CNI Sport News

၂၀၂၃ ခုနှစ်၊ ဇွန်လ ၃

ဝါရင့်နောက်ခံလူ တစ်ဦးဖြစ်တဲ့ ရာမို့စ်ဟာ အခုရာသီအကုန်မှာ ပြင်သစ်ကလပ် ပီအက်စ်ဂျီကနေ ထွက်ခွာမယ်လို့ သူ့ရဲ့ ဆိုရှယ်မီဒီယာကနေ အတည်ပြု လိုက်ပါတယ်။

ရာမို့စ်က “မနက်ဖြန်က ထူးခြားတဲ့နေ့ပါ၊ ကျနော့်ဘဝရဲ့ နောက်ထပ် အဆင့်တစ်ခုကို နှုတ်ဆက်ရတော့မှာပါ။ နှုတ်ဆက်ပါတယ် ပီအက်စ်ဂျီ။ ပြိုင်ပွဲတိုင်းကို ပါဝင်ကစားနိုင်ခဲ့တဲ့ အထူး ၂ နှစ်တာအတွက် ကျေးဇူးတင်ပြီး အရာ အားလုံးကို ကျနော်ပေးခဲ့ပါတယ်”လို့ ရေးသားခဲ့တာ ဖြစ်ပါတယ်။

၂၀၂၁ က ရီးရယ်လ်အသင်းကနေ စာချုပ်ကုန်ဆုံးပြီးနောက် ရောက်ရှိလာခဲ့တဲ့ ရာမို့စ်နဲ့ ပီအက်စ်ဂျီအသင်းတို့ချုပ် ဆိုထားတဲ့ ၂ နှစ်စာချုပ်ဟာ အခုရာသီအကုန်မှာ ကုန်ဆုံးမှာပါ။

အဲဒါကြောင့် ရာမို့စ်ဟာ မက်ဆီပြီးနောက် ပီအက်စ်ဂျီကနေ ထွက်ခွာမယ့် နောက်ထပ် နာမည်ကြီး ကစားသမား ဖြစ်လာခဲ့ပါတယ်။

ရာမို့စ်ကိုတွေ့ရစဉ်

အသက် ၃၇ နှစ်အရွယ်ရှိ ရာမို့စ်ဟာ ပီအက်စ်ဂျီအသင်းကို ရောက်ရှိလာခဲ့တဲ့ ပထမရာသီမှာ ဒဏ်ရာတွေကြောင့် ၁၃ ပွဲသာ ပါဝင်ကစားနိုင်ခဲ့ပေမယ့် ဒုတိယရာသီမှာတော့ ၄၄ ပွဲအထိ ပါဝင်ကစားပေးနိုင်ခဲ့တာပါ။

ရာမို့စ်ဟာ ပီအက်စ်ဂျီ အသင်းနဲ့အတူ လီဂူးဝမ်းဆုဖလား ၂ ခု ရယူနိုင်ခဲ့ပေမယ့် အသင်းမျှော်လင့်ထားတဲ့ ချန်ပီယံ လိဂ်ဖလား ရရှိအောင်တော့ မကူညီပေးနိုင်ခဲ့တာ ဖြစ်ပါတယ်။

စပိန်ဝါရင့် နောက်ခံလူဟာ ကလဲယားမောင့်နဲ့ ကစားမယ့် အခုနှစ်ရာသီ ပြင်သစ်လီဂူးဝမ်း နောက်ဆုံးပွဲစဉ်မှာ ပီအက်စ်ဂျီအတွက် နောက်ဆုံးပွဲစဉ်အဖြစ် ပါဝင်ကစားမှာ ဖြစ်ပါတယ်။

ပီအက်စ်ဂျီအသင်းဥက္ကဋ္ဌ အယ်လ်ခီလိုင်ဖီက “ဆာဂျီယိုရဲ့ ခေါင်းဆောင်မှု၊ အသင်းလိုက် စိတ်ဓါတ်နဲ့ ပရော်ဖက်ရှင် နယ် ဆန်မှု၊ အမြင့်ဆုံးအဆင့်မှာ သူ့ရဲ့ အတွေ့အကြုံတွေနဲ့ ပေါင်းစပ်ထားပါတယ်။ ဒါတွေက သူ့ကို စစ်မှန်တဲ့ ဘောလုံး ဂန္တဝင်ဖြစ်စေခဲ့ပြီး သူ့ကို ပဲရစ်မှာရှိအောင် လုပ်ရတာကို ဂုဏ်ယူမိပါတယ်”လို့ ပြောခဲ့ပါတယ်။

ရာမို့စ်ကို ခေါ်ယူဖို့ ဆော်ဒီကလပ်တွေက လုပ်အားခ အများအပြားနဲ့ ကမ်းလှမ်းမှု ပြုလုပ်ထားတယ်လို့ နာမည်ကြီး ဂျာနယ်လစ် ဖာဘရီဇီယိုရိုမန်နိုက ဖော်ပြထားပေမယ့် ကစားသမားဘက်ကတော့ အနာဂတ်ကို ဆုံးဖြတ်ချက် မချ ရသေးပါဘူး။

Source: Goal

CNI Sport News

၂၀၂၃ ခုနှစ်၊ ဇွန်လ ၃

ရီးရယ်လ်နည်းပြ အန်ဆယ်လော့တီဟာ တိုက်စစ်မှူး ဘန်ဇီမာရဲ့ အနာဂတ်အပေါ် သံသယတွေ ရှိလာတာကြောင့် စပါးတိုက်စစ်မှူး ဟာရီကိန်းကို ခေါ်ယူပေးဖို့ အသင်းဘုတ်အဖွဲ့ကို ပြောခဲ့ပါတယ်။

ဟာရီကိန်းနဲ့ စပါးအသင်းတို့ ချုပ်ဆိုထားတဲ့စာချုပ်ဟာ နောက်ဆုံးနှစ်ထဲကို ရောက်ရှိလာခဲ့တာဖြစ်ပြီး အခုလာမယ့် နွေရာသီအပြောင်းအရွှေ့မှာ ယူနိုက်တက်အသင်းရဲ့ ဦးစားပေးပစ်မှတ်အဖြစ် ရှိနေခဲ့တာပါ။

စပါးအသင်းဥက္ကဋ္ဌ လီဗိုင်းက အင်္ဂလန်အသင်းခေါင်းဆောင်ကို ပရီးမီးယားလိဂ်ပြိုင်ဘက်အသင်းတွေထံ မရောင်းချချင်တာကြောင့် ဒီအပြောင်းအရွှေ့ဟာ ရီးရယ်လ်အတွက် ဖြစ်လာနိုင်ဖွယ်ရှိတယ်လို့ နည်းပြ အန်ဆယ်လော့တီက ယူဆနေတာဖြစ်ပါတယ်။

အီတလီလူမျိုးနည်းပြဟာ ကြာသပတေးနေ့က ပြုလုပ်ခဲ့တဲ့ အသင်းအကြီးအကဲတွေရဲ့ အစည်းအဝေးမှာ ဟာရီကိန်းကို ခေါ်ယူဖို့ ပြောခဲ့တာကြောင့် ရီးရယ်လ်အသင်းကလည်း နံပတ် ၉ အသစ်အတွက် ခေါ်ယူ မယ့် အစီအစဉ်တွေကို အရှိန်မြှင့်ပြီးလုပ်ဆောင်နေတယ်လို့ The Athletic က ဖော်ပြခဲ့တာပါ။

ဘောလွန်းဒီအောဆု ရရှိထားတဲ့ ဘန်ဇီမာဟာ ဆော်ဒီကလပ်အသင်းတွေရဲ့ ကြီးမားတဲ့ ကမ်းလှမ်းမှု ပမာဏတွေကြောင့် ပြောင်းရွှေ့သွားနိုင်တယ်လို့ သတင်းတွေထွက်ပေါ်နေပေမယ့် ကစားသမားဘက် ကတော့ အင်တာနက်ပေါ်က သတင်းတွေဟာ လက်တွေ့မကျဘူးလို့ ပြောထားပါတယ်။

စပါးအသင်းဟာ လက်ရှိအချိန်မှာ နည်းပြသစ် မခန့်အပ်ရသေးသလို လာမယ့်ရာသီ ဥရောပပြိုင်ပွဲ ယှဉ်ပြိုင်ခွင့် မရရှိထားပေမယ့်လည်း ဟာရီကိန်းကို ဆက်ပြီးထိန်းသိမ်းနိုင်ဖို့ ကြိုးစားနေတာပါ။ ပြီးခဲ့တဲ့ ရက်ပိုင်းက ထွက်ပေါ်ခဲ့တဲ့သတင်းတွေမှာ ဟာရီကိန်းဟာ ယူနိုက်တက်အသင်းကို ပြောင်းချင်တယ်လို့ ပြောထားခဲ့ပေမယ့် စပါးအသင်းဥက္ကဋ္ဌ လီဗိုင်းက ဒီအပြောင်းအရွှေ့ကို ငြင်းဆန်ထားတာဖြစ်ပါတယ်။ အဲဒါကြောင့် အင်္ဂလန်တိုက်စစ်မှူးဟာ ဒီရာသီမှာ အပြောင်းအရွှေ့မဖြစ်ခဲ့ရင် စာချုပ်ကုန်ဆုံးမယ့် လာမယ့် ရာသီအကုန်မှသာ အလွတ်နဲ့ ပြောင်းရွှေ့ဖို့ ဆုံးဖြတ်ထားတာပါ။

ရီးရယ်လ်အသင်းဘက်ကတော့ ဟာရီကိန်းကို ခေါ်ယူနိုင်ဖို့အတွက် ဘန်ဇီမာရဲ့ အနာဂတ်အပေါ် မူတည် ပြီး ဆုံးဖြတ်ဖို့ရှိနေကာ ပြင်သစ်တိုက်စစ်မှူးနဲ့ စပိန်ကလပ်တို့ ချုပ်ဆိုထားတဲ့ စာချုပ်ဟာ အခုရာသီ အကုန်မှာ ကုန်ဆုံးမှာဖြစ်ပါတယ်။ ဒါပေမယ့် ရီးရယ်လ်အသင်းဟာ ဘန်ဇီမာကို တစ်ရာသီ ယူရို ၂၄ သန်း နဲ့ အလိုအလျောက် ၁ နှစ် ထပ်မံသက်တမ်းတိုးဖို့ မျှော်လင့်နေတာပါ။

ဆော်ဒီကလပ် အယ်လ်အီးတီဟတ်အသင်းကတော့ ဘန်ဇီမာကို ၂၀၃၀ ကမ္ဘာ့ဖလားပြိုင်ပွဲ အိမ်ရှင် ပြုလုပ်ခွင့်ရနိုင်ဖို့အတွက် သံတမန်အဖြစ် ကမ်းလှမ်းတာအပါအဝင် တစ်ရာသီ ယူရိုသန်း ၂၀၀ နဲ့ ၂ နှစ် စာချုပ်ချုပ်ဆိုဖို့ ကမ်းလှမ်းထားတာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဇွန်လ ၂

မန်စီးတီးအသင်း တိုက်စစ်မှူး ဟာလန်းက ဒီရာသီမှာ အသင်းကို သမိုင်းဝင် ဆုဖလား ၃ လုံး ရအောင် ကူညီဖို့ အတွက် အရာအားလုံး လုပ်ဆောင်မယ်လို့ ပြောလိုက်ပါတယ်။

ဟာလန်းက “ဒီသမိုင်းကို ဖန်တီးဖို့က အစစ်အမှန် မဟုတ်ပါဘူး။ သူတို့ဟာ ဒီလိုမျိုး အောင်မြင်မှုကို ရယူနိုင် ဖို့အတွက် ကျနော်ကို ဝယ်ယူခဲ့တယ်ဆိုတာကို ဖုံးကွယ်ထားစရာ မလိုပါဘူး။ ဒါက အရာအားလုံးကို ဆိုလိုတာပါ။ ဒီလိုမျိုးအရာတွေ ဖြစ်လာဖို့အတွက်လည်း ကျနော်တက်နိုင်သမျှ အကောင်းဆုံး ကြိုးစားသွားမှာပါ။ ကျနော့်ရဲ့ အကြီးမားဆုံး အိပ်မက်တွေ အမှန်တကယ် ဖြစ်လာဖို့လည်း မျှော်လင့်ပါတယ်”လို့ BBC Sports ကို ပြောခဲ့တာပါ။

မန်စီးတီးအသင်းဟာ ပရီးမီးယားလိဂ်ဖလားကို ရရှိထားပြီး၊ FA ဖလားနဲ့ ချန်ပီယံလိဂ် ဗိုလ်လုပွဲလည်း ရောက်ရှိ ထားပြီးဖြစ်လို့ ဒီရာသီမှာ ဆုဖလား ၃ လုံး ရယူနိုင်ဖို့ မျှော်လင့်ချက်ရှိနေတာ ဖြစ်ပါတယ်။

ယူနိုက်တက်အသင်းဟာ ၁၉၉၉ က ဒီဆုဖလား ၃ လုံးစလုံးကို ရယူထားတာဖြစ်ပြီး အင်္ဂလန်မှာ ဒီလိုမျိုး အောင်မြင်မှုရခဲ့တဲ့ တစ်သင်းတည်းသော အသင်းအဖြစ် ရှိခဲ့တာပါ။

ဟာလန်းကို တွေ့ရစဉ်

အဲဒါကြောင့် မန်စီးတီးအသင်းဟာ အခုနှစ် ရာသီမှာ မြို့ခံပြိုင်ဘက်ရဲ့ အောင်မြင်မှုမျိုးကို ရယူနိုင်ဖို့ ပစ်မှတ်ထား နေတာ ဖြစ်ပါတယ်။

ဟာလန်းက “ ဒါပေမယ့် ဒါက မလွယ်ကူပါဘူး။ ကျနော်တို့ဟာ အသင်းကောင်း ၂ သင်းနဲ့ ဗိုလ်လုပွဲ ကစားရမှာ ဖြစ်ပြီး သူတို့ဟာ ဒါကို ဖျက်ဆီးနိုင်ဖို့ လုပ်ကြပါလိမ့်မယ်။ ကျနော်တို့က အကောင်းဆုံး ကစားခဲ့မယ်ဆိုရင် ဒါကို အောင်မြင်မှု ရယူနိုင်ဖို့အတွက် အခွင့်အရေးကောင်းတွေ ရှိပါတယ်။ အခုအချိန်မှာ ကျနော်တို့ဟာ အားလပ်ရက် မတိုင်ခင် ဒီဗိုလ်လုပွဲ ၂ ပွဲကို အာရုံစိုက်ရမှာပါ”လို့ ပြောခဲ့ပါတယ်။

အသက် ၂၂ နှစ်အရွယ်ရှိ ဟာလန်းဟာ ဒီရာသီ ပရီးမီးယားလိဂ် ပြိုင်ပွဲမှာ ၃၆ ဂိုးသွင်းပြီး ရွှေဖိနပ်ဆု ရယူနိုင်ခဲ့တာ အပါအဝင် ပြိုင်ပွဲစုံ ၅၁ ပွဲမှာ ၅၂ ဂိုး သွင်းယူနိုင်ခဲ့တာပါ။

မန်စီးတီးအသင်းဟာ ဇွန်လ ၃ ရက်မှာ FA ဖလား ဗိုလ်လုပွဲအဖြစ် ယူနိုက်တက်အသင်းနဲ့ ယှဉ်ပြိုင်မှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇွန်လ ၂

ပီအက်စ်ဂျီကနေ အခုရာသီအကုန်မှာ ထွက်ခွာတော့မယ့် တိုက်စစ်မှူး မက်ဆီရဲ့ အနာဂတ်ကို လာမယ့် အပတ်မှာ ဆုံးဖြတ်မယ်လို့ ဘာစီလိုနာအသင်းနည်းပြ ဇာဗီက ပြောလိုက်ပါတယ်။

ဇာဗီက “မက်ဆီနဲ့ ပတ်သက်ပြီး ကျနော် အကြိမ်ကြိမ် ပြောပြီးပါပြီ။ ဒီနေရာဟာ သူ့အတွက် တံခါးဖွင့် ထားပါတယ်။ သူလာဖို့ ဆုံးဖြတ်ခဲ့ရင် သူက ကျနော်တို့ကို ကူညီမယ်ဆိုတာ ကျနော်သိပါတယ်။ ကျနော် တို့ဟာ ပီအက်စ်ဂျီကို လေးစားပြီး အကောင်းဆုံးနည်းလမ်းနဲ့ပဲ ပြီးဆုံးသွားစေချင်ပါတယ်။ သူဟာ မြင့် မားတဲ့ အဆင့်မှာ ဘောလုံး ဆက်ကစားနိုင်တယ်လို့ ကျနော်တို့ထင်သလို အကောင်းဆုံး လုပ်နိုင်မယ်လို့ လည်း ယုံကြည်ပါတယ်။ လာမယ့်အပတ်မှာ သူဆုံးဖြတ်ချက် ချမယ်လို့ ကျနော့်ကို ပြောခဲ့ပါတယ်။ အဆုံးသတ်မှာ သူက အနာဂတ်ကို ဆုံးဖြတ်တော့မှာဖြစ်ပြီး ဒီမှာလည်း တံခါးတွေ ဖွင့်ထားတော့ ငြင်းခုံ စရာ မရှိတော့ပါဘူး”လို့ ပြောပါတယ်။

အာဂျင်တီးနား အသင်းခေါင်းဆောင်ဟာ အခုလအကုန်မှာ ပီအက်စ်ဂျီကနေ ထွက်ခွာမှာ ဖြစ်ပေမယ့် အနာဂတ်ကို မဆုံးဖြတ်ရသေးပါဘူး။

မက်ဆီကို ခေါ်ယူဖို့ ဆော်ဒီက လုပ်ခလစာ ယူရိုသန်း ၅၀၀ နဲ့ ကမ်းလှမ်းမှု ပြုလုပ်ထားတာ ဖြစ်ပေမယ့် ဘာစီလိုနာအသင်းကလည်း သူတို့ရဲ့ ကစားသမားဟောင်းကို အံ့မခန်း သဘောတူညီမှုတစ်ခုနဲ့ ပြန်လည် ခေါ်ယူနိုင်ဖို့ စိတ်အား ထက်သန်နေတာ ဖြစ်ပါတယ်။

မက်ဆီကို တွေ့ရစဉ်

စပိန်ကလပ်အနေနဲ့ မက်ဆီကို ပြန်လည် ခေါ်ယူဖို့ဆိုရင် သူတို့ရဲ့ ဘဏ္ဍာရေး အခြေအနေတွေကို ပြန်လည် ပြုပြင်ဖို့ လိုအပ်နေတာပါ။

ဇာဗီကတော့ ဘာစီလိုနာအနေနဲ့ မက်ဆီကို အမြဲတမ်း ကြိုဆိုနေမယ်လို့ ပြောခဲ့ပေမယ့် နောက်ဆုံး ဆုံးဖြတ်ချက်က အသင်းဖော်ဟောင်းပေါ်မှာပဲ မူတည်တယ်လို့ ပြောခဲ့တာ ဖြစ်ပါတယ်။

ပီအက်စ်ဂျီနည်းပြ ဂယ်လ်တီယာက လာမယ့် ကလားမောင့်နဲ့ပွဲဟာ မက်ဆီရဲ့ ပီအက်စ်ဂျီ ကစားသမား ဘဝ နောက်ဆုံးပွဲလို့ အတည်ပြု ထားပါတယ်။

အသက် ၃၅ နှစ်အရွယ်ရှိ မက်ဆီဟာ ပီအက်စ်ဂျီအသင်းမှာ ကစားခဲ့တဲ့ ၂ နှစ်အတွင်း ပွဲပေါင်း ၇၄ ပွဲ ပါဝင်ကစားခဲ့ပြီး ၃၂ ဂိုး သွင်းယူခဲ့ကာ လီဂူးဝမ်းဆုဖလား ၂ ကြိမ်နဲ့ ထရိုဖီဒတ်စ် ချန်ပီယံဆု ၁ ကြိမ် ရယူ နိုင်ခဲ့တာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဇွန်လ ၂

ယူရိုပါလိဂ် ဗိုလ်လုပွဲကို ကိုင်တွယ်ခဲ့တဲ့ အင်္ဂလိပ်ဒိုင်လူကြီး အန်သိုနီတေလာနဲ့ သူ့ရဲ့ မိသားစုတွေကို ရိုးမား ပရိသတ်တွေက ဘူဒါပတ်စ်လေဆိပ်မှာ နှောင့်ယှက်မှုလုပ်တဲ့ ရုပ်သံတွေ ဆိုရှယ်မီဒီယာပေါ်မှာ ရောက်ရှိလာခဲ့ ပြီးနောက် ဒိုင်လူကြီးများအဖွဲ့ချုပ်(PGMOL)က ရှုတ်ချခဲ့ပါတယ်။

PGMOL က “အန်သိုနီတေလာနဲ့ သူ့ရဲ့ မိသားစုဟာ ဘူဒါပတ်စ်လေဆိပ်မှာ နှောင့်ယှက်မှုတွေခံရတဲ့ ရုပ်သံတွေဟာ ဆိုရှယ်မီဒီယာပေါ်မှာ ရောက်ရှိလာတာကို ကျနော်တို့ သိရှိပါတယ်။ ဒိုင်လူကြီးက အိမ်ပြန်ဖို့ လုပ်တဲ့အချိန်မှာ သူနဲ့ သူ့မိသားစုအပေါ် တရားမျှတမှုမရှိတဲ့ လုပ်ရပ်တွေအပေါ် ကျနော်တို့ တုန်လှုပ်ခြောက်ခြားမိပါတယ်။ ကျနော်တို့ ဟာ အန်သိုနီနဲ့ သူ့ရဲ့ မိသားစုကို အပြည့်အဝ ပံ့ပိုးပေးမှုတွေကို ဆက်ပြီး ပြုလုပ်သွားမှာပါ”လို့ ကြေညာချက် ထုတ် ပြန်ခဲ့ပါတယ်။

အန်သိုနီတေလာဟာ ဆီဗီလာအသင်းက ရိုးမားအသင်းကို ပင်နယ်တီ အဆုံးအဖြတ်နဲ့ အနိုင်ရခဲ့တဲ့ ယူရိုပါလိဂ် ဗိုလ်လုပွဲကို ကိုင်တွယ်ခဲ့တာ ဖြစ်ပါတယ်။

ဒိုင်လူကြီးကိုတွေ့ရစဉ်

ရိုးမား ပရိသတ်တွေဟာ ဒီပွဲက ဆုံးဖြတ်ချက်တွေကို ဒေါသထွက်နေခဲ့တာကြောင့် အင်္ဂလိပ်ဒိုင်လူကြီးကို လေဆိပ် မှာ စောင့်ဆိုင်းကာ အော်ဟစ်မှုတွေ ပြုလုပ်ခဲ့ကြသလို ပရိသတ်တစ်ဦးဆိုရင် ခုံနဲ့ပါ ပစ်ပေါက်မှုတွေ ပြုလုပ်ခဲ့ကြ တာပါ။
အဲဒါကြောင့် ဒီအဖြစ်အပျက်တွေကို လုံခြုံရေးဝန်ထမ်းတွေကို ထိန်းသိမ်းခဲ့ရတာ ဖြစ်ပါတယ်။

ဒီဖြစ်ရပ်မတိုင်ခင် ယူရိုပါလိဂ် ဗိုလ်လုပွဲ ပွဲပြီးပြီးချင်းမှာ ရိုးမားအသင်း နည်းပြဖြစ်သူ မော်ရင်ဟိုဟာ ကားပါကင်မှာ စောင့်ဆိုင်းကာ ကွင်းလယ်ဒိုင်လူကြီးနဲ့ ထိပ်တိုက်တွေ့ဆုံဖို့ ပြုလုပ်ခဲ့တာပါ။

မော်ရင်ဟိုဟာ အန်သိုနီတေလာကို အရှက်မရှိတဲ့ သူဆိုပြီး ပါးစပ်ထဲမှာ ရေရွှတ်ခဲ့တာ ဖြစ်ပါတယ်။

ရိုးမားအသင်းဟာ ဒီပွဲမှာ သူတို့ရသင့်တဲ့ ပင်နယ်တီ အပါအဝင် ဆုံးဖြတ်ချက်အချို့ကို မကျေနပ်တာကြောင့် ကွင်း လယ် ဒိုင်လူကြီးကို စောဒကတက်ခဲ့တာမှာ နည်းပြ မော်ရင်ဟိုလည်း အဝါကတ် ပြသခံခဲ့ရတာပါ။

ဥရောပဘောလုံးအဖွဲ့ချုပ်(ယူအီးအက်ဖ်အေ)က ဒီဖြစ်ရပ်နဲ့ ပတ်သက်ပြီး မော်ရင်ဟိုကို အရေးယူတဲ့ ဆုံးဖြတ်ချက် မချခင်မှာ ပြိုင်ပွဲတာဝန်ရှိသူတွေရဲ့ အစီရင်ခံစာကို စောင့်မျှော်နေတာဖြစ်ပါတယ်။ အန်သိုနီတေလာဟာ ယူရိုပါ လိဂ် ဗိုလ်လုပွဲမှာ စံချိန်တင် အဝါကတ် ၁၃ ကတ် ပြသခဲ့ပြီး ဒီထဲမှာ ရိုးမားကစားသမား ၇ ဦးအထိ အဝါကတ် ပြသ ခံခဲ့ရတာ ဖြစ်ပါတယ်။

Source: BBC/CNA

CNI Sport News

၂၀၂၃ ခုနှစ်၊ ဇွန်လ ၂

ပေါ်တူဂီအသင်းခေါင်းဆောင် ရော်နယ်ဒိုက ဥရောပပြန်မယ့် သတင်းတွေကို ငြင်းဆန်လိုက်ပြီး အယ်လ်နာဆာမှာ ပဲ ဆက်ရှိမယ်လို့ အတည်ပြုခဲ့ပါတယ်။

ရော်နယ်ဒိုက “ကျနော်ဒီမှာ ပျော်ရွှင်ပြီး ဆက်သွားချင်ပါတယ်။ ကျနော်ဒီမှာ ဆက်ရှိမှာပါ။ လာမယ့် ရာသီမှာ ကျနော်တို့ အသင်းဟာ ပိုပြီးကောင်းမွန်လာမှာပါ။ နောက်ဆုံး ၅ လနဲ့ ၆ လအတွင်းမှာ ကျနော်တို့ဟာ တိုးတက် လာခဲ့ပြီး မကြာခင်မှာ ဆုဖလားတွေရယူနိုင်မယ်ဆိုတာကို ကျနော်ယုံကြည်မှုရှိပါတယ်”လို့ ပြောခဲ့တာပါ။

ရော်နယ်ဒိုဟာ ပြီးခဲ့တဲ့ ဇန်နဝါရီလက ယူနိုက်တက်အသင်းနဲ့ စာချုပ်ဖျက်သိမ်းပြီးနောက် အယ်လ်နာဆာ အသင်း ထံ အလွတ်ပြောင်းရွှေ့ကြေးနဲ့ ရောက်ရှိလာခဲ့တာ ဖြစ်ပါတယ်။

အသက် ၃၈ နှစ်အရွယ်ရှိ ရော်နယ်ဒိုဟာ အယ်လ်နာဆာ အသင်းအတွက် ဆော်ဒီပရိုလိဂ်ပွဲစဉ် ၁၆ ပွဲ ပါဝင် ကစား ခဲ့ပြီး ၁၄ ဂိုး သွင်းယူနိုင်ခဲ့ပေမယ့် အသင်းကို အမှတ်ပေး ချန်ပီယံဆု ရရှိအောင် မကူညီပေးနိုင်ခဲ့ပါဘူး။

အယ်လ်နာဆာအသင်းဟာ ဆော်ဒီပရိုလိဂ် ပြိုင်ပွဲမှာ ဒုတိယနေရာသာ ရရှိခဲ့ပြီး ချန်ပီယံဖြစ်ခဲ့တဲ့ အယ်လ်အီးတီ ဟတ် အသင်းနဲ့ ၅ မှတ် ကွာဟခဲ့တာ ဖြစ်ပါတယ်။

ရော်နယ်ဒိုဟာ အယ်လ်နာဆာအသင်းက ထွက်ခွာပြီး ဥရောပကို ပြန်သွားဖွယ်ရှိတယ်လို့ မကြာသေးခင်က သတင်းတွေ ထွက်ပေါ်ခဲ့ပေမယ့် ကစားသမားကတော့ ဆော်ဒီကလပ်မှာပဲ ဆက်ရှိမယ်လို့ ပြောခဲ့တာပါ။

ရော်နယ်ဒို အောင်ပွဲခံနေစဉ်

ရော်နယ်ဒိုနဲ့ အယ်လ်နာဆာအသင်းတို့ ချုပ်ဆိုထားတဲ့ စာချုပ်ဟာ ၂၀၂၅ အထိ သက်တမ်းရှိနေတာ ဖြစ်ပါတယ်။

ရော်နယ်ဒိုက နာမည်ကျော် ထိပ်တန်း ကစားသမားတွေကို ဆော်ဒီလိဂ်ကနေ ကြိုဆိုတယ်လို့လည်း ပြောခဲ့ပါသေး တယ်။

ရော်နယ်ဒိုက “သူတို့တွေကို ကြိုဆိုပါတယ်၊ လိဂ်က တိုးတက်လာမှာပါ။ လက်ရှိ အချိန်မှာလည်း အံ့သြစရာ ကောင်းတဲ့ နိုင်ငံခြားသား ကစားသမားတွေနဲ့ အာရပ်ကစားသမားတွေ ရှိပါတယ်”လို့ ပြောခဲ့ပါတယ်။

ဆော်ဒီလိဂ်ဟာ လက်ရှိအချိန်မှာ နာမည်ကျော် ကစားသမားတွေဖြစ်တဲ့ မက်ဆီ၊ ဘန်ဇီမာ၊ ဘတ်စ်ကွက်၊ မိုဒရစ် အစရှိတဲ့ ကစားသမားတွေကို ငွေကြေး အများအပြားပေးပြီး ခေါ်ယူဖို့ ကြိုးစားနေပါတယ်။

ဘန်ဇီမာဟာ ဆော်ဒီကလပ် အယ်လ်အီးတီဟတ်အသင်းကို ပြောင်းဖို့ နီးစပ်နေပြီလို့ သတင်းတွေ ထွက်ခဲ့ပေမယ့် ကစားသမားကတော့ ရီးရယ်လ်အသင်းမှာပဲ ဆက်ရှိဖွယ်ရှိတယ်လို့ ပြောထားပါတယ်။

Source: Goal

CNI Sport News

၂၀၂၃ ခုနှစ်၊ ဇွန်လ ၂

ယူနိုက်တက်အသင်းဟာ Forbes စီးပွားရေးဝက်ဘ်ဆိုက်က ထုတ်ပြန်ခဲ့တဲ့ စာရင်းအရ ပရီးမီးယားလိဂ်ရဲ့ တန်ဖိုးအရှိဆုံးအသင်းအဖြစ် ရပ်တည်နေတာ ဖြစ်ပါတယ်။

Forbes က ထုတ်ပြန်ခဲ့တဲ့ စာရင်းရဲ့ ထိပ်ဆုံးနေရာမှာ စပိန်လာလီဂါထိပ်သီး ရီးရယ်လ်အသင်းက ဒေါ်လာ ၆.၀၇ ဘီလီယံနဲ့ ရှိနေတာဖြစ်ပြီး ပရီးမီးယားလိဂ်ကလပ် ယူနိုက်တက်အသင်းက ဒေါ်လာ ၆ ဘီလီယံနဲ့ ဒုတိယနေရာမှာ ရှိနေတာပါ။ ထိပ်ဆုံး ၂ သင်းဟာ ပထမဆုံးအကြိမ်အဖြစ် ဒေါ်လာ ၆ ဘီလီယံ အထိ ရောက်ရှိလာခဲ့တာဖြစ်ပါတယ်။ ဒီစာရင်းရဲ့ ထိပ်ဆုံး ၁၀ သင်းထဲမှာ ပရီးမီးယားလိဂ် ကလပ်တွေ ဖြစ်တဲ့ လီဗာပူးလ်၊ မန်စီးတီး၊ ချယ်လ်ဆီး၊ စပါးနဲ့ အာဆင်နယ်အသင်းတို့လည်း ပါဝင်ခဲ့ပါတယ်။

ယူနိုက်တက်အသင်းကို ဂလေဇာမိသားစုက ပြီးခဲ့တဲ့နှစ် နိုဝင်ဘာလကတည်းက ရောင်းချဖို့ စီစဉ်ခဲ့တာ ဖြစ်ပြီး ကာတာဘဏ်လုပ်ငန်းရှင် ရှိတ်ဂျာဆင်မ်နဲ့ ဗြိတိန်ဘီလျံနာ ရက်ကလစ်ဖ်တို့က ဝယ်ယူဖို့ လေလံ တင်သွင်းထားခဲ့ကြတာပါ။ ရီးရယ်လ်အသင်းဟာ သူတို့ရဲ့ တန်ဖိုးကို ၁၉ ရာခိုင်နှုန်း တိုးမြှင့်စေခဲ့ပြီး နောက် ထိပ်ဆုံးနေရာမှာ ဆက်လက်ရပ်တည်ခဲ့တာဖြစ်ပြီး ခါးသီးပြိုင်ဘက် ဘာစီလိုနာအသင်းကတော့ ဒေါ်လာ ၅.၅၁ ဘီလီယံနဲ့ တတိယနေရာမှာ ရပ်တည်နေတာဖြစ်ပါတယ်။

Forbes ဟာ ကမ္ဘာ့တန်ဖိုးအရှိဆုံး ဘောလုံးအသင်းတွေရဲ့စာရင်းကို စတင်ထုတ်ပြန်ခဲ့တဲ့ ၂၀၀၄ က စတင်ပြီး ရီးရယ်လ်နဲ့ယူနိုက်တက်အသင်းတို့ဟာ နှစ်စဉ်ထိပ်ဆုံး ၅ သင်းထဲမှာ ရပ်တည်ခဲ့တာပါ။ ဆော်ဒီ ကျောထောက်နောက်ခံနဲ့ လာမယ့်နှစ်ရာသီ ချန်ပီယံလိဂ်ဝင်ခွင့်ရခဲ့တဲ့ နယူးကာဆယ်အသင်းရဲ့ တန်ဖိုး ဟာ ၅၁ ရာခိုင်နှုန်းမြင့်တက်လာခဲ့ပြီး ဒေါ်လာ ၇၉၄ သန်းနဲ့ အဆင့် ၂၂ နေရာအထိ ရောက်ရှိလာခဲ့တာ ဖြစ်ပါတယ်။

ဂျာမန်ချန်ပီယံ ဘိုင်ယန်မြူးနစ်နဲ့ ပြင်သစ်ချန်ပီယံ ပီအက်စ်ဂျီအသင်းတို့ဟာ ဒေါ်လာ ၄.၈၆ ဘီလီယံ၊ ဒေါ်လာ ၄.၂၁ ဘီလီယံနဲ့ နံပတ် ၆ ၊ နံပတ် ၇ နေရာမှာ ရပ်တည်နေတာဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဇွန်လ ၁

ရိုးမားအသင်းနည်းပြ မော်ရင်ဟိုဟာ ဆီဗီလာအသင်းကို အရေးနိမ့်ခဲ့တဲ့ ယူရိုပါလိဂ် ဗိုလ်လုပွဲအပြီးမှာ ရရှိခဲ့တဲ့ ငွေတံဆိပ် ဆုတံဆိပ်ကို လူအုပ်ကြီးရှိ ကလေးတစ်ဦးထံ ပစ်ပေးသွားခဲ့ပါတယ်။

မော်ရင်ဟိုက “ဒါကို ကျနော်လုပ်ခဲ့တာပါ။ ကျနော် ငွေတံဆိပ်တွေကို မလိုချင်ပါဘူး။ ငွေတံဆိပ်တွေ ကိုလည်း မသိမ်းထားချင်ပါဘူး။ ဒါကြောင့် ကျနော်ပေးလိုက်တာပါ”လို့ ပြောခဲ့တာပါ။

ဇွန်လ ၁ ရက် မနက်ပိုင်းက ကစားခဲ့တဲ့ ယူရိုပါလိဂ် ဗိုလ်လုပွဲမှာ ဆီဗီလာအသင်းက ရိုးမားအသင်းကို ပင်နယ်တီ အဆုံးအဖြတ်မှာ အနိုင်ရပြီး ချန်ပီယံဆုကို ရယူနိုင်ခဲ့တာပါ။

ပွဲချိန်အတွင်းမှာ ၁ ဂိုးစီ သရေကျခဲ့လို့ အချိန်ပို ဆက်ကစားတာမှာလည်း ဂိုးမသွင်း နိုင်ခဲ့တဲ့အတွက် ပင်နယ်တီ အဆုံးအဖြတ် ခံယူခဲ့ရတာ ဖြစ်ပါတယ်။

ပင်နယ်တီ အဆုံးအဖြတ်မှာ ဆီဗီလာအသင်းက ၄ ဂိုး- ၁ ဂိုးနဲ့ အနိုင်ရပြီး ယူရိုပါလိဂ် ချန်ပီယံဆုကို ၇ ကြိမ်မြောက် ရယူနိုင်ခဲ့တာပါ။

ဆီဗီလာအသင်း ဖလားရသွားစဉ်

ဆီဗီလာအသင်းဟာ ယူရိုပါလိဂ် ဗိုလ်လုပွဲတက်တဲ့ ၇ ကြိမ်စလုံး ဗိုလ်စွဲနိုင်ခဲ့တဲ့ မှတ်တမ်းကောင်းကို ဆက်ပြီး ထိန်းသိမ်း နိုင်ခဲ့ပေမယ့် မော်ရင်ဟိုကတော့ ဥရောပပြိုင်ပွဲတွေရဲ့ ဗိုလ်လုပွဲမှာ ပထမဆုံး ရှုံးပွဲ ကြုံတွေ့ခဲ့ရတာ ဖြစ်ပါတယ်။

ပေါ်တူဂီလူမျိုး နည်းပြဟာ ဥရောပပြိုင်ပွဲတွေရဲ့ ဗိုလ်လုပွဲ အရင် ၅ ကြိမ်စလုံး ချန်ပီယံ ဖြစ်ခဲ့ပေမယ့် ယူရိုပါလိဂ် ဘုရင်အဖြစ် သတ်မှတ်ခံထားရတဲ့ ဆီဗီလာနဲ့ အတွေ့မှာ သူ့ရဲ့ မှတ်တမ်းကောင်း ရပ်တန့် သွားခဲ့ရတာပါ။

မော်ရင်ဟိုနဲ့ ရိုးမားအသင်းတို့ ချုပ်ဆိုထားတဲ့ စာချုပ်ဟာ ၂၀၂၄ အထိ ရှိနေသေးပေမယ့် သူ့ကို ခေါ်ယူဖို့ ပီအက်စ်ဂျီအသင်း အပါအဝင် အသင်းတချို့ရဲ့ ပစ်မှတ်ထားခြင်း ခံနေရပါတယ်။

မော်ရင်ဟိုက “ကျနော်ဟာ အခြားကလပ် တစ်သင်းသင်းက အဆက်အသွယ် ပြုလုပ်တာခံရရင် အသင်း ပိုင်ရှင်တွေကို ပြောမယ်လို့ လွန်ခဲ့တဲ့လ အနည်းငယ်က ပြောခဲ့ဖူးပါတယ်။ ကျနော် လျှို့ဝှက်ထားမှာ မဟုတ်ပါဘူး။ ပေါ်တူဂီက ကျနော့်ကို ဒီဇင်ဘာလတုန်းက မေးခဲ့ချိန်မှာလည်း အသင်းကို ပြောခဲ့ပါတယ်။ အခု အချိန်ထိတော့ ကျနော်နဲ့ စကားပြောတဲ့ အသင်းမရှိသေးပါဘူး။ ဗိုလ်လုပွဲ ၅ ကြိမ် အနိုင်ရပြီး ဒီတစ်ကြိမ် အရေးနိမ့်ခဲ့ပေမယ့် ကျနော်ဂုဏ်ယူပါတယ်”လို့ ပြောခဲ့တာပါ။

အခုနှစ်ရာသီ ယူရိုပါလိဂ်ပြိုင်ပွဲမှာ ချန်ပီယံဖြစ်ခဲ့တဲ့ ဆီဗီလာအသင်းဟာ လာမယ့်နှစ်ရာသီ ချန်ပီယံလိဂ် ပြိုင်ပွဲ ယှဉ်ပြိုင်ခွင့် ရရှိသွားခဲ့ပြီ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဇွန်လ ၁

ဘန်ဇီမာဟာ ဆော်ဒီကလပ် အယ်လ်အီးတီဟတ်အသင်းက ကြီးမားတဲ့ ကမ်းလှမ်းမှုကို လက်ခံမယ်ဆိုပြီး ရီးရယ်လ်အသင်းကို အသိပေးခဲ့တယ်လို့ သိရပါတယ်။

ဘန်ဇီမာဟာ ဆော်ဒီပရိုလိဂ်ကို အလွတ်ပြောင်းရွှေ့ကြေးနဲ့ ပြောင်းရွှေ့မှာဖြစ်ပြီး အခုရာသီအကုန်မှာ ကုန်ဆုံးမယ့် စာချုပ်ကို သက်တမ်းတိုးမှာ မဟုတ်ဘူးလို့ ရီးရယ်လ်အသင်းထံ အသိပေးခဲ့ကြောင်း Foot Mercato က ဖော်ပြခဲ့ ပါတယ်။

ပြင်သစ်လက်ရွေးစင်အသင်း တိုက်စစ်မှူးဟောင်းဟာ ယူရိုသန်း ၄၀၀ ရရှိမယ့် ၂ နှစ်စာချုပ်နဲ့ ကမ်းလှမ်းမှု ခံထားရတာ ဖြစ်ပါတယ်။

ဒီကမ်းလှမ်းမှုထဲမှာ ဘန်ဇီမာဟာ ၂၀၃၀ ကမ္ဘာ့ဖလားပြိုင်ပွဲ အိမ်ရှင်အဖြစ် ဆော်ဒီနိုင်ငံက ကျင်းပနိုင်ဖို့အတွက် သံတမန်အဖြစ် ဆောင်ရွက်ရမှာလည်း ပါဝင်ပါတယ်။

ဆော်ဒီနိုင်ငံဟာ နာမည်ကြီး ကစားသမား အများအပြားကို နိုင်ငံအတွင်း ခေါ်ယူနိုင်ဖို့ လုပ်ဆောင်နေပြီး မကြာ သေးခင်က ပေါ်တူဂီအသင်း ခေါင်းဆောင် ရော်နယ်ဒိုကို အယ်လ်နာဆာအသင်းက ခေါ်ယူနိုင်ခဲ့ပါတယ်။
အခုအချိန်မှာ ဘန်ဇီမာအပြင် မက်ဆီကိုလည်း ခေါ်ယူနိုင်ဖို့ ပစ်မှတ်ထား ကြိုးပမ်းနေပါတယ်။

ဘန်ဇီမာကို တွေ့ရစဉ်

ဆော်ဒီပရိုလိဂ် အသင်းတစ်သင်းဖြစ်တဲ့ အယ်လ်ဟီလယ်အသင်းဟာ မက်ဆီကို ကြီးမားတဲ့ ငွေကြေးပမာဏနဲ့ ကမ်းလှမ်းမှု ပြုလုပ်ဖို့ စီစဉ်ထားပါတယ်။

အသက် ၃၅ နှစ်အရွယ်ရှိ ဘန်ဇီမာဟာ ရီးရယ်လ် အသင်းနဲ့အတူ ချန်ပီယံလိဂ် ၅ ကြိမ် အပါအဝင် ဆုဖလား အများအပြားကို ရရှိထားပြီး မနှစ်က ရာသီက ပြသခဲ့တဲ့ ခြေစွမ်းတွေကြောင့် ဘောလွန်းဒီအောဆုကို ရယူထား တာ ဖြစ်ပါတယ်။

ဘန်ဇီမာဟာ ဒီရာသီမှာ ရီးရယ်လ် အသင်းအတွက် ၄၂ ပွဲ ပါဝင်ကစားပြီး ဂိုး ၃၀ သွင်းယူကာ ကိုပါဒယ်ရေးဖလား ချန်ပီယံဆုကို ရယူနိုင်ခဲ့ပါတယ်။

စပိန်ကလပ်က သူတို့ရဲ့ ဝါရင့်တိုက်စစ်မှူးဖြစ်တဲ့ ဘန်ဇီမာကို အနည်းဆုံး တစ်ရာသီအသင်းမှာ ဆက်ရှိအောင် ဆွဲဆောင်နိုင်ဖို့ ကြိုးပမ်းဖွယ်ရှိပေမယ့် ကစားသမားဘက်ကတော့ ငွေကြေးပမာဏ အများကြီးရမယ့် ဆော်ဒီကို သွားရောက်ချင်နေတာပါ။

ဘန်ဇီမာကို ခေါ်ယူမယ့် အယ်လ်အီးတီဟတ်အသင်းဟာ အခုနှစ်ရာသီ ဆော်ဒီပရိုလိဂ် ပြိုင်ပွဲမှာ ချန်ပီယံဆုကို ရယူထားနိုင်ခဲ့တာ ဖြစ်ပါတယ်။

Source: Goal