CNI International Article 

၂၀၂၄ ခုနှစ်၊ မေလ ၆

မြန်မာနိုင်ငံတွင် ယခုနှစ်အစောပိုင်းက အစိုးရဆန့်ကျင်သည့် တပ်ဖွဲ့များက လောက်ကိုင်(ကိုးကန့်ဒေသ)ကို ထိန်းချုပ်ခဲ့သည်။ ထိုသို့ ထိန်းချုပ်ခဲ့ပြီးနောက် မြန်မာ့တပ်မတော်သည် အနီးနားရှိဒေသမှ စစ်စခန်း ၅၀ ကျော်ကို လက်လွတ်ခဲ့သည်။

လောက်ကိုင်သည် ကိုးကန့်ဒေသ၏ မြို့တော်ြဖစ်သလို တရုတ်၏ ယူနန်ပြည်နယ်နှင့် နယ်စပ်ချင်း ထိစပ်နေသည့် မြို့ဖြစ်သည်။

ကိုးကန့်တရုတ်လူဉီးရေ အများအပြားနေထိုင်သည့် ထိုမြို့ကို မြောက်ပိုင်းညီနောင်သုံးဖွဲ့(TNLA-AA-MNDAA) အမည်ရှိ လက်နက်ကိုင်မဟာမိတ်အဖွဲ့က ထိန်းချုပ်လိုက်ခြင်းသည် ထိုဒေသတွင် တရုတ်၏ လွှမ်းမိုးမှုနှင့် ပတ်သက်ပြီး မေးခွန်းများ ထွက်ပေါ်လာစေခဲ့သည်။

ယခင်က မြန်မာ့တပ်မတော်ကို ကာလကြာရှည် ထောက်ခံပေးလာခဲ့သည့် တရုတ်သည် လက်ရှိတွင် နှစ်ဖက်စလုံး ၌ ပါဝင်ပြီး နိုင်ငံရေးကစားလျက်ရှိသည်။ မြောက်ပိုင်းညီနောင်သုံးဖွဲ့သည် တရုတ်၏ ထောက်ပံ့မှုကိုမရဘဲ လောက်ကိုင်ကို ထိန်းချုပ်ရန် မဖြစ်နိုင်ကြောင်း ကျွမ်းကျင်သူအများစုက ယူဆကြသည်။

ထို့ကြောင့် တရုတ်သည် မြန်မာ့တပ်မတော်နှင့် အင်အားချိန်ခွင်လျှာညှိရန် ထိုလက်နက်ကိုင်သုံးဖွဲ့ကို ပေါင်းစည်း စေဖို့ လုပ်ဆောင်ခဲ့ခြင်း ဖြစ်နိုင်သည်ဟု ယူဆချက်များ ထွက်ပေါ်ခဲ့သည်။

တစ်ဖက်တွင်လည်း တရုတ်သည် မြန်မာ့တပ်မတော်ကို စစ်လက်နက်ပစ္စည်းများနှင့် လေယာဉ်များ ထောက်ပံ့ပေး နေပြီး အခြားတစ်ဖက်တွင် AA၊ MNDAA နှင့် TNLA တို့ကို လက်နက်တပ်ဆင်ပေးနေသည်ဟု ထင်‌ကြေးပေးမှုများ ထွက်ပေါ်နေသည်။

မကြာသေးမီက ထိုမြောက်ပိုင်းသုံးဖွဲ့သည်  မြန်မာနိုင်ငံမြောက်ပိုင်း၏ နယ်‌မြေ အများအပြားကို သိမ်းယူခဲ့သည်။ 

တရုတ်ရဲတပ်ဖွဲ့က ကျားဖြန့်လုပ်ငန်းခေါင်းဆောင်တွေကို ဖမ်းဆီးနေစဉ်

ထိုအချိန်က တရုတ်သည် နယ်စပ်ဒေသတွင် ကျားဖြန့် လုပ်ငန်းများ၊ ကာစီနိုရုံများ၊ ဆိုက်ဘာ လိမ်လည်မှု လုပ်ငန်း များကို မြန်မာပြည်မြောက်ပိုင်းတွင် နှိမ်နင်းနေရချိန်ဖြစ်သည်။ နိုင်ငံရေးအရ တိုက်ဆိုင်သည်ဆိုသည်မှာ မရှိဟူ သည့် စကားကို ထိုဖြစ်စဉ်တွင် မြင်တွေ့နိုင်သည်။

ပြီးခဲ့သည့်နှစ်က မြန်မာ့တပ်မတော်သည် ထိုလူဆိုးဂိုဏ်းများကို လုံခြုံရေးတပ်ဖွဲ့ဖြင့် နှိမ်နင်းမှုကို အရှိန်မြှင့်တင်ခဲ့ သည်။ 

ထိုတရုတ်လူဆိုးဂိုဏ်းများနှင့် ကျားဖြန့် လုပ်ငန်းများသည် တရုတ်ကွန်မြူနစ်ပါတီ(CCP)မှ ပါတီဝင်အများစုနှင့် တိုက်ရိုက်သော်လည်းကောင်း သွယ်ဝိုက်၍သော်လည်းကောင်း ဆက်နွှယ်မှု  ရှိခဲ့သည်။

ယူနန်နှင့် စီချွန်ပြည်နယ်ကဲ့သို့ ပြည်နယ်များမှ CCP ပါတီဝင်များထဲမှ ဒေသခံ ပါတီဝင်များသည် မြန်မာပြည် မြောက်ပိုင်းနယ်စပ်ရှိ တရားမဝင် ကာစီနိုလုပ်ငန်းများနှင့် အွန်လိုင်းမှ လိမ်ညာမှုများကို ပါဝင်ပတ်သက်နေသည်။

ထို့ကြောင့် ဒေသခံလူများသည် ၎င်းတို့အတွက် မိမိတို့၏ သဘောဆန္ဒမပါဘဲ အလုပ်လုပ်ရမည့် အခြေအနေသို့ ဖိအားပေးခံခဲ့ရသည်။

နောက်ထပ် စီးပွားရေးတစ်ခုမှာ CCP ပါတီဝင် အများစုသည် မူးယစ်ဆေးဝါး မှောင်ခိုကူးမှုတွင် ပါဝင်ပတ်သက် နေခြင်း ဖြစ်သည်။ အရှေ့တောင် အာရှနှင့် ပစိဖိတ်ဒေသသို့ မူးယစ်ဆေးဝါး မှောင်ခိုကူးမှု စုစုပေါင်း၏ ၅၀ ရာခိုင်နှုန်းကျော်ဖြစ်သည့် ရွှေတြိဂံဒေသ၏ တစ်စိတ်တစ်ပိုင်း အနေဖြင့် အသုံးချခြင်း ဖြစ်သည်။

 MNDAA က မြန်မာ့တပ်မတော်စစ်စခန်းကို သိမ်းပိုက်ခဲ့စဉ်

ကုလသမဂ္ဂ၏ မူးယစ်ဆေးဝါးနှင့် ရာဇဝတ်မှုဆိုင်ရာရုံး၏ ထုတ်ပြန်ချက်တွင် မြန်မာနိုင်ငံသည် ၂၀၂၃ ခုနှစ်အတွင်း ကမ္ဘာ့အကြီးဆုံး ဘိန်းထုတ်လုပ်သည့် နိုင်ငံအဖြစ် ဖော်ပြခဲ့သည်။

၂၀၂၃ ခုနှစ်အတွင်း မြန်မာနိုင်ငံ၏ ဘိန်းထုတ်လုပ်မှုသည် တန်ချိန် ၁၀၀ ကျော်ရှိသည်ဟု ကုလသမဂ္ဂက ခန့်မှန်းခဲ့ သည်။

မြန်မာနိုင်ငံ မြောက်ပိုင်းနှင့် အရှေ့မြောက်ပိုင်းဒေသတွင် နေထိုင်သူများအတွက် ဘိန်းစိုက်ပျိုးမှုသည် အဓိက ဝင်ငွေအရင်းအမြစ် ဖြစ်သည်။

ထိုဘိန်းစိုက်ပျိုးမှု၊ ထုတ်လုပ်မှု ၊ မှောင်ခိုကူးမှုသည် မြန်မာနိုင်ငံအခြေစိုက် တရုတ်လူဆိုးဂိုဏ်းများနှင့် CCP ၏ ပါဝင်ပတ်သက်မှု ရှိနေသည်ဆိုသည့် သတင်းများလည်း ရှိနေသည်။  

ထိုအခြေအနေမျိုးတွင် တရုတ်အစိုးရအနေဖြင့် ကွန်မြူနစ်ပါတီဝင်များ ပါဝင်ပတ်သက်မှုကို မသိ၍လောဟူသည့် မေးခွန်းထုတ်စရာရှိသည်။

ထို့ကြောင့် မြန်မာ့တပ်မတော်သည် လက်နက်ကိုင်သူပုန်များက လက်နက်များဝယ်ယူရန် ထိုမူးယစ်ဆေးဝါး မှောင်ခိုကူးမှုများမှ ရရှိသည့် ငွေများကို အသုံးပြုမည့် အ‌ရေးကို စိုးရိမ်ခဲ့ပြီး နှိမ်နင်းမှုများကို အရှိန်မြှင့်တင်ခဲ့သည်။

အဆိုပါ အချိန်တွင် တရုတ်လူဆိုးဂိုဏ်းများသည် ဘိန်းစိုက်ခင်းများကို ကာကွယ်ရန် ထိုဒေသရှိ လက်နက်ကိုင် သူပုန်များကို လက်နက်များ၊ ငွေကြေးများ ထောက်ပံ့ပေးခဲ့သည်။

တရုတ်အထူးကိုယ်စားလှယ်နဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

ထိုဒေသတွင် ပြိုင်ဘက် လက်နက်ကိုင်အဖွဲ့များကို ထောက်ပံ့ပေးနေသည့် တရုတ်၏ နောက်ထပ် အကြောင်း ပြချက်တစ်ခုမှာ မြေရှားသတ္တုများ ပေါကြွယ်ဝခြင်းကြောင့် ဖြစ်သည်။

မြန်မာနိုင်ငံတွင် မြေရှားသတ္တု ထုတ်လုပ်မှုသည် ကမ္ဘာလုံးဆိုင်ရာ မြေရှားသတ္တု ထုတ်လုပ်မှု၏ ၉ ရာခိုင်နှုန်းရှိ သည်။

ထို့ကြောင့် မြန်မာနိုင်ငံ၏ ပြိုင်ဘက် လက်နက်ကိုင်အဖွဲ့များကို ထောက်ပံ့ပေးနေမည်ဆိုပါက တရုတ် သတ္တုတွင်း ဂိုဏ်းများအတွက် ဒေါ်လာ ဘီလျံချီ ဝင်ငွေများရရှိနိုင်မည်ဖြစ်သည်။

ထိုအခြေအနေကို မြန်မာ့တပ်မတော်ကလည်း စိုးရိမ်မှု ရှိနေနိုင်သည်။ မြန်မာ့တပ်မတော်အနေဖြင့် ပြိုင်ဘက် လက်နက်ကိုင်အဖွဲ့များကို တရုတ်က ထောက်ပံ့ပေးနေသည့် အခြေအနေဖြင့် အကျပ်ကိုင်ခံရမည့် အနေအထားကို စိုးရိမ်မှု ရှိနေနိုင်သည်။

နောက်ထပ် အကြောင်းပြချက်တစ်ခုမှာ ရှမ်းပြည်နယ်အရေး ဖြစ်သည်။ မြောက်ပိုင်းညီနောင်သုံးဖွဲ့က ရှမ်းပြည်နယ်၏ နယ်မြေ အများအပြားကို ထိန်းချုပ်ခဲ့ပြီးကတည်းက တရုတ်၏ ယူနန်ပြည်နယ်ထဲသို့ တရားမဝင် ရွှေ့ပြောင်းနေထိုင်သူများ ဝင်ရောက်လာခြင်းဖြစ်သည်။

ထို့ကြောင့် တရုတ်အနေဖြင့် ထိုကဲ့သို့ ရွှေ့ပြောင်းများ ဝင်ရောက်မှု အခြေအနေကို ကိုင်တွယ်ထိန်းသိမ်းရန် ထိုလက်နက်ကိုင်တပ်ဖွဲ့များကို  မျက်နှာသာပေး ဆက်ဆံနေခြင်း ဖြစ်သည်ဟု ယူဆချက်များ ထွက်ပေါ်ခဲ့သည်။

မြောက်ပိုင်းမဟာမိတ်သုံးဖွဲ့က ဒုတိယခေါင်းဆောင်များကို တွေ့ရစဉ်

တရုတ်သည် နယ်မြေချင်း ထိစပ်နေသည့် ယူနန်ပြည်နယ်၏ နယ်စပ်ဒေသများမှ လူနည်းစုများကို မြန်မာနယ်စပ် မှ  လက်နက်ကိုင်အဖွဲ့များက လွှမ်းမိုးမည့် အရေးကိုလည်း အထူးစိုးရိမ်နေဆဲဖြစ်သည်။

မြန်မာနိုင်ငံမှ လက်နက်ကိုင်သူပုန်များ၏ လှုပ်ရှားမှုကို တရုတ်က တစ်နည်းတစ်ဖုံဖြင့် စိုးရိမ်နေသည်။ တိဘက် ဒေသအရေး၊ မွန်ဂိုးလီးယားဒေသအရေး၊ ဝီဂါအရေးတို့ကြောင့် ဖြစ်သည်။

ထိုအချက်အလက်များကို ခြုံငုံသုံးသပ်ရမည်ဆိုပါက တရုတ်၏ Check and Balance ဟူသည့် စောင့်ကြည့် ထိန်းညှိ မူဝါဒနှင့် ပထဝီနိုင်ငံရေး ကစားပွဲကို တွေ့မြင် ရမည်ဖြစ်သည်။

၂၀၂၁ ခုနှစ်ကတည်းက မြန်မာပြည်သူ တစ်သန်းခန့်သည် အိမ်ပစ်ရာပစ် ထွက်ပြေးတိမ်းရှောင်ခဲ့ရပြီ ဖြစ်သည်။ 

ထိုအချိန်မျိုးတွင် တရုတ်အနေဖြင့် မြန်မာပြည်သူများကို အရှုံး/အနိုင် ခွဲခြားသတ်မှတ်သည့် Zero Sum game မျိုးအပါအဝင် ၎င်း၏ ပထဝီနိုင်ငံရေး လိုအပ်ချက်များကို ဖြည့်ဆည်းပေးနိုင်မည့် အထောက်အပံ့များပေးရန် လိုအပ်လှပေသည်။

CNI Sport Article 

၂၀၂၄ ခုနှစ်၊ မေလ ၃

၂၀၂၃-၂၄ ရာသီ ဥရောပချန်ပီယံလိဂ်ပြိုင်ပွဲကတော့ ဗိုလ်လုပွဲကို ရောက်ရှိဖို့ တစ်ပွဲသာကစားဖို့ ကျန်ရှိတော့တာ ဖြစ်ပါတယ်။ 

ချန်ပီယံလိဂ် ဆီမီးဖိုင်နယ် ပထမအကျော့ ပွဲစဉ်တွေ အပြီးမှာတော့ ဗိုလ်လုပွဲကို ဘယ်အသင်း တက်နိုင်မလဲဆိုတာ ယတိပြတ်ပြောလို့ မရသေးပါဘူး။ 

အဲဒါကြောင့်လည်း ဒုတိယအကျော့ ပွဲစဉ်တွေအပြီးမှသာ ဗိုလ်လုပွဲကို ဘယ်အသင်းတွေ တက်မလဲဆိုတာ မျက်ဝါး ထင်ထင် မြင်တွေ့ရဖို့ရှိနေတာပါ။

လက်ရှိ အနေအထားအရတော့ ၄ သင်းစလုံးဟာ ချန်ပီယံလိဂ်ပြိုင်ပွဲရဲ့ ဗိုလ်လုပွဲကို တက်နိုင်ဖို့ ကိုယ်စီ အခွင့်အရေးတွေကို ပိုင်ဆိုင်ထားတာ ဖြစ်ပါတယ်။

ရီးရယ်လ်နဲ့ ဘိုင်ယန်မြူးနစ် အသင်းတို့ရဲ့ ပထမအကျော့ပွဲစဉ်ကတော့ ၂ ဂိုးစီ သရေကျခဲ့တာပါ။ 

ချန်ပီယံလိဂ်ပြိုင်ပွဲရဲ့ အအောင်မြင်ဆုံး ထိပ်သီးအသင်း အချင်းချင်း တွေ့ဆုံတဲ့ပွဲကတော့ အပြန်အလှန် သွင်းဂိုးတွေနဲ့ ပရိသတ်အကြိုက် ဖြစ်ခဲ့ပါတယ်။ 

တိုနီကရူးစ်ရဲ့ အကွက်မြင်မြင် ဖန်တီးမှုနဲ့ ဗီနီစီးယက်စ်ရဲ့ သွင်းဂိုး၊ ဟာရီကိန်း ပင်နယ်တီ ကန်သွင်းတဲ့အချိန်မှာ ဘယ်လင်ဂမ်က စိတ်အနှောင့်အယှက်ဖြစ်အောင် လုပ်ခဲ့တာတွေက ချန်ပီယံလိဂ် ပြိုင်ပွဲကြီးရဲ့အရှိန်အဟုန်ကို ပိုကောင်းအောင်လုပ်ခဲ့တဲ့ မြင်ကွင်းတွေ ဖြစ်ခဲ့တာပါ။

ဒီပွဲမှာ ပိုကောင်းခဲ့တာက ဘိုင်ယန်မြူးနစ်ဖြစ်ပေမယ့် ချန်ပီယံလိဂ်မှာဆိုရင် အထာနပ်နေတဲ့ ရီးရယ်လ်အသင်းကို အနိုင်မယူနိုင်ခဲ့ပါဘူး။

အဲဒါကြောင့် ဘာနေဗျူးမှာ ကစားရမယ့်ပွဲစဉ်က ၂ သင်းစလုံးအတွက် အရေးကြီးနေပါတယ်။ 

 ပီအက်စ်ဂျီနဲ့ဒေါ့မွန် ယှဉ်ပြိုင်နေစဉ်

ချန်ပီယံလိဂ်ပြိုင်ပွဲမှာ အအောင်မြင်ဆုံး အသင်းဖြစ်နေတဲ့ ရီးရယ်လ်အသင်းဟာ လာလီဂါပြိုင်ပွဲမှာလည်း ချန်ပီယံဆုကို ရယူနိုင်ဖို့ သေချာနေတဲ့အတွက် ဒီပွဲကို အပြည့်အဝ အာရုံစိုက်ထားနေတာ ဖြစ်ပါတယ်။  

ဘိုင်ယန်မြူးနစ်အသင်းကလည်း ဒီရာသီသူတို့ရဲ့ တစ်လုံးတည်းသော ဆုဖလား မျှော်လင့်ချက်ဖြစ်တဲ့ ချန်ပီယံလိဂ် ဖလားကို ရယူနိုင်ဖို့ ပစ်မှတ်ထားနေတာပါ။ 

ဗိုလ်လုပွဲကို တက်ဖို့ အဆုံးအဖြတ် ကစားရမယ့်ပွဲဖြစ်တာကြောင့် ၂ သင်းစလုံး အမှားအယွင်းနည်းအောင် ကစားကြမှာဖြစ်ပေမယ့် ဘာနေဗျူးကွင်းမှာ ကစားရမယ့်ပွဲ ဖြစ်တာကြောင့် ရီးရယ်လ်အသင်း ဗိုလ်လုပွဲ တက်သွားမယ်လို့ ထင်မြင်မိပါတယ်။

ဒေါ့မွန်အသင်းနဲ့ ပီအက်စ်ဂျီအသင်းတို့ရဲ့ ပထမအကျော့ ပွဲစဉ်မှာတော့ ဒေါ့မွန်အသင်းက ၁ ဂိုး- ဂိုးမရှိနဲ့ အနိုင်ရရှိခဲ့ ပါတယ်။ 

ကွင်းလုံးပြည့် နေရာလွတ်တောင် မရှိတဲ့အထိ အားပေးကြမ်းခဲ့တဲ့ ဒေါ့မွန်အသင်း ပရိသတ်တွေကြောင့် သူတို့ အသင်းဟာ ပီအက်စ်ဂျီအသင်းကို နိုင်ပွဲရယူနိုင်ခဲ့တာပါ။

ယူနိုက်တက်အသင်းမှာ ရှိခဲ့ချိန်တုန်းက အကောင်းဆုံး ခြေစွမ်းပြသ နိုင်ခဲ့ခြင်းမရှိတဲ့ ဆန်ချိုဆိုရင် ဒီပွဲမှာ လိမ်ခေါက်ဖြတ်ကျော်မှု ၁ ၂ ကြိမ်အထိ ပြုလုပ်နိုင်ခဲ့ပြီး စံချိန်သစ်တင်နိုင်ခဲ့ပါတယ်။ 

ကမ္ဘာ့အကောင်းဆုံး စာရင်းဝင် ဘတ်ပီကတော့ ဒေါ့မွန်အသင်းရဲ့ ခံစစ်ကျောက်ဆောင်ကို ကျော်ဖြတ်ဖို့ ခက်ခဲခဲ့ပြီး ဂိုးပေါက်တည့်မှု ၁ ကြိမ်သာရှိခဲ့တဲ့အထိ ဆိုးရွားခဲ့တာပါ။

ဘတ်ပီကို တွေ့ရစဉ်

ဒါပေမယ့် နှစ်ကျော့ကစားရတဲ့ ဒီလိုအဆင့်တွေမှာ ဒုတိယပိုင်းကစားဖို့ ကျန်ရှိနေသေးတာကြောင့် ၁ ဂိုး- ဂိုးမရှိ ရလဒ်ဟာ အပြောင်းအလဲတွေ အများကြီး ဖြစ်သွားနိုင်ပါသေးတယ်။ 

ပထမအကျော့မှာ ဒေါ့မွန်အသင်းက ကောင်းမွန်ခဲ့သလို ပီအက်စ်ဂျီအသင်းဟာ ဂိုးရသင့်တဲ့ အခွင့်အရေး အများအပြားကို ဖြုန်းတီးခဲ့တာကြောင့် ပရိသတ်တွေဟာ ဂိုးအများအပြား မြင်တွေ့ခဲ့ရခြင်းမရှိပါဘူး။ 

ဒုတိယအကျော့မှာတော့ ပထမအကျော့ကလို မဟုတ်ဘဲ သွင်းဂိုးတွေကို မြင်တွေ့ရဖို့ ရှိနေပြီး ပီအက်စ်ဂျီအသင်း အနိုင်ရယူသွားနိုင်မယ်လို့ ထင်မြင်မိပါတယ်။ 

ဒါတွေက ထင်မြင်ချက်ကို ပြောခဲ့တာဖြစ်ပြီး ၂၀၁၃ ချန်ပီယံလိဂ်ကလို ဘိုင်ယန်မြူးနစ်နဲ့ ဒေါ့မွန်အသင်းတို့ ဗိုလ်လုပွဲမှာ တွေ့ဆုံနိုင်သလို အစောကပြောခဲ့သလိုမျိုး ရီးရယ်လ်နဲ့ ပီအက်စ်ဂျီအသင်းတို့ တွေ့ဆုံရမယ့် ဗိုလ်လုပွဲ လည်း ဖြစ်သွားနိုင်ပါတယ်။ 

ဒီရာသီ ချန်ပီယံလိဂ်ဗိုလ်လုပွဲကို လန်ဒန်မြို့မှာရှိတဲ့ ဝင်ဘာလေ အားကစားကွင်းကြီးထဲမှာ ကျင်းပသွားမှာဖြစ်ပြီး ၂၀၁၃ ကလည်း ဗိုလ်လုပွဲကို ဝင်ဘာလေကွင်းကြီးထဲမှာပဲ ကျင်းပခဲ့တာပါ။

အဲဒါကြောင့် ဘိုင်ယန်မြူးနစ်နဲ့ ဒေါ့မွန်အသင်းတို့ ဝင်ဘာလေကွင်းကြီးထဲမှာ ချန်ပီယံလိဂ်ဗိုလ်လုပွဲ ထပ်မံ ယှဉ်ပြိုင်ရမယ်ဆိုရင် အတော်လေး ထူးခြားတဲ့ တိုက်ဆိုင်မှုလို့ ပြောရမှာဖြစ်ပါတယ်။

ဒါပေမယ့် ဘာတွေ ဖြစ်မလာမလဲဆိုတာကို လာမယ့် ရက်ပိုင်းအတွင်း မြင်တွေ့ရတော့မှာဖြစ်ပြီး ဝင်ဘာလေ ဝင်ခွင့် လက်မှတ် ၂ စောင်ကို ဘယ်အသင်းတွေ ရယူသွားမလဲဆိုတာ စိတ်ဝင်စားဖွယ် စောင့်ကြည့်ရမှာပဲ ဖြစ်ပါတယ်။

CNI Article 

၂၀၂၄ ခုနှစ်၊ မေလ ၂

ကရင်ပြည်နယ်အတွင်းက လှပသော မြဝတီမြို့လေးသည် ပြီးခဲ့သည့်လအတွင်းက လှပသော အိပ်မက်လား ၊ ကြောက်စရာကောင်းသော အိပ်မက်လား မသိသော်လည်း စစ်ပွဲ၏ သရုပ်သဏ္ဍန်ကို အိပ်မက်မက်ခဲ့ကြရသည်။

ထိုအိပ်မက်ထဲတွင် မြဝတီမြို့အတွင်းနှင့် မြဝတီမြို့အနီးမှာ မြန်မာ့တပ်မတော်နှင့် အတိုက်အခံတို့၏ လက်နက်ကိုင်အဖွဲ့များကြား တိုက်ပွဲများ အပြင်းအထန် ဖြစ်ပွားခဲ့ကြသည်။

ထို့နောက် မြန်မာ့တပ်မတော်၏ မြဝတီမြို့အနီးက သင်္ဃန်းညီနောင် တပ်စခန်း သိမ်းပိုက်ခံလိုက်ရပြီး မြဝတီကို ဆက်လက်သိမ်းပိုက်နိုင်ရေးအတွက် အတိုက်အခံတို့၏ လက်နက်ကိုင်များက ထိုးစစ်ဆင်လာခဲ့ရာ မြဝတီ မြို့စောင့်တပ် ဖြစ်သည့် ခလရ ၂၇၅ လည်း ဆုတ်ခွာရင် ထိုင်း-မြန်မာ အမှတ်(၂) တံတားအနီးသို့ ရောက်သွား ခဲ့သည်။

တခြားတစ်ဖက်မှာတော့ မြဝတီမြို့မှာ နေထိုင်ကြသည့် အရပ်သားများသည် သောကအပူမီးများ တောက် လောင်နေပြီး ကလေးများကို ချီပိုးကာ မြစ်ကိုဖြတ်ကူးရင် စစ်ပွဲ၏ ဘေးလွတ်ရာ ထိုင်းနိုင်ငံဘက်ကို ထွက်ပြေး နေကြရသည်။

အဆိုပါ အဖြစ်အပျက်များကို ထိုင်းသတင်းဌာန တစ်ခုဖြစ်သည့် The Reporters သတင်းဌာနကလည်း အဆက်မဖြတ် တင်ဆက်နေသလို မြဝတီမြို့အတွင်းမှာ မြန်မာ့တပ်မတော်၏ လုံခြုံရေးအဖွဲ့များ မရှိတော့ဘဲ အတိုက်အခံအင်အားစုများက မြို့အတွင်း ဝင်ရောက်ကာ ထိန်းချုပ်၍ လုံခြုံရေး ကင်းလှည့်နေသည်ဟုလည်း တင်ဆက်ခဲ့သည်။

 မြဝတီရှိ တပ်မတော် စစ်စခန်းတစ်ခုကို အတိုက်အခံ လက်နက်ကိုင်များ ဝင်ရောက်နိုင်ခဲ့စဉ်

အလားတူ ခလရ ၂၇၅ ၏ တပ်ဌာနချုပ်ကို အတိုက်အခံတို့၏ လက်နက်ကိုင်အင်အားစုများက ထိန်းချုပ် လိုက်ပြီးနောက် The Reporters ၏ သတင်းထောက် Mr.Thapanee Eadsrichai ကိုယ်တိုင် ခလရ ၂၇၅ တပ်ဌာနချုပ်ကို လုံခြုံရေး အစောင့်အရှောက်နှင့်အတူ သွားရောက်ခဲ့ပြီး အမှတ်တရ ဓာတ်ပုံများ ရိုက်၍ တင်ခဲ့သလို KNU အလံကိုပါ လွှင့်တင်နေသော ဓာတ်ပုံများကိုလည်း ထုတ်လွှင့်သည်။

ထိုပုံရိပ်လွှာများကို အွန်လိုင်း စာမျက်နှာပေါ်ကနေ စောင့်ကြည့်နေကြရသူများက မြဝတီမြို့ကို အတိုက်အခံများ ထိန်းချုပ် သွားနိုင်ခဲ့ပြီးဟု ယုံကြည်ခဲ့ကြသည်။ ထိုသို့ ယုံကြည်ခဲ့ကြရခြင်းကလည်း အတိုက်အခံများသည် သတင်းမီဒီယာကို အသုံးချ၍ ဝါဒဖြန့်ချီရေးကို စစ်ပွဲနှင့်အတူ ဆင်နွှဲကာ လူထု၏စိတ်ကို ဖမ်းစားခဲ့ခြင်းကြောင့် ဖြစ်သည်။

မြဝတီမြို့ကို အတိုက်အခံများ ထိန်းချုပ်နိုင်ခဲ့သည်ဟု အွန်လိုင်းစာမျက်နှာပေါ်က လူထုကြီး မြင်တွေ့ခဲ့ရသော နေ့က ၂၀၂၄ ခုနှစ်၊ ဧပြီ ၁၅ ရက်နေ့ဖြစ်သည်။ ထိုနေ့သည် မြဝတီမြို့ကို အတိုက်အခံများက ထိန်းချုပ်နိုင်ခဲ့ပြီ ဟု ရေးသားထုတ်လွှင့်ခဲ့ကြသော အိပ်မက်နေ့စွဲလေး တစ်ခုဖြစ်သည်။

ဤသို့ လှပသော အိပ်မက်လေးကနေ လှန့်နိုးသွားခဲ့ပြီး အိပ်ယာကနေထ၍ အပြင်ကို ကြည့်လိုက်သည့် အချိန်မှာတော့ မြန်မာ့တပ်မတော်က မြဝတီမြို့ ထိန်းချုပ်နိုင်ရေး၊ သင်္ဃန်းညီနောင် ပြန်လည်ရရှိရေး၊ ခလရ ၂၇၅ ကို တပ်ကူစေလွှတ်ရေး စသည့် အခြေအနေများအတွက် ဒုတပ်ချုပ် ဒုတိယဗိုလ်ချုပ်မှူးကြီးစိုးဝင်း ဦးဆောင်ပြီး ဦးအောင်ဇေယျ စစ်ဆင်ရေးတစ်ရပ်ကို ဖော်ဆောင်နေသည်ကို ကြားလိုက်ရပြန်သည်။

ခလရ ၂၇၅ ထဲသို့ The Reporters ၏ သတင်းထောက် Mr.Thapanee Eadsrichai ရောက်ပြီး အမှတ်တရ ဓာတ်ပုံရိုက်နေစဉ်

ထို့နောက် မြဝတီမြို့၏ အတွင်း/အပြင် အပါအဝင် မြဝတီမြို့ကို သွားရောက်မည့် ကော့ကရိတ်လမ်းတစ် လျှောက်မှာ တိုက်ပွဲများ အပြင်းအထန် ဖြစ်ပွားခဲ့ကြပြီး ဧပြီ ၂၁ ရက်နေ့မှာပဲ KNU- PDF ပူးပေါင်းတပ်ဖွဲ့ နောက်ပြန်ဆုတ်သွားကာ မြန်မာ့တပ်မတော်က မြဝတီမြို့စောင့်တပ် ခလရ ၂၇၅ မှာ နိုင်ငံတော်အလံပြန်လည် လွှင့်ထူ၍ မြဝတီမြို့ကို ထိန်းချုပ်လိုက်သည်။

မြဝတီမြို့ကို မြန်မာ့တပ်မတော် ပြန်လည် ထိန်းချုပ်လိုက်နိုင်ခြင်းက ကရင်အမျိုးသားအစည်းအရုံး(KNU) ခေါင်းဆောင်ပိုင်းများကြား သဘောထား ကွဲလွဲခြင်းကြောင့်ဖြစ်သည်ဟု KNU ခေါင်းဆောင်တစ်ဦးက ပြော သည်။

၎င်းက “ KNU ခေါင်းဆောင်အများစုရော၊ KNA ကရောက တည်ငြိမ်မှု ပျက်သွားမှာ စိုးရိမ်ကြတယ်။ ထိုင်းနဲ့ ချစ်ကြည်ရေး ပျက်သွားမှာလည်း စိတ်ပူကြတယ်။ တချို့ KNU ခေါင်းဆောင်ပိုင်းကတော့ မြဝတီကို သိမ်းချင် တယ်။ အဲမှာ သဘောထားကွဲကြတာပါ။ ဒေသခံတွေကလည်း မြို့ပျက်သွားမှာကို စိုးရိမ်ကြတယ်”ဟု ပြော သည်။

မြဝတီမြို့သည် ထိုင်း-မြန်မာ ကုန်သွယ်ရေး၏ အဓိက ထွက်ပေါက်ဖြစ်ပြီး နေ့စဉ် ဒေါ်လာသန်းနှင့်ချီ ကုန်သွယ် မှု ရှိနေခြင်းကြောင့် နှစ်နိုင်ငံအစိုးရအကြား ချစ်ကြည်ရေး ဖြတ်တောက်သွားမည်ကို KNU ခေါင်းဆောင်ပိုင်း တချို့က မလိုလားကြသည့်အတွက် မြဝတီမြို့ထိုးစစ်ကနေ နောက်ပြန်ဆုတ်သွားခဲ့ကြကြောင်း သိရသည်။

ထို့အပြင် KNU ခေါင်းဆောင်ပိုင်း တချို့က တစ်ချိန်ချိန်မှာ မြန်မာ့တပ်မတော်နှင့် ငြိမ်းချမ်းရေး ဆွေးနွေးမှု ပြန်လုပ်ကို လုပ်ရမည်ဟု နားလည်ထားခြင်းကြောင့်လည်း မြဝတီမြို့ ထိန်းချုပ်နိုင်ရေး စစ်ဆင်ရေးကို နောက် ပြန်ဆုတ်ခဲ့ခြင်းဖြစ်သည်ဟု KNU နှင့် နီးစပ်သူ တစ်ဦးက ရှင်းပြသည်။

မြန်မာ့တပ်မတော်က ခလရ ၂၇၅ မှာ မြန်မာနိုင်ငံအလံ ပြန်လည် လွှင့်တင်နေစဉ်

သို့သော် NUG နှင့် PDF တို့သည် အတိုက်အခံ အင်အားစုများဖြစ်သည့်အတွက် မြဝတီမြို့ကို ထိန်းချုပ်ပြီး လွတ်မြောက်ရေး ကြေညာကာ တခြားသော ဒေသများကို ဆက်လက် ထိန်းချုပ်ရေး ကြိုးပမ်းသွားလိုကြရာမှာ လည်း စဉ်းစားပုံခြင်း မတူညီကြသည်ကို တွေ့ရသည်ဟု ၎င်းက ရှင်းပြသည်။

မြဝတီမြို့ ထိန်းချုပ်ရေး စိတ်အားထက်သန်ကြသည့် တချို့သော KNU ခေါင်းဆောင်ပိုင်းများကတော့ ရှမ်းပြည်နယ်မြောက်ပိုင်းတွင် AA-TNLA-MNDAA တို့၏ ၁၀၂၇ စစ်ဆင်ရေး အောင်မြင်မှုနှင့် ကိုယ်ရကိုယ်ယူ နယ်မြေသိမ်း စစ်ပွဲအပေါ် အားကျနေပြီး မြဝတီမြို့ကို ထိန်းချုပ်ရန် စိတ်ဆန္ဒများ ပြင်းပြလျက်ရှိနေသည်ဟု ထိုင်းနယ်စပ်တွင် ရောက်ရှိနေသော အတိုက်အခံတစ်ဦးက ပြောသည်။

၎င်းက “ မြောက်ပိုင်းက ကိုယ်ရကိုယ်ယူပုံစံကို တောင်ပိုင်းက EAO တွေနဲ့ အတိုက်အခံ (NUG)တွေက သဘောကျသွားတယ်။ သူတို့လည်း အားတက်သွားတယ်။ အဲမှာ မြဝတီမြို့သိမ်းတိုက်ပွဲကို ဖော်ဆောင်တာ ဒီလို ဖော်ဆောင်နိုင်ဖို့အတွက်ကိုလည်း နိုင်ငံကြီးတစ်နိုင်ငံက ထောက်ပံ့ပေးတယ်။ အဲဒီနိုင်ငံကြီး တစ်နိုင်ငံက ပေးတဲ့ လူသားချင်းစာနာထောက်ထားမှု ငွေကြေးအကူအညီက လက်နက်တွေ ဖြစ်သွားတယ်။ ဒီအချိန်မှာ KNU ခေါင်းဆောင် တချို့က မြောက်ပိုင်း EAO တွေလိုမျိုး စိတ်ကူးယဉ်လိုက်တာ။ အတိုက်အခံတွေကလည်း အားတက်နေတာပေါ့။ အဲဒီမှာ သတင်းသမားတွေကိုတောင် ခေါ်လာပြီးတော့ မြဝတီမြို့ သိမ်းလိုက်ပြီဆိုပြီး တော့ သတင်းတွေ ထုတ်လွှင့်ခဲ့သေးတယ်။ ဒါပေမယ့် ကရင်ပြည်နယ်က ရှမ်းမြောက်လို ပထဝီအနေအထားက မတူညီဘူးလေ။ ပြီးတော့ KNU ခေါင်းဆောင်တွေကြားမှာ စဉ်းစားပုံချင်းလည်း မတူညီဘဲ ကွဲလွဲနေကြတယ်လို့ လည်း သိရတယ်။ ဒါကြောင့် နောက်ပြန်ဆုတ်သွားရတာ”ဟု ပြောသည်။

မြဝတီမြို့ ထိန်းချုပ်နိုင်ရေး တိုက်ပွဲသည် တော်လှန်ရေးအင်အားစုများနှင့် အတိုက်အခံများအတွက် ရည်မှန်း ချက် ပန်းတိုင်ကြီး တစ်ခုဖြစ်သည်။ အလားတူ လှပသော အနာဂတ် အိပ်မက်ကြီးတစ်ခုလည်း ဖြစ်သည်။

 မြန်မာနိုင်ငံအလံကို တွေ့ရစဉ်

မြန်မာ့တပ်မတော် အတွက်ကလည်း မြဝတီမြို့သည် တိုင်းပြည်၏ အဆုံးအဖြတ် တစ်ခုဖြစ်သွားနိုင်သည်ဟု နားလည်ထား၍ နည်းလမ်းပေါင်းစုံဖြင့် မြဝတီမြို့ကို ဆက်လက် ထိန်းချုပ်ထားနိုင်ရေး ကြိုးပမ်းနိုင်ကြောင်း မြန်မာ့တပ်မတော်နှင့်နီးစပ်သူ တစ်ဦးက ရှင်းပြသည်။

ထို့နောက် တိုင်းပြည်၏ အဆုံးအဖြတ်ကို ထိုင်း-မြန်မာ အမှတ်(၂)ချစ်ကြည်ရေးတံတားက အဆုံးအဖြတ်ပေး သွားခဲ့သည်။

ထိုအဆုံးအဖြတ်မှာ ကရင်နယ်ခြားစောင့်တပ် (BGF)ကနေ အသွင်ပြောင်းသွားသည့် ကရင်အမျိုးသားတပ်မ တော်(KNA)၏ အခန်းကဏ္ဍကလည်း အလွန်အရေးပါခဲ့သည်ဟု အတိုက်အခံတစ်ဦးက ပြောသည်။

မြန်မာနိုင်ငံတွင် ဒီမိုကရေစီလှုပ်ရှားမှု ကျိုးပဲ့ပြီး အစိတ်စိတ် အမွာမွာကွဲနေလျှင် နိုင်ငံခြားစီးပွားရေး ပိတ်ဆို့မှု တစ်ခုတည်းက အုပ်ချုပ်ရေးကို ပြိုကွဲအောင် မလုပ်နိုင်သလို သူ့ဟာနှင့်သူ စီးပွားရေး အကျပ်အတည်းဖြစ်ခြင်း ကလည်း အုပ်ချုပ်ရေးကို ပြိုကွဲအောင် မလုပ်နိုင်ပေ။

 မြဝတီမြို့ ကုန်သွယ်ရေးဇုန်ကို တွေ့ရစဉ်

ထို့အပြင် အတိုက်အခံများ၏ ဒီမိုကရေစီအင်အားစု ကြီးထားမှုမရှိလျှင် အတိုက်အခံများသည် ဘေဂျင်းဖြစ်ဖြစ်၊ ဝါရှင်တန်ဖြစ်ဖြစ် အင်အားကြီးအစိုးရ တစ်ရပ်အပေါ် အမြဲတမ်း မှီခိုအားထားနေရပြီး ၎င်းတို့ပြုသမျှ နုရလိမ့် မည်။ 

ထို့နောက် အင်အားကြီး နှစ်နိုင်ငံ၏ ပဋိပက္ခကြားမှာ မြန်မာနိုင်ငံ ပိတ်မိသွားမည်ဖြစ်ပြီး နိုင်ငံရေး၊ စီးပွားရေး မတည်ငြိမ်သော တိုင်းပြည်တစ်ပြည်ထက် ပိုမိုဆိုးဝါးသွားနိုင်သည်ကို အားလုံး သတိချပ်သင့်သည်။

မည်သို့ပင်ဆိုစေကာမူ လက်ရှိမှာတော့ မြဝတီမြို့ကို တိုက်ပွဲကင်းပြီး စီးပွားရေးဇုန်အဖြစ်ထားရန်၊ ခလရ ၂၇၅ ကို မူလ တပ်စခန်းမှာ ပြန်လည် အခြေစိုက်ခွင့်ပြုရန်၊ အကောက်ခွန်နှင့် လူဝင်မှုကြီးကြပ်ရေးဝန်ထမ်းများ မူလ လုပ်ငန်းစဉ်များ ပြန်လည် လုပ်ကိုင်ရန်၊ ကုန်သွယ်ရေး ပြန်လည်စတင်ရန် စသဖြင့် သဘောတူညီမှုများ ရယူခဲ့ ကြပြီးဖြစ်သည်။

ထို့ကြောင့် မြဝတီသည် အတိုက်အခံတို့၏ မျှော်လင့်ချက် သို့မဟုတ် အတိုက်အခံတို့၏ ပျက်စီးသွားသော အိပ် မက်မြို့လေး တစ်မြို့အဖြစ်သာ ကျန်ရှိခဲ့တော့သည်ဟု နယ်စပ်ရောက် အတိုက်အခံများက မှတ်ချက်ပြုခဲ့ကြ သည်။

CNI Sport Article 

၂၀၂၄ ခုနှစ်၊ ဧပြီ ၂၈

၂၀၁၅ ခုနှစ်က လီဗာပူးလ်အသင်းကို စတင်ကိုင်တွယ်ခဲ့တဲ့ ကလော့ပ်ဟာ ဒီရာသီအကုန်မှာ ၉ နှစ်ကြာ ကိုင်တွယ် ခဲ့တဲ့ အသင်းကနေ ထွက်ခွာတော့မှာ ဖြစ်ပါတယ်။

လီဗာပူးလ်အသင်းကနေ ထွက်ခွာမယ်လို့ ကလော့ပ် ကြေညာချိန်မှာ အသင်းဟာ ဆုဖလား ၄ လုံး ရယူနိုင်မယ့် လမ်းကြောင်းပေါ်မှာရှိနေခဲ့ပြီး ခြေစွမ်းပိုင်းကလည်း အကောင်းဆုံးဖြစ်နေတာပါ။

အဲဒါကြောင့်လည်း လီဗာပူးလ်အသင်း ကစားသမားတွေဟာ သူတို့ရဲ့နည်းပြကြီးကို ဆုဖလား ၄ လုံးစလုံး ရယူပေးပြီး နှုတ်ဆက်နိုင်ဖို့ မျှော်လင့်ခဲ့ကြတာ ဖြစ်ပါတယ်။

လီဗာပူးလ်အသင်း ကစားသမားတွေဟာ နည်းပြ ကလော့ပ်အတွက် ဒီရာသီရဲ့ ပထမဆုံး ဆုဖလားဖြစ်တဲ့ ကာရာဘောင်းဖလား ရယူပေးခဲ့အပြီးမှာ နောက်ထပ်ဆုဖလား ၃ လုံးအတွက် ဆက်ပြီးတိုက်ပွဲဝင်ဖို့ ပြင်ဆင်ခဲ့ ကြတာပါ။

ဒါပေမယ့် လီဗာပူးလ်အသင်းရဲ့ ခြေချော်မှုတွေဟာ တဖြေးဖြေးချင်း စတင်လာခဲ့ပြီး FA ဖလားပြိုင်ပွဲမှာ ယူနိုက်တက်အသင်းကို အချိန်ပိုမှာ အရေးနိမ့်ကာ ဆုဖလား ၁ လုံး စတင် လက်လွှတ်ခဲ့ရပါတယ်။ 

လီဗာပူးလ်အသင်းကို တွေ့ရစဉ်

လီဗာပူးလ်အသင်းကတော့ FA ဖလားက ထွက်ခွာခဲ့ရပေမယ့် ကျန်တဲ့ ပရီးမီးယားလိဂ်နဲ့ ယူရိုပါလိဂ်ဖလားကို မဖြစ်မနေ ရယူသွားမယ်လို့ ဆုံးဖြတ်ခဲ့တာပါ။ 

လီဗာပူးလ်အသင်းရဲ့ မျှော်လင့်ချက်ကို စတင်ထိခိုက်ခဲ့တာကတော့ ယူနိုက်တက်အသင်းနဲ့ ကစားခဲ့တဲ့ ပရီးမီးယားလိဂ်ပွဲစဉ်မှာ ၂ ဂိုးစီ သရေကျသွားခဲ့တာ ဖြစ်ပါတယ်။ 

လီဗာပူးလ်အသင်းဟာ ဒီပွဲစဉ်ပြီးကတည်းက သူတို့ရဲ့ခြေစွမ်းဟာ ကျဆင်းသွားခဲ့ပြီး တိုက်စစ်ပိုင်းကလည်း အလုပ် မဖြစ်တော့တာပါ။ 

အန်ဖီးလ်ကလပ်ဟာ နောက်ပိုင်းကစားခဲ့တဲ့ အတ္တလန်တာနဲ့ ယူရိုပါလိဂ်၊ ပဲလေ့စ်အသင်းနဲ့ ပရီးမီးယားလိဂ် အိမ်ကွင်း ၂ ပွဲဆက် အရေးနိမ့်ပြီး ကလော့ပ်ကို ဆုဖလားတွေ အများအပြားနဲ့ နှုတ်ဆက်ပေးချင်တဲ့ သူတို့ရဲ့ မျှော်လင့်ချက်တွေ ပျက်ပြယ်လာခဲ့တာ ဖြစ်ပါတယ်။ 

လီဗာပူးလ်အသင်းဟာ အတ္တလန်တာနဲ့ ယူရိုပါလိဂ် ဒုတိယအကျော့ပွဲစဉ်မှာ အနိုင်ရခဲ့ပေမယ့် ပထမအကျော့က အရှုံးရလဒ်ကြောင့် ယူရိုပါလိဂ်ကနေ ထွက်ခွာခဲ့ရပါတယ်။

လီဗာပူးလ်အသင်းဟာ ပြိုင်ပွဲတစ်ခုပြီး တစ်ခုထွက်ခဲ့ရပြီးနောက် အဲဗာတန်အသင်းကို ပရီးမီးယားလိဂ်မှာ ထပ်ပြီး အရေးနိမ့်သွားခဲ့ပြန်ပါတယ်။ 

လီဗာပူးလ်အသင်း အတွက်တော့ ဒီပွဲအရှုံးကြောင့် ဒီရာသီ ပရီးမီးယားလိဂ် ချန်ပီယံဆုကို လက်လွှတ်ရဖို့ အများစု သေချာသွားပြီလို့ ပြောရမှာပါ။ 

ပရီးမီးယားလိဂ် ပွဲစဉ်တွေ ကစားဖို့ အနည်းငယ် ကျန်သေးပေမယ့် အခွင့်အရေးက လီဗာပူးလ်အသင်းရဲ့ လက်ထဲ မှာ မရှိတော့ပါဘူး။ 

ကလော့ပ် ဆုဖလားကိုင် အောင်ပွဲခံနေစဉ်

အာဆင်နယ်နဲ့ မန်စီးတီးအသင်းရဲ့ အမှားကို စောင့်ရမယ့် အခြေအနေဖြစ်လို့ လီဗာပူးလ်အသင်း အတွက်တော့ ဒီရာသီကို ကာရာဘောင်းဖလား ဆုဖလား ၁ လုံးနဲ့သာ ကျေနပ်ရဖို့ ရှိနေပါတယ်။

ဆုဖလားတွေနဲ့အတူ မြို့ထဲကို အမိုးဖွင့်ကားနဲ့ လှည့်လှည်ပြီး နည်းပြ ကလော့ပ်ကို နှုတ်ဆက်ချင်တဲ့ လီဗာပူးလ် အသင်းရဲ့ မျှော်လင့်ချက်တွေဟာ ဆုဖလား ၁ လုံးနဲ့ပဲ အဆုံးသတ်သွားရပြီ ဖြစ်တာပါ။ 

လီဗာပူးလ်အသင်း ကစားသမားတွေဟာ နည်းပြ ကလော့ပ်ကို ဆုဖလား ၄ လုံး ရယူပေးပြီး နှုတ်ဆက်ချင်တဲ့ ဖိအားဒဏ်တွေကြောင့်လည်း နောက်ပိုင်းပွဲစဉ်တွေမှာ အမှားတွေလုပ်ခဲ့ပြီး ပြိုင်ဘက်အသင်းတွေကို လွယ်ကူ သွားစေခဲ့တာ ဖြစ်ပါတယ်။ 

လီဗာပူးလ်အသင်းရဲ့အဓိက တိုက်စစ်မှူး ဆာလက်ရဲ့ ခြေစွမ်းပိုင်းကျဆင်းမှု ဒါဝင်နူနက်စ်ရဲ့ ဂိုးဖြုန်းတီးမှုတွေက လီဗာပူးလ်အသင်းအပေါ် အနည်းနဲ့ အများသက်ရောက်မှု ရှိခဲ့တာပါ။ 

ပရီးမီးယားလိဂ်ဖလားကို လက်လွှတ်ရမှာက လီဗာပူးလ်အသင်းကို ပိုစိတ်ပျက်စေခဲ့ပြီး အသင်းခေါင်းဆောင် ဗန်ဒိုက်က အသင်းဖော်တွေအနေနဲ့ ဒီဖလားကို အမှန်တကယ် ရယူချင်ရဲ့လားဆိုပြီး မေးခွန်းထုတ်ခဲ့ပါတယ်။ 

ကလော့ပ်ဟာ လီဗာပူးလ်အသင်း နည်းပြဘဝမှာ ယူရိုပါလိဂ် ဆုဖလားကလွဲပြီး ဆုဖလားအားလုံး ရယူနိုင်ခဲ့တဲ့ အထိ အောင်မြင်ခဲ့တာ ဖြစ်ပါတယ်။ 

လီဗာပူးလ်အသင်းကို တွေ့ရစဉ်

ဒါပေမယ့် ကလော့ပ်ဟာ မန်စီးတီးအသင်းကို ကိုင်တွယ်နေတဲ့ ဂွာဒီယိုလာကြောင့် ပရီးမီးယားလိဂ်ဖလားကို ရယူဖို့ထိုက်တန်တာထက် ၁ ကြိမ်သာ ရယူနိုင်ခဲ့တာပါ။ 

အဲဒါကြောင့် ကလော့ပ်ဟာ သူ့ရဲ့ လီဗာပူးလ်အသင်း နည်းပြဘဝ နောက်ဆုံးရာသီမှာ ပရီးမီးယားလိဂ် ဆုဖလားကို နောက်ထပ်တစ်ကြိမ် ကိုင်မြှောက်ချင်ခဲ့ပေမယ့်လည်း ဖြစ်မလာဖို့က ရာခိုင်နှုန်းများနေတာ ဖြစ်ပါတယ်။

လီဗာပူးလ်အသင်းအနေနဲ့ ပရီးမီးယားလိဂ် လက်ကျန်ပွဲစဉ်တွေမှာ အကောင်းဆုံးလုပ်ပြီး မန်စီးတီးနဲ့ အာဆင်နယ် အသင်းတို့ရဲ့ အမှားတွေကိုစောင့်ကာ နည်းပြ ကလော့ပ်အတွက် အကောင်းဆုံးရလဒ်တွေ ရယူပေးဖို့ပဲ ရှိတော့တာ ပါ။ 

ဘယ်လိုပဲဖြစ်ဖြစ် နည်းပြ ကလော့ပ်ကို လီဗာပူးလ်အသင်းရဲ့ နှုတ်ဆက်မှုဟာ လှပမှုမရှိတာပဲ ဖြစ်ပါတယ်။ 

CNI Article

၂၀၂၄ ခုနှစ်၊ ဧပြီ ၁၄

ထိုင်းနိုင်ငံသည် လိင်တူစုံမက်သူများ၊ လိင်တူလိင်ကွဲ စုံမက်သူများ၊ လိင်ပြောင်းထားသူများ အစရှိသည့် LGBTQ အသိုင်းအဝိုင်းနှင့်မစိမ်းသည့် နေရာတစ်ခုဖြစ်သော်လည်း ထိုင်း၏ အမျိုးသားဥပ‌ဒေများနှင့် မူဝါဒများသည် LGBTQ အသိုင်းအဝိုင်းအတွက် လိုက်လျောညီထွေ သိပ်မရှိသည်ကို တွေ့ရမည်ဖြစ်သည်။

ထို့ကြောင့် ထိုင်းလွှတ်တော်သည် လိင်တူလက်ထပ်ခွင့်ကို တရားဝင်အတည်ပြုရန် ဆုံးဖြတ်ချက်ချတော့မည့် အနေအထားသို့ ရောက်ရှိခဲ့ပြီး ဖြစ်သည်။

လိင်တူလက်ထပ်ခွင့်ကိုသာ တရားဝင် အတည်ပြုခဲ့မည်ဆိုပါက ထိုင်းနိုင်ငံ၏ စီးပွားရေးအတွက် တစ်ဖက် တစ်လမ်းမှ အထောက်အပံ့ ဖြစ်စေလိမ့်မည် ဖြစ်သည်။

 အထူးသဖြင့် လိင်တူချင်း လက်ထပ်သည့် မင်္ဂလာဆောင် များမှ ဒေါ်လာများ သန်းချီရရှိနိုင်မည် ဖြစ်သည်။

သာတူညီမျှလက်ထပ်ခွင့် အက်ဥပဒေကို အတည်ပြုခြင်းသည် ထိုင်းနိုင်ငံ၏ LGBTQ+ အသိုင်းအဝိုင်းအတွက် သာမကဘဲ ထိုင်းနိုင်ငံအတွင်း စီးပွားရေး လုပ်ငန်းများလုပ်ရန် ကြိုးပမ်းနေသည့် ကမ္ဘာလုံးဆိုင်ရာ စီးပွားရေး အသိုင်းအဝိုင်းအတွက်လည်း သတင်းကောင်းတစ်ခု ဖြစ်လာလိမ့်မည်ဖြစ်သည်။

ထိုင်းဝန်ကြီးချုပ် ဆရီသာ သာဗီဆင်နဲ့ LGBTQ ကိုတွေ့ရစဉ်

ထိုဥပဒေကို ပြဋ္ဌာန်းခဲ့မည်ဆိုပါက ထိုင်းတွင် စီးပွားရေးနှင့် သက်ဆိုင်ရာ နယ်ပယ်များတွင် ပါရမီရှိသူများကို လျင်မြန်စွာ စုဆောင်းနိုင်ခြင်းမှ အကျိုးကျေးဇူးများ ရရှိမည့် အခြေအနေကို တစ်ကမ္ဘာလုံးက မြင်တွေ့နိုင်မည် ဖြစ်သည်။

ထိုအချက်သည် ထိုင်း၏ မူဝါဒရေးဆွဲသူများအတွက် အဓိကထား စဥ်းစားရမည့် အချက်ဖြစ်သည်။

ကမ္ဘာလုံးဆိုင်ရာ နိုင်ငံတကာကုမ္ပဏီကြီးများသည်  LGBTQ အသိုင်းအဝိုင်းအား ခွဲခြားဆက်ဆံမှုအပေါ် အလွန်အမင်း အလေးအနက်ထားပြီး ကိုင်တွယ်လျက်ရှိသည်။ 

LGBTQ များကို ခွဲခြားဆက်ဆံမှုသည် စွမ်းဆောင်ရည်မြင့်မားပြီး ပါရမီရှိသည့် ဝန်ထမ်းများကို စုဆောင်းရာတွင် ဆိုးကျိုးသက်ရောက်စေနိုင်သလို နိုင်ငံအတွင်း  LGBTQ များကို မုန်းတီးသည့် ပတ်ဝန်းကျင်တွင် ပါရမီရှင်  LGBTQ များအား ဝန်ထမ်းအဖြစ် ခေါ်ယူရာတွင် အဟန့်အတား ဖြစ်စေနိုင်သည်။

ထိုအချက်သည်  LGBTQ များကိုသာ သက်ရောက်စေမည် မဟုတ်ဘဲ  LGBTQ အသိုင်းအဝိုင်းနှင့် ရင်းနှီးကျွမ်းဝင် သည့် လုပ်ငန်းခွင်တွင် အလုပ်လုပ်ရန် ကြိုးပမ်းနေသော  LGBTQ  များ၏ မိတ်ဆွေများ၊ မိဘများ၊ မိသားစုဝင်များ ကိုလည်း သက်ရောက်စေမည်ဖြစ်သည်။

ထို့ကြောင့် အမေရိကန်၏ အကြီးဆုံးကုမ္ပဏီ ၅၀၀ စာရင်းကို နှစ်စဥ် စစ်တမ်းကောက်ယူ ဖော်ပြနေသည့် Fortune 500 စာရင်းတွင် ပါဝင်သည့် ကုမ္ပဏီ ၉၆ ရာခိုင်နှုန်းက လိင်အပေါ် အခြေခံသည့် ခွဲခြားဆက်ဆံမှုမျိုးကို တားမြစ် ထားသည်။

အမေရိကန် စီးပွားရေး ပညာရှင်တစ်ဦးဖြစ်သည့် လီဘက်ဂတ်ကို တွေ့ရစဉ်

နိုင်ငံ၏ ထိပ်သီး အရောင်းဝန်ထမ်းအဖြစ် တင်စားခံထားရသည့် ထိုင်းဝန်ကြီးချုပ် ဆရီသာ သာဗီဆင် (Srettha Thavisin) ကလည်း လက်ရှိတွင် ထိုင်း၌ စီးပွားရေးလုပ်ငန်းများ ဖွင့်လှစ်လုပ်ကိုင်ရန် အချိန်အခါကောင်းဖြစ် ကြောင်း၊ ထိုင်းတွင် ရင်းနှီးမြှုပ်နှံရန် လက်ရှိအချိန်ထက် ကောင်းမွန်သည့် အချိန်မရှိကြောင်း ပြောကြားခဲ့သည်။

စီးပွားရေးလုပ်ငန်းတွင်  ဖွံ့ဖြိုးတိုးတက်မှုနှင့် ပွင့်လင်းမှုအတွက် LGBTQ များနှင့် ပွင့်လင်းစွာ လက်တွဲဆောင်ရွက် ရမည် ဖြစ်သည်။ 

အဘယ်ကြောင့်ဆိုသော်  LGBTQ များသည် သာတူညီမျှမှုရှိသည့် တရားရေး အကာအကွယ်အောက်တွင် ရှိလာခဲ့မည်ဆိုပါက အစိုးရနှင့် စီးပွားရေး လုပ်ငန်းများသည်  LGBTQ များထံမှ အကျိုးအမြတ်များကို မျှော်လင့် နိုင်မည်ဖြစ်သည်။

လိင်တူလက်ထပ်ခွင့်ကို တရားဝင် အတည်ပြုခြင်းအားဖြင့် ထိုင်းနိုင်ငံအတွင်းရှိ ကုမ္ပဏီများသည် ၎င်းတို့၏ လုပ်ငန်း လည်ပတ်မှုများကို ချဲ့ထွင်မှု၊ လစာငွေ ကောင်းမွန်သည့် အလုပ်အကိုင်များ ပေါ်ထွက်လာမှု၊ ဆန်းသစ် တီထွင်မှု အပိုင်းတွင် အားကောင်းလာမှုနှင့် ထိုင်းပြည်သူများအတွက် အကျိုးရှိစေမည့် နိုင်ငံခြားရင်းနှီးမြှုပ်နှံမှု များကို ဆွဲဆောင်နိုင်မည်ဖြစ်သည်။

ပြီးခဲ့သည့်နှစ်များအတွင်း  ပြုလုပ်ခဲ့သည့် လေ့လာမှုများတွင် ထိုင်းနိုင်ငံအတွင်းရှိ LGBTQ များ၏ ရေရာမှုမရှိသည့် စီးပွားရေး ကောင်းကျိုးချမ်းသာ အခြေအနေကို အလေးထားဖော်ပြခဲ့သည်။

ထို့နောက် သာတူညီမျှမှု မရှိသော အခြေအနေက LGBTQ များအား နိုင်ငံစီးပွားရေးအတွင်းသို့ အပြည့်အဝ ပါဝင် ဆောင်ရွက်နိုင်ခြင်း မရှိစေရန် ဟန့်တားရာ ရောက်ခဲ့သဖြင့် ထိုင်းနိုင်ငံ၏ အစိုးရနှင့် စီးပွားရေး လုပ်ငန်းများသည် ၎င်းတို့ ကြိုးပမ်းအားထုတ်သလောက် တူညီသည့် အကျိုးကျေးဇူးကို မခံစားခဲ့ရကြောင်း လေ့လာသူများက ပြောကြားခဲ့သည်။

ကမ္ဘာလုံးဆိုင်ရာ သုတေသနတစ်ခုတွင် သက်ဆိုင်ရာ နယ်ပယ်များ၌ ပရော်ဖက်ရှင်နယ်များအဖြစ် လုပ်ကိုင်နေ သည့်  LGBTQ+ စုစုပေါင်း၏ ၆၆ ရာခိုင်နှုန်းက ၎င်းတို့၏ လိင်စိတ်ခံယူမှုကို ထုတ်ဖော်ပြောဆိုခြင်းဖြင့် စီးပွားရေး လုပ်ငန်းများ လုပ်ဆောင်သည့် ၎င်းတို့၏ လုပ်နိုင်စွမ်း အပြင် ဖောက်သည်များနှင့် ထိတွေ့ဆက်ဆံမှုများအပေါ် အပြုသဘောဆောင်သည့် သက်ရောက်မှုရှိခဲ့သည်ဟု ပြောကြားခဲ့သည်။

ထို့ပြင် LGBTQ+ များ ပါဝင်မှုသည် နိုင်ငံပေါင်းစုံ ပါဝင်သည့် စီးပွားရေး လုပ်ငန်းစုများနှင့် ကော်ပိုရေးရှင်းများ အတွက် ပိုမိုအောင်မြင်မှုများလည်း ရရှိစေသည်ဟု လေ့လာသူများက ပြောကြားခဲ့သည်။

ချစ်သူ စုံတစ် တစ်တွဲကို တွေ့ရစဉ်

၂၀၁၆ ခုနှစ်က Credit Suisse ဘဏ္ဍာရေး ဝန်ဆောင်မှုကုမ္ပဏီ၏ လေ့လာချက်တစ်ရပ်တွင်  LGBTQ များနှင့် ရင်းနှီးကျွမ်းဝင်မှုရှိသည့် စီးပွားရေးလုပ်ငန်းများသည် ကမ္ဘာလုံးဆိုင်ရာ စတော့လှုပ်ရှားမှုများကို တိုင်းတာသော MSCI All Country World Index အမည်ရှိ ညွှန်းကိန်း၌ ပျမ်းမျှ ၃ ရာခိုင်နှုန်း ပိုမိုသာလွန်နေကြောင်း ဖော်ပြခဲ့ သည်။

သာတူညီမျှ လက်ထပ်ခွင့် မရှိပါက ဆုံးရှုံးနစ်နာရမည့် အရာများကို ရေတွက်နိုင်မည် မဟုတ်ဘဲ ကမ္ဘာတစ်ဝန်းရှိ ကုမ္ပဏီများနှင့် အစိုးရများသည်  LGBTQ+ အသိုင်းအဝိုင်းအတွက် လက်ထပ်မှုဆိုင်ရာ အစီအစဥ်များကို ဖော်ဆောင်ပေးနိုင်ခြင်းမရှိပါက ဒေါ်လာဘီလျံချီ နစ်နာလိမ့်မည်ဖြစ်သည်။

၂၀၁၈ ခုနှစ်က ထိုင်း၏ စီးပွားရေးနှင့် LGBTQ များ၏ အခွင့်အရေးများအကြား ဆက်နွှယ်မှုကို လေ့လာသည့် ထုတ်ပြန်ချက်တစ်ခုတွင် လိင်တူစုံမက်မှုနှင့် ၎င်းတို့၏ မိသားစုများကို အသိအမှတ်ပြုသည့် လက်ထပ်ထိမ်းမြား ခြင်းဆိုင်ရာ ဥပဒေများ၊ လိင်တူလက်ထပ်ခွင့်ပြုသည့် ဥပဒေများကိုပြဋ္ဌာန်းရန် ကမ္ဘာ့ဘဏ်က အကြံပြုခဲ့သည်။

ကမ္ဘာ့ဘဏ်သည် အမေရိကန်အခြေစိုက် သုတေသနအဖွဲ့ဖြစ်သည့် Williams Institute နှင့် လေ့လာမှုများ ပြုလုပ်ခဲ့ရာတွင်  LGBTQ များကို ဖယ်ကြဥ်ထားမှုသည် ကမ္ဘာတစ်ဝန်းရှိ စီးပွားရေးအပေါ် မည်ကဲ့သို့ သက်ရောက်မှု ရှိခဲ့သည်ဆိုသည့်အချက်ကို လေ့လာခဲ့ကြသည်

လွန်ခဲ့သည့် ၁၀ နှစ်အတွင်း အိန္ဒိယတွင် လိင်တူစုံမက်သူများကို ဖယ်ကြဥ်မှုကြောင့် စီးပွားရေးအရ ဆုံးရှုံးနစ်နာမှု သည် နိုင်ငံ့ ဂျီဒီပီ၏ ၁ ဒသမ ၇ ရာခိုင်နှုန်း၊ ငွေကြေးအားဖြင့် ဒေါ်လာ ၇ ဒသမ ၇ ဘီလျံရှိခဲ့ကြောင်း အမေရိကန် စီးပွားရေး ပညာရှင်တစ်ဦးဖြစ်သည့် လီဘက်ဂတ် (Lee Badgett) က လေ့လာတွေ့ရှိခဲ့သည်။

ထိုပမာဏမှာ လွန်ခဲ့သည့် ၁၀ နှစ်က ဒေါ်လာစျေးဖြစ်ပြီး လက်ရှိ ဒေါ်လာစျေးနှင့်ဆိုလျှင် နစ်နာမှုမှာ ပိုမိုများပြား နိုင်ခြေရှိသည်။

ထိုင်း၏ အမျိုးသား ခရီးသွားလုပ်ငန်း အာဏာပိုင်အဖွဲ့ကလည်း ထိုင်းနိုင်ငံကို အာရှတွင်  LGBTQ များ လက်ခံ ကြိုဆိုမှုအရှိဆုံး နိုင်ငံဖြစ်စေရန်အတွက်  "Go Thai, Be Free" လှုပ်ရှားမှုကို လက်ခံကြောင်း အရိပ်လက္ခဏာ ပြသခဲ့ပြီး ဖြစ်သည်။ 

LGBTQ+ ခရီးသွားများသည် ကမ္ဘာလုံးဆိုင်ရာ ခရီးသွားများ၏ ၁၀ ရာခိုင်နှုန်းရှိသဖြင့် ၂၀၃၂ ခုနှစ်တွင် LGBTQ+ ခရီးသွားစျေးကွက်သည် ဒေါ်လာ ၆၂၀ ဘီလျံအထိ မြင့်တက်လာနိုင်ခြေရှိကာ ထိုင်းနိုင်ငံသည် အရှေ့တောင် အာရှတွင် လိင်တူလက်ထပ်ခွင့်ကို တရားဝင် အတည်ပြုပေးခြင်းအားဖြင့်   LGBTQ+ ခရီးသွားကဏ္ဍကို ပိုမို ခိုင်မာစေမည့် အခွင့်အလမ်းကို ရရှိထားပြီဖြစ်သည်။

အရေးကြီးသည့် ထိုအခွင့်အလမ်းနှင့် ပတ်သက်ပြီး လွှတ်တော်အမတ်များက စဥ်းစားနေကာ ထိုအခွင့်အလမ်းကို ရာနှင့်ချီသည့် စီးပွားရေးလုပ်ငန်းများမှ စီအီးအိုများ၊ ကမ္ဘာလုံးဆိုင်ရာ ကော်ပိုရေးရှင်းများက အာရုံစိုက်နေသည်ကို လွှတ်တော်အမတ်များက သိထားသင့်သည်။

ထိုင်းနိုင်ငံအနေဖြင့် ထိုအခွင့်အလမ်းကို အကောင်အထည်ဖော်မည် ဆိုပါက သာတူညီမျှ လက်ထပ်ခွင့်မှတစ်ဆင့် ဒေါ်လာ ထရီလျံကျော် ဝင်ငွေများကို မျှော်လင့်နိုင်ပြီး နိုင်ငံတကာ ကုမ္ပဏီများကလည်း ထိုင်းနိုင်ငံအတွင်း သက်ဆိုင်ရာ နယ်ပယ်အသီးသီးတွင် ကျွမ်းကျင်ပညာရှင်များနှင့် ပါရမီရှင်များကို လွယ်ကူလျင်မြန်စွာ

စုဆောင်းနိုင်မည်ဖြစ်သည်။ ထိုအခြေအနေမျိုးကို မလိုချင်သူ မရှိဟု ကောက်ချက်ချ ရမည်ဆိုပါက မှားမည် မထင်ပေ။

Source: ဘန်ကောက်ပို့စ်

CNI Sport Article 

 ၂၀၂၄ ခုနှစ်၊ ဧပြီ ၁၂

ဒီရာသီ ချန်ပီယံလိဂ်ပြိုင်ပွဲရဲ့ ကွာတားဖိုင်နယ် ပထမအကျော့ ပွဲစဉ်တွေကို ပြီးခဲ့တဲ့ ကြားရက်ထဲမှာ ယှဉ်ပြိုင်ခဲ့ ပြီးပြီ ဖြစ်ပါတယ်။ 

ကမ္ဘာပေါ်မှာရှိတဲ့ ဘောလုံးပရိသတ်တိုင်း စိတ်ဝင်စားမှု အရှိဆုံး ပြိုင်ပွဲဖြစ်တဲ့ ချန်ပီယံလိဂ်ပြိုင်ပွဲရဲ့ ကွာတား ဖိုင်နယ် ပထမအကျော့ ပွဲစဉ်တွေဟာ ဘယ်လောက်ထိ ပြိုင်ဆိုင်မှု ပြင်းထန်ခဲ့လဲဆိုတာ ရလဒ်တွေကို ကြည့်ရင် သိနိုင်တာပါ။

ဒီပွဲတွေကို ကြည့်တဲ့သူတိုင်း အိပ်ငိုက်လို့တောင် မရတဲ့အထိ အပြန်အလှန် သွင်းဂိုးတွေကို မြင်ခဲ့ရပြီး ကွာတားဖိုင် နယ် ပထမအကျော့ပွဲစဉ် ၄ ပွဲမှာ သွင်းယူခဲ့တဲ့သွင်းဂိုးက ၁၈ ဂိုးအထိရှိခဲ့တာ ဖြစ်ပါတယ်။

ဒီပွဲစဉ်တွေမှာ အနိုင်အရှုံးရလဒ်က ၂ ပွဲထွက်ပေါ်ခဲ့ပြီး သရေရလဒ်က ၂ ပွဲထွက်ပေါ်ခဲ့တာပါ။ သရေရလဒ်တွေက အာဆင်နယ်နဲ့ ဘိုင်ယန်မြူးနစ် အသင်းပွဲစဉ်မှာ ၂ ဂိုးစီသရေနဲ့ ရီးရယ်လ်နဲ့မန်စီးတီးအသင်းတို့ပွဲမှာ ၃ ဂိုးစီ သရေကျခဲ့တာ ဖြစ်ပါတယ်။ 

ကျန် ၂ ပွဲမှာ ဘာစီလိုနာအသင်းက ပီအက်စ်ဂျီအသင်းကို ၃ ဂိုး- ၂ ဂိုးနဲ့ အနိုင်ရခဲ့ပြီး အသလက်တီကိုအသင်းက ဒေါ့မွန်အသင်းကို ၂ ဂိုး-၁ ဂိုးနဲ့ အနိုင်ရရှိခဲ့တာပါ။ ဒီ ၄ ပွဲစလုံးဟာ ရလဒ်တွေပြတ်သားခဲ့ခြင်းမရှိတာ ဖြစ်ပါတယ်။

အဲဒါကြောင့် ဆီမီးဖိုင်နယ်တက်ဖို့ အသင်း ၈ သင်းစလုံးမှာ မျှော်လင့်ချက် ရှိနေတဲ့အတွက် ဒုတိယအကျော့ ပွဲစဉ် တွေဟာ ပြိုင်ဆိုင်မှုပြင်းထန်ပြီး အကြိတ်အနယ်ရှိမယ်ဆိုတာ သေချာနေတာပါ။ 

ဘာစီလိုနာနဲ့ ပီအက်ဂျီအသင်း ယှဉ်ပြိုင်နေစဉ်

ပြီးတော့ အဝေးဂိုး စည်းမျဉ်းမရှိတော့တာကြောင့်လည်း အဝေးဂိုး ရထားတယ်ဆိုတဲ့ အားသာချက် မရှိတော့လို့ အသင်းတိုင်းအတွက် အခွင့်အရေးရှိနေတာ ဖြစ်ပါတယ်။ 

ဘိုင်ယန်မြူးနစ်နဲ့ အာဆင်နယ်အသင်းတို့ရဲ့ ဒုတိယအကျော့ပွဲစဉ်မှာတော့ နောက်တစ်ဆင့်တက်ဖို့ အားသာနေတဲ့ အသင်းကတော့ ဘိုင်ယန်မြူးနစ်အသင်းလို့ ပြောရမှာပါ။

ဘိုင်ယန်မြူးနစ်အသင်းဟာ ဒီရာသီ ပြည်တွင်းပြိုင်ပွဲတွေမှာ ရလဒ်တွေဆိုးရွားပြီး ဆုဖလား လက်လွှတ်ခဲ့ရလို့ ချန်ပီယံလိဂ်ပြိုင်ပွဲမှာ အောင်မြင်မှု ရယူနိုင်ဖို့ အပြည့်အဝ အာရုံစိုက်နေတာ ဖြစ်ပါတယ်။

ပြီးတော့ ဘိုင်ယန်မြူးနစ်အသင်းဟာ အိမ်ကွင်းမှာကစားခဲ့တဲ့ ချန်ပီယံလိဂ် ပွဲစဉ်တွေမှာ ရလဒ်ကောင်းတွေရရှိခဲ့ပြီး အာဆင်နယ်အသင်းနဲ့ ထိပ်တိုက် တွေ့ဆုံခဲတဲ့ ရလဒ်တွေကလည်း ကောင်းခဲ့တာကြောင့် ချန်ပီယံလိဂ် ဆီမီးဖိုင်နယ်တက်ဖို့ ရေပန်းစားနေတာပါ။

နောက်တစ်ပွဲဖြစ်တဲ့ လက်ရှိချန်ပီယံ မန်စီးတီးနဲ့ ချန်ပီယံလိဂ်ပြိုင်ပွဲရဲ့ အအောင်မြင်ဆုံး ရီးရယ်လ်အသင်း တို့ပွဲကတော့ အမှားအယွင်း အများဆုံးလုပ်တဲ့ အသင်းက ပြိုင်ပွဲကနေ ထွက်ခွာရမှာ ဖြစ်ပါတယ်။

ချန်ပီယံလိဂ်ဖလားကိုတွေ့ရစဉ်

ရီးရယ်လ်အသင်းဟာ ဘာနေဗျူးမှာ မန်စီးတီးအသင်းကို အနိုင်မရရှိခဲ့တာက သူတို့အတွက် စိတ်ပျက်စရာ ဖြစ်ခဲ့ရပြီး မနှစ်ကရာသီ ချန်ပီယံလိဂ် ဆီမီးဖိုင်နယ်အဆင့်မှာ တွေ့ဆုံခဲ့တုန်းက မန်စီးတီးအသင်းက အိမ်ကွင်းမှာ ရီးရယ်လ်အသင်းကို ဂိုးပြတ်အနိုင်ယူခဲ့တာပါ။ 

အဲဒါကြောင့် ဒီပွဲမှာ မန်စီးတီးအသင်းက ဆီမီးဖိုင်နယ်တက်ဖို့ အားသာနေတာ ဖြစ်ပါတယ်။

နောက်တစ်ပွဲကတော့ အပြန်အလှန် သွင်းဂိုးတွေနဲ့ ကြည့်ကောင်းခဲ့ပြီး အရှုံးအနိုင် အဖြေထွက်ခဲ့တဲ့ ဘာစီလိုနာနဲ့ ပီအက်စ်ဂျီအသင်းတို့ရဲ့ပွဲပါ။ 

ပထမအကျော့အဖြစ် ကစားခဲ့တုန်းက အဝေးကွင်းပွဲစဉ်မှာ ဘာစီလိုနာအသင်း အနိုင်ရခဲ့တာကြောင့် ဒုတိယ အကျော့ အိမ်ကွင်းကစားရမယ့်ပွဲမှာ ဘာစီလိုနာအသင်းက အသာစီးနဲ့ ကစားလို့ရမှာ ဖြစ်ပါတယ်။ 

ချန်ပီယံလိဂ် ဆီမီးဖိုင်နယ် တက်နိုင်ခွင့်ရှိနေသာ အသင်းများကိုတွေ့ရစဉ်

ဒါပေမယ့် ပထမအကျော့က ခြေစွမ်းမပြနိုင်တဲ့ ဘတ်ပီသာ ပီအက်စ်ဂျီအတွက် ခြေစွမ်းပြနိုင်ရင် ပွဲက အလှည့်အပြောင်း ပြန်ဖြစ်သွားနိုင်ပြီး ပီအက်စ်ဂျီအသင်းအတွက် ဆီမီးဖိုင်နယ်တက်ဖို့ မျှော်လင့်ချက်ရှိလာ နိုင်တာပါ။

နောက်ဆုံးပွဲကတော့ ဒေါ့မွန်နဲ့ အသလက်တီကို အသင်းတို့ရဲ့ ပွဲဖြစ်ပါတယ်။ ဒီပွဲရဲ့ ပထမအကျော့မှာ အသလက်တီကိုအသင်း အနိုင်ရထားပေမယ့် ဒေါ့မွန်အသင်းဟာ အိမ်ကွင်းမှာ ရလဒ်ကောင်းတဲ့ အသင်းဖြစ်လို့ အသလက်တီကိုအသင်းအတွက် လွယ်ကူမှာ မဟုတ်ပါဘူး။

ဒါပေမယ့် ခံစစ်ပိုင်းကျစ်လစ်တဲ့ အသလက်တီကိုအသင်းဟာ ဒေါ့မွန်အသင်းကို တန်ပြန်တိုက်စစ်နဲ့ ကစားပြီး ဆီမီးဖိုင်နယ်ကို တက်သွားနိုင်ပါတယ်။

လက်ရှိအချိန်မှာ အသင်းတိုင်းဟာ ကွာတားဖိုင်နယ် ဒုတိယအကျော့အတွက် အကောင်းဆုံး ပြင်ဆင်နေကြလို့ ချန်ပီယံလိဂ် ဆီမီးဖိုင်နယ်ကို ဘယ်အသင်း ၄ သင်း တက်နိုင်မလဲဆိုတာကို ဧပြီ ၁၇ နဲ့ ၁၈ ရက်တွေမှာ သိရှိ ရတော့မှာလည်း ဖြစ်ပါတယ်။

CNI Article

၂၀၂၄ ခုနှစ်၊ ဧပြီ ၆

ဗီယက်နမ်နိုင်ငံ၊ ဟနွိုင်း (Hanoi) မြို့တော် ခန်းမအတွင်းရှိ တိတ်ဆိတ်သည့် ပုဂ္ဂလိကနေရာတစ်ခုတွင် လူပေါင်း ၂၀ ကျော် ပါဝင်သည့် အဖွဲ့တစ်ဖွဲ့သည် သြဇာတိက္ကမကြီးမားပြီး ဗီယက်နမ်ဘာသာစကားကို ကျွမ်းကျင်ပိုင်နိုင်စွာ ပြောတတ်သော အသက် ၃၀ အရွယ် ပါလက်စတိုင်း အမျိုးသားတစ်ဦးဖြစ်သူ ဆာလမ် ဟမ်မက် (Saleem Hammad) ၏ စကားများကို အာရုံစိုက် နားထောက်လျက်ရှိသည်။

ဗီယက်နမ်တွင် စီးပွားရေးလုပ်ငန်းတစ်ခု ပိုင်ဆိုင်ထားသည့် ဟမ်မက်က အစ္စရေးတို့ သိမ်းပိုက်ထားသည့် ဂျော်ဒန်မြစ် အနောက်ဘက်ကမ်းဒေသရှိ ဂျီနင် (Jenin) မြို့၌ သူကလေးဘဝက ကြုံတွေ့ခဲ့ရသော ဖြစ်စဉ် တစ်ခုကို ပြန်လည် ပြောပြနေခြင်းဖြစ်သည်။

သူကလေးဘဝက ညတစ်ညတွင် အစ္စရေးစစ်သားများက သူတို့ မိသားစု၏ နေအိမ်ကို ဝိုင်းပြီး ဝင်ရောက် စီးနင်းခဲ့သည့် အကြောင်းကို ပြောကြားနေချိန်၌ နားထောင်သူများသည် စိတ်ဝင်တစားဖြင့် အံ့သြနေကြသည်။

ထိုဆွေးနွေးပွဲ စကားဝိုင်း၏ အစောပိုင်းတွင် ဟမ်မက်က အမေရိကန်ကို ဆန့်ကျင်တိုက်ခိုက်ပြီး လွတ်လပ်ရေး အတွက် တိုက်ပွဲဝင်ခဲ့သည့် ဗီယက်နမ်နိုင်ငံ၏ သမိုင်းကြောင်းသည် အစ္စရေး၏ သိမ်းပိုက်မှုကို ဆန့်ကျင်ရန် ရုန်းကန်နေရသော ပါလက်စတိုင်းများအတွက် စိတ်အားတက်ကြွစရာ ဖြစ်စဉ်တစ်ခုဖြစ်သည်ဟု ပြောကြားခဲ့ သည်။

ပါလက်စတိုင်းထောက်ခံ စုရုံးပွဲကိုတွေ့ရစဉ်

"ဗီယက်နမ်ပြည်သူတွေရဲ့ နာကျင်ခံစားရမှုတွေနဲ့ ဂုဏ်သိက္ခာကြီးမားတဲ့ သမိုင်းအစဉ်အလာဟာ တရားမျှတရေး အတွက် ရုန်းကန်နေရတဲ့ ပါလက်စတိုင်းတွေအတွက် စိတ်ခွန်အားတစ်ခု ဖြစ်ခဲ့ပါတယ်။ ကျနော်တို့က သင်တို့ကို အမြဲတမ်း စံပြအဖြစ် သတ်မှတ်ထားပါတယ်” ဟု ဟမ်မက်က ပြောကြားခဲ့သည်။

ဂါဇာတွင် အစ္စရေး၏ ထိတ်လန့်ကြောက်မက်ဖွယ် စစ်ပွဲကြောင့် သေဆုံးသူ အရေအတွက် တစ်နေ့ထက်တစ်နေ့ ပိုမိုမြင့်တက်နေပြီး ဗီယက်နမ်လူငယ်များကမူ ပါလက်စတိုင်းများကို ထောက်ခံသည့် ၎င်းတို့၏ အသံများကို ပိုမိုမြှင့်တင်ခဲ့ကြသည်။

တစ်ချိန်တည်းမှာပင် ဗီယက်နမ်နှင့် ပါလက်စတိုင်းအကြား အမျိုးသား လွတ်မြောက်ရေးအတွက် တိုက်ပွဲဝင် နေရသည့် သမိုင်းဝင် ဆက်ဆံရေးများကို ဗီယက်နမ်လူငယ်များက ရှာဖွေတွေ့ရှိခဲ့သည်။

သို့သော် မကြာသေးမီက ဗီယက်နမ် မျိုးဆက်သစ် လူငယ်များအတွက် အစ္စရေးက စီးပွားရေး ဖွံ့ဖြိုးတိုးတက်မှုကို မြှင့်တင်ပေးမှုကြောင့် ဗီယက်နမ်နှင့် ပါလက်စတိုင်းအကြား ဆယ်စုနှစ်များစွာကြာမြင့်ခဲ့သည့် ဆက်ဆံရေးအပေါ် အရိပ်မည်း ကျရောက်ခဲ့သည်။

ဗီယက်နမ်၏ လျင်မြန်စွာ တိုးတက်လာသည့် လွတ်လပ်သော ဈေးကွက် စီးပွားရေးတွင် အောင်မြင်မှုများ ရရှိနေခြင်းကြောင့် ဗီယက်နမ် လူငယ်အများစုသည် အစ္စရေး၏ startup စီးပွားရေး လုပ်ငန်းယဉ်ကျေးမှုကို စိတ်ပါဝင်စားလာခဲ့သည်။

ထိုလူငယ် အများစုသည် အစ္စရေး၏ အောင်မြင်မှု အခြားတစ်ဖက်တွင် ပါလက်စတိုင်း နယ်မြေများကို ကာလကြာရှည် သိမ်းယူထားသည့် အမှောင်ခြမ်းကို မသိကြပေ။

 အမေရိကန်သမ္မတ ဘိုင်ဒန်နဲ့ ဗီယက်နမ်သမ္မတကို တွေ့ရစဉ်

Trinh နှင့် Vuong အမည်ရှိ ပါလက်စတိုင်း တက်ကြွလှုပ်ရှားသူနှစ်ဦးက ပြီးခဲ့သည့်နှစ်တွင် ပြုလုပ်ခဲ့သည့် စုရုံးတွေ့ဆုံမှု၌ ဟမ်မက်လည်း ပါဝင်ခဲ့ပြီး အမှာစကား ပြောကြားခဲ့သည်။ 

Trinh နှင့် Vuong တို့သည် ပြီးခဲ့သည့်နှစ် အောက်တိုဘာလက ဂါဇာတွင် စစ်ပွဲ စတင်ခဲ့ပြီးနောက် ပါလက်စတိုင်း တို့၏ ဆင်းရဲဒုက္ခများကို သိရှိနားလည်လာခဲ့သည့် ဗီယက်နမ်လူငယ်များအကြား လျင်မြန်စွာ ကြီးထွားလာသော အခြေခံ တက်ကြွလှုပ်ရှားမှုတွင် ပါဝင်သူများဖြစ်သည်။ 

သို့သော် အများပြည်သူပိုင် နေရာများတွင် လူစုဝေးခြင်းနှင့် နိုင်ငံရေး လှုပ်ရှားမှုများကို တင်းကျပ်စွာ တားမြစ်ထား သည့် ဗီယက်နမ်၏ မူဝါဒများကြောင့် ပါလက်စတိုင်းလိုလားသည့် တက်ကြွလှုပ်ရှားသူများသည် ပေါ်ပေါ်ထင်ထင် မနေကြဘဲ ဗီယက်နမ်အာဏာပိုင်များ အာရုံမစိုက်နိုင်စေရန် ဆွေးနွေးပွဲ စကားဝိုင်းများကဲ့သို့ စုရုံးတွေ့ဆုံပွဲများကို ပြုလုပ်ခဲ့ကြသည်။

ဟိုချီမင်းစီးတီး (Ho Chi Minh City) မြို့တွင် Trinh နှင့် သူငယ်ချင်းအချို့သည် ပါလက်စတိုင်းများနှင့်ပတ်သက်ပြီး ဆွေးနွေးမှုများ ပါလက်စတိုင်း အငွေ့အသက် ပါဝင်သည့် ရုပ်ပုံရေးဆွဲမှုများကို ပြုလုပ်ခဲ့သည်။ 

ဒီဇိုင်းနာတစ်ဦး၏ သင်ကြားပေးမှုဖြင် Trinh သည် အခြားမိတ်ဆွေများနှင့်အတူ ပါလက်စတိုင်း လိုလားသည့် ကုန်စည်များကို ဒီဇိုင်းရေးဆွဲခြင်း၊ နိုင်ငံရေးအနုပညာနှင့် အပျော်တမ်း မဂ္ဂဇင်းများတွင် ပုံများ ပါဝင်ရေးဆွဲခဲ့သည်။

နိုဝင်ဘာလကလည်း ပါလက်စတိုင်း မှတ်တမ်းရုပ်ရှင်များ၊ Nakba လူမျိုးသုဉ်း သတ်ဖြတ်မှု၊ ပါလက်စတိုင်း နယ်မြေများကို အစ္စရေးက သိမ်းပိုက်သည့် သမိုင်းကြောင်းကို ဖော်ပြသည့် "လွတ်မြောက်ရေးအတွက် ရုပ်ရှင်များ- ထာဝရ ပါလက်စတိုင်း" ( Films for Liberation: Palestine Forever ) ဟူသည့် ခေါင်းစဉ်အောက်တွင် ပြသခဲ့ ကြသည်။

ပါလက်စတိုင်း ထောက်ခံမှုကို ပြသနေကြစဉ်

လူမှုမီဒီယာတွင်လည်း ဗီယက်နမ်ဘာသာဖြင့် တည်ထောင်ထားသည့် fan page များတွင် ပါလက်စတိုင်း ကဗျာ များကို ဘာသာပြန်ခြင်း၊ ပါလက်စတိုင်း လိုလားသော အနုပညာလက်ရာများကို ဖော်ပြခြင်းနှင့် ဗီယက်နမ်ရှိ ပါလက်စတိုင်သံရုံးသည် အမေရိကန်ကို ဆန့်ကျင်တိုက်ခိုက်ခဲ့သည့် ဗီယက်နမ်စစ်ပြန်များ၊ ပညာရှင်များ၊ တက်ကြွလှုပ်ရှားသူများနှင့် ဂါဇာတွင် သေဆုံးခဲ့သူများအတွက် ဝမ်းနည်းအောင့်မေ့ကြောင်း ဖော်ပြခဲ့သူများကို ဖိတ်ကြားခဲ့သည့် သမိုင်းကြောင်းများကို လေ့လာလျက်ရှိသည်။

ဂါဇာတွင် အစ္စရေး၏ တိုက်ခိုက်ဖျက်ဆီးမှုများသည် ၁၉၇၂ ခုနှစ်က ဟနွိုင်းမြို့တော်၏ အိမ်နီးချင်း ခမ်သီယန် (Kham Thien) မြို့ကို အမေရိကန်ဗုံးကြဲ တိုက်ခိုက်ခဲ့သည့် ဖြစ်စဉ်ကို အမှတ်ရစေခဲ့သည်။ 

လက်ရှိ အစ္စရေး၏ တိုက်ခိုက်မှုကို ခံနေရသည့် ဂါဇာသည် လွန်ခဲ့သည့် နှစ်ပေါင်း ၅၀ ကျော်က ခမ်သီယန်မြို့ ဗုံးကြဲ တိုက်ခိုက်မှုနှင့် အလားသဏ္ဍန် တူညီနေသည်ဟု ကျွမ်းကျင်သူများက ပြောကြားခဲ့သည်။ 

၁၉၇၂ ခုနှစ်က အမေရိကန်သမ္မတ ရစ်ချက် နစ်ဆင် (Richard Nixon) သည် ခရစ္စမတ်ကာလတွင် မြောက်ဗီယက်နမ်၏ မြို့တော် ခမ်သီယန်ကို ဗုံးကြဲတိုက်ခိုက်ရန် အမိန့်ပေးခဲ့ပြီး ဒီဇင်ဘာ ၁၈ ရက်မှ စတင်ပြီး ၁၂ ရက်ကြာ ဗုံးကြဲတိုက်ခိုက်သည့် စစ်ဆင်ရေးတွင် ဗုံးပေါင်း တန်ချိန် ၂၀,၀၀၀ ခန့်ကို ကြဲချတိုက်ခိုက်ခဲ့သည်။

"သမိုင်းက တစ်ပတ် ပြန်လည်လာပါပြီ။ ဂါဇာမှာ ဖြစ်ပျက်နေတာကို ကြည့်မယ်ဆိုရင် ကျနော့် အဖေကပြောပြခဲ့ တဲ့ ခမ်သီယန်မြို့ ဗုံးကြဲခံရတဲ့ ဖြစ်စဉ်တွေနဲ့ တူညီနေသလို ခံစားရပါတယ်"ဟု ပါလက်စတိုင်း ထောက်ခံသည့် အသက် ၂၀ အရွယ် ဗီယက်နမ် ကျောင်းသားတစ်ဦးဖြစ်သူ Hung က ပြောကြားခဲ့သည်။

Source: Al Jazeera

CNI Sport Article 

၂၀၂၄ ခုနှစ်၊ ဧပြီ ၅

အင်တာမိုင်ယာမီအသင်း ခေါင်းဆောင် မက်ဆီဟာ ဒဏ်ရာတွေကြောင့် ၂၀၂၄ ခုနှစ် အစပိုင်းမှာတင် ပွဲစဉ်အချို့ကို လွဲချော်ထားတာ ဖြစ်ပါတယ်။ 

အသက် ၃၇ နှစ်ပြည့်ဖို့ နီးစပ်နေပြီဖြစ်သလို ကစားသမားဘဝ အဆုံးသတ်ဖို့လည်း တဖြေးဖြေး နီးလာပြီ ဖြစ်တဲ့ မက်ဆီဟာ ကစားသမားဘဝ အစပိုင်းကတည်းက ပြိုင်ဘက် ကစားသမားတွေရဲ့ ကြမ်းတမ်းစွာ ဖျက်ထုတ်မှု ခံရတဲ့ဒဏ်ကို အခုအချိန်မှာ ခံစားနေရပြီ ဖြစ်တာပါ။ 

မက်ဆီဟာ ကြွက်သားဒဏ်ရာကြောင့် အင်တာမိုင်ယာမီအသင်း နောက်ဆုံးကစားခဲ့တဲ့ ပွဲစဉ် ၄ ပွဲစလုံး မပါဝင်နိုင်ခဲ့တာ ဖြစ်ပါတယ်။

Transfermarkt ရဲ့ အချက်အလက်တွေအရ မက်ဆီဟာ ဒဏ်ရာတွေကြောင့် ၂၀၂၃-၂၄ ရာသီမှာ ပွဲစဉ် ပေါင်း ၁၃ ပွဲအထိ လွဲချော်ထားတယ်လို့ ဖော်ပြထားတာပါ။ 

 မက်ဆီ ဒဏ်ရာရသွားစဉ်

မက်ဆီဟာ ပုံမှန်ဆိုရင် ဒဏ်ရာရ နေချိန်မှာတောင် အာဂျင်တီးနားအသင်း လူစာရင်းနဲ့ ပူးပေါင်းခဲ့ပေမယ့် ပြီးခဲ့တဲ့မတ်လက ကစားခဲ့တဲ့ နိုင်ငံတကာ ခြေစမ်းပွဲတွေမှာ မပါဝင်နိုင်ခဲ့တာပါ။ 

အင်တာမိုင်ယာမီအသင်းကတော့ မက်ဆီရဲ့ဒဏ်ရာကို နေ့တိုင်း အကဲဖြတ် စစ်ဆေးမှုတွေပြုလုပ်ပြီး စွန့်စွန့်စားစား အသုံးပြုဖို့ မရှိဘူးလို့ ပြောထားခဲ့တာ ဖြစ်ပါတယ်။ 

မက်ဆီဟာ ဒဏ်ရာတွေကြောင့် ပွဲအရေအတွက် အများအပြား လွဲချော်ခဲ့တာက ၂၀၀၆-၀၇ ရာသီက ဖြစ်ပြီး စုစုပေါင်း ပွဲစဉ် ၁၉ ပွဲအထိ လွဲချော်ခဲ့တာပါ။ 

ဒါက တစ်ရာသီလုံးမှာ လွဲချော်ခဲ့တာဖြစ်ပြီး အခုက ၂၀၂၃ နဲ့ ၂၀၂၄ ခုနှစ် အစပိုင်းမှာတင် ၁၃ ပွဲ လွဲချော်ခဲ့ တာကြောင့် စံချိန်တင်နိုင်မယ့် အခြေအနေမှာရှိနေတာ ဖြစ်ပါတယ်။ 

အင်တာမိုင်ယာမီအသင်းဟာ မက်ဆီရဲ့ဒဏ်ရာ အခြေအနေ ထပ်ဆိုးမှာကို စိုးရိမ်နေတာကြောင့် အသုံးပြု ဖို့ စဉ်းစားနေရသလို မက်ဆီ ကိုယ်တိုင်ကလည်း သူ့ရဲ့ကစားသမားဘဝကို စောစီးစွာ အဆုံးသတ်သွား မှာကို စိုးရိမ်မှုတွေရှိနေတာပါ။

မက်ဆီနဲ့ ဘာစီလိုနာအသင်းဖော်ဟောင်းကိုတွေ့ရစဉ်

မက်ဆီဒဏ်ရာကြောင့် ပွဲတွေမကစားရတာဟာ အင်တာမိုင်ယာမီ အသင်းအပေါ် သက်ရောက်မှုတွေ အများကြီး ရှိနေတာဖြစ်ပါတယ်။ 

အင်တာမိုင်ယာမီအသင်းဟာ မက်ဆီရဲ့ ဘာစီလိုနာ အသင်းဖော်ဟောင်းတွေဖြစ်တဲ့ ဆွာရက်ဇ်၊ ဘတ်စကွက်စ်နဲ့ အယ်လ်ဘာတို့ကို ခေါ်ယူထားပေမယ့် ပရိသတ်တွေက မက်ဆီကစားတာကို ကြည့်ဖို့အတွက် လက်မှတ်တွေဝယ်ပြီး ကွင်းလုံးပြည့် အားပေးခဲ့ကြတာပါ။ 

၂၀၂၄ မေဂျာလိဂ် ရာသီသစ် မစတင်ခင် ဟောင်ကောင်မှာ ကစားခဲ့တဲ့ ရာသီကြို ခြေစမ်းပွဲမှာဆိုရင် အင်တာမိုင်ယာမီအသင်းဟာ မက်ဆီကို အသုံးပြုခဲ့ခြင်းမရှိလို့ ပရိသတ်တွေက သူတို့ရဲ့ လက်မှတ် ခတွေကို ပြန်ပေးဖို့ တောင်းဆိုခဲ့ကြတာကို အားလုံးသိရှိပြီး ဖြစ်ပါတယ်။

မက်ဆီဟာ ပြီးခဲ့တဲ့ရာသီကလည်း အင်တာမိုင်ယာမီအသင်းရဲ့ ပွဲစဉ်အချို့ကို လွဲချော်ခဲ့တာကြောင့် သူပါဝင်တဲ့ ပွဲကိုကြည့်ဖို့ လက်မှတ်ခတွေ အများကြီးပေးပြီး ဝယ်ခဲ့ကြတဲ့ ပရိသတ်တွေဟာ အလွန် စိတ်ပျက်ခဲ့ကြတာ ဖြစ်ပါတယ်။ 

ဒီရာသီအစပိုင်းမှာ မက်ဆီ ဒဏ်ရာကြောင့် ပွဲတွေကို လွဲချော်နေတာက ပရိသတ်တွေအတွက် မသိသာပေမယ့် ကြာလာရင်တော့ သိသာလာတော့မှာပါ။ ပြီးတော့ မက်ဆီ မပါဝင်နိုင်တဲ့ပွဲတွေမှာ အင်တာမိုင်ယာမီအသင်းရဲ့ရလဒ်တွေက ကောင်းမွန်မှုမရှိတာဖြစ်ပါတယ်။ 

အင်တာမိုင်ယာမီအသင်းဟာ ပြီးခဲ့တဲ့ရာသီက မက်ဆီရဲ့ ဦးဆောင်မှုနဲ့အတူ လိဂ်ဖလားကို ရယူနိုင်ခဲ့ပေ မယ့် ရာသီနောက်ဆုံးပွဲစဉ်တွေမှာ မက်ဆီ မပါဝင်နိုင်တာကြောင့် ရလဒ်တွေက ဆိုးပြီး မေဂျာလိဂ် ပလေးအော့ဖ် ဝင်ခွင့် ဆုံးရှုံးခဲ့တာပါ။ 

မက်ဆီကို တွေ့ရစဉ်

အနီးစပ်ဆုံး ပြောရမယ်ဆိုရင် ဒီရာသီ မက်ဆီ မပါဝင်ခဲ့တဲ့ နောက်ဆုံး ၄ ပွဲမှာ အင်တာမိုင်ယာမီအသင်း ဟာ ၁ ပွဲသာနိုင်ပြီး ၂ ပွဲရှုံး ၁ ပွဲသရေ ရလဒ်ထွက်ပေါ်ခဲ့တာ ဖြစ်ပါတယ်။ 

ကွန်ကာကပ်ဖ် ချန်ပီယံဖလား ကွာတားဖိုင်နယ် ပထမအကျော့ အိမ်ကွင်းပွဲစဉ်မှာ မွန်တာရေးအသင်းကို အရေးနိမ့်ခဲ့တာက ဒီရာသီမှာ ဆုဖလား အများအပြားရယူဖို့ ရည်မှန်းထားတဲ့ အင်တာမိုင်ယာမီအသင်းရဲ့ မျှော်လင့်ချက်ကို ထိခိုက်စေခဲ့တာပါ။

ဒါပေမယ့် ဒုတိယအကျော့ ပွဲစဉ်ကစားဖို့ ကျန်ရှိနေသေးတာကြောင့် မက်ဆီသာ ပြန်ပါနိုင်ရင် အင်တာမိုင်ယာမီ အသင်းဟာ ရှုံးခဲ့တဲ့ရလဒ်ကို ပြန်ပြောင်းအောင်လုပ်နိုင်ဖို့ မျှော်လင့်လို့ရတာ ဖြစ်ပါတယ်။

ဒါကြောင့် အင်တာမိုင်ယာမီအသင်းဟာ မက်ဆီ ကြံ့ခိုင်မှု အပြည့်အဝ ပြန်ရအောင် စိတ်ရှည်ရှည်ထား စောင့်ဆိုင်းနေပြီး မွန်တာရေးအသင်းနဲ့ ဒုတိယအကျော့ ပွဲစဉ်မှာ ပါဝင်ပေးနိုင်ဖို့ အလိုရှိနေတာပါ။ 

မက်ဆီ ကိုယ်တိုင်ကလည်း သူမပါဝင်နိုင်တဲ့ ပွဲတွေမှာ အင်တာမိုင်ယာမီအသင်း ရလဒ်ဆိုးတာကို ကွင်းထဲမှာ ထိုင်ကြည့်နေရတာကနေ အမြန်ဆုံးကွင်းထဲပြန်ဝင်ပြီး အသင်းကို ရလဒ်ကောင်းတွေ ပြန်ရရှိအောင် လုပ်ပေးဖို့ စိတ်အားထက်သန်နေတာပဲ ဖြစ်ပါတယ်။

CNI Sport Article

၂၀၂၄ ခုနှစ်၊ မတ်လ ၂၉

ဥရောပတိုက် ကိုယ်စားပြုတဲ့ ဆန်မာရီနိုအသင်းဟာ ကမ္ဘာ့အဆိုးရွား အသင်းအဖြစ် တံဆိပ်ကပ်ခံရလောက်တဲ့ အထိ သူတို့ရဲ့ရလဒ်တွေဟာ ဆိုးရွားခဲ့ပြီး ပွဲပေါင်း ၂၀၃ ပွဲ ကစားခဲ့တာမှာ နိုင်ပွဲ ၁ ပွဲသာ ရရှိခဲ့တာဖြစ်ပါတယ်။ 

ဆန်မာရီနိုအသင်းဟာ သူတို့ရဲ့ တစ်ပွဲတည်းသော နိုင်ပွဲကို ၂၀၀၄ ခုနှစ်က ရယူနိုင်ခဲ့တာကြောင့် နောက်ထပ် နိုင်ပွဲ တစ်ပွဲကို ထပ်ပြီးရယူနိုင်ဖို့ စောင့်ဆိုင်းနေခဲ့ရတာ နှစ်ပေါင်း ၂၀ အထိ ကြာမြင့်ခဲ့ပြီဖြစ်တာပါ။ 

ဆန်မာရီနိုအသင်းရဲ့ အသင်းခေါင်းဆောင်လည်းဖြစ် ပွဲအများဆုံး ကစားထားတဲ့သူလည်းဖြစ်တဲ့ တိုက်စစ်မှူး ဗီတိုင်းအိုလီဆိုရင် နိုင်ငံအသင်းကို ကိုယ်စားပြုတာ ၁၇ နှစ်ကြာရှိပြီဖြစ်ပေမယ့် အခုထိနိုင်ပွဲဆိုတဲ့ အရသာကို ခံစားဖူးခြင်း မရှိသေးတာဖြစ်ပါတယ်။

ဆန်မာရီနိုနိုင်ငံဟာ လူဦးရေ ၃၃,၀၀၀ သာရှိပြီး ကမ္ဘာပေါ်မှာ ပဉ္စမမြောက် အသေးဆုံးနိုင်ငံဖြစ်ကာ ၆၁ စတုရန်း ကီလိုမီတာသာ ကျယ်ဝန်းပါတယ်။

ဆန်မာရီနိုအသင်း ဂိုးသွင်းအောင်ပွဲခံနေစဉ်

ဆန်မာရီနိုအသင်းဟာ လက်ရှိ ကမ္ဘာ့အဆင့် ရပ်တည်မှု ၂၁၀ မှာ ရှိနေတာကြောင့် ကမ္ဘာ့အဆိုးရွားဆုံး အသင်း အဖြစ် သတ်မှတ်ခြင်းခံခဲ့ရတာ ဖြစ်ပါတယ်။

ဆန်မာရီနိုအသင်း အနိုင်ရရှိခဲ့တဲ့ တစ်ပွဲတည်းသော နိုင်ပွဲကတော့ ၂၀၀၄ ခုနှစ်၊ ဧပြီ ၂၈ ရက်က ကစားခဲ့တဲ့ လက်ချင်စတိန်းအသင်းနဲ့ပွဲမှာဖြစ်ပြီး ၁ ဂိုး- ဂိုးမရှိနဲ့ အနိုင်ရရှိခဲ့တာပါ။ ဆန်မာရီနိုအသင်းရဲ့သမိုင်းဝင်နိုင်ပွဲ ဖြစ်စေမယ့် ဂိုးကို သွင်းယူခဲ့တဲ့သူက တိုက်စစ်မှူးဟောင်း အန်ဒီဆယ်လ်ဗာ ဖြစ်ပါတယ်။

အန်ဒီဆယ်လ်ဗာဟာ ဆန်မာရီနိုအသင်းအတွက် ၈ ဂိုး သွင်းယူနိုင်ခဲ့ပြီး နိုင်ငံအသင်းရဲ့ ဂိုးသွင်းအများဆုံး ကစားသမားအဖြစ် ရပ်တည်နေခဲ့တာပါ။

ဆန်မာရီနိုအသင်းဟာ နိုင်ပွဲတွေ ပျောက်ဆုံးခဲ့သလို သွင်းဂိုးတွေ ရယူနိုင်ဖို့ပါ အခက်တွေ့ခဲ့ပြီး ၂၀၂၃ ခုနှစ်၊ အောက်တိုဘာလက ဒိန်းမတ်အသင်းကို ၂ ဂိုး-၁ ဂိုးနဲ့ အရေးနိမ့်တဲ့ပွဲ မတိုင်ခင်အထိ ပြိုင်ပွဲတွေမှာ ဂိုးပေါက် ပျောက်ဆုံးတာ ၂ နှစ်ကြာမြင့်ခဲ့တာ ဖြစ်ပါတယ်။ 

ဆန်မာရီနိုအသင်းဟာ ဒိန်းမတ်အသင်းနဲ့ပွဲမှာ ဂိုးပေါက် တွေ့ပြီးနောက် ဒီပွဲ အပါအဝင် နောက်ဆုံး ၃ ပွဲ ဆက်တိုက် ဂိုးသွင်းယူနိုင်ခဲ့တာပါ။

ဒါဟာ ဆန်မာရီနိုအသင်း သမိုင်းမှာ ပထမဆုံးအကြိမ် ၃ ပွဲဆက် ဂိုးသွင်းနိုင်ခဲ့တဲ့ စံချိန်မှတ်တမ်းကောင်းတစ်ခု ဖြစ်ခဲ့ရပါတယ်။ 

ဆန်မာရီနိုအသင်းကို တွေ့ရစဉ်

ဆန်မာရီနိုအသင်းဟာ ပြီးခဲ့တဲ့ Saint Kitts and Nevis အသင်းနဲ့ ခြေစမ်းပွဲ ၂ ပွဲမှာ နိုင်ပွဲပြန်လည်ရှာဖွေနိုင်ဖို့ မျှော်လင့်ခဲ့ပေမယ့် အချည်းအနှီးသား ဖြစ်ခဲ့ရတာပါ။ ဆန်မာရီနိုအသင်းဟာ ဒီ ၂ ပွဲမှာ ၁ ပွဲသရေ ၁ ပွဲရှုံးနိမ့်ခဲ့ပါ တယ်။

ဆန်မာရီနိုအသင်းနည်းပြ ဆီဗိုလီဟာ ဒီပွဲမတိုင်ခင်က နိုင်ပွဲနဲ့အတူ နှစ်ပေါင်း ၂၀ ကြာ စောင့်ဆိုင်းခဲ့ရတာကို အဆုံးသတ်ဖို့ ပိုကောင်းတဲ့ နည်းလမ်းမရှိဘူးလို့ ပြောခဲ့ပါတယ်။

ဆန်မာရီနိုအသင်းရဲ့ သမိုင်းတစ်လျှောက် အကြီးမားဆုံး ရှုံးနိမ့်မှုကတော့ ၂၀၀၆ ခုနှစ်၊ စက်တင်ဘာလက ဂျာမနီအသင်းနဲ့ ပွဲစဉ်ဖြစ်ပြီး ၁၃ ဂိုး- ဂိုးမရှိနဲ့ ဂိုးပြတ် အရေးနိမ့်ခဲ့တာပါ။

ဒုတိယမြောက် ဂိုးပြတ် အရေးနိမ့်ခဲ့တဲ့ပွဲကတော့ ၂၀၁၁ ခုနှစ်၊ စက်တင်ဘာလက နယ်သာလန်အသင်းနဲ့ ပွဲစဉ် ဖြစ်ပြီး ၁၁ ဂိုး- ဂိုးမရှိနဲ့ အရေးနိမ့်ခဲ့တာ ဖြစ်ပါတယ်။

ဆန်မာရီနိုအသင်းဟာ ပွဲစဉ်ပေါင်း ၂၀၃ ကစားထားခဲ့တာမှာ ၁ ပွဲနိုင် ၉ ပွဲ သရေကျခဲ့ပြီး ၁၉၃ ပွဲအထိ စံချိန်တင် ရှုံးနိမ့်ခဲ့တာပါ။

ဆန်မာရီနိုအသင်းဟာ ဒီပွဲတွေမှာ ၃၂ ဂိုး သွင်းယူနိုင်ခဲ့ပြီး ၈၁၆ ဂိုး ပေးဂိုးခွင့်ပြုခဲ့ရကာ ဂိုးကွာခြားချက်က - ၇၈၄ ဂိုးအထိ ရှိနေတဲ့အထိ ဆိုးရွားနေခဲ့တာ ဖြစ်ပါတယ်။ 

ဆန်မာရီနိုအသင်းဟာ ၂၀၂၄ ခုနှစ်ထဲမှာ ၇ ပွဲကစားဖို့ ကျန်ရှိနေသေးပြီး ဒီပွဲတွေမှာ ဆလိုဗက်ကီးယား၊ ဆိုက်ပရပ်စ်၊ လက်ချင်စတိန်း၊ မောလ်ဒိုဗာ၊ ဂျီဘရောလ်တာ အသင်းတို့နဲ့ ကစားရမှာပါ။

အဲဒါကြောင့် ဆန်မာရီနိုအသင်း အနေနဲ့ ၂၀၂၄ ခုနှစ်ထဲမှာ နိုင်ပွဲ ပြန်လည်ရှာဖွေပြီး သူတို့သမိုင်းတစ်လျှောက် ဒုတိယမြောက် နိုင်ပွဲကို ရှာဖွေနိုင်မလားဆိုတာ စိတ်ဝင်စားစရာ ကောင်းနေတာ ဖြစ်ပါတယ်။ 

CNI Article 

၂၀၂၄ ခုနှစ်၊ မတ်လ ၂၉

ထိုင်ဝမ်၏ ကာကွယ်ရေးကဏ္ဍတွင် သင့်တော်ကောင်းမွန်သည့် လက်နက်များနှင့် စစ်အသုံးအဆောင် ပစ္စည်းများ ရှိနေခြင်း ရှိ/မရှိဆိုခြင်းသည် မေးခွန်းထုတ်စရာ အချက်တစ်ခု ဖြစ်နိုင်သည်။

သို့သော် ထိုမေးခွန်းသည် ပိုမိုလေးနက်သည့် မေးခွန်းတစ်ခုမှာ ထိုင်ဝမ်၏ စိတ်ပိုင်းဆိုင်ရာ ခိုင်မာမှု ရှိ/မရှိဆိုသည့် မေးခွန်းဖြစ်သည်။

ထိုင်ဝမ်လူငယ်များအကြား ၎င်းတို့၏ ထိုင်ဝမ်ကျွန်းကို တရုတ်ပြည်မကြီး၏ ရန်လိုမှုမှ ကာကွယ်ရာတွင် ၎င်းတို့၏ ရပ်တည်ချက်နှင့် သဘောထားမှာ အဘယ်နည်း။ ခိုင်မာသည့် ရပ်တည်ချက်မျိုး ရှိနေပါသလော။

ထိုမေးခွန်းများသည် ပြင်ပနိုင်ငံသားများအတွက် ဖြေရခက်သည့် မေးခွန်းများဖြစ်သည်။ ထိုင်ဝမ်ဒေသခံများ ကိုယ်တိုင် ထိုမေးခွန်းများကို အမှန်တကယ် သိရှိနားလည်နိုင်မည် မဟုတ်ပေ။

သို့သော် ထိုမေးခွန်းများအတွက် ဖြစ်နိုင်ခြေရှိသည့် အဖြေများကို စာရေးသူအနေဖြင့် ကိုယ်တွေ့ဖြစ်ရပ်မှန် ဇာတ်လမ်းတစ်ပုဒ်ဖြင့် ကြိုးစားပမ်းစား ဖြေကြားပေးလိုသည်။

လွန်ခဲ့သည့် နှစ်အနည်းငယ်က စာရေးသူသည် ထိုင်ဝမ်တွင် နေထိုင်ခဲ့ချိန်အတွင်း မီးရထားဘူတာရုံ အပြင်ဘက်ရှိ မြေပုံလမ်းညွှန်တစ်ခုကို လေ့လာနေခဲ့သည်။ 

တရုတ်နဲ့ ထိုင်ဝမ် တိုက်လေယာဉ်တစ်စီးကိုတွေ့ရစဉ်

ထိုအချိန်တွင် အသက် ၂၀ ခန့်ရှိမည်ဟု ထင်ရသည့် အမျိုးသမီးငယ်တစ်ဦးသည် မိမိထံသို့လာရောက်ပြီး လမ်းပြ ကူညီပေးမည်ဟု ပြောကြားခဲ့သည်။ 

စာရေးသူ သွားမည့်နေရာမှာ သိပ်မဝေးလှသဖြင့် ထိုအမျိုးသမီးငယ်သည် မိမိနှင့်အတူ လမ်းလျှောက်ပြီး မိမိ သွားလိုသည့် နေရာကို လိုက်ပါပို့ဆောင်ပေးခဲ့သည်။

လမ်းလျှောက်နေချိန်တွင် ထိုအမျိုးသမီးငယ်က မိမိအား မည်သည့်နိုင်ငံမှဖြစ်ကြောင်း မေးမြန်းရာတွင် စာရေးသူ က မိမိသည် အမေရိကန်နိုင်ငံမှဖြစ်သည်ဟု ဖြေကြားခဲ့သည်။

ထိုအချိန်တွင် ထိုအမျိုးသမီးငယ်က ပြောကြားခဲ့သည့်စကားမှာ "ကျေးဇူးပြုပြီး ကျမတို့ကို တရုတ်ရဲ့ နယ်မြေ အစိတ်အပိုင်း မဖြစ်အောင် လုပ်ပေးပါ" ဟူသည့် စကားပင်တည်း။

ထိုစကားသည် အဓိပ္ပာယ်မျိုးစုံ ပါဝင်သည့် စကားတစ်ခွန်း ဖြစ်သည်။ စာရေးသူ၏ ရှုထောင့်မှပြောရလျှင် ငယ်ရွယ်သည့် ထိုင်ဝမ်ဒေသခံ အများစုသည် တရုတ်၏ လက်အောက်ခံ မဖြစ်ချင်ကြပေ။ 

တရုတ်ပြည်မကြီးတွင် နေထိုင်ရသည့် လူနေမှုဘဝအကြောင်းကို ထိုင်ဝမ်လူငယ်များက အတော်အတန် သိရှိနားလည်ထားကြသည်။

တရုတ်ကွန်မြူနစ်ပါတီသည် ဟောင်ကောင်ကို တစ်စထက်တစ်စ တင်းကျပ်စွာအုပ်ချုပ်လာပြီး ထိုင်ဝမ်တွင် နေထိုင်ခွင့်ရရန် လွတ်လပ်ရေး လှုပ်ရှားမှုများကို ပြုလုပ်နေသူများအား တရားစီရင်ခဲ့သည့် ဖြစ်စဉ်များကို ထိုင်ဝမ်လူငယ်တို့ မြင်တွေ့ကြားသိခဲ့ရသည်။

သို့သော် ထိုင်ဝမ်အား အမှန်တကယ် ကာကွယ်ရမည့် အခြေအနေတွင် မည်ကဲ့သို့ ရှိလာနိုင်သနည်း။ 

ထိုင်ဝမ်လူငယ် အများအပြားသည် ၎င်းတို့၏ ကျွန်းကို ကာကွယ်ရန် တစ်ခုခုကို လုပ်ဆောင်ကြလိမ့်မည်ဖြစ်သည်။ သို့မဟုတ်သည့်တိုင် သူတို့သည် ထိုင်ဝမ်ကျွန်းကို ကာကွယ်လိုသည့် ဆန္ဒမျိုးရှိနေလိမ့်မည်။ 

ပြဿနာတစ်ခုမှာ ထိုင်ဝမ်လူငယ်များသည် သူတို့ ဘယ်အရာကို စွမ်းဆောင်နိုင်သည်ကို သူတို့ ကိုယ်တိုင် မသိကြခြင်း ဖြစ်သည်။ 

ထိုင်ဝမ်တွင် စစ်မှုထမ်းဥပဒေရှိသည်။ အသက် ၁၈ နှစ်ပြည့်ပြီးသည့် အမျိုးသားတိုင်း ၁ နှစ်ကြာ စစ်မှုထမ်း ကာလကို ထမ်းဆောင်ရမည်ဖြစ်ပြီး အရန်တပ်ဖွဲ့ဝင်များအဖြစ် နှစ်ကာလ အပိုင်းအခြားတစ်ခုအထိ တာဝန် ထမ်းဆောင်ရသည်။

ထိုင်ဝမ်စစ်တပ်ကိုတွေ့ရစဉ်

သို့သော်စစ်မှုထမ်းဥပဒေထက် ကျော်လွန်သည့် အခြေအနေကို သုံးသပ်ရမည်ဆိုပါက ထိုင်ဝမ်လူငယ် အနည်းငယ် သာ ထိုင်ဝမ်ကျွန်း ကာကွယ်ရေးကဏ္ဍတွင် ဆက်လက် ပါဝင်ခဲ့ကြသည်။ ထို့အတွက်လည်း အကြောင်းရင်း အနည်းငယ် ရှိနေသည်။

ထိုင်ဝမ်စစ်တပ်သည် မိမိသဘောဆန္ဒအလျောက် စစ်ထဲဝင်သူ အများစုဖြင့် ဖွဲ့စည်းထားပြီး လူငယ်စစ်သား အများစု ဖြစ်သည်။ သူတို့သည် ပရော်ဖက်ရှင်နယ် စစ်သားများဖြစ်ပြီး ကောင်းမွန်သည့် ဦးဆောင်မှုသာရှိပါက ကောင်းမွန်စွာ တိုက်ပွဲဝင်နိုင်သူများဖြစ်သည်။

သို့သော် မိမိသဘောဆန္ဒအလျောက် စစ်ထဲဝင်သည့် စစ်သားများကိုသာ အားကိုးနေခြင်းသည် ထိုင်ဝမ်စစ်တပ် အတွက် အဓိကပြဿနာတစ်ခု ဖြစ်သည်။

စစ်ပွဲစတင် ဖြစ်ပွားလာပါက စစ်မှုထမ်းခဲ့ကြသည့် လူငယ်များသည် စစ်တပ်ထဲ ပြန်ဝင်လိမ့်မည်ဖြစ်သော်လည်း ထိုအချိန်သည် အလွန်နောက်ကျနေပြီဟု ပြောနိုင်သည်။

ထိုင်ဝမ်တွင် စစ်ထဲဝင်ပြီး စစ်သားလုပ်ခြင်းသည် လူငယ်များအကြား ဆွဲဆောင်မှုမရှိသည့် အသက်မွေးဝမ်း ကျောင်း အလုပ်တစ်ခု မဟုတ်ပေ။ ထိုင်ဝမ်စစ်သားတစ်ဦး၏ ဘဝသည် ခက်ခဲကြမ်းတမ်းပြီး လစာငွေ နည်းပါးသည်။ 

စစ်သားများအတွက် အစိုးရက ချပေးသည့် ဝန်ထမ်းအိမ်ရာများမှာလည်း ကောင်းမွန်ခြင်း မရှိသဖြင့်အပြင် ခံစားခွင့်များလည်း နည်းပါးလှသည်။

ထို့ပြင် ထိုင်ဝမ်တွင် စစ်မှုထမ်းချိန်အတွင်း လွန်ခဲ့သည့် ရာစုနှစ်များက အစဉ်အလာရှိခဲ့သည့် တရုတ် လူ့အဖွဲ့အစည်းကို လေးစားမှုမရှိကြောင်း ထိုင်ဝမ်နိုင်ငံသားအချို့က စာရေးသူကို ပြောဖူးသည်။

ထိုင်ဝမ်အစိုးရ အဆက်ဆက်သည် ထိုစိတ်ထားများကို ပြောင်းလဲခဲ့ခြင်းမရှိပေ။ စစ်တပ်နှင့် စစ်သားများကို ၎င်းတို့နှင့် ထိုက်တန်သည့် လေးစားမှုနှင့် ခံစားခွင့်များ ပေးအပ်မည်ဆိုပါက တပ်သားသစ်စုဆောင်းမှုတွင် ကြုံတွေ့နေရသည့် ပြဿနာများကို ဖြေရှင်းနိုင်မည်ဖြစ်သည်။

တစ်ချိန်တည်းမှာပင် တန်းပြည့်စစ်သား မလုပ်ချင်သော်လည်း ထိုင်ဝမ်ကျွန်းကို ကာကွယ်ရန် တစ်ဖက်တစ်လမ်းမှ ပါဝင်လိုသည့် လူငယ်များအတွက် အခွင့်အလမ်းများမှာလည်း ကန့်သတ်ခံထားရသည်။

ထိုင်ဝမ်အလံများကို တွေ့ရစဉ်

ထိုင်ဝမ်၏ အရန်တပ်ဖွဲ့အင်အားစု ဆိုသည်မှာလည်း ဖရိုဖရဲဖြစ်နေပြီး ပြည်သူ့စစ်များလည်း မရှိပေ။ ထို့ပြင် ထိုင်ဝမ်တွင် မြို့ပြကာကွယ်ရေး စီမံကိန်းမှာလည်း အားနည်းနေသည်။

မကြာသေးမီက ထိုင်ဝမ်ရှိ ပုဂ္ဂလိက အဖွဲ့အစည်းများသည် ရှေးဦးသူနာပြု သင်တန်းများ၊ အမျိုးသား ကာကွယ်ရေး အတွက် ပညာပေးမှုများနှင့် လေသေနတ်များ ပစ်ခတ်ခွင့်ရရှိမည့် အစီအစဉ်များကို ကမ်းလှမ်းခဲ့သည်။

သို့သော်လည်း ထိုအစီအစဉ်များသည် စနစ်တကျ ဖွဲ့စည်းမှုရှိပြီး ရန်ပုံငွေ တောင့်တင်းမှုရှိသည့် အစိုးရက ဦးစီးသည့် အစီအစဉ်များ မဟုတ်ပေ။

ထိုင်ဝမ်အစိုးရသည် စစ်တပ်ကို အသင့်အနေအထား ရှိနေစေရန်၊ အရပ်သားများကို စည်းရုံးစေရန်နှင့် တရုတ်၏ ခြိမ်းခြောက်မှုများအတွက် စိတ်ပိုင်းဆိုင်ရာ အသင့်အနေအထား ရှိနေစေရန် ၎င်းတို့၏ အလုပ်တာဝန်များကို အပြီးသတ် လုပ်ဆောင်ခဲ့ခြင်းမရှိပေ။

ကျွမ်းကျင်သူအချို့ကလည်း ထိုင်ဝမ်၏ ကာကွယ်ရေး အလားအလာနှင့် ပတ်သက်ပြီး ထင်မြင်ချက် အမျိုးမျိုး ပေးနေကြသည်။

အမေရိကန် ပတ်စပို့များရှိနေသည့် ထိုင်ဝမ်နိုင်ငံသားများသည် အန္တရာယ်နှင့် ကြုံလာပါက အမေရိကန်သို့ အမြန် ဆုံး ထွက်ပြေးလိမ့်မည်ဖြစ်ကြောင်း၊ သို့သော် ထိုင်ဝမ်ဒေသခံ ၉၉ ရာခိုင်နှုန်းမှာ ဒုတိယမြောက် ပတ်စပို့များ မရှိကြောင်း ကျွမ်းကျင်သူများက ပြောကြားခဲ့သည်။

ထို့ကြောင့် ထိုင်ဝမ် ဒေသခံများအနေနှင့် ထိုင်ဝမ်ကို ကာကွယ်လိုသည့် ဆန္ဒမှာ မရှိမဟုတ်၊ ရှိနေသည်။ သို့သော် ထိုင်ဝမ် အာဏာပိုင်များ အနေဖြင့် ထိုဆန္ဒများကို ခိုင်မာစွာ ချိတ်ဆက်ဆောင်ရွက်ရန် ဖွဲ့စည်းပုံအချို့ လိုအပ် သည်။

ထိုင်ဝမ်ဒေသခံများကလည်း တစ်ခုခု ဖြစ်ပွားလာပါက ၎င်းတို့ကို ကူညီထောက်ပံ့ပေးမည့် အင်အားကြီးသည့် မိတ်ဆွေများရှိနေသည်ကို ကောင်းစွာ သိရှိနားလည်ထားသည်။

မကြာသေးမီက အမေရိကန်သည် အမေရိကန်နှင့် ထိုင်ဝမ်တပ်ဖွဲ့များအကြား စစ်တပ်အချင်းချင်း ထိတွေ့ဆက်ဆံ မှုများ ပြုလုပ်ခွင့်ပေးရန် အားထုတ်ကြိုးပမ်းနေခြင်းသည် အပြုသဘောဆောင်သည့် လုပ်ဆောင်ချက်တစ်ခု ဖြစ်သည်။

ထိုပုံစံအတိုင်း ဆက်လက် ဆောင်ရွက်ပြီး ထိုင်ဝမ်အစိုးရကလည်း တပ်သားသစ် စုဆောင်းရေးအတွက် လိုအပ် သည့် အရာများကို လုပ်ဆောင်မည်ဆိုပါက ထိုင်ဝမ်လူငယ်များအကြား ထိုင်ဝမ်ကျွန်းကို ကာကွယ်လိုစိတ်များ ပိုမိုရှင်သန်တက်ကြွစေမည် ဖြစ်သည်။

Source: Asia Times

CNI Article

၂၀၂၄ ခုနှစ်၊ မတ်လ ၂၂

"ပုံတစ်ပုံသည် စကားလုံးပေါင်း ထောင်ချီတန်သည်" ဆိုသည့် စကားပုံကဲ့သို့ပင်။ ကောင်းမွန်သည့် ပန်းချီကား သို့မဟုတ် ဓာတ်ပုံ တစ်ပုံသည် ဖြစ်စဉ်တစ်ခုလုံးကို ပြောပြနိုင်သည့် အစွမ်းသတ္တိရှိပေသည်။

မတ်လ ၁၅ ရက် ညပိုင်းက ဝန်ကြီးချုပ်ဟောင်း ဆွမ်ချိုင် ဝေါင်ဆာဝပ် (Somchai Wongsawat) က နောက်ထပ် ဝန်ကြီးချုပ်ဟောင်းဖြစ်ပြီး ယောက်ဖလည်းတော်စပ်သည့် သက်ဆင် ရှင်နာဝပ် (Thaksin Shinawatra) နှင့် လက်ရှိ ဝန်ကြီးချုပ် ဆရီသာ သာဗီဆင် (Srettha Thavisin) တို့ကို တည်ခင်းဧည့်ခံသည့် ညစာစားပွဲ၏ ဓာတ်ပုံ တစ်ပုံ ထွက်ပေါ်လာခဲ့သည်။

ထိုဓာတ်ပုံထဲတွင် သက်ဆင်သည် ရီမောနေပြီး ပြီးခဲ့သည့်လကုန်ပိုင်းက ခံဝန်ဖြင့် ပြန်လည်လွတ်မြောက် လာခဲ့ပြီးနောက် သူဝတ်ဆင်နေကျ ကျန်းမာရေးလည်ပတ်မပါဘဲ ပုံမှန်အတိုင်း မြင်တွေ့ရသည်။

 ဝန်ကြီးချုပ်ဟောင်းများဖြစ်သည့် ဆွမ်ချိုင်ဝေါင်ဆာဝပ်၊ သက်ဆင်နဲ့ လက်ရှိဝန်ကြီးချုပ် ဆရီသာတို့ကို တွေ့ရစဉ်

ထိုဓာတ်ပုံထဲတွင် သက်ဆင်ကို ဆရီသာနှင့် ဆွမ်ချိုင်တို့က တစ်ဖက်တစ်ချက်စီ ဝိုင်းရံထားသည်ကို မြင်တွေ့ရ သည်။

သက်ဆင်သည် မစ္စတာ ဆွမ်ချိုင်ထက် ပိုပြီး အရွယ်တင်နုပျိုပြီး ကျန်းမာနေသည်ကို မြင်တွေ့နေရသည်။

သက်ဆင်သည် ကျန်းမာရေးညံ့ဖျင်းသည်ဟု ယူဆခံခဲ့ရပြီး လွန်ခဲ့သည့် သီတင်းသုံးပတ်ခန့်က သူသည် ကျန်းမာရေး အလွန်ဆိုးရွားနေသူအဖြစ် ကြေညာခံခဲ့ရသည်။ 

ထို့ကြောင့် သက်ဆင်သည် ကျန်းမာရေး အကြောင်းပြချက်များကြောင့် ရဲတပ်ဖွဲ့ အထွေထွေဆေးရုံတွင် ရက်ပေါင်း ၁၈၀ ခန့်ကာ ကုသမှုခံယူခဲ့ပြီးနောက် ခံဝန်ဖြင့် ပြန်လည်လွတ်မြောက်လာခဲ့သည်။

 သက်ဆင် ချင်းမိုင်းကို ရောက်လာစဉ်

အမှန်တရားသည် မည်သည့်အခါမှ သေဆုံးမည် မဟုတ်ပေ။ မတ်လ ၁၄ ရက်က စတင်ခဲ့သည့် ၎င်း၏ မွေးရပ်မြို့ ဖြစ်သည့် ချင်းမိုင်သို့ သွားရောက်သော ၃ ရက်ကြာ ခရီးစဉ်တွင် သက်ဆင်၏ ပကတိ ကျန်းမာရေး အခြေအနေ သည်  ထင်ရှားစွာ ပေါ်ထွက်လာခဲ့သည်။

ချင်းမိုင်တွင် လေထုညစ်ညမ်းမှုများ ဆိုးရွားစွာ ဖြစ်ပွားနေသည့်ကြားမှ သက်ဆင်သည် ချင်းမိုင်သို့ သွားရောက်ပြီး အပြင်လူများနှင့် တွေ့ဆုံခဲ့သည်။ 

သက်ဆင်သည် ဆေးရုံတွင် ဆေးကုသမှုခံယူနေချိန်က အသက်အန္တရာယ် စိုးရိမ်ရသည့် ဖျားနာမှုများကို ခံစားနေရ ကြောင်း ၎င်း၏ ဆရာဝန်များနှင့် အကျင့်စာရိတ္တပြု ပြင်ပြင်ရေးဌာနမှ ညွှန်ကြားရေးမှူးချုပ် သာဗီ ဆွတ်ဆောင် (Thavee Sodsong) တို့က ပြောကြားခဲ့သည်။

သို့သော် လက်ရှိတွင် သက်ဆင်သည် လေထုညစ်ညမ်းနေသည့် ချင်းမိုင်မြို့တွင် ပျော်ရွှင်စွာ လှုပ်ရှားသွားလာ နေမှုများသည် ထိုပြောကြားချက်များနှင့် ဆန့်ကျင်ကွဲလွဲနေသည်ကို တွေ့ရမည်ဖြစ်သည်။

Move Forward Party ခေါင်းဆောင်ကိုတွေ့ရစဉ်

သက်ဆင်သည် လေထုညစ်ညမ်းနေသည့် ချင်းမိုင်မြို့၏ ချစ်ချစ်တောက် ပူပြင်းနေသည့် နေရောင်အောက်တွင် အကူအညီမပါဘဲ လွတ်လွတ်လပ်လပ် လမ်းလျှောက်နေသည့် ဓာတ်ပုံများ၊ ၎င်းအား ထောက်ခံသူများနှင့် တွေ့ဆုံနေသည့် ဓာတ်ပုံများသည် လူမှုမီဒီယာများတွင် ပျံ့နှံ့ခဲ့သည်။

သက်ဆင်၏ ပြုံးရွှင်နေသည့် မျက်နှာသည် အနိုင်ရသူတစ်ဦး၏ မျက်နှာမျိုးဖြစ်သည်။ ထို့ကြောင့် သက်ဆင်က အနိုင်ရသူဆိုလျှင် အရှုံးသမားများသည် မည်သူများ ဖြစ်နိုင်မည်နည်း။

အရှုံးသမားများဟု ပြောရမည့် လူစာရင်းထဲတွင် တရားရေးဝန်ကြီး၊ အကျင့်စာရိတ္တ ပြုပြင်ရေးဌာန အကြီးအကဲ၊ ရဲတပ်ဖွဲ့ အထွေထွေဆေးရုံမှ ဆရာဝန်အချို့ ပါဝင်နေသည်။

ထိုပုဂ္ဂိုလ်များက သက်ဆင်၏ ကျန်းမာရေးအခြေအနေသည် အလွန်ဆိုးရွားနေကြောင်း တစ်လေသံတည်း ထွက်ခဲ့ ကြသည်။ လက်ရှိတွင် သက်ဆင်သည် အလွန်ကျန်းမာရွှင်လန်းနေသည့် ဓာတ်ပုံများ ထွက်ပေါ်လာသဖြင့် ၎င်းတို့ ၏ ပြောကြားချက်များသည် ဟာသသက်သက် ဖြစ်သွားခဲ့သည်။

ထို့ပြင် လူမြင်ကွင်းသို့ သက်ဆင်တစ်ယောက် ပျော်ရွှင်စွာ ထွက်ပေါ်လာခြင်းသည် တရားရေးစနစ်အတွက် ထိုးနှက်ချက်တစ်ခုလည်း ဖြစ်လာခဲ့သည်။

သက်ဆင်အနေဖြင့် အာဏာပိုင်များ၏ ဇာတ်ညွှန်းအတိုင်း ကျန်းမာရေး ညံ့ဖျင်းနေသည့် ပုံစံမျိုးဖြင့် သရုပ်ဆောင် ပြီး လူမြင်ကွင်းသို့ မထွက်သေးဘဲ အချိန်အတိုင်းအတာ တစ်ခုအထိ စိတ်ရှည်စွာ စောင့်ဆိုင်းကာ လူမသိ၊ သူမသိ ဆိတ်ငြိမ်စွာ နေထိုင်ခဲ့မည်ဆိုပါက ယခုကဲ့သို့ မေးခွန်းများ ထွက်ပေါ်လာလိမ့်မည်မဟုတ်ပေ။

သို့သော်လည်း "ကြောင်ကြာကြာ ရေမငုပ်နိုင်" ဆိုသည့် မြန်မာစကားပုံအတိုင်း အမှန်တရားသည် စောစီးစွာ ထွက်ပေါ်လာခဲ့ခြင်းဖြစ်သည်။ 

နိုင်ငံရေး ဂုရုများကမူ သက်ဆင်၏ ချင်းမိုင်ခရီးစဉ်သည် နိုင်ငံရေး လုပ်ငန်းစဉ်တစ်ခုဖြစ်သည်ဟု သုံးသပ်ထားကြ သည်။ 

အဘယ်ကြောင့်ဆိုသော် ပြီးခဲ့သည့်နှစ် မေလက ပြုလုပ်ခဲ့သည့် ရွေးကောက်ပွဲတွင် သက်ဆင်နှင့်ဆက်နွှယ်သည့် ဖြူးထိုင်းပါတီသည် Move Forward ပါတီသည် Move Forward Party ကိုရှုံးနိမ့်ခဲ့သဖြင့် သက်ဆင်သည် ချင်းမိုင် တွင် နိုင်ငံရေးအရ ထောက်ခံမှုများရရှိရန် ကြိုးပမ်းနေခြင်းဖြစ်သည်ဟု သုံးသပ်ခဲ့ကြသည်။

မကြာသေးမီက Nida အဖွဲ့က ကောက်ယူသည့် စစ်တမ်းများတွင် သက်ဆင်သည် ထိုင်းနိုင်ငံရေးလောက၌ သြဇာလွှမ်းမိုးမှုအရှိဆုံး ပုဂ္ဂိုလ်အဖြစ် ရလဒ်ထွက်ပေါ်ခဲ့သည်။ 

သို့သော် ထိုစစ်တမ်း ကောက်ယူမှု ရလဒ်များသည် လာမည့်ရွေးကောက်ပွဲတွင် ထောက်ခံမဲများ ဖြစ်လာလိမ့်မည် ဟုတ်/မဟုတ်ကိုမူ မေးခွန်းထုတ်ရမည်ဖြစ်သည်။

ထိုင်းတွင် သက်ဆင် မရှိခဲ့သည့် ကာလအတွင်း ထိုင်းနိုင်ငံ၏ နိုင်ငံရေး အခင်းအကျင်းသည် ပြောင်းလဲသွားခဲ့ သည်ကို မြင်တွေ့ရသည်။ 

ဖြူးထိုင်းပါတီသည် သြဇာလွှမ်းမိုးမှု လျော့ကျသွားရုံသာမက မျိုးဆက်သစ်လူငယ်များအကြားတွင် ရေပန်းစားမှု နှုန်းလည်း ကျဆင်းခဲ့သည်။ 

ဖြူးထိုင်းပါတီသည် MFP နှင့် ယှဉ်ပြိုင်လိုပါက သြဇာတိက္ကမ ကြီးမားသည့် ခေါင်းဆောင်တစ်ဦးဖြင့် လူငယ်များ၏ ထောက်ခံမှုကို ရယူရန် လိုအပ်ခဲ့သည်။ သို့သော်လည်း ထိုကဲ့သို့ မလုပ်ဆောင်နိုင်ခဲ့သဖြင့် ပြီးခဲ့သည့်နှစ် ရွေးကောက်ပွဲတွင် MFP ပါတီကို ရှုံးနိမ့်ခဲ့ခြင်းဖြစ်သည်။  

ထို့ကြောင့် သက်ဆင်၏ ချင်းမိုင်ခရီးစဉ်သည် လာမည့်ရွေးကောက်ပွဲများ၌ MFP ပါတီကို အနိုင်ယူရန် နိုင်ငံရေးအရ လှုပ်ရှားမှုတစ်ခုဖြစ်သည်ဟုလည်း ယူဆနိုင်သည်။ 

ထိုယူဆချက်ကို အခြေခံပြီး သက်ဆင်သည် လူထုရှေ့မှောက်သို့ ဆောလျင်စွာ ထွက်ပေါ်လာခဲ့ခြင်း ဖြစ်သည်ဟု လည်း ယူဆမည်ဆိုက မှားမည်မထင်ပေ။

သို့သော်လည်း သက်ဆင်အနေဖြင့် သူ့ကို ထောက်ခံသည့် ရှပ်နီများအကြား ထိုင်း၏ တရားရေးစနစ်အပေါ် အယုံအကြည် ကင်းမဲ့စေမည့် ချင်းမိုင်ခရီးစဉ်ကဲ့သို့ နိုင်ငံရေးသဘော သက်ဝင်သည့် လှုပ်ရှားမှုများကို ဂရုတစိုက် စဉ်းစားသုံးသပ်သင့်ပေသည်။

Source: ဘန်ကောက်ပို့စ်

CNI Sport Article 

၂၀၂၄ ခုနှစ်၊ မတ်လ ၂၂

ပေါ်တူဂီအသင်း နောက်ခံလူ ကန်ဆယ်လိုက နိုင်ငံအသင်းဟာ အသင်းခေါင်းဆောင် ရော်နယ်ဒို အပေါ်လုံးဝ မှီခိုတာမျိုး မရှိတော့ဘူးလို့ ပြီးခဲ့တဲ့ရက်ပိုင်းအတွင်းက ပြောလာခဲ့ပါတယ်။ 

လက်ရှိအချိန်မှာ ရော်နယ်ဒိုရဲ့ အသက်ဟာ ၃၉ နှစ် ရှိနေပြီဖြစ်လို့ ကန်ဆယ်လိုပြောတဲ့ စကားက မှန်ကောင်း မှန်နိုင်ပေမယ့် ရော်နယ်ဒို သာမရှိရင် ပေါ်တူဂီအသင်းဟာ အောင်မြင်မှုအချို့ ရယူနိုင်မလားဆိုတာ စဉ်းစားစရာ ဖြစ်လာပါတယ်။ 

ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာဆိုရင် ရော်နယ်ဒိုကို လူစားဝင် ကစားသမားအဖြစ်သာ အသုံးပြုခဲ့လို့ ပေါ်တူဂီအသင်း ကွာတားဖိုင်နယ်ကနေ လှည့်ပြန်ခဲ့ရတဲ့ သာဓကတွေလည်း ရှိခဲ့တာပါ။

ရော်နယ်ဒိုဟာ သူ့ရဲ့အသက်အရွယ်ကြောင့် ပေါ်တူဂီအသင်းအတွက် အရာအားလုံး မစွမ်းဆောင်နိုင်ရင်တောင် သူ့ရဲ့အရှိန်အဝါက ပြိုင်ဘက်အသင်းတွေအပေါ် သက်ရောက်မှု ရှိနေတုန်းဆိုတာ ငြင်းလို့မရပါဘူး။ 

ရော်နယ်ဒိုကို တွေ့ရစဉ်

ရော်နယ်ဒိုလို အသက်အရွယ်နဲ့ သူ့လိုမျိုး နိုင်လိုစိတ်အပြည့်၊ ပွဲချိန်အပြည့် ကစားနိုင်တဲ့ ကစားသမားဟာ ခပ်ရှားရှားပါ။

ရော်နယ်ဒိုကတော့ သူ့ကို ဘယ်သူတွေ ဘာပဲပြောပြော သူ့စိတ်ထဲမှာကတော့ နိုင်ငံအသင်းအတွက် အကောင်းဆုံး ကစားပြီး အောင်မြင်မှုတွေ ရယူချင်နေတာပဲ ဖြစ်ပါတယ်။

ရော်နယ်ဒိုရဲ့ ပြိုင်ဘက်ကြီး မက်ဆီဆိုရင် အာဂျင်တီးနား အသင်းမှာရှိနေတဲ့ သူတွေက သူပါဝင် ကစားပေး နေရင်တောင် ကျေနပ်နေတယ်လို့ ပြောထားကြပြီး သူ့အတွက်ဆိုရင် အသက်တောင် ပေးချင်ကြတာပါ။ 

ရော်နယ်ဒိုကတော့ ပေါ်တူဂီမှာ ဒီလိုမျိုး ဆက်ဆံမခံရဘဲ သူ့ကို မလိုလားတော့တဲ့ ပုံစံမျိုးတွေတောင် ပြောနေကြ တာဖြစ်ပါတယ်။ 

ရော်နယ်ဒိုဟာ လက်ရှိအချိန်မှာ ပေါ်တူဂီအသင်းအတွက် ၂၀၅ ပွဲ ပါဝင်ကစားထားပြီး ၁၂၈ ဂိုးသွင်းယူကာ ကမ္ဘာ့ ဂိုးသွင်း အများဆုံး ကစားသမားအဖြစ် ရပ်တည်နေတာပါ။

ESPN က ဖော်ပြခဲ့တဲ့ အချက်အလက်တွေမှာဆိုရင် ပေါ်တူဂီအသင်းဟာ ရော်နယ်ဒို မပါဝင်ခင်အချိန်က ကမ္ဘာ့ဖလားပြိုင်ပွဲ ၁၇ ကြိမ်မှာ ၃ ကြိမ်သာ ယှဉ်ပြိုင်ခွင့်ရခဲ့ပြီး ယူရိုပြိုင်ပွဲ ၁၁ ကြိမ်မှာလည်း ၃ ကြိမ်သာ ယှဉ်ပြိုင်ခွင့်ရခဲ့ကာ ဆုဖလားအောင်မြင်မှု မရခဲ့ပါဘူး။ 

အရံခုံမှာ ထိုင်နေရတဲ့ ရော်နယ်ဒိုကို တွေ့ရစဉ်

ဒါပေမယ့် ရော်နယ်ဒို ပါဝင်ခဲ့တဲ့ အချိန်ကစပြီး ပေါ်တူဂီအသင်းဟာ ယူရိုပြိုင်ပွဲနဲ့ ကမ္ဘာ့ဖလားပြိုင်ပွဲတိုင်း ပါဝင်ကစားနိုင်ခဲ့တာပါ။ 

ဒါအပြင် ပေါ်တူဂီအသင်းဟာ ယူရို ၂၀၁၆ နဲ့ ၂၀၁၉ နေးရှင်းလိဂ်ပြိုင်ပွဲမှာ ချန်ပီယံဆု ရယူနိုင်ခဲ့တာ ဖြစ်ပါတယ်။

ဘောလွန်းဒီအော ၅ ကြိမ်ရရှိပြီး ကမ္ဘာ့အကောင်းဆုံး ကစားသမားတွေထဲက တစ်ဦးအဖြစ် သတ်မှတ်ခြင်းခံခဲ့ရတဲ့ ရော်နယ်ဒို အတွက်တော့ ပေါ်တူဂီအသင်းရဲ့ အောင်မြင်မှုတွေမှာ အဓိကအခန်းကဏ္ဍကနေ ပါဝင်ခဲ့တာပါ။ 

ကမ္ဘာ့ဖလား မရယူနိုင်ခဲ့တာကသာ ရော်နယ်ဒိုရဲ့ ကစားသမားဘဝမှာ မပြီးပြည့်စုံတဲ့ အရာဖြစ်ခဲ့ပေမယ့် ရော်နယ်ဒို ကတော့ အခုအချိန်ထိ ကမ္ဘာ့ဖလားကို ကိုင်မြှောက်ချင်တဲ့ သူ့ရဲ့ဆန္ဒတွေဟာ ရပ်တန့်ခြင်း မရှိသေးတာ ဖြစ်ပါ တယ်။ 

ဒါကြောင့်လည်း သူဟာ ၂၀၂၆ ကမ္ဘာ့ဖလားပြိုင်ပွဲ အထိတောင် ပေါ်တူဂီအသင်းအတွက် ပါဝင်ကစားချင်နေတာပါ။ 

မကြာသေးခင်က ပြင်သစ်အသင်း ကစားသမားဟောင်း ဖရန့်လီဘော့ခ်က ပေါ်တူဂီအသင်းဟာ ယူရို ၂၀၂၄ ပြိုင်ပွဲ မှာ ချန်ပီယံဆုကို ရယူနိုင်ပေမယ့် ရော်နယ်ဒို မကစားမှသာ သူတို့ရယူနိုင်မယ်လို့ ပြောခဲ့သေးတာ ဖြစ်ပါတယ်။ 

 ရော်နယ်ဒိုကို တွေ့ရစဉ်

ရော်နယ်ဒိုကတော့ အသက် ၃၉ နှစ်အရွယ် ရောက်နေပြီဖြစ်ပေယ့် အခုအချိန်ထိ ဝေဖန်သူတွေရဲ့ စောင့်ကြည့်ခြင်း ကို ခံနေရပြီး ဒါဟာ သူ့အတွက် အောင်မြင်မှုတစ်ခုလို့ ပြောရမှာပါ။ 

ရော်နယ်ဒိုလို အသက်အရွယ်မှာ တချို့ကစားသမားတွေဟာ ကစားသမားဘဝ ကအနားယူ၊ တချို့ကစားသမား တွေက နည်းပြအဖြစ်ကို ကူးပြောင်းနေကြပြီဖြစ်ပါတယ်။

ရော်နယ်ဒိုကတော့ အခုအချိန်ထိ ကစားသမားဘဝမှာ အောင်မြင်မှု၊ သွင်းဂိုးတွေ ဆက်ပြီး သွင်းယူနိုင်ဖို့ ဆာလောင် နေဆဲဖြစ်ပြီး လေ့ကျင့်မှုအပိုင်းကိုလည်း ပြင်းပြင်းထန်ထန် ပြုလုပ်နေတာပါ။ 

ရော်နယ်ဒိုဟာ ဝေဖန်သူတွေကို မှားယွင်းကြောင်း သက်သေပြသနိုင်ဖို့အတွက် လာမယ့် ယူရို ၂၀၂၄ ပြိုင်ပွဲမှာ ပေါ်တူဂီအသင်းအတွက် ဘာတွေလုပ်ပြမလဲဆိုတာ စိတ်ဝင်စားဖို့ ကောင်းနေပါတယ်။ 

ရော်နယ်ဒိုအနေနဲ့ ယူရိုပြိုင်ပွဲမှာ ပေါ်တူဂီအသင်းကို ချန်ပီယံဆု ရယူပေးပြီး သူ့ရဲ့နောက်ဆုံး ဥရောပပြိုင်ပွဲကို အနိုင်နဲ့ အဆုံးသတ်သွားမလား ဒါမှမဟုတ် ပေါ်တူဂီအတွက် သူက မလိုအပ်တော့ဘူးလားဆိုတာ မကြာခင် မြင်တွေ့ရတော့မှာပဲ ဖြစ်ပါတယ်။ 

ချစ်မင်းထွန်း

CNI Article 

၂၀၂၄ ခုနှစ်၊ မတ်လ ၁၉

မြန်မာနိုင်ငံမှာ ဖက်ဒရယ်ကို ခွဲထွက်ရေးဟုဆိုကာ တပ်မတော်က ၁၉၆၂ ခုနှစ်၊ မတ်လ ၂ ရက်နေ့မှာ အာဏာသိမ်းခဲ့သည်။

ထိုစဉ်အချိန်က ဝန်ကြီးချုပ် ဦးနု လက်ထပ် ဒီမိုကရေစီ အပြည့်အဝရနေချိန်ကာလဖြစ်သည်။

သို့သော် အုပ်ချုပ်ရေး အာဏာနှင့် သယံဇာတခွဲဝေရေး မညီမျှမှုများကြောင့် ဗမာမဟုတ်သော တိုင်းရင်းသား လူမျိုးများသည် ဖက်ဒရယ်စနစ်ကို ကျင့်သုံးပြီး အုပ်ချုပ်ရေး အာဏာနှင့် သယံဇာတအရင်းအမြစ် ပိုင်ဆိုင်ခွင့် ခွဲဝေရေးကို တောင်းဆိုခဲ့သည်။

AA ခေါင်းဆောင် ဗိုလ်ချုပ်ထွန်းမြတ်နိုင်ကိုတွေ့ရစဉ်

ထိုသို့ တောင်းဆိုသည့် ဖက်ဒရယ်စနစ်သည် ခွဲထွက်ရေး တောင်းဆိုခြင်းနှင့် တိုင်းပြည် ပြိုကွဲအောင် လုပ်ခြင်းဆိုကာ ဦးနေဝင်း ဦးဆောင်သည့် တပ်မတော်က အာဏာသိမ်းကာ ဖက်ဒရယ်ဆိုသည့် အသံကို တိတ်ဆိတ်သွားအောင် လုပ်ပစ်ခဲ့သည်။

ထို့နောက် ဦးသိန်းစိန် အစိုးရလက်ထက် ရောက်လာသည့်အခါမှာတော့ ငြိမ်းချမ်းရေး ဆိုသည့် စကားလုံးနှင့်အတူ ဖက်ဒရယ်စနစ်ကို လက်ခံကြောင်း တပ်မတော်က ထုတ်ဖော် ပြောကြားလာခဲ့သည်။

သို့သော် ၂၀၁၂ ခုနှစ်ကနေ စတင်ခဲ့သော ငြိမ်းချမ်းရေး တည်ဆောက်မှုနှင့် ဖက်ဒရယ်စနစ် အကောင်အထည်ဖော်မှုက ယနေ့(၂၀၂၄ ခုနှစ်)ထိ မအောင်မြင်သေးပါ။

UWSA ကိုတွေ့ရစဉ်

ထို့နောက် မြန်မာနိုင်ငံသည် တရားဥပဒေ စိုးမိုးမှုများ နိုင်ငံတစ်ဝန်း ပျက်စီးလာပြီး လက်နက်ကိုင် ပဋိပက္ခက ပိုမိုကြီးထွားခဲ့သည်။

အလားတူ တပ်မတော်၏ စစ်အင်အားသည်လည်း အားနည်းလာသလို အုပ်ချုပ်ရေးပိုင်းမှာ လည်း အားနည်းမှုများဖြစ်လာသည်။

ထို့ကြောင့် လက်နက်ကိုင် တိုက်ခိုက်နေသူများသည် ဖက်ဒရယ်ပြည်ထောင်စု တည်ဆောက်ရေး ဆိုသော စိတ်ကူးစိတ်သန်းများကနေ ကိုယ်ပိုင်ပြဋ္ဌာန်းခွင့်နှင့် ကိုယ်ပိုင်အုပ်ချုပ်ခွင့်ဆိုသော စကားလုံးများကို သုံးကာ အကောင်အထည်ဖော် လာခဲ့သည်။

ကိုယ်ပိုင်ပြဋ္ဌာန်းခွင့် (Self-determination)သည် ခွဲထွက်ခွင့်ထိရှိသော Self-determination နှင့် ခွဲထွက်ခွင့်ထိ မရှိသော Self-determination ဆိုပြီး ရှိသည်။

လက်နက်ကိုင် တိုက်ခိုက်လျက်ရှိသည့် EAO များ သည် ခွဲထွက်ခွင့်မရှိသော Self-determination ကို ပြောနေသူများရှိသလို ခွဲထွက်နိုင်သည့် Self-determination ကို ပြောနေသူများဆိုကာ ယခင်က ကွဲပြားကြသော်လည်း ယခုကာလမှာ တော့ ကိုယ့်ဘာသာကိုယ် အုပ်ချုပ်ခွင့်ရှိသည့် အဆင့်ထိ ပြောလာကြသည်ကို တွေ့ရသည်။

ရက္ခိုင့်တပ်တော်(AA)က UWSA “ဝ” ထက် မနိမ့်သော အဆင့်အတန်းမျိုးကို ယူမည် သို့မဟုတ် ကွန်ဖက်ဒရေးရှင်း(ကွန်ဖက်ဒရိတ်)အဆင့်အတန်းကို ရအောင်ယူမည်ဟု ပြောထားသည်။

လက်ရှိ မြန်မာနိုင်ငံမှာ ဖက်ဒရယ်စနစ်ထက် ကျော်လွန်ပြီး ကွန်ဖက်ဒရေးရှင်းအတင့်အတန်းရရှိထားသော EAO များမှာ “ဝ”ပြည်သွေးစည်း ညီညွတ်ရေးတပ်မတော်(UWSA)၊ အမျိုးသားဒီမိုကရက်တစ် မဟာမိတ်တပ်မတော်-မိုင်းလား (NDAA)တို့ဖြစ်သည်။

ယခု မြန်မာအမျိုးသားဒီမိုကရက်တစ် မဟာမိတ်တပ်မတော်(MNDAA)က စတင် အကောင်အထည်ဖော်နေပြီး ဖြစ်သည်။

ထို့နောက် ရှမ်းပြည်ပြန်လည်ထူထောင်ရေး ကောင်စီ(RCSS)ဥက္ကဋ္ဌ ဗိုလ်ချုပ်ကြီးယွက်စစ်က “ မိမိတို့ ၇ ဖွဲ့ရဲ့ ထိန်းချုပ်တဲ့ နယ်မြေအသီးသီးတွေမှာ မိမိတို့ ကိုယ်ပိုင်ပြဋ္ဌာန်းခွင့်ရဲ့ ကိုယ်ပိုင်အုပ်ချုပ်ရေးစနစ်နဲ့ စတင်အုပ်ချုပ်သွားရမှာ ဖြစ်ပါတယ်။ မိမိတို့ ဒေသမှာ ရှိနေကြတဲ့ လူထုတွေအတွက် အုပ်ချုပ်ရေး၊ လုံခြုံရေး၊ စီးပွါးရေး၊ ပညာေးရ၊ ကျန်းမာရေး၊ စားဝတ်နေရေး အပါအဝင် အခြားဝန်ဆောင်မှု လုပ်ငန်းတွေကို ဆောင်ရွက်သွားမှာ ဖြစ်ပါတယ်။ ဖက်ဒရယ်ဒီမိုကရေစီပြည်ထောင်စု ကို တဆင့်ပြီးတဆင့် တည်ဆောက်သွားရမှာဖြစ်ပါတယ်။ တဖက်တွင်လည်း မိမိတို့ ၇ ဖွဲ့ကြား မှာ တူတာတွဲလုပ် မတူတာခွဲလုပ်ဆိုတဲ့မူအတိုင်း ဆောင်ရွက်သွားဖို့လိုပါတယ်”ဟု ၂၀၂၄ ခုနှစ်၊ မတ်လ ၁၇ ရက်မှ ၁၉ ရက်နေ့ထိ ကျင်းပသည့် အပစ်ရပ် ၇ ဖွဲ့၏ အစည်းအဝေးမှာ ပြောသွားသည်။

 TNLA အထွေထွေအတွင်းရေးမှူး ဗိုလ်မှူးချုပ် တားဘုန်းကျော်ကို တွေ့ရစဉ်

အလားတူ ကချင်လွတ်လပ်ရေးတပ်မတော်(KIA)ဒုဥက္ကဋ္ဌ ဒုတိယဗိုလ်ချုပ်ကြီးဂွမ်မော်ကလည်း တိုင်းရင်းသားများသည် ၂၀၂၅ ရောက်လာသည့်အခါမှာ ဖက်ဒရယ်ထက် ကျော်လွန်သည့် စဉ်းစားချက်များ ရှိလာမည်ဖြစ်၍ မြန်မြန် ယခုကာလမှာ ဖက်ဒရယ်ပြည်ထောင်စုကို တည်ဆောက်သင့်ကြောင်းဗိုလ်ချုပ်မှူးကြီးမင်းအောင်လှိုင်နှင့် ဒေါ်အောင်ဆန်းစုကြည်တို့နှင့် ၂၀၁၈ ခုနှစ်က တွေ့ဆုံစဉ်ပြောထားခဲ့သည်။

ထို့ပြင် တအာင်းအမျိုးသားလွတ်မြောက်ရေး တပ်မတော်(TNLA) အထွေထွေအတွင်းရေးမှူး ဗိုလ်မှူးချုပ် တားဘုန်းကျော်ကလည်း နိုင်ငံတစ်ခုအထိ တည်ထောင်ရန် အခြေအနေဖြစ်လာပါက အဆင်သင့်ဖြစ်အောင် ပလောင်လူမျိုးများ လုပ်ထားရမည်ဟု ၂၀၂၂ ခုနှစ်၊ဩဂုတ် ၁၈ ရက် က ပြောခဲ့သည်။

ဗိုလ်မှူးချုပ် တားဘုန်းကျော်က “ နိုင်ငံရေး ရေချိန်အရ မြှင့်တက်လာမယ်၊ ပထဝီနိုင်ငံရေး အခြေအနေ၊ လက်ရှိ ကမ္ဘာ့နိုင်ငံရေး အခြေအနေတွေအပေါ် မူတည် သွားပြီးတော့ ဒီနိုင်ငံဟာ ပြည်ထောင်စုတောင် မတည်ဆောက် နိုင်တော့ဘူးဆိုရင် အစိတ်စိတ် အမွာမွာကွဲပြီးတော့ နိုင်ငံငယ်တွေလည်း အများကြီး ထွက်သွားနိုင်တယ်။ ဒါကြောင့်မလို့ ကျနော်တို့လူထုတွေ ကျနော်တို့ တအာင်း (ပလောင်)လူထုတွေလည်း ဒါသေချာ စဉ်းစားဖို့လို တယ်။ ကျနော်တို့ကို ကျနော်တို့ သေချာ ပြင်ဆင်နိုင်ဖို့ လိုတယ်။ ဒီပြည်ထောင်စုနိုင်ငံ တကယ် တည်ဆောက် တဲ့အချိန်မှာ ကျနော်တို့လည်း ပြည်နယ်တစ်ခုအနေနဲ့ ကျနော်တို့လူမျိုး ကျနော်တို့ ကာကွယ်သွားဖို့ ၊ တည် ဆောက် နိုင်ဖို့အတွက် အဆင်သင့် ကျနော်တို့ ကြိုးပမ်းဆောင်ရွက် သွားဖို့လိုတယ်။ အဲလိုမှ မဟုတ်ဘူး ပြည် ထောင်စု တည်ဆောက်လို့ မရဘူး၊ ပထဝီနိုင်ငံရေး၊ ကမ္ဘာ့နိုင်ငံရေး တစ်ခုကြောင့် လိုအပ်ချက်ကြောင့် တော် လှန်ရေးတွေ သိပ်အရှိန်မြင့်လာလို့ နိုင်ငံတွေ ထွက်လာမယ်ဆိုလည်း ကျနော်တို့ နိုင်ငံတည်ဆောက်နိုင်ဖို့ အဆင့်လည်း ကျနော်တို့ ပြင်ဆင်သွားဖို့လိုပါတယ်”ဟု ပြောသည်။

အထက်ပါ အခြေအနေများကို ခြုံငုံလေ့လာကြည့်လျှင် တိုင်းရင်းသား လက်နက်ကိုင်များသည် လက်ရှိ မြန်မာ့နိုင်ငံရေး အခြေအနေ၊ တပ်မတော် ၏ အားနည်းနေမှု၊ လူထု၏ တပ်မတော်ကို ဆန့်ကျင်နေမှု ရေချိန်၊ နိုင်ငံတကာ၏ အခြေအနေ တို့ကို သုံးသပ်ကာ ဖက်ဒရယ်စနစ်ထက် ကွန်ဖက်ဒရေးရှင်း(ကွန်ဖက်ဒရိတ်)ကို တည်ဆောက်ဖို့ ပြင် ဆင်လာနေသည်ဟု တွေ့ရသည်။

သို့မဟုတ်ပါက ကွန်ဖက်ဒရေးရှင်းထက် သာလွန်သော အတင့်အတန်းမျိုးထိပါ တည်ဆောက်ရန်လည်း စိတ်ကူးနေကြဟန် ရှိနိုင်သည်။

ထို့ကြောင့် တချိန်က ဖက်ဒရယ်စနစ်ကိုတောင် ခွဲထွက်ရေး-တိုင်းပြည်ပြိုကွဲရေးဟု ဆိုကာ အာဏာသိမ်းခဲ့သည့်အထိ တုန့်ပြန်ခဲ့သော တပ်မတော်သည် ဖက်ဒရယ်စနစ်ထက် သာလွန်သော ကွန်ဖက်ဒရေးရှင်းဖက်ကို အရိပ်လွှမ်းလာသော အခြေအနေကို ဘယ်လို ခံယူပြီးတော့ ဖြေရှင်းမလဲဆိုတာတော့ စိတ်ဝင်စားစရာကောင်းလှသည်။

CNI Article

၂၀၂၄ ခုနှစ်၊ မတ်လ ၁၈

အခုဆိုရင် မြန်မာ့တပ်မတော် ဖြုတ်ချရေး နိုင်ငံတဝှမ်း လက်နက်ကိုင် အင်အားစုများက ဖော်ဆောင်နေကြတာ အားလုံး အသိပဲ ဖြစ်ပါတယ်။

ဒီလို လက်နက်ကိုင် အင်အားစုတွေက မြန်မာ့တပ်မတော် ဖြုတ်ချရေး ဖော်ဆောင်တဲ့အထဲကမှ ကချင်လွတ် လပ်ရေး တပ်မတော်(KIA)အနေနဲ့ ဘယ်လိုပုံစံနဲ့ ဖော်ဆောင်နေလဲဆိုတာကို လေ့လာကြည့်ရအောင်ပါ။

KIA ဟာ ကချင်ပြည်နယ်နဲ့ ထိစပ်နေတဲ့ စစ်ကိုင်းတိုင်းဒေသကြီးထဲက မြန်မာ့တပ်မတော်ကို တိုက်ခိုက်လိုစိတ် ရှိသူတွေကို စုစည်းပြီးတော့ ပထမဆုံး စစ်သင်တန်းပေးတာ၊ လက်နက်တပ်ဆင်ပေးတာ၊ လိုအပ်တဲ့ လက်နက် ခဲယမ်းတွေ ထောက်ပံ့ပေးတာနဲ့ စတင်ပါတယ်။

ဒီနောက်မှာတော့ စစ်ဆင်ရေးတွေမှာ ဦးဆောင်ပြီးတော့ အမိန့်ပေး ကွပ်ကဲတာ၊ ထောက်ပို့ လမ်းကြောင်းတွေ ကို ဖော်ဆောင်တာ၊ တခြားသော လက်နက်ကိုင် အင်အားစုတွေကို ချိတ်ဆက်တာတွေ ဆက်လုပ်ပါတယ်။

ဒီအခြေအနေတွေ အားလုံး သေချာ စီစဉ်ထားနိုင်တဲ့အခါမှာတော့ စစ်ကိုင်း တိုင်းဒေသကြီးကို ထိန်းချုပ်နိုင်ဖို့ အတွက် စစ်ဆင်ရေးမဟာဗျူဟာ ၃ ရပ်ကို ချမှတ် အကောင်အထည်ဖော်လာတာကို တွေ့ရပါတယ်။

စစ်ကိုင်းတိုင်းဒေသကြီး၊ ဟုမ္မလင်းမြို့နယ်အတွင်းက ဒေသခံများက ရှမ်းနီနယ်မြေကာကွယ်ရေး  ဆန္ဒပြနေကြစဉ်

ဒီစစ်ဆင်ရေးမဟာဗျူဟာ ၃ ရပ်ကတော့ (၁) ဗန်းမောက်မြို့နယ်ကို ဗဟိုပြုစစ်ဆင်ရေး၊ (၂) ကသုံးလုံး (ကသာ-ကောလင်း-ကန့်ဘလူ) စစ်ဆင်ရေး၊ (၃) ထီးချိုင့်မြို့နယ်ကို ဗဟိုပြုစစ်ဆင်ရေးတို့ပဲ ဖြစ်ပါတယ်။

နံပါတ်(၁)အနေနဲ့ ဗန်းမောက်မြို့နယ်ကို KIA က ထိန်းချုပ်နိုင်ပြီးဆိုရင် အင်းတော်၊ ကသာကို ဆက်လက် တိုက်ခိုက်လို့ ရပါမယ်။ ပြီးရင် ပင်လည်ဘူးမြို့ကို တိုက်ခိုက်လို့ရပါမယ်။ ပင်လည်ဘူးကို ထိန်းချုပ်နိုင်ပြီးဆိုရင် တော့ ဖောင်းပြင်၊ ရွှေပြည်အေး၊ ဟုမ္မလင်း စတဲ့ မြို့တွေကို အလွယ်တကူ တိုက်ခိုက်နိုင်မှာ ဖြစ်ပါတယ်။

ဒီမြို့နယ်တွေကို တိုက်ခိုက်နိုင်ဖို့အတွက် ဗန်းမောက်မြို့နယ်က KIA အတွက် စစ်ရေးမဟာဗျူဟာအရ အရေး ပါနေပါတယ်။ ပြီးရင်တော့ စစ်ကိုင်းတိုင်း အထက်ပိုင်းကို ထိန်းချုပ်နိုင်ဖို့နဲ့ လက်နက်ခဲယမ်း အလွယ်တကူ သယ်ယူပို့ဆောင်နိုင်ရေးတွေကိုလည်း လုပ်နိုင်သွားမှာ ဖြစ်ပါတယ်။ 

ဗန်းမောက်ကို လက်နက်ထောက်ပံ့နိုင်တဲ့ လမ်းကြောင်းကတော့ ကချင်ပြည်နယ်၊ မိုးညှင်းမြို့နယ်ကနေ မော်ဟန်၊ မော်လူး၊ အင်းတော်လမ်းကြောင်းကနေ ဖြစ်ပါတယ်။

နောက်ထပ် လမ်းကြောင်းတစ်ခုကတော့ ကချင်ပြည်နယ်၊ ရွှေကူမြို့နယ်ကနေ စစ်ကိုင်းတိုင်းဒေသကြီးအတွင်း မှာရှိတဲ့ ကသာကို သယ်ယူနိုင်ပါတယ်။ ကသာကနေ တဆင့် အင်းတော်-ဗန်းမောက်လမ်းကြောင်း ဖြစ်ပါတယ်။

(၂) ကသုံးလုံး(ကသာ-ကောလင်း-ကန့်ဘလူ) စစ်ဆင်ရေးဖြစ်ပါတယ်။ 

ဒါကတော့ ကသာကို ပထမဆုံး ထိန်းချုပ်နိုင်ပြီးဆိုရင် ကောလင်းကို ထိန်းချုပ်နိုင်ရေး ဆက်လက်ကြိုးပမ်းမှာ ဖြစ်ပါတယ်။ ကောလင်းကနေ အောက်ဘက်ကိုဆင်းပြီး ကန့်ဘလူကို ထိန်းချုပ်နိုင်ရေး KIA က ဆက်လက် ကြိုးပမ်းနိုင်ပါတယ်။

အခုဆိုရင် ကောလင်းကို ထိန်းချုပ်ထားပြီးတော့မှန် ပြန်လည် လက်လွတ်လိုက်ရတယ်ဆိုပေမယ့် အချိန်မရွေး ပြန်လည်ထိန်းချုပ်နိုင်ရေး ကြိုးပမ်းလာနိုင်ပါတယ်။ ဒီနောက်မှာတော့ ကန့်ဘလူမြို့နဲ့အနီးဖြစ်တဲ့ ကျွန်းလှမှာ KIA က ထောက်ထားပြီးတော့ ကောလင်းကို စစ်တပ်ဘက်က လာမတိုက်နိုင်အောင် ကာထားသလို ကန့်ဘလူကို လည်း ဖိအားပေးမည့် မဟာဗျူဟာကို ဖော်ဆောင်လာနိုင်ပါတယ်။

ဒီစစ်ဆင်ရေးကို အောင်မြင်ဖို့အတွက် လက်နက်ခဲယမ်းကိုတော့ ကချင်ပြည်နယ်၊ ရွှေကူ၊ မိုးညှင်း၊ အင်းတော် ဒီလမ်းကြောင်းတွေကနေ ဖြည့်တင်း ထောက်ပို့ လုပ်နိုင်ပါတယ်။

(၃) ထီးချိုင့်မြို့နယ်ကို ဗဟိုပြု စစ်ဆင်ရေးပဲ ဖြစ်ပါတယ်။ ဒီစစ်ဆင်ရေးကတော့ ထီးချိုင့်မြို့ကို KIA-PDF-AA တို့က တိုက်ခိုက်နေပြီးဖြစ်သလို ကျေးလက်ဒေသတွေကိုလည်း ထိန်းချုပ်ထားပါတယ်။

အဓိက ထီးချိုင့်ကို လက်နက်ခဲယမ်း ထောက်ပို့လုပ်နိုင်တာကတော့ ကချင်ပြည်နယ်၊ ရွှေကူမြို့နယ်ကနေတဆင့် လာနိုင်သလို ကသာကနေလည်း လာနိုင်ပါတယ်။ နောက်တစ်ခုကတော့ မန္တလေးတိုင်းထဲမှာ ပါနေတဲ့ မဘိမ်း ဒေသဘက်ကနေလည်း ထောက်ပို့လုပ်နိုင်ပါသေးတယ်။

ထီးချိုင့်မြို့နယ် အားလုံးကို KIA-PDF-AA တို့ ထိန်းချုပ်နိုင်ပြီးဆိုရင်တော့ ဧရာဝတီမြစ်ကြောင်းနဲ့ စစ်ကိုင်း- မန္တလေး-ကချင် တို့ကို ဆက်သွယ်ထားတဲ့ လမ်းပိုင်းကိုလည်း ထိန်းချုပ်နိုင်မှာ ဖြစ်ပါတယ်။ 

PDF နဲ့ KIA အဖွဲ့ကိုတွေ့ရစဉ်

ဒီနောက်မှာတော့ မန္တလေးတိုင်းဒေသကြီးကို KIA က စစ်ရေးအရ ဆက်လက် ဖိအားပေးလာနိုင်ပါလိမ့်မယ်။

စစ်ကိုင်းတိုင်းဒေသကြီးအတွင်းမှာ ပါဝင်နေတဲ့ တမူး၊ ခမ်းပတ်၊ ကလေး စတဲ့ မြို့နယ်တွေကိုလည်း CNF- CNDF- PDF- KNO Burma- ABSDF တို့က ပူးပေါင်းတိုက်ခိုက်လျက်ရှိပါတယ်။ ဒီအင်အားစုတွေကိုလည်း KIA က လက်နက်ခဲယမ်း ထောက်ပံ့ပေးခြင်းနဲ့ ချိတ်ဆက်ထားပြီးတော့ စစ်ကိုင်းတိုင်းဒေသကြီး တစ်ခုလုံး ထိန်းချုပ်နိုင် ရေး ကြိုးပမ်းလျက်ရှိနေတာ ဖြစ်ပါတယ်။

ဘယ်လိုပဲဖြစ်ပါစေ ဒီစစ်ဆင်ရေး မဟာဗျူဟာ ၃ ရပ်ကို KIA ဟာ PDF- AA- ABSDF၊ CNDF၊ CNF၊ တို့နဲ့ ပူးပေါင်း ဖော်ဆောင်နေတာဖြစ်လို့ အောင်မြင်သွားခဲ့မယ်ဆိုရင်တော့ စစ်ကိုင်းတိုင်းဒေသကြီး တစ်ခုလုံးကို ထိန်းချုပ် သွားနိုင်မှာ ဖြစ်ပါတယ်။

စစ်ကိုင်းတိုင်းဒေသကြီး တစ်ခုလုံးကို KIA က ထိန်းချုပ်သွားနိုင်ပြီးဆိုပါက စစ်ကိုင်းတိုင်းဒေသကြီးနဲ့ ဆက်စပ် ထားတဲ့ မန္တလေးတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ရခိုင်ပြည်နယ် စတဲ့ ဒေသတွေထဲကို လက်နက်ခဲယမ်း ထောက်ပို့ရေး လမ်းကြောင်းဟာ အတားအဆီးမရှိ သယ်ယူလာနိုင်မှာ ဖြစ်ပါတယ်။

ဒီနောက်မှာတော့ မန္တလေးတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ရခိုင်ပြည်နယ်တို့ တဆက်တည်း လွတ်မြောက်ရေးကို AA – CNF- CNDF- PDF တို့က ဆက်လက်ကြိုးပမ်းလို့ရသွားပြီ ဖြစ်ပါတယ်။

ဒါကြောင့် KIA ရဲ့ စစ်ကိုင်းတိုင်းဒေသကြီး တစ်ခုလုံး ထိန်းချုပ်နိုင်ရေး မဟာဗျူဟာကနေ ချင်းပြည်နယ်၊ ရခိုင်ပြည်နယ်၊ မကွေးတိုင်းဒေသကြီး၊ မန္တလေးတိုင်းဒေသကြီးတို့ လွတ်မြောက်ရေး တိုက်ပွဲတွေဟာလည်း တချိန်တည်းမှာ ပေါ်ပေါက်လာမှာ ဖြစ်ပါတယ်။

ဒါပေမယ့် လက်ရှိမှာ KIA ဟာ စစ်ကိုင်းတိုင်းဒေသကြီး တစ်ခုလုံး ထိန်းချုပ်နိုင်ရေးအတွက် အကောင်အထည် ဖော်တာမှာ အတားအဆီးတွေ တချို့ကို ရင်ဆိုင်နေရပါတယ်။ 

ဒါကတော့ စစ်ကိုင်းတိုင်းဒေသကြီး အလယ်ပိုင်းကနေ အထက်ပိုင်းဒေသဟာ ရှမ်းနီတိုင်းရင်းသားတွေ နေထိုင် ပိုင်ဆိုင်ခဲ့တဲ့ နယ်မြေဒေသတွေဖြစ်လို့ ရှမ်းနီအမျိုးသားများတပ်မတော်(SNA)ဆိုတဲ့ တိုင်းရင်းသား လက်နက်ကိုင် အဖွဲ့က ဒေသတွင်း တည်ငြိမ် အေးချမ်းရေးအတွက် ကြိုးပမ်းနေပါတယ်။

ရှမ်းနီအမျိုးသားများတပ်မတော်(SNA)ကို တွေ့ရစဉ်

အထူးသဖြင့် ရှမ်းနီလက်နက်ကိုင် SNA တပ်ဖွဲ့ဟာ စစ်ကိုင်းတိုင်းဒေသကြီးထဲက ထီးချိုင့်၊ ကောလင်း၊ ဝန်သို၊ ပင်လည်ဘူး၊ ကသာ၊ ရွှေပြည်အေး၊ တမူး၊ ကလေး၊ ဗန်းမောက်၊ အင်းတော်၊ ဖောင်းပြင်၊ ဟုမ္မလင်း၊ မော်လိုက်၊ သနန့် စတဲ့ ဒေသတွေမှာ လှုပ်ရှားနေပြီး ဒေသတွင်း တည်ငြိမ်အေးချမ်းဖို့နဲ့ ရှမ်းနီပြည်နယ် ရရှိရေး ကြိုးပမ်းနေ ပါတယ်။

ဒါကြောင့် KIA ရဲ့ စစ်ရေးမဟာဗျူဟာ ၃ ရပ် ဖော်ဆောင်တဲ့ ဒေသတွေထဲမှာ တည်ရှိနေတဲ့အတွက် KIA- PDF တို့နဲ့ SNA ကြား တိုက်ပွဲတွေ ဖြစ်လာခဲ့ရပါတယ်။ 

SNA ဟာ စစ်ကိုင်းတိုင်းဒေသကြီး တစ်ခုလုံးကို KIA ထိန်းချုပ်ဖို့ ဖော်ဆောင်နေတဲ့ စစ်ရေးမဟာဗျူဟာထဲမှာ အဓိက အရေးပါတဲ့ အနေအထားမှာ ဖြစ်နေတဲ့အတွက် KIA က SNA ကို စည်းရုံးနိုင်ခဲ့မယ်ဆိုရင် အလွယ်တကူ အကောင်အထည် ဖော်ဆောင်နိုင်မှာ ဖြစ်ပါတယ်။

အဲလိုမဟုတ်ဘဲ မစည်းရုံးနိုင်ရင်တော့ ခက်ခဲနိုင်ပါတယ်။ ဒါကြောင့် KIA ဟာ SNA ကို စည်းရုံးနိုင်ဖို့ အရေးကြီး သလို တိုက်ထုတ်နိုင်ဖို့လည်း အရေးကြီးပါတယ်။

ဒီလိုပဲ မြန်မာ့တပ်မတော် အနေနဲ့ စစ်ကိုင်းတိုင်းဒေသကြီးကို KIA ထိန်းချုပ်မသွားနိုင်အောင် လုပ်ဆောင်နေတာ မှာလည်း SNA ကို စည်းရုံးနိုင်ရင် ခြေတစ်လှမ်း သာသွားနိုင်ပါတယ်။ 

စစ်ကိုင်းတိုင်းဒေသကြီးကို KIA ထိန်းချုပ်နိုင်ခဲ့မယ်ရင် KIA က ဟိုယခင်ကတည်းက ကသည်းနဲ့နာဂ လက်နက်ကိုင်တွေကို ထူထောင်ပေးနေပြီး အိန္ဒိယကို တရုတ်အကြိုက် ဖိအားပေးနေတာဖြစ်လို့ အခု ပိုပြီးတော့ ဖိအားပေးလာနိုင်မှာ ဖြစ်ပါတယ်။

ဘာကြောင့်ဆို KIA ဟာ အိန္ဒိယကို တော်လှန်တိုက်ခိုက်နေတဲ့ နာဂ လက်နက်ကိုင်တွေကို လက်နက်ခဲယမ်း ထောင်ပံ့ပေးထားသလို လိုင်ဇာမြို့မှာလည်း စစ်စခန်းတွေ အခြေစိုက်ခွင့် ပေးထားလို့ပဲ ဖြစ်ပါတယ်။

ဒါကြောင့် KIA သာ စစ်ကိုင်းတိုင်းဒေသကြီး တစ်ခုလုံး ကို ထိန်းချုပ်သွားနိုင်ခဲ့မယ်ဆိုရင် အိမ်နီးချင်းဖြစ်တဲ့ အိန္ဒိယနိုင်ငံရဲ့ အမျိုးသားလုံခြုံရေးနဲ့ အကျိုးစီးပွားအတွက်လည်း ခြိမ်းခြောက်မှုတွေ ခံလာရပါလိမ့်မယ်။ 

မေးခွန်းထုတ်စရာ တစ်ခုဖြစ်နေတာကတော့ စစ်ကိုင်းတိုင်းဒေသကြီး တစ်ခုလုံးထိန်းချုပ်နိုင်ရေးနဲ့ ချင်းပြည်နယ်၊ ရခိုင်ပြည်နယ်၊ မကွေးတိုင်းဒေသကြီး၊ မန္တလေးဒေသကြီးတို့မှာ တိုက်ပွဲများ ဆက်လက် ဖော်ဆောင်နိုင်ရေး အတွက် KIA အနေနဲ့ လက်နက်ခဲယမ်း ထောက်ပံ့မှုစရိတ်ကို တက်နိုင်မည်မဟုတ်ပေ။

ထိုသို့ဆိုလျှင် မည်သည့် အင်အားစုက နောက်ကွယ်က ရှိနေနိုင်သလား ဆိုသည်မှာ မေးခွန်းထုတ်စရာ ဖြစ်လာပါ တယ်။ စစ်ရေးအကဲခတ် တချို့ကတော့ KIA ရဲ့ စစ်ဆင်ရေးတွင် တရုတ်က ကျောထောက် နောက်ခံပြုပေးထား နိုင်တယ်လို့ ဆိုကြသလို တချို့ကလည်း အမေရိကန်ရဲ့ မဟာဗျူဟာ တချို့ပါနိုင်တယ်လို့ ဆိုကြပါတယ်။

ဘယ်လိုပဲ ဖြစ်နေပါစေ KIA ဟာ အိမ်နီးချင်း တရုတ်နိုင်ငံရဲ့ သဘောထားကိုတော့ ဘယ်လိုမှ လွန်ဆန်နိုင်မှာ မဟုတ်ပါဘူး။ ဒါကြောင့် အမေရိကန်နဲ့ ဆက်ဆံရေးလည်း မပျက်အောင်၊ တရုတ်နဲ့ ဆက်ဆံရေးလည်း မပျက် အောင် နှစ်ဖက်ခွ သံတမန်နည်းလမ်းကို အသုံးပါလိမ့်မယ်။

အခု တင်ပြခဲ့တဲ့ အခြေအနေတွေကတော့ စစ်ကိုင်းတိုင်းဒေသကြီးဟာ မြန်မာ့တပ်မတော် ဖြုတ်ချရေး လက်နက် ကိုင် အင်အားစုတွေအတွက် ဘယ်လောက်ထိ အရေးပါတဲ့ ဒေသဖြစ်နေသလဲ၊ KIA အတွက် ဘယ်လောက် အရေး ပါတဲ့ ဒေသဖြစ်နေသလဲ၊  တရုတ်အတွက်ကရော ဘယ်လောက်ထိ အရေးပါတဲ့ ဒေသဖြစ်နေသလဲ၊ မြန်မာ့ တပ်မတော် အတွက်ရော ဘယ်လောက်ထိ အရေးပါတဲ့ဒေသ ဖြစ်နေသလဲဆိုတာတွေကိုပဲ ဖြစ်ပါတယ်။

ဒါပေမယ့် ဘယ်လိုပုံစံနဲ့ ဖြစ်တည်လာမလဲဆိုတာကတော့ အားလုံး ဆက်လက် စောင့်ကြည့်ရတော့မှာပဲ ဖြစ်ပါတယ်။

CNI Sport Article 

၂၀၂၄ ခုနှစ်၊ မတ်လ ၁၅

၂၀၂၃-၂၄ ရာသီ ပရီးမီးယားလိဂ်ပြိုင်ပွဲပြီးဆုံးဖို့ ၁၀ ပွဲသာ ကျန်ရှိတော့တဲ့အချိန်မှာ ချန်ပီယံဆုအတွက် ပြိုင်ဆိုင်မှု တွေဟာ ဇာတ်ရှိန်အမြင့်ဆုံးကို ရောက်ရှိလာခဲ့ပြီ ဖြစ်ပါတယ်။

ပြီးခဲ့တဲ့ရာသီတွေက ချန်ပီယံဆုအတွက် ၂ သင်းတည်းသာ အပြိုင်ဖြစ်ခဲ့ပေမယ့် ဒီရာသီမှာတော့ ချန်ပီယံဆု  ပြေးလမ်းကြောင်းမှာ ၃ သင်းအထိ ရှိလာခဲ့တာပါ။ 

ပရီးမီးယားလိဂ် ၂၈ ပွဲ ကစားအပြီးမှာ အာဆင်နယ်အသင်းက ၆၄ မှတ်နဲ့ အဆင့် ၁၊ လီဗာပူးလ်အသင်းက ၆၄ မှတ်နဲ့ အဆင့် ၂ ၊ မန်စီးတီးအသင်းက ၆၃ မှတ်နဲ့ အဆင့် ၃ နေရာမှာ ရပ်တည်နေတာ ဖြစ်ပါတယ်။

ဒီ ၃ သင်းကြားမှာ ရမှတ်ကွာဟမှုက ၁ မှတ်သာရှိတာကြောင့် ခြေချော်တာနဲ့ အမှတ်ပေးဇယား ရပ်တည်မှုက အပြောင်းအလဲတွေ ဖြစ်သွားနိုင်တာပါ။ 

အမှတ်ကွာဟမှုက ကျဉ်းမြောင်းတာကြောင့် ချန်ပီယံဆုအတွက် ဂိုးကွာခြားချက်နဲ့ ဆုံးဖြတ်ရနိုင်တဲ့ အခြေအနေ တွေလည်း ရှိလာနိုင်တဲ့အတွက် အဆင့် ၁ နေရာမှာ ဦးဆောင်နေတဲ့ အာဆင်နယ်အသင်းဟာ ပြီးခဲ့တဲ့ပွဲတွေမှာ ဂိုးတွေ အများကြီးသွင်းယူကာ ဒါကိုအားသာချက်ဖြစ်အောင် လုပ်ဆောင်နေတာဖြစ်ပါတယ်။ 

အာဆင်နယ်နဲ့ မန်စီးတီး ယှဉ်ပြိုင်နေစဉ်

လက်ရှိအချိန်မှာတော့ ၃ သင်းစလုံးဟာ ရာသီနောက်ဆုံးပွဲစဉ်အထိ အမှားအယွင်းမရှိအောင် ပြင်ဆင်နေ ကြတာပါ။

အာဆင်နယ်၊ လီဗာပူးလ်နဲ့ မန်စီးတီးအသင်းတို့ရဲ့ လက်ကျန် ၁၀ ပွဲကို ကြည့်မယ်ဆိုရင် အာဆင်နယ်အသင်းဟာ ပွဲကျပ်နေတာကို  မြင်တွေ့ခဲ့ရပါတယ်။

အာဆင်နယ်အသင်းဟာ ဒီ ၁၀ ပွဲမှာ ချယ်လ်ဆီး၊ မန်စီးတီး၊ အက်စတွန်ဗီလာ၊ စပါး၊ ယူနိုက်တက်အသင်းတို့နဲ့ တွေ့ဆုံရမယ့် ပွဲစဉ်တွေအပြင် တန်းဆင်းဇုန်ကနေ လွတ်ဖို့ ရုန်းမယ့် လူတန်၊ အဲဗာတန်အသင်းတို့နဲ့ ပွဲစဉ်တွေ ပါဝင်တာ ဖြစ်ပါတယ်။ 

အဲဒါကြောင့် အာဆင်နယ်အသင်းဟာ ပွဲကျပ် အများအပြားကို ကျော်ဖြတ်ရဖို့ ရှိနေပြီး ချန်ပီယံဆုယူချင်ရင် ကျော်ဖြတ်ပြဖို့လည်း လိုအပ်နေတာ ဖြစ်ပါတယ်။ 

အာဆင်နယ်အသင်းဟာ ပြီးခဲ့တဲ့ရာသီကလည်း ရာသီကုန်ဖို့ နီးကပ်တဲ့အချိန်မှ ချန်ပီယံဆုကို လက်လွှတ်ခဲ့ရ တာကြောင့် ဒီရာသီမှာ ဒီလိုအရာတွေကနေ သင်ယူထားတယ်လို့ နည်းပြ အာတီတာက ပြောထားတာပါ။

 လီဗာပူးလ်အသင်းနဲ့ မန်စီးတီး ယှဉ်ပြိုင်နေစဉ်

လီဗာပူးလ်အသင်းရဲ့ လက်ကျန်ပွဲစဉ်တွေမှာတော့ အဲဗာတန်၊ ယူနိုက်တက်၊ စပါးနဲ့ အက်စတွန်ဗီလာ ပွဲစဉ်တွေ လောက်သာ သူ့အတွက် ခက်ခဲနိုင်ပြီး လက်ရှိခြေစွမ်းအရ ကျန်ပွဲတွေဟာ သူ့အတွက် လွယ်ကူတာ မဟုတ်ရင် တောင် အနိုင်ရလဒ် ရယူနိုင်မယ့်ပွဲစဉ်တွေ ဖြစ်ပါတယ်။ 

လီဗာပူးလ်အသင်းဟာ ပြီးခဲ့တဲ့ပွဲတွေမှာ အဓိက ကစားသမားအချို့ ဒဏ်ရာရရှိပေမယ့် လူငယ်ကစားသမားတွေကို အသုံးပြုပြီး ရလဒ်ကောင်းတွေ ရယူနိုင်ခဲ့တာကို မြင်တွေ့ခဲ့ရတာပါ။ 

လီဗာပူးလ်အသင်း တစ်သင်းလုံးဟာ ဒီရာသီအကုန်မှာ ထွက်ခွာတော့မယ့် နည်းပြကလော့ပ်ကို ပရီးမီးယားလိဂ် ဖလား ရယူပေးပြီး နှုတ်ဆက်ချင်နေတာကြောင့် အမှတ်ပေးဖလားကို ရယူဖို့ စိတ်အားထက်သန်နေတာ ဖြစ်ပါတယ်။

လက်ရှိချန်ပီယံ မန်စီးတီးအသင်းဟာ လက်ကျန်ပွဲစဉ်တွေမှာ အာဆင်နယ်၊ အက်စတွန်ဗီလာ၊ စပါးတို့နဲ့ ပွဲကြီး ပွဲကောင်းတွေအပြင် တန်းဆင်းဇုန်က လွတ်ဖို့ရုန်းကန်နေရတဲ့ လူတန်၊ နော်တင်ဟမ်ဖောရက်စ်အသင်းတို့နဲ့ တွေ့ဆုံတဲ့ပွဲစဉ်တွေ ပါဝင်နေတာပါ။

ဒီပွဲစဉ်တွေကို ကြည့်ရမယ်ဆိုရင် မန်စီးတီးအသင်းဟာ အာဆင်နယ်အသင်းလောက် အရမ်းကြီး ပွဲကျပ်နေတဲ့ ပွဲစဉ်တွေ အများကြီး မပါဝင်တာ ဖြစ်ပါတယ်။ 

 ပရီးမီးယားလိဂ်ဆုဖလားကို တွေ့ရစဉ်

မန်စီးတီးအသင်းဟာ ပရီးမီးယားလိဂ်ဖလားကို ၃ နှစ်ဆက်တိုက် ရယူထားနိုင်တဲ့ အသင်းဖြစ်တာကြောင့် ဒီလက်ကျန်ပွဲတွေကို ကျော်ဖြတ်နိုင်တဲ့ အတွေ့အကြုံတွေကို ပိုင်ဆိုင်ထားပြီး ဖြစ်တာပါ။

ပြီးတော့ မန်စီးတီးအသင်းဟာ ဒီရာသီ ပရီးမီးယားလိဂ်ပြိုင်ပွဲမှာ ချန်ပီယံဆုကို ရယူနိုင်ခဲ့ရင် ပရီးမီးယားလိဂ်ဖလား ကို ၄ နှစ်ဆက်တိုက် ရယူနိုင်တဲ့ ပထမဆုံးအသင်းအဖြစ် စံချိန်သစ် ရေးထိုးနိုင်မှာ ဖြစ်ပါတယ်။ 

အဲဒါကြောင့် ရာသီသိမ်းဖို့ ၁၀ ပွဲသာ ကျန်ရှိတော့တဲ့အချိန်မှာ ဒီမျှော်လင့်ချက်ကို လက်လွှတ်ခံမှာ မဟုတ်ဘူးဆို တာ သေချာနေပါတယ်။ 

ပရီးမီးယားလိဂ် လက်ကျန်ပွဲစဉ်တွေကို ကြည့်ပြီး ဒီရာသီ ပရီးမီးယားလိဂ် ချန်ပီယံဆုကို ခန့်မှန်းရရင် အာဆင်နယ် အသင်းအတွက် ခက်ခဲနိုင်ပြီး လီဗာပူးလ်နဲ့ မန်စီးတီးအသင်းတို့ထဲက တစ်သင်းက ဒီဆုဖလားကို ကိုင်မြှောက်နိုင် မယ်လို့ ယူဆရပါတယ်။

ဒီ ၃ သင်းစလုံးဟာ ဥရောပပြိုင်ပွဲတွေ ယှဉ်ပြိုင်နေရတဲ့အတွက် ကစားသမားတွေရဲ့ ဒဏ်ရာ၊ ပွဲပန်းမယ့် အရာတွေ ကြောင့် အခြေအနေတွေကလည်း ပြောင်းလဲသွားနိုင်တာပါ။

အဲဒါကြောင့် ဒီရာသီ ပရီးမီးယားလိဂ်ပြိုင်ပွဲမှာ ဘယ်အသင်း ချန်ပီယံဆု ရယူသွားနိုင်မလဲဆိုတာ စိတ်ဝင်စားဖို့ ကောင်းနေတာပဲ ဖြစ်ပါတယ်။ 

CNI Sport News

၂၀၂၄ ခုနှစ်၊ မတ်လ ၈

မန်စီးတီးအသင်း အကြောင်းပြောရင် အားလုံးဟာ တိုက်စစ်မှူး ဟာလန်းနဲ့ ကွင်းလယ်လူ ဒီဘရိုင်းကိုပဲ ပြေးမြင်မိ မှာဖြစ်ပေမယ့် သူတို့ အပါအဝင် မရှိမဖြစ် အရေးပါတဲ့ ကစားသမားတစ်ဦးလည်း ရှိပါတယ်။

သူကတော့ စပိန်ကွင်းလယ်လူ ရိုဒရီပါ။ အသက် ၂၇ နှစ်အရွယ်ရှိ ရိုဒရီဟာ မန်စီးတီးအသင်းကို အသလက်တီကို အသင်းကနေ ရောက်ရှိလာခဲ့တဲ့ ၂၀၁၉ ခုနှစ်ကတည်းက အသင်းအတွက် ခြေစွမ်းပြပြီး မနှစ်ကရာသီက သမိုင်းဝင် ဆုဖလား ၃ လုံး ရယူနိုင်ခဲ့တာမှာ အသင်းရဲ့ အသက်သွေးကြော အဖြစ်ရှိခဲ့တာ ဖြစ်ပါတယ်။

ရိုဒရီဟာ ပြီးခဲ့တဲ့ ၂၀၂၃ ခုနှစ်ထဲမှာ မန်စီးတီးအသင်းနဲ့ ပရီးမီးယားလိဂ်၊ FA ဖလား၊ ချန်ပီယံလိဂ်၊ ဥရောပစူပါ ဖလား၊ ကလပ်ကမ္ဘာ့ဖလားတို့ကို ရယူနိုင်ခဲ့ပြီး စပိန်လက်ရွေးစင်အသင်း နေးရှင်းလိဂ်ဖလား ရယူခဲ့တာမှာလည်း အဓိက ကျတဲ့သူဖြစ်ခဲ့တာပါ။ 

မန်စီးတီးအသင်းနည်းပြ ဂွာဒီယိုလာက ရိုဒရီဟာ လက်ရှိကမ္ဘာ့အကောင်းဆုံး ကွင်းလယ်ကစားသမားဖြစ်ပြီး သူပါဝင်ရင် မန်စီးတီးအသင်းက ပိုပြီးကောင်းတယ်ဆိုတာ သံသယမရှိဘူးလို့ ပြောထားခဲ့ပါတယ်။ တကယ်လည်း ရိုဒရီရဲ့ သက်ရောက်မှုတွေက မန်စီးတီးအသင်းမှာ အများကြီးရှိနေတာပါ။

ရိုဒရီဟာ အခုဆိုရင် မန်စီးတီးအသင်းအတွက် သူပါဝင်ကစားခဲ့တဲ့ နောက်ဆုံးပြိုင်ပွဲစုံ ပွဲပေါင်း ၆၀ အထိ ရှုံးပွဲမရှိတဲ့ စံချိန်တစ်ခုကို ပိုင်ဆိုင်နေပြီ ဖြစ်ပါတယ်။

ရိုဒရီကို တွေ့ရစဉ်

ဒါဟာ ပရီးမီးယားလိဂ်မှာ ဘယ်ကစားသမားကမှ မလုပ်နိုင်သေးတဲ့ မှတ်တမ်းတစ်ခုလည်း ဖြစ်တာပါ။

ရိုဒရီဟာ ၂၀၂၃ ခုနှစ်၊ ဖေဖာ်ဝါရီ ၁၂ ရက်ကနေ အခုအချိန်ထိ သူပါဝင်ကစားခဲ့တဲ့ ပွဲပေါင်း ၆၀ မှာ မန်စီးတီးအသင်း ဟာ ရှုံးပွဲမရှိခဲ့တာဖြစ်ပြီး ဒီပွဲတွေမှာ မန်စီးတီးအသင်းဟာ ၄၈ ပွဲ အနိုင်ရပြီး ၁၂ ပွဲသရေကျခဲ့တာ ဖြစ်ပါတယ်။

ရိုဒရီ မပါဝင်နိုင်ခဲ့တဲ့ ၁၁ ပွဲမှာ မန်စီးတီးအသင်းဟာ ၆ ပွဲ အနိုင်ရပြီး ၅ ပွဲ ရှုံးနိမ့်ထားတာကို အချက်အလက်တွေမှာ ဖော်ပြထားတာပါ။ 

ဒီရာသီ အစောပိုင်းပွဲစဉ်ဖြစ်တဲ့ နော်တင်ဟမ်ဖောရက်စ် အသင်းနဲ့ပွဲမှာ ရိုဒရီ အနီကတ်ထိပြီးနောက် ပွဲပယ်ခံထား ရချိန် မန်စီးတီးအသင်းဟာ နယူးကာဆယ်၊ ဝုလ်ဗ်စ်နဲ့ အာဆင်နယ်အသင်းတို့ကို အရေးနိမ့်ခဲ့တာ ဖြစ်ပါတယ်။ 

ရိုဒရီမပါဝင်တာနဲ့ မန်စီးတီးအသင်း ရှုံးပွဲကြုံတွေ့ရတာကတော့ တကယ်ကို ထူးခြားတဲ့ တိုက်ဆိုင်မှုတစ်ခုလည်း ဖြစ်နေတာပါ။

ရိုဒရီဟာ ကွင်းလယ်ခံစစ် ကစားသမားဆိုပေမယ့် မန်စီးတီးအသင်းဂိုးရဖို့ လိုအပ်ချိန်တိုင်းမှာ သူ့ရဲ့သွင်းဂိုးတွေနဲ့ ကူညီပေးနေတာကိုလည်း မြင်တွေ့နေရတာ ဖြစ်ပါတယ်။

ဒီရာသီမှာ ရိုဒရီဟာ မန်စီးတီးအသင်းအတွက် ၃၅ ပွဲ ပါဝင်ကစားထားပြီး ၇ ဂိုးသွင်းယူကာ ၈ ဂိုးဖန်တီးထားတာပါ။ 

မန်စီးတီးအသင်းနည်းပြ ဂွာဒီယိုလာရဲ့နည်းဗျူဟာမှာ ရိုဒရီဟာ အဓိကကျနေပြီး ဘောလုံးလက်ခံရယူကာ အသင်း ဖော်တွေကို ပြန်လည်ပေးပြီး လိုအပ်ရင် ဂိုးပါသွင်းယူနေတာ ဖြစ်ပါတယ်။ 

ရိုဒရီကို တွေ့ရစဉ်

စပိန်ကွင်းလယ်လူဟာ ဒီရာသီ ဥရောပထိပ်တန်း ၅ လိဂ်မှာ ဘောလုံးပေးပို့မှု အအောင်မြင်ဆုံး ကစားသမား အဖြစ်လည်း ရပ်တည်နေတာပါ။

ရိုဒရီရဲ့ စွမ်းဆောင်ရည်ကို လူတန်အသင်းခေါင်းဆောင် လော့ခ်ယာက ချီးကျူးမှု ပြုလုပ်ထားပါတယ်။

လော့ခ်ယာက ရိုဒရီနဲ့အတူ ဘောလုံးကွင်းတစ်ခုမှာ အတူရှိနေရတာက ပျော်ရွှင်ဖို့ကောင်းပြီး ရိုဒရီကို  Rolls Royce ကားနဲ့ တင်စားခဲ့တာပါ။ 

ရိုဒရီဟာ မန်စီးတီးအသင်း ရရှိခဲ့တဲ့ ချန်ပီယံလိဂ်၊ ကလပ်ကမ္ဘာ့ဖလားပြိုင်ပွဲတွေမှာ အကောင်းဆုံး ကစားသမားဆု ကို ရရှိခဲ့ပြီး စပိန်အသင်း နေးရှင်းလိဂ်ဖလားကို ရယူခဲ့တုန်းကလည်း ဒီပြိုင်ပွဲရဲ့ အကောင်းဆုံး ကစားသမားဆုကို ရရှိခဲ့တာဖြစ်ပါတယ်။

ရိုဒရီဟာ ဒီလိုအောင်မြင်မှုတွေ ရထားပေမယ့် ဘောလွန်းဒီအော၊ ဖီဖာ အကောင်းဆုံး ဆုတွေမှာတော့ ထိပ်ဆုံး ၃ ဦးစာရင်း ပါဝင်ခွင့်မရခဲ့ပါဘူး။ 

ရိုဒရီကတော့ ဒီလိုဆုတွေ မရခဲ့တာကို အေးဆေးဖြစ်ခဲ့ပြီး အသင်းလိုက်ရတဲ့ အောင်မြင်မှုတွေကို ပိုပြီးမက်မော တယ်လို့ ပြောခဲ့ပါတယ်။ 

ရိုဒရီဟာ ဒီရာသီမှာ မန်စီးတီးအသင်းကို မနှစ်ကလို အောင်မြင်မှုမျိုး ပြန်ယူပေးနိုင်ဖို့ ပစ်မှတ်ထားနေပြီး သူပါဝင် တဲ့ပွဲတွေမှာ မန်စီးတီးအသင်း မရှုံးနိမ့်ဖူးဆိုတဲ့ စံချိန်မှတ်တမ်းကို ဆက်ပြီး သယ်ဆောင်နိုင်ဖို့လည်း မျှော်လင့်နေ တာပါ။ 

အဲဒါကြောင့် ရိုဒရီအနေနဲ့ အနီးကပ်ဆုံးပွဲဖြစ်တဲ့ လီဗာပူးလ်အသင်းနဲ့ပွှဲမှာ မန်စီးတီးအသင်းကို ရလဒ်ကောင်း ရယူပေးပြီး ဒီစံချိန်ကို ဆက်ထိန်းနိုင်မလားဆိုတာ စောင့်ကြည့်ရမှာဖြစ်ပါတယ်။