CNI Sport News

၂၀၂၂ ခုနှစ်၊ နိုဝင်ဘာ ၂

စပါးအသင်းတိုက်စစ်မှူး ဆွန်ဟောင်မင်ဟာ မာဆေးလ်အသင်းနဲ့ ကစားခဲ့တဲ့ ချန်ပီယံလိဂ်ပွဲမှာ ဦးခေါင်းဒဏ်ရာ ရရှိသွားခဲ့တာကြောင့် ပထမပိုင်းမှာတင် လူစားလဲခဲ့ရတာဖြစ်ပါတယ်။

စပါးအသင်းက ၂ ဂိုး- ၁ ဂိုးနဲ့ အနိုင်ရခဲ့တဲ့ ဒီပွဲမှာ ဆွန်ဟောင်မင်ဟာ ဘောလုံးကို ခုန်ပြီး ခေါင်းတိုက်တာမှာ မာဆေးလ်နောက်ခံလူ အမ်ဘမ်ဘာနဲ့ ထိခိုက်မိခဲ့တာပါ။ ဒီလို ထိခိုက်မိမှုကြောင့် ပွဲကို ဆက်ကစားနိုင်ခြင်း မရှိတော့တဲ့အတွက် ဘစ်ဆိုးမားနဲ့ လူစားလဲခံရတာဖြစ်ပါတယ်။

စပါးအသင်းဟာ ဒီပွဲအနိုင်ရလဒ်ကြောင့် ချန်ပီယံလိဂ် ၁၆ သင်းအဆင့်ကို တက်သွားခဲ့ပေမယ့် ဆွန်ဟောင်မင်ရဲ့ အခြေအနေအတွက် စိုးရိမ်မှုတွေရှိခဲ့တာပါ။

ကမ္ဘာ့ဖလားပြိုင်ပွဲနီးကပ်လာချိန်မှာ အဓိကကစားသမားအများအပြားဟာ ဒဏ်ရာကြောင့် မပါဝင်နိုင်ကြတော့တာ ကြောင့် ဆွန်ဟောင်မင်ရဲ့ ဒဏ်ရာရရှိမှုဟာ တောင်ကိုရီးယားအတွက် စိုးရိမ်ပူပန်မှုတွေ ဖြစ်စေခဲ့ပါတယ်။ စပါး အသင်းလက်ထောက်နည်းပြ စတယ်လီနီက ဆွန်ဟောင်မင်ရဲ့ ဒဏ်ရာအခြေအနေကို စမ်းသပ်မှုတွေပြုလုပ်ရမှာ ဖြစ်လို့ အခုအချိန်မှာ သူ့အခြေအနေဘယ်လိုလဲဆိုတာ မသိဘူးလို့ ပြောခဲ့တာပါ။

စတယ်လီနီက “ဒီအချိန်မှာတော့ သူ့အခြေအနေကို ကျနော်တို့မသိသေးပါဘူး။ဆေးဘက်ဆိုင်ရာအကဲဖြတ်မှုကို စောင့်ကြည့်ရမှာဖြစ်ပြီး မနက်ဖြန်အထိ ဒါကိုစောင့်ရမှာပါ။ဆွန်က အခုအချိန်မှာ ကောင်းမွန်တယ်လို့ ခံစားနေရ ပါတယ်။အဝတ်လဲခန်းထဲမှာ သူ့ကို တွေ့မြင်လိုက်ရပါတယ်။သူလည်း ကျနော်တို့နဲ့အတူ အောင်ပွဲခံခဲ့ပါတယ်။ ဒါကြောင့် မနက်ဖြန်ကို ကျနော်တို့စောင့်ဆိုင်းရပါမယ်။သူ့ရဲ့မျက်လုံးကတော့ အနည်းငယ်ရောင်နေတယ်” လို့ ပွဲအပြီးမှာ ပြောခဲ့ပါတယ်။

ဆွန်ဟောင်မင်ဟာ ဒဏ်ရာကြောင့် ဒီတစ်ပတ် လီဗာပူးလ်နဲ့ ကစားမယ့် ပရီးမီးယားလိဂ်အရေးကြီးပွဲကို လွဲချော် နိုင်တယ်လို့ သတင်းတွေမှာ ဖော်ပြထားတာပါ။တောင်ကိုရီးယားအသင်းခေါင်းဆောင်ဟာ စပါးအသင်းမှာ ခြေစွမ်း ပြသနေတဲ့သူဖြစ်ပြီး မနှစ်က ရာသီက ပရီးမီးယားလိဂ် ရွှေဖိနပ်ဆုရ ပထမဆုံး အာရှကစားသမားအဖြစ် မှတ်တမ်း ရေးထိုးနိုင်ခဲ့တာ ဖြစ်ပါတယ်။

ဆွန်ဟောင်မင်ဟာ အခုနှစ်ရာသီမှာ စပါးအသင်းအတွက် အနည်းငယ်ရုန်းကန်နေရပြီး ၁၉ ပွဲကစားအပြီးမှာ ၅ ဂိုး သွင်းယူထားနိုင်တာ ဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ နိုဝင်ဘာ ၁

ဂျပန်အသင်းနည်းပြ မိုရီယာဆုက ကာတာကမ္ဘာ့ဖလားပြိုင်ပွဲမှာ ကွာတားဖိုင်နယ်အထိ ရောက်ရှိဖို့ ပစ်မှတ်ထား တယ်လို့ ကစားသမား ၂၆ ဦး စာရင်း ထုတ်ပြန်တာမှာ ပြောလိုက်ပါတယ်။

မိုရီယာဆုက “ကျနော်တို့ရဲ့ ရည်မှန်းချက်က အနိမ့်ဆုံး ကွာတားဖိုင်နယ် ရောက်ရှိဖို့ပါ။ လွယ်ကူမှာတော့ မဟုတ် ဘူး”လို့ သတင်းစာ ရှင်းလင်းပွဲမှာ ပြောခဲ့တာပါ။

ကမ္ဘာ့ဖလားပြိုင်ပွဲကို ၇ ကြိမ်မြောက်အဖြစ် ဝင်ရောက်ယှဉ်ပြိုင်မယ့် ဂျပန်အသင်းဟာ ဂျာမနီ၊ စပိန်၊ ကော်စတာရီကာတို့နဲ့ အုပ်စု E မှာ ကျရောက်နေတာ ဖြစ်ပါတယ်။

ဂျပန်အသင်း လူစာရင်းမှာ ဆဲလ်တစ် တိုက်စစ်မှူး ဖူရူဟာရှီနဲ့ ဗစ်ဆယ်လ်ကိုဘေး တိုက်စစ်မှူး အိုဆာကိုတို့ ချန်လှပ်ခံခဲ့ရတာပါ။

ဂျပန်အသင်းကိုတွေ့ရစဉ် (Reuters)

ဖူရူဟာရှီဟာ စကော့တလန်ကလပ်မှာ အထင်ကြီးစရာ ကောင်းလောက်တဲ့ ခြေစွမ်းပြသနေပြီး အိုဆာကိုကတော့ နည်းပြ မိုရီယာဆု လက်ထက်မှာ ပုံမှန်ပွဲထွက်ခွင့် ရခဲ့ပေမယ့် ဂျေလိဂ်ကို ပြန်ရောက်အပြီးမှာ ကြံ့ခိုင်မှုပိုင်း ပြဿနာတွေနဲ့ ရင်ဆိုင်ခဲ့ရတာ ဖြစ်ပါတယ်။

ပြီးခဲ့တဲ့ ကမ္ဘာ့ဖလားပြိုင်ပွဲမှာ ပါဝင်ခဲ့တဲ့ ယူနီယံ ဘာလင် ကွင်းလယ်လူ ဟာရာဂူချီဟာလည်း ဂျပန်အသင်း လူစာရင်းမှာ ရွေးချယ်ခြင်း မခံခဲ့ရတာပါ။

မိုရီယာဆုက “ဖြစ်နိုင်ရင်တော့ သူတို့ကို ခေါ်ယူပြီး ကမ္ဘာ့ဖလားပြိုင်ပွဲမှာ အတူတူ တိုက်ပွဲဝင်ချင်ပါတယ်။ သူတို့မှာ အဲ့ဒီလိုလုပ်နိုင်တဲ့ စွမ်းရည်ရှိပါတယ်။ အတွေ့အကြုံရှိတဲ့ ကစားသမားတွေကို ရွေးချယ်တာက ရွေးချယ်စရာ တစ်ခု အဖြစ် ရှိပေမယ့် ဒီလိုတွေမရှိလည်း ကမ္ဘာ့ဖလားမှာ အောင်မြင်မှုရဖို့ ဆာလောင်နေပြီး ရည်မှန်းချက်ရှိတဲ့ ကစား သမားတွေကို ရွေးချယ်ဖို့ ဆုံးဖြတ်ခဲ့တယ်”လို့ ကစားသမားရွေးချယ်မှုနဲ့ ပတ်သက်ပြီး ပြောခဲ့တာပါ။

ဂျပန်အသင်းကို အသင်းခေါင်းဆောင်အဖြစ် ဝါရင့်နောက်ခံလူ ယိုရှီဒါက ဦးဆောင်မှာဖြစ်ပြီး အာဆင်နယ် နောက်ခံလူ တိုမီယာဆုနဲ့ ဆိုစီဒက်အသင်းက ကူဘိုတို့လည်း အသင်းလူစာရင်းမှာ ပါဝင်ခဲ့တာ ဖြစ်ပါတယ်။

ဂျပန်အသင်းဟာ ကမ္ဘာ့ဖလားပြိုင်ပွဲ အဖွင့်ပွဲစဉ်အဖြစ် နိုဝင်ဘာလ ၂၃ ရက်မှာ ဂျာမနီအသင်းနဲ့ ယှဉ်ပြိုင်ရမှာ ဖြစ်ပါတယ်။

CNI Sport News

၂၀၂၂ ခုနှစ်၊ နိုဝင်ဘာ ၁

ဘော့စနီးယား အသင်းဟာ နိုဝင်ဘာလထဲမှာ ရုရှားနဲ့ ကစားဖို့ စီစဉ်ထားတဲ့ ခြေစမ်းပွဲကို မကစားတော့ဘူးလို့ အတည်ပြု ပြောကြားလိုက်ပါတယ်။

ဘော့စနီးယား အသင်းဟာ ရုရှားနိုင်ငံကို သွားရောက်ပြီး နိုဝင်ဘာလ ၁၉ ရက် ဂတ်ဇ်ပွန်အရီနာမှာ ခြေစမ်းပွဲ ကစားမယ်လို့ ပြီးခဲ့တဲ့ စက်တင်ဘာလမှာ နှစ်နိုင်ငံဘောလုံးအဖွဲ့ချုပ်က ကြေညာခဲ့တာပါ။

ဒါပေမယ့် ဘော့စနီးယား ဘောလုံးအဖွဲ့ချုပ်ဟာ အသင်းရဲ့ အဓိကကြယ်ပွင့်တွေဖြစ်တဲ့ ဂျက်ကို၊ ယာနစ်တို့အပြင် ဘုတ်အဖွဲ့ဝင်တို့ရဲ့ ဝေဖန်မှုတွေကို ခံခဲ့ရပြီး ဒီပွဲကို ဖျက်သိမ်းဖို့ ဖိအားပေးမှုတွေ ခံခဲ့ရတာ ဖြစ်ပါတယ်။ ယူကရိန်း ဘောလုံးအဖွဲ့ချုပ်ကလည်း ဒီပွဲကို ဖျက်သိမ်းဖို့ ဖီဖာနဲ့ ယူအီးအက်ဖ်အေထံ တောင်းဆိုသွားမယ်လို့ ပြောခဲ့တာပါ။

အဲ့ဒါကြောင့် ဘော့စနီးယားဘောလုံးအဖွဲ့ချုပ် အမှုဆောင် အစည်းအဝေးမှာ ဒီခြေစမ်းပွဲနဲ့ ပတ်သက်ပြီး ဆွေးနွေး ခဲ့ကြပြီး စီစဉ်ထားတဲ့အတိုင်း ကစားနိုင်မှာ မဟုတ်ပေမယ့် နောက်ပိုင်းမှာ ကစားနိုင်တယ်လို့ ကြေညာခဲ့တာ ဖြစ်ပါတယ်။

ယူကရိန်းပဋိပက္ခကြောင့် ရုရှားလက်ရွေးစင်နဲ့ ကလပ်အသင်းတွေကို ဖီဖာနဲ့ ယူအီးအက်ဖ်အေက ကျင်းပတဲ့ ပြိုင်ပွဲ တွေမှာ ယှဉ်ပြိုင်ခွင့် ပိတ်ပင်ထားပေမယ့် ခြေစမ်းပွဲကိုတော့ လွတ်လပ်စွာ ယှဉ်ပြိုင်ခွင့် ရှိတာပါ။

ဘော့စနီးယားအသင်းကိုတွေ့ရစဉ် (အာတီ)

ကာပင်ကိုင်တွယ်နေတဲ့ ရုရှားအသင်းဟာ နိုဝင်ဘာလ ၁၇ ရက်မှာ တာဂျစ်ကစ္စတန်အသင်းနဲ့ ခြေစမ်းပွဲ ကစား မယ်လို့ ပြီးခဲ့တဲ့ ရက်ပိုင်းက ကြေညာခဲ့ပါတယ်။

ရုရှားဟာ ဒီလထဲမှာပဲ အီရန်အသင်းနဲ့ ခြေစမ်းပွဲ ကစားဖို့ရှိတယ်လို့ ပြီးခဲ့တဲ့ လပိုင်းတွေက သတင်းတွေ ထွက်ခဲ့ပေ မယ့် ကျင်းပမယ့် နေရာနဲ့ ကစားမယ့် နေ့ရက်ကို အတည်မပြုရသေးတာကြောင့် ပွဲကျင်းပဖို့ မသေချာတော့တာပါ။

အီရန်အသင်းဟာ အင်္ဂလန်အသင်းနဲ့ ကစားမယ့် ကမ္ဘာ့ဖလား အဖွင့်ပွဲမတိုင်ခင် နီကာရာဂွာနဲ့ ခြေစမ်းပွဲကစားဖို့ စီစဉ်ထားတာ ဖြစ်ပါတယ်။

ရုရှားအသင်းဟာ တာဂျစ်ကစ္စတန်နဲ့ ခြေစမ်းပွဲပြီးရင် ဥဇဘတ်ကစ္စတန်နဲ့ပါ ခြေစမ်းပွဲ ကစားမယ်လို့ ရုရှားမီဒီယာ တွေက ဖော်ပြထားပါတယ်။

ရုရှားအသင်းဟာ ၂၀၂၁ ခုနှစ်၊ နိုဝင်ဘာလ နောက်ပိုင်း ပထမဆုံးပွဲစဉ်အဖြစ် စက်တင်ဘာ ၂၄ ရက်က ကာဂျစ္စတန် အသင်းနဲ့ ခြေစမ်းပွဲကစားထားပြီး ၂ ဂိုး- ၁ ဂိုးနဲ့ အနိုင်ရရှိထားတာ ဖြစ်ပါတယ်။

ရုရှားအသင်းဟာ ပြီးခဲ့တဲ့ ၂၀၂၂ ကမ္ဘာ့ဖလား ခြေစစ်ပွဲ ပလေးအော့ဖ် ပွဲစဉ်မှာ ကစားခွင့် မရခဲ့သလို လာမယ့် ယူရို ၂၀၂၄ ခြေစစ်ပွဲမှာလည်း ယှဉ်ပြိုင်ခွင့် ပိတ်ပင်ခံထားရတာ ဖြစ်ပါတယ်။

Source: အာတီရ်သတင်းဌာန

CNI Sport News

၂၀၂၂ ခုနှစ်၊ နိုဝင်ဘာ ၁

ယူကရိန်းဘောလုံးအဖွဲ့ချုပ်က အီရန်ဟာ ရုရှားကို လက်နက်တွေပေးခဲ့တယ်ဆိုတဲ့ စွပ်စွဲချက်နဲ့ ၂၀၂၂ ကမ္ဘာ့ဖလား ပြိုင်ပွဲကနေ ပိတ်ပင်ဖို့ ဖီဖာထံ တောင်းဆိုလိုက်ပါတယ်။

ယူကရိန်းအပေါ် ရုရှားရဲ့ စစ်ရေးရန်လိုမှုမှာ အီရန်ပါဝင်ပက်သက်မှုကို ယူကရိန်းဘောလုံးအဖွဲ့ချုပ်က ဖီဖာထံ တောင်းဆိုတဲ့အချက်ထဲမှာ ထည့်သွင်းခဲ့တာပါ။ရုရှားအပေါ် လက်နက်တွေပေးတာက ဖီဖာရဲ့ လူ့အခွင့်အရေးနဲ့ ခွဲခြားတိုက်ဖျက်မှုဆိုင်ရာ စည်းမျဉ်းတွေကို ချိုးဖောက်တယ်လို့ ယူကရိန်းဘောလုံးအဖွဲ့ချုပ်က ထောက်ပြခဲ့ပါ တယ်။

အဆိုပါအဖွဲ့ချုပ်ရဲ့ အမှုဆောင်ကော်မတီဟာ တနင်္လာနေ့က တွေ့ဆုံခဲ့တာဖြစ်ပြီး အီရန်ကို ကမ္ဘာ့ဖလားပြိုင်ပွဲမှာ ဝင်ရောက်ယှဉ်ပြိုင်ခွင့် ပိတ်ပင်ဖို့အတွက် ကမ္ဘာ့ဘောလုံးအဖွဲ့ချုပ်(ဖီဖာ)ထံ တောင်းဆိုဖို့ သဘောတူညီခဲ့ကြတာပါ။

ယူကရိန်းကလပ် ရှက်တာဒိုးနက်အကြီးအကဲ ပယ်လ်ကင်က အီရန်နေရာမှာ ယူကရိန်းနဲ့ အစားထိုးဖို့ အကြံပြုခဲ့ပြီး နောက် မကြာခင်မှာ ယူကရိန်းအက်ဖ်အေက ဖီဖာထံတောင်းဆိုခဲ့တာဖြစ်ပါတယ်။ပြီးခဲ့တဲ့လက အီရန်ရှိ လူ့အခွင့် အရေးအဖွဲ့အစည်းတွေက အီရန်လက်ရွေးစင်အသင်းကို ကမ္ဘာ့ဖလားပြိုင်ပွဲ ယှဉ်ပြိုင်ခွင့် ပိတ်ပင်ဖို့ ဖီဖာထံ တောင်းဆိုမှုတွေလည်း ရှိခဲ့တာပါ။ဒါပေမယ့် ဖီဖာကတော့ အီရန်ကို ပြိုင်ပွဲကနေ ထုတ်ပယ်ဖို့နဲ့ ပတ်သက်ပြီး တရားဝင်တုံ့ပြန်တာမျိုးတော့ မရှိသေးပါဘူး။

အီရန်အသင်းဟာ ၂၀၂၂ ကမ္ဘာ့ဖလားပြိုင်ပွဲမှာ အင်္ဂလန်၊၊ အမေရိကန်၊ ဝေးလ်စ်တို့နဲ့ တစ်အုပ်စုတည်းကျရောက်နေ ပြီး နိုဝင်ဘာလ ၂၁ ရက်မှာ အဖွင့်ပွဲစဉ်အဖြစ် အင်္ဂလန်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ နိုဝင်ဘာ ၁

ပေါ့ဘာဟာ လေ့ကျင့်ရေးကွင်းမှာ နောက်ထပ်ဒဏ်ရာရရှိသွားတဲ့အတွက် ကာတာကမ္ဘာ့ဖလားပြိုင်ပွဲမှာ မပါဝင်နိုင်တော့ဘူးလို့ အေးဂျင့်ဖြစ်သူက အတည်ပြုလိုက်ပါတယ်။

ပီမန်တာက “ပေါလ်ဟာ အမြန်ဆုံးပြန်လာချင်ပေမယ့် စိတ်ရှည်သည်းခံရဦးမှာပါ။ဒီလိုခက်ခဲတဲ့အချိန်မှာ သူပိုပြီး ကြိုးစားရမှာပါ။ပရိသတ်တွေနဲ့ အသင်းအတွက် အမြန်ဆုံးပြန်လာပြီး ကွင်းထဲမှာ သူအကောင်းဆုံး ပေးဆပ် သွားမှာပါ။အခုတော့ သူဟာ ခွဲစိတ်မှုကနေ ပြန်ကောင်းလာဖို့ အချိန်လိုအပ်ပါသေးတယ်။ဒါကြောင့် ပေါလ်ဟာ ကမ္ဘာ့ဖလားပြိုင်ပွဲမှာ ပြင်သစ်အတွက် ပါဝင်နိုင်မှာမဟုတ်ဘူး” လို့ ပြင်သစ်အခြေစိုက် Telefoot နဲ့ စကားပြော ခဲ့တာကို Get French Football News က ကိုးကားပြီးဖော်ပြထားတာပါ။

ပေါ့ဘာဟာ ဒူးဒဏ်ရာကနေ ပြန်ကောင်းလာပြီးနောက် အသင်းနဲ့ လေ့ကျင့်မှုတွေပြုလုပ်ရင်း နောက်ထပ် ပေါင်ဒဏ်ရာ ရရှိသွားခဲ့တာဖြစ်ပါတယ်။ယူနိုက်တက်ကနေ အလွတ်နဲ့ရောက်ရှိလာခဲ့တဲ့ ပေါ့ဘာဟာ ဂျူဗင်တပ်စ်အသင်းအတွက် ဒီရာသီမှာ တစ်ပွဲမှပါဝင်ကစားရခြင်းမရှိသေးပါဘူး။ပြင်သစ်ကစားသမားဟာ ရာသီကြိုလေ့ကျင့်ရေးအစီအစဉ်မှာ ဒူးဒဏ်ရာရရှိခဲ့တာကြောင့် ခွဲစိတ်ကုသမှုခံယူခဲ့ရတာပါ။

ဒီခွဲစိတ်မှုကနေ ပြန်ကောင်းလာခဲ့တာကြောင့် ကာတာကမ္ဘာ့ဖလားမှာ ပြင်သစ်အတွက် ပါဝင်ကစားနိုင်ဖို့ သူ့ မျှော်လင့်ချက်တွေ ရှင်သန်လာခဲ့တာဖြစ်ပါတယ်။ဒါပေမယ့် ပေါင်ဒဏ်ရာကြောင့် နောက်ထပ် ၃ ပတ်ကြာ အနားယူဖို့ရှိတာကြောင့် ပေါ့ဘာဟာ ကမ္ဘာ့ဖလားပြိုင်ပွဲမှာ မပါဝင်နိုင်ဖို့ သေချာသွားခဲ့တာပါ။ လက်ရှိအခြေအနေတွေကြောင့် ယူနိုက်တက်ကစားသမားဟောင်းဟာ ကမ္ဘာ့ဖလားပြိုင်ပွဲပြီးမှသာ ဂျူဗင်တပ်စ်အသင်းအတွက် ပါဝင် ကစားနိုင်မှာ ဖြစ်ပါတယ်။

ပြင်သစ်လက်ရွေးစင်အသင်းဟာ ပေါ့ဘာမတိုင်ခင် ကန်တီကိုလည်း ဒဏ်ရာကြောင့် ဆုံးရှုံးထားပြီးဖြစ်လို့ ကြီးမားတဲ့ ထိုးနှက်ချက်ဖြစ်ခဲ့တာပါ။အဆိုပါကစားသမား နှစ်ဦးစလုံးဟာ ပြင်သစ်အသင်း ချန်ပီယံဖြစ်ခဲ့တဲ့ ၂၀၁၈ ကမ္ဘာ့ဖလားပြိုင်ပွဲမှာ အဓိက ခြေစွမ်းပြသခဲ့တဲ့သူတွေဖြစ်ပါတယ်။အဲဒါကြောင့် လက်ရှိချန်ပီယံ ပြင်သစ်အသင်းဟာ အဓိကကစားသမား နှစ်ဦးမပါဘဲ ကာတာကို သွားရောက်ရတော့မှာပါ။

ဒိန်းမတ်၊ သြစတြေးလျ၊ တူနီရှားတို့နဲ့ တစ်အုပ်စုတည်းကျရောက်နေတဲ့ ပြင်သစ်အသင်းဟာ ကမ္ဘာ့ဖလားပြိုင်ပွဲ အုပ်စုအဖွင့်ပွဲစဉ်အဖြစ် နိုဝင်ဘာလ ၂၂ ရက်မှာ သြစတြေးလျအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ အောက်တိုဘာ ၃၁

မက်ဆီဟာ အခုနှစ် ရာသီအကုန်မှာ ပီအက်စ်ဂျီအသင်းနဲ့ စာချုပ်ကုန်ဆုံးပြီးနောက် ဒေးဗစ်ဘက်ခမ်း ပိုင်ဆိုင်တဲ့ မေဂျာလိဂ်ကလပ် အင်တာမိုင်ယာမီ အသင်းထံ ပြောင်းရွှေ့ဖွယ် ရှိတယ်လို့ သတင်းတွေ ထွက်ပေါ်လာခဲ့ပါတယ်။

အသက် ၃၅ နှစ်အရွယ်ရှိ မက်ဆီဟာ ၂၀၂၀ က ဘာစီလိုနာအသင်းနဲ့ စာချုပ်ကုန်ဆုံးပြီးနောက် ပီအက်စ်ဂျီ အသင်း ထံ ပြောင်းရွှေ့ခဲ့ပြီး ၂ နှစ် စာချုပ်ချုပ်ဆိုထားတာပါ။

အာဂျင်တီးနား အသင်းခေါင်းဆောင်ဟာ ပီအက်စ်ဂျီအသင်းရဲ့ ပွဲဦးထွက်ရာသီမှာ ခြေစွမ်းပြနိုင်ဖို့ ရုန်းကန်ခဲ့ရပြီး လီဂူးဝမ်းပြိုင်ပွဲမှာ ၆ ဂိုးသာ သွင်းယူကာ ဝေဖန်မှုတွေနဲ့ ရင်ဆိုင်ခဲ့ရတာ ဖြစ်ပါတယ်။ ဒါပေမယ့် မက်ဆီဟာ ဒီရာသီမှာတော့ အကောင်းဆုံးပုံစံကို ပြန်လည် ရှာဖွေနိုင်ခဲ့ပြီး ခြေစွမ်းပြသနိုင်ခဲ့တာပါ။

မက်ဆီဟာ ဒီရာသီမှာ ပြင်သစ်ကလပ်အတွက် ၁၇ ပွဲ ကစားထားပြီး ၁၂ ဂိုး သွင်းယူကာ ၁၃ ဂိုး ဖန်တီးထားတာ ဖြစ်ပါတယ်။

အာဂျင်တီးနား လက်ရွေးစင် အသင်းခေါင်းဆောင် မက်ဆီကိုတွေ့ရစဉ် (Football365)

မက်ဆီနဲ့ ပီအက်စ်ဂျီတို့ ချုပ်ဆိုထားတဲ့ စာချုပ်ဟာ နောက်ဆုံးနှစ်ကို ရောက်ရှိနေပြီ ဖြစ်တာကြောင့် စာချုပ် သက်တမ်းတိုးပြီး ပီအက်စ်ဂျီမှာ ဆက်နေမလား၊ ဒါမှမဟုတ် ဘာစီလိုနာကို ပြန်မလားဆိုပြီး ထင်ကြေးတွေဟာ ကျယ်ကျယ်ပြန့်ပြန့် ထွက်ပေါ်နေခဲ့တာပါ။

ဒါ့အပြင် မက်ဆီဟာ တတိယ ရွေးချယ်မှုအဖြစ် အင်တာမိုင်ယာမီ အသင်းနဲ့ စာချုပ်ချုပ်ဖွယ် ရှိတယ်လို့လည်း သတင်းတွေမှာ ဖော်ပြထားပါတယ်။

The Athletic ကတော့ ဒေးဗစ်ဘက်ခမ်း ပူးတွဲပိုင်ဆိုင်တဲ့ အင်တာမိုင်ယာမီ အသင်းဟာ လွန်ခဲ့တဲ့ နှစ်တွေထဲက ဆွေးနွေးမှုတွေ ပြုလုပ်ထားတာကြောင့် မက်ဆီကို ခေါ်ယူနိုင်ဖို့ ယုံကြည်မှုတွေ မြင့်မားနေတယ်လို့ ဖော်ပြထား တာပါ။

ဒေးဗစ်ဘက်ခမ်းနဲ့အတူ မေဂျာလိဂ် ကလပ်ကို ပူးတွဲပိုင်ဆိုင်တဲ့ ဂျော့ချ်နဲ့ ဂျို့စ်မတ်စ်တို့ဟာ မက်ဆီရဲ့ ဖခင်ဖြစ်သူ နဲ့ ဆွေးနွေးမှုတွေ အများအပြား ပြုလုပ်ခဲ့တယ်လို့ သိရပါတယ်။

မက်ဆီကတော့ လက်ရှိအချိန်မှာ အာဂျင်တီးနား လက်ရွေးစင်နဲ့ သူ့ရဲ့ နောက်ဆုံး ကမ္ဘာ့ဖလားဖြစ်တဲ့ ကာတာ ကမ္ဘာ့ဖလားပြိုင်ပွဲကိုပဲ ပိုပြီး အာရုံစိုက်နေပါတယ်။ ဒီပြိုင်ပွဲပြီးမှ မက်ဆီဟာ သူ့အနာဂတ်ကို ဆုံးဖြတ်ဖို့ ရှိနေတာ လည်း ဖြစ်ပါတယ်။

Source: Sportbible

CNI Sport News

၂၀၂၂ ခုနှစ်၊ အောက်တိုဘာ ၃၁

ဝါရင့်တိုက်စစ်မှူး အီဘရာဟီမိုဗစ်က ပီအက်စ်ဂျီကနေ သူထွက်ခွာခဲ့တဲ့ ၂၀၁၆ ကတည်းက လီဂူးဝမ်းဟာ ကျဆင်း သွားပြီလို့ ပြောလိုက်ပါတယ်။

အီဘရာဟီမိုဗစ်က “ ကျနော်ပြင်သစ်ကနေ ထွက်ခွာသွားပြီး ကတည်းက အရာအားလုံးဟာ ကျဆင်းသွားပါပြီ။ ပြင်သစ်နဲ့ ပတ်သက်ပြီး ပြောစရာ ဘာမှမရှိပါဘူး။ ပြင်သစ်က ကျနော့်ကို လိုအပ်ပေမယ့် ကျနော်ကတော့ ပြင်သစ်ကို မလိုအပ်ပါဘူး။ ခင်ဗျားတို့မှာ မက်ဆီ၊ နေမာနဲ့ ဘတ်ပီ ရှိရင်တောင် နတ်ဘုရားကြီး မရှိလို့ ဒါကို အကူအညီ ပေးနိုင်မှာ မဟုတ်ဘူး”လို့ Canal Plus ကို ပြောခဲ့တာပါ။

အီဘရာဟီမိုဗစ်ဟာ လက်ရှိ လီဂူးဝမ်းရဲ့ ပုံရိပ်ကို မြင့်မားအောင် ထိန်းထားဖို့အတွက် မက်ဆီ၊ နေမာ၊ ဘတ်ပီတို့နဲ့ မလုံလောက်ဘူးလို့ ပြောသွားခဲ့တာ ဖြစ်ပါတယ်။

ဆွီဒင်ကစားသမားဟာ ပီအက်စ်ဂျီ အသင်းမှာ ၂၀၁၂ ကနေ ၂၀၁၆ အထိ ၄ ရာသီကြာ ကစားခဲ့တာပါ။ သူဟာ ပြင်သစ် ကလပ်အတွက် ကစားပေးခဲ့တဲ့ ပွဲပေါင်း ၁၈၀ မှာ ၁၅၆ ဂိုး သွင်းယူနိုင်ခဲ့ပြီး ဆုဖလားပေါင်း ၁၂ လုံးအထိ ရယူနိုင်ခဲ့တာ ဖြစ်ပါတယ်။

မက်ဆီ၊ နေမာ၊ ဘတ်ပီတို့ကိုတွေ့ရစဉ်

အီဘရာဟီမိုဗစ်ဟာ ပီအက်စ်ဂျီကနေ ထွက်ခွာပြီးနောက် ယူနိုက်တက်၊ အယ်လ်အေ ဂလက်ဇီနဲ့ အခု အေစီမီလန် အသင်းမှာ ဒုတိယအကြိမ် ကစားနေတာပါ။ အီဘရာဟီမိုဗစ်ဟာ လက်ရှိအချိန်မှာ ဒဏ်ရာကြောင့် အနားယူ နေရ ပေမယ့် အေစီမီလန် အသင်းဟာ အခုနှစ် ရာသီအကုန်ထိ ၁ နှစ် သက်တမ်းတိုး ထားတာ ဖြစ်ပါတယ်။

အီဘရာဟီမိုဗစ်ဟာ အသက် ၄၁ နှစ် အရွယ်ရှိပြီ ဖြစ်ပေမယ့် အခုအချိန်ထိ အနားယူဖို့ အကြောင်းကို စဉ်းစားခြင်း မရှိသေးပါဘူး။

အီဘရာဟီမိုဗစ်က “ကျနော်အနားယူမှာ မဟုတ်ပါဘူး။ ကျနော် ပြန်လာမှာပါ။ အရှုံးပေးသွားမှာ မဟုတ်ဘူး”လို့ ဂါဇတ်တာဒယ်လိုစပေါ့နဲ့ အင်တာဗျူးမှာ ပြောခဲ့တာပါ။

အီဘရာဟီမိုဗစ်ရဲ့ အသင်းဟောင်း ပီအက်စ်ဂျီအသင်းဟာ ဒီရာသီမှာ မက်ဆီ၊ နေမာ၊ ဘတ်ပီတို့ ၃ ဦးရဲ့ တိုက်စစ် စွမ်းဆောင်ရည်တွေကြောင့် ပြင်သစ်လီဂူးဝမ်း အမှတ်ပေးဇယားကို ဦးဆောင်နေသလို ချန်ပီယံလိဂ်မှာလည်း ၁၆ သင်းအဆင့်ကို တက်ရောက်ခဲ့ပြီ ဖြစ်ပါတယ်။

Source: Goal

CNI Sport News

၂၀၂၂ ခုနှစ်၊ အောက်တိုဘာ ၃၁

နော်တင်ဟမ်ဖောရက်စ် အသင်းကို ၅ ဂိုး- ဂိုး မရှိနဲ့ ဂိုးပြတ် အနိုင်ရခဲ့တဲ့ပွဲမှာ ဒဏ်ရာရရှိသွားတဲ့ ဆာကာအနေနဲ့ ကမ္ဘာ့ဖလားပြိုင်ပွဲ မလွဲချော်ဘဲ ပါဝင်နိုင်ဖို့ မျှော်လင့်ကြောင်း အာဆင်နယ်နည်းပြ အာတီတာက ပြောလိုက်ပါတယ်။

အာတီတာက “ ကမ္ဘာ့ဖလားပြိုင်ပွဲအတွက် သံသယမဖြစ်ဖို့ ကျနော်မျှော်လင့်ပါတယ်။ ဆိုးရွားတဲ့ ကန်ချက်ကြောင့် သူဟာ ထော့နဲ့ ထော့နဲ့ ဖြစ်နေပေမယ့် အဲ့ဒီထက် ပိုပြီး ဖြစ်တယ်လို့ ကျနော်မမြင်မိပါဘူး။ သူဟာ ခြေကျင်းဝတ်နဲ့ ခြေထောက် ၂ ခုစလုံးကို အကြိမ်အနည်းငယ် ကန်ခံခဲ့ရပါတယ်”လို့ ပွဲအပြီး သတင်းစာ ရှင်းလင်းပွဲမှာ ပြောသွား ပါတယ်။

ဆာကာဟာ ပွဲအစပိုင်းမှာ သွင်းယူခဲ့တဲ့ မာတင်နယ်လီရဲ့ သွင်းဂိုးကို ဖန်တီးနိုင်ခဲ့ပေမယ့် နော်တင်ဟမ် ဖောရက်စ် နောက်ခံလူ လိုဒီရဲ့ ဖျက်ထုတ်မှုကြောင့် ကုသမှုခံယူခဲ့ရတာ ဖြစ်ပါတယ်။

ဆာကာဟာ ကုသမှုခံယူပြီးနောက် အာဆင်နယ်အတွက် ပြန်ကစားခဲ့ပေမယ့် အဆင်မပြေတော့တာကြောင့် ၁၀ မိနစ်အကြာ ပွဲချိန် ၂၇ မိနစ်မှာ လူစားလဲခံရတာပါ။ အင်္ဂလန်လက်ရွေးစင် ကစားသမားဟာ နယ်လ်ဆန်နဲ့ လူစား လဲပြီးနောက် ဥမင်ထဲကို တန်းပြီး ဝင်သွားခဲ့တာ ဖြစ်ပါတယ်။

အာဆင်နယ်နည်းပြ အာတီတာကိုတွေ့ရစဉ် (Reuters)

အာဆင်နယ် အကယ်ဒမီထွက် ဆာကာရဲ့ ဒဏ်ရာ အခြေအနေဟာ အင်္ဂလန်နည်းပြ ဆောက်ဂိတ်အတွက် စိုးရိမ် စရာ ဖြစ်ခဲ့ရပါတယ်။

ဆောက်ဂိတ်နဲ့ အင်္ဂလန်အသင်းဟာ အာတီတာ ပြောတဲ့အတိုင်း ဒဏ်ရာမပြင်းထန်ဖို့ မျှော်လင့်နေတာ ဖြစ်ပါ တယ်။ ကမ္ဘာ့ဖလားပြိုင်ပွဲဟာ ကျင်းပဖို့ ရက်အနည်းငယ်သာ ကျန်ရှိတော့တာဖြစ်ပြီး အင်္ဂလန်အသင်းဟာ နိုဝင်ဘာလ ၂၁ ရက်မှာ အီရန်အသင်းနဲ့ ယှဉ်ပြိုင်ရမှာပါ။

အသက် ၂၁ နှစ်အရွယ်ရှိ ဆာကာဟာ အာဆင်နယ် အတွက်ရော အင်္ဂလန်အသင်းအတွက်ပါ အားထားရတဲ့ အဓိက ကစားသမား ၁ ဦးအဖြစ် ရှိနေတာ ဖြစ်ပါတယ်။

ဆာကာဟာ အင်္ဂလန်အတွက် ပွဲပေါင်း ၂၀ ကစားအပြီးမှာ ၄ ဂိုး သွင်းယူထားကာ အာဆင်နယ်အတွက် ၁၄၇ ပွဲ ကစားထားပြီး ၂၈ ဂိုး သွင်းယူထားတာပါ။

အာဆင်နယ်အသင်းဟာ ကမ္ဘာ့ဖလားပြိုင်ပွဲ မတိုင်ခင် ပွဲစဉ် ၄ ပွဲ ကစားသွားဖို့ ရှိပြီး ကြားရက်မှာ ကစားမယ့် ဇူးရစ်နဲ့ ယူရိုပါလိဂ်ပွဲမှာတော့ ဆာကာ ပါဝင်နိုင်ဖို့ မရှိတော့ပါဘူး။

ဒီပွဲပြီးရင် အာဆင်နယ်အသင်းဟာ ချယ်လ်ဆီး၊ ဝုလ်ဗ်စ်တို့နဲ့ ပရီးမီးယားလိဂ်ပွဲစဉ်၊ ဘရိုက်တန်နဲ့ ကာရာဘောင်း ဖလား ယှဉ်ပြိုင်ရမှာ ဖြစ်ပါတယ်။

Source: Metro

CNI Sport News

၂၀၂၂ ခုနှစ်၊ အောက်တိုဘာ ၃၁

ဝက်စ်ဟမ်းအသင်းကို ၁ ဂိုး- ဂိုးမရှိနဲ့ အနိုင်ရခဲ့တဲ့ ပရီးမီးယားလိဂ်ပွဲမှာ ယူနိုက်တက်အတွက် လက်စွမ်းပြသခဲ့တဲ့ ဒီဂီယာက အနည်းငယ် ပင်ပန်းတယ်လို့ ခံစားရကြောင်း ပွဲအပြီးမှာ ပြောခဲ့ပါတယ်။

ဒီဂီယာက “ ကျနော် အနည်းငယ် ပင်ပန်းတယ်လို့ ခံစားနေရပါတယ်။ လူတွေကတော့ ဂိုးသမားတွေ မပင်ပန်းဘူး လို့ ထင်နေကြပေမယ့် အဆုံးသတ်မှာ ကျနော်တို့လည်း ပင်ပန်းမှုဒဏ်ကို ခံရတာပါပဲ။ ကျနော်တို့ ပွဲကို ကောင်းမွန် စွာ ထိန်းချုပ်နိုင်ခဲ့ပေမယ့် အဆုံးသတ်မှာ ခက်ခဲခဲ့ပါတယ်။ ဒါဟာ ကြီးမားတဲ့ နိုင်ပွဲပါ။ ထိပ်ဆုံးနေရာကို သွားချင် ရင်တော့ ဒီလိုပွဲမျိုးမှာ အနိုင်ရအောင် လုပ်ဆောင်ရမှာပါ။ ဂိုးမပေးရအောင် ကာကွယ်ပြီး အကူအညီတွေ ပေးချင် လို့ ဒီမှာ ရှိနေတာပါ”လို့ Sky Sports ကို ပြောခဲ့တာပါ။

ဒီဂီယာဟာ ဒီပွဲမှာ ယူနိုက်တက်အသင်း ၃ မှတ် ရရှိအောင် ဟီးရိုးသဖွယ် ဂိုးကာကွယ်မှု အများအပြားကို ကာကွယ် သွားနိုင်ခဲ့တာ ဖြစ်ပါတယ်။ ဝက်စ်ဟမ်း နောက်ခံလူ ဇူးမားရဲ့ ခေါင်းတိုက်ချက်နဲ့ ပွဲမပြီးဆုံးခင် ဒီကလန်ရိုက်စ်ရဲ့ ကောင်းမွန်တဲ့ ကန်သွင်းချက်တွေကို ဒီဂီယာက လက်စွမ်းပြပြီး ပုတ်ထုတ် ကာကွယ်သွားနိုင်ခဲ့တာ ဖြစ်ပါတယ်။

ဒေးဗစ်မိုယက်စ်က ဒီဂီယာကို အသိအမှတ်ပြု နှုတ်ဆက်နေစဉ် (United In Focus)

ပွဲသိမ်းခရာမှုတ် အပြီးမှာ ယူနိုက်တက် အသင်းဖော်တွေဟာ ဒီဂီယာကို ဝိုင်းဝန်း ဂုဏ်ပြုခဲ့ကြတာ ဖြစ်ပါတယ်။

ဝက်စ်ဟမ်းနည်းပြ ဒေးဗစ်မိုယက်စ် ကတောင် ပွဲအပြီးမှာ ဒီဂီယာကို ချီးကျူးသွားခဲ့တာပါ။

ဒေးဗစ်မိုယက်စ်က “ဒီဂီယာက အလွန်ကောင်းမွန်ပါတယ်။ သူဟာ ဘယ်လောက်တောင် ကောင်းတဲ့ ဂိုးသမားလဲ ဆိုတာ ကျနော်တို့ သိပါတယ်။ သူဟာ ဒီမှာ နှစ်အတော်ကြာအောင် ဂိုးသမားကောင်း တစ်ဦးအဖြစ် ရှိနေခဲ့တာပါ။ ဒီပွဲမှာ သူဟာ အပိုင်အခွင့်အရေး ၂ ကြိမ် ကာကွယ်နိုင်ခဲ့တာ အားလုံးလည်း သိကြပါတယ်။ သူဟာ အလွန်တော်တဲ့ သူဖြစ်လို့ ချီးကျူးချင်ပါတယ်”လို့ ပြောခဲ့ပါတယ်။

ဒီဂီယာဟာ အခုနောက်ပိုင်း ပွဲတွေမှာ ယူနိုက်တက်အတွက် လက်စွမ်းပြ နေပေမယ့် ကမ္ဘာ့ဖလားပြိုင်ပွဲဝင်မယ့် စပိန်အသင်းရဲ့ ပဏာမကစားသမား ၅၅ ဦးထဲမှာ ချန်လှပ်ခံခဲ့ရတာပါ။

အဲ့ဒါကြောင့် ဒီဂီယာဟာ ဝက်စ်ဟမ်းနဲ့ ပွဲမှာ အကောင်းဆုံး လက်စွမ်းပြပြီး ပြီးပြည့်စုံတဲ့ တုံ့ပြန်မှု ပြုလုပ်နိုင်ခဲ့တယ် လို့ သတင်းမှာ ဖော်ပြထားပါတယ်။

ယူနိုက်တက်အသင်းဟာ ဝက်စ်ဟမ်းအသင်းကို အနိုင်ရခဲ့တာကြောင့် အဆင့် ၄ နေရာက နယူးကာဆယ်အသင်းနဲ့ ၁ မှတ်အကွာ အဆင့် ၅ နေရာမှာ ရပ်တည်နေပြီး ကြားရက်မှာ ယူရိုပါလိဂ်ပွဲအဖြစ် ဆိုစီဒက်အသင်းနဲ့ ယှဉ်ပြိုင်ရ မှာ ဖြစ်ပါတယ်။

Source: Goal/Daily Mail