CNI Sport News

၂၀၂၃ ခုနှစ်၊ ဇွန် ၁

အာဆင်နယ်နောက်ခံလူ ဇင်ချန်ကိုနဲ့ ဂန္တဝင်တိုက်စစ်မှူး ရှက်ဖ်ချန်ကိုတို့ဟာ သြဂုတ်လ ၅ ရက် စတမ်းဖို့ဒ် ဘရစ်ချ်မှာ ကစားမယ့် Game4Ukraine ပရဟိတပွဲမှာ အသင်းခေါင်းဆောင်အဖြစ် ပါဝင်မယ်လို့ သိရပါတယ်။

ရုရှားက နိုင်ငံအတွင်း ကျူးကျော်ပြီးနောက် ဒုံးကျည်တွေ ထိမှန်ခဲ့တဲ့ ယူကရိန်းရှိ စာသင်ကျောင်းများ ပြန်လည် တည်ဆောက်ရေး ရန်ပုံငွေပွဲအဖြစ် ကျင်းပသွားမှာဖြစ်တယ်လို့ ယူကရိန်းသမ္မတ ဇာလန်းစကီးက မေလ ၃၀ ရက်မှာ ကြေညာခဲ့ပါတယ်။

ချယ်လ်ဆီးအသင်း တိုက်စစ်မှူးဟောင်း ရှက်ဖ်ချန်ကိုဟာ ယူကရိန်းရဲ့ ဂိုးသွင်း အများဆုံး ကစားသမားဖြစ်ပြီး နိုင်ငံရဲ့ နည်းပြအဖြစ် ၅ နှစ်ကြာ တာဝန်ယူ ကိုင်တွယ်ခဲ့ပါတယ်။

အာဆင်နယ်အသင်းမှာ ကစားနေတဲ့ ဇင်ချန်ကိုကတော့ လက်ရှိ ယူကရိန်း လက်ရွေးစင်အသင်းရဲ့ အသင်း ခေါင်းဆောင်လည်း ဖြစ်ပါတယ်။ ဒီပရဟိတပွဲကို ၂၀၂၃-၂၄ ပရီးမီးယားလိဂ် ရာသီသစ် မစတင်ခင်မှာ ကျင်းပ သွားမှာပါ။

 ဇင်ချန်ကိုနဲ့ ရှက်ဖ်ချန်ကို ကိုတွေ့ရစဉ်

အသက် ၂၆ နှစ်အရွယ်ရှိ ဇင်ချန်ကိုက “ဒီပရဟိတပွဲဟာ အပျက်အဆီးတွေကြားမှာ ကလေးတွေရဲ့ စာသင် ကျောင်းတွေ ပြန်တည်ဆောက်နိုင်ဖို့အတွက် ရန်ပုံငွေ ရှာဖွေနိုင်ဖို့ ရည်ရွယ်တာပါ။ သူတို့က ဒီကျောင်းကို လိုအပ်ပြီး ဖခင်တစ်ဦးအနေနဲ့ ယူကရိန်းကလေးတိုင်းရဲ့ နာကျင်မှုကို မျှဝေပြီး ခံစားရပါတယ်။ အာဆင်နယ်၊ ချယ်လ်ဆီးနဲ့ တခြားထိပ်တန်း အသင်းတွေကနေ ကွင်းထဲမှာ ကြီးကျယ်တဲ့ ကစားသမားတွေ အများကြီးကို တွေ့ရမယ်ဆိုတာ သေချာပါတယ်”လို့ ပြောခဲ့ပါတယ်။

ဒီပွဲက ရရှိတဲ့ ငွေကြေးတွေဟာ ချာနီဟစ်ဗ်အောဘလတ်စ်ရှိ Mykhailo-Kotsiubynsky Lyceum ရောက်ရှိမယ်လို့ သတင်းမှာ ဖော်ပြထားပါတယ်။

Source: BBC

CNI Sport News

၂၀၂၃ ခုနှစ်၊ ဇွန်လ ၂

ပြီးခဲ့တဲ့ တနင်္ဂနွေနေ့က ဖရန့်ဖတ်မှာ ကျင်းပခဲ့တဲ့ နိုင်ငံတကာ လူငယ်ဘောလုံးပြိုင်ပွဲမှာ ထိတ်လန့်စရာ အဖြစ်အပျက် ဖြစ်ခဲ့ပြီး ဆယ်ကျော်သက် ကစားသမားတစ်ဦးဟာ ပြိုင်ဘက်နဲ့ ရန်ဖြစ်ပြီးနောက် သေဆုံး သွားခဲ့ပါတယ်။

JFC ဘာလင်အသင်းမှာ ကစားနေတဲ့ အသက် ၁၅ နှစ်အရွယ်ရှိ ကစားသမားဟာ မတ်ဇ်လူငယ် အသင်း က ကစားသမားတစ်ဦးနဲ့ ပွဲအပြီးမှာ ရန်ဖြစ်ခဲ့ပါတယ်။

အဲဒီ ဖြစ်ရပ်ကြောင့် အသက် ၁၅ နှစ်အရွယ်ရှိ ကစားသမားဟာ ပြင်းထန်တဲ့ ဦးနှောက်ဒဏ်ရာ ရရှိသွား ခဲ့ပြီး သေဆုံးသွားခဲ့ပါတယ်။

ဂျာမန်ရဲတပ်ဖွဲ့ရဲ့ ထုတ်ပြန်ချက်မှာ “တနင်္ဂနွေနေ့က ရန်ဖြစ်ခဲ့မှုကြောင့် အသက် ၁၅ နှစ်အရွယ်ရှိ ကောင်လေးတစ်ဦးဟာ ဦးနှောက်ဒဏ်ရာ ပြင်းထန်စွာ ရရှိပြီး သေဆုံးသွားခဲ့ပါတယ်။ အခြေအနေတွေကို ရှင်းရှင်းလင်းလင်း သိနိုင်ဖို့အတွက် လာမယ့် ရက်ပိုင်းအတွင်းမှာ အလောင်းကို ခွဲစိတ်ပြီး စစ်ဆေးသွား မယ်”လို့ ဖော်ပြခဲ့ပါတယ်။

ဘောလုံးကွင်း တစ်ခုကိုတွေ့ရစဉ်

ဂျာမန်က NW သတင်းမှာတော့ ပွဲအပြီး နှစ်ဘက်အသင်းကြား ရန်ပွဲဖြစ်ပွားခဲ့တာမှာ မတ်ဇ်ကစားသမား တစ်ဦးဟာ သေဆုံးသွားခဲ့တဲ့ ကစားသမားရဲ့ ဦးခေါင်းနဲ့ လည်ပင်းကို ထိခိုက်အောင် လုပ်ခဲ့တာကြောင့် ပြင်းထန်တဲ့ ဦးနှောက်ဒဏ်ရာ ရသွားခဲ့တယ်လို့ ဖော်ပြခဲ့ပါတယ်။

လက်ရှိအချိန်မှာ ဂျာမန်တရားရေးဌာနက ဒီအမှုကို ကိုင်တွယ်နေပြီး ဖြစ်ရပ်မှန်တွေကို ဖော်ထုတ်နိုင်ဖို့ အတွက် စုံစမ်းစစ်ဆေးမှုတွေ ပြုလုပ်နေပါတယ်။

မတ်ဇ်လူငယ်အသင်းရဲ့ ကစားသမားကတော့ ဂျာမန်အာဏာပိုင်တွေနဲ့အတူ ရှိနေပြီး သေဆုံးသွားတဲ့ ကစားသမားကို တမင်ထိခိုက်အောင် လုပ်ဆောင်လိုစိတ် မရှိခဲ့ဘူးလို့ ပြောထားပါတယ်။

ရဲတပ်ဖွဲ့က အမည်မဖော်လိုတဲ့ အသက် ၁၆ နှစ်အရွယ်ရှိ မတ်ဇ်လူငယ် ကစားသမားကို စခန်းမှာ ထိန်းသိမ်း ထားပါတယ်။

အခုအချိန်မှာ စုံစမ်းစစ်ဆေးမှုတွေကို အရှိန်မြှင့် လုပ်ဆောင်နေတယ်လို့ သိရပါတယ်။

Source: Daily Mail

CNI Sport News

၂၀၂၃ ခုနှစ်၊ မေလ ၃၁

မန်စီးတီးအသင်းနည်းပြ ဂွာဒီယိုလာဟာ လိဂ်မန်နေဂျာများ အစည်းအရုံး(LMA)နဲ့ ပရီးမီးယားလိဂ် တစ်နှစ်တာ အကောင်းဆုံး နည်းပြဆု ၂ ဆုကို ရရှိသွားခဲ့ပါတယ်။

ဂွာဒီယိုလာဟာ မန်စီးတီးအသင်းကို ပရီးမီးယားလိဂ်ပြိုင်ပွဲမှာ ချန်ပီယံဆု ၃ နှစ်ဆက်တိုက် ရရှိအောင် ကိုင်တွယ်ပေးနိုင်ခဲ့ပြီးနောက် အခုလိုဆု ၂ ဆုကို ရရှိခဲ့တာပါ။

စပိန်လူမျိုး နည်းပြဟာ ပရီးမီးယားလိဂ် တစ်နှစ်တာ အကောင်းဆုံး နည်းပြဆုကို ၄ ကြိမ်မြောက် ရယူ နိုင်ခဲ့တာဖြစ်ပြီး လိဂ်မန်နေဂျာများအစည်းအရုံးက ပေးတဲ့ဆုကိုတော့ ၃ ကြိမ်မြောက်အဖြစ် ရယူ နိုင်ခဲ့တာ ဖြစ်ပါတယ်။
ဂွာဒီယိုလာဟာ ဒီဆု ၂ ဆုစလုံးကို ၂၀၂၁ နောက်ပိုင်းမှ ပထမဆုံးအကြိမ် ပြန်လည် ရယူနိုင်ခဲ့တာပါ။

ဂွာဒီယိုလာက “ ပရီးမီးယားလိဂ်ရဲ့ တစ်နှစ်တာ အကောင်းဆုံး နည်းပြဆုကို ရယူနိုင်ခဲ့တဲ့အတွက် ကျနော် ဝမ်းမြောက်မိ ပါတယ်။ ပြီးတော့ ဒီဆုဖလားကို ရခဲ့တာက မယုံနိုင်ဖွယ်ကောင်းတဲ့ ဂုဏ်ယူ စရာပါ။ ကျနော်တို့ဟာ ကမ္ဘာ့အကောင်းဆုံး လိဂ်မှာ ရှိနေပြီး လာမယ့်ရာသီမှာလည်း ဒီလိုမျိုးပဲ ဆက်ပြီး ရှိနေမယ်ဆိုတာကို ကျနော် ကတိပေးပါတယ်”လို့ ပြောခဲ့ပါတယ်။

 ကွန်ပနီကို တွေ့ရစဉ်

ဒီရာသီ ပရီးမီးယားလိဂ်ဖလား ရရှိထားပြီးဖြစ်တဲ့ မန်စီးတီးအသင်းဟာ နောက်ထပ် ဆုဖလားတွေဖြစ်တဲ့ FA ဖလားနဲ့ ချန်ပီယံလိဂ်ဖလား ပြိုင်ပွဲတွေရဲ့ ဗိုလ်လုပွဲ ယှဉ်ပြိုင်ရမှာဖြစ်လို့ ဆုဖလား ၃ လုံး ရယူနိုင်မယ့် အိပ်မက်ကို အကောင်အထည် ဖော်နိုင်ဖို့ ရှိနေတာပါ။

မန်စီးတီးအသင်းဟာ စနေနေ့မှာ ယူနိုက်တက်အသင်းနဲ့ FA ဖလား ဗိုလ်လုပွဲ၊ ဇွန်လ ၁၀ ရက်မှာ အင်တာ မီလန်နဲ့ ချန်ပီယံလိဂ် ဗိုလ်လုပွဲ ယှဉ်ပြိုင်ရမှာ ဖြစ်ပါတယ်။

အင်္ဂလန်ချန်ပီယံရှစ် ပြိုင်ပွဲရဲ့ တစ်နှစ်တာ အကောင်းဆုံး နည်းပြဆုကိုတော့ ဘန်လေအသင်း နည်းပြ ကွန်ပနီက ရရှိခဲ့ပါတယ်။

ကွန်ပနီဟာ သူကိုင်တွယ်တဲ့ ပထမဆုံး ရာသီမှာတင် ဘန်လေအသင်းကို ချန်ပီယံရှစ် ပြိုင်ပွဲကနေ ပရီးမီးယားလိဂ်ကို တန်းတက်နိုင်အောင် ဦးဆောင် ပေးနိုင်ခဲ့တာကြောင့် ဒီဆုကို ရရှိခဲ့တာပါ။

လိဂ်ဝမ်းတစ်နှစ်တာ အကောင်းဆုံး နည်းပြဆုကို ပလိုင်းမောက်နည်းပြ ရှုးမာကာနဲ့ လိဂ်တူးနည်းပြဆုကို လေတန်အော်ရီးယန့် အသင်းနည်းပြ ဝဲလ်လန်းစ်က ရရှိခဲ့တာ ဖြစ်ပါတယ်။

အမျိုးသမီး စူပါလိဂ်ပြိုင်ပွဲမှာ ချယ်လ်ဆီးအသင်းကို ချန်ပီယံဆု ရယူနိုင်အောင် ကိုင်တွယ်နိုင်ခဲ့တဲ့ နည်းပြ ဟေးရက်စ်က ဒီပြိုင်ပွဲရဲ့ တစ်နှစ်တာ အကောင်းဆုံးနည်းပြဆုကို ရရှိခဲ့ပါတယ်။

Source: Daily Mail

CNI Sport News

၂၀၂၃ ခုနှစ်၊ မေလ ၃၁

မော်ရင်ဟိုက သူ့ရဲ့ နည်းစနစ်တွေကို လူတွေက မေးခွန်းထုတ်ပြီး ဝေဖန်နေတာကို ဂရုမစိုက်ဘူးလို့ ဆီဗီလာနဲ့ ကစားမယ့် ယူရိုပါလိဂ်ဗိုလ်လုပွဲ မတိုင်ခင် ပြောလိုက်ပါတယ်။

မော်ရင်ဟိုက “ဝေဖန်မှုတွေကို ကျနော် ဂရုမစိုက်ပါဘူး။ ကျနော် ဘာလုပ်ပေးရမလဲ၊ လူတိုင်းနဲ့ တိုက်ခိုက်ရမှာ လား၊ ဒါကို ကျနော် မလုပ်နိုင်ပါဘူး။ ကျနော် အကောင်းဆုံးတွေကို ပေးဖို့အတွက် အလုပ်ကို ကြိုးစားပြီး လုပ်နေ ပါတယ်။ ကျနော့်မှာ သမိုင်းကြောင်းရှိပါတယ်။ ဒါကို ဘယ်သူကမှ ယုံနိုင်မှာ မဟုတ်ပါဘူး။ ဒါက ကျနော့်ရဲ့ ဘဝ ဒဿနပါပဲ။ ဗိုလ်လုပွဲမှာ ကျနော်တတ်နိုင်သမျှ အကောင်းဆုံး ကြိုးစားပြီး အနိုင်ရအောင် လုပ်ဆောင်သွားမှာပါ” လို့ BT Sport နဲ့ အင်တာဗျူးမှာ ပြောခဲ့ပါတယ်။

ရိုးမားအသင်းဟာ ယူရိုပါလိဂ် ဆီမီးဖိုင်နယ် ဒုတိယအကျော့ ပွဲစဉ်အဖြစ် ကစားခဲ့တဲ့ လေဗာကူဆင် အသင်းနဲ့ ပွဲမှာ ဘောလုံးပိုင်ဆိုင်မှု စံချိန်တင် ၂၈ ရာခိုင်နှုန်းသာရှိခဲ့ပြီး ခံစစ်ကို အကောင်းဆုံး ကစားကာ ယူရိုပါလိဂ် ဗိုလ်လုပွဲကို ရောက်ရှိခဲ့တာ ဖြစ်ပါတယ်။

 ရိုးမားအသင်းကိုတွေ့ရစဉ်

အဲဒါကြောင့် မော်ရင်ဟိုရဲ့ နာမည်ကြီး ခံစစ်နည်းစနစ်ကို ဝေဖန်မှုတွေ ပြုလုပ်ခဲ့ကြတာ ဖြစ်ပေမယ့် ပေါ်တူဂီ လူမျိုး နည်းပြက ဒါကို ဂရုမစိုက်ပါဘူး။

မော်ရင်ဟိုဟာ ရိုးမားအသင်းကို ပြီးခဲ့တဲ့ရာသီက ယူရိုပါကွန်းဖရန့်စ်လိဂ် ပြိုင်ပွဲမှာ ချန်ပီယံဆု ရရှိအောင် ကိုင်တွယ်နိုင်ခဲ့ပြီးနောက် အခုနှစ်မှာလည်း ယူရိုပါလိဂ်ဗိုလ်လုပွဲ ပို့ဆောင်ပေးခဲ့တာကြောင့် ၂ နှစ်ဆက်တိုက် ဥရောပပြိုင်ပွဲ ဗိုလ်လုပွဲ ယှဉ်ပြိုင်ခွင့် ရရှိအောင် ကိုင်တွယ်ပေးနိုင်ခဲ့တာ ဖြစ်ပါတယ်။

ဒါအပြင် ဒီဗိုလ်လုပွဲဟာ မော်ရင်ဟိုအတွက် ၆ ကြိမ်မြောက် ဥရောပပြိုင်ပွဲ ဗိုလ်လုပွဲဖြစ်ပြီး အရင် ၅ ကြိမ်စလုံးမှာ ဗိုလ်စွဲခဲ့တဲ့ မှတ်တမ်းကောင်းတစ်ခုကို ပိုင်ဆိုင်ထားပါတယ်။

မော်ရင်ဟိုက “ကျနော်တို့ဟာ ကြောက်ရွံ့တာ မရှိပါဘူး။ ကျနော်တို့ရဲ့ အရည်အသွေးတွေနဲ့ ပြဿနာတွေကို ကျနော်တို့ သိပါတယ်။ ကျနော်တို့ဟာ ဒီပြဿနာတွေကို ဖုံးကွယ်ပြီး အားသာချက်တွေနဲ့ ကစားနေပါတယ်။ ကျနော်တို့ဟာ အလွန်တောင့်တင်းတဲ့ အစုအဖွဲ့ဖြစ်ပြီး ဒီကောင်လေးတွေက ဗိုလ်လုပွဲမှာ ကစားဖို့ အလွန် ထိုက် တန်ပါတယ်”လို့ ပြောခဲ့ပါတယ်။

ဆီဗီလာနဲ့ ရိုးမားအသင်းတို့ရဲ့ ယူရိုပါလိဂ် ဗိုလ်လုပွဲကို ဟန်ဂေရီနိုင်ငံ၊ ဘူဒါပတ်စ်ရှိ Puskas Arena မှာ ဇွန်လ ၁ ရက် မြန်မာစံတော်ချိန် မနက် ၁ နာရီခွဲအချိန်မှာ ယှဉ်ပြိုင်သွားမှာ ဖြစ်ပါတယ်။

Source: Euro Sport

CNI Sport News

၂၀၂၃ ခုနှစ်၊ မေလ ၃၁

ဘိုင်ယန်မြူးနစ်အသင်းနည်းပြ တူချယ်လ်ဟာ ဝက်စ်ဟမ်းကွင်းလယ်လူ ဒီကလန်ရိုက်စ်ကို အသင်းထံ ပြောင်းရွှေ့လာနိုင်ဖို့အတွက် ဖုန်းခေါ်ဆိုပြီး ဆွဲဆောင်ခဲ့တယ်လို့ ဂျာမနီကလာတဲ့ သတင်းတွေမှာ ဖော်ပြ ထားပါတယ်။

ပရီးမီးယားလိဂ်ကလပ်အသင်းအများအပြားက ခေါ်ယူဖို့ စိတ်ဝင်စားနေတဲ့ ဒီကလန်ရိုက်စ်ဟာ အခု နွေရာသီအပြောင်းအရွှေ့မှာ ဝက်စ်ဟမ်းအသင်းကနေ ထွက်ခွာဖို့ ရှိနေတာပါ။ အာဆင်နယ်အသင်းဟာ ကွင်းလယ်ပိုင်းကို အားဖြည့်ဖို့အတွက် ဒီကလန်ရိုက်စ်ကို အဓိကပစ်မှတ်အဖြစ်သတ်မှတ်ပြီး ကြိုးစား နေသလို ယူနိုက်တက်၊ချယ်လ်ဆီးနဲ့ မန်စီးတီးအသင်းတို့ကလည်း ခေါ်ယူဖို့ စောင့်ကြည့်နေကြတာ ဖြစ်ပါတယ်။

ဘိုင်ယန်မြူးနစ်အသင်းကလည်း ပရီးမီးယားလိဂ်ကလပ်အသင်းတွေနဲ့အပြိုင် ဒီကလန်ရိုက်စ်ကို ခေါ်ယူဖို့ လုပ်ဆောင်နေပြီး Sky Sport Germany က နည်းပြဖြစ်သူ တူချယ်လ်ဟာ ကစားသမားနဲ့ ပုဂ္ဂိုလ်ရေးအရ စကားပြောဆိုမှုတွေပြုလုပ်ကာ ဘွန်ဒစ်လီဂါကို ပြောင်းရွှေ့လာနိုင်အောင် ဆွဲဆောင်နေတယ်လို့ ဖော်ပြ ခဲ့ပါတယ်။ ဒီကလန်ရိုက်စ်ကတော့ ပရီးမီးယားလိဂ်မှာပဲ ဆက်ရှိဖို့က သူ့ရဲ့ဦးစားပေးဖြစ်ပေမယ့် ဘိုင်ယန် မြူးနစ်ရဲ့ စိတ်ဝင်စားမှုကိုလည်း လမ်းဖွင့်ပြီး ကြိုဆိုထားတာပါ။

ဘိုင်ယန်မြူးနစ်အသင်းဟာ လာမယ့်နှစ်ရာသီမှာ ချန်ပီယံလိဂ်ဆုဖလားကို ရယူနိုင်ဖို့ ပစ်မှတ်ထား နေတာကြောင့် နာမည်ကြီးကစားသမားတွေကို ခေါ်ယူဖို့ ရှိနေပြီး ဒီထဲမှာ ဒီကလန်ရိုက်စ်က ထိပ်ဆုံး နေရာမှာ ရှိနေတာဖြစ်ပါတယ်။ အာဆင်နယ်အသင်းဟာ ဒီကလန်ရိုက်စ်ကို ခေါ်ယူနိုင်ဖို့ ပိုပြီးအခြေအနေ ကောင်းနေတာကြောင့် ဘိုင်ယန်မြူးနစ်အသင်းဟာ အမြန်ဆုံးလက်ဦးမှုရယူနိုင်အောင် လုပ်ဆောင် နေတာပါ။

ဘိုင်ယန်မြူးနစ်နည်းပြ တူချယ်လ်ဟာ ချယ်လ်ဆီးအသင်းကို ကိုင်တွယ်ချိန်တုန်းက ဒီကလန်ရိုက်စ်နဲ့ အကြိမ်ကြိမ်တွေ့ဆုံခဲ့ဖူးပြီး ကွင်းလယ်ကစားသမားကို ချီးကျူးမှုတွေတောင် ပြုလုပ်ထားတာ ဖြစ်ပါ တယ်။ဘိုင်ယန်မြူးနစ်အသင်းဟာ လာမယ့်ရက်ပိုင်းအတွင်းမှာ ဒီကလန်ရိုက်စ်ကို ခေါ်ယူနိုင်ဖို့အတွက် အရှိန်မြှင့်လုပ်ဆောင်ဖို့ ရှိနေပြီး အင်္ဂလန်ကစားသမားကို ပေါင် ၈၆ သန်းနဲ့ ကမ်းလှမ်းမှုတွေ ပြုလုပ်ဖို့ ရှိနေတာပါ။ ဝက်စ်ဟမ်းအသင်းကတော့ ဒီကလန်ရိုက်စ်အတွက် ပေါင်သန်း ၁၀၀ အထက် ရရှိနိုင်ဖို့ မျှော်လင့်နေတာဖြစ်ပါတယ်။

Source:Metro

CNI Sport News

၂၀၂၃ ခုနှစ်၊ မေလ ၃၁

ယူနိုက်တက်အသင်းနည်းပြ အဲရစ်တန်ဟတ်က ပြီးခဲ့တဲ့လပိုင်းတွေ အတွင်းမှာ စွဲချက်တင်ခံထားရတဲ့ အမှုတွေ အားလုံးကနေ ရုပ်သိမ်းခံခဲ့ရတဲ့ တိုက်စစ်မှူး ဂရင်းဝုဒ်ရဲ့ အနာဂတ်နဲ့ ပတ်သက်ပြီး သူ့မှာ ဆုံးဖြတ်ပိုင်ခွင့် မရှိဘူးလို့ ပြောခဲ့ပါတယ်။

အဲရစ်တန်ဟတ်က “ဂရင်းဝုဒ်ဟာ ယူနိုက်တက် အသင်းအတွက် ဂိုးအများအပြား သွင်းယူထား နိုင်တယ် ဆိုတာကို အတိတ်မှာ သူပြသခဲ့ပြီးပါပြီ။ သူ့ရဲ့ အနာဂတ်နဲ့ ပတ်သက်ပြီး ကျနော့်မှာ ဆုံးဖြတ်ပိုင်ခွင့် မရှိပါ ဘူး”လို့ The Times ကို ပြောခဲ့တာပါ။

ဂရင်းဝုဒ်ဟာ မုဒိမ်းမှု၊ လိင်ပိုင်းဆိုင်ရာ ကျူးလွန်မှုတွေနဲ့ စွဲချက်တင်ခံခဲ့ရတဲ့ ၂၀၂၂ ခုနှစ်၊ ဇန်နဝါရီလ ကတည်းက ဘောလုံးကစားခြင်းကနေ ဆိုင်းငံ့ခံထားရတာ ဖြစ်ပေမယ့် သူ့ကို စွဲချက်တင်ထားတာ တွေကို အခုနှစ် ဖေဖော်ဝါရီလက ရုပ်သိမ်းပေးခဲ့ပါတယ်။

ဒါပေမယ့် ယူနိုက်တက်အသင်းဘက်က သူ့ကို ကလပ်အတွင်းပိုင်းမှာ စုံစမ်းစစ်ဆေးမှုတွေ ပြုလုပ်နေတာ ကြောင့် ဂရင်းဝုဒ်ဟာ အသင်းအတွက် ပြန်လည် ကစားခွင့်မရသေးပါဘူး။

ဂရင်းဝုဒ်ကို တွေ့ရစဉ်

ဂရင်းဝုဒ်ဟာ အသင်းအတွက် ပြန်ကစားပေးဖို့ စိတ်အားထက်သန်နေပေမယ့် ဒီလို အခြေအနေတွေ ကြောင့် ယူနိုက်တက်အတွက် ပြန်ကစားပေးတော့မှာ မဟုတ်တော့ဘူးလို့ သူငယ်ချင်းတွေကို ပြောခဲ့ ကြောင်း သတင်းတွေမှာ ဖော်ပြထားတာ ဖြစ်ပါတယ်။

ယူနိုက်တက်နည်းပြ အဲရစ်တန်ဟတ်ဟာ ဂရင်းဝုဒ်နဲ့ မျက်နှာချင်းဆိုင် တွေ့ဆုံပြီး ကစားသမားရဲ့ အခြေအနေတွေကို မေးမြန်းခဲ့ပေမယ့် အသင်းဘက်က အခုအချိန်ထိ ဆုံးဖြတ်ချက် မပြတ်သား သေးတာပါ။

လက်ရှိအချိန်မှာ ဂရင်းဝုဒ်ကို ခေါ်ယူဖို့ စီးရီးအေ ထိပ်သီးကလပ် ဂျူဗင်တပ်စ် အသင်းအပြင် အီတလီ ကလပ်တွေနဲ့ တူရကီကလပ်တွေက စိတ်ဝင်စားနေပြီး ကစားသမားရဲ့ ယူနိုက်တက် အခြေအနေကို စောင့်ကြည့်နေကြတာ ဖြစ်ပါတယ်။

ဂရင်းဝုဒ်ဟာ ယူနိုက်တက်အသင်းနဲ့ ၂၀၂၁ ခုနှစ်၊ ဖေဖော်ဝါရီလကမှ ၄ နှစ် စာချုပ်သစ် ချုပ်ဆိုခဲ့တာ ဖြစ်ပြီး တစ်ပတ်လုပ်ခပေါင် ၇၅,၀၀၀ ရရှိနေတာပါ။

အင်္ဂလန်ကစားသမားဟာ ယူနိုက်တက်အသင်းအတွက် ၂၀၂၂ ခုနှစ်၊ ဇန်နဝါရီလက ဝက်စ်ဟမ်းအသင်းကို ၁ ဂိုး- ဂိုးမရှိနဲ့ အနိုင်ရတဲ့ပွဲမှာ နောက်ဆုံးပွဲစဉ်အဖြစ် ပါဝင်ကစားထားတာ ဖြစ်ပါတယ်။

၂၀၁၈-၁၉ ရာသီမှာ ယူနိုက်တက် အသင်းကြီးအတွက် စတင် ပါဝင်ခွင့်ရခဲ့တဲ့ ဂရင်းဝုဒ်ဟာ ပွဲပေါင်း ၁၂၉ ပွဲ ပါဝင်ကစားထားပြီး ၃၅ ဂိုး သွင်းယူထားပါတယ်။

Source: Daily Mail

CNI Sport News

၂၀၂၃ ခုနှစ်၊ မေလ ၃၀

အခုနှစ်ရာသီ ပရီးမီးယားလိဂ် ပြိုင်ပွဲကနေ တန်းဆင်းသွားခဲ့ပြီးနောက် လက်စတာအသင်း ပြန်လာမယ်လို့ အသင်း ဥက္ကဋ္ဌ အေရာဝတ်က ကတိပေးလိုက်ပါတယ်။

အေရာဝတ်က “တန်းဆင်းခြင်းက သိသာတဲ့ ဆုတ်ယုတ်မှုဆိုတာ ငြင်းလို့မရပေမယ့် ဒါကို ကျနော်တို့ အဓိပ္ပါယ် ဖွင့်ဆိုသွားမှာ မဟုတ်ပါဘူး။ ကျနော်တို့ဟာ တန်းဆင်းရတဲ့ နာကျင်မှုကို အတူမျှဝေ ခံစားကြရတာ ဖြစ်ပေမယ့် ကျနော်တို့ ပြန်လာမှာပါ။ ကျနော်တို့ဟာ အောင်မြင်မှုတွေ ရရှိခဲ့ပြီး ဘယ်တော့မှ မေ့လို့မရတဲ့ အတွေ့အကြုံ တွေကိုလည်း အတူမျှဝေ ခဲ့ကြရပါတယ်။ ကျနော်တို့ဟာ ပြီးခဲ့တဲ့ရာသီမှာ ကောင်းမွန်အောင် မလုပ်နိုင်ခဲ့ပါဘူး။ ကျနော်တို့ဟာ လာမယ့် ရက်ပိုင်းအတွင်းမှာ ဒီလိုဖြစ်ခဲ့ရတဲ့ လုပ်ငန်းစဉ်တွေနဲ့ ဆုံးဖြတ်ချက်တွေကို ပြန်လည် သုံးသပ်ဖို့ လိုအပ်ပါတယ်”လို့ ပြောခဲ့တာပါ။

အေရာဝတ်ရဲ့ မိသားစုဟာ လက်စတာအသင်းကို ၂၀၁၀ ကတည်းက ပိုင်ဆိုင်ခဲ့တာဖြစ်ပြီး ဖခင်ဖြစ်သူ ဗီချိုင်း ကွယ်လွန်ပြီးနောက် ၂၀၁၈ မှာ အေရာဝတ်ဟာ အသင်းကို စပြီး ဦးဆောင်ခဲ့ရတာ ဖြစ်ပါတယ်။

လက်စတာအသင်းဟာ ဒီအချိန်တွေ အတွင်းမှာ ချန်ပီယံရှစ်ကနေ ပရီးမီးယားလိဂ်ကို တန်းတက်နိုင်ခဲ့ပြီး ပရီးမီးယားလိဂ်နဲ့ အက်ဖ်အေဖလားကို ရယူနိုင်ခဲ့တာပါ။

လက်စတာအသင်း ပိုင်ရှင်မိသားစုကို တွေ့ရစဉ်

လက်စတာအသင်းဟာ အခုနှစ်ရာသီ ပရီးမီးယားလိဂ် နောက်ဆုံးပွဲစဉ်မှာ ဝက်စ်ဟမ်းအသင်းကို ၂ ဂိုး- ၁ ဂိုးနဲ့ အနိုင်ရခဲ့ပေမယ့် အဲဗာတန်အသင်းက ဘုန်းမောက်အသင်းကို အနိုင်ရခဲ့တာကြောင့် လာမယ့်နှစ်ရာသီ ချန်ပီယံရှစ် ပြိုင်ပွဲမှာ သွားရောက် ယှဉ်ပြိုင်ရမှာ ဖြစ်ပါတယ်။

လက်စတာအသင်းဟာ တိုင်လီမန်စ်၊ ဂျွန်နီအီဗန်စ်နဲ့ ဆိုယန်ကူတို့အပြင် အဓိက ကစားသမားအချို့ကို အခု လာမယ့် အပြောင်းအရွှေ့မှာ ဆုံးရှုံးရမှာဖြစ်လို့ နွေရာသီမှာ အသင်းကို ကြီးကြီးမားမား ပြောင်းလဲမှုတွေ ပြုလုပ်ရဖို့ ရှိနေပါတယ်။

လက်စတာအသင်းကို ရောင်းဖို့အတွက် တောင်းဆိုတဲ့ ရိုင်းစိုင်းတဲ့ မက်ဆေ့ချ်တွေကိုလည်း ရရှိခဲ့တယ်လို့ အေရာဝတ်က ဖွင့်ဟခဲ့ပါတယ်။

အေရာဝတ်က “ကျနော်တို့ရဲ့ ပရိသတ်တွေဆီကနေ အကောင်းမြင်တဲ့ မက်ဆေ့ချ်တွေရော အဆိုးမြင်တဲ့ မက်ဆေ့ချ်တွေရော အမြောက်အများကို ရရှိခဲ့ပါတယ်။ တချို့က ကလပ်ကို ရောင်းချစေချင်ပြီး၊ တချို့က ရိုင်းစိုင်းတဲ့ စကားလုံးတွေနဲ့ ဖော်ပြခဲ့ကြပါတယ်။ ဒါပေမယ့် ရရှိခဲ့တဲ့ မက်ဆေ့ချ်အားလုံးက ကျနော့်ကို နာကျင် ရပါတယ်။ ကျနော်တို့ ကြုံတွေ့ခဲ့ရတဲ့ အရာတွေကို ပြန်လည်သင်ယူပြီး အသင်းကို ပြန်တည်ဆောက်နိုင်မယ်လို့ ယုံကြည်ကြောင်း”ပြောခဲ့ပါတယ်။

Source: BBC

CNI International News

၂၀၂၃ ခုနှစ်၊ မေလ ၃၀

ယူနိုက်တက်တိုက်စစ်မှူး ရက်ရှ်ဖို့ဒ်ဟာ ကလပ်ရဲ့ ရာသီအကုန် ကျင်းပတဲ့ ဆုပေးပွဲမှာ တစ်နှစ်တာ အကောင်းဆုံး ကစားသမားဆုကို ရရှိသွားခဲ့ပါတယ်။

အသက် ၂၅ နှစ်အရွယ်ရှိ တိုက်စစ်မှူးဟာ ဒီရာသီမှာ ယူနိုက်တက် အသင်းအတွက် ပြိုင်ပွဲစုံ ၅၅ ပွဲ ပါဝင် ကစားထားအပြီးမှာ ဂိုး ၃၀ သွင်းယူကာ ခြေစွမ်းပြသ နိုင်ခဲ့တာပါ။

ပြီးခဲ့တဲ့နှစ် ရာသီတွေတုန်းက ခြေစွမ်းပြသနိုင်ဖို့ ခက်ခဲခဲ့တဲ့ ရက်ရှ်ဖို့ဒ်ဟာ အခုနှစ်ရာသီမှာ ကောင်းမွန်တဲ့ ခြေစွမ်း တွေနဲ့အတူ မေလ ၂၉ ရက်နေ့ညက ပြုလုပ်ခဲ့တဲ့ ဆုပေးပွဲမှာ အသင်းရဲ့ ထိပ်တန်းဆုကို ရယူနိုင်ခဲ့တာ ဖြစ်ပါတယ်။

ရက်ရှ်ဖို့ဒ်ဟာ ယူနိုက်တက်အသင်း ၆ နှစ်ကြာ ဆုဖလားလက်မဲ့ ဖြစ်တာကို အဆုံးသတ်နိုင်ခဲ့တဲ့ ကာရာဘောင်း ဖလား ရယူနိုင်တာနဲ့ ချန်ပီယံလိဂ် ဝင်ခွင့် ရယူနိုင်ခဲ့တာမှာ အဓိကအခန်းကဏ္ဍကနေ ပါဝင်ခဲ့ပါတယ်။

အဲဒါကြောင့် ရက်ရှ်ဖို့ဒ်ဟာ ယူနိုက်တက်အသင်းရဲ့ တစ်နှစ်တာ အကောင်းဆုံး ကစားသမားဆုဖြစ်တဲ့ ဆာမတ် ဘတ်စ်ဘီဆုနဲ့ ကစားသမားတွေကပေးတဲ့ တစ်နှစ်တာ အကောင်းဆုံး ကစားသမားဆု ၂ ခုကို ရယူနိုင်ခဲ့တာ ဖြစ်ပါတယ်။

ရက်ရှ်ဖို့ဒ်ဟာ ၁၉၉၈ က ရိုင်ယန်ဂစ် နောက်ပိုင်း ဆာမတ်ဘတ်စ်ဘီဆုကို ရယူနိုင်တဲ့ ပထမဆုံး ယူနိုက်တက် အကယ်ဒမီထွက် ကစားသမားအဖြစ်လည်း မှတ်တမ်းတင်နိုင်ခဲ့ပါတယ်။

ကာရာဘောင်းဖလားနဲ့အတူ တွေ့ရတဲ့ ရက်ရှ်ဖို့ဒ်

ယူနိုက်တက်အသင်းကြီးအတွက် ရက်ရှ်ဖို့ဒ်ဟာ ပွဲထွက်ခွင့်ရရှိတဲ့ ၂၀၁၅-၁၆ ရာသီက စတင်ပြီး အခုအချိန်ထိ ပွဲပေါင်း ၃၅၈ ပွဲ ပါဝင် ကစားထားတာမှာ ၁၂၈ ဂိုး သွင်းယူနိုင်ခဲ့ပါတယ်။

ရက်ရှ်ဖို့ဒ်က “ဒါက အလွန်ဂုဏ်ယူစရာကောင်းတဲ့ ခံစားချက်ပါ။ အကယ်ဒမီ ကစားသမား တစ်ဦးအနေနဲ့ ဒီဆုကို ရယူနိုင်ခဲ့တာက ဂုဏ်ယူစရာပါ။ အသင်းဖော်တွေ၊ နည်းပြအဖွဲ့ဝင်တွေနဲ့ ဝန်ထမ်းတွေ အားလုံးကို ကျနော် ကျေးဇူးတင် ပါတယ်။ လေ့ကျင့်ရေးကွင်းမှာ သူတို့ရဲ့ နေ့တိုင်း တွန်းအားပေးမှု မပါဘဲနဲ့ ကျနော့်ရဲ့ အကောင်းဆုံး ပုံစံကို ခင်ဗျားတို့ မြင်တွေ့ရမှာ မဟုတ်ပါဘူး။ အားလုံးကို ကျေးဇူး အများကြီး တင်ပါတယ်”လို့ ပြောပါတယ်။

ရက်ရှ်ဖို့ဒ်နဲ့ ယူနိုက်တက်အသင်းတို့ ချုပ်ဆိုထားတဲ့ စာချုပ်ဟာ ၂၀၂၄ မှာ ကုန်ဆုံးမှာဖြစ်ပြီး အသင်းဘက်က သူ့ကို စာချုပ်သက်တမ်းတိုးဖို့ လုပ်ဆောင်နေသလို နည်းပြ အဲရစ်တန်ဟတ်က ကစားသမားဟာ စာချုပ်သစ် ချုပ်ဆိုနိုင် မယ်လို့ ယုံကြည်ကြောင်း ပြောထားပါတယ်။

ယူနိုက်တက်အသင်းဟာ အခုနှစ် ရာသီ နောက်ဆုံးပွဲစဉ်အဖြစ် ဇွန်လ ၃ ရက်မှာ မန်စီးတီးအသင်းနဲ့ FA ဖလား ဗိုလ်လုပွဲ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ မေလ ၃၀

အေဂျတ်စ်အသင်းကွင်းလယ်လူ ဘာဂျ့်ဟူးဝစ်ဟာ အသင်းဘတ်စ်ကားရှေ့မှာ ပရိသတ်တစ်ဦးကို ထိုးနှက်ခဲ့တဲ့ ရုပ်သံထွက်ပေါ်လာပြီးနောက် တောင်းပန်မှုပြုလုပ်သွားခဲ့တာဖြစ်ပါတယ်။

အသက် ၃၁ နှစ်အရွယ်ရှိ နယ်သာလန်လက်ရွေးစင် ကွင်းလယ်လူဟာ ပရိသတ်တစ်ဦးကို ထိုးနှက်ခဲ့တာဖြစ်ပြီး တာဝန်ရှိသူတွေက ဝင်ရောက်တားဆီးခဲ့ရတာပါ။ တနင်္ဂနွေနေ့က ကစားခဲ့တဲ့ပွဲစဉ်မှာ အေဂျတ်စ်အသင်းက တွမ်တီးအသင်းကို ၃ ဂိုး- ၁ ဂိုးနဲ့အရေးနိမ့်ခဲ့တဲ့ ပွဲစဉ်အပြီးမှာ ဒီအဖြစ်အပျက်ဖြစ်ခဲ့တာဖြစ်ပြီး ဘာဂျ့်ဟူးဝစ်ဟာ သူ့ရဲ့လုပ်ရပ်ကို နောင်တရနေခဲ့တာဖြစ်ပါတယ်။

ဘာဂျ့်ဟူးဝစ်က “ကျနော့်ရဲ့ လုပ်ရပ်အတွက် နောင်တရမိပြီး၊ ဒီလိုမျိုးမလုပ်ခဲ့သင့်ပါဘူး။ ကျနော့်ရဲ့လုပ်ရပ်က ဘယ်လိုမှဖြေရှင်းလို့မရပါဘူး။ ဒါက မကောင်းဘူးဆိုတာကို ကျနော်နားလည်ပါတယ်။ အေဂျတ်စ်ကစားသမား တစ်ဦးအနေနဲ့ စံနမူနာယူစရာ အခန်းကဏ္ဍရှိပါတယ်” လို့ ထုတ်ပြန်ချက်ထဲမှာ ဖော်ပြထားတာပါ။

နယ်သာလန်လက်ရွေးစင်အတွက် ၄၅ ပွဲ ပါဝင်ကစားထားတဲ့ ဘာဂျ့်ဟူးဝစ်ဟာ ၂၀၂၁ က ဖီယင်နုကနေ အေဂျတ်စ်အသင်းကို ပြောင်းရွှေ့လာခဲ့တာဖြစ်ပြီး ဒီရာသီ ၄၂ ပွဲ ပါဝင်ကစားထားတာမှာ ၁၁ ဂိုးသွင်းယူနိုင်ခဲ့တာ ဖြစ်ပါတယ်။ ဘာဂျ့်ဟူးဝစ်ဟာ ဖီယင်နုအသင်းကို မပြောင်းရွှေ့ခင်မှာ ပရီးမီးယားလိဂ်ကလပ် ဝက်ဖိုဒ့်အသင်းမှာ ၂၀၁၅-၁၆ ရာသီက တစ်ရာသီ ကစားခဲ့တာပါ။

ပြီးခဲ့တဲ့ရာသီက ဒတ်ချ်အမှတ်ပေးဖလား ရယူနိုင်ခဲ့တဲ့ အေဂျတ်စ်အသင်းဟာ အခုနှစ်ရာသီမှာတော့ ယူရိုပါလိဂ် ပလေးအောဖ့် ယှဉ်ပြိုင်ရမှာဖြစ်ပြီး ၂၀၀၉ နောက်ပိုင်း ပထမဆုံးအကြိမ် ချန်ပီယံလိဂ်ဝင်ခွင့်နဲ့ လွဲခဲ့ရတာ ဖြစ်ပါတယ်။ဘာဂျ့်ဟူးဝစ်ရဲ့ အသင်းဟောင်း ဖီယင်နုအသင်းကတော့ ၂၀၁၇ နောက်ပိုင်း ပထမဆုံးအကြိမ် ဒတ်ချ်အမှတ်ပေးဖလားကို ရယူနိုင်ခဲ့ပြီး ပီအက်စ်ဗွီအသင်းက ဒုတိယရရှိခဲ့တာဖြစ်ပါတယ်။

Source:BBC