- By CNI
- Category: နိုင်ငံရေး
- Hits: 747
CNI News
၂၀၂၃ ခုနှစ်၊ ဇန်နဝါရီ ၁၂
ရှမ်းနီပြည်နယ် (ဝါ) ရှမ်းနီအမျိုးသားများ ကိုယ်ပိုင်အုပ်ချုပ်ခွင့်ရတိုင်းဒေသ ဖော်ဆောင်ရန်အတွက် ရှမ်းနီအမျိုး သားများကောင်စီ(SNNC)ကို ဖွဲ့စည်းလိုက်ကြောင်း ယနေ့ (ဇန်နဝါရီ ၁၂ ရက်)တွင် ထုတ်ပြန် ကြေညာခဲ့သည်။
အဆိုပါ ရှမ်းနီအမျိုးသားများကောင်စီ(SNNC)သည် ရှမ်းနီမျိုးနွယ်များဖြစ်သော တိုင်းခန္တီး၊ တိုင်းလျန်(တိုင်းနိုင်း၊ တိုင်းလိုင်)၊ တိုင်းလုံ၊ တိုင်းဆာ၊ တိုင်းလေ စသည့် မျိုးနွယ်များ၏ စာပေ ယဉ်ကျေးမှုဆိုင်ရာများ၊ သမိုင်းကြောင်း များ၊ ပထဝီနိုင်ငံရေး အခြေအနေများနှင့် လက်ရှိ လူမှုဘဝများ ဖွံ့ဖြိုးတိုးတက်စေရေးအတွက် လုပ်ငန်းအဆင့် ဆင့်ကို စနစ်တကျ စီမံခန့်ခွဲပြီး ဆောင်ရွက်ကြမည့် ရှမ်းနီအဓိပတိအဖွဲ့အစည်း တစ်ရပ်ဖြစ်သည်။
ရှမ်းနီတိုင်းရင်းသား လူငယ်များကိုတွေ့ရစဉ်
SNNC က “ ရှမ်းနီအမျိုးသားများကောင်စီ(SNNC)သည် ကျစ်လစ်ခိုင်မာသည့် ဖွဲ့စည်းပုံရေးဆွဲပြဋ္ဌာန်းနိုင်ရေးနှင့် လုပ်ငန်းကော်မတီအသင်းသင်း၏ လုပ်ငန်းတာဝန်များ ချမှတ်မည့် ရှမ်းနီအမျိုးသားများညီလာခံကို မကျင်းပမီ လက်ရှိ နိုင်ငံရေးအခြေအနေအရ လုပ်ငန်းကော်မတီတစ်ရပ်ကို အရေးပေါ် ဖွဲ့စည်းလိုက်ပါသည်။ အဆိုပါ လုပ်ငန်း ကော်မတီသည် နှစ်ပေါင်းများစွာ ရှမ်းနီမျိုးနွယ်ထုတစ်ရပ်လုံး၏ အဓိကမျှော်မှန်းချက်ဖြစ်သော မိမိ အမျိုးသား ကြမ္မာ မိမိတို့ဖန်တီးနိုင်ရေးဖြစ်သည့် ရှမ်းနီအမျိုးသားများပြည်နယ် တည်ထောင်နိုင်ရေးအတွက် အရေးပါသော ကော်မတီတစ်ရပ်ဖြစ်သည်”ဟု ပြောသည်။
ရှမ်းနီပြည်နယ်ရရှိရေး တောင်းဆိုနေကြစဉ်
ရှမ်းနီတိုင်းရင်းသားများသည် ကချင်ပြည်နယ်အတွင်း ပါဝင်သွားသော ရှမ်းနီဒေသများဖြစ်သည့် မိုးညှင်း၊ မိုး ကောင်း၊ မြစ်ကြီးနား၊ ဗန်းမော်နှင့် စစ်ကိုင်းတိုင်းဒေသကြီးအတွင်းရှိ ဟုမ္မလင်း၊ ခန္တီး၊ တမူး၊ ဗန်းမောက်၊ ကလေး၊ ကသာ၊ မော်လိုက် စသည့်ဒေသများကို စုစည်း၍ ရှမ်းနီပြည်နယ် (ဝါ) ရှမ်းနီအမျိုးသားများ ကိုယ်ပိုင်အုပ်ချုပ်ခွင့်ရ တိုင်း အဖြစ် သတ်မှတ်နိုင်ရေး တောင်းဆို ကြိုးပမ်းလျက်ရှိသည်။
- By CNI
- Category: နိုင်ငံရေး
- Hits: 502
CNI News
၂၀၂၃ ခုနှစ်၊ ဇန်နဝါရီ ၁၂
အိမ်နီးချင်းနိုင်ငံများအနေဖြင့် မိမိတို့၏ လေပိုင်နက်ကို အသုံးပြုကာ တိုက်ခိုက်မှု ပြုလုပ်နေသည့် တပ်မတော်ကို အရေးယူရန် အမျိုးသားညီညွတ်ရေးအစိုးရ(NUG)က ယနေ့ (ဇန်နဝါရီ ၁၂ ရက်)တွင် ထုတ်ပြန် တောင်းဆိုခဲ့သည်။
ချင်းအမျိုးသားတပ်ဦး(CNF)၏ ဌာနချုပ်ကို လေကြောင်းတိုက်ခိုက်မှု ပြုလုပ်ခဲ့ခြင်းနှင့် ပတ်သက်၍ ထုတ်ပြန်ချက် တွင် အထက်ပါအတိုင်း ဖော်ပြထားခြင်း ဖြစ်သည်။
NUG က “အိမ်နီးချင်းနိုင်ငံများ အနေဖြင့်လည်း မိမိတို့၏ လေပိုင်နက်ကို ကျော်လွန်အသုံးပြုကာ မြန်မာပြည်သူ များကို သတ်ဖြတ်နေရုံမက၊ အိမ်နီးချင်း နိုင်ငံများရှိ ပြည်သူလူထု၏ အသက်အိုးအိမ် စည်စိမ် လုံခြုံမှုကိုပါ ခြိမ်း ခြောက် လာနေသည့် စစ်ကောင်စီ၏ လုပ်ရပ်များကို ထိရောက်ပြင်းထန်စွာ အရေးယူ ဆောင်ရွက်မှုများ အမြန်ဆုံး ပြုလုပ်ကြရန် တိုက်တွန်းပြောကြားလိုသည်” ဟု ပြောထားသည်။
အကြမ်းဖက်မှုများကို ရပ်တန့်ရန် တောင်းဆိုထားသည့် ကုလသမဂ္ဂလုံခြုံရေးကောင်စီ၏ ဆုံးဖြတ်ချက်ကို ပြောင် ပြောင်တင်းတင်း ချိုးဖောက်ခြင်းဖြစ်ပြီး မြန်မာ့အရေးကိစ္စအား ပြေလည်စေရန် ကူညီဆောင်ရွက်နေသည့် နိုင်ငံ တကာ အသိုင်းအဝိုင်း၏ ကြိုးပမ်းမှုများကိုလည်း လျစ်လျူရှုခြင်း ဖြစ်သည်ဟု ပြောသည်။
NUG ၏ ဖက်ဒရယ်ရေးရာဝန်ကြီးလည်းဖြစ် CNF ၏ ဒုဥက္ကဋ္ဌလည်းဖြစ်သူ ဒေါက်တာလျန်မှုန်းဆာခေါင်းကို CNF ရဲဘော်များနှင့်အတူ အိန္ဒိယနယ်စပ်မှာတွေ့ရစဉ်
အရှိန်မြန်သည့် လေယာဉ်များ လေပိုင်နက်ကျော်လွန်မှုများ ရှိနိုင်ကြောင်း သို့သော်လည်း နှစ်နိုင်ငံကြားမှာ နိုင်ငံ ရေးအရ ဖြေရှင်းနိုင်သည့်အတွက် ပြဿနာမရှိကြောင်း သေနင်္ဂမဟာဗျူဟာလေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။
၎င်းက “အဲဒါကတော့ ကျနော်တို့ အိန္ဒိယဖက်က ခဏထားပေါ့လေ၊ ထိုင်းဖက်ကို လေယာဉ်ကျော်သွားတဲ့ ဖြစ်စဉ် ပေါ့၊ အဲဒါကို ကျနော်တို့ ကြည့်ကြတာပေါ့၊ အဲချိန်မှာ ထိုင်းနဲ့ မြန်မာကြားထဲမှာ နိုင်ငံရေးအရ ဆက်သွယ် ဖြေရှင်းမှု တွေ အများကြီးရှိတယ်၊ ဆိုရှယ်မီဒီယာမှာတော့ မြေပြင်ကလူတွေ သဘောထား မှတ်ချက်မျိုး တင်ပေးကြတာ ရှိပါ တယ်၊ ဒါပေမဲ့ အဲဒါက ဘာမှမဖြစ်ပဲ ပြီးသွားတယ်ပေါ့၊ ဒီမြန်မာအနေနဲ့ အိမ်နီးချင်းနိုင်ငံတွေက အင်မတန် ကောင်း မွန်တဲ့ ဆက်ဆံရေးရှိတယ်၊ ဒါကြောင့်မို့လို့ နယ်စပ်နဲ့ ဆက်စပ်နေတဲ့ EAO စခန်းမျိုးတွေကြရင် အထူး သဖြင့်တော့ အရှိန်မြန်တဲ့ ဂျက်လေယာဉ်လို့ လေယာဉ်မျိုးတွေက ကျော်တာမျိုးတွေရှိတယ်၊ ကိုယ့်ဖက်က ဒါနဲ့ ပတ်သက်ပြီး တော့ နိုင်ငံရေးအရ ကောင်းကောင်း ဖြေရှင်းနိုင်တယ်ဆိုရင် ဒါက ပြဿနာဖြစ်စရာ အကြောင်းမရှိပါဘူး။ အဲဒီ တော့ အိန္ဒိယဖြစ်စဉ်နဲ့ ပတ်သက်ပြီးတော့လည်း ဒီဖက်ကတော့ ဘာမှတော့ ထူးထူးခြားခြား သတင်းတော့ မကြား ဘူး။ ကျော်တာမျိုးတော့ ရှိကောင်းလည်း ရှိနိုင်ပါတယ်၊ ဒါပေမဲ့ နှစ်နိုင်ငံကြားမှာ နိုင်ငံရေးအရ ကောင်းကောင်း ဖြေရှင်းနိုင်တယ်ဆိုရင် ဒါဟာ ကျနော်တို့အတွက် ဘာမှပြဿနာရှိစရာ အကြောင်းမဟုတ်ပါဘူး” ဟု ပြောသည်။
တော်လှန်ရေး အင်အားစုများအနေဖြင့် အိမ်နီးချင်းကောင်းများနှင့် မဆက်ဆံရကြောင်း နိုင်ငံရေးလေ့လာသုံးသပ် သူ ဦးသန်းစိုးနိုင်က CNI သတင်းဌာနသို့ ပြောသည်။
တပ်မတော်က CNF ဌာနချုပ်ကို လေယာဉ်နဲ့ဗုံးကြဲစဉ်
၎င်းက “ဒါကတော့ ရှင်းပါတယ်ဗျာ၊ ကျနော်တို့က အိမ်နီးချင်းကောင်းတွေနဲ့ မဆက်ဆံရပဲနဲ့ အိမ်နီးချင်းဆိုးတွေရဲ့ မတူတဲ့ အတိုင်းအတာနဲ့ ဒုက္ခပေးမှုတွေကို ကျနော်တို့ တော်လှန်ရေး အင်အားစုတွေက ခံနေရတဲ့အချိန်မှာ နောက် အဲဒီ ထိုင်းတို့၊ အိန္ဒိယတို့ ဆိုတာက တရုတ်၊ ဆိုဗီယက် စတဲ့ နိုင်ငံတွေနည်းတူ ဗမာပြည်အပေါ် သံတမန် စစ်ရေး ဆိုင်ရာ သဘောထား မကောင်းပါဘူး။ ပြီးခဲ့တဲ့ ကာလအတွင်းက လုပ်တဲ့ လုံခြုံရေးကောင်စီရဲ့ ဆုံးဖြတ်ချက်မှာ တောင် ဒီအင်အားစုတွေဟာ ကန့်ကွက်မဲ ပေးကြသော်ငြားလည်း သူတို့ ပြည်တွင်းရေးကို တခြားအင်အားစုတွေ က၊ တခြားတိုင်းပြည်တွေက ဝင်ရောက် စွက်ဖက်ခွင့်ကို သူတို့က ကာကွယ်မှုကို ရပ်ခံပြောဆိုနေတဲ့ တိုင်းပြည်တွေ ဖြစ်ပါတယ်၊ အဲဒါကြောင့်မို့ အဲဒီတိုင်းပြည်တွေက ကျနော်တို့ နွေဦးတော်လှန်ရေးကြောင့် ဖြစ်ပေါ်လာတဲ့ ပြဿနာ တွေ အထူးသဖြင့် စစ်ပြေးဒုက္ခသည်တွေကို အခုဆိုလို့ရှိရင် အိန္ဒိယဆိုရင်လည်း အသိအမှတ် မပြုပါဘူး။ အသိ အမှတ် မပြုတဲ့အပြင် အထောက်အကူလည်း မပြုပါဘူး။ ဒါပေမဲ့ ဒေသဆိုင်ရာ ပြည်နယ်ခေါင်းဆောင် ကနေပြီး တော့ နေရာပေးနေတာ ဖြစ်ပါတယ်။ ထိုင်းနိုင်ငံလည်း အဲဒီအတိုင်းပါပဲ၊ ထိုင်းနိုင်ငံမှာ ရောက်နေတဲ့ စစ်ဘေး ဒုက္ခ သည်တွေ ထိရောက်တဲ့ အကူအညီတွေ ဘယ်တုန်းကမှ ထိုင်းနိုင်ငံက မပေးခဲ့ပါဘူး” ဟု ပြောသည်။
နွေဦးတော်လှန်ရေး လှုပ်ရှားမှုကြောင့် ဖြစ်ပေါ်လာသည့် ကိစ္စရပ်များကို အိမ်နီးချင်းနိုင်ငံများမှ မသိကျိုးကျွန် ပြုခြင်း ခံရသလို နစကကို သွယ်ဝိုက်သည့်န ည်းဖြင့် ထောက်ခံအားပေးနေသည်အထိ ရှိနေကြောင်း ၎င်းက ပြောသည်။
အိန္ဒိယ-မြန်မာနယ်စပ် ချင်းပြည်နယ်၊ ထန်တလန်မြို့နယ်အတွင်းရှိ CNF ၏ ဗစ်တိုးရီးယားဌာနချုပ် စခန်းကို တပ်မတော်က ဇန်နဝါရီ ၁၀ ရက်၊ ၁၁ ရက်နေ့က လေယာဉ်ဖြင့် ဗုံးကြဲတိုက်ခိုက်မှုကြောင့် CNF တပ်ဖွဲ့ဝင် ၅ ဦးသေဆုံးကာ ထိခိုက်ဒဏ်ရာရရှိမှုများလည်း ရှိခဲ့ကြောင်း သိရသည်။
- By CNI
- Category: နိုင်ငံရေး
- Hits: 788
CNI News
၂၀၂၃ ခုနှစ်၊ ဇန်နဝါရီ ၁၁
နွေဦးတော်လှန်ရေးမှာ မပါဝင်ရန် ချင်းအမျိုးသားတပ်ဦး (CNF)၏ ဌာနချုပ်ကို လေယာဉ်ဖြင့် ဗုံးကြဲတိုက်ခိုက်ခြင်း ဖြစ်နိုင်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။
ပြီးခဲ့သည့် ရက်ပိုင်းကလည်း ပလောင်ပြည်လွတ်မြောက်ရေးတပ်ဦး (PSLF/TNLA) ၏ ဗဟိုစခန်းများကို လေယာဉ် ဖြင့် ဗုံးကြဲတိုက်ခိုက်ခဲ့သလို ယခုဖြစ်စဉ်မှာလည်း လေယာဉ်ဖြင့် တိုက်ခိုက်ပြီး အားပေးခြင်းဖြစ်ကြောင်း ၎င်းက ပြောသည်။
ဦးသန်းစိုးနိုင်က “NUG ဦးဆောင်တဲ့ နွေဦးတော်လှန်ရေးထဲကို ဆက်လက်ပါဝင်ခြင်း မပြုပဲနဲ့ သူတို့ဘက်ကို မျက်နှာမူ လာစေဖို့အတွက် စစ်ရေးအရ ဖိအားပေးတာ အဲဒီလို အလုပ်တွေကို ပြီးခဲ့တဲ့ ရက်ပိုင်းအတွင်းက TNLA ပလောင် EAO အဖွဲ့တွေရဲ့ ဗဟိုစခန်းကိုလည်း နမ့်ဆန်မှာ ဗုံးကြဲတိုက်ခိုက်ခဲ့ပါတယ်၊ ပြီးတော့မှ မှားတယ်လို့ ပြော ပြီး ခွာထွက်သွားတယ်၊ အဲဒီမှာလည်း အတော်ပြင်းထန် ၃ ရက်လောက် လေကြောင်းထိုးစစ်တွေ လုပ်ခဲ့ပါတယ်၊ နောက်မှ ဒါက မှားယွင်းပြီး ပစ်ခတ်တာ ဖြစ်တယ်၊ အဓိပ္ပာယ်ကတော့ ညီနောင် ၃ ဖွဲ့မှာ ပါဝင်နေတဲ့ တအာင်း ပလောင် အဖွဲ့ ဌာနချုပ်ကို သွားရောက်ပြီးတော့ ဗုံးကြဲတိုက်ခိုက်တာ အဓိပ္ပာယ်ကတော့ ဒီအင်အားစုတွေ NUG အစိုးရ ဦးဆောင်ဆင်နွှဲနေတဲ့ နွေဦးတော်လှန်ရေးဘက်ကို ပါဝင်မသွားဖို့အတွက် သူတို့ တိုက်ခိုက်တာပါ၊ အလား တူပဲ CNF ကိုလည်း NUG ဦးဆောင်တဲ့ နွေဦးတော်လှန်ရေးဘက်မှာ ပါဝင်တိုက်ခိုက်နေမှုအပေါ်မှာ စစ်ရေးအရ ဖိအားပေးပြီးတော့ စစ်ကောင်စီဘက်ကို ဦးလှည့်လာဖို့၊ မျက်နှာမူလာဖို့ တိုက်ခိုက်တယ်လို့ ကျနော်ကတော့ ယူဆပါတယ်ခင်ဗျ” ဟု CNI သတင်းဌာနသို့ ပြောသည်။
၂၀၂၃ ခုနှစ်၊ ဇန်နဝါရီ ၁၀ ရက်နေ့ တပ်မတော်က CNF ဌာနချုပ်ကို ဗုံးကြဲမှု အခြေပြမြေပုံ(CHRO)
အိန္ဒိယ-မြန်မာနယ်စပ် ချင်းပြည်နယ်၊ ထန်တလန်မြို့နယ်အတွင်းရှိ CNF ၏ ဗစ်တိုးရီးယားဌာနချုပ် စခန်းကို တပ်မတော်က ဇန်နဝါရီ ၁၀ ရက် ညနေ ၄ နာရီကျော်မှာ လေယာဉ်ဖြင့် ဗုံးကြဲတိုက်ခိုက်မှုကြောင့် CNF တပ်ဖွဲ့ဝင် ၅ ဦးသေဆုံးကာ ထိခိုက်ဒဏ်ရာရရှိမှုများလည်း ရှိခဲ့ကြောင်း သိရသည်။
တစ်ဖက်နှင့်တစ်ဖက် နိုင်ငံရေးအရ ညှိနှိုင်းဆွေးနွေး၍ မရသည့်အဆုံးတွင် ထိတွေ့တိုက်ပွဲများမှာ ဆက်လက် ဖြစ်ပွားနေမှာဖြစ်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာန ကို ပြောသည်။
၎င်းက “တစ်ဖက်နဲ့ တစ်ဖက် လက်နက်ကိုင် ပဋိပက္ခအနေနဲ့ ဖြစ်ကြတယ်၊ လက်နက်ကိုင် ပဋိပက္ခမှာ ထိတွေ့မှု ရှိကြတယ်ဆိုတာတော့ ရှင်းပါတယ်၊ နိုင်ငံရေးအရ ဘယ်လိုမှ ညှိနှိုင်းဆောင်ရွက်လို့ မရတော့ဘူး။ ဒါ့အပြင် နိုင်ငံရေးအရ ညှိနှိုင်းဆောင်ရွက်တဲ့ နေရာမှာ တစ်ဖက်က ဖွင့်ပေးထားတဲ့ လမ်းကြောင်းပေါ် တစ်ဖက်က မလာနိုင် ဘူးဆိုရင်တော့ ဒါမျိုး ထိတွေ့တိုက်ခိုက်မှုကတော့ ဖြစ်လာမှာပဲ သိပ်တော့ မဆန်းလှပါဘူး။ အဲဒီတော့ ငြိမ်းချမ်း ရေး ဖိတ်ခေါ်ထားတယ်၊ လမ်းဖွင့်ပေးထားတယ်ဆိုတာ ဒီလိုမျိုး အဖြစ်အပျက်တွေကို ရှောင်လွဲပြီးတော့ တကယ် တမ်းကို ကျနော်တို့က အမျိုးသားပြန်လည် စည်းလုံးညီညွတ်ရေး ဦးတည်ထားတာပေါ့၊ အဲဒီတော့ တစ်ဖက်ထဲ ကနေပြီးတော့ ငြိမ်းချမ်းရေးဆိုတာ သွားနေလို့မရဘူး။ ပါဝင်တဲ့သူတွေ အကုန်လုံးက တကယ့်ကို ငြိမ်းချမ်းရေး လမ်းကြောင်းပေါ် သွားချင်ရဲ့လားဆိုတဲ့ အခြေအနေက ခုနပြောတဲ့ အဲဒီဆန္ဒက တစ်ဖက်က မရှိတော့ဘူး၊ အထူး သဖြင့် EAO တွေဖက်က ဒါမျိုး မလိုက်နာနိုင်တော့ဘူး။ သူတို့တွေးတာက ဒီဖက်က ဖိတ်ခေါ်ချက်ကို တစ်မျိုး အဓိပ္ပာယ် ကောက်ထားတယ်ဆိုရင်တော့ ခုနပြောတဲ့ ထိတွေ့မှု တိုက်ခိုက်မှုတွေက ဆက်ဖြစ်နေဦးမှာပါပဲ” ဟု ပြောသည်။
နိုင်ငံရေးအရ အဖြေရှာ၍ မရဘဲ တစ်ဖက်နှင့် တစ်ဖက် အပြုတ်တိုက်ကြသည့်အခါ ပြည်သူလူထုက နစ်နာနေမှာ ဖြစ်ကြောင်း နိုင်ငံရေးလေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။
၂၀၂၃ ခုနှစ်၊ ဇန်နဝါရီ ၁၀ ရက်နေ့ တပ်မတော်က CNF ဌာနချုပ်ကို ဗုံးကြဲမှုကိုတွေ့ရစဉ်
၎င်းက “သူတို့ NCA ထိုးထားတဲ့ အဖွဲ့တွေရော၊ မထိုးရသေးတဲ့ UWSA တို့ ဘာတို့နဲ့ရော ကောင်းကောင်းမွန်မွန် ဒီနိုင်ငံရေးအရ ဖြေရှင်းပြီးတော့ ဆွေးနွေးပြီးတော့ ဖြေရှင်းဖို့ ကြိုးစားနေတာပဲလေ၊ NUG တို့ PDF တို့ကတော့ အပြုတ်တိုက်မယ်ဆိုပြီးတော့ စေ့စပ်ဆွေးနွေးရေးကိုလည်း လက်မခံ၊ သူတို့ ပေါ်လာတာလည်း မကြာသေးဘူး။ အဲဒီလိုဆိုတော့ တိုင်းရင်းသား လက်နက်ကိုင် အဖွဲ့အစည်းတွေနဲ့ မူလကတည်းက မူလရည်ရွယ်ချက်တွေလည်း မတူကြဘူးလေ၊ မတူကြတော့ နှစ်ဖက်စလုံးက နိုင်ငံရေးနည်းနဲ့ ဖြေရှင်းဖို့၊ ဆွေးနွေးဖို့လည်း နှစ်ဖက်စလုံးက သဘောမတူတာ၊ တပ်ကလည်း သဘောမတူဘူး။ ဟိုဖက်ကလည်း သဘောမတူဘူး။ အဲဒီလို သဘောမတူတဲ့ လက်နက်ကိုင် အဖွဲ့အစည်းတွေကို ထောက်ပံ့နေတဲ့၊ ကူညီနေတဲ့ တိုင်းရင်းသားလက်နက်ကိုင် အဖွဲ့အစည်းတွေ ကိုလည်း တပ်က ရန်သူလို့ စာရင်းသွင်းပြီးတော့ တိုက်တာပေါ့ဗျာ၊ အဲဒီတော့ နိုင်ငံရေးအရ ဆွေးနွေးဖို့ အဖြေရှာဖို့ မဖြစ်မချင်းကတော့ တစ်ဖက်နဲ့ တစ်ဖက် မူလရည်ရွယ်ချက်အတိုင်း အပြုတ်တိုက်ကြတဲ့အခါ လူထုကတော့ အများကြီး နစ်နာမှာပေါ့နော်၊ ပြည်သူလူထုရော တိုင်းပြည်ရော နစ်နာမှာပေါ့” ဟု ပြောသည်။
နစကနှင့် တွေ့ဆုံဆွေးနွေးခြင်း မရှိသလို ၎င်းတို့ကိုလည်း အယုံအကြည်မရှိကြောင်း ချင်းပြည်နယ် ပူးတွဲ ကာကွယ်ရေး ကော်မတီ (CJDC)မှ ပြောရေးဆိုခွင့်ရှိသူတစ်ဦးက CNI သတင်းဌာနသို့ ပြောသည်။
၎င်းက “ကျနော်တို့ဘက်ကတော့ ဘယ်လိုပြောမလဲ နိုင်ငံရေးအရလည်း ကျနော်တို့နဲ့ ဆွေးနွေးခဲ့တာလည်း မရှိသလို သူတို့ရဲ့ ပြောဆိုချက်အပေါ်မှာလည်း တစ်ခါမှလည်း ဒီကြားထဲမှာ တွေ့ဆုံဆွေးနွေးခဲ့တာလည်း မရှိ ဘူးဆိုတော့လေ သူတို့ပြောသမျှကိုတော့ ဘယ်လိုပြောမလဲ တသမတ်တည်း တစ်ခုအနေနဲ့ မှတ်ယူထားတာ မျိုးတော့ မရှိပါဘူးခင်ဗျ၊ သူတို့အနေနဲ့ကတော့ သူတို့ လုပ်စရာရှိတာ လုပ်သွားမှာပဲ၊ သူတို့အနေနဲ့ တရားဝင် ပဲဖြစ်ဖြစ်၊ တရားမဝင်ပဲ ဖြစ်ဖြစ် သူတို့ ပေးပို့တဲ့စာတွေ သူတို့ ထုတ်ပြန်ချက်တွေကိုတော့ ကျနော်တို့ အယုံအကြည် မရှိတာတော့ အခုမှ မဟုတ်တဲ့အတွက် အရမ်းကြီးလည်း ကျနော်တို့ ထိတ်လန့်မနေပါဘူး” ဟု ပြောသည်။
ချင်းအမျိုးသားတပ်ဦး (CNF) သည် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) လက်မှတ်ရေးထိုးထားသော ချင်းလက်နက်ကိုင်တပ်ဖွဲ့ဖြစ်သည်။
သို့သော်လည်း ၂၀၂၁ ခုနှစ်၊ ဖေဖော်ဝါရီအတွင်း မြန်မာ့နိုင်ငံရေး အပြောင်းအလဲ ဖြစ်ပွားခဲ့ပြီးနောက် ချင်းဒေသ အတွင်း ပေါ်ပေါက်လာသည့် LDF (တနည်းအားဖြင့် CDF)များနှင့် ပူးပေါင်းပြီး မြန်မာ့တပ်မတော်နှင့် တိုက်ပွဲများ ဖြစ်ပွားလျက်ရှိသည်။
- By CNI
- Category: နိုင်ငံရေး
- Hits: 752
CNI News
၂၀၂၃ ခုနှစ်၊ ဇန်နဝါရီ ၁၀
ထိုင်းနိုင်ငံ ဘန်ကောက်မြို့ရှိ မြန်မာသံရုံးအနေဖြင့် မြန်မာရွှေ့ပြောင်းအလုပ်သမားများအား လက်ရှိ၌ နိုင်ငံကူး လက်မှတ်စာအုပ်အသစ်အတွက် တိုကင်ရက်ချိန်းပေးရာတွင် တာဝန်ယူဆောင်ရွက်ပေးမှုမှာ ညံ့ဖျင်းကြောင်း ထိုင်းအခြေစိုက် အလုပ်သမားအရေးဆောင်ရွက်နေသူများက ထောက်ပြပြောဆိုသည်။
ပြီးခဲ့သည့် ဇန်နဝါရီ ၇ ရက်နေ့က နိုင်ငံကူးလက်မှတ်သက်တမ်းတိုးရန်အတွက် တိုကင်ရက်ချိန်းများအား ဘန်ကောက်ရှိ မြန်မာသံရုံးမှ ပြန်လည်ထုတ်ပေးခဲ့ရာတွင် မြန်မာရွှေ့ပြောင်းအလုပ်သမား ထောင်နှင့်ချီကာ တန်းစီစောင့်ဆိုင်းနေကြရပြီး မူးမေ့လဲသူများလည်း ရှိခဲ့သည်။
ထို့ကြောင့် မြန်မာရွှေ့ပြောင်းအလုပ်သမားများအား နိုင်ငံကူးလက်မှတ်သက်တမ်းတိုးရေး လုပ်ဆောင်ရာတွင် မြန်မာသံရုံး၏လုပ်ငန်းဆောင်တာများမှာ ညံ့ဖျင်းကြောင်း ပြောရခြင်းဖြစ်သည်ဟု မြန်မာရွှေ့ပြောင်း အလုပ်သမား အရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။
သက်တမ်းတိုးဖို့ လာရောက်စောင့်ဆိုင်းရင်း မူးလဲခဲ့သည့် မြန်မာအလုပ်သမားတစ်ဦး
၎င်းက “ဒီစာအုပ်ထုတ်ပေးတဲ့လုပ်ငန်းဟာ လုံးဝမှားနေတဲ့စနစ်ကြီးလိုဖြစ်နေတယ်။ ပိုမို ကြန့်ကြာစေတာဖြစ်သလို အလုပ်သမားတွေကို ပိုမိုပြီးတော့မှ အချိန်ကုန်စေတယ်။ အခက်တွေ့စေတယ်။ ကိုယ်လုပ်ချင်တိုင်း လုပ်နေမယ် ဆိုရင် ဒီအလုပ်သမားတွေအတွက် ငါတို့ဟာ အကူအညီပေးတာနဲ့တူမလား။ ကူထောင်းနေတာနဲ့ တူမလား။ ဒါတွေစဉ်းစားဖို့လိုအပ်တယ်။ ဒီ ခယူ(တိုကင်) ရရင်ရော စာအုပ်က လွယ်လွယ်လေး ရမှာလားပေါ့။ တော်ကြာ စာအုပ်ကကုန်သွားလို့၊ မရသေးလို့၊ မရှိသေးလို့ဆိုတာ အဲဒါမျိုးတွေ ခဏခဏ သံရုံးတွေမှာ ဖြစ်လေ့ရှိနေတာပဲ။ ကျနော်ထင်ပါတယ် စာအုပ်ထုတ်ပေးတဲ့ စနစ်ကြီးကို သက်ဆိုင်ရာ တာဝန်ရှိသူတွေက ဒီအလုပ်သမားတွေ အပေါ်မှာ တကယ်ထိထိ ရောက်ရောက်ပေါ့။ အချိန်နဲ့အကန့်အသတ်တစ်ခုနဲ့ စာအုပ်လာလျှောက်တဲ့သူကို လျှောက်တဲ့နေ့ကနေ စာအုပ်လက်ထဲရောက်တဲ့အချိန်အထိ ထုတ်ပေးရမယ့် စနစ်ကို ဒီသံရုံးရှေ့ကြီးမှာ လူပေါင်း ထောင်နဲ့ရောက်လာအောင် ခယူ(တိုကင်)လာယူရတာ တစ်ခုခုတော့ လွဲနေတယ်။ ရိုးရိုးသားသားပြောရရင်တော့ စာအုပ်ထုတ်ပေးတဲ့စနစ်က အခုအချိန်ထိ မှားနေတုန်းပဲ သံရုံးက” ဟု ပြောသည်။
၂၀၂၂ ခုနှစ်အတွင်း နိုင်ငံကူးလက်မှတ်သက်တမ်းကုန်သည့် မြန်မာရွှေ့ပြောင်းအလုပ်သမားများအား တိုကင် ရက်ချိန်း ထုတ်ပေးရာတွင် လူအစုလိုက်အပြုံလိုက်ဖြစ်သွားသည့်အတွက် အပတ်စဉ် စနေ့နေ့တိုင်းတွင် လအလိုက် သက်တမ်းကုန်သူများအား ထုတ်ပေးမည်ဟု ဘန်ကောက်ရှိ မြန်မာသံရုံးက ပြန်လည်ထုတ်ပြန်ထားသည်။
ထိုသို့ တစ်ပတ်လျှင် တစ်ရက်တည်းသာ ရက်ချိန်းထုတ်ပေးမည်ဆိုပါက ပိုမို၍ အချိန်ကြန့်ကြာမှာဖြစ်သလို အချို့ စက်ရုံ၊ အလုပ်ရုံတို့တွင် စနေနေ့အား ခွင့်ယူ၍ မရသည်များလည်း ရှိသဖြင့် မြန်မာရွှေ့ပြောင်း အလုပ်သမားများ အတွက် အခက်အခဲများဖြစ်စေကြောင်းလည်း ထိုင်းအခြေစိုက် အလုပ်သမားအရေး ဆောင်ရွက်နေသူများက ပြောသည်။
MWRN မှ အလုပ်သမားတာဝန်ခံ ဦးဘရီက “အခုထိုင်းမှာ သန်းနဲ့ချီပြီးတော့ရှိနေတဲ့ အလုပ်သမားတွေအတွက် ဘယ်လိုမှ လိုက်လို့မမီဘူးလေ။ အဲဒီလိုဆိုရင် အခြေအနေက ပိုဆိုးသွားနိုင်တယ်။ အခု အနေအထားဆိုရင် အင်မတန်မှ ညံ့ဖျင်းမှုတွေ ဖြစ်နေတာပေါ့နော် ကျနော်တို့မြင်ရတာ။ ဘာဖြစ်လို့လဲဆိုရင် ရွှေ့ပြောင်း အလုပ်သမား တွေအနေနဲ့ ပြည်တွင်းကိုလည်း ပြန်ဝင်ပြီးတော့ လုပ်ဖို့အတွက်လည်း နယ်စပ်ဂိတ်တွေက ပိတ်ထားတဲ့အခါ ကျနော်တို့ အလုပ်သမားတွေအတွက် ထွက်ပေါက်က ပိတ်နေတယ်။ ထွက်ပေါက် ပိတ်နေတဲ့အနေအထားမှာ ထိုင်းနိုင်ငံ ဘန်ကောက်မြို့မှာရှိတဲ့ မြန်မာသံရုံးအနေနဲ့ အခကြေးငွေများများယူတာကိုတော့ အပြစ်မပြောပါဘူး။ ဒါပေမယ့် ရက်တိုအတွင်းမှာ ပြီးစီးအောင်ပေါ့ ကျနော်တို့ ရွှေ့ပြောင်းအလုပ်သမားတွေအတွက် လုပ်ပေးနိုင်မယ် ဆိုလို့ရှိရင် အဆင်ပြေတယ်လို့ ကျနော်တို့မြင်တာပေါ့” ဟု ပြောသည်။
နိုင်ငံကူးလက်မှတ် သက်တမ်းတိုးခြင်းနှင့် တိုကင်ရက်ချိန်းများအား ဘန်ကောက်ရှိ မြန်မာသံရုံးတွင်သာ ထုတ်ပေး နေခြင်းဖြစ်သည်။
ထို့ကြောင့် ၎င်းအနီးပတ်ဝန်းကျင်တွင် နေထိုင်လုပ်ကိုင်လျက်ရှိသည့် မြန်မာရွှေ့ပြောင်း အလုပ်သမားများ အတွက်သာ အဆင်ပြေကြောင်းနှင့် ထိုင်းနိုင်ငံရှိ နယ်မြို့များတွင် နေထိုင် အလုပ်လုပ်ကိုင်လျက်ရှိသည့် မြန်မာရွှေ့ပြောင်း အလုပ်သမားများအတွက်လည်း စဉ်းစားပေးစေချင်ကြောင်း FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။
နိုင်ငံကူးလက်မှတ်သက်တမ်းတိုးရန် တန်းဆီးစောင့်ဆိုင်းနေကြသူများ
၎င်းက “နယ်ကလူတွေကို ဘယ်တော့မှ ထည့်မစဉ်းစားတဲ့ကိစ္စ။ အရင်တုန်းကလည်း ကျနော်တို့တွေ ပြောဖူး တယ်။ ဒီဟာ လာတန်းစီရင် နယ်က လူက ဘယ်လိုလာတန်းစီပြီးတော့ လုပ်မလဲ။ အဲဒါအရေးကြီးတာ။ ဥပမာ တန်းစီလို့ရတယ်ပဲ ထားဦး လာတန်းစီးပြီးတော့ ရက်ချိန်းကို တစ်ခါ ပြန်လာရမယ်။ အဲဒီသွားလာရမယ့် ကုန်ကျ စရိတ်တွေ အခက်အခဲတွေပေါ့နော်။ အထောက်အထားတိုးတယ်ဆိုတဲ့ဟာက တစ်ဖက်တည်းကို ကြည့်လို့ရတဲ့ဟာ မဟုတ်ဘူး။ နှစ်ဖက်စလုံးကိုကြည့်ရတာ အစိုးရဌာန နှစ်ဖက်စလုံး။ ဒီဘက်မှာ work permit တို့ ဗီဇာတို့ ဒါတွေ တိုးဖို့ဆိုတာ ဌာနဆိုင်ရာတွေက ပတ်စပို့မှာရှိတဲ့ သက်တမ်းကို ကြည့်ပြီးတော့ ပေးတာ။ အဲဒီတော့ ပတ်စပို့ရှိတဲ့ သက်တမ်းက အနည်းဆုံး တစ်နှစ်လောက်ရှိနေမှာ။ ၆ လနဲ့ အထက်ဆိုတာတော့ ထားပါတော့။ သို့သော် အဲဒီလို မရှိတော့ဘူးဆိုရင် ဒီဘက်မှာ ပေးလို့မရဘူး။ ဒီဘက်က မပေးဘူး သူ့ရဲ့ ဥပဒေအရ” ဟု ပြောသည်။
ထို့ကြောင့် မြန်မာရွှေ့ပြောင်းအလုပ်သမားများအား နိုင်ငံကူးလက်မှတ်သက်တမ်းတိုးပေးခြင်းနှင့် တိုကင် ရက်ချိန်း ထုတ်ပေးခြင်းအား ဘန်ကောက်ရှိ မြန်မာသံရုံးတစ်ခုတည်း၌ မဟုတ်ဘဲ အခြားနေရာဒေသများတွင်လည်း ယာယီ စခန်းများဖွင့်လှစ်၍ လုပ်သင့်ကြောင်း ထိုင်းအခြေစိုက် အလုပ်သမားအရေး ဆောင်ရွက်နေသူများက အကြံပြု သည်။
၂၀၂၂ ခုနှစ်အတွင်း နိုင်ငံကူးလက်မှတ်သက်တမ်းကုန်ဆုံးသွားသည့် မြန်မာရွှေ့ပြောင်းအလုပ်သမားများနှင့် ပတ်သက်၍ မြန်မာသံရုံးအနေဖြင့် ထိုင်းဘက်ရှိ ဌာနဆိုင်ရာတို့အား တစ်စုံတစ်ခု မေတ္တာရပ်ခံထားသင့်ကြောင်း ထိုင်းအခြေစိုက် အလုပ်သမားအရေး ဆောင်ရွက်နေသူများက ပြောသည်။
ဇန်နဝါရီ ၇ ရက်နေ့က နိုင်ငံကူးလက်မှတ် သက်တမ်းတိုးရန်အတွက် တိုကင်ရက်ချိန်းရရှိသည့် လူပေါင်း ၆၁၄၂ ဦးအား ထုတ်ပေးခဲ့ကြောင်း မြန်မာသံရုံးက သတင်းထုတ်ပြန်ထားသည်။
- By CNI
- Category: နိုင်ငံရေး
- Hits: 779
CNI News
၂၀၂၃ ခုနှစ်၊ ဇန်နဝါရီ ၁၀
လက်ရှိ အကြမ်းဖက်မှုများနှင့် လက်နက်ကိုင် တိုက်ခိုက်မှုများကို ရန်တန့်ရန် လိုအပ်နေပြီဖြစ်ကြောင်း နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။
နိုင်ငံတော် တည်ငြိမ်အေးချမ်းမှု မရှိပါက ဆက်လက် လုပ်ဆောင်ရမည့် ဒီမိုကရေစီနှင့်ဖက်ဒရယ်စနစ်ကို အခြေခံ သော ပြည်ထောင်စုတည်ဆောက်ရေးနှင့် နိုင်ငံတော် ဖွံ့ဖြိုးတိုးတက်မှုတို့မှာ အလှမ်းဝေးနေဆဲဖြစ်ကြောင်း ယနေ့ (ဇန်နဝါရီ ၁၀) နေ့တွင် ကျရောက်သည့် ကချင်ပြည်နယ်နေ့သို့ ပေးပို့သည့် သဝဏ်လွှာတွင် ဖော်ပြထားသည်။
ဗိုလ်ချုပ်မှူးကြီးမင်းအောင်လှိုင်က “ငြိမ်းချမ်းရေး လုပ်ငန်းစဉ်များ အောင်မြင်စေရန်အတွက် သက်ဆိုင်ရာ အဖွဲ့အစည်းများ၊ သက်ဆိုင်သူများ အနေဖြင့် သဘောထား မှန်ကန်ကြပြီး နိုင်ငံတော် အကျိုးအတွက်ဆိုသည် တူညီသော စိတ်ဆန္ဒများ ရရှိရန် လိုအပ်ကြောင်း၊ နိုင်ငံတော် အစိုးရအနေဖြင့်လည်း ငြိမ်းချမ်းရေး လုပ်ငန်းစဉ်များ ကို မထိခိုက်စေရေး တတ်နိုင်သမျှ ထိန်းသိမ်းဆောင်ရွက်နေကြောင်း၊ နိုင်ငံတော် တည်ငြိမ်အေးချမ်းမှု မရှိပါက ဆက်လက် လုပ်ဆောင်ရမည့် ဒီမိုကရေစီနဲ့ ဖက်ဒရယ်စနစ်ကို အခြေခံသော ပြည်ထောင်စုတည်ဆောက်ရေးနဲ့ နိုင်ငံတော် ဖွံ့ဖြိုးတိုးတက်မှုတို့မှာ အလှမ်းဝေးနေဆဲ ဖြစ်တယ်ဆိုတာ အားလုံးသိရှိပြီး ဖြစ်ပါတယ်၊ အဲဒါကြောင့် လက်ရှိ အကြမ်းဖက်မှုများနဲ့ လက်နက်ကိုင် တိုက်ခိုက်မှုတွေကို လျှော့ချပြီး ရပ်တန့်ကြရန် လိုအပ်နေပြီဖြစ် ကြောင်း အသိပေး ဖော်ပြအပ်ပါသည်” ဟု ပြောထားသည်။
ကချင်ပြည်နယ်နေ့ အခမ်းအနားကိုတွေ့ရစဉ်(Shwe Min-fb)
လက်ရှိ မြန်မာနိုင်ငံတွင် လက်နက်ကိုင် ပဋိပက္ခများ ဖြစ်ပွားနေပြီး လူသေဆုံးမှုများ၊ နေရပ်စွန့်ခွာ ထွက်ပြေးမှုများ၊ လူနေအိမ် မီးလောင်ပျက်စီးမှုများ ဖြစ်ပွားလျက်ရှိနေသည်။
မြန်မာ့တပ်မတော်မှ တိုက်ပွဲများ ရပ်ဆိုင်းပြီး ပြည်သူများအား ရန်သူဟု သတ်မှတ်နေမှုကို ရပ်တန့်ရန် လိုအပ် ကြောင်း ပအိုဝ်းအမျိုးသား ဖက်ဒရယ်ကောင်စီ (PNFC) မှ ဥက္ကဋ္ဌ ခွန်မြင့်ထွန်းက CNI သတင်းဌာနသို့ ပြောသည်။
၎င်းက “အဓိကအကြောင်းအရင်းကတော့ ကျနော်တို့ တိုင်းပြည်မှာ စစ်အာဏာရှင်စနစ် သက်ဆိုးရှည်နေတာက အဓိက အကြောင်းအရင်း ဖြစ်ပြီးတော့ လတ်တလော အကြောင်းအရင်းကတော့ စစ်ကောင်စီ ကနေပြီးတော့ တိုင်းပြည်ရဲ့ အာဏာကို မတရားသိမ်းပိုက်ထားတယ်၊ ပြီးတော့ လူထုရဲ့ ဆန္ဒတွေကို ၂၀၂၀ ရွေးကောက်ပွဲ ရလဒ် တွေကို မျက်ကွယ်ပြုခဲ့တယ်၊ ပြီးရင် ပြည်သူကို ရန်သူလို့ သတ်မှတ်ပြီးတော့ ရက်ရက်စက်စက် ချေမှုန်းနေတဲ့ အတွက်ကြောင့်လည်း ဒီဟာတွေ ပေါ်ပေါက်နေတာ ဖြစ်ပါတယ်၊ ဒါကြောင့် အကြောင်းရင်း အနေနဲ့ အကြောင်းအရင်းကို သတ်ဖို့ကတော့ စစ်အာဏာရှင်စနစ်ကို ကျနော်တို့ တိုင်းပြည်ကနေ အပြီးတိုင်ဖယ်ရှားရမှာ ဖြစ်ပါတယ်၊ လတ်တလော အကြောင်းအရင်းကို ငြိမ်းသက်နိုင်ဖို့ကတော့ စစ်ကောင်စီဖက်ကနေ ပထမဦးဆုံး တိုက်ပွဲတွေ ရပ်ဆိုင်းဖို့လိုတယ်၊ ပြည်သူကို ရန်သူလို့ သတ်မှတ်ထားပြီးတော့ နှိပ်စက်ညဉ်းပမ်းနေတာကို အရင်ဆုံး ချက်ချင်းရပ်တန့်ဖို့ လိုပါတယ်” ဟု ပြောသည်။
NUG ခေါင်းဆောင်နဲ့ PDF များကိုတွေ့ရစဉ်
၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် မြန်မာ့တပ်မတော်က အမျိုးသားဒီမိုကရေစီအဖွဲ့ချုပ်(NLD)အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရန် ကြိုးပမ်းသည်ဟု ဆိုကာ ဖြုတ်ချခဲ့ပြီးနောက် ဆန့်ကျင်ဆန္ဒပြမှုနှင့်အတူ လက်နက်ကိုင် တော်လှန်ရေးကို ဆင်နွှဲခဲ့ကြသည်။
အဆိုပါ တိုက်ပွဲများကြောင့် တိုက်ပွဲရှောင် ဒေသခံဦးရေ ၂ သန်းနီးပါးရှိလာပြီဖြစ်ကြောင်း ISP Myanmar ၏ ထုတ်ပြန်ချက်အရ သိရသည်။
- By CNI
- Category: နိုင်ငံရေး
- Hits: 766
CNI News
၂၀၂၃ ခုနှစ်၊ ဇန်နဝါရီ ၉
ယခု ၂၀၂၃ ခုနှစ်သည် လက်ရှိ ပြည်တွင်းမှာ ဖြစ်ပွားနေသည့် တိုက်ပွဲများ ပိုမိုပြင်းထန်လာပြီး အဆုံးအဖြတ်ဆီ ဦးတည်သွားနိုင်သောနှစ် ဖြစ်နိုင်ကြောင်း မြန်မာ့နိုင်ငံရေးလေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။
မြန်မာ့တပ်မတော် ဘက်ကလည်း မိုးမဝင်ခင် ပိုမိုထိုးစစ်ဆင်လာနိုင်ကြောင်း၊ ပြည်သူများလည်း ပိုမိုပြီး ဒုက္ခ ရောက်စရာရှိကြောင်း ၎င်းက ပြောသည်။
ဒေါက်တာလှကျော်ဇောက “အခုဟာကလေ မြို့ပြပြောက်ကျားတို့ သို့မဟုတ် ပြည်မထဲသို့ ထားလိုက်ဦး၊ အခု ပတ်ပတ်လည်မှာ ဖြစ်နေတဲ့ ကိစ္စတွေလည်း သူမဖြေရှင်းနိုင်သေးဘူးလေ၊ အခု ကြာအင်းဆိပ်ကြီးတို့လို နေရာမျိုး အဲဒီလိုဘက်တွေမှာ နောက် KIA တို့ဘက်တွေမှာလည်း မနေ့ကပဲ ဖားကန့်က ဆန္ဒပြပွဲတို့ ဘာတို့ ရှိနေတာ၊ KIA တို့ကလည်း မနေဘူး ဖော်မှာပဲ တိုက်ပွဲက တအောင်းနဲ့ ဖြစ်နေတာ၊ ကိုးကန့်နဲ့ ဖြစ်နေတာလည်း တောက် လျှောက် ကြားနေတာပဲ၊ အဲဒီတော့ ဒီပြည်မကြီးထက် အဲပတ်ပတ်လည်မှာတော့ သူတော်တော် လှုပ်ရှားနေရ တယ်ဗျ၊ နောက်တစ်ခုက ခင်ဗျားတို့ သတိထားမိသလားမသိဘူး။ စကစရဲ့ တိုက်ရေခိုက်ရေက တော်တော်ကို အခြေအနေ ဆိုးနေတယ်၊ အခြေအနေ ဆိုးတယ်ဆိုတာ ဒီလိုလေ သူတို့တပ်မှာကိုက တပ်မှူးကောင်းကို မရှိတော့ တာ၊ ဒါကလည်း တောက်လျှောက်ဗျ၊ စစ်တပ်က ငြိမ်းချမ်းရေးယူထားတဲ့ အနှစ် ၂၀ အတွင်းမှာ စစ်တပ်က တော် တော်ပျက်သွားပြီ။ အဲဒါကြောင့်မို့လို့ စကစဘက်က အထိအခိုက် အကျဆုံးတွေက မုချများမှာ၊ အဲဒီတော့ သူတို့ ဘယ်လောက်ပဲတိုက်တိုက် သူတို့ကတော့ တိုးတိုက်လာမှာပဲ၊ မြေပြင်ကနေမရရင် လေယာဉ်ကနေချမယ်၊ ဘာ မယ်၊ ပြည်သူတွေကိုတော့ ပိုပြီးတော့ အတိဒုက္ခ ပိုပြီးတော့ ရောက်စရာတွေတော့ ရှိတာပေါ့၊ သို့သော်လည်း စစ်ကောင်စီဖက်က သိပ်တော့ မချောင်လောက်ပါဘူး။ ဒီနှစ်က သူတို့ပြောသလိုပဲ အဆုံးအဖြတ်နှစ် မဟုတ်တောင် မှ အဆုံးအဖြတ်ဆီ ဦးတည်သွားနိုင်တဲ့ နှစ်ဖြစ်နိုင်ပါတယ်” ဟု ပြောသည်။
နွေဦးတော်လှန်ရေး လက်နက်ကိုင်အင်အားစု တစ်ဖွဲ့ကိုတွေ့ရစဉ်
၂၀၂၃ ခုနှစ်သည် နွေဦးတော်လှန်ရေး၏ အဆုံးသတ်တိုက်ပွဲအတွက် အဆုံးအဖြတ်နှစ်ဖြစ်ကြောင်း အမျိုးသား ညီညွတ်ရေးအစိုးရ(NUG) က ၂၀၂၂ ခုနှစ်၊ အောက်တိုဘာ ၇ ရက်နေ့ညတွင် ပြုလုပ်သည့် ပြည်သူ့ခုခံတော်လှန်စစ် တစ်နှစ်ပြည့် သုံးသပ်ချက်နှင့် ရှေ့လုပ်ငန်းစဉ်များ ချမှတ်ခြင်း သတင်းစာ ရှင်းလင်းပွဲတွင် ပြောကြားခဲ့သည်။
စစ်ရေးအရ ၂၀၂၃ ခုနှစ်မှာ အဆုံးအဖြတ်နှစ် ဖြစ်နိုင်စရာမရှိကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။
၎င်းက “အဲဒါကတော့ နှစ်ပိုင်းရှိတယ်၊ စစ်ရေးအရပြောရင် ဘယ်လိုမှ ဖြစ်နိုင်စရာအကြောင်းမရှိဘူး၊ ဒါကတော့ သက်သက်မဲ့ ကိုယ့်ကိုယ်ကို ပြန်ပြီးတော့ ရမ်း(မောင်း)တင်တဲ့ သဘောပါပဲ၊ စစ်ရေးပိုင်းအရ ဘယ်လိုမှ လုပ်နိုင် စရာ အကြောင်းမရှိဘူး။ ဘာကြောင့်လဲဆိုတော့ ၂၀၂၁ ကနေ ၂၀၂၂ အကုန်ပေါ့နော်၊ ၂၀၂၃ အစအထိ ၂ နှစ်ကာလ တွက်ကြည့်လိုက် အဲဒီထဲမှာ ၁ နှစ်ခွဲ ကျော်ကျော်လောက်က လက်နက်ကိုင်ပဋိပက္ခကို သူတို့ ရွေးချယ်ခဲ့တယ်၊ အကြမ်းဖက်ဖို့ လမ်းစဉ်ကို သူတို့ရွေးချယ်ခဲ့တယ်၊ ဒါပေမဲ့ အောင်မြင်မှုမရှိဘူး။ မရှိတဲ့အပြင်ကို သူတို့ ပိုဆိုးလာ တာက လုပ်ရပ်တွေအကုန်လုံးက အကြမ်းဖက်ကို ဦးတည်သွားတဲ့ အတွက်ကြောင့် လက်နက်ကိုင်လမ်းစဉ်နဲ့ သွားမယ်ဆိုတဲ့ ကိစ္စရပ်မှာတော့ အဆုံးအဖြတ်က ဖြစ်နိုင်စရာ အကြောင်းမရှိဘူး။ တစ်ခုပဲ အဲဒါကို နိုင်ငံရေးနည်း အရ ပြန်တွေးမယ်ဆိုရင်တော့ ရွေးကောက်ပွဲကို ဖျက်ပြီးတော့ သူတို့ အောင်မြင်တယ်လို့ အော်ရင်တော့ တစ်မျိုး ဖြစ်သွားနိုင်တယ်၊ သူတို့ပြောတဲ့ အဆုံးအဖြတ်ဆိုတဲ့ ကိစ္စရပ်သည် မြေပြင်က လက်နက်ကိုင်လမ်းစဉ်နဲ့က ဖြစ်နိုင် စရာ အကြောင်း လုံးဝမရှိပါဘူး။ ရွေးကောက်ပွဲကို သူတို့ ရာခိုင်နှုန်း ဘယ်လောက်လောက် ဖျက်မလဲ အဲလို ဖျက် ပြီးတော့ အဖျက်အမှောင့်လုပ်ရင်းနဲ့ပဲ သူတို့ အောင်မြင်တယ်လို့ ယူဆမလား၊ အဲဒီနှစ်လမ်းပဲ ရှိတာဗျ၊ သေချာတာ ကတော့ လက်နက်ကိုင်လမ်းစဉ်နဲ့က ဖြစ်စရာအကြောင်း လုံးဝမရှိပါဘူး” ဟု ပြောသည်။
NUG ၏ ကာကွယ်ရေး၀န်ကြီး ဦးရည်မွန်နဲ့ PDF အဖွဲ့ကိုတွေ့ရစဉ်
၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် မြန်မာ့တပ်မတော်က အမျိုးသားဒီမိုကရေစီအဖွဲ့ချုပ်(NLD)အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရန် ကြိုးပမ်းသည်ဟု ဆိုကာ ဖြုတ်ချခဲ့ပြီးနောက် ဆန့်ကျင်ဆန္ဒပြမှုနှင့်အတူ လက်နက်ကိုင် တော်လှန်ရေးကို ဆင်နွှဲခဲ့ကြသည်။
လက်ရှိတွင်လည်း ကရင်ပြည်နယ်၊ ကယား(ကရင်နီ)ပြည်နယ်၊ ချင်းပြည်နယ်၊ စစ်ကိုင်းတိုင်းဒေသကြီးနှင့် မကွေး တိုင်းဒေသကြီးတို့တွင် မြန်မာ့တပ်မတော်နှင့် တိုင်းရင်းသား လက်နက်ကိုင် အဖွဲ့အစည်းအချို့၊ ပြည်သူ့ ကာကွယ် ရေးတပ် (PDF) ပူးပေါင်းတပ်တို့အကြား တိုက်ပွဲများ ဖြစ်ပွားလျက်ရှိသည်။
- By CNI
- Category: နိုင်ငံရေး
- Hits: 527
CNI News
၂၀၂၃ ခုနှစ်၊ ဇန်နဝါရီ ၇
အာဆီယံ ဥက္ကဋ္ဌအသစ် လက်ထက်တွင် မြန်မာနိုင်ငံ၏ အပြောင်းအလဲတစ်ခု ဖြစ်မည်ဟု မျှော်လင့်ကြောင်း ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) မှ အထွေထွေအတွင်းရေးမှူး စိုင်းလိတ်က CNI သတင်းဌာနသို့ ပြောသည်။
အာဆီယံဥက္ကဋ္ဌအဖြစ် တာဝန်ထမ်းဆောင်မည့် အင်ဒိုနီးရှားနိုင်ငံက စစ်အာဏာရှင်စနစ်ကို အားပေးမှာ မဟုတ်ကြောင်း ၎င်းက ပြောသည်။
စိုင်းလိတ်က “အခု အာဆီယံဥက္ကဋ္ဌအဖြစ် ထမ်းဆောင်မယ့် အင်ဒိုနီးရှားနိုင်ငံက အရှေ့တောင်အာရှမှာ အင်အား အကြီးဆုံး ဒီမိုကရေစီနိုင်ငံတစ်ခု ဖြစ်တယ်ပေါ့နော်၊ အဲဒီတော့ သူက အာဏာရှင်စနစ်ကိုတော့ အားပေးမှာ မဟုတ်ဘူး။ ဆိုတော့ ဒီမိုကရေစီ အရေးဖက်ကို ပိုပြီးတော့မှ ဦးတည်အောင် ပိုပြီး အာရုံစိုက်အောင်တော့ သူကတော့ အရင်ကထက် ပိုပြီး ဖိအားပေးလိမ့်မယ်လို့ မျှော်လင့်ပါတယ်၊ ကမ္ဘောဒီးယားနဲ့ စာရင်တော့ အရွေ့အပြောင်း တစ်ခု တော့ ဖြစ်မယ်လို့ မျှော်လင့်ပါတယ်ခင်ဗျ” ဟု ပြောသည်။
လက်ရှိ အကျပ်အတည်းကို ဖြေရှင်းနိုင်ငံရေး နိုင်ငံတကာ၏ ပူးပေါင်းပါဝင်မှု လိုအပ်ကြောင်း တစ်နိုင်ငံလုံးပစ်ခတ် တိုက်ခိုက်မှုရပ်စဲရေး သဘောတူစာချုပ်(NCA)ထိုးထားသည့် လက်နက်ကိုင် ၇ ဖွဲ့ဖြင့် စုဖွဲ့ထားသော ငြိမ်းချမ်းရေး လုပ်ငန်းစဉ် ဦးဆောင်အဖွဲ့(PPST)၏ ပြောခွင့်ရပုဂ္ဂိုလ် ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။
အာဆီယံအလှည့်ကျ ဥက္ကဋ္ဌ အင်ဒိုနီးရှားသမ္မတ ဂျိုကိုဝီဒိုဒိုကိုတွေ့ရစဉ်
ဗိုလ်မှူးကြီးစောကျော်ညွန့်က “လာမယ့် အာဆီယံဥက္ကဋ္ဌ အပြောင်းအလဲ၊ အခင်းအကျဉ်း အပေါ်မှာကတော့ တကယ် ဖြစ်တည်လာတဲ့ အခြေအနေအပေါ်မှာလည်း ကျနော်တို့က အဲဒီကနေ ထွက်ရှိလာတဲ့ ကျနော်တို့ရဲ့ ပူးပေါင်းဆောင်ရွက်မှု အပေါ်မှာ ဘယ်လောက်အတိုင်းအတာအထိ ကျနော်တို့အတွက် အကူအညီ ပံ့ပိုးမှုတွေ ဖြစ်နိုင်မလဲ ဆိုတာတော့ ကျနော်တို့ ပြောနိုင်မှာ ဖြစ်ပါတယ်ခင်ဗျ၊ လောလောဆယ် အရတော့ ကျနော်တို့ အနေ နဲ့ကတော့ ခုနက ပြောသလိုမျိုးပဲ လက်ရှိ အကျပ်အတည်းကို ကျော်လွှားဖို့ဆိုရင် ကျနော်တို့ ၇ ဖွဲ့အနေနဲ့ ကတော့ နိုင်ငံတကာရဲ့ ပူးပေါင်းပါဝင် ပံ့ပို့မှုတွေကလည်း လိုအပ်တယ်လို့ ကျနော်တို့ အဲဒီလိုပဲ နားလည်မှုရှိတယ်” ဟု ပြောသည်။
နစကအပေါ် အာဆီယံဖိအားက ကြီးလာပြီး ဒီမိုကရေစီ လှုပ်ရှားသူများအတွက် အင်အားတစ်ခု ဖြစ်လာလိမ့်မည် ဟု နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။
ဆန္ဒပြလူငယ်များကိုတွေ့ရစဉ်
ဦးသန်းစိုးနိုင်က “ကောင်းပါတယ် အခုက ဘာဖြစ်လို့လဲဆိုတော့ အင်ဒိုနီးရှားနိုင်ငံ အလှည့်ကျတာကိုး၊ အင်ဒိုနီးရှား နိုင်ငံကတော့ တော်တော်လေး ဒီမိုကရေစီ အင်အားစုတွေအပေါ်မှာ တော်တော်လေး စာနာထောက်ထားမှုရှိတဲ့ နိုင်ငံဖြစ်တဲ့ အခါကြတော့ စစ်ကောင်စီအပေါ်မှာ ဖိအားတွေ ပေးပြီးတော့ တစ်စုံတစ်ရာ ရလဒ်ဖော်ဆောင်နိုင်မယ့် အင်အားတစ်ရပ် ဖြစ်လာလိမ့်မယ်လို့ ကျနော်တော့ မျှော်လင့်ပါတယ်၊ ဥပမာ အာဆီယံက ချမှတ်ထားတဲ့ မူ ၅ ရပ် ကို အကောင်အထည် ဖော်ရေးဆိုတဲ့ကိစ္စမှာ အခုက ရက်ချိန်း သတ်မှတ်ထားတာကို အဲဒီတော့ ဒီဆုံးဖြတ်ချက်ကို အင်ဒိုနီးရှားနိုင်ငံက အကောင်အထည် ဖော်ပေးလိမ့်မယ်လို့ ထင်ပါတယ်” ဟု ပြောသည်။
မကြာခင်က သက်တမ်းကုန်ဆုံးခဲ့သည့် ကမ္ဘောဒီးယားနိုင်ငံ၏ အာဆီယံအလှည့်ကျ ဥက္ကဋ္ဌ တာဝန်ကို ၂၀၂၃ ခုနှစ်၊ ဇန်နဝါရီ ၁ ရက်နေ့တွင် စတင်၍ အင်ဒိုနီးရှားနိုင်ငံက လွှဲပြောင်း တာဝန်ယူခဲ့ကြောင်း သိရသည်။
- By CNI News
- Category: နိုင်ငံရေး
- Hits: 420
CNI News
၂၀၂၃ ခုနှစ်၊ ဇန်နဝါရီ ၆
နိုင်ငံတော်ကို ၂၀၁၁ ခုနှစ်နှင့် ၂၀၁၆ ခုနှစ် နိုင်ငံတော်၏ ပုံမှန်အခြေအနေများနှင့် ယင်းအခြေအနေများထက် မနိမ့်သည့်အဆင့်ကို ဖော်ဆောင်ရမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။
ယနေ့ (ဇန်နဝါရီ ၆ ရက်) နံနက်ပိုင်းက နေပြည်တော်တွင် ပြည်ထောင်စုဝန်ကြီးများ၊ နေပြည်တော်ကောင်စီ ဥက္ကဋ္ဌ၊ တိုင်းဒေသကြီးနှင့် ပြည်နယ်ဝန်ကြီးချုပ်များ၊ ကိုယ်ပိုင်အုပ်ချုပ်ခွင့်ရဒေသနှင့်တိုင်းဥက္ကဋ္ဌများနှင့်တွေ့ဆုံ စဉ် အထက်ပါအတိုင်း ၎င်းက ပြောသွားခြင်း ဖြစ်သည်။
ဗိုလ်ချုပ်မှူးကြီးမင်းအောင်လှိုင်က ၂၀၂၀ ပြည့်နှစ် ရွေးကောက်ပွဲ၌ မဲမသမာမှုများ ဖြစ်ပေါ်ခဲ့ခြင်းသည် မိမိတို့ နိုင်ငံ၏ ဒီမိုကရေစီဖွံ့ဖြိုးဆဲ အခြေအနေကို အညွန့်ချိုးခဲ့ခြင်းဖြစ်ကြောင်း၊ နိုင်ငံ၏ သမိုင်းတွင်လည်း အဆိုပါ ရွေး ကောက်ပွဲ မဲမသမာမှုသည် အမည်းစက်တစ်ခုအဖြစ် ကျန်ခဲ့ပြီဖြစ်ကြောင်း၊ ထိုကဲ့သို့သော အခြေအနေမျိုး ထပ် မံ ဖြစ်ပွားမှုမရှိစေရေး ဆောင်ရွက်ရန် လိုအပ်မည်ဖြစ်ကြောင်း ပြောသည်။
၎င်းက “ မိမိတို့အနေဖြင့် နိုင်ငံရေး ရည်မှန်းချက်နှစ်ရပ်ကို မဖြစ်မနေ အကောင်အထည်ဖော်နိုင်ရေးအတွက် နိုင်ငံ တော်ကို ပုံမှန်အခြေအနေအတိုင်း ပြည်လည်ရောက်ရှိအောင် မိမိတို့အနေဖြင့် ဖော်ဆောင်ရမည်ဖြစ် ကြောင်း၊ ပုံမှန် အခြေအနေဟုဆိုရာတွင် ၂၀၁၁ ခုနှစ် နိုင်ငံတော်၏ ပုံမှန်အခြေအနေ၊ ၂၀၁၆ ခုနှစ် နိုင်ငံတော်၏ ပုံမှန် အခြေအနေများနှင့် ယင်းအခြေအနေများထက် မနိမ့်သည့်အဆင့်နှင့် ဖြစ်နိုင်ပါက သာလွန်သည့် တိုင်းပြည်၏ အခြေအနေကို ဖော်ဆောင်ပေးနိုင်ရမည်ဖြစ်ကြောင်း၊ ထိုသို့ ဆောင်ရွက်ပေးနိုင်မှသာလျင် နိုင်ငံတော်ကို အာမခံ ချက် ပေးနိုင်မည် ဖြစ်သည့်အတွက် သက်ဆိုင်ရာတာဝန်ရှိသူများ၊ ပြည်ထောင်စုဝန်ကြီးများ၊ ပြည်နယ်နှင့် တိုင်း ဒေသကြီး ဝန်ကြီးချုပ်များ၊ ကိုယ်ပိုင်အုပ်ချုပ်ခွင့်ရဒေသနှင့် တိုင်းဥက္ကဋ္ဌများအနေဖြင့် မလျှော့သော ဇွဲလုံ့လ ဖြင့် ရရှိသည့် ကာလအတွင်းကြိုးစား၍ တိုးမြှင့်ဆောင်ရွက်ကြ”ဟု ပြောသည်။
ထို့နောက် ၇၅ နှစ်မြောက် လွတ်လပ်ရေးနေ့ မိန့်ခွန်းကို အလေးအနက်ထား လေ့လာကြစေလိုကြောင်း၊ နိုင်ငံ ရေးစနစ်အရ ပါတီစုံဒီမိုကရေစီစနစ်ကို ဆောင်ရွက်သွားမည်ဖြစ်ပြီး အုပ်ချုပ်ရေးပုံစံစနစ်အရ ဒီမိုကရေစီအုပ်ချုပ် ရေးနှင့် ဖက်ဒရယ်အုပ်ချုပ်ရေးကို ပေါင်းစပ်ထားသည့် အုပ်ချုပ်မှုပုံစံကို သွားရမည်ဖြစ်ကြောင်း၊ အလားတူ အမျိုးသားရေး ရည်မှန်းချက်များအနေဖြင့် တိုင်းပြည်သာယာဝပြောရေးနှင့် တိုင်းပြည်စားရေရိက္ခာဖူလုံရေးကို ချမှတ် အကောင်အထည်ဖော်နေကြောင်း နစကဥက္ကဋ္ဌက ပြောသည်။
လက်ရှိ မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီ ၁ ရက်၌ တပ်မတော်က အမျိုးသားဒီမိုကရေစီအဖွဲ့ချုပ် (NLD)အစိုးရကို ၂၀၂၀ အထွေထွေရွေးကောက်ပွဲ မဲစာရင်းအငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချ၍ နိုင်ငံတော်ကို အရေးပေါ်ကြေညာထားသည်။
ထို့နောက် တပ်မတော်ဖြုတ်ချရေး NLD အမတ်များ၊ ဒီမိုကရေစီအရေး တက်ကြွလှုပ်ရှားသူများ၊ ကျောင်းသား၊ လူငယ်များက လက်နက်ကိုင် တိုက်ပွဲဝင်လျက်ရှိရာ ကယားပြည်နယ်၊ ကရင်ပြည်နယ်၊ ချင်းပြည်နယ်၊ မကွေး တိုင်းဒေသကြီး၊ စစ်ကိုင်းတိုင်းဒေသကြီးတို့မှာ တိုက်ပွဲများ ဖြစ်ပွားလျက်ရှိနေသည်။
အဆိုပါ တိုက်ပွဲများကြောင့် နေအိမ်နှင့် အဆောက်အအုံ သောင်းနှင့်ချီ မီးရှို့ခံခဲ့ရသလို လူဦးရေ ၁ သန်းကျော် လည်း နေရပ်စွန့်ခွာ ထွက်ပြေး တိမ်းရှောင်နေကြရသည်။
- By CNI
- Category: နိုင်ငံရေး
- Hits: 592
CNI News
၂၀၂၃ ခုနှစ်၊ ဇန်နဝါရီ ၆
ရခိုင်တော်လှန်ရေး အင်းအားစု အချင်းချင်း မညီညွတ်မှုသည် ရခိုင်များအတွက် ရှုံးစေကြောင်း ရခိုင်ပြည် လွတ် မြောက်ရေးပါတီ(ALP)မှ ဒုဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။
ALP ၏ စစ်ဦးစီးချုပ် ဗိုလ်ချုပ်ခိုင်စိုးမြ အပါအဝင် အမှတ်(၁၀၁)တပ်ရင်းမှူး ဒုတိယဗိုလ်မှူးကြီး ခိုင်ကျော်စိုးနှင့် ဗိုလ်ကြီးခိုင်သူရိန္ဒ တို့ကို ရက္ခိုင့်တပ်တော်(ULA/AA)က ဇန်နဝါရီ ၄ ရက်နေ့က လုပ်ကြံပစ်ခတ် သတ်ဖြတ်သွားခဲ့ကြောင်း၊ ထိုလုပ်ရပ်ကို အပြင်းအထန် ရှုတ်ချကြောင်း ALP က ဇန်နဝါရီ ၅ ရက်က ထုတ်ပြန်ခဲ့သည်။
ဒေါ်စောမြရာဇာလင်းက “ကိုယ်တို့ပဲ ရှုံးပါတယ်၊ ကိုယ်တို့အချင်းချင်းပဲ ရှုံးပါတယ်လို့ ဒီလောက်ပဲ ပြောချင်ပါတယ်၊ လူထုအတွက်လည်း စိတ်မအေးစရာတွေ အများကြီးဖြစ်နိုင်ပါတယ်၊ အခုလည်းပဲ ဖြစ်နေကြတာတွေလည်း ရှိပါ တယ်။ ကျမတို့က မဖြစ်သင့်တာတွေကို မဖြစ်ဖို့အတွက်ကို တာဝန်ရှိသူများအားလုံးက ထိန်းထိန်းသိမ်းသိမ်းနဲ့ လုပ်ဖို့ အများကြီး လိုအပ်တယ်လို့ မြင်ပါတယ်၊ ထိုနည်းလည်းကောင်းပဲ ဒီလို တာဝန်ရှိနေတဲ့ အစိုးရဟာလည်းပဲ လုံလုံခြုံခြုံနဲ့ ကိုယ့်တိုင်းပြည်မှာ လူတွေက ကောင်းကောင်းမွန်မွန် သွားလာလှုပ်ရှား နေထိုင်ဖို့အတွက်ကို ဒီထက် ကြပ်မတ် ဆောင်ရွက်ရမယ်လို့ မြင်ပါတယ်” ဟု CNI သတင်းဌာနသို့ ပြောသည်။
ရခိုင်ဒေသတစ်နေရာကိုတွေ့ရစဉ်
အဆိုပါ လုပ်ကြံသတ်ဖြတ်မှုကို မိမိတို့ လုပ်ဆောင်ခြင်း မရှိကြောင်း ULA/AA မှ ပြန်ကြားရေးတာဝန်ခံ ဦးခိုင်သုခက ရခိုင်အခြေစိုက် မီဒီယာများကို ဖြေကြားထားသည်။
မိမိတို့ အနေဖြင့် အချက်အလက်များကို သိရှိရပါက ကြားဝင်စေ့စပ် ညှိနှိုင်းပေးနိုင်ကြောင်း ရခိုင်အမျိုးသား ကွန်ရက်မှ ဥက္ကဋ္ဌ ဦးတင်ထူးအောင်က CNI သတင်းဌာနသို့ ပြောသည်။
၎င်းက “အပြန်အလှန် စွပ်စွဲနေတာထက် ဘယ်လို ညှိနှိုင်းလုပ်ဆောင်သင့် သလဲဆိုတော့ တစ်ဦးနဲ့ တစ်ဦးပေါ့နော်၊ တစ်ဖက်နဲ့ တစ်ဖက် အချက်အလက်တွေကို ရှင်းရှင်းလင်းလင်း သိရရင်တော့ ကျနော်တို့အနေနဲ့ လိုအပ်လာရင် တော့ ကြားဝင်စေ့စပ်ညှိနှိုင်း ပေးပါဆိုရင်လည်း ကျနော်တို့ အနေနဲ့ ညှိနှိုင်းပေးဖို့အတွက် ကျနော်တို့ လုပ်ကိုင် ဆောင်ရွက်ပေးလို့တော့ ရတာပေါ့၊ ဒါပေမဲ့ ကျနော်တို့မှာတော့ အဲဒီဟာနဲ့ ပတ်သက်လို့ လုံလောက်တဲ့ အချက် အလက် ကျနော်တို့မှာ မရှိဘူး” ဟု ပြောသည်။
၂၀၁၆ ခုနှစ်၊ ဇူလိုင်လက မိုင်ဂျာယန်မြို့မှာ ဒေါ်စောမြရာဇာလင်း ဦးဆောင်သည့် ALP ကိုယ်စားလှယ်အဖွဲ့ကိုတွေ့ရစဉ်
၂၀၂၂ ခုနှစ်၊ ဩဂုတ် ၂ ရက်က AA သည် ALP မှ ဗဟိုအလုပ်မှုဆောင်ကော်မတီဝင် ဒုဗိုလ်မှူးကြီး ခိုင်ပေါ်လင်းကို ၎င်း၏ နေအိမ်ထဲသို့ ဝင်ရောက်၍ ဖမ်းဆီးသွားကြောင်း ALP မှ ထုတ်ပြန်ထားသည်။
အဆိုပါ ဖမ်းဆီးမှုမှာ ALP ပါတီဝင် ဖြစ်သည့်အတွက် မဟုတ်ဘဲ ပြစ်မှုကျူးလွန်ထားခြင်းကြောင့် ဖမ်းဆီးခြင်းဖြစ်ကြောင်း AA ၏ ပြန်ကြားရေး တာဝန်ခံ ခိုင်သုခက ဩဂုတ် ၁၁ ရက်က ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။
ရက္ခိုင့်တပ်တော် (ULA/AA) နှင့် ရခိုင်ပြည်လွတ်မြောက်ရေးပါတီ (ALP) တို့သည် ရခိုင်လက်နက်ကိုင် အဖွဲ့အစည်း များဖြစ်ပြီး ALP သည် တစ်နိုင်ငံလုံး အပစ်အခတ်ရပ်စဲရေး သဘောတူစာချုပ် (NCA) ထိုးထားသော အဖွဲ့ဖြစ်ကာ AA ကမူ မထိုးနိုင်သေးဘဲ ညှိနှိုင်းမှုများ ရှိနေသည့် အဖွဲ့ဖြစ်သည်။