CNI Sport News

၂၀၂၂ ခုနှစ်၊နိုဝင်ဘာ ၁၂

ပြင်သစ်စူပါစတား ဘတ်ပီဟာ လူမျိုးရေးခွဲခြားခံရမှုကြောင့် ယူရို ၂၀၂၀ ပြိုင်ပွဲအပြီးမှာ ပြင်သစ်လက်ရွေးစင်ကနေ နုတ်ထွက်ဖို့ စဉ်းစားခဲ့ကြောင်း ပြောလိုက်ပါတယ်။

ဘတ်ပီက “ကျနော့်ကို မျောက်လို့ထင်နေတဲ့သူတွေအတွက် ကစားပေးချင်စိတ်မရှိတော့ပါဘူး။ကျနော် မကစားချင်တော့ပါဘူး။ဒါပေမယ့် ဒီလိုမျိုးအရှုံးပေးလိုက်တာက ကောင်းတဲ့ သတင်းစကားမဟုတ်ဘူးလို့ ကျနော်ထင်ပါတယ်။ဘာကြောင့်လဲဆိုရင် ကျနော်က လူတိုင်းအတွက် စံနမူနာတစ်ခုလို ဖြစ်နေတယ်လို့ ထင်လို့ပါ။လက်ရွေးစင်ကနေ မထွက်ခွာချင်တာကြောင့် ဒါက ပြင်သစ်အသစ်ဖြစ်ပါတယ်။ကျနော်တို့ထက် ပိုသန်မာဖို့ မျိုးဆက်သစ်လူငယ်ကစားသမားတွေကို ပြောချင်တယ်” လို့ Sports Illustrated နဲ့ အင်တာဗျူးမှာ ထုတ်ပြောခဲ့တာပါ။

ဘတ်ပီဟာ ယူရို ၂၀၂၀ ပြိုင်ပွဲရဲ့ ၁၆ သင်းအဆင့်ပွဲစဉ်ဖြစ်တဲ့ ဆွစ်ဇာလန်အသင်းနဲ့ ပွဲမှာ အသင်းအတွက် အဆုံးအဖြတ်ပင်နယ်တီကို ကန်သွင်းခဲ့တာမှာ ဂိုးမဝင်ခဲ့တာဖြစ်ပါတယ်။ဒီဂိုးမဝင်မှုနဲ့အတူ ပြင်သစ်အသင်းဟာ ယူရိုပြိုင်ပွဲကနေ ထွက်ခွာခဲ့ရတာကြောင့် ဘတ်ပီဟာ လူမျိုးရေးခွဲခြားမှုအများအပြားကို ခံခဲ့ရတာပါ။ဘတ်ပီဟာ ပြင်သစ်ကနေ နုတ်ထွက်ဖို့ ဆုံးဖြတ်ချက်ကို ပြန်ပြောင်းပြီးနောက် လက်ရွေးစင်အတွက် ပြန်လည်ပါဝင်ကစားပြီး ခြေစွမ်းပြ ဂိုးတွေသွင်းယူခဲ့တာဖြစ်ပါတယ်။

ပီအက်စ်ဂျီတိုက်စစ်မှူးဟာ ၂၀၁၇ မတ်လမှာ ပြင်သစ်လက်ရွေးစင်အသင်းကြီးထံ စတင်ခေါ်ယူခံခဲ့ရတာဖြစ်ပြီး သြဂုတ်လမှာ ပထမဆုံးသွင်းဂိုးကို ရယူနိုင်ခဲ့တာပါ။ဘတ်ပီဟာ ၂၀၁၈ ကမ္ဘာ့ဖလားပြိုင်ပွဲမှာ ပြင်သစ်အသင်းမှာ ရွေးချယ်ခံခဲ့ရပြီး ခရိုအေးရှားနဲ့ ဗိုလ်လုပွဲမှာ သွင်းယူခဲ့တဲ့ ဂိုးအပါအဝင် ကမ္ဘာ့ဖလားမှာ သွင်းဂိုး ၄ ဂိုးသွင်းယူ နိုင်ခဲ့တာဖြစ်ပါတယ်။ဘတ်ပီဟာ အဆိုပါပြိုင်ပွဲရဲ့ အကောင်းဆုံးလူငယ်ကစားသမားဆုကိုလည်း ရရှိသွားခဲ့တာပါ။

ဘတ်ပီဟာ လက်ရှိအချိန်မှာ ပြင်သစ်အသင်းအတွက် ၅၉ ပွဲပါဝင်ကစားထားပြီး ၂၈ ဂိုးသွင်းယူကာ ကာတာ ကမ္ဘာ့ဖလားပြိုင်ပွဲမှာ ဘန်ဇီမာနဲ့အတူ အသင်းရဲ့ တိုက်စစ်ကို ဦးဆောင်မှာ ဖြစ်ပါတယ်။

Source:DailyMail

CNI International News

၂၀၂၂ ခုနှစ်၊ နိုဝင်ဘာ ၁၂

ယူနိုက်တက်အသင်းနည်းပြ အဲရစ်တန်ဟတ်က ဖူလ်ဟမ်နဲ့ ကစားမယ့် ပရီးမီးယားလိဂ်ပွဲမှာ ကမ္ဘာ့ဖလား အကြောင်းပြချက်ပေးတာကို လက်ခံမှာမဟုတ်ဘူးလို့ ရော်နယ်ဒို အပါအဝင် အသင်းသားတွေကို သတိပေး လိုက်ပါတယ်။

အဲရစ်တန်ဟတ်က “ဖူလ်ဟမ်နဲ့ ပွဲရဲ့ အရေးပါမှုကို ကစားသမားတွေအားလုံး သိရှိနားလည်ထား ပါတယ်။ ကမ္ဘာ့ဖလားကို ထည့်သွင်းစဉ်းစားမှာ မဟုတ်ပါဘူး။ ကျနော်တို့ အကောင်းဆုံးအသင်းနဲ့ ကစားမှာပါ။ တနင်္ဂနွေနေ့အထိ ယူနိုက်တက်ကိုပဲ စိတ်ဝင်စားရမယ်။ ယူနိုက်တက်အတွက်ပဲ ဖြစ်ရမယ်”လို့ ပြောခဲ့တာပါ။

ယူနိုက်တက်တိုက်စစ်မှူး ရော်နယ်ဒိုဟာ ဗီလာနဲ့ ကာရာဘောင်း ဖလားပွဲစဉ်မှာ ဖျားနာနေတာကြောင့် မပါဝင် နိုင်ခဲ့ပေမယ့် ဒီပွဲရဲ့ နာရီပိုင်းအကြာမှာ ထုတ်ပြန်တဲ့ ပေါ်တူဂီအသင်းရဲ့ ကမ္ဘာ့ဖလား လူစာရင်းမှာ ပါဝင်ခဲ့ပါတယ်။

အဲရစ်တန်ဟတ်ကတော့ ကမ္ဘာ့ဖလားပြိုင်ပွဲဝင်မယ့် လက်ရွေးစင်အသင်းနဲ့ ချိတ်ဆက်မှုတွေ ပြုလုပ်တာထက် ဖူလ်ဟမ်နဲ့ပွဲကို ပိုပြီး အာရုံစိုက် စေချင်နေတာပါ။

ရော်နယ်ဒိုနဲ့ ယူနိုက်တက်အသင်းကိုတွေ့ရစဉ် (Manchester United)

ဖူလ်ဟမ်နဲ့ ပွဲမှာ ရော်နယ်ဒို အဆင်သင့် ဖြစ်မလားလို့ မေးခဲ့တာမှာ “ ဒီပွဲအတွက် သူ အဆင်သင့်ဖြစ်မလား ဆိုတာ ကျနော် အာမ မခံနိုင်ပါဘူး။ သူက ဗီလာနဲ့ ပွဲတုန်းက သူဖျားနေခဲ့တာပါ။ ဒါဟာ ပြန်ကောင်းလာ နိုင်ပါ တယ်။ ရက်ပေါင်း ဒါမှမဟုတ် ရက်သတ္တပတ် ပေါင်းများစွာကြာပြီး ပြင်းထန်တဲ့ ရောဂါမျိုး မဟုတ်ပါ ဘူး”လို့ အဲရစ်တန်ဟတ်က ဖြေခဲ့တာ ဖြစ်ပါတယ်။

လက်ရှိအချိန်မှာ ကမ္ဘာ့ဖလားပြိုင်ပွဲ ကျင်းပဖို့ တစ်ပတ်သာ လိုတော့တာကြောင့် ကစားသမားတွေဟာ ကလပ် အသင်းပွဲတွေမှာ ဒဏ်ရာရမှာကို ရှောင်ရှားလိုနေကြပြီး လက်ရွေးစင် အသင်းအတွက် အပြည့်အဝ ယှဉ်ပြိုင် ချင်နေကြတာပါ။

ယူနိုက်တက်အသင်းရဲ့ အဓိက ကစားသမား အများစုကလည်း လက်ရွေးစင် အသင်းတွေမှာ ရွေးချယ်ခံထားရတာ ဖြစ်ပါတယ်။

ယူနိုက်တက်အသင်းဟာ ပြီးခဲ့တဲ့ ပရီးမီးယားလိဂ်ပွဲစဉ်မှာ ဗီလာအသင်းကို အရေးနိမ့်ခဲ့ပေမယ့် ကြားရက်က ကစားခဲ့တဲ့ ကာရာဘောင်းဖလားပွဲစဉ်မှာ ဗီလာအသင်းကို ပြန်လည် အနိုင်ရရှိခဲ့တာပါ။ ယူနိုက်တက်အသင်းဟာ အဆင့် ၄ နေရာက စပါးအသင်းနဲ့ ၃ မှတ်အကွာ ပရီးမီးယားလိဂ် အမှတ်ပေးဇယား အဆင့် ၅ နေရာမှာ ရပ်တည် နေပါတယ်။

Source: The Sun

CNI Sport News

၂၀၂၂ ခုနှစ်၊ နိုဝင်ဘာ ၁၂

အာဂျင်တီးနားအသင်းခေါင်းဆောင် မက်ဆီက လက်ရှိအသင်းဟာ ၂၀၁၄ ဗိုလ်လုပွဲရောက်ခဲ့တုန်းကအသင်းနဲ့ များစွာတူညီမှုရှိတယ်လို့ ပြောလိုက်ပါတယ်။

မက်ဆီက “၂၀၁၄ ကမ္ဘာ့ဖလားမှာ ကျနော်တို့ အလွန်ကောင်းမွန်ခဲ့ပြီး မမေ့နိုင်စရာအတွေ့အကြုံလည်းဖြစ်ခဲ့ပါ တယ်။ဒါကို ကျနော်အလွန်နှစ်သက်ပြီး အဓိကနဲ့ အရေးကြီးဆုံးအရာကတော့ ခိုင်ခိုင်မာမာနဲ့ စည်းလုံညီညွှတ်တဲ့ အသင်းအဖွဲ့ဖြစ်ဖို့ဆိုတာ အရင်ကထက်ပိုပြီး ရှင်းရှင်းလင်းလင်းသိလာပါတယ်။ဒါက ခင်ဗျားကို အရေးကြီးတဲ့ ရည်မှန်းချက်ပန်းတိုင်ဆီ အရောက်ပို့ဆောင်ပေးပါတယ်။ဒီနေ့မှာတော့ လက်ရှိအသင်းနဲ့ ၂၀၁၄ က အသင်းတို့ကြား မှာ များစွာတူညီမှုရှိတယ်လို့ ခံစားရကြောင်း” Ole ကို ပြောခဲ့တာပါ။

မက်ဆီဟာ အခုနှစ်ကမ္ဘာ့ဖလားပြိုင်ပွဲမှာ အာဂျင်တီးနားအသင်းကို ဦးဆောင်မှာဖြစ်ပြီး အသင်းကလည်း ပြိုင်ပွဲ မတိုင်ခင်ကတည်းက ဗိုလ်စွဲဖို့ ရေပန်းအစားဆုံးအသင်းတွေထဲက တစ်သင်းဖြစ်နေခဲ့ပါတယ်။မက်ဆီဟာ ၂၀၁၄ ကမ္ဘာ့ဖလားတုန်းက အာဂျင်တီးနားနဲ့အတူ ဗိုလ်လုပွဲအထိ တက်နိုင်ခဲ့ပြီး ချန်ပီယံဆုရယူဖို့ နီးစပ်ခဲ့တာပါ။ ဒါပေမယ့် ဂျာမနီအသင်းကို ဂေါ့ဇီရဲ့ တစ်လုံးတည်းသောသွင်းဂိုးနဲ့ အရေးနိမ့်ပြီး ချန်ပီယံဆုကို လက်လွှတ်ခဲ့ရတာ ဖြစ်ပါတယ်။

ပီအက်စ်ဂျီတိုက်စစ်မှူးဟာ ဒီရာသီမှာ ပုံစံကောင်းတွေပြသနေပြီး ပြိုင်ပွဲစုံ ၁၈ ပွဲမှာ ၁၂ ဂိုးသွင်းယူကာ ၁၄ ဂိုး ဖန်တီးထားတာပါ။မက်ဆီကတော့ ဒီကမ္ဘာ့ဖလားဟာ သူ့ရဲ့ နောက်ဆုံးကမ္ဘာ့ဖလားပြိုင်ပွဲလို့ ဝန်ခံထားပြီး ကစားသမားဘ၀ ပထမဆုံးအကြိမ် ဒီဆုဖလားကို ကိုင်မြှောက်နိုင်ဖို့ စိတ်ဆန္ဒပြင်းပြနေတာဖြစ်ပါတယ်။ အာဂျင်တီးနားအသင်းဟာ ကမ္ဘာ့ဖလားချန်ပီယံဆုကို ၁၉၈၆ က မက္ကဆီကိုမှာ နောက်ဆုံးရယူထားတာကြောင့် ကမ္ဘာ့ဖလားချန်ပီယံဆုကို ပြန်လည်ရယူနိုင်ဖို့ ပစ်မှတ်ထားနေတာပါ။

တောင်အမေရိကအသင်းဟာ လက်ရှိအချိန်မှာ ပြိုင်ပွဲစုံ ၃၅ ပွဲဆက်ရှုံးပွဲမရှိဖြတ်သန်းနေပြီး အီတလီရဲ့ ၃၇ ပွဲဆက် ရှုံးပွဲမရှိစံချိန်ကို ကျော်ဖြတ်နိုင်ဖို့လည်း နီးစပ်နေတာဖြစ်ပါတယ်။အာဂျင်တီးနားအသင်းဟာ ၂၀၂၂ ကမ္ဘာ့ဖလား ပြိုင်ပွဲအုပ်စုအဖွင့်ပွဲစဉ်အဖြစ် နိုဝင်ဘာလ ၂၂ ရက်မှာ ဆော်ဒီအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ နိုဝင်ဘာ ၁၁

ဒိန်းမတ်ဘောလုံးအဖွဲ့ချုပ်က ကမ္ဘာ့ဖလားပြိုင်ပွဲမှာ “လူသားအားလုံးအတွက် လူ့အခွင့်အရေး”ဆိုတဲ့ စာသားပါ ရှပ်အင်္ကျီဝတ်ဆင်ပြီး လေ့ကျင့်မှုတွေ ပြုလုပ်ဖို့ တောင်းဆိုတာကို ဖီဖာက ပယ်ချခဲ့တယ်လို့ ပြောပါတယ်။

ဒိန်းမတ်ဘောလုံးအဖွဲ့ချုပ် အမှုဆောင်အရာရှိချုပ်က “ ကျနော်တို့ ကစားသမားတွေ လေ့ကျင့်ရေး အစီအစဉ်မှာ ဒီလိုမျိုး လုပ်ဆောင်ဖို့ တောင်းဆိုခဲ့တာကို နည်းပညာဆိုင်ရာ အကြောင်းပြချက်တွေကြောင့်ဆိုပြီး ပယ်ချခဲ့ပါ တယ်။ ဒါဟာ ဝမ်းနည်းစရာ ကောင်းပါတယ်”လို့ Ritzau သတင်းအေဂျင်စီကို ပြောခဲ့တာပါ။

ဖီဖာကတော့ ဒါနဲ့ ပတ်သက်ပြီး မှတ်ချက်ပေးဖို့ တောင်းဆိုတာကို ငြင်းဆန်ထားပါတယ်။

ဖီဖာရဲ့ စည်းမျဉ်းတွေမှာ အသင်းတွေအနေနဲ့ နိုင်ငံရေး၊ ဘာသာရေး၊ ပုဂ္ဂိုလ်ရေးဆိုင်ရာ ကြွေးကြော်သံတွေ၊ ထုတ် ပြန်ချက် ဒါမှမဟုတ် ရုပ်ပုံတွေကို အသုံးပြုခွင့် မရှိဘူးဆိုပြီး ပါရှိတာပါ။

ဒိန်းမတ်အသင်းကိုတွေ့ရစဉ် (Sports)

“လူသားအားလုံးအတွက် လူ့အခွင့်အရေးဆိုတဲ့ စာသားဟာ လူတိုင်းအတွက်ဖြစ်ပြီး နိုင်ငံရေးမဟုတ်ပါဘူး။ ဒါပေမယ့် လူတိုင်းက ပံ့ပိုးပေးနိုင်တဲ့ အရာတစ်ခုပါ”လို့ ဒိန်းမတ်ဘောလုံးအဖွဲ့ချုပ်က ပြောခဲ့တာ ဖြစ်ပါတယ်။

ကမ္ဘာ့ဖလားကျင်းပမယ့် ကာတာနိုင်ငံအပေါ်မှာ ဝေဖန်မှုတွေ မြင့်မားနေတာကြောင့် ပြိုင်ပွဲဝင် နိုင်ငံတွေအနေနဲ့ ဘောလုံးကိုပဲ အာရုံစိုက်ကြဖို့ ဖီဖာက ပြောထားပါတယ်။

ဒိန်းမတ်အသင်း ဂျာစီထုတ်လုပ်သူ ဟမ်းမဲလ်က ကမ္ဘာ့ဖလား ပြိုင်ပွဲဝင်မယ့် အသင်းဝတ်စုံပေါ်မှာ အသေးစိတ် အချက်အလက်တွေကို လျှော့ချခဲ့ပြီး ကာတာရဲ့ လူ့အခွင့်အရေး မှတ်တမ်းကို ဆန့်ကျင်တဲ့ အနက်ရောင် ဝတ်စုံကို ပြိုင်ပွဲမတိုင်ခင် ကတည်းက ထုတ်ပြသွားခဲ့တာပါ။

ကမ္ဘာ့ဖလားပြိုင်ပွဲ ကျင်းပဖို့ နီးကပ်လာနေပေမယ့် အခုအချိန်ထိ ဝေဖန်သံတွေဟာ ပိုပြီး များပြားလာနေတာ ဖြစ်ပါတယ်။

ဖီဖာဥက္ကဋ္ဌဟောင်း ဆပ်ဘလတ္တာက ကမ္ဘာ့ဖလားအိမ်ရှင်အဖြစ် ကာတာကို ရွေးချယ်ခဲ့တာဟာ အမှားဖြစ်ခဲ့တယ် ဆိုပြီး မကြာသေးခင်က ပြောခဲ့ပါတယ်။ ကာတာကမ္ဘာ့ဖလားကို နိုဝင်ဘာလ ၂၀ ရက်မှာ စတင်ကျင်းပတော့မှာ ဖြစ်ပါတယ်။

Source: CNA

CNI Sport News

၂၀၂၂ ခုနှစ်၊ နိုဝင်ဘာ ၁၁

ဘရာဇီးလ်ဂန္တဝင် ပီလီက ကာတာကမ္ဘာ့ဖလားပြိုင်ပွဲမှာ ချန်ပီယံဆုကို ရယူပြီး ဘရာဇီးလ်အင်္ကျီရဲ့ ရင်ဘတ်မှာ ၆ ခုမြောက် ကြယ် ထပ်ထည့်ဖို့ ပြောလိုက်ပါတယ်။

ပီလီက “ကျနော် ဘရာဇီးလ်အသင်း အင်္ကျီကို နောက်ဆုံး ဝတ်ဆင်ခဲ့တုန်းက ကြယ်ပွင့် ၃ ခု တပ်နိုင်အောင် လုပ်ဆောင်ပေးခဲ့ပါတယ်။ အခု ကျနော်တို့ဆီမှာ ကြယ် ၅ ခု ရှိပါတယ်။ ၆ ခုမြောက် ကြယ်ကို ထပ်တည့် နိုင်ဖို့အတွက် မစောင့်ဆိုင်းနိုင်တော့ဘူး”လို့ ပြောပါတယ်။

ပီလီဟာ ဘရာဇီးလ်အသင်းကို ၁၉၅၈၊ ၁၉၆၂ နဲ့ ၁၉၇၀ ကမ္ဘာ့ဖလားပြိုင်ပွဲတွေမှာ ချန်ပီယံဆု ရယူနိုင်အောင် စွမ်းဆောင်ပေးနိုင်ခဲ့ပါတယ်။

ဘရာဇီးလ်အသင်းဟာ ကမ္ဘာ့ဖလားချန်ပီယံဆုကို ၂၀၀၂ က နောက်ဆုံး ရယူခဲ့တာဖြစ်ပြီး နှစ်ပေါင်း ၂၀ ကျော် အကြာမှာ ပထမဆုံးအကြိမ် ပြန်လည်ရယူနိုင်ဖို့ ပစ်မှတ်ထားနေပါတယ်။ ပီလီက နည်းပြတိုင်တီ ရွေးချယ်ထားတဲ့ ကစားသမား ၂၆ ဦးကို ယုံကြည်မှု အပြည့်ရှိတယ်လို့လည်း ပြောပါတယ်။

နည်းပြတိုင်တီနဲ့ ဘရာဇီးလ်ကစားသမား နေမာကိုတွေ့ရစဉ်

ပီလီက “ ကျနော်ဒီ အသင်းကို ယုံကြည်မှုအပြည့်နဲ့ မဲပေးချင်ပါတယ်။ နိုင်ငံအသင်း ကံကောင်းပါစေလို့ ကျနော် ဆန္ဒပြုကြောင်း” ပြောခဲ့ပါတယ်။

အခုဆိုရင် ဘရာဇီးလ်အသင်းဟာ ကမ္ဘာ့အဆင့် ရပ်တည်မှု အဆင့် ၁ နေရာမှာ ရပ်တည်နေပြီး ကမ္ဘာ့ဖလား ခြေစစ်ပွဲတောင် အမေရိကဇုန်မှာ ရှုံးပွဲမရှိ ဖြတ်သန်းခဲ့တာကြောင့် ကမ္ဘာ့ဖလား ချန်ပီယံဆု ရယူနိုင်ဖို့ ရေပန်း စားနေတဲ့ အသင်းတွေထဲမှာ ပါဝင်နေတာ ဖြစ်ပါတယ်။

ကမ္ဘာ့ဖလား ချန်ပီယံဆု အများဆုံးရထားတဲ့ ဘရာဇီးလ်အသင်းဟာ အခုနှစ်ပြိုင်ပွဲမှာ ဆားဘီးယား၊ ဆွစ်ဇာလန်၊ ကင်မရွန်းတို့နဲ့ တစ်အုပ်စုတည်း ကျရောက်နေတာပါ။ ဘရာဇီးလ်အသင်းဟာ အုပ်စုအဖွင့် ပွဲစဉ်အဖြစ် နိုဝင်ဘာလ ၂၄ ရက်မှာ ဆားဘီးယားအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: CNA

CNI Sport News

၂၀၂၂ ခုနှစ်၊ နိုဝင်ဘာ ၁၁

ရော်နယ်ဒိုဟာ ၂၀၂၂ ကမ္ဘာ့ဖလားပြိုင်ပွဲဝင်မယ့် ပေါ်တူဂီအသင်းရဲ့ ကစားသမား ၂၆ ဦး စာရင်းမှာ ပါဝင်ခဲ့တာ ကြောင့် ဒီကမ္ဘာ့ဖလားဟာ သူ့အတွက် ၅ ကြိမ်မြောက် ဝင်ရောက်ယှဉ်ပြိုင်မယ့် ကမ္ဘာ့ဖလား ဖြစ်လာခဲ့ပါတယ်။

ရော်နယ်ဒိုဟာ ၂၀၀၆ ကမ္ဘာ့ဖလားပြိုင်ပွဲကစပြီး ပေါ်တူဂီအတွက် စတင်ပါဝင်ခဲ့ကာ ၂၀၁၀၊ ၂၀၁၄ နဲ့ ၂၀၁၈ ပြိုင်ပွဲ တွေမှာလည်း ပါဝင်ခဲ့တာပါ။

အသက် ၃၇ နှစ်အရွယ်ရှိ ရော်နယ်ဒိုဟာ ဒီရာသီ ယူနိုက်တက် အသင်းအတွက် ၃ ဂိုး သာ သွင်းယူထားနိုင်ပြီး ပုံစံ ကောင်း ပြသနိုင်ဖို့ ရုန်းကန်နေရပေမယ့် ကမ္ဘာ့ဖလားပြိုင်ပွဲမှာတော့ ပေါ်တူဂီအသင်းကို ဦးဆောင်မှာ ဖြစ်ပါတယ်။ ကာတာကမ္ဘာ့ဖလားဟာ ရော်နယ်ဒိုအတွက် နောက်ဆုံး ကမ္ဘာ့ဖလားပြိုင်ပွဲ ဖြစ်လာနိုင်ပါတယ်။

ရော်နယ်ဒိုဟာ ကမ္ဘာ့ဖလားပြိုင်ပွဲမှာ ၁၇ ပွဲ ကစားထားပြီး ၇ ဂိုး သွင်းယူထားတာ ဖြစ်ပြီး ဒီပြိုင်ပွဲမှာ ဂိုးသွင်း ယူနိုင် မယ်ဆိုရင် ကမ္ဘာ့ဖလားပြိုင်ပွဲ ၅ ကြိမ်ဆက် ဂိုးသွင်းယူနိုင်တဲ့ ပထမဆုံး ကစားသမားအဖြစ် မှတ်တမ်းဝင်မှာ ဖြစ်ပါတယ်။

ပေါ်တူဂီအသင်း နည်းပြ ဖာနန်ဒိုဆန်းတို့စ်နဲ့ရော်နယ်ဒိုကိုတွေ့ရစဉ် (Sports)

ပေါ်တူဂီနည်းပြ ဖာနန်ဒိုဆန်းတို့စ်က “ ရော်နယ်ဒို အပါအဝင် အခုခေါ်ယူခဲ့တဲ့ ကစားသမားတွေ အားလုံးဟာ အောင်မြင်မှုတွေ ဆာလောင်နေပြီး ပေါ်တူဂီကို ကမ္ဘာ့ချန်ပီယံဖြစ်အောင် လုပ်ဆောင်ပေးမယ့်သူတွေ”လို့ ပြောခဲ့ပါတယ်။

ပေါ်တူဂီအသင်း လူစာရင်းမှာ ပရီးမီးယားလိဂ် ကစားသမား ၁၀ ဦးအထိ ပါဝင်ခဲ့ပါတယ်။ သူတို့တွေကတော့ ရော်နယ်ဒိုရဲ့ ယူနိုက်တက်အသင်းဖော် ဘရူနိုဖာနန်ဒက်စ်နဲ့ ဒါလော့၊ မန်စီးတီးအသင်းက ရူဘင်ဒီယက်စ်၊ ကန်ဆယ်လို နဲ့ ဘာနာဒိုဆေးလ်ဗား၊ ဖူလ်ဟမ်က ပယ်လင်ဟာ၊ ဝုလ်ဗ်စ်က ဂျိုဆီဆာ၊ ရူဘင်နာဗက်စ်နဲ့ နူနက်စ်တို့ ဖြစ်ပါတယ်။

အသက် ၃၉ နှစ်အရွယ်ရှိ ဝါရင့်နောက်ခံလူ ပီပီကလည်း ပေါ်တူဂီ လူစာရင်းမှာ ပါဝင်ခဲ့ပြီး မော်တင်ဟို၊ ဂွီဒက်စ်နဲ့ ရီနာတိုဆန်းချက်စ် တို့ကတော့ လူစာရင်းမှာ မပါဝင်ခဲ့ပါဘူး။

ပေါ်တူဂီအသင်းဟာ ကာတာကမ္ဘာ့ဖလားပြိုင်ပွဲမှာ ဥရုဂွေး၊ ဂါနာ၊ တောင်ကိုရီးယားတို့နဲ့ တစ်အုပ်စုတည်း ကျရောက်နေတာ ဖြစ်ပြီး အုပ်စုအဖွင့်ပွဲစဉ်အဖြစ် နိုဝင်ဘာလ ၂၄ ရက်မှာ ဂါနာအသင်းနဲ့ ယှဉ်ပြိုင်ရမှာ ဖြစ်ပါ တယ်။

Source: BBC

CNI Sport News

၂၀၂၂ ခုနှစ်၊ နိုဝင်ဘာ ၁၁

ဖီဖာအထွေထွေအတွင်းရေးမှူး ဖာတီမာဆာမိုရာက မာနေး ကမ္ဘာ့ဖလားကစားနိုင်ဖို့အတွက် ပယောဂဆရာတွေပါ အသုံးပြုသွားမယ်လို့ ပြောလိုက်ပါတယ်။

ဖာတီမာဆာမိုရာက “ဒီအတွက် ကျမတို့ဟာ ပယောဂဆရာတွေကို အသုံးပြုသွားမှာပါ။ဒါက ထိရောက်မှု ရှိ၊ မရှိ ဆိုတာမသိပေမယ့် ဒီလိုအခြေအနေမှာ ဘယ်လိုနည်းလမ်းပဲဖြစ်ဖြစ် ကျမတို့ အသုံးပြုသွားမှာပါ။ကျမတို့ဟာ အံသြဖွယ်အရာတွေကို မျှော်လင့်နေကြပါတယ်။သူကမ္ဘာ့ဖလားပြိုင်ပွဲမှာ ရှိရမှာပါ” လို့ Europe 1 ကိုပြောခဲ့တာပါ။

ဆီနီဂေါကြယ်ပွင့် မာနေးဟာ ဘိုင်ယန်မြူးနစ်နဲ့ ဝါဒါဘရီမင်တို့ ကစားခဲ့တဲ့ ပွဲစဉ်ရဲ့ ပွဲချိန်မိနစ် ၂၀ မှာတင် ရခဲ့တဲ့ ဒဏ်ရာကြောင့် ပွဲကိုဆက်ကစားနိုင်ခြင်းမရှိတော့တာဖြစ်ပါတယ်။အဲဒါကြောင့် ဆေးအဖွဲ့ရဲ့ ကုသမှုခံယူခဲ့ရပြီး လူစားလဲခဲ့ရတာပါ။မာနေးရဲ့ ဒဏ်ရာအခြေအနေကို စကန်ဖတ်စစ်ဆေးမှုတွေ ပြုလုပ်ခဲ့တာမှာ ညို့သကျည်း ဒဏ်ရာရရှိနေတာကြောင့် ကမ္ဘာ့ဖလားပြိုင်ပွဲကို ပါဝင်နိုင်မှာမဟုတ်ဘူးလို့ သတင်းတွေမှာ ဖော်ပြထားတာ ဖြစ်ပါတယ်။

ဘိုင်ယန်မြူးနစ်က မာနေးရဲ့ဒဏ်ရာကို နောက်ထပ်စမ်းသပ်စစ်ဆေးမှုတွေ ပြုလုပ်သွားမှာဖြစ်ပြီး ဆီနီဂေါအသင်း ဆေးအဖွဲ့ဝင်တွေနဲ့ ဆက်သွယ်မှုတွေပြုလုပ်ထားတယ်လို့ ထုတ်ပြန်ခဲ့တာပါ။ ဖီဖာအထွေထွေ အတွင်းရေးမှူး ဖာတီမာဆာမိုရာဟာ ဆီနီဂေါနိုင်ငံသူ ဖြစ်တာကြောင့် မာနေး ကမ္ဘာ့ဖလားပြိုင်ပွဲမှာ ပါဝင်ကစားနိုင်ဖို့ သူမက လည်း မျှော်လင့်နေတာဖြစ်ပါတယ်။ဆီနီဂေါနည်းပြဆစ်ဆီက သောကြာနေ့မှာ ထုတ်ပြန်မယ့် ကမ္ဘာ့ဖလား လူစာရင်းမှာ မာနေးကို ထည့်သွင်းသွားမယ်လို့ သိရတာပါ။

မာနေးဟာ ဆီနီဂေါအသင်းရဲ့ အဓိကကစားသမားဖြစ်ပြီး နိုင်ငံအသင်း အာဖရိကဖလားရယူနိုင်တာနဲ့ ကမ္ဘာ့ဖလား ဝင်ခွင့်ရခဲ့တာမှာ သူ့ရဲ့စွမ်းဆောင်ရည်တွေက အဓိကကျခဲ့တာဖြစ်ပါတယ်။မာနေးဟာ ပြီးခဲတဲ့ရာသီက ပြသခဲ့တဲ့ ခြေစွမ်းတွေကြောင့်လည်း ၂၀၂၂ ဘောလွန်းဒီအောဆုပေးပွဲမှာ ဘန်ဇီမာနောက် ဒုတိယ ရရှိခဲ့တာပါ။ ကာတာ ကမ္ဘာ့ဖလားပြိုင်ပွဲမှာ မာနေးပါဝင်ကစားနိုင်ဖို့အတွက် ဆီနီဂေါပြည်သူတွေအပြင် ပရိသတ်တွေအားလုံးကလည်း အလိုရှိနေကြတာဖြစ်ပါတယ်။

ဆီနီဂေါအသင်းဟာ ကမ္ဘာ့ဖလားပြိုင်ပွဲရဲ့ အုပ်စု A မှာ အိမ်ရှင်ကာတာ၊ နယ်သာလန်၊ အီကွေဒေါတို့နဲ့ တစ်အုပ်စု တည်းကျရောက်နေပြီး အဖွင့်ပွဲစဉ်အဖြစ် နယ်သာလန်နဲ့ နိုဝင်ဘာလ ၂၁ ရက်မှာ ယှဉ်ပြိုင်ရမှာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ နိုဝင်ဘာ ၁၀

ရော်နယ်ဒိုဟာ ယူနိုက်တက်အသင်းထံ ပေါင် ၁၂ သန်းနဲ့ ၂၀၀၃ က မပြောင်းရွှေ့ခင်မှာ ဘောလုံးလောကကနေ ထွက်ခွာလုနီးပါး ဖြစ်ခဲ့တယ်လို့ သိရပါတယ်။

အဲဒီ အချိန်တုန်းက ရော်နယ်ဒိုဟာ စပို့တင်းလစ္စဘွန်း အသင်းရဲ့ ဆယ်ကျော်သက် ကစားသမားတစ်ဦးဖြစ်ပြီး အနိုင်ကျင့်ခံရတာကြောင့် ဘောလုံးလောကကနေ ထွက်ခွာချင်ခဲ့တာလို့ သတင်းတွေမှာ ဖော်ပြထားတာပါ။

စပို့တင်းမှာ အကယ်ဒမီ ကစားသမားအဖြစ် ရှိနေချိန်အတွင်း သူ့ရဲ့ စကားပြောဆိုမှု လေယူလေသိမ်းကို တခြား ကောင်လေးတွေက ဝိုင်းဝန်း လှောင်ပြောင်ခဲ့ကြတာ ဖြစ်ပါတယ်။ သူဟာ မိသားစုကို လွမ်းနေတာကြောင့်လည်း နေ့တိုင်းငိုခဲ့ရတယ်လို့ The Sun က ဖော်ပြခဲ့ပါတယ်။

နောက်ဆုံးမှာတော့ ရော်နယ်ဒိုဟာ ကျောင်းကနေ ထွက်ခဲ့ပြီး ဘောလုံးကိုသာ အာရုံစိုက်ခဲ့လို့ စပို့တင်း ပထမ အသင်းကြီးဆီ ခေါ်ယူခြင်း ခံခဲ့ရပါတယ်။ ပေါ်တူဂီ ကစားသမားဟာ စပို့တင်းမှာ ရှိတဲ့အချိန် အတွင်းမှာ သူ လိုချင်တဲ့ အချိန်တိုင်း အားကစားခန်းမကို အသုံးပြုလို့ မရတာကြောင့် မပျော်မရွှင် ဖြစ်ခဲ့ရပါသေးတယ်။

အားကစားခန်းမကို အသုံးပြုတဲ့ ကလေးတွေနဲ့ ပက်သက်ပြီး ကလပ်အသင်းက တင်းကျပ်တဲ့ မူဝါဒတွေကို ချမှတ်ထားတာ ဖြစ်ပါတယ်။

ရော်နယ်ဒို ယူနိုက်တက်နဲ့ စပို့တင်းလစ္စဘွန်း အသင်းတို့မှာ ကစားစဉ် (Ronaldo)

ကလပ် အကယ်ဒမီ အမှုဆောင် အော်ရယ်လီယိုပါရဲရားက “ ကျနော်တို့ဟာ ကလေးတွေကို အားကစားရုံမှာ ဘယ်တုန်းကမှ မထားခဲ့ပါဘူး။ ဒါဟာ ကျနော်တို့ ကစားသမားတွေရဲ့ ရှည်ကြာတဲ့ ကစားသမားဘဝ နောက် ကွယ်က လျှို့ဝှက်ချက်ပါပဲ။ သဘာဝအတိုင်း ကြီးထွားဖွံ့ဖြိုးလာဖို့က ပိုပြီးအရေးကြီးပါတယ်”လို့ ပြောပါတယ်။

ရော်နယ်ဒိုဟာ အလေးမ လေ့ကျင့်ခန်းတွေ ပြုလုပ်ဖို့ ညဘက်တွေမှာ ထွက်လာခဲ့ပြီး သူ့ရဲ့ လုပ်ဆောင်မှုတွေကို သိရှိခဲ့လို့ အပြစ်ပေးတဲ့ အနေနဲ့ ထိန်းသိမ်းထားခဲ့တာ ဖြစ်ပါတယ်။

ရော်နယ်ဒို အနေနဲ့ ဒီလိုမျိုး လုပ်ဆောင်မှာကို တားဆီးတဲ့ အနေနဲ့ အားကစားခန်းမရဲ့ တံခါးတွေကို သော့ခ လောက်နဲ့ သော့ခတ်ခဲ့ပါတယ်။

ဒါပေမယ့် ရော်နယ်ဒို ကတော့ ရပ်တန့်သွားခြင်းမရှိပဲ ပိုမိုသန်မာလာစေဖို့ အရာအားလုံးကို ကြိုးစား လုပ်ဆောင်ခဲ့ ပါတယ်။ ရော်နယ်ဒိုဟာ ဒီလိုလုပ်ဆောင်မှုတွေကြောင့် သူ့ရဲ့ ခန္ဓာကိုယ် အချိုးအစားကို အခုအချိန်ထိ ထိန်းသိမ်း ထားနိုင်ခဲ့တာပါ။

ပေါ်တူဂီ ကစားသမားဟာ အသက် ၃၈ နှစ်ပြည့်ဖို့ နီးစပ်နေပေမယ့် အခုအချိန်ထိ ထိပ်တန်းအဆင့်မှာ ကစား နိုင်သေးတယ်ဆိုတာကို အကောင်းဆုံး ကြိုးစားပြီး သက်သေပြနေပါတယ်။

Source: Sportbible

CNI Sport News

၂၀၂၂ ခုနှစ်၊ အောက်တိုဘာ ၁၀

ဝေးလ်စ်လက်ရွေးစင်အသင်းနည်ပြ ရော့ဘ်ပေ့ချ်က ဂါရတ်ဘေးလ်အနေနဲ့ ၉ ရက်အတွင်းကစားရမယ့် ကမ္ဘာ့ ဖလားပြိုင်ပွဲ အုပ်စု ၃ ပွဲစလုံးကို ကြံခိုင်မှုအပြည့်နဲ့ ပါဝင်ကစားနိုင်မလားဆိုတာ သူမသိဘူးလို့ ဝန်ခံလိုက်ပါတယ်။

ရော့ဘ်ပေ့ချ်က “ဒါက ဒေါ်လာသန်းချီတန်တဲ့ မေးခွန်းပါ။ကျနော်တော့ မသိပါဘူး။ပွဲတစ်ပွဲချင်းစီကို အကဲဖြတ်ပြီး သွားရမှာပါ။ကျနော်တို့ဟာ ပထမပွဲကို အပြည့်အဝအာရုံစိုက်ထားပါတယ်။အမေရိကန်နဲ့ အဖွင့်ပွဲမှာ အရှုံးပေး သွားမှာမဟုတ်ဘဲ အပေါင်းလက္ခဏာဆောင်တဲ့ ရလဒ်နဲ့ စတင်နိုင်ဖို့ မျှော်လင့်ထားပါတယ်။ဒုတိယပွဲအတွက် လည်း ရှေ့ဆက်သွားဖို့ အစီအစဉ်ရှိပါတယ်။သူပါဝင်နိုင်တယ်ဆိုရင်တော့ အလွန်ကောင်းပါတယ်။ မပါဝင်နိုင်ရင် လည်း ကျနော်တို့ စီမံခန့်ခွဲသွားရမှာပါ”လို့ ပြောခဲ့တာပါ။

ဂါရတ်ဘေးလ်ဟာ မေဂျာလိဂ်ကလပ် လော့စ်အိန်ဂျလိစ်အသင်းကို ပြောင်းရွှေ့ပြီးကတည်းက ၂ ပွဲသာ ပွဲစ ကတည်းက ပါဝင်ခွင့်ရခဲ့ပြီး ပွဲချိန်ပြည့်လည်း ပါဝင်မကစားနိုင်ခဲ့ပါဘူး။သူဟာ ကြံ့ခိုင်မှုပိုင်းကောင်းမွန်ဖို့ ရုန်းကန် နေရပေမယ့် ကာတာကမ္ဘာ့ဖလားမှာ ဝေးလ်စ်အသင်းကို ဦးဆောင်မှာ ဖြစ်ပါတယ်။ဂါရတ်ဘေးလ်ဟာ ပြီးခဲ့တဲ့ မေဂျာလိဂ်ဖလားဗိုလ်လုပွဲမှာ လော့စ်အိန်ဂျလိစ်အတွက် နောက်ကျချေပဂိုးသွင်းပြီး အသင်းကို ဆုဖလား ရရှိ အောင် စွမ်းဆောင်ပေးနိုင်ခဲ့တာပါ။

ရော့ဘ်ပေ့ချ်က “ဘေးလ်က ပွဲအပေါ်မှာ ချက်ချင်းအကျိုးသက်ရောက်မှုရှိတာဖြစ်ပြီး ပြိုင်ဘက်နည်းပြတွေက ပွဲစာရွက်ပေါ်မှာ သူ့နာမည်ကို တွေ့လိုက်တာနဲ့ သူတို့သိပါတယ်။ဘေးလ်ဟာ ကျနော်တို့ အောင်မြင်မှုရအောင် လုပ်ဆောင်ပေးမယ့် စွမ်းအားရှိတယ်” လို့ ပြောခဲ့တာဖြစ်ပါတယ်။

ဝေးလ်စအသင်းဟာ နှစ်ပေါင်း ၆၄ နှစ်အကြာမှ ပထမဆုံး ကမ္ဘာ့ဖလားအဖြစ် အခုနှစ်ပြိုင်ပွဲကို ဝင်ရောက် ယှဉ်ပြိုင် မှာပါ။ဝေးလ်စ်အသင်းရဲ့ လူစာရင်းမှာ တံကောက်ကြော ဒဏ်ရာရနေတဲ့ ဆွမ်ဆီးကွင်းလယ်လူ ဂျိုးအလန်လည်း ပါဝင်လာခဲ့တာဖြစ်ပါတယ်။ဒါ့အပြင် နာမည်ကြီး ကစားသမားတွေဖြစ်တဲ့ ရမ်ဆေး၊ ဘန်ဒေးဗီးစ်၊ ဒန်နီးဝါတ့်၊ ဒန်နီရယ်လ်ဂျိမ်းစ်တို့လည်း ပါဝင်လာခဲ့တာပါ။

ဝေးလ်စ်အသင်းဟာ ၂၀၂၂ ကမ္ဘာ့ဖလားပြိုင်ပွဲရဲ့ အုပ်စု B မှာ အင်္ဂလန်၊ အမေရိကန်၊ အီရန်တို့နဲ့ တစ်အုပ်စုတည်း ကျရောက်နေတာ ဖြစ်ပါတယ်။

Source:DailyMail