CNI Sport News

၂၀၂၂ ခုနှစ်၊ အောက်တိုဘာ ၁၅

ပြင်သစ်လက်ရွေးစင်အသင်း ကွင်းလယ်လူ ကန်တီဟာ တံကောက်ကြောဒဏ်ရာကြောင့် နိုဝင်ဘာလမှာ ကျင်းပမယ့် ကမ္ဘာ့ဖလားပြိုင်ပွဲမှာ ပါဝင်နိုင်ဖွယ်မရှိတော့ဘူးလို့ သိရပါတယ်။

အသက် ၃၁ နှစ်အရွယ်ရှိ ကန်တီဟာ သြဂုတ်လက ချယ်လ်ဆီးနဲ့ စပါးအသင်းတို့ ၂ ဂိုးစီသရေကျခဲ့တဲ့ ပရီးမီးယားလိဂ်ပွဲမှာ ရခဲ့တဲ့ ဒဏ်ရာကြောင့် ဒီရာသီမှာ အသင်းရဲ့ ပွဲစဉ်အများအပြားကို ပါဝင်နိုင်ခြင်း မရှိခဲ့ပါဘူး။ကန်တီဟာ ကြံခိုင်မှုအပြည့်ပြန်ရဖို့ ဖြည်းဖြည်းချင်း တည်ဆောက်နေပေမယ့် လေ့ကျင့်ရေး ပြုလုပ်ချိန် ဒဏ်ရာရရှိခဲ့တာကြောင့် ကြီးမားတဲ့ ဆုတ်ယုတ်မှုနဲ့ ကြုံတွေ့ခဲ့ရတာပါ။

L'Equipe သတင်းဌာနက ကန်တီရဲ့ဒဏ်ရာအခြေအနေဟာ ပြိုင်ပွဲမတိုင်ခင် ပြန်လည်ကောင်းမွန်ဖွယ်မရှိ တာကြောင့် ကမ္ဘာ့ဖလားပြိုင်ပွဲမှာ ပါဝင်နိုင်ဖို့ မရှိဘူးလို့ ဖော်ပြခဲ့ပါတယ်။

အဓိကကွင်းလယ်လူတစ်ဦးဖြစ်တဲ့ ပေါ့ဘာရဲ့ ကြံခိုင်မှုနဲ့ပတ်သက်ပြီး မသေချာမှုရှိနေတဲ့အချိန် ကန်တီရဲ့ ဒဏ်ရာသတင်းဟာ ပြင်သစ်နဲ့ ဒက်ချမ့်ပ်စ်အတွက် ကြီးမားတဲ့ ထိုးနှက်မှုဖြစ်လာခဲ့တာပါ။ပြီးခဲ့တဲ့ ၂၀၁၈ ကမ္ဘာ့ဖလားပြိုင်ပွဲမှာ အောင်မြင်မှုရယူပေးနိုင်ခဲ့တဲ့ ကြယ်ပွင့်ကစားသမား ၂ ဦးမပါဘဲ ပြင်သစ်အသင်း ဟာ ၂၀၂၂ ကမ္ဘာ့ဖလားပြိုင်ပွဲ သွားရောက်ရဖို့ ရှိနေတာဖြစ်ပါတယ်။

အစောပိုင်းက စပေါ့မေးလ်ဟာ ကန်တီရဲ့ ဒဏ်ရာက ကမ္ဘာ့ဖလားမတိုင်ခင် ရက်သတ္တပတ်အနည်း ငယ်လောက်သာ အနားယူဖို့ မျှော်လင့်ခဲ့ပေမယ့် အခုအခြေအနေက ပိုပြီးပြင်းထန်ပုံရှိနေတာပါ။ ပြင်သစ်နည်းပြ ဒက်ချမ့်ပ်စ်က ဒဏ်ရာရကစားသမားတွေကို လူစာရင်းမှာ ရွေးချယ်မှာမဟုတ်ဘူးလို့ ပြောထားတာ ဖြစ်ပါတယ်။ ကန်တီနဲ့ ချယ်လ်ဆီးအသင်းတို့ ချုပ်ဆိုထားတဲ့ စာချုပ်ဟာ အခုရာသီအကုန် မှာ ကုန်ဆုံးမှာဖြစ်ပြီး ဒဏ်ရာအခြေအနေကြောင့် စာချုပ်သစ်အတွက် ဆွေးနွေးမှုတွေ ပြုလုပ်တာမှာ လည်း အခက်အခဲတွေရှိလာနိုင်ပါတယ်။

ကန်တီရဲ့ ဒဏ်ရာအခြေအနေနဲ့ပတ်သက်ပြီး ချယ်လ်ဆီးနည်းပြ ဂရေဟမ်ပေါ်တာက “ပြန်လည် ထူထောင်ရေးလုပ်ငန်းစဉ်မှာ ဒီဆုတ်ယုတ်မှုက စိုးရိမ်စရာအခြေအနေမှာရှိပါတယ်။ဒါပေမယ့် ကျနော်တို့ လုပ်နိုင်တာကတော့ မှန်ကန်တဲ့ရောဂါရှာဖွေမှု၊ မှန်ကန်တဲ့ တိုင်ပင်ဆွေးနွေးမှုတွေကို ရယူပြီး ကြံခိုင်မှု အပြည့်နဲ့သူ ပျော်ပျော်ရွှင်ရွှင်ပြန်ကစားနိုင်အောင် ကြိုးစားကူညီပေးဖို့ပါ” လို့ ပြောခဲ့ပါတယ်။

ကန်တီဟာ ပြင်သစ်အတွက် ၂၀၁၆ မှ စတင်ပွဲထွက်ခွင့်ရခဲ့တာဖြစ်ပြီး ပွဲပေါင်း ၅၃ ပွဲပါဝင်ကစားကာ ၂ ဂိုးသွင်းယူနိုင်ခဲ့တာပါ။ကန်တီဟာ ပြင်သစ်နဲ့အတူ ၂၀၁၈ ကမ္ဘာ့ဖလားရယူနိုင်ခဲ့ပြီး၊ ယူရို ၂၀၁၆ ပြိုင်ပွဲမှာ ဒုတိယရရှိခဲ့တာဖြစ်ပါတယ်။

Source:DailyMail

CNI Sport News

၂၀၂၂ ခုနှစ်၊ အောက်တိုဘာ ၁၄

ဖိလစ်ပိုင် လက်ဝှေ့အကျော်အမော် ပတ်ကွီအိုက မေဝယ်လ်သာနဲ့ ပရော်ဖက်ရှင်နယ် မကျေပွဲ ထိုးသတ်ချင်ပေမယ့် အမေရိကန်နိုင်ငံသားက သရုပ်ပြပွဲပဲ ထိုးသတ်ချင်နေတယ်လို့ ပြောပါတယ်။

ပတ်ကွီအိုက “ ဖလွိုက်နဲ့ ထိုးမယ့်ပွဲက တကယ့်ပွဲဖြစ်ဖို့ မသေချာတော့ပါဘူး။ သူက ဒီလို မထိုးသတ်ချင်ပါဘူး။ သူက သရုပ်ပြပွဲ ထိုးသတ်ချင်နေပါတယ်။ သရုပ်ပြပွဲဖြစ်ဖို့ အခွင့်အလမ်းရှိပြီး ဒါက ဖြစ်နိုင်ပါတယ်။ ဒါပေမယ့် တကယ် ထိုးသတ်မယ့်ပွဲတော့ ဖြစ်မယ်မထင်ပါဘူး”လို့ FITE TV ကို ပြောခဲ့ပါတယ်။

သူတို့ နှစ်ဦးထိုးသတ်ခဲ့တဲ့ ၂၀၁၅ က ပေါင်သန်း ၄၇၀ တန်ကြေးရှိ ထိုးသတ်ပွဲမှာ ဝိတ်တန်း ၅ ခု ကမ္ဘာ့ချန်ပီယံ မေဝယ်လ်သာက ဝိတ်တန်း ၈ ခု ကမ္ဘာ့ချန်ပီယံ ပတ်ကွီအိုကို အနိုင်ရရှိခဲ့တာ ဖြစ်ပါတယ်။

ပတ်ကွီအိုဟာ ဒီဇင်ဘာလမှာ DK Yoo နဲ့ သရုပ်ပြပွဲ ထိုးသတ်မှာဖြစ်ပြီး အဆိုပါပွဲက ရရှိတဲ့ ဝင်ငွေတွေကို ယူကရိန်းရှိ ပြည်သူတွေကို အကူအညီပေးဖို့နဲ့ ဖိလစ်ပိုင်ရှိ အိုးမဲ့အိမ်မဲ့ ပြည်သူတွေအတွက် အိမ်တွေဆောက်လုပ်ဖို့ အသုံးပြုသွားမှာပါ။

မေဝယ်လ်သာနဲ့ ပတ်ကွီအို ထိုးသတ်ခဲ့ကြစဉ် (GETTY IMAGES)

ပတ်ကွီအိုက “ ဒီသရုပ်ပြပွဲက ပရဟိတပွဲ တစ်ပွဲပါ။ ယူကရိန်းမှာ ခံစားနေရတဲ့ ဒုက္ခသည်တွေနဲ့ ဖိလစ်ပိုင်ရှိ အိုးမဲ့ အိမ်မဲ့တွေကို အကူအညီ ပေးသွားဖို့လည်း ပါဝင်ပါတယ်။ ကမ္ဘာပေါ်မှာရှိတဲ့ လူတွေကို အကူအညီ ပေးနိုင်ဖို့ အတွက် လူတွေအနေနဲ့လည်း ဒီသရုပ်ပြပွဲကို ပိုပြီး ပံ့ပိုးပေးဖို့ မျှော်လင့်ပါတယ်”လို့ ပြောခဲ့တာ ဖြစ်ပါတယ်။

ပတ်ကွီအိုက ဒီပွဲက သရုပ်ပြပွဲ ဖြစ်ပေမယ့် ပရော်ဖက်ရှင်နယ်ပွဲ ထိုးသတ်ဖို့အတွက် ကြိုးဝိုင်းထဲ ပြန်လာသလိုမျိုး လေ့ကျင့်မယ်လို့ ဝန်ခံခဲ့ပါတယ်။
“ဒီပွဲအတွက် ကျနော့်ရဲ့ လေ့ကျင့်မှုက အရင်တုန်းက အတိုင်းပါပဲ။ အရင်က ကျနော်လုပ်ခဲ့တာကို ခင်ဗျားတို့ မြင်တွေ့ခဲ့တဲ့ အတိုင်းပဲ ဒီလေ့ကျင့်မှုမှာလည်း ဒီလိုပဲ လုပ်သွားမှာပါ။ ဖိလစ်ပိုင်ကို ပြန်ပြီး လေ့ကျင့်မှုတွေကို ပြင်းပြင်းထန်ထန် လုပ်မယ်”လို့ ပတ်ကွီအိုက ပြောပါတယ်။

ပတ်ကွီအိုဟာ ပရော်ဖက်ရှင်နယ် လက်ဝှေ့ပွဲပေါင်း ၇၂ ပွဲ ထိုးသတ်ခဲ့တာမှာ ၆၂ ပွဲ အနိုင်ရခဲ့ပြီး ၈ ပွဲ အရေးနိမ့်ကာ ၂ ပွဲသရေကျခဲ့တာ ဖြစ်ပါတယ်။

Source: Daily Maila

CNI Sport News

၂၀၂၂ ခုနှစ်၊ အောက်တိုဘာ ၁၄

ဘရာဇီးလ် ရင်းနှီးမြှပ်နှံမှု ကုမ္ပဏီတစ်ခုက ၂၀၁၃ မှာ ဆန်းတို့စ်ကနေ ဘာစီလိုနာကို ပြောင်းရွှေ့ခဲ့တဲ့ နေမာရဲ့ အပြောင်းအရွှေ့နဲ့ ပတ်သက်ပြီး လာမယ့်အပတ် ရုံးတင်စစ်ဆေးတဲ့အခါ ထောင်ဒဏ် ၅ နှစ်ချမှတ်ဖို့ တောင်းဆို ထားပါတယ်။

အဲဒီအချိန်က နေမာရဲ့ လုပ်ပိုင်ခွင့် ၄၀ ရာခိုင်နှုန်း ပိုင်ဆိုင်ခဲ့တဲ့ DIS က ပြောင်းရွှေ့ကြေးဟာ တန်ဖိုးနည်းပါးတာ ကြောင့် သူတို့ဆုံးရှုံးခဲ့တယ်ဆိုပြီး ပြောပါတယ်။

အသက် ၃၀ အရွယ်ရှိ နေမာဟာ ဒီစွပ်စွဲချက်တွေကို ငြင်းဆန်ခဲ့ပေမယ့် ၂၀၁၇ က စပိန်တရားရုံးချုပ်မှာ အယူခံ ဝင်တာမှာ အရေးနိမ့်ခဲ့တာကြောင့် စပိန်အစိုးရရှေ့နေတွေရဲ့ ရုံးတင်စစ်ဆေးခြင်းကို ခံခဲ့ရတာ ဖြစ်ပါတယ်။

နေမာ အနေနဲ့ ရုံးတင်စစ်ဆေးမယ့် ပထမဆုံးနေ့မှာ ဘာစီလိုနာကို လူကိုယ်တိုင် လာရောက်ရမယ်လို့ တရားရုံးက ပြောထားပါတယ်။

ဒါပေမယ့် ဒီကြားနာမှုဟာ ၂ ပတ် ကြာမြင့်နိုင်တာကြောင့် ပီအက်စ်ဂျီ တိုက်စစ်မှူးကို ဒီမှာဆက်ရှိပေးဖို့ တောင်းဆို မလားဆိုတာ ရှင်းရှင်းလင်းလင်း မသိရသေးပါဘူး။

ဆန်းတို့စ်အသင်းကနေ ဘာစီလိုနာကို နေမာ ပြောင်းရွှေ့ခဲ့စဉ် (Barca Blaugranes)

တခြား တရားခံတွေကတော့ နေမာရဲ့ မိဘတွေ၊ ကလပ် ၂ သင်း၊ ဘာစီလိုနာ ဥက္ကဋ္ဌဟောင်း ဘာတိုမြူနဲ့ ရိုဆဲလ်၊ ဆန်းတို့စ်အသင်း ဥက္ကဋ္ဌဟောင်း အိုတီလီယိုတို့ ဖြစ်ပါတယ်။ ရိုဆဲလ်ကတော့ သူတို့ ဘာအမှားအယွင်းမှ မလုပ်ခဲ့ ဘူးလို့ အရင်ကလည်း ငြင်းဆန်ထားပါတယ်။
နေမာ မိသားစုကိုယ်စားပြု ရှေ့နေတွေဖြစ်တဲ့ ဘာကာမက်ကန်ဇီက စပိန်တရားရုံး အနေနဲ့ နေမာရဲ့ မိသားစု၊ သူတို့ရဲ့ ကုမ္ပဏီဖြစ်တဲ့ N&N ကို တရားစွဲဆိုပိုင်ခွင့် မရှိဘူးလို့ ကြေညာချက် ထုတ်ပြန်ထားပါတယ်။

ဒီအဖြစ်အပျက်တွေဟာ စပိန်နိုင်ငံ အပြင်ဘက်မှာ ဖြစ်ခဲ့တာဖြစ်ပြီး ဘရာဇီးမှာ စွပ်စွဲထားတဲ့ ရာဇဝတ်မှုတွေ အတွက် အပြစ်ပေးခံရမှာ မဟုတ်ဘူးလို့ ပြောပါတယ်။ နေမာဟာ စပိန်ကလပ်ကို ပြောင်းရွှေ့ခဲ့ချိန်မှာ ပြောင်းရွှေ့ ကြေးက ယူရို ၅၇.၁ သန်းဖြစ်ပြီး ဒီထဲက ယူရိုသန်း ၄၀ ကို သူ့မိသားစုထံ ပေးခဲ့တာလို့ ဘာစီလိုနာက ပြောခဲ့တာပါ။

အဆိုပါ ရင်းနှီးမြှပ်နှံမှု ကုမ္ပဏီဟာ ဘရာဇီးလ်ကလပ် ဆန်းတို့စ်အသင်းထံ ပေးချေခဲ့တဲ့ ယူရို ၁၇.၁ သန်းထဲက ရှယ်ယာ ၄၀ ရာခိုင်နှုန်း ရရှိခဲ့တာ ဖြစ်ပါတယ်။ နေမာကို ထောင်ဒဏ် ၅ နှစ် ချမှတ်ဖို့ တောင်းဆိုမှုအပြင် DIS ဟာ ရိုဆဲလ်နဲ့ ဘာတိုမြူတို့ကိုလည်း ထောင်ဒဏ်နဲ့ ဒဏ်ကြေးငွေ ယူရို ၁၄၉ သန်းချမှတ်ဖို့ တောင်းဆိုထားပါတယ်။

စပိန်အစိုးရရှေ့နေတွေကတော့ နေမာကို ထောင်ဒဏ် ၂ နှစ်နဲ့ ဒဏ်ကြေးငွေ ယူရို ၁၀ သန်း၊ ရိုဆဲလ်ကို ထောင်ဒဏ် ၅ နှစ်နဲ့ ဒဏ်ကြေးငွေ ချမှတ်ဖို့ အလိုရှိနေတာ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ အောက်တိုဘာ ၁၄

ဘာစီလိုနာအသင်းတိုက်စစ်မှူး လီဝန်ဒေါစကီးက အခုနှစ် ဘောလွန်းဒီအောဆုပေးပွဲကိုသာ မဖျက်ဘူးဆိုရင် ဘန်ဇီမာပဲ ရရှိမှာလို့ ပြောလိုက်ပါတယ်။

လီဝန်ဒေါစကီးက “ဘန်ဇီမာဟာ ဘောလွန်းဒီအောဆုကို ရယူဖို့ ရေပန်းအစားဆုံးသူတွေထဲက တစ်ယောက် ဖြစ်ပါတယ်။ဒီဆုပေးပွဲကိုသာ မပယ်ဖျက်ဘူးဆိုရင် ဘောလွန်းဒီအောဆုကို ဘန်ဇီမာပဲ ရရှိမယ်ဆိုတာ ဟုတ်ပါ တယ်” လို့ Movistar Plus ကို ပြောခဲ့တာပါ။အခုနှစ်အတွက် ဘောလွန်းဒီအောဆုပေးပွဲအခမ်းအနားကို တနင်္လာနေ့မှာပြုလုပ်မှာဖြစ်ပြီး ပိုလန်အသင်းခေါင်းဆောင်က ဆုပေးပွဲမတိုင်ခင် ပြောခဲ့တာဖြစ်ပါတယ်။

လီဝန်ဒေါစကီးရဲ့ အခုလို ပြောဆိုမှုဟာ ၂၀၂၀ က ကိုဗစ်ကြောင့် ဆုပေးပွဲဖျက်ခဲ့တာကို ရည်ညွှန်းခဲ့တာလည်း ဖြစ်ပါတယ်။လီဝန်ဒေါစကီးဟာ အဆိုပါနှစ်က ဘိုင်ယန်မြူးနစ်အသင်းနဲ့အတူ ဘွန်ဒစ်လီဂါ၊ချန်ပီယံလိဂ်နဲ့ ပိုကယ်လ်ဖလားတို့ကို ရယူနိုင်ခဲ့ပြီး ပြိုင်ပွဲစုံ ၅၅ ဂိုးသွင်းယူကာ ၁၀ ဂိုးအထိ ဖန်တီးနိုင်ခဲ့တာဖြစ်ပါတယ်။ အဲဒါကြောင့် လီဝန်ဒေါစကီးဟာ အဆိုပါနှစ်အတွက် ဘောလွန်းဒီအောဆုကို သေချာပေါက်ရရှိမယ့်သူအဖြစ် အားလုံးက သတ်မှတ်ခဲ့ကြတာပါ။

ဒါပေမယ့် ကိုဗစ်ကြောင့် ဒီဆုပေးပွဲကို ဖျက်သိမ်းခဲ့တဲ့အတွက် လီဝန်ဒေါစကီးဟာ ဖီဖာရဲ့ အကောင်းဆုံးဆုနဲ့ ယူအီးအက်ဖ်အေတစ်နှစ်တာ အကောင်းဆုံးဆုတို့ကိုသာ ရရှိခဲ့တာဖြစ်ပါတယ်။အခုနှစ်အတွက်တော့ ရီးရယ်လ် အသင်းခေါင်းဆောင် ဘန်ဇီမာက ဒီဆုကို ရရှိဖို့ ရေပန်းအစားဆုံးဖြစ်နေတာပါ။သူဟာ ပြီးခဲ့တဲ့ရာသီက ရီးရယ်လ် အသင်းကို ချန်ပီယံလိဂ်နဲ့ လာလီဂါဆုဖလား ရရှိနိုင်အောင် ဦးဆောင်ပေးနိုင်ခဲ့ပြီး ပြိုင်ပွဲစုံ ၄၆ ပွဲမှာ ၄၄ ဂိုးအထိ သွင်းယူနိုင်ခဲ့တာဖြစ်ပါတယ်။

ပြီးခဲ့တဲ့နှစ်က ဘောလွန်းဒီအောဆုကို ရရှိခဲ့တဲ့ မက်ဆီဟာ ဒီနှစ်အတွက် ဆန်ကာတင် ၃၀ ဦးစာရင်းမှာ ပါဝင်ခြင်း မရှိခဲ့ဘဲ အဓိကပြိုင်ဘက်ကြီး ရော်နယ်ဒိုကတော့ ဒီစာရင်းမှာ ပါဝင်ခဲ့တာပါ။ရော်နယ်ဒိုဟာ ဒီနှစ်ဆုပေးပွဲကို ၂၀၁၇ နောက်ပိုင်း ပထမဆုံးအကြိမ်တက်ရောက်ဖို့ ရှိတယ်လို့လည်း သတင်းတွေမှာ ဖော်ပြထားတာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ အောက်တိုဘာ ၁၄

ရုရှားသမ္မတ ဗလာဒီမာပူတင်က လာမယ့် ကမ္ဘာ့ဖလားပြိုင်ပွဲကို ကာတာနိုင်ငံ အနေနဲ့ အောင်မြင်စွာ ကျင်းပနိုင်ဖို့ ဆန္ဒပြုလိုက်ပြီး ၂၀၁၈ က အိမ်ရှင်အဖြစ် ကျင်းပခဲ့တဲ့ အတွေ့အကြုံတွေကို မျှဝေပေးခဲ့တယ်လို့ သိရပါတယ်။

ဗလာဒီမာပူတင်က “ကမ္ဘာ့ဖလားပြိုင်ပွဲ ပြင်ဆင်မှုနဲ့ ပတ်သက်ပြီး အတွေ့အကြုံတွေကို မျှဝေပေးနိုင်ဖို့ လုပ်ဆောင် လို့ရတဲ့ အရာအားလုံးကို လုပ်ဆောင်ပေးနေပါတယ်။ ကမ္ဘာ့ဖလားပြိုင်ပွဲကို အောင်မြင်စွာ ကျင်းပနိုင်ဖို့လည်း ဆန္ဒပြုပေးချင်ပါတယ်။ ဒီလိုပဲ ဖြစ်မယ်ဆိုတာ သေချာပါတယ်”လို့ ပြောပါတယ်။

ရုရှားဟာ ပြီးခဲ့တဲ့ ၂၀၁၈ ကမ္ဘာ့ဖလားပြိုင်ပွဲကို အိမ်ရှင်အဖြစ် အောင်မြင်စွာ ကျင်းပနိုင်ခဲ့ပြီး ကွာတားဖိုင်နယ်အထိ ရောက်ရှိခဲ့တာ ဖြစ်ပါတယ်။ ဒါပေမယ့် အခုနှစ် အစောပိုင်းမှာ ယူကရိန်းကို ဝင်ရောက် ကျူးကျော်မှုကြောင့် ကာတာ ကမ္ဘာ့ဖလား ဝင်ခွင့်ရမယ့် ပလေးအော့ဖ် ယှဉ်ပြိုင်ခွင့် ပိတ်ပင်ခံခဲ့ရတာပါ။

 ကမ္ဘာ့ဖလား ဆုဖလားနဲ့အတူ ပူတင်ကိုတွေ့ရစဉ် (RT)

ရုရှားသမ္မတ ဗလာဒီမာပူတင်ဟာ အောက်တိုဘာလ ၁၃ ရက်က ကာဇက်စတန်နိုင်ငံမှာ ပြုလုပ်ခဲ့တဲ့ ထိပ်သီး အစည်းအဝေးမှာ ကာတာနိုင်ငံက ရှိတ်တာမင်နဲ့ တွေ့ဆုံခဲ့တာ ဖြစ်ပါတယ်။

ကာတာနိုင်ငံဟာ ကမ္ဘာ့ဖလားပြိုင်ပွဲကို အိမ်ရှင်အဖြစ် ပြုလုပ်တဲ့ ပထမဆုံး အရှေ့အလယ်ပိုင်း နိုင်ငံလည်း ဖြစ်ပါ တယ်။

ရှိတ်တာမင်က “ ၂၀၁၈ ကမ္ဘာ့ဖလားပြိုင်ပွဲကို ရုရှားက အောင်အောင်မြင်မြင်နဲ့ ကျင်းပနိုင်မှုက ကျနော်တို့ လက်ခံ ကျင်းပမယ့် ကမ္ဘာ့ဖလားပြိုင်ပွဲအတွက် ပြင်ဆင်တာမှာ ကြီးမားတဲ့ အထောက်အကူ တစ်ခုပါပဲ။ လာမယ့် ပြိုင်ပွဲ အတွက် ပြင်ဆင်မှုတွေအပေါ် ပူးပေါင်းဆောင်ရွက်မှုအတွက် ကျေးဇူးတင်ပါတယ်”လို့ ပြောခဲ့ပါတယ်။

၂၀၂၂ ကမ္ဘာ့ဖလားပြိုင်ပွဲကို နိုဝင်ဘာလ ၂၀ ရက်ကနေ ဒီဇင်ဘာလ ၁၈ ရက်အထိ ကျင်းပသွားမှာ ဖြစ်ပါတယ်။

Source: Reuters

CNI Sport News

၂၀၂၂ ခုနှစ်၊ အောက်တိုဘာ ၁၃

လီဗာပူးလ်နည်းပြ ကလော့ပ်က သူနဲ့ အသင်းသားတွေဟာ နိုင်ပွဲအတွက် ဘီယာသောက်ပြီး အောင်ပွဲခံမယ့် အကြောင်း ရိန်းဂျားစ်အသင်းကို ဂိုးပြတ်အနိုင်ရတဲ့ ပွဲအပြီးမှာ ပြောလိုက်ပါတယ်။

ကလော့ပ်က “ ကျနော်တို့ဟာ အဝေးကွင်း ပွဲတွေပြီးရင် ဘီယာသောက်လေ့ ရှိပါတယ်။ ဒါပေမယ့် ဘီယာသောက် တာဟာ ကြာနေပြီဆိုတော့ တစ်လုံးပြီး တစ်လုံး သောက်ရင်းနဲ့ မူးနေပါလိမ့်မယ်”လို့ BT Sport နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

လီဗာပူးလ်အသင်းဟာ ရိန်းဂျားစ်အသင်းကို အဝေးကွင်းမှာ ကစားခဲ့ရပေမယ့် ၇ ဂိုး- ၁ ဂိုးနဲ့ ဂိုးပြတ် အနိုင်ရခဲ့တာ ဖြစ်ပါတယ်။

ဒီပွဲမှာ စကော့အာဖီးလ်က ရိန်းဂျားစ်အတွက် ဦးဆောင်ဂိုး သွင်းယူခဲ့ပေမယ့် လီဗာပူးလ်က ချေပဂိုးနဲ့ အနိုင်ဂိုးတွေ သွင်းပြီး ပွဲအပြီးမှာ ဂိုးပြတ်နိုင်ပွဲကို ရယူနိုင်ခဲ့တာပါ။ လီဗာပူးလ်အသင်း တိုက်စစ်မှူး ဆာလတ်ဟာ ဒီပွဲမှာ ဟတ်ထရစ် ဂိုးသွင်းပြီး ချန်ပီယံလိဂ် သမိုင်းမှာ အမြန်ဆုံး ဟတ်ထရစ် ဂိုးသွင်းသူအဖြစ် စံချိန်သစ် တင်ခဲ့ပါတယ်။

ဆာလတ်နဲ့ လီဗာပူးလ် ကစားသမားများကိုတွေ့ရစဉ် (STV News)

လီဗာပူးလ်အသင်းဟာ ဒဏ်ရာရ ကစားသမားတွေ များနေတာကြောင့် အဓိက ကစားသမားတွေဖြစ်တဲ့ ဆာလတ် နဲ့ ဂျိုတာကို လူစားဝင် ကစားသမားတွေအဖြစ် အသုံးပြုခဲ့တာပါ။

ကလော့ပ်က “ ဂျိုတာဆိုရင် ကြွက်သား အနည်းငယ် နာကျင်နေတယ်လို့ ခံစားနေရတယ်ဆိုပြီး ပြောလာတာ ကြောင့် ဒီပွဲကို ပွဲအစကတည်းက မပါဝင်နိုင်ခဲ့ပါဘူး။ သူဟာ ကစားနိုင်ခဲ့ပေမယ့် အကြာကြီး မကစားခိုင်း သင့်ပါ ဘူး။ ဒါကြောင့်လည်း ကျနော်လုပ်သင့်တာကို လုပ်ခဲ့တယ်ဆိုတာ ထင်ရှားပါတယ်”လို့ ပြောခဲ့ပါတယ်။

ဂျိုဟာဟာ ပွဲချိန် ၇၃ မိနစ် အရောက်မှ လူစားဝင်လာခဲ့ပေမယ့် ဆာလတ်သွင်းယူခဲ့တဲ့ ၃ ဂိုးစလုံးကို ဖန်တီးပေး သွားနိုင်ခဲ့တာပါ။ လီဗာပူးလ်အသင်းဟာ ဒီပွဲ အနိုင်ရခဲ့တာကြောင့် လက်ကျန် ၂ ပွဲမှာ အနိမ့်ဆုံး ၁ မှတ် ရယူနိုင် တာနဲ့ ချန်ပီယံလိဂ် နောက်တစ်ဆင့်ကို တက်ရောက်နိုင်တော့မှာလည်း ဖြစ်ပါတယ်။

ချန်ပီယံလိဂ်မှာ ရလဒ်ကောင်းတွေ ရနေတဲ့ လီဗာပူးလ်အသင်းဟာ အခုတစ်ပတ် ပရီးမီးယားလိဂ်ပွဲစဉ်အဖြစ် မန်စီးတီးအသင်းနဲ့ ယှဉ်ပြိုင်ရမှာပါ။

လီဗာပူးလ်အသင်းဟာ ချန်ပီယံလိဂ်မှာ ရလဒ်တွေ ကောင်းနေပေမယ့် ပရီးမီးယားလိဂ်မှာတော့ ရလဒ်တွေ ဆိုးရွား နေပြီး ၈ ပွဲကစားအပြီးမှာ နိုင်ပွဲ ၂ ပွဲသာ ရရှိကာ အဆင့် ၁၀ နေရာမှာ ရပ်တည်နေတာ ဖြစ်ပါတယ်။

Source: Metro

CNI Sport News

၂၀၂၂ ခုနှစ်၊ အောက်တိုဘာ ၁၃

ယူနိုက်တက်တိုက်စစ်မှူး ရော်နယ်ဒိုဟာ တနင်္လာနေ့မှာ ကျင်းပမယ့် ဘောလွန်းဒီအော ဆုပေးပွဲကို တက်ရောက် မယ်လို့ နိုင်ငံတကာ သတင်းတွေအရ သိရပါတယ်။

အသက် ၃၇ နှစ်အရွယ်ရှိ ရော်နယ်ဒိုဟာ ၂၀၁၇ က ဘောလွန်းဒီအောဆုကို နောက်ဆုံး ရရှိပြီးနောက်ပိုင်း ဒီဆုပေးပွဲကို တက်ရောက်ခြင်း မရှိတော့တာပါ။

ပြီးခဲ့တဲ့ရာသီက ယူနိုက်တက်အတွက် ၂၄ ဂိုး သွင်းယူခဲ့တဲ့ ရော်နယ်ဒိုဟာ အခုနှစ် ကျင်းပမယ့် ဆုပေးပွဲရဲ့ ဆန်ကာတင်စာရင်းမှာ ပါဝင်နေတာ ဖြစ်ပါတယ်။ ရော်နယ်ဒိုဟာ ဒီဆုကိုရယူနိုင်ဖို့ ဖြစ်နိုင်ဖွယ်မရှိဘဲ ရီးရယ်လ် အသင်းတိုက်စစ်မှူး ဘန်ဇီမာက ဆုရရှိဖို့ ရေပန်းအစားဆုံးအဖြစ် ရှိနေတာပါ။

ဘန်ဇီမာဟာ ပြီးခဲ့တဲ့ရာသီက ရီးရယ်လ်အသင်းအတွက် ပြိုင်ပွဲစုံ ၄၆ ပွဲမှာ ၄၄ ဂိုး သွင်းယူပြီး အသင်းကို လာလီဂါ နဲ့ ချန်ပီယံလိဂ် ဆုဖလား ရယူနိုင်အောင် စွမ်းဆောင်ပေးနိုင်ခဲ့တာ ဖြစ်ပါတယ်။

ရော်နယ်ဒိုနဲ့ ဘန်ဇီမာတို့ဟာ ဘာနေဗျူးမှာ ၉ နှစ်ကြာ တွဲကစားခဲ့ပြီး အဆိုပါအချိန်တွေမှာ အရင်းနှီးဆုံး မိတ်ဆွေ တွေအဖြစ် ရှိခဲ့တာပါ။ ရော်နယ်ဒို ကိုယ်တိုင်ကလည်း အခုနှစ်အတွက် ဘောလွန်းဒီအောဆုကို ဘန်ဇီမာ ရရှိမယ် လို့ ယုံကြည်မှုရှိနေတာ ဖြစ်ပါတယ်။

ရော်နယ်ဒိုနဲ့ ဘန်ဇီမာကိုတွေ့ရစဉ် (Sky Sports)

ရော်နယ်ဒိုဟာ ပြီးခဲ့တဲ့ ၂၀၁၈၊ ၂၀၁၉ နဲ့ ၂၀၂၁ က ကျင်းပခဲ့တဲ့ ဆုပေးပွဲမှာ ဆုရရှိနိုင်မှာ မဟုတ်မှန်းသိလို့ တက်ရောက်ခဲ့ခြင်း မရှိပါဘူး။ ဒါပေမယ့် အခုနှစ်မှာ ကျင်းပမယ့် ဆုပေးပွဲမှာတော့ အသင်းဖော်ဟောင်း ဘန်ဇီမာကို ဂုဏ်ပြုချင်လို့ တက်ရောက်မယ်လို့ နိုင်ငံတကာ သတင်းတွေက ဖော်ပြထားကြပါတယ်။

ပြီးခဲ့တဲ့နှစ်က ဘောလွန်းဒီအောဆုကို ရယူနိုင်ခဲ့တဲ့ မက်ဆီကတော့ အခုနှစ်အတွက် ဆန်ကာတင်စာရင်းမှာ ပါဝင်ခဲ့ခြင်း မရှိပါဘူး။

အာဂျင်တီးနား အသင်းခေါင်းဆောင်ဟာ ပီအက်စ်ဂျီအသင်းနဲ့ ပထမရာသီမှာ ခြေစွမ်းပြနိုင်ဖို့ ခက်ခဲနေတာကြောင့် ဆန်ကာတင်စာရင်းမှာ ရွေးချယ်ခြင်း မခံခဲ့ရတာ ဖြစ်ပါတယ်။ ဘန်ဇီမာက သူဟာ အခုနှစ်အတွက် ချီးမြှင့်မယ့် ဘောလွန်းဒီအောဆုနဲ့ ထိုက်တန်တယ်ဆိုတာ ယုံကြည်တယ်လို့ အင်တာဗျူးတစ်ခုမှာ ပြောထားတာပါ။

ဘန်ဇီမာက “ ကျနော်ဟာ ကောင်းမွန်တဲ့ ရာသီတစ်ခု ရှိခဲ့တာကြောင့်လို့ ထင်ပါတယ်။ အရေးကြီးတဲ့ ပွဲ အများ အပြားမှာလည်း ကျနော်ရှိနေခဲ့ပြီး ကွဲပြားခြားနားမှုတွေကို ကျနော် လုပ်နိုင်ခဲ့ပါတယ်။ ဒါတွေအားလုံးက ကျနော့်ရဲ့ စွမ်းဆောင်ရည်ကို လူတွေ အသိအမှတ် ပြုစေခဲ့တာ ဖြစ်ပါတယ်။ ကျနော်ဟာ တစ်ရာသီလုံး တသမတ်တည်း ရှိခဲ့ပါတယ်”လို့ ပြောခဲ့ပါတယ်။

Source: Sportbible

CNI Sport News

၂၀၂၂ ခုနှစ်၊ အောက်တိုဘာ ၁၃

ဆာလတ်ဟာ လီဗာပူးလ်အသင်းက ရိန်းဂျားစ်အသင်းကို ၇ ဂိုး- ၁ ဂိုးနဲ့ ဂိုးပြတ်အနိုင်ရခဲ့တဲ့ ချန်ပီယံလိဂ်ပွဲစဉ်မှာ ဒီပြိုင်ပွဲရဲ့ အမြန်ဆုံးဟတ်ထရစ်ဂိုးသွင်းသူအဖြစ် စံချိန်သစ်တင်လိုက်ပါတယ်။

ဆာလတ်ဟာ ဒီပွဲစဉ်ရဲ့ ပွဲချိန် ၆၈ မိနစ်မှ ဒါဝင်နူနက်စ်ရဲ့ နေရာမှာ လူစားထိုးဝင်ရောက်လာခဲ့ပြီး ပွဲချိန် ၇၅ မိနစ်၊ မိနစ် ၈၀ နဲ့ ၈၁ မိနစ်တွေမှာ ဟတ်ထရစ်ဂိုးသွင်းယူခဲ့တာပါ။ဆာလတ်ဟာ ဒီဂိုးတွေသွင်းယူဖို့ ၆ မိနစ်နဲ့ ၁၂ စက္ကန့် သာ အချိန်ယူခဲ့ရတာဖြစ်ပြီး စံချိန်သစ်တင်နိုင်ခဲ့တာ ဖြစ်ပါတယ်။အရင်က ချန်ပီယံလိဂ်ပြိုင်ပွဲရဲ့ အမြန်ဆုံး ဟတ် ထရစ်ဂိုးသွင်းသူအဖြစ် စံချိန်တင်ထားကတော့ ပြင်သစ်တိုက်စစ်မှူးဟောင်း ဂိုမစ်ဖြစ်တာပါ။

သူဟာ ၂၀၁၁-၁၂ ရာသီ ချန်ပီယံလိဂ်ပြိုင်ပွဲရဲ့ အုပ်စုအဆင့်မှာ လိုင်ယွန်အသင်းအတွက် ကစားပေးချိန် ဒိုင်နမိုဇာ ဂရက်ဘက်ကို ဟတ်ထရစ်သွင်းယူခဲ့တာဖြစ်ပါတယ်။ဂိုမစ်ဟာ ဒီဂိုးတွေကို ၈ မိနစ်အတွင်း သွင်းယူနိုင်ခဲ့တာ ဖြစ်ပြီး အခု ဆာလတ်က ၆ မိနစ် ၁၂ စက္ကန့်နဲ့ စံချိန်သစ်တင်ခဲ့တာပါ။ ဆာလတ်သွင်းယူခဲ့တဲ့ ၃ ဂိုးစလုံးကို တိုက်စစ်မှူး ဂျိုတာ တစ်ဦးတည်းက ဖန်တီးပေးခဲ့တာလည်း ဖြစ်ပါတယ်။

လီဗာပူးလ်အသင်းနည်းပြ ကလောပ့်က “ဆာလတ်ကတော့ ဆာလတ်ပါပဲ။ချန်ပီယံလိဂ်သမိုင်းတစ်လျှောက် အမြန်ဆုံးဟတ်ထရစ်သွင်းဂိုး၊ဒါဟာ ထူးခြားမှုတစ်ခုပါပဲ” လို့ ပွဲအပြီး BT Sport နဲ့ အင်တာဗျူးမှာ ပြောခဲ့တာပါ။ လီဗာပူးလ်အသင်းဟာ ဒီပွဲရဲ့ ပထမပိုင်းမှာ ရိန်းဂျားစ်အသင်းနဲ့ ၁ ဂိုးစီသရေကျခဲ့ပေမယ့် ဒုတိယပိုင်းမှာ ၆ ဂိုး သွင်းပြီး ဂိုးပြတ်နိုင်ပွဲရရှိခဲ့တာဖြစ်ပါတယ်။လီဗာပူးလ်အသင်းဟာ ဒီနိုင်ပွဲကြောင့် နောက်တစ်ဆင့်တက်ဖို့ အခြေအနေ ကောင်းသွားပြီဖြစ်ပါတယ်။

လီဗာပူးလ်အသင်းဟာ အုပ်စုတွင်း ၄ ပွဲကစားအပြီးမှာ ၃ ပွဲနိုင် ၁ ပွဲရှုံး ရမှတ် ၉ မှတ် ရရှိထားပြီး ဒုတိယနေရာမှာ ရပ်တည်ကာ တတိယနေရာက အေဂျတ်စ်အသင်းကို ၆ မှတ်ဖြတ်ထားတာဖြစ်ပါတယ်။ အုပ်စုထိပ်ဆုံးက နာပိုလီ အသင်းကတော့ ရာနှုန်းပြည့်နိုင်ပွဲနဲ့ နောက်တစ်ဆင့်ကို တက်ရောက်သွားခဲ့ပါပြီ။လီဗာပူးလ်အသင်းဟာ ချန်ပီယံ လိဂ်မှာ ရလဒ်ကောင်းတွေရနေပေမယ့် ပရီးမီးယားလိဂ်မှာ ရလဒ်ဆိုးတာကနေ ပြန်လည်ရုန်းထွက်နိုင်ဖို့ လိုအပ်နေတာပါ။

ပရီးမီးယားလိဂ်မှာ နိုင်ပွဲ ၂ ပွဲသာ ရရှိထားပြီး အမှတ်ပေးဇယား အဆင့် ၁၀ နေရာမှာရပ်တည်နေတဲ့ လီဗာပူးလ် အသင်းဟာ ဒီတစ်ပတ်မှာတော့ မန်စီးတီးအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Mirror,Goal

CNI Sport News

၂၀၂၂ ခုနှစ်၊ အောက်တိုဘာ ၁၃

အင်တာမီလန်အသင်းနဲ့ ၃ ဂိုးစီသရေကျပြီးနောက် ဘာစီလိုနာအသင်းဟာ ချန်ပီယံလိဂ်မှာ ကစားဖို့ မထိုက်တန် ဘူးလို့ နည်းပြ ဇာဗီက ပြောလိုက်ပါတယ်။

ဇာဗီက “အိမ်ကွင်းမှာ အင်တာမီလန်အသင်းကို အနိုင်မရခဲ့တဲ့အတွက် ဒီပြိုင်ပွဲမှာ ဆက်ရှိဖို့ မထိုက်တန်တော့ပါ ဘူး။ ပြီးခဲ့တဲ့ရာသီက ကျနော်တို့ ဒီပြိုင်ပွဲအတွက် လုံလောက်မှုမရှိခဲ့ပေမယ့် ဒီရာသီမှာတော့ ကျနော်တို့ လုပ်နိုင်ခဲ့ ပါတယ်။အခုတစ်ကြိမ်ကတော့ ကျနော်တို့ရဲ့ အမှားတွေပါပဲ။ကျနော်အလွန်စိတ်ပျက်၊ ဝမ်းနည်းပြီး ဒေါသထွက် နေပါတယ်။ ဒီအတွက် ကိုယ့်ကိုကိုယ်ပဲ ဝေဖန်ရပါမယ်။ကျနော်တို့ ချန်ပီယံလိဂ်မှာ ကစားဖို့ မထိုက်တန်ပါဘူး။ ဒါဟာ ကျနော့်ကို နာကျင်စေပေမယ့် အမှန်တရားတွေပါ” လို့ ပွဲအပြီးသတင်းစာရှင်းလင်းပွဲမှာ ပြောခဲ့တာပါ။

ဘာစီလိုနာအသင်းဟာ ဒီပွဲမှာ ၁ ဂိုး- ဂိုးမရှိနဲ့ ဦးဆောင်ခွင့်ရခဲ့ပေမယ့် ပွဲပြီးနာကျင်အချိန်ပိုမှာ လီဝန်ဒေါစကီးရဲ့ အဖိုးတန်ချေပဂိုးကြောင့်သာ တစ်ဖက် ၃ ဂိုးစီသရေနဲ့ ပြီးဆုံးခဲ့တာဖြစ်ပါတယ်။ဘာစီလိုနာအသင်းဟာ ဒီရလဒ် ကြောင့် အုပ်စုတွင်း ဒုတိယနေရာက အင်တာမီလန်အသင်းနဲ့ ၃ မှတ်ကွာဟသွားခဲ့တာဖြစ်ပြီး နောက်တစ်ဆင့် တက်ဖို့ ခက်ခဲသွားပြီဖြစ်ပါတယ်။ဘာစီလိုနာအသင်းဟာ မနှစ်ကလည်း အုပ်စုကနေ ထွက်ခဲ့ရပြီး ယူရိုပါလိဂ် ဆင်းကစားခဲ့ရတာပါ။

အဲဒါကြောင့် အခုနှစ်မှာလည်း ဒီလိုပဲ ယူရိုပါလိဂ်ဆင်းကစားရဖို့ နီးစပ်သွားခဲ့တာဖြစ်ပါတယ်။ ဘာစီလိုနာ အသင်း ဟာ မနှစ်ကလို မဖြစ်အောင် အခုနှစ်ရာသီမှာ လီဝန်ဒေါစကီး၊ ရာဖင်ဟာ၊ ကတ်ဆီ၊ ကွန်ဒီ အပါအဝင် ကစားသမား အများအပြားကို အားဖြည့်ခဲ့ပေမယ့် ချန်ပီယံလိဂ်မှာ ရလဒ်တွေဆိုးရွားနေဆဲ ဖြစ်တာပါ။ ဘာစီလိုနာအသင်းအနေ နဲ့ နောက်ထပ်ကစားရမယ့် ချန်ပီယံလိဂ်ပွဲစဉ်မှာ ဘိုင်ယန်မြူးနစ်နဲ့ တွေ့ဆုံနေတာဖြစ်ပြီး အနိုင်မရခဲ့ရင်တော့ ယူရိုပါလိဂ်ကစားရဖို့ သေချာသွားပြီဖြစ်ပါတယ်။

ဘာစီလိုနာအသင်းဟာ ချန်ပီယံလိဂ်မှာ ရလဒ်မကောင်းပေမယ့် လာလီဂါမှာတော့ ၈ ပွဲ ကစားအပြီးမှာ ရှုံးပွဲမရှိ ရမှတ် ၂၂ မှတ်နဲ့ အမှတ်ပေးဇယားထိပ်ဆုံးနေရာကို ဦးဆောင်နေတာပါ။ဘာစီလိုနာအသင်းဟာ ဒီတစ်ပတ်မှာ တော့ ရမှတ်တူ ဂိုးကွာခြားချက်ကြောင့် ဒုတိယနေရာမှာရှိနေတဲ့ ရီးရယ်လ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Goal