CNI Sport News

၂၀၂၂ ခုနှစ်၊ နိုဝင်ဘာ ၂၉

တိုက်ဂါးဝုဒ်ဟာ သူ့ရဲ့ ညာဘက်ခြေထောက် ပြဿနာကြောင့် လာမယ့်လ ဘဟားမားစ်မှာ ကျင်းပမယ့် Hero World Challenge ပြိုင်ပွဲကို ပါဝင်ကစားနိုင်မှာ မဟုတ်ဘူးလို့ ကြေညာလိုက်ပါတယ်။

တိုက်ဂါးဝုဒ်က “ ညာဘက်ခြေထောက် နာကျင်ကိုက်ခဲနေရတဲ့ အခြေအနေကြောင့် လမ်းလျှောက်ရ ခက်နေ ပါတယ်။ ဆရာဝန်တွေနဲ့ တိုင်ပင်အပြီးမှာ ဒီပြိုင်ပွဲကနေ နှုတ်ထွက်ဖို့ ဆုံးဖြတ်လိုက်ပါတယ်။ ကျနော့်ရဲ့ တာဝန် တွေကို ဆက်ပြီး အာရုံစိုက်ဖို့ ဆုံးဖြတ်ခဲ့ပါတယ်။ ကျနော့်ရဲ့ အစီအစဉ်ကတော့ The Match နဲ့ PNC ချန်ပီယံ ရှစ်ပြိုင်ပွဲမှာ ပါဝင်ယှဉ်ပြိုင်ဖို့ ရှိပါတယ်”လို့ ပြောခဲ့တာပါ။

အသက် ၄၆ နှစ်အရွယ်ရှိ တိုက်ဂါးဝုဒ်ဟာ ဇူလိုင်လက ကျင်းပခဲ့တဲ့ The Open Championship ပြိုင်ပွဲ ပြီးကတည်းက ဂေါ့ဖ်ပြိုင်ပွဲတွေမှာ ပါဝင်ယှဉ်ပြိုင်ခြင်း မရှိတော့ပါဘူး။

Hero World Challenge ပြိုင်ပွဲမှာ တိုက်ဂါးဝုဒ်ဟာ ၂၀၀၁၊ ၂၀၀၄၊ ၂၀၀၆၊ ၂၀၀၇ နဲ့ ၂၀၁၁ ပြိုင်ပွဲတွေမှာ ဗိုလ်စွဲခဲ့ပြီး ချန်ပီယံဆု ၅ ကြိမ် ရရှိထားတာ ဖြစ်ပါတယ်။ အခုနှစ် ပြိုင်ပွဲကို နိုဝင်ဘာလ ၂၈ ရက်ကနေ ဒီဇင်ဘာလ ၄ ရက် အထိ ကျင်းပသွားမှာပါ။

တိုက်ဂါးဝုဒ်ကို တွေ့ရစဉ် (TSN)

တိုက်ဂါးဝုဒ်ဟာ ဒီဇင်ဘာလ ၁၀ ရက် ဖလော်ရီဒါမှာ ကျင်းပမယ့် The Match ပြိုင်ပွဲမှာတော့ မက်အီရွိုင်းနဲ့ တွဲဖက်ပြီး ဂျော်ဒန်စပိဒ်၊ ဂျက်စတင် သောမတ်စ်တို့နဲ့ ယှဉ်ပြိုင်မှာ ဖြစ်ပါတယ်။

တိုက်ဂါးဝုဒ်ဟာဆိုရင် အခုနှစ် မာစတာပြိုင်ပွဲမှာ အဆင့် ၄၇ နေရာနဲ့ အဆုံးသတ်ခဲ့ရပြီး တတိယအဆင့် ပြိုင်ပွဲ အပြီးမှာ အမေရိကန် ပီဂျီအေ ပြိုင်ပွဲကနေ နှုတ်ထွက်ခဲ့ရတာ ဖြစ်ပါတယ်။

ကမ္ဘာ့နံပါတ်(၁) ဂေါ့ဖ်ကစားသမားဟောင်း တိုက်ဂါးဝုဒ်ဟာ ကစားသမားဘဝမှာ အဓိကချန်ပီယံဆု ၁၅ ကြိမ် ရရှိခဲ့တာ အပါအဝင် ဆုဖလား အောင်မြင်မှု အများအပြား ရရှိခဲ့တာပါ။

တိုက်ဂါးဝုဒ်ဟာ ပြင်းထန်တဲ့ ကားတိုက်မှု ဖြစ်ပွားပြီးနောက်ပိုင်း ဂေါ့ဖ်ပြိုင်ပွဲမှာ ကြံ့ခိုင်မှုအပြည့်နဲ့ ပါဝင် ယှဉ်ပြိုင် နိုင်ဖို့ ရုန်းကန်နေရပြီး အောင်မြင်မှုတွေနဲ့ ဝေးကွာနေတာ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ နိုဝင်ဘာ ၂၉

ဘန်ဇီမာဟာ ဒဏ်ရာကြောင့် ကမ္ဘာ့ဖလားပြိုင်ပွဲဝင်မယ့် ပြင်သစ်လူစာရင်းကနေ ထွက်ခွာခဲ့ပေမယ့် ပြန်လည် ပါဝင်လာနိုင်ဖွယ် ရှိတယ်လို့ RMC Sport က ဖော်ပြထားပါတယ်။

ဘန်ဇီမာဟာ ကမ္ဘာ့ဖလားပြိုင်ပွဲအတွက် ပြင်သစ်လက်ရွေးစင်အသင်းနဲ့ လေ့ကျင့်မှု ပြုလုပ်ရင်း ဒဏ်ရာ ရရှိသွားခဲ့ တာပါ။

အဲ့ဒါကြောင့် ရီးရယ်လ်အသင်း ခေါင်းဆောင်ဟာ ကမ္ဘာ့ဖလားပြိုင်ပွဲဝင်မယ့် ပြင်သစ်လူစာရင်းကနေ ထွက်ခွာ ခဲ့ရတာ ဖြစ်ပါတယ်။ ဘန်ဇီမာဟာ ဒဏ်ရာကနေ ပြန်လည် ကောင်းမွန်လာတာကြောင့် RMC Sport က ကစားသမား ပြန်လာနိုင်မယ့် ဖြစ်နိုင်ချေကို ထုတ်ဖော်ပြသခဲ့တာပါ။

ဘန်ဇီမာဟာ ဒီဇင်ဘာ ၁ ရက်မှာ ရီးရယ်လ်အသင်းနဲ့ လေ့ကျင့်ခန်း ပြန်ဆင်းမှာကို စပိန်ကလပ်က ငြင်းဆန် ထားခြင်း မရှိလို့ ရီးရယ်လ်အသင်းအတွက် ကစားနိုင်ရင် ပြင်သစ်အတွက်လည်း ကစားနိုင်မှာ ဖြစ်ပါတယ်။

လေ့ကျင့်ခန်းလုပ်နေတဲ့ ဘန်ဇီမာ (Reuters)

ဘန်ဇီမာဟာ လက်ရွေးစင်အသင်းကနေ ထွက်ခွာခဲ့ပေမယ့် ပြင်သစ်အသင်းရဲ့ ကမ္ဘာ့ဖလားပြိုင်ပွဲဝင်မယ့် ကစားသမား ၂၆ ဦး စာရင်းမှာ ပါဝင်နေဆဲ ဖြစ်ပါတယ်။

ပြင်သစ်နည်းပြ ဒက်ချမ့်ပ်စ်ကလည်း ဘန်ဇီမာနေရာ အစားထိုးဖို့ ခေါ်ယူထားခြင်းမရှိလို့ လာမယ့် ပွဲတွေအတွက် ဝါရင့်တိုက်စစ်မှူးကို ပြန်လည်ခေါ်ယူသွားဖို့ ရှိနေတာပါ။

ဘန်ဇီမာဟာ လက်ရွေးစင်အတွက် ပြန်လည် ခေါ်ယူ မခံရဘူး ဆိုရင်တောင် လက်ရွေးစင်အသင်း လူစာရင်းမှာ ဆက်လက် ရှိနေမှာဖြစ်ပြီး ပြင်သစ်အသင်း ကမ္ဘာ့ဖလားရခဲ့ရင် ဆုတံဆိပ်ကို ရရှိမှာဖြစ်တယ်လို့ သိရပါတယ်။

ပြင်သစ်အသင်းဟာ လက်ရှိအချိန်မှာ ကမ္ဘာ့ဖလား အုပ်စုပွဲစဉ် ၂ ပွဲ ကစားအပြီးမှာ ရမှတ် ၆ မှတ်နဲ့ ၁၆ သင်း အဆင့်ကို တက်ရောက်သွားပြီ ဖြစ်ပါတယ်။

လက်ရှိချန်ပီယံ ပြင်သစ်အသင်းဟာ အုပ်စုနောက်ဆုံး ပွဲစဉ်အဖြစ် နိုဝင်ဘာ ၃၀ ရက်မှာ တူနီးရှားအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Besoccer

CNI Sport News

၂၀၂၂ ခုနှစ်၊ နိုဝင်ဘာ ၂၉

ဂျူဗင်တပ်စ်အသင်းရဲ့ဥက္ကဋ္ဌ အက်ဂ်နယ်လီ အပါအဝင် ဂျူဗင်တပ်စ် ဘုတ်အဖွဲ့ဝင်အားလုံးဟာ ရာထူးကနေ နှုတ်ထွက်တယ်လို့ ကြေညာခဲ့ပါတယ်။

ပြီးခဲ့တဲ့ရာသီ စီးရီးအေပြိုင်ပွဲမှာ အဆင့် ၄ နေရာနဲ့ ရာသီအဆုံးသတ်ခဲ့တဲ့ ဂျူဗင်တပ်စ်အသင်းဟာ ပေါင်သန်း ၂၂၀ ဆုံးရှုံးခဲ့ပြီး အီတလီမှာ စံချိန်တင် အရှုံးပေါ်ခဲ့တာပါ။

ပြီးခဲ့တဲ့နှစ် နိုဝင်ဘာလက ဂျူဗင်တပ်စ်အသင်းဟာ ကလပ်အပြောင်းအရွှေ့နဲ့ ပတ်သက်ပြီး စုံစမ်းစစ်ဆေးမှုတွေ စတင်ခြင်း ခံခဲ့ရပြီးနောက် ရဲတပ်ဖွဲ့နဲ့ ပူးပေါင်း လုပ်ဆောင်ခဲ့တယ်လို့ ပြောခဲ့ပါတယ်။

၂၀၁၉ ကနေ ၂၀၂၁ ကြား ကစားသမားတွေ စာရင်းသွင်း မှတ်ပုံတင်ကနေ ရရှိတဲ့ ဝင်ငွေကို စုံစမ်းစစ်ဆေးမှုတွေ ပြုလုပ်ခဲ့တာပါ။

ဒီစုံစမ်း စစ်ဆေးမှုမှာ ပါဝင်ခဲ့တဲ့ ဥက္ကဋ္ဌ အက်ဂ်နယ်လီနဲ့ ဒုဥက္ကဋ္ဌ နတ်ဗတ်တို့ဟာ သူတို့ရဲ့ ရာထူးတွေက နှုတ်ထွက် ခဲ့ကြတာ ဖြစ်ပါတယ်။

“ဆိုင်းငံ့ထားတဲ့ တရားရေးနဲ့ စာရင်းအင်းဆိုင်ရာ ပြဿနာတွေရဲ့ ဗဟိုချုပ်ကိုင်မှုနဲ့ ဆက်စပ်မှုကို ထည့်သွင်း စဉ်းစားပြီး ဘုတ်အဖွဲ့တွေဟာ ရာထူးက နှုတ်ထွက်ခဲ့တယ်”လို့ ထုတ်ပြန်ချက်မှာ ဖော်ပြထားတာပါ။

ဂျူဗင်တပ်စ်အသင်းကိုတွေ့ရစဉ်(Sport)

မန်နေဂျင်းဒါရိုက်တာ အာရီဗာဘီနီဟာ ဘုတ်အဖွဲ့ဝင် အသစ်တွေကို စုစည်းဖို့ ယာယီ ကာလအတွင်းမှာ သူ့ရဲ့ ရာထူးနေရာမှာပဲ ဆက်ရှိနေမှာ ဖြစ်တယ်လို့ သိရပါတယ်။

အက်ဂ်နယ်လီဟာ ၂၀၂၁ မှာ ဥရောပစူပါလိဂ် ပြိုင်ပွဲကို ခွဲထွက်ပြီး ယှဉ်ပြိုင်ဖို့ စီစဉ်ခဲ့တဲ့ အကြီးအကဲတွေထဲက တစ်ဦးလည်း ဖြစ်ပါတယ်။

အီတလီ စတော့အိတ်ချိန်းရဲ့ စာရင်းမှာရှိနေတဲ့ ဂျူဗင်တပ်စ်အသင်းဟာ ရင်းနှီးမြုပ်နှံတဲ့ သူတွေကို မှားယွင်းတဲ့ စာရင်းအင်း အချက်အလက်တွေ တင်ပြတာတွေ ရှိခဲ့ပါတယ်။

ဒါ့အပြင် လုံးဝမရှိတဲ့ အပြောင်းအရွှေ့တွေအတွက် ပြေစာတွေ ထုတ်ပေးခဲ့တယ်ဆိုပြီး စွပ်စွဲခံနေရသလို စုံစမ်း စစ် ဆေးမှုတွေလည်း ခံနေရတာ ဖြစ်ပါတယ်။

အီတလီကလပ်ကတော့ သူတို့ဟာ ဘာအမှားအယွင်းကိုမှ ပြုလုပ်ထားခြင်း မရှိဘူးလို့ စွပ်စွဲချက်တွေကို ငြင်းဆန် ထားတာပါ။ အီတလီဘောလုံးအဖွဲ့ချုပ်ဟာ အခြားကလပ် အသင်းတွေကိုလည်း အောက်တိုဘာလက စုံစမ်း စစ်ဆေးမှုတွေ ပြုလုပ်ပါတယ်။

ဘုတ်အဖွဲ့ အသစ် ခန့်အပ်ဖို့အတွက် အစုရှယ်ယာရှင်တွေဟာ ဇန်နဝါရီ ၁၈ ရက်မှာ ထပ်မံတွေ့ဆုံဖို့အတွက် စီစဉ် ထားတယ်လို့ ဂျူဗင်တပ်စ်အသင်းက ထုတ်ပြန်ထားပါတယ်။ ဂျူဗင်တပ်စ်အသင်းဟာ ဒီရာသီ စီးရီးအေ ပြိုင်ပွဲမှာ ရမှတ် ၃၁ မှတ်နဲ့ အဆင့် ၃ နေရာမှာ ရပ်တည်နေပါတယ်။

Source: BBC

CNI International News

၂၀၂၂ ခုနှစ်၊ နိုဝင်ဘာ ၂၉

ဘရူနိုဖာနန်ဒက်စ်က ဥရုဂွေးအသင်းကို ၂ ဂိုး- ဂိုးမရှိနဲ့ အနိုင်ရခဲ့တဲ့ ကမ္ဘာ့ဖလားပွဲစဉ်မှာ ပေါ်တူဂီအတွက် အဖွင့်ဂိုး ကို ဘယ်သူပဲသွင်းသွင်း အရေးကြီးတာက နောက်တဆင့် တက်ဖို့ပဲလိုတယ်လို့ ပြောလိုက်ပါတယ်။

ဘရူနိုဖာနန်ဒက်စ်က “ အဖွင့်ဂိုးကို ဘယ်သူ သွင်းယူလဲဆိုတာက တကယ်ကို အရေးမကြီးပါဘူး။ ကျနော်ပဲဖြစ်ဖြစ် ခရစ္စတီယာနိုပဲ ဖြစ်ဖြစ်ပါ။ ကျနော်ကတော့ အဲ့အချိန်မှာ ခရစ္စတီယာနို ဘောလုံးထိမိခဲ့တယ်လို့ ခံစားခဲ့ရပါတယ်။ ကျနော် သူ့ဆီကို ဘောလုံးပေးပို့ခဲ့တာပါ။ အရေးကြီးတာက ကျနော်တို့ ခက်ခဲတဲ့ ပြိုင်ဘက်ကို အနိုင်ရပြီး နောက်တဆင့် တက်ဖို့ပါပဲ။ လာမယ့်ပွဲမှာလည်း အနိုင်ရပြီး ရှုံးပွဲမရှိနဲ့ အုပ်စုက တက်ချင်တယ်”လို့ ပြောခဲ့တာပါ။

ဒီပွဲစဉ်ရဲ့ ပွဲချိန် ၅၄ မိနစ်မှာ ရရှိတဲ့ ပေါ်တူဂီအတွက် အဖွင့်ဂိုးကို ရော်နယ်ဒို သွင်းယူခဲ့တယ်လို့ ထင်ခဲ့ကြတာ ဖြစ်ပါတယ်။

ဒါပေမယ့် အနှေးပြကွက်နဲ့ ပြန်ကြည့်တာမှာ ဘရူနိုဖာနန်ဒက်စ် ဖြတ်တင်ပေးလိုက်တဲ့ ဘောလုံးဟာ ရော်နယ်ဒိုရဲ့ ခေါင်းနဲ့ မထိပဲ ဂိုးထဲ ဝင်သွားခဲ့တာပါ။

အဲ့ဒါကြောင့် ဒီဂိုးကို ဘရူနိုဖာနန်ဒက်စ်ရဲ့ ဂိုးအဖြစ် သတ်မှတ်ခဲ့တာ ဖြစ်ပါတယ်။ ဒီဂိုးသာ ရော်နယ်ဒိုရဲ့ သွင်းဂိုး ဖြစ်ခဲ့မယ်ဆိုရင် ပေါ်တူဂီရဲ့ ကမ္ဘာ့ဖလား သွင်းဂိုး အများဆုံး ဂန္တဝင် အူဆီဘီယိုရဲ့ သွင်းဂိုး အရေအတွက်နဲ့ တူညီ သွားမှာပါ။

ဘရူနိုဖာနန်ဒက်စ် ဖြတ်တင်လိုက်တဲ့ ဘောလုံးကို ရော်နယ်ဒို ခေါင်းတိုက် သွင်းနေစဉ် (The Standard)

အူဆီဘီယိုက ၉ ဂိုး သွင်းယူထားပြီး ဒီစံချိန်ကို တင်ထားခဲ့တာ ဖြစ်ပါတယ်။ ဘရူနိုဖာနန်ဒက်စ်ဟာ ပေါ်တူဂီ အသင်း ရခဲ့တဲ့ ဒုတိယဂိုးကိုလည်း ပင်နယ်တီကနေ သွင်းယူသွားခဲ့တာပါ။

ရော်နယ်ဒိုဟာ ဒီအချိန်မှာ လူစားလဲ ခံခဲ့ရတာကြောင့် ပင်နယ်တီကို ယူနိုက်တက် ကစားသမားက ကန်သွင်းယူ ခဲ့တာ ဖြစ်ပါတယ်။ ဘရူနိုဖာနန်ဒက်စ်ဟာ လက်ရှိ ကမ္ဘာ့ဖလားပြိုင်ပွဲ ၂ ပွဲ ကစားအပြီးမှာ ၂ ဂိုးသွင်းပြီး ၂ ဂိုး ဖန်တီးထားပါတယ်။

ဘရူနိုဖာနန်ဒက်စ်ဟာ ဒီပွဲမှာ ပြသခဲ့တဲ့ ခြေစွမ်းတွေကြောင့် အကောင်းဆုံး ကစားသမားဆုကိုလည်း ရရှိသွားခဲ့ ပါတယ်။ ပေါ်တူဂီအသင်းဟာ ဥရုဂွေးအသင်းကို အနိုင်ရပြီးနောက် အုပ်စုတွင်း ၂ ပွဲကစား ရမှတ် ၆ မှတ်နဲ့ ၁၆ သင်းအဆင့်ကို တက်ရောက်သွားပြီ ဖြစ်ပါတယ်။

ပေါ်တူဂီအသင်းဟာ အုပ်စု နောက်ဆုံးပွဲစဉ်အဖြစ် သောကြာနေ့မှာ တောင်ကိုရီးယားအသင်းနဲ့ ယှဉ်ပြိုင်ရမှာပါ။

တောင်ကိုရီယားအသင်းဟာ အုပ်စုတွင်း ၂ ပွဲ ကစားအပြီးမှာ ရမှတ် ၁ မှတ်သာ ရရှိထားပြီး နောက်တဆင့် တက်ဖို့ မျှော်လင့်ချက် နည်းပါးနေတာ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ နိုဝင်ဘာ ၂၈

ရုရှားဘောလုံးအဖွဲ့ချုပ်ဟာ ဥရောပမှာ အဖွဲ့ချုပ် အဖွဲ့ဝင်အဖြစ် တည်ရှိမှုကို အာရှထံ ကူးပြောင်းဖို့ စဉ်းစားဖွယ် ရှိတယ်လို့ အဖွဲ့ချုပ်အကြီးအကဲ ဒူကော့ဗ်ရဲ့ ပြောဆိုမှုကို ကိုးကားပြီး ရုရှားသတင်း အေဂျင်စီတွေက ဖော်ပြခဲ့ ပါတယ်။

ဒူကော့ဗ်က “ အာရှဟာ အချိန်မတန်သေးဘူးလို့ လွန်ခဲ့တဲ့လ အနည်းငယ်က ကျနော်ပြောခဲ့ဖူးပါတယ်။ ဒါပေမယ့် အခုအချိန်မှာတော့ ဒီအကြောင်းအရာဟာ ကျနော်တို့အတွက် စဉ်းစားသင့်တဲ့ အခွင့်အရေးပါပဲ”လို့ RIA သတင်း ဌာနက ဖော်ပြခဲ့ပါတယ်။

ရုရှားက ယူကရိန်းကို ကျူးကျော်မှုတွေ ပြုလုပ်ပြီး ကတည်းက ဖီဖာနဲ့ ယူအီးအက်ဖ်အေတို့က ရုရှားနိုင်ငံနဲ့ ကလပ် အသင်းတွေကို သူတို့ကျင်းပတဲ့ ပြိုင်ပွဲတွေမှာ ပါဝင်ယှဉ်ပြိုင်ခွင့် ပိတ်ပင်ခဲ့တာပါ။ ဒီလို ပိတ်ပင်မှုနဲ့ ပတ်သက်ပြီး ရုရှားဘောလုံးအဖွဲ့ချုပ်နဲ့ ကလပ်အသင်း ၄ သင်းက အယူခံဝင်ခဲ့ပေမယ့် အားကစားခုံရုံးက ပယ်ချခဲ့တာကြောင့် ပြိုင်ပွဲဝင်ခွင့် ဆုံးရှုံးခဲ့တာ ဖြစ်ပါတယ်။

ရုရှားအသင်းကိုတွေ့ရစဉ်(Sport)

ဒူကော့ဗ်က “ ယူအီးအက်ဖ်အေမှာ ရှိနေလို့ အာရှက ကိုယ်စားလှယ်တွေနဲ့ ကျနော် စကားမပြောဖြစ်သေးပါဘူး။ သူတို့က ကျနော်တို့ကို ဥရောပ မိသားစုအဖွဲ့ဝင်အဖြစ် မှတ်ယူထားပါတယ်။ သူတို့ရဲ့ ခေါင်းပေါ်ကို ကျော်ပြီး စေ့စပ်ညှိနှိုင်းမှုတွေ ပြုလုပ်ဖို့ စတင်ရတာက ကျနော်တို့အတွက် အမြင်တော်မှု မရှိပါဘူး”လို့ ပြောခဲ့တာပါ။

ရုရှားဟာ လာမယ့် ယူရို ၂၀၂၄ ပြိုင်ပွဲ ခြေစစ်ပွဲကိုလည်း ဝင်ရောက် ယှဉ်ပြိုင်ခွင့် ပိတ်ပင်ခံထားရပြီး လက်ရှိအချိန် မှာ အာရှအသင်းတွေနဲ့သာ ခြေစမ်းပွဲတွေ ယှဉ်ပြိုင်နေရတာပါ။

အခုလို ပြိုင်ပွဲဝင်ခွင့်ကို ကာလကြာရှည်စွာ ပိတ်ပင်ထားမယ်ဆိုရင် လက်ရွေးစင်နဲ့ ကလပ်အသင်းတွေအတွက် ထိခိုက်မှုတွေ ရှိလာနိုင်တာဖြစ်လို့ အာရှဘောလုံးအဖွဲ့ချုပ်ကို ကူးပြောင်းဖို့အတွက် စဉ်းစားဖွယ် ရှိနေပါတယ်။

သြစတြေးလျဘောလုံးအဖွဲ့ချုပ်ကလည်း သမုဒ္ဒရာပိုင်းဘောလုံးအဖွဲ့ချုပ်ကနေ အာရှဘောလုံးအဖွဲ့ချုပ်ထံ ကူးပြောင်းခဲ့ပြီး အခု ၂၀၂၂ ကာတာကမ္ဘာ့ဖလား ပြိုင်ပွဲကို ဝင်ရောက် ယှဉ်ပြိုင်နေတာ ဖြစ်ပါတယ်။

Source: CNA

CNI Sport News

၂၀၂၂ ခုနှစ်၊ နိုဝင်ဘာ ၂၈

မေဂျာလိဂ်ကလပ် အင်တာမိုင်ယာမီ အသင်းဟာ မက်ဆီကို ခေါ်ယူနိုင်ဖို့အတွက် သဘောတူညီမှု ရယူဖို့ နီးစပ်နေပြီလို့ သတင်းတွေမှာ ဖော်ပြထားပါတယ်။

အင်တာမိုင်ယာမီအသင်းက မက်ဆီဟာ ပီအက်စ်ဂျီအသင်းကနေ အလွတ်ပြောင်းရွှေ့ကြေးနဲ့ ပြောင်းရွှေ့လာမယ် လို့ ယုံကြည်နေပြီး အာဂျင်တီးနား အသင်းခေါင်းဆောင်ဟာ အမေရိကန် အားကစားသမိုင်းမှာ လုပ်ခလစာ အများ ဆုံးရတဲ့ ကစားသမား ဖြစ်လာဖို့ ရှိနေပါတယ်။

မက်ဆီဟာ လက်ရှိအချိန်မှာ တစ်ပတ်လုပ်ခလစာ ပေါင် ၁.၂ သန်းခန့် ရရှိနေပြီး ဒေးဗစ်ဘက်ခမ်း ပူးတွဲပိုင်ဆိုင်တဲ့ အင်တာမိုင်ယာမီမှာ လုပ်ခလစာ လျှော့ယူရဖွယ် ရှိနေတာ ဖြစ်ပါတယ်။

ဒါပေမယ့် မက်ဆီဟာ အမေရိကန်မှာ ထိပ်တန်းဝင်ငွေရတဲ့ ကစားသမားအဖြစ် ရှိနေမှာပါ။ အာဂျင်တီးနား တိုက်စစ်မှူးဟာ မိုင်ယာမီမှာ အိမ်ရှိပြီး ပုံမှန်အားလပ်ရက်ဆိုရင် လာရောက် လည်ပတ်လေ့ ရှိပါတယ်။

အင်တာမိုင်ယာမီအသင်းဟာ မက်ဆီရဲ့ ကစားကွက်နဲ့ ကိုက်ညီမှု ရှိစေဖို့အတွက် ဘာစီလိုနာ အသင်းဖော်ဟောင်း တွေဖြစ်တဲ့ ဆွာရက်စ်နဲ့ ဖာဘရီဂတ်စ်ကိုပါ ခေါ်ယူဖို့ စဉ်းစားမှုတွေ ပြုလုပ်နေပါတယ်။

ဒေးဗစ်ဘက်ခမ်း၊ မက်ဆီနဲ့ ဘာစီလိုနာအသင်းဖော်ဟောင်းတွေ မိသားစုကိုတွေ့ရစဉ် (GETTY IMAGES)

အင်တာမိုင်ယာမီအသင်းကို ဒေးဗစ်ဘက်ခမ်းရဲ့ ယူနိုက်တက် အသင်းဖော်ဟောင်း ဖီးလ်နဗီးလ်က ကိုင်တွယ်နေ ပြီး မကြာသေးခင်က သက်တမ်းတိုး စာချုပ်ချုပ်ဆိုထားတာ ဖြစ်ပါတယ်။

ဒေးဗစ်ဘက်ခမ်းဟာ မက်ဆီနဲ့ စာချုပ်ချုပ်ဆိုဖို့ အစိတ်အပိုင်းတွေထဲက ၁ ခုအဖြစ် ကာတာမှာ ရှိနေတာ ဖြစ်သလို သူဟာ ကာတာကမ္ဘာ့ဖလားပြိုင်ပွဲ အိမ်ရှင်ရဲ့ သံတမန်လည်း ဖြစ်ပါတယ်။

ဒေးဗစ်ဘက်ခမ်းဟာ ပီအက်စ်ဂျီအသင်းရဲ့ ပိုင်ရှင်တွေနဲ့ ကလပ်ဥက္ကဋ္ဌ အယ်ဖီလိုင်ဖီတို့ကို တိုက်ရိုက် ချိတ်ဆက် မှုတွေ ပြုလုပ်နေပါတယ်။

ဒါ့အပြင် ဒေးဗစ်ဘက်ခမ်းနဲ့ မက်ဆီတို့ရဲ့ ဆက်ဆံရေးကလည်း ကောင်းမွန်မှုရှိ နေပါတယ်။ မက်ဆီနဲ့ ပီအက်စ်ဂျီ အသင်းတို့ ချုပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးတော့မှာ ဖြစ်ပါတယ်။ အဲ့ဒါကြောင့် ပီအက်စ်ဂျီ အသင်းဟာ စာချုပ်သက်တမ်းတိုးဖို့ ကြိုးစားနေသလို အသင်းတချို့ကလည်း ခေါ်ယူဖို့ ချိတ်ဆက်မှုတွေ ပြုလုပ်နေ တာပါ။

မက်ဆီကတော့ လက်ရှိအချိန်မှာ အာဂျင်တီးနား အသင်းနဲ့ ကမ္ဘာ့ဖလားပြိုင်ပွဲကိုသာ အပြည့်အဝ အာရုံစိုက်ထား ပြီး ဒီပြိုင်ပွဲပြီးမှသာ အနာဂတ်ကို ဆုံးဖြတ်ဖို့ ရှိနေတာ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ နိုဝင်ဘာ ၂၈

ဗာတွန်ဂန်က မော်ရိုကိုကို အရေးနိမ့်တဲ့ ပွဲအပြီးမှာ ဘယ်လ်ဂျီယံအသင်းဟာ အိုမင်းလွန်းနေပြီး ခံစစ်ပိုင်းကလည်း အားနည်းတယ်လို့ ပြောခဲ့တဲ့ ဒီဘရိုင်းနဲ့ ဟာဇတ်တို့ကို ပြန်လည် ထိုးနှက်သွားခဲ့ပါတယ်။

ဗာတွန်ဂန်က “ ကျနော်တို့ရဲ့ ရှေ့တန်းက အိုမင်းလွန်းတာကြောင့် တိုက်စစ်ပိုင်းက တော်တော်လေးကို ဆိုးရွား ခဲ့တယ်လို့ ထင်ပါတယ်။ ကျနော်တို့ဟာ လုံလောက်တဲ့ အခွင့်အရေးကိုလည်း မဖန်တီးနိုင်ခဲ့ပါဘူး။တူညီတဲ့ သွင်းဂိုး ၂ ဂိုးကို ခွင့်ပြုခဲ့ရပါတယ်”လို့ ပွဲအပြီးမှာ သတင်းထောက်တွေကို ပြောခဲ့တာပါ။

ဘယ်လ်ဂျီယံရဲ့ ရွှေရောင်မျိုးဆက်လို့ သတ်မှတ်ခံထားရတဲ့ ဒီအစုအဖွဲ့ဟာ မော်ရိုကိုအသင်းကို ၂ ဂိုး- ဂိုးမရှိနဲ့ အရေးနိမ့်ခဲ့တာ ဖြစ်ပါတယ်။

အဲ့ဒါကြောင့် အုပ်စုတွင်း ၂ ပွဲ ကစားအပြီးမှာ ရမှတ် ၃ မှတ်သာ ရရှိထားပြီး နောက်တဆင့် တက်ဖို့ဆိုရင် ခရိုအေးရှားအသင်းနဲ့ ကစားရမယ့် အုပ်စုနောက်ဆုံးပွဲမှာ မဖြစ်မနေ နိုင်ပွဲရယူဖို့ လိုအပ်သွားပြီ ဖြစ်ပါတယ်။

ဘယ်လ်ဂျီယံ ကစားသမား ဗာတွန်ဂန်ကို ကစားဖော်များနဲ့အတူတွေ့ရစဉ် (Sport)

ဒီပွဲမတိုင်ခင်မှာ ဒီဘရိုင်းက “ ဘယ်လ်ဂျီယံအသင်းရဲ့ အကောင်းဆုံး ကစားသမားတွေဟာ အိုမင်းနေပြီး၊ တစ်သင်း လုံး ကလည်း အိုမင်းလွန်း နေတာကြောင့် ကမ္ဘာ့ဖလား ချန်ပီယံဆုရဖို့ မဖြစ်နိုင်ဘူး”လို့ ပြောခဲ့တာ ဖြစ်ပါတယ်။

ဒါ့အပြင် အသင်းခေါင်းဆောင် ဟာဇတ်ကလည်း “ ကျနော်တို့ရဲ့ ခံစစ်ကစားသမားတွေဟာ မလျင်မြန်တော့ပါဘူး။ ဒါကို သူတို့သိပါတယ်”လို့ မော်ရိုကိုနဲ့ ပွဲမတိုင်ခင်မှာ ပြောခဲ့တာပါ။

ဒီလိုပြောဆိုမှုတွေကို ဗာတွန်ဂန်က မော်ရိုကိုနဲ့ ပွဲအပြီးမှာ ပြန်လည် တုံ့ပြန်သွားခဲ့တာ ဖြစ်ပါတယ်။ ဘယ်လ်ဂျီယံ နည်းပြ မာတီးနတ်စ်က သူတို့ဟာ ၆ နှစ်ကြာ အတူလက်တွဲခဲ့ကြတာဖြစ်ပြီး ဒီလိုမှတ်ချက်တွေက အနိုင်ရဖို့ အထောက်အကူ မဖြစ်ဘူးလို့ ပြောခဲ့ပါတယ်။

မာတီးနတ်စ်က “ ကီဗင်ရဲ့ မှတ်ချက်ကို ကျနော် ပထမဆုံးအကြိမ် ကြားခဲ့ရတာပါ။ ကမ္ဘာ့ဖလားပြိုင်ပွဲမှာ ကစား သမားတွေက မီဒီယာတွေကို နေ့တိုင်း စကားပြောနေရမှာပါ။ ၉၀ ရာခိုင်နှုန်းက အကောင်းမြင်တက်ပေမယ့် အကြောင်းအရာနဲ့ မကိုက်ညီတဲ့ စာကြောင်း ၁ ကြောင်း၊ ၂ ကြောင်းလောက်ကတော့ အမြဲရှိနေမှာပါ။ ကစားသမား တွေက သူတို့ရဲ့ အမြင်တွေကို ထုတ်ပြခွင့် ရှိပါတယ်”လို့ ပြောပါတယ်။

ဘယ်လ်ဂျီယံအသင်းဟာ ကမ္ဘာ့အဆင့် ၁ နေရာကို အကြာကြီး ရယူခဲ့ပြီး ကမ္ဘာ့အဆင့်ရှိ ကစားသမားတွေ အများကြီး ပါဝင်ခဲ့ပေမယ့် ဆုဖလားအောင်မြင်မှုတော့ မရခဲ့ပါဘူး။

Source: Goal

CNI Sport News

၂၀၂၂ ခုနှစ်၊ နိုဝင်ဘာ ၂၆

မြောက်ကိုရီးယား ရုပ်သံတွေဟာ သူတို့ရဲ့ နိုင်ငံရေးရန်ဘက်တွေ ပါဝင်တဲ့ ကမ္ဘာ့ဖလားပွဲတွေကို ပြသခြင်းမပြုဘဲ သပိတ်မှောက်ဖို့ အမိန့်ပေးခြင်း ခံထားရတယ်လို့ သိရပါတယ်။

ကင်မ်ဂျုံအန်း ဦးဆောင်တဲ့ မြောက်ကိုရီးယားနိုင်ငံဟာ အိမ်နီးချင်း တောင်ကိုရီးယားနဲ့ ဆက်ဆံရေး ပြတ်တောက် နေပြီး ဂျပန်၊ အမေရိကန်တို့လို နိုင်ငံတွေနဲ့လည်း ကမ္ဘာ့ဇာတ်ခုံပေါ်မှာ ဆက်ဆံရေး တင်းမာနေပါတယ်။

KBS World TV က မြောက်ကိုရီးယား ရုပ်သံလိုင်းတွေဟာ ကျင်းပနေတဲ့ ၂၀၂၂ ကမ္ဘာ့ဖလား ပြိုင်ပွဲမှာ တောင်ကိုရီးယား၊ ဂျပန်နဲ့ အမေရိကန် ပါဝင်တဲ့ ပွဲစဉ်တွေကို ပြသခြင်း မရှိဘူးလို့ ဖော်ပြထားပါတယ်။

မြောက်ကိုရီးယားဟာ ကမ္ဘာ့ဖလားပြိုင်ပွဲအတွက် ရုပ်သံထုတ်လွှင့်ခွင့် ဝယ်ယူထားခြင်း မရှိပေမယ့် ပွဲစဉ်တွေကို ပြသနေတယ်လို့ တွစ်တာအသုံးပြုသူ တစ်ဦးက ပုံနဲ့တကွ ဖော်ပြထားပါတယ်။

တောင်ကိုရီးယားကစားသမားများကို တွေ့ရစဉ် (Eurosport)

ဖီဖာဥက္ကဋ္ဌ အင်ဖန်တီနိုကတော့ မြောက်ကိုရီးယားနိုင်ငံကို ကမ္ဘာ့ဖလားပြိုင်ပွဲ ကျင်းပဖို့ လမ်းဖွင့် ပေးထားတယ်လို့ မကြာသေးခင်က ထုတ်ပြောထားတာ ဖြစ်ပါတယ်။ အင်ဖန်တီနိုဟာ မြောက်ကိုရီးယားနိုင်ငံကို သွားရောက်ခဲ့ဖူးပြီး အမျိုးသမီး ကမ္ဘာ့ဖလားပြိုင်ပွဲကို တောင်ကိုရီးယားနဲ့ ပူးတွဲကျင်းပဖို့ အဆင်သင့်ဖြစ်လားလို့ မေးမြန်းခဲ့တာပါ။

ဖီဖာဟာ အခုနှစ် ကမ္ဘာ့ဖလားပြိုင်ပွဲကို ကာတာမှာ ကျင်းပတာနဲ့ ပတ်သက်ပြီး ဝေဖန်မှုတွေ ခံရချိန်မှာ မြောက်ကိုရီးယားကိုပါ လမ်းဖွင့်ပေးခဲ့လို့ ဝေဖန်မှုတွေဟာ ၂ ဆတိုး လာခဲ့တာ ဖြစ်ပါတယ်။

ကမ္ဘာ့အဆင့် ရပ်တည်မှု ၁၁၂ နေရာမှာ ရပ်တည်နေတဲ့ မြောက်ကိုရီးယားဟာ ကမ္ဘာ့ဖလားပြိုင်ပွဲကို ၂ ကြိမ် ဝင်ရောက် ယှဉ်ပြိုင်ခဲ့ပါတယ်။

မြောက်ကိုရီးယားဟာ အင်္ဂလန်မှာ ကျင်းပတဲ့ ၁၉၆၆ ကမ္ဘာ့ဖလားပြိုင်ပွဲကို ပထမဆုံး အကြိမ်အဖြစ် ယှဉ်ပြိုင်ခဲ့ပြီး ၂၀၁၀ တောင်အာဖရိကမှာ ကျင်းပတဲ့ပြိုင်ပွဲကို ဒုတိယအကြိမ်အဖြစ် ယှဉ်ပြိုင်ခဲ့တာ ဖြစ်ပါတယ်။

Source:Sportbible

CNI Sport News

၂၀၂၂ ခုနှစ်၊ နိုဝင်ဘာ ၂၆

တရုတ်လက်ရွေးစင်အသင်း နည်းပြဟောင်း လီတိုင်ဟာ ဥပဒေချိုးဖောက်တယ်လို့ သံသယရှိတာကြောင့် စုံစမ်း စစ်ဆေးမှုတွေ ပြုလုပ်ခဲ့တယ်လို့ တရုတ်အာဏာပိုင်တွေက နိုဝင်ဘာလ ၂၆ ရက်မှာ ပြောပါတယ်။

လီတိုင်ဟာ အားကစား အထွေထွေ အုပ်ချုပ်ရေးအဖွဲ့အတွင်း စည်းကမ်းထိန်းသိမ်းရေးအဖွဲ့ရဲ့ စုံစမ်းစစ်ဆေးမှု ခံခဲ့ ရပေမယ့် သူ့ကိုစွပ်စွဲတဲ့ ပြစ်မှုတွေကိုတော့ ဖော်ပြထားခြင်း မရှိဘူးလို့ တရုတ်နိုင်ငံ အလယ်ပိုင်း ပြည်နယ်အစိုးရ ဝက်ဘ်ဆိုက်တစ်ခုရဲ့ ကြေညာချက်အရ သိရတာပါ။

တရုတ်နိုင်ငံရဲ့ အသိအမှတ်ပြု အခံရဆုံး ကစားသမားတစ်ဦးဖြစ်တဲ့ အသက် ၄၅ နှစ်အရွယ်ရှိ လီတိုင်ဟာ ပရီးမီးယားလိဂ်ကလပ် အဲဗာတန်အသင်းမှာ ၂၀၀၂ ကနေ ၂၀၀၆ အထိ ကစားခဲ့ပါတယ်။

လီတိုင်ဟာ တရုတ်လက်ရွေးစင် အသင်းအတွက်လည်း ပွဲပေါင်း ၉၂ ပွဲ ပါဝင်ကစားခဲ့ပြီး နည်းပြအဖြစ် ၂၀၁၉ ကနေ ၂၀၂၁ အထိ တာဝန်ယူခဲ့တာပါ။

ဒါပေမယ့် ၂၀၂၂ ကမ္ဘာ့ဖလား ခြေစစ်ပွဲအတွင်း တရုတ်ရဲ့ ဆိုးရွားတဲ့ ရလဒ်တွေကြောင့် နည်းပြရာထူးကနေ နုတ်ထွက်ခဲ့ပြီး လက်ရွေးစင်အသင်းကလည်း ခြေစစ်ပွဲအောင်မြင်ခြင်း မရှိခဲ့ပါဘူး။

အဲဗာတန်မှာ လီတိုင် ကစားခဲ့စဉ် 

တရုတ်သမ္မတ ရှီကျင့်ဖျင်ဟာ အာဏာရပြီးကတည်းက အကျင့်ပျက်ခြစားမှုတွေကို ပစ်မှတ်ထား လုပ်ဆောင်နေ တာပါ။

နိုင်ငံရေးပြိုင်ဘက်တွေကို ဖယ်ရှားဖို့ နည်းလမ်းအဖြစ် ဒါတွေကို ပြင်းပြင်းထန်ထန် လုပ်ဆောင်နေတယ်လို့ ဝေဖန်သူတွေက ပြောခဲ့ပါတယ်။

ရှီက သူကိုယ်တိုင် ဘောလုံးပရိသတ် ဖြစ်တယ်လို့ ပြောထားပြီး တရုတ်နိုင်ငံမှာ ကမ္ဘာ့ဖလားပြိုင်ပွဲကို အိမ်ရှင်အဖြစ်ကျင်းပဖို့ အိပ်မက်မက်နေတာ ဖြစ်ပါတယ်။

ဒါပေမယ့် နိုင်ငံအတွင်း တင်းကျပ်တဲ့ ကိုဗစ်မူဝါဒတွေကြောင့် ကျင်းပခွင့်ရခဲ့တဲ့ အဓိကပြိုင်ပွဲ အာရှဖလားကို အိမ်ရှင်အဖြစ်ကနေ နုတ်ထွက်ခဲ့တာပါ။

တရုတ်အသင်းဟာ ကမ္ဘာ့ဖလားပြိုင်ပွဲကို ၂၀၀၂ က ၁ ကြိမ်သာ ဝင်ရောက် ယှဉ်ပြိုင်ခွင့် ရထားပြီး အုပ်စု အဆင့်နဲ့ သာ ကျေနပ်ခဲ့ရတာ ဖြစ်ပါတယ်။ တရုတ်အသင်းဟာ အာရှဖလားပြိုင်ပွဲမှာလည်း အမြင့်ဆုံး အောင်မြင်မှုအဖြစ် ဒုတိယသာ ရရှိခဲ့ဖူးတာ ဖြစ်ပါတယ်။

Source: CNA