CNI Sprot News

၂၀၂၄ ခုနှစ်၊ ဧပြီ ၅    

ဘာစီလိုနာအသင်းတိုက်စစ်မှူး ဂျာအိုဖီးလစ်က မန်စီးတီးအသင်းရဲ့ပေါ်တူဂီလက်ရွေးစင်အသင်းဖော် ဘာနာဒို ဆေးလ်ဗားကို အသင်းအနေနဲ့ ခေါ်ယူနိုင်ဖို့ မျှော်လင့်တယ်လို့ ပြောလိုက်ပါတယ်။

ဂျာအိုဖီးလစ်က “ဘာစီလိုနာက ဘာနာဒိုကို ခေါ်ယူနိုင်မယ်လို့ ကျနော်မျှော်လင့်ပါတယ်။ သူက ထိပ်တန်းကစား သမားဖြစ်ပြီး သူဟာ ဘာစီလိုနာအကြောင်းကို မေးသလို သူ့ရဲ့မိသားစုကလည်း ဒီမှာရှိနေပါတယ်။ သူဒီကိုလာဖို့ အားလုံးအဆင်ပြေတယ်ဆိုပြီး ကျနော်သူ့ကိုပြောခဲ့ဖူးပါတယ်။ ကျနော်သာ အားကစားဒါရိုက်တာ ဒေကိုဆိုရင် ဘာနာဒိုကို သံသယမရှိဘဲ ခေါ်ယူသွားမှာပါ”လို့ ပြောခဲ့တာပါ။

မန်စီးတီးအသင်းနဲ့ ဘာနာဒိုဆေးလ်ဗားတို့ ချုပ်ဆိုထားတဲ့စာချုပ်ထဲမှာပါဝင်တဲ့ စာချုပ်ဖျက်သိမ်းကြေး ပေါင်သန်း ၅၀ ဟာ လာမယ့်နွေရာသီမှာ စတင်အသက်ဝင်တော့မှာဖြစ်ပါတယ်။

 အဲဒါကြောင့် ဂျာအိုဖီးလစ်ဟာ သူ့ရဲ့ ပေါ်တူဂီ အသင်းဖော်ကို ဘာစီလိုနာအသင်းခေါ်ယူမှုပြုလုပ်ဖို့ ပြောလာခဲ့တာပါ။

 ဘာစီလိုနာအသင်းနဲ့ ဘာနာဒို ဆေးလ်ဗား တို့ရဲ့ အပြောင်းအရွှေ့သတင်းတွေဟာ အရင်ကလည်း ထွက်ပေါ်ခဲ့ဖူးပြီး အခု ထပ်မံထွက်ပေါ်လာခဲ့ပါတယ်။

ဘာစီလိုနာအသင်းအနေနဲ့ ဘာနာဒိုဆေးလ်ဗားကို ခေါ်ယူခဲ့မယ်ဆိုရင် လာလီဂါရဲ့ ဘဏ္ဍာရေးစည်းမျဉ်းကို မချိုးဖောက်စေဖို့အတွက် အသင်းမှာရှိတဲ့ ကစားသမားအချို့ကို ရောင်းချရမှာဖြစ်ပါတယ်။ 

အသက် ၂၉ နှစ် အရွယ်ရှိ ဘာနာဒိုဆေးလ်ဗားနဲ့ မန်စီးတီးအသင်းတို့ချုပ်ဆိုထားတဲ့ စာချုပ်ဟာ ၂၀၂၆ ခုနှစ်၊ဇွန်အထိ သက်တမ်း ရှိနေသေးတာပါ။

 ၂၀၁၇ ခုနှစ်က မိုနာကိုအသင်းကနေ ရောက်ရှိလာခဲ့တဲ့ ဘာနာဒိုဆေးလ်ဗားဟာ မန်စီးတီး အသင်းအတွက် ၃၄၄ ပွဲပါဝင်ကစားထားပြီး ၆၅ ဂိုးသွင်းယူကာ ပရီးမီးယားလိဂ်ဖလား ၅ ကြိမ်၊ချန်ပီယံလိဂ်ဖလား ၁ ကြိမ်အပါအဝင် ဆုဖလားအောင်မြင်မှုအများအပြား ရယူထားနိုင်တာဖြစ်ပါတယ်။

ဂျာအိုဖီးလစ်ကလည်း ဒီရာသီအကုန်မှာ ဘာစီလိုနာအသင်းနဲ့ အငှားစာချုပ်ကုန်ဆုံးမှာဖြစ်ပေမယ့် အသလက်တီကိုအသင်းထံ ပြန်မသွားချင်ဘဲ ဘာစီလိုနာအသင်းမှာသာ ဆက်ရှိဖို့ ဆုံးဖြတ်ထားတာပါ။ 

ဘာစီလိုနာအသင်းဟာ ဂျာအိုဖီးလစ်ကို အပြီးသတ်ဝယ်ယူ ဒါမှမဟုတ် အငှားသက်တမ်းတိုးဖို့ ကြိုးပမ်း နေတာဖြစ်ပါတယ်။

Source:Besoccer

CNI Sport News

၂၀၂၄ ခုနှစ်၊ ဧပြီ ၅

လီဗာပူးလ်အသင်းဟာ ရှက်ဖီးယူနိုက်တက်အသင်းကို အနိုင်ရပြီး ပရီးမီးယားလိဂ် ထိပ်ဆုံးနေရာကို ပြန်ရောက်ရှိခဲ့ ပေမယ့် နည်းပြ ကလော့ပ်က ပိုပြီးကောင်းမွန်အောင်လုပ်ဖို့ အသင်းကို တိုက်တွန်းသွားခဲ့ပါတယ်။

ကလော့ပ်က “အပြောင်းအလဲတွေ မပြုလုပ်မချင်း ကျနော်တို့ရဲ့ ပွဲကစားပုံက မကောင်းခဲ့ပါဘူး။ ဒါကို ကျနော်တို့ ဝန်ခံရမှာပါ။ သူတို့ရဲ့ ပိတ်ဆော့ ကစားမှုတွေကြောင့် ခက်ခဲတယ်ဆိုတာ သိပေမယ့် ကျနော်တို့ ပိုပြီးကောင်းမွန် အောင် လုပ်ရမှာပါ။ အရန်ခုံကနေ ဝင်လာတဲ့သူတွေနဲ့ အပြောင်းအလဲလုပ်နိုင်ခဲ့တဲ့အတွက် ကျနော်အလွန် ပျော်ရွှင်ပါတယ်။ အဆုံးသတ်မှာ ကျနော်တို့အတွက် ထိုက်တန်တဲ့နိုင်ပွဲဖြစ်ခဲ့ပြီး အားလုံးကောင်းမွန်ပါတယ်”လို့ TNT Sports ကို ပြောပါတယ်။

လီဗာပူးလ်အသင်းဟာ ရှက်ဖီးယူနိုက်တက်အသင်းကို ၃ ဂိုး-၁ ဂိုးနဲ့ အနိုင်ရခဲ့တာဖြစ်ပြီး ပွဲချိန် ၇၅ မိနစ်အထိ ၁ ဂိုးစီ သရေကျနေခဲ့လို့ အနိုင်ဂိုးရဖို့ လူစားလဲမှု အပြောင်းအလဲတွေ ပြုလုပ်ခဲ့ရတာ ဖြစ်ပါတယ်။ 

အဲဒါကြောင့် ပွဲပြီးဖို့ နောက်ဆုံး ၁၅ မိနစ်အလိုမှာ လီဗာပူးလ်အသင်းအနိုင်ဂိုး ၂ ဂိုးရပြီး ပရီးမီးယားလိဂ် အဆင့် ၁ နေရာကို ပြန်တက်နိုင်ခဲ့တာပါ။ 

 လီဗာပူးလ်အသင်းကို တွေ့ရစဉ်

ဒီပွဲမှာ လီဗာပူးလ်အသင်းအတွက် ဂိုးတွေကို ဒါဝင်နူးနက်စ်၊ မက်အယ်လစ္စတာနဲ့ ဂတ်ပိုတို့က သွင်းယူခဲ့ပြီး ရှက်ဖီးယူနိုက်တက်အသင်းအတွက် ချေပဂိုးကို လီဗာပူးလ်အသင်း နောက်ခံလူ ဘရက်ဒလေက ကိုယ့်ဂိုးကိုယ် သွင်းယူခဲ့တာ ဖြစ်ပါတယ်။

လီဗာပူးလ်အသင်းဟာ ဒီပွဲမှာ ဘောလုံးပိုင်ဆိုင်မှု ၈၃ ရာခိုင်နှုန်းအထိရှိခဲ့ပြီး ပရီးမီးယားလိဂ်သမိုင်းမှာ စံချိန်တင် ဘောလုံးပိုင်ဆိုင်မှုအဖြစ် မှတ်တမ်းတင်နိုင်ခဲ့တာပါ။

လီဗာပူးလ်အသင်းခေါင်းဆောင် ဗန်ဒိုက်က အသင်းအနေနဲ့ လာမယ့်ပွဲစဉ်တွေမှာ ပိုမိုကောင်းမွန်တဲ့ စတင်မှုတွေ ပြုလုပ်ဖို့လိုတယ်လို့ ပြောခဲ့ပါတယ်။ 

လီဗာပူးလ်အသင်းဟာ ဒီနိုင်ပွဲကြောင့် အဆင့် ၂ နေရာက အာဆင်နယ်အသင်းကို ၂ မှတ်အသာနဲ့ ဦးဆောင်နေပြီး ရှက်ဖီးယူနိုက်တက်အသင်းကတော့ အဆင့် ၂၀ နေရာမှာ ရပ်တည်နေကာ လာမယ့်ရာသီ ချန်ပီယံရှစ်ပြိုင်ပွဲမှာ ပြန်ကစားရဖို့ နီးစပ်နေတာပါ။

လီဗာပူးလ်အသင်းဟာ ဧပြီ ၇ ရက်မှာ ယူနိုက်တက်အသင်းနဲ့ ပရီးမီးယားလိဂ်ပွဲစဉ် ယှဉ်ပြိုင်ရမှာဖြစ်ပြီး ဒီပွဲ အပြီးမှာတော့ ယူရိုပါလိဂ် ကွာတားဖိုင်နယ် ပွဲစဉ်အဖြစ် အတ္တလန်တာအသင်းနဲ့ ယှဉ်ပြိုင်ရမှာဖြစ်ပါတယ်။

Source: Eurosport

CNI Sport News

၂၀၂၄ ခုနှစ်၊ ဧပြီ ၅

ယူနိုက်တက်အသင်းနည်းပြ အဲရစ်တန်ဟတ်က ချယ်လ်ဆီးအသင်းကို အရေးနိမ့်ခဲ့တဲ့ပွဲမှာ အသင်းကစားသမား တွေဟာ တစ်ဦးချင်းအမှားတွေ ပြုလုပ်ခဲ့တယ်လို့ ပြောလိုက်ပါတယ်။

အဲရစ်တန်ဟတ်က “ယူနိုက်တက်အသင်းဟာ ဒီပွဲကို ကြီးစိုးထားနိုင်ခဲ့ပေမယ့် တစ်ဦးချင်း အမှားတွေကြောင့် ရှုံးပွဲကြုံတွေ့ခဲ့ရပါတယ်။ ကျနော်တို့ဟာ ဒီကနေ သင်ယူမှုတွေ ပြုလုပ်ရမှာပါ။ ယူနိုက်တက် ကစားသမားတွေ အနေနဲ့ ဒီအခြေအနေကို ဘယ်လိုကိုင်တွယ်ရမလဲဆိုတာ သိသင့်ပါတယ်။ အနိုင်ရသင့်တဲ့ပွဲကို အနိုင်မရခဲ့တာ ကြောင့် ကျနော် စိတ်ပျက်မိပါတယ်။ ၅ ရက်အတွင်းမှာ ရမှတ် ၅ မှတ်လျော့သွားခဲ့ပြီး ဒါက လက်ခံနိုင်စရာ မရှိဘူး”လို့ ပြောပါတယ်။

ယူနိုက်တက်အသင်းဟာ ဒီပွဲမှာ ချယ်လ်ဆီးအသင်းကို ၄ ဂိုး-၃ ဂိုးနဲ့ အရေးနိမ့်ခဲ့တာ ဖြစ်ပါတယ်။

ဒီပွဲစဉ်မှာ ယူနိုက်တက်အသင်းဟာ ချယ်လ်ဆီးအသင်းရဲ့ ဦးဆောင်ဂိုး ၂ ဂိုးကို ပြန်ချေပပြီး ဦးဆောင်ဂိုးပါ သွင်းယူကာ နာကျင်အချိန်ပို ၉၉ မိနစ်အထိ ၃ ဂိုး-၂ ဂိုးနဲ့ အနိုင်ရရှိနေခဲ့တာပါ။

ဒါပေမယ့် မိနစ် ၁၀၀ နဲ့ ၁၀၁ မိနစ်မှာ ချယ်လ်ဆီးအသင်းက ချေပဂိုးနဲ့ အနိုင်ဂိုးတွေ သွင်းယူခဲ့တာကြောင့် ယူနိုက်တက်အသင်း ရှုံးပွဲကြုံတွေ့ခဲ့ရတာ ဖြစ်ပါတယ်။

ဒီပွဲစဉ်မှာ ချယ်လ်ဆီးအသင်းအတွက် ဂိုးတွေကို ကိုးလ်ပါလ်မာက ဟက်ထရစ်နဲ့ ဂယ်လာဂါက ၁ ဂိုးသွင်းယူခဲ့ကာ ယူနိုက်တက်အသင်းအတွက် ဂိုးတွေကို ဂါနာချိုက ၂ ဂိုးနဲ့ ဘရူနိုဖာနန်ဒက်စ်က ၁ ဂိုးသွင်းယူခဲ့ပါတယ်။ 

 ယူနိုက်တက်အသင်းနဲ့ ချယ်လ်ဆီးအသင်း ယှဉ်ပြိုင်နေစဉ်

ယူနိုက်တက်အသင်းဟာ ဒီရှုံးပွဲကြောင့် ပရီးမီးယားလိဂ် ပွဲစဉ်ကစားဖို့ ၈ ပွဲသာကျန်ရှိတော့တဲ့ အချိန်မှာ အဆင့် ၄ နေရာက အက်စတွန်ဗီလာအသင်းနဲ့ ၁၁ မှတ်၊ အဆင့် ၅ နေရာက စပါးအသင်းနဲ့ ၉ မှတ်အကွာ အဆင့် ၆ နေရာမှာ ရပ်တည်နေတာဖြစ်ပါတယ်။

အနိုင်ရရှိခဲ့တဲ့ ချယ်လ်ဆီးအသင်းကတော့ ပရီးမီးယားလိဂ်အဆင့် ၁၀ နေရာမှာ ရပ်တည်နေပေမယ့် အဆင့် ၆ နေရာက ယူနိုက်တက်အသင်းနဲ့ ၅ မှတ်သာ ကွာဟတော့တာပါ။ 

ဒီရာသီမှာ ဒဏ်ရာပြဿနာနှိပ်စက်နေတဲ့ ယူနိုက်တက်အသင်းဟာ ချယ်လ်ဆီးအသင်းနဲ့ပွဲစဉ်မှာလည်း နောက်ခံလူတွေဖြစ်တဲ့ ဗာရန်း၊ အီဗန်စ်နဲ့ ကွင်းလယ်လူ ကတ်စမဲရိုးတို့ ဒဏ်ရာရရှိသွားခဲ့တာကြောင့် လူစားလဲခဲ့ရပါတယ်။ 

ယူနိုက်တက်အသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် လီဗာပူးလ်အသင်းနဲ့ ယှဉ်ပြိုင်ရမှာဖြစ်ပြီး ချယ်လ်ဆီးအသင်းက ရှက်ဖီးယူနိုက်တက်အသင်းနဲ့ ယှဉ်ပြိုင်ရမှာဖြစ်ပါတယ်။

Source: ESPN

CNI Sport News

 ၂၀၂၄ ခုနှစ်၊ ဧပြီ ၄

ယူနိုက်တက်အသင်းဟာ ခံစစ်ပိုင်းပြဿနာ ဖြေရှင်းဖို့အတွက် ဝုလ်ဗ်စ်အသင်းခေါင်းဆောင် ကေးလ်မန်းကို ခေါ်ယူဖို့ ပစ်မှတ်ထားနေပြီး နွေရာသီမှာ ဝယ်ယူမယ့်စာရင်းထဲ ထည့်သွင်းခဲ့တယ်လို့ The Times က ဖော်ပြ ထားပါတယ်။

ယူနိုက်တက်အသင်းဟာ နွေရာသီမှာ ဗဟိုခံစစ်မှူးတစ်ဦးကို ခေါ်ယူဖို့ ဦးစားပေး လုပ်ဆောင်နေပြီး ဒီရာသီမှာ ကေးလ်မန်းရဲ့ ခြေစွမ်းကို ကြည့်ရှုဖို့ ကင်းထောက်တွေကို အကြိမ်ပေါင်းများစွာ စေလွှတ်ခဲ့တာပါ။ 

ကလပ်အသင်း ၂ သင်းကြားမှာ ဘယ်လိုဆက်သွယ်မှုမှ မပြုလုပ်ရသေးပေမယ့် ကေးလ်မန်းဟာ ယူနိုက်တက် အသင်းခေါ်ယူဖို့ စောင့်ကြည့်နေတဲ့ ကစားသမားတွေထဲက တစ်ဦးအဖြစ်ရှိနေတာ ဖြစ်ပါတယ်။ 

ယူနိုက်တက်အသင်းဟာ ဒီရာသီမှာ ခံစစ်ပိုင်းက ဒဏ်ရာပြဿနာ အများအပြား ကြုံတွေ့နေရတာပါ။

ကေးလ်မန်းကို တွေ့ရစဉ်

မကြာသေးခင်ကမှ ဗဟိုနောက်ခံလူ ၂ ဦးဖြစ်တဲ့ လီဆန်ဒရိုမာတီနက်ဇ်နဲ့ လင်ဒီလော့ဖ်တို့ဟာ ကြွက်သားဒဏ်ရာ တွေကြောင့် အနည်းဆုံး ၁ လကြာ အနားယူရမယ်လို့ ယူနိုက်တက်အသင်းက အတည်ပြုထားတာ ဖြစ်ပါတယ်။ 

ကေးလ်မန်းဟာ အင်္ဂလန်အသင်းအတွက် ပါဝင်ကစားရခြင်း မရှိသေးပေမယ့် ယူနိုက်တက်အသင်း မတိုင်ခင် ကတည်းက အသင်းကြီးအချို့ရဲ့ စိတ်ဝင်စားမှုကို ခံခဲ့ရတာပါ။ 

နာပိုလီအသင်းဟာ ပြီးခဲ့တဲ့နွေရာသီက ကင်မင်ဂျေးနေရာမှာ အစားထိုးဖို့ ကေးလ်မန်းကို ခေါ်ယူဖို့ ကြိုးစားခဲ့ ပေမယ့် အောင်မြင်ခဲ့ခြင်းမရှိတာ ဖြစ်ပါတယ်။

အသက် ၂၆ နှစ်အရွယ်ရှိ ကေးလ်မန်းဟာ ဒီရာသီမှာ ဝုလ်ဗ်စ်အသင်းအတွက် ပရီးမီးယားလိဂ်ပွဲစဉ်တိုင်း ပွဲထွက် လူစာရင်းမှာ ပါဝင်ခဲ့ပြီး ပြိုင်ပွဲစုံ ၃၄ ပွဲပါဝင်ကစားကာ ၂ ဂိုးသွင်းယူထားတာပါ။ 

ဝုလ်ဗ်စ်အသင်းဟာ ဒီရာသီ ပရီးမီးယားလိဂ်ပြိုင်ပွဲမှာ အဆင့် ၁၀ နေရာ ရပ်တည်နေပြီး အဆင့် ၇ နေရာက ဝက်စ်ဟမ်းအသင်းနဲ့ ၃ မှတ် ကွာဟနေပါတယ်။

ဝုလ်ဗ်စ်အသင်းဟာ ဒီတစ်ပတ် ပရီးမီးယားလိဂ်ပွဲစဉ်အဖြစ် ဝက်စ်ဟမ်းအသင်းနဲ့ ယှဉ်ပြိုင်ရမှာဖြစ်ပါတယ်။

Source: Goal

CNI Sport News

၂၀၂၄ ခုနှစ်၊ ဧပြီ ၄

အာဆင်နယ်အသင်း ကစားသမားဟောင်း ရောဘတ်ပီရက်ဇ်က ပီအက်စ်ဂျီအသင်း တိုက်စစ်မှူး ဘတ်ပီကို ရီးရယ်လ်အသင်းထက် လီဗာပူးလ်အသင်းကို ပြောင်းရွှေ့ပြီးကစားဖို့ ပြောလိုက်ပါတယ်။

ရောဘတ်ပီရက်စ်က “ဘတ်ပီအနေနဲ့ နောက်ဆုံးမှာ ဘာဆုံးဖြတ်မလဲဆိုတာ မသိပေမယ့် ကျနော်ကတော့ သူ့ကို လီဗာပူးလ်မှာ မြင်တွေ့ချင်ပါတယ်။ လီဗာပူးလ်အသင်းဟာ ကြီးမားတဲ့ မိသားစုကလပ်ဖြစ်ပြီး ကောင်းမွန်တဲ့ ဖွဲစည်းမှုနဲ့ ဖိအားလည်း မရှိပါဘူး။ ပရိသတ်တွေရဲ့ အားပေးမှုတွေကလည်း တကယ်ကောင်းမွန်ပါတယ်။ ပြီးတော့ ဆာလက်-ဘတ်ပီ အတွဲဖက်က ပေါက်ကွဲထွက်သွားနိုင်တယ်လို့ ထင်ပါတယ်။ သူဟာ ရီးရယ်လ်ကို ငြင်းပယ် နိုင်စွမ်း ရှိတယ်လို့ ကျနော်ထင်ကြောင်း”ပြောပါတယ်။

ဒီရာသီအကုန်မှာ ပီအက်စ်ဂျီအသင်းနဲ့ စာချုပ်ကုန်ဆုံးတော့မယ့် ဘတ်ပီဟာ ရီးရယ်လ်အသင်းကို ပြောင်းရွှေ့ဖို့ သဘောတူညီမှုရရှိပြီးပြီလို့ သတင်းတွေမှာ ဖော်ပြထားပါတယ်။ 

ဘတ်ပီကတော့ ယူရို ၂၀၂၄ ပြိုင်ပွဲ မတိုင်ခင်မှာ သူ့ရဲ့အနာဂတ်ကို ကြေညာသွားမယ်လို့ ပြောထားတာပါ။ 

ဘတ်ပီကို တွေ့ရစဉ်

ပြင်သစ်အသင်းခေါင်းဆောင်ဟာ ၂၀၁၇ ခုနှစ်က မိုနာကိုအသင်းကနေ ရောက်ရှိလာပြီးကတည်းက ပီအက်စ်ဂျီ အသင်းအတွက် ၂၅၁ ဂိုး သွင်းယူထားပြီး ပြည်တွင်းပြိုင်ပွဲမှာ ဆုဖလားအများအပြားနဲ့ တစ်ဦးချင်း အောင်မြင်မှု တွေလည်း အများအပြား ရယူထားတာ ဖြစ်ပါတယ်။

ပြင်သစ်အသင်းနဲ့ ၂၀၁၈ ကမ္ဘာ့ဖလားပြိုင်ပွဲမှာ ချန်ပီယံဆု ရယူနိုင်ခဲ့တဲ့ ဘတ်ပီဟာ ၂၀၂၂ ခုနှစ်ကတည်းက ရီးရယ်လ်အသင်းထံ ပြောင်းရွှေ့ဖို့ နီးစပ်ခဲ့ပေမယ့် ပီအက်စ်ဂျီအသင်းနဲ့ သက်တမ်းတိုး စာချုပ်ချုပ်ခဲ့တာပါ။ 

အခုအချိန်မှာတော့ ဘတ်ပီဟာ ပီအက်စ်ဂျီအသင်းရဲ့ စာချုပ်သစ် ကမ်းလှမ်းမှုကို ငြင်းပယ်ပြီး ရီးရယ်လ်အသင်းကို ပြောင်းရွှေ့ဖို့ ဆုံးဖြတ်ထားတာ ဖြစ်ပါတယ်။

ဒါပေမယ့် ဘတ်ပီဟာ ပီအက်စ်ဂျီအသင်း ကစားသမားဘဝ နောက်ဆုံးရာသီမှာ အသင်းနဲ့ အောင်မြင်မှုတွေ ရယူနိုင်ဖို့ကိုသာ အာရုံစိုက်နေတာပါ။

ပီအက်စ်ဂျီအသင်းဟာ ဒီရာသီ ပြင်သစ်လီဂူးဝမ်းပြိုင်ပွဲမှာ အဆင့် ၂ နေရာက ဘရက်စ်အသင်းကို ၁၂ မှတ်ဖြတ်ပြီး အဆင့် ၁ နေရာက ဦးဆောင်နေသလို ပြင်သစ်ဖလားပြိုင်ပွဲမှာလည်း ဗိုလ်လုပွဲတက်နိုင်ခဲ့ပါတယ်။ 

ဒါအပြင် ပီအက်စ်ဂျီအသင်းဟာ ချန်ပီယံလိဂ်ပြိုင်ပွဲမှာလည်း ကွာတားဖိုင်နယ် ရောက်ရှိနေကာ ဒီရာသီမှာ ဆုဖလား ၃ လုံးရယူနိုင်မယ့် လမ်းကြောင်းပေါ်မှာ ရှိနေတာဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ ဧပြီ ၄

အာဆင်နယ်အသင်းနည်းပြ အာတီတာက လူတန်အသင်းဟာ အလွန်ကောင်းမွန်တဲ့ အသင်းဖြစ်ပြီး သူတို့ကို အခက်အခဲ ဖြစ်စေခဲ့တယ်လို့ ပြောခဲ့ပါတယ်။

အာတီတာက “အနိုင်ရခဲ့လို့ ပျော်ပါတယ်။ ဒီပွဲဟာ အလွန်ခက်ခဲခဲ့ပြီး လူတန်အသင်းကို အသိအမှတ်ပြုပါတယ်။ သူတို့ဟာ အလွန်ကောင်းမွန်တဲ့ အသင်းဖြစ်ခဲ့ပြီး ကျနော်တို့ကို အခက်အခဲ ဖြစ်စေခဲ့ပါတယ်။ ကျနော်တို့ဟာ အလွန်ကောင်းမွန်တဲ့ ဂိုး ၂ ဂိုးကို သွင်းယူနိုင်ခဲ့ပေမယ့် သူတို့ရဲ့ ကစားပုံကြောင့် စည်းချက်မှန်ကို မရရှိခဲ့ဘူး”လို့ ပြောပါတယ်။

လူတန်အသင်းကို ၂ ဂိုး- ဂိုးမရှိနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ အာဆင်နယ်အသင်းအတွက် ဂိုးတွေကို အိုဒီဂတ်နဲ့ လူတန်အသင်း နောက်ခံလူ ဟာရှီအိုကာက ကိုယ့်ဂိုးကိုယ်သွင်းယူခဲ့တာ ဖြစ်ပါတယ်။ 

အာဆင်နယ်အသင်းဟာ ဒီနိုင်ပွဲကြောင့် လီဗာပူးလ်အသင်း ပွဲမကစားခင် ပရီးမီးယားလိဂ် အမှတ်ပေးဇယား အဆင့် ၁ နေရာကို ပြန်လည်ရောက်ရှိခဲ့ပါတယ်။ 

 အာဆင်နယ်နဲ့လူတန်အသင်းတို့ ယှဉ်ပြိုင်နေစဉ်

အာဆင်နယ်အသင်းဟာ ဒီပွဲ အပါအဝင် ၂၀၂၄ ခုနှစ်ထဲမှာ ကစားခဲ့တဲ့ ပရီးမီးယားလိဂ် ၁၀ ပွဲစလုံး ရှုံးပွဲမရှိဘဲ ၉ ပွဲ အနိုင်ရရှိကာ ၁ ပွဲသရေကျထားတဲ့ မှတ်တမ်းကောင်းကို ပိုင်ဆိုင်ထားတာပါ။

အာဆင်နယ်အသင်းဟာ လူတန်အသင်းနဲ့ပွဲစဉ်မှာ ပြီးခဲ့တဲ့ မန်စီးတီးအသင်းနဲ့ပွဲစဉ်က ပွဲထွက်လူစာရင်းကို ၅ ဦး အထိ အပြောင်းအလဲ ပြုလုပ်ခဲ့တာ ဖြစ်ပါတယ်။ 

အာဆင်နယ်အသင်း တောင်ပံကစားသမား ဆာကာဟာ ဒဏ်ရာကြောင့် ဒီပွဲကို လွဲချော်ခဲ့ပြီး လာမယ့်ပွဲစဉ်မှာ ပြန်လည် ပါဝင်နိုင်ဖို့ မျှော်လင့်တယ်လို့ နည်းပြ အာတီတာက ပြောခဲ့တာပါ။

အာတီတာက “ဆာကာဟာ လူတန်အသင်းနဲ့ပွဲစဉ်မှာ ပါဝင်ဖို့ နီးစပ်ခဲ့ပေမယ့် မန်စီးတီးအသင်းနဲ့ ပွဲက တူညီတဲ့ နေရာမှာပဲ တစ်ခုခုကို သူခံစားခဲ့ရပါတယ်။ အဲဒါကြောင့် သူ့ကို ကျနော်တို့ အသုံးမပြုခဲ့တာပါ။ မနက်ဖြန်မှာ သူပြန်လေ့ကျင့်နိုင်ဖို့နဲ့ ဒီအပတ်ကစားမယ့်ပွဲစဉ်မှာ ပါဝင်နိုင်ဖို့ ကျနော်မျှော်လင့်တယ်”လို့ ပြောပါတယ်။

အာဆင်နယ်အသင်းဟာ ဧပြီ ၆ ရက်မှာ ပရီးမီးယားလိဂ်ပွဲစဉ်အဖြစ် ဘရိုက်တန်အသင်းနဲ့ ယှဉ်ပြိုင်ရမှာဖြစ်ပြီး ဒီပွဲအပြီးမှာ ချန်ပီယံလိဂ် ကွာတားဖိုင်နယ်ပွဲစဉ်အဖြစ် ဘိုင်ယန်မြူးနစ်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: Metro

CNI Sport News

၂၀၂၄ ခုနှစ်၊ ဧပြီ ၄

အက်စတွန်ဗီလာအသင်းကို အနိုင်ရခဲ့တဲ့ ပွဲစဉ်မှာ မန်စီးတီးအသင်းအတွက် ဟက်ထရစ် ဂိုးသွင်းယူနိုင်ခဲ့တဲ့ ဖိုဒန်ကို နည်းပြ ဂွာဒီယိုလာက ထိပ်တန်းကစားသမားတစ်ဦးလို့ ချီးကျူးသွားခဲ့ပါတယ်။ 

ဂွာဒီယိုလာက “သူ့ရဲ့ အလုပ်အပေါ်ထားတဲ့ ကျင့်ဝတ်ကတော့ အံ့အားသင့်ဖို့ ကောင်းပါတယ်။ သူဟာ အလယ်မှာ ကစားပြီး မယုံနိုင်လောက်အောင် ဂိုးသွင်းနိုင်စွမ်းရှိတဲ့သူပါ။ သူ့ရဲ့သွေးကြောထဲမှာ သွင်းဂိုးတွေရှိနေပါတယ်။ ဖိုဒန် အနေနဲ့ သူလုပ်ချင်တဲ့ အရာမှန်သမျှကို လုပ်လို့ရပါတယ်။ သူက ထိပ်တန်း ကစားသမားဖြစ်ပြီး ဒါကို ကျနော်တို့ သိတယ်”လို့ ပြောပါတယ်။

အက်စတွန်ဗီလာအသင်းကို ၄ ဂိုး-၁ ဂိုးနဲ့ အနိုင်ရရှိခဲ့တဲ့ ပရီးမီးယားလိဂ်ပွဲစဉ်မှာ မန်စီးတီးအသင်းအတွက် ဖိုဒန်က ၃ ဂိုးနဲ့ ရိုဒရီက ၁ ဂိုးသွင်းယူခဲ့ပြီး အက်စတွန်ဗီလာအသင်းအတွက် ဂိုးကို ဒူရမ်က သွင်းယူခဲ့တာ ဖြစ်ပါတယ်။ 

ဖိုဒန်ကို တွေ့ရစဉ်

ဒီပွဲမှာ ဟက်ထရစ် ဂိုးသွင်းယူခဲ့တဲ့ ဖိုဒန်ဟာ သူ့ရဲ့ ပရီးမီးယားလိဂ် ကစားသမားဘဝမှာ ဟက်ထရစ် ၃ ကြိမ်အထိ ရယူပြီးပြီလည်း ဖြစ်တာပါ။

ဖိုဒန်ဟာ ဒီရာသီမှာ မန်စီးတီးအသင်းအတွက် ခြေစွမ်းပြသနေပြီး ၂၁ ဂိုးအထိသွင်းယူကာ ၁၀ ဂိုး ဖန်တီးထားတာ လည်း ဖြစ်ပါတယ်။

မန်စီးတီးအသင်းဟာ လာမယ့် ရက်ပိုင်းအတွင်းမှာ ပရီးမီးယားလိဂ်နဲ့ ချန်ပီယံလိဂ်ပွဲစဉ်တွေ ဆက်တိုက် ယှဉ်ပြိုင်ရမှာဖြစ်လို့ နည်းပြ ဂွာဒီယိုလာဟာ အဓိက ကစားသမား ၂ ဦးဖြစ်တဲ့ ဒီဘရိုင်းနဲ့ ဟာလန်းတို့ကို ဒီပွဲမှာအသုံးမပြုဘဲ အနားပေးခဲ့တာပါ။

ဂွာဒီယိုလာက “ကျနော်တို့ဟာ ၃ ရက်ကို ၁ ပွဲနှုန်း ကစားနေရတာဖြစ်လို့ လန်းဆန်းတဲ့ ခြေထောက်တွေ လိုအပ်ပါ တယ်။ ပွဲစဉ် အချိန်ဇယားတွေကြောင့် ကျနော်တို့ ဒီလိုလုပ်ဖို့လိုပါတယ်။ ဒါကြောင့် ကျနော်တို့ သူတို့ကို အနားပေး ဖို့ လိုအပ်တယ်”လို့ ပြောပါတယ်။

မန်စီးတီးအသင်းဟာ အက်စတွန်ဗီလာအသင်းကို အနိုင်ရခဲ့ပေမယ့် ပရီးမီးယားလိဂ်အဆင့် ၃ နေရာမှာ ဆက်လက် ရပ်တည်နေပြီး ဧပြီ ၆ ရက်မှာ ပဲလေ့စ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဧပြီ ၃

ဖီနာဘာချီအသင်းဟာ တူရကီစူပါလိဂ်ပြိုင်ပွဲကနေ နုတ်ထွက်မှာ မဟုတ်ဘဲ ဆက်ရှိနေမယ်လို့ ဥက္ကဋ္ဌဖြစ်သူ အလီကော့က အစ္စတန်ဘူလ်ရှိ သူတို့ရဲ့ အားကစားကွင်းထဲမှာ စုရုံးနေကြတဲ့ ကွန်ဂရက်အဖွဲ့ဝင်တွေကို အတည်ပြုခဲ့တာ ဖြစ်ပါတယ်။

ပြီးခဲ့တဲ့ တူရကီစူပါလိဂ်ပွဲစဉ်မှာ ဖီနာဘာချီအသင်း ကစားသမားတွေဟာ ထရက်ဇွန်စပေါ်အသင်း ပရိသတ်တွေရဲ့ ကွင်းအတွင်း ဝင်ရောက်တိုက်ခိုက်ခြင်းကို ခံခဲ့ရပြီးနောက် ဖီနာဘာချီအသင်း တာဝန်ရှိသူတွေဟာ လိဂ်ပြိုင်ပွဲ ကနေ နုတ်ထွက်ဖို့ စဉ်းစားခဲ့တာပါ။ 

ဖီနာဘာချီအသင်း အဖွဲ့ဝင်တွေဟာ တူရကီစူပါလိဂ်ကနေ နုတ်ထွက်မယ့် အဆိုပြုချက်ကို မဲခွဲဆုံးဖြတ်ခဲ့တာ မှာတော့ ကန့်ကွက်မဲပေးခဲ့ကြတာ ဖြစ်ပါတယ်။ 

ပြီးခဲ့တဲ့ ဖီနာဘာချီအသင်းက ထရက်ဇွန်စပေါ်အသင်းကို ၃ ဂိုး-၂ ဂိုးနဲ့ အနိုင်ရခဲ့တဲ့ ပွဲစဉ်အပြီးမှာ ထရက်ဇွန်စပေါ် အသင်း ပရိသတ်အများအပြားဟာ ကွင်းအတွင်း ဝင်ရောက်ကာ လုံခြုံရေးတွေနဲ့ ဖီနာဘာချီအသင်း ကစားသမား တွေကို တိုက်ခိုက်ခဲ့ကြတာပါ။ 

ဖီနာဘာချီအသင်းနဲ့ ပရိသတ်တွေ ခိုက်ရန်ဖြစ်ပွားနေစဉ်

ချယ်လ်ဆီးအသင်း တိုက်စစ်မှူး ဘတ်ရှုအာယီက ပွဲချိန် ၈၇ မိနစ်မှာ အနိုင်ဂိုး သွင်းယူပြီးနောက် ထရက်ဇွန်စပေါ် အသင်း ပရိသတ်တွေဟာ ကွင်းအတွင်း အရာဝထ္ထုတွေနဲ့ ပစ်ပေါက်ခဲ့တာကြောင့် တင်းမာမှုတွေ မြင့်တက်လာ ခဲ့တာ ဖြစ်ပါတယ်။

ဘတ်ရှုအာယီဟာ ပွဲအပြီးမှာ သူ့ဆီ ဦးတည်လာခဲ့တဲ့ ပရိသတ်တစ်ဦးကို ကန်ခဲ့သလို ဖီနာဘာချီအသင်းဖော် အိုဆာရီဟာ ပရိသတ်တစ်ဦးကို ကွင်းအတွင်း လဲကျအောင် ပြုလုပ်ခဲ့တာပါ။

တူရကီဘောလုံးအဖွဲ့ချုပ်ကတော့ တိုက်ခိုက်မှုမှာ ပါဝင်ခဲ့တဲ့ ဖီနာဘာချီအသင်း ကစားသမား ၃ ဦးနဲ့ ကလပ် အသင်း တာဝန်ရှိသူ ၂ ဦးကို နိုင်ငံရဲ့ ပရော်ဖက်ရှင်နယ် ဘောလုံးစည်းကမ်းထိန်းသိမ်းရေး ဘုတ်အဖွဲ့ထံ အစီရင်ခံ တင်ပြထားတယ်လို့ သိရပါတယ်။ 

တူရကီစူပါလိဂ်ဖလားကို ၁၉ ကြိမ် ရရှိထားတဲ့ ဖီနာဘာချီအသင်းဟာ ဒီရာသီ ပွဲစဉ်ပေါင်း ၃၀ ကစားအပြီးမှာ အဆင့် ၂ နေရာမှာ ရပ်တည်နေတာပါ။

ဖီနာဘာချီအသင်းဟာ ဧပြီ ၇ ရက်မှာ တူရကီစူပါဖလား ဗိုလ်လုပွဲအဖြစ် ဂါလာတာစာရေးအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: CNA

CNI Sport News

၂၀၂၄ ခုနှစ်၊ ဧပြီ ၃

ယူနိုက်တက်အသင်း နောက်ခံလူ ဗာရန်းက ဘောလုံးခေါင်းတိုက်မှုတွေကို ဆက်တိုက် ပြုလုပ်နေရတာကြောင့် နောက်ဆက်တွဲ ဆိုးကျိုးတွေကို ခံစားနေရလို့ ဘောလုံးကို ခေါင်းနဲ့မတိုက်ဖို့ သားဖြစ်သူကို အကြံပေးထားတယ်လို့ ပြောခဲ့ပါတယ်။

ဗာရန်းက “ကျနော့်ရဲ့ ၇ နှစ်အရွယ်သားက ဘောလုံးကစားပါတယ်။ ဘောလုံးကို ခေါင်းမတိုက်ဖို့ အကြံပေးထား ပါတယ်။ ဒါက ချက်ချင်းကြီး သက်ရောက်မှု မရှိရင်တောင် ရေရှည်မှာ သိသာလာပါတယ်။ ကျနော် အသက် ၁၀၀ အထိ နေရမလားဆိုတာ မသိပေမယ့် ကျနော့်ရဲ့ ခန္ဓာကိုယ်ပျက်ဆီးသွားပြီဆိုတာ ကျနော်သိပါတယ်။ ခေါင်းတိုက် ခြင်းရဲ့ အန္တရာယ်နဲ့ ပတ်သက်ပြီး အပျော်တမ်းဘောလုံးပွဲတွေနဲ့ လူငယ်တွေကို သင်ကြားဖို့လိုတယ်”လို့ ပြောခဲ့တာ ပါ။

ဗာရန်းဟာ ခေါင်းတိုက်မှုတွေကြောင့် ပြင်သစ်အသင်းအတွက် ပါဝင်ကစားပေးခဲ့တဲ့ ၂၀၁၄ ကမ္ဘာ့ဖလားပြိုင်ပွဲမှာ ခေါင်မူးပြီး ကစားခဲ့ရတဲ့အတွက် ဒီအဖြစ်အပျက်တွေကို ပိုပြီးသိရှိလာအောင်နဲ့ ပိုအကာကွယ်ပေးနိုင်ဖို့ တောင်းဆိုခဲ့တာ ဖြစ်ပါတယ်။ 

ဗာရန်းကို တွေ့ရစဉ်

အသက် ၃၀ နှစ်အရွယ်ရှိ ဗာရန်းဟာ ၂၀၁၄ ကမ္ဘာ့ဖလားပြိုင်ပွဲမှာ ပြင်သစ်အသင်းက ဂျာမနီအသင်းကို ကွာတား ဖိုင်နယ်မှာ ၁ ဂိုး-ဂိုးမရှိနဲ့ အရေးနိမ့်ခဲ့တဲ့ပွဲစဉ်နဲ့ ၂၀၂၀ ခုနှစ်က အသင်းဟောင်း ရီးရယ်လ်နဲ့ မန်စီးတီးအသင်းတို့ရဲ့ ချန်ပီယံလိဂ်ပွဲစဉ်မှာ ခေါင်းထိခိုက်ခဲ့ပေမယ့် ပါဝင်ကစားခဲ့တာပါ။

ဗာရန်းဟာ ဂျာမနီအသင်းနဲ့ ပွဲစဉ်မတိုင်ခင် ၁၆ သင်းအဆင့် ပွဲစဉ်ဖြစ်တဲ့ နိုင်ဂျီးရီးယားအသင်းနဲ့ပွဲစဉ်မှာ ခေါင်း ထိခိုက်ခဲ့ပေမယ့် အရဲစွန့်ပြီး ပါဝင်ကစားသွားခဲ့တယ်လို့ ပြောခဲ့ပါတယ်။

၂၀၂၁ ခုနှစ်၊ ဇူလိုင်က ထုတ်ပြန်ခဲ့တဲ့ လမ်းညွှန်မှု အသစ်တွေအရ အင်္ဂလန်ရှိ ပရော်ဖက်ရှင်နယ် ဘောလုံးသမား တွေဟာ လေ့ကျင့်ခန်း အစီအစဉ်မှာ တစ်ပတ်ကို ၁၀ ကြိမ်ထက် ပိုပြီးပြင်းထန်တဲ့ ခေါင်းတိုက်မှုမပြုလုပ်ဖို့ ညွှန်ကြားထားတာပါ။

ဗာရန်းဟာ လက်ရှိအချိန်မှာ ယူနိုက်တက်အသင်းအတွက် ပွဲပေါင်း ၉၂ ပွဲ ပါဝင်ကစားထားပြီး ၂ ဂိုးသွင်းယူကာ ရာသီအကုန်မှာ အသင်းကနေ ထွက်ခွာရဖွယ်ရှိနေတာ ဖြစ်ပါတယ်။

Source: BBC