CNI Sport News

၂၀၂၃ ခုနှစ်၊ ဧပြီ ၂၉

ယူနိုက်တက် အကယ်ဒမီထွက်ကစားသမားဖြစ်တဲ့ ဂရင်းဝုဒ်ဟာ အသင်းအတွက် မကစားပေးတော့ဘူးဆိုပြီး သူငယ်ချင်းတွေကို ပြောခဲ့တယ်လို့ သတင်းတွေရဲ့ ဖော်ပြချက်အရ သိရပါတယ်။

ဂရင်းဝုဒ်ဟာ မုဒိမ်းမှုနဲ့ပတ်သက်တဲ့ စွဲချက်တွေအားလုံးကို ဖေဖော်ဝါရီလမှာ ရုပ်သိမ်းပေးခြင်းခံထားရပေမယ့် ယူနိုက်တက်အသင်းကတော့ အသင်းအတွက်ကစားခွင့်ကို ဆိုင်းငံ့ထားပြီး အသင်းအတွင်းပိုင်း စုံစမ်းစစ်ဆေးမှု တွေကို ဆက်လက်လုပ်ဆောင်ခဲ့တာပါ။၂၀၂၂ ခုနှစ်၊ ဇန်နဝါရီလအစောပိုင်းက ဖမ်းဆီးထိန်းသိမ်းခံခဲ့ရတဲ့ ဂရင်းဝုဒ် ဟာ အဲရစ်တန်ဟတ်ရဲ့အသင်းမှာ ပါဝင်နိုင်ဖို့ မျှော်လင့်ခဲ့တာဖြစ်ပါတယ်။

ဒါပေမယ့် အသက် ၂၁ နှစ်အရွယ်ရှိ ကြယ်ပွင့်ကစားသမားဟာ ယူနိုက်တက်အသင်းမှာ တစ်ပတ်လုပ်ခပေါင် ၇၀,၀၀၀ ရရှိနေပေမယ့် အခုအချိန်ထိ အသင်းနဲ့ လေ့ကျင့်ခန်းပြန်ဆင်းခွင့်မရသေးပါဘူး။ဂရင်းဝုဒ်နဲ့ ယူနိုက်တက် တို့ ချုပ်ဆိုထားတဲ့ စာချုပ်ဟာ ၂၀၂၅ နွေရာသီမှာ ကုန်ဆုံးတော့မှာပါ။ဂရင်းဝုဒ်နဲ့နီးစပ်သူတစ်ဦးက ကစားသမား ဟာ ယူနိုက်တက်နဲ့ ပြီးဆုံးသွားပြီလို့ ယုံကြည်နေကြောင်း The Sun ကို ပြောခဲ့တာဖြစ်ပါတယ်။

ဂရင်းဝုဒ်ဟာ ဘောလုံးပြန်ကစားဖို့ကို စိတ်ပိုင်းဖြတ်ထားပေမယ့် ယူနိုက်တက်ဂျာစီကို ထပ်ပြီး ဝတ်ဆင်မှာ မဟုတ်တော့ဘူးလို့ ပြောခဲ့တာပါ။ဂရင်းဝုဒ်ဟာ ယူနိုက်တက်ကစားသမားဘဝကို အမြန်ဆုံး ပြန်လည် ရယူချင်တာ ကြောင့် အသင်းတာဝန်ရှိသူတွေနဲ့ ပြီးခဲ့တဲ့လက ဆွေးနွေးမှုတွေကို ကျယ်ကျယ်ပြန့်ပြန့်ပြုလုပ်ခဲ့တယ်လို့ သိရပါတယ်။

ယူနိုက်တက်အသင်းဟာ အခုအချိန်ထိ ဂရင်းဝုဒ်ကို အသင်းရဲ့လူစာရင်းကနေ ထုတ်ပယ်ထားခြင်းမရှိပေမယ့် အသင်းရဲ့ စီးပွားရေးအကြီးအကဲတွေကတော့ ကစားသမားပြန်လာမှုဟာ ကလပ်ရဲ့ဂုဏ်သတင်းကို ထိခိုက်နိုင်တာ ကြောင့် စိုးရိမ်မှုတွေ ရှိနေကြတာပါ။

ယူနိုက်တက်ဘက်ကတော့ ဂရင်းဝုဒ်နဲ့ ပတ်သက်တဲ့လုပ်ငန်းစဉ်တွေ မပြီးဆုံးမချင်း နောက်ထပ် ဘာမှတ်ချက်မှ ပေးမှာ မဟုတ်ဘူးလို့ ဖေဖော်ဝါရီလက ကြေညာချက်ထုတ်ပြန်ထားပါတယ်။ ၂၀၀၇ ကတည်းက ယူနိုက်တက် လူငယ်အသင်းမှာ ကစားခဲ့တဲ့ ဂရင်းဝုဒ်ဟာ အသင်းကြီးအတွက် ပွဲပေါင်း ၁၂၉ ပွဲ ပါဝင်ကစားခဲ့ပြီး ၃၅ ဂိုး သွင်းယူ ထားတာပါ။ဂရင်းဝုဒ်ဟာ အင်္ဂလန်လက်ရွေးစင်အသင်းအတွက်လည်း ၁ ပွဲ ပါဝင်ကစားထားတာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဧပြီ ၂၉

မန်စီးတီးအသင်း နည်းပြ ဂွာဒီယိုလာက အာဆင်နယ်အသင်း အနေနဲ့ ၇ နှစ်ကြာ ဝေးကွာခဲ့တဲ့ ချန်ပီယံလိဂ် ဝင်ခွင့် ပြန်လည် ရရှိခဲ့တာကြောင့် ပရီးမီးယားလိဂ်မှာ အဆင့် ၂ နဲ့ အဆုံးသတ်ခဲ့ရင် သူတို့အတွက် အောင်မြင်မှုလို့ ပြောခဲ့ပါတယ်။

ဂွာဒီယိုလာက “အာဆင်နယ်က ချန်ပီယံလိဂ် ဝင်ခွင့်ရသွားပါပြီ။ ချန်ပီယံလိဂ်နဲ့ ၆ နှစ်၊ ၇ နှစ်ကြာဝေးပြီးမှ ပြန် လည် ယှဉ်ပြိုင်ရမှာက ဘယ်လောက်ထိ အဓိပ္ပါယ်ရှိလဲဆိုတာ အာဆင်နယ်အသင်း ပိုင်ရှင်တွေကို မေးကြည့်ပါ။ လာမယ့် ရာသီမှာဆိုရင် အာဆင်နယ်အသင်းဟာ ဥရောပရဲ့ အကောင်းဆုံးအသင်းတွေနဲ့ ယှဉ်ပြိုင်ရမယ့် ပြိုင်ပွဲမှာ ပါဝင်ရတော့မှာပါ။ ဒါက သူတို့အတွက် လုံးဝအောင်မြင်မှု တစ်ခုပါပဲ”လို့ ပြောပါတယ်။

မန်စီးတီးအသင်းဟာ ပြီးခဲ့တဲ့ ရက်ပိုင်းက ကစားခဲ့တဲ့ပွဲမှာ အာဆင်နယ်အသင်းကို ၄ ဂိုး- ၁ ဂိုးနဲ့ အနိုင်ရခဲ့ပြီး နောက် ပရီးမီးယားလိဂ် ဆုဖလားကို ရယူနိုင်ဖို့ အခြေအနေ ကောင်းသွားခဲ့တာ ဖြစ်ပါတယ်။

မန်စီးတီးအသင်းဟာ လက်ရှိအချိန်မှာ အာဆင်နယ်အသင်းထက် ၂ မှတ်လျော့ နေပေမယ့် ပွဲကျန် ၂ ပွဲကစားဖို့ ကျန်ရှိနေတာက သူတို့ရဲ့ အားသာချက်အဖြစ် ရှိနေခဲ့တာပါ။

အာဆင်နယ်အသင်းဟာ အခုနှစ်ရာသီ အစောပိုင်းက အမှတ်ပေးဇယား ထိပ်ဆုံးနေရာမှာ ၈ မှတ်အသာနဲ့ ဦးဆောင်နိုင်ခဲ့လို့ ပရီးမီးယားလိဂ်ဖလားကို ၁၉ နှစ်အကြာမှ ပထမဆုံးအကြိမ် ပြန်လည်ရယူနိုင်ဖို့ ရေပန်းစားခဲ့ပါတယ်။

ဒါပေမယ့်လည်း အာဆင်နယ်အသင်းဟာ မန်စီးတီးအသင်းကို အရေးနိမ့်ခဲ့တဲ့ပွဲ အပါအဝင် နောက်ဆုံး ၄ ပွဲဆက် နိုင်ပွဲ ပျောက်ဆုံးပြီးနောက် ရမှတ်ကွာဟမှုတွေ လျော့နည်းလာခဲ့တာ ဖြစ်ပါတယ်။

ဂွာဒီယိုလာကို တွေ့ရစဉ်

အာဆင်နယ်အသင်းဟာ မန်စီးတီးအသင်းကို အရေးနိမ့်ခဲ့ပေမယ့် ၂၀၁၆-၁၇ ရာသီနောက်ပိုင်း ပထမဆုံးအကြိမ် ချန်ပီယံလိဂ် ဝင်ခွင့်ရခဲ့တာကြောင့် ဂွာဒီယိုလာက ဒါကို အာဆင်နယ် အသင်းအနေနဲ့ ပျော်ရွှင်သင့်တယ်လို့ ယုံကြည်နေတာပါ။

ဒါအပြင် ဂွာဒီယိုလာက မန်စီးတီးအနေနဲ့ ချန်ပီယံဖြစ်ချင်ရင် အမှားယွင်းခံလို့ မရဘူးလို့လည်း ပြောခဲ့ပါတယ်။

ဂွာဒီယိုလာက “လူတွေက ဒီပြိုင်ပွဲပြီးဆုံးသွားပြီ၊ မပြီးဆုံးသေးဘူးဆိုပြီး ပြောနေကြပေမယ့် ကျနော်တို့ ကစားဖို့ ၇ ပွဲ ကျန်ပါသေးတယ်။ ကျနော်တို့ အီးမရိတ်စ်ကွင်းမှာ အနိုင်ရပြီးချိန်မှာ နော်တင်ဟမ်ဖောရက်စ်နဲ့ ကွင်းဆီသွားပြီး သရေတစ်မှတ်သာ ရခဲ့ပါတယ်။ အခုအချိန်မှာ ကျနော်တို့ဟာ အလွန်ဖွဲ့စည်းမှုကောင်းတဲ့ ဖူလ်ဟမ်အသင်း အိမ်ကွင်းမှာ သွားရောက် ကစားရမှာပါ။ အဲဒါကြောင့် ကျနော်တို့အတွက် ဘယ်လိုအရာကိုမှ ခွင့်ပြုချက် မရှိပါဘူး။ ကျနော်တို့ဟာ ချန်ပီယံဆုရအောင် ကြိုးစားဖို့ ဒီမှာရှိနေတာပါ။ ကျနော်တို့ဟာ အရှိန်အဟုန်ကောင်းနေသလို ခံစားချက်တွေကလည်း ကောင်းနေပေမယ့် ထပ်ပြီး သက်သေပြရပါမယ်”လို့ ပြောသွားပါတယ်။

မန်စီးတီးအသင်းဟာ အခုနှစ်ရာသီမှာ ပရီးမီးယားလိဂ်၊ အက်ဖ်အေဖလားနဲ့ ချန်ပီယံလိဂ်ဖလား ရယူနိုင်မယ့် လမ်းကြောင်းပေါ်မှာ ရှိနေတာဖြစ်ပြီး အသင်းဘက်က ဆုဖလားအားလုံး ရယူနိုင်ဖို့ ပစ်မှတ်ထားနေတာ ဖြစ်ပါတယ်။

Source: Metro

CNI Sport News

၂၀၂၃ ခုနှစ်၊ ဧပြီ ၂၉

ကာတာဘဏ်လုပ်ငန်းရှင် ရှိတ်ဂျာဆင်မ်နဲ့ ဗြိတိန်ဘီလျံနာ ရက်ကလစ်ဖ်တို့ဟာ ယူနိုက်တက်အသင်းကို ဝယ်ယူဖို့အတွက် သူတို့ရဲ့ တတိယနဲ့ နောက်ဆုံးအကြိမ်လေလံတင်သွင်းမှုကို ဧပြီလ ၂၈ ရက်က ပြုလုပ် သွားခဲ့ပါတယ်။

ရှိတ်ဂျာဆင်မ်နဲ့ ရက်ကလစ်ဖ်တို့နှစ်ဦးဟာ ဂလေဇာမိသားစုဆီကနေ ပရီးမီးယားလိဂ်ကလပ်ကို ဝယ်ယူနိုင်ဖို့ အတွက် အဓိကပြိုင်ဘက်တွေအဖြစ် ရှိလာပြီးနောက် အပြိုင်အဆိုင် လေလံတင်သွင်းကမ်းလှမ်းမှုတွေ ပြုလုပ် လာခဲ့ကြတာပါ။ရှိတ်ဂျာဆင်မ်ရဲ့ နောက်ဆုံးကမ်းလှမ်းမှုဟာ ပေါင် ၅ ဘီလီယံကျော်ရှိတယ်လို့ သတင်း တွေမှာ ဖော်ပြထားပေမယ့် ရက်ကလစ်ဖ်ရဲ့ နောက်ဆုံးကမ်းလှမ်းမှု ပမာဏကိုတော့ မသိရသေးပါဘူး။ သူတို့နှစ်ဦးဟာ တတိယအကြိမ်လေလံတင်သွင်းဖို့ နောက်ဆုံးသတ်မှတ်ထားတဲ့ သောကြာနေ့မှာ အောင်မြင်စွာ တင်သွင်းနိုင်ခဲ့တာပါ။

ကာတာဘဏ်လုပ်ငန်းရှင်ဖြစ်တဲ့ ရှိတ်ဂျာဆင်မ်ဟာ ယူနိုက်တက်အသင်းကို ၁၀၀ ရာခိုင်နှုန်းရယူချင်ပြီး သူဟာ အသင်းအတွက် အပြောင်းအရွှေ့တွေနဲ့ အခြေခံအဆောက်အဦတွေအတွက် ငွေကြေးအများအပြားသုံးစွဲမယ်လို့ ကတိပြုထားကြောင်း သတင်းရင်းမြစ်တွေက ဖော်ပြထားပါတယ်။ရှိတ်ဂျာဆင်မ်ဟာ ယူနိုက်တက်အသင်းရဲ့ ခေတ်မမီတော့တဲ့ အိုးထရက်ဖိုဒ့်ကွင်းကို ပြန်လည်ပြင်ဆင်ခြင်း ဒါမှမဟုတ် အသစ်တည်ဆောက်တာနဲ့ ကလပ် ရဲ့လေ့ကျင့်ရေးအဆောက်အဦတွေကို ပြုပြင်မွမ်းမံတာတွေပါ ပြုလုပ်ပေးသွားမယ်လို့ ကတိပြုထားတာပါ။

ဒါ့အပြင် ရှိတ်ဂျာဆင်မ်ဟာ အသင်းရဲ့ ကြွေးမြီ အမေရိကန်ဒေါ်လာသန်း ၆၂၀ ကိုလည်း ကင်းစင်သွားအောင် လုပ်ပေးမယ်လို့ ပြောထားတာဖြစ်ပါတယ်။ပြီးခဲ့တဲ့နှစ်က ချယ်လ်ဆီးအသင်းကို ဝယ်ယူဖို့ မအောင်မြင်ခဲ့တဲ့ ယူနိုက်တက်အသင်းရဲ့ အမာခံပရိသတ် ရက်ကလစ်ဖ်ဟာ အသင်းရဲ့ ရှယ်ယာ ၅၀ ရာခိုင်နှုန်းကျော်ကို ဝယ်ယူ ချင်နေတယ်လို့ သတင်းတွေမှာ ဖော်ပြထားတာပါ။ရက်ကလစ်ဖ်ရဲ့ ဝယ်ယူမှုမှာ အေဗရန်နဲ့ ဂျိုရယ်လ် ဂလေဇာ တို့က ရှယ်ယာ ၂၀ ရာခိုင်နှုန်းကျော်နဲ့ အသင်းရဲ့ အစုရှယ်ယာရှင်အဖြစ် ဆက်ရှိမှာဖြစ်လို့ ယူနိုက်တက် ပရိသတ် တွေကြားမှာ စိုးရိမ်မှုတွေမြင့်တက်နေတာဖြစ်ပါတယ်။

ဂလေဇာမိသားစုဟာ ယူနိုက်တက်အသင်းကို အားကစားကလပ်တစ်ခုအတွက် ကမ္ဘာ့စံချိန်တင်ကြေးဖြစ်တဲ့ ပေါင် ၆ ဘီလီယံအထိ ရရှိချင်နေတာဖြစ်ပါတယ်။ယူနိုက်တက်ပရိသတ်တွေကတော့ အသင်းအတွက် ရင်းနှီးမြုပ်နှံမှု အသစ်လိုအပ်တာကြောင့် ဂလေဇာမိသားစုဆီကနေ ပိုင်ရှင်အသစ်အမြန်ဆုံး လွှဲပြောင်းရယူတာကို လိုချင်နေကြ တာပါ။ယူနိုက်တက်ပရိသတ်တွေဟာ အိုးထရက်ဖိုဒ့်မှာ ကစားမယ့် အက်စတွန်ဗီလာအသင်းနဲ့ပွဲမှာ ဂလေဇာ မိသားစုကို ဆန္ဒပြမှုတွေပြုလုပ်ဖို့ စီစဉ်နေတယ်လို့ သိရပါတယ်။

ယူနိုက်တက်အသင်းဟာ အခုနှစ်ရာသီမှာ ကာရာဘောင်းဖလားရယူထားပြီး ၆ နှစ်ကြာဆုဖလားလက်မဲ့ဖြစ်တာကို အဆုံးသတ်နိုင်ခဲ့သလို ဇွန်လ ၃ ရက်မှာ မန်စီးတီးအသင်းနဲ့ အက်ဖ်အေဖလားဗိုလ်လုပွဲ ယှဉ်ပြိုင်ရမှာဖြစ်ပါတယ်။

Source:ChannelNewsAsia

CNI Sport News

၂၀၂၃ ခုနှစ်၊ ဧပြီ ၂၈

ယူနိုက်တက်အသင်းဟာ အာဂျင်တီးနားမှာ ကျင်းပမယ့် ယူ-၂၀ ကမ္ဘာ့ဖလားပြိုင်ပွဲမှာ ပါဝင်ယှဉ်ပြိုင်ဖို့ ဂါနာချိုရဲ့ တောင်းဆိုမှုကို ပယ်ချခဲ့ပါတယ်။

အသက် ၁၈ နှစ်အရွယ်ရှိ ဂါနာချိုဟာ မေလ ၃၀ ရက်ကနေ ဇွန်လ ၁၁ ရက်အထိ ကျင်းပမယ့် ဒီပြိုင်ပွဲမှာ အာဂျင်တီးနားအတွက် ကိုယ်စားပြုပြီး ယှဉ်ပြိုင်ချင်လို့ နည်းပြ အဲရစ်တန်ဟတ်ထံ တောင်းဆိုထားခဲ့တာပါ။

ဂါနာချိုက အာဂျင်တီးနားဂျာစီနဲ့ သူ့ရဲ့ ဇာတ်လမ်းကို ရေးချင်တာကြောင့် နည်းပြထံ တောင်းဆိုခဲ့ပြီး ဒီပြိုင်ပွဲမှာ ပါဝင် ယှဉ်ပြိုင်ချင်တယ်ဆိုတာကို ရှင်းရှင်းလင်းလင်း အသိပေးခဲ့တာ ဖြစ်ပါတယ်။

ဂါနာချို အနေနဲ့ ယူ-၂၀ ကမ္ဘာ့ဖလားပြိုင်ပွဲမှာ ပါဝင်ခဲ့ရင် မန်စီးတီးနဲ့ ကစားမယ့် အက်ဖ်အေဖလား ဗိုလ်လုပွဲမှာ ယူနိုက်တက်အတွက် ပါဝင်နိုင်မှာ မဟုတ်ပါဘူး။

မန်စီးတီးနဲ့ ယူနိုက်တက်တို့ရဲ့ ဗိုလ်လုပွဲကို ဇွန်လ ၃ ရက် ဝင်ဘာလေကွင်းမှာ ကျင်းပသွားဖို့ စီစဉ်ထားတာပါ။

အာဂျင်တီးနား ကစားသမားဟာ မကြာသေးခင်ကမှ ခြေကျင်းဝတ် ဒဏ်ရာကနေ ပြန်လည် ကောင်းမွန်လာခဲ့ပြီး နည်းပြ အဲရစ်တန်ဟတ်အတွက် တိုက်စစ် ကစားသမား ရွေးချယ်ခွင့် ပိုမိုရှိလာခဲ့တာ ဖြစ်ပါတယ်။

ဂါနာချိုကိုတွေ့ရစဉ်

အဲဒါကြောင့်လည်း ယူနိုက်တက် အသင်းဘက်က ဂါနာချိုရဲ့ တောင်းဆိုမှုကို ပယ်ချခဲ့တာ ဖြစ်ပါတယ်။

အာဂျင်တီးနား အသင်းကတော့ ဂါနာချို ပါဝင်မယ်ဆိုရင် သူတို့ရဲ့ အောင်မြင်မှု အခွင့်အလမ်းတွေအတွက် ကြီးမားတဲ့ တွန်းအားပေးမှု ဖြစ်နိုင်တာကြောင့် ယူနိုက်တက် ကစားသမားကို အသင်းရဲ့ လူစာရင်းမှာ ထည့်သွင်းဖို့ စိတ်အား ထက်သန်နေတာပါ။

အာဂျင်တီးနား အသင်းဟာ အစောပိုင်းက ယူ-၂၀ ကမ္ဘာ့ဖလားပြိုင်ပွဲအတွက် ခြေစစ်ပွဲ အောင်မြင်ခဲ့ခြင်း မရှိပေ မယ့် ပြီးခဲ့တဲ့လက အင်ဒိုနီးရှားနေရာမှာ အိမ်ရှင်အဖြစ် အစားထိုးဝင်ခဲ့ရလို့ ပြိုင်ပွဲယှဉ်ပြိုင်ခွင့် ရခဲ့တာ ဖြစ်ပါတယ်။

ဂါနာချိုဟာ ဒီရာသီမှာ ယူနိုက်တက် အသင်းအတွက် ၂၉ ပွဲ ပါဝင်ကစားထားတာမှာ ၄ ဂိုး သွင်းယူထားပေမယ့် ခြေကျင်းဝတ်ဒဏ်ရာကြောင့် မတ်လကတည်းက အသင်းအတွက် ပါဝင်ကစားနိုင်ခြင်း မရှိတာပါ။

ဂါနာချိုဟာ သူဟာ ကြံ့ခိုင်မှု ပြန်လည် ပြည့်ဝဖို့ နီးစပ်နေပြီလို့ မကြာသေးခင်က အင်စတာဂရမ်မှာ ပို့စ်တင်ကာ ဖော်ပြခဲ့ပါတယ်။

ယူနိုက်တက် အသင်းနည်းပြ အဲရစ်တန်ဟတ်က အခုနှစ်ရာသီ မကုန်ခင်မှာ ဂါနာချို အသင်းအတွက် ပါဝင် ကစား ပေးနိုင်ဖို့ မျှော်လင့်နေတာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဧပြီ ၂၈

မြန်မာ ယူ-၂၂ အသင်းနည်းပြချုပ် မိုက်ကယ်က ကမ္ဘောဒီးယားနိုင်ငံက အိမ်ရှင်အဖြစ် ကျင်းပမယ့် ၃၂ ကြိမ်မြောက် ဆီးဂိမ်းစ် အမျိုးသား ဘောလုံးပြိုင်ပွဲရဲ့ ပွဲကြို သတင်းစာ ရှင်းလင်းပွဲမှာ အသင်းကို ယုံကြည်မှုထားပြီး ရမှတ်တွေ ရနိုင်သမျှယူထားချင်တယ်လို့ ပြောလိုက်ပါတယ်။

မိုက်ကယ်က “ကျနော်တို့အသင်းမှာ ပြီးခဲ့တဲ့ ဆီးဂိမ်းစ် အတွေ့အကြုံရှိ ကစားသမားက နည်းနည်းလေးပဲရှိ ပါတယ်။ အများစုကတော့ ပထမဆုံးအကြိမ်အဖြစ် ဆီးဂိမ်းစ် ကစားကြမယ့် သူတွေပါ။ ကျနော်တို့အတွက်တော့ တစ်သင်းချင်းစီ၊ တစ်ပွဲချင်းစီကိုပဲ ပစ်မှတ်ထားပြီး ပြိုင်ပွဲကို သေသေချာချာ ယှဉ်ပြိုင်ကြသွားမှာပါ။ နည်းပြတစ်ဦး အနေနဲ့ကတော့ ကိုယ့် ကစားသမားတွေအပေါ်ကို ယုံကြည်ထားပါတယ်။ တချို့ပွဲတွေမှာ အမှတ်ရဖို့ အခွင့်အရေးရှိ မယ်၊ တချို့ပွဲတွေမှာ ပြိုင်ဘက်ဆီက အမှတ်ရဖို့ ပိုမိုခက်ခဲတာ ရှိမယ်။ ဒါပေမယ့် ပထမဆုံးက အသင်းကို ယုံကြည် မှုထားပြီး ကျနော်တို့ ရနိုင်သမျှ ရမှတ်တွေ ယူထားချင်ပါတယ်”လို့ ပြောခဲ့တာပါ။

မြန်မာ ယူ-၂၂ အသင်း လေ့ကျင့်နေစဉ်

မြန်မာအသင်းဟာ ဒီပြိုင်ပွဲရဲ့ အုပ်စု A မှာ အိမ်ရှင် ကမ္ဘောဒီးယား၊ အင်ဒိုနီးရှား၊ ဖိလစ်ပိုင်၊ တီမောတို့နဲ့ တစ်အုပ်စု တည်း ကျရောက်နေတာဖြစ်ပြီး အုပ်စုအဖွင့် ပွဲစဉ်အဖြစ် မေလ ၂ ရက် မြန်မာစံတော်ချိန် ၃ နာရီခွဲမှာ တီမော အသင်းနဲ့ ယှဉ်ပြိုင်သွားမှာ ဖြစ်ပါတယ်။

မိုက်ကယ်က “ပြိုင်ဘက်အသင်းတွေ၊ နည်းပြတွေကိုလည်း ကျနော်တို့ လေးစား ရပါလိမ့်မယ်။ အုပ်စု A မှာ ပါဝင် ခွင့်ရတာကို အင်မတန် စိတ်လှုပ်ရှား မိပါတယ်။ အိမ်ရှင်အသင်းလည်း အုပ်စုမှာ ပါနေတဲ့အတွက် ပရိသတ်တွေ တကယ့်ကို ကွင်းအပြည့် လာရောက် အားပေးကြမှာ ဖြစ်သလို သူတို့ကို ဖျော်ဖြေမှု ပေးချင်တာကလည်း ကျနော် တို့ ရည်မှန်းချက်တစ်ခုပဲ”လို့ မီဒီယာတွေရဲ့ မေးမြန်းမှုကို ဖြေခဲ့တာပါ။

မြန်မာ ယူ-၂၂ အသင်းဟာ ဆီးဂိမ်းစ် ပြိုင်ပွဲမတိုင်ခင်က ထိုင်းနိုင်ငံမှာ သွားရောက် စခန်းသွင်း လေ့ကျင့်ပြီး ခြေစမ်းပွဲတွေ ယှဉ်ပြိုင် ကစားခဲ့တာ ဖြစ်ပါတယ်။

မြန်မာအမျိုးသား ဘောလုံးအသင်းဟာ ပြီးခဲ့တဲ့နှစ်က ဗီယက်နမ်မှာ ကျင်းပခဲ့တဲ့ ဆီးဂိမ်းစ်ပြိုင်ပွဲမှာ အုပ်စုကနေ ထွက်ခွာခဲ့ရတာ ဖြစ်ပါတယ်။

CNI Sport News

၂၀၂၃ ခုနှစ်၊ ဧပြီ ၂၈

အဲဗာတန်အသင်းဟာ နယူးကာဆယ်အသင်းကို အိမ်ကွင်းမှာ အရေးနိမ့်ပြီး တန်းဆင်းဇုန်ထဲ ကျရောက်နေပေမယ့် ပရီးမီးယားလိဂ်မှာ ဆက်ပြီး ရှိနိုင်မယ်ဆိုတာ ယုံကြည်တယ်လို့ နည်းပြဖြစ်သူ ရှောင်ဒိုက်က ပြောခဲ့ပါတယ်။

ရှောင်ဒိုက်က “ကျနော်တို့ ပရီးမီးယားလိဂ်မှာ ဆက်ရှိအောင် လုပ်နိုင်မယ်လို့ ထင်ပါတယ်။ အာဆင်နယ်ကို အနိုင် ယူခဲ့တုန်းကလည်း ဒီလို အလားတူပါပဲ။ အဲဒါကြောင့် ကျနော်တို့ လုပ်လို့ရတဲ့ အထောက်အထားတွေ ရှိပါတယ်။

ပထမပိုင်းမှာ ကျနော်တို့ဟာ အလွန်ကောင်းမွန်တဲ့ စွမ်းဆောင်ရည်တွေကို ရခဲ့ပါတယ်။ သွင်းဂိုးဟာ ပွဲတွေကို ပြောင်းလဲနိုင်ပါတယ်။ ရလဒ်တွေတင် မဟုတ်ဘဲ စွမ်းဆောင်ရည်ရဲ့ ခံစားချက်ကိုပါ အပြောင်းအလဲ ဖြစ်ပါတယ်။ ကျနော်တို့ဟာ စွမ်းဆောင်ရည် တစ်ခုလုံးကိုတော့ ပြောင်းလဲခွင့် မပြုနိုင်ပါဘူး”လို့ ပြောခဲ့တာပါ။

အဲဗာတန်အသင်းဟာ နယူးကာဆယ်အသင်းကို ၄ ဂိုး- ၁ ဂိုးနဲ့ အရေးနိမ့်ခဲ့တာကြောင့် တန်းဆင်းဇုန် အထက်က အသင်းနဲ့ ၂ မှတ်အကွာ အမှတ်ပေးဇယားအဆင့် ၁၉ နေရာမှာ ရပ်တည်နေတာ ဖြစ်ပါတယ်။

အဲဗာတန်အသင်းဟာ နောက်ဆုံး ကစားခဲ့တဲ့ ၁၀ ပွဲမှာ ၁ ပွဲသာ အနိုင်ရထားတဲ့အထိ ရလဒ်တွေ ဆိုးနေပြီး ပရီးမီးယားလိဂ်ကနေ တန်းဆင်းသွားမယ့် အန္တရာယ်မှာ ကျရောက်နေတာပါ။

အဲဗာတန်နဲ့ နယူးကာဆယ်အသင်း ယှဉ်ပြိုင်နေစဉ်

အဲဗာတန်အသင်း နည်းပြအဖြစ် ဇန်နဝါရီလက လမ်းပတ်နေရာမှာ အစားထိုးဝင်ခဲ့တဲ့ ရှောင်ဒိုက်ဟာ ပွဲဦးထွက် ပွဲမှာ အာဆင်နယ်အသင်းကို အနိုင်ရအောင် ကိုင်တွယ်နိုင်ခဲ့ပေမယ့် နောက်ပိုင်းပွဲတွေမှာ ရလဒ်တွေ ဆိုးနေခဲ့တာ ဖြစ်ပါတယ်။

ရှောင်ဒိုက်က “ပြီးခဲ့တဲ့ ရက်သတ္တပတ်က ကျနော်တို့ လုပ်ခဲ့တဲ့ အမှားတွေကို ပြင်ရပါမယ်။ ကစားသမားတွေဘက် ကလည်း ဒါကို ပြောင်းလဲနိုင်ဖို့အတွက် လမ်းကြောင်းမှန်ပေါ် ရောက်အောင် ကြိုးစားနေပါတယ်။ အဲဗာတန်ရဲ့ အခြေအနေကို အများကြီး ပြုပြင်ပေးရမယ်ဆိုတာက ထင်ရှားပါတယ်။ ခင်ဗျားတို့ရဲ့ အကောင်းဆုံး ခံစစ်ပုံစံက မကြာခဏဆိုသလို တိုက်စစ်ဆင်တာပါ။ ဒါပေမယ့် ဒီလို အခိုက်တန့်မျိုးကို ကျနော်တို့ ရှာမတွေ့သေးပါဘူး”လို့ ပြောခဲ့တာပါ။

ဒီပွဲမှာ အဲဗာတန်အသင်း ပရိသတ်တွေဟာ ပွဲမစခင်မှာ အသင်းကို အကောင်းမွန်ဆုံး ကြိုဆိုမှုတွေ ပြုလုပ်ခဲ့ကြ ပေမယ့် အသင်းရဲ့ ဆိုးရွားတဲ့ ရလဒ်ကြောင့် ပရိသတ်တွေဟာ ပွဲမပြီးခင်မှာ ကွင်းထဲကနေ ထွက်ခွာသွားခဲ့ ကြပါတယ်။

ရှောင်ဒိုက်ကတော့ ပရိသတ်တွေဟာ ရာသီအကုန်ထိ သူတို့ကို ထောက်ခံ အားပေးမှုတွေ ပြုလုပ်သွားကြမှာပါလို့ ပြောခဲ့ပါတယ်။

အဲဗာတန်အသင်းဟာ အခုလာမယ့် ပရီးမီးယားလိဂ် ပွဲစဉ်အဖြစ် တန်းဆင်းဇုန်အဆင့် ၁၈ နေရာမှာ ရှိနေတဲ့ လက်စတာအသင်းနဲ့ အဝေးကွင်းပွဲစဉ် ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဧပြီ ၂၈

စပါးအသင်း တောင်ပံကစားသမား ဆွန်ဟောင်မင်ဟာ ယူနိုက်တက်အသင်းနဲ့ ၂ ဂိုးစီ သရေကျခဲ့တဲ့ ပရီးမီးယား လိဂ်ပွဲမှာ အနိုင် ၃ မှတ် မရခဲ့တဲ့အတွက် မပျော်ရွှင်ဘူးလို့ ပြောခဲ့ပါတယ်။

ဆွန်ဟောင်မင်က “ကျနော်တို့ဟာ ပထမပိုင်းမှာ ၂ ဂိုး- ဂိုးမရှိနဲ့ အရေးနိမ့်ဖို့ မထိုက်တန်ပါဘူး။ ဒါကို အလွန် ဒေါသ ထွက် ပါတယ်။ ပြီးခဲ့တဲ့အပတ်က အဖြစ်အပျက်ကို လက်မခံသလို ဒီလိုမျိုးလည်း ထပ်ပြီး အဖြစ် မခံနိုင်ပါဘူး။ ဒီနေ့မှာတော့ ကျနော်တို့ဟာ အလွန်ကောင်းမွန်တဲ့ စွမ်းအင်တွေကို ယူဆောင်လာချင်ပါတယ်။ ပရိသတ်တွေရဲ့ အားပေးမှုကို ကျနော် တန်ဖိုးထားပြီး သူတို့ဟာ ကျနော်တို့နဲ့ တိုက်ပွဲဝင်ခဲ့ကြပါတယ်။ ယူနိုက်တက်နဲ့ပွဲမှာ ကျနော် တို့ဟာ အလွန်ကောင်းမွန်စွာ ကစားခဲ့ကြပြီး ဂိုးသွင်းဖို့လည်း အခွင့်အရေးတွေ ရခဲ့ပေမယ့် ဒါကို အရ မယူ နိုင်ခဲ့ပါ ဘူး။ ဒုတိယပိုင်းမှာ အလွန်ကောင်းမွန်တဲ့ စရိုက်လက္ခဏာတွေကို ပြသခဲ့ပေမယ့် ၃ မှတ် မရခဲ့လို့ မပျော်ရွှင်ဘူး” လို့ BT Sport ကို ပြောခဲ့တာပါ။

စပါးအသင်းဟာ ယူနိုက်တက်အသင်းနဲ့ ပွဲစဉ်မှာ ဆန်ချို၊ ရက်ရှ်ဖို့ဒ်တို့ရဲ့ သွင်းဂိုးတွေကြောင့် ပထမပိုင်းမှာ ၂ ဂိုး- ဂိုးမရှိနဲ့ အရေးနိမ့်ခဲ့ပေမယ့် ဒုတိယပိုင်းမှာ ပေါ်ရိုနဲ့ ဆွန်ဟောင်မင်တို့က ချေပဂိုးတွေ ပြန်သွင်းပေးခဲ့လို့ ၂ ဂိုးစီ သရေရလဒ်နဲ့ ပွဲပြီးဆုံးခဲ့တာ ဖြစ်ပါတယ်။

စပါးနဲ့ ယူနိုက်တက် ယှဉ်ပြိုင်နေစဉ်

စပါးအသင်းဟာ ပြီးခဲ့တဲ့အပတ်က ကစားခဲ့တဲ့ပွဲစဉ်မှာ နယူးကာဆယ် အသင်းကို ၆ ဂိုး- ၁ ဂိုးနဲ့ ဂိုးပြတ် အရေးနိမ့် ပြီးနောက် ယာယီနည်းပြ စတယ်လီနီကို ထုတ်ပယ်ကာ ကစားသမားဟောင်း ရိုင်ယန်မေဆင်ကို ယာယီနည်းပြ အဖြစ် ပြန်လည် ခန့်အပ်ခဲ့တာပါ။

စပါးအသင်းကို ယာယီနည်းပြအဖြစ် ဒုတိယအကြိမ် ကိုင်တွယ်တဲ့ ရိုင်ယန်မေဆင် လက်ထက်မှာတော့ အသင်း ဟာ ရှုံးပွဲဆက်နေတာကို ရပ်တန့်ပြီး ၁ မှတ် ရယူနိုင်ခဲ့တာ ဖြစ်ပါတယ်။

ရိုင်ယန်မေဆင်က ယူနိုက်တက်နဲ့ ပွဲစဉ်က စပါးအသင်းရဲ့ စွမ်းဆောင်ရည်ကို ချီးကျူးခဲ့ပြီး သူ့မှာ တိုက်ပွဲဝင်ချင်တဲ့ အသင်းတစ်သင်း ရှိတယ်လို့ ပြောခဲ့တာပါ။

ရိုင်ယန်မေဆင်က “ကျနော် အလွန်ပျော်ပါတယ်။ ဒီပွဲမှာ ဒီထက်ပိုပြီး ဂိုးတွေ သွင်းယူနိုင်မယ်လို့ ကျနော် ထင်ခဲ့ တာပါ။ တုံ့ပြန်မှုက အသင်းအတွက် အရေးကြီးဆုံးပါပဲ။ ဘောလုံးမှာ အနိုင်၊ အရှုံးနဲ့ သရေဆိုတာ ရှိပေမယ့် အရေး ကြီးဆုံးက ကျနော်တို့ အချင်းချင်း စည်းစည်းလုံးလုံးနဲ့ စုပေါင်းပြီး အသင်းလိုက်လုပ်ဆောင်ဖို့ပါ။ ကျနော်တို့မှာ တိုက်ပွဲဝင်လိုတဲ့ အသင်းတစ်သင်း ရှိပါတယ်”လို့ ပြောခဲ့ပါတယ်။

စပါးအသင်းဟာ ဒီပွဲသရေ ရလဒ်ကြောင့် လီဗာပူးလ်၊ အက်စတွန်ဗီလာတို့ရဲ့ အထက် အဆင့် ၅ နေရာကို ပြန်လည် ရောက်ရှိလာခဲ့ပြီး အဆင့် ၄ နေရာက ယူနိုက်တက်အသင်းနဲ့ ၆ မှတ်ကွာဟနေတာပါ။

စပါးအသင်းဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် လီဗာပူးလ်အသင်း အိမ်ကွင်းမှာ သွားရောက် ယှဉ်ပြိုင်ရ မှာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဧပြီ ၂၇

ချယ်လ်ဆီးအသင်း ကြယ်ပွင့်ဟောင်း ဖရန့်လီဘော့ဖ်က လမ်းပတ်ကို ယာယီနည်းပြ အဖြစ်ကနေ နှုတ်ထွက်ဖို့ တိုက်တွန်းခဲ့ပြီး လမ်းပတ်အနေနဲ့ ရာသီအကုန်ထိ တစ်ပွဲမှ အနိုင်မရနိုင်ဘူးလို့ သတိပေးခဲ့ပါတယ်။

ဖရန့်လီဘော့ဖ်က “ခင်ဗျားတို့ သိသလောက် ကျနော်ပြောပြီးပါပြီ။ ကျနော့်မှာ ပြောစရာ ဘာမှမရှိတော့ပါဘူး။ ဖြစ်နိုင်တယ်ဆိုရင် လမ်းပတ်အနေနဲ့ ထွက်သွားပါ။ အမြန်ဆုံး ထွက်သွားလိုက်ပါ။ သူတို့အနိုင်ရဖို့ လိုအပ်ပါတယ်။ တစ်ပွဲ အနိုင်ရမှဖြစ်မယ်။ ဒီ ၃ မှတ်က အသင်း တန်းမဆင်းရဖို့အတွက် သေချာစေမှာပါ”လို့ ESPN ကို ပြောခဲ့တာပါ။

ချယ်လ်ဆီးအသင်းဟာ ဂရေဟမ်ပေါ်တာကို ထုတ်ပယ်ပြီးနောက် အသင်းရဲ့ ကစားသမားဟောင်းနဲ့ နည်းပြ ဟောင်းဖြစ်တဲ့ လမ်းပတ်ကို ရာသီအကုန်ထိ ယာယီနည်းပြအဖြစ် ခန့်အပ်ခဲ့တာ ဖြစ်ပါတယ်။

လမ်းပတ်ရဲ့ လက်ထက်မှာ ချယ်လ်ဆီးအသင်းဟာ ရလဒ်တွေ ဆက်တိုက် ဆိုးနေပြီး သူကိုင်တွယ်ထားတဲ့ ၅ ပွဲစလုံး အရေးနိမ့်ခဲ့တာပါ။ အဲဒါကြောင့် လမ်းပတ်ဟာ ချယ်လ်ဆီးအသင်းရဲ့ အဆိုးရွားဆုံး နည်းပြလို့တောင် သတ်မှတ်ခံနေရတာ ဖြစ်ပါတယ်။

ချယ်လ်ဆီးကစားကိုတွေ့ရစဉ်

ချယ်လ်ဆီးအသင်းဟာ ပရီးမီးယားလိဂ် ပြိုင်ပွဲမှာ အဆင့် ၁၁ နေရာ ရပ်တည်နေပြီး ပွဲကစားဖို့ ၆ ပွဲ ကျန်ရှိ နေသေးပေမယ့် တန်းဆင်းဇုန် အဆင့် ၁၈ နေရာက လက်စတာအသင်းနဲ့ ၁၀ မှတ် ကွာဟနေတာပါ။

အဲဒါကြောင့် ချယ်လ်ဆီးအသင်းဟာ သင်္ချာနည်းအရတော့ ပရီးမီးယားလိဂ် ပြိုင်ပွဲကနေ တန်းဆင်းနိုင်တဲ့ အလားအလာရှိနေလို့ ကစားသမားဟောင်း ဖရန့်လီဘော့ဖ်က လမ်းပတ်ကို လက်ရှိ ရာထူးကနေ ထွက်ခွာသွားဖို့ ပြောခဲ့တာ ဖြစ်ပါတယ်။

လမ်းပတ်ဟာ စတမ်းဖို့ဘရစ်ချ်မှာ ဘရန်ဖို့ဒ်အသင်းကို အရေးနိမ့်တဲ့ပွဲအပြီး ပရိသတ်တွေရဲ့ လှောင်ပြောင်မှုကို ခံခဲ့ရပေမယ့် အင်္ဂလန် ကစားသမားဟောင်းက ဒါကို နားလည်တယ်လို့ ပြောခဲ့တာပါ။

လန်ဒန်ကလပ်ဟာ ပိုချက်တီနိုကို နည်းပြသစ်အဖြစ် ခန့်အပ်ဖို့ လုပ်ဆောင်နေပေမယ့် လမ်းပတ်ကတော့ အခု ရာသီအကုန်ထိ အသင်းကို ယာယီနည်းပြအဖြစ် ကိုင်တွယ်ရဦးမှာ ဖြစ်ပါတယ်။

ချယ်လ်ဆီးအသင်းဟာ ပရီးမီးယားလိဂ် လက်ကျန်ပွဲစဉ်တွေအဖြစ် အာဆင်နယ်၊ ယူနိုက်တက်၊ မန်စီးတီး၊ နယူးကာဆယ်တို့နဲ့ တွေ့ဆုံရမယ့် ပွဲစဉ်တွေ ပါဝင်နေတာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဧပြီ ၂၇

ပြီးခဲ့တဲ့ တနင်္ဂနွေနေ့က လန်ဒန်မာရသွန်ပြိုင်ပွဲမှာ ပါဝင်ယှဉ်ပြိုင်ခဲ့တဲ့ အသက် ၄၅ နှစ်အရွယ်ရှိ အမျိုးသား တစ်ဦးဟာ အိမ်ပြန်တဲ့ခရီးမှာ သေဆုံးသွားခဲ့တယ်လို့ ပြိုင်ပွဲစီစဉ်သူတွေရဲ့ ထုတ်ပြန်ချက်မှာ ဖော်ပြထားပါတယ်။

နော်တင်ဟမ်က အတွေ့အကြုံရှိ အပြေးသမား စတိဗ်ရှန့်စ်ဟာ လန်ဒန်မာရသွန်ပြိုင်ပွဲမှာ ၂ နာရီ ၅၃ မိနစ် ၂၆ စက္ကန့်နဲ့ ပြိုင်ပွဲကို ပြီးဆုံးအောင် ယှဉ်ပြိုင်နိုင်ခဲ့တာပါ။စတိဗ်ရှန့်စ် သေဆုံးခဲ့ရတဲ့ အကြောင်းရင်းကို ဆေးစစ်ချက်နဲ့ နောက်ပိုင်းမှာ ဖော်ထုတ်သွားမယ်လို့ ပြိုင်ပွဲစီစဉ်သူတွေက ပြောခဲ့ပါတယ်။

“လန်ဒန်မာရသွန်မှာ ပါဝင်ခဲ့တဲ့ လူတိုင်းဟာ စတိဗ်ရှန့်စ်ရုတ်တရက်သေဆုံးသွားတဲ့အကြောင်းကို ကြားသိခဲ့ရလို့ အလွန်စိတ်မကောင်းဖြစ်မိပါတယ်” လို့ ပြိုင်ပွဲစီစဉ်သူတွေက ထုတ်ပြန်ထားတာပါ။

ဒီပြိုင်ပွဲရဲ့ အမျိုးသားအပြေးပြိုင်ပွဲမှာ ကင်ညာနိုင်ငံသား ကယ်လ်ဗင်ကစ်ပ်တန်ဟာ စံချိန်တင် ၂ နာရီ ၁ မိနစ် ၂၅ စက္ကန့်နဲ့ အနိုင်ရခဲ့ပြီး အမျိုးသမီးပြိုင်ပွဲမှာတော့ နယ်သာလန်နိုင်ငံသူ ဆီဖန်ဟာဆန်က ၂ နာရီ ၁၈ မိနစ် ၃၃ စက္ကန့် နဲ့ အနိုင်ရခဲ့တာဖြစ်ပါတယ်။

၄၃ ကြိမ်မြောက်အဖြစ်ကျင်းပတဲ့ လန်ဒန်မာရသွန်ပြိုင်ပွဲမှာ လူပေါင်း ၄၈,၀၀၀ ကျော် ပါဝင်ယှဉ်ပြိုင်ခဲ့ကြတယ်လို့ ပြိုင်ပွဲစီစဉ်သူတွေက ထုတ်ပြန်ထားပါတယ်။

Source:ChannelNewsAsia