CNI Sport News
၂၀၂၃ ခုနှစ်၊ ဩဂုတ် ၁၈
အာဆင်နယ်၊ အဲဗာတန်နဲ့ အင်္ဂလန် လက်ရွေးစင် ကစားသမားဟောင်း ဝဲလ်ကော့ဟာ အသက် ၃၄ နှစ်အရွယ်မှာ ပရော်ဖက်ရှင်နယ် ဘောလုံးသမားဘဝကနေ အနားယူပြီလို့ ကြေညာခဲ့ပါတယ်။
ဝဲလ်ကော့က “ကျနော် ကစားသမားဘဝကနေ တရားဝင် အနားယူတော့မှာပါ။ ဒါဟာ ကြောက်ဖို့ကောင်းတယ် ဆိုတာ လိမ်ညာနေမှာ မဟုတ်ပါဘူး။ ကျနော်ဟာ အသက် ၁၆ နှစ် ဒါမှမဟုတ် ငယ်ငယ်လေးကတည်းက ဘောလုံးကို သိခဲ့တဲ့အတွက် ဒါက ကြောက်ဖို့ ကောင်းပါတယ်။ ကျနော်ဟာ မကြုံတွေ့ဖူးသေးတဲ့ အရာအသစ် တွေကို စမ်းကြည့်ချင်ပါသေးတယ်။ ကျနော်ဟာ ဘောလုံးနဲ့ပဲ နေရတာများတဲ့အတွက် ဘဝကို တွေ့ကြုံခံစားချင် တယ်”လို့ ပြောပါတယ်။
ဝဲလ်ကော့ဟာ ပြီးခဲ့တဲ့ရာသီအကုန်မှာ ဆောက်သမ်တန်အသင်းနဲ့ စာချုပ်ကုန်ဆုံးခဲ့ပြီးနောက် ၂၃ နှစ်ကြာ ကစား သမားဘဝကို အဆုံးသတ်ခဲ့တာ ဖြစ်ပါတယ်။
ဝဲလ်ကော့ဟာ ကလပ်အသင်းတွေအတွက် ပွဲပေါင်း ၅၆၄ ပွဲ ပါဝင်ကစားခဲ့ပြီး ၁၂၉ ဂိုး သွင်းယူနိုင်ခဲ့တာပါ။
ဝဲလ်ကော့ကို တွေ့ရစဉ်
အာဆင်နယ် ကစားသမားဟောင်းဟာ လန်ဒန်ကလပ်နဲ့အတူ FA ဖလားနဲ့ ကွန်မြူနတီဒိုင်း ချန်ပီယံဆုကို ၂ ကြိမ်စီ ရယူနိုင်ခဲ့တာ ဖြစ်ပါတယ်။
ဝဲလ်ကော့ဟာ အသက် ၁၇ နှစ်အရွယ်မှာ ၂၀၀၆ ကမ္ဘာ့ဖလားပြိုင်ပွဲဝင်မယ့် အင်္ဂလန်လက်ရွေးစင်အသင်း လူစာရင်းမှာ အံ့အားသင့်ဖွယ် ရွေးချယ်ခံခဲ့ရတာပါ။
ဝဲလ်ကော့ဟာ အင်္ဂလန်အသင်းအတွက် ၂၀၁၆ ခုနှစ်အထိ ၄၇ ပွဲ ပါဝင်ကစားခဲ့ပြီး ၈ ဂိုး သွင်းယူနိုင်ခဲ့ပါတယ်။
ဝဲလ်ကော့အနေနဲ့ အာဆင်နယ် အသင်းဖော်ဟောင်း ဝီလ်ရှိုင်းယားလို နည်းပြလောကထဲကို ဝင်ရောက်မလား ဆိုတာတော့ ရှင်းရှင်းလင်းလင်း မသိရသေးပါဘူး။
အသက် ၃၄ နှစ်အရွယ်ရှိ ကစားသမားဟောင်းအနေနဲ့ ဘောလုံးပွဲ ဝေဖန်သုံးသပ်သူအဖြစ် ဆောင်ရွက်ဖို့အတွက် ရွေးချယ်ခွင့်လည်း ရှိနေပါတယ်။
ဘောလုံးသမားဟောင်း အများအပြားဟာ ကစားသမားဘဝကနေ အနားယူပြီးနောက် ဘောလုံးပွဲဝေဖန် သုံးသပ်သူအဖြစ် ဆောင်ရွက်တဲ့ လမ်းကြောင်းကို လျှောက်လှမ်းဖို့ ဆုံးဖြတ်ခဲ့ကြတာ ဖြစ်ပါတယ်။
Source: BBC
