CNI Sport News
၂၀၂၃ ခုနှစ်၊ ဩဂုတ် ၂၂
စပိန်ဝါရင့်နောက်ခံလူဟောင်း ရာမို့စ်ဟာ အခုနွေရာသီအပြောင်းအရွှေ့မှာ တူရကီကလပ် ဘက်ဆီးတပ်စ် အသင်း ထံ ပြောင်းရွှေ့ဖို့ နီးစပ်နေပြီလို့ Foot Mercato ဂျာနယ်လစ် ဆန်တီအူနာရဲ့ ပြောကြားချက်ကို ကိုးကားပြီး သတင်းတွေမှာ ဖော်ပြထားပါတယ်။
ရာမို့စ်ဟာ ပီအက်စ်ဂျီအသင်းနဲ့ (၂)နှစ်သက်တမ်းရှိစာချုပ်ကုန်ဆုံးပြီးနောက် လက်ရှိအချိန်မှာ အသင်းလက်မဲ့ ဖြစ်နေတာပါ။ ရာမို့စ်ကို ခေါ်ယူဖို့ တူရကီထိပ်တန်းကလပ် ဂါလာတာစာရေးအသင်းကလည်း စိတ်ဝင်စားခဲ့ပေမယ့် ဒီပြိုင်ဆိုင်မှုမှာ ဘက်ဆီးတပ်စ်အသင်းက အနိုင်ရခဲ့တာဖြစ်ပါတယ်။ အသက် ၃၇ နှစ်အရွယ်ရှိ ကစားသမားဟာ အပြောင်းအရွှေ့အပြီးမသတ်ခင် တူရကီကလပ်ရဲ့ နောက်ဆုံးကမ်းလှမ်းမှုကို စောင့်ဆိုင်းနေတာပါ။
ရာမို့စ်ဟာ ပီအက်စ်ဂျီအသင်းကနေ ထွက်ခွာပြီးနောက် မေဂျာလိဂ်ကလပ် လော့စ်အိန်ဂျလိစ်အသင်းထံ ပြောင်းရွှေ့ဖို့အတွက် ချိတ်ဆက်မှုတွေပြုလုပ်ခဲ့ပေမယ့် သဘောတူညီမှုကို အကောင်အထည်မဖော်နိုင်တာကြောင့် အပြောင်းအရွှေ့ဖြစ်မလာခဲ့ပါဘူး။ ရီးရယ်လ်ကစားသမားဟောင်းဟာ စပိန်ကလပ်တွေထံ ပြန်ဖွယ်ရှိတယ်လို့ သတင်းတွေထွက်ပေါ်ခဲ့သလို ဆော်ဒီကလပ်တွေရဲ့ ချိတ်ဆက်မှုတွေလည်း ခံခဲ့ရတာဖြစ်ပါတယ်။
ဘက်ဆီးတပ်စ်အသင်းဟာ မကြာသေးခင်ကမှ လီဗာပူးလ်အသင်းကစားသမားဟောင်း ချိန်ဘာလိန်ကို ခေါ်ယူ ထားပြီး ရာမို့စ်ကိုပါ ထပ်မံခေါ်ယူကာ အသင်းလူစာရင်းအင်အားကို တောင့်တင်းအောင် လုပ်ဆောင်နေတာပါ။ ဘက်ဆီးတပ်စ်အသင်းဟာ သြဂုတ် ၂၄ ရက်မှာ ယူရိုပါကွန်းဖရန့်စ်လိဂ်ပွဲစဉ်အဖြစ် ဒိုင်နမိုကိဗ်အသင်းနဲ့ ယှဉ်ပြိုင် ရမှာဖြစ်ပါတယ်။
Source:Goal
