CNI Sport News

၂၀၂၂ ခုနှစ်၊ ဒီဇင်ဘာ ၂

သောမတ်စ်မူလာက ဂျာမနီအသင်း ကမ္ဘာ့ဖလားပြိုင်ပွဲကနေ ထွက်ခွာရပြီးနောက် လက်ရွေးစင်အသင်းကနေ အနားယူဖွယ်ရှိကြောင်း ပြောလိုက်ပါတယ်။

သောမတ်စ်မူလာက “ ဒါဟာ ဂျာမနီအတွက် နောက်ဆုံးပွဲ ဖြစ်ခဲ့တယ်ဆိုရင် ပရိသတ်တွေကို စကားအနည်းငယ် ပြောချင်ပါတယ်။ ကျနော်ဝမ်းသာ ပီတိ ဖြစ်ခဲ့ရပါတယ်။ ကျေးဇူးလည်း အများကြီး တင်ပါတယ်။ ကျနော်ဟာ ကွင်းထဲမှာ ကျနော့်နှလုံးသားကို အမြဲတမ်းပြသနိုင်ဖို့ ကြိုးစားခဲ့ပါတယ်။ တခါတလေ ဝမ်းသာလို့ ကျခဲ့တဲ့ မျက်ရည်တွေ ရှိသလို၊ တခါတရံလည်း နာကျင်ရပါတယ်။ ကျနော်ဒါတွေကို ချစ်မြတ်နိုးလို့ လုပ်ခဲ့တာပါ။ အခု တခြားအရာအားလုံးကို စဉ်းစားဖို့ လိုပါတယ်”လို့ သတင်းထောက်တွေကို ပြောခဲ့တာပါ။

ဂျာမနီအသင်းဟာ အုပ်စုနောက်ဆုံး ပွဲစဉ်မှာ ကော်စတာရီကာ အသင်းကို ၄ ဂိုး-၂ ဂိုးနဲ့ အနိုင်ရခဲ့ပေမယ့် ဒုတိယ နေရာက စပိန်အသင်းနဲ့ ဂိုးကွာခြားချက် ရှိခဲ့တာကြောင့် အုပ်စုကနေ လှည့်ပြန်ခဲ့ရတာ ဖြစ်ပါတယ်။

သောမတ်စ်မူလာကို ဂျာမနီအသင်းဖော်များနဲ့အတူ တွေ့ရစဉ် (Goal)

ဂျာမနီအသင်းဟာ ၂၀၁၄ ခုနှစ်က ကမ္ဘာ့ဖလားပြိုင်ပွဲမှာ ချန်ပီယံဖြစ်ခဲ့ပြီးနောက် ကစားခဲ့တဲ့ ကမ္ဘာ့ဖလားပြိုင်ပွဲ ၂ ကြိမ်ဆက်တိုက် အုပ်စုက ထွက်ခဲ့ရတာပါ။

သောမတ်စ်မူလာဟာ ဂျိုအာချင်လို လက်ထက် ၂၀၁၉ ကနေ ၂၀၂၁ အထိ ဂျာမနီလက်ရွေးစင် အသင်းမှာ ရွေးချယ် ခြင်း မခံခဲ့ရပေမယ့် ဟန်ဆီဖလစ်ခ် လက်ထက်မှာတော့ ပြန်လည် ရွေးချယ်ခြင်း ခံခဲ့ရတာ ဖြစ်ပါတယ်။

ဘိုင်ယန်မြူးနစ် ကစားသမားဟာ ဂျာမနီလက်ရွေးစင်အတွက် ၂၀၁၀ မှာ စတင်ရွေးချယ်ခံခဲ့ရပြီး ပွဲပေါင်း ၁၂၁ ပွဲ ပါဝင်ကစားခဲ့ကာ ၄၄ ဂိုး သွင်းယူနိုင်ခဲ့ပါတယ်။ သောမတ်စ်မူလာဟာ လက်ရွေးစင်အသင်းနဲ့ အောင်မြင်မှုအဖြစ် ၂၀၁၄ ကမ္ဘာ့ဖလားချန်ပီယံဆု ရယူနိုင်ခဲ့တာပါ။

အသက် ၃၃ နှစ်အရွယ်ရှိ သောမတ်စ်မူလာဟာ ဘိုင်ယန်မြူးနစ် အသင်းအတွက် ပွဲပေါင်း ၆၄၁ ပွဲ ပါဝင် ကစား ထားပြီး ၂၃၀ ဂိုး သွင်းယူကာ ဘွန်ဒစ်လီဂါဖလား ၁၁ ကြိမ်၊ ချန်ပီယံလိဂ်ဖလား နဲ့ ကလပ်ကမ္ဘာ့ဖလား ၂ ကြိမ် အပါအဝင် ဆုဖလားအောင်မြင်မှု အများအပြားကို ရယူထားနိုင်ခဲ့တာ ဖြစ်ပါတယ်။

Source: Goal

CNI Sport News

၂၀၂၂ ခုနှစ်၊ ဒီဇင်ဘာ ၂

ဂျပန်အသင်းနည်းပြ မိုရီယာဆုက စပိန်အသင်းကို ၂ ဂိုး- ၁ ဂိုးနဲ့ အနိုင်ရပြီး ၁၆ သင်းအဆင့် တက်ရောက် နိုင်ခဲ့ပြီးနောက် ကမ္ဘာ့ဖလားပြိုင်ပွဲမှာ စံချိန်သစ်တင်ချင်တယ်လို့ ပြောလိုက်ပါတယ်။

မိုရီယာဆုက “ကျနော်တို့ရဲ့ ရည်မှန်းချက်အသစ်ကတော့ နောက်ဆုံး ၈ သင်းထဲကို ရောက်ဖို့ပါ။ ကစားသမား တွေက ကျနော်တို့ဟာ ကမ္ဘာ့စင်မြင့်ပေါ်မှာ တိုက်ပွဲဝင်နိုင်တယ်ဆိုတာကို မတူညီတဲ့ အမြင်အသစ်တွေနဲ့ ပြသနေပါတယ်။နောက်ဆုံး ၈ သင်းရောက်ဖို့ ဒါမှမဟုတ် ဒီထက်ပိုမိုကောင်းမွန်တဲ့ နေရာအထိ သွားနိုင်ပြီး စံချိန်သစ်တင်ချင်ပါတယ်” လို့ ပြောခဲ့တာပါ။

ဂျပန်အသင်းဟာ စပိန်အသင်းကို အနိုင်ရခဲ့တာကြောင့် အုပ်စုပထမနဲ့ ၁၆ သင်းအဆင့်ကို တက်ရောက်နိုင်ခဲ့ တာဖြစ်ပါတယ်။ဂျပန်အသင်းဟာ ကမ္ဘာ့ဖလားပြိုင်ပွဲမှာ အမြင့်ဆုံးအောင်မြင်မှုအဖြစ် ၁၆ သင်းအဆင့်အထိသာ တက်လှမ်းနိုင်ခဲ့တာဖြစ်ပြီး အဲ့ဒီအဆင့်ကနေ ကျော်လွန်နိုင်ခဲ့ခြင်းမရှိပါဘူး။အဲဒါကြောင့် နည်းပြ မိုရီယာဆုက ဂျပန်အသင်း ဒီထက်ပိုမြင့်တဲ့အဆင့်ကို သွားနိုင်ဖို့ မျှော်လင့်နေတာဖြစ်ပါတယ်။

ဒီပွဲမှာ ဂျပန်အသင်းဘက်က သွင်းယူခဲ့တဲ့ အနိုင်ဂိုးမှာ ဘောလုံးဟာ ဂိုးစည်းကျော်သွားတယ်ဆိုပြီး အငြင်းပွားခဲ့ ကြတာကြောင့် ကွင်းလယ်ဒိုင်က VAR ကိုအသုံးပြုပြီး ဘောလုံးစည်းမကျော်ဘူးလို့ ဆုံးဖြတ်ခဲ့တာပါ။အဲဒါကြောင့် ဂျပန်အသင်း အနိုင်ဂိုး ရရှိခဲ့တာဖြစ်ပါတယ်။

မိုရီယာဆုက “ဂျပန်ကပြည်သူတွေ၊ ကျနော်တို့ကို အားပေးတဲ့သူတွေအားလုံးကို အလွန်ကျေးဇူးတင်ပါတယ်။ ဘာဖြစ်လို့လဲဆိုရင် သူတို့ရဲ့ ပံ့ပိုးပေးမှုတွေကြောင့်ပါ။သူတို့တွေကြောင့်ပဲ ဒီလိုခက်ခဲတဲ့ ပွဲကို ကျော်ဖြတ် နိုင်ခဲ့တာပါ။ဒီနိုင်ပွဲကို ဂျပန်ပြည်သူတွေထံ လက်ဆောင်ပေးချင်ပါတယ်။ကျနော်တို့ အလွန်ပျော်ရွှင်နေပါတယ်” လို့ ပြောခဲ့တာပါ။

ဂျပန်အသင်းဟာ ၁၆ သင်းအဆင့်မှာ ခရိုအေးရှားအသင်းနဲ့ ယှဉ်ပြိုင်ရမှာဖြစ်ပါတယ်။ဂျပန်ကို အရေးနိမ့်ခဲ့တဲ့ စပိန်အသင်းကတော့ အုပ်စုဒုတိယနဲ့ နောက်တဆင့်တက်ခဲ့ပြီး မော်ရိုကိုအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:The Score

CNI Sport News

၂၀၂၂ ခုနှစ်၊ ဒီဇင်ဘာ ၁

ရော်နယ်ဒိုဟာ တောင်ကိုရီးယားအသင်းနဲ့ ကစားရမယ့် အုပ်စုနောက်ဆုံးပွဲ မတိုင်ခင် ဗုဒ္ဓဟူးနေ့က ပြုလုပ်ခဲ့တဲ့ အသင်းရဲ့ လေ့ကျင့်ခန်း အစီအစဉ်မှာ မပါဝင်နိုင်ခဲ့ဘူးလို့ သိရပါတယ်။

ပေါ်တူဂီအသင်းဟာ ဥရုဂွေးအသင်းကို ၂ ဂိုး- ဂိုးမရှိနဲ့ အနိုင်ရခဲ့ပြီးနောက် ၁၆ သင်းအဆင့်ကို တက်ရောက် ထားပြီးသားပါ။ အဲ့ဒါကြောင့် နည်းပြ ဖာနန်ဒိုဆန်းတို့စ်ဟာ တောင်ကိုရီးယားနဲ့ ပွဲစဉ်မှာ အဓိကကစားသမား တချို့ကို အနားပေးသွားဖို့ ရှိနေတာ ဖြစ်ပါတယ်။

ပေါ်တူဂီသတင်းစာ Abola က ရော်နယ်ဒိုဟာ ရုပ်ပိုင်းဆိုင်ရာ ပြဿနာမရှိပဲ အားကစားရုံမှာ တစ်ဦးတည်း လေ့ကျင့်မှုတွေ ပြုလုပ်နေတာလို့ ဖော်ပြထားတာပါ။

ဒါကြောင့်လည်း ရော်နယ်ဒို လေ့ကျင့်ခန်း အစီအစဉ်မှာ မပါဝင်နိုင်ခဲ့တာဟာ ပေါ်တူဂီအတွက် စိုးရိမ်စရာ အခြေအနေ မဟုတ်ဘူးလို့ သိရပါတယ်။

ပေါ်တူဂီအသင်းရဲ့ လေ့ကျင့်ခန်း အစီအစဉ်မှာ မပါဝင်နိုင်ခဲ့တာဟာ ရော်နယ်ဒို တစ်ဦးတည်း မဟုတ်ဘူးလို့ ဒေးလီးမေးလ်က ဖော်ပြထားတာပါ။

 ပေါ်တူဂီအသင်းဖော်တွေ လေ့ကျင့်ခန်းလုပ်နေစဉ် 

ပေါ်တိုကွင်းလယ်လူ အိုတာဗီယို၊ ပီအက်စ်ဂျီ ကစားသမားတွေဖြစ်တဲ့ ဒါနီလိုပါရဲရားနဲ့ နူနိုမန်ဒတ်စ်တို့လည်း ဒဏ်ရာကနေ ပြန်လည်ကောင်းမွန်အောင် လုပ်ဆောင်နေတာကြောင့် မပါဝင်နိုင်ခဲ့ပါဘူး။

ရော်နယ်ဒိုဟာ ပြီးခဲ့တဲ့ ဂါနာနဲ့ ကမ္ဘာ့ဖလားအုပ်စု အဖွင့်ပွဲမှာ ပေါ်တူဂီအတွက် ဂိုးသွင်းယူပြီးနောက် ကမ္ဘာ့ဖလား ၅ ကြိမ်ဆက် ဂိုးသွင်းယူနိုင်တဲ့ ပထမဆုံး ကစားသမားအဖြစ် မှတ်တမ်းတင်ခဲ့ပါတယ်။

ရော်နယ်ဒို ဟာဆိုရင် ပြီးခဲ့တဲ့ ဥရုဂွေးနဲ့ပွဲမှာလည်း ဘရူနိုဖာနန်ဒက်စ် ဖြတ်တင်ပေးလိုက်တဲ့ ဘောလုံးကို ခေါင်းတိုက်ခဲ့ ပေမယ့် သူနဲ့မထိခဲ့ဘူးဆိုပြီး ဘရူနိုဖာနန်ဒက်စ်ရဲ့ ဂိုးအဖြစ် သတ်မှတ်ခြင်း ခံခဲ့ရတာ ဖြစ်ပါတယ်။

လက်ရှိအချိန်မှာ ရော်နယ်ဒိုဟာ ဆော်ဒီကလပ် အယ်လ်နာဆာအသင်းကို တစ်နှစ်လုပ်ခ ပေါင် ၁၇၃ သန်းနဲ့ ၂ နှစ်ခွဲ စာချုပ်ချုပ်ဆိုကာ ပြောင်းရွှေ့ဖို့ သဘောတူညီမှု ရခဲ့တယ်ဆိုပြီး စပိန်သတင်းစာ မာကာရဲ့ ဖော်ပြခြင်း ခံထားရတာပါ။

လက်ရှိမှာ ရော်နယ်ဒိုဟာ ကမ္ဘာ့ဖလားပြိုင်ပွဲကိုသာ အာရုံစိုက်နေတာဖြစ်ပြီး ဒီပြိုင်ပွဲပြီးမှသာ အနာဂတ်ကို ဆုံးဖြတ်သွားမှာ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ ဒီဇင်ဘာ ၁

ဆားဘီးယားကြယ်ပွင့် ဗလာဟိုဗစ်က အသင်းဖော်ရဲ့ ဇနီးသည်နဲ့ ဆက်ဆံမှုတွေကြောင့် အခုကမ္ဘာ့ဖလားပြိုင်ပွဲ မှာ ပွဲကစားခွင့် နည်းပါးနေတယ်ဆိုတဲ့ စွပ်စွဲမှုတွေဟာ အဓိပ္ပါယ်မရှိတဲ့ အရာတွေလို့ ပြောလိုက်ပါတယ်။

ဗလာဟိုဗစ်က “ အခု ကျနော့်ရဲ့ နာမည်က အလွဲသုံးစားလုပ်ခြင်း ခံနေရပါတယ်။ ဒါတွေက အားလုံးလည်း ဖတ် နေ၊ ကြားနေရတဲ့ အရာတွေပါ။ ဒီလို အဓိပ္ပါယ်မရှိတဲ့ အရာကို မှတ်ချက်ပေးဖို့တော့ မလိုအပ်ပါဘူး။ လုပ်ကြံနေတဲ့ ဇာတ်လမ်း အကြောင်းအရာတွေက တကယ်ကို ရယ်စရာကောင်းပါတယ်။ ကျနော်ကတော့ ကျနော့်ရဲ့ နာမည်နဲ့ ဂုဏ်သိက္ခာကို ကာကွယ်ဖို့အတွက် လိုအပ်မယ်ဆိုရင် တရားဥပဒေကပါ အရေးယူသွားမှာပါ။ ဒီလိုမျိုးဖြစ်တာ ပထမဆုံးအကြိမ်တော့ မဟုတ်ပါဘူး”လို့ သတင်းစာ ရှင်းလင်းပွဲမှာ ပြောခဲ့တာပါ။

ဂျူဗင်တပ်စ်အသင်းရဲ့ တိုက်စစ်မှူးဟာ ဆားဘီးယားအသင်းရဲ့ ကမ္ဘာ့ဖလားပွဲစဉ် ၂ ပွဲစလုံးမှာ အရန်ခုံမှာသာ ရှိခဲ့ တာဖြစ်ပြီး ကင်မရွန်းနဲ့ ၃ ဂိုးစီ သရေကျခဲ့တဲ့ ပွဲမှာဆိုရင် ပါဝင်ကစားရခြင်းတောင် မရှိပါဘူး။

အဲ့ဒါကြောင့် ဆားဘီးယား မီဒီယာတွေက ဗလာဟိုဗစ် ပွဲကစားခွင့်မရတဲ့ အကြောင်းအရင်းက အရန်ဂိုးသမား ရာဂျ့်ကိုဗစ်ရဲ့ ဇနီးသည်နဲ့ ဆက်ဆံတာမှာ မိသွားတာကြောင့်လို့ ဖော်ပြခဲ့ကြတာ ဖြစ်ပါတယ်။ ဒါကို ဗလာဟိုဗစ်က ငြင်းဆိုသွားခဲ့တာပါ။

ဗလာဟိုဗစ် သတင်းစာ ရှင်းလင်းပွဲ လုပ်နေစဉ် 

ရာ့ဂျ်ကိုဗစ်ရဲ့ ဇနီးသည် အန်နာကာကစ်ကလည်း ဒီသတင်းတွေကို ငြင်းဆန်ခဲ့တာ ဖြစ်ပါတယ်။ အန်နာကာကစ်နဲ့ ရာ့ဂျ်ကိုဗစ်တို့ဟာ လက်တွဲခဲ့တာ ကာလကြာရှည်ရှိပြီဖြစ်ပြီး ၂၀၁၈ ခုနှစ်၊ သြဂုတ်လမှာ လက်ထပ်ခဲ့ပါတယ်။ ဒီနောက်မှာတော့ ကလေး ၂ ဦး ရှိနေလာခဲ့ပါတယ်။

ဗလာဟိုဗစ်က သူဟာ အခုအချိန်မှာ အဆင်ပြေမှု မရှိသလို ခံစားနေရပေမယ့် အသင်းကို ကူညီနိုင်ဖို့ အပြည့်အဝ အာရုံစိုက်နေတယ်လို့ ပြောခဲ့တာပါ။

ဗလာဟိုဗစ်က “ ကျနော်အဆင်သင့် မဖြစ်သေးတာကြောင့် ပွဲမကစားသေးတာပါ။ အခုအချိန်မှာတော့ ပိုကောင်း သထက် ပိုကောင်းလာပြီး လာမယ့်ပွဲအတွက် လုံးဝကို အာရုံစိုက်နေပါတယ်”လို့ ပြောခဲ့တာ ဖြစ်ပါတယ်။

ဗလာဟိုဗစ်ဟာ ဆားဘီးယားအတွက် ၁၈ ပွဲ ပါဝင်ကစားထားပြီး ၉ ဂိုး သွင်းယူထားပါတယ်။

ဆားဘီးယားအသင်းဟာ အုပ်စုနောက်ဆုံး ပွဲစဉ်အဖြစ် ဆွစ်ဇာလန်အသင်းနဲ့ ယှဉ်ပြိုင်ရမှာဖြစ်ပြီး အနိုင်ရမှသာ နောက်တဆင့်ကို တက်ရောက်နိုင်မှာ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ ဒီဇင်ဘာ ၁

ဘရာဇီးလ်ဂန္တဝင် ကစားသမား ပီလီဟာ ဆေးရုံတင်ထားရပေမယ့် အရေးပေါ် အခြေအနေမဟုတ်ဘူးလို့ သမီးဖြစ်သူက အတည်ပြု ပြောကြားလိုက်ပါတယ်။

နာစီမန်တိုက “ အဖေ့ရဲ့ ကျန်းမာရေးနဲ့ ပတ်သက်ပြီး မီဒီယာမှာ အချက်ပေးသံတွေ အများကြီး ထွက်ပေါ်နေပါ တယ်။ သူ့ရဲ့ ဆေးဝါးကို ထိန်းညှိနိုင်ဖို့အတွက် ဆေးရုံတက်နေရပါတယ်။ အရေးပေါ် အခြေအနေ ဒါမှမဟုတ် ဆိုးရွားတဲ့ ခန့်မှန်းချက် အသစ်တွေတော့ မရှိပါဘူး။ နှစ်သစ်ကူးအတွက် ပုံတချို့ တင်မယ်ဆိုပြီး ကတိ ပေးထား ပါတယ်”လို့ အင်စတာဂရမ်မှာ ပို့စ်တင်ခဲ့တာပါ။

ဗုဒ္ဓဟူးနေ့ အစောပိုင်းမှာ ESPN Brazil က ပီလီကို အထွေထွေရောင်ရမ်းမှုနဲ့အတူ ဆော်ပေါ်လိုရှိ ဆေးရုံသို့ ခေါ်ဆောင်သွားခဲ့တယ်လို့ ဖော်ပြခဲ့တာ ဖြစ်ပါတယ်။

ပီလီဟာ အခုနောက်ပိုင်းနှစ်တွေမှာ ကျန်းမာရေး အခြေအနေ ဆိုးရွားနေပြီး ၂၀၂၁ ခုနှစ်၊ စက်တင်ဘာလတုန်းက သူ့ရဲ့ အူမကြီးမှာရှိတဲ့ အကျိတ်တခုကို ဖယ်ရှားခဲ့တာပါ။ အဲ့ဒီကတည်းက ပီလီဟာ ဆေးရုံမှာ ပုံမှန် ဆေးကုသမှု ခံယူခဲ့ရတာ ဖြစ်ပါတယ်။

ဘရာဇီးလ်အသင်း ကမ္ဘာ့ဖလား ရစဉ်က ပီလီကိုတွေ့ရစဉ်(talkSPORT)

အသက် ၈၂ နှစ် အရွယ်ရှိပြီဖြစ်တဲ့ ပီလီဟာ နှလုံးနဲ့ဆိုင်တဲ့ ပြဿနာတွေရှိနေပြီး သူ့ရဲ့ ဓာတုကုထုံး ကုသမှုဟာ မျှော်လင့်ထားတဲ့ အာနိသင် မရှိတာကြောင့် စိုးရိမ်မှုတွေ ရှိနေတယ်လို့ ESPN Brazil က ဖော်ပြခဲ့တာပါ။

ပီလီဟာ ဘရာဇီးလ်လက်ရွေးစင်အတွက် ၁၉၅၇ ကနေ ၁၉၇၁ အထိ ၉၂ ပွဲ ပါဝင်ကစားခဲ့ပြီး ၇၇ ဂိုး သွင်းယူကာ ဂိုးအများဆုံး သွင်းယူထားတဲ့ ကစားသမားအဖြစ် ရပ်တည်နေတာ ဖြစ်ပါတယ်။

ပီလီဟာ ဘရာဇီးလ် လက်ရွေးစင်အသင်းနဲ့ ကမ္ဘာ့ဖလား ချန်ပီယံဆုကို ၃ ကြိမ် ရယူထားနိုင်ခဲ့ပြီး ကမ္ဘာ့အကောင်း ဆုံး ကစားသမားတွေထဲက တဦးအဖြစ် အားလုံးရဲ့ အသိအမှတ်ပြုခြင်းကို ခံခဲ့ရတာပါ။

လက်ရှိ ကျင်းပနေတဲ့ ကာတာ ကမ္ဘာ့ဖလားပြိုင်ပွဲမှာ ဘရာဇီးလ်အသင်း နောက်ထပ် ကမ္ဘာ့ဖလားချန်ပီယံဆုကို ထပ်မံရယူဖို့ ပီလီက မျှော်လင့်ထားကြောင်း မကြားသေးခင်ကမှ ပြောထားပါတယ်။

ကမ္ဘာ့ဖလား ချန်ပီယံဆုကို ၅ ကြိမ် ရရှိထားတဲ့ ဘရာဇီးလ်အသင်းဟာ ဆုဖလားကို ၂၀၀၂ က နောက်ဆုံး ရယူနိုင်ခဲ့ တာဖြစ်ပြီး လက်ရှိ ကမ္ဘာ့ဖလားပြိုင်ပွဲမှာ ဆုဖလားရယူဖို့ ပစ်မှတ်ထားနေပါတယ်။

အခုအချိန်မှာတော့ ဘရာဇီးလ်အသင်းဟာ ၁၆ သင်း အဆင့်ကို တက်ရောက်နိုင်ခဲ့ပြီ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ ဒီဇင်ဘာ ၁

အာဂျင်တီးနားအသင်းခေါင်းဆောင် မက်ဆီက ပိုလန်အသင်းကို ၂ ဂိုး- ဂိုးမရှိနဲ့ အနိုင်ရတဲ့ပွဲမှာ ပင်နယ်တီ မဝင်ခဲ့တာကြောင့် ဒေါသထွက်မိခဲ့တယ်လို့ ပြောလိုက်ပါတယ်။

မက်ဆီက “ပင်နယ်တီမဝင်ခဲ့တဲ့အတွက် ကျနော်ဒေါသထွက်မိပါတယ်။ဒါပေမယ့် ကျနော့်ရဲ့ အမှားကြောင့် အသင်းက ပိုပြီးအားကောင်းလာခဲ့ပါတယ်။ပထမဂိုးရပြီဆိုတာနဲ့ ပွဲကပြောင်းလဲသွားမှာဖြစ်ပြီး သူတို့ဘက်က ဖွင့်ကစားလာမယ်ဆိုတာ ကျနော်တို့ သိပါတယ်။အရင်ပွဲတွေက ကျနော်တို့ကို စိတ်ငြိမ်သက်မှုအများကြီးပေးခဲ့ ပါတယ်။ကျနော်တို့ အနိုင်ရမယ်လို့ပဲတွေးပြီး ကွင်းထဲက ထွက်လာခဲ့တယ်” လို့ ပြောခဲ့တာပါ။

ဒီပွဲမှာ မက်ဆီ ပင်နယ်တီမဝင်ခဲ့ပေမယ့် အယ်လစ်စတာနဲ့ အယ်လ်ဗားရတ်စ်တို့က အာဂျင်တီးနားအတွက် အဖိုးတန်အနိုင်ဂိုးတွေသွင်းယူပေးခဲ့တာဖြစ်ပါတယ်။အာဂျင်တီးနားအသင်းဟာ ဒီနိုင်ပွဲကြောင့် အုပ်စုတွင်း ၃ ပွဲ ကစားအပြီးမှာ ၂ ပွဲနိုင် ၁ ပွဲရှုံး ရမှတ် ၆ မှတ်နဲ့ အုပ်စုပထမနေရာရရှိကာ ၁၆ သင်းအဆင့် တက်နိုင်ခဲ့တာပါ။ အာဂျင်တီးနားအသင်းဟာ ၁၆ သင်းအဆင့်မှာ သြစတြေးလျအသင်းနဲ့ ယှဉ်ပြိုင်ရမှာ ဖြစ်ပါတယ်။

မက်ဆီက “သြစတြေးလျနဲ့ ပွဲက အလွန်ခက်ခဲမှာပါ။ဘယ်သူမဆိုအနိုင်ရနိုင်ပါတယ်။ကျနော်တို့ အမြဲတမ်း လုပ်ဆောင်နေတဲ့အတိုင်းပဲ ပွဲကိုပြင်ဆင်သွားမှာဖြစ်ပါတယ်။အေးဆေးတည်ငြိမ်စွာနဲ့ပဲ ပွဲကို ကစားသွားမှာပါ။ အခုနောက်ထပ်ကမ္ဘာ့ဖလားစတင်နေပြီဖြစ်ပြီး ဒီနေ့ ကျနော်တို့ လုပ်ခဲ့တဲ့အရာကိုပဲ ဆက်ထိန်းနိုင်ဖို့ မျှော်လင့် ပါတယ်” လို့ ပြောခဲ့ပါတယ်။

အာဂျင်တီးနားကို အရေးနိမ့်ခဲ့တဲ့ ပိုလန်အသင်းကလည်း အုပ်စုတွင်း ဒုတိယနဲ့ ၁၆ သင်းအဆင့်ကို တက်နိုင်ခဲ့တာ ဖြစ်ပါတယ်။အုပ်စုတွင်း နောက်ထပ်ပွဲစဉ်မှာ မက္ကဆီကိုအသင်းက ဆော်ဒီအသင်းကို ၂ ဂိုး- ၁ ဂိုးနဲ့ အနိုင်ရခဲ့ပေမယ့် ပိုလန်အသင်းက ဂိုးကွာခြားချက်မှာ အသာရခဲ့တာကြောင့် နောက်တဆင့်တက်နိုင်ခဲ့တာပါ။

ပိုလန်အသင်းကတော့ ၁၆ သင်းအဆင့်မှာ လက်ရှိချန်ပီယံ ပြင်သစ်အသင်းနဲ့ ယှဉ်ပြိုင်ရမှာဖြစ်ပါတယ်။ဒီပွဲတွေကို ဒီဇင်ဘာလ ၃ ရက်နဲ့ ၄ ရက်နေ့တွေမှာ ကျင်းပသွားမှာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ နိုဝင်ဘာ ၃၀

ကမ္ဘာ့ဖလားပြိုင်ပွဲအတွက် အားကစားကွင်းတွေနဲ့ အခြေခံ အဆောက်အဦတွေ တည်ဆောက်တာမှာ ရွှေ့ပြောင်း နေထိုင်သူ ၅၀၀ သေဆုံးခဲ့တယ်လို့ ကာတာကမ္ဘာ့ဖလား အကြီးအကဲက ပြောလိုက်ပါတယ်။

ဟာဆန်အယ်လ်သဝါဒီက “ ခန့်မှန်းခြေအားဖြင့် ပြောရရင် ၄၀၀ ဝန်းကျင်၊ ၄၀၀ နဲ့ ၅၀၀ ကြားပေါ့၊ အရေအတွက် အတိအကျတော့ ကျနော်မသိပါဘူး။ သေခြင်းတရားနဲ့ ပတ်သက်ပြီး များပြားလွန်းပါတယ်။ အနည်းဆုံး ကမ္ဘာ့ ဖလား အလုပ်တည်နေရာတွေမှာ ကျန်းမာရေးနဲ့ ဘေးအန္တရာယ်ကင်းရေး စံနှုန်းတွေဟာ နှစ်စဉ်နှစ်တိုင်း တိုးတက် နေတယ်လို့ ထင်ပါတယ်။ ဒါက ကျနော်တို့မှာ တာဝန်ရှိပါတယ်။ ဂျာမန် အလုပ်သမားသမဂ္ဂ ကိုယ်စားလှယ်တွေ၊ ဆွစ်ဇာလန် အလုပ်သမားသမဂ္ဂ ကိုယ်စားလှယ်တွေက ကမ္ဘာ့ဖလားပြိုင်ပွဲအတွက် လုပ်ခဲ့တဲ့အလုပ်နဲ့ တိုးတက်မှု ကို ချီးကျူးခဲ့ကြပါတယ်”လို့ ပြောခဲ့တာပါ။

ကာတာကမ္ဘာ့ဖလား အကြီးအကဲဟာ ပီယာစ်မော်ဂန်နဲ့ ပြုလုပ်ခဲ့တဲ့ အင်တာဗျူးမှာ အခုလို ပြောခဲ့တာ ဖြစ်ပါ တယ်။ ဒါပေမယ့် ကမ္ဘာ့ဖလားပြိုင်ပွဲအတွက် ရွှေ့ပြောင်းနေထိုင်သူ သေဆုံးသူဦးရေဟာ ၁၅,၀၀၀ ကျော်အထိ ရှိတယ်လို့ နိုင်ငံတကာသတင်းတွေမှာ ဖော်ပြထားပါတယ်။

ကာတာ ကမ္ဘာ့ဖလား ဆောက်လုပ်ရေး လုပ်သားများကိုတွေ့ရစဉ် (The Times)

ပြိုင်ပွဲကျင်းပနိုင်ဖို့ အားကစားကွင်းတွေ တည်ဆောက်တာမှာ ရွှေ့ပြောင်းနေထိုင်သူတွေ အများအပြား သေဆုံး ခဲ့တာကြောင့် ကာတာမှာ ကျင်းပနေတဲ့ ကမ္ဘာ့ဖလားပြိုင်ပွဲဟာ ဝေဖန်မှုတွေ ခံနေရတာ ဖြစ်ပါတယ်။

Amnesty International အဖွဲ့ဝင် စတိဗ်ကော့ဘ်ဘန်းက “ ရွှေ့ပြောင်း အလုပ်သမားတွေ ခံစားခဲ့ရတဲ့ အရာတွေ ကို ကုစား မပေးနိုင်သေးခင်အထိတော့ ဒီကမ္ဘာ့ဖလားပြိုင်ပွဲဟာ ဆိုးဆိုးရွားရွားနဲ့ မှေးမှိန်သွားပါလိမ့်မယ်”လို့ ပြောခဲ့တာပါ။

ဝေဖန်မှုတွေ ခံနေရပေမယ့် ကမ္ဘာ့ဖလားပြိုင်ပွဲကို ကျင်းပနေတာ အုပ်စုပွဲစဉ် နောက်ဆုံး ပွဲစဉ်အထိ ရောက်ရှိ နေပြီဖြစ်ပြီး အိမ်ရှင် ကာတာအသင်း ကတော့ ၃ ပွဲကစား ၃ ပွဲစလုံး ရှုံးနိမ့်ခဲ့လို့ အုပ်စုကနေ ထွက်ခွာခဲ့ရပြီ ဖြစ်ပါတယ်။

Source: The Sun

CNI Sport News

၂၀၂၂ ခုနှစ်၊ နိုဝင်ဘာ ၃၀

အမျိုးသမီးဒိုင်လူကြီးအဖွဲ့ဟာ ကော်စတာရီကာနဲ့ ဂျာမနီအသင်းတို့ ကစားမယ့် အမျိုးသားကမ္ဘာ့ဖလားပြိုင်ပွဲကို ပထမဆုံးအကြိမ်အဖြစ် တာဝန်ယူ ဆောင်ရွက်သွားမှာ ဖြစ်ပါတယ်။

ဖရက်ပါ့ဒ်ဟာ အမျိုးသားကမ္ဘာ့ဖလားပြိုင်ပွဲကို ပထမဆုံးအကြိမ် ကိုင်တွယ်မယ့် အမျိုးသမီး ကွင်းလယ်ဒိုင်လူကြီး ဖြစ်လာခဲ့တာပါ။ သူမဟာ ပြီးခဲ့တဲ့ မက္ကဆီကိုနဲ့ ပိုလန်တို့ပွဲစဉ်မှာ စတုတ္တဒိုင်လူကြီးအဖြစ် ဆောင်ရွက်ခဲ့ရပြီး ကမ္ဘာ့ဖလားပြိုင်ပွဲရဲ့ ပထမဆုံး အမျိုးသမီး တာဝန်ရှိသူ ဖြစ်ခဲ့ပါတယ်။

ဖရက်ပါ့ဒ်က “ ကျမတို့ ဖိအားတွေကို သိပါတယ်။ ဒါပေမယ့် ကျမကတော့ ကိုယ့်ကိုယ်ကို ပြောင်းလဲသွားမှာ မဟုတ်ဘူးလို့ ထင်ပါတယ်။ စိတ်အေးအေးထားမယ်၊ အာရုံစိုက်မယ်၊ အာရုံစူးစိုက်သွားမှာပါ။ မီဒီယာနဲ့ အရာ အားလုံးကို အများကြီး စဉ်းစားသွားမှာ မဟုတ်ပါဘူး။ ကွင်းထဲက အရာတွေကိုပဲ အာရုံစိုက်သွားမှာပါ။ ကျမ ဒါကို စလုပ်ကတည်းက အသင်းတွေ၊ ကစားသမားတွေရဲ့ အားပေးမှုတွေကို အမြဲတမ်း ရရှိခဲ့ပါတယ်။ အခုလည်း အရင် ကလိုပဲ ကြိုဆိုဖို့ မျှော်လင့်ပါတယ်”လို့ ပြိုင်ပွဲမတိုင်ခင် BBC Sport ကို ပြောခဲ့တာပါ။

ကမ္ဘာ့ဖလားပြိုင်ပွဲမှာ ဒိုင်လူကြီးလုပ်မယ့် အမျိုးသမီးဒိုင်သုံးဦးကိုတွေ့ရစဉ်

ကြာသပတေးနေ့မှာ ကစားမယ့် ကော်စတာရီကာနဲ့ ဂျာမနီပွဲစဉ်ကို ပြင်သစ်လူမျိုး ဖရက်ပါ့ဒ်နဲ့အတူ ဘရာဇီးလ်က နူဇာဘက်၊ မက္ကဆီကိုက ဒီယတ်ဇ်တို့က စည်းကြပ်ဒိုင်တွေအဖြစ် ဆောင်ရွက်သွားမှာ ဖြစ်ပါတယ်။

ဖရက်ပါ့ဒ်ဟာ ၂၀၂၀ က အမျိုးသား ချန်ပီယံလိဂ်ပြိုင်ပွဲကို ပထမဆုံး ကိုင်တွယ်ခဲ့တဲ့ အမျိုးသမီးဒိုင်လူကြီး ဖြစ်ခဲ့ သလို၊ ၂၀၁၉ က လီဗာပူးလ်နဲ့ ချယ်လ်ဆီးတို့ ကစားခဲ့တဲ့ ဥရောပစူပါဖလား ပွဲစဉ်ကိုလည်း တာဝန်ယူခဲ့တာပါ။

မူကန်ဆန်ဂါနဲ့ ယိုရှီမီတို့ကလည်း ၂၀၂၂ ကမ္ဘာ့ဖလားပြိုင်ပွဲမှာ တာဝန်ယူဖို့ ရွေးချယ်ခံထားရတဲ့ ဒိုင်လူကြီး ၃၆ ဦး စာရင်းမှာ ပါဝင်နေတဲ့ အမျိုးသမီးဒိုင်လူကြီးတွေ ဖြစ်ပါတယ်။ အခု ကမ္ဘာ့ဖလားပြိုင်ပွဲဟာ အမျိုးသမီး ဒိုင်လူကြီး တွေကို တာဝန်ယူဖို့ ရွေးချယ်ထားတဲ့ ပထမဆုံး အမျိုးသားကမ္ဘာ့ဖလား ပြိုင်ပွဲဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ နိုဝင်ဘာ ၃၀

ရက်ရှ်ဖို့ဒ်က ဝေးလ်စ်အသင်းကို ၃ ဂိုး- ဂိုးမရှိနဲ့ အနိုင်ရပြီး ၁၆ သင်းအဆင့် တက်နိုင်ခဲ့ပြီးနောက် အင်္ဂလန်အသင်း နောက်ထပ်လာဖို့တွေ ရှိသေးတယ်လို့ ပြိုင်ဘက်တွေကို သတိပေးလိုက်ပါတယ်။

ရက်ရှ်ဖို့ဒ်က “ ဒီလို အခိုက်အတန့်တွေကို ကျနော်သဘောကျပါတယ်၊ ဒါကြောင့်လည်း ဘောလုံးကစားနေတာပါ။ အသင်း နောက်တဆင့် တက်နိုင်ခဲ့လို့ ကျနော် အလွန်ပျော်ရွှင်ပါတယ်။ ကျနော်တို့ဟာ ဒီစွမ်းဆောင်ရည်ကို ဆက်ပြီး တည်ဆောက်နိုင်ဖို့ မျှော်လင့်ပါတယ်။ ဒီအသင်းအတွက် ကျနော့်ရဲ့ ရည်မှန်းချက်တွေက ကြီးကြီးမားမား ရှိနေဆဲပါ။ ကျနော်တို့ ဒီပွဲမှာ လုပ်ပြခဲ့တာထက်တောင် ပိုပြီးကောင်းမွန်အောင် ကစားနိုင်မယ်လို့ ထင်ပါတယ်။ လာမယ့် ပွဲတွေမှာ စွမ်းဆောင်ရည်ကောင်းရှိဖို့ အရေးကြီးတယ်”လို့ ပြောပါတယ်။

ရက်ရှ်ဖို့ဒ်ဟာ ဝေးလ်စ်နဲ့ ပွဲစဉ်မှာ ပွဲစကတည်းက ပါဝင်ခွင့်ရခဲ့ပြီး အင်္ဂလန်အတွက် ၂ ဂိုး သွင်းယူကာ ခြေစွမ်းပြသ နိုင်ခဲ့တာ ဖြစ်ပါတယ်။

အဲ့ဒါကြောင့် ဒီပွဲရဲ့ အကောင်းဆုံး ကစားသမားဆုကို ရရှိသွားခဲ့တာပါ။ ရက်ရှ်ဖို့ဒ်ဟာ ၂၀၂၂ ကမ္ဘာ့ဖလားပြိုင်ပွဲမှာ ၃ ဂိုး သွင်းယူထားပြီး ဘတ်ပီ၊ ဂတ်ပို၊ အန်နာဗလင်စီယာတို့နဲ့အတူ ဂိုးသွင်း ရွှေဖိနပ်ဆု ရယူဖို့ ဦးဆောင်နေတာ ဖြစ် ပါတယ်။

ဝေးလ်စ်အသင်းဘက်ကို ရက်ရှ်ဖို့ဒ် ဖရီးကစ်ကနေ ဂိုးသွင်းနေစဉ်

ဒါ့အပြင် ရက်ရှ်ဖို့ဒ်ဟာ ၁၉၆၆ က ဘော်ဘီချာလ်တန် နောက်ပိုင်း ကမ္ဘာ့ဖလားပြိုင်ပွဲမှာ ၃ ဂိုး သွင်းယူနိုင်တဲ့ ပထမ ဆုံး ယူနိုက်တက် ကစားသမားအဖြစ်လည်း မှတ်တမ်း တင်နိုင်ခဲ့တာပါ။

ရက်ရှ်ဖို့ဒ်ဟာဆိုရင် ပြီးခဲ့တဲ့ အီရန်နဲ့ အမေရိကန်တို့ ပွဲစဉ်မှာ လူစားဝင် ကစားသမားအဖြစ်သာ ပါဝင်ခဲ့ရပေမယ့် ဝေးလ်စ်နဲ့ပွဲမှာ ပွဲထွက်ခွင့်ရခဲ့ပြီး ခြေစွမ်းပြသ နိုင်ခဲ့တာကြောင့် ၁၆ သင်းအဆင့် ပွဲမှာလည်း ပွဲထွက်ခွင့်ရဖို့ မျှော်လင့်နေတာ ဖြစ်ပါတယ်။

အင်္ဂလန်အသင်းဟာ ဝေးလ်စ်အသင်းကို အနိုင်ရခဲ့တာကြောင့် အုပ်စုတွင်း ၃ ပွဲကစားပြီး ၂ ပွဲနိုင် ၁ ပွဲသရေ ရမှတ် ၇ မှတ်ရရှိကာ ပထမနဲ့ ၁၆ သင်းအဆင့် တက်နိုင်ခဲ့တာပါ။

အခုဆိုရင် အင်္ဂလန်အသင်းဟာ ၁၆ သင်းအဆင့်မှာတော့ ဆီနီဂေါအသင်းနဲ့ ယှဉ်ပြိုင်ရမှာဖြစ်ပြီး ဒီပွဲကို ဒီဇင်ဘာ ၄ ရက်နေ့မှာ ကျင်းပသွားမှာ ဖြစ်ပါတယ်။

Source: Metro