CNI Sport News

၂၀၂၂ ခုနှစ်၊ ဒီဇင်ဘာ ၈

အင်္ဂလန်အသင်းနောက်ခံလူ ကိုင်လီဝေါလ်ကာက ဘတ်ပီကို ကော်ဇောနီ ခင်းပေးပြီး ဂိုးသွင်းလို့ရအောင် လုပ်မှာ မဟုတ်ဘူးလို့ ပြင်သစ်အသင်းနဲ့ ပွဲမတိုင်ခင် ပြောကြားလိုက်ပါတယ်။

ကိုင်လီဝေါလ်ကာက “ ဒီပွဲက အင်္ဂလန်နဲ့ ဘတ်ပီပွဲ မဟုတ်ပါဘူး။ အင်္ဂလန်နဲ့ ပြင်သစ်ပွဲပါ။ ကျနော်တို့ လေးစား မှုတွေ ပေးပါမယ်။ ဒါပေမယ့် ကျနော် သူ့အတွက် ကော်ဇောနီခင်းပေးပြီး ဂိုးသွင်းလို့ရအောင်တော့ မလုပ်ပါဘူး။ ကျနော်တို့ ရှုံးရင် အိမ်ပြန်ရမှာဖြစ်လို့ အကောင်းဆုံးလုပ်မလား ဒါမှမဟုတ် အသေခံမလားပဲ ရှိတာပါ”လို့ ပြောခဲ့ တာပါ။

အင်္ဂလန်နဲ့ ပြင်သစ်အသင်းတို့ဟာ စနေနေ့မှာ ကမ္ဘာ့ဖလား ကွာတားဖိုင်နယ် ပွဲစဉ်အဖြစ် ယှဉ်ပြိုင်ရမှာဖြစ်ပြီး ဒီပွဲမတိုင်ခင် ပြုလုပ်တဲ့ သတင်းစာ ရှင်းလင်းပွဲမှာ ဘတ်ပီနဲ့ ပတ်သက်တဲ့ မေးခွန်းကို ကိုင်လီဝေါလ်ကာ မေးမြန်း ခံခဲ့ရတာ ဖြစ်ပါတယ်။

ကိုင်လီဝေါလ်ကာနဲ့ ဘတ်ပီတို့ဟာ ကလပ်အသင်းအဆင့် ချန်ပီယံလိဂ် ပွဲစဉ်တွေမှာ ထိပ်တိုက် တွေ့ဆုံမှုတွေ ရှိခဲ့တာပါ။

ကိုင်လီဝေါလ်ကာကို တွေ့ရစဉ် (ESPN)

ကိုင်လီဝေါလ်ကာက “ သူ့ကိုရပ်တန့်ဖို့ ကျနော် ဘာလုပ်ရမလဲဆိုတာကို နားလည်ပါတယ်။ ပြောရတာက ပိုပြီး လွယ်ကူပေမယ့် ကျနော်ကတော့ ကိုယ့်ကိုယ်ကို လျှော့မတွက်ပါဘူး။ ကျနော်ကတော့ ဘတ်ပီနဲ့ ထိုက်တန်တဲ့ လေးစားမှုကို ပေးမှာပါ။ ဒါပေမယ့် အများကြီးတော့ မဟုတ်ပါဘူး။ ဘာဖြစ်လို့လဲဆိုရင်တော့ ဒါက အင်္ဂလန် ဖြစ်နေလို့ပါ။ ကျနော်တို့ဟာ အသင်းလိုက် လုပ်ဆောင်ရမှာပါ။ ဒါက တင်းနစ် မဟုတ်သလို တစ်ဦးတည်း ကစား ရတဲ့ အားကစားနည်း မဟုတ်ပါဘူး”လို့ ပြောပါတယ်။

ဘီဘီစီရဲ့ အားကစား သုံးသပ်သူဖြစ်တဲ့ အင်္ဂလန် ကစားသမားဟောင်း ဂယ်ရီလိုင်နီကာက ဘတ်ပီရဲ့ ခြိမ်းခြောက် မှုတွေကို ထိန်းချုပ်နိုင်ဖို့အတွက် ဆီနီဂေါအသင်းကို အနိုင်ရတဲ့ ၁၆ သင်းအဆင့်ပွဲမှာ ဝေါလ်ကာကို အနားပေးဖို့ တောင် ပြောခဲ့တာပါ။

မန်စီးတီးအသင်း နောက်ခံလူဟာ ဘတ်ပီကို ချန်ပီယံလိဂ်မှာ တွေ့ဆုံခဲ့တုန်းက အကောင်းဆုံး ထိန်းနိုင်ခဲ့တာ ကြောင့် ဒီပွဲမှာလည်း ဒီလို လုပ်ဆောင် နိုင်မယ်လို့ အားလုံးက မျှော်လင့်နေကြတာ ဖြစ်ပါတယ်။

ဘတ်ပီကတော့ လက်ရှိ ကမ္ဘာ့ဖလားပြိုင်ပွဲရဲ့ အကောင်းဆုံး ကစားသမားတွေထဲက ၁ ဦးအဖြစ် သတ်မှတ်ခံ ရ လောက်အောင် ခြေစွမ်းပြ ဂိုးတွေ သွင်းယူနေတာပါ။

ပြင်သစ်တိုက်စစ်မှူး ဘတ်ပီဟာ ၂၀၂၂ ကမ္ဘာ့ဖလားပြိုင်ပွဲမှာ ၅ ဂိုး သွင်းယူထားပြီး ဂိုးသွင်းအများဆုံး ရွှေဖိနပ်ဆု ရယူဖို့ ဦးဆောင်နေပါတယ်။

CNI Sport News

၂၀၂၂ ခုနှစ်၊ ဒီဇင်ဘာ ၈

ယူနိုက်တက်အသင်းနည်းပြ အဲရစ်တန်ဟတ်က ကာဒစ်ဇ်အသင်းကို ၄ ဂိုး- ၂ ဂိုးနဲ့ အရေးနိမ့်ခဲ့တဲ့ ခြေစမ်းပွဲမှာ အသင်းရဲ့ စွမ်းဆောင်ရည်ဟာ လက်ခံနိုင်စရာမရှိဘူးလို့ ပြောလိုက်ပါတယ်။

အဲရစ်တန်ဟတ်က “ကျနော်တို့ မနိုးထသေးဘူးဆိုတာ ရှင်းပါတယ်။ပထမ ၁၅ မိနစ်အတွင်းမှာ ကျနော်တို့ အိမ်ပျော်နေတုန်းပဲရှိပါသေးတယ်။ကျနော်တို့က ပြင်ဆင်ခဲ့ပြီး ဒုတိယဂိုးရဖို့ မြင်တွေ့ခဲ့ရပေမယ့် ဒါက ဖြစ်မလာခဲ့ပါဘူး။ကျနော်တို့ ခံစစ်ပိုင်းရော ကွင်းလယ်ပိုင်းရော ဆိုးရွားခဲ့ပါတယ်။ဒါက မဖြစ်နိုင်သလို၊ လက်ခံစရာ အကြောင်းလည်းမရှိပါဘူး” လို့ MUTV ကို ပြောခဲ့တာပါ။

ယူနိုက်တက်အသင်းဟာ ကလပ်အသင်းပွဲတွေပြန်မလာခင် ခြေစမ်းပွဲအဖြစ် စပိန်ကလပ် ကာဒစ်ဇ်အသင်းနဲ့ ကစားခဲ့တာမှာ ပထမပိုင်း မိနစ် ၂၀ အတွင်း သွင်းဂိုး ၂ ဂိုးခွင့်ပြုခဲ့ရတာဖြစ်ပါတယ်။ယူနိုက်တက်အသင်းရဲ့ အဓိကကစားသမားအများအပြားဟာ ကမ္ဘာ့ဖလားပြိုင်ပွဲယှဉ်ပြိုင်နေတာကြောင့် ပထမပိုင်းမှာဆို ဒူဘရာကာ၊ ဝမ်ဘစ်စကာ၊ လင်ဒီလောဖ့်၊ တိုမီနေး၊ ဗန်ဒီဘိခ်နဲ့ မာရှယ်တို့ကို ပွဲထွက်အသုံးပြုခဲ့တာပါ။

ဒုတိယပိုင်းမှာတော့ ဂိုးသမား ဒူဘရာကာကလွဲပြီး လူငယ်ကစားသမားတွေကို ထည့်သွင်းခဲ့တာဖြစ်ပါတယ်။ ယူနိုက်တက်အသင်းဟာ ပထမပိုင်းမှာ ၂ ဂိုး၊ ဒုတိယပိုင်းမှာ ၂ ဂိုး ခွင့်ပြုခဲ့ရပြီး ချေပဂိုး ၂ ဂိုးကိုတော့ မာရှယ်နဲ့ လူငယ်ကစားသမား ကိုဘီမေနိုတို့က သွင်းယူခဲ့တာပါ။ယူနိုက်တက်အသင်းဟာ ဒီပွဲမှာ ဘောလုံးပိုင်ဆိုင်မှု ၄၈ ရာခိုင်နှုန်းနဲ့ ဂိုးပေါက်တည့်မှု ၃ ကြိမ်သာရှိခဲ့တာဖြစ်ပါတယ်။

အဲရစ်တန်ဟတ်က “ဒီပွဲအတွက် ကျနော်မပျော်ရွှင်ပါဘူး။ရှုံးသွားတယ်ဆိုရင်တောင် အပေါင်းလက္ခဏာဆောင်တဲ့ အရာတွေအမြဲရှိပေမယ့် အခုက အနုတ်လက္ခဏာဆောင်တဲ့အရာတွေပဲ ပိုပြီးရှိလာပါတယ်။ဒါပေမယ့် သေးငယ်တဲ့ အမှားလေးတွေက ကြီးမားတဲ့ အကျိုးဆက်ရနိုင်တယ်ဆိုတာ သင်ခန်းစာကောင်းတခုပါပဲ။ဒီလိုဖြစ်ခဲ့တာကြောင့် လည်း ပွဲကို အရေးနိမ့်ခဲ့တာ”လို့ ပြောခဲ့တာပါ။

ယူနိုက်တက်အသင်းဟာ စနေနေ့မှာ ဘက်တစ်အသင်းနဲ့ ခြေစမ်းပွဲယှဉ်ပြိုင်မှာဖြစ်ပြီး ဒီပွဲပြီးရင်တော့ ဒီဇင်ဘာလ ၂၁ ရက်မှာ ကာရာဘောင်းဖလားပွဲစဉ်အဖြစ် ဘန်လေအသင်းနဲ့ ယှဉ်ပြိုင်ရမှာဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ ဒီဇင်ဘာ ၈

ကာတာကမ္ဘာ့ဖလားပြိုင်ပွဲမှာ ရွှေ့ပြောင်းအလုပ်သမားတဦးသေဆုံးတယ်လို့ ဖီဖာကအတည်ပြုခဲ့ပြီးနောက် ဒီလို အဖြစ်အပျက်ကို အလွန် ဝမ်းနည်းမိတယ်လို့ ပြောလိုက်ပါတယ်။

“ဒီအဖြစ်အပျက်ဆိုးကြောင့် ဖီဖာက အလွန်ဝမ်းနည်းရပါတယ်။ကျနော်တို့ရဲ့ အတွေးအမြင်နဲ့ စာနာမှုတွေဟာ မိသားစုနဲ့အတူ ရှိနေပါတယ်။ဒီမတော်တဆမှုကို ဖီဖာက သတိပြုမိပြီးတာနဲ့ အသေးစိတ်အချက်အလက်တွေကို တောင်းဆိုဖို့ ဒေသဆိုင်ရာအာဏာပိုင်တွေကို ဆက်သွယ်ခဲ့ပါတယ်။ အလုပ်သမားသေဆုံးတာနဲ့ ပတ်သက်ပြီး သက်ဆိုင်ရာလုပ်ငန်းစဉ်တွေ ပြီးဆုံးသွားတဲ့အချိန်မှာ ဖီဖာက နောက်ထပ်မှတ်ချက်ပေးဖို့ရှိတယ်” လို့ ကမ္ဘာ့ ဘောလုံးအဖွဲ့ချုပ်ရဲ့ထုတ်ပြန်ချက်မှာ ဖော်ပြထားတာပါ။

ဒီသေဆုံးမှုဟာ ဆော်ဒီအသင်းရဲ့ ကမ္ဘာ့ဖလားလေ့ကျင့်ရေးစခန်းအဖြစ် အသုံးပြုဖို့ ပြန်လည်ပြင်ဆင်ထားတဲ့ အပန်းဖြေစခန်း အနီးမှာဖြစ်ခဲ့တာဖြစ်ပြီး ပြုပြင်ထိန်းသိမ်းရေး အလုပ်သမားဟာ သေဆုံးသွားခဲ့တယ်လို့ The Athletic သတင်းဌာနက ဖော်ပြခဲ့တာဖြစ်ပါတယ်။ ကာတာအာဏာပိုင်တွေက ဒီ အဖြစ်အပျက်ကို စုံစမ်းစစ်ဆေး နေတယ်လို့ သိရတာပါ။ အဆိုပါ သေဆုံးသွားသူဟာ အသက် ၄၀ ကျော်အရွယ်ရှိ ဖိလစ်ပိုင်အမျိုးသားဖြစ်တယ်လို့ The Athletic က ဖော်ပြခဲ့ပါတယ်။

သူဟာ ပစ္စည်းတွေသယ်ယူရွှေ့ပြောင်းရာမှာ အသုံးပြုတဲ့ ကားတိမ်းမှောက်မှုမှာပါဝင်ခဲ့တယ်လို့ သတင်းတွေက ဖော်ပြထားပေမယ့် အတည်ပြုလို့တော့မရပါဘူး။ဖီဖာကတော့ ပြိုင်ပွဲကာလအတွင်း ဒိုဟာမှာ သေဆုံးမှု ဖြစ်ခဲ့တယ်လို့ ပြောထားခဲ့ပေမယ့် အသေးစိတ်အချက်အလက်တွေကိုတော့ ပြောဆိုခဲ့ခြင်းမရှိပါဘူး။ ကာတာ နိုင်ငံဟာ ကမ္ဘာ့ဖလားပြိုင်ပွဲမတိုင်ခင်ကတည်းက ရွှေ့ပြောင်းအလုပ်သမားတွေအပေါ် ဆက်ဆံပုံနဲ့ပတ်သက်ပြီး နှစ်ပေါင်းများစွာကြာ မီးမောင်းထိုးပြခြင်းကို ခံနေရတာပါ။

ကမ္ဘာ့ဖလားစီမံကိန်းတွေနဲ့ ဆက်စပ်ပြီး သေဆုံးသူဦးရေဟာ ၆,၀၀၀(ခြောက်ထောင်)ကျော်ရှိတယ်လို့ လူ့အခွင့် အရေးအဖွဲ့တွေက ပြောထားပါတယ်။ဒါပေမယ့် ကာတာအစိုးရဟာ မူလက သေဆုံးမှု ၄၀ လောက်သာရှိတယ်လို့ ပြောထားခဲ့ပေမယ့် ပြိုင်ပွဲစတင်ပြီးချိန်မှာတော့ သေဆုံးသူ ၄၀၀ နဲ့ ၅၀၀ ကြားရှိတယ်လို့ တာဝန်ရှိသူတဦးက ဝန်ခံခဲ့တာဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ ဒီဇင်ဘာ ၇

ဂျူဗင်တပ်စ်အသင်းဟာ သမိုင်းတလျှောက် အပြင်းထန်ဆုံး စုံစမ်းစစ်ဆေးမှုတွေနဲ့ ရင်ဆိုင်နေရပြီး တန်းဆင်းသွား နိုင်တယ်လို့ အီတလီရှေ့နေတစ်ဦးက ပြောပါတယ်။

အီတလီရှေ့နေ ဂရက်စ်ဆာနီက “ ဒါက ဂျူဗင်တပ်စ်သမိုင်းမှာ အပြင်းထန်ဆုံး စုံစမ်းစစ်ဆေးမှုလို့ ထင်ပါတယ်။ ၂၀၀၆ က ကယ်လ်ဆီယိုပိုလီ ထက်တောင်ပိုပြီး ပြင်းထန်ပါတယ်။ စည်းမျဉ်းတွေအရ စာရွက်စာတမ်းတွေကို ပြောင်းလဲခဲ့တယ်ဆိုရင် ကြီးမားတဲ့ ပြစ်ဒဏ် ချမှတ်ခံရနိုင်ပါတယ်။ ရိုးရိုး ပြစ်ဒဏ်ထက် ကြီးမားတဲ့ အကျိုးဆက် တွေလည်း ဖြစ်လာနိုင်ပါတယ်။ သူတို့ဟာ စီးရီးအေကနေ တန်းဆင်းသွားနိုင်ပြီး စကူဒတ်တိုကိုလည်း ဆုံးရှုံးနိုင်ပါ တယ်”လို့ ရေဒီယို Rai1 ကို ပြောခဲ့တာပါ။

ဂျူဗင်တပ်စ်အသင်းဟာ အီတလီဘောလုံးလောကကို အချိန်အကြာကြီး လွှမ်းမိုးထားနိုင်ခဲ့ပေမယ့် ပြီးခဲ့တဲ့ ၂ ရာသီ ဆက်တိုက် အမှတ်ပေးဖလားကို ဆုံးရှုံးခဲ့တာ ဖြစ်ပါတယ်။

အခုဆိုရင် ဂျူဗင်တပ်စ်အသင်းဟာ မကြာသေးခင်ကမှ ဥက္ကဋ္ဌ အက်ဂ်နယ်လီ၊ ဒုဥက္ကဋ္ဌ နတ်ဗတ်တို့ အပါအဝင် ဘုတ်အဖွဲ့ဝင်တွေ အားလုံး ရာထူးကနေ ထွက်ခွာခဲ့တာကြောင့် အီတလီကလပ်ရဲ့ ကွင်းပြင်ပ အရာတွေက ပိုပြီး လေးနက်လာခဲ့တာပါ။
ဂျူဗင်တပ်စ်အသင်း အနေနဲ့ ကိုဗစ်ကာလ အတွင်းက ဘဏ္ဍာရေး အခြေအနေတွေကြောင့် စုံစမ်းစစ်ဆေးမှုတွေကို ခံနေရတာ ဖြစ်ပါတယ်။

ဂျူဗင်တပ်စ်အသင်းနဲ့ အားကစားဒါရိုက်တာများကိုတွေ့ရစဉ် (Sports)

သူတို့တွေဟာ ၃ လစာ လုပ်ခလစာ လျှော့ချမယ်လို့ တရားဝင် ကြေညာခဲ့ပေမယ့် ကစားသမားတွေနဲ့ နည်းပြ ဆာရီတို့ကို လျှို့ဝှက်စာချုပ် ချုပ်ဆိုခဲ့တယ်ဆိုပြီး စွပ်စွဲခံနေရတာပါ။ ဂျူဗင်တပ်စ်အသင်းဟာ ၂၀၀၆ က ကယ်လ်ဆီယိုပိုလီ အရှုပ်တော်ပုံကြောင့် တန်းဆင်းခံရတဲ့ အဖြစ်အပျက် ရှိခဲ့တာ ဖြစ်ပါတယ်။

ဂျူဗင်တပ်စ်အသင်းဟာ ကိုဗစ်ကာလ ၂၀၁၉-၂၀ ရာသီက အမှတ်ပေး ချန်ပီယံဆုကို ရယူနိုင်ခဲ့ပေမယ့် ၂၀၀၆ တုန်းကလို အဖြစ်အပျက် ဖြစ်ခဲ့မယ်ဆိုရင် ဆုဖလားကို ပြန်လည် ရုပ်သိမ်းခံရနိုင်ပါတယ်။

အီတလီကလပ်ဟာ ဒီအရှုပ်တော်ပုံကြောင့် ၂၀၀၄-၀၅ နဲ့ ၂၀၀၅-၀၆ ရာသီတွေမှာ ဆုဖလားရုပ်သိမ်း ခံခဲ့ရပါတယ်။ ဂျူဗင်တပ်စ်အသင်းဟာ အမှတ်လျှော့ ပြစ်ဒဏ်နဲ့ စီးရီးဘီကို တန်းဆင်းခဲ့ရပေမယ့် ချန်ပီယံဆု ရယူကာ ၁ နှစ် အကြာမှာ စီးရီးအေကို တန်းပြန်တက် နိုင်ခဲ့တာပါ။

ကမ္ဘာ့ဖလားပြိုင်ပွဲကြောင့် ရပ်နားထားတဲ့ အခုနှစ်ရာသီ စီးရီးအေ ပြိုင်ပွဲမှာတော့ ဂျူဗင်တပ်စ်အသင်းဟာ ထိပ်ဆုံး နေရာက နာပိုလီအသင်းနဲ့ ၁၀ မှတ်အကွာ အမှတ်ပေး ဇယားအဆင့် ၃ နေရာမှာ ရပ်တည်နေတာ ဖြစ်ပါတယ်။

Source: Sportbible

CNI Sport News

၂၀၂၂ ခုနှစ်၊ ဒီဇင်ဘာ ၇

ဂန္တဝင်ကစားသမား ဒေးဗစ်ဘက်ခမ်းဟာ ဆီနီဂေါအသင်းနဲ့ ကစားမယ့် ၁၆ သင်းအဆင့် ပွဲစဉ်မတိုင်ခင် အင်္ဂလန်အသင်းရဲ့ လေ့ကျင့်ရေးစခန်းကို သွားရောက်ခဲ့တယ်လို့ သိရပါတယ်။

အသက် ၄၇ နှစ်အရွယ်ရှိ ဒေးဗစ်ဘက်ခမ်းဟာ ၁၉၉၆ ကနေ ၂၀၀၉ အထိ အင်္ဂလန်အတွက် ၁၁၅ ပွဲ ပါဝင် ကစားခဲ့ ပြီး ၁၇ ဂိုး သွင်းယူခဲ့တာပါ။

ဒေးဗစ်ဘက်ခမ်းဟာ လက်ရွေးစင်အသင်းနဲ့အတူ ၁၉၉၈ ကမ္ဘာ့ဖလား၊ ယူရို ၂၀၀၀၊ ၂၀၀၂ ကမ္ဘာ့ဖလား၊ ယူရို ၂၀၀၄ နဲ့ ၂၀၀၆ ကမ္ဘာ့ဖလားပြိုင်ပွဲတွေမှာ ပါဝင်ကစားခဲ့ပြီး ဘယ်လာရုစ်နဲ့ ၂၀၁၀ ကမ္ဘာ့ဖလား ခြေစစ်ပွဲမှာ နောက်ဆုံး ပါဝင်ခဲ့တာ ဖြစ်ပါတယ်။

ဒေးဗစ်ဘက်ခမ်းဟာ အင်္ဂလန်အသင်းရဲ့ အယ်လ်ဝါကရာ လေ့ကျင့်ရေး စခန်းကို သွားရောက်ခဲ့ပြီး နည်းပြ ဆောက်ဂိတ်က လက်ရွေးစင် အသင်းဖော်ဟောင်းကို သူ့ရဲ့ အထင်ကရ နံပါတ်ပါ ဂျာစီကို လက်ဆောင်ပေး ခဲ့ပါတယ်။

ဒေးဗစ်ဘက်ခမ်းဟာ မက်ဒီဆင်၊ ဝီလ်ဆင်၊ မက်ဂွဲယား၊ မေဆန်မောင့်၊ ဂရီလစ်ရှ်၊ ဟာရီကိန်း၊ ဆာကာတို့နဲ့ စကားပြောဆိုခဲ့ပြီး ဓါတ်ပုံ တွဲရိုက်ခဲ့ပါတယ်။

ဒေးဗစ်ဘက်ခမ်းနဲ့ ဟာရီကိန်းကိုတွေ့ရစဉ်

လက်ရှိ အင်္ဂလန်အသင်း ခေါင်းဆောင် ဟာရီကိန်းက ဒေးဗစ်ဘက်ခမ်း သူတို့ဆီ လာရောက်ခဲ့ပုံကို ပြန်ပြောင်း ပြောပြပါတယ်။

ဟာရီကိန်းက “ ဒေးဗစစ်ဘက်ခမ်း ရောက်ရှိလာချိန်မှာ ကျနော်တို့ ကောင်းမွန်စွာ စကားတွေပြောခဲ့ ကြပါတယ်။ ကျနော်ဟာ သူ့ကိုကြည့်ပြီး ကြီးပြင်း လာခဲ့ရတာပါ။ သူဟာ ကျနော်တို့ရဲ့ အကောင်းဆုံး အသင်းခေါင်းဆောင်တွေ ထဲက တစ်ဦးဖြစ်နိုင်ပါတယ်။ သူ့ရဲ့ အတွေ့အကြုံတွေ၊ ကျနော်တို့အသင်းနဲ့ ပတ်သက်ပြီး သူမြင်ရတာတွေနဲ့ ဘယ်လို ခံစားရလဲဆိုတာကို ပိုပြီး သိလာရပါတယ်။ သူက ကျနော်တို့ကစားပုံကို သဘောကျတယ်လို့ ပြောခဲ့ပြီး ဒီလို ကစားသမားဟောင်းတွေရဲ့ အားပေးမှုကိုရတာ အလွန်ကောင်းပါတယ်”လို့ ပြောခဲ့ပါတယ်။

ဒေးဗစ်ဘက်ခမ်းဟာ လက်ရှိ ကာတာမှာ ရှိနေပြီး ပေါင်သန်း ၁၅၀ နဲ့ ၂၀၂၂ ကမ္ဘာ့ဖလား မျက်နှာစာ အပါအဝင် နိုင်ငံရဲ့ သံတမန်အဖြစ် ၁၀ နှစ် စာချုပ် ချုပ်ဆိုထားတာကြောင့် ဝေဖန်မှုတွေ ခံနေရတာပါ။

အင်္ဂလန်အသင်းကတော့ လက်ရှိ ကမ္ဘာ့ဖလားပြိုင်ပွဲရဲ့ ၁၆ သင်းအဆင့်မှာ ဆီနီဂေါအသင်းကို ၃ ဂိုး- ဂိုးမရှိနဲ့ အနိုင် ရပြီး ကွာတားဖိုင်နယ်အဆင့်မှာ လက်ရှိချန်ပီယံ ပြင်သစ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ ဒီဇင်ဘာ ၇

စပိန်အသင်းနည်းပြ အင်းနရစ်က ကမ္ဘာ့ဖလားပြိုင်ပွဲ မတိုင်ခင် ကတည်းက ပင်နယ်တီ ၁,၀၀၀ လောက် ကန်သွင်း လေ့ကျင့်ထားပေမယ့် အဆုံးအဖြတ် ကန်သွင်းတဲ့အချိန်မှာ မလုံလောက်ခဲ့ဘူးလို့ ပြောခဲ့ပါတယ်။

အင်းနရစ်က “ အိမ်စာတွေ ပြီးဆုံးသွားပြီလို့ တွေးခဲ့မိပါတယ်။ လွန်ခဲ့တဲ့ ၁ နှစ်ကတည်းက စပိန်လေ့ကျင့်ရေး စခန်းမှာ အနည်းဆုံး ပင်နယ်တီ ၁,၀၀၀ လောက် ကန်သွင်းပြီး ကမ္ဘာ့ဖလားကို ရောက်လာဖို့ ပြောခဲ့ပါတယ်။ ပင်နယ်တီ လေ့ကျင့်ဖို့ ဒီကိုရောက်တဲ့အထိ စောင့်ရတာတောင် မလုံလောက်ခဲ့ဘူး”လို့ ပြောခဲ့တာပါ။

စပိန်အသင်းဟာ ၁၆ သင်းအဆင့် ပွဲစဉ်အဖြစ် မော်ရိုကိုအသင်းနဲ့ ကစားခဲ့တာမှာ ပင်နယ်တီ အဆုံးအဖြတ်နဲ့ အရေးနိမ့် သွားခဲ့တာ ဖြစ်ပါတယ်။

ပွဲချိန်အတွင်းရော၊ အချိန်ပိုမှာ ဂိုးမရှိသရေနဲ့ ပြီးဆုံးနေခဲ့လို့ ပင်နယ်တီ အဆုံးအဖြတ် ခံယူခဲ့ရတာပါ။ စပိန်အသင်း ဟာ ပင်နယ်တီ အများအပြား ကန်သွင်း လေ့ကျင့်ခဲ့တယ်လို့ နည်းပြက ပြောခဲ့ပေမယ့် အဆုံးအဖြတ် ကန်သွင်းတဲ့ အချိန်မှာ ဆိုလာ၊ ဆာရာဘီယာနဲ့ ဘတ်စ်ကွက်တို့ ၃ ဦးစလုံး ဂိုးမဝင်ခဲ့ပါဘူး။

အဲ့ဒါကြောင့် မော်ရိုကိုအသင်းက ၃ ဂိုး- ဂိုးမရှိနဲ့ အနိုင်ရပြီး ကွာတားဖိုင်နယ်ကို တက်သွားခဲ့ပါတယ်။

စပိန်အသင်းသားများနဲ့ နည်းပြ အင်းနရစ်ကိုတွေ့ရစဉ်

စပိန်အသင်း ကွင်းလယ်ကစားသမား ရိုဒရီက သူတို့အသင်း နောက်တဆင့်တက်ဖို့ ထိုက်တန်တယ်လို့ ပြောခဲ့ပါတယ်။

ရိုဒရီက “ အခုတော့ ကျနော်တို့ အိမ်ပြန်ရတော့မှာပါ။ ဒါဟာ တကယ်ကို ဆိုးရွားပါတယ်။ ကျနော့်အတွက်တော့ အဆိုးရွားဆုံး နေ့တနေ့ပါပဲ။ မော်ရိုကိုက ကျနော်တို့ မျှော်လင့်ထားသလိုပဲ နောက်တန်းမှာ ၁၁ ယောက်နဲ့ ကစားခဲ့ တာပါ။ ဒါပေမယ့် ဖြတ်ကျော်နိုင်မယ်လို့ မျှော်လင့်ခဲ့တာပါ။ ပင်နယ်တီဆိုတာ ထီထိုးရသလိုပါပဲ”လို့ ပြောခဲ့တာပါ။

စပိန်အသင်းဟာ ကမ္ဘာ့ဖလားပြိုင်ပွဲမှာ ပင်နယ်တီ ၄ ကြိမ်အထိ အရေးနိမ့်ခဲ့တဲ့ ပထမဆုံး နိုင်ငံအသင်းဖြစ်ခဲ့သလို ၂၀၀၆ က ယူကရိန်းနဲ့ ဆွစ်ဇာလန်ပွဲ နောက်ပိုင်း ပင်နယ်တီ အဆုံးအဖြတ်မှာ ၁ ဂိုးမှ မသွင်းယူနိုင်တဲ့ ဒုတိယ မြောက် အသင်း ဖြစ်ခဲ့ပါတယ်။

မော်ရိုကိုအသင်းကတော့ ကမ္ဘာ့ဖလား သမိုင်းတလျှောက် ပထမဆုံးအကြိမ် ကွာတားဖိုင်နယ်ကို တက်နိုင်ခဲ့တာ ဖြစ်ပါတယ်။

Source: Goal

CNI Sport News

၂၀၂၂ ခုနှစ်၊ ဒီဇင်ဘာ ၇

ပေါ်တူဂီအသင်းနည်းပြ ဖာနန်ဒိုဆန်းတို့စ်က ဆွစ်ဇာလန်အသင်းကို ၆ ဂိုး- ၁ ဂိုးနဲ့ အနိုင်ရခဲ့တဲ့ပွဲမှာ ရော်နယ်ဒိုကို ပွဲထွက်လူစာရင်းကနေ ချန်လှပ်တာက နည်းဗျူဟာကြောင့်လို့ ပြောလိုက်ပါတယ်။

ဖာနန်ဒိုဆန်းတို့စ်က “ ရော်နယ်ဒိုကို ပွဲထွက် လူစာရင်းကနေ ချန်တာနဲ့ ပတ်သက်ပြီး ကျနော်ရှင်းပြပြီးပါပြီ။ ထပ်ပြီး ရှင်းမပြနိုင်တော့ပါဘူး။ ကစားသမားတွေက မတူညီကြပါဘူး။ ဒါက ပွဲရဲ့ ဗျူဟာပါ။ ဒါလော့ဒ်နဲ့ ရာဖဲလ် တို့ကိုလည်း ကျနော် အသုံးပြုခဲ့တယ်။ ဒါပေမယ့် ကန်ဆယ်လိုဟာ တကယ်ကို ကောင်းမွန်တဲ့ ကစားသမားပါ။ ဆွစ်ဇာလန်နဲ့ပွဲအတွက် လိုအပ်မယ်ထင်လို့ ကျနော်ဒီလိုလုပ်ခဲ့တာပါ”လို့ ပွဲအပြီး သတင်းထောက်တွေနဲ့ တွေ့ဆုံ ချိန်မှာ ပြောခဲ့တာပါ။

ရော်နယ်ဒိုဟာ တောင်ကိုရီးယားနဲ့ပွဲမှာ လူစားလဲ ခံရတုန်းက ပြုမူခဲ့တဲ့ အပြုအမူကြောင့် ဆွစ်ဇာလန်နဲ့ပွဲကို အရန်ခုံကနေ စတင်ရတာလို့ သတင်းတွေ ထွက်ပေါ်ခဲ့ပေမယ့် နည်းပြက နည်းဗျူဟာ အရလို့ ဖြေရှင်းခဲ့တာ ဖြစ်ပါတယ်။

ဒီပွဲမှာ ရော်နယ်ဒို နေရာအစား အသုံးပြုခဲ့တဲ့ ဂွန်ကာလိုရာမို့စ်ဟာ ပေါ်တူဂီအတွက် ဟတ်ထရစ် ဂိုးသွင်းယူသွားခဲ့ တာပါ။ အဲ့ဒါကြောင့် ဂွန်ကာလိုရာမို့စ်ဟာ ၂၀၂၂ ကမ္ဘာ့ဖလားပြိုင်ပွဲမှာ ပထမဆုံး ဟတ်ထရစ် ဂိုးသွင်းယူသူအဖြစ် မှတ်တမ်း ဝင်ခဲ့ပါတယ်။

ရော်နယ်ဒိုကိုတွေ့ရစဉ် (Getty Images)

ဖာနန်ဒိုဆန်းတို့စ်က “ ကျနော်နဲ့ ရော်နယ်ဒိုကြားမှာ ပြဿနာမရှိပါဘူး။ သူဟာ ကျနော်တို့ရဲ့ အသင်းခေါင်းဆောင် ပါ။ သူနဲ့ ကျနော်ဟာ နှစ်ပေါင်းများစွာကြာ သူငယ်ချင်းတွေ ဖြစ်ခဲ့ကြပါတယ်။ ကစားသမားတွေလည်း ဆုံးဖြတ် ချက် ချကြပါတယ်။ ဒီလိုအရာတွေက ကျနော်တို့ကို မထိခိုက်ပါဘူး။ ကျနော် ဒါကို ရှင်းပြပြီးသားပါ။ လုံးဝလည်း ပြေလည်ပြီးသားပါ၊ သူက အသင်းခေါင်းဆောင် တစ်ဦးရဲ့ စံနမူနာကို ပြသခဲ့ပါတယ်”လို့ ပြောခဲ့တာပါ။

ဒီပွဲမှာ ပရိသတ်တွေ အများအပြားက ရော်နယ်ဒိုရဲ့ နာမည်ကို အော်ဟစ်ခဲ့ကြပြီး ဒုတိယပိုင်းမှာ လူစားလဲ အသုံးပြု ဖို့ နည်းပြကို တောင်းဆိုခဲ့ကြတာ ဖြစ်ပါတယ်။ အဲ့ဒါကြောင့် ရော်နယ်ဒိုဟာ ပွဲချိန် ၇၄ မိနစ် အရောက်မှာ ဂွန်ကာလိုရာမို့စ် နေရာ လူစားလဲ ဝင်ရောက်ကစားခဲ့တာပါ။

ပေါ်တူဂီအသင်းဟာ ကမ္ဘာ့ဖလားပြိုင်ပွဲ ကွာတားဖိုင်နယ်အဆင့်မှာ မော်ရိုကိုအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၂ ခုနှစ်၊ ဒီဇင်ဘာ ၆

နေမာဟာ ကမ္ဘာ့ဖလားအုပ်စုအဖွင့်ပွဲစဉ်မှာရခဲ့တဲ့ ခြေကျင်းဝတ်ဒဏ်ရာကြောင့် ဒီ ပြိုင်ပွဲမှာ ထပ်ပြီး ပါဝင်မကစား နိုင်တော့မှာကို ကြောက်ခဲ့မိတယ်လို့ ပြောလိုက်ပါတယ်။

နေမာက “မတူညီတဲ့အရာတွေ သန်းပေါင်းများစွာကို တွေးမိခဲ့ပြီး ဒီ ကမ္ဘာ့ဖလားပြိုင်ပွဲမှာ ထပ်ပြီးပါဝင်မကစား နိုင်မှာကို ကြောက်ခဲ့မိပါတယ်။ဒါပေမယ့် ကျနော့်ရဲ့အသင်းဖော်တွေ၊ မိသားစုတွေဆီက အားပေးမှုတွေကို ရရှိခဲ့ ပါတယ်။မတွေ့နိုင်တော့ဘူးလို့ထင်တဲ့ ခွန်အားတွေကိုလည်း ရှာဖွေဖို့ ကြိုးစားခဲ့ပါတယ်။ အားပေးစကားတွေကို ဖတ်လိုက်ရချိန်မှာတော့ ပြန်လည်ကောင်းမွန်လာဖို့အတွက် အထောက်အကူဖြစ်စေခဲ့ပါတယ်” လို့ ပြောခဲ့တာပါ။

နေမာဟာ ဆားဘီးယားနဲ့ပွဲမှာ ရခဲ့တဲ့ဒဏ်ရာကြောင့် ကမ္ဘာ့ဖလားပြိုင်ပွဲကြီးတခုလုံးကို လွဲချော်သွားနိုင်တဲ့အထိ စိုးရိမ်မှုတွေရှိခဲ့တာပါ။ပီအက်စ်ဂျီတိုက်စစ်မှူးဟာ နောက်ဆုံးအုပ်စု ၂ ပွဲမှာ မပါဝင်နိုင်ခဲ့ပေမယ့် တောင်ကိုရီးယား ကို အနိုင်ရခဲ့တဲ့ ၁၆ သင်းအဆင့်မှာ ပြန်လည်ပါဝင်နိုင်ခဲ့တာဖြစ်ပါတယ်။နေမာဟာ ဒီပွဲမှာ ဘရာဇီးလ်အတွက် ပင်နယ်တီကနေ သွင်းဂိုး ၁ ဂိုးသွင်းယူပေးခဲ့တာပါ။ဒီဂိုးကြောင့် နေမာဟာ ဘရာဇီးလ်ကစားသမားဘဝ သွင်းဂိုး ၇၆ ဂိုးအထိ ရှိလာခဲ့တာဖြစ်ပါတယ်။

အဲဒါကြောင့် နေမာဟာ ပီလီရဲ့ဘရာဇီးလ်သွင်းဂိုးအများဆုံးစံချိန်ကို ကျော်ဖြတ်နိုင်ဖို့ သွင်းဂိုး ၂ ဂိုးသာ လိုအပ် တော့တာပါ။နေမာက ပီလီနဲ့ပတ်သက်ပြီး “ကျနော်ကတော့ သူအမြန်ဆုံးကောင်းမွန်လာဖို့ ဆန္ဒပြုပါတယ်။ မကြာခင်မှာ သူပိုပြီး ကျန်းမာလာမယ်ဆိုတာ အသေအချာပါပဲ”လို့ ပြောခဲ့ပါတယ်။

အသက် ၃၀ အရွယ်ရှိ နေမာဟာ အခုကမ္ဘာ့ဖလားပြိုင်ပွဲမှာ ဘရာဇီးလ်လက်ရွေးစင်အသင်းနဲ့အတူ ဆုဖလား ကိုင် မြှောက်ခွင့်ရဖို့ မျှော်လင့်နေတာပါ။နေမာရဲ့ ဘရာဇီးလ်အသင်းဟာ ကွာတားဖိုင်နယ်မှာ ခရိုအေးရှားအသင်းနဲ့ ယှဉ်ပြိုင်ရမှာဖြစ်ပြီး ဒီပွဲကို ဒီဇင်ဘာလ ၉ ရက်မှာ ကျင်းပသွားမှာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ ဒီဇင်ဘာ ၆

တောင်ကိုရီးယားအသင်းဟာ ကမ္ဘာ့ဖလား ၁၆ သင်း အဆင့်ကနေ ထွက်ခွာရပြီးနောက် နည်းပြ ပေါ်လိုဘန်တိုဟာ ရာထူးကနေ နှုတ်ထွက်သွားခဲ့ပြီ ဖြစ်ပါတယ်။

ပေါ်လိုဘန်တိုက “ကျနော်တို့ အနာဂတ်အတွက် စဉ်းစားဖို့ လိုအပ်ပါတယ်။ ဒါက တောင်ကိုရီးယား လက်ရွေးစင် အသင်းနဲ့ ဖြစ်လာမှာ မဟုတ်ပါဘူး။ ကျနော် ကစားသမားတွေနဲ့ တောင်ကိုရီးယား ဘောလုံးအဖွဲ့ချုပ်ကို ကြေညာ ထားပါတယ်။ ဒီဆုံးဖြတ်ချက်ကို စက်တင်ဘာလကတည်းက ကျနော် ချမှတ်ထားတာပါ။ အခုအချိန်မှာတော့ အတည်ပြုခဲ့တာဖြစ်ပြီး သူတို့လုပ်ဆောင်ခဲ့တာတွေကို ကျေးဇူးတင်ပါတယ်။ ကျနော် အကောင်းဆုံးတွေ ပေးခဲ့ပြီး သူတို့ရဲ့ နည်းပြ ဖြစ်ခွင့်ရတဲ့အတွက် ကျေနပ်ပြီး ဂုဏ်ယူတယ်”လို့ ပြောပါတယ်။

တောင်ကိုရီးယားအသင်းဟာ ဘရာဇီးလ်အသင်းကို ၄ ဂိုး- ၁ ဂိုးနဲ့ အရေးနိမ့်ပြီးနောက် ကမ္ဘာ့ဖလားပြိုင်ပွဲရဲ့ ၁၆ သင်း အဆင့်ကနေ ထွက်ခွာခဲ့ရတာ ဖြစ်ပါတယ်။

အသက် ၅၃ နှစ်အရွယ်ရှိ ပေါ်တူဂီလူမျိုးနည်းပြဟာ ၂၀၁၈ ခုနှစ်၊ သြဂုတ်လမှာ တောင်ကိုရီးယားအသင်းရဲ့ နည်းပြ သစ်အဖြစ် ခန့်အပ်ခြင်း ခံခဲ့ရတာပါ။ ပေါ်လိုဘန်တိုဟာ တောင်ကိုရီးယားအသင်းကို ၂၀၁၀ နောက်ပိုင်း ပထမဆုံး အကြိမ် ကမ္ဘာ့ဖလား ၁၆ သင်း အဆင့် ရောက်ရှိနိုင်အောင် ကိုင်တွယ်ပေးခဲ့တာ ဖြစ်ပါတယ်။

တောင်ကိုရီးယား အသင်းကစားသမားများနဲ့ နည်းပြ ပေါ်လိုဘန်တိုကို တွေ့ရစဉ် (Sportstar)

ပေါ်လိုဘန်တို လက်ထက်မှာ တောင်ကိုရီးယားအသင်းဟာ ၂၀၁၉ အာရှဖလားပြိုင်ပွဲမှာ ကွာတားဖိုင်နယ်အထိ ရောက်ရှိခဲ့တာပါ။ ပေါ်လိုဘန်တိုဟာ တောင်ကိုရီးယားအသင်းကို ပွဲပေါင်း ၅၇ ပွဲ ကိုင်တွယ်ခဲ့တာမှာ ၃၅ ပွဲ အနိုင်ရပြီး ၁၃ ပွဲ သရေကျခဲ့ပါတယ်။

ဒီနောက် ၉ ပွဲ ရှုံးနိမ့်ခဲ့ပြီး အနိုင် ၆၁.၄၀ ရာခိုင်နှုန်းအထိ ရှိခဲ့တာ ဖြစ်ပါတယ်။

အသက် ၅၃ နှစ်အရွယ်ရှိ နည်းပြဟာ စပို့တင်းလစ္စဘွန်း၊ ပေါ်တူဂီ၊ ခရူဇီယိုနဲ့ အိုလံပီယာကို့စ် အသင်းတို့ကိုလည်း ကိုင်တွယ်ခဲ့တာပါ။

တောင်ကိုရီးယား အသင်းဟာ လာမယ့် ၂၀၂၃ အာရှဖလားပြိုင်ပွဲအတွက် လေ့ကျင့်ပြင်ဆင်မှု ပြုလုပ်ရမှာဖြစ်လို့ နည်းပြသစ်ကို မကြာခင်မှာ ခန့်အပ်သွားဖွယ်ရှိတယ်လို့ သိရပါတယ်။

Source: BBC