CNI Sport News

၂၀၂၂ ခုနှစ်၊ နိုဝင်ဘာ ၂၅

၂၀၂၂ ကမ္ဘာ့ဖလားအုပ်စုပွဲစဉ် ၂ အဖြစ် အီရန်အသင်းနဲ့ ဝေးလ်စ်အသင်းတို့ ယှဉ်ပြိုင်ခဲ့တာမှာ အီရန်အသင်းက ၂ ဂိုး- ဂိုးမရှိနဲ့ အနိုင်ရရှိသွားခဲ့ပါတယ်။

ပထမပိုင်းမှာ ဂိုးမရှိ သရေကျခဲ့ပြီး ဒုတိယပိုင်း ပွဲပြီးကာနီးမှာ အီရန်ကစားသမားကို တား‌ဆီးပုံကြမ်းလို့ ဝေးလ်စ်အသင်းဂိုးသမား အနီကတ်ပြသခံရတာက ပွဲကို အလှည့်အပြောင်း ဖြစ်ခဲ့ရပါတယ်။

နာကျင်အချိန်ပို ၉ မိနစ်ပေးခဲ့တာက အီရန်အတွက် အနိုင်ရဖို့ အခွင့်အရေး ရသွားခဲ့ပြီး နာကျင်အချိန်ပို ၈ မိနစ်မှာ ချက်စ်ဟီမီက အီရန်အတွက် အဖွင့်ဂိုး စသွင်းပေးခဲ့ပါတယ်။

ဝေးလ်စ်အသင်းဟာ ချေပဂိုးရဖို့ ပြန်လည်တိုက်စစ် ဆင်ခဲ့ပါတယ်။

ဝေးလ်အသင်းသားများ စိတ်ပျက်နေစဉ်

ဒါပေမယ့် တန်ပြန်တိုက်စစ်နဲ့ အီရန်အသင်း နောက်ထပ် သွင်းဂိုး ရရှိသွားခဲ့ပါတယ်။

ဒီဂိုးကို နာကျင်အချိန်ပို ၁၁ မိနစ်မှာ ရာမင်က သွင်းယူခဲ့တာ ဖြစ်ပါတယ်။

အဲ့ဒါကြောင့် အီရန်အသင်းက ၂ ဂိုး- ဂိုးမရှိနဲ့ ဝေးလ်စ်ကို အနိုင်ရခဲ့တာပါ။

အီရန်အသင်းဟာ ဒီနိုင်ပွဲကြောင့် ၂ ပွဲ ကစားအပြီးမှာ ရမှတ် ၃ မှတ်ရရှိခဲ့ပြီး ဝေးလ်စ်ကတော့ ၂ ပွဲကစားအပြီးမှာ ၁ မှတ်သာ ရရှိထားတာဖြစ်ပါတယ်။

CNI Sport News

၂၀၂၂ ခုနှစ်၊ နိုဝင်ဘာ ၂၅

ဆားဘီးယားအသင်းကို အနိုင်ရခဲ့တဲ့ ကမ္ဘာ့ဖလားပွဲစဉ်မှာ ခြေကျင်းဝတ်ဒဏ်ရာရရှိသွားတဲ့ နေမာရဲ့ဒဏ်ရာကို အကဲဖြတ်ဖို့ စောင့်ဆိုင်းရမယ်လို့ ဘရာဇီးလ်အသင်းဆရာဝန် ရိုဒရီဂိုလက်စ်မာက ပြောပါတယ်။

ရိုဒရီဂိုလက်စ်မာက “သူ့ရဲ့ ညာဘက်ခြေကျင်းဝတ်က အနည်းငယ်ရောင်ရမ်းနေပါတယ်။သူဘယ်လိုတုံ့ပြန်မလဲ ဆိုတာ ကြည့်ရဖို့က အရေးကြီးပါတယ်။ကုသမှုကို စတင်လုပ်ဆောင်နေပြီး စိတ်အေးအေးထားကာ စိတ်ရှည်ဖို့ လိုအပ်ပါတယ်။ကမ္ဘာ့ဖလားပြိုင်ပွဲမှာ ဆက်လက်ပါဝင်နိုင်ဖို့ သံသယရှိလားဆိုရင်တော့ ပြောဖို့ စောပါသေး ပါတယ်။မနက်ဖြန်မှာ အကဲဖြတ်မှုအသစ်ပြုလုပ်မယ်၊အဲဒါကိုစောင့်ဆိုင်းရမှာပါ” လို့ သတင်းထောက်တွေကို ပြောခဲ့တာပါ။

နေမာဟာ ဒီပွဲမှာ ဆားဘီးယားကစားသမားတွေရဲ့ ပြစ်ဒဏ်ဘောကျူးလွန်မှု ၉ ကြိမ်အထိ ခံခဲ့ရပြီး နာကျင် နေပေမယ့် ပွဲချိန် ၇၉ မိနစ်အထိ ကစားခဲ့တာဖြစ်ပါတယ်။နေမာဟာ ကုသမှုခံယူချိန် အရန်ခုံတန်းပေါ်မှာ ငိုကြွေး နေခဲ့တာပါ။ဘရာဇီးလ်ကစားသမားရဲ့ ခြေကျင်းဝတ်ရောင်ရမ်းနေတာကြောင့် ပွဲအပြီး အဝတ်စားလဲခန်း သွား ရောက်တာမှာ ထော့နဲ့ထော့နဲ့ သွားနေခဲ့တာဖြစ်ပါတယ်။

ဘရာဇီးနည်းပြ တိုင်တီကတော့ နေမာ ကမ္ဘာ့ဖလားပြိုင်ပွဲမှာ ဆက်ပြီးကစားနိုင်မယ်ဆိုတာကို ယုံကြည်မှုအပြည့် ရှိနေတာပါ။တိုင်တီက “နေမာ ကမ္ဘာ့ဖလားပြိုင်ပွဲမှာ ဆက်ကစားနိုင်မယ်ဆိုတာ သေချာပါတယ်။ဒါကို သေချာ ပေါက် ပြောနိုင်ပါတယ်” လို့ ပြောခဲ့ပါတယ်။နေမာဟာ ဘရာဇီးလ်အသင်းရဲ့ အဓိကကစားသမားဖြစ်ပြီး အသင်းကို ဦးဆောင်နေတဲ့ ကစားသမားတွေထဲကတစ်ဦးလည်း ဖြစ်တာပါ။

ဘရာဇီးလ်အသင်းဟာ ဒီပွဲမှာ ဆားဘီးယားအသင်းကို ၂ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး ၂ ဂိုးစလုံးကို ရစ်ချာလီ ဆန်က သွင်းယူခဲ့တာဖြစ်ပါတယ်။ကမ္ဘာ့ဖလားချန်ပီယံဆု ရယူနိုင်ဖို့ ရေပန်းစားနေတဲ့ ဘရာဇီးလ်အသင်းဟာ အုပ်စုဒုတိယပွဲစဉ်အဖြစ် တနင်္လာနေ့မှာ ဆွစ်ဇာလန်အသင်းနဲ့ ယှဉ်ပြိုင်ရမှာပါ။ဆွစ်ဇာလန်အသင်းကတော့ အုပ်စု အဖွင့်ပွဲစဉ်မှာ ကင်မရွန်းအသင်းကို ၁ ဂိုး- ဂိုးမရှိနဲ့ အနိုင်ရရှိထားတာဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ နိုဝင်ဘာ ၂၅

ရော်နယ်ဒိုဟာ ပေါ်တူဂီအသင်းက ဂါနာအသင်းကို အနိုင်ရခဲ့တဲ့ပွဲမှာ ၁ ဂိုး သွင်းယူခဲ့ပြီးနောက် ကမ္ဘာ့ဖလားပြိုင်ပွဲ ၅ ကြိမ်ဆက် ဂိုးသွင်းယူနိုင်တဲ့ ပထမဆုံး ကစားသမားအဖြစ် စံချိန်သစ် တင်လိုက်ပါတယ်။

ရော်နယ်ဒိုဟာ ဒီစံချိန်မှတ်တမ်းအပေါ် အလွန်ဂုဏ်ယူနေတာပါ။

ရော်နယ်ဒိုက “ ဒါဟာ လှပတဲ့ အခိုက်အတန့်ဖြစ်ပြီး ကျနော့်ရဲ့ ၅ ကြိမ်မြောက် ကမ္ဘာ့ဖလားပြိုင်ပွဲပါ။ ကျနော်တို့ အနိုင်ရခဲ့တယ်။ ကောင်းမွန်စွာနဲ့လည်း စတင်နိုင်ခဲ့ပါတယ်။ ဒီနိုင်ပွဲဟာ ကျနော်တို့အတွက် အလွန်အရေးပါပါ တယ်။ ဒီလိုပြိုင်ပွဲတွေမှာ ပထမပွဲတွေက အရေးကြီးတယ်ဆိုတာ ကျနော်တို့ သိပါတယ်။ ကမ္ဘာ့ဖလားပြိုင်ပွဲ ၅ ကြိမ်ဆက် ဂိုးသွင်းယူနိုင်တဲ့ ပထမဆုံး ကစားသမား၊ ဒါကို ကျနော်အလွန်ဂုဏ်ယူပါတယ်”လို့ ပြောခဲ့တာ ဖြစ်ပါတယ်။

ပေါ်တူဂီအသင်းဟာ ဒီပွဲမှာ ဂါနာအသင်းကို ၃ ဂိုး- ၂ ဂိုးနဲ့ အနိုင်ရခဲ့တာဖြစ်ပြီး ရော်နယ်ဒိုအပြင် ဂျာအိုဖိလစ်နဲ့ ရာဖေးလ်လီယာအိုတို့က ၁ ဂိုးစီ သွင်းယူခဲ့တာပါ။ ပေါ်တူဂီနဲ့ ဂါနာပွဲရဲ့ အကောင်းဆုံး ကစားသမားဆုကို ရော်နယ်ဒိုက ရရှိသွားခဲ့တာ ဖြစ်ပါတယ်။

ရော်နယ်ဒိုဟာ ဂါနာနဲ့ပွဲမှာ သွင်းယူခဲ့တဲ့ ဂိုးကြောင့် ကမ္ဘာ့ဖလားပြိုင်ပွဲမှာ သွင်းဂိုး ၈ ဂိုးအထိ ရှိသွားပြီလည်း ဖြစ်ပါတယ်။

ရော်နယ်ဒိုနဲ့ အသင်းဖော်များကိုတွေ့ရစဉ် (Reuters)

ရော်နယ်ဒိုဟာ ကမ္ဘာ့ဖလားနဲ့ ယူရိုပြိုင်ပွဲ အပါအဝင် အဓိကပြိုင်ပွဲ ၁၀ ပွဲဆက် ဂိုးသွင်းယူနိုင်တဲ့သူလည်း ဖြစ်ခဲ့ပါ တယ်။

ပေါ်တူဂီအသင်းဖော် ရူဘင်နာဗတ်စ်က “ ခရစ္စတီယာနိုကို လူတိုင်းသိပါတယ်။ သူက ကမ္ဘာ့အကောင်းဆုံး ကစား သမားပါ။ သူဟာ တကယ့်ကို စိတ်အားထက်သန်ပြီး လက်ရွေးစင်အတွက် အပြည့်အဝ အာရုံစိုက်နေပါတယ်။ သူ ဟာ ကျနော်တို့ကို အများကြီး အကူအညီ ပေးနိုင်တာကြောင့် သူနဲ့အတူ ရှိနေရတာက ကျနော်တို့အတွက် ကံကောင်းတယ်”လို့ ပြောခဲ့တာပါ။

ပေါ်တူဂီ လက်ရွေးစင် အသင်းအတွက် ၁၉၂ ပွဲ ပါဝင်ကစားထားပြီး ၁၁၈ ဂိုး သွင်းယူထားတဲ့ ရော်နယ်ဒိုအတွက် ဒီကမ္ဘာ့ဖလားပြိုင်ပွဲဟာ သူ့ရဲ့ နောက်ဆုံး ကမ္ဘာ့ဖလားပြိုင်ပွဲ ဖြစ်လာဖို့ ရှိနေတာ ဖြစ်ပါတယ်။

အဲ့ဒါကြောင့် ရော်နယ်ဒိုဟာ ပေါ်တူဂီအသင်းနဲ့ ကမ္ဘာ့ဖလား ရယူပြီး သူ့ရဲ့ လက်ရွေးစင် ကစားသမားဘဝကို အဆုံး သတ်ဖို့ မျှော်လင့်နေတာပါ။

ပေါ်တူဂီအသင်းဟာ နိုဝင်ဘာလ ၂၈ ရက်မှာ အုပ်စုဒုတိယပွဲစဉ်အဖြစ် ဥရုဂွေးအသင်းနဲ့ ယှဉ်ပြိုင်ရမှာ ဖြစ်ပါတယ်။ ဥရုဂွေးအသင်းဟာ အုပ်စုအဖွင့်ပွဲမှာ တောင်ကိုရီးယားအသင်းနဲ့ ဂိုးမရှိ သရေကျခဲ့တာ ဖြစ်ပါတယ်။

Source: Goal/BBC

CNI Sport News

၂၀၂၂ ခုနှစ်၊ နိုဝင်ဘာ ၂၄

ယူနိုက်တက်အသင်းရဲ့ ပိုင်ရှင်တစ်ဦးဖြစ်တဲ့ အေဗရန်ဂလေဇာဟာ အသင်းကို ရောင်းချဖို့ ဘာကြောင့် ဆုံးဖြတ်ခဲ့ တာလဲဆိုပြီး မေးမြန်းတဲ့အပေါ် ဖြေကြားဖို့ ငြင်းဆန်သွားခဲ့ပါတယ်။

အေဗရန်ဂလေဇာက “ဘုတ်အဖွဲ့ဟာ လုပ်ငန်းစဉ် တစ်ခုကို ဖြတ်သန်း လုပ်ဆောင်ခဲ့ပြီး ယူနိုက်တက်အတွက် ခြားနားတဲ့ ဗျူဟာမြောက် ရွေးချယ်မှုတွေကို ရှာဖွေဖို့ ဆုံးဖြတ်ခဲ့ပါတယ်”လို့ Sky ကို ပြောခဲ့တာပါ။
ယူနိုက်တက် ပရိသတ်တွေဟာ ဂလေဇာမိသားစုကို နှစ်ပေါင်းများစွာ ဆန့်ကျင်နေပြီး အသင်းကို ပိုင်ဆိုင်နေတဲ့ အပေါ် ဆန္ဒပြမှုတွေလည်း ပြုလုပ်ခဲ့တာ ဖြစ်ပါတယ်။ အဲ့ဒါကြောင့်လည်း သူတို့ဟာ ယူနိုက်တက်ကို ရောင်းချဖို့ စီစဉ်နေတာပါ။

အမေရိကန်မိသားစုဟာ ယူနိုက်တက်ကို ပေါင် ၉ ဘီလီယံနဲ့ ရောင်းချနိုင်ဖို့ မျှော်လင့်နေပါတယ်။ မကြာသေးခင်က ယူနိုက်တက်နဲ့ စာချုပ်ဖျက်သိမ်းခဲ့တဲ့ ရော်နယ်ဒိုက ဂလေဇာ မိသားစုဟာ ကလပ်ကို ဈေးကွက်ရှာဖွေရေး အသင်း အဖြစ် သတ်မှတ်ထားပြီး ပိုက်ဆံရဖို့ပဲသိပြီးတော့ အသင်းအပေါ်မှာ ဂရုစိုက်တဲ့သူတွေ မဟုတ်ဘူးလို့ ပြောခဲ့တာပါ။

ယူနိုက်တက်အသင်း အားကစားကွင်းကိုတွေ့ရစဉ် (AP)

ရော်နယ်ဒိုနဲ့ ပတ်သက်ပြီး အေဗရန်ဂလေဇာက “ ခရစ္စတီယာနိုရော်နယ်ဒို အကြောင်း ပြောရမယ်ဆိုရင် သူဟာ ယူနိုက်တက်ရဲ့ အလွန်ကောင်းမွန်တဲ့ ကစားသမားပါ။ ကလပ်အတွက် သူလုပ်ပေးခဲ့တဲ့ အရာတွေအားလုံးကို အလွန် ကျေးဇူးတင်ပါတယ်။ ရော်နယ်ဒို အနာဂတ်မှာ ကံကောင်းပါစေလို့ ဆန္ဒပြုကြောင်း” ပြောခဲ့ပါတယ်။

ယူနိုက်တက် ဂန္တဝင် ဒေးဗစ်ဘက်ခမ်းဟာ အသင်းကို ဝယ်ယူဖို့ အလားအလာရှိတဲ့ သူတွေအားလုံးနဲ့ ဆွေးနွေးမှု တွေ ပြုလုပ်ဖို့ လမ်းဖွင့်ထားတယ်လို့ သိရပါတယ်။

ဒေးဗစ်ဘက်ခမ်းဟာ ယူနိုက်တက်ကို ဝယ်ယူဖို့ တက်နိုင်မှာ မဟုတ်ပေမယ့် ဝယ်ယူမယ့် သူတွေရဲ့ ရင်းနှီးမြုပ်နှံမှု မှာ အစိတ်အပိုင်းအဖြစ် ပါဝင်နိုင်ပါတယ်။ ဗြိတိန်ရဲ့ အချမ်းသာဆုံး ဘီလျံနာတစ်ဦးဖြစ်တဲ့ ဆာဂျင်ရက်ကလစ်ဖ် ကလည်း ယူနိုက်တက်ကို ဝယ်ယူဖို့ စိတ်ဝင်စားနေတဲ့ သူတွေထဲက တစ်ဦးဖြစ်ပါတယ်။

ယူနိုက်တက် ပရိသတ်ဖြစ်တဲ့ ဆာဂျင်ရက်ကလစ်ဖ်ဟာ ပြီးခဲ့တဲ့ နွေရာသီက ချယ်လ်ဆီးကို ဝယ်ယူဖို့ လုပ်ခဲ့ပေ မယ့် မအောင်မြင်ခဲ့ပါဘူး။

Source: The Sun

CNI Sport News

၂၀၂၂ ခုနှစ်၊ နိုဝင်ဘာ ၂၄

စပိန်ကြယ်ပွင့်ကစားသမား ဂါဗီဟာ ကော်စတာရီကာအသင်းကို ၇ ဂိုး- ဂိုးမရှိနဲ့ ဂိုးပြတ် အနိုင်ရတဲ့ပွဲမှာ ဂိုးသွင်း ယူနိုင်ခဲ့တာကြောင့် ပီလီနောက်ပိုင်း ကမ္ဘာ့ဖလားပြိုင်ပွဲရဲ့ အသက်အငယ်ဆုံး ဂိုးသွင်းတဲ့သူ ဖြစ်လာခဲ့ပါတယ်။

ပီလီဟာ ၁၉၅၈ ကမ္ဘာ့ဖလားပြိုင်ပွဲမှာ ဘရာဇီးလ်အသင်းကို ပထမဆုံး ကမ္ဘာ့ဖလားချန်ပီယံဆု ရယူနိုင်အောင် စွမ်းဆောင်ပေးနိုင်ခဲ့တာပါ။ အဲ့ဒီတုန်းက ပီလီရဲ့ အသက်ဟာ ၁၇ နှစ်သာ ရှိသေးပြီး အဆိုပါ ပြိုင်ပွဲမှာ ၆ ဂိုးအထိ သွင်းယူခဲ့တာ ဖြစ်ပါတယ်။
အသက် ၁၈ နှစ်အရွယ်ရှိ ဂါဗီဟာ ကော်စတာရီကာနဲ့ ပွဲမှာ ဂိုးသွင်းပြီး အခုလို စံချိန်မှတ်တမ်း ရယူနိုင်ခဲ့သလို ဒီပွဲရဲ့ အကောင်းဆုံး ကစားသမားဆုကိုပါ ရယူနိုင်ခဲ့တာပါ။

ဒါ့အပြင် ဂါဗီဟာ စပိန်လက်ရွေးစင်အသင်းရဲ့ အသက်အငယ်ဆုံး ကမ္ဘာ့ဖလား ဂိုးသွင်းတဲ့သူလည်း ဖြစ်ခဲ့ပါတယ်။

၂၀၀၆ ပြိုင်ပွဲမှာ အသက် ၁၉ နှစ်အရွယ်ရှိ ဖာဘရီဂတ်စ်က ယူကရိန်းဘက်ကို ဂိုးသွင်းပြီး စံချိန်တင်ထားတာကို ဂါဗီက ချိုးဖျက်ခဲ့တာပါ။ ဂါဗီဟာ အသက် ၁၇ နှစ်ပြည့်ပြီး ၂ လအကြာမှာ စပိန်လက်ရွေးစင်ရဲ့ အသက်အငယ်ဆုံး ကစားသမားအဖြစ် ရွေးချယ်ခံခဲ့ရပါတယ်။

စပိန်အသင်းသားများကိုတွေ့ရစဉ် (GETTY IMAGES)

ဂါဗီက “ ဒီလို အောင်မြင်မှုတွေအတွက် ကျနော်ပျော်ရွှင်ပါတယ်။ ဒါပေမယ့် ကျနော် တကယ် ဂရုစိုက်တာက အသင်းနိုင်ပွဲရဖို့နဲ့ ကစားပုံ ကောင်းမွန်ဖို့ပါ။ ကျနော်တို့ ဆက်သွားကြရမှာပါ။ ပီလီရဲ့ နောက် ဒုတိယနေရာမှာ ရှိနေရတာက ကျနော့်အတွက် ဂုဏ်ယူစရာပါပဲ။ ဒါက ကျနော့်ကို တကယ်ပျော်ရွှင်စေတဲ့ အရာပါ”လို့ ပွဲအပြီး သတင်းစာ ရှင်းလင်းပွဲမှာ ပြောခဲ့ပါတယ်။

ကော်စတာရီကာကို အနိုင်ရတဲ့ပွဲမှာ စပိန်အတွက် ဂိုးတွေကို ဂါဗီအပြင် အိုလ်မို၊ မိုရာတာ၊ အဆန်စီယို၊ ဆိုလာတို့ က ၁ ဂိုးစီသွင်းပြီး ဖာရန်တောရက်စ်က ၂ ဂိုး သွင်းယူခဲ့တာပါ။

စပိန်အသင်းဟာ အခုနှစ် ပြိုင်ပွဲမှာ ဝါရင့်ကစားသမားတွေနဲ့ လူငယ် ကစားသမား အများအပြားကို ပေါင်းစပ်ထား ပြီး အသင်းကို စုဖွဲ့ထားတာ ဖြစ်ပါတယ်။

စပိန်အသင်းဟာ အုပ်စုဒုတိယပွဲစဉ်အဖြစ် အဖွင့်ပွဲမှာ ဂျပန်ကို အရေးနိမ့်ခဲ့တဲ့ ဂျာမနီအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: CNA

CNI Sport News

၂၀၂၂ ခုနှစ်၊ နိုဝင်ဘာ ၂၄

ဂျပန်နည်းပြ မိုရီယာဆုက ဂျာမနီအသင်းကို အရှုံးကနေ ၂ ဂိုး- ၁ ဂိုးနဲ့ အနိုင်ရအောင်ကစားနိုင်ပြီးနောက် ဒါက သူတို့အတွက် သမိုင်းဝင်အောင်ပွဲလို့ ပြောလိုက်ပါတယ်။

မိုရီယာဆုက “ဒါက သမိုင်းဝင်အခိုက်အတန့်နဲ့ သမိုင်းဝင်အောင်ပွဲလို့ ကျနော်ယုံကြည်ပါတယ်။ဂျပန်ဘောလုံး လောကရဲ့ ဖွံ့ဖြိုးတိုးတက်မှုတွေကို တွေးကြည့်ရမယ်ဆိုရင် ကျနော်တို့က တည်ဆောက်ပြီး ကစားသမားတွေက နိုင်ငံရပ်ခြားကို သွားကြတာပါ။အဲဒီလိဂ်တွေကပဲ ကျနော်တို့ ဂျပန်ကစားသမားတွေရဲ့ စွမ်းဆောင်ရည်ကို ပံ့ပိုး ပေးပါတယ်။အဲဒါကြောင့် ကျနော်တို့ အလွန်ကျေးဇူးတင်ပြီး လေးစားပါတယ်။ဒါပေမယ့် ဘယ်လိုပြိုင်ဘက်ပဲ ဖြစ်ဖြစ် ကျနော်တို့က အနိုင်ရဖို့ သွားရမှာပါ” လို့ ပြောခဲ့တာပါ။

ဂျပန်အသင်းဟာ ဂျာမနီအသင်းရဲ့ ဦးဆောင်ခြင်းခံခဲ့ရပေမယ့် အကောင်းဆုံးတိုက်ပွဲဝင်နိုင်ခဲ့လို့ အဆုံးမှာ ထိုက်တန်တဲ့ နိုင်ပွဲရရှိခဲ့တာဖြစ်ပါတယ်။ဆော်ဒီအသင်းက အာဂျင်တီးနားအသင်းကို အံအားသင့်ဖွယ်အနိုင်ရပြီး နောက် ဂျပန်အသင်းကပါ ဂျာမနီအသင်းကို နောက်ထပ်အံအားသင့်ဖွယ်စွမ်းဆောင်ပြသခဲ့တာပါ။

အနိုင်ဂိုးရှင် အဆာနိုက “အိပ်မက်တွေ အမှန်တကယ်ဖြစ်လာခဲ့တာပါ။ကျနော်တို့ လုပ်နိုင်မယ်ဆိုတာ သိသလို၊ ဒီလိုအိမ်မက်မျိုးလည်း ရှိပါတယ်။ဆော်ဒီပွဲကို ကြည့်ခဲ့ပြီး ကျနော်တို့လည်း လုပ်နိုင်မယ်လို့ ထင်ခဲ့ပါတယ်။ ဒီနေ့မှာတော့ ကျနော်တို့ လုပ်ဆောင်နိုင်ခဲ့ပြီ” လို့ BBC Radio 5 Live ကို ပြောခဲ့တာဖြစ်ပါတယ်။

ဂျပန်အသင်းအနိုင်ရခဲ့သလို အားပေးသူပရိသတ်တွေကလည်း ပွဲအပြီးမှာ ပွဲကြည့်စင်ပေါ်က အမှိုက်တွေကို သန့်ရှင်းရေး ပြုလုပ်ပေးသွားခဲ့တာပါ။ဂျပန်အသင်းဟာ အုပ်စုဒုတိယပွဲစဉ်အဖြစ် ကော်စတာရီကာအသင်းနဲ့ ယှဉ်ပြိုင်ရမှာဖြစ်ပြီး အနိုင်ရတာနဲ့ ၁၆ သင်းအဆင့်ကို တက်ရောက်သွားမှာ ဖြစ်ပါတယ်။ဂျာမနီအသင်းကတော့ ကော်စတာရီကာကို ၇ ဂိုး- ဂိုးမရှိနဲ့ ဂိုးပြတ်အနိုင်ရခဲ့တဲ့ စပိန်အသင်းနဲ့ ယှဉ်ပြိုင်ရမှာပါ။

ဂျာမနီနည်းပြ ဟန်ဆီဖလစ်ခ်က “ဒီရှုံးပွဲ၊ အမှတ်သုညနဲ့ ကျနော်တို့ ဖိအားတွေခံနေရပါတယ်။ဒါနဲ့ ပတ်သက်လို့ မေးခွန်းမရှိပါဘူး။ကိုယ့်ကိုယ်ကိုပဲ အပြစ်တင်ရမှာပါ။ဒီရှုံးပွဲကနေ ရုန်းထွက်ပြီး ပြတ်ပြတ်သားသားသေချာအောင် လုပ်ရတော့မယ်” လို့ ပြောခဲ့ပါတယ်။

Source:BBC

CNI Sport News

၂၀၂၂ ခုနှစ်၊ နိုဝင်ဘာ ၂၄

ရော်နယ်ဒိုအနေနဲ့ ယူနိုက်တက်က ထွက်တာကလွဲပြီး တခြားရွေးချယ်စရာမရှိဘူးလို့ အသင်းဖော်ဟောင်း ဝိန်းရွန်နီက ပြောလိုက်ပါတယ်။

ဝိန်းရွန်နီက “ရော်နယ်ဒိုထွက်တာနဲ့ပတ်သက်ပြီး အံအားသင့်မိလားဆိုရင် အံအားမသင့်ပါဘူး။ တခြား ရွေးချယ်စရာမရှိပေမယ့် သူဟာ ကလပ်အတွက် အကောင်းဆုံးပေးဆပ်ခဲ့တဲ့သူဖြစ်လို့ ဒီလိုမျိုးလမ်းခွဲရတာက ရှက်ဖို့ကောင်းပါတယ်။သူဘယ်ပဲသွားသွား အကောင်းဆုံးဖြစ်ပါစေလို့ ကျနော်ဆန္ဒပြုကြောင်း” Sport 18 ကို ပြောခဲ့တာပါ။

ရော်နယ်ဒိုဟာ ပီယာစ်မော်ဂန်နဲ့ ပြုလုပ်ခဲ့တဲ့ သီးသန့်အင်တာဗျူးထွက်ပေါ်လာအပြီးမှာ ယူနိုက်တက်က ကစားသမားနဲ့ ချုပ်ဆိုထားတဲ့ စာချုပ်ကို နှစ်ဦးသဘောတူဖျက်သိမ်းကာ ထွက်ခွာခွင့်ပေးခဲ့တာ ဖြစ်ပါတယ်။ ရော်နယ်ဒိုဟာ စပါးနဲ့ပွဲမှာ လူစားလဲဝင်ဖို့ ငြင်းဆန်ပြီး ဥမင်ထဲတန်းဝင်သွားတဲ့ သူ့ရဲ့အပြုအမူနဲ့ ပတ်သက်ပြီး ပြောခဲ့တဲ့ ဝိန်းရွန်နီကိုလည်း ဒီအင်တာဗျူးမှာ ဝေဖန်ထားတာပါ။

ရော်နယ်ဒိုကတော့ သူဟာ ယူနိုက်တက်နဲ့ ပရိသတ်တွေကို ချစ်ပြီး ဒါက ဘယ်တော့မှ ပြောင်းလဲမယ့်အရာ မဟုတ်ပေမယ့် စိန်ခေါ်မှုအသစ်တွေအတွက် အချိန်ကျရောက်ပြီလို့ ပြောခဲ့ပါတယ်။ရော်နယ်ဒိုဟာ အသင်းဟောင်း စပို့တင်းလစ္စဘွန်းအသင်းကို ပြန်သွားနိုင်တယ်လို့ ထင်ကြေးပေးနေကြပြီး၊ ပရီးမီးယားလိဂ်ကလပ်တွေဖြစ်တဲ့ ချယ်လ်ဆီး၊ နယူးကာဆယ်တို့နဲ့လည်း အသံတွေ ထွက်နေခဲ့တာပါ။

ရော်နယ်ဒိုဟာ ပေါ်တူဂီအသင်းနဲ့ ကမ္ဘာ့ဖလားပြိုင်ပွဲယှဉ်ပြိုင်ပြီးတာနဲ့ အသင်းပြောင်းရွှေ့ဖို့ကို လုပ်ဆောင်မှာ ဖြစ်ပြီး လက်ရှိအချိန်မှာတော့ လက်ရွေးစင်အသင်းအတွက်ပဲ အပြည့်အ၀ အာရုံစိုက်နေတာ ဖြစ်ပါတယ်။ဂါနာ၊ ဥရုဂွေး၊ တောင်ကိုရီးယားတို့နဲ့ ကမ္ဘာ့ဖလားပြိုင်ပွဲမှာ တစ်အုပ်စုတည်းကျရောက်နေတဲ့ ပေါ်တူဂီအသင်းဟာ အုပ်စုအဖွင့်ပွဲအဖြစ် နိုဝင်ဘာလ ၂၄ ရက်မှာ ဂါနာအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ နိုဝင်ဘာ ၂၃

လက်ရှိ ကျင်းပနေတဲ့ ကမ္ဘာ့ဖလားပြိုင်ပွဲကို ပြသဖို့အတွက် ရုပ်သံလွှင့်ခွင့် မဝယ်ယူထားပေမယ့် မြောက်ကိုရီးယား နိုင်ငံမှာ ထုတ်လွှင့်ပြသနေတဲ့ ပုံတွေ အွန်လိုင်းပေါ်မှာ ပျံ့နှံ့လာခဲ့ပါတယ်။

အခုနှစ် ကမ္ဘာ့ဖလားပြိုင်ပွဲကို တနင်္ဂနွေနေ့က စတင်ခဲ့တာဖြစ်ပြီး အီကွေဒေါအသင်းက အိမ်ရှင်ကာတာ အသင်းကို ၂ ဂိုး- ဂိုးမရှိနဲ့ အနိုင်ရရှိခဲ့တာပါ။ မြောက်ကိုရီးယားက Korea Central TV(KCTV)ဟာ ပြိုင်ပွဲအတွက် ရုပ်သံ ထုတ်လွှင့်ခွင့် မဝယ်ယူထားဘဲ ပြသနေတယ်လို့ ဖီကာဖန်တာဆိုတဲ့ တွစ်တာအကောင့်က ဖော်ပြခဲ့တာ ဖြစ်ပါတယ်။

အင်္ဂလန်က အီရန်ကို ၆ ဂိုး- ၂ ဂိုးနဲ့ အနိုင်ရခဲ့တဲ့ပွဲ အပါအဝင် တခြားပွဲတွေရဲ့ ပုံရိပ်တွေကလဲ အွန်လိုင်းပေါ်မှာ ပျံ့နှံ့နေခဲ့တာပါ။

KCTV ကို ပြုံယမ်းကနေ ထုတ်လွှင့်နေတာဖြစ်ပြီး ဝါဒါဖြန့်ချိရေး အစီအစဉ်တွေနဲ့ လွှမ်းမိုးနေပါတယ်။

မြောက်ကိုရီးယားဟာ ကမ္ဘာပေါ်မှာ သက်တမ်းအရှည်ကြာဆုံး အာဏာရှင် နိုင်ငံတွေထဲက တစ်နိုင်ငံဖြစ်ပြီး ကင်မိသားစုရဲ့ မျိုးဆက် ၃ ဆက်ဟာ နိုင်ငံကို ထိန်းချုပ်ထားတာပါ။ မြောက်ကိုရီးယားရဲ့ လက်ရှိခေါင်းဆောင် ကင်ဂျူံအန်းဟာ ယူနိုက်တက်အသင်းရဲ့ အမာခံပရိသတ် ဖြစ်တယ်လို့ သိရပါတယ်။

မြောက်ကိုရီးယားရဲ့ KCTV က ကမ္ဘာ့ဖလားပြိုင်ပွဲ ထုတ်လွှင့်ပြသနေစဉ်

မြောက်ကိုရီးယားဟာ ကမ္ဘာ့ဖလားပြိုင်ပွဲကို ၁၉၆၆ နဲ့ ၂၀၁၀ ခုနှစ်တွေမှာ ဝင်ရောက် ယှဉ်ပြိုင်ထားပြီး ၁၉၆၆ ပြိုင်ပွဲမှာ ကွာတားဖိုင်နယ်အထိ ရောက်ရှိခဲ့တာပါ။

ဖီဖာအကြီးအကဲ အင်ဖန်တီနိုက မြောက်ကိုရီးယားကို ကမ္ဘာ့ဖလားပြိုင်ပွဲ ကျင်းပဖို့ လမ်းဖွင့်ပေးထားတယ်လို့ ပြီးခဲ့တဲ့ အပတ်က ပြောခဲ့ပါတယ်။ ကာတာနိုင်ငံမှာ ကျင်းပနေတဲ့ ကမ္ဘာ့ဖလားပြိုင်ပွဲအပေါ် ဝေဖန်မှုတွေ မြှင့်တက် နေချိန်မှာ အင်ဖန်တီနိုရဲ့ အခုလို ပြောတာက ပိုပြီး ဝေဖန်စရာတွေ ဖြစ်ခဲ့ပါတယ်။

အင်ဖန်တီနိုဟာ မြောက်ကိုရီးယားနိုင်ငံကို သွားရောက်ခဲ့ဖူးပြီး တောင်ကိုရီးယားနဲ့အတူ အမျိုးသမီး ကမ္ဘာ့ဖလား ပြိုင်ပွဲကို ပူးတွဲအိမ်ရှင်အဖြစ် ကျင်းပဖို့ အဆင်သင့် ဖြစ်ပြီလားလို့ မေးမြန်းခဲ့တာ ဖြစ်ပါတယ်။

မြောက်ကိုရီးယား အမျိုးသားဘောလုံးအသင်းဟာ လက်ရှိ ကမ္ဘာ့အဆင့် ၁၁၂ နေရာမှာ ရပ်တည်နေပြီး အမျိုးသမီး အသင်းကတော့ ကမ္ဘာ့အဆင့် ၁၀ နေရာမှာ ရပ်တည်နေတာ ဖြစ်ပါတယ်။

Source: Sportbible

CNI Sport News

၂၀၂၂ ခုနှစ်၊ နိုဝင်ဘာ ၂၃

၂၀၂၂ ကမ္ဘာ့ဖလားပြိုင်ပွဲ အုပ်စုအဖွင့်ပွဲစဉ်မှာ မက်ဆီရဲ့ အာဂျင်တီးနားအသင်းကို ၂ ဂိုး- ၁ ဂိုးနဲ့ အနိုင်ရရှိအောင် ဆော်ဒီအသင်း စွမ်းဆောင်ခဲ့ပြီးနောက် ဘုရင်ဆဲလ်မန်က ဗုဒ္ဓဟူးနေ့ကို အများပြည်သူအားလပ်ရက်အဖြစ် ကြေညာလိုက်ပါတယ်။

ဆော်ဒီနိုင်ငံရဲ့ တရားဝင်တွစ်တာမှာ “ နိုဝင်ဘာလ ၂၃ ရက် ဗုဒ္ဓဟူးနေ့ဟာ နိုင်ငံတော်နဲ့ ပုဂ္ဂလိကကဏ္ဍရှိ ဝန်ထမ်း တွေအားလုံး၊ပညာရေးအတန်းတိုင်းမှာရှိတဲ့ ကျောင်းသား၊ကျောင်းသူတွေအားလုံးအတွက် အားလပ်ရက်အဖြစ် ညွှန်ကြားထားတယ်” လို့ ဖော်ပြထားတာပါ။

ဆော်ဒီအသင်းဟာ ဒီပွဲစဉ်ရဲ့ပထမပိုင်းမှာ မက်ဆီရဲ့ ပင်နယ်တီသွင်းဂိုးနဲ့ အာဂျင်တီးနားအသင်းရဲ့ ဦးဆောင်ခြင်း ခံခဲ့ရတာဖြစ်ပါတယ်။ဒါပေမယ့် ဒုတိယပိုင်းအရောက်မှာ အယ်လ်ရှီဟီရီနဲ့ အယ်လ်ဒေါစာရီတို့က ဆော်ဒီအတွက် ချေပဂိုးနဲ့ အနိုင်ဂိုးတွေသွင်းပေးခဲ့လို့ အာရှကလပ်အတွက် သမိုင်းဝင်နိုင်ပွဲတစ်ပွဲကို ဖော်ဆောင်နိုင်ခဲ့တာပါ။ ဆော်ဒီပရိသတ်တွေဟာ ဒီနိုင်ပွဲကြောင့် အလွန်ပျော်ရွှင်စွာ အောင်ပွဲခံနေကြတာဖြစ်ပါတယ်။

ဒီနိုင်ပွဲဟာ ဆော်ဒီအတွက် ကမ္ဘာ့ဖလားပြိုင်ပွဲသမိုင်းမှာ ၄ ပွဲမြောက်နိုင်ပွဲဖြစ်ခဲ့ပြီး၊ အာဂျင်တီးနားအသင်းရဲ့ ပြိုင်ပွဲစုံ ၃၆ ပွဲဆက်ရှုံးပွဲမရှိစံချိန်ကိုလည်း ရပ်တန့်နိုင်ခဲ့တာပါ။ဆော်ဒီအသင်းဟာ ဂါနာအသင်းပြီးရင် အခု ကမ္ဘာ့ ဖလားပြိုင်ပွဲမှာ ဒုတိယမြောက်ကမ္ဘာ့အဆင့်ရပ်တည်မှုအနိမ့်ဆုံးအသင်းဖြစ်ပါတယ်။ဒါပေမယ့် ချန်ပီယံဖြစ်ဖို့ ရေပန်းစားနေတဲ့ အာဂျင်တီးနားအသင်းကို အံအားသင့်ဖွယ်အနိုင်ရခဲ့တာပါ။

ဆော်ဒီအသင်းနည်းပြ ရီနာတ့်က “ဒါက စာအုပ်တွေထဲမှာ မှတ်သားရမယ့်အရာတစ်ခုဖြစ်ပြီး ဆော်ဒီဘောလုံး သမိုင်းကို ဖန်တီးခဲ့တာပါ။ဒါက အမြဲတမ်းရှိနေတော့မယ့်အရာပါ။ဒါပေမယ့် ကျနော်တို့ အလွန်ခက်ခဲတဲ့ ပွဲ ၂ ပွဲ ကျန်သေးတာကြောင့် ဆက်သွားရဦးမှာပါ” လို့ ပြောခဲ့ပါတယ်။

ဆော်ဒီအသင်းဟာ အုပ်စုဒုတိယပွဲစဉ်အဖြစ် စနေနေ့မှာ ပိုလန်အသင်းနဲ့ ယှဉ်ပြိုင်ရမှာပါ။ပိုလန်အသင်းကတော့ အုပ်စုအဖွင့်ပွဲမှာ မက္ကဆီကိုအသင်းနဲ့ ဂိုးမရှိသရေကျခဲ့ပါတယ်။

Source:Goal