CNI Sport News

၂၀၂၂ ခုနှစ်၊ အောက်တိုဘာ ၅

ဘာစီလိုနာအသင်းနည်းပြ ဇာဗီက အင်တာမီလန်အသင်းကို ရှုံးနိမ့်ခဲ့တဲ့ ချန်ပီယံလိဂ်ပွဲစဉ်မှာ မတရားမှုကို ခံစားခဲ့ ရပြီးနောက် ဒိုင်လူကြီးဆီကနေ သူတို့ဆုံးဖြတ်ချက်တွေ ဖြေရှင်းဖို့ တောင်းဆိုခဲ့တယ်လို့ ပြောလိုက်ပါတယ်။

ဇာဗီက “ကျနော် စိတ်ပျက်မိပါတယ်။ ဒါဟာ မတရားမှုဖြစ်ပြီး ကျနော်တို့ ပြန်မလာနိုင်ခဲ့ပါဘူး။ ဒိုင်လူကြီးဆီကနေ ရှင်းပြတာကို ကျနော်လိုချင်ပါတယ်။ ဒါဟာ လက်ထိဘောဆိုတာ ရှင်းရှင်းလင်းလင်းပါပဲ။ ကျနော် တကယ်ကို ဒေါသ ထွက်မိပါတယ်”လို့ ပြောပါတယ်။

ဘာစီလိုနာအသင်းဟာ ဒီပွဲမှာ အင်တာမီလန်အသင်းကို ၁ ဂိုး- ဂိုးမရှိနဲ့ အရေးနိမ့်ခဲ့တာ ဖြစ်ပါတယ်။

ဒီပွဲရဲ့ ဒုတိယပိုင်းမှာ ပီဒရီက ဘာစီလိုနာအတွက် ချေပဂိုး သွင်းယူခဲ့ပေမယ့် အန်ဆုဖာတီ လက်ထိတယ်ဆိုပြီး ကွင်းလယ်ဒိုင်လူကြီး ဗင်ဆစ်က ဂိုးမပေးခဲ့တာပါ။

ဒီပွဲရဲ့ ပွဲပြီးကာနီးမှာ အင်တာမီလန်အသင်း နောက်ခံလူ ဒွန်ဖရိုင်း ဂိုးဧရိယာအတွင်းမှာ လက်ထိခဲ့ပေမယ့် ဒိုင် လူကြီးက VAR ကို ပြန်မကြည့်ခဲ့တဲ့အပေါ် ဇာဗီက ဒေါသထွက်နေခဲ့တာ ဖြစ်ပါတယ်။ ဘာစီလိုနာ ကစားသမား တွေကလည်း ဒီအဖြစ်အပျက်ကို မစစ်ဆေးခဲ့တဲ့ ဒိုင်လူကြီးရဲ့ ဆုံးဖြတ်ချက်ကို အံ့အားသင့် နေခဲ့ကြတာပါ။

ဘာစီလိုနာနဲ့ အင်တာမီလန်တို့ ယှဉ်ပြိုင်နေစဉ် (MARCA)

ဘာစီလိုနာအသင်းဟာ ချန်ပီယံလိဂ် ၃ ပွဲ ကစားအပြီးမှာ ၁ ပွဲနိုင် ၂ ပွဲရှုံး ရလဒ်ကြောင့် နောက်တဆင့် တက်ဖို့ဆို ရင် လက်ကျန် ၃ ပွဲမှာ ရလဒ်ကောင်း ရယူနိုင်ဖို့ လိုအပ်နေတာ ဖြစ်ပါတယ်။ ဘာစီလိုနာအသင်းဟာ ပြီးခဲ့တဲ့ ရာသီ ကလည်း ချန်ပီယံလိဂ်ပြိုင်ပွဲမှာ ရလဒ်ဆိုးတွေကြောင့် ယူရိုပါလိဂ် ဆင်းကစားခဲ့ရတာပါ။

ဇာဗီက “ ကျနော်တို့ အခုဆို ဗိုလ်လုပွဲ ၃ ပွဲကစားဖို့ ရှိပါတယ်။ သူတို့က ၆ မှတ်၊ ကျနော်တို့က ၃ မှတ်နဲ့ ဘိုင်ယန် က ၉ မှတ်အထိ ရရှိထားပါတယ်။ ဒါပေမယ့် နောက်ထပ် ၃ ပွဲမှာ ၂ ပွဲက အိမ်ကွင်းမှာ ကစားရမှာပါ။ ဒီပွဲတွေကို တကယ့် ဗိုလ်လုပွဲလို ပြင်းပြင်းထန်ထန် ကစားရမှာပါ။ ဒီပွဲမှာဆိုရင် ကျနော်တို့ အခွင့်အရေးတွေ ရခဲ့ပေမယ့် မယူနိုင်ခဲ့ပါဘူး။ သူတို့ကတော့ အဝေးကန်ချက်နဲ့ ဂိုးယူသွားခဲ့ပါတယ်”လို့ ပြောခဲ့ပါတယ်။

လာလီဂါ အမှတ်ပေးဇယား ထိပ်ဆုံးနေရာမှာ ရပ်တည်နေတဲ့ ဘာစီလိုနာအသင်းဟာ ဒီတစ်ပတ်လာလီဂါ ပွဲစဉ် အဖြစ် ဆယ်လ်တာဗီဂိုအသင်းနဲ့ ယှဉ်ပြိုင်ရမှာဖြစ်ပြီး ဒီပွဲပြီးရင်တော့ အင်တာမီလန်အသင်းနဲ့ ဆက်လက် ယှဉ်ပြိုင် ရမှာ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ အောက်တိုဘာ ၄

ရုရှားနဲ့ ဘယ်လာရုစ် တာဝန်ရှိသူတွေ တက်ရောက်မယ့် အပြည်ပြည်ဆိုင်ရာ ကျွမ်းဘား အားကစားအဖွဲ့ချုပ် ကွန်ဂရက်ကို ပိုလန်နဲ့ အက်စ်တိုးနီးယားတို့က တက်ရောက်မှာ မဟုတ်ဘူးလို့ သိရပါတယ်။

ဒီကွန်ဂရက်ကို လာမယ့်လ တူရကီနိုင်ငံ၊ အစ္စတန်ဘူလ်မှာ ကျင်းပသွားမှာပါ။ ယူကရိန်းနဲ့ ဖြစ်ပွားနေတဲ့ ပဋိပက္ခ တွေကြောင့် အပြည်ပြည်ဆိုင်ရာ ကျွမ်းဘားအဖွဲ့ချုပ်ဟာ ရုရှားနဲ့ ဘယ်လာရုစ် အားကစားသမားတွေကို ပြိုင်ပွဲ ဝင်ခွင့် ပိတ်ပင်ထားပါတယ်။

ဒါပေမယ့် အဖွဲ့အစည်းက ကျင်းပတဲ့ အစည်းအဝေး ပွဲတွေမှာတော့ အဆိုပါ ၂ နိုင်ငံက တာဝန်ရှိသူတွေဟာ လွတ်လပ်စွာ တက်ရောက်ခွင့် ရှိတာပါ။

ကျွမ်းဘား ကစားသမားတစ်ဦးကိုတွေ့ရစဉ် (Inside TheGames)

အဲ့ဒါကြောင့် ပိုလန်နဲ့ အက်စ်တိုးနီးယားတို့ဟာ နိုဝင်ဘာလ ၁၁ ရက်နဲ့ ၁၂ ရက်မှာ ကျင်းပဖို့ စီစဉ်ထားတဲ့ ဒီကွန်ဂရက်ကို သပိတ်မှောက်သွားဖို့ စီစဉ်ထားတယ်လို့ Inside The Game က ဖော်ပြခဲ့တာ ဖြစ်ပါတယ်။
နော်ဝေနဲ့ ယူကရိန်းတို့က တာဝန်ရှိသူတွေကလည်း သူတို့တက်ရောက်မှာ မဟုတ်ဘူးဆိုပြီး ပြောထားပြီးသား ဖြစ်တယ်လို့ သတင်းမှာ ဖော်ပြထားပါတယ်။ ဒီကွန်ဂရက်ကို ကနဦးက နော်ဝေမှာ ကျင်းပဖို့ စီစဉ်ထားတာ ဖြစ်ပါတယ်။

ဒါပေမယ့် နော်ဝေ အားကစား အာဏာပိုင်တွေနဲ့ နိုင်ငံရေးသမားတွေရဲ့ တောင်းဆိုမှုကြောင့် နော်ဝေ ကျွမ်းဘား အားကစားအဖွဲ့ချုပ်က ရုရှားနဲ့ ဘယ်လာရုစ်ကို တက်ရောက်ခွင့်ပြုမှာ မဟုတ်ဘူးလို့ ပြောခဲ့တာပါ။

ဒါကြောင့်လည်း အစ္စတန်ဘူလ်မှာ ပြောင်းလဲကျင်းပဖို့ သတ်မှတ်ခဲ့တာ ဖြစ်ပါတယ်။ ရုရှားကျွမ်းဘားအဖွဲ့ချုပ် ဥက္ကဋ္ဌကတော့ နိုင်ငံတိုင်းဟာ ဒီပွဲကို မတက်ရောက်ဖို့ အခွင့်အရေးရှိတယ်လို့ ပြောခဲ့ပါတယ်။

“ပိုလန်နဲ့ အက်စ်တိုးနီးယားက သပိတ်မှောက်မယ်ဆိုတာကို ကျနော်သိခဲ့ပါတယ်။ ဒါဟာ သူတို့ရဲ့ အခွင့်အရေး ပါပဲ။ ဒီကွန်ဂရက်မှာ ပါဝင်နိုင်ဖို့အတွက် အဖွဲ့ချုပ်အနည်းဆုံး ၁၃၀ စာရင်းသွင်း ထားတယ်ဆိုတာကို ကျနော် ထောက်ပြချင်ပါတယ်”လို့ တီတော့ဗ်က RIA Novosti ကို ပြောခဲ့ပါတယ်။

Source: အာတီသတင်းဌာန

CNI Sport News

၂၀၂၂ ခုနှစ်၊ အောက်တိုဘာ ၄

ယူကရိန်းဟာ ၂၀၃၀ ကမ္ဘာ့ဖလားပြိုင်ပွဲကို ပေါ်တူဂီ၊ စပိန်တို့နဲ့အတူ ပူးတွဲအိမ်ရှင်အဖြစ် ကျင်းပဖို့ စီစဉ်နေတယ်လို့ The Times သတင်းဌာနက တနင်္လာနေ့မှာ ဖော်ပြထားပါတယ်။

ယူကရိန်းသမ္မတ ဇာလန်းစကီး၊ စပိန်နဲ့ ပေါ်တူဂီ အာဏာပိုင်တို့ဟာ နားလည်မှုတွေ ရရှိပြီးနောက် ဒီပြိုင်ပွဲရဲ့ အုပ်စု တစ်ခုကို အိမ်ရှင်အဖြစ် လက်ခံကျင်းပမယ်လို့ The Times က ဖော်ပြထားတာ ဖြစ်ပါတယ်။

စပိန်နဲ့ ပေါ်တူဂီဘောလုံး အကြီးအကဲတွေဟာ သူတို့ရဲ့ ပူးပေါင်းမှုအသစ်ကို ဗုဒ္ဓဟူးနေ့ ယူအီးအက်ဖ်အေ ရုံးချုပ်မှာ ပြုလုပ်မယ့် သတင်းစာရှင်းလင်းပွဲမှာ ကြေညာသွားမယ်လို့ အဆိုပါသတင်းက ဆက်လက် ဖော်ပြထားပါတယ်။

အာဖရိတိုက်က မော်ရိုကို၊ တောင်အမေရိတိုက်က ဥရုဂွေး၊ ချီလီ၊ အာဂျင်တီးနားနဲ့ ပါရာဂွေးတို့က ပူးတွဲအိမ်ရှင်၊ အီဂျစ်၊ ဂရိ၊ ဆော်ဒီတို့ကလည်း ၂၀၃၀ ကမ္ဘာ့ဖလားပြိုင်ပွဲကို ပူးတွဲအိမ်ရှင်အဖြစ် ပြုလုပ်ဖို့ လျှောက်ထားကြပါတယ်။

ယူကရိန်းပရိသတ်တစ်ဦးကို တွေ့ရစဉ် (Reuters)

အဲ့ဒါကြောင့် စပိန်၊ပေါ်တူဂီနဲ့ ယူကရိန်းတို့ဟာ အဆိုပါနိုင်ငံတွေနဲ့ အိမ်ရှင်အဖြစ် ရရှိဖို့ ပြိုင်ဆိုင်ကြရမှာ ဖြစ်ပါတယ်။

တောင်အမေရိကတိုက်က ၄ နိုင်ငံကတော့ ကမ္ဘာ့ဖလားပြိုင်ပွဲကို စတင်ခဲ့တဲ့ သူတို့တိုက်မှာပဲ နှစ် ၁၀၀ ပြည့် ကမ္ဘာ့ဖလားပြိုင်ပွဲကို အိမ်ရှင်အဖြစ် ကျင်းပဖို့ စီစဉ်နေတာပါ။ ကမ္ဘာ့ဖလားပြိုင်ပွဲကို ၁၉၃၀ က ဥရုဂွေးနိုင်ငံမှာ စတင်ကျင်းပခဲ့တာ ဖြစ်ပါတယ်။

ရုရှားရဲ့ ကျူးကျော်မှုဒဏ် ခံနေရတဲ့ ယူကရိန်းကတော့ ကမ္ဘာ့ဖလားပြိုင်ပွဲကို အိမ်ရှင်အဖြစ် ကျင်းပခွင့် မရရှိ သေးပါဘူး။

လာမယ့် ၂၀၂၂ ကမ္ဘာ့ဖလားပြိုင်ပွဲကို နိုဝင်ဘာလ ၂၀ ရက် ကာတာနိုင်ငံမှာ စတင်ကျင်းပသွားတော့မှာ ဖြစ်ပြီး ၂၀၂၆ ကမ္ဘာ့ဖလားပြိုင်ပွဲကိုတော့ ကွန်ကာကပ်ဖ်ဇုန်က အမေရိကန်၊ ကနေဒါနဲ့ မက္ကဆီကိုတို့က ပူးတွဲအိမ်ရှင် အဖြစ် ကျင်းပသွားမှာ ဖြစ်ပါတယ်။

Source: Reuters

CNI Sport News

၂၀၂၂ ခုနှစ်၊ အောက်တိုဘာ ၄

လန်ဒန်မာရသွန်ပြိုင်ပွဲမှာ ပါဝင်ယှဉ်ပြိုင်နေတဲ့ အပြေးသမားတစ်ဦးဟာ ပြိုင်ပွဲဝင်နေစဉ်မှာပဲ လဲကျပြီးနောက် သေဆုံးသွားခဲ့တယ်လို့ သိရပါတယ်။

အသက် ၃၆ နှစ်အရွယ်ရှိ ပြိုင်ပွဲဝင်အပြေးသမားဟာ ၂၃ မိုင်နဲ့ ၂၄ မိုင်ကြားမှာ ဒီလိုထိတ်လန့်ဖွယ် အဖြစ်အပျက် ဖြစ်ခဲ့တာပါ။လူနာတင်ယာဉ်ဟာ အခင်းဖြစ်ပွားရာနေရာကို ၃ မိနစ်အတွင်းရောက်ရှိလာခဲ့ပြီး ဆေးရုံကို အမြန် ပို့ဆောင်ခဲ့တာ ဖြစ်ပါတယ်။ဒါပေမယ့် အသက်ကိုမကယ်တင်နိုင်ခဲ့ဘဲ သေဆုံးသွားခဲ့တာပါ။ လန်ဒန်မာရသွန် ပြိုင်ပွဲစီစဉ်သူတွေကတော့ သေဆုံးရခြင်းအကြောင်းအရင်းကို ဖော်ထုတ်နိုင်ဖို့အတွက် ရင်ခွဲစစ်ဆေးမယ်လို့ အတည်ပြုထားခဲ့ပါတယ်။

ကြေညာချက်မှာတော့ “ဝမ်းနည်းစွာနဲ့ပဲ ၂၀၂၂ လန်ဒန်မာရသွန်ပြိုင်ပွဲမှာ ပါဝင်နေတဲ့သူတစ်ဦး သေဆုံးသွားတာကို ကျနော်တို့ အတည်ပြုပါတယ်။မိသားစုက ဒါနဲ့ပတ်သက်ပြီး လျှို့ဝှက်ဖို့ တောင်းဆိုထားပါတယ်။သူတို့ရဲ့ ဆန္ဒအရ အသေးစိတ်အချက်အလက်တွေကို ထုတ်ပြန်မှာမဟုတ်ဘူး။သေဆုံးခဲ့ရတဲ့ အကြောင်းအရင်းကို ဆေးစစ်ချက် တွေအရ သိရမှာပါ” လို့ ထုတ်ပြန်ခဲ့ပါတယ်။

အဆိုပါအပြေးသမားကို ကယ်တင်နိုင်ဖို့ ဆေးဘက်ဆိုင်ရာဝန်ထမ်းတွေက အသည်းအသန်ကြိုးစားခဲ့တယ်လို့ လည်း ထုတ်ပြန်ချက်မှာ ဖော်ပြထားပါတယ်။အမျိုးသားပြိုင်ပွဲမှာ ကီပရူတိုက ၂ နာရီ ၄ မိနစ် ၃၉ စက္ကန့်နဲ့ ချန်ပီယံ ဖြစ်ခဲ့ပြီး အမျိုးသမီးပြိုင်ပွဲမှာ ယီဟွာလောက ၂ နာရီ ၁၇ မိနစ် ၂၆ စက္ကန့်နဲ့ ချန်ပီယံဖြစ်ခဲ့တာပါ။ ဘီးတပ် ကုလား ထိုင်အမျိုးသားပြိုင်ပွဲမှာ မာဆယ်လ်ဟုချ်နဲ့ အမျိုးသမီးပြိုင်ပွဲမှာ ဒီဘာနာက ချန်ပီယံဆုကို ရယူနိုင်ခဲ့တာ ဖြစ်ပါ တယ်။

အောက်တိုဘာလ ၂ ရက်နေ့က ကျင်းပခဲ့တဲ့ လန်ဒန်မာရသွန်ပြိုင်ပွဲမှာ လူပေါင်း ၄၀,၀၀၀(လေးသောင်း)ခန့် ပါဝင်ခဲ့တာ ဖြစ်တယ်လို့သိရပါတယ်။

Source:The Sun

CNI Sport News

၂၀၂၂ ခုနှစ်၊ အောက်တိုဘာ ၄

ယူနိုက်တက်အသင်းဟာ ဇန်နဝါရီအပြောင်းအရွှေ့မှာ ရော်နယ်ဒိုကို ထွက်ခွာခွင့်ပေးသွားမယ်လို့ သတင်းတွေမှာ ဖော်ပြထားပါတယ်။

ဘောလွန်းဒီအောဆုကို ၅ ကြိမ်ရရှိထားတဲ့ ရော်နယ်ဒိုဟာ မန်စီးတီးအသင်းကို ၆ ဂိုး- ၃ ဂိုးနဲ့ အရေးနိမ့်ခဲ့တဲ့ ပရီးမီးယားလိဂ်ပွဲစဉ်မှာ လူစားဝင်ကစားသမားအဖြစ်တောင် ပါဝင်ခွင့်မရခဲ့ပါဘူး။ယူနိုက်တက်နည်းပြ အဲရစ်တန် ဟတ်က ရော်နယ်ဒိုရဲ့ ကြီးကျယ်တဲ့ ကစားသမားဘဝကို လေးစားလို့ ဒီပွဲမှာ အသုံးမပြုခဲ့တာလို့ ပွဲအပြီးမှာ ပြောခဲ့တာဖြစ်ပါတယ်။

ဘောလုံးပွဲဝေဖန်သုံးသပ်သူအဖြစ် ဆောင်ရွက်နေတဲ့ ရွိုင်ကိန်းက အသင်းဟောင်းဟာ ရော်နယ်ဒိုအပေါ်မှာ လေးစားမှုမရှိဘူးဆိုပြီး ဝေဖန်မှုတွေ ပြုလုပ်သွားခဲ့တာပါ။

ရော်နယ်ဒိုဟာ ပြီးခဲ့တဲ့ အပြောင်းအရွှေ့က ထွက်ခွာခွင့်တောင်းဆိုခဲ့ပေမယ့် ယူနိုက်တက်အသင်းက ငြင်းဆန်ခဲ့တာကြောင့် ကစားသမားဟာ မန်ချက်စတာကလပ်မှာပဲ ဆက်လက်ရှိနေခဲ့တာ ဖြစ်ပါတယ်။ အခုအချိန်မှာတော့ အဲရစ်တန်ဟတ်နဲ့ အသင်းတာဝန်ရှိသူတွေက ဇန်နဝါရီမှာ ရော်နယ်ဒိုကို ထွက်ခွာခွင့်ပေးဖို့အတွက် ဆွေးနွေး ညှိနှိုင်းမှုတွေပြုလုပ်ဖို့ ဆန္ဒရှိနေတယ်လို့ The Telegraph သတင်းဌာနက ဖော်ပြထားတာပါ။

 ပေါ်တူဂီအသင်းခေါင်းဆောင်ဟာ ဒီရာသီ ပရီးမီးယားလိဂ်ပြိုင်ပွဲမှာ မိနစ် ၈၀ သာ ပါဝင်ကစားခွင့်ရထားပြီး ဘရန်ဖိုဒ့်အသင်းကို အရေးနိမ့်ခဲ့တဲ့ ပွဲစဉ်တစ်ပွဲသာ ပွဲစကတည်းက ပါဝင်ခွင့်ရခဲ့တာဖြစ်ပါတယ်။ရော်နယ်ဒိုဟာ မန်စီးတီးအသင်းကို အရေးနိမ့်ခဲ့တဲ့ပွဲမှာ အသင်းဖော်တွေရဲ့ စွမ်းဆောင်ရည်တွေကိုကြည့်ပြီး အရန်ခုံတန်းပေါ်မှာ စိတ်ပျက်လက်ပျက်ဖြစ်နေတာကို တွေ့မြင်ခဲ့ရတာပါ။

ပေါ်တူဂီတိုက်စစ်မှူးဟာ ချန်ပီယံလိဂ်ပြိုင်ပွဲယှဉ်ပြိုင်နေတဲ့ အသင်းတစ်သင်းဆီကို ပြောင်းရွှေ့ဖို့ စိတ်အားထက်သန်နေတာ ဖြစ်ပါတယ်။

ပြီးခဲ့တဲ့ အပြောင်းအရွှေ့က ရော်နယ်ဒိုကို ခေါ်ယူဖို့ ဆော်ဒီကလပ် အယ်လ်ဟီလယ်အသင်းက ကြီးမားတဲ့ ကမ်းလှမ်းမှုကို ပြုလုပ်ခဲ့ပေမယ့် ကစားသမားကတော့ ဥရောပမှာပဲ ဆက်ရှိဖို့ ဆန္ဒရှိခဲ့တာပါ။

ရော်နယ်ဒိုနဲ့ ယူနိုက်တက်တို့ ချုပ်ဆိုထားတဲ့ စာချုပ်ဟာ အခုရာသီအကုန်မှာကုန်ဆုံးတော့မှာဖြစ်ပြီး မန်ချက်စတာ ကလပ် အနေနဲ့ ဇန်နဝါရီမှာ မရောင်းချဘူးဆိုရင် နွေရာသီမှာ အလွတ်နဲ့ ဆုံးရှုံးရတော့မှာ ဖြစ်ပါတယ်။ အဲဒါကြောင့်လည်း ဇန်နဝါရီမှာ ရော်နယ်ဒိုကို ထွက်ခွာခွင့်ပေးဖို့ ယူနိုက်တက်ဘက်က ခွင့်ပြုတာဖြစ်နိုင်တယ်လို့ သတင်းမှာ ဖော်ပြ ထားတာပါ။

ရော်နယ်ဒိုဟာ ဒီရာသီမှာ ယူနိုက်တက်အသင်းအတွက် ပြိုင်ပွဲစုံ ၈ ပွဲပါဝင်ကစားထားပြီး ရှရစ်ဖ်ကို အနိုင်ရခဲ့တဲ့ ယူရိုပါလိဂ်ပွဲမှာ ၁ ဂိုးသွင်းယူထားတာ ဖြစ်ပါတယ်။

Source:Daily Mail

CNI Sport News

၂၀၂၂ ခုနှစ်၊ စက်တင်ဘာ ၃

အာဆင်နယ်အသင်းဟာ မန်စီးတီးအသင်းနောက်မှာ ပရီးမီးယားလိဂ်ရဖို့ ဒုတိယအကောင်းဆုံး အသင်းအဖြစ် ရှိနေတယ်လို့ အာဆင်ဝင်းဂါးက မန်ချက်စတာဒါဘီပွဲစဉ်အပြီးမှာ ပြောလိုက်ပါတယ်။

အာဆင်ဝင်းဂါးက “ ကျနော့်ရဲ့ ပုဂ္ဂိုလ်ရေးအရဆိုရင် အာဆင်နယ်အသင်းကို မန်စီးတီးအသင်း အနောက်မှာ ထားပါမယ်။ အာဆင်နယ်အသင်းဟာ ပရီးမီးယားလိဂ် ဖလားရဖို့ အခွင့်အရေး ကောင်းတွေရှိနေတဲ့ ဒုတိယ အသင်းပါ။ ဘာဖြစ်လို့လဲဆိုရင် မန်စီးတီးအသင်းက တချို့အဆင့်တွေမှာ ချန်ပီယံလိဂ်မှာ အာရုံစိုက်မှာမို့လို့ပါ။ အာဆင်နယ်က လက်ရှိအချိန်မှာ ဆုဖလားကို စိန်ခေါ်ဖို့ အကောင်းဆုံးအသင်းပါ” လို့ ပြောပါတယ်။

အာဆင်နယ်အသင်းဟာ စနေနေ့က ကစားခဲ့တဲ့ ပရီးမီးယားလိဂ်ပွဲစဉ်မှာ စပါးအသင်းကို ၃ ဂိုး- ၁ ဂိုးနဲ့ အနိုင်ရခဲ့ပြီး အမှတ်ပေးဇယားကို ဆက်လက် ဦးဆောင်နေတာ ဖြစ်ပါတယ်။ ဒါပေမယ့် မန်စီးတီးအသင်းက ယူနိုက်တက် အသင်းကို အနိုင်ရခဲ့တာကြောင့် ဒုတိယနေရာကနေ ရမှတ် ၁ မှတ်အကွာနဲ့ ဖိအားပေးနေတာပါ။

အာဆင်နယ်သတင်းကိုတွေ့ရစဉ် (Eurosport)

မန်စီးတီးအသင်းဟာ ဒီရာသီ ပရီးမီးယားလိဂ်ဖလားကို ထပ်မံထိန်းသိမ်းနိုင်ဖို့ ရေပန်းစားနေပေမယ့် အာဆင်ဝင်း ဂါးက အသင်းဟောင်း အာဆင်နယ်ကလည်း ဆုဖလားအတွက် အနီးကပ် လိုက်နိုင်မယ်ဆိုတာ ယုံကြည်နေတာ ဖြစ်ပါတယ်။

အာဆင်ဝင်းဂါးက “လီဗာပူးလ်အသင်း အကြောင်းမသိပေမယ့် သူတို့ဟာ အာဆင်နယ်နဲ့ ၁၁ မှတ်ကွာဟနေပြီး၊ မန်စီးတီးနဲ့ ၁၀ မှတ်ကွာဟနေပါတယ်။ ချယ်လ်ဆီးအသင်းကလည်း လက်ရှိအချိန်မှာ ခြေစွမ်း တသမတ်တည်း မရှိပါဘူး။ သူတို့ဟာ လိဂ်ဖလားကို ရယူနိုင်မယ်ဆိုတဲ့ ယုံကြည်ချက်ကိုလည်း ရှာမတွေ့သေးပါဘူး။ စပါးအသင်းနဲ့ ပတ်သက်ပြီး ကျနော် မခန့်မှန်းနိုင်ပါဘူး”လို့ ပြောသွားခဲ့တာပါ။

အာဆင်နယ်အသင်းဟာ ပရီးမီးယားလိဂ် ဆုဖလားကို အာဆင်ဝင်းဂါး ကိုင်တွယ်တဲ့အချိန် ၂၀၀၃-၀၄ ရာသီက နောက်ဆုံးရယူနိုင်ခဲ့တာဖြစ်ပြီး မနှစ်ကရာသီမှာ အဆင့် ၅ နေရာနဲ့ ရာသီကုန်ဆုံးကာ ယူရိုပါလိဂ်ပြိုင်ပွဲဝင်ခွင့် ရရှိခဲ့တာ ဖြစ်ပါတယ်။

Source: Metro

CNI Sport News

၂၀၂၂ ခုနှစ်၊ အောက်တိုဘာ ၃

ဆားဘီးယားတင်းနစ်သမား ဂျိုကိုဗစ်ဟာ ATP 250 ပြိုင်ပွဲဖြစ်တဲ့ တယ်လ်အဗစ်အိုးပန်းမှာ ဗိုလ်စွဲပြီး ဝင်ဘယ်လ်ဒန်အိုးပန်း နောက်ပိုင်း ပထမဆုံးဆုဖလားကို ရယူနိုင်ခဲ့ပါတယ်။

ဂျိုကိုဗစ်ဟာ တယ်လ်အဗစ် အိုးပန်းပြိုင်ပွဲ ဗိုလ်လုပွဲမှာ မာရင်ဆီလစ်ကို ၆-၃၊ ၆-၄ နဲ့ အနိုင်ရပြီး ဆုဖလား ရယူနိုင်ခဲ့တာပါ။

ဆားဘီးယား တင်းနစ်သမားဟာ ဇူလိုင်လက ဝင်ဘယ်လ်ဒန် အိုးပန်းပြိုင်ပွဲ ယှဉ်ပြိုင်ပြီးနောက် ပထမဆုံး တစ်ဦးချင်း ပြိုင်ပွဲအဖြစ် တယ်လ်အဗစ်ပြိုင်ပွဲမှာ ဝင်ရောက် ယှဉ်ပြိုင်ခဲ့တာ ဖြစ်ပါတယ်။ ဂျိုကိုဗစ်ဟာ ဒီပွဲမတိုင်ခင် ရော်ဂျာဖက်ဒဲရားကို နှုတ်ဆက်တဲ့ Laver Cup ပြိုင်ပွဲမှာ ပါဝင်ကစားခဲ့သေးပါတယ်။

ဂျိုကိုဗစ်က “ ကျနော်အလွန်ကောင်းမွန်တဲ့ တင်းနစ်ပွဲ ကစားခဲ့တယ် ထင်ပါတယ်။ ကျနော် ပြိုင်ပွဲ မကစားရတာ ၃ လလောက်ရှိပါပြီ။ အဲ့ဒါကြောင့် တကယ်ကို ကောင်းမွန်အောင် လုပ်ဆောင်နိုင်ဖို့က ကျနော့်အတွက် တွန်းအား တစ်ခုလို ဖြစ်ခဲ့ပါတယ်။ ဘာကြောင့်လဲဆိုရင် လူတွေက ချစ်ကြည်ရင်းနှီးပြီး ရက်သတ္တပတ်လုံး ကျနော့်ကို အားပေးကြတဲ့ အတွက်ပါ”လို့ ပွဲအပြီးမှာ ပြောခဲ့ပါတယ်။

ဂျိုကိုဗစ်ကို တင်းနစ်ကစားနေစဉ် (The Times of Israel)

ဂျိုကိုဗစ်ဟာ တယ်လ်အဗစ်အိုးပန်းမှာ ပထမဆုံးအကြိမ် ဗိုလ်စွဲခဲ့တာဖြစ်ပြီး ဒီဆုဖလားဟာ သူ့ရဲ့ ကစားသမား ဘဝ ၈၉ ခုမြောက် ဆုဖလားလည်း ဖြစ်ခဲ့ပါတယ်။

ဒါ့အပြင် မာရင်ဆီလစ်နဲ့ တွေ့ဆုံတဲ့ ၂၁ ကြိမ်မှာ ၁၉ ပွဲမြောက် နိုင်ပွဲကို ရယူနိုင်ခဲ့တာ ဖြစ်ပါတယ်။ ဂျိုကိုဗစ်ဟာ ကိုဗစ် ကာကွယ်ဆေး မထိုးတာကြောင့် အခုနှစ်ရာသီ ဂရမ်းဆလမ်းပြိုင်ပွဲတွေဖြစ်တဲ့ သြစတြေးလျအိုးပန်း၊ အမေရိကန်အိုးပန်း အပါအဝင် ပြိုင်ပွဲအများအပြားကို လွဲချော်ခဲ့ရတာပါ။

ကမ္ဘာ့အဆင့် ၇ နေရာမှာ ရပ်တည်နေတဲ့ ဆားဘီးယား တင်းနစ်သမားဟာ ATP 500 ပြိုင်ပွဲဖြစ်တဲ့ အက်စတာနာ အိုးပန်းပြိုင်ပွဲမှာ ဝင်ရောက် ယှဉ်ပြိုင်သွားဖို့ ရှိနေပြီး ဒီပြိုင်ပွဲမှာ ကမ္ဘာ့နံပတ် ၁ အယ်လ်ကာရတ်ဇ်နဲ့ မက်ဗီးဒက်ဗ် တို့လည်း ပါဝင်ယှဉ်ပြိုင်ကြမှာ ဖြစ်ပါတယ်။

အသက် ၃၅ နှစ်အရွယ်ရှိ ဂျိုကိုဗစ်ဟာ အခုနှစ်အတွင်း ဝင်ဘယ်လ်ဒန်အိုးပန်း၊ အီတလီအိုးပန်းနဲ့ အခု တယ်လ်အဗစ် အိုးပန်းတွေမှာ ချန်ပီယံဆုကို ရယူနိုင်ခဲ့ပါတယ်။

Source: BBC

CNI Sport News

၂၀၂၂ ခုနှစ်၊ အောက်တိုဘာ ၃

ယူနိုက်တက်နည်းပြ အဲရစ်တန်ဟတ်က မန်စီးတီးကို အရေးနိမ့်ခဲ့တဲ့ မန်ချက်စတာဒါဘီပွဲစဉ်မှာ ရော်နယ်ဒိုကို လူစားလဲ အသုံးမပြုတာက သူ့ရဲ့ ကစားသမားဘဝကို လေးစားလို့ပါလို့ ပြောပါတယ်။

အဲရစ်တန်ဟတ်က “ရော်နယ်ဒိုကို ကျနော် အသုံးမပြုတာက သူ့ရဲ့ ကြီးကျယ်ခမ်းနားတဲ့ ကစားသမားဘဝကို လေးစားလို့ပါ။ မာရှယ်ကို ထည့်သွင်းခဲ့တာက သူဟာ ကစားဖို့ မိနစ်တွေ လိုအပ်နေသလို သူဟာ အခြားအရာ တွေကိုလည်း ယူဆောင်လာနိုင်ပါတယ်။ ဒါပေမယ့် ဒီလိုမျိုး ကျနော် မညွှန်းဆိုချင်ပါဘူး”လို့ ရော်နယ်ဒိုကို အသုံး မပြုခဲ့တဲ့အပေါ် မေးမြန်းမှုကို ဖြေသွားခဲ့တာပါ။

ရော်နယ်ဒိုဟာ ဒီရာသီ ပရီးမီးယားလိဂ်ပြိုင်ပွဲမှာ ဘရန်ဖို့ဒ်အသင်းကို အရေးနိမ့်ခဲ့တဲ့ ပွဲစဉ်ကလွဲပြီး ကျန်တဲ့ပွဲတွေ မှာ လူစားဝင်အဖြစ်သာ ပါဝင်ခဲ့ရပြီး မန်ချက်စတာဒါဘီပွဲစဉ်မှာ ပါဝင်ခွင့်တောင် မရခဲ့တာ ဖြစ်ပါတယ်။

ယူနိုက်တက်အသင်းဟာ ဒီပွဲမှာ မန်စီးတီးအသင်းကို ၆ ဂိုး- ၃ ဂိုးနဲ့ အရေးနိမ့်ခဲ့တာ ဖြစ်ပြီး ဖိုဒန်နဲ့ ဟာလန်းက မန်စီးတီးအတွက် ဟတ်ထရစ် သွင်းယူခဲ့ကြတာ ဖြစ်ပါတယ်။ ယူနိုက်တက်အတွက် ဂိုးတွေကို လူစားဝင်လာတဲ့ မာရှယ်က ၂ ဂိုးနဲ့ အန်သိုနီက ၁ ဂိုး သွင်းယူခဲ့တာ ဖြစ်ပါတယ်။

ယူနိုက်တက် ကစားသမားဟောင်း ရွိုင်ကိန်း (Manchester Evening News)

ယူနိုက်တက်အသင်း ခေါင်းဆောင်ဟောင်း ရွိုင်ကိန်းကတော့ အသင်းဟာ ရော်နယ်ဒိုအပေါ်မှာ လေးစားမှု မရှိဘူး လို့ ပြောသွားခဲ့ပါတယ်။

“ယူနိုက်တက်အသင်းက ရော်နယ်ဒိုအပေါ်မှာ လေးစားမှုမရှိကြောင်း ပြသနေတယ်လို့ ကျနော်ထင်ပါတယ်။ ယူနိုက်တက် အနေနဲ့ အပြောင်းအရွှေ့ မပိတ်ခင်အချိန်မှာ သူ့ကို ထွက်ခွာခွင့် ပေးလိုက်သင့်ပါတယ်။ ရော်နယ်ဒို ဟာ အကြီးကျယ်ဆုံး ကစားသမားတွေထဲက တစ်ဦးပါ။ သူ့ကို ရက်သတ္တပတ်တိုင်း အရန်ခုံမှာ ထိုင်ခိုင်းနေတာက ရုပ်ဆိုးပါတယ်”လို့ Sky Sports ကို ပြောခဲ့ပါတယ်။

ရော်နယ်ဒိုဟာ ပြီးခဲ့တဲ့ အပြောင်းအရွှေ့မှာ ထွက်ခွာခွင့် တောင်းဆိုခဲ့ပေမယ့် ယူနိုက်တက်အသင်းက မရောင်းချခဲ့တာကြောင့် အသင်းမှာ ဆက်လက်ရှိနေခဲ့တာပါ။

ပေါ်တူဂီအသင်း ခေါင်းဆောင်ဟာ ဒီရာသီ ရှရစ်ဖ်နဲ့ ကစားခဲ့တဲ့ ယူရိုပါလိဂ်ပွဲစဉ်မှာသာ ယူနိုက်တက်အသင်း အတွက် ၁ ဂိုး သွင်းယူထားနိုင်တာ ဖြစ်ပါတယ်။ ယူနိုက်တက်အသင်းဟာ ကြားရက်မှာ ယူရိုပါလိဂ် ပွဲစဉ်အဖြစ် အိုမိုနီယာနဲ့ ယှဉ်ပြိုင်ရမှာဖြစ်ပြီး ရော်နယ်ဒို ပွဲထွက် ပါဝင်လာဖွယ် ရှိနေတာ ဖြစ်ပါတယ်။

Source: Goal/ Metro

CNI Sport News

၂၀၂၂ ခုနှစ်၊ အောက်တိုဘာ ၃

အင်ဒိုနီးရှားမှာ ကျင်းပခဲ့တဲ့ ဘောလုံးပွဲတစ်ပွဲအတွင်း အနည်းဆုံး လူပေါင်း ၁၂၅ ဦးသေဆုံးပြီးနောက် ဒါဟာ ဘောလုံးလောကအတွက် မှောင်မိုက်တဲ့နေ့လို့ ဖီဖာဥက္ကဋ္ဌ အင်ဖန်တီနိုက ပြောလိုက်ပါတယ်။

“အင်ဒိုနီးရှားမှာ ဖြစ်ပျက်ခဲ့တဲ့ ကြေကွဲဖွယ်ဖြစ်ရပ်တွေအပြီးမှာ ဘောလုံးလောကဟာ ထိတ်လန့်တုန်လှုပ်စရာ အခြေအနေတစ်ခုဖြစ်နေပါတယ်။ဒီနေ့ဟာ ဘောလုံးလောကနဲ့ ပတ်သက်သူအားလုံးအတွက် မှောင်မိုက်တဲ့ နေ့တစ်နေ့ပါပဲ။နားမလည်နိုင်တဲ့ ကြေကွဲဖွယ်ဖြစ်ရပ်ပါ” လို့ အင်ဖန်တီနိုက ပြောခဲ့တာပါ။

အရီမာအသင်းက ပါဆီဘာရာအသင်းကို အရေးနိမ့်ခဲ့တဲ့ အရှေ့ဂျာဗားဒါဘီပွဲစဉ်အပြီးမှာ ဒီလိုဖြစ်ရပ်ဆိုးကြီး ဖြစ်ခဲ့တာဖြစ်ပြီး လူပေါင်း ၁၈၀ ခန့် ထိခိုက်ဒဏ်ရာရရှိခဲ့တယ်လို့ သိရပါတယ်။ပရိသတ်တွေဟာ ပွဲအပြီးကွင်းထဲကို ဝင်ရောက်လာချိန်မှာ ရဲတွေက မျက်ရည်ယိုဗုံးအသုံးပြုပြီး လူစုခွဲကာ ထိန်းချုပ်ဖို့ ကြိုးစားခဲ့ကြတာပါ။ ပရိသတ် ထောင်ပေါင်းများစွာဟာ ကွင်းထွက်ပေါက်မှာ ပိတ်ဆို့မှုတွေဖြစ်ခဲ့သလို မျက်ရည်ယိုဗုံးကြောင့် အသက်ရှူကြပ်ပြီး ကွင်းထဲမှာ လဲကျမှုတွေလည်းဖြစ်ခဲ့တယ်လို့ သတင်းတွေအရ သိရတာပါ။

ဖီဖာကတော့ လုံခြုံရေး ဒါမှမဟုတ် ရဲတွေအနေနဲ့ ပွဲတွေမှာ လူစုလူဝေးကို ထိန်းချုပ်တဲ့ ဓါတ်ငွေ့ကို သယ်ဆောင် ခြင်း ဒါမှမဟုတ် အသုံးမပြုရဘူးလို့ ဖော်ပြထားပါတယ်။ အင်ဖန်တီနိုက “ ဒီကြေကွဲဖွယ်ဖြစ်ရပ်အပြီးမှာ အသက် ဆုံးရှုံးခဲ့ရတဲ့ မိသားစုတွေနဲ့ မိတ်ဆွေတွေကို ဝမ်းနည်းကြောင်း အလေးအနက်ထားပြောချင်ပါတယ်” လို့ ထပ်မံ ပြောခဲ့တာပါ။

အာရှဘောလုံးအဖွဲ့ချုပ်အကြီးအကဲ အယ်လ်ခါလီဖာက “ဘောလုံးကိုချစ်မြတ်နိုးတဲ့ အင်ဒိုနီးရှားနိုင်ငံကနေ ဒီလို ကြေကွဲဖွယ်သတင်းကို ကြားလိုက်ရလို့ အလွန်တုန်လှုပ်မိပြီး စိတ်မကောင်းဖြစ်မိတယ်” လို့ ရိုက်တာ သတင်းဌာန ကို သူ့ရဲ့ကြေညာချက်ထုတ်ပြန်ပေးခဲ့ပါတယ်။ လာလီဂါနဲ့ စပိန်ဘောလုံးအဖွဲ့ချုပ်တို့ဟာ ဒီ ဖြစ်ရပ်အတွက် လေးစားမှုပြသတဲ့အနေနဲ့ တနင်္ဂနွေနေ့မှာ ကစားတဲ့ ပွဲမစတင်ခင် ၁ မိနစ်ငြိမ်သက်မှုကို ပြုလုပ်ခဲ့ကြတယ်လို့ သိရပါတယ်။

တနင်္ဂနွေနေ့က ကစားခဲ့တဲ့ ပရီးမီးယားလိဂ်ပွဲစဉ် ၂ ပွဲမှာလည်း ကစားသမားတွေဟာ အနက်ရောင်လက်ပတ်ကို ဝတ်ဆင်ခဲ့ကြတာပါ။ဒါ့အပြင် ထိပ်တန်းကလပ်တွေနဲ့ နာမည်ကျော်ကစားသမားတွေကလည်း ဒီ ဖြစ်ရပ်အတွက် ဝမ်းနည်းကြောင်း သူတို့ရဲ့ ဆိုရှယ်မီဒီယာမှာ ရေးသားခဲ့ကြတယ်လို့ သတင်းမှာ ဖော်ပြထားပါတယ်။

Source:BBC