CNI Sport News

၂၀၂၂ ခုနှစ်၊ အောက်တိုဘာ ၂၄

အာဆင်နယ်အသင်းတိုက်စစ်မှူး ဂျီးဆပ်စ်က ဆောက်သမ်တန်အသင်းနဲ့ ၁ ဂိုးစီသရေကျပြီးနောက် ခက်ခဲတဲ့ အချိန်တွေရောက်လာပြီလို့ အသင်းဖော်တွေကို သတိပေးလိုက်ပါတယ်။

ဂျီးဆပ်စ်က “ကျနော်တို့ရဲ့ အရည်အသွေးကို သိတာကြောင့် ဒီပွဲရလဒ်ကို ကျနော်လည်းစိတ်ပျက်သလို အသင်း ကလည်း စိတ်ပျက်နေပါတယ်။ဒီပုံစံအတိုင်းသာကစားမယ်ဆိုရင် ကျနော်တို့ အနိုင်ရမယ်ဆိုတာ သိပါတယ်။ ဒီလိဂ်က ခက်ခဲတာကြောင့် ကျနော်တို့ ပြန်လာနိုင်အောင် လုပ်ရပါမယ်။အခုအချိန်က ခက်ခဲတဲ့အချိန် ရောက်လာ ပြီလို့ ထင်ပါတယ်။ဒီလိုအချိန်ရောက်လာတော့ လူတိုင်းသတိထားရပါမယ်။ပိုပြီးတော့လည်း အာရုံစိုက်ရပါမယ်” Premier League Productions ကို ပြောခဲ့တာပါ။

အာဆင်နယ်အသင်းဟာ ဒီပွဲမှာ ရှာခါရဲ့သွင်းဂိုးနဲ့ ဦးဆောင်နိုင်ခဲ့ပေမယ့် အမ်းစထရောင်းရဲ့ ချေပဂိုးကြောင့် သရေ ရလဒ်နဲ့ အဆုံးသတ်ခဲ့ရတာဖြစ်ပါတယ်။လန်ဒန်ကလပ်ဟာ ဒီပွဲသရေကျခဲ့ပေမယ့် ဒုတိယနေရာက မန်စီးတီး အသင်းကို ၂ မှတ်ဖြတ်ပြီး ပရီးမီးယားလိဂ်အမှတ်ပေးဇယားကို ဦးဆောင်နေခဲ့တာပါ။ဂျီးဆပ်စ်ကတော့ သရေ ရလဒ်ကနေ ရလဒ်ကောင်းပြန်ရယူနိုင်အောင် လုပ်ရမယ်လို့ ပြောခဲ့ပါတယ်။

ဂျီးဆပ်စ်က “ကျနော်တို့ ကမ္ဘာ့ဖလားပြိုင်ပွဲမတိုင်ခင်မှာ ၆ ပွဲ၊ ၇ ပွဲကစားဖို့ ရှိပါတယ်။အဲဒါကြောင့် ကျနော်တို့ ပြန်လာနိုင်ဖို့လိုပါတယ်။မနက်ဖြန် အနားယူပြီး သန်သန်မာမာနဲ့ ပြန်လာရမှာပါ။တစ်ခါတစ်ရံမှာ ရမှတ်လျော့သွား ပေမယ့် ဒါကို သဘောပေါက်ပြီး ပြန်လည်နိုးထရပါမယ်။အခု ဒါကို ကျနော်တို့ လုပ်ရပါတော့မယ်” လို့ ပြောခဲ့ တာပါ။

ဘရာဇီးလ်တိုက်စစ်မှူး ဂျီးဆပ်စ်ဟာ လက်ရှိအချိန်မှာ အာဆင်နယ်အတွက် ၅ ပွဲဆက်တိုက် ဂိုးပေါက်ပျောက်ဆုံး နေတာကြောင့် ဒီအတွက် အာရုံအပြည့်အဝစိုက်ထားတယ်လို့လည်း ပြောခဲ့ပါတယ်။ဂျီးဆပ်စ်ဟာ အာဆင်နယ် အသင်းအတွက် ဒီရာသီပွဲပေါင်း ၁၄ ပွဲပါဝင်ကစားထားပြီး ၅ ဂိုးသွင်းယူထားတာပါ။

အာဆင်နယ်အသင်းဟာ ကြားရက်မှာ ယူရိုပါလိဂ်ပွဲစဉ်အဖြစ် ပီအက်စ်ဗွီအသင်းနဲ့ ယှဉ်ပြိုင်ရမှာဖြစ်ပြီး ပရီးမီးယား လိဂ်ပွဲစဉ်ကတော့ နော်တင်ဟမ်ဖောရတ်စ်အသင်းနဲ့ ယှဉ်ပြိုင်ရမှာဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ အောက်တိုဘာ ၂၂

အာဂျင်တီးနားအသင်းဟာ ကမ္ဘာ့ဖလားပြိုင်ပွဲမှာ ဘယ်အသင်းကိုမှ မကြောက်ဘူးလို့ အသင်းခေါင်းဆောင် မက်ဆီက ပြောလိုက်ပါတယ်။

မက်ဆီက “ ကျနော်တို့ ကောင်းမွန်စွာ လုပ်ဆောင်နေကြပြီး လူတွေက ဆုဖလားနဲ့အတူ ပြန်လာမယ်လို့ ပြောနေ ကြပေမယ့် ဒီလိုမျိုး မဟုတ်ပါဘူး။ ကမ္ဘာ့ဖလားက အလွန်ခက်ခဲပါတယ်။ ကျနော်တို့ဟာ ဒီပြိုင်ပွဲအတွက် စိတ်အား ထက်သန်နေပြီး အတူတူတိုက်ပွဲဝင်ကြမယ်၊ ဘယ်အသင်းကိုမှ ကြောက်စရာ မရှိပါဘူး။ ကျနော်တို့ဟာ ဘယ် အသင်းနဲ့မဆို ယှဉ်ပြိုင်ကစားဖို့ အဆင်သင့်ပါပဲ။ စိတ်အေးအေးချမ်းချမ်းနဲ့ပေါ့”လို့ Directv Sports ရုပ်သံလိုင်းကို ပြောခဲ့တာပါ။

ကိုပါအမေရိက ချန်ပီယံ အာဂျင်တီးနားအသင်းဟာ ၂၀၁၉ ကတည်းက လက်ရှိအချိန်ထိ ၃၅ ပွဲဆက်တိုက် ရှုံးပွဲ မရှိဘဲ အကောင်းဆုံးပုံစံ ရရှိနေတာ ဖြစ်ပါတယ်။ အာဂျင်တီးနားအသင်းဟာ ၂၀၂၂ ကမ္ဘာ့ဖလားပြိုင်ပွဲမှာ ဆော်ဒီ၊ ပိုလန်၊ မက္ကဆီတို့နဲ့ တစ်အုပ်စုတည်း ကျရောက်နေပြီး ၁၉၈၆ နောက်ပိုင်း ပထမဆုံး ကမ္ဘာ့ဖလား ချန်ပီယံဆုကို ရယူနိုင်ဖို့ ပစ်မှတ်ထား နေတာပါ။

အာဂျင်တီးနား အသင်းဟာ ၂၀၁၈ ပြိုင်ပွဲမှာ လက်ရှိ ချန်ပီယံကို အရေးနိမ့်ပြီး ၁၆ သင်းအဆင့်က လှည့်ပြန်ခဲ့ရတာ ဖြစ်ပါတယ်။

ဥရုဂွေးနဲ့ အာဂျင်တီးနားအသင်း ယှဉ်ပြိုင်နေစဉ် (Reuters)

မက်ဆီကတော့ အဖွင့်ပွဲစဉ်အဖြစ် ကစားမယ့် ဆော်ဒီအသင်းနဲ့ ပွဲစဉ်ဟာ အာဂျင်တီးနားအသင်းရဲ့ အခွင့်အရေး အတွက် အဓိက အချက်ဖြစ်တယ်လို့ တွေးမြင်နေတာပါ။

မက်ဆီက “ ပထမပွဲရဲ့ ပထမမိနစ်မှာ စိုးရိမ်မှုတွေက ထိန်းချုပ်ရ ခက်ပါတယ်။ နိုင်ပွဲနဲ့ စတင်မှသာ စိတ်ငြိမ်သက် မှုကို ပေးတာကြောင့် ပထမပွဲက အလွန်အရေးကြီးတယ်လို့ ထင်ပါတယ်။ ပြီးခဲ့တဲ့ ကမ္ဘာ့ဖလားမှာဆို ကျနော်တို့ သရေနဲ့သာ စတင်နိုင်ခဲ့တာပါ”လို့ ပြောခဲ့ပါတယ်။

အာဂျင်တီးနား အသင်းဟာ ကမ္ဘာ့ဖလားပြိုင်ပွဲ မတိုင်ခင် နောက်ဆုံး ခြေစမ်းပွဲအဖြစ် နိုဝင်ဘာလ ၁၆ ရက်မှာ ယူအေအီးအသင်းနဲ့ ယှဉ်ပြိုင်မှာ ဖြစ်ပါတယ်။

Source: CNA

CNI Sport News

၂၀၂၂ ခုနှစ်၊ အောက်တိုဘာ ၂၂

အိုလံပစ်ရွှေတံဆိပ်ဆု ၅ ကြိမ်ရရှိထားတဲ့ ရေကူးချန်ပီယံ ဒေဗီတိုဗာဟာ နိုင်ငံအတွင်းကနေ ထွက်ခွာ သွားခဲ့ပေမယ့် ရုရှားနိုင်ငံသားဖြစ်ခွင့်ကို စွန့်လွှတ်မှာမဟုတ်ဘူးလို့ သတင်းတွေအရ သိရပါတယ်။

အသက် ၃၉ နှစ်အရွယ်ရှိ ဒေဗီတိုဗာဟာ စက်တင်ဘာလက ရုရှားနိုင်ငံကနေ ထွက်ခွာခဲ့ပြီး မွေးရပ်မြေကို ပြန်လာဖို့ အစီအစဉ်မရှိဘူးလို့ သူ့ရဲ့ ရေကူးစင်တာရှိ ဝန်ထမ်းတွေကို အကြောင်းကြားခဲ့တာပါ။

ရုရှားအိုလံပစ်ကော်မတီက အထွေထွေအတွင်းရေးမှူးအဖြစ် ဆောင်ရွက်ခဲ့တဲ့ ဒေဗီတိုဗာဆီကနေ တရားဝင် နုတ်ထွက်စာမရရှိသေးသလို သူမထွက်ခွာခဲ့တဲ့ အသေးစိတ်အချက်အလက်တွေကို အတည်မပြုနိုင်ကြောင်း ပြောခဲ့ပါတယ်။

ဒါပေမယ့် ရုရှားရေကူး အဖွဲ့ချုပ်အကြီးအကဲ ဗလန်တီနာကို ကိုးကားပြီး ဒေဗီတိုဗာဟာ သူမရဲ့အစီအစဉ်တွေကို ညွှန်ပြတဲ့ အဖွဲ့အစည်းထံကို စာတစ်စောင်ပေးပို့ခဲ့တယ်လို့ TASS သတင်းဌာနက ကြာသပတေးနေ့က ဖော်ပြ ခဲ့တာပါ။ဒေဗီတိုဗာဟာ သူ့ရဲ့အဖွဲ့အစည်းကနေ နုတ်ထွက်ခွင့်ပြုဖို့ အဖွဲ့ချုပ်ဥက္ကဋ္ဌထံ တောင်းဆိုတဲ့ ကြေညာချက် တစ်စောင်ကိုပေးပို့ခဲ့တယ်လို့ ဗလန်တီနာက ပြောခဲ့ပါတယ်။ဒါ့အပြင် နိုင်ငံအတွင်းကနေ ဒေဗီတိုဗာထွက်ခွာခဲ့ရတဲ့ အကြောင်းအရင်းကိုလည်း သူမမသိခဲ့ဘူးလို့ ဗလန်တီနာက ပြောခဲ့တာပါ။

“ကျမမေးခဲ့တဲ့ တစ်ခုတည်းသောမေးခွန်းက ရုရှားနိုင်ငံသားဖြစ်ခွင့်ကို စွန့်လွှတ်မှာလားဆိုပြီးတော့ပေါ့။ သူမ ကတော့ စွန့်လွှတ်မှာမဟုတ်ဘူးဆိုပြီး ပြန်ရေးသားခဲ့တယ်လို့” ဗလန်တီနာက ပြောခဲ့တာဖြစ်ပါတယ်။

ဒေဗီတိုဗာဟာ အိုလံပစ်ရွှေတံဆိပ်ဆု ၅ ကြိမ်၊ ကမ္ဘာ့ချန်ပီယံဆု ၁၃ ကြိမ်နဲ့ ဥရောပချန်ပီယံဆု ၇ ကြိမ်ရယူထား နိုင်ခဲ့ပြီး ရေကူးလောကရဲ့ အကြီးကျယ်ဆုံးကစားသမားတွေထဲက တစ်ဦးအဖြစ် သတ်မှတ်ခံထားရတာပါ။ အိုလံပစ်ရွှေတံဆိပ် ၅ ကြိမ်ကို သူမဟာ ၂၀၀၄ အေသင်နဲ့ ၂၀၀၈ ဘေဂျင်းပြိုင်ပွဲတွေမှာ ၂ ကြိမ်စီနဲ့ ၂၀၁၂ လန်ဒန်ပြိုင်ပွဲမှာ ၁ ကြိမ်ရယူနိုင်ခဲ့တာဖြစ်ပါတယ်။

တစ်နိုင်ငံတည်းသူဖြစ်တဲ့ ရိုမာရှီနာဟာ ၂၀၂၀ တိုကျိုအိုလံပစ်ပြိုင်ပွဲမှာ ရွှေတံဆိပ် ၂ ခုရယူနိုင်ခဲ့တာကြောင့် အိုလံပစ်ပြိုင်ပွဲမှာ ရွှေတံဆိပ် ၇ ကြိမ်ရယူနိုင်ခဲ့ပြီး ဒေဗီတိုဗာရဲ့ စံချိန်ကို ၂ ကြိမ်အသာရယူပြီး ကျော်ဖြတ်နိုင်ခဲ့တာ ဖြစ်ပါတယ်။

Source:အာရ်တီသတင်းဌာန

CNI Sport News

၂၀၂၂ ခုနှစ်၊ အောက်တိုဘာ ၂၂

ကမ္ဘာ့အဆင့် ၁ တင်းနစ်မယ်ဟောင်း ဆီမိုနာဟာလပ်ဟာ တားမြစ်ထားတာကို သုံးစွဲကြောင်း တွေ့ရှိရပြီးနောက် တင်းနစ်ပြိုင်ပွဲယှဉ်ပြိုင်ခွင့် ယာယီဆိုင်းငံ့ခံလိုက်ရပြီဖြစ်ပါတယ်။

ဆီမိုနာဟာလပ်ဟာ သြဂုတ်လက အမေရိကန်အိုးပန်းပြိုင်ပွဲအတွက် စမ်းသပ်ဖို့ ပေးပို့ထားတဲ့ နမူနာထဲမှာ Roxadustat သုံးစွဲကြောင်းတွေ့ရှိရတာပါ။ Roxadustat ဟာ သွေးအားနည်းရောဂါကို တိုက်ဖျက်တဲ့ဆေးဖြစ်ပြီး ခန္ဓာကိုယ်အတွင်းရှိ သွေးနီဥတွေ ထုတ်လုပ်မှုကို လှုံဆော်ပေးတာလို့ သိရပါတယ်။ဒီဆေးသုံးစွဲမှုကို နိုင်ငံတကာ တင်းနစ်သမာဓိအေဂျင်စီက ပိတ်ပင်ထားတာပါ။အဲဒါကြောင့် ဆီမိုနာဟာလပ်ဟာ တင်းနစ်ယှဉ်ပြိုင်ခွင့် ယာယီ ဆိုင်းငံ့ခံရတာဖြစ်ပါတယ်။

လက်ရှိကမ္ဘာ့အဆင့် ၉ နေရာမှာ ရပ်တည်နေတဲ့ ရိုမေးနီးယားတင်းနစ်မယ်ကတော့ ဒီသတင်းဟာ သူမဘဝ အတွက် အကြီးမားဆုံးအံသြတုန်လှုပ်မှုအဖြစ် ဖော်ပြခဲ့တာပါ။ဆီမိုနာဟာလပ်က “ ဒီနေ့ဟာ ကျမဘဝရဲ့ အခက်ခဲဆုံးပွဲဖြစ်ခဲ့ပြီး အမှန်တရားအတွက် တိုက်ပွဲတစ်ခုကို စတင်ခဲ့ပါတယ်။ကျမရဲ့ ကစားသမား ဘဝ တစ်လျှောက် လိမ်လည်လှည့်ဖြားမယ်ဆိုတဲ့ အတွေးမျိုး စိတ်ထဲမှာ တစ်ခါမှမရောက်ခဲ့ဖူးပါဘူး။ဒါဟာ ကျမ သင်ယူခဲ့ရတဲ့ တန်ဖိုးတွေနဲ့ လုံးဝဆန့်ကျင်ဘက်ဖြစ်နေလို့ပါ။ ဒီလိုမျှတမှုမရှိတဲ့ အခြေအနေနဲ့ ကြုံတွေ့နေရတာ ဟာ လုံးဝကို စိတ်ရှုပ်ထွေးပြီး သစ္စာဖောက်နေသလိုကိုခံစားရတယ်” လို့ သူမရဲ့ တွစ်တာမှာ ရေးသားခဲ့တာ ဖြစ်ပါတယ်။

ဆီမိုနာဟာလပ်ဟာ ၂၀၁၈ မှာ ဂရမ်းဆလမ်းချန်ပီယံဆုတွေဖြစ်တဲ့ ပြင်သစ်အိုးပန်းနဲ့ ဝင်ဘယ်လ်ဒန်အိုးပန်း ချန်ပီယံဆုတွေကို ရယူနိုင်ခဲ့သူပါ။၂၀၁၆ က ရုရှားတင်းနစ်မယ် ရှာရာပိုဗာ ဆေးစစ်မှု မအောင်မြင်ပြီးနောက်ပိုင်း ဆီမိုနာဟာလပ်ဟာ ဒီလိုကြုံတွေ့ရတဲ့ ပထမဆုံးနာမည်ကြီး တင်းနစ်ပြိုင်ပွဲဝင်ဖြစ်လာခဲ့ပါတယ်။ ဟာလပ် ကတော့ ဒါကို အဆုံးထိတိုက်ပွဲဝင်သွားမယ်လို့ ပြောထားတာပါ။

ရိုမေးနီးယားတင်းနစ်မယ်ဟာ ပြီးခဲ့တဲ့ စက်တင်ဘာလက သူမရဲ့ အသက်ရှူမှု ပိုမိုကောင်းမွန်လာဖို့ နှာခေါင်း ခွဲစိတ်မှုကို ပြုလုပ်ခဲ့ပြီး ၂၀၂၂ ရာသီကို စောစီးစွာအဆုံးသတ်ခဲ့တာဖြစ်ပါတယ်။သူမဟာ အခုနှစ် WTA ပြိုင်ပွဲမှာ ချန်ပီယံဆု ၂ ကြိမ်ရယူနိုင်ခဲ့ပြီး ဝင်ဘယ်လ်ဒန်အိုးပန်းပြိုင်ပွဲမှာ ဆီမီးဖိုင်နယ်အဆင့်အထိ တက်နိုင်ခဲ့တာပါ။

နိုင်ငံတကာတင်းနစ်သမာဓိအေဂျင်စီ(ITIA) က ဟာလပ်ပေးပို့ခဲ့တဲ့ B နမူနာကို ခွဲခြမ်းစိတ်ဖြာခဲ့တာမှာ Roxadustat သုံးစွဲတာကို တွေ့ရှိခဲ့တယ်လို့ အတည်ပြုခဲ့ပါတယ်။အဆိုပါဆေးဟာ ကျောက်ကပ်ပြဿနာရှိတဲ့ လူနာတွေကို ကုသရာမှာ အသုံးပြုတယ်လို့လည်း သိရပါတယ်။

Source:BBC

CNI Sport News

၂၀၂၂ ခုနှစ်၊ အောက်တိုဘာ ၂၂

မန်စီးတီးအသင်း တိုက်စစ်မှူးဟာလန်းဟာ ကမ္ဘာပေါ်မှာ ပေါင် ၁ ဘီလီယံ တန်ကြေးရှိတဲ့ ပထမဆုံး ကစားသမား ဖြစ်လာလိမ့်မယ်လို့ အေးဂျင့်ဖြစ်သူ ရာဖေလာပီမန်တာက ပြောလိုက်ပါတယ်။

ဟာလန်းရဲ့ အေးဂျင့်ဖြစ်သူ ရာဖေလာပီမန်တာက “ အာလင်းက ဈေးကွက်မှာ ပေါင် ၁ ဘီလီယံ တန်ကြေးရှိ ပြောင်းရွှေ့ကြေးကို ရနိုင်မယ့် ပထမဆုံး ကစားသမားလို့ ထင်ပါတယ်။ သူ့ရဲ့ ဘောလုံးတန်ဖိုး၊ ပုံရိပ်တန်ဖိုးနဲ့ စပွန်ဆာ တန်ဖိုးတွေကို ပေါင်းလိုက်မယ်ဆိုရင် ပေါင် ၁ ဘီလီယံဆိုတာ အသေအချာပါပဲ။ ဘတ်ပီနဲ့ ဟာလန်းကို နှိုင်းယှဉ်နေတယ်ဆိုတာက ပုံမှန်လိုပါပဲ”လို့ ပြောခဲ့တာကို ဒေးလီးမေးလ်က ဖော်ပြထားတာပါ။

မန်စီးတီးအသင်းဟာ နော်ဝေတိုက်စစ်မှူး ဟာလန်းကို ပြီးခဲ့တဲ့ နွေရာသီက ပေါင် ၅၁.၂ သန်းနဲ့ ခေါ်ယူခဲ့တာဖြစ်ပြီး သူဟာ လက်ရှိအချိန်မှာ မန်စီးတီးအတွက် ဂိုးသွင်းခြေစွမ်းပြနေတာ ဖြစ်ပါတယ်။

ဟာလန်းဟာ ဒီရာသီမှာ မန်စီးတီး အသင်းအတွက် ၁၄ ပွဲ ပါဝင်ကစားထားပြီး ဂိုး ၂၀ သွင်းယူထားကာ စံချိန်သစ် တွေလည်း အများအပြား ရယူထားနိုင်ခဲ့တာပါ။

အေးဂျင့်ဖြစ်သူ ရာဖေလာပီမန်တာကိုတွေ့ရစဉ် 

ဟာလန်းရဲ့ အေးဂျင့်ဟောင်းဖြစ်သူ ရွိုင်အိုလာ ကွယ်လွန်ပြီး သူ့ရဲ့ ကစားသမားတွေကို ပီမန်တာက အေးဂျင့်သစ် အဖြစ် ဆောင်ရွက်နေတာ ဖြစ်ပါတယ်။

လက်ရှိအချိန်မှာ ဟာလန်းကို ဖခင်ဖြစ်သူကလည်း အကြံပေးအဖြစ် ဆောင်ရွက်နေတာပါ။ ဟာလန်းဟာ မန်စီးတီးအသင်းနဲ့ ၅ နှစ် စာချုပ်ချုပ်ဆိုထားပေမယ့် ဖခင်ဖြစ်သူကတော့ သားဖြစ်သူဟာ နောက်ထပ် ဥရောပလိဂ် စိန်ခေါ်မှုတွေဆီ မသွားခင် မန်စီးတီးအသင်းမှာ အနည်းဆုံး ၃၊ ၄ နှစ်လောက်တော့ ရှိနိုင်တယ်လို့ ပြောခဲ့ပါတယ်။

မကြာသေးခင် ရက်ပိုင်းတုန်းက ဟာလန်းနဲ့ ရီးရယ်လ်အသင်းတို့ရဲ့ ထင်ကြေးတွေဟာလည်း ထွက်ပေါ်လာခဲ့ ပါသေးတယ်။

The Athletic သတင်းဌာနကတော့ ဟာလန်းနဲ့ မန်စီးတီးအသင်းတို့ ချုပ်ဆိုထားတဲ့ စာချုပ်မှာ စာချုပ်ဖျက်သိမ်း ကြေး ယူရိုသန်း ၂၀၀ ပါဝင်နေပြီး ၂၀၂၄ က စတင်ကာ အသက်ဝင်မယ်လို့ ဖော်ပြထားပါတယ်။ ဒါပေမယ့် အချိန် တွေ ကြာလာရင်တော့ ဒီတန်ဖိုးဟာ လျော့ကျလာမှာ ဖြစ်တယ်လို့ သိရပါတယ်။

Source: Daily Mail/Sportbible

CNI Sport News

၂၀၂၂ ခုနှစ်၊ အောက်တိုဘာ ၂၁

အန်သိုနီဂျိုရွှာရဲ့ အဖွဲ့နဲ့ အလုပ်လုပ်ရတာ အလွန်ခက်ခဲတာကြောင့် သူတို့နှစ်ဦးရဲ့ ထိုးသတ်ပွဲဟာ ဘယ်တော့မှ ဖြစ်လာနိုင်မှာ မဟုတ်ဘူးလို့ တိုင်ဆန်ဗျူရီက ပြောပါတယ်။

တိုင်ဆန်ဗျူရီက “အန်သိုနီဂျိုရွှာနဲ့ ပွဲဖြစ်လာမယ်လို့ ကျနော် မထင်ပါဘူး။ သူတို့နဲ့ တွဲအလုပ်လုပ်ရတာ အလွန် ခက်ခဲပါတယ်။ တစ်စုံတစ်ဦးကို သူတို့ မလုပ်ချင်တဲ့အရာ ခင်ဗျား သွားပြီးလုပ်ခိုင်းလို့ မရပါဘူး။ တခြားသူတွေ မတိုက်ချင်တဲ့ပွဲကို ဖြစ်လာအောင် ခင်ဗျားတို့ လုပ်လို့ မရပါဘူး။ ကျနော့်ဘက်က ဘယ်လောက်ပဲ ထိုးသတ်ချင် စိတ်ရှိပါစေ သူတို့ဘက်က မပါဝင်ရင် ပွဲဖြစ်မှာ မဟုတ်ပါဘူး။ ဒီပွဲကို တကယ် ထိုးသတ်ချင်တဲ့ စိတ်ရှိတယ်ဆိုရင် အဖွဲ့ကို ပြောလိုက်လို့ ရပါတယ်။ မလုပ်ချင်ရင်တော့ အကြောင်းပြချက် သန်းပေါင်းများစွာ ရှာနေမှာပါ”လို့ TalkSPORT ကို ပြောခဲ့ပါတယ်။

တိုင်ဆန်ဗျူရီနဲ့ အန်သိုနီဂျိူရွှာကိုတွေ့ရစဉ် (MMA Fighting)

သူတို့နှစ်ဦးဟာ ဒီဇင်ဘာလ ၃ ရက်မှာ ထိုးသတ်မယ့် ပွဲအတွက် ဆွေးနွေးမှုတွေ ပြင်းပြင်းထန်ထန် လုပ်ခဲ့ပေမယ့် ဂျိူရွှာဟာ နောက်ဆုံး သတ်မှတ်ထားတဲ့အချိန်မှာ လက်မှတ်မထိုးလို့ ပွဲပျက်ပြယ်သွားခဲ့ပြီလို့ တိုင်ဆန်ဗျူရီက ပြောခဲ့ပါတယ်။ အဲ့ဒါကြောင့် တိုင်ဆန်ဗျူရီဟာ ချီဆိုရာနဲ့ ဒီဇင်ဘာလ ၃ ရက် စပါးအသင်းရဲ့ ကွင်းမှာ ထိုးသတ် သွားတော့မှာပါ။ ဗြိတိန် ဟဲဗီးဝိတ်ချန်ပီယံဟာ ၂၀၂၃ အစောပိုင်းမှာ အူဆက်ခ်နဲ့ ထိုးသတ်ဖို့ ရည်ရွယ်ထားတာ ဖြစ်ပါတယ်။

လက်ဝှေ့ ပရိသတ်တွေဟာ ဗြိတိန်လက်ဝှေ့သမား ၂ ဦး ထိုးသတ်မယ့် ဟဲဗီးဝိတ်ပွဲကို ကြည့်ဖို့ မျှော်လင့်ခဲ့ပေမယ့် ပွဲမဖြစ်ခဲ့လို့ စိတ်ပျက်နေကြပါတယ်။

တိုင်ဆန်ဗျူရီကတော့ ဒီပွဲဟာ အနာဂတ်မှာလည်း ဖြစ်ဖို့ မရှိနိုင်တော့ဘူးလို့ သူ့ရဲ့ ခံစားချက်ကို ပြောပါတယ်။ ပွဲစီစဉ်သူ ဖရန့်ခ်ဝါရမ်ကလည်း တိုင်ဆန်ဗျူရီနဲ့ အန်သိုနီဂျိူရွှာတို့ ပွဲဟာ ဖြစ်လာနိုင်ဖို့ မရှိတော့ဘူးလို့ ပြောပါ တယ်။

တိုင်ဆန်ဗျူရီဟာ ၂၀၂၃ ထဲမှာ အူဆက်ခ်အပြင် ဂျိုးဂျွိုက်စ်နဲ့လည်း ထိုးသတ်ဖို့ စီစဉ်နေပြီး သူ့ရဲ့ ရှုံးပွဲမရှိ စံချိန်ကို ဆက်ထိန်းဖို့ မျှော်လင့်နေတယ်လို့ သိရပါတယ်။

Source: Metro

CNI Sport News

၂၀၂၂ ခုနှစ်၊ အောက်တိုဘာ ၂၁

ကာတာမှာ ကျင်းပမယ့် ၂၀၂၂ ကမ္ဘာ့ဖလားပြိုင်ပွဲမှာ အီရန်လက်ရွေးစင်အသင်းကို ယှဉ်ပြိုင်ခွင့် ပိတ်ပင်ဖို့ ကမ္ဘာ့ ဘောလုံးအဖွဲ့ချုပ်(ဖီဖာ)ထံ တောင်းဆိုမှုတွေ ရှိနေပါတယ်။

အီရန်ဘောလုံးနဲ့ အားကစားဆိုင်ရာ အဖွဲ့အစည်းတစ်ခုဟာ အီရန်ဘောလုံးအသင်းကို ပိတ်ပင်ဖို့ ဖီဖာထံ တရားဝင် တောင်းဆိုစာ ပေးပို့ခဲ့ပါတယ်။

အီရန်မှာ အမျိုးသမီးတွေ ကွင်းအတွင်း ဝင်ရောက်တာကို ရပ်တန့်ဖို့ အစိုးရက ဝင်ရောက် စွက်ဖက်နေပြီး ဖီဖာရဲ့ စည်းမျဉ်းတွေကို ချိုးဖောက်နေတယ်လို့ ပြောခဲ့ပါတယ်။ အဆိုပါ အဖွဲ့အစည်းက “ ဖီဖာရဲ့ ကြားနေရေးဟာ ရွေးချယ်စရာ မဟုတ်ဘူး”လို့ ပြောပါတယ်။

အီရန်နိုင်ငံအတွင်း ကျယ်ကျယ်ပြန့်ပြန့် ဖြစ်ပေါ်နေတဲ့ အစိုးရဆန့်ကျင်ရေး ဆန္ဒပြပွဲတွေကို လုံခြုံရေးတပ်ဖွဲ့တွေက ပြင်းထန်စွာ နှိပ်နင်းနေချိန် အခုလို တောင်းဆိုမှုတွေ ထွက်ပေါ်လာခဲ့တာ ဖြစ်ပါတယ်။ ပြီးခဲ့တဲ့ လကလည်း Open Stadiums အမည်ရှိ လူ့အခွင့်အရေးအဖွဲ့အစည်းက ဒီလိုပဲ အလားတူ တောင်းဆိုမှုကို ပြုလုပ်ခဲ့ပါသေးတယ်။

အီရန် အမျိုးသမီးပရိသတ်များကိုတွေ့ရစဉ် (DW)

အီရန်မှာ အမျိုးသားတွေ ယှဉ်ပြိုင်နေတဲ့ အားကစားကွင်းတွေမှာ အမျိုးသမီးတွေ ဝင်ရောက်တာကို တရားဝင် တားမြစ် ထားခြင်းမရှိပေမယ့် မကြာခဏ ဝင်ခွင့် ငြင်းပယ်ခံရတယ်လို့ နိုင်ငံတကာသတင်းတွေရဲ့ ဖော်ပြချက်အရ သိရပါတယ်။

ဖီဖာကလည်း အခုနှစ် အစောပိုင်းမှာ အမျိုးသမီးတွေကို အားကစားကွင်းထဲဝင်ဖို့ အီရန်အာဏာပိုင်တွေထံ စာရေး သား တောင်းဆိုခဲ့ပြီးနောက် အီရန်လိဂ် ပွဲစဉ်တွေမှာ အမျိုးသမီးအချို့ဟာ ရွေးချယ်ထားတဲ့ ပွဲစဉ်တွေကို တက် ရောက် ကြည့်ရှုခွင့် ရခဲ့ပါတယ်။

စပိန်ဥပဒေကုမ္ပဏီတစ်ခုက ပံ့ပိုးကူညီပေးထားတဲ့ အဖွဲ့ဟာ ဒီလိုတူညီတဲ့ ချိုးဖောက်မှုတွေကြောင့် အခြား နိုင်ငံ တွေကိုလည်း အရင်က ဆိုင်းငံ့ပိတ်ပင်မှုတွေ ရှိတယ်လို့ ပြောပါတယ်။

“ဖီဖာကောင်စီက အီရန်ကို အခုချက်ချင်း ပိတ်ပင်ရမှာပါ။ သူတို့ရဲ့ အခြေခံ လူ့အခွင့်အရေးကို ကျင့်သုံးဖို့ အမျိုးသမီးတွေ၊ အားကစားသမားတွေနဲ့ ကလေးတွေကို နှိပ်စက်ညှင်းပန်းနေတဲ့ နိုင်ငံကို ဖီဖာက ပါဝင်ယှဉ်ပြိုင်ခွင့် မပြုသင့်ပါဘူး”လို့ အဆိုပါအဖွဲ့အစည်းက ပြောခဲ့တာပါ။

အီရန်ဟာ ၂၀၂၂ ကမ္ဘာ့ဖလားပြိုင်ပွဲမှာ အင်္ဂလန်၊ အမေရိကန်၊ ဝေးလ်စ်တို့နဲ့ တစ်အုပ်စုတည်း ကျရောက်နေတာ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ အောက်တိုဘာ ၂၁

ယူနိုက်တက်တိုက်စစ်မှူး ရော်နယ်ဒိုက ပေါက်ကွဲစေတတ်တဲ့ အခိုက်အတန့်တွေဟာ သူတို့ကို အနိုင်ယူသွား တယ်လို့ ချယ်လ်ဆီးနဲ့ပွဲမှာ သူ့ကို လူစာရင်းကနေ ချန်လှပ်ခဲ့တာနဲ့ ပတ်သက်ပြီး တုံ့ပြန်လိုက်ပါတယ်။

ရော်နယ်ဒိုက “ကျနော့်ရဲ့ ကစားသမားဘဝတစ်လျှောက်မှာ အသင်းဖော်တွေ၊ နည်းပြတွေနဲ့ ပြိုင်ဘက်တွေ အပေါ်မှာ လေးစားစွာဆက်ဆံပြီး ကစားဖို့ အမြဲတမ်းကြိုးစားခဲ့ပါတယ်။ဒါကို ကျနော်ဘယ်တော့မှ မပြောင်း လဲပါဘူး။လေးစားမှုဆိုတာ ကျနော်ဆုံးဖြတ်ချက်ချတဲ့ လုပ်ငန်းစဉ်မှာ အမြဲတမ်းအရေးကြီးတဲ့ အခန်းကဏ္ဍ ကနေပါဝင်ခဲ့ပါတယ်။အတွေ့အကြုံရင့်ကျက်တဲ့ ကစားသမားတွေက ကျနော့်အတွက် အမြဲတမ်းအရေးပါသလို ကျနော်ကလည်း လူငယ်ကစားသမားတွေအတွက် စံနမူနာဖြစ်အောင် အမြဲတမ်းကြိုးစားခဲ့ပါတယ်။ဒါပေမယ့် ကံမကောင်းစွာနဲ့ ပေါက်ကွဲစေတတ်တဲ့ အခိုက်အတန့်တွေက ကျနော်တို့ကို အနိုင်ယူသွားခဲ့ပါတယ်” လို့ အင်စတာ ဂရမ်မှာ ရေးသားခဲ့တာပါ။

ရော်နယ်ဒိုဟာ စပါးအသင်းကို ယူနိုက်တက်က ၂ ဂိုး- ဂိုးမရှိနဲ့ အနိုင်ရခဲ့တဲ့ပွဲမှာ ပွဲထွက်ကစားခွင့် မရခဲ့သလို လူစားလဲဝင်ခွင့်လည်း မရခဲ့ပါဘူး။အဲဒါကြောင့် ရော်နယ်ဒိုဟာ ပွဲမပြီးသေးခင် ပွဲချိန် ၈၉ မိနစ်အရောက်မှာ ကွင်းအတွင်းကနေ ထွက်ခွာပြီး ဥမင်ထဲကို ဝင်သွားခဲ့တာဖြစ်ပါတယ်။အဲဒါကြောင့် ယူနိုက်တက်အသင်းဟာ ရော်နယ်ဒိုကို စည်းကမ်းပိုင်းဆိုင်ရာ အရေးယူမှုအဖြစ် ချယ်လ်ဆီးအသင်းနဲ့ကစားမယ့် ပွဲစဉ်ရဲ့ အသင်းလူ စာရင်းကနေ ချန်လှပ်ဖို့ ဆုံးဖြတ်ခဲ့တာပါ။

ဒါကြောင့် ရော်နယ်ဒိုဟာ ချယ်လ်ဆီးအသင်းနဲ့ ကစားမယ့်ပွဲစဉ်ကို ပါဝင်ခွင့်မရတော့တာ ဖြစ်ပါတယ်။ ရော်နယ်ဒိုက “ကာရင်တန်မှာ အလုပ်ကို ကြိုးကြိုးစားစားဆက်လုပ်ဆောင်ပြီး အသင်းဖော်တွေကို ပံ့ပိုး ပေးသွားမှာပါ။ဖိအားဆိုတာက ရွေးချယ်စရာမဟုတ်ပါဘူး။ဒါဟာ မန်ချက်စတာယူနိုက်တက်၊ ကျနော်တို့ စည်းစည်းလုံးလုံးရှိနေရပါမယ်။မကြာခင် ကျနော်တို့ ပြန်တွေ့ကြမယ်”လို့ ရေးသားထားခဲ့တာပါ။

ရော်နယ်ဒိုဟာ စပါးအသင်းနဲ့ ပွဲမှာ နောက်ကျပြီးမှ လူစားလဲတာကို ပါဝင်ဖို့ ငြင်းဆန်ခဲ့တယ်လို့လည်း သတင်း တွေမှာ ဖော်ပြထားတာဖြစ်ပါတယ်။လက်ရှိအချိန်မှာ ရော်နယ်ဒိုနဲ့ နည်းပြ အဲရစ်တန်ဟတ်တို့ရဲ့ ဆက်ဆံရေးဟာ အဆင်ပြေမှုမရှိတော့တာကြောင့် ကစားသမားဟာ ဇန်နဝါရီအပြောင်းအရွှေ့မှာ အသင်းက ထွက်ခွာဖို့ ရှိနေပြီလို့ သိရပါတယ်။

ဒီရာသီမှာ ယူနိုက်တက်အတွက် ၂ ဂိုးသာသွင်းယူထားတဲ့ ရော်နယ်ဒိုနဲ့ အသင်းတို့ချုပ်ဆိုထားတဲ့ စာချုပ်ဟာ အခုနှစ်ရာသီအကုန်မှာ ကုန်ဆုံးတော့မှာဖြစ်ပါတယ်။

Source:DailyMail

CNI Sport News

၂၀၂၂ ခုနှစ်၊ အောက်တိုဘာ ၂၀

သြစတြေးလျ ရပ်ဘီလိဂ် ကစားသမားတစ်ဦးဟာ သူငယ်ချင်း ဖြစ်သူတွေနဲ့ ညဘက် အပြင်ထွက်တာမှာ ပျောက်ဆုံးပြီးနောက် စပိန်မှာ သေဆုံးနေတာကို တွေ့ရှိခဲ့ပါတယ်။

လီယန်ဟမ်ဆန်လို့ အမည်ရတဲ့ သူ့ရဲ့ ရုပ်အလောင်းကို ဘာစီလိုနာ နိုက်ကလပ်ရဲ့ ကြမ်းပြင်ပေါ်မှာ တွေ့ခဲ့ရတာလို့ ဒေသခံ မီဒီယာတွေက ဖော်ပြခဲ့ပါတယ်။

လီယန်ဟမ်ဆန်ဟာ အမျိုးသားရပ်ဘီလိဂ်(NRL) ကစားသမားတွေ အပါအဝင် အဖွဲ့တစ်ဖွဲ့နဲ့ ဥရောပကို ခရီးထွက် ခဲ့တာဖြစ်ပါတယ်။ ဒီနောက်မှာတော့ လီယန်ဟမ်ဆန် ပျောက်ဆုံးနေခဲ့တယ်လို့ သတင်းတွေ ထွက်ပေါ်ခဲ့တာ ဖြစ်ပါတယ်။

မတော်တဆမှုအဖြစ် ဖော်ပြခဲ့တဲ့ လီယန်ဟမ်ဆန်ရဲ့ သေဆုံးမှုကြောင့် မိသားစုတွေဟာ ထိခိုက်ကြေကွဲ နေရတယ်လို့ ဆိုပါတယ်။

လီယန်ဟမ်ဆန်ဟာ လာမယ့်ရာသီ သြစတြေးလျထိပ်တန်း NRL မှာ ဝင်ရောက် ယှဉ်ပြိုင်မယ့် Redcliffe Dolphins အတွက် Queensland Cup ပြိုင်ပွဲမှာ ပါဝင်ကစားခဲ့ပါတယ်။

လီယန်ဟမ်ဆန် သေဆုံးမှုအပေါ် မိသားစုက ရေးသားထားသော ၀မ်းနည်းကြောင်းကိုတွေ့ရစဉ်

သူဟာ အင်္ဂါနေ့ ဒေသစံတော်ချိန် အစောပိုင်းက ဆယ်လ်လာအပိုလို နိုက်ကလပ်ကနေ ထွက်ခွာသွားချိန်မှာ သူငယ်ချင်းဖြစ်သူတွေနဲ့ ကွဲကွာသွားခဲ့တာလို့ မိသားစုက ဆိုရှယ်မီဒီယာမှာ ပြောထားတာပါ။

သူ့ကို ၂၄ နာရီကျော်ကြာအောင် မတွေ့ရပြီးနောက် ဆွေမျိုးတွေက ရှာဖွေမှုတွေ ပြုလုပ်ပေးဖို့ အကူအညီ တောင်းခဲ့တာ ဖြစ်ပါတယ်။

လီယန်ဟမ်ဆန်ရဲ့ ရုပ်အလောင်းကို ဝန်ထမ်းတွေက ဗုဒ္ဓဟူးနေ့ နေ့လည်ပိုင်းလောက်မှာ တွေ့ရှိခဲ့တယ်ဆိုပြီး ဘာစီလိုနာရဲတပ်ဖွဲ့က ပြောခဲ့ကြောင်း ဘရစ်စဘိန်းတိုင်းမ်စ်က ဖော်ပြထားပါတယ်။

လီယန်ဟမ်ဆန်ဟာ အမြင့် ၁၀ မီတာခန့် အတွင်းကနေ မတော်တဆ ပြုတ်ကျခဲ့တယ်လို့ ရဲအရာရှိတွေက ယုံကြည်နေကြောင်း အဆိုပါသတင်းက ဆက်လက် ဖော်ပြထားပါတယ်။

လီယန်ဟမ်ဆန်ရဲ့ ဖခင်ဖြစ်သူ ဘရတ်က “ စကားလုံးတွေက ငါတို့ရဲ့ ဝမ်းနည်းမှုကို ဖော်ပြလို့ မရပါဘူး”လို့ ရေးသားခဲ့သလို အစ်မဖြစ်သူ တီယာနာဟမ်ဆန်က “ သူ့ရဲ့ နောက်ဆုံး နေ့ရက်တွေက သူ့ဘဝရဲ့ အကောင်းဆုံး အချိန် ဖြစ်တယ်ဆိုတာ သေချာစေခဲ့တယ်”လို့ ဆိုရှယ်မီဒီယာမှာ ရေးသားခဲ့ကြတာပါ။

လီယန်ဟမ်ဆန်ဟာ ဆီမီးပရော်ဖက်ရှင်နယ် ကစားသမားအဖြစ် Tweed Seagulls အသင်းမှာ ကစားခဲ့ပြီး အခုနှစ်မှာ Redcliffe Dolphins အသင်းထံ ရောက်ရှိခဲ့တာ ဖြစ်ပါတယ်။

Source: BBC