပြုအမူပြုလုပ်ခဲ့တယ်လို့ စွဲချက်တင်ထားကြောင်း”ထုတ်ပြန်ချက်ထဲမှာ ဖော်ပြထားပါတယ်။ အာတီတာအနေနဲ့ FA ရဲ့ စွဲချက်တင်ခံရတာကို ပြန်ပြီးဖြေရှင်းနိုင်ဖို့ နိုဝင်ဘာ ၂၁ ရက်အထိ အချိန်ရှိတယ်လို့ သိရပါတယ်။

အာဆင်နယ်အသင်းဟာ အာတီတာပြောခဲ့တာကို ထောက်ခံကြောင်း ကြေညာချက်ထုတ်ပြန်ခဲ့သလို စပိန် လူမျိုးနည်းပြကလည်း ကလပ်ကို ကာကွယ်ဖို့က သူ့ရဲ့တာဝန်လို့ နောက်ပိုင်းမှာ ပြောခဲ့ပါတယ်။ အာဆင်နယ် အသင်းက ဒိုင်လူကြီးရဲ့ ဆုံးဖြတ်ချက်တွေဟာ လက်ခံနိုင်စရာမရှိဘဲ ကစားသမားတွေ၊ နည်းပြတွေနဲ့ အားပေးတဲ့ သူတွေဟာ ပိုမိုကောင်းမွန်တဲ့အရာနဲ့ ထိုက်တန်တယ်လို့ ကြေညာချက်ထဲမှာ ရေးသားထားတာပါ။

နယူးကာဆယ်အသင်းကို အရေးနိမ့်ခဲ့တဲ့အတွက် အာဆင်နယ်အသင်းဟာ ဒီရာသီ ပရီးမီးယားလိဂ်ပြိုင်ပွဲမှာ ပထမဆုံးရှုံးပွဲကြုံတွေ့ခဲ့ရတာဖြစ်ပါတယ်။ အာဆင်နယ်အသင်းဟာ လက်ရှိပရီးမီးယားလိဂ်အမှတ်ပေးဇယား အဆင့် ၃ နေရာမှာရပ်တည်နေပြီး ထိပ်ဆုံးနေရာက မန်စီးတီးအသင်းနဲ့ ၁ မှတ်သာ ကွာဟနေတာပါ။ အာဆင်နယ် အသင်းဟာ နိုင်ငံတကာပွဲစဉ်အပြီး နိုဝင်ဘာ ၂၅ ရက်မှာ ဘရန်ဖိုဒ့်အသင်းနဲ့ ယှဉ်ပြိုင်ရမှာဖြစ်ပါတယ်။

Source:BBC

CNI Sport News

 ၂၀၂၃ ခုနှစ်၊ နိုဝင်ဘာ ၁၇

ဂျပန်အသင်းနည်းပြ မိုရီယာဆုက မြန်မာအသင်းကို ၅ ဂိုး- ဂိုးမရှိနဲ့ ဂိုးပြတ်အနိုင်ရခဲ့ပြီးနောက် အသင်းသား တွေအနေနဲ့ ဒီထက်ပိုပြီးကောင်းမွန်အောင်လုပ်ဖို့ တောင်းဆိုလိုက်ပါတယ်။

မိုရီယာဆုက “ကျနော်တို့ ဂိုးတွေအများကြီးသွင်းနိုင်ဖို့ အခွင့်အရေးတွေရခဲ့ပါတယ်။ အခွင့်အရေးတွေကို ပိုပြီး ဖန်တီးနိုင်ရမှာဖြစ်သလို ကိုယ့်ကိုကိုယ်အခက်တွေ့စေနိုင်တဲ့ အကြိမ်အရေအတွက်ကိုလည်း လျှော့ချရမှာပါ။ ဘယ်ပြိုင်ပွဲမှာမဆို အဖွင့်ပွဲစဉ်က ခက်ခဲပေမယ့် ကစားသမားတွေက ကောင်းမွန်စွာပြင်ဆင်နိုင်ခဲ့ပါတယ်။ ပွဲတိုင်းက ပြိုင်ဘက်အပေါ်မူတည်ပေမယ့် ကစားသမားတွေက သူတို့ကိုယ်သူတို့ စိန်ခေါ်ချင်ပြီး ဒီလို စိတ်နေသဘောထားကို မြင်တွေ့ရတာကောင်းပါတယ်”လို့ ပြောခဲ့တာပါ။

မြန်မာအသင်းကို အနိုင်ရခဲ့တဲ့ ၂၀၂၆ ကမ္ဘာ့ဖလားခြေစစ်ပွဲ(အာရှဇုန်)ဒုတိယအဆင့် အုပ်စုအဖွင့်ပွဲစဉ်မှာ ဂျပန်အသင်းဟာ ဂိုးပေါက်ကန်သွင်းမှု ၃၁ ကြိမ်ရှိခဲ့ပြီး ဂိုးပေါက်တည့်မှု ၁၅ ကြိမ်ရှိခဲ့တာပါ။ ဒါပေမယ့် ဂျပန်အသင်းဟာ ၅ ဂိုးသာသွင်းယူနိုင်တဲ့အပေါ် နည်းပြ မိုရီယာဆုက ကျေနပ်မှုမရှိတာဖြစ်ပါတယ်။ လာမယ့် ဆီးရီးယားအသင်းနဲ့ ကစားမယ့်ပွဲစဉ်မှာတော့ ပိုပြီးပြင်းထန်တဲ့ ကစားပုံကို မြင်တွေ့ချင်တယ်လို့ နည်းပြ မိုရီယာဆုက ဂျပန်ကစားသမားတွေကို ပြောခဲ့တာပါ။

မြန်မာအသင်းနည်းပြ မိုက်ကယ်က သူတို့ဟာ ဒီပွဲမှာ ခံစစ်ကိုဦးစားပေးကစားပြီး ပေးဂိုးအများကြီး မပေးရအောင်စီစဉ်ခဲ့တယ်လို့ ပွဲအပြီးသတင်းစာရှင်းလင်းပွဲမှာ ပြောခဲ့ပါတယ်။

မိုက်ကယ်က “ဂျပန်အသင်းလို ကမ္ဘာ့အဆင့်အသင်းတစ်သင်းကိုသူ့အိမ်ကွင်းမှာ အနိုင်ရဖို့၊ အမှတ်ယူဖို့ ဆိုတာတွေကို မျှော်လင့်မထားပါဘူး။ ကျနော်တို့ လက်တွေ့ဆန်ဆန်ပဲ ဆုံးဖြတ်ပါတယ်။ ဒါကြောင့် ခံစစ် ဦးစားပေးပြီး အကောင်းဆုံး ကြိုးစားသွားခဲ့ကြတဲ့ ကစားသမားတွေကို ချီးကျူးပါတယ်”လို့ ပြောခဲ့ပါတယ်။

အုပ်စုဒုတိယပွဲစဉ်တွေအဖြစ် မြန်မာအသင်းက မြောက်ကိုရီးယား၊ ဂျပန်အသင်းက ဆီးရီးယားအသင်းတို့နဲ့ နိုဝင်ဘာ ၂၁ ရက်မှာ ယှဉ်ပြိုင်ကြမှာဖြစ်ပါတယ်။ 

CNI Sport News

၂၀၂၃ ခုနှစ်၊ နိုဝင်ဘာ ၁၇

ဘရိုက်တန်အသင်းဟာ ယူနိုက်တက်၊ ချယ်လ်ဆီးနဲ့ စပါးအသင်းတို့ရဲ့ ပစ်မှတ်ဖြစ်နေတဲ့ တိုက်စစ်မှူး အီဗန်ဖာဂူဆန်အတွက် ပြောင်းရွှေ့ကြေး ပေါင်သန်း ၁၀၀ ကျော်နဲ့ ကမ်းလှမ်းတဲ့ ကမ်းလှမ်းမှုတွေကိုသာ လက်ခံဖွယ်ရှိတယ်လို့ သိရပါတယ်။

အသက် ၁၉ နှစ်အရွယ်ရှိ အီဗန်ဖာဂူဆန်ဟာ ပရီးမီးယားလိဂ်ရဲ့ အတောက်ပဆုံး လူငယ်ကစားသမားတွေထဲမှာ တစ်ဦး အပါအဝင်အဖြစ် သတ်မှတ်ခံထားရပြီး ဒီရာသီ ပရီးမီးယားလိဂ်ပြိုင်ပွဲမှာ ၅ ဂိုး သွင်းယူထားတာပါ။

ဘရိုက်တန်အသင်းအတွက် ပြိုင်ပွဲစုံ ၄၅ ပွဲအထိ ပါဝင်ကစားထားပြီး ၁၅ ဂိုး သွင်းယူထားတဲ့ အီဗန်ဖာဂူဆန်ရဲ့ အလားအလာဟာ စိတ်လှုပ်ရှားဖို့ ကောင်းနေတာကြောင့် အသင်းကြီးတွေရဲ့ စောင့်ကြည့်ခြင်းကို ခံနေရတာ ဖြစ်ပါတယ်။

အီဗန်ဖာဂူဆန်ဟာ အိုင်ယာလန် လက်ရွေးစင်အသင်းအတွက် ၈ ပွဲ ပါဝင်ကစားထားပြီး ၃ ဂိုးသွင်းယူကာ နိုင်ငံ တကာ စင်မြင့်ထက်မှာလည်း အထင်ကြီးမှုတွေကို ရရှိနေတာပါ။

အီဗန်ဖာဂူဆန်ကို တွေ့ရစဉ်

အိုင်ယာလန်တိုက်စစ်မှူးကို ခေါ်ယူဖို့ ပရီးမီးယားလိဂ် ထိပ်သီးကလပ်တွေဖြစ်တဲ့ ယူနိုက်တက်၊ စပါးနဲ့ ချယ်လ်ဆီး အသင်းတို့က စိတ်ဝင်စားနေတာကြောင့် ဒီကစားသမားကို ခေါ်ယူမယ်ဆိုရင် ပြောင်းရွှေ့ကြေး ကြီးမားတဲ့ ပမာဏ ကို ပေးချေရဖွယ်ရှိနေတာ ဖြစ်ပါတယ်။

TalkSPORTS က ပြီးခဲ့တဲ့နွေရာသီကမှ ကွင်းလယ်လူ ကိုင်စီဒိုကို ပေါင် ၁၁၅ သန်းနဲ့ ချယ်လ်ဆီးအသင်းထံ ရောင်းချခဲ့တဲ့ ဘရိုက်တန်အသင်းဟာ တိုက်စစ်မှူး အီဗန်ဖာဂူဆန်အတွက် ပေါင်သန်း ၁၀၀ ကျော်နဲ့ ပိုမို ကောင်းမွန်တဲ့ ကမ်းလှမ်းမှုတွေကိုသာ စိတ်ဝင်စားမယ်လို့ ဖော်ပြခဲ့တာပါ။

အီဗန်ဖာဂူဆန်ဟာ ပြီးခဲ့တဲ့ ရက်သတ္တပတ်ကမှ ဘရိုက်တန်အသင်းနဲ့ ၂၀၂၉ ခုနှစ်အထိ သက်တမ်းတိုး စာချုပ်ချုပ် ဆိုခဲ့တာဖြစ်ပြီး စာချုပ်ထဲမှာ စာချုပ်ဖျက်သိမ်းကြေး ထည့်သွင်းထားခြင်း မရှိပါဘူး။

အဲ့ဒါကြောင့် ဘရိုက်တန်အသင်းအနေနဲ့ အိုင်ယာလန် တိုက်စစ်မှူးအတွက် အပြောင်းအရွှေ့ ဆွေးနွေးညှိနှိုင်းတာ မှာ သူတို့စိတ်ကြိုက် ပြောင်းရွှေ့ကြေး တောင်းလို့ရတာ ဖြစ်ပါတယ်။ 

အီဗန်ဖာဂူဆန်ကလည်း ပုံမှန်ပွဲကစားခွင့်ရနေတဲ့ ဘရိုက်တန်အသင်းကနေ ထွက်ခွာဖို့ အလျင်စလို ဆုံးဖြတ်ဖွယ် မရှိတာပါ။ 

အီဗန်ဖာဂူဆန်ဟာ လက်ရှိအချိန်မှာ နောက်ကျောဒဏ်ရာနဲ့ ရင်ဆိုင်နေရတယ်လို့ သိရပါတယ်။

Source: Metro