CNI Sport News

၂၀၂၂ ခုနှစ်၊ ဧပြီ ၂၀

ရုရှားသမ္မတ ပူတင်က ယူကရိန်းကို ကျူးကျော်ပြီးနောက် ရုရှားနဲ့ ဘယ်လာရုစ် တင်းနစ်ကြယ်ပွင့်တွေကို ဝင်ဘယ်လ်ဒန်မှာ ယှဉ်ပြိုင်ခွင့် ပိတ်ပင်လိုက်ပြီ ဖြစ်ပါတယ်။

ရုရှားရဲ့ လုပ်ရပ်ကြောင့် ရုရှားအမျိုးသား ဘောလုံးအသင်းဟာ ၂၀၂၂ ကမ္ဘာ့ဖလား ခြေစစ်ပွဲ ပလေးအောဖ့် အဆင့်ကနေ ထုတ် ပယ် ခံခဲ့ရပါတယ်။ ဒါ့အပြင် အမျိုးသမီး ဘောလုံးအသင်းဟာလည်း အခုနှစ်ထဲ ကစားမယ့် ဥရောပချန်ပီယံရှစ် ပြိုင်ပွဲကို ပါဝင် ကစားခွင့် ပိတ်ပင်ခံခဲ့ရတာပါ။

ပူတင်ရဲ့ ရုရှားအပေါ် သစ္စာခံတဲ့ ဘယ်လာရုစ်ကြောင့်လည်း သူတို့နိုင်ငံက အားကစားသမားတွေလည်း အပြစ်ပေး ခံခဲ့ရတာ ဖြစ်ပါတယ်။

ဝင်ဘယ်လ်ဒန်ရဲ့ အဓိက ကော်မတီက အခုနှစ်ထဲ ကျင်းပမယ့် ဂရမ်းစလမ်းပြိုင်ပွဲမှာ ရုရှားနဲ့ ဘယ်လာရုစ် ကစားသမားတွေ ကို ပိတ်ပင်လိုက်တာပါ။

တင်းနစ်ပြိုင်ပွဲ(AFP)

အဲ့ဒါကြောင့် ကမ္ဘာ့နံပတ်(၂) တင်းနစ်ကစားသမားဖြစ်တဲ့ မက်ဗီဒက်ဗ်ဟာ ဒီပြိုင်ပွဲကို ဝင်ရောက် ယှဉ်ပြိုင်လို့ရမှာ မဟုတ်တော့ ပါဘူး။
အမျိုးသမီး ကမ္ဘာ့အဆင့်(၄) ဘယ်လာရုစ် တင်းနစ်မယ် ဆာဘလန်ကာလည်း ဇွန်လ ၂၇ ရက်မှာ စတင်ကျင်းပမယ့် ဒီပြိုင်ပွဲကို လွဲချော်သွားပြီ ဖြစ်ပါတယ်။

ဒီလိုပိတ်ပင်တာနဲ့ ပတ်သက်ပြီး ကစားသမားတွေရဲ့ အဖွဲ့အစည်းထံ အင်္ဂါနေ့က အသိပေးခဲ့တယ်လို့ ဒေးလီးမေးလ် သတင်းမှာ ဖော်ပြထားတာပါ။ ဒီလိုပိတ်ပင်မှုဟာ ဗြိတိန်မှာရှိတဲ့ တခြားတင်းနစ်ပွဲတွေနဲ့ သက်ဆိုင်ခြင်း ရှိ၊ မရှိဆိုတာတော့ ရှင်းရှင်းလင်းလင်း မသိရသေး တာ ဖြစ်ပါတယ်။ ဒါပေမယ့် ဝင်ဘယ်လ်ဒန် ပြိုင်ပွဲဟာ ATP ၊WTA ပြိုင်ပွဲတွေနဲ့ သီးခြားဖြစ်တယ်လို့ သိရပါတယ်။

တခြား အားကစားပြိုင်ပွဲတွေမှာတော့ နိုင်ငံရဲ့ အလံ၊ နိုင်ငံရဲ့ သီချင်းကို ကိုယ်စားပြုခွင့် မပေးဘဲ ရုရှားနဲ့ ဘယ်လာရုစ် ကစား သမားတွေကို ဝင်ရောက်ယှဉ်ပြိုင်ခွင့် ပြုထားတာ ဖြစ်ပါတယ်။

Source: The Sun

CNI Sport News

၂၀၂၂ ခုနှစ်၊ ဧပြီ ၂၀

လီဗာပူးလ်နဲ့ ကစားခဲ့တဲ့ ပွဲစဉ်မှာ ဒဏ်ရာရရှိသွားခဲ့တဲ့ ပေါ့ဘာကို မန်ချက်စတာယူနိုက်တက် ဂျာစီနဲ့ ပရိသတ်တွေ နောက်ဆုံး မြင်တွေ့ခဲ့ရတာ ဖြစ်နိုင်တယ်လို့ ဂယ်ရီနဗီးလ်က ပြောလိုက်ပါတယ်။

မန်ချက်စတာယူနိုက်တက် အသင်းက လီဗာပူးလ် အသင်းကို ဂိုးပြတ် အရေးနိမ့်ခဲ့တဲ့ ပရီးမီးယားလိဂ်ပွဲစဉ်မှာ ပေါ့ဘာဟာ ပွဲထွက်လူစာရင်းမှာ ပါဝင်ခဲ့တာပါ။ ဒါပေမယ့် ဒဏ်ရာကြောင့် ပွဲချိန် (၁၀)မိနစ်မှာပဲ လင်ဂတ်နဲ့ လူစားလဲမှု ပြုလုပ်ခဲ့ရပါတယ်။

ပေါ့ဘာနဲ့ မန်ချက်စတာယူနိုက်တက်တို့ ချုပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးတော့မှာဖြစ်ပြီး ကစားသမား ဘက်က ဆုံးဖြတ်ချက် မချရသေးတာပါ။

ပြင်သစ်လက်ရွေးစင် ကစားသမားဟာ ဒီရာသီမှာ ဒဏ်ရာတွေနဲ့ ရုန်းကန်နေရပြီး အသင်းနဲ့ စာချုပ် သက်တမ်း တိုးဖွယ်မရှိ တာလည်း ဖြစ်ပါတယ်။ ပေါ့ဘာကို ခေါ်ယူဖို့ ပီအက်စ်ဂျီ၊ ဂျူဗင်တပ်စ် အပါအဝင် အသင်းတချို့က ချိတ်ဆက်မှုတွေ ပြုလုပ် နေ ကြတာပါ။

၂၀၁၆ က မန်ချက်စတာယူနိုက်တက် အသင်းကို ကလပ်စံချိန်တင် ပြောင်းရွှေ့ကြေးနဲ့ ရောက်ရှိလာခဲ့တဲ့ ပေါ့ဘာဟာ အသင်းနဲ့အတူ ယူရိုပါလိဂ်နဲ့ လိဂ်ဖလားတို့ကို ရယူနိုင်ခဲ့တာ ဖြစ်ပါတယ်။

ပေါ့ဘာ ဒဏ်ရာကြောင့် လင်ဂတ်နဲ့ လူစားလဲခံရစဉ်(Sports)

ဂယ်ရီနဗီးလ်က “ဒီဒဏ်ရာက ရက်သတ္တပတ် အနည်းငယ်ကြာခဲ့ရင်တော့ မန်ချက်စတာယူနိုက်တက် ဂျာစီ ဝတ်ဆင်ထားတဲ့ ပေါ့ဘာရဲ့ နောက်ဆုံးမိနစ် ဖြစ်သွားနိုင်ပါတယ်”လို့ Sky Sports ရဲ့ သုံးသပ်ချက်မှာ ပြောခဲ့တာပါ။

မန်ချက်စတာယူနိုက်တက် အသင်းခေါင်းဆောင်ဟောင်း ဂယ်ရီနဗီးလ်က ရွိုင်ကိန်းနဲ့အတူ အသင်းရဲ့ အခြေအနေကို အလွန် စိတ်ပျက်နေတာ ဖြစ်ပါတယ်။

“မန်ချက်စတာယူနိုက်တက် အသင်းဟာ ပြီးခဲ့တဲ့ ရာသီကုန်ပိုင်းအထိ အလားအလာ ကောင်းတယ်လို့ ထင်ခဲ့ပေမယ့် ဒီနေ့ မှာ တော့ သူတို့ရောက်ရှိတဲ့ နေရာအတွက် စိုးရိမ်စရာ ဖြစ်ခဲ့ပါတယ်။ ကျနော်တို့ သူတို့ကို ကြည့်ရတာ ဘာမှမရှိတော့ သလိုပါ။ တကယ်ကို ဘာမှမရှိတော့တာပါ”လို့ ဂယ်ရီနဗီးလ်က ပြောခဲ့ပါတယ်။

မန်ချက်စတာ ယူနိုက်တက် အသင်းဟာ လက်ရှိ အခြေအနေကြောင့် နည်းပြသစ်နဲ့အတူ အသင်းကို ပြုပြင်ပြောင်းလဲမှုတွေ ပြုလုပ်ရမယ်လို့ သုံးသပ်နေကြတာပါ။

မန်ချက်စတာယူနိုက်တက် အသင်းဟာ နည်းပြသစ်အဖြစ် အေဂျတ်စ် အသင်းကို ကိုင်တွယ်နေတဲ့ အဲရစ်တန်ဟတ်ကို ခန့်အပ် သွားမှာ ဖြစ်တယ်လို့ သတင်းတွေ အများအပြားက အတည်ပြုထားတာ ဖြစ်ပါတယ်။

Source: Metro

EPL ကို တန်းတက်နိုင်မှုနဲ့အတူ ပေါင်သန်း(၂၀၀)ရရှိမယ့် ဖူလ်ဟမ်

CNI Sport News

၂၀၂၂ ခုနှစ်၊ ဧပြီ ၂၀

ဖူလ်ဟမ် အသင်းဟာ ပရက်စတန် အသင်းနဲ့ ကစားခဲ့တဲ့ ချန်ပီယံရှစ်ပွဲစဉ်မှာ ၃ ဂိုး - ဂိုးမရှိနဲ့အနိုင်ရပြီး ပရီးမီးယား လိဂ်ကို တန်းပြန်တက်လာခဲ့ကာ ပေါင်သန်း(၂၀၀)ရရှိတော့မှာ ဖြစ်ပါတယ်။

ဖူလ်ဟမ် အသင်းဟာ ပြီးခဲ့တဲ့ရာသီက ပရီးမီးယားလိဂ်ကနေ ချန်ပီယံရှစ်ကို တန်းဆင်းသွားခဲ့ပေမယ့် တစ်ရာသီ အကြာမှာပဲ တန်းပြန်တက်နိုင်ခဲ့တာပါ။ လန်ဒန်ကလပ်ဟာ ချန်ပီယံရှစ်ပြိုင်ပွဲပြီးဆုံးဖို့အတွက် (၄)ပွဲကစားဖို့ ကျန်သေးပေမယ့် တတိယနေရာက ဟတ်ဒါဖီးစ် အသင်းကို (၁၃)မှတ်ဖြတ်ကာ ပရီးမီးယားလိဂ်ကို တိုက်ရိုက် တန်းတက်နိုင်ခဲ့တာဖြစ်ပါတယ်။ ဖူလ်ဟမ် အသင်း ပရိသတ်တွေဟာ ပွဲအပြီးမှာ ကွင်းအတွင်း ဝင်ရောက် အောင်ပွဲခံမှုတွေပြုလုပ်သွားခဲ့ကြတာပါ။

ဖူလ်ဟမ် အသင်းဟာ ဒီရာသီ ချန်ပီယံရှစ်ပြိုင်ပွဲမှာ (၄၂)ပွဲကစားပြီး (၉၈)ဂိုးအထိ သွင်းယူနိုင်ခဲ့ကာ ဒီထဲမှာ အဓိက တိုက်စစ်မှူးဖြစ်တဲ့ မီထရိုဗစ် က ဂိုး(၄၀)အထိ သွင်းယူခဲ့တာဖြစ်ပါတယ်။ ပြီးခဲ့တဲ့နွေရာသီက စကော့ပါကားရဲ့ နေရာမှာ အစားထိုးတာဝန်ယူခဲ့တဲ့ မာကိုဆေးလ်ဗားကတော့ ချန်ပီယံရှစ်ဆုဖလားကိုပါ ရယူနိုင်ဖို့ ပစ်မှတ်ထား နေတာပါ။

မာကိုဆေးလ်ဗား က “ဒီကလပ်အတွက် ကျနော်တို့လုပ်ဆောင်ခဲ့တဲ့ အောင်မြင်မှုအတွက် ဂုဏ်ယူရပါမယ်။ ဒီလို လုပ်ဆောင်နိုင်ဖို့ပဲ ကျနော်နဲ့ကျနော့်ရဲ့ အဖွဲ့ဝင်တွေက ဒီကိုရောက်ရှိလာခဲ့တာပါ။ ကစားသမားတွေရဲ့ အားထုတ်မှု မပါဘဲ ဒီလိုဖြစ်လာစရာအကြောင်းမရှိပါဘူး။ ရာသီတစ်လျှောက်လုံး ကျနော်တို့လွှမ်းမိုးထားတဲ့ ပုံစံတွေက တကယ်ကိုအံမခန်းပါဘဲ။ ဒါဟာ ကျနော်တို့အတွက် ကောင်းမွန်တဲ့ခရီးပါ။ အခုအချိန်မှာ သူတို့အတွက် အောင်ပွဲခံ ဂုဏ်ပြုပွဲလုပ်ပြီး ချန်ပီယံဆုယူဖို့ကြိုးစားရမယ့် အချိန်ပါပဲ” လို့ ပြောခဲ့ပါတယ်။

ဖူလ်ဟမ် အသင်းဟာ နောက်ဆုံး(၅)နှစ်အတွင်းမှာ ပရီးမီးယားလိဂ်ကို တတိယအကြိမ်မြောက် တန်းတက် နိုင်ခဲ့တာပါ။ သူတို့ဟာ ပရီးမီးယားလိဂ်ကို တန်းတက်လာပြီး တစ်ရာသီအကြာမှာပဲ ချန်ပီယံရှစ်ကို တန်းပြန် ဆင်းနေတာဖြစ်ပါတယ်။

မာကိုဆေးလ်ဗား က” ချန်ပီယံရှစ်နဲ့ ပရီးမီးယားလိဂ်ကြားက ကွာဟချက်က ပိုပြီး ကြီးမားပါတယ်။ ဒါကို ရာသီတိုင်းမှာ မြင်တွေ့နိုင်ပါတယ်။ တန်းတက်လာတဲ့ အသင်းတွေအနေနဲ့ သူတို့ လိုချင်တာ ကို ရအောင်လုပ်ဖို့ခက်ပါတယ်။ ဒါဟာ ခက်ခဲပေမယ့် စိန်ခေါ်မှုတစ်ခုပါ။ ဖူလ်ဟမ် ကို ပရီးမီးယားလိဂ်ကလပ် ဖြစ်အောင်လုပ်ရမယ်”လို့ ပြောခဲ့တာဖြစ်ပါတယ်။

ဖူလ်ဟမ် အသင်းနဲ့အတူ ပြီးခဲ့တဲ့ရာသီက ချန်ပီယံရှစ်ကို တန်းဆင်းခဲ့တဲ့ ဘုန်းမောက် အသင်းကလည်း ပရီးမီးယား လိဂ်ကို တန်းပြန်တက်နိုင်ဖို့ အခြေအနေကောင်းနေခဲ့တာဖြစ်ပါတယ်။

Source:TheSun

CNI Sport News

၂၀၂၂ ခုနှစ်၊ ဧပြီ ၂၀

မန်ချက်စတာယူနိုက်တက် အသင်းဟာ လီဗာပူးလ် အသင်းကို ၄ ဂိုး- ဂိုးမရှိနဲ့ ဂိုးပြတ်အရေးနိမ့်ပြီးနောက် ဒီ အသင်းဟာ သူကစားခဲ့တဲ့ အသင်းမဟုတ်တော့ဘူးလို့ ရွိုင်ကိန်းက ဝမ်းနည်းကြေကွဲစွာ ပြောလိုက်ပါတယ်။

မန်ချက်စတာယူနိုက်တက် အသင်းဟာ ဒီပွဲမှာ လီဗာပူးလ် အသင်းရဲ့ တစ်ဖက်သတ်ဖိကစားခြင်းကို ခံခဲ့ရတာ ဖြစ်ပြီး ဘောလုံးပေးပို့မှုကအစ လွဲချော်ခဲ့တာပါ။လီဗာပူးလ် အသင်းဟာ ဒီပွဲမှာ ဘောလုံးပိုင်ဆိုင်မှု (၇၂)ရာခိုင်နှုန်း၊ ဂိုးပေါက်ကန်သွင်းမှု(၁၄)ကြိမ် ဂိုးပေါက်တည့်မှု(၅)ကြိမ်ရှိခဲ့တာဖြစ်ပါတယ်။ မန်ချက်စတာယူနိုက်တက် အသင်း ကတော့ ဘောလုံးပိုင်ဆိုင်မှု(၂၈)ရာခိုင်နှုန်း၊ဂိုးပေါက်ကန်သွင်းမှု(၂)ကြိမ်နဲ့ ဂိုးပေါက်တည့်မှု(၁)ကြိမ်သာ ရှိခဲ့တာပါ။

မန်ချက်စတာယူနိုက်တက် အသင်းဟာ လီဗာပူးလ် အသင်းကို အိမ်ကွင်းမှာ ကစားခဲ့တဲ့ ပရီးမီးယားလိဂ်ပြိုင်ပွဲမှာ လည်း ၅ ဂိုး - ဂိုးမရှိနဲ့ ဂိုးပြတ်အရေးနိမ့်ခဲ့တာကြောင့် (၂)ပွဲပေါင်း ၉ ဂိုး - ဂိုးမရှိနဲ့ ဆိုးဆိုးရွားရွား အရေးနိမ့်ခဲ့ တာဖြစ်ပါတယ်။ အဲဒါကြောင့် မန်ချက်စတာယူနိုက်တက် အသင်းခေါင်းဆောင်ဟောင်း ရွိုင်ကိန်းက အသင်းရဲ့ အခြေအနေကို အလွန်စိတ်ပျက်နေတာပါ။

ရွိုင်ကိန်းက “အခုဒေါသမထွက်နိုင်တော့ပါဘူး။ ဝမ်းပဲဝမ်းနည်းတော့တာပါ။ သူတို့မှာ ခေါင်းဆောင်လည်း မရှိ၊အရည်အသွေးအပိုင်းကလည်း တော်တော်လေးကို အားနည်းနေပါတယ်။ သူတို့ဟာ နည်းပြသစ်လိုသလို ကစားသမား အပြောင်းအလဲပြုလုပ်ဖို့လည်း လိုပါတယ်။ ဒါတွေကို မြင်တွေ့ရတာ အလွန်ဝမ်းနည်းမိပါတယ်။ ဒီအသင်းဟာ ကျနော်ကစားခဲ့တဲ့ အသင်းမဟုတ်တော့ပါဘူး။ မြေဖြူခဲနဲ့ ဒိန်ခဲလိုပါပဲ”လို့ ပြောခဲ့ပါတယ်။

မန်ချက်စတာယူနိုက်တက် အသင်းအနေနဲ့ ပြန်လည်တည်ဆောက်ဖို့လိုတယ်လို့လည်း ရွိုင်ကိန်းက မှတ်ချက် ပေးခဲ့ပါသေးတယ်။ "ယူနိုက်တက်အနေနဲ့ ပြန်လည်တည်ဆောက်ဖို့လိုတယ်ဆိုတဲ့ စကားလုံးတွေကိုပဲ ကျနော် ပြန်သုံးရမှာပါ။ အသင်းအနေနဲ့ပရီးမီးယားလိဂ်ပြိုင်ပွဲရဲ့ အဆင့်(၆)နေရာမှာ ရပ်တည်နေတယ်ဆိုတာ မယုံနိုင် စရာပါပဲ။ အသင်းမှာ ခေါင်းဆောင်ပိုင်းမရှိဘူး။ စရိုက်လက္ခဏာတွေလည်းမရှိဘူး။ တိုက်ပွဲဝင်လိုစိတ်လည်း မရှိသလို ဘာဆုံးဖြတ်ချက်မှလည်း မရှိပါဘူး။ ဒီကလပ်က တော်တော်လေးဝေးကွာနေပါပြီ”လို့ ပြောခဲ့တာ ဖြစ်ပါတယ်။

မန်ချက်စတာယူနိုက်တက် အသင်းဟာ ဒီ ရှုံးပွဲကြောင့် အဆင့်(၄)နေရာက စပါးအသင်းထက်(၁)ပွဲပိုကစားထားပြီး (၃)မှတ်အကွာနဲ့ ပရီးမီးယားလိဂ်အမှတ်ပေးဇယား အဆင့်(၆)နေရာမှာ ရပ်တည်နေတာပါ။ မန်ချက်စတာကလပ် ဟာ ဒီတစ်ပတ်မှာတော့ ပရီးမီးယားလိဂ်ပွဲစဉ်အဖြစ် အာဆင်နယ် အသင်းနဲ့ အဝေးကွင်းမှာ ယှဉ်ပြိုင်ရမှာ ဖြစ်ပါ တယ်။

Source:Goal

CNI Sport News

၂၀၂၂ ခုနှစ်၊ ဧပြီ ၁၉

လီဗာပူးလ် ပရိသတ်တွေဟာ မနက်ဖြန်မနက်ပိုင်း အန်ဖီးလ်မှာ ကစားမယ့် မန်ချက်စတာယူနိုက်တက်နဲ့ ပရီးမီးယားလိဂ် ပွဲစဉ်မှာ ရော်နယ်ဒိုကို အားပေးမှုတွေ ပြုလုပ်သွားဖို့ စီစဉ်ထားကြပါတယ်။

ရော်နယ်ဒိုနဲ့ ဂျော်ဂျီနာတို့ဟာ  သူတို့ရဲ့ အမြွှာကလေး ၂ ဦးထဲက သားဖြစ်သူကို ဆုံးရှုံးခဲ့ရလို့ ဝမ်းနည်း ကြေကွဲနေတာ ဖြစ်ပါတယ်။ အဲ့ဒါကြောင့် လီဗာပူးလ် ပရိသတ်တွေဟာ ရော်နယ်ဒိုအတွက် ပွဲချိန် ၇ မိနစ်မှာ ၁ မိနစ်ကြာ လက်ခုပ်တီး အားပေးမှုတွေ ပြုလုပ်ဖို့ စီစဉ်ထားတာပါ။

လီဗာပူးလ်နဲ့ မန်ချက်စတာယူနိုက်တက် အသင်းတို့ဟာ ခါးသီးတဲ့ ပြိုင်ဘက်တွေ ဖြစ်ပေမယ့် လီဗာပူးလ် ပရိသတ်တွေရဲ့ လုပ်ရပ်ကတော့ လေးစားဖွယ်ရာ အဖြစ်ရှိနေတာလည်း ဖြစ်ပါတယ်။

မန်ချက်စတာယူနိုက်တက် အသင်းကလည်း ရော်နယ်ဒိုဟာ လီဗာပူးလ်နဲ့ ကစားမယ့်ပွဲကို ပါဝင်နိုင်မှာ မဟုတ်ဘူးလို့ အတည်ပြု ထုတ်ပြန်ထားပါတယ်။

Source: SPORTbible

CNI Sport News

၂၀၂၂ ခုနှစ်၊ ဧပြီ ၁၉

မန်စီးတီး အသင်းဟာ ဒေါ့မွန် အသင်းတိုက်စစ်မှူး ဟာလန်းရဲ့ ကိုယ်စားလှယ်တွေနဲ့ ပရီးမီးယားလိဂ်မှာ လုပ်ခလစာ အများ ဆုံးရ ကစားသမားဖြစ်လာစေမယ့် စာချုပ်အတွက် သဘောတူညီမှုရရှိခဲ့ပြီလို့ သိရပါတယ်။

မန်စီးတီး အသင်းဟာ ဒေါ့မွန် တိုက်စစ်မှူးကို တစ်ပတ်လုပ်ခ ပေါင် ၅ သိန်းကျော် တန်ကြေးရှိတဲ့ စာချုပ်ချုပ်ဆိုဖို့ ကမ်းလှမ်း ထားတာဖြစ်ပြီး ကစားသမားရဲ့ ကိုယ်စားလှယ်တွေက ဒါကို မီးစိမ်းပြခဲ့တယ်လို့ ဒေးလီးမေးလ်က ဖော်ပြထားတာပါ။

ဟာလန်းနဲ့ ဒေါ့မွန်အသင်းတို့ ချုပ်ဆိုထားတဲ့ စာချုပ်ထဲမှာ စာချုပ်ဖျက်သိမ်းကြေး ပေါင် ၆၃ သန်း ပါဝင်နေပြီး မန်စီးတီး အသင်းက ဒါကို ပေးချေကာ ၅ နှစ် စာချုပ်ချုပ်ဆိုဖို့ ပြင်ဆင်နေတာ ဖြစ်ပါတယ်။

ဟာလန်းကို ခေါ်ယူဖို့ ချယ်လ်ဆီး၊ မန်ချက်စတာယူနိုက်တက်၊ ရီးရယ်လ်၊ ဘာစီလိုနာနဲ့ ပီအက်စ်ဂျီ အသင်းတို့က စိတ်ဝင်စား ကြောင်း ပြသခဲ့တာပါ။ ဒါပေမယ့် မန်စီးတီး အသင်းက ဒီပြိုင်ဆိုင်မှုမှာ ဟာလန်းကို ခေါ်ယူဖို့ အခြားအသင်းတွေထက် လက်ဦးမှု ရယူနိုင်ခဲ့တာ ဖြစ်ပါတယ်။

ဟာလန်းရဲ့ ဖခင်ဖြစ်သူကလည်း မန်စီးတီး အသင်းမှာ ၂၀၀၀ ကနေ ၂၀၀၃ အထိ ကစားခဲ့တာပါ။ ၂၀၂၀ ဇန်နဝါရီလက ဆဲလ်ဘတ် အသင်းကနေ ဒေါ့မွန်ကို ရောက်ရှိလာတဲ့ ဟာလန်းဟာ ဂျာမန်ကလပ်အတွက် ၈၅ ပွဲ ပါဝင်ကစားထားပြီး ၈၂ ဂိုး သွင်းယူထားတာ ဖြစ်ပါတယ်။

ဟာလန်းကိုတွေ့ရစဉ်(MARCA)

ဟာလန်းဟာ နော်ဝေလက်ရွေးစင် အသင်းအတွက် ၁၇ ပွဲ ပါဝင်ကစားထားပြီး ၁၅ ဂိုး သွင်းယူထားကာ ကမ္ဘာပေါ်မှာ အသင်း အများအပြားက အလိုရှိဆုံး ကစားသမားတွေထဲက တစ်ဦးဖြစ်ခဲ့တာပါ။ မန်စီးတီး အသင်းဟာ ဒီရာသီမှာ အဓိက တိုက်စစ်မှူး မပါဘဲ ပွဲတွေအများအပြား ကစားနေတာဖြစ်ပြီး ဟာလန်းကို ခေါ်ယူဖို့က အသင်းကို အများကြီး သက်ရောက်မှု ရှိနိုင်မှာလည်း ဖြစ်ပါတယ်။ မန်စီးတီး အသင်းဟာ ပြီးခဲ့တဲ့ရာသီက တိုက်စစ်မှူး အဂွေရိုကို လက်လွှတ်ခဲ့ပေမယ့် ပြန်လည် အစားမထိုးနိုင်ခဲ့ တာပါ။

မန်ချက်စတာကလပ်ဟာ စပါး တိုက်စစ်မှူး ဟာရီကိန်းကို ခေါ်ယူဖို့ ကြိုးစားခဲ့ပေမယ့် စပါး အသင်းက မရောင်းချခဲ့တာ ကြောင့် အသင်းမှာ စီနီယာ တိုက်စစ်မှူးအဖြစ် ဂျီးဆပ်စ်သာ ရှိတော့တာ ဖြစ်ပါတယ်။

ဒါပေမယ့် မန်စီးတီး နည်းပြ ဂွာဒီယိုလာဟာ ဂျီးဆပ်စ်ကို ပွဲတိုင်း အသုံးပြုခြင်း မရှိခဲ့ပါဘူး။ မန်စီးတီး အသင်းဟာ ဒီရာသီမှာ တိုက်စစ်မှူး စစ်စစ်ကို အသုံးပြုခြင်း မရှိခဲ့ပေမယ့် ပရီးမီးယားလိဂ်နဲ့ ချန်ပီယံလိဂ်ပြိုင်ပွဲမှာ ရလဒ်ကောင်းတွေ ရရှိနေတာ ဖြစ်ပါတယ်။

Source: Metro

CNI Sport News

၂၀၂၂ ခုနှစ်၊ ဧပြီ ၁၉

ကမ္ဘာ့လက်ဝှေ့ချန်ပီယံဟောင်း အာမီယာခန်း ဟာ တနင်္လာနေ့က လန်ဒန်မြို့အရှေ့ဘက်ရှိ လေတန်ဧရိယာမှာ သေနတ်ချိန်ပြီး လုယက်မှုခံလိုက်ရတဲ့ သားကောင်ဖြစ်ခဲ့တယ်လို့ ပြောလိုက်ပါတယ်။

အာမီယာခန်း ဟာ ဇနီးဖြစ်သူနဲ့ လမ်းလျှောက်ထွက်ပြီး လမ်းဖြတ်ကူးချိန်မှာ လူနှစ်ဦးက သူ့ဆီကို ပြေးလာခဲ့တယ် လို့ ဒီအဖြစ်အပျက်နဲ့ပတ်သက်ပြီး ပြောခဲ့တာပါ။အဆိုပါလူနှစ်ဦးဟာ အာမီယာခန်းရဲ့မျက်နှာကို သေနတ်နဲ့ ချိန်ပြီး နာရီကို လုယူသွားခဲ့တာဖြစ်ပါတယ်။ဒါပေမယ့် အာမီယာခန်းနဲ့ ဇနီးဖြစ်သူတို့ကတော့ ဒီ ဖြစ်ရပ်ဆိုးအပြီးမှာ ဘေးကင်းစွာနဲ့ ကျန်ရစ်ခဲ့ကြတာပါ။

လုယူသွားခဲ့တဲ့ အာမီယာခန်းရဲ့ နာရီဟာ ပေါင်(၇၂၀၀၀) တန်ကြေးရှိတဲ့ Franck Muller Vanguard နာရီ အမျိုး အစားဖြစ်ပြီး သူ့ကိုရာချီတဲ့ စိန်တွေနဲ့အလှဆင်ခဲ့တာဖြစ်ပါတယ်။

အာမီယာခန်း က “လန်ဒန်အရှေ့ဘက် လေတန်မှာ သေနတ်နဲ့ချိန်ပြီး နာရီလုယူခံလိုက်ရပါတယ်။ကျနော်နဲ့ ဖာရယ်လ်တို့ လမ်းဖြတ်ကူးခဲ့ပါတယ်။ကံကောင်းစွာနဲ့ပဲ သူမဟာ ကျနော့်ရဲ့နောက်ကို ခြေလှမ်းအနည်းငယ်သာ လှမ်းခဲ့ပါတယ်။လူနှစ်ယောက် က ကျနော့်ဆီကို ပြေးလာပြီး မျက်နှာကို သေနတ်နဲ့ချိန်ကာ လက်ပတ်နာရီကို တောင်းခဲ့ပါတယ်။အဓိက ကတော့ ကျနော်တို့နှစ်ဦးလုံး ဘေးကင်းဖို့ပါပဲ”လို့ တွစ်တာမှာ ရေးသားခဲ့ပါတယ်။

ဗြိတိန်နိုင်ငံသား အိုလံပစ်ငွေတံဆိပ်ဆုရ အာမီယာခန်း ဟာ ဖေဖော်ဝါရီလက ကယ်လ်ဘရွတ်ခ် နဲ့ နောက်ဆုံး ထိုးသတ်ထားတာဖြစ်ပြီး အရေးနိမ့်ထားတာပါ။ အာမီယာခန်း က ဒီရှုံးပွဲဟာ သူ့ရဲ့ လက်ဝှေ့ကစားသမားဘဝ နောက်ဆုံးပွဲဖြစ်တယ်လို့ပြောထားခဲ့တာဖြစ်ပါတယ်။ အာမီယာခန်း ဟာ လက်ဝှေ့ကစားသမားဘဝ ပွဲပေါင်း (၄၀)ထိုးသတ်ထားပြီး (၃၄)ပွဲအနိုင်ရကာ (၆)ပွဲရှုံးနိမ့်ထားတာဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ ဧပြီ ၁၉

ဝိန်းရွန်နီ ဟာ ဒါဘီအသင်း ချန်ပီယံရှစ်ကနေ တန်းဆင်းသွားခဲ့ပေမယ့် အသင်းနည်းပြအဖြစ် ဆက်ရှိဖို့ မျှော်လင့် ကြောင်း ပြောသွားခဲ့ပါတယ်။ဒါပေမယ့် အသင်းကို အပြီးသတ်လွှဲပြောင်းပြီးမှသာ ဆက်ရှိနိုင်မယ်လို့ ပြောခဲ့တာ ဖြစ်ပါတယ်။

ဒါဘီ အသင်းဟာ ကျုပီအာ အသင်းနဲ့ ကစားခဲ့တဲ့ ချန်ပီယံရှစ်ပွဲမှာ ၁ ဂိုး- ဂိုးမရှိနဲ့ အရေးနိမ့်ခဲ့ပြီးနောက် လာမယ့် နှစ်ရာသီ လိဂ်ဝမ်းပြိုင်ပွဲမှာ ကစားရဖို့ သေချာသွားခဲ့တာပါ။ ဒါဘီ အသင်းဟာ အုပ်ချုပ်ရေး ဝင်ရောက်မှုနဲ့ ဘဏ္ဍာရေးစည်းမျဉ်းတွေကို ချိုးဖောက်ခဲ့တဲ့အတွက် ရမှတ်(၂၁)မှတ်နှုတ်ယူခံခဲ့ရတာဖြစ်ပါတယ်။ ဝိန်းရွန်နီ နဲ့ ကစားသမားတွေရဲ့ ကြိုးစားအားထုတ်မှုကြောင့် ဒါဘီ အသင်းဟာ ရမှတ်ပေါင်း(၃၁)မှတ်ထိ ရရှိအောင် ပြန် ကစားနိုင်ခဲ့တာပါ။

ဒါပေမယ့်လည်း အသင်းဟာ ချန်ပီယံရှစ်ပြိုင်ပွဲပြီးဆုံးဖို့ (၃)ပွဲသာလိုတော့တဲ့အချိန်မှာ တန်းဆင်းဇုန်အထက် က ရီးဒင်းအသင်းနဲ့ (၁၀)မှတ်ကွာဟသွားတာကြောင့် တန်းဆင်းသွားခဲ့တာဖြစ်ပါတယ်။ ဒါဘီ အသင်းကို ပိုင်ရှင် အသစ်အဖြစ် အမေရိကန်လူမျိုး ခရစ်ကချာနာ က ဝယ်ယူဖို့ရှိနေပြီး ဒီလွှဲပြောင်းဝယ်ယူမှုသာ ပြီးစီးခဲ့မယ်ဆိုရင် ဝိန်းရွန်နီ ဟာ အသင်းကို ဆက်လက်ကိုင်တွယ်မှာ ဖြစ်တယ်လို့ ပြောခဲ့တာပါ။ဒါဘီ အသင်းဟာ ချန်ပီယံရှစ် ပြိုင်ပွဲ ကနေ တန်းဆင်းသွားခဲ့ပေမယ့် ဝိန်းရွန်နီ ကတော့ သူ့ရဲ့ ကစားသမားတွေနဲ့ ဝန်ထမ်းတွေကို ဂုဏ်ယူမှု အပြည့် ရှိကြောင်း ပြောခဲ့ပါသေးတယ်။

ဝိန်းရွန်နီ က “ကစားသမားတွေ တစ်ဦးချင်းနဲ့အသင်းရဲ့ ဖွံ့ဖြိုးတိုးတက်မှုက အပြုသဘောဆောင်ပါတယ်။ တစ် ရာသီလုံး အားပေးခဲ့တဲ့ ပရိသတ်တွေရဲ့အားပေးမှုက မယုံနိုင်စရာပဲလို့ ကျနော်ထင်ပါတယ်။စိတ်ပျက်မိပြီး ဝမ်းနည်းမှုတွေခံစားခဲ့ရပေမယ့် ဂုဏ်ယူမိပါတယ်။ကလပ်ကို ပြန်လည်တည်ဆောက်ပြီး ရှေ့ဆက်သွားရမှာပါ။ အဲဒါကြောင့် လွှဲပြောင်းမှုကို လိုအပ်ပြီး ဒါကလည်း မြန်မြန်ဆန်ဆန်ဖြစ်ရပါမယ်။ နောက်ရာသီမှာ ကျနော်တို့ ဘယ်လိဂ်ကို သွားရမလဲဆိုတာ သိသွားပါပြီ။အဲဒါကြောင့် မြန်မြန်ဆန်ဆန်နဲ့ တန်းပြန်တက်နိုင်ဖို့ ကစားသမားတွေ ခေါ်ယူဖို့လိုပါတယ်”လို့ ပြောခဲ့ပါတယ်။

ဒါအပြင် ဝိန်းရွန်နီ က “ဒီ လွှဲပြောင်းမှုက ဖြစ်ဖို့လိုပါတယ်။ ဒီလိုမှမဖြစ်ရင် ကလပ်ဟာ ဘယ်မှာ အဆုံးသတ် သွားမလဲဆိုတာကို ကြောက်မိပါတယ်။ ကျနော် ဒီမှာဆက်ရှိချင်ပြီး ပျော်ရွှင်စရာ နေ့ရက်တွေကို ယူဆောင် လာချင်ပါတယ်”လို့ ပြောခဲ့တာဖြစ်ပါတယ်။

ဝိန်းရွန်နီ ရဲ့ ဒါဘီ အသင်းဟာ ရမှတ်မနှုတ်ခံရဘူးဆိုရင် ရမှတ်(၅၂)မှတ်နဲ့ အမှတ်ပေးဇယား အဆင့်(၁၇)နေရာမှာ ရပ်တည်နိုင်မှာလည်းဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ ဧပြီ ၁၉

ရော်နယ်ဒို က သူ့ရဲ့ အတူနေချစ်သူဖြစ်တဲ့ ဂျော်ဂျီနာ ကလေးမွေးဖွားပြီးနောက် အမြွှာကလေးနှစ်ဦးထဲက တစ်ဦး ဟာ သေဆုံးသွားကြောင်း ထုတ်ဖော်ပြောလာခဲ့ပါတယ်။

ရော်နယ်ဒိုနဲ့ ဂျော်ဂျီနာတို့ကတော့ ဒီအဖြစ်အပျက်ကြောင့် အလွန်ဝမ်းနည်းကြေကွဲနေကြတာပါ။သူတို့နှစ်ဦးဟာ ပြီးခဲ့တဲ့နှစ် အောက်တိုဘာလက သားနဲ့သမီး အမြွှာကလေးနှစ်ဦးကို ကိုယ်ဝန်လွယ်ထားရကြောင်း ကြေညာခဲ့တာ ဖြစ်ပါတယ်။ဒါပေမယ့် သူ့ရဲ့သားလေးဟာ မွေးဖွားအပြီးမှာ သေဆုံးသွားခဲ့တယ်လို့ မန်ချက်စတာယူနိုက်တက် ကစားသမားက ပြောခဲ့တာပါ။ရော်နယ်ဒို က သူတို့ဟာ အလွန်ဝမ်းနည်းနေပေမယ့် သမီးလေးက အသက်ရှင်ဖို့ ခွန်အားတွေပေးတယ်လို့ ပြောခဲ့တာဖြစ်ပါတယ်။

ရော်နယ်ဒို က “ကျနော်တို့ရဲ့ သားလေး သေဆုံးသွားပြီဆိုတာကို အလွန်ဝမ်းနည်းစွာနဲ့ပဲ အသိပေးပါရစေ။ဒါဟာ မိဘတိုင်းခံစားရနိုင်တဲ့ အကြီးမားဆုံးနာကျင်မှုပါ။အသက်ရှင်ကျန်ရစ်ခဲ့တဲ့ သမီးလေးက ကျနော်တို့အတွက် မျှော်လင့်ချက်အချို့၊ပျော်ရွှင်မှုနဲ့ ခွန်အားတွေကို ပေးစွမ်းပါတယ်။ဒီလိုဆုံးရှုံးမှုအတွက် ကျနော်တို့ အားလုံး ကြေကွဲ ဝမ်းနည်းနေပြီး အခုလိုခက်ခဲနေတဲ့အချိန်မှာ ကိုယ်ရေးကိုယ်တာကိစ္စရပ်တွေအတွက် မေတ္တာရပ်ခံပါတယ်။ ကျနော်တို့ရဲ့ သားလေး၊မင်းက ကျနော်တို့ရဲ့ နတ်သားလေးပါပဲ။ကျနော်တို့ သူ့ကို အမြဲတမ်း ချစ်နေမှာပါ”လို့ ရေးသားခဲ့တာပါ။

ရော်နယ်ဒို ရဲ့ အဖြစ်အပျက်နဲ့ပတ်သက်ပြီး မန်ချက်စတာယူနိုက်တက် အသင်းက “မင်းရဲ့ နာကျင်မှုက ငါတို့ရဲ့ နာကျင်မှုပါပဲ။ဒီအချိန်မှာ မင်းနဲ့ မင်းရဲ့မိသားစုတွေကို ချစ်ခြင်းမေတ္တာတွေနဲ့ ခွန်အားတွေပေးပို့ပါတယ်”လို့ ရေးသားခဲ့ပါတယ်။အသင်းဖော် ရက်ရှ်ဖိုဒ့်၊အသင်းဟောင်း ရီးရယ်လ်၊မန်စီးတီး အပါအဝင် ပရီးမီးယားလိဂ်ကလပ် အချို့ကလည်း ဝမ်းနည်းကြောင်း ရေးသားကာ မက်ဆေ့ချ်တွေ ပေးပို့ခဲ့ကြတာပါ။

ရော်နယ်ဒို ဟာ (၁၁)နှစ်အရွယ် ဂျုနီယာ၊(၄)နှစ်အရွယ်ရှိ အမြွှာနှစ်ဦးဖြစ်တဲ့ အီဗာနဲ့ မတ်တီယို၊(၃)နှစ်အရွယ်ရှိ မာတီနာတို့ရဲ့ ဖခင်ဖြစ်ပြီး အခုမွေးလိုက်တဲ့ သမီးလေးအပါအဝင် ကလေး(၅)ဦးရဲ့ ဖခင်အဖြစ် ရှိနေတာ ဖြစ်ပါ တယ်။

Source:TheSun