CNI Sport News

၂၀၂၃ ခုနှစ်၊ ဧပြီ ၂၇

မန်စီးတီးအသင်းနည်းပြ ဂွာဒီယိုလာက အာဆင်နယ်အသင်းကို ဂိုးပြတ်အနိုင်ရပြီးနောက် ပရီးမီးယားလိဂ် ဖလားက မိမိတို့လက်ထဲမှာလို့ ပြောလိုက်ပါတယ်။

ဂွာဒီယိုလာက “ဒါက အရေးကြီးတဲ့ ပွဲတစ်ပွဲဖြစ်ပြီး အဆုံးအဖြတ်မဟုတ်ပေမယ့် အရေးကြီးပါတယ်။ ကျနော်တို့ရဲ့ အာရုံစူးစိုက်မှုကို အဆုံးရှုံးမခံနိုင်ပါဘူး။အခု ကျနော်တို့ လက်ထဲမှာရှိနေပါပြီ။ ကျနော်တို့လုပ်ချင်တဲ့အရာကို လုပ်နိုင်မယ်ဆိုရင် နောက်လာမယ့် ၃ ပွဲက အဆုံးအဖြတ်ဖြစ်ပါလိမ့်မယ်။အမှန်တရားကတော့ ကျနော်တို့ဟာ အာဆင်နယ်ရဲ့ အနောက်မှာပဲ ရှိနေပါသေးတယ်။ဒါက လွယ်ကူမှာမဟုတ်ပေမယ့် တစ်ပွဲပြီးတစ်ပွဲ ဘာတွေ ဖြစ်မလဲဆိုတာ ကျနော်တို့ မြင်တွေ့ရမှာပါ။ ကျနော်တို့ လက်ထဲမှာရှိနေတာကို အသုံးပြုရမယ်” လို့ ပြောခဲ့တာပါ။

မန်စီးတီးအသင်းဟာ ပရီးမီးယားလိဂ်ပွဲစဉ် ၃၃ အဖြစ်အိမ်ကွင်းမှာ ကစားခဲ့တဲ့ ပွဲစဉ်မှာ အာဆင်နယ်အသင်းကို ၄ ဂိုး- ၁ ဂိုးနဲ့ ဂိုးပြတ်အနိုင်ရရှိခဲ့ပါတယ်။ဒီပွဲမှာ မန်စီးတီးအသင်းအတွက် ဂိုးတွေကို ဒီဘရိုင်းက ၂ ဂိုးနဲ့ ဟာလန်း၊ ဂျွန် စတုန်းစ်တို့က ၁ ဂိုးစီသွင်းယူခဲ့ကြတာပါ။ဒီပွဲမှာ ၁ ဂိုးသွင်းယူနိုင်ခဲ့တဲ့ ဟာလန်းဟာ ၃၈ ပွဲကစားရတဲ့ ပရီးမီးယား လိဂ်ရာသီမှာ သွင်းဂိုး ၃၃ ဂိုးနဲ့ ဆာလတ်ရဲ့ ၃၂ ဂိုးစံချိန်ကို ချိုးဖျက်ကာ စံချိန်သစ်တင်နိုင်ခဲ့တာဖြစ်ပါတယ်။

မန်စီးတီးအသင်းဟာ ဒီပွဲအနိုင်ရခဲ့တာကြောင့် အဆင့် ၁ နေရာက အာဆင်နယ်အသင်းနဲ့ ၂ မှတ်အကွာ အဆင့် ၂ နေရာမှာ ဆက်လက်ရပ်တည်နေပေမယ့် ၂ ပွဲကစားဖို့ ကျန်ရှိနေသေးတာကြောင့် အဆင့် ၁ နေရာကို တက်လှမ်း နိုင်ဖို့ အခြေအနေကောင်းနေတာပါ။ အာဆင်နယ်အသင်းနည်းပြ အာတီတာကတော့ ၂၀၀၄ နောက်ပိုင်း ပထမဆုံး ပရီးမီးယားလိဂ်ဆုဖလားကို ရယူနိုင်ဖို့ မျှော်လင့်ချက်အတွက် ကျန်ရှိနေတဲ့ ပွဲတွေအားလုံးကို အနိုင်ရအောင် ကစားသွားမယ်လို့ ပြောခဲ့ပါတယ်။

အာတီတာက “ကျနော်တို့ကစားဖို့ ၅ ပွဲကျန်ရှိနေသေးပြီး ဘာမဆိုဖြစ်သွားနိုင်ပါတယ်။ နှစ်တွေကြာလာပြီးနောက် ဒီလိဂ်မှာ အများကြီးဖြစ်နိုင်သေးတယ်ဆိုတာကို ကျနော်မြင်တွေ့ခဲ့ရပါတယ်။ကျနော်တို့ အလွန်ထူးခြား ကောင်းမွန်တဲ့အသင်းကို ရှုံးသွားခဲ့တဲ့အပေါ် လက်ခံရမှာပါ” လို့ ပြောခဲ့တာဖြစ်ပါတယ်။

မန်စီးတီးအသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် ဖူလ်ဟမ်အသင်းနဲ့ အဝေးကွင်းမှာ ယှဉ်ပြိုင်ရမှာ ဖြစ်ပြီး အာဆင်နယ်အသင်းကတော့ အိမ်ကွင်းမှာ ချယ်လ်ဆီးအသင်းနဲ့ ယှဉ်ပြိုင်ရမှာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဧပြီ ၂၆

ဘောလုံးအားကစားနည်းကို အမေရိကန်နိုင်ငံမှာ လူကြိုက်များနေတဲ့အတွက် အနာဂတ် ချန်ပီယံလိဂ် ဗိုလ်လုပွဲမှာ အဲဒီနိုင်ငံမှာ ကျင်းပနိုင်တယ်လို့ ယူအီးအက်ဖ်အေဥက္ကဋ္ဌ ဆက်ဖာရင်က ပြောခဲ့ပါတယ်။

ဆက်ဖာရင်က “ဒါက ဖြစ်နိုင်ပါတယ်။ ဒါနဲ့ ပတ်သက်ပြီး ကျနော်တို့ စပြီး ဆွေးနွေးမှုတွေ ပြုလုပ်ခဲ့ပါတယ်။ ဒါပေမယ့် ဒီနှစ် ဗိုလ်လုပွဲက အစ္စတန်ဘူလ်၊ ၂၀၂၄ မှာ လန်ဒန်၊ ၂၀၂၅ မြူးနစ်မှာ ကျင်းပမှာ ဖြစ်ပါတယ်။ အဲဒီ နောက်မှာ ဘာဖြစ်မလဲဆိုတာ ကြည့်ကြတာပေါ့။ ဒီရက်ပိုင်းတွေမှာ ဘောလုံးက အမေရိကန်နိုင်ငံမှာ အလွန် ရေပန်းစားနေပါတယ်။ ဥရောပရှိ ဘတ်စကတ်ဘော ချစ်တဲ့သူတွေဟာ NBA နောက်ကို လိုက်သလို၊ သူတို့တွေ ကလည်း ဥရောပဘောလုံး နောက်ကို လိုက်ကြပါလိမ့်မယ်။ အမေရိကန် ပရိသတ်တွေဟာ NBA ဗိုလ်လုပွဲတွေ ထက် ချန်ပီယံလိဂ် ဗိုလ်လုပွဲကို ပိုပြီးကြည့်တာက ကျနော့်ကို အံ့အားသင့်စေပါတယ်”လို့ ပြောခဲ့တာပါ။

ချန်ပီယံလိဂ်ပြိုင်ပွဲကို စတင်ကျင်းပတဲ့ ၁၉၅၅ ခုနှစ်ကတည်းက ဥရောပတိုက်ရဲ့ အပြင်ဘက်မှ တစ်ကြိမ်မှာ ကျင်းပခဲ့ဖူးခြင်း မရှိပေမယ့် ဆက်ဖာရင်ကတော့ ဒီအစဉ်အလာကို ချိုးဖျက်ပြီး အမေရိကန်နိုင်ငံမှာ ကျင်းပမယ့် စိတ်ကူးကို အကောင်အထည် ဖော်ချင်နေတာ ဖြစ်ပါတယ်။

ချန်ပီယံလိဂ်ဖလားကို တွေ့ရစဉ်

ဒါပေမယ့် အမေရိကန်နဲ့ ဥရောပရဲ့ အချိန်ကွာခြားမှုကြောင့် ဒါက ပြဿနာတစ်ခု အနေနဲ့ ရှိနိုင်တယ်လို့လည်း ဆက်ဖာရင်က ပြောခဲ့ပါတယ်။

အမေရိကန်နိုင်ငံဟာ လာမယ့် ၂၀၂၆ ကမ္ဘာ့ဖလားပြိုင်ပွဲကို မက္ကဆီကို၊ ကနေဒါတို့နဲ့အတူ ပူးတွဲအိမ်ရှင်အဖြစ် ကျင်းပသွားဖို့ ရှိနေတာပါ။ ဥရောပထိပ်သီး အသင်းတွေဟာ ရာသီသစ် မစတင်ခင် အချိန်မှာ အမေရိကန်နိုင်ငံကို သွားရောက်ပြီး ခြေစမ်းပွဲ ကစားတာတွေ၊ လေ့ကျင့်တာတွေ ပြုလုပ်လေ့ ရှိတာကြောင့် အမေရိကန်နိုင်ငံဟာ နာမည်ကျော် ကစားသမားတွေနဲ့ မစိမ်းတာလည်း ဖြစ်ပါတယ်။

၂၀၁၆ ကတည်းက ယူအီးအက်ဖ်အေဥက္ကဋ္ဌအဖြစ် တာဝန်ထမ်းဆောင်ခဲ့တဲ့ ဆက်ဖာရင်ဟာ နောက်ထပ် သက်တမ်းအတွက် ကန့်ကွက်သူမရှိ ရွေးချယ်ခံထားရလို့ ၂၀၂၇ အထိ ၄ နှစ် သက်တမ်း တာဝန်ထမ်းဆောင် ရဦးမှာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ ဧပြီ ၂၆

ယူနိုက်တက် အသင်းခေါင်းဆောင်ဟောင်း ဗီဒစ်က အသင်းဟောင်းအနေနဲ့ လာမယ့် နွေရာသီ အပြောင်းအရွှေ့မှာ စပါးတိုက်စစ်မှူး ဟာရီကိန်းထက် လူငယ်တိုက်စစ်မှူးကို ခေါ်ယူဖို့ အကြံပြု ပြောသွားခဲ့ပါတယ်။

ဗီဒစ်က “ဟာရီကိန်းက ပြီးခဲ့တဲ့ ၁၀ နှစ်အတွင်းမှာ ထိပ်တန်း တိုက်စစ်မှူး ဖြစ်ခဲ့သလို ဂိုးတွေ အများကြီးလည်း သွင်းယူနိုင်ပါတယ်။ ဒါပေမယ့် ကျနော်ကတော့ တခြား ရွေးချယ်စရာတွေကို သွားရမှာပါ။ အသင်းမှာ နှစ်ပေါင်း များစွာကြာ တိုက်စစ်မှူးရှိမယ့် နည်းလမ်းရှိပါတယ်။ ကလပ်အနေနဲ့ နှစ်ပေါင်းများစွာအတွက် စဉ်းစားရမှာဖြစ်ပြီး ၂၃ ၊ ၂၄ နှစ်အရွယ် ကစားသမားတွေကို ရှာဖွေရမှာပါ။ သူတို့က ဒီမှာ ၇ နှစ်လောက်အထိ ဆက်ရှိမှာဖြစ်ပြီး အထူး သဖြင့် အသင်းရဲ့ နှလုံးသားထဲမှာပါ”လို့ ပြောခဲ့တာပါ။

ယူနိုက်တက်အသင်းဟာ လာမယ့် အပြောင်းအရွှေ့မှာ တိုက်စစ်မှူး တစ်ဦးကို ဦးစားပေးခေါ်ယူမှာ ဖြစ်ပြီး စပါး တိုက်စစ်မှူး ဟာရီကိန်း၊ နာပိုလီတိုက်စစ်မှူး အိုဆင်ဟမ်နဲ့ ဘင်ဖီကာတိုက်စစ်မှူး ဂွန်ကာလိုရာမို့စ်တို့ဟာ အသင်း ရဲ့ ရွေးချယ်စရာအဖြစ် ရှိနေပါတယ်။

ဟာရီကိန်းနဲ့ စပါးအသင်းတို့ ချုပ်ဆိုထားတဲ့ စာချုပ်ဟာ တစ်နှစ်သာ ကျန်ရှိတော့ပြီး လန်ဒန်ကလပ်ကတော့ ရောင်းချမှာ မဟုတ်ဘူးလို့ ပြောနေပေမယ့် ကစားသမားရဲ့ အနာဂတ်ဟာ မသေချာမှုတွေ ရှိနေတာပါ။

ရီယိုဖာဒီနန် Presents Five မှာ ဗီဒစ်နဲ့ ရီယိုဖာဒီနန်တို့ဟာ အသင်းဟောင်းအနေနဲ့ လာမယ့်နှစ်တွေမှာ အသင်းရဲ့ ကျောရိုးကို ခိုင်ခံအောင် တည်ဆောက်ဖို့ အရေးကြီးကြောင်း ပြောခဲ့တဲ့အထဲမှာ တိုက်စစ်မှူးသစ်ကလည်း အဓိက အနေနဲ့ ပါဝင်ခဲ့တာ ဖြစ်ပါတယ်။

ဟာရီကိန်းကို တွေ့ရစဉ်

ဒါအပြင် ဗီဒစ်က နောက်ထပ် ဗဟိုခံစစ်မှူး တစ်ဦး ခေါ်ယူဖို့လည်း အသင်းဟောင်းကို ပြောခဲ့ပါသေးတယ်။

ဗီဒစ်က “ကလပ်အသင်း အနေနဲ့ နောက်ခံလူ ခေါ်ယူဖို့ကိုလည်း ကြည့်သင့်ပါတယ်။ ဘာကြောင့်လဲဆိုရင် ကျနော် တို့မှာ ဒဏ်ရာရနေတဲ့ နောက်ခံလူတွေ ရှိနေလို့ပါ။ ဒါကြောင့်လည်း ဒီနှစ်ဦးကို စိန်ခေါ်နိုင်ဖို့အတွက် အမှန်တကယ် ငယ်ရွယ်တဲ့သူတစ်ဦး လိုအပ်တယ်ဆိုတာ သေချာတယ်”လို့ ပြောခဲ့တာ ဖြစ်ပါတယ်။

ယူနိုက်တက်အသင်းရဲ့ ဒီရာသီ အဓိကဗဟိုနောက်ခံလူ ၂ ဦးဖြစ်တဲ့ လီဆန်ဒရိုမာတီးနတ်ဇ်နဲ့ ဗာရန်းတို့ဟာ ဆီဗီလာ အသင်းနဲ့ ယူရိုပါလိဂ် ကွာတားဖိုင်နယ် ပထမအကျော့ ပွဲစဉ်မှာ ရခဲ့တဲ့ ဒဏ်ရာကြောင့် အနားယူနေ ရတာပါ။

လီဆန်ဒရိုမာတီးနတ်ဇ်ကတော့ ရာသီကုန်တဲ့အထိ ပါဝင်နိုင်မှာ မဟုတ်ဘဲ ဗာရန်းက အက်ဖ်အေဖလား ဗိုလ်လု ပွဲမှာ ပြန်လည် ပါဝင်နိုင်ဖွယ် ရှိတယ်လို့ သိရပါတယ်။

Source: Metro

CNI Sport News

၂၀၂၃ ခုနှစ်၊ ဧပြီ ၂၆

ရီးရယ်လ်အသင်းနည်းပြ အန်ဆယ်လော့တီက ဂျီရိုနာကို အရေးနိမ့်တဲ့ပွဲမှာ အသင်းရဲ့အဆင့်က အလွန်နိမ့်ခဲ့တယ် လို့ ပြောလိုက်ပြီး ကစားသမားတွေကို ဝေဖန်လိုက်ပါတယ်။

အန်ဆယ်လော့တီက “ကျနော်တို့ရဲ့ အဆင့်က အလွန်နိမ့်ခဲ့ပါတယ်။အသင်းဟာ လုံးဝမကစားနိုင်ခဲ့လို့ ကျနော်တို့ တောင်းပန်ပါတယ်။ကျနော်တို့ ခံစစ်ပိုင်းက တကယ်ကို ညံ့ဖျင်းခဲ့ပြီး ဒါက ရှုံးနိမ့်ရတဲ့ အဓိကအချက်ပါပဲ။ ကျနော် တို့ဟာ စိုးရိမ်မှုတွေရှိနေကြပြီး တစ်ဦးချင်းစီ ကစားတာကိုပဲ အားကိုးနေကြတယ်”လို့ ပြောခဲ့တာပါ။

ရီးရယ်လ်အသင်းဟာ ဂျီရိုနာအသင်းနဲ့ ကစားခဲ့တဲ့ အဝေးကွင်းပွဲစဉ်မှာ ၄ ဂိုး- ၂ ဂိုးနဲ့ အရေးနိမ့်ခဲ့တာဖြစ်ပါတယ်။ ဒီပွဲမှာ ဂျီရိုနာအသင်းအတွက် ၄ ဂိုးစလုံးကို မေဂျာလိဂ်ကလပ် နယူးယောခ့်စီးတီးကနေ အငှားလာရောက် ကစား နေတဲ့ ကတ်စတယ်လန်နိုစ်က သွင်းယူခဲ့တာဖြစ်ပြီး ရီးရယ်လ်အတွက် ၂ ဂိုးကိုတော့ ဗီနီစီးယက်စ်နဲ့ ဗတ်စကွက် တို့က သွင်းယူခဲ့တာပါ။ဒီပွဲမှာ ရီးရယ်လ်ဘက်ကို ၄ ဂိုးစလုံးသွင်းယူခဲ့တဲ့ ကတ်စတယ်လန်နိုစ်ဟာ နှစ်ပေါင်း ၇၅ နှစ်အကြာမှ လာလီဂါပြိုင်ပွဲမှာ ရီးရယ်လ်ဘက်ကို တစ်ပွဲတည်း ၄ ဂိုးသွင်းယူနိုင်တဲ့ ပထမဆုံးကစားသမားအဖြစ် မှတ်တမ်းတင်နိုင်ခဲ့ပါတယ်။

ရီးရယ်လ်အသင်းဟာ မန်စီးတီးအသင်းနဲ့ ကစားရမယ့် ချန်ပီယံလိဂ် ဆီမီးဖိုင်နယ်မတိုင်ခင်မှာ ရလဒ်ဆိုးကြီး တစ်ခုနဲ့ ကြုံတွေ့ခဲ့ရတာဖြစ်ပါတယ်။အန်ဆယ်လော့တီက မနှစ်ကရာသီ စပိန်ဒုတိယတန်းမှာ ကစားခဲ့ရတဲ့ ဂျီရိုနာကို အရေးနိမ့်ခဲ့တဲ့အပေါ် ပရိသတ်တွေစိတ်ပျက်နေတာကို လက်ခံခဲ့ပါတယ်။

အန်ဆယ်လော့တီက “ပရိသတ်တွေဟာ ကျနော်တို့လိုပဲ နာကျင်ပြီး ဒေါသထွက်နေကြပါလိမ့်မယ်။ ဒါပေမယ့် လည်း ကျနော်တို့မှာ ကိုပါဒယ်ရေးဖလား ဗိုလ်လုပွဲနဲ့ ချန်ပီယံလိဂ် ဆီမီးဖိုင်နယ်ရှိနေတာကို သတိရဖို့ လိုအပ် ပါတယ်”လို့ ပြောခဲ့တာပါ။

ရီးရယ်လ်အသင်းရဲ့ ဒီရှုံးပွဲကြောင့် ဘာစီလိုနာအသင်းဟာ စပိန်လာလီဂါပြိုင်ပွဲမှာ ၁ ပွဲလျော့နဲ့ ရမှတ် ၁၁ မှတ် ဖြတ်ကာ အမှတ်ပေးဇယားကို ဦးဆောင်နေပြီး အမှတ်ပေးချန်ပီယံဆုကို ရယူနိုင်ဖို့ နီးစပ်နေပြီ ဖြစ်ပါတယ်။

ရီးရယ်လ်အသင်းဟာ ဧပြီ ၂၉ ရက်မှာ လာလီဂါပွဲစဉ်အဖြစ် အယ်လ်မာရီးယားအသင်းကို အိမ်ကွင်းမှာ လက်ခံ ယှဉ်ပြိုင်ရမှာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဧပြီ ၂၆

အခုနှစ်ရာသီ ပရီးမီးယားလိဂ် ဆုဖလားအတွက် အဆုံးအဖြတ် ဖြစ်မယ့်ပွဲမှာ မန်စီးတီးအသင်းကို ကြောက်ရွံ့မှုနဲ့ ချဉ်းကပ်မယ်ဆိုရင် အာဆင်နယ်အသင်းရဲ့ ကစားသမားတွေကို သတ်ပစ်မယ်လို့ နည်းပြ အာတီတာက သတိပေး လိုက်ပါတယ်။

အာတီတာက “မန်စီးတီးကို မကြောက်ရွံ့ပါဘူး။ ဒီလိုသာဖြစ်ရင် ကစားသမားတွေကို ကျနော် သတ်ပစ်မှာပါ။ ဒီလို ဖြစ်မှာကို ကျနော်လုံးဝကို မလိုချင်ပါဘူး။ ဒါက ခက်ခဲတဲ့ ညတစ်ည ဖြစ်ပါလိမ့်မယ်။ ဒါပေမယ့် အခွင့်အရေးက ကျနော်တို့အတွက် မယုံနိုင်လောက်အောင်ပါပဲ။ ပရီးမီးယားလိဂ် ချန်ပီယံဆုကို ရချင်ရင် မန်စီးတီးအိမ်ကွင်းဆီ သွားပြီး အနိုင်ယူရမှာပါ။ ခင်ဗျားတို့ အနေနဲ့ ချန်ပီယံဆုကို ရချင်ရင်တော့ ဒီပွဲတွေကို အနိုင်ရအောင် ယူရမှာပါ။ ဒါက ရိုးရှင်းပါတယ်”လို့ ပြောခဲ့ပါတယ်။

အာဆင်နယ်အသင်းဟာ လက်ရှိအချိန်မှာ မန်စီးတီးအသင်းထက် ၅ မှတ်အသာနဲ့ ပရီးမီးယားလိဂ် အမှတ်ပေး ဇယားကို ဦးဆောင်နေတာ ဖြစ်ပေမယ့် မန်စီးတီးအသင်းဟာ လက်ကျန်ပွဲ ၂ ပွဲကစားဖို့ ကျန်ရှိနေသေးပါတယ်။

အဲဒါကြောင့် အာဆင်နယ် အသင်းအနေနဲ့ ဒီပွဲမှာ အနိုင်ရလဒ် ရယူနိုင်မှသာ ပရီးမီးယားလိဂ် ချန်ပီယံဆုဖလား အတွက် မျှော်လင့်ချက်တွေကို ဆက်ပြီး ထိန်းထားနိုင်မှာ ဖြစ်ပါတယ်။

မန်စီးတီးအတွက်ကလည်း ဒီရာသီမှာ ဆုဖလား ၃ လုံး ရယူနိုင်မယ့် အိပ်မက်ကို ဆက်လက် ရှင်သန်နိုင်ဖို့အတွက် ဒီပွဲမှာ ရလဒ်ကောင်း ရယူနိုင်ဖို့ လိုအပ်နေတာပါ။

မန်စီးတီးနဲ့ အာဆင်နယ် အသင်းကစားသမား ၂ ဦးကိုတွေ့ရစဉ် 

အာဆင်နယ်အသင်းဟာ ပရီးမီးယားလိဂ်မှာ နောက်ဆုံး ၃ ပွဲဆက် သရေကျခဲ့တာကြောင့် ရမှတ်တွေ ဆုံးရှုံးခဲ့ရတာ ဖြစ်ပြီး မန်စီးတီးအသင်းကတော့ နောက်ဆုံး ကစားခဲ့တဲ့ ပြိုင်ပွဲစုံ ၁၂ ပွဲမှာ ၁၁ ပွဲအထိ နိုင်ပွဲရယူထားတာ ဖြစ်ပါတယ်။

အာဆင်နယ် အသင်းနည်းပြ အာတီတာက ဒီပွဲဟာ ပရီးမီးယားလိဂ် ချန်ပီယံဆုအတွက် အဆုံးအဖြတ်ပွဲ မဟုတ်ဘူးလို့ ပြောခဲ့ပါတယ်။

အာတီတာက “ဒီပွဲမှာ ကျနော်တို့ အနိုင်ရခဲ့ရင် အမှတ်ပေးဖလားကို မရသေးပါဘူး။ ရာခိုင်နှုန်း အပြောင်းအလဲ တော့ ဖြစ်ကောင်း ဖြစ်သွားနိုင်ပါတယ်။ အီးတီဟတ်ကွင်းကို သွားရမှာ ခက်ခဲမယ်ဆိုတာကို သိပေမယ့် ဒီပွဲက ဒီရာသီကို အဆုံးအဖြတ် ပေးမှာလားဆိုရင်တော့ မဟုတ်ပါဘူး။ ကျနော်တို့ဟာ ဆောက်သမ်တန်နဲ့ ပွဲစဉ်က တုံ့ပြန် မှုမျိုးတွေကို မန်စီးတီးနဲ့ ပွဲမှာ ထပ်ပြီးပြသသွားမယ်”လို့ ပြောခဲ့တာပါ။

မန်စီးတီးနဲ့ အာဆင်နယ် အသင်းတို့ဟာ ဒီရာသီ ပရီးမီးယားလိဂ်နဲ့ အက်ဖ်အေဖလားမှာ ၂ ကြိမ် တွေ့ဆုံထားပြီး ၂ ကြိမ်စလုံး မန်စီးတီးအသင်းက အနိုင်ရခဲ့တာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဧပြီ ၂၅

ဂျုဗင်တပ်စ်နဲ့ အင်တာမီလန်အသင်းတို့ ကစားခဲ့တဲ့ ကိုပါအီတာလီယာဖလား ဆီမီးဖိုင်နယ် ပထမအကျော့ ပွဲစဉ်မှာ လူကာကူအပေါ် လူမျိုးရေးခွဲခြားမှုတွေ ပြုလုပ်ခဲ့တာနဲ့ ပတ်သက်ပြီး စုံစမ်းစစ်ဆေးပြီးနောက် ဂျူဗင်တပ်စ် ပရိသတ် ၁၇၁ ဦးကို အီတလီရဲ့တပ်ဖွဲ့က ပွဲကြည့်ခွင့် ပိတ်ပင်မှုတွေ ပြုလုပ်ခဲ့ပါတယ်။

ပိတ်ပင်ခံခဲ့ရတဲ့ ဂျူဗင်တပ်စ်ပရိသတ် ၁၇၁ ဦးဟာ အားကစားကွင်းအတွင်း ဝင်ရောက်ခွင့်ရမှာ မဟုတ်သလို အားကစားကွင်း အတွင်းထဲမှာ စည်းမျဉ်းစည်းကမ်းတွေကို ဖောက်ဖျက်ခဲ့တဲ့အတွက် ဒဏ်ကြေးငွေလည်း ချမှတ်ခံခဲ့ရပါတယ်။

လက်ရှိအချိန်မှာ လူမျိုးရေးခွဲခြားမှုတွေ ပြုလုပ်ခဲ့တဲ့ နောက်ထပ် သူတွေကိုလည်း ဖော်ထုတ်နိုင်ဖို့ စုံစမ်းစစ်ဆေး မှုတွေ လုပ်ဆောင်နေတယ်လို့ သိရတာပါ။

လူကာကူဟာ ဒီပွဲမှာ အင်တာမီလန် အသင်းအတွက် ပင်နယ်တီကနေ အဖိုးတန် ချေပဂိုး သွင်းယူပြီး ၁ ဂိုးစီ သရေ ရလဒ် ထွက်ပေါ်အောင် စွမ်းဆောင်ခဲ့ပြီးနောက် ဂျူဗင်တပ်စ် ပရိသတ်တွေဟာ မျောက်အော်သံတွေ ပြုလုပ်ကာ လူမျိုးရေး ခွဲခြားခဲ့ပါတယ်။

လူကာကူရဲ့ ဂိုးသွင်းပြီး အောင်ပွဲခံခဲ့တဲ့ ပုံစံကိုလည်း ကွင်းလယ်ဒိုင်လူကြီးက အဝါကတ်ပြသကာ နှစ်ဝါ တစ်နီနဲ့ ထုတ်ပယ်ခဲ့ပါတယ်။

အင်တာမီလန်နဲ့ ဂျူဗင်တပ်စ် ယှဉ်ပြိုင်နေစဉ်

အင်တာမီလန်အသင်းဟာ လူကာကူရဲ့ ပွဲပယ်ကို အယူခံဝင်ခဲ့ပေမယ့် အီတလီ အားကစားခုံရုံးက ဒီပြစ်ဒဏ်ကို ထိန်းသိမ်းထားခဲ့ပါတယ်။

ဒါပေမယ့် အီတလီဘောလုံးအဖွဲ့ချုပ် အကြီးအကဲ ဂရာဗီနာက လူမျိုးရေးခွဲခြားမှုကို တိုက်ဖျက်တဲ့ အတိုင်းအတာ အဖြစ် ဒီဆုံးဖြတ်ချက်ကို ကြားဝင်စွက်ဖက်ပေးခဲ့လို့ ပွဲပယ်ပြစ်ဒဏ်ကနေ ပယ်ဖျက်ခံခဲ့ရပါတယ်။

အဲဒါကြောင့် လူကာကူဟာ ဂျူဗင်တပ်စ်အသင်းနဲ့ ဒုတိယအကျော့ ပွဲစဉ်ကို ပါဝင်ယှဉ်ပြိုင်ခွင့် ရရှိသွားခဲ့ပါတယ်။

လူကာကူက “ဂရာဗီနာရဲ့ ဝင်စွက်ဖက်မှုကြောင့် တရားမျှတမှုက ပြီးဆုံးသွားပြီဆိုတာ ကျနော် ယုံကြည်ပါတယ်။ ဒါက အားကစားလောက တစ်ခုလုံးနဲ့ ပြင်ပကို ကြီးမားတဲ့ သတင်းစကား ပေးပို့လိုက်တာပါပဲ။ ဒါဟာ လူမျိုးရေး ခွဲခြားမှုကို တိုက်ဖျက်လိုတဲ့ ဆန္ဒရှိနေတယ်ဆိုတာကို ပြသပါတယ်”လို့ ပြောခဲ့ပါတယ်။

အီတလီဘောလုံး အဖွဲ့ချုပ်ကတော့ လူမျိုးရေးခွဲခြားမှု ပုံစံအားလုံးကို တိုက်ဖျက်တာဟာ အားကစားစနစ်ရဲ့ အခြေခံမူတွေထဲက တစ်ခုဖြစ်တယ်လို့ ပြောခဲ့ပါတယ်။

Source: Daily Mail

CNI Sport News

၂၀၂၃ ခုနှစ်၊ ဧပြီ ၂၆

ရုရှားနဲ့ ဘယ်လာရုစ်နိုင်ငံက အားကစားသမားတွေ ပါဝင်တဲ့ ပြိုင်ပွဲတွေမှာ ယူကရိန်း နိုင်ငံအသင်းတွေ ပါဝင်တာ ကို နိုင်ငံရဲ့ အစိုးရက ပိတ်ပင်ထားပေမယ့် ယူကရိန်းဘောလုံးအသင်းဟာ ယူရို ၂၀၂၄ ခြေစစ်ပွဲမှာ ဆက်ပြီး ပါဝင် ကစားမယ်လို့ အတည်ပြုခဲ့ပါတယ်။

ဒီပိတ်ပင်မှုဟာ အိုလံပစ်၊ အိုလံပစ် မဟုတ်တဲ့ ပြိုင်ပွဲနဲ့ မသန်စွမ်း ပြိုင်ပွဲတွေမှာပါ သက်ရောက်မှု ရှိခဲ့ပါတယ်။

ကျင်းပနေတဲ့ ယူရို ၂၀၂၄ ခြေစစ်ပွဲတွေမှာ ဘယ်လာရုစ်အသင်း ပါဝင်နေပေမယ့် ဒီခြေစစ်ပွဲမှာ ယူကရိန်းကို ပါဝင်ခွင့်ပေးတဲ့ ဆုံးဖြတ်ချက်ကို နိုင်ငံရဲ့ အားကစားဝန်ကြီးဌာနက ဖော်ပြခဲ့တာ ဖြစ်ပါတယ်။

အဲဒါကြောင့် ယူကရိန်းအသင်းဟာ ယူရို ၂၀၂၄ ခြေစစ်ပွဲတွေကို ဆက်ပြီး ယှဉ်ပြိုင် ကစားခွင့်ရခဲ့တာပါ။

ယူကရိန်းအသင်းဟာ ဒီခြေစစ်ပွဲရဲ့ အုပ်စု C မှာ အင်္ဂလန်၊ အီတလီ၊ မြောက်မက်ဆီဒိုးနီးယား၊ မော်လ်တာတို့နဲ့ တစ်အုပ်စုတည်း ကျရောက်နေပြီး ဘယ်လာရုစ်ကတော့ အုပ်စု I မှာ ဆွစ်ဇာလန်၊ ရိုမေးနီးယား၊ ကိုဆိုဗို၊ အန်ဒိုရာ၊ အစ္စရေးတို့နဲ့ ကျရောက်နေတာ ဖြစ်ပါတယ်။

ယူကရိန်းနဲ့ အင်္ဂလန်အသင်းကိုတွေ့ရစဉ်

ယူကရိန်းအသင်းဟာ ခြေစစ်ပွဲ အဖွင့်ပွဲစဉ်အဖြစ် အင်္ဂလန်အသင်းနဲ့ ကစားထားခဲ့တာမှာ ၂ ဂိုး- ဂိုးမရှိနဲ့ အရေးနိမ့် ခဲ့တာပါ။

ယူကရိန်းအသင်းဟာ အုပ်စုဒုတိယ ပွဲစဉ်အဖြစ် ဇွန်လ ၁၆ ရက်မှာ မြောက်မက်ဆီဒိုးနီးယားနဲ့ ယှဉ်ပြိုင်ရမှာ ဖြစ်ပါတယ်။

ယူကရိန်းကို ကျူးကျော် တိုက်ခိုက်ခဲ့တဲ့ ရုရှားကိုတော့ ယူအီးအက်ဖ်အေက သူတို့ လက်အောက်မှာ ကျင်းပတဲ့ ပြိုင်ပွဲတွေမှာ ပါဝင်ယှဉ်ပြိုင်ခွင့် ပိတ်ပင်ထားတာပါ။

ရုရှားအသင်းဟာ ယူအီးအက်ဖ်အေအပြင် ဖီဖာရဲ့ ပိတ်ပင်မှုကိုလည်း ခံခဲ့ရလို့ ပြီးခဲ့တဲ့ ၂၀၂၂ ကမ္ဘာ့ဖလားခြေစစ်ပွဲ ပလေးအော့ဖ်ပွဲမှာ ယှဉ်ပြိုင်ခွင့် မရခဲ့ပါဘူး။

ရုရှားအသင်းဟာ နိုင်ငံတကာ ပြိုင်ပွဲတွေ ယှဉ်ပြိုင်ခွင့် ပိတ်ပင်ခံထားရပေမယ့် ခြေစမ်းပွဲတွေတော့ ကစားခွင့် ရရှိထားပြီး မတ်လက အိမ်ကွင်းမှာ အီရတ်အသင်းနဲ့ နောက်ဆုံး ကစားခဲ့တာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ ဧပြီ ၂၅

ယူနိုက်တက် အသင်းရဲ့ ကွင်းလယ်လူ ဘရူနိုဖာနန်ဒက်စ် တစ်ယောက် အကာအကွယ်ပါတဲ့ ဖိနပ် ဝတ်ဆင်ထား တဲ့ပုံကို ဇနီးဖြစ်သူက ပြသခဲ့ပြီးနောက် စပါးအသင်းနဲ့ ကစားမယ့် ပရီးမီးယားလိဂ်ပွဲမှာ ပါဝင်နိုင်ဖို့ မသေချာဘူးလို့ သိရပါတယ်။

ဘရူနိုဖာနန်ဒက်စ်ဟာ ဘရိုက်တန်အသင်းကို ပင်နယ်တီ အဆုံးအဖြတ်နဲ့ အနိုင်ရခဲ့တဲ့ အက်ဖ်အေဖလား ဆီမီး ဖိုင်နယ် ပွဲစဉ်ရဲ့ ပထမပိုင်းမှာ ဒဏ်ရာ ရရှိခဲ့ပါတယ်။

ဒါပေမယ့် ဘရူနိုဖာနန်ဒက်စ်ဟာ တိုက်စစ်မှူး ဝက်ဂ်ဟော့စ်နဲ့ လူစားမလဲခင် ပွဲချိန် ၁၀၁ မိနစ်အထိ ကွင်းထဲမှာ ရှိနေခဲ့ပါတယ်။

ဘရူနိုဖာနန်ဒက်စ်ရဲ့ ဇနီးဖြစ်သူ အန်နာပင်ဟိုဟာ အင်စတာဂရမ်မှာ ယူနိုက်တက် ကွင်းလယ် ကစားသမားရဲ့ ပုံကို တင်လိုက်ပြီးနောက် အသင်း ပရိသတ်တွေအတွက် စိုးရိမ်စရာ ဖြစ်လာခဲ့ရပါတယ်။

အန်နာပင်ဟို တင်ထားတဲ့ပုံမှာ ဘရူနိုဖာနန်ဒက်စ်ဟာ ဆိုဖာပေါ်မှာ ထိုင်နေပြီး သူ့ရဲ့ ညာဘက် ခြေထောက်ကို ကူရှင်ပေါ်မှာ ထင်ထားတာ တွေ့ရပါတယ်။

ဒါအပြင် သူ့ဘေးမှာရှိတဲ့ ကြမ်းပြင်ပေါ်မှာ အကာအကွယ်ပါတဲ့ ဖိနပ်တစ်ရံနဲ့ ချိုင်းထောက်တစ်စုံပါ ပါဝင်နေ ပါတယ်။

ဘရူနိုဖာနန်ဒက်စ်ဟာ ပွဲအပြီး ဝင်ဘာလေကွင်းက ထွက်ခွာချိန်မှာ ထော့နဲ့ထော့နဲ့ ဖြစ်နေတာကို မြင်တွေ့ခဲ့ ရကတည်းက ပရိသတ်တွေရဲ့ စိုးရိမ်မှုတွေ မြင့်တက်နေခဲ့ပါတယ်။

ဘရူနိုဖာနန်ဒက်စ်နဲ့ ဝက်ဂ်ဟော့စ် လူစားလဲနေကြစဉ်

ဘရူနိုဖာနန်ဒက်စ်ဟာ ယူနိုက်တက်အသင်းကို စပို့တင်းလစ္စဘွန်းကနေ ရောက်ရှိလာပြီးကတည်းက အသင်း အတွက် အရေးပါတဲ့ ကစားသမားအဖြစ် ခြေစွမ်းပြသနေပါတယ်။

ပေါ်တူဂီ ကစားသမားဟာ ဒီရာသီမှာ အသင်းခေါင်းဆောင်အဖြစ် ယူနိုက်တက်အသင်းရဲ့ ပွဲအများအပြားကို ဦးဆောင်ခဲ့ပြီး သူမပါဝင်နိုင်တဲ့ ပွဲတွေမှာ အသင်းရဲ့ ရလဒ်ပိုင်းဟာ အနည်းငယ် ဆိုးနေခဲ့တာ တွေ့ရပါတယ်။

ပြီးခဲ့တဲ့ ဆီဗီလာနဲ့ ယူရိုပါလိဂ် ကွာတားဖိုင်နယ် ဒုတိယအကျော့ပွဲမှာ ဘရူနိုဖာနန်ဒက်စ်ဟာ ပွဲပယ်ကြောင့် မပါဝင်နိုင်ခဲ့ပါဘူး။

ဒီပွဲမှာ ယူနိုက်တက်အသင်းဟာ ဆီဗီလာအသင်းကို ၃ ဂိုး- ဂိုးမရှိနဲ့ အရေးနိမ့်ပြီး ယူရိုပါလိဂ်ကနေ ထွက်ခွာခဲ့ရပါ တယ်။

ဘရူနိုဖာနန်ဒက်စ်ဟာ ဒီရာသီမှာ ယူနိုက်တက် အသင်းအတွက် ၁၀ ဂိုး သွင်းယူထားပြီး ၁၃ ဂိုး ဖန်တီးထားတာ ဖြစ်ပါတယ်။

လက်ရှိ ယူနိုက်တက်အသင်းမှာ အဓိက နောက်ခံလူတွေဖြစ်တဲ့ လီဆန်ဒရို မာတီးနတ်ဇ်နဲ့ ဗာရန်းတို့ ဒဏ်ရာ ကြောင့် အနားယူနေရပါတယ်။

ပရီးမီးယားလိဂ် အဆင့် ၄ နေရာမှာရှိနေတဲ့ ယူနိုက်တက်အသင်းဟာ အဆင့် ၅ နေရာက စပါးအသင်းကို ၆ မှတ်ဖြတ်ထားပြီး ဧပြီလ ၂၈ ရက်မှာ ဒီနှစ်သင်း ထိပ်တိုက် တွေ့ဆုံကြရမှာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဧပြီ ၂၅

အယ်လ်နာဆာအသင်းဟာ အယ်လ်ဝါဒါအသင်းကို အရေးနိမ့်ပြီး ဆော်ဒီဘုရင့်ဖလား ဆီမီးဖိုင်နယ်ကနေ ထွက်ခွာ ခဲ့ရပြီးနောက် အသင်းခေါင်းဆောင် ရော်နယ်ဒိုဟာ ဒေါသထွက် ပေါက်ကွဲနေခဲ့ပါတယ်။

အယ်လ်နာဆာအသင်းဟာ ပြီးခဲ့တဲ့ ဖေဖော်ဝါရီလက အယ်လ်ဝါဒါအသင်းနဲ့ ဆော်ဒီပရိုလိဂ်မှာ ကစားခဲ့တုန်းက ၄ ဂိုး- ဂိုးမရှိနဲ့ အနိုင်ရခဲ့ပြီး ၄ ဂိုးစလုံးကို ရော်နယ်ဒို တစ်ဦးတည်းက သွင်းယူခဲ့တာပါ။

ဒါပေမယ့် ဘုရင့်ဖလား ဆီမီးဖိုင်နယ်မှာတော့ အယ်လ်နာဆာ အသင်းဟာ အယ်လ်ဝါဒါအသင်းကို ၁ ဂိုး- ဂိုးမရှိနဲ့ အရေးနိမ့်ခဲ့တာ ဖြစ်ပါတယ်။

ဒီပွဲမှာ အယ်လ်ဝါဒါ ကစားသမား အယ်လ်ဟာဖစ်ဟာ ပွဲချိန် ၅၃ မိနစ်မှာ နှစ်ဝါ တစ်နီနဲ့ ထုတ်ပယ် ခံခဲ့ရပေမယ့် အယ်လ်နာဆာ အသင်းဟာ သွင်းဂိုး မသွင်းနိုင်ခဲ့လို့ ဆုဖလားရမယ့် မျှော်လင့်ချက် အဆုံးသတ်ခဲ့ရတာပါ။

ရော်နယ်ဒိုဟာ ဒီပွဲမှာ ဂိုးရနိုင်မယ့် အခွင့်အရေး အများအပြားကို လွဲချော်ခဲ့ပြီး မိနစ် ၈၀ ကျော်မှာရတဲ့ ဂိုး ဧရိယာအတွင်းက ကန်သွင်းချက်ကလည်း တိုင်ထိထွက်ခဲ့လို့ အယ်လ်နာဆာအသင်း ဂိုးရနိုင်မယ့် အခွင့်အရေး ဆုံးရှုံးခဲ့ရပါတယ်။

ပေါ်တူဂီ အသင်းခေါင်းဆောင်ဟာ ဒီပွဲရဲ့ ပထမပိုင်းအပြီးမှာ အသင်း အရေးနိမ့်နေတဲ့အပေါ် စိတ်ပျက်နေပြီး အသင်းရဲ့ အရန်ခုံတန်းဘက်ကို ဒေါသထွက် ပေါက်ကွဲ အော်ဟစ်ကာ ဥမင်ထဲကို ဝင်ရောက်သွားခဲ့ပါတယ်။

ရော်နယ်ဒိုကိုတွေ့ရစဉ်

အယ်လ်နာဆာအသင်းဟာ ဆော်ဒီ ဘုရင့်ဖလား မတိုင်ခင်က ဆော်ဒီစူပါဖလားကနေ ထွက်ခွာခဲ့ရတာကြောင့် ဖလားပြိုင်ပွဲတွေမှာ ဆုဖလားရယူနိုင်မယ့် မျှော်လင့်ချက်တွေ အဆုံးသတ်သွားခဲ့ရပါတယ်။

ဒီရာသီမှာ အယ်လ်နာဆာအသင်းဟာ မျှော်လင့်စရာ တစ်လုံးတည်းသော ဆုဖလားကတော့ ဆော်ဒီပရိုလိဂ် အမှတ်ပေး ဖလားဖြစ်ပြီး လက်ရှိအချိန်မှာ အယ်လ်အစ်တီဟတ်အသင်းက ၃ မှတ်အသာနဲ့ အမှတ်ပေးဇယားကို ဦးဆောင်နေပါတယ်။

ဇန်နဝါရီက ဆော်ဒီကလပ် အယ်လ်နာဆာအသင်းထံ ရောက်ရှိလာခဲ့တဲ့ ရော်နယ်ဒိုဟာ အသင်းအတွက် ပြိုင်ပွဲစုံ ၁၄ ပွဲကစားအပြီးမှာ ၁၁ ဂိုး သွင်းယူထားပေမယ့် နောက်ဆုံး ၃ ပွဲဆက် ဂိုးပေါက် ပျောက်ဆုံးနေပါတယ်။

အယ်လ်နာဆာ အသင်းဟာ ဧပြီလ ၂၈ ရက်မှာ ဆော်ဒီပရိုလိဂ် ပွဲစဉ်အဖြစ် အယ်လ်ရက်ဒ်အသင်းနဲ့ အိမ်ကွင်း ပွဲစဉ် ယှဉ်ပြိုင်ရမှာ ဖြစ်ပါတယ်။

Source: Daily Mail