CNI Sport News

၂၀၂၂ ခုနှစ်၊ အောက်တိုဘာ ၁၀

အာဂျင်တီးနားအသင်းနည်းပြ စကာလိုနီက အသင်းခေါင်းဆောင် မက်ဆီကို ၂၀၂၆ ကမ္ဘာ့ဖလားပြိုင်ပွဲအထိ ဆက်ကစားစေချင်တယ်လို့ ပြောလိုက်ပါတယ်။

စကာလိုနီက “ဒါဟာ သူ့အတွက် နောက်ဆုံးကမ္ဘာ့ဖလားမဖြစ်လာဖို့ မျှော်လင့်ပါတယ်။သူဟာ ကွင်းထဲမှာ ပျော်ရွှင် နေသလို လူအများအပြားကိုလည်း ပျော်ရွှင်စေပါတယ်။ကျနော်တို့ဘက်က သူ့ကို ဂရုစိုက်ပြီး ဆက်ခေါ်ဆောင် သွားမယ်ဆိုရင် သူ့ဆီက ပွဲအများအပြားကို ဆက်ပြီး မြင်တွေ့ရမှာပါ။ဘောလုံးလောကကလည်း ဒီလိုပဲ တောင်းဆို နေကြတာပါ” လို့ CNN Radio ကို ပြောခဲ့တာပါ။

ကာတာကမ္ဘာ့ဖလားဟာ သူ့အတွက် ၅ ကြိမ်မြောက်ကမ္ဘာ့ဖလားနဲ့ နောက်ဆုံးကမ္ဘာ့ဖလား ဖြစ်တယ်လို့ မက်ဆီ ကိုယ်တိုင်က အတည်ပြုထားတာဖြစ်ပါတယ်။ဒါပေမယ့် နည်းပြ စကာလိုနီကတော့ မက်ဆီအနေနဲ့ သူ့ရဲ့ ဆုံးဖြတ်ချက်ကို ပြန်ပြောင်းပြီး လက်ရွေးစင်အတွက် ဆက်ကစားဖို့ မျှော်လင့်နေတာပါ။လက်ရှိအချိန်မှာ အာဂျင်တီးနားအသင်းဟာ အကောင်းဆုံးပုံစံကို ရရှိနေပြီး ပြိုင်ပွဲစုံ ၃၅ ပွဲ ဆက်တိုက်ရှုံးပွဲမရှိဖြတ်သန်းနေတာ ဖြစ်ပါတယ်။

မက်ဆီဟာ လက်ရှိအချိန်မှာ အသက် ၃၅ နှစ်အရွယ်ရှိပြီဖြစ်တာကြောင့် နောက်တစ်ကြိမ် ကမ္ဘာ့ဖလားပြိုင်ပွဲဆိုရင် အသက် ၃၉ နှစ်အရွယ်ရှိပြီဖြစ်ပါတယ်။မက်ဆီဟာ ၂၀၁၆ ကိုပါအမေရိကဖလား ဗိုလ်လုပွဲမှာ ချီလီအသင်းကို အရေးနိမ့်ပြီးနောက် လက်ရွေးစင်ကစားသမားဘဝက အနားယူကြောင်း ကြေညာခဲ့သေးတာ ဖြစ်ပါတယ်။ အဲဒီတုန်းက အာဂျင်တီးနားအသင်းဟာ ၂၀၁၄ ကမ္ဘာ့ဖလားဗိုလ်လုပွဲ အပါအဝင် ဗိုလ်လုပွဲ ၄ ကြိမ် အရေးနိမ့် ခဲ့တာပါ။

ဒါပေမယ့် ပီအက်စ်ဂျီတိုက်စစ်မှူးဟာ ဆုံးဖြတ်ချက်ပြန်ပြောင်းပြီး အာဂျင်တီးနားအတွက် ပါဝင်ကစားကာ ၂၀၂၁ ကိုပါအမေရိကဖလားကို ရယူနိုင်ခဲ့တာဖြစ်ပါတယ်။မက်ဆီဟာ ကစားသမားဘဝကို ပြီးပြည့်စုံဖို့အတွက် ကမ္ဘာ့ဖလားဆုဖလား ကိုင်မြှောက်နိုင်ဖို့ ကျန်ရှိနေသေးတာဖြစ်ပြီး အခုနှစ်ပြိုင်ပွဲမှာ ရယူနိုင်ခဲ့မယ်ဆိုရင်တော့ သူ့ရဲ့ဆုံးဖြတ်ချက်ကို ပြန်ပြောင်းနိုင်ဖွယ် မရှိတော့ပါဘူး။အာဂျင်တီးနားအသင်းဟာ ကာတာကမ္ဘာ့ဖလား ပြိုင်ပွဲမှာ ဗိုလ်စွဲဖို့ ရေပန်းအစားဆုံးအသင်းတွေထဲမှာ ပါဝင်နေတာဖြစ်ပါတယ်။

တောင်အမေရိကနိုင်ငံဟာ အခုနှစ်ပြိုင်ပွဲရဲ့ အုပ်စု C မှာ ဆော်ဒီ၊ မက္ကဆီကို၊ ပိုလန်တို့နဲ့ တစ်အုပ်စုတည်း ကျရောက်နေပြီး အဖွင့်ပွဲစဉ်အဖြစ် နိုဝင်ဘာလ ၂၂ ရက်မှာ ဆော်ဒီအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:DailyMail

CNI Sport News

၂၀၂၂ ခုနှစ်၊ နိုဝင်ဘာ ၉

ကမ္ဘာ့ဖလားပြိုင်ပွဲ ကျင်းပဖို့ ရက်ပိုင်းသာ လိုအပ်တော့ချိန်မှာ EA Sports က အာဂျင်တီးနားဟာ ဒီပြိုင်ပွဲမှာ ချန်ပီယံဆုကို ရရှိသွားလိမ့်မယ်လို့ ခန့်မှန်းလိုက်ပါတယ်။

ဖီဖာဘောလုံးဂိမ်းတွေကို ထုတ်လုပ်တဲ့ EA Sports ဟာ ကမ္ဘာ့ဖလားပြိုင်ပွဲ တစ်ခုလုံးကို တုပပြီး ခန့်မှန်းမှု ပြုလုပ် သွားခဲ့တာပါ။ EA Sports ဟာ ကမ္ဘာ့ဖလား ချန်ပီယံဆုအတွက် ခန့်မှန်းတာနဲ့ ပက်သက်ပြီး အထင်ကြီးစရာ ကောင်းတဲ့ မှတ်တမ်းတွေ ရှိနေတာလည်း ဖြစ်ပါတယ်။

၂၀၁၀ ကမ္ဘာ့ဖလားမှာ စပိန်၊ ၂၀၁၄ ကမ္ဘာ့ဖလားမှာ ဂျာမနီနဲ့ ၂၀၁၈ ကမ္ဘာ့ဖလားပြိုင်ပွဲမှာ ပြင်သစ်အသင်း ချန်ပီယံဆု ရယူနိုင်မယ်လို့ ခန့်မှန်းတာမှာ မှန်ကန်ခဲ့ပါတယ်။

EA Sports က အာဂျင်တီးနား အသင်းဟာ ၂၀၂၂ ကမ္ဘာ့ဖလားဗိုလ်လုပွဲမှာ ဘရာဇီးလ်အသင်းနဲ့ တွေ့ဆုံမှာ ဖြစ်ပြီး ၁ ဂိုး- ဂိုးမရှိနဲ့ အနိုင်ရကာ ချန်ပီယံဆုကို ရယူမယ်လို့ ခန့်မှန်းခဲ့တာ ဖြစ်ပါတယ်။

၂၀၂၂ ကမ္ဘာ့ဖလား အကောင်းဆုံးရလာနိုင်မယ့် စာရင်းကို EA Sports ကထုတ်ပြန်ထား

တတိယနေရာကိုတော့ ပြင်သစ်အသင်းက ပေါ်တူဂီအသင်းကို ၄ ဂိုး- ၂ ဂိုးနဲ့ အနိုင်ယူပြီး ရရှိမယ်လို့ ခန့်မှန်းထား တာပါ။ နာမည်ကြီး အင်္ဂလန်ဟာ ၁၆ သင်းအဆင့်မှာ နယ်သာလန်ကို ၃ ဂိုး- ၁ ဂိုးနဲ့ အရေးနိမ့်ပြီး ထွက်ခွာရမယ်လို့ သူတို့ရဲ့ ခန့်မှန်းမှုမှာ ဖော်ပြထားတာ ဖြစ်ပါတယ်။

မက်ဆီဟာ ဒီပြိုင်ပွဲမှာ ၇ ပွဲ ကစားတာမှာ ၈ ဂိုးသွင်းပြီး ဂိုးသွင်းဘုရင်ဆုနဲ့ ပြိုင်ပွဲရဲ့ အကောင်းဆုံး ကစားသမားဆု ကို ရရှိမယ်လို့လည်း EA Sports က ခန့်မှန်းထားတာပါ။

ဒီပြိုင်ပွဲရဲ့ အကောင်းဆုံးအသင်းမှာ မာတီးနတ်စ်၊ ကန်ဆယ်လို၊ ဗာရန်း၊ မာကွင်ဟိုစ်၊ အကူနာ၊ ပါရီဒက်စ်၊ ဒီပေါလ်၊ ဗီနီစီးယက်စ်၊ မက်ဆီ၊ ဘတ်ပီနဲ့ ရစ်ချာလီဆန် တို့ ပါဝင်မယ်လို့ ခန့်မှန်းထားတာ ဖြစ်ပါတယ်။

၂၀၂၂ ကမ္ဘာ့ဖလား ပြိုင်ပွဲကိုတော့ နိုဝင်ဘာလ ၂၀ ရက်ကနေ ဒီဇင်ဘာလ ၁၈ ရက်အထိ ကျင်းပမှာဖြစ်ပါတယ်။

Source: Sportbible

CNI Sport News

၂၀၂၂ ခုနှစ်၊ နိုဝင်ဘာ ၉

အီကွေဒေါ အသင်းနည်းပြ အယ်လ်ဖာရိုက အိမ်ရှင်ကာတာနဲ့ သူ့အသင်း ကစားမယ့် ကမ္ဘာ့ဖလားပြိုင်ပွဲ အဖွင့်ပွဲစဉ် ကို ရက်ပြောင်းလဲ ကျင်းပတဲ့ ဆုံးဖြတ်ချက်အပေါ် ဝေဖန်လိုက်ပါတယ်။

အယ်လ်ဖာရိုက “ကျနော်တို့ ပြင်ဆင်ချိန် တစ်ရက် လျော့နည်းသွားပါတယ်။ ဒီလို ရက်ပြောင်းလဲ ကျင်းပတာနဲ့ ပက်သက်ပြီး အကောင်အထည် ဖော်တာမှာ ပြဿနာတစ်စုံတစ်ရာ ရှိ၊မရှိ ဆိုတာကိုလည်း ကျနော်တို့နဲ့ ဆွေးနွေး တိုင်ပင်မှု မရှိခဲ့ဘူး”လို့ အင်္ဂါနေ့က ပြုလုပ်တဲ့ သတင်းစာ ရှင်းလင်းပွဲမှာ ပြောပါတယ်။

ကမ္ဘာ့ဖလားပြိုင်ပွဲကို မူလက နိုဝင်ဘာလ ၂၁ ရက်မှာ ကျင်းပဖို့ စီစဉ်ခဲ့တာဖြစ်ပေမယ့် ပြိုင်ပွဲစီစဉ်သူတွေက အိမ်ရှင်အသင်းနဲ့ ပြိုင်ပွဲစတင်တာ ပိုကောင်းတယ်လို့ ဆုံးဖြတ်ခဲ့တာ ဖြစ်ပါတယ်။

အဲ့ဒါကြောင့် ကာတာနဲ့ အီကွေဒေါ အသင်းရဲ့ ပွဲကို ရှေ့တစ်ရက်တိုးပြီး နိုဝင်ဘာလ ၂၀ ရက်မှာ ကျင်းပဖို့ ပြုလုပ်ခဲ့ တာပါ။ အီကွေဒေါအသင်းဟာ တောင်အမေရိကဇုန် ခြေစစ်ပွဲမှာ ဘရာဇီးလ်၊ အာဂျင်တီးနား၊ ဥရုဂွေးတို့ရဲ့ နောက် စတုတ္တနေရာရကာ ကမ္ဘာ့ဖလား ခြေစစ်ပွဲ အောင်မြင်ခဲ့တာပါ။

အီကွေဒေါအသင်းသားများကိုတွေ့ရစဉ်(FIFA)

အီကွေဒေါအသင်းဟာ အသုံးပြုလို့မရတဲ့ ကစားသမား ကတ်စတီလိုကို အသုံးပြုခဲ့လို့ ကမ္ဘာ့ဖလားပြိုင်ပွဲကနေ ထုတ်ပယ်ဖို့ တောင်းဆိုမှုတွေနဲ့လည်း ရင်ဆိုင်ခဲ့ ရပါသေးတယ်။

ဒါပေမယ့် အားကစားခုံရုံးက ကတ်စတီလိုဟာ အီကွေဒေါနိုင်ငံသား ဖြစ်တယ်လို့ ပြောခဲ့တာကြောင့် လက်ရွေးစင် အသင်းဟာ ကမ္ဘာ့ဖလား ယှဉ်ပြိုင်ခွင့်ရဖို့ သေချာသွားခဲ့တာ ဖြစ်ပါတယ်။ အီကွေဒေါအသင်းဟာ အခုတစ်ကြိမ်နဲ့ ဆို ကမ္ဘာ့ဖလားပြိုင်ပွဲကို ၄ ကြိမ်မြောက်အဖြစ် ဝင်ရောက်ယှဉ်ပြိုင်မှာပါ။

၂၀၀၆ က ဂျာမနီမှာကျင်းပခဲ့စဉ်က ၁၆ သင်းအဆင့် တက်နိုင်တာကလွဲပြီး အီကွေဒေါအသင်းဟာ ကျန်တဲ့ ၂ ကြိမ် စလုံး အုပ်စုအဆင့်ကနေ ထွက်ခွာခဲ့ရတာ ဖြစ်ပါတယ်။ အီကွေဒေါအသင်းဟာ အခုနှစ် ကမ္ဘာ့ဖလားပြိုင်ပွဲရဲ့ အုပ်စု A မှာ အိမ်ရှင်ကာတာ၊ ဆီနီဂေါ၊ နယ်သာလန်တို့နဲ့ တစ်အုပ်စုတည်း ကျရောက်နေပြီး နောက်တစ်ဆင့် တက်ဖို့ ကြိုးစားရမှာ ဖြစ်ပါတယ်။

Source:CNA

CNI Sport News

၂၀၂၂ ခုနှစ်၊ နိုဝင်ဘာ ၉

ဆီနီဂေါကြယ်ပွင့် မာနေးဟာ ဘိုင်ယန်မြူးနစ်အသင်းနဲ့ ဝါဒါဘရီမင်အသင်းတို့ ကစားခဲ့တဲ့ ဘွန်ဒစ်လီဂါပွဲစဉ်မှာ ဒဏ်ရာရရှိသွားခဲ့တာကြောင့် ပွဲချိန်မိနစ် ၂၀ မှာကတည်းက လူစားလဲခဲ့ရတာဖြစ်ပါတယ်။

မာနေးဟာ ဒဏ်ရာကြောင့် စိတ်ပျက်လက်ပျက်နဲ့ ကွင်းထဲမှာ ထိုင်နေခဲ့တာဖြစ်ပြီး ဘိုင်ယန်မြူးနစ်နည်းပြ နာဂျယ်လ်စမန်းက ကစားသမားဟာ ညို့သကျည်းဒဏ်ရာရသွားတာဖြစ်တယ်လို့ ပြောခဲ့တာပါ။ဆေးအဖွဲ့တွေက မာနေးရဲ့ ဒဏ်ရာအခြေအနေကို စမ်းသပ်စစ်ဆေးမှုတွေပြုလုပ်အပြီးမှာ ဆက်မကစားနိုင်တော့လို့ လူစားလဲ ခဲ့ရတာဖြစ်ပါတယ်။ကမ္ဘာ့ဖလားပြိုင်ပွဲနီးကပ်လာချိန်မှာ မာနေးရဲ့ဒဏ်ရာအခြေအနေဟာ ဆီနီဂေါလက်ရွေးစင် အတွက် စိုးရိမ်ဖွယ်ရာဖြစ်ခဲ့ပါတယ်။

ဘိုင်ယန်မြူးနစ်နည်းပြ နာဂျယ်လ်စမန်းက “မာနေးက ညို့သကျည်းမှာ ဒဏ်ရာရရှိသွားခဲ့ပါတယ်။ ဒဏ်ရာ အခြေ အနေပြင်းထန်ခြင်း ရှိ၊မရှိသိရဖို့အတွက် ဓါတ်မှန်ရိုက်ကြည့်ဖို့ လိုအပ်ပါတယ်။ ဒဏ်ရာအခြေအနေ မပြင်းထန်ဖို့ ကျနော်တို့မျှော်လင့်ပါတယ်။ပွဲအပြီးမှာ သူ့ကိုမတွေ့ခဲ့ရပါဘူး။မနက်ဖြန်မှ သူ့အခြေအနေကို သိရမှာပါ” လို့ ပွဲ အပြီးမှာ ပြောခဲ့တာပါ။

လီဗာပူးလ်ကစားသမားဟောင်းဟာ ဒဏ်ရာကြောင့် အခုတစ်ပတ် ရှောလ်ကေးနဲ့ ကစားမယ့် ဘွန်ဒစ်လီဂါပွဲစဉ်မှာ ဘိုင်ယန်မြူးနစ်အတွက် ပါဝင်ကစားပေးနိုင်ဖွယ်မရှိပါဘူး။ဒါပေမယ့် မာနေးဟာ ကမ္ဘာ့ဖလားပြိုင်ပွဲမှာတော့ ဆီနီဂေါအတွက် ကြံခိုင်မှုအပြည့်နဲ့ ပါဝင်ပေးနိုင်ဖို့ မျှော်လင့်နေတာပါ။ဆီနီဂေါအသင်းဟာ ကမ္ဘာ့ဖလားပြိုင်ပွဲမှာ အိမ်ရှင်ကာတာ၊ အီကွေဒေါ၊ နယ်သာလန်တို့နဲ့ တစ်အုပ်စုတည်းကျရောက်နေတာဖြစ်ပါတယ်။

အာဖရိကနိုင်ငံဟာ ကမ္ဘာ့ဖလားအုပ်စုအဖွင့်ပွဲစဉ်အဖြစ် နိုဝင်ဘာလ ၂၁ ရက်မှာ နယ်သာလန်အသင်းနဲ့ ယှဉ်ပြိုင် ရမှာပါ။ဆီနီဂေါအတွက် ၉၃ ပွဲပါဝင်ကစားထားပြီး ၃၄ ဂိုးသွင်းယူနိုင်ခဲ့တဲ့ မာနေးဟာ ပြီးခဲ့တဲ့ အာဖရိကဖလား ပြိုင်ပွဲမှာ လက်ရွေးစင်အသင်းချန်ပီယံဖြစ်ဖို့နဲ့ ကမ္ဘာ့ဖလားဝင်ခွင့်ရဖို့အတွက် အဓိက စွမ်းဆောင်ပေးခဲ့တာ ဖြစ်ပါတယ်။

Source:DailyMail

CNI Sport News

၂၀၂၂ ခုနှစ်၊ နိုဝင်ဘာ ၉

ဖီဖာဥက္ကဋ္ဌဟောင်း ဆပ်ဘလတ္တာက ၂၀၂၂ ကမ္ဘာ့ဖလားအိမ်ရှင်အဖြစ် ကာတာကိုရွေးချယ်ဖို့ ဆုံးဖြတ်တာက မှားခဲ့တယ်လို့ ပြောလိုက်ပါတယ်။

ဆပ်ဘလတ္တာက “ဒါဟာ ဆိုးရွားတဲ့ ရွေးချယ်မှုတစ်ခုဖြစ်ခဲ့ပြီး အဲ့ဒီအချိန်တုန်းက ဥက္ကဋ္ဌအဖြစ်တာဝန်ယူခဲ့တဲ့ ကျနော့်မှာ တာဝန်ရှိပါတယ်။ကမ္ဘာ့ဖလားက အမေရိကန်ထက် ကာတာကို သွားရောက်ခဲ့တာပါ။ဒါက အမှန်တရားပါ။ကာတာဟာ ကမ္ဘာ့ဖလားပြိုင်ပွဲကို ကျင်းပဖို့အတွက် သေးငယ်လွန်းတဲ့နိုင်ငံဖြစ်ခဲ့ပြီး ဘောလုံးနဲ့ ကမ္ဘာ့ဖလားက ကြီးမားတယ်”လို့ ဆွစ်ဇာလန်သတင်းစာ Tages Anzeiger နဲ့ အင်တာဗျူးမှာ ပြောခဲ့တာပါ။

အသက် ၈၆ နှစ်အရွယ်ရှိပြီဖြစ်တဲ့ ဘလတ္တာဟာ ကာတာကို ကမ္ဘာ့ဖလားပြိုင်ပွဲရဲ့ အိမ်ရှင်အဖြစ် ရွေးချယ်ခဲ့တဲ့ ၂၀၁၀ က ဖီဖာဥက္ကဋ္ဌအဖြစ် တာဝန်ထမ်းဆောင်နေတာဖြစ်ပါတယ်။ကာတာနိုင်ငံဟာ လိင်တူဆက်ဆံမှုအပေါ် သူတို့ရဲ့ ရပ်တည်မှု၊ လူ့အခွင့်အရေးမှတ်တမ်းတွေနဲ့ ရွှေ့ပြောင်းအလုပ်သမားတွေအပေါ် ဆက်ဆံပုံတွေကြောင့် ဝေဖန်မှုတွေကို ပြင်းပြင်းထန်ထန် ရင်ဆိုင်နေရတာပါ။

၂၀၂၂ ပြိုင်ပွဲဟာ ကမ္ဘာ့ဖလားသမိုင်းတစ်လျှောက် ၉၂ နှစ်အတွင်း အရှေ့အလယ်ပိုင်းမှာ ပထမဆုံးအိမ်ရှင်အဖြစ် ကျင်းပတာဖြစ်ပြီး ဆောင်းရာသီမှာ ပထမဆုံးအကြိမ်ကျင်းပတာလည်း ဖြစ်ပါတယ်။ ၂၀၂၂ ကမ္ဘာ့ဖလားပြိုင်ပွဲကို အမေရိကန်မှာ ကျင်းပဖို့ စဉ်းစားခဲ့ပေမယ့် ဖီဖာအမှုဆောင်ကော်မတီက ၁၄ မဲ - ၈ မဲနဲ့ ကာတာကို အိမ်ရှင်အဖြစ် ကျင်းပဖို့ ရွေးချယ်ခဲ့တာပါ။ဘလတ္တာကတော့ သူဟာ အဲဒီအချိန်တုန်းက အမေရိကန်ကို မဲပေးခဲ့တာလို့ အင်တာဗျူးမှာ ထည့်သွင်းပြောခဲ့တာဖြစ်ပါတယ်။

ဘလတ္တာဟာ ဖီဖာဥက္ကဋ္ဌအဖြစ် ၁၇ နှစ်ကြာတာဝန်ထမ်းဆောင်ခဲ့ပြီး ပလာတီနီထံ ဆွစ်ဖရန့်စ် ၂ သန်း တရားမဝင် လွှဲပြောင်းပေးခဲ့တယ်ဆိုတဲ့ စွပ်စွဲချက်တွေကြောင့် ၂၀၁၅ မှာ ရာထူးကနေ နုတ်ထွက်ခဲ့တာပါ။သူဟာ ဒီလို ပေးချေမှုကြောင့် မူလက ဘောလုံးလောကကနေ ၈ နှစ်ပိတ်ပင်ခံခဲ့ရပြီး နောက်ပိုင်းမှာ ၆ နှစ်လျှော့ချခံခဲ့ရတာ ဖြစ်ပါတယ်။ဘလတ္တာနဲ့ ပလာတီနီတို့ဟာ ပြီးခဲ့တဲ့နှစ် နိုဝင်ဘာလက လိမ်လည်မှုတွေနဲ့ စွဲချက်တင်ခံခဲ့ရပေမယ့် ဇူလိုင်လက ပြုလုပ်ခဲ့တဲ့ ရုံးချိန်းမှာတော့ အပြစ်မရှိကြောင်းတွေ့ခဲ့ရတာပါ။

ရုရှားနဲ့ ကာတာကို ၂၀၁၈ နဲ့ ၂၀၂၂ ကမ္ဘာ့ဖလားအိမ်ရှင်ပေးခဲ့တဲ့ ဆုံးဖြတ်ချက်အပေါ် အကျင့်ပျက်ခြစားမှုတွေ ပြုလုပ်ခဲ့တယ်ဆိုပြီး စွပ်စွဲခံခဲ့ရကာ ဆွစ်ဇာလန်အစိုးရရှေ့နေတွေနဲ့ အမေရိကန်တရားရေးဌာနတို့က ၂၀၁၅ အတွင်းမှာ စုံးစမ်းစစ်ဆေးမှု ၂ ကြိမ်ပြုလုပ်ခဲ့ပါတယ်။ကာတာနဲ့ ရုရှားတို့ကတော့ ဘယ်လိုအမှားအယွင်းမှ ပြုလုပ် ခဲ့ခြင်းမရှိဘူးလို့ ငြင်းဆိုခဲ့ကာ ၂၀၁၇ မှာ ဖီဖာရဲ့ ကိုယ်ပိုင်စုံစမ်းစစ်ဆေးမှုကနေ ထိရောက်စွာရှင်းလင်းခဲ့တာပါ။

ကာတာကမ္ဘာ့ဖလားပြိုင်ပွဲကို နိုဝင်ဘာလ ၂၀ ရက်မှာ စတင်မှာဖြစ်ပြီး ဖီဖာကတော့ ပြိုင်ပွဲဝင်နိုင်ငံတွေကို ဘောလုံးကိုပဲ အာရုံစိုက်ကြဖို့ ပြောထားပါတယ်။

Source:BBC

CNI Sport News

၂၀၂၂ ခုနှစ်၊ နိုဝင်ဘာ ၈

သြစတြေးလျအသင်းဟာ ၂၀၂၂ ကမ္ဘာ့ဖလားပြိုင်ပွဲဝင်မယ့် ကစားသမား ၂၆ ဦးစာရင်းကို ထုတ်ပြန်ခဲ့တာမှာ နယူးကာဆယ် ကစားသမားသစ် ကူရိုလ် ပါဝင်လာခဲ့တာ ဖြစ်ပါတယ်။

နယူးကာဆယ်အသင်းဟာ အသက် ၁၈ နှစ်အရွယ်ရှိ ကစားသမားကို စင်ထရယ်လ် ကို့စ်မာရီနာ အသင်းကနေ ခေါ်ယူဖို့ သဘောတူညီမှု ရရှိထားတာဖြစ်ပြီး ဇန်နဝါရီမှာ အသင်းနဲ့ ပူးပေါင်းမှာ ဖြစ်ပါတယ်။

ကူရိုလ်ဟာ ဒီရာသီမှာ သြစတြေးလျ ကလပ်အတွက် အေလိဂ်ပြိုင်ပွဲမှာ ၃ ပွဲ ပါဝင်ကစားထားပြီး လက်ရွေးစင် အသင်းအတွက် စက်တင်ဘာလက နယူးဇီလန်နဲ့ ခြေစမ်းပွဲမှာ ၁ ပွဲသာ ပါဝင် ကစားထားတာ ဖြစ်ပါတယ်။

သြစတြေးလျနည်းပြ ဂရေဟမ်အာနိုးလ်က “ဒီကောင်လေးဟာ သူ့ကိုယ်သူ အကောင်းဆုံး ဖြစ်နေရပါမယ်။ သူဟာ ပွဲတစ်ပွဲကို ပြောင်းလဲအောင် ဘယ်လို လုပ်ဆောင်ရမလဲဆိုတာကို ပြသထားပါတယ်။ သူဟာ ကြောက်ရွံခြင်း လုံးဝ မရှိသလို ပွဲကို ဖျော်ဖြေမှု ပေးချင်တဲ့သူပါ”လို့ လူစာရင်း ထုတ်ပြန် အပြီးမှာ ပြောခဲ့တာပါ။

သြစတြေးလျအသင်း ကစားသမား ကူရိုလ်ကို တွေ့ရစဉ်

သြစတြေးလျအသင်း လူစာရင်းမှာ ဝက်စ်ဘရွန်းနဲ့ ဆဲလ်တစ် ကွင်းလယ်လူဟောင်း တွမ်ရိုဂျစ်၊ ဗဟိုနောက်ခံလူ စိန့်ဘူရီ၊ နာဂိုရာဂိုးသမား လန်ဂီရတ်ခ်တို့ ချန်လှပ်ခံခဲ့ရပါတယ်။

ဂရေဟမ်အာနိုးလ်က “စိန့်ဘူရီဟာ ရက်သတ္တပတ် ပေါင်းများစွာ ပွဲမကစားခဲ့ရပါဘူး။ ကျနော်ဟာ အလုပ်ကို ကောင်းမွန်စွာ လုပ်ဆောင်နေတဲ့ ဆူတာ၊ ရိုဝယ်လ်စ်စတဲ့ ကစားသမားတွေကို ရွေးချယ်ခဲ့ပါတယ်။ ခက်ခဲတဲ့ ဆုံးဖြတ်ချက်တွေကို ချမှတ်ခဲ့ရတာပါ”လို့ ပြောခဲ့တာပါ။

သြစတြေးလျအသင်း လူစာရင်းမှာ သြစတြေးလျ အခြေစိုက် ကစားသမား ၇ ဦးအထိ ပါဝင်နေတာ ဖြစ်ပါတယ်။
ကမ္ဘာ့ဖလားပြိုင်ပွဲရဲ့ အုပ်စု D မှာ ပြင်သစ်၊ တူနီးရှား၊ ဒိန်းမတ်တို့နဲ့ တစ်အုပ်စုတည်း ကျရောက်နေတဲ့ သြစတြေးလျ အသင်းဟာ အဖွင့်ပွဲစဉ်အဖြစ် နိုဝင်ဘာလ ၂၂ ရက်မှာ လက်ရှိချန်ပီယံ ပြင်သစ်အသင်းနဲ့ ယှဉ်ပြိုင်ရမှာပါ။

ပြီးခဲ့တဲ့ ၂၀၁၈ ကမ္ဘာ့ဖလားပြိုင်ပွဲမှာ အုပ်စုအဆင့်ကနေ လှည့်ပြန်ခဲ့ရတဲ့ သြစတြေးလျအသင်းဟာ ဒီပြိုင်ပွဲမှာ အမြင့်ဆုံး အောင်မြင်မှုအဖြစ် ၁၆ သင်း အဆင့်ထိသာ တက်လှမ်းနိုင်ခဲ့တာ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ နိုဝင်ဘာ ၈

မန်စီးတီးနောက်ခံလူ မန်ဒီက သူဟာ ဘရက်ပစ် မဟုတ်ပေမယ့် အမျိုးသမီးတွေနဲ့ လိင်ဆက်ဆံတာမှာ အလွန် လွယ်ကူတယ်လို့ မုဒိမ်းမှုနဲ့ ပက်သက်ပြီး ရုံးတင် စစ်ဆေးတာမှာ ပြောလိုက်ပါတယ်။

မန်ဒီဟာ အမျိုးသမီးငယ် ၆ ဦးကို မုဒိမ်းမှု ၇ မှု၊ မုဒိမ်းကျင့်ရန် ကြိုးပမ်းမှု ၁ မှု၊ လိင်ပိုင်းဆိုင်ရာ စော်ကားမှု ၁ မှုတို့ နဲ့ စွဲချက်တင် ခံထားရပါတယ်။

အသက် ၂၈ နှစ်အရွယ်ရှိ မန်ဒီဟာ Chester Crown တရားရုံးမှာ ပြုလုပ်တဲ့ ရုံးချိန်းမှာ ပထမဆုံးအကြိမ် သက်သေ တွေရဲ့ ရှေ့မှောက်မှာ ထွက်ဆိုခဲ့တာ ဖြစ်ပါတယ်။

မန်ဒီက “သူဟာ ဘရက်ပစ် မဟုတ်ပေမယ့် ရိုးရိုးသားသား ပြောရရင် အမျိုးသမီးတွေနဲ့ တွေ့ဆုံတာ၊ လိင် ဆက်ဆံ တာက အလွန်လွယ်ကူတယ်”လို့ တရားရုံးကို ထွက်ဆိုခဲ့တာပါ။

မန်စီးတီးအသင်းမှာ ကစားချိန် အမျိုးသမီးတွေက သူ့အပေါ်မှာ အာရုံစူးစိုက်မှု ၁၀ ဆကျော်သွားတယ်လို့လည်း ပြင်သစ်ကစားသမားက ပြောခဲ့ပါတယ်။

 မန်စီးတီးအသင်းမှာ မန်ဒီကစားစဉ်

မန်ဒီက “ မန်စီးတီးက ဥရောပရဲ့ အကောင်းဆုံးတွေထဲက တစ်သင်းပါ။ သူတို့တွေ ကျနော့်ဆီကို ရောက်လာခဲ့ တာက ကျနော့်ကြောင့် မဟုတ်ပါဘူး။ ဘောလုံးကြောင့်ပါ။ သူတို့အာရုံစူးစိုက်တာက ကျနော့်အတွက် ဆိုးတယ်လို့ ပြောလို့ မရပါဘူး”လို့ ပြောခဲ့တာပါ။

မန်စီးတီးနောက်ခံလူဟာ အမျိုးသမီးအများစုက သူ့ကို ချဉ်းကပ်မှုတွေ ပြုလုပ်ခဲ့ကြပြီး လိင်မဆက်ဆံချင်ဘူးဆိုရင် ရပ်တန့်လိုက်တယ်လို့လည်း ပြောခဲ့တာ ဖြစ်ပါတယ်။

မန်ဒီဟာ တစ်ညတည်းမှာပဲ အမျိုးသမီး အများအပြားနဲ့ မကြာခဏဆိုသလို အိပ်လေ့ရှိတယ်လို့လည်း တရား သူကြီးတွေကို ပြောခဲ့တာပါ။ မန်ဒီဟာ ချက်ရှိုင်းယားရှိ သူ့ရဲ့ နေအိမ်မှာ ပါတီပွဲတွေ ပြုလုပ်ရင်း အမျိုးသမီးတွေကို မုဒိမ်းကျင့်တယ်လို့ စွပ်စွဲခံနေရတာ ဖြစ်ပါတယ်။

မန်ဒီဟာ မန်စီးတီးအသင်းမှာ ကစားခွင့် ဆိုင်းငံ့ခံထားရပေမယ့် တစ်နှစ်လုပ်ခ ပေါင် ၄.၇ သန်း ရရှိနေတာပါ။ မန်ဒီဟာ တွဲဖက်တရားခံ မက်တူရီနဲ့အတူ တရားရင်ဆိုင် နေရတာ ဖြစ်ပါတယ်။

နှစ်ဦးစလုံးကတော့ မုဒိမ်းမှုနဲ့ ပက်သက်ပြီး ငြင်းဆိုထားကြပြီး ရုံးချိန်းကတော့ ဆက်လက် ပြုလုပ်နေတာပါ။

ပြင်သစ်လက်ရွေးစင်နဲ့ ၂၀၁၈ ကမ္ဘာ့ဖလား ရရှိခဲ့တဲ့ မန်ဒီဟာ မန်စီးတီးအသင်းအတွက် ပြီးခဲ့တဲ့ရာသီက ပရီးမီးယားလိဂ် ၁ ပွဲသာ ပါဝင်ကစားခဲ့ရပြီး မုဒိမ်းမှုကြောင့် စွဲချက်တင် ခံထားရတာ ဖြစ်ပါတယ်။

Source:The Sun

CNI Sport News

၂၀၂၂ ခုနှစ်၊ နိုဝင်ဘာ ၈

ဘရာဇီးလ်အသင်းဟာ ပရီးမီးယားလိဂ် ကစားသမားတွေ အများအပြား ပါဝင်တဲ့ ကမ္ဘာ့ဖလားပြိုင်ပွဲဝင်မယ့် ကစားသမား ၂၆ ဦးစာရင်းကို ထုတ်ပြန်လိုက်ပြီ ဖြစ်ပါတယ်။

ဘရာဇီးလ်နည်းပြ တိုင်တီဟာ လူစာရင်းကို တနင်္လာနေ့က ထုတ်ပြန်ခဲ့ပါတယ်။ အဲဒီ ထုတ်ပြန်ခဲ့တဲ့ လူစာရင်းမှာ တော့ လီဗာပူးလ် တိုက်စစ်မှူး ဖာမီနို၊ အာဆင်နယ် နောက်ခံလူ ဂါဘရီရယ်လ်နဲ့ ဒဏ်ရာရနေတဲ့ ကော်တင်ဟိုတို့ ချန်လှပ်ခံခဲ့ရတာကို တွေ့ရပါတယ်။

နေမာကတော့ ဘရာဇီးလ်အသင်း လူစာရင်းမှာ အရေးပါတဲ့ ကစားသမားအဖြစ် ပါဝင်နေပြီး နိုင်ငံအတွက် ဆုဖလား ရယူပေးဖို့နဲ့ လက်ရွေးစင်အသင်းရဲ့ ဂိုးသွင်း အများဆုံး ကစားသမားဖြစ်လာဖို့ မျှော်လင့်နေတာ ဖြစ်ပါတယ်။

ဘရာဇီးလ်အသင်း လူစာရင်းမှာ ပရီးမီးယားလိဂ် ကစားသမားတွေဖြစ်တဲ့ အာဆင်နယ်က ဂျီးဆပ်စ်နဲ့ မာတင် နယ်လီ၊ ချယ်လ်ဆီးက သီယာဂိုဆေးလ်ဗား၊ ယူနိုက်တက်က ကတ်စမဲရိုး၊ ဖရက်နဲ့ အန်တိုနီ၊ လီဗာပူးလ်က ဖာဘင်ဟိုနဲ့ အလီဆန်၊ မန်စီးတီးက အီဒါဆန်၊ စပါးက ရစ်ချာလီဆန်၊ နယူးကာဆယ်က ဘရူနိုဂွီမာရေ့စ်နဲ့ ဝက်စ်ဟမ်းက ပတ်ကွီတာတို့ ပါဝင်ခဲ့ကြပါတယ်။

ဘရာဇီးလ်အသင်း လူစာရင်းမှာ မပါ၀င်ခဲ့တဲ့ ဂါဘရီရယ်လ်၊ ဖာမီနို၊ ကော်တင်ဟိုတို့ကို တွေ့ရစဉ်

အန်တိုနီနဲ့ ဘရူနိုဂွီမာရေ့စ်တို့ဟာ ဘရာဇီးလ်အသင်းရဲ့ လူစာရင်း ကြေညာတာကို မိသားစုနဲ့အတူ ကြည့်ရှုနေခဲ့ ကြတာ ဖြစ်ပြီး သူတို့ နာမည်ပါဝင်ချိန်မှာ အလွန်ပျော်ရွှင်နေတာကို ဆိုရှယ်မီဒီယာမှာ တင်ခဲ့ပါတယ်။

အသက် ၃၉ နှစ် အရွယ်ရှိတဲ့ ဘာစီလိုနာ နောက်ခံလူဟောင်း ဒန်နီအဲလ်ဗက်စ်ကလည်း ဘရာဇီးလ်အသင်းရဲ့ လူစာရင်းမှာ ပါဝင်လာခဲ့ပါတယ်။

အခြား ကစားသမားတွေအဖြစ် ဂိုးသမား ဝီဗာတန်၊ နောက်ခံလူတွေအဖြစ် ဒန်နီလို၊ ဆန်ဒရို၊ တဲလက်စ်၊ ဘရီမာ၊ မီလီတာအိုနဲ့ မာကွင်ဟိုတို့ ရွေးချယ်ခံခဲ့ရတာ ဖြစ်ပါတယ်။

ကွင်းလယ်မှာတော့ အဲဗာတန်ရီဘီရို၊ တိုက်စစ်နေရာမှာ ပီဒရို၊ ရာဖင်ဟာ၊ ရိုဒရီဂိုနဲ့ ဗီနီစီးယက်စ်တို့ ပါဝင်လာခဲ့ ကြတာပါ။ ဘရာဇီးလ်အသင်းဟာ ကမ္ဘာ့ဖလားပြိုင်ပွဲရဲ့ အုပ်စု G မှာ ဆားဘီးယား၊ ဆွစ်ဇာလန်၊ ကင်မရွန်းတို့နဲ့ တစ်အုပ်စုတည်း ကျရောက်နေတာ ဖြစ်ပါတယ်။

အုပ်စုအဖွင့်ပွဲစဉ်အဖြစ် ဘရာဇီးလ်အသင်းဟာ နိုဝင်ဘာလ ၂၄ ရက်မှာ ဆားဘီးယားအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ နိုဝင်ဘာ ၈

ဘာစီလိုနာအသင်း နည်းပြ ဇာဗီက ပြိုင်ဘက်ဟောင်းဖြစ်ခဲ့တဲ့ ရော်နယ်ဒိုက ခြားနားမှုတွေဖြစ်အောင် လုပ်နိုင် သေးတယ်လို့ ယူရိုပါလိဂ်မှာ ယူနိုက်တက်နဲ့ တွေ့ဆုံ ယှဉ်ပြိုင်သွားဖို့ မဲခွဲဆုံးဖြတ်ချက် ကျလာအပြီး ပြောလိုက် ပါတယ်။

ဇာဗီက “ ရော်နယ်ဒိုက အံ့မခန်းဖွယ် ကောင်းမွန်တဲ့ ကစားသမားပါ။ မကြာသေးခင် ကာလတွေအတွင်းမှာ သူဟာ ကမ္ဘာ့အကောင်းဆုံး ကစားသမားတစ်ဦးပါ။ သူဟာ ခြားနားချက်ဖြစ်အောင် လုပ်နိုင်ပါသေးတယ်”လို့ ပြောခဲ့တာ ဖြစ်ပါတယ်။

ချန်ပီယံလိဂ်အုပ်စု အဆင့်ကနေ ထွက်ခွာလာတဲ့ ဘာစီလိုနာနဲ့ ယူရိုပါလိဂ် အုပ်စုတွင်းမှာ ဒုတိယရခဲ့တဲ့ ယူနိုက်တက်တို့ဟာ ယူရိုပါလိဂ် ပလေးအော့ဖ် အဆင့်အတွက် မဲခွဲမှုပြုလုပ်တာမှာ တွေ့ဆုံခဲ့ကြတာ ဖြစ်ပါတယ်။

ဒီပလေးအော့ဖ် အဆင့်ပွဲစဉ်ရဲ့ နှစ်ကျော့စလုံးကို ဖေဖော်ဝါရီလအတွင်းမှာ ယှဉ်ပြိုင်ကြမှာဖြစ်ပြီး အနိုင်ရတဲ့ အသင်းက ၁၆ သင်းအဆင့်ကို တက်ရောက်နိုင်မှာပါ။

ယူရိုပါလိဂ်ပွဲမှာ ဘာစီလိုနာနဲ့ ယူနိုက်တက် တွေ့ဆုံ (Twitter)

ဘာစီလိုနာအတွက် ဇာဗီကစားပေးနေတဲ့ အချိန်အတွင်းမှာ ရော်နယ်ဒိုနဲ့ ယူနိုက်တက် အသင်းမှာလည်း တွေ့ဆုံခဲ့ သလို ရီးရယ်လ်အသင်းမှာလည်း တွေ့ဆုံခဲ့တာ ဖြစ်ပါတယ်။

ရော်နယ်ဒိုဟာ အဲဒီအချိန်တုန်းက ကစားသမားဘဝ အကောင်းဆုံး အနေအထားမှာ ရှိနေပေမယ့် လက်ရှိမှာတော့ ခြေစွမ်းပြနိုင်ဖို့ ရုန်းကန်နေရတာပါ။ ဒါပေမယ့် ဇာဗီကတော့ ရော်နယ်ဒိုရဲ့ လုပ်ဆောင်နိုင်စွမ်းအပေါ် ယုံကြည်နေ တာလည်း ဖြစ်ပါတယ်။

ဘာစီလိုနာအသင်း နည်းပြ ဇာဗီက ယူနိုက်တက်နဲ့ တွေ့ဆုံမှု အပေါ်မှာလည်း မပျော်ရွှင်ကြောင်း ပြောခဲ့ပါ သေးတယ်။

ဇာဗီက “အခက်အခဲဆုံး ပြိုင်ဘက်နဲ့ နောက်တစ်ကြိမ် ပြန်တွေ့ဆုံရတာပါ။ ဒါပေမယ့် ကျနော်တို့ ဒါကို စောင့်မျှော် နေတာပါ။ သူတို့က သမိုင်းမှတ်တမ်းရှိတဲ့ အသင်းဖြစ်ပြီး နာမည်ကြီး ကစားသမားတွေလည်း ရှိသလို တန်ဟတ် ရောက်လာပြီးနောက်မှာ အများကြီး တိုးတက်လာပါတယ်။ ဒါဟာ ကျနော်တို့အတွက် အဆိုးရွားဆုံး မဲခွဲမှုလို့ တောင် ပြောလို့ရပါတယ်။ ကံမကောင်းခဲ့ဘူး”လို့ ပြောပါတယ်။

လက်ရှိအချိန်မှာ အမှတ်ပေး လိဂ်တွေမှာတော့ ဘာစီလိုနာအသင်းက လာလီဂါ ထိပ်ဆုံး နေရာမှာ ရပ်တည်နေပြီး ယူနိုက်တက်အသင်းက ပရီးမီးယားလိဂ်အဆင့် ၅ နေရာမှာ ရပ်တည်နေတာ ဖြစ်ပါတယ်။

Source: Goal