CNI Sport News

၂၀၂၃ ခုနှစ်၊ ဧပြီ ၁

ဆော်ဒီကလပ် အယ်လ်နာဆာအသင်းဟာ နိုင်ငံတကာ ပွဲအများဆုံး ကစားသမားအဖြစ် စံချိန်သစ် တင်နိုင်ခဲ့တဲ့ အသင်းခေါင်းဆောင် ရော်နယ်ဒိုကို အထူးပြုလုပ်ထားတဲ့ ကိတ်မုန့်ကို ပေးအပ်ကာ ဂုဏ်ပြုခဲ့ပါတယ်။

အသက် ၃၈ နှစ် အရွယ် ရှိပြီဖြစ်တဲ့ ရော်နယ်ဒိုဟာ လက်ချင်စတိန်းအသင်းနဲ့ ကစားခဲ့တဲ့ ယူရို ၂၀၂၄ ခြေစစ်ပွဲမှာ ပေါ်တူဂီအသင်းအတွက် ပါဝင်ကစားပေးပြီးနောက် ကူဝိတ်ကစားသမား အယ်လ်မူတာဝါရဲ့ နိုင်ငံတကာပွဲ အရေအတွက် ၁၉၆ ပွဲကို ကျော်ဖြတ်နိုင်ခဲ့တာပါ။

ရော်နယ်ဒိုဟာ လူဇင်ဘတ်နဲ့ ပွဲမှာပါ ပါဝင်ကစားခဲ့ပြီးနောက် နိုင်ငံတကာပွဲ အရေအတွက် ၁၉၈ ပွဲအထိ ရောက်ရှိ သွားခဲ့တာ ဖြစ်ပါတယ်။

အဲဒါကြောင့်လည်း ဆော်ဒီကလပ်ဟာ ရော်နယ်ဒိုအတွက် အထူးပြုလုပ်ထားတဲ့ ကိတ်မုန့်စီစဉ်ပြီး ဂုဏ်ပြုခဲ့တာပါ။

ရော်နယ်ဒိုဟာ ပေါ်တူဂီအသင်းရဲ့ ပြီးခဲ့တဲ့ ယူရို ၂၀၂၄ ခြေစစ်ပွဲ ၂ ပွဲစလုံးမှာ ၂ ဂိုးစီ သွင်းယူနိုင်ခဲ့ကာ အသင်းက လည်း ရမှတ် ၆ မှတ် ရရှိခဲ့တာ ဖြစ်ပါတယ်။ ပေါ်တူဂီအသင်း ခေါင်းဆောင်ဟာ လက်ရှိအချိန်မှာ နိုင်ငံအသင်း အတွက် ၁၂၂ ဂိုးအထိ သွင်းယူထားပြီး နိုင်ငံတကာသွင်းဂိုး အများဆုံး ကစားသမားအဖြစ်လည်း စံချိန်တင် ထားတာပါ။

ရော်နယ်ဒိုကိုတွေ့ရစဉ်

ယူနိုက်တက်အသင်းနဲ့ စာချုပ် ဖျက်သိမ်းပြီးနောက် ဆော်ဒီကလပ်ထံ ပြောင်းရွှေ့ခဲ့တဲ့ ရော်နယ်ဒိုဟာ အယ်လ်နာဆာ အသင်းအတွက် ၁၀ ပွဲ ကစားအပြီးမှာ ၉ ဂိုးအထိ သွင်းယူထားတာ ဖြစ်ပါတယ်။

အယ်လ်နာဆာအသင်းဟာ လာမယ့် ဆော်ဒီပရိုလိဂ် ပွဲစဉ်အဖြစ် အယ်လ်အက်ဒါလက်အသင်းနဲ့ ဧပြီလ ၅ ရက်မှာ ယှဉ်ပြိုင်ကြမှာဖြစ်ပြီး ရော်နယ်ဒိုကပဲ အသင်းကို ဦးဆောင်ပြီး ပွဲထွက်လာဖို့ ရှိနေတာပါ။

အခုနှစ်ရာသီ ဆော်ဒီပရိုလိဂ်ပွဲစဉ် ၂၁ ပွဲကစားအပြီးမှာ အယ်လ်အစ်တီဟတ် အသင်းက ရမှတ် ၅၀ နဲ့ အမှတ်ပေး ဇယားကို ဦးဆောင်နေပြီး အယ်လ်နာဆာအသင်းက ရမှတ် ၄၉ မှတ်နဲ့ အဆင့် ၂ နေရာမှာ ရပ်တည်နေတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဧပြီ ၁

ပြီးခဲ့တဲ့နှစ်က ဝင်ဘယ်လ်ဒန် အိုးပန်းပြိုင်ပွဲမှာ ရုရှားနဲ့ ဘယ်လာရုစ် အားကစားသမားတွေကို ယှဉ်ပြိုင်ခွင့် ပိတ်ပင် ထားတာကို အခုနှစ်မှာ ရုပ်သိမ်းလိုက်ပြီ ဖြစ်ပါတယ်။

အဲဒါကြောင့် အခုနှစ်ပြိုင်ပွဲမှာတော့ ဒီနှစ်နိုင်ငံက အားကစားသမားတွေဟာ ယှဉ်ပြိုင်ခွင့် ရရှိသွားခဲ့တာပါ။

ဒါပေမယ့် ကြားနေ အားကစားသမားတွေ အဖြစ်နဲ့သာ ဝင်ရောက်ယှဉ်ပြိုင်လို့ ရမှာဖြစ်ပြီး အချို့သော အခြေအနေ တွေကိုတော့ လိုက်နာရမယ်လို့ ပြိုင်ပွဲကျင်းပရေးဖြစ်တဲ့ ALL England Club က ထုတ်ပြန်ခဲ့ပါတယ်။

ယူကရိန်းကို ကျူးကျော်တဲ့ ရုရှားနဲ့ ထောက်ပံ့ပေးနေတဲ့ ဘယ်လာရုစ်ရဲ့ လုပ်ရပ်ကို တုန့်ပြန်တဲ့ အနေနဲ့ ပြီးခဲ့တဲ့ နှစ်က ဒီနှစ်နိုင်ငံက အားကစားသမားတွေကို ယှဉ်ပြိုင်ခွင့် ပိတ်ပင်ခဲ့တာပါ။ အခုနှစ်မှာ ကျင်းပမယ့် ဝင်ဘယ်လ်ဒန် အိုးပန်းပြိုင်ပွဲကို ဇူလိုင်လ ၃ ရက်နေ့မှာ စတင် ကျင်းပသွားတော့မှာ ဖြစ်ပါတယ်။

All England Club ဥက္ကဋ္ဌ အီယန်ဟီဝစ်က “ရုရှားရဲ့ တရားမဝင် ကျူးကျော်မှုကို ဆက်လက် ရှုတ်ချသွားမှာဖြစ်ပြီး ကျနော်တို့ရဲ့ ထောက်ခံမှုဟာ ယူကရိန်းပြည်သူတွေနဲ့အတူ ရှိနေဆဲပါပဲ။ ထိခိုက်မယ့် သူတွေအတွက် ပေါ့ပေါ့တန် တန် မစဉ်းစားဘဲ ကြီးကြီးမားမား ထည့်သွင်း စဉ်းစားတာကြောင့် ဒါဟာ မယုံနိုင်လောက်အောင် ခက်ခဲတဲ့ ဆုံး ဖြတ်ချက်ပါ”လို့ ပြောခဲ့တာပါ။

ဒီဆုံးဖြတ်ကြောင့် ရုရှားနဲ့ ဘယ်လာရုစ် အားကစားသမားတွေဟာ Queen's နဲ့ Eastbourne ပြိုင်ပွဲအပြင် ဗြိတိန် မှာ ကျင်းပတဲ့ အခြားပြိုင်ပွဲတွေမှာလည်း ဝင်ရောက်ယှဉ်ပြိုင်လို့ ရရှိမှာ ဖြစ်ပါတယ်။

ဝင်ဘယ်လ်ဒန်ပြိုင်ပွဲကိုတွေ့ရစဉ်

ဝင်ဘယ်လ်ဒန် အိုးပန်းပြိုင်ပွဲ ဝင်ရောက်ယှဉ်ပြိုင်မယ့် အဲဒီနှစ်နိုင်ငံက အားကစားသမားတွေ လိုက်နာရမယ့် စည်းကမ်းချက်တွေကတော့ နိုင်ငံတွင်းက အစိုးရနဲ့ ခေါင်းဆောင်တွေကို ထောက်ခံမှု မပြုလုပ်ဖို့ သဘောတူညီ ရမှာပါ။

ဒါအပြင် နိုင်ငံအတွင်းက အစိုးရတွေနဲ့ ခေါင်းဆောင်တွေ ထိန်းချုပ်ထားတဲ့ ကုမ္ပဏီတွေကနေ စပွန်ဆာ ယူတာ အပါအဝင် သူတို့ဆီကနေ ထောက်ပံ့မှုတွေကို လက်ခံလို့မရတာ ဖြစ်ပါတယ်။

ပိတ်ပင်မှုကို ရုပ်သိမ်းခဲ့တဲ့အတွက် အခုနှစ်မှာ ကျင်းပမယ့် ပြိုင်ပွဲကို ရုရှားနဲ့ ဘယ်လာရုစ် ထိပ်တန်း အားကစားသမားတွေဖြစ်တဲ့ မက်ဗီဒက်ဗ်၊ ရူဘလက်ဗ်၊ ကာဆတ်ကီနာနဲ့ ဆာဘလန်ကာတို့ဟာ ဝင်ရောက် ယှဉ်ပြိုင်နိုင်တာပါ။

ဒါပေမယ့် အားကစားသမားတွေနဲ့ သူတို့ရဲ့ အဖွဲ့ဝင်တွေဟာ ဝင်ဘယ်လ်ဒန် ပြိုင်ပွဲဝင်နိုင်ဖို့အတွက် ကြားနေ ဆိုတာကို လတ်မှတ် ထိုးရမယ်လို့ သိရပါတယ်။

ဒီစည်းမျဉ်းကို ချိုးဖောက်ခဲ့တယ်ဆိုရင်တော့ ဒဏ်ကြေးငွေ ဒါမှမဟုတ် ပြိုင်ပွဲကနေ ထုတ်ပယ်တဲ့အထိ ပြစ်ဒဏ် ချမှတ်ခြင်း ခံရနိုင်တယ်လို့ သတင်းမှာ ဖော်ပြထားတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဧပြီ ၁

ပြီးခဲ့တဲ့နှစ် စက်တင်ဘာလက ချယ်လ်ဆီးကနေ ထုတ်ပယ်ခံရတာကို အခုအချိန်ထိ နာကျင်နေရဆဲပဲလို့ ဘိုင်ယန် မြူးနစ်နည်းပြသစ် တူချယ်လ်က ပြောခဲ့ပါတယ်။

တူချယ်လ်က “ဒါကို အခုထိ နာကျင်နေတုန်းပါပဲ။ ဒီမှာရှိတဲ့လူတွေကို နေ့တိုင်း မတွေ့နိုင်တော့ပါဘူး။ဒီအလုပ်ကို ကျနော်ချစ်တယ်၊ ပြီးတော့ အလွန်စိတ်အားထက်သန်ခဲ့တာပါ။ ကျနော်တို့ဟာ ဒီလိုအခြေအနေတွေမှာ ထူးခြားတဲ့ နှောင်ကြိုးတစ်ခုကို တည်ဆောက်နိုင်ခဲ့ပါတယ်။ကျနော်တို့ဟာ ကိုဗစ်ကာလအတွင်းမှာ စတင်ခဲ့ကြပေမယ့် အဲဒီ နောက်မှာ ပိုင်ရှင်တွေကလည်း အပြောင်းအလဲဖြစ်လာခဲ့ပါတယ်။ကျနော်တို့ဟာ မိသားစုလိုခံစားခဲ့ရတဲ့ အဖွဲ့ အစည်းဖြစ်ခဲ့ပြီး ဒါဟာ ပြောင်းလဲသွားမှာမဟုတ်ဘူး” လို့ ပြောခဲ့တာပါ။

တူချယ်လ်ဟာ ချယ်လ်ဆီးအသင်းကို ကိုင်တွယ်ခဲ့တဲ့ ပထမရာသီမှာတင် ချန်ပီယံလိဂ်ဖလားကို ရယူပေးနိုင်ခဲ့ပြီး အဲဒီနောက်မှာ ဥရောပ စူပါဖလား၊ ကလပ်ကမ္ဘာ့ဖလားတို့ကို ရယူပေးနိုင်ခဲ့သလို ကာရာဘောင်းနဲ့ အက်ဖ်အေ ဖလားပြိုင်ပွဲတွေရဲ့ ဗိုလ်လုပွဲကိုလည်း ရောက်အောင်ပို့ဆောင်ပေးနိုင်ခဲ့တာဖြစ်ပါတယ်။ဒါပေမယ့် အခုနှစ်ရာသီ အစောပိုင်းက ဒိုင်နမိုဇာဂရက်အသင်းကို ချန်ပီယံလိဂ်ပြိုင်ပွဲမှာ ၁ ဂိုး- ဂိုးမရှိနဲ့ အရေးနိမ့်ပြီးနောက် ချယ်လ်ဆီး အသင်းဟာ တူချယ်လ်ကို နည်းပြရာထူးကနေ ထုတ်ပယ်ခဲ့တာပါ။

ဒီထုတ်ပယ်ခံရမှုဟာ ပိုင်ရှင်သစ် တောဒ့်ဘိုလီအသင်းကို ပိုင်ဆိုင်မှုရက် ၁၀၀ ပြည့်တဲ့နေ့ဖြစ်ပြီး တူချယ်လ်ရဲ့ နေရာမှာ ဂရေဟမ်ပေါ်တာကို အစားထိုးခန့်အပ်ခဲ့တာပါ။တူချယ်လ်ကတော့ သူ့ကို ထုတ်ပယ်ခဲ့တဲ့ အစည်းအဝေး ဟာ မိနစ်အနည်းငယ်ပဲ ကြာမြင့်ခဲ့တယ်လို့လည်း ပြောခဲ့တာဖြစ်ပါတယ်။

တူချယ်လ်က “ဒါက တုန်လှုပ်စရာပါပဲ။လေ့ကျင့်ရေးစင်တာကို ကားမောင်းသွားတဲ့အချိန်မှာ ထူးထူးခြားခြား ခံစားခဲ့ရပါတယ်။ကျနော်တို့ တွေ့ဆုံတဲ့အစည်းအဝေးက မိနစ်အနည်းငယ်ပဲ ကြာမြင့်ခဲ့ပါတယ်။၃ မိနစ်ကနေ ၅ မိနစ်ပဲ ကြာမြင့်တာပါ။ဒီဆုံးဖြတ်ချက်ဟာ ကျနော်တို့အားလုံးအတွက် တုန်လှုပ်စရာဖြစ်ခဲ့ပါတယ်။ဒီအချိန်ဟာ ကျနော်တို့အတွက် အချိန်မှန်၊နေရာမှန်ရောက်နေတယ်လို့ ခံစားခဲ့ရတာပါ။အောင်မြင်မှုလည်း ကြီးကြီးမားမား ရယူနိုင်မယ်လို့ ခံစားနေရပြီး ရိုးရိုးသားသားပြောရရင် ဒီမှာ အချိန်အကြာကြီး ဆက်ရှိချင်ပါတယ်” လို့ ပြောခဲ့တာ ပါ။

တူချယ်လ်ဟာ ချယ်လ်ဆီးအသင်းကနေ ထုတ်ပယ်ခံရပြီးနောက် အသင်းလက်မဲ့အဖြစ် ရှိခဲ့ပေမယ့် မကြာသေးခင် ရက်ပိုင်းမှာ ဘိုင်ယန်မြူးနစ်အသင်းရဲ့နည်းပြသစ်အဖြစ် ခန့်အပ်ခြင်းခံခဲ့ရပါတယ်။ဂျာမန်လူမျိုးနည်းပြဟာ ဘိုင်ယန်မြူးနစ်အသင်းနဲ့ အခုနှစ်ရာသီ ဆုဖလားတွေအားလုံး ရယူသွားချင်တယ်လို့ ပြောထားတာဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ မတ်လ ၃၁

ပဲရစ်အိုလံပစ်ပြိုင်ပွဲ ခြေစစ်ပွဲနဲ့ လက်ရည်စစ်ပွဲမှာ ရုရှားနဲ့ ယှဉ်ပြိုင်ရမယ်ဆိုရင် ယူကရိန်းအားကစားသမားတွေကို ယှဉ်ပြိုင်ခွင့်ပြုမှာ မဟုတ်ဘူးလို့ အစိုးရဝန်ကြီး အိုလက်နမ်ချီနော့ဗ်က ပြောပါတယ်။

အိုလက်နမ်ချီနော့ဗ်က “အစိုးရအစည်းအဝေးမှာ ရုရှားနိုင်ငံသားတွေ မပါဝင်တဲ့ လက်ရည်စစ်နဲ့ ခြေစစ်ပွဲတွေမှာ ဝင်ရောက်ယှဉ်ပြိုင်ဖို့ ဆုံးဖြတ်ချက် ချခဲ့ပါတယ်။ ဒီသတ်မှတ်ချက် ပြင်ပမှာ ပါဝင်ခြင်းဟာ အဖွဲ့ချုပ်တွေ အနေနဲ့ သူတို့ရဲ့ အမျိုးသားရပ်တည်မှုကို ဆုံးရှုံးစေခြင်းရဲ့ အကြောင်းရင်း ဖြစ်နိုင်တယ်”လို့ ပြောခဲ့တာပါ။

ယူကရိန်းနိုင်ငံရဲ့ အားကစားဝန်ကြီးရဲ့ အဆိုပြုချက်အတိုင်း အစိုးရက ဆုံးဖြတ်ချက် ချခဲ့တာဖြစ်ပြီး ဒါကို လျစ်လျူ ရှုတဲ့ အားကစားအဖွဲ့ချုပ်တွေဟာ အရေးယူခြင်း ခံရနိုင်ပါတယ်။

နိုင်ငံတကာ အိုလံပစ်ကော်မတီ (IOC) ဟာ ရုရှားနဲ့ ဘယ်လာရုစ် အားကစားသမားတွေကို ကြားနေအဖြစ် နိုင်ငံတကာပြိုင်ပွဲတွေထံ ဖြည်းဖြည်းချင်း ပြန်လာနိုင်ဖို့အတွက် အကြံပြုချက် ထုတ်ပြန်ခဲ့တာပါ။

ရုရှားက ယူကရိန်းကို ကျူးကျော်ပြီးကတည်းက ရုရှားနဲ့ ဘယ်လာရုစ်နိုင်ငံက အားကစားသမားတွေကို နိုင်ငံ တကာ အားကစားပြိုင်ပွဲတွေမှာ ဝင်ရောက်ယှဉ်ပြိုင်ခွင့် ပိတ်ပင်ထားတာ ဖြစ်ပါတယ်။

 ယူကရိန်းကစားသမားတစ်ဦးကိုတွေ့ရစဉ်

ဒါပေမယ့် လာမယ့်နှစ်မှာ ကျင်းပမယ့် ပဲရစ်အိုလံပစ် ပြိုင်ပွဲမှာတော့ ရုရှားနဲ့ ဘယ်လာရုစ် အားကစားသမားတွေကို ကြားနေအဖြစ် ယှဉ်ပြိုင်ခွင့်ပေးဖို့ နိုင်ငံတကာ အိုလံပစ်ကော်မတီက စဉ်းစားလာခဲ့တာပါ။

ယူကရိန်းဟာ ဒီနှစ်နိုင်ငံက အားကစားသမားတွေကို ယှဉ်ပြိုင်ခွင့်ပြုရင် ၂၀၂၄ ပဲရစ်အိုလံပစ်ကို သပိတ်မှောက် မယ်လို့လည်း ခြိမ်းခြောက်ထားပါတယ်။

နိုင်ငံတကာ အိုလံပစ်ကော်မတီဟာ စစ်အေးခေတ်ရဲ့ သပိတ်မှောက်မှုကို ပြန်လည်ရောက်မှာကို စိုးရိမ်နေတဲ့ အတွက် ရုရှားနဲ့ ဘယ်လာရုစ် အားကစားသမားတွေကို ဖယ်ထုတ်ဖို့ ဝန်လေးနေတာပါ။

အဲဒါကြောင့်လည်း ဒီနိုင်ငံတွေက အားကစားသမားတွေကို အာရှကနေ ခြေစစ်ပွဲဝင်ပြီး အိုလံပစ်ပြိုင်ပွဲ ဝင်ရောက် နိုင်ဖို့ လမ်းကြောင်း တစ်ခုကို ချမှတ်ပေးခဲ့တာ ဖြစ်ပါတယ်။

အချို့အဖွဲ့ချုပ်တွေကတော့ ပြိုင်ပွဲမှာ ရုရှားနဲ့ ဘယ်လာရုစ် အားကစားသမားတွေကို လက်ခံထားပေမယ့် အားကစားသမားတွေနဲ့ ဥရောပအစိုးရအချို့ကတော့ IOC ရဲ့ အစီအစဉ်တွေကို ဆန့်ကျင်မှုတွေ ရှိနေတာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ မတ်လ ၃၁

ပြင်သစ်နောက်ခံလူဟောင်း အီဗရာက ပြီးခဲ့တဲ့ ကမ္ဘာ့ဖလားဗိုလ်လုပွဲမှာ သူ့ရဲ့ နိုင်ငံအသင်းဟာ အာဂျင်တီးနားနဲ့ မက်ဆီကို ရှုံးနိမ့်ခဲ့တာကြောင့် ကားထဲမှာ ငိုခဲ့ရတယ်လို့ ပြောခဲ့ပါတယ်။

အီဗရာက “ကျနော် ဒီပွဲကို တိုက်ရိုက်ကြည့်ပြီး ငိုခဲ့ရပါတယ်။ ဒါကို မမျှော်လင့်ထားပါဘူး။ ပြင်သစ်နဲ့ အာဂျင်တီး နားတို့ရဲ့ ဗိုလ်လုပွဲကို ကြည့်ပြီး ကားထဲကို သွားရောက် ငိုခဲ့ရတာပါ။ ဒါဟာ အမှန်အတိုင်း ပြောနေတာပါ။ ကျနော် ၃ ရက်ကြာအောင် နာကျင်ခဲ့ရပါတယ်။ ကျနော်ဟာ ပြင်သစ်အသင်းကို ချစ်တဲ့အတွက် အလွန်နာကျင် ခဲ့ရပါတယ်။ ဘတ်ပီကတော့ ဒီပွဲမှာ ဟတ်ထရစ် သွင်းခဲ့ပါတယ်။ ဗိုလ်လုပွဲမှာ ၃ ဂိုး သွင်းခဲ့ပေမယ့် အနိုင်မရခဲ့ပါဘူး။ ဒါကို မယုံ နိုင်စရာပဲလို့ မြင်မိကြောင်း”RMC နဲ့ အင်တာဗျူးမှာ ပြောခဲ့တာပါ။

၂၀၂၂ ကမ္ဘာ့ဖလား ဗိုလ်လုပွဲအဖြစ် ကစားခဲ့တဲ့ ပြင်သစ်နဲ့ အာဂျင်တီးနားအသင်းတို့ရဲ့ ဗိုလ်လုပွဲမှာ အာဂျင်တီးနား အသင်းက ပင်နယ်တီ အဆုံးအဖြတ်မှာ အနိုင်ရပြီး ချန်ပီယံဆုကို ရရှိခဲ့တာ ဖြစ်ပါတယ်။

ဒီပွဲမှာ ပြင်သစ်အသင်းဟာ ၂ ဂိုး- ဂိုးမရှိနဲ့ အရေးနိမ့် နေတာကနေ ချေပဂိုးတွေ လိုက်သွင်းပြီး အချိန်ပို အပြီးမှာ ၃ ဂိုးစီ သရေကျခဲ့တာကြောင့် ပင်နယ်တီ အဆုံးအဖြတ် ကစားခဲ့ရတာပါ။ ပင်နယ်တီမှာ အာဂျင်တီးနားအသင်းက ၄ ဂိုး- ၂ ဂိုးနဲ့ အနိုင်ရရှိခဲ့တာ ဖြစ်ပါတယ်။

မက်ဆီနဲ့ ဘတ်ပီကိုတွေ့ရစဉ်

အာဂျင်တီးနား အသင်းအတွက်တော့ ၁၉၈၆ နောက်ပိုင်း ပထမဆုံးအကြိမ် ကမ္ဘာ့ဖလားချန်ပီယံဆုကို ရယူနိုင်ခဲ့တာဖြစ်ပြီး ၃ ကြိမ်မြောက် ရရှိခဲ့တာပါ။

၂၀၁၈ ကမ္ဘာ့ဖလားပြိုင်ပွဲမှာ ချန်ပီယံဖြစ်ခဲ့တဲ့ ပြင်သစ်အသင်းဟာ လက်ရှိချန်ပီယံဘွဲ့ကို ဆက်ထိန်းသိမ်းဖို့ မျှော်လင့်ခဲ့ပေမယ့် ပင်နယ်တီနဲ့ အရေးနိမ့်ပြီး မျှော်လင့်ချက် ပျက်ပြယ်ခဲ့ရတာ ဖြစ်ပါတယ်။

ဒီပြိုင်ပွဲမှာ မက်ဆီက ရွှေဘောလုံးဆု ရရှိခဲ့ပြီး ဘတ်ပီက ဂိုးသွင်း အများဆုံး ရွှေဖိနပ်ဆုကို ရရှိခဲ့တာပါ။

ပြီးခဲ့တဲ့ နိုင်ငံတကာ ရက်သတ္တပတ်မှာတော့ ပြင်သစ်အသင်းဟာ ယူရို ၂၀၂၄ ခြေစစ်ပွဲအဖြစ် နယ်သာလန်၊ အိုင်ယာလန်တို့နဲ့ ကစားခဲ့ပြီး ၂ ပွဲစလုံး အနိုင်ရရှိခဲ့သလို အာဂျင်တီးနား အသင်းကလည်း ပနားမား၊ ကူရာကာအို တို့နဲ့ ခြေစမ်းပွဲကစားခဲ့တာမှာ ၂ ပွဲစလုံး အနိုင်ရရှိခဲ့တာ ဖြစ်ပါတယ်။

Source :Goal

CNI Sport News

၂၀၂၃ ခုနှစ်၊ မတ်လ ၃၁

ယူနိုက်တက်အသင်းရဲ့ စာချုပ်သက်တမ်းတိုးဖို့ ကမ်းလှမ်းမှုတွေကို ပယ်ချခဲ့တယ်လို့ သတင်းတွေ ထွက်နေခဲ့ ပေမယ့် ဂိုးသမား ဒီဂီယာကတော့ အသင်းမှာ ပျော်ရွှင်နေတယ်လို့ ပြောလိုက်ပါတယ်။

ဒီဂီယာက “ကျနော်ဒီမှာရှိနေတာ နှစ်အတော်ကြာပါပြီ။ ကလပ်အတွက် ပွဲတွေ အများကြီး ကစားထားပြီး ကစား တဲ့ အချိန်တိုင်းမှာလည်း ပျော်ပျော်ရွှင်ရွှင်ပါပဲ။ ယူနိုက်တက်အသင်းဟာ ကြီးမားတဲ့ ကလပ်ဖြစ်ပြီး ကလပ်ကို ချစ်မြတ်နိုးသလို ဒီမှာရှိနေရတာကို အလွန်ပျော်ရွှင်ပါတယ်။ နှစ်တွေ ကြာသွားလည်း ဒီလိုပါပဲ။ ကလပ်ရဲ့ ဝန်းကျင် မှာ ဒီလို ဆူညံသံတွေ ထွက်နေပေမယ့် ကစားသမားတွေက ပွဲတွေကိုပဲ အာရုံစိုက်နေကြတာပါ။ ကျနော်တို့ဟာ ထိပ်ဆုံး ၄ သင်းထဲ ဝင်ရောက်ပြီး ရာသီကို အဆုံးသတ်ချင်ပါတယ်။ ကျနော် ပြောခဲ့သလိုပဲ ပွဲတွေအများကြီး ကစားဖို့ ရှိနေတဲ့အတွက် လေ့ကျင့်ရေးကို ကောင်းမွန်စွာလုပ်ပြီး အသင်းကို ကူညီဖို့က စာချုပ် ဒါမှမဟုတ် ဘယ်လို အရာတွေထက်မဆို ပိုပြီးအရေးကြီးပါတယ်”လို့ Sky Sports ကို ပြောခဲ့ပါတယ်။

ဒီဂီယာနဲ့ ယူနိုက်တက်တို့ ချုပ်ဆိုထားတဲ့ စာချုပ်ဟာ နောက်ဆုံးလ အနည်းငယ်ထဲကို ရောက်ရှိနေတာ ဖြစ်ပြီး စပိန်ဂိုးသမားဟာ အခုအပတ် အစောပိုင်းက အသင်းရဲ့ စာချုပ်သစ် ကမ်းလှမ်းမှုကို ပယ်ချခဲ့တယ်လို့ သတင်းတွေ ထွက်ပေါ်ခဲ့ပါတယ်။

ဒီဂီယာဟာ ယူနိုက်တက်အသင်းမှာ လုပ်ခလစာ အများဆုံးရတဲ့ သူတွေထဲက တစ်ဦးဖြစ်ပြီး တစ်ပတ်ကို ပေါင် ၃၇၅,၀၀၀ ရရှိနေတာပါ။

အဲဒါကြောင့် မန်ချက်စတာကလပ်ဟာ ဒီဂီယာကို လုပ်ခလစာ လျှော့ချပြီး စာချုပ်သစ် ချုပ်ဆိုချင်နေတာ ဖြစ်ပါတယ်။

ပြိုင်ဘက်အသင်းရဲ့ သွင်းဂိုးကို ကာကွယ်နေတဲ့ ဒီဂီယာကို တွေ့ရစဉ်

ဖာဂူဆန် လက်ထက်ကတည်းက ယူနိုက်တက်အသင်းမှာ နံပါတ်တစ် ဂိုးသမားအဖြစ် ပွဲထွက်ခွင့် ရနေတဲ့ ဒီဂီယာဟာ နည်းပြ အဲရစ်တန်ဟတ်ရဲ့ ကစားကွက်ပုံစံနဲ့ လိုက်ဖက်မှု မရှိမှာကို စိုးရိမ်မှုတွေ ရှိခဲ့တာပါ။

ဒါပေမယ့် ဒီဂီယာဟာ အသင်းအတွက် အထင်ကြီးဖွယ် ကောင်းတဲ့ လက်စွမ်းတွေကို ပြသထားတာကြောင့် အသင်းရဲ့ အရေးပါတဲ့သူအဖြစ် ရှိနေတာ ဖြစ်ပါတယ်။

ဒီဂီယာက သူဟာ အသင်းရဲ့ အရေးပါတဲ့ ကစားသမားအဖြစ် ရှိနေတဲ့အတွက် သင့်လျော်တဲ့ လစာပမာဏကို ပေးချေသင့်တယ်လို့ ယုံကြည်နေတာပါ။

၂၀၁၁ ကတည်းက အသလက်တီကို အသင်းကနေ ရောက်ရှိလာခဲ့တဲ့ ဒီဂီယာဟာ ယူနိုက်တက် အသင်းအတွက် ပွဲပေါင်း ၅၀၀ ကျော် ပါဝင်ကစားထားပြီး ပရီးမီးယားလိဂ်၊ ယူရိုပါလိဂ်၊ အက်ဖ်အေဖလား၊ ကာရာဘောင်းဖလား တို့ကို ရယူထားသလို တစ်ဦးချင်း အောင်မြင်မှုတွေလည်း အများအပြား ရယူထားတာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ မတ်လ ၃၁

ယူနိုက်တက်အသင်းရဲ့ ဂန္တဝင်ကစားသမား ဝိန်းရွန်းနီက မန်စီးတီးအသင်းထက် အာဆင်နယ်အသင်းကိုသာ ပရီးမီးယားလိဂ်ဖလား ရစေချင်တယ်လို့ ပြောလိုက်ပါတယ်။

ဝိန်းရွန်းနီက “အာဆင်နယ်အသင်းဟာ ဒီနေရာမှာ အကြာကြီးမရှိခဲ့လို့ ဒါက ဖိအားတွေ အများကြီး ရှိနိုင်ပါတယ်။ ရာသီကုန်ဖို့ ၇ ပွဲ၊ ၈ ပွဲလောက်ရောက်လာရင် ဖိအားတွေဟာ စတင်ဝင်ရောက်လာပါပြီ။ သူတို့တစ်ရာသီလုံး လုပ် ဆောင်ထားတဲ့ အရာတွေကို ဆက်ထိန်းထားနိုင်မလား ဆိုတာကို ကြည့်ရမှာကို အလွန် စိတ်ဝင်စားပါတယ်။ မန်စီးတီးကလည်း ဒီနေရာမှာပဲ ရှိနေမယ် ထင်ပါတယ်။ မန်စီးတီးကတော့ ပြီးခဲ့တဲ့နှစ်တွေက လိဂ်ဖလား ရယူနိုင် ခဲ့သလို သူတို့မှာ ဆုဖလားရယူနိုင်တဲ့ အတွေ့အကြုံရှိ နည်းပြ ဂွာဒီယိုလာလည်း ရှိပါတယ်။ ကျနော်ကတော့ မန်စီးတီးနဲ့ အာဆင်နယ်အသင်းကြား ဘယ်အသင်းကို ရစေချင်လဲဆိုရင်တော့ အာဆင်နယ်အသင်းကိုပဲ ရစေချင် ပါတယ်”လို့ CNN ကို ပြောခဲ့တာပါ။

အခုနှစ်ရာသီ ပရီးမီးယားလိဂ် ပြိုင်ပွဲပြီးဆုံးဖို့ ၁၀ ပွဲသာ ကျန်ရှိတော့တဲ့ အချိန်မှာ အာဆင်နယ် အသင်းဟာ ဒုတိယ နေရာက မန်စီးတီးအသင်းထက် ၁ ပွဲပို ကစားထားပြီး ရမှတ် ၈ မှတ်အသာနဲ့ အမှတ်ပေးဇယားကို ဦးဆောင်နေ တာ ဖြစ်ပါတယ်။

အာဆင်နယ်အသင်းဟာ ပြီးခဲ့တဲ့ရာသီက အဆင့် ၅ နေရာနဲ့ ရာသီအဆုံးသတ် နိုင်ခဲ့ပေမယ့် အခုနှစ် ရာသီမှာတော့ ခြေစွမ်း တသမတ်တည်းရှိခဲ့ကာ အဆင့် ၁ နေရာကို ရယူပြီး ချန်ပီယံဆု ပြေးလမ်းကြောင်းရဲ့ ထိပ်ဆုံးနေရာမှာ ရှိနေတာပါ။

အာဆင်နယ်အသင်းဟာ ပရီးမီးယားလိဂ်ဖလား ရယူဖို့ ၁၉ နှစ်ကြာ စောင့်ဆိုင်းခဲ့ရတာကို အခုနှစ်ရာသီမှာ အဆုံး သတ်နိုင်ဖို့ ပစ်မှတ်ထားနေတာဖြစ်ပြီး ရာသီကုန်ဆုံးဖို့ နီးကပ်လာချိန်မှာ ဒုတိယနေရာက မန်စီးတီးအသင်းရဲ့ ဖိအားပေးမှုတွေကို ခံနေရတာ ဖြစ်ပါတယ်။

အာဆင်နယ်နဲ့ မန်စီးတီး အသင်းကို တွေ့ရစဉ်

အာဆင်နယ်အသင်းရဲ့ ပရီးမီးယားလိဂ် လက်ကျန် ၁၀ ပွဲမှာ လီဗာပူးလ်၊ မန်စီးတီး၊ ချယ်လ်ဆီးအသင်းတို့နဲ့ တွေ့ဆုံရမယ့် ပွဲကြီးပွဲကောင်းတွေ ပါဝင်နေတာပါ။

ဒါပေမယ့် ဝိန်းရွန်းနီကတော့ အခုနှစ်ရာသီ ပရီးမီးယားလိဂ်ဖလားကို အာဆင်နယ်အသင်း ရယူနိုင်မယ်လို့ ယုံကြည်နေတာ ဖြစ်ပါတယ်။

အသင်းဟောင်း ယူနိုက်တက်ကတော့ ဆုဖလားပြိုင်ပွဲမှာ မပါဝင်တော့ဘူးလို့လည်း ဝိန်းရွန်းနီက ပြောခဲ့တာပါ။

ယူနိုက်တက်အသင်းဟာ လက်ရှိ ပရီးမီးယားလိဂ် ၂၆ ပွဲ ကစားအပြီးမှာ အဆင့် ၁ နေရာက အာဆင်နယ်အသင်းနဲ့ ၁၉ မှတ် ကွာဟနေတာ ဖြစ်ပါတယ်။

ဝိန်းရွန်းနီက “ယူနိုက်တက်ကတော့ ဒီပြိုင်ပွဲမှာ မပါဝင်ဖို့ ပြီးဆုံးသလောက် ဖြစ်သွားပါပြီ။ အပြည့်အဝ မဟုတ် သေးပေမယ့် ပြီးဆုံးလု နီးပါး ဖြစ်နေပါပြီ”လို့ ပြောခဲ့တာပါ။

အာဆင်နယ်အသင်းဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် လိဒ်စ်အသင်းနဲ့ ယှဉ်ပြိုင်ရမှာဖြစ်ပြီး မန်စီးတီး ကတော့ လီဗာပူးလ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Metro

CNI Sport News

၂၀၂၃ ခုနှစ်၊ မတ်လ ၃၀

စပိန်နဲ့ ဘာစီလိုနာအသင်း နည်းပြဟောင်း လူးဝစ်အင်းနရစ်က ပရီးမီးယားလိဂ်မှာ နည်းပြအဖြစ် ဆောင်ရွက်ချင် တယ်လို့ ဝန်ခံပြောကြားလာခဲ့ပါတယ်။

လူးဝစ်အင်းနရစ်က “ကျနော် အင်္ဂလန်မှာ အလုပ်သွားလုပ်ချင်ပါတယ်။ ဒါပေမယ့် ဇူလိုင်လထဲမှာတော့ ကိုယ့်ကိုယ် ကို ပရီးမီးယားလိဂ်မှာ မမြင်တွေ့ရပါဘူး။ ဘာကြောင့်လဲဆိုရင် အရေးကြီးတဲ့ အရာတွေကို လုပ်ဆောင်နိုင်တဲ့ အသင်း တစ်သင်းကို သွားရောက်ချင်လို့ပါ။ ဒါပေမယ့် ဒါက ခက်ခဲပါတယ်။ အခုအချိန်မှာတော့ ဘယ် ပရီးမီးယား လိဂ် ကလပ်အသင်းကိုမှ ကျနော် မသွားပါဘူး”လို့ ပြောခဲ့တာပါ။

စပိန်လူမျိုးနည်းပြဟာ ပြီးခဲ့တဲ့ ကမ္ဘာ့ဖလားပြိုင်ပွဲမှာ စပိန်အသင်း ၁၆ သင်း အဆင့်ကနေ ထွက်ခွာရပြီးနောက် နည်းပြရာထူးကနေ ထွက်ခွာခဲ့တာဖြစ်ပြီး လက်ရှိအချိန်မှာတော့ အသင်းလက်မဲ့ ဖြစ်နေပါတယ်။

အင်းနရစ်ဟာ နိုင်ငံလက်ရွေးစင် အသင်းတွေရဲ့ ကမ်းလှမ်းမှုကို ရရှိထားပေမယ့် ပရီးမီးယားလိဂ် ကလပ် အသင်း တွေကို ကိုင်တွယ်ခွင့်ရမယ့် အခွင့်အရေးကို စောင့်ဆိုင်းနေတာပါ။

စပိန်အသင်း နည်းပြအဖြစ် တာ၀န်ယူခဲ့စဉ်က လူးဝစ်အင်းနရစ်ကိုတွေ့ရစည်

ပရီးမီးယားလိဂ်ကလပ် စပါးအသင်းဟာ နည်းပြ ကွန်တီနဲ့ နှစ်ဦးသဘောတူ လမ်းခွဲပြီးနောက် လူးဝစ်အင်းနရစ် ဟာ စပါးအသင်း ပစ်မှတ်ထားနေတဲ့ ဆန်ကာတင် နည်းပြတွေထဲက တစ်ဦးလည်း ဖြစ်ပါတယ်။

ဒါပေမယ့် စပါးအသင်းဟာ ကွန်တီရဲ့ လက်ထောက်နည်းပြ စတယ်လီနီကို ရာသီအကုန်ထိ ယာယီနည်းပြအဖြစ် ခန့်အပ်ထားတာကြောင့် ရာသီကုန်မှသာ နည်းပြသစ် ခန့်အပ်ဖို့ ရှိနေတာပါ။

ပီအက်စ်ဂျီကလည်း နည်းပြ ဂယ်လ်တီယာကို ထုတ်ပယ်ခဲ့မယ်ဆိုရင် နည်းပြသစ်အဖြစ် ခန့်အပ်ဖို့ လူးဝစ် အင်းနရစ်ကို စိတ်ဝင်စားနေတာ ဖြစ်ပါတယ်။

ပီအက်စ်ဂျီအသင်းဟာ ဒီရာသီမှာ ချန်ပီယံလိဂ် ရယူဖို့ ပစ်မှတ်ထားနေပေမယ့် ၁၆ သင်းအဆင့်ကနေ စောစီးစွာ ထွက်ခွာခဲ့ရတာကြောင့် နည်းပြ ဂယ်လ်တီယာကို ထုတ်ပယ်ဖို့ စဉ်းစားနေပြီး စပိန်နည်းပြဟောင်းကို နည်းပြသစ် အဖြစ် ခန့်အပ်ဖို့ ချိတ်ဆက်မှုတွေ ပြုလုပ်နေပါတယ်။

Source: Goal

CNI Sport News

၂၀၂၃ ခုနှစ်၊ မတ်လ ၃၀

ရိုမန်အေဘရာမိုဗစ်ချ်ဟာ ချယ်လ်ဆီးအသင်း ပိုင်ရှင်အဖြစ် ရှိနေချိန်အတွင်းမှာ ဒတ်ချ်ကလပ် တစ်ခုကို ဝယ်ယူနိုင် ဖို့အတွက် လျှို့ဝှက်ငွေကြေး ထောက်ပံ့ခဲ့တယ်လို့ ပေါက်ကြားလာတဲ့ စာရွက်စာတမ်းတွေအရ သိရပါတယ်။

အေဘရာမိုဗစ်ချ်ဟာ ၂၀၁၀ က ဗီတက်ဆီအသင်းကို ဂျော်ဂျီယာ လက်ရွေးစင်ဟောင်း ဂျော်ဒါနီယာက ဦးဆောင် ပြီး ဝယ်ယူမှုမှာ ငွေကြေးထောက်ပံ့ ပေးနိုင်ဖို့အတွက် အဓိကအခန်းကဏ္ဍကနေ ပါဝင်နေခဲ့တာပါ။

အေဘရာမိုဗစ်ချ်ဟာ ဗီတက်ဆီ အသင်းအတွက် ပေါင် ၁၀၃ သန်းအထိ ရင်းနှီးမြှုပ်နှံခဲ့တာဖြစ်ပြီး ချယ်လ်ဆီး အသင်းမှာရှိတဲ့ မေဆန်မောင့်၊ မာတစ်နဲ့ ဘရိုဂျာတို့ကိုလည်း အငှားချခဲ့တာ ဖြစ်ပါတယ်။

ဗီတက်ဆီအသင်းကို အဲဒီအချိန်တုန်းက ဝယ်ယူခဲ့တဲ့ ဂျော်ဒါနီယာကတော့ အေဘရာမိုဗစ်ချ် မပါဝင်ဘူးလို့ ပြောခဲ့ပါတယ်။

၂၀၁၃ မှာ ရုရှား စီးပွားရေး လုပ်ငန်းရှင် ချီဂရင်စကီးက ဗီတက်ဆီအသင်းကို အပြည့်အဝ ထိန်းချုပ်အပြီး ချယ်လ်ဆီးအသင်းဟာ ကစားသမားတွေကို ဒတ်ချ်ကလပ်ထံ အငှားချခဲ့ပါတယ်။

ဗီတက်ဆီအသင်းသား တစ်ဦးကိုတွေ့ရစဉ်

အဲဒီနောက်ပိုင်းမှာတော့ သံသယတွေ ထပ်ပြီး ထွက်ပေါ်လာခဲ့တာ ဖြစ်ပါတယ်။ ဗီတက်ဆီအသင်းကို ကနဦး ဝယ်ယူချိန်ကတည်းက သူပါဝင်နေတယ် ဆိုတာဟာ ပိုပြီးထင်ရှားတယ်လို့ သတင်းမှာ ဖော်ပြထားတာပါ။

ဒတ်ချ်ဘောလုံးအဖွဲ့ချုပ်ကတော့ ဗီတက်ဆီနဲ့ ရုရှားဘီလျံနာတို့ ချိတ်ဆက်မှု ရှိ၊မရှိကို နှစ်ကြိမ်တိုင်တိုင် စုံစမ်း စစ်ဆေးခဲ့ပေမယ့် အေဘရာမိုဗစ်ချ် ဆီကနေ ငွေကြေးချိတ်ဆက်မှု ဒါမှမဟုတ် သြဇာလွှမ်းမိုးမှုဆိုင်ရာ အထောက် အထားကို ရှာမတွေ့ခဲ့ပါဘူး။

လန်ဒန်ကလပ်ဟာ ဗီတက်ဆီအသင်းထံ ကစားသမား စုစုပေါင်း ၂၉ ဦးကို အငှားစေလွှတ် ခဲ့တာပါ။ ချယ်လ်ဆီး အသင်းဟာ လက်ရှိ အချိန်မှာတော့ ပိုင်ရှင်အသစ် လက်အောက်မှာရှိနေပြီး အေဘရာမိုဗစ်ချ် ရှေ့နေကတော့ ဒါနဲ့ ပတ်သက်ပြီး မှတ်ချက်ပေးဖို့ ငြင်းဆန်ထားတာ ဖြစ်ပါတယ်။

ဗီတက်ဆီက “ဗီတက်ဆီဟာ မာရင်ဒါလီကုမ္ပဏီရဲ့ ဘဏ္ဍာရေးဆိုင်ရာ နည်းလမ်းကို မသိရှိပါဘူး။ ဗီတက်ဆီမှာ ဘယ်လို ချေးငွေ သဘောတူညီမှုမှ မရှိပါဘူး”လို့ ထုတ်ပြန်ခဲ့တာ ဖြစ်ပါတယ်။

Source: Daily Mail