မီလန်မြို့ရှိ စူပါမားကတ်မှာ အာဆင်နယ်နောက်ခံလူ ပါဘလိုမာရီ ဓါးနဲ့ အထိုးခံရ

CNI Sport News

၂၀၂၂ ခုနှစ်၊ အောက်တိုဘာ ၂၈

အာဆင်နယ်အသင်းနောက်ခံလူ ပါဘလိုမာရီဟာ အီတလီနိုင်ငံ မီလန်မြို့အနီးရှိ စူပါမားကတ်မှာ ဓါးနဲ့ အထိုးခံခဲ့ ရပြီး သူအပါအဝင် အနည်းဆုံး ၅ ဦးဒဏ်ရာရကာ ၁ ဦးသေဆုံးသွားခဲ့တယ်လို့ ဘီဘီစီသတင်းမှာ ဖော်ပြထားပါ တယ်။

လူတစ်ဦးက စတင်တိုက်ခိုက်ခဲ့တာဖြစ်ပြီး အဆိုပါစူပါမားကတ်က အသက် ၃၀ အရွယ်ရှိ ငွေကိုင်တစ်ဦး သေဆုံး သွားခဲ့တာလို့ ဒေသတွင်း မီဒီယာတွေက ဖော်ပြထားတာပါ။ဒဏ်ရာရသူတွေထဲမှာ အာဆင်နယ်ကနေ မွန်ဇာမှာ အငှားသွားကစားနေတဲ့ ပါဘလိုမာရီလည်း ပါဝင်ခဲ့တာဖြစ်ပါတယ်။အသက် ၄၆ နှစ်အရွယ်ရှိ သံသယရှိသူကို ဖမ်းဆီးထားတယ်လို့ သိရပါတယ်။အဲဒီ တိုက်ခိုက်သူဟာ စိတ်ကျန်းမာရေး ပြဿနာရှိနေတာဖြစ်ပြီး စူပါမားကတ် မှာရှိတဲ့ ဓါးကို ယူခဲ့တာဖြစ်ပါတယ်။

တိုက်ခိုက်သူ အမျိုးသားဟာ ဈေးဝယ်စင်တာကို လာရောက်တဲ့လူတွေကို ဓါးနဲ့ ထိုးခဲ့တာကြောင့် စင်တာရှိ လူ တွေဟာ ကြောက်လန့်တကြားနဲ့ ထွက်ပြေးဖို့ ကြိုးစားခဲ့ကြတယ်လို့ သတင်းမှာ ဖော်ပြထားပါတယ်။ ဒီလို တိုက်ခိုက်သူကို ဝိုင်းဝန်းဖမ်းဆီးခဲ့ကြပြီး အခင်းဖြစ်ရာနေရာကို ရောက်ရှိလာတဲ့ ရဲတွေထံ လွှဲပြောင်းပေးခဲ့ တာဖြစ်ပါတယ်။အသက် ၂၉ နှစ်အရွယ်ရှိ ပါဘလိုမာရီဟာ နောက်ကျောမှာ ဓါးထိုးဒဏ်ရာရခဲ့ပေမယ့် အသက် အန္တရာယ်စိုးရိမ်ရမှုမရှိဘူးလို့ အေးဂျင့်ဖြစ်သူက ပြောခဲ့တာပါ။

မွန်ဇာအသင်း စီအီးအို ဂယ်လီယာနီက ပါဘလိုမာရီဟာ တိုက်ခိုက်မှုဖြစ်ပွားချိန်မှာ ဇနီးသည်၊ သားဖြစ်သူတို့နဲ့ ဈေးဝယ်ထွက်ခဲ့တယ်လို့ Sky Italy ကို ပြောခဲ့ပါတယ်။

“ပါဘလိုက နောက်ကျောကို ဓါးနဲ့ထိုးခံခဲ့ရပေမယ့် ကံကောင်းတာက အဆုတ် ဒါမှမဟုတ် အခြားအရေးကြီးတဲ့ အင်္ဂါရပ်တွေဆီကို မရောက်ခဲ့တာပါ။ သူ့အသက်အန္တရာယ် မစိုးရိမ်ရပါဘူး။သူမြန်မြန်ပြန်ကောင်းလာမှာပါ။သူ့မှာ ဒဏ်ရာတွေရှိပေမယ့် သိပ်ပြီး မပြင်းထန်ပါဘူး” လို့ ဂယ်လီယာနီက ပြောခဲ့တာပါ။

၂၀၂၀ ဇန်နဝါရီက ဖလာမင်ဂိုကနေ ရောက်ရှိလာခဲ့တဲ့ ပါဘလိုမာရီဟာ အာဆင်နယ်အတွက် ၁၉ ပွဲ ပါဝင် ကစား ထားပြီး မနှစ်ကရာသီက အူဒီးနီးစ်မှာ အငှားသွားကစားခဲ့ရသလို အခုနှစ်မှာလည်း မွန်ဇာအသင်းထံ အငှားချ ထားခံရတာဖြစ်ပါတယ်။

အာဆင်နယ်နည်းပြ အာတီတာက “အီဒူးက သူ့ရဲ့ ဆွေမျိုးမိသားစုတွေနဲ့ အဆက်အသွယ်ရှိတယ်ဆိုတာ ကျနော် သိပါတယ်။ဆေးရုံတက်နေရပေမယ့် သူအဆင်ပြေမှာပါ” လို့ ပြောခဲ့ပါတယ်။

Source:BBC

CNI Sport News

၂၀၂၂ ခုနှစ်၊ အောက်တိုဘာ ၂၈

ယူနိုက်တက်နည်းပြ အဲရစ်တန်ဟတ်က ရှရစ်ဖ်ကို ၃ ဂိုး- ဂိုးမရှိနဲ့ အနိုင်ရခဲ့တဲ့ ယူရိုပါလိဂ်ပွဲစဉ်မှာ အသင်းအတွက် ၁ ဂိုး သွင်းယူပေးခဲ့တဲ့ ရော်နယ်ဒိုကို ချီးကျူးမှု ပြုလုပ်သွားခဲ့ပါတယ်။

အဲရစ်တန်ဟတ်က “ သူက အခွင့်အရေးတွေ ဖန်တီးခဲ့သလို အသင်းကလည်း သူ့အတွက် အခွင့်အရေးတွေ ဖန်တီး ပေးပါတယ်။ ဒီပွဲမှာ သူဂိုးသွင်းနိုင်ဖို့ တကယ်လိုအပ်ခဲ့တာပါ။ အခုထက်ပိုပြီး သူဂိုးသွင်းနိုင်မယ်လို့လည်း ကျနော် ယုံကြည်ပါတယ်။ သူဟာ ဘယ်တော့မှ အရှုံးမပေးတဲ့သူပါ။ ဒါဟာ သူ့ရဲ့ ကစားသမားဘဝ တစ်လျှောက်လုံး လုပ် ဆောင်ခဲ့တဲ့အရာလို့ ကျနော်ထင်ပါတယ်။ အဆုံးသတ်မှာ သူ ဆုလာဘ်ကို ရရှိခဲ့တယ်”လို့ ပွဲအပြီးမှာ ပြောခဲ့ပါ တယ်။

ရော်နယ်ဒိုဟာ ဒီပွဲစဉ်ရဲ့ ၈၁ မိနစ်မှာ သွင်းယူခဲ့တဲ့ ဂိုးမတိုင်ခင် အခွင့်အရေးတွေ ရခဲ့ပေမယ့် လွဲချော်နေခဲ့သလို သွင်းတဲ့ ဂိုးကလည်း ခွင့်ပြုခြင်း မခံခဲ့ရပါဘူး။

ရှရစ်ဖ်နဲ့ပွဲမှာ သွင်းယူခဲ့တဲ့ ဂိုးဟာ ဒီရာသီ အိုးထရက်ဖို့ဒ်မှာ သွင်းတဲ့ ရော်နယ်ဒိုရဲ့ ပထမဆုံး ဂိုးလည်း ဖြစ်ခဲ့ပါ တယ်။ ပေါ်တူဂီ အသင်းခေါင်းဆောင်ဟာ ရှရစ်ဖ်နဲ့ ကစားခဲ့တဲ့ ယူရိုပါလိဂ်မှာ ၂ ဂိုးနဲ့ အဲဗာတန်နဲ့ ပရီးမီးယား လိဂ်ပွဲမှာ ၁ ဂိုး သွင်းယူထားပြီး ဒီရာသီ ယူနိုက်တက်အသင်းအတွက် ၃ ဂိုး သွင်းယူထားတာပါ။

နည်းပြ အဲရစ်တန်ဟတ်ကိုတွေ့ရစဉ် (Yahoo Sports)

ရော်နယ်ဒိုက “ အသင်းလိုက် ကြိုးစားအားထုတ်မှုနဲ့ အလွန်ကောင်းမွန်တဲ့ နိုင်ပွဲပါ။ ကျနော်တို့ အတူတူ ရှိခဲ့ကြ တယ်။ ဆက်သွားကြစို့ ယူနိုက်တက်ဆိုပြီး”သူ့ရဲ့ တွစ်တာမှာ ရေးသားထားတာ ဖြစ်ပါတယ်။

ရော်နယ်ဒိုဟာ ပြီးခဲ့တဲ့ စပါးအသင်းနဲ့ ပွဲစဉ်မှာ လူစားလဲ ဝင်ရောက်ဖို့ ငြင်းဆန်ခဲ့ပြီး ပွဲမပြီးခင် ဥမင်ထဲကို ထွက်သွားခဲ့တာကြောင့် စည်းကမ်းပိုင်းအရ အရေးယူမှု ခံခဲ့ရပါတယ်။

အဲ့ဒါကြောင့် ချယ်လ်ဆီးအသင်းနဲ့ ပွဲစဉ်မှာ အသင်းလူစာရင်းကနေ ချန်လှပ်ခံရပြီး လူငယ်အသင်းနဲ့ လေ့ကျင့်မှု ပြုလုပ်ခဲ့ရတာ ဖြစ်ပါတယ်။ ဒါပေမယ့် နည်းပြ အဲရစ်တန်ဟတ်နဲ့ ဆွေးနွေးမှုတွေ ပြုလုပ်အပြီးမှာတော့ ရော်နယ်ဒို ဟာ အသင်းကြီးနဲ့အတူ လေ့ကျင့်မှုပြန်လည် ပြုလုပ်ခွင့်ရခဲ့ပြီး ရှရစ်ဖ်နဲ့ ပွဲမှာ ပွဲချိန်ပြည့် ပါဝင်ကစားခွင့် ရခဲ့တာပါ။

ယူနိုက်တက်အသင်းဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် ဝက်စ်ဟမ်းအသင်းနဲ့ ယှဉ်ပြိုင်ရမှာဖြစ်ပြီး ရော်နယ်ဒိုကို နည်းပြ အဲရစ်တန်ဟတ်က ပွဲထွက် အသုံးပြုမလားဆိုတာ စောင့်ကြည့်ရမှာ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ အောက်တိုဘာ ၂၇

သြစတြေးလျအသင်းဟာ ကာတာနိုင်ငံရဲ့ လူ့အခွင့်အရေး မှတ်တမ်းတွေကို ဆန့်ကျင့်တဲ့ စုပေါင်း ကြေညာချက်ကို ထုတ်ပြန်လိုက်ပြီး ၂၀၂၂ ကမ္ဘာ့ဖလားပြိုင်ပွဲဝင် အသင်းတွေမှာ ဒီလိုလုပ်ဆောင်တဲ့ ပထမဆုံးအသင်းဖြစ်လာ ခဲ့ပါ တယ်။

ရွှေ့ပြောင်း အလုပ်သမားတွေနဲ့ LGBTQ+ လူတွေအပေါ်မှာ ကာတာနိုင်ငံရဲ့ ပြုမူဆက်ဆံပုံတွေကို ဗွီဒီယိုကနေ မက်ဆေ့ချ်ပေးပို့ပြီးတော့ ဝေဖန်ထားတာပါ။ သြစတြေးလျဘောလုံးအဖွဲ့ချုပ်ကလည်း အလုပ်သမားတွေနဲ့ သူတို့ရဲ့ မိသားစုတွေ ခံစားနေရတဲ့ ဒုက္ခတွေကို ပြိုင်ပွဲကြောင့် လျစ်လျူရှုလို့ မရဘူးလို့ ကြေညာချက် ထုတ်ပြန်ခဲ့ပါတယ်။

သြစတြေးလျအသင်းဟာ နိုဝင်ဘာလ ၂၀ ရက် ကာတာမှာ စတင်ကျင်းပမယ့် ကမ္ဘာ့ဖလားပြိုင်ပွဲမှာ ပါဝင်ယှဉ်ပြိုင် မှာပါ။

အဲဒီ ဗွီဒီယိုမှာ ကစားသမား ၁၆ ယောက် ပါဝင်ပြီး သူတို့တွေက ရွှေ့ပြောင်း အလုပ်သမားတွေနဲ့ လိင်တူ ဆက်ဆံမှုကို ခွဲခြားတာတွေကို ထိရောက်စွာ ကုစားပေးဖို့ တောင်းဆိုခဲ့တာ ဖြစ်ပါတယ်။

ဒီ ကစားသမား ၁၆ ယောက်ထဲမှာ အသင်းခေါင်းဆောင် မတ်ရိုင်ယန်၊ ဆန်းဒါးလန်း နောက်ခံလူ ဘေလီ၊ ဟာ့တ် အသင်းက ရိုဝယ်လ်စ်နဲ့ သြစတြေးလျ ပရော်ဖက်ရှင်နယ် ဘောလုံးသမားများ သမဂ္ဂဥက္ကဋ္ဌ ဝီလ်ကင်ဆန်တို့ ပါဝင်ကြတာပါ။

ကာတာနိုင်ငံက ၂၀၂၂ ကမ္ဘာ့ဖလားပြိုင်ပွဲအတွက် ပြင်ဆင်ထားမှုကိုတွေ့ရစဉ်

ကစားသမားတွေက “ ဒီပြဿနာတွေကို ဖြေရှင်းဖို့က မလွယ်ကူသလို ကျနော်တို့မှာလည်း အဖြေတွေအားလုံး မရှိပါဘူး။ ဒီမှာ ရွှေ့ပြောင်းသူတွေအတွက် အရင်းအမြစ်စင်တာတစ်ခု ထူထောင်ရေး၊ သူတို့ရဲ့ အခွင့်အရေးကို ငြင်းဆိုခံရသူတွေနဲ့ လိင်တူ ဆက်ဆံမှုအားလုံးကို ခွဲခြားတာနဲ့ ပတ်သက်ပြီး ထိရောက်စွာ ကုစားပေးဖို့ တောင်းဆို ပါတယ်။ ဒါဟာ အားလုံးနဲ့ သက်ဆိုင်တဲ့ အခြေခံ အခွင့်အရေးတွေပါ”လို့ ပြောခဲ့တာ ဖြစ်ပါတယ်။

၂၀၂၂ ကမ္ဘာ့ဖလားကို ကာတာမှာ ကျင်းပဖို့ ဖီဖာက ဆုံးဖြတ်ချက် ချခဲ့တဲ့ ၂၀၁၀ ကစပြီး ဝေဖန်မှုတွေ ပြင်းပြင်း ထန်ထန် ထွက်ပေါ်ခဲ့တာပါ။ ကာတာမှာ နိုင်ငံခြား အလုပ်သမားတွေအပေါ် ပြုမူဆက်ဆံပုံတွေနဲ့ အဲဒီနေရာမှာ သေဆုံးသွားတဲ့ သူတွေရဲ့ အရေအတွက်နဲ့ ပတ်သက်ပြီး လူ့အခွင့်အရေးအဖွဲ့တွေက မကျေမနပ် ဖြစ်နေကြတာ ဖြစ်ပါတယ်။

အိန္ဒိယ၊ ပါကစ္စတန်၊ ဘင်္ဂလားဒေ့ရှ်၊ နီပေါ၊ သီရိလင်္ကာနိုင်ငံတို့က ရွှေ့ပြောင်း အလုပ်သမား ၆,၅၀၀ ဟာ ကာတာ နိုင်ငံက ကမ္ဘာ့ဖလား ဝင်ခွင့်ရပြီးနောက်ပိုင်း သေဆုံးသွားခဲ့တာလို့ ၂၀၂၁ ခုနှစ်၊ ဖေဖော်ဝါရီလက ဂါဒီးယန်း သတင်းက ဖော်ပြခဲ့တာပါ။

ဒီအရေအတွက်ဟာ ကာတာရှိနိုင်ငံတွေရဲ့ သံရုံးတွေကပေးတဲ့ ကိန်းဂဏန်းတွေအပေါ် အခြေခံထားတာလို့ သိရပါတယ်။

Source: BBC

CNI International News

၂၀၂၂ ခုနှစ်၊ အောက်တိုဘာ ၂၇

ပြီးခဲ့တဲ့ ဇန်နဝါရီ အပြောင်းအရွှေ့တုန်းက ဟာလန်း၊ ဒီယတ်ဇ် အပါအဝင် ကစားသမားတချို့ ခေါ်ယူပေးဖို့ ပြောခဲ့တာကို ဘုတ်အဖွဲ့က ငြင်းဆန်ခဲ့တယ်လို့ ယူနိုက်တက် ယာယီနည်းပြဟောင်း ရက်ဂ်နစ်က ပြောလိုက် ပါတယ်။

ရက်ဂ်နစ်က “ ဒါတွေနဲ့ ပတ်သက်တဲ့ အပြောင်းအရွှေ့ စာရွက်စာတမ်းတော့ မရှိပါဘူး။ ကလပ်ကလည်း ဒါကို ဘယ်တုန်းကမှ မလိုချင်ခဲ့ပါဘူး။ ဒီလို စာရွက်စာတမ်း မရှိရင်တောင် နေရာတော်တော်များများမှာ လိုအပ်နေတယ် ဆိုတာ လူတိုင်းသိပါတယ်။ ကျနော်တို့ လိုက်ပ်ဇစ်က ဂျီဗာဒီရယ်လ်၊ အန်ကန်ကူတို့အတွက် ဆွေးနွေးခဲ့ကြပါ တယ်။ ဒါတွေက တကယ်ကို လက်တွေ့ဆန်တဲ့ နာမည်တွေပါ။ မိုရာတာ၊ ဒီယတ်ဇ်၊ ဗလာဟိုဗစ်တို့ အကြောင်း လည်း ပြောခဲ့ပါတယ်။ အဲ့ဒီ အချိန်တုန်းက ဟာလန်းကလည်း ဈေးကွက်ထဲမှာပဲ ရှိပါသေးတယ်။ ဒါပေမယ့် နည်းပြသစ်ရောက်မှ ပြန်တည်ဆောက်ဖို့ ကလပ်က ဆုံးဖြတ်ခဲ့ပါတယ်”လို့ ဂျာမန် သတင်း Bild ကို ပြောခဲ့တာပါ။

ရက်ဂ်နစ်ဟာ ပြီးခဲ့တဲ့နှစ် နိုဝင်ဘာလက ဆိုးလ်ရှား ထုတ်ပယ်ခံရပြီးနောက် ရာသီအကုန်ထိ ယူနိုက်တက် အသင်းကို ယာယီ နည်းပြအဖြစ် ကိုင်တွယ်ခဲ့သူ ဖြစ်ပါတယ်။

ရက်ဂ်နစ်နဲ့ ရော်နယ်ဒိုကိုတွေ့ရစဉ်

သူကိုင်တွယ်တဲ့ အချိန်မှာ တိုက်စစ်မှူး မာရှယ်ဟာ ဆီဗီလာထံ အငှားနဲ့ သွားရောက်ခဲ့သလို ဂရင်းဝုဒ်ကလည်း ကလပ်ကနေ ဆိုင်းငံ့ခံထားရတာပါ။ အဲ့ဒါကြောင့် အသင်းရဲ့ တိုက်စစ်ပိုင်းမှာ ရော်နယ်ဒို တစ်ဦးတည်းကိုသာ မှီခိုခဲ့ရတာပါ။ ရော်နယ်ဒိုဟာ ပြီးခဲ့တဲ့ရာသီက ၂၄ ဂိုးသွင်းပြီး အသင်းရဲ့ ထိပ်တန်းဂိုးသွင်းရှင် ဖြစ်ခဲ့ပါတယ်။

ယူနိုက်တက်အသင်းဟာ ပြီးခဲ့တဲ့ ရာသီအကုန်က ပရီးမီးယားလိဂ် အဆင့် ၆ နေရာမှာ ရပ်တည်ခဲ့လို့ ချန်ပီယံလိဂ် ဝင်ခွင့် ဆုံးရှုံးခဲ့ပြီး ယူရိုပါလိဂ် ဝင်ခွင့်သာ ရရှိခဲ့တာပါ။

ရက်ဂ်နစ်ဟာ Bild ရဲ့ ဂျာနယ်လစ် ခရစ္စတီယန်ဖော့ခ်နဲ့ တွေ့ဆုံပြီး ဇန်နဝါရီ အပြောင်းအရွှေ့က တိုက်စစ်မှူး ခေါ်ယူဖို့ ကြိုးစားခဲ့ကြောင်း ပြောခဲ့တာ ဖြစ်ပါတယ်။ ဒါပေမယ့် ယူနိုက်တက် အသင်းဟာ နည်းပြသစ်အဖြစ် အဲရစ်တန်ဟတ်ကို ခန့်အပ်ပြီးမှ ကြီးမားတဲ့ အပြောင်းအရွှေ့တွေကို ပြုလုပ်လာခဲ့တာပါ။

အေဂျတ်စ်အသင်းက လောတရိုမာတီးနတ်စ်၊ အန်တိုနီ၊ ရီးရယ်လ်အသင်းက ကတ်စမဲရိုး၊ ဖီယင်နုအသင်းက မာလာစီယာနဲ့ အဲရစ်ဆန်တို့ကို ခေါ်ယူခဲ့တာ ဖြစ်ပါတယ်။ လက်ရှိအချိန်မှာ ယူနိုက်တက် အသင်းဟာ ပြီးခဲ့တဲ့ ရာသီကလို အမှတ်ပေးဇယား အဆင့် ၆ နေရာမှာ ရပ်တည်နေတာဖြစ်ပါတယ်။

Source: The Sun

CNI Sport News

၂၀၂၂ ခုနှစ်၊ အောက်တိုဘာ ၂၇

ဘာစီလိုနာအသင်းနည်းပြ ဇာဗီက ချန်ပီယံလိဂ်ကနေ ထွက်ခဲ့ရပြီးနောက် အုပ်စုတွင်းအခက်အခဲကို ထောက်ပြ လိုက်ပြီး ဒီအုပ်စုက အလွန်ရှုပ်ထွေးတယ်လို့ ပြောလိုက်ပါတယ်။

ဇာဗီက “အမှန်တကယ်ဖြစ်ခဲ့တာကို ကျနော်တို့ ရင်ဆိုင်ရမှာပါ။ဒီနေ့မှာ ကျနော်တို့ သူတို့ကို မယှဉ်နိုင်ခဲ့ပါဘူး။ မြူးနစ်မှာတုန်းက ကျနော်တို့ ပိုကောင်းခဲ့ပေမယ့် ဒီနေ့မှာတော့ ဘိုင်ယန်က ပိုပြီးကောင်းခဲ့ပါတယ်။ဒီအုပ်စုက အလွန်ရှုပ်ထွေးပြီး ချန်ပီယံလိဂ်မှာ အရာအားလုံးက ကျနော်တို့အတွက် ဖြစ်သွားခဲ့ပါတယ်” လို့ ပြောခဲ့တာပါ။

ဘာစီလိုနာအသင်းဟာ အိမ်ကွင်းမှာ ကစားခဲ့တဲ့ ချန်ပီယံလိဂ်အုပ်စုပွဲမှာ ဘိုင်ယန်မြူးနစ်အသင်းကို ၃ ဂိုး- ဂိုးမရှိနဲ့ အရေးနိမ့်ခဲ့တာဖြစ်ပါတယ်။ဘာစီလိုနာအသင်းဟာ ဒီပွဲမှာ ဂိုးပေါက်ကန်သွင်းမှုရှိခဲ့ပေမယ့် ဂိုးပေါက်တည့်မှု ၁ ကြိမ်မှမရှိခဲ့ပါဘူး။စပိန်ကလပ်ဟာ ဒီပွဲမတိုင်ခင်ကစားခဲ့တဲ့ အင်တာမီလန်အသင်းက ပလာဇန်အသင်းကို ဂိုးပြတ် အနိုင်ရတဲ့ ပွဲပြီးကတည်းက ချန်ပီယံလိဂ်အုပ်စုအဆင့်ကနေ ထွက်ခွာရဖို့က သေချာသွားခဲ့တာဖြစ်ပါတယ်။

ဘာစီလိုနာအသင်းဟာ ချန်ပီယံလိဂ်အုပ်စုအဆင့်က ထွက်ခဲ့ရပြီး ယူရိုပါလိဂ်ပြိုင်ပွဲကို ၂ နှစ်ဆက်တိုက် ကစားရ တော့မှာပါ။ဇာဗီက “ကျနော်တို့ အရင်ပွဲတွေမှာ လုပ်ခဲ့မိတဲ့ အမှားတွေက အခုလိုအခြေအနေကို ရောက်သွားတဲ့ အဓိကအကြောင်းအရင်းပါပဲ။ကျနော်တို့ဟာ တကယ်ကို ဆိုးရွားတဲ့ ခံစားချက်နဲ့ ထွက်ခွာခဲ့ရပေမယ့် ပြန်လည် ချိတ်ဆက်ပြီး ကျန်တဲ့ ဆုဖလားတွေအတွက် တိုက်ပွဲဝင်သွားရမှာပါ” လို့ ပြောခဲ့ပါတယ်။

ဘာစီလိုနာအသင်းဟာ အခုနှစ်ရာသီအသင်းအောင်မြင်မှုတွေရဖို့အတွက် ကစားသမားသစ်တွေ အများ အပြားဖြည့်တင်းခဲ့ပေမယ့် အခုလို ချန်ပီယံလိဂ်က ထွက်ခွာခဲ့ရတာကြောင့် ယူရိုသန်း ၂၀ ဝန်းကျင် ဆုံးရှုံး ရနိုင်တယ်လို့ သိရပါတယ်။ဘာစီလိုနာအသင်းဟာ ချန်ပီယံလိဂ်က ထွက်ခဲ့ရပြီးနောက် လာလီဂါပြိုင်ပွဲကို အာရုံစိုက်ရတော့မှာဖြစ်ပြီး ထိပ်ဆုံးက ဦးဆောင်နေတဲ့ ရီးရယ်လ်အသင်းနဲ့ ၃ မှတ်ကွာဟနေတာ ဖြစ်ပါတယ်။

ဘာစီလိုနာအသင်းဟာ စနေနေ့မှာ စပိန်လာလီဂါပွဲစဉ်အဖြစ် ဗလင်စီယာအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ အောက်တိုဘာ ၂၆

ဂျူဗင်တပ်စ် အသင်းနည်းပြ အယ်လီဂရီက ဘင်ဖီကာအသင်းကို အရေးနိမ့်ကာ ချန်ပီယံလိဂ်က ထွက်ခဲ့ရပေမယ့် ဒါဟာ ကျရှုံးမှု မဟုတ်ဘူးလို့ ပြောလိုက်ပါတယ်။

အယ်လီဂရီက “ မှားယွင်းတဲ့ ချဉ်းကပ်မှုထက် ပထမပိုင်းမှာ ကျနော်တို့ရဲ့ ခံစစ်ကစားပုံဟာ အလွန်ပျော့ပျောင်း လွန်းတယ်လို့ ထင်ပါတယ်။ ချန်ပီယံလိဂ်က ထွက်ခဲ့ရလို့ စိတ်ပျက်ပြီး ဒေါသလည်း ထွက်မိပါတယ်။ အခုအချိန်မှာ ကျနော်တို့ဟာ အီတလီလိဂ်ကို အာရုံစိုက် ရပါတော့မယ်။ ဒါ့အပြင် ယူရိုပါလိဂ် ဝင်ခွင့်နေရာအတွက် ပီအက်စ်ဂျီနဲ့ ပွဲကိုလည်း အာရုံစိုက်ထားရပါမယ်။ ကျနော်တို့ အမှားတွေ အများကြီး လုပ်ခဲ့ပေမယ့် အခုအချိန်မှာ ဒါက ပြောဖို့ အသုံးမဝင်ပါဘူး။ ဒါကို ကျရှုံးမှုလို့တော့ ကျနော်မထင်ပါဘူး။ ဘောလုံးပွဲတွေမှာ ရှုံးပွဲတွေ ရှိပါတယ်”လို့ ပွဲအပြီး သတင်းထောက်တွေကို ပြောခဲ့တာပါ။

ဂျူဗင်တပ်စ်အသင်းသားတွေကို တွေ့ရစဉ် (MARCA)

ဂျူဗင်တပ်စ်အသင်းဟာ ဘင်ဖီကာအသင်းကို ၄ ဂိုး- ၃ ဂိုးနဲ့ အရေးနိမ့်ခဲ့တာကြောင့် ၂၀၁၃ နောက်ပိုင်း ပထမဆုံး အကြိမ် ချန်ပီယံလိဂ် အုပ်စုအဆင့်ကနေ ထွက်ခွာခဲ့ရတာ ဖြစ်ပါတယ်။ အဲ့ဒါကြောင့် နည်းပြ အယ်လီဂရီ အပေါ်မှာ လည်း ဖိအားတွေ ကျရောက်နေတာပါ။ အီတလီကလပ်ဟာ ချန်ပီယံလိဂ်က ထွက်ခဲ့ရပေမယ့် ယူရိုပါလိဂ် ဝင်ခွင့် အတွက် မျှော်လင့်ချက်ရှိနေတာ ဖြစ်ပါတယ်။

ဂျူဗင်တပ်စ်အသင်းဟာ နောက်ဆုံးပွဲစဉ်အဖြစ် ကစားမယ့် ပီအက်စ်ဂျီနဲ့ ပွဲစဉ်မှာ ရလဒ်မကောင်းပဲ မက္ကာဘီ ဟိုင်ဖာ အသင်းကသာ ရလဒ်ကောင်း ရသွားခဲ့ရင် ယူရိုပါလိဂ် ပြိုင်ပွဲမှာလည်း ပါဝင်ယှဉ်ပြိုင်ခွင့် ဆုံးရှုံးရနိုင်တာပါ။

အခုဆိုရင် ဂျူဗင်တပ်စ်အသင်းဟာ ဒီရာသီ စီးရီးအေ ပြိုင်ပွဲမှာလည်း ရလဒ်တွေ ဆိုးနေပေမယ့် နောက်ဆုံး ကစား ခဲ့တဲ့ ၂ ပွဲဆက် အနိုင်ရခဲ့တာကြောင့် အမှတ်ပေးဇယား အဆင့် ၈ နေရာမှာ ရပ်တည်နေတာ ဖြစ်ပါတယ်။

ထိပ်ဆုံးနေရာက နာပိုလီအသင်းနဲ့ ၁၀ မှတ်ကွာဟနေတဲ့ ဂျူဗင်တပ်စ် အသင်းဟာ ဒီတစ်ပတ် စီးရီးအေ ပွဲစဉ် အဖြစ် လက်ချီအသင်း အိမ်ကွင်းမှာ သွားရောက်ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၂ ခုနှစ်၊ အောက်တိုဘာ ၂၆

ဒေါ့မွန်အသင်း တိုက်စစ်မှူး ဟော်လာဟာ ဝှေးစေ့အကျိတ်ကနေ ပြန်လည်ကောင်းမွန်လာပြီးနောက် အသင်းဟောင်း အေဂျတ်စ်အသင်းနဲ့ လေ့ကျင့်မှုတွေ ပြုလုပ်ခဲ့တယ်လို့ သိရပါတယ်။

ဟော်လာဟာ ပြီးခဲ့တဲ့ရာသီက အေဂျတ်စ်အသင်းအတွက် ခြေစွမ်းပြသနိုင်ခဲ့ပြီး ပြိုင်ပွဲစုံ ၃၄ ဂိုး သွင်းယူနိုင်ခဲ့ တာကြောင့် နွေရာသီအပြောင်းအရွှေ့မှာ ဒေါ့မွန်အသင်းက ပေါင် ၃၁ သန်းနဲ့ ခေါ်ယူခဲ့တာပါ။

အိုင်ဗရီကို့စ် တိုက်စစ်မှူးဟာ ဒေါ့မွန်အသင်းကို ရောက်ပြီး မကြာခင်မှာ ရောဂါရှာဖွေ တွေ့ရှိခဲ့တာ ဖြစ်ပါတယ်။ သူဟာ ဒေါ့မွန်အသင်းရဲ့ ရာသီကြို ဆွစ်ဇာလန်ခရီးစဉ်မှာ နာမကျန်းမှုဖြစ်ပြီးနောက် ဆေးစစ်မှု ခံယူခဲ့တာမှာ ကင်ဆာအကျိတ် တွေ့ရှိခဲ့တာပါ။

ဟော်လာဟာ ဓါတုကုထုံးကို ခံယူခဲ့ရပြီး ပြန်လည် ကောင်းမွန်လာမှု ခြေလှမ်းအဖြစ် လေ့ကျင့်ရေးကွင်းကို ပြန်လည် ရောက်ရှိလာခဲ့တာ ဖြစ်ပါတယ်။

အေဂျတ်စ်အသင်းနည်းပြ ရှရူဒါက ဟော်လာအသင်းထံ ပြန်လာကြောင်း အတည်ပြုခဲ့ပါတယ်။

ဒေါ့မွန်အသင်းမှာ တွေ့ရတဲ့ ဟော်လာ  (Stadium Astro)

ရှရူဒါက “သူဟာ ဒီမှာ ပြန်လည်ထူထောင်ရေး လုပ်ငန်းစဉ်တွေကို လုပ်နေတာကြောင့် ဒီမှာလာပြီး လေ့ကျင့်လို့ ရမလားဆိုပြီး မေးခဲ့ပါတယ်။ သူပြန်ကောင်းလာဖို့ အကူအညီပေးတဲ့ အနေနဲ့ တခြားကွင်းမှာ လေ့ကျင့် နိုင်ခဲ့ တယ်”လို့ ပြောခဲ့ပါတယ်။
ဟော်လာဟာ ဒေါ့မွန်အသင်းအတွက် ပွဲဦးထွက် မကစားရသေးဘဲ ကုသမှုခံယူခဲ့ရတဲ့ အကြောင်းကို အရင်က ဖွင့်ဟပြောခဲ့ပါ သေးတယ်။

ဟော်လာရဲ့ လက်ရှိ အခြေအနေကြောင့် လပေါင်းများစွာ အနားယူနိုင်တယ်လို့ မျှော်လင့်ထားပေမယ့် ကစားသမားကတော့ ကွင်းထဲပြန်လာနိုင်မယ့် အချိန် အတိုင်းအတာကို စိတ်ထဲမှာ ရှိနေတာ ဖြစ်ပါတယ်။

ဟော်လာက “ကျနော်ဟာ ရုပ်ပိုင်းဆိုင်ရာအရ အလုပ်လုပ်နိုင်ပါတယ်။ စိတ်ပိုင်းဆိုင်ရာရော ရုပ်ပိုင်းဆိုင်ရာ ရှုထောင့်ကနေ ကြည့်မယ်ဆိုရင် ဒီရောဂါကို တိုက်ဖျက်တာမှာ အထောက်အကူ ဖြစ်စေပါတယ်။ ကျနော့်စိတ်ထဲ မှာ ပြန်လာနိုင်ဖို့ အချိန်အတိုင်းအတာ တစ်ခုရှိပါတယ်”လို့ ပြောခဲ့တာပါ။

ဟော်လာရဲ့ ဒေ့ါမွန်အသင်းဟာ မန်စီးတီးအသင်းနဲ့ ကစားခဲ့တဲ့ ချန်ပီယံလိဂ်ပွဲမှာ ဂိုးမရှိ သရေကျပြီးနောက် ၁၆ သင်း အဆင့် တက်ရောက်သွားပြီ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ အောက်တိုဘာ ၂၆

စပို့တင်းလစ္စဘွန်း အသင်းနည်းပြ အမ်မိုရင်မ်က အသင်းအနေနဲ့ ရော်နယ်ဒိုကို ပြန်လည်ခေါ်ယူဖို့ အိမ်မက် ရှိပေမယ့် သူ့ရဲ့ မြင့်မားတဲ့ လစာတောင်းဆိုမှုကြောင့် ခက်ခဲမယ်လို့ ပြောလိုက်ပါတယ်။

အမ်မိုရင်မ်က “ ရော်နယ်ဒိုဟာ ထိပ်တန်းကစားသမားဖြစ်ပြီး ယူနိုက်တက် ကစားသမားပါ။ ပေါ်တူဂီက ဂျာနယ် လစ် တော်တော်များများက ကျနော့်ကို ဒီမေးခွန်းတွေ အများကြီးမေးကြပြီး ကျနော်ကလည်း ဒီလိုပဲ တုံ့ပြန်မှာပါ။ သူက ယူနိုက်တက် ကစားသမားပါ။ စပို့တင်းမှာရှိတဲ့ လူတိုင်းက ရော်နယ်ဒို ပြန်လာဖို့ အိမ်မက်တွေ ရှိကြပါတယ်။ ဒါပေမယ့် သူ့ရဲ့ လုပ်ခလစာ ပေးချေဖို့ ကျနော်တို့မှာ ပိုက်ဆံမရှိပါဘူး။ သူဟာ ဘောလုံး မကစားရတာကလွဲရင် ယူနိုက်တက်မှာ ပျော်နေတယ်လို့ ထင်ပါတယ်”လို့ စပါးနဲ့ ပွဲမတိုင်ခင် ပွဲကြိုသတင်းစာ ရှင်းလင်းပွဲမှာ ပြောခဲ့ပါ တယ်။

စပို့တင်းလစ္စဘွန်း အသင်းနည်းပြ အမ်မိုရင်မ်ကိုတွေ့ရစဉ် (Goal)

ရော်နယ်ဒိုဟာ စပို့တင်းလစ္စဘွန်းအသင်းမှာ ကစားသမားဘဝ စတင်ခဲ့တာဖြစ်ပြီး ၁၉၉၇ ကနေ ၂၀၀၂ အထိ လူငယ်အသင်း၊ ၂၀၀၂ ကနေ ၂၀၀၃ အထိ စီနီယာအသင်းမှာ ကစားခဲ့တာ ဖြစ်ပါတယ်။

၂၀၀၃ အရောက်မှာ ယူနိုက်တက်အသင်းက သူ့ကို ခေါ်ယူခဲ့တာပါ။ ပြီးခဲ့တဲ့ နွေရာသီ အပြောင်းအရွှေ့က ရော်နယ်ဒို ယူနိုက်တက်အသင်းကနေ ထွက်ခွာခွင့် တောင်းချိန်မှာ စပို့တင်းလစ္စဘွန်းအသင်းနဲ့ သတင်းတွေ ထွက်ခဲ့သေးပါတယ်။

ရော်နယ်ဒိုရဲ့ မိခင်ဖြစ်သူက သူမကွယ်လွန်ခင် သူ့သား စပို့တင်းလစ္စဘွန်းအသင်းမှာ နောက်တစ်ကြိမ် ပြန်ကစား တာကို တွေ့ချင်ကြောင်း အရင်က ထုတ်ပြောခဲ့ဖူးပါတယ်။

စပို့တင်းလစ္စဘွန်း အသင်းမှာ ရော်နယ်ဒိုကစားခဲ့စဉ် (Goal)

ဒါပေမယ့် ရော်နယ်ဒိုကတော့ စပို့တင်းအသင်းဆီ မပြန်ချင်ပဲ အခြားထိပ်တန်း အသင်းကြီးတွေဆီသာ သွားရောက် ဖို့ ဆန္ဒရှိနေခဲ့တာ ဖြစ်ပါတယ်။

ရော်နယ်ဒိုဟာ ဒီရာသီမှာ ယူနိုက်တက် အသင်းအတွက် ပွဲထွက်ကစားခွင့် နည်းပါးနေတာကြောင့် စိတ်ပျက်နေ သလို ပြီးခဲ့တဲ့ စပါးနဲ့ပွဲမှာ လူစားဝင်ခွင့် ငြင်းဆန်ခဲ့လို့ အသင်းရဲ့ အရေးယူခြင်းကိုလည်း ခံထားရပါတယ်။

အဲ့ဒါကြောင့် ရော်နယ်ဒိုကို နည်းပြဖြစ်သူက ချယ်လ်ဆီးအသင်းနဲပွဲမှာ လူစာရင်းကနေ ချန်လှပ်ခဲ့ပြီး လူငယ် အသင်းနဲ့သာ လေ့ကျင့်မှုတွေ ပြုလုပ်ခိုင်းခဲ့ပါတယ်။

ဒါပေမယ့် နည်းပြ အဲရစ်တန်ဟတ်နဲ့ ဆွေးနွေးမှုအပြီးမှာ ရော်နယ်ဒိုဟာ အသင်းကြီးနဲ့အတူ လေ့ကျင့်မှု ပြုလုပ်ခွင့် ရခဲ့ပြီး ရှရစ်ဖ်နဲ့ ကစားမယ့် ယူရိုပါလိဂ်ပွဲစဉ်မှာ ပွဲထွက်ပါဝင်ခွင့် ရဖွယ်ရှိတယ်လို့ သိရပါတယ်။

Source: Goal

CNI Sport News

၂၀၂၂ ခုနှစ်၊ အောက်တိုဘာ ၂၆

ပီအက်စ်ဂျီအသင်းနည်းပြ ဂယ်လ်တီယာက အသင်းရဲ့ အဓိကတိုက်စစ်မှူး ၃ ဦးဖြစ်တဲ့ မက်ဆီ၊ နေမာနဲ့ ဘတ်ပီတို့ရဲ့ နည်းပြဖြစ်ခွင့်ရတာ သူ့အတွက် ကံကောင်းပြီး သုခဘုံပဲလို့ မက္ကာဘီဟိုင်ဖာအသင်းကို အနိုင်ရခဲ့တဲ့ ချန်ပီယံလိဂ်ပွဲအပြီးမှာ ပြောလိုက်ပါတယ်။

ဂယ်လ်တီယာက “ကစားသမားတွေ ပျော်ရွှင်နေရတာကို မြင်ခဲ့ရပြီး ဒါက အရေးကြီးပါတယ်။ကျနော်တို့ ရှေ့တန်း ကစားသမား ၃ ဦးရဲ့ အကောင်းဆုံးပုံစံတွေကို ထုတ်ပြနိုင်ဖို့ စဉ်းစားခဲ့ရပြီး စနစ်က အလွန်အရေးကြီးပါတယ်။ သူတို့နဲ့ လေ့ကျင့်ရတာ အလွန်ပျော်ဖို့ ကောင်းပြီး သူတို့ ကစားနေတာကိုလည်း နေ့တိုင်းမြင်တွေ့ရပါတယ်။ နည်းပြတစ်ဦးအတွက်တော့ ဒါဟာ သုခဘုံပါပဲ” လို့ ပြောခဲ့တာပါ။

ပီအက်စ်ဂျီအသင်းဟာ မက္ကာဘီဟိုင်ဖာအသင်းနဲ့ ကစားခဲ့တဲ့ ချန်ပီယံလိဂ်အုပ်စုအဆင့်ပွဲစဉ်မှာ ၇ ဂိုး- ၂ ဂိုးနဲ့ ဂိုးပြတ်အနိုင်ရရှိခဲ့တာဖြစ်ပါတယ်။ဒီပွဲမှာ မက်ဆီနဲ့ ဘတ်ပီက ၂ ဂိုးစီသွင်းယူခဲ့သလို ၂ ဂိုးစီ ဂိုးဖန်တီးမှုပြုလုပ်ခဲ့ပြီး နေမာက ၁ ဂိုးသွင်းယူခဲ့တာပါ။ပီအက်စ်ဂျီအသင်းဟာ ဒီနိုင်ပွဲကြောင့် ချန်ပီယံလိဂ် ၁၆ သင်းအဆင့်ကို တက် ရောက်သွားပြီလည်း ဖြစ်ပါတယ်။ဒီပွဲမှာ ဂိုးသွင်းခဲ့တဲ့ မက်ဆီဟာ ချန်ပီယံလိဂ်သွင်းဂိုး ၁၂၉ ဂိုးအထိ ရရှိသွားခဲ့ တာပါ။

ဒါ့အပြင် မက်ဆီဟာ ဒီရာသီမှာ ပီအက်စ်ဂျီအသင်းအတွက် ၁၁ ဂိုးသွင်းယူထားပြီး ၁၂ ဂိုးဖန်တီးထားတာကြောင့် ဥရောပထိပ်တန်း ၅ လိဂ်မှာ ၁၀ ဂိုးနဲ့အထက် ဂိုးသွင်း၊ ဂိုးဖန်တီးနိုင်တဲ့ ပထမဆုံး ကစားသမားဖြစ်ခဲ့ပါတယ်။ မက်ဆီ၊ နေမာနဲ့ ဘတ်ပီတို့ ၃ ဦးစလုံးဟာ မက္ကာဘီဟိုင်ဖာနဲ့ တွေ့ဆုံခဲ့တဲ့ စက်တင်ဘာလကလည်း ဂိုးသွင်း နိုင်ခဲ့သလို ဒီပွဲမှာလည်း ၃ ဦးစလုံးဂိုးသွင်းယူနိုင်ခဲ့ကြတာပါ။ဒီရာသီမှာ ပီအက်စ်ဂျီအတွက် သူတို့ ၃ ဦးပေါင်း သွင်းဂိုး ၄၀ အထိ သွင်းယူပေးထားနိုင်ခဲ့ပြီဖြစ်ပါတယ်။

“သူတို့ဟာ တခြားသူတွေ မလုပ်နိုင်တဲ့အရာတွေကို လုပ်ဆောင်တာကြောင့် ကျနော်တို့ အားလုံး နှစ်သက် သဘောကျပါတယ်။တကယ်ကို အထူးအခွင့်အရေးပါပဲ” လို့ ပီအက်စ်ဂျီအသင်း ကွင်းလယ်ကစားသမား ဗီတင်ဟာ က ပြောခဲ့တာပါ။

ဒီရာသီ လီဂူးဝမ်းနဲ့ ချန်ပီယံလိဂ်ပြိုင်ပွဲမှာ ရှုံးပွဲမရှိဖြတ်သန်းနေတဲ့ ပီအက်စ်ဂျီအသင်းဟာ ဒီတစ်ပတ်လီဂူးဝမ်း ပွဲစဉ်အဖြစ် ထရိုယက်စ်အသင်းနဲ့ ကစားမှာဖြစ်ပြီး ဒီပွဲပြီးရင် ချန်ပီယံလိဂ်အုပ်စုအဆင့် နောက်ဆုံးပွဲစဉ်အဖြစ် ဂျူဗင်တပ်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source:ChannelNewsAsia