CNI Sport News
၂၀၂၃ ခုနှစ်၊ နိုဝင်ဘာ ၁၂
ဆော်ဒီပရိုလိဂ်ကလပ် အယ်လ်အစ်တီဟတ်အသင်းဟာ အေစီမီလန်အသင်းဂန္ထဝင် မာလ်ဒီနီကို အသင်းရဲ့ အားကစား ဒါရိုက်တာအသစ်အဖြစ် ခန့်အပ်ဖို့ စိတ်ဝင်စားနေတယ်လို့ ဖာဘရီဇီယိုရိုမန်နိုက ဖော်ပြထားပါတယ်။
အယ်လ်အစ်တီဟတ်အသင်းဟာ အခုရာသီအစပိုင်းမှာ ရလဒ်တွေ ဆိုးရွားနေပြီး တိုက်စစ်မှူး ဘန်ဇီမာနဲ့ အဆင်မပြေဖြစ်ခဲ့တဲ့ နည်းပြ နူနိုဆန်တိုကို ရာထူးကနေ ထုတ်ပယ်ထားပါတယ်။
မာလ်ဒီနီကလည်း အေစီမီလန်အသင်းက သူတို့ရဲ့ စီမံခန့်ခွဲမှုကို ပြင်ဆင်ပြီးနောက် နည်းစနစ်ဒါရိုက်တာ ရာထူး ကနေ ထုတ်ပယ်ခံခဲ့ရတာ ဖြစ်ပါတယ်။
အသက် ၅၅ နှစ်အရွယ်ရှိ မာလ်ဒီနီဟာ ကစားသမားဘဝ တစ်လျှောက်လုံး အေစီမီလန်အသင်းမှာသာ ကစားခဲ့တာ ဖြစ်ပြီး ကစားသမားဘဝက အနားယူချိန်မှာလည်း အီတလီကလပ်မှာသာ တာဝန်ထမ်းဆောင်ခဲ့ပါတယ်။
အယ်လ်အစ်တီဟတ် အသင်းကသာ မာလ်ဒီနီကို အားကစားဒါရိုက်တာအဖြစ် ခန့်အပ်နိုင်ခဲ့မယ်ဆိုရင် အီတလီ ဂန္ထဝင်ကစားသမားဟာ အေစီမီလန်အသင်း မဟုတ်တဲ့ အခြားအသင်းမှာ ပထမဆုံးအကြိမ် ပါဝင်ပတ်သက်မှု ဖြစ်လာမယ်လို့ သိရပါတယ်။
အယ်လ်အစ်တီဟတ်အသင်းဟာ ပြီးခဲ့တဲ့အပြောင်းအရွှေ့က ဘန်ဇီမာ၊ ကန်တီနဲ့ ဖာဘင်ဟိုတို့ကို ခေါ်ယူထားခဲ့ပြီး အသင်းကို အောင်မြင်မှု အများအပြားရယူနိုင်ဖို့ ပစ်မှတ်ထားနေပါတယ်။
နည်းပြ နူနိုဆန်တိုကို ထုတ်ပယ်ခဲ့တဲ့ အယ်လ်အစ်တီဟတ် အသင်းဟာ နောက်ဆုံး ကစားခဲ့တဲ့ပွဲမှာတော့ အက်ဘာအသင်းကို ၄ ဂိုး- ၂ ဂိုးနဲ့ နိုင်ပွဲ ပြန်လည်ရယူနိုင်ခဲ့ပြီး ဆော်ဒီပရိုလိဂ်ပြိုင်ပွဲမှာ ၅ ပွဲ ဆက်တိုက်နိုင်ပွဲ ပျောက်ဆုံးနေတာကို အဆုံးသတ်နိုင်ခဲ့ပါတယ်။
တိုက်စစ်မှူး ဘန်ဇီမာဟာ ဒီပွဲမှာ အယ်လ်အစ်တီဟတ်အသင်းအတွက် ဟက်ထရစ် သွင်းယူခဲ့ပြီး သွင်းဂိုး ၁ ဂိုးကို ဖန်တီးပေးခဲ့ပါတယ်။
အယ်လ်အစ်တီဟတ်အသင်းဟာ လာမယ့် ဆော်ဒီပရိုလိဂ် ပွဲစဉ်အဖြစ် နိုဝင်ဘာ ၂၄ ရက်နေ့မှာ အယ်လ်အက်တီ ဖတ် အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: Goal
