- By CNI
- Category: အားကစား
- Hits: 710
CNI Sport News
၂၀၂၂ ခုနှစ်၊ ဒီဇင်ဘာ ၂၀
အာဂျင်တီးနားအသင်းဟာ ဗျူနိုအေရိစ်မှာ ကမ္ဘာ့ဖလားအောင်ပွဲခံ အခမ်းအနားကျင်းပမှာ ဖြစ်တဲ့အတွက် အင်္ဂါနေ့(ဒီဇင်ဘာ ၂၀ ရက်)ကို နိုင်ငံတော်အားလပ်ရက်အဖြစ် ကြေညာလိုက်ပါတယ်။
အာဂျင်တီးနား ဘောလုံးအဖွဲ့ချုပ်က “ကမ္ဘာ့ချန်ပီယံအသင်းဟာ ပရိသတ်တွေနဲ့ အောင်ပွဲခံဖို့အတွက် အင်္ဂါနေ့ မွန်းတည့်ချိန်မှာ Obelisk ကို ထွက်ခွာမယ်”လို့ တွစ်တာမှာ ရေးထားပါတယ်။
ဒါ့အပြင် အာဂျင်တီးနား အစိုးရက အင်္ဂါနေ့ကို ဘဏ်အားလပ်ရက်အဖြစ် ကြေညာခဲ့တာကြောင့် တစ်တိုင်းပြည် လုံးဟာ နိုင်ငံအသင်းနဲ့အတူ အောင်ပွဲခံလို့ရမှာ ဖြစ်ပါတယ်။
အာဂျင်တီးနားအသင်းဟာ ၂၀၂၂ ကမ္ဘာ့ဖလား ဗိုလ်လုပွဲမှာ ပြင်သစ်အသင်းကို ပင်နယ်တီ အဆုံးအဖြတ်မှာ အနိုင်ရပြီး ၁၉၈၆ နောက်ပိုင်း ပထမဆုံးအကြိမ် ကမ္ဘာ့ဖလား ချန်ပီယံဆုကို ရယူနိုင်ခဲ့တာပါ။
အာဂျင်တီးနားအသင်းဟာ ဒီပွဲရဲ့ ပွဲချိန်အတွင်းမှာ ပြင်သစ်အသင်းနဲ့ ၂ ဂိုးစီသရေ၊ အချိန်ပိုမှာ ၃ ဂိုးစီ သရေကျခဲ့လို့ ပင်နယ်တီ အဆုံးအဖြတ် ခံယူခဲ့ရပြီး ၄ ဂိုး- ၂ ဂိုးနဲ့ အနိုင်ရကာ ကမ္ဘာ့ချန်ပီယံအဖြစ် အောင်ပွဲခံနိုင်ခဲ့တာ ဖြစ်ပါတယ်။
အာဂျင်တီးနားအသင်းဟာ နိုင်ငံပိုင် လေကြောင်းလိုင်းနဲ့ အင်္ဂါနေ့ အစောပိုင်းက နိုင်ငံအတွင်းကို ရောက်ရှိလာခဲ့ တာဖြစ်ပြီး လေဆိပ်အနီးရှိ အဖွဲ့ချုပ် လေ့ကျင့်ရေးစင်တာမှာ တညတာ အိပ်စက်ခဲ့တယ်လို့ ဒေသတွင်း မီဒီယာ တွေက ဖော်ပြခဲ့ပါတယ်။
မက်ဆီနဲ့ အသင်းဖော်များ ကမ္ဘာ့ဖလား ဆုရလို့ အောင်ပွဲခံနေကြစဉ်
အာဂျင်တီးနား ဘောလုံးအဖွဲ့ချုပ် အကြီးအကဲ ကလော်ဒီယိုတာပီယာက အာဂျင်တီးနားကို သူတို့ ရောက်လာ ခဲ့ပြီလို့ တွစ်တာမှာ ရေးသားခဲ့တာ ဖြစ်ပါတယ်။
အာဂျင်တီးနားအသင်း ကမ္ဘာ့ဖလား ချန်ပီယံဆုကို တတိယအကြိမ်မြောက် ရရှိနိုင်ခဲ့ပြီးနောက် အာဂျင်တီးနား ပြည်သူတွေဟာ လမ်းမပေါ်တွေမှာ အောင်ပွဲခံမှုတွေကို ပြုလုပ်နေတာဖြစ်ပြီး လက်ရွေးစင်အသင်းနဲ့ ဆက်လက် အောင်ပွဲခံဖို့ စိတ်အားထက်သန်နေကြတာပါ။
မက်ဆီက “ ပရိသတ်တွေအနေနဲ့ ကျနော်တို့ကို စောင့်ဆိုင်းစေချင်ပါတယ်။ အဲဒီကို သွားပြီးသူတို့နဲ့ အောင်ပွဲခံဖို့ မစောင့်ဆိုင်းနိုင်တော့ဘူး”လို့ ပြောခဲ့ပါတယ်။
မက်ဆီဟာ ကမ္ဘာ့ဖလားပြိုင်ပွဲမှာ အာဂျင်တီးနားအသင်းအတွက် ၇ ဂိုးသွင်းယူခဲ့ပြီး ပြိုင်ပွဲရဲ့ အကောင်းဆုံး ဘောလုံးသမားဆုကို ရယူနိုင်ခဲ့ပါတယ်။
Source: ESPN
- By CNI
- Category: အားကစား
- Hits: 1335
CNI Sport News
၂၀၂၂ ခုနှစ်၊ ဒီဇင်ဘာ ၁၉
ပြင်သစ်သမ္မတ မက်ခရွန်က ကမ္ဘာ့ဖလား ဗိုလ်လုပွဲအပြီးမှာ စိတ်ထိခိုက် ခံစားနေရတဲ့ တိုက်စစ်မှူး ဘတ်ပီကို သူဘာပြောခဲ့လဲဆိုတာကို ပြန်လည်ရင်ဖွင့် ပြောသွားခဲ့ပါတယ်။
မက်ခရွန်က “ ကိုင်လီယန်က ထူးချွန်တဲ့ ကစားသမား ဖြစ်ပေမယ့် သူဟာ ငယ်ရွယ်သေးတယ်ဆိုတာကို ကျနော် သတိရမိပါတယ်။ မင်းက အသက် ၂၄ နှစ်ပဲရှိသေးပြီး ကမ္ဘာ့ဖလားပြိုင်ပွဲရဲ့ ဂိုးသွင်းအများဆုံး ကစားသမားပါ။ အခု ဗိုလ်လုပွဲ မတိုင်ခင်က မင်းက ကမ္ဘာ့ဖလားကို ရခဲ့တယ်လို့ ကျနော်သူ့ကို ပြောခဲ့ပါတယ်။ ကျနော်လည်း သူ့လိုပဲ ဝမ်းနည်းပေမယ့် သူက ကျနော်တို့အားလုံးကို ဂုဏ်ယူစေခဲ့ပါတယ်”လို့ RMC ကို ပြောခဲ့တာပါ။
ဘတ်ပီဟာ အာဂျင်တီးနားနဲ့ ဗိုလ်လုပွဲမှာ ပြင်သစ်အတွက် ဟတ်ထရစ် ဂိုးသွင်းယူခဲ့ပေမယ့် အသင်းဟာ ပင်နယ်တီ အဆုံးအဖြတ်မှာ အရေးနိမ့်ပြီး ဒုတိယနဲ့ ကျေနပ်ခဲ့ရတာ ဖြစ်ပါတယ်။
ဒီအရှုံးကြောင့် ဘတ်ပီဟာ အလွန်စိတ်ပျက်နေပြီး ဒီပွဲကို တက်ရောက်ကြည့်ရှုခဲ့တဲ့ ပြင်သစ်သမ္မတ မက်ခရွန်က ပီအက်စ်ဂျီ တိုက်စစ်မှူးကို နှစ်သိမ့်မှုတွေ ပြုလုပ်ပေးခဲ့တာပါ။
ရွှေဖိနပ်ဆုရခဲ့တဲ့ ဘတ်ပီကိုတွေ့ရစဉ်
ဘတ်ပီဟာဆိုရင် ကာတာကမ္ဘာ့ဖလားမှာ ၈ ဂိုးအထိသွင်းပြီး ဂိုးသွင်း ရွှေဖိနပ်ဆုကို ရယူနိုင်ခဲ့တာ ဖြစ်ပါတယ်။
၂၀၁၈ တုန်းက ဘတ်ပီဟာ ပြင်သစ်အသင်းနဲ့အတူ ကမ္ဘာ့ဖလားချန်ပီယံဆုကို ရယူနိုင်ခဲ့ပြီး ၂ ကြိမ်ဆက် ရယူနိုင်ဖို့ မျှော်လင့်ခဲ့တာပါ။ ပြင်သစ်အသင်းကလည်း ၁၉၆၂ ခုနှစ်က ဘရာဇီးလ်နောက်ပိုင်း ကမ္ဘာ့ဖလား ချန်ပီယံဆုကို ၂ ကြိမ်ဆက်ရယူဖို့ ပစ်မှတ်ထားခဲ့ပေမယ့် ပင်နယ်တီ အဆုံးအဖြတ်မှာ အရေးနိမ့်ခဲ့တာ ဖြစ်ပါတယ်။
မက်ခရွန်က “ ပထမပိုင်းအပြီးမှာ ကျနော်တို့ အလွန်ဝေးကွာနေခဲ့ပြီး ဒီလိုမျိုး ပြန်လာနိုင်တာတွေလည်း ရှိပေမယ့် ဘောလုံးသမိုင်းမှာတော့ အလွန်ရှားပါတယ်။ ဒါပေမယ့် အံ့ဩလောက်အောင် ပြန်လာနိုင်ခဲ့ပါတယ်။ ဘတ်ပီနဲ့ တသင်းလုံး လုပ်ခဲ့တာတွေက ထူးထူးခြားခြားပါပဲ။ ဆာလောင်မှုကို ပြန်တွေ့ခဲ့ပြီး လုပ်နိုင်မယ်လို့ ယုံကြည်ခဲ့ ပါတယ်။ ဒါပေမယ့်လည်း အံ့ဖွယ်ကောင်းတဲ့ ဒုတိယပိုင်းလိုမျိုး ပြန်မလာနိုင်တော့ဘူး”လို့ ပြောခဲ့ပါတယ်။
Source: Metro
- By CNI
- Category: အားကစား
- Hits: 773
CNI Sport News
၂၀၂၂ ခုနှစ်၊ ဒီဇင်ဘာ ၁၉
အာဂျင်တီးနားအသင်း နည်းပြ စကာလိုနီက မက်ဆီအနေနဲ့ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားဖို့ ဆုံးဖြတ်ခဲ့ တယ်ဆိုရင် သူ့ရဲ့ ဂျာစီက အဆင်သင့် ဖြစ်နေမှာပဲလို့ ပြောလိုက်ပါတယ်။
စတာလိုနီက “ မက်ဆီအနေနဲ့ ကစားချင်တယ်လို့ ခံစားရရင်တော့ လာမယ့် ကမ္ဘာ့ဖလားပြိုင်ပွဲအတွက် ပြင်ဆင် ထားတဲ့ နံပါတ် ၁၀ ဂျာစီကို ဆက်ပြီး ထားသင့်တယ်လို့ ထင်ပါတယ်။ သူ့ရဲ့ ကစားသမားဘဝနဲ့ သူလုပ်ချင်တဲ့ အရာမှန်သမျှကို လုပ်ပိုင်ခွင့် ရထားပါတယ်။ အသင်းဖော်တွေအတွက် သူပို့ဆောင်ပေးတဲ့ အရာတွေကလည်း မယုံနိုင်စရာပါပဲ။ အဝတ်လဲခန်းထဲမှာ ဒီလောက် ဩဇာကြီးမားတဲ့သူကို ကျနော်တစ်ခါမှ မတွေ့ဖူးပါဘူး”လို့ ပြောခဲ့တာပါ။
မက်ဆီဟာ ဒီပြိုင်ပွဲကြီး မစတင်ကတည်းကရော ဗိုလ်လုပွဲ မကစားခင်ကရော အခုကမ္ဘာ့ဖလားဟာ သူ့ရဲ့ နောက်ဆုံး ကမ္ဘာ့ဖလား ဖြစ်တယ်လို့ ပြောထားတာ ဖြစ်ပါတယ်။
ကမ္ဘာ့ဖလားကို ကိုင်မြှောက်နေတဲ့ အာဂျင်တီးနားအသင်းကိုတွေ့ရစဉ်
ဒါပေမယ့် လက်ရွေးစင် အသင်းကနေ အနားမယူသေးတာကြောင့် ၂၀၂၆ ကမ္ဘာ့ဖလားပြိုင်ပွဲမှာ မက်ဆီ ပါဝင်နိုင်ဖို့ကို စကာလိုနီက မျှော်လင့်နေတာပါ။ အာဂျင်တီးနား အသင်းခေါင်းဆောင်ဟာ ကာတာကမ္ဘာ့ဖလားမှာ ရွှေဘောလုံးဆုကို ရယူနိုင်ခဲ့ပြီး သွင်းဂိုး ၇ ဂိုးအထိ ရယူနိုင်ခဲ့တာ ဖြစ်ပါတယ်။
စကာလိုနီက “ ကျနော်တို့ ကိုပါအမေရိကဖလားမှာ ဘရာဇီးလ်အသင်းကို အနိုင်ရပြီး မက်ဆီနဲ့ စကားပြောဆိုမှု တွေ ရှိခဲ့ပါတယ်။ ကျနော်တို့ ရှေ့မှာ ကြီးမားတဲ့ တာဝန်တစ်ခု ရှိလာခဲ့ပြီး နိုင်ငံက လူတွေကလည်း ကမ္ဘာ့ဖလား အခွင့်အရေးကို စတင်ပြီး ယုံကြည်လာခဲ့ပါတယ်။ ပြီးတော့ ဖိအားတွေက တိုးလာခဲ့တာပေါ့။ မက်ဆီကတော့ ကျနော်တို့ ဆက်သွားရမယ်၊ တခြားဘာမှ အရေးမကြီးဘူးလို့ ပြောခဲ့တယ်။ ဒါက ကျနော့်အတွက် ကြီးမားတဲ့ စိတ်ဓါတ်ခွန်အားကို ရခဲ့ပါတယ်။ ကျနော်တို့ ကြီးမားတဲ့ အရာတစ်ခုကို ရဖို့ နီးလာပြီဆိုတာကို သဘောပေါက် ခဲ့ပါတယ်”လို့ ကိုပါအမေရိကပွဲက အဖြစ်အပျက်ကို ပြောခဲ့တာပါ။
အာဂျင်တီးနားအသင်းဟာ ၂၀၂၁ က ကိုပါအမေရိကဖလားကို ရခဲ့ပြီး ၂၀၂၂ အစပိုင်းမှာ Finalissima ဆုဖလားကို ရရှိခဲ့ပါတယ်။ အခုအကြိမ်မှာတော့ နှစ်ပေါင်း ၃၆ နှစ်ကြာ ဝေးကွာနေခဲ့တဲ့ ကမ္ဘာ့ဖလားချန်ပီယံဆုကို ရယူ နိုင်ခဲ့တာ ဖြစ်ပါတယ်။
အာဂျင်တီးနားအသင်းဟာ ကမ္ဘာ့ဖလားချန်ပီယံဆုကို ၃ ကြိမ်မြောက် ရယူနိုင်ခဲ့တာ ဖြစ်ပါတယ်။
Source: CNA
- By CNI
- Category: အားကစား
- Hits: 1224
CNI Sport News
၂၀၂၂ ခုနှစ်၊ ဒီဇင်ဘာ ၁၉
ပြင်သစ်အသင်းဟာ ကမ္ဘာ့ဖလားဗိုလ်လုပွဲမှာ အာဂျင်တီးနားအသင်းကို အရေးနိမ့်ပြီး ကမ္ဘာ့ဖလား ချန်ပီယံဆုကို မကာကွယ်နိုင်ခဲ့ပေမယ့် အသင်းကို အလွန်ဂုဏ်ယူတယ်လို့ နောက်ခံလူ ဗာရန်းက ပြောပါတယ်။
ဗာရန်းက “ ကျနော်တို့ အရာအားလုံး ပေးခဲ့ပေမယ့် စိတ်ပျက်ခဲ့ရပါတယ်။ ပြိုင်ပွဲမှာ အတားအဆီးတွေ အများကြီး နဲ့ ရင်ဆိုင်ခဲ့ရပေမယ့် ကျနော်တို့ ဘာကိုမှ အရှုံးမပေးခဲ့ပါဘူး။ ကျနော်တို့ဟာ ဒီပွဲမှာ ၁ နာရီလောက်ကြာအောင် ပွဲမကစားနိုင်ခဲ့ပါဘူး။ ကျနော်တို့လည်း အနိုင်ရဖို့ ရှိခဲ့ပြီး ဒီအသင်းနဲ့အတူ ပြင်သစ်ဖြစ်ရတာကို အလွန် ဂုဏ်ယူပါ တယ်။ ကျနော်တို့ ဦးခေါင်းကို ဆက်ပြီးမော့နေဦးမှာပါ”လို့ ပြောပါတယ်။
ပြင်သစ်အသင်းဟာ ဒီပွဲမှာ မိနစ် ၈၀ အထိ ၂ ဂိုး- ဂိုးမရှိနဲ့ အရေးနိမ့်နေခဲ့ပေမယ့် ဘတ်ပီရဲ့ ချေပဂိုး ၂ ကြောင့် အချိန်ပိုအထိ သွားခဲ့ရပြီး အချိန်ပိုမှာလည်း ထပ်မံ ဦးဆောင်ခြင်း ခံခဲ့ရတာ ဖြစ်ပါတယ်။
ဒါပေမယ့် ဘတ်ပီက ဟတ်ထရစ်ဂိုးအဖြစ် ချေပဂိုး ထပ်သွင်းခဲ့လို့ ပင်နယ်တီ အဆုံးအဖြတ် ခံယူခဲ့တာမှာ ၄ ဂိုး- ၂ ဂိုးနဲ့ အာဂျင်တီးနားအသင်းက အနိုင်ရပြီး ချန်ပီယံဆုကို ရယူနိုင်ခဲ့တာပါ။
ပြင်သစ်ကစားသမား ဗာရန်းကိုတွေ့ရစဉ်
ပြင်သစ်အသင်းဟာ ၂၀၁၈ ပြိုင်ပွဲတုန်းက ချန်ပီယံဆုကို ရခဲ့တာကြောင့် အခုပြိုင်ပွဲမှာ ချန်ပီယံဆုကို ဆက်လက် ထိန်းသိမ်းနိုင်ဖို့ မျှော်လင့်ခဲ့ပေမယ့် မျှော်လင့်ချက် ပျက်ပြယ်သွားခဲ့ရတာ ဖြစ်ပါတယ်။
ကမ္ဘာ့ဖလား ချန်ပီယံဆုကို ၂ ကြိမ်ဆက် နောက်ဆုံး ရယူခဲ့တဲ့အသင်းက ၁၉၆၂ က ဘရာဇီးလ်ဖြစ်ပြီး အဲ့ဒီ နောက်ပိုင်း ဘယ်အသင်းကမှ ဒီလိုမျိုး မရယူနိုင်တော့တာပါ။
ဗာရန်းက “ ကျနော်တို့ဟာ ဒီပွဲမှာ တွန်းအားပေးနိုင်ခဲ့ပြီး အဆုံးထိကို ယုံကြည်ခဲ့ပါတယ်။ ကျနော်တို့ ဆိုးရွားစွာ စတင်ခဲ့ပေမယ့် ပွဲကို ပြန်ပြောင်း နိုင်ခဲ့ပါတယ်။ ဒီပွဲမှာ စိတ်ပိုင်းဆိုင်ရာ ခွန်အားတွေနဲ့ နှလုံသားတွေ အများကြီး ရှိခဲ့ပြီး ဒါကြောင့်လည်း ပြန်လာနိုင်ခဲ့တာပါ။ ကျနော်တို့ စိတ်ပျက်ခဲ့ပေမယ့် ဂုဏ်ယူမိပါတယ်”လို့ ပြောခဲ့တာ ဖြစ်ပါတယ်။
ဘတ်ပီဟာ ဒီပွဲမှာ ဂိုးသွင်း အများဆုံးဆုဖြစ်တဲ့ ရွှေဖိနပ်ဆုကို ရခဲ့ပေမယ့် အသင်း အရေးနိမ့်ခဲ့တာကြောင့် ဆုရယူတာမှာ အလွန်စိတ်ပျက် နေခဲ့တာလည်း ဖြစ်ပါတယ်။
Source: Goal
- By CNI
- Category: အားကစား
- Hits: 848
CNI Sport News
၂၀၂၂ ခုနှစ်၊ ဒီဇင်ဘာ ၁၉
အာဂျင်တီးနားအသင်းခေါင်းဆောင် မက်ဆီက ကမ္ဘာ့ဖလားချန်ပီယံဆုဟာ သူ့ရဲ့ဘ၀မှာ အလိုချင်ဆုံးဆုဖလား ဖြစ်တယ်လို့ ပြောလိုက်ပါတယ်။
မက်ဆီက “ကမ္ဘာ့ဖလားချန်ပီယံဖြစ်ခွင့်ရတာ တကယ်ကိုရူးသွပ်စရာပါပဲ။ဒါကို အရမ်းလိုချင်ခဲ့တာပါ။ ဒီ ဆုဖလား ကို ဘုရားသခင်က ကျနော့်ကိုပေးမယ်ဆိုတာ သိပါတယ်။ဒီလိုဖြစ်လိမ့်မယ်လို့လည်း ခံစားမိခဲ့ပါတယ်။အခုတော့ ခံစားခွင့်ရခဲ့ပြီး ဒီဆုဖလားကို ကြည့်ရတာ တကယ်ကိုလှပပါတယ်။ကမ္ဘာ့ဖလားက ကျနော်ဘ၀မှာ အလိုချင်ဆုံးဆု ဖလားပါ။ကလေးဘ၀ကတည်းက အိမ်မက်ပါ” လို့ ပြောခဲ့တာပါ။
အာဂျင်တီးနားအသင်းဟာ ၂၀၂၂ ကမ္ဘာ့ဖလားဗိုလ်လုပွဲမှာ ပြင်သစ်အသင်းနဲ့ ပွဲချိန်အတွင်း ၂ ဂိုးစီသရေ၊ အချိန်ပိုမှာ ၃ ဂိုးစီသရေကျခဲ့လို့ ပင်နယ်တီအဆုံးအဖြတ် ခံယူခဲ့ရတာဖြစ်ပါတယ်။ပင်နယ်တီအဆုံးအဖြတ်မှာ ၄ ဂိုး- ၂ ဂိုးနဲ့ အနိုင်ရပြီး ၁၉၈၆ နောက်ပိုင်း ပထမဆုံးအကြိမ် ကမ္ဘာ့ဖလားချန်ပီယံဆုကို ရယူနိုင်ခဲ့တာပါ။ အာဂျင်တီးနား အတွက်တော့ တတိယအကြိမ်မြောက် ကမ္ဘာ့ဖလားချန်ပီယံဆုကို ရယူနိုင်ခဲ့တာဖြစ်ပါတယ်။
မက်ဆီဟာ ဗိုလ်လုပွဲမှာ ၂ ဂိုးသွင်းပြီး ဒီပြိုင်ပွဲမှာ သွင်းဂိုး ၇ ဂိုးအထိရှိခဲ့ကာ ပြိုင်ပွဲတလျှောက်ပြသခဲ့တဲ့ ခြေစွမ်း တွေကြောင့် ရွှေဘောလုံးဆုကို ရယူနိုင်ခဲ့တာပါ။မက်ဆီဟာ ကမ္ဘာ့ဖလားပြိုင်ပွဲမှာ ရွှေဘောလုံးဆုကို ၂ ကြိမ်ရတဲ့ ပထမဆုံးကစားသမားအဖြစ်လည်း မှတ်တမ်းဝင်ခဲ့ပါတယ်။ဒီဗိုလ်လုပွဲဟာ သူ့ရဲ့ နောက်ဆုံးကမ္ဘာ့ဖလားပွဲ ဖြစ်တယ်လို့ ပြောထားပေမယ့် လက်ရွေးစင်အသင်းကနေ အနားယူမှာမဟုတ်သေးဘူးလို့ မက်ဆီက ပြောခဲ့ပါတယ်။
မက်ဆီက “ကျနော် အာဂျင်တီးနားလက်ရွေးစင်အသင်းကနေ အနားယူမှာ မဟုတ်သေးပါဘူး။ ချန်ပီယံတယောက် အနေနဲ့ ဆက်ပြီးကစားချင်သေးတယ်” လို့ TyC Sports ကို ပြောခဲ့တာပါ။
ကမ္ဘာ့ဖလားပြိုင်ပွဲရဲ့ ဂိုးသွင်းအများဆုံးဆုကို ပြင်သစ်တိုက်စစ်မှူး ဘတ်ပီက ၈ ဂိုးနဲ့ ရရှိခဲ့ပြီး၊ ရွှေလက်အိတ်ဆုကို အာဂျင်တီးနားဂိုးသမား မာတီးနတ်စ်က ရရှိခဲ့ကာ အကောင်းဆုံးလူငယ်ကစားသမားဆုကို အာဂျင်တီးနားအသင်း က အန်ဇိုဖာနန်ဒက်စ်က ရရှိခဲ့တာဖြစ်ပါတယ်။
Source:Goal
- By CNI News
- Category: အားကစား
- Hits: 1043
CNI Sport News
၂၀၂၂ ခုနှစ်၊ ဒီဇင်ဘာ ၁၉
၂၀၂၂ ကမ္ဘာ့ဖလား ဗိုလ်လုပွဲအဖြစ် အာဂျင်တီးနားနဲ့ ပြင်သစ်တို့ ကစားခဲ့တာမှာ ပင်နယ်တီ အဆုံးအဖြတ်မှာ မက်ဆီရဲ့ အာဂျင်တီးနား အသင်းက အနိုင်ရပြီး ချန်ပီယံဆုကို ရယူနိုင်ခဲ့ပြီ ဖြစ်ပါတယ်။
ပထမပိုင်းမှာ အာဂျင်တီးနားအသင်းက ပြတ်ပြတ်သားသား အသာစီးရခဲ့ပြီး ပြင်သစ်အသင်းက ဂိုးပေါက်တောင် ကန်သွင်းခွင့် မရခဲ့တာ ဖြစ်ပါတယ်။ ပထမပိုင်း ၂၃ မိနစ်မှာ မက်ဆီက ပင်နယ်တီကနေ ဦးဆောင်ဂိုး စသွင်း ယူခဲ့ ပါတယ်။
အာဂျင်တီးနားအတွက် ဒုတိယဂိုးကို ဒီမာရီယာက မက်အက်လစ္စတာရဲ့ ဖန်တီးမှုကနေ သွင်းယူသွားခဲ့တာပါ။ အဲ့ဒါကြောင့် ပထမပိုင်းအပြီးမှာ အာဂျင်တီးနားအသင်းက ၂ ဂိုး- ဂိုးမရှိနဲ့ ဦးဆောင်နေတာ ဖြစ်ပါတယ်။
ဒုတိယပိုင်းမှာ အာဂျင်တီးနားက အနည်းငယ် ထိန်းကစားခဲ့ပြီး ပြင်သစ်က ချေပဂိုးရဖို့ အားထည့်လာခဲ့တာကြောင့် ချေပဂိုး ၂ ဂိုး ဆက်တိုက် ရရှိသွားခဲ့တာပါ။ ပွဲချိန် ၈၀ နဲ့ ၈၁ မိနစ်မှာ ဘတ်ပီက သွင်းယူခဲ့တာ ဖြစ်ပါတယ်။ အဲ့ဒါကြောင့် ၂ ဂိုးစီ သရေကျပြီး အချိန်ပို ဆက်သွားခဲ့ရပါတယ်။
အချိန်ပိုမှာ ၂ သင်းစလုံးဟာ အကောင်းဆုံး ကစားရင်းနဲ့ ပထမပိုင်းက ဂိုးမသွင်းနိုင်ခဲ့တာ ဖြစ်ပါတယ်။ အချိန်ပို ဒုတိယပိုင်းမှာ မက်ဆီက အာဂျင်တီးနားအတွက် ဦးဆောင်ဂိုး သွင်းယူခဲ့ပါတယ်။ အဲ့ဒီနောက်ပိုင်းမှာ ပြင်သစ်က ပင်နယ်တီရခဲ့ပြီး ဘတ်ပီက ချေပဂိုးအဖြစ် ထပ်မံသွင်းယူခဲ့တာပါ။
တဖက် ၃ ဂိုးစီသရေနဲ့ ပင်နယ်တီ အဆုံးအဖြတ် ဆက်ကန်သွင်းရပြီ ဖြစ်ပါတယ်။ ပင်နယ်တီမှာ အာဂျင်တီးနားက ၄ ဂိုး- ၂ ဂိုးနဲ့ အနိုင်ရပြီး ချန်ပီယံဆုကို ရယူနိုင်ခဲ့ပြီ ဖြစ်ပါတယ်။
- By CNI
- Category: အားကစား
- Hits: 745
CNI Sport News
၂၀၂၂ ခုနှစ်၊ ဒီဇင်ဘာ ၁၇
၂၀၂၂ ကမ္ဘာ့ဖလား ဗိုလ်လုပွဲမှာ ယူကရိန်းသမ္မတ ဇာလန်းစကီးက ပရိသတ်ထံ မက်ဆေ့ချ်ပေးမှာကို ဖီဖာက ပိတ်ပင်လိုက်ပါတယ်။
ဖီဖာဥက္ကဋ္ဌ အင်ဖန်တီနိုက ဘောလုံးကွင်းဟာ ဆန္ဒပြတဲ့သူတွေအတွက် နေရာ မဖြစ်စေရဘူးလို့ ပြောထားတာပါ။
ဇာလန်းစကီးဟာ ဗိုလ်လုပွဲ ကျင်းပမယ့် လူဆေးလ် အားကစားကွင်းအတွင်းရှိ ပရိသတ်တွေကို ဗွီဒီယိုလင့်ခ် ကနေ တဆင့် ကမ္ဘာ့ငြိမ်းချမ်းရေးနဲ့ ပတ်သက်တဲ့ သတင်းစကားကို မျှဝေချင်နေတာလို့ သိရပါတယ်။
ဒီလိုချဉ်းကပ်မှုဟာ ငြင်းဆန်ခံရပြီးနောက် ယူကရိန်းအစိုးရ အဖွဲ့ဝင်တစ်ဦးက “ ဖီဖာဟာ သူ့ရဲ့ ပလက်ဖောင်းကို ပိုပြီးကောင်းမွန်တဲ့ နေရာမှာ အသုံးပြုမယ်လို့ ထင်ခဲ့ကြောင်း”ပြောခဲ့တာပါ။
အင်္ဂလန်အသင်း ခေါင်းဆောင် ဟာရီကိန်းကိုတွေ့ရစဉ်(Sky Sports)
အင်ဖန်တီနိုဟာ အင်္ဂလန်၊ ဝေးလ်စ်နဲ့ ဥရောပ ၆ သင်းတို့ကို One Love စာသားပါဝင်တဲ့ လက်ပတ် ဝတ်ဆင်တာနဲ့ ပတ်သက်ပြီး သူ့ရဲ့ ဆန္ဒကို လူသိရှင်ကြား ထုတ်ဖော်ပြောခဲ့ပြီးနောက် ဒီဆုံးဖြတ်ချက်စာတွေ မကြာခင်မှာ ထွက် ပေါ် လာခဲ့တာ ဖြစ်ပါတယ်။
အသင်းခေါင်းဆောင်တွေ အနေနဲ့ ဖီဖာရဲ့ ဆုံးဖြတ်ချက်ကို ဆန့်ကျင်ပြီး အဆိုပါ လက်ပတ်ကို ဝတ်ဆင်မယ်ဆိုရင် အဝါကတ် ပြသခံရမှာဖြစ်သလို ကြီးမားတဲ့ အရေးယူမှုတွေနဲ့ ရင်ဆိုင်ရနိုင်တယ်လို့ ပြောခဲ့တာပါ။
ကျင်းပနေတဲ့ ကမ္ဘာ့ဖလားပြိုင်ပွဲမှာ ဂျာမနီ ကစားသမားတွေဟာ ပါးစပ်ကို သူတို့ရဲ့လက်နဲ့ အုပ်ထားပြီး ဆန္ဒပြမှု လောက်သာ ရှိခဲ့ပြီး ကွင်းအတွင်း ကြီးကြီးမားမား ဆန္ဒပြမှုတွေ မရှိခဲ့တာ ဖြစ်ပါတယ်။
ကာတာကမ္ဘာ့ဖလားဟာ ပြိုင်ပွဲ မစတင်ခင်မှာ ကြီးကြီးမားမား ဝေဖန်မှုတွေနဲ့ ရင်ဆိုင်ခဲ့ရပေမယ့် အခုအချိန်မှာ တော့ ပြိုင်ပွဲကြီးကို အဆုံးသတ် နိုင်တော့မှာပါ။ အင်ဖန်တီနိုဟာ ကာတာ ၂၀၂၂ ကို အကောင်းဆုံး ကမ္ဘာ့ဖလား အဖြစ် ချီးကျူးထားတာ ဖြစ်ပါတယ်။
တနင်္ဂနွေနေ့မှာတော့ ကာတာကမ္ဘာ့ဖလား နောက်ဆုံး ပွဲစဉ်ဖြစ်တဲ့ ဗိုလ်လုပွဲအဖြစ် အာဂျင်တီးနားနဲ့ လက်ရှိ ချန်ပီယံ ပြင်သစ်အသင်းတို့ ယှဉ်ပြိုင်ကြမှာ ဖြစ်ပါတယ်။
Source: The Sun
- By CNI
- Category: အားကစား
- Hits: 970
CNI Sport News
၂၀၂၂ ခုနှစ်၊ ဒီဇင်ဘာ ၁၇
ပီအက်စ်ဂျီ အသင်းဖော်ဟောင်း ဒီရယ်လ်လိုက ဘတ်ပီအတွက်တော့ ရော်နယ်ဒိုဟာ ထိလို့မရတဲ့သူလို့ ပြောလိုက် ပါတယ်။
ဒီရယ်လ်လိုက “ ရော်နယ်ဒိုဟာ ဘတ်ပီအတွက်တော့ အရာအားလုံးပါပဲ။ ရော်နယ်ဒိုကို မက်ဆီနဲ့ ယှဉ်ပြီး ပြောမယ်ဆိုရင် သူက ခင်ဗျားနဲ့ အနည်းဆုံး ၁ နာရီလောက်ကြာအောင် စကားစစ်ထိုး နေပါလိမ့်မယ်။ သူ့ အတွက်တော့ ရော်နယ်ဒိုဟာ ထိလို့မရတဲ့သူပါ”လို့ Mail ကို ပြောခဲ့တာပါ။
ဒီရယ်လ်လိုဟာ ဘတ်ပီနဲ့ ပီအက်စ်ဂျီအသင်းမှာ ၃ ရာသီကြာ တွဲကစားခဲ့ပြီး နွေရာသီက လိုက်ပ်ဇစ်အသင်းထံ အငှားချခံခဲ့ရတာ ဖြစ်ပါတယ်။
ဘတ်ပီဟာ ရော်နယ်ဒိုကို သူ့ရဲ့ အိုင်ဒေါလ်အဖြစ် သတ်မှတ်ထားတာဖြစ်ပြီး သူ့ရဲ့ ကစားပုံကို ကြည့်ပြီး ကြီးပြင်း လာခဲ့တာပါ။ လက်ရှိ အချိန်မှာတော့ ဘတ်ပီဟာ ရော်နယ်ဒိုရဲ့ ပြိုင်ဘက်ဖြစ်တဲ့ မက်ဆီနဲ့ ပီအက်စ်ဂျီအသင်းမှာ အတူတွဲဖက် ကစားနေကြတာ ဖြစ်ပါတယ်။
ဘတ်ပီနဲ့ ရော်နယ်ဒိုကိုတွေ့ရစဉ်
မက်ဆီကတော့ ကမ္ဘာ့ဖလားချန်ပီယံဆုကို ရယူနိုင်မယ့် နောက်ဆုံး မျှော်လင့်ချက် ပွဲစဉ်အဖြစ် ပြင်သစ်အသင်းနဲ့ ဗိုလ်လုပွဲ ကစားရမှာဖြစ်ပြီး ပေါ်တူဂီကတော့ ကွာတားဖိုင်နယ်မှာ မော်ရိုကိုကို အရေးနိမ့်ခဲ့လို့ ရော်နယ်ဒိုရဲ့ အိပ်မက်တွေ အဆုံးသတ် သွားခဲ့ရပါတယ်။
ဘတ်ပီနဲ့ မက်ဆီဟာ ကမ္ဘာ့ဖလားဗိုလ်လုပွဲမှာ ထိပ်တိုက် တွေ့ဆုံကြမှာဖြစ်ပြီး သူတို့ ၂ ဦးဟာ ချန်ပီယံဆုအပြင် ဂိုးသွင်း ရွှေဖိနပ်ဆု၊ ရွှေဘောလုံးဆု စတာတွေကိုလည်း ယှဉ်ပြိုင်ကြရမှာ ဖြစ်ပါတယ်။
လက်ရှိအချိန်မှာ ဘတ်ပီနဲ့ မက်ဆီဟာ ၅ ဂိုးစီ သွင်းယူထားပြီး ဂိုးသွင်း ရွှေဖိနပ်ဆုအတွက် အပြိုင်ဖြစ်နေတာပါ။
ပြင်သစ်အသင်းဟာ ဒီပြိုင်ပွဲရဲ့ လက်ရှိ ချန်ပီယံဖြစ်ပြီး ချန်ပီယံဆုကို ၂ ကြိမ်ဆက် ရယူနိုင်ဖို့ မျှော်လင့်နေတာ ဖြစ်ပါတယ်။ ပြင်သစ်နဲ့ အာဂျင်တီးနားအသင်းတို့ဟာ ကမ္ဘာ့ဖလားပြိုင်ပွဲမှာ ချန်ပီယံဆုကို ၂ ကြိမ်စီ ရရှိထားပြီး အခု တစ်ကြိမ်ရတဲ့ အသင်းဟာ ၃ ကြိမ်မြောက်အဖြစ် အောင်ပွဲခံနိုင်မှာ ဖြစ်ပါတယ်။
Source: Goal
- By CNI
- Category: အားကစား
- Hits: 699
CNI Sport News
၂၀၂၂ ခုနှစ်၊ ဒီဇင်ဘာ ၁၇
ပြင်သစ်ကြယ်ပွင့် ဒမ်ဘီလီက လက်ရှိမျိုးဆက်ဟာ လွန်ခဲ့တဲ့ ၄ နှစ်က ကမ္ဘာ့ဖလားချန်ပီယံဖြစ်ခဲ့တဲ့အသင်းထက် ပိုပြီးကောင်းတယ်လို့ ပြောလိုက်ပါတယ်။
ဒမ်ဘီလီက “ကျနော်တို့ တူညီနိုင်တာတွေလည်း ရှိပေမယ့် အခုအချိန်မှာတော့ ကောင်းမွန်တဲ့ပုံစံတခုရှိနေတာ မို့လို့ တကယ်ကို နှိုင်းယှဉ်လို့မရပါဘူး။၂၀၁၈ ကတော့ နှစ်ပေါင်း ၂၀ အတွင်း ပထမဆုံးအကြိမ်ဖြစ်တာကြောင့် တူညီတဲ့အရာမဟုတ်ပါဘူး။ဒီအသင်းက ၂၀၁၈ က အသင်းနဲ့ အနည်းငယ်ပိုပြီးဖွဲ့စည်းထားပါတယ်။ အာဂျင်တီးနား ကို အနိုင်ရဖို့ဆိုတာ လွယ်မှာမဟုတ်ပေမယ့် ကျနော်တို့အကောင်းဆုံးပြင်ဆင်ပြီး တိုက်ပွဲဝင်ဖို့အတွက် စိတ်ဓါတ် ပိုင်းကိုလည်း အဆင်သင့်ဖြစ်နေအောင်ပြင်ဆင်မှာပါ” လို့ ပြောခဲ့တာပါ။
ပြင်သစ်အသင်းဟာ ဒီပြိုင်ပွဲမှာ အဓိကကစားသမားတွေဖြစ်တဲ့ ဘန်ဇီမာ၊ ကန်တီနဲ့ ပေါ့ဘာတို့ မပါဝင်နိုင်ခဲ့ပေမယ့် လက်ရှိချန်ပီယံဆုကို ဆက်ထိန်းသိမ်းဖို့အတွက် ဗိုလ်လုပွဲကို ရောက်ရှိလာခဲ့တာဖြစ်ပါတယ်။ဒမ်ဘီလီဟာ ၂၀၁၈ က ချန်ပီယံဖြစ်ခဲ့တဲ့အသင်းမှာ ပါဝင်ခဲ့ပေမယ့် ဗိုလ်လုပွဲမှာ မပါဝင်ခဲ့ရတာပါ။ ဘာစီလိုနာတိုက်စစ်မှူးဟာ လက်ရှိ အချိန်မှာ ပြင်သစ်အသင်းရဲ့ ပွဲထွက်ခွင့်တနေရာကို ရယူထားပြီး ခြေစွမ်းပြသနေတာဖြစ်ပါတယ်။
ဒမ်ဘီလီဟာ ဘာစီလိုနာအသင်းမှာ တွဲကစားခဲ့ဖူးတဲ့ မက်ဆီနဲ့ ကမ္ဘာ့ဖလားဗိုလ်လုပွဲမှာ ပြိုင်ဘက်အဖြစ် ရင်ဆိုင်ရမှာပါ။ဒမ်ဘီလီက မက်ဆီကို လေးစားပေမယ့် ကမ္ဘာ့ဖလားကိုတော့ ပြင်သစ်အတွက် အရယူသွားမယ်လို့ ပြောခဲ့တာဖြစ်ပါတယ်။
ဒမ်ဘီလီက “မက်ဆီနဲ့ ကောင်းမွန်တဲ့အချိန်တွေရှိခဲ့ပြီး သူနဲ့တွဲကစားခွင့်ရဖို့ အိပ်မက်ဆိုတာ ကျနော်အမြဲတမ်း ပြောခဲ့ပါတယ်။သူနဲ့အတူ ၄ နှစ်ကြာအောင် တွဲခဲ့ရလို့ ပျော်ရွှင်ပါတယ်။သူနဲ့ပြိုင်ဘက်အဖြစ် ကစားရတာက ခက်ခဲပေမယ့် အကောင်းဆုံးလုပ်ဆောင်သွားမှာပါ။ကမ္ဘာ့ဖလားကို လူတိုင်းလိုချင်ပြီး မက်ဆီကတော့ အခုထိ မရသေးပါဘူး။အခု ကျနော်တို့နိုင်ငံကို ကိုယ်စားပြုပြီး လာရောက်ခဲ့တာကြောင့် ပြင်သစ်ကပဲ အနိုင်ရဖို့ မျှော်လင့်တယ်” လို့ ပြောခဲ့တာပါ။
ပြင်သစ်ကစားသမားအများစုဟာ အအေးမိနေကြပြီး ဗာရန်းနဲ့ ကိုနာတီတို့ဟာ နောက်ဆုံးဖျားနာတဲ့သူတွေ ဖြစ်ကြကာ လေ့ကျင့်ရေးအစီအစဉ်မှာ မပါဝင်နိုင်ခဲ့ဘူးလို့ ပြင်သစ်ဘောလုံးအဖွဲ့ချုပ်က အတည်ပြုထားတာ ဖြစ်ပါတယ်။
Source:Mirror
- By CNI
- Category: အားကစား
- Hits: 841
CNI Sport News
၂၀၂၂ ခုနှစ်၊ ဒီဇင်ဘာ ၁၇
ဖီဖာဥက္ကဋ္ဌ အင်ဖန်တီနိုက အခု ကျင်းပနေတဲ့ ကာတာ ၂၀၂၂ ကို အကောင်းဆုံးကမ္ဘာ့ဖလားအဖြစ် ချီးကျူးလိုက် ပါတယ်။
အင်ဖန်တီနိုက “ဒီကမ္ဘာ့ဖလားမှာ ပါဝင်ခဲ့ကြတဲ့သူတွေအားလုံးကို ကျေးဇူးတင်ပါတယ်။ စေတနာ့ဝန်ထမ်းတွေ အားလုံးက အကောင်းဆုံးကမ္ဘာ့ဖလားဖြစ်အောင် ပြုလုပ်နိုင်ခဲ့ကြပါတယ်။ ဘယ်လိုအဖြစ်အပျက်မှမရှိဘဲ ပွဲတွေကို ကစားနိုင်ခဲ့ပါတယ်။ အလွန်ပျော်စရာကောင်းတဲ့ အားပေးမှုတွေဖြစ်ခဲ့ပါတယ်။ အာဖရိကအသင်းဟာ ပထမဆုံး အကြိမ် ကမ္ဘာ့ဖလားဆီမီးဖိုင်နယ်တက်နိုင်ခဲ့ပါတယ်။ ပထမဆုံးအကြိမ်အဖြစ် အမျိုးသမီးဒိုင်လူကြီး ဖရန်ပါတ့်က တာဝန်ယူခဲ့ပါတယ်။ ကြည့်ရှူသူအရေအတွက် ၅ ဘီလီယံအထိ ရောက်ခဲ့တာကလည်း မယုံနိုင်လောက်တဲ့ အောင်မြင်မှုပါပဲ” လို့ ပြောခဲ့တာပါ။
နိုဝင်ဘာလ ၂၀ ရက်ကနေ စတင်ကျင်းပခဲ့တဲ့ ကမ္ဘာ့ဖလားပြိုင်ပွဲဟာ ဒီဇင်ဘာ ၁၈ ရက်နေ့ဆိုရင် အဆုံးသတ် တော့မှာဖြစ်ပြီး တတိယနေရာလုပွဲနဲ့ ဗိုလ်လုပွဲသာ ကစားဖို့ ကျန်ရှိတော့တာဖြစ်ပါတယ်။ ပြီးခဲ့တဲ့ ၂၀၁၈ ကမ္ဘာ့ ဖလားပြိုင်ပွဲမှာ ပရိသတ်တက်ရောက် ကြည့်ရှုသူဦးရေဟာ ၃.၃ သန်းရှိခဲ့ပြီး လက်ရှိပြိုင်ပွဲမှာ ၂ ပွဲကစားဖို့ ကျန်သေးတဲ့အထိ တက်ရောက်ကြည့်ရှုသူ ဦးရေ ၃.၂၇ သန်းအထိ ရှိတယ်လို့ ဖီဖာကောင်စီအစည်းအဝေးက ထွက်ပေါ်လာတဲ့ အချက်အလက်အရ သိရတာပါ။
ဖီဖာဟာ ၂၀၁၈ ကနေ ၂၀၂၂ အထိ လည်ပတ်မှုမှာ ဒေါ်လာ ၇.၅ ဘီလီယံဝန်းကျင်ရရှိထားပြီး အင်ဖန်တီနိုကတော့ လာမယ့် ၂၀၂၆ မြောက်အမေရိကမှာ ကျင်းပမယ့် ကမ္ဘာ့ဖလားပြိုင်ပွဲအပြီးမှာ ဝင်ငွေဒေါ်လာ ၁၁ ဘီလီယံကျော် အထိ ရောက်ရှိလာဖို့ ခန့်မှန်းထားတာ ဖြစ်ပါတယ်။ ဖီဖာဟာ လာမယ့် ၂၀၂၅ မှာ ကျင်းပမယ့် ကလပ်ကမ္ဘာ့ဖလား ပြိုင်ပွဲကိုလည်း ပထမဆုံးအကြိမ် ၃၂ သင်းနဲ့ ကျင်းပသွားမယ်လို့လည်း အတည်ပြုခဲ့တာပါ။
လာမယ့် ၂၀၂၆ ကမ္ဘာ့ဖလားပြိုင်ပွဲမှာလည်း အသင်းပေါင်း ၃၂ သင်းကနေ ၄၈ အသင်းအထိ တိုးချဲ့ပြီး ကျင်းပ သွားမှာဖြစ်ပါတယ်။ အခုကမ္ဘာ့ဖလားပြိုင်ပွဲရဲ့ နောက်ဆုံးဗိုလ်လုပွဲစဉ်အဖြစ် အာဂျင်တီးနားနဲ့ ပြင်သစ်အသင်း တို့က တနင်္ဂနွေနေ့မှာ ယှဉ်ပြိုင်သွားမှာ ဖြစ်ပါတယ်။
Source:Goal
Page 285 of 372
Connect with us
