CNI Sport News

၂၀၂၂ ခုနှစ်၊ စက်တင်ဘာ ၁၇

အီကွေဒေါအသင်းဟာ အသုံးပြုလို့မရတဲ့ ကစားသမားဖြစ်တဲ့ ကတ်စတီလိုကို အသုံးပြုခဲ့တယ်ဆိုတဲ့ တိုင်ကြားချက်တွေကို ဖီဖာက ပယ်ချလိုက်ပါတယ်။အဲဒါကြောင့် အီကွေဒေါအသင်းဟာ ကမ္ဘာ့ဖလား ယှဉ်ပြိုင်ခွင့် ရရှိသွားပြီဖြစ်ပါတယ်။

ဒီမတိုင်ခင်က အီကွေဒေါအသင်း ညာနောက်ခံလူ ကတ်စတီလိုဟာ ၁၉၉၅ ခုနှစ်၊ ကိုလံဘီယာနိုင်ငံ တူမာကိုမှာ မွေးဖွားခဲ့တာဖြစ်ပြီး ၁၉၉၈ ခုနှစ်၊ အီကွေဒေါမှာ မွေးဖွားခဲ့တာမဟုတ်ဘူးလို့ ချီလီ ဘောလုံး အဖွဲ့ချုပ်က သက်သေအထောက်အထားတွေ ပြသခဲ့မှုအပေါ် ကတ်စတီလိုကလည်း မွေးစာရင်း အတု ပြုလုပ်ခဲ့တယ်လို့ ဝန်ခံလိုက်တာကြောင့် အီကွေဒေါ အသင်းဟာ ၂၀၂၂ ကမ္ဘာ့ဖလား ပြိုင်ပွဲကနေ ထုတ်ပယ်ခံရဖို့ အခြေအနေနဲ့ ရင်ဆိုင်ခဲ့ရတာပါ။

ယခုအခါ ချီလီဘက်က ဖီဖာရဲ့ ပယ်ချလိုက်တဲ့ ဆုံးဖြတ်ချက်အပေါ် မကျေနပ်တာကြောင့် အားကစား ခုံရုံးထံ အယူခံဝင်သွားမယ်လို့ သိရပါတယ်။ဖီဖာဟာ ဇွန်လကတည်းက ကတ်စတီလိုဟာ အသုံးပြုလို့ ရတဲ့ ကစားသမားဖြစ်တယ်လို့ ပြောထားခဲ့ပေမယ့် ချီလီနဲ့ ပီရူးဘောလုံးအဖွဲ့ချုပ်တွေက အယူခံထပ် ဝင်ခဲ့တာဖြစ်ပါတယ်။ အခုအချိန် မှာတော့ ဖီဖာအယူခံကော်မတီက ကတ်စတီလိုဟာ အီကွေဒေါအတွက် ကစားလို့ရတဲ့သူလို့ ပြောခဲ့တာ ပါ။

ချီလီဘောလုံးအဖွဲ့ချုပ်အထွေအထွေအတွင်းရေးမှူး ယန်းက “ဒီနေ့က ဘောလုံးနဲ့ စနစ်ရဲ့ ယုံကြည် စိတ်ချရမှုတွေအတွက် မှောင်မိုက်တဲ့ နေ့တစ်နေ့ပါပဲ”လို့ ပြောပါတယ်။ကတ်စတီလိုဟာ အီကွေဒေါ အတွက် ၂၀၂၂ ကမ္ဘာ့ဖလားခြေစစ်ပွဲ ၈ ပွဲ ပါဝင်ကစားခဲ့တာဖြစ်ပြီး ချီလီဘောလုံးအဖွဲ့ချုပ်ကတော့ ကစားသမားဟာ မွေးစာရင်းအတုအသုံးပြုခဲ့တယ်လို့ အခိုင်အမာပြောခဲ့တာပါ။ ပြီးခဲ့တဲအပတ်က ဒေးလီးမေးလ်ဟာ ကတ်စတီလိုရဲ့ အင်တာဗျူးအသေးစိတ်ကို ချပြခဲ့တာမှာ ကစားသမားဟာ စာရွက် စာတမ်းအတု အသုံးပြုခဲ့တယ်လို့ ဝန်ခံခဲ့တာဖြစ်ပါတယ်။

ဖီဖာကတော့ “တင်ပြထားတဲ့ စာရွက်စာတမ်းပေါ်မှာ အခြေခံပြီး ကစားသမားကို အီကွေဒေါ နိုင်ငံသား အဖြစ် အမြဲတမ်း သတ်မှတ်ရမယ်” လို့ ထုတ်ပြန်ထားတာပါ။ ချီလီဘောလုံးအဖွဲ့ချုပ် အထွေအထွေ အတွင်းရေးမှူး ယန်းက “ ဖီဖာရဲ့ ကြားနာမှုမှာ သူပါဝင်ဖို့ ငြင်းဆန်ခဲ့တာကို အံသြစရာ မရှိပါဘူး။ လက်ရှိ ဆုံးဖြတ်ချက်နဲ့ပတ်သက်ပြီး အားကစားဆိုင်ရာ ခုံရုံးမှာ အယူခံဝင်ဖို့ ကျန်ရှိနေပါသေးတယ်” လို့ ပြောခဲ့ပါ တယ်။

အယူခံဝင်သွားမယ့် ချီလီဘောလုံးအဖွဲ့ချုပ်ရှေ့နေဖြစ်သူ ကာလက်စ်ဇိုက “ရှေ့နေတစ်ဦးအနေနဲ့ ဒီလို မမျှတမှုကို ကျနော့်ဘဝမှာ တစ်ခါမှမမြင်တွေ့ဖူးပါဘူး။ ကစားသမားကို ကိုလံဘီယာမှာ မွေးဖွားခဲ့တယ် ဆိုတာ သံသယမရှိပါဘူး။ဒါကို သက်သေပြနိုင်တဲ့ စာရွက်စာတမ်းတွေအများကြီး ရှိပါတယ်။ ကစားသမားရဲ့ ဝန်ခံချက်ကို လူတိုင်းကြားခဲ့ရပါတယ်။လိမ်လည်မှုကို ခွင့်ပြုတယ်ဆိုတဲ့ သတင်းစကားက အလွန်ရှင်းပါတယ်”လို့ ပြောခဲ့ပါတယ်။
အီကွေဒေါဟာ ကမ္ဘာ့ဖလားခြေစစ်ပွဲ တောင်အမေရိကဇုန်ရဲ့ အဆင့် ၄ နေရာနဲ့ ခြေစစ်ပွဲတိုက်ရိုက် အောင်မြင်ခဲ့တာဖြစ်ပြီး ပီရူးက အဆင့် ၅၊ ချီလီက အဆင့် ၇ နေရာမှာ ရပ်တည်ခဲ့ပါတယ်။ အီကွေဒေါ အသင်းဟာ ကမ္ဘာ့ဖလားပြိုင်ပွဲမှာ ကာတာ၊ နယ်သာလန်၊ ဆီနီဂေါတို့နဲ့ ကျရောက်နေတာ ဖြစ်ပါတယ်။

CNI Sport News

၂၀၂၂ ခုနှစ်၊ စက်တင်ဘာ ၁၇

အမေရိကန်သမ္မတ ဂျိုးဘိုင်ဒန်ဟာ ရုရှားမှာ ဖမ်းဆီးထိန်းသိမ်းခံထားရတဲ့ ဘတ်စကတ်ဘောကြယ်ပွင့် ဘရစ်တနီဂရိုင်နာရဲ့ မိသားစုနဲ့ အိမ်ဖြူတော်မှာ တွေ့ဆုံခဲ့ပါတယ်။

ရုရှားမှာ ဖမ်းဆီးထိန်းသိမ်းခံထားရတာကနေ လွတ်မြောက်နိုင်ဖို့ ဝါရှင်တန်မှာ ကြိုးပမ်းနေတာလို့ အယ်လ်ဂျားဇီးယား သတင်းဌာနမှာ ရေးသားဖော်ပြထားတာပါ။ဂျိုးဘိုင်ဒန်ဟာ Oval Office မှာ ဘရစ်တနီဂရိုင်နာရဲ့ ဇနီးဖြစ်သူ ချီရယ်လ်ဂရိုင်နာနဲ့ တွေ့ဆုံခဲ့တာ ဖြစ်ပါတယ်။

ဒီလိုမျက်နှာချင်း ဆိုင်တွေ့ဆုံဆွေးနွေးမှုတွေကနေ မိသားစုတွေဟာ အမေရိကန်ပြည်ထောင်စု အုပ်ချုပ်ရေးက သူတို့ စိတ်ထဲမှာ ရှေ့ဆုံးကနေ ရှိနေကြောင်း ပြသနိုင်ဖို့ ဘိုင်ဒန်က မျှော်လင့်ထား ကြောင်း အိမ်ဖြူတော် ပြောရေးဆိုခွင့်ရှိသူက အခုအပတ်အစောပိုင်းမှာ ပြောခဲ့တာ ဖြစ်ပါတယ်။

အိမ်ဖြူတော်ပြောရေးဆိုခွင့်ရှိသူဂျန်းပီရယ်လ်က “ ဒီတွေ့ဆုံမှုရဲ့ ရည်ရွယ်ချက်က ရုရှားဟာ ကျမတို့ရဲ့ ကမ်းလှမ်းမှုကို လက်ခံပြီး သူတို့ချစ်ရတဲ့သူတွေကို အိမ်ပြန်ခေါ်လာနိုင်ကြောင်း မိသားစုထံအသိပေးဖို့ ပြောချင်တာပါ။ဒါပေမယ့် ဒီ ညှိနှိုင်းမှုမှာ ကျမတို့ မြင်နေရတာမျိုးတော့ မဟုတ်ပါဘူးလို့” သတင်း ထောက်တွေကို ပြောခဲ့တာပါ။

အမေရိကန်လက်ရွေးစင်နဲ့ အိုလံပစ်ရွှေတံဆိပ် ၂ ကြိမ်ရယူနိုင်ခဲ့တဲ့ ဘရစ်တနီဂရိုင်နာဟာ မူးယစ် ဆေးစွဲချက်တွေနဲ့ ပြီးခဲ့တဲ့လက ထောင်ဒဏ် ၉ နှစ်ချမှတ်ခံထားရတာ ဖြစ်ပါတယ်။သူမဟာ ရုရှားက ယူကရိန်းကို အပြည့်အဝမကျူးကျော်ခင် ရက်ပိုင်းအလို ဖေဖော်ဝါရီလမှာကတည်းက ဖမ်းဆီးခံခဲ့ရတာ ပါ။ဝါရှင်တန်ဟာ ဂရိုင်နာလွတ်မြောက်နိုင်ဖို့အတွက် မော်စကိုထံ ကြီးမားတဲ့ အဆိုပြုချက်တစ်ခု ပြုလုပ် ခဲ့တယ်လို့ ဇူလိုင်လက နိုင်ငံခြားရေးဝန်ကြီး အန်တိုနီဘလင်ကန်က ပြောခဲ့ပါတယ်။

ဘိုင်ဒန်အစိုးရဟာ အမေရိကန်မှာ ထိန်းသိမ်းခံထားရတဲ့ ရုရှားလက်နက်ရောင်းဝယ်သူတွေနဲ့ ပတ်သက် တဲ့ အကျဉ်းသားလဲလှယ်ရေး ကမ်းလှမ်းမှုကို ရုရှားနဲ့ပြုလုပ်ထားတယ်လို့လည်း အမေရိကန်မီဒီယာ အချို့က ဖော်ပြထားတာပါ။

ဒါ့အပြင် သမ္မတ ဂျိုးဘိုင်ဒန်ဟာ ဘရစ်တနီဂရိုင်နာရဲ့မိသားစုအပြင် သူလျှိုလုပ်မှုစွဲချက်နဲ့ ၂၀၂၀ က ရုရှားမှာ ထောင်ဒဏ် ၁၆ နှစ်ချမှတ်ခံခဲ့ရတဲ့ မရိန်းတပ်သားဟောင်း ဝီလန်ရဲ့ ဇနီးသည်ဖြစ်သူနဲ့လည်း အိမ်ဖြူတော်မှာ တွေ့ဆုံခဲ့တာဖြစ်ပါတယ်။

Source:Aljazeera

CNI Sport News

၂၀၂၂ ခုနှစ်၊ စက်တင်ဘာ ၁၆

ယူကရိန်းဘောလုံးအာဏာပိုင်တွေက ယူရို ၂၀၂၄ ပြိုင်ပွဲခြေစစ်ပွဲအတွက် အုပ်စုမဲခွဲတာမှာ ရုရှားကို ဖယ်ထုတ်ဖို့ တောင်းဆိုလိုက်ပါတယ်။

ဒီပြိုင်ပွဲအတွက် ခြေစစ်ပွဲအုပ်စုမဲခွဲမှုကို အောက်တိုဘာလ ၉ ရက် ဂျာမနီမှာပြုလုပ်မယ့် အခမ်းအနားမှာ ဆုံးဖြတ်သွားမှာပါ။ယူကရိန်းဘောလုံးအဖွဲ့ချုပ်ဉက္ကဋ္ဌ ပါဗယ်လ်ကိုက “ကျနော်တို့ဟာ အောက်တိုဘာလ ၉ ရက် ဖရန့်ဖတ်မှာ စီစဉ်ထားတဲ့ ယူရို ၂၀၂၄ ခြေစစ်ပွဲအုပ်စုမဲခွဲမှုမှာ ရုရှားကို မပါဝင်စေချင်တဲ့ ရည်ရွယ် ချက်နဲ့ ယူအီးအက်ဖ်အေအဆင့်မှာ အားထုတ်ကြိုးပမ်းနေတယ်”လို့ ပြောခဲ့တာဖြစ်ပါတယ်။

နိုင်ငံတကာအိုလံပစ်ကော်မတီရဲ့ အကြံပြုချက်အတိုင်း ရုရှားလက်ရွေးစင်နဲ့ ကလပ်အသင်းတွေကို ဖီဖာ နဲ့ ယူအီးအက်ဖ်အေက ကျင်းပထားတဲ့ပြိုင်ပွဲတွေမှာ ဝင်ရောက်ယှဉ်ပြိုင်ခွင့် ပိတ်ပင်ထားတာပါ။ ဖီဖာ ကတော့ အကန့်အသတ်မရှိ ပိတ်ပင်ထားတာဖြစ်ပြီး အဲဒါကြောင့်လည်း ရုရှားအမျိုးသားအသင်းဟာ ၂၀၂၂ ကမ္ဘာ့ဖလားပြိုင်ပွဲယှဉ်ပြိုင်ခွင့် အခွင့်အရေးဆုံးရှုံးခဲ့ပါတယ်။ယူအီးအက်ဖ်အေဟာ အခုနှစ်ရာသီမှာ လည်း ရုရှားကလပ်အသင်းတွေကို ယှဉ်ပြိုင်ခွင့် ပိတ်ပင်ထားတာပါ။

ဒါပေမယ့် ယူရို ၂၀၂၄ ပြိုင်ပွဲအတွက် ခြေစစ်ပွဲတွေမှာ ရုရှားပါဝင်လာနိုင်တယ်ဆိုတဲ့ တရားဝင် ထုတ်ပြန် ချက်တွေ မထုတ်ပြန်သေးတာ ဖြစ်ပါတယ်။စက်တင်ဘာလ ၂၀ ရက် ခရိုအေးရှားမှာ ကျင်းပမယ့် ယူအီး အက်ဖ်အေအမှုဆောင်ကော်မတီအစည်းအဝေးမှာ ဒီပြဿနာကို ဖြေရှင်းနိုင်မယ်လို့ ရုရှားမီဒီယာတွေက ဖော်ပြထားတာပါ။အဲဒီမှာ ရုရှားကို ယူရို ၂၀၂၄ ခြေစစ်ပွဲတွေမှာ ပါဝင်ခွင့် ရှိ၊ မရှိ ဆုံးဖြတ်နိုင်မယ်လို့ သိရပါတယ်။

ယူကရိန်းဘောလုံးအဖွဲ့ချုပ်ဥက္ကဋ္ဌက “စိန့်ပီတာစဘတ်မှာ ကစားဖို့ စီစဉ်ထားတဲ့ ရုရှားနဲ့ ဘော့စနီးယား အသင်းတို့ရဲ့ ခြေစမ်းပွဲကို ရပ်တန့်နိုင်အောင် ကြားဝင်စွက်ဖက်ပေးဖို့အတွက် ဖီဖာနဲ့ ယူအီးအက်ဖ်အေကို ထပ်မံတောင်းဆိုထားတာပါ။ဒီပွဲကို မဖြစ်အောင် ကျနော်တို့ တတ်နိုင်သမျှအရာအားလုံး လုပ်ဆောင် နေပါတယ်”လို့ ပါဗယ်လ်ကိုက ပြောခဲ့တာဖြစ်ပါတယ်။

ရုရှားအသင်းကတော့ ဘော့စနီးယားနဲ့အပြင် အီရန်၊ ကာဂျစ္စတန်တို့နဲ့လည်း ခြေစမ်းပွဲကစားဖို့ စီစဉ်ထား တာ ဖြစ်ပါတယ်။

Source:အာရ်တီ

CNI Sport News

၂၀၂၂ ခုနှစ်၊ စက်တင်ဘာ ၁၆

တင်းနစ်လောကက အနားယူဖို့ ရော်ဂျာဖက်ဒဲရားဆုံးဖြတ်လိုက်တာဟာ အားကစားအတွက် ဝမ်းနည်းဖို့ ကောင်းတဲ့နေ့လို့ ပြိုင်ဘက်ကြီး ရာဖေးလ်နာဒယ်လ်က ပြောဆိုလိုက်ပါတယ်။

နာဒယ်လ်က “ကျနော်တို့ဟာ သူငယ်ချင်းတွေဖြစ်သလို၊ ပြိုင်ဘက်တွေလည်း ဖြစ်ပါတယ်။ ဒီလိုနေ့မျိုး ဘယ်တော့မှ မရောက်လာစေဖို့က ကျနော့်ရဲ့ဆန္ဒပါ။ဒါဟာ ကျနော့်အတွက်ရော ကမ္ဘာတစ်ဝှမ်းရှိတဲ့ အားကစားအတွက် ဝမ်းနည်းဖို့ ကောင်းတဲ့နေ့ပါ။ခင်ဗျားနဲ့အတူနှစ်တွေအများကြီး မျှဝေခွင့်ရခဲ့တာက ကျနော့်အတွက် ဂုဏ်ယူဖို့ ကောင်းပါတယ်။ကျနော်တို့ အတူတူအလုပ်လုပ်စရာတွေအများကြီး ရှိပါတယ်။အခုအချိန်မှာ ခင်ဗျားရဲ့ မိသားစုတွေနဲ့ ပျော်ပျော်ရွှင်ရွှင်ဖြတ်သန်းပါ။လန်ဒန်မှာ တွေ့ကြမယ်” လို့ သူ့ရဲ့ ဆိုရှယ်မီဒီယာမှာ ရေးသားထားတာပါ။

ဂရမ်းဆလမ်းချန်ပီယံဆု အကြိမ် ၂၀ ရရှိထားတဲ့ ဖက်ဒဲရားဟာ အခုလထဲ ကျင်းပမယ့် Laver Cup ပြိုင်ပွဲအပြီးမှာ အနားယူတော့မယ်လို့ ကြာသပတေးနေ့က ကြေညာခဲ့တာဖြစ်ပါတယ်။ဖက်ဒဲရားထက် ဂရမ်းဆလမ်းအများဆုံးရ ကစားသမားတွေအဖြစ် နာဒယ်လ်က ၂၂ ကြိမ်၊ ဂျိုကိုဗစ်က ၂၁ ကြိမ် ရရှိ ထားတာပါ။တင်းနစ်သမိုင်းမှာ အကျော်ကြားဆုံး ပြိုင်ဖက်တွေဖြစ်တဲ့ နာဒယ်လ်နဲ့ ဖက်ဒဲရားတို့ဟာ ထိပ်တိုက်တွေ့ဆုံမှု အကြိမ် ၄၀ အထိ ရှိခဲ့ပါတယ်။

နာဒယ်လ်က ၂၄ ကြိမ်အနိုင်ရခဲ့ပြီး ဖက်ဒဲရားက ၁၆ ကြိမ် အနိုင်ရရှိခဲ့တာပါ။ဖက်ဒဲရားဟာ အသက် ၁၆ နှစ်အရွယ် ၁၉၉၈ မှာ ပရော်ဖက်ရှင်နယ်တင်းနစ်လောကကို စတင်ဝင်ရောက်ခဲ့တာဖြစ်ပြီး ၂၀၀၃ ဝင်ဘယ်လ်ဒန်အိုးပန်းပြိုင်ပွဲမှာ ပထမဆုံး ဂရမ်းဆလမ်းချန်ပီယံဆုကို ရယူနိုင်ခဲ့တာ ဖြစ်ပါတယ်။ ဆွဇ်ဇာလန်တင်းနစ်သမားဟာ တတိယအကြိမ်မြောက် ဒူးခွဲစိတ်ပြီးနောက် ၂၀၂၁ ဝင်ဘယ်လ်ဒန်အိုးပန်း ပြိုင်ပွဲပြီးကတည်းက ပြိုင်ပွဲတွေဝင်ရောက်ကစားခြင်း မရှိတော့ပါဘူး။

ဖက်ဒဲရားက “ကျနော်ဟာ ၂၄ နှစ်အတွင်းမှာ ပွဲပေါင်း ၁၅၀၀ ကျော်ကစားပြီးပါပြီ။ အခု ကစားသမားဘဝ ကို အဆုံးသတ်ဖို့ အချိန်တန်ပြီဆိုတာကို ကျနော်အသိအမှတ်ပြုရတော့မှာ ဖြစ်ပါတယ်။တင်းနစ်ပွဲတွေကို ကျနော် အလွန်ချစ်မြတ်နိုးပါတယ်။ဘယ်တော့မှမမေ့နိုင်တဲ့ ပြိုင်ဆိုင်မှုတွေ အများကြီးကစားခဲ့ရလို့ ကျနော် ကံကောင်းခဲ့ပါတယ်”လို့ ပြောခဲ့ပါတယ်။

၂၀၂၂ Laver Cup ပြိုင်ပွဲကို စက်တင်ဘာ ၂၃ ရက်ကနေ ၂၅ ရက်အထိ လန်ဒန်မှာ ကျင်းပသွားမှာဖြစ်ပြီး တင်းနစ်လောကရဲ့နာမည်ကြီးတွေဖြစ်တဲ့ ဖက်ဒဲရား၊ နာဒယ်လ်၊ ဂျိုကိုဗစ်နဲ့ အန်ဒီမာရေး တို့ ပါဝင် ယှဉ်ပြိုင်ကြမှာ ဖြစ်ပါတယ်။

Source:BBC

CNI Sport News

၂၀၂၂ ခုနှစ်၊ စက်တင်ဘာ ၁၆

ရှရစ်ဖ်ကို အနိုင်ရတဲ့ ယူရိုပါလိဂ်ပြိုင်ပွဲမှာ သွင်းယူခဲ့တဲ့ ဂိုးက ရော်နယ်ဒိုအတွက် တကယ်ကိုလိုအပ်နေတာလို့ ယူနိုက်တက်နည်းပြ အဲရစ်တန်ဟတ်က ပြောလိုက်ပါတယ်။

အဲရစ်တန်ဟတ်က “ရော်နယ်ဒိုက အဲ့ဒီဂိုးကိုလိုအပ်ပါတယ်။သူဟာ အကြိမ်ပေါင်းများစွာနီးစပ်ခဲ့ပေမယ့် အရမ်းကို လိုချင်နေတာပါ။သူ ဂိုးသွင်းနိုင်လို့ ကျနော်တို့ အလွန်ပျော်ရွှင်နေပါတယ်။အသင်းကလည်း သူ့ကို ဂိုးတွေသွင်းစေချင်နေတာပါ။ရော်နယ်ဒို ပင်နယ်တီသွင်းယူနိုင်မယ်ဆိုတာ ခင်ဗျားတို့လည်း သိပါတယ်။ကြံခိုင်မှုပိုင်း ပိုကောင်းလာရင် သူဟာ ဂိုးတွေပိုပြီး သွင်းလာပါလိမ့်မယ်။ အသင်းစီမံကိန်း ကိုလည်း စိတ်နှစ်ပြီး အပြည့်အဝပူးပေါင်းနေပါတယ်”လို့ ပြောခဲ့တာပါ။

ယူနိုက်တက်အသင်းဟာ ဒီပွဲမှာ ရှရစ်ဖ်အသင်းကို ၂ ဂိုး- ဂိုးမရှိနဲ့ အနိုင်ရရှိခဲ့တာဖြစ်ပြီး ဆန်ချိုနဲ့ ရော် နယ်ဒိုတို့က သွင်းယူခဲ့တာဖြစ်ပါတယ်။ရော်နယ်ဒိုအတွက်တော့ ဒီဂိုးဟာ ဒီရာသီ ယူနိုက်တက် အသင်း အတွက် ပထမဆုံးသွင်းယူနိုင်ခဲ့တဲ့ ဂိုးလည်းဖြစ်ခဲ့တာပါ။ဒါ့အပြင် ယူရိုပါလိဂ်ပြိုင်ပွဲမှာ သူ့ရဲ့ ကစားသမား ဘ၀ ပထမဆုံးသွင်းဂိုးကိုလည်း ရယူနိုင်ခဲ့တာဖြစ်ပါတယ်။

ရော်နယ်ဒိုက “ဂိုးသွင်းပြီး အသင်းကို အနိုင်ရအောင်ကူညီပေးနိုင်လို့ ပျော်ရွှင်ပါတယ်။အရေးကြီးတဲ့ ၃ မှတ်ပါ”လို့ သူ့ရဲ့ ဆိုရှယ်မီဒီယာမှာ ရေးသားခဲ့တာပါ။ရော်နယ်ဒိုအတွက် ဒီပွဲမှာ ဂိုးသွင်းယူနိုင်ခဲ့လို့ ၁၆ နှစ်အတွင်း အဆိုးရွားဆုံး ဂိုးမိုးခေါင်မှုကို အဆုံးသတ်နိုင်ခဲ့တာလည်း ဖြစ်ပါတယ်။ဒီဂိုးကြောင့် ပေါ်တူဂီ ကစားသမားဟာ ကလပ်ကစားသမားဘ၀ သွင်းဂိုး ၆၉၉ ဂိုးအထိ ရှိသွားခဲ့ပြီး ဂိုး ၇၀၀ ပြည့်ဖို့ ၁ ဂိုးသာ လိုအပ်တော့တာပါ။

ရော်နယ်ဒိုဟာ ပြီးခဲ့တဲ့ အပြောင်းအရွှေ့က အသင်းက ထွက်ခွာဖို့ ကြိုးစားခဲ့ပေမယ့် ယူနိုက်တက် အသင်း ဟာ ရောင်းချဖို့ ငြင်းဆန်ခဲ့လို့ အပြောင်းအရွှေ့ပိတ်တဲ့အချိန်ထိ အသင်းမှာပဲ ဆက်လက်ရှိနေတာ ဖြစ်ပါတယ်။ရော်နယ်ဒိုဟာ ရှရစ်ဖ်နဲ့ ပွဲအပါအဝင် ဆိုစီဒက်နဲ့ကစားခဲ့တဲ့ ယူရိုပါလိဂ်ပွဲစဉ်မှာလည်း ယူနိုက်တက်အတွက် ပွဲစကတည်းက ပါဝင်ခွင့်ရခဲ့တာပါ။

ယူနိုက်တက်အသင်းဟာ အခုအပတ်မှာ ကစားဖို့ရှိတဲ့ ပရီးမီးယားလိဂ်ပွဲစဉ်ကို ရွှေ့ဆိုင်းခဲ့ရတာကြောင့် အောက်တိုဘာလ ၂ ရက်မှ ပရီးမီးယားလိဂ်ပွဲစဉ်အဖြစ် မန်စီးတီးအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ စက်တင်ဘာ ၁၅

ဂရင်းဝုဒ်ဟာ ၂၀၂၂-၂၃ ရာသီအတွက် ယူနိုက်တက်အသင်းရဲ့ တရားဝင်လူစာရင်းမှာ ပါဝင်နေပေမယ့် သူ့ကို ဆိုင်းငံ့ထားဆဲဖြစ်တယ်လို့ အသင်းက ပြောလိုက်ပါတယ်။

အသက် ၂၀ အရွယ်ရှိ ဂရင်းဝုဒ်ဟာ ကစားသမား ၂၅ ဦးစာရင်းမှာမပါဝင်ပေမယ့် အသင်းကြီးအတွက် ဒီရာသီ ပရီးမီးယားလိဂ်ကစားခွင့်ရမယ့် ယူ-၂၁ ကစားသမားစာရင်းမှာ ပါဝင်နေတာပါ။

ဂရင်းဝုဒ်ဟာ လက်ရှိအချိန်မှာ အဓမ္မပြုကျင့်မှု၊ လိင်ပိုင်းဆိုင်ရာစော်ကားမှု၊ အသက် ၁၈ နှစ်အရွယ်ရှိ ကျောင်းသားကို သတ်ပစ်မယ်ဆိုပြီး ခြိမ်းခြောက်မှုတွေနဲ့ ရင်ဆိုင်နေရတာ ဖြစ်ပါတယ်။ဂရင်းဝုဒ်ဟာ ဇန်နဝါရီလက ဖမ်းဆီးခံခဲ့ရတာဖြစ်ပြီး ဇွန်လကပြုလုပ်ခဲ့တဲ့ သီးသန့်ကြားနာမှုမှာ သူ့ရဲ့အာမခံကို သက်တမ်းတိုးခဲ့တာပါ။

ဂရင်းဝုဒ်ဟာ ဖမ်းဆီးခံရပြီးနောက် ရဲစခန်းမှာ ၃ ညတာနေခဲ့ရပြီး သတ်ပစ်မယ်ဆိုတဲ့ ခြိမ်းခြောက်မှုတွေကြောင့် နောက်ပိုင်းမှာစစ်ဆေးမေးမြန်းခြင်း ခံခဲ့ရတာဖြစ်ပါတယ်။ဒီရာသီ ယူနိုက်တက်အသင်းရဲ့ ယူရိုပါလိဂ်လူစာရင်းမှာ မပါဝင်တဲ့ ဂရင်းဝုဒ်ဟာ အာမခံနဲ့ ပြန်လွတ်ခဲ့ပြီး နောက်ပိုင်းမှာ အာမခံကို ၂ ကြိမ်သက်တမ်းတိုးခဲ့တာပါ။

ဂရင်းဝုဒ်ရဲ့ ကစားသမားပရိုဖိုင်ဟာ အဖမ်းဆီးခံရပြီးကတည်းက အွန်လိုင်း ပေါ်မှာ ရှိနေပေမယ့် ယူနိုက်တက်အသင်းက သူ့ရဲ့နာမည်နဲ့ ကျောနံပတ် ၁၁ ပါ ဂျာစီကို မဝယ်ယူဖို့ ပရိသတ်တွေကို ပိတ်ပင်ထားတာ ဖြစ်ပါတယ်။

ယူနိုက်တက်အသင်းဟာ ဂရင်းဝုဒ်နဲ့ချုပ်ဆိုထားတဲ့ စာချုပ်ရှိနေတာကြောင့် ကစားသမားရဲ့ တစ်ပတ် လုပ်ခ ပေါင် ၇၅,၀၀၀(ခုနှစ်သောင်းခွဲ)ကို ဆက်လက်ပေးချေနေရတာပါ။ဂရင်းဝုဒ်ဟာ ဇန်နဝါရီ ၂၂ ရက် က ဝက်စ်ဟမ်းကို အနိုင်ရခဲ့တဲ့ပွဲမှာ ယူနိုက်တက်အတွက် နောက်ဆုံးပွဲစဉ်အဖြစ် ပါဝင်ကစားခဲ့တာ ဖြစ်ပါတယ်။

သူဟာ အင်္ဂလန်လက်ရွေးစင်အတွက် ၂၀၂၀ စက်တင်ဘာလက အိုက်စလန်နဲ့ပွဲစဉ်မှာ ပွဲ ထွက်ခွင့်ရခဲ့ပေမယ့် ကိုဗစ်စည်းမျဉ်းတွေကို ချိုးဖောက်လို့ နေအိမ်ပြန်ပို့ခြင်း ခံခဲ့ရတာပါ။ဂရင်းဝုဒ်ဟာ ယူနိုက်တက်အတွက် ပွဲပေါင်း ၈၃ ပွဲပါဝင်ကစားထားပြီး ၂၂ ဂိုးသွင်းယူထားတာ ဖြစ်ပါတယ်။

ဂရင်းဝုဒ်ဟာ ချစ်သူမိန်းကလေးဖြစ်သူကို ရုပ်ပိုင်းဆိုင်ရာ အကြမ်းဖက်မှုနဲ့ လိင်ပိုင်းဆိုင်ရာ ခြိမ်းခြောက်မှု တွေ ပြုလုပ်နေတဲ့ ပုံရိပ်တွေဟာ ဆိုရှယ်မီဒီယာပေါ်မှာ ပျံနှံ့သွားပြီးနောက် ဇန်နဝါရီ ၃၀ ရက်မှာ ရဲတပ်ဖွဲ့ က ဖမ်းဆီးခဲ့တာပါ။ဂရင်းဝုဒ်နဲ့ ယူနိုက်တက်တို့ ချုပ်ဆိုထားတဲ့ စာချုပ်ဟာ ၂၀၂၅ ဇွန်လ ၃၀ ရက်မှ ကုန် ဆုံးမယ်လို့ သိရပါတယ်။

Source:Daily Mail

CNI Sport News

၂၀၂၂ ခုနှစ်၊ စက်တင်ဘာ ၁၅

ဘော့စနီးယားကြယ်ပွင့် ယာနစ်က မကြာသေးခင်က ကြေညာခဲ့တဲ့ နှစ်နိုင်ငံခြေစမ်းပွဲကို ဆန့်ကျင် ပေမယ့် ရုရှားကစားသမားတွေအပေါ်မှာ ဆိုးရွားတဲ့ သဘောထားမရှိပါဘူးလို့ ပြောဆိုလိုက်ပါတယ်။

ယာနစ်က “ကျနော်ဟာ နိုင်ငံအသင်း အားကစားဒါရိုက်တာဆီကနေ ဖုန်းခေါ်ဆိုမှုကို ရရှိခဲ့ပါတယ်။သူက ကျနော့်ကို ဒီပွဲနဲ့ပတ်သက်ပြီး ဖြစ်နိုင်ခြေကို ရှင်းပြခဲ့ပါတယ်။အခုအချိန်မှာ ဒါဟာ လုံးဝအဓိပ္ပါယ်မရှိဘူး လို့ ကျနော် ပြောလိုက်ပါတယ်။သူတို့ကို ဖီဖာနဲ့ ယူအီးအက်ဖ်အေတို့က ပိတ်ပင်ထားသလို တကမ္ဘာလုံး က ဒါကို ဆန့်ကျင်နေတာပါ။ကျနော့်မှာ ရုရှားကစားသမားတွေကို ဆန့်ကျင်တာမရှိပါဘူး။ဒါပေမယ့် လူတိုင်းက ရုရှားသမ္မတ ပူတင်ကို ဆန့်ကျင်တယ်ဆိုရင်တော့ ကျနော်တို့လည်း သူတို့နောက်ကို လိုက်ရမှာပါ”လို့ DAZN နဲ့ အင်တာဗျူးမှာ ပြောခဲ့တာပါ။

ဘော့စနီးယားအသင်းရဲ့ ပုံရိပ်မြှင့်ကစားသမားတွေဖြစ်တဲ့ ဂျက်ကိုနဲ့ ယာနစ်တို့ဟာ ရုရှားနဲ့ ခြေစမ်းပွဲ ကစားဖို့ စီစဉ်တာကို မကြာသေးခင်က မေးခွန်းတွေထုတ်ခဲ့ကြတာဖြစ်ပါတယ်။ဒီပွဲကို ကာတာကမ္ဘာ့ ဖလား စတင်ကျင်းပမယ့် ၁ ရက်မတိုင်ခင် စိန့်ပီတာစဘတ်မှာ ကျင်းပသွားဖို့ သတ်မှတ်ထားတာပါ။ ယူကရိန်းဘောလုံးအဖွဲ့ချုပ်ကတော့ ဒီခြေစမ်းပွဲကို ကြားဝင်စွက်ဖက်ပေးဖို့ ဖီဖာနဲ့ ယူအီးအက်ဖ်အေကို တောင်းဆိုမှုတွေ ရှိနေတာဖြစ်ပါတယ်။

ဖီဖာနဲ့ ယူအီးအက်ဖ်အေတို့ဟာ ရုရှားကို ပြိုင်ပွဲတွေယှဉ်ပြိုင်ခွင့်သာ ပိတ်ပင်ထားတာပါ။ရုရှားကတော့ ဘော့စနီးယားနဲ့အပြင် အီရန်၊ ကာဂျစ္စတန်တို့နဲ့လည်း ခြေစမ်းပွဲကစားဖို့ စီစဉ်ထားတာ ဖြစ်ပါတယ်။ နိုင်ငံတကာက ဖိအားပေးမှုတွေရှိနေတာကြောင့် ဘော့စနီးယားအသင်းဟာ ရုရှားနဲ့ ခြေစမ်းမယ့် အစီ အစဉ်ကို ပြန်လည်သုံးသပ်သွားမယ်လို့ ဝန်ခံထားတာပါ။ဖီဖာကလည်း ဒီခြေစမ်းပွဲနဲ့ပတ်သက်ပြီး မှတ်ချက်ပေးခြင်း မရှိသေးဘူးလို့လည်း သိရပါတယ်။

ရုရှားအသင်းဟာ ၂၀၂၁ နိုဝင်ဘာလက ခရိုအေးရှားအသင်းနဲ့ ကစားခဲ့တဲ့ ၂၀၂၂ ကမ္ဘာ့ဖလားခြေစစ်ပွဲ ပြီး ကတည်းက ပွဲတွေယှဉ်ပြိုင်ကစားခြင်းမရှိတော့ပါဘူး။ရုရှားအသင်းဟာ စက်တင်ဘာ ၂၄ ရက်မှာ ပထမဆုံးပွဲစဉ်အဖြစ် ကာဂျစ္စတန်နဲ့ ခြေစမ်းပွဲ ယှဉ်ပြိုင်ကစားမှာ ဖြစ်ပါတယ်။

Source:အာရ်တီ

CNI Sport News

၂၀၂၂ ခုနှစ်၊ စက်တင်ဘာ ၁၅

မန်စီးတီးအသင်းက ဒေါ့မွန်အသင်းကို ၂ ဂိုး- ၁ ဂိုးနဲ့ အနိုင်ရခဲ့တဲ့ ချန်ပီယံလိဂ်ပွဲစဉ်မှာ အသင်းဟောင်းရဲ့ နောက်ခံ လူတွေက သူ့ကို မရပ်တန့်နိုင်ခဲ့ဘူးလို့ ဟာလန်းက ပြောလိုက်ပါတယ်။

ဟာလန်းက “ သူတို့ ကျနော့်ကို မရပ်တန့်နိုင်ခဲ့ပါဘူး။ ကျနော် ဂိုးသွင်းယူနိုင်ခဲ့ပါတယ်။ သူတို့ ကောင်းမွန်စွာ ကစားခဲ့သလို ကောင်းလည်းကောင်းပါတယ်။ သူတို့နည်းပြ တာဇစ်က ကျနော့်အကြောင်း ကောင်းကောင်းသိလို့ တစ်ပွဲလုံး လူကပ် ကစားခံရမယ်ဆိုတာကို သိပြီးသားပါ။ ဒီနေ့ ဒေါ့မွန်အသင်းက တကယ်ကို ကောင်းတာပါ။ ဒါပေမယ့် ၃ မှတ်ရဖို့က အရေးကြီးပါတယ်”လို့ ပြောပါတယ်။

ဒီပွဲမှာ ဘယ်လင်ဂမ်က ဒေါ့မွန်အတွက် ဦးဆောင်ဂိုး စတင်သွင်းယူခဲ့ပေမယ့် ဂျွန်စတုန်းစ်က မန်စီးတီးအတွက် ချေပဂိုး သွင်းယူခဲ့ပြီး ဟာလန်းက အနိုင်ဂိုး သွင်းယူပေးခဲ့တာ ဖြစ်ပါတယ်။

နော်ဝေလက်ရွေးစင် တိုက်စစ်မှူးလည်းဖြစ်တဲ့ ဟာလန်းဟာ ဒီဂိုးသွင်းယူခဲ့တာမှာ ကန်ဆယ်လို ပေးပို့လိုက်တဲ့ ဘောလုံးကို လေပေါ်မှာ ခုန်ပြီး ခြေထောက်နဲ့ လမ်းကြောင်း ပြောင်းပေးခဲ့တာပါ။ ဟာလန်းဟာ ဂိုးသွင်းပြီးချိန်မှာ အသင်းဟောင်းကို လေးစားမှုပြတဲ့ အနေနဲ့ အောင်ပွဲခံခဲ့ခြင်း မရှိပါဘူး။

ဒေါ့မွန်အသင်းဘက်ကို ဂိုးသွင်းနေတဲ့ ဟာလန်း (Football365)

ဟာလန်းက “ အဆုံးသတ်မှာ ကျနော်တို့က ဘာလဲဆိုတာကို ပြသနိုင်ခဲ့ပါတယ်။ ဒါကိုပဲ ကျနော်တို့ လိုချင်ခဲ့တာ ပါ။ နောက်ဆုံး ၂၅ မိနစ်အတွင်းမှာ ကျနော်တို့ရဲ့ စွမ်းဆောင်ရည်အတွက် ဂုဏ်ယူမိပါတယ်။ ကန်ဆယ်လိုရဲ့ ဖြတ် တင်ပေးမှုက အလွန်ကောင်းမွန်ပါတယ်။ ဒါဟာ အလွန်အရေးကြီးတဲ့ နိုင်ပွဲပါ”လို့ ပွဲအပြီး BT Sport နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့ပါတယ်။

မန်စီးတီးနည်းပြ ဂွာဒီယိုလာက ဟာလန်းရဲ့ သွင်းဂိုးကို ဂန္တဝင် ကစားသမားကြီး ဂျိုဟန်ခရိုက်ဖ်ရဲ့ သွင်းဂိုးနဲ့ နှိုင်းယှဉ် သွားခဲ့ပါတယ်။

“ကျနော့်ဘဝမှာ ဂျိုဟန်ခရိုက်ဖ်ရဲ့ လွှမ်းမိုးမှုကို ခင်ဗျားတို့လည်း သိမှာပါ။ လူပုဂ္ဂိုလ်အနေနဲ့ရော၊ နည်းပြပိုင်းရော၊ အရာအားလုံးပါပဲ။ အသလက်တီကိုနဲ့ပွဲမှာ သွင်းတဲ့ ဂျိုဟန်ခရိုက်ဖ်ရဲ့ ဂိုးက ဟာလန်းနဲ့ တော်တော်လေးကို တူတာ ပါ။ ဟာလန်း ဂိုးသွင်းတဲ့အချိန်မှာ ကျနော် ဂျိုဟန်ခရိုက်ဖ် အကြောင်းကို တွေးမိခဲ့ပါတယ်။ အလွန်ကောင်းမွန်တဲ့ ဂိုးပါ”လို့ ပြောပါတယ်။

ဟာလန်းကတော့ ဒီရာသီ မန်စီးတီးအတွက် ပြိုင်ပွဲစုံ ၉ ပွဲ ကစားအပြီးမှာ ၁၃ ဂိုးအထိ သွင်းယူထားနိုင်ပြီ ဖြစ်ပါတယ်။

Source: The Athletic

CNI Sport News

၂၀၂၂ ခုနှစ်၊ စက်တင်ဘာ ၁၅

ပီအက်စ်ဂျီအသင်းက မက္ကာဘီဟိုင်ဖာအသင်းကို ၃ ဂိုး- ၁ ဂိုးနဲ့ အနိုင်ရခဲ့တဲ့ ချန်ပီယံလိဂ် အုပ်စုအဆင့် ပွဲစဉ်မှာ မက်ဆီဟာ ပြိုင်ဘက်ကြီး ရော်နယ်ဒိုရဲ့ စံချိန်ကို ကျော်ဖြတ်ခဲ့သလို စံချိန်သစ် တင်နိုင်ခဲ့ပါတယ်။

မက္ကာဘီဟိုင်ဖာအသင်းကို ဂိုးသွင်းယူပြီးနောက် မက်ဆီဟာ ချန်ပီယံလိဂ်ပြိုင်ပွဲမှာ မတူညီတဲ့ အသင်းပေါင်း ၃၉ သင်းကို ဂိုးသွင်း ယူနိုင်ခဲ့တာပါ။ မက်ဆီဟာ အရင်က ရော်နယ်ဒိုနဲ့အတူ ချန်ပီယံလိဂ်ပြိုင်ပွဲမှာ မတူညီတဲ့ ၃၈ သင်း ကို ဂိုးသွင်းယူနိုင်ခဲ့တာဖြစ်ပြီး အခုအချိန်မှာတော့ စံချိန်သစ် တင်နိုင်ခဲ့တာ ဖြစ်ပါတယ်။

ဒါ့အပြင် မက်ဆီဟာ ချန်ပီယံလိဂ်ပြိုင်ပွဲမှာ ၁၈ ရာသီဆက်တိုက် ဂိုးသွင်းယူနိုင်တဲ့ ပထမဆုံး ကစားသမားလည်း ဖြစ်ခဲ့ပါတယ်။

မက်ဆီဟာဆိုရင် ဘန်ဇီမာနဲ့အတူ ချန်ပီယံလိဂ်ပြိုင်ပွဲမှာ ၁၇ ရာသီဆက်တိုက် ဂိုးသွင်းယူနိုင်ခဲ့တာကနေ ဒီပွဲမှာ သွင်းခဲ့တဲ့ဂိုးကြောင့် စံချိန်သစ် ရရှိခဲ့တာ ဖြစ်ပါတယ်။

မက်ဆီအတွက်တော့ မက္ကာဘီဟိုင်ဖာအသင်းနဲ့ ပွဲမှာ ဂိုးသွင်း ယူပြီးနောက် ကစားသမားဘ၀ ချန်ပီယံလိဂ် သွင်းဂိုး ၁၂၆ ဂိုးအထိ ရှိလာခဲ့ပါတယ်။ ဒါပေမယ့် ချန်ပီယံလိဂ် ပြိုင်ပွဲရဲ့ ဂိုးသွင်း အများဆုံး ကစားသမားကတော့ ရော်နယ်ဒို ဖြစ်ပြီး ၁၄၀ ဂိုး သွင်းယူထားတာ ဖြစ်ပါတယ်။

မက်ဆီ ဂိုးသွင်းနေစဉ်

ရော်နယ်ဒိုဟာ လက်ရှိအချိန်မှာ ယူနိုက်တက်အသင်းနဲ့ ယူရိုပါလိဂ်ပြိုင်ပွဲကို ပထမဆုံးအကြိမ် ယှဉ်ပြိုင်နေ တာ ကြောင့် မက်ဆီအနေနဲ့ ရော်နယ်ဒိုရဲ့ စံချိန်တွေကို လိုက်မှီနိုင်ဖို့ ရှိသေးတယ်လို့ အချက်အလက်တွေအရ သိရပါ တယ်။
မက္ကာဘီဟိုင်ဖာအသင်းကို အနိုင်ရခဲ့တဲ့ပွဲမှာ မက်ဆီအပြင် ပီအက်စ်ဂျီ အသင်းအတွက် ဂိုးတွေကို နေမာနဲ့ ဘတ်ပီ တို့က သွင်းယူခဲ့ပါသေးတယ်။ ပြင်သစ်ကလပ်ဟာ ချန်ပီယံလိဂ် အဖွင့်ပွဲမှာလည်း အနိုင်ရထားတာကြောင့် ၂ ပွဲ ကစား ၂ ပွဲ အနိုင်ရရှိထားတာပါ။
ပီအက်စ်ဂျီအသင်းနည်းပြ ဂယ်လ်တီယာက “ပထမပိုင်းမှာ ကျနော်တို့ဟာ အခွင့်အရေး ၂ ကြိမ် ၃ ကြိမ်လောက် ရရှိခဲ့ ပါတယ်။ သူတို့တွေလည်း အခွင့်အရေးတွေ ရခဲ့ပါတယ်။ ဒါပေမယ့် သူတို့ ပရိသတ်တွေရဲ့ အားပေးမှုတွေ ကြောင့် ခက်ခက်ခဲခဲ လုပ်ဆောင်ခဲ့ရပါတယ်။ ပထမပိုင်းကတော့ ကျနော်တို့အတွက် ခက်ခဲခဲ့ပါတယ်။ အနားယူပြီး ချိန်မှာ ပြင်ဆင်နိုင်ခဲ့လို့ ပိုမိုကျစ်လစ်လာခဲ့တာပါ။ ချန်ပီယံလိဂ်မှာ ပြိုင်ဘက်တွေက အမြဲတမ်း ကောင်းမွန်တဲ့ အရည်အသွေးရှိလို့ ကျနော်တို့ တုံ့ပြန်နိုင်ဖို့ လိုပါတယ်”လို့ RMC Sport ကို ပြောခဲ့ပါတယ်။

ပီအက်စ်ဂျီအသင်းဟာ တနင်္ဂနွေနေ့မှာ လီဂူးဝမ်းပွဲစဉ်အဖြစ် လိုင်ယွန်အသင်းအိမ်ကွင်းမှာ သွားရောက် ယှဉ်ပြိုင်ရ မှာ ဖြစ်ပါတယ်။

Source: Metro/Daily Mail