CNI News

၂၀၂၂ ခုနှစ်၊ ဇူလိုင် ၂၅

ထိုင်းနိုင်ငံသားသေဆုံးမှုတွင် လက်ဗွေတွေ့ရှိသဖြင့် တရားရင်ဆိုင်နေရသည့် ရခိုင်လူငယ်၏အမှုသည် ငွေကြေး မတတ်နိုင်သဖြင့် အာခံမယူဘဲ ရင်ဆိုင်သွားမည်ဖြစ်ကြောင်း ကူညီဆောင်ရွက်ပေးနေသည့် MWRN မှ မြန်မာ အလုပ်သမားတာဝန်ခံ ကိုသိန်းထွန်းက CNI သတင်းဌာနသို့ ပြောသည်။

အဆိုပါ သေဆုံးမှုသည် မလေးရှားသို့ တရားမဝင် ခိုးဝင်မည့် မြန်မာအလုပ်သမား ၄၀၀ ကျော်ထဲကမှ ရခိုင် လူငယ် တစ်ဦး၏ လက်ဗွေရာအား အလောင်း၏ လည်ပင်းမှပုဆိုးကို စစ်ဆေးကြည့်ရာမှာ တွေ့ရှိခဲ့ခြင်းဖြစ်သည်။

လက်ဗွေတွေ့ရှိသည့် ရခိုင်လူငယ်အား ဇူလိုင်လ ၁၈ ရက်နေ့တွင် စစ်ဆေးခဲ့ပြီး ၁၉ ရက်နေ့တွင် ၎င်းအပါအဝင် သက်သေနှစ်ဦးနှင့် အမှုကိုင်ရဲတို့အား စစ်ဆေးခဲ့ရာမှာ အလားအလာကောင်းကြောင်း MWRN မှ မြန်မာ အလုပ်သမားတာဝန်ခံ ကိုသိန်းထွန်းက ပြောသည်။

“အောင်ကိုဝင်းက လက်ဗွေတွေ့ထားတာတော့ မှန်တယ်။ ဒါပေမယ့် လက်ဗွေတွေ့တိုင်း လူသတ်မှု မြောက်တယ် ဆိုပြီး ချမှတ်လို့မရတဲ့အကြောင်းကို ရဲကထွက်ဆိုထားတာရှိတယ်။ အဲဒီအပေါ်မှာ ကျနော်တို့က အားသာချက်တွေ အများကြီး ရှိတယ်။ အာမခံဆိုရင် ကျနော်တို့ ရတာကြာပြီ။ ငွေကြေး တတ်နိုင်မယ်ဆိုရင်ပေါ့လေ။ လုပ်လို့ရတာ ကြာပြီ။ အာမခံနဲ့ဆိုတာက ငွေကြေး အမြောက်အများ ကုန်မယ်။ အာမခံမလုပ်ဘဲနဲ့ ဒီလိုမျိုး အထဲကနေပြီးတော့ ကျနော်တို့ ရင်ဆိုင်သွားဖို့ ဆုံးဖြတ်ထားတာ။ အာမခံယူမယ်ဆိုရင် ယူလို့ရတယ်။ ဒါပေမယ့် ကျနော်တို့က ငွေကြေး ပိုင်းဆိုင်ရာ မတတ်နိုင်ဘူးလေ။ မတတ်နိုင်ဘူးဆိုတော့ အထဲကပဲ ကျနော်တို့ အဲဒီလိုမျိုး ရင်ဆိုင်သွားဖို့ဆိုပြီးတော့ ရှေ့နေတွေနဲ့ တိုင်ပင်ထားတာရှိတယ်။ အလားအလာကောင်းတယ်။ ရာခိုင်နှုန်းများတယ်လို့ပြောရမယ်။ ဒါပေမယ့် အပြတ်နိုင်တယ်ဆိုတာကတော့ တရားရုံးက မဆုံးဖြတ်ရသေးတဲ့အတွက်ကြောင့် ပြောလို့မရဘူး။ အခြေအနေ တော့ ကောင်းပါတယ်” ဟု ၎င်း ပြောသည်။

လက်ဗွေတွေ့ရှိထားသည့် ရခိုင်လူငယ်၏ မိခင်ဖြစ်သူ ဒေါ်သန်းကြည်မေက ယခုကဲ့သို့ အမှုအခြေအနေ ကောင်းသည်ဟု ကြားသိရသည့်အတွက် အတိုင်းမသိဝမ်းသားကြောင်းနှင့် သားဖြစ်သူအား အမြန်ဆုံးလွတ်မြောက် စေချင်ကြောင်း ပြောသည်။

“အောင်ကိုဝင်းကို အမှုထဲမှာ လူသတ်သမားလို့ စွပ်စွဲလို့မရဘူး။ အောင်ကိုဝင်းသတ်တာမဟုတ်ဘူး။ အဲဒါကိုတော့ သိရတယ်။ အန်တီမှာ လွတ်‌မြောက်ဖို့တစ်ခုပဲ အရေးကြီးတယ်။ အန်တီသားက တကယ့်တကယ်မလုပ်ထားတာ ဆိုတာကို အန်တီကိုယ်တိုင်လည်း ယုံတယ်။ အများအပြားကလည်း သူမပါခဲ့ဘူးဆိုတာသိတယ်။ သူ့နှုတ်ဖျားက ထွက်တာကလည်း ငါမလုပ်ဘူးလို့ သူပြောတာကို သိရတော့ အန်တီက စိတ်သက်သာခွင့်ရတာပေါ့။ ဒါပေမယ့် ကိုယ့်သားလေးက ရင်ခွင်ထဲမှာ မရောက်သေးဘူးဆို‌တော့ အန်တီက စိတ်မကျသလို ဖြစ်နေတယ်။ ရင်ထဲကို ရောက်လာဖို့အချိန်ကို အန်တီက မျှော်နေတာ” ဟု ၎င်းက CNI သို့ ပြောသည်။

ယခုအမှုနှင့်ပတ်သက်၍ အခကြေးငွေသက်သာစွာဖြင့် လိုက်ပါဆောင်ရွက်ပေးနေသည့် ရှေ့နေရှိပြီး ဥပဒေ အကြံပေးသူများ၊ အာဏာပိုင်အဖွဲ့အစည်းတွေမှလည်း ကူညီပံ့ပိုးပေးမှုများရှိနေကြောင်းနှင့် အမှုအား ပြီးဆုံး သည်အထိ လိုက်မည်ဖြစ်ပြီး နိုင်အောင် ကြိုးစားသွားမည်ဖြစ်ကြောင်းလည်း ကိုသိန်းထွန်းက ပြောသည်။

သို့သော် အမှုတစ်ခုအား ဖြေရှင်းရာတွင် ငွေကြေးလိုအပ်ချက်များသည့်အတွက် လက်ရှိတွင် ငွေကြေးလိုအပ်ချက် အချို့ ရှိနေကြောင်း သိရသည်။

ကိုသိန်းထွန်းက “ကျနော်တို့ အခုကောင်းတဲ့ဘက်ကို သွားနေပါတယ်။ အရမ်းကို အဆင်ပြေဖို့ အတိုင်းအတာ တစ်ခုကို ကျနော်တို့ မျှောင်လင့်ထားတာရှိတယ်။ ဒီအတွက်လည်း ကျ‌နော်တို့ကြိုးစားနေတယ်။ မိသားစုတွေက မတတ်နိုင်ပေမယ့် ဒီဘက်မှာ ကျနော်တို့ တတ်နိုင်တဲ့နည်းလမ်းနဲ့ ကျနော်တို့အသိုင်းအဝိုင်းနဲ့။ ရှိတာပေါ့ ဒီမှာ ရွှေ့ပြောင်း မြန်မာတွေလည်း အများကြီးရှိတယ်ဆိုတော့ သူတို့တွေလည်း တတ်နိုင်သလောက် ကူညီပေးကြတာ မျိုးတွေ ရှိတယ်။ ၁၈ ရက်နေ့က ကျနော် အောင်ကိုဝင်းနဲ့ တွေ့တယ်။ ၁၉ ရက်နေ့တရားရုံးမှာ ထပ်တွေ့တယ်။ သူကတော်တော်လေးကို စိတ်အားထက်သန်သွားတာပေါ့။ နောက်ပြီးတော့ သူကိုယ်တိုင်လည်း ဒီအမှုမှာ မပတ် သက်ဘူးဆိုတဲ့ဟာကိုပဲ ထွက်ဆိုထားတယ်ဆိုတော့ သူကလွတ်ချင်တယ်ဆိုတဲ့ အကြောင်းတော့ ပြောသွားတယ်” ဟု ပြောသည်။

သေဆုံးသူအ‌လောင်းအား မေလ ၃၁ ရက်က တွေ့ရှိခဲ့တာကြောင့် ထိုင်းအာဏာပိုင်များက ဇွန်လ ၂ ရက်နေ့မှ စတင်၍ တရားခံ ရှာဖွေခဲ့သည့်အတွက် မလေးရှားသို့ တရားမဝင် ခိုးဝင်မည့် မြန်မာ ၄၀၀ ကျော်အားတွေ့ရှိကာ ဖမ်းဆီးထိန်းသိမ်း စစ်ဆေးခဲ့ရခြင်းဖြစ်သည်။

လက်ရှိတွင် လက်‌ဗွေတွေ့ရှိသူနှင့် မျက်မြင်သက်သေတို့မှ လွ၍ ဖမ်းဆီးခံထားရသည့် မြန်မာအချို့အား နေရပ်သို့ ပြန်ပို့ပေးနေကြောင်းနှင့် ထိုထဲတွင် ချင်းလူမျိုးတစ်ဦးသည်လည်း ကျန်းမာရေးမကောင်းသဖြင့် ဆေးရုံ၌ ဆုံးပါး သွားကြောင်း သိရသည်။

CNI News

၂၀၂၂ ခုနှစ်၊ ဇူလိုင် ၁၈

မနက်ဖြန် (ဇူလိုင် ၁၉ ရက်) ကျရောက်မည့် (၇၅) နှစ်မြောက် အာဇာနည်နေ့တွင် ရွှေတိဂုံဘုရား၏ အရှေ့ဘက်မုခ်နှင့် မြောက်ဘက်မုခ် တို့ကို ပိတ်ထားမည်ဖြစ်ကြောင်း ရွှေတိဂုံဘုရား ဂေါပကအဖွဲ့က CNI သတင်းဌာနသို့ ပြောသည်။

အာဇာနည်နေ့သို့ လာရောက် ဂါဝရပြုကြမည့် ပြည်သူလူထုများ ယာဉ်လမ်းကြောင်း ရှင်းလင်းစေရန်အတွက် အထက်ပါ မုခ် နှစ်ခုကို ယနေ့ (ဇူလိုင် ၁၈ ရက်) နေ့လယ်မှ မနက်ဖြန် (ဇူလိုင် ၁၉ ရက်) အာဇာနည်နေ့ တစ်နေ့လုံးအထိ ပိတ်ထားမည်ဖြစ်ပြီး ဇူလိုင် ၂၀ ရက်နေ့မှ ပြန်လည် ဖွင့်လှစ်မည်ဖြစ်သည်။

အရှေ့ဘက်မုခ် ရွှေတိဂုံဘုရားကို မြင်တွေ့ရစဉ်

ရွှေတိဂုံဘုရား ဂေါပကအဖွဲ့ဝင် ဦးဋ္ဌေးလှိုင်က “အရှေ့ဘက်မုခ်နဲ့ မြောက်ဘက်မုခ်ကို ပိတ်တာ။ အာဇာနည်လမ်း ပိတ်တယ် ဆိုတော့ အ‌ရှေ့ဘက်က ပိတ်လိုက်တာ။ အနောက်နဲ့ တောင်နဲ့က လာလို့ရတယ်။ ဒီနေ့ နေ့ခင်းကတည်းက ပိတ်ထားတာ။ ပိတ်လိုက်ပြီ။ အ‌ရှေ့ဘက်နဲ့ မြောက်ဘက် တစ်နေ့လုံး အဝင်အထွက်တွေ ရှိတာကိုး” ဟု CNI သတင်းဌာနသို့ ပြောသည်။

ဘုရာဖူး ပြည်သူများ အနေဖြင့် အနောက်ဘက်မုခ်နှင့် တောင်ဘက်မုခ်မှ တဆင့် သွားရောက် ဖူးမျှော်နိုင်သည်။

CNI News

၂၀၂၂ ခုနှစ်၊ ဇူလိုင် ၁၈

ထိုင်းနိုင်ငံတွင် အလုပ်လုပ်ကိုင်ရန်အတွက် MOU ဖြင့် ရောက်ရှိနေသည့် အလုပ်သမားများထဲတွင် စာချုပ်ပါ အလုပ်အတိုင်း မရရှိမှုနှင့် ကြုံတွေ့နေရကြောင်း မြန်မာအလုပ်သမားအရေး ဆောင်ရွက်ပေးနေသည့် ကိုသားကြီး က CNI သတင်းဌာနသို့ ပြောသည်။

ထိုအလုပ်သမားများသည် ထိုင်းကို MOU ဖြင့် မသွားရောက်ခင် အေဂျင်စီများတွင် အလုပ်ရှင်၊ အလုပ်သမား စာချုပ်ချုပ်ဆိုရာ၌ စက်ရုံ၊ အလုပ်ရုံတို့တွင် အလုပ်လုပ်ရမည်ဟူ၍ စာချုပ်ချုပ်ဆိုခဲ့ကြသော်လည်း ထိုင်းသို့ ရောက်ရှိသည့်အခါတွင် ဆောက်လုပ်ရေးလုပ်ငန်း၌ လုပ်ကိုင်နေရကြောင်း သိရသည်။

ကိုသားကြီးက “ခေါ်တုန်းကတော့ စက်ရုံ၊အလုပ်ရုံ တစ်ခုခု‌ပေါ့။ အခု အလုပ်လုပ်နေရတာတော့ ဆောက်လုပ်ရေး ထဲမှာပေါ့။ နောက် တချို့တွေဆိုရင်လည်း ဒီဆောက်လုပ်ရေးအလုပ်ထဲမှာ ဆိုက်ထဲသာ ပို့သွားတယ်။ ဆောက်လုပ် ရေး အလုပ်တောင်မှ မဆင်းရသေးဘူး။ ပြဿနာကဘာလဲဆိုတော့ စာချုပ်ပါအတိုင်း အလုပ်မရဘူးဆိုရင် MOU စကားနဲ့ပြောမယ်ဆိုရင် A to B ပို့လိုက်တာပေါ့ အေဂျင်စီက။ လူရောင်းစားတာပေါ့။ ဒါ မြန်မာပြည်ထဲက ထွက်ဖို့ အတွက်ကိုတော့ တရားဝင်ပုံပြတာပေါ့။ ဒီစက်ရုံ ဒီ demand ဆိုပြီးတော့ ဒီကုမ္ပဏီကိုပို့မယ်။ စက်ရုံတစ်ရုံမှာ လုပ်ရမယ့်ကုန်ကျစရိတ်နဲ့ ဆောက်လုပ်ရေးတစ်ခုကိုသွားမယ့် ကုန်ကျစရိတ်တွေက မတူဘူး။ အဲဒီတော့ အေဂျင်စီ တွေက စက်ရုံ demand နဲ့ ခေါ်ပြီးတော့မှ ဘာကြောင့် ဒီ စက်ရုံ demand ကို မပေးနိုင်တာလဲ။ စာချုပ်ပါအတိုင်း အလုပ်မရတာလဲပေါ့။ လောလောဆယ်တော့ ကျနော့်ကို တိုင်လာတဲ့ လောလောလတ်လတ်ကတော့ ကျနော်တို့ စာချုပ်ချုပ်တာတစ်နေရာ၊ ရောက်နေတာတစ်နေရာပေါ့” ဟု ပြောသည်။

ယခုကိစ္စသည် ပြည်ပအလုပ်အကိုင်ရှာဖွေရေးအေဂျင်စီတို့တွင် တာဝန်ရှိကြောင်း၊ တိုင်ကြားလာသည့် အလုပ် သမားများမှာ အေဂျင်စီအမည်‌အား မသိကြဘဲ ပို့‌ဆောင်ပေးလိုက်သည့် သူ၏ အမည်ကိုသာ သိကြကြောင်းနှင့် ၎င်းတို့ပေးသည့် ဖုန်းနံပါတ်အား ဆက်သွယ်ကြည့်ရာတွင်လည်း မကိုင်‌တော့ကြောင်း သိရသည်။

လက်ရှိတွင် ထိုအလုပ်သမားများသည် နေစရာအဆောင် ကောင်းကောင်းမွန်မွန်မရှိသည့်အပြင် စားဝတ်နေရေး တို့အတွက် အခက်အခဲဖြစ်နေကြပြီး ပြန်ချင်နေကြကြောင်းနှင့် အဆိုပါကိစ္စနှင့်ပတ်သက်၍ အလုပ်သမားဝန်ကြီး ဌာနတွင် တာဝန်ရှိကြောင်း ကိုသားကြီးက ပြောသည်။

 ထိုင်းနိုင်ငံရှိ ဆောက်လုပ်ရေးလုပ်ငန်းခွင်တစ်ခုကို တွေ့ရစဉ်

“အဆောင်ပေးမယ်လို့ပြောတဲ့ ဥပမာ နယ်မှာဆို နယ်ပွဲစားတွေက ဒီအလုပ်သမားတွေကို ရဖို့အတွက် သူတို့ အမျိုးမျိုး ကြော်ငြာတယ်။ အခန်းပုံတွေပြတယ် မင်းတို့ ဘယ်လိုနေရမယ်ပေါ့။ မင်းတို့ ‌ရေခ၊ မီးခတွေ မပေးရဘူး။ တချို့သောနေရာတွေမှာဆိုလည်း မင်းတို့ ရေခ၊ မီးခပဲပေးရမယ်။ အခန်းကတော့ ဒီလိုမျိုးပေါ့။ ထမင်းကတော့ တစ်နေ့ဘယ်လောက်ကျွေးမယ် ဘယ်စက်ရုံပေါ့။ အဲဒီလိုတွေပြောခဲ့တာ။ လက်ရှိသူတို့က ဒီနေရာမှာ လုံးဝ မနေ ချင်ဘူး။ မရရင် သူတို့ပြန်မယ်။ ကျနော်တို့ကလည်း သူတို့ကို လတ်တလောမှာတော့ အကြံပြုနိုင်တာက စာချုပ်ပါ အတိုင်း အလုပ်မလုပ်ရဘူးဆိုရင် ပြန်တာက အကောင်းဆုံးပဲ။ ပြန်ပြီးတော့မှ မိမိတို့ ဘယ်အေးဂျင့်နဲ့စာချုပ်ချုပ် တယ်၊ ဒီအေးဂျင့်ကို လူကုန်တားကနေခေါ်ပြီးတော့မှ ဒီအလုပ်သမားတွေ ကုန်တဲ့ကုန်ကျစရိတ်တွေကို တစ်ကျပ် မကျန် ပြန်ပေးဖို့ ဒါကိုပဲ ပြောရမှာ” ဟု ၎င်းက ပြောသည်။

ထိုသို့သော အလုပ်အကိုင် ရှာဖွေရေးအေဂျင်စီများအား သက်ဆိုင်ရာသံရုံးနှင့် သံအရာရှိတို့အနေဖြင့် စနစ်တကျ ကိုင်တွယ်အပြစ်ပေးအရေးယူမှု ဆောင်ရွက်ရန် လိုအပ်ကြောင်း ပညာရေးနှင့် ဖွံ့ဖြိုးတိုးတက်ရေး ဖောင်ဒေးရှင်း (FED) မှ အမှုဆောင်ဒါရိုက်တာ ဦးထူးချစ်က CNI သတင်းဌာနသို့ ပြောသည်။

“အလုပ်သမားသံအရာရှိ အများစုကလည်း ဒီဘက်ကို ရောက်လို့ရှိရင် အစောကပြောတဲ့ အေဂျင်စီတွေပေါ်မှာပဲ သူတို့က မှီခိုနေရတာဖြစ်တယ်။ အေဂျင်စီတွေရဲ့ ကူညီထောက်ပံ့မှုနဲ့ပဲ နေရသလိုကျတော့ အေဂျင်စီတွေအချို့ လုပ်ဟန် လွဲတယ်ဆိုရင်တောင်မှပဲ ထိထိရောက်ရောက် အရေးယူအပြစ်ပေးဆောင်ရွက်မှုတွေ မလုပ်နိုင်ဘူး။ ဒါကြောင့်မို့လို့ ဒီအလုပ်သမားသံအရာရှိတွေရဲ့ တာဝန်ယူမှု တာဝန်ခံမှု ညံ့ဖျင်းမှုကလည်း ဒါ အစိုးရတွေကို ဘာပဲပြောပြော အနည်းနဲ့အများထိခိုက်တယ်။ ဒါကြောင့်မို့လို့ ဒီအလုပ်သမားသံအရာရှိတွေက သက်ဆိုင်ရာ နိုင်ငံတွေမှာဖြစ်တဲ့ ပြဿနာတွေကို စနစ်တကျနားလည်ပြီးတော့ စနစ်တကျ မြန်မြန်ဆန်ဆန် ကူညီဆောင်ရွက် ပေးဖို့လိုတယ်။ ဒါဆိုလို့ရှိရင်တော့ တစ်စုံတစ်ရာ အလုပ်သမားကာကွယ်ရေးကိစ္စတွေကို ဆောင်ရွက်ထားပြီးသား ဖြစ်လိမ့်မယ်လို့ ကျနော်တို့အနေနဲ့ ထင်တယ်” ဟု ၎င်းက ပြောသည်။

ထိုင်းနိုင်ငံတွင် မြန်မာအလုပ်သမား သန်းနှင့်ချီရှိပြီး ကိုဗစ်ကြောင့်ရပ်နားထားသည့် MOU ဖြင့် အလုပ်သမား စေလွှတ်ခြင်းအား ၂၀၂၂ ခုနှစ် မေလ ၁၀ ရက်နေ့မှစတင်ကာ ပြန်လည်စေလွှတ်ခဲ့ပြီး လက်ရှိတွင် အလုပ်သမား တစ်သောင်းကျော်ခန့် စေလွှတ်ထားပြီးဖြစ်ကြောင်း သိရသည်။

CNI International News

ဆန်ဖရန်စစ္စကို၊ ဇူလိုင် ၄

ကိုယ်ဝန်ဖျက်ချပေးသော ဆေးကုခန်းများ၊ အိမ်တွင်းအကြမ်းဖက်မှုမှ ရှောင်တိမ်းသည့်နေရာများ၊ ကိုယ်ရေး ကိုယ်တာအချက်အလက်ရှာဖွေသည့်နေရာများသို့ သွားရောက်ခဲ့ဖူးသော Google သုံးစွဲသူများ၏ တည်နေရာ မှတ်တမ်းများကို Google ကုမ္ပဏီက မှတ်သားသိမ်းဆည်းခြင်းမပြုဘဲ ဖျက်သွားမည်ဖြစ်ကြောင်း ဇူလိုင် ၁ ရက်၌ ကြေညာခဲ့သည်။

“အဲဒီလိုနေရာတွေကို တစ်ယောက်ယောက်က သွားခဲ့ဖူးတယ်လို့ ကျမတို့သိတာနဲ့ မကြာခင်မှာပဲ အဲဒီ အကြောင်းအရာတွေနဲ့ ပတ်သက်တဲ့ တည်နေရာမှတ်တမ်းတွေကို ဖျက်ပေးမှာပါ။ အခုအပြောင်းအလဲအစီအစဉ်က လာမယ့်သီတင်းပတ်တွေအတွင်း အသက်ဝင်လာပါလိမ့်မယ်” ဟု Goolge ကုမ္ပဏီမှ ဒုတိယဥက္ကဋ္ဌ ဂျန်ဖစ်ဇ် ပက်ထရစ်က ဘလော့ဂ်ပို့စ်တစ်ခုတွင် ပြောကြားခဲ့သည်။

အလားတူ တည်နေရာအချက်အလက်များကို Google မှတ်သားသိမ်းဆည်းမည်မဟုတ်သည့် အခြားနေရာများ တွင် သားဖွားမီးယပ်ဌာနများ၊ မူးယစ်/အရက်စသည့် စွဲလန်းမှုကုသရေးဌာနများနှင့် ကိုယ်အလေးချိန်လျှော့ချ ပေးသည့်ဆေးကုခန်းများလည်း ပါဝင်သည်။

အမေရိကန်အမျိုးသမီးများ ကိုယ်ဝန်ဖျက်ချခွင့်အတွက် ဖွဲ့စည်းပုံအခြေခံဥပဒေပါ အခွင့်အရေးများ ဖယ်ရှားပစ်ရန် အမေရိကန်တရားရုံးချုပ်က ဆုံးဖြတ်ပြီး ရက်သတ္တတစ်ပတ်အကြာတွင် ယခုကဲ့သို့ Google က ကြေညာချက် ထုတ်ပြန်ခဲ့သည်။

အမေရိကန်နိုင်ငံတွင် ကိုယ်ဝန်ဖြတ်ချခွင့်နှင့်စပ်လျဉ်း၍ ဥပဒေပြဋ္ဌာန်းချက်များကို ပြည်နယ်ပေါင်း ဆယ်ဂဏန်း ခန့်၌ လူအများစုပါဝင်သည့် ဆန္ဒပြပွဲများပြုလုပ်၍ သဘောထားထုတ်ဖော်ခဲ့ကြသည်။

ကိုယ်ဝန်ဖျက်ချခြင်းဆိုင်ရာ စုံစမ်းစစ်ဆေးမှုများနှင့် တရားစွဲဆိုမှုများအတွက် Google အပါအဝင် အခြား နည်းပညာကုမ္ပဏီများအနေဖြင့် ၎င်းတို့စုစည်းထားသောအချက်အလက်ပမာဏကို ကန့်သတ်ရန်အတွက် တက်ကြွလှုပ်ရှားသူများနှင့် နိုင်ငံရေးသမားများက တောင်းဆိုခဲ့ကြသည်။

ဂျန်ဖစ်ဇ်ပက်ထရစ်ကတော့ “မိမိတို့ကုမ္ပဏီအနေဖြင့် ကိုယ်ရေးကိုယ်တာအချက်အလက်များကို အလေးအနက် ထားပြီး Google ဝန်ဆောင်မှုသုံးစွဲသူများ လုံခြုံစိတ်ချစေရန် ကြိုးစားနေပါကြောင်း” ပြောကြားခဲ့သည်။

“Googel ဆီမှာ တရားဥပဒေစိုးမိုးရေးရဲ့ကျယ်ကျယ်ပြန့်ပြန့် တောင်းဆိုချက်တွေအရ ဆိုင်းငံ့ပေးလိုက်တဲ့ မှတ်တမ်းရှည်ရှိပါတယ်။ အဲဒီအထဲမှာ တောင်းဆိုချက်တချို့ကို လုံးဝကန့်ကွက်တာမျိုးလည်း ပါပါတယ်” ဟု ၎င်းက ဆက်လက်ပြောကြားခဲ့သည်။

“ကျမတို့ရဲ့ဒစ်ဂျစ်တယ်ထုတ်ကုန်တွေကို သုံးစွဲသူတွေရဲ့ကိုယ်ရေးကိုယ်တာနဲ့ လုံခြုံရေးကို ထည့်စဉ်းစားပြီးတော့ အစိုးရရဲ့ညွှန်ကြားချက်ကို လိုက်နာရတဲ့အခါမှာ သုံးစွဲသူတွေကို အသိပေးပါတယ်” ဟု ၎င်းက ထပ်လောင်း ပြောကြားခဲ့သည်။

မကြာသေးမီလများအတွင်း ရှေးရိုးဆန်သည့် အမေရိကန်ပြည်နယ်အချို့တွင် ကိုယ်ဝန်ဖျက်ချပေးသည့် ဆရာဝန် များကို လူမှုရေးအသင်းအဖွဲ့ဝင်များ (သို့မဟုတ်) ၎င်းတို့ကို အားပေးကူညီသူများက တရားစွဲဆိုပိုင်ခွင့်ရှိသည့် ဥပဒေများကို အတည်ပြုခဲ့ကြသည်။ သို့ဖြစ်၍ တရားရုံးစီရင်ချက်မချမီ စမတ်ဖုန်းပါ အချက်အလက်များ၊ မျိုးဆက်ပွားဆိုင်ရာအခွင့်အရေးများအပေါ် စိုးရိမ်စရာများ ဖြစ်လာခဲ့သည်။

ပြီးခဲ့သည့်မေလတွင် ဒီမိုကရက်တစ်ပါတီမှ ထိပ်တန်းလွှတ်တော်အမတ်များအဖွဲ့က Google အမှုဆောင်အရာရှိ ချုပ် ဆန်ဒါပီချိုင်းထံသို့ စာတစ်စောင် ရေးသားပေးပို့၍ မျိုးဆက်ပွားကျန်းမာရေးစောင့်ရှောက်မှု လိုလားသူများကို နှိမ်နင်းရန် လက်ယာအစွန်းရောက်ဝါဒီများအတွက် Google သည် အသုံးချစရာကိရိယာတစ်ခု ဖြစ်လာမည့်အရေး စိုးရိမ်မိကြောင်း၊ သို့ဖြစ်၍ စမတ်ဖုန်းတည်နေရာ အချက်အလက်စုဆောင်းခြင်းကို ရပ်တန့်ပေးရန် တောင်းဆိုခဲ့ကြသည်။

Source: AFP, Bangkok Post

CNI News

၂၀၂၂ ခုနှစ်၊ ဇွန်လ ၂၃

ထိုင်းနိုင်ငံသားသေဆုံးမှု၌ အလောင်းနှင့်ဆက်စပ်၍ လက်ဗွေတွေ့ရှိသည့် ရခိုင်လူငယ်သည် အာမခံဖြင့် လွတ်နိုင်ခြေရှိသဖြင့် အာမခံရရှိရန် ရှေ့နေနှင့်ဆောင်ရွက်လုပ်ဆောင်နေကြောင်း အကူအညီပေးနေသည့် ရွှေ့ပြောင်းအလုပ်သမား အခွင့်အရေးကွန်ယက်(MWRN) က CNI သတင်းဌာနသို့ ပြောသည်။

ရှေ့နေတစ်ဦးနှင့် အဆိုပါအမှုကိစ္စအား အကြောင်းစုံပြောပြထားပြီး ၎င်းက ကူညီမည်ဆိုသည့်အတွက် ဇွန်လ ၂၇ ရက်နေ့တွင် တရားရုံးသို့ သွားရောက်ကြမည်ဖြစ်ကြောင်း MWRN မှ မြန်မာအလုပ်သမားတာဝန်ခံ ကိုသိန်းထွန်းက CNI သတင်းဌာနသို့ ပြောသည်။

MWRN မှ မြန်မာအလုပ်သမားတာဝန်ခံ ကိုသိန်းထွန်းက “အာမခံနဲ့လွှတ်တယ်ဆိုတာက နေရပ်ကို ပြန်ပို့ရမှာ တော့ မဟုတ်ဘူး။ ဒီအမှုမပြီးမချင်းကတော့ မြန်မာပြည်ကိုပြန်လို့ရဖို့ဆိုတာကတော့ မဖြစ်နိုင်ဘူး။ အာမခံနဲ့ လွတ်ရင်တောင်မှ ထိုင်းမှာ ဒီတရားရုံးအခင်းတွေမှာ ပြီးအောင် ဆက်လုပ်ရမယ့်သဘောရှိတယ်။ ပြီးမှပဲ သူက မြန်မာပြည်ကို ပြန်ပို့မယ်။ ဒါပေမယ့် ဒီမှာရှိတဲ့ သူနဲ့သက်ဆိုင်တဲ့ ရှေ့နေက အာမခံပေးရမယ်။ နောက်ပြီးတော့ ရှေ့နေ တစ်ယောက်တည်းနဲ့ မလုံလောက်ဘူး။ တခြားပုဂ္ဂိုလ်တွေကနေပြီးတော့ အဖွဲ့အစည်းကသော် လည်းကောင်း၊သူ့ရဲ့ဆွေမျိုးတွေထဲကသော်လည်းကောင်း ပူးပေါင်းပြီးတော့ အာမခံပေးရမယ့်သဘောရှိတယ်။ အာမခံလို့ အမှန်တကယ် ၁၀၀ ရာခိုင်နှုန်း ရနိုင်မလား၊ မရနိုင်ဘူးလားဆိုတာ မသိရသေးဘူး။ ထောင်ကျမလား၊ မကျဘူးလားဆိုတဲ့ဟာမျိုးတွေပေါ့လေ။ ဒါပေမယ့် သူ့ရဲ့ထွက်ဆိုချက်တို့ နောက်ပြီးတော့ သက်သေအပေါ်မှာရော၊ မျက်မြင်သက်သေတွေအပေါ်မှာပေါ့ အကုန်လုံးလည်း သက်ဆိုင်နေတယ်”ဟု ပြောသည်။

ထိုင်း-မလေးရှား နယ်စပ်တွင် ထိုင်းနိုင်ငံသားတစ်ဦး အသတ်ခံရမှုနှင့်ပတ်သက်ပြီး သံသယရှိသူအဖြစ် ရခိုင် ၉ ဦးအား စစ်ဆေးရာတွင် ယခုကဲ့သို့ လက်ဗွေတွေ့ရှိခြင်းဖြစ်ပြီး တရားခံဟုယူဆရသောကြောင့် ဖမ်းဆီးထားသည့် ပွဲစားမှာ ကိုဗစ်ဖြစ်နေသည့်အတွက် တစ်စုံတစ်ရာ စစ်ဆေးမှုများ မပြုလုပ်ရသေးကြောင်း သိရသည်။

ဖမ်းဆီးထိန်းသိမ်းခံထားရသည့် မြန်မာအလုပ်သမားများကိုတွေ့ရစဉ်

အဆိုပါ သေဆုံးသူအ‌လောင်းအား မေလ ၃၁ ရက်က တွေ့ရှိခဲ့တာကြောင့် ဇွန်လ ၂ ရက်နေ့မှ စတင်၍ တရားခံရှာဖွေခဲ့သည့်အတွက် မလေးရှားသို့ တရားမဝင် ခိုးဝင်မည့် မြန်မာ ၄၀၀ ကျော်အားတွေ့ရှိကာ ဖမ်းဆီးထိန်းသိမ်းစစ်ဆေးခဲ့ခြင်းဖြစ်သည်။

၎င်းတို့ထဲကမှ မျက်မြင် သက်သေ ၃ ဦးပေါ်ထွက်ခဲ့ပြီး သေဆုံးသူအလောင်းနှင့် ဆက်စပ်ပြီး လက်ဗွေရာတွေ့ ရှိသူတစ် ဦး ထွက်ပေါ်လာခဲ့ကာ ၎င်းတို့မှာ စစ်တွေမှ ၁ ဦး၊ ပုဏ္ဏားကျွန်းမှ ၁ ဦးနှင့် မင်းပြားမှ ၂ ဦးတို့ ဖြစ်ကြောင်း သိရသည်။

လက်ရှိတွင် အဆိုပါ ၄ ဦးမှအပ ဖမ်းဆီးထိန်းသိမ်းခံထားရသည့် မြန်မာ ၄၀၀ ကျော်ထဲကမှ လူဦးရေ ၁၇၀ ကျော် အား နေရပ်သို့ပြန်ပို့ရန်အတွက် ယာယီအချုပ်သို့ ပိုဆောင်ထားပြီးဖြစ်ကြောင်း MWRN မှ မြန်မာအလုပ်သမား တာဝန်ခံ ကိုသိန်းထွန်းက ပြောသည်။

ယာယီအချုပ်ဆိုသည်မှာ ပြစ်ဒဏ်ကင်းလွတ်ပြီးဖြစ်သည့်အတွက် နေရပ်သို့ ပြန်ပို့ခံရမည့်သူများအား ထားရှိသော နေရာဖြစ်ကြောင်းလည်း သိရသည်။

“အဲဒီနေရာမှာက လူ ထောင်နဲ့ချီပြီးလည်း မဆန့်ဘူး။ တစ်ဖြတ် တစ်ဖြတ်၊ တစ်သုတ်ပို့ပြီးမှ တစ်သုတ်ကို ပို့ရတာ ဆိုတော့လေ။ အဲဒါနည်းနည်းတော့ စောင့်ဆိုင်းရမယ်။ တခါတည်းနဲ့ ဒီ ၄၀၀ ကျော်လုံးကို တခါတည်းပို့လိုက်လို့ တော့ မရဘူး။ နောက်တစ်ခုက စစ်ဆေးရမယ့်ဟာတွေ ရှိဦးမယ်လို့ထင်တယ်။ အကုန်လုံးကိုတော့ ပို့မှာတော့ မဟုတ်သေးဘူးနဲ့ တူတယ်။ လိုအပ်တဲ့ဟာတွေလည်း ဆေးစစ်စရာရှိတာတွေ သူတို့ဆေးစစ်မယ်။ စစ်ဆေးစရာ ရှိတာလည်း စစ်ဆေးဦးမယ်နဲ့တူတယ်”ဟု ပြောသည်။

၎င်း ထိုင်း-မ‌လေးရှားနယ်စပ်ရှိ မြန်မာအလုပ်သမားအရေးဆောင်ရွက်နေသည့် အဖွဲ့အစည်းများသည် ထို ဖမ်းဆီး စစ်ဆေးခံနေရသည့် မြန်မာများအတွက် နေ့စဉ် စားသောက်ဖွယ်ရာနှင့် ဆေးဝါးတို့ ထောက်ပံ့ကူညီပေးလျက် ရှိသည်။

အဆိုပါ ဖမ်းဆီးစစ်ဆေးခံနေရသည့် မြန်မာ ၄၀၀ ကျော်တို့သည် ပွဲစားဖြင့် ထိုင်းနိုင်ငံမှတဆင့် မလေးရှားနိုင်ငံသို့ တရားမဝင် ခိုးဝင်ကာ သွားရောက်အလုပ်လုပ်ကိုင်ရန် ရောက်ရှိနေသူများ ဖြစ်ကြောင်းသိရသည်။

CNI International News

တိုကျို၊ ဇွန်လ ၂၁

လိင်တူလက်ထပ်ခွင့်ကို တားမြစ်ခြင်းသည် ဖွဲ့စည်းပုံအခြေခံဥပဒေကို ချိုးဖောက်ရာမရောက်ကြောင်း ဂျပန်နိုင်ငံရှိ တရားရုံးတစ်ရုံးက ဇွန်လ ၂၀ ရက်တွင် ဆုံးဖြတ်ခဲ့ပြီး လွတ်လပ်စွာပေါင်းသင်းခွင့်နှင့်တန်းတူညီမျှမှုအခွင့်အရေးတို့ ချိုးဖောက်ခံရကြောင်း စောဒကတက်ခဲ့သည့် စုံတွဲ ၃ တွဲ၏ တောင်းဆိုချက်များကို ပယ်ချခဲ့သည်။

အထက်ပါ အိုဆာကာခရိုင်တရားရုံး၏ စီရင်ဆုံးဖြတ်ချက်သည် အလားတူအမှုမျိုးအတွက် ဒုတိယအကြိမ်မြောက် ဆုံးဖြတ်ခဲ့ရခြင်းဖြစ်ပြီး လိင်တူချင်းလက်ထပ်ခြင်းကို တားမြစ်ခြင်းသည် ဖွဲ့စည်းပုံအခြေခံဥပဒေနှင့် မကိုက်ညီ ကြောင်း တွေ့ရှိရသည်ဟု ယမန်နှစ်က ဆက်ပိုရိုတရားရုံး၏ဆုံးဖြတ်ချက်အပေါ် သဘောတူလိုက်နာခြင်းမရှိပေ။

စက်မှုထိပ်သီး ၇ နိုင်ငံအနက် လိင်တူသမဂ္ဂများကို အသိအမှတ်မပြုသည်မှာ ဂျပန်နိုင်ငံတည်းဖြစ်ပြီး ယခု ပြဿနာသည် ဂျပန်နိုင်ငံတွင် သဘောထားကွဲလွဲမှုရှိနေခြင်းကို ပြသနေခြင်းဖြစ်ကြောင်း အေပီက သတင်း ဆက်လက်ဖော်ပြသည်။

ယခုစီရင်ဆုံးဖြတ်ချက်တွင် အိုဆာကာတရားရုံးက လိင်တူချစ်သူများရင်ဆိုင်နေရသည့် ခွဲခြားဆက်ဆံခံရခြင်း အတွက် စုံတွဲတစ်တွဲလျှင် နစ်နာကြေး ယန်းငွေ ၁ သန်း (ဒေါ်လာ ၇,၄၀၀) ရယူလိုမှုတောင်းဆိုခြင်းကို ပယ်ချ ခဲ့သည်။

 ဂျပန်နိုင်ငံရှိ လိင်တူချစ်သူနှစ်ဦး လက်ထပ်မင်္ဂလာပွဲ ကျင်းပနေစဉ်(ဓါတ်ပုံ- Elise Hu/NPR)

၂၀၁၉ ခုနှစ်တွင် လွတ်လပ်စွာပေါင်းသင်းခွင့်နှင့် တန်းတူညီမျှခွင့် ချိုးဖောက်ခံရသည်ဟုပြောကြား၍ ဂျပန်အစိုးရ ကို တရားစွဲဆိုခဲ့ကြသူများသည် ဆက်ပိုရကို၊ တိုကျို၊ နာဂိုယာ၊ ဖူကူအိုကာနှင့် အိုဆာကာစသည့် မြို့ကြီးများမှ ဖြစ်ကြသည်။ ၎င်းတို့ထဲတွင် ယခု အိုဆာကာစီရင်ချက်တွင် တရားရင်ဆိုင်ခဲ့ကြသည့် အမျိုးသားစုံတွဲ ၂ တွဲနှင့် အမျိုးသမီး စုံတွဲတစ်တွဲတို့လည်း ပါဝင်ခဲ့ကြသည်။

လက်ထပ်ခြင်းမှတစ်ဆင့် ရရှိခံစားနိုင်သော တူညီသည့်အကျိုးစီးပွားနှင့် တရားဝင်ခံစားခွင့်များကို ဆုံးရှုံးရကြောင်း၊ ၎င်းတို့အပေါ် တရားမဝင် ခွဲခြားဆက်ဆံခံခဲ့ရကြောင်း ရုံးတော်တွင် စောဒကတက်ခဲ့ကြသည်။

ဂျပန်နိုင်ငံတွင် လိင်ကွဲပြားမှုများအတွက် ပံ့ပိုးကူညီခြင်းများ တဖြည်းဖြည်း ကြီးထွားလာသော်လည်း လိင်တူ ချစ်သူများ၊ လိင်စုံ (Bisexual) နှင့် လိင်ပြောင်းလဲထားသူများအတွက် တရားဝင်အကာအကွယ် နည်းပါးနေဆဲ ဖြစ်သည်။

LGBTQ များသည် စာသင်ကျောင်း၊ လုပ်ငန်းခွင်နှင့်နေအိမ်တို့တွင် မကြာခဏ ခွဲခြားဆက်ဆံခံရခြင်းကို ကြုံတွေ့ ရလေ့ရှိပြီး အများစုမှာ ၎င်းတို့၏လိင်ပိုင်းဆိုင်ရာ အထောက်အထားများကို ဖုံးကွယ်ထားကြသည်။

ပြီးခဲ့သည့် နွေရာသီ တိုကျိုအိုလံပစ်ပွဲ မတိုင်မီက တန်းတူညီမျှရေး ဥပဒေတစ်ရပ်ကို အတည်ပြုရန် လူ့ အခွင့် အရေးအဖွဲ့များက တွန်းအားပေးခဲ့သော်လည်း ဂျပန်ကို နိုင်ငံတကာအာရုံစိုက်လာချိန်၌ ကွန်ဆာဗေးတစ်ပါတီ အစိုးရက ယင်းဥပဒေကြမ်းကို ဖျက်သိမ်းခဲ့သည်။

Source: AP

CNI News

၂၀၂၂ ခုနှစ်၊ ဇွန်လ ၁၇

ထိုင်း-မလေးရှား နယ်စပ်တွင် ထိုင်းနိုင်ငံသားတစ်ဦး အသတ်ခံရမှုနှင့်ပတ်သက်ပြီး သံသယရှိသူအဖြစ် ရခိုင် ၉ ဦး အား စစ်ဆေးရာတွင် သေဆုံးသူအလောင်းနှင့်ဆက်စပ်ပြီး တစ်ဦး၏လက်ဗွေရာကို တွေ့ရှိကြောင်းနှင့် ထိုသူမှာ စစ်တွေမြို့မှဖြစ်ကြောင်း ရွှေ့ပြောင်း အလုပ်သမားအခွင့်အရေးကွန်ယက်(MWRN) က CNI သတင်းဌာနသို့ ပြောသည်။

ထို့အပြင် သံသယရှိသူ ၉ ဦးထဲတွင် မျက်မြင်သက်သေအဖြစ် တစ်ဦးပါဝင်ကြောင်းနှင့် ထပ်မံဖမ်းဆီးခံရသည့် မြန်မာအလုပ်သမား ၈၀ ကျော်ထဲမှ မျက်မြင်သက်သေအဖြစ် အမျိုးသား ၁ ဦးနှင့် အမျိုးသမီး ၁ ဦး ထပ်မံတွေ့ရှိပြီး အဆိုပါ ၄ ဦးစလုံးသည် ရခိုင်လူမျိုးများ ဖြစ်ကြောင်း သိရသည်။

ထို ၄ ဦးတို့မှာ စစ်တွေမှ ၁ ဦး၊ ပုဏ္ဏားကျွန်းမှ ၁ ဦးနှင့် မင်းပြားမှ ၂ ဦးတို့ ဖြစ်ကြောင်း သိရသည်။

MWRN မှ မြန်မာအလုပ်သမားတာဝန်ခံ ကိုသိန်းထွန်းက “ဒီ ၉ ဦးထဲကနေပြီးတော့ ၂ ယောက်တွေ့တယ်။ စစ်ဆေး လိုက်တဲ့အခါ လက်ဗွေက တစ်ယောက်တွေ့တယ်။ နောက်ပြီးတော့ ဝိုင်းဖမ်းတဲ့အခါ ပါဝင်တယ် ဆိုပြီးတော့ သူကိုယ်တိုင်လည်း ထွက်ဆိုထားတာရှိတယ်။ အဲဒါကြောင့် ၂ ယောက်ပေါ့လေ။ နောက်တစ်ဖွဲ့ကနေပြီးတော့ တစ်ယောက် ပိုက်ဆံကောက်ပေးတဲ့ ပိုက်ဆံကောက်ပြီးတော့ အဲဒီထိုင်းလူမျိုးကို ပေးတာပေါ့လေ။ သူ တစ်ယောက် သုံးယောက်။ ကောင်မလေးကတော့ သူထွက်ဆိုထားတာတော့ သူ့ကိုလွှတ်လိုက်တဲ့အချိန်မှာ သူက ကြောက်ပြီးတော့ ထွက်ပြေးတယ်။ ဘာမှ မသိခဲ့ဘူးပေါ့လေ။ ဒီကောင်မလေးကတော့ သူ့ရဲ့ထွက်ဆိုချက်အတိုင်းသာ သူက တော့ မသက်ဆိုင်သလိုဖြစ်နေပြီပေါ့။ အလားအလာအရမ်းကောင်းနေတယ်”ဟု CNI သို့ ပြောသည်။

ဖြစ်စဉ်မှာ ၎င်းသေဆုံးသူ ထိုင်းနိုင်ငံသားသည် မြန်မာအလုပ်သမားများရှိနေသည့် နေရာသို့ ရောက်ရှိလာပြီး မြန်မာအမျိုးသမီးတစ်ဦးအား ဓားစာခံအဖြစ် ဖမ်းဆီးခဲ့သည့်အတွက် အလုပ်သမားများထဲမှ ထိုင်းစကား အနည်းငယ် နားလည်သူက ညှိနှိုင်းခဲ့ရကာ ငွေပေးပါက လွှတ်ပေးမည်ဟုဆိုကြောင်း သိရသည်။

ထို့ကြောင့် ထိုင်းဘတ်ငွေတစ်ချို့အား ပေးလိုက်သော်လည်း ဓားစားခံ မြန်မာအမျိုးသမီးကို ပြန်မလွှတ်ပေးဘဲ ထိုနေရာမှ ထွက်ခွာရန် ကြိုးစားခဲ့ကြောင်း၊ အဖမ်းခံထားရသည့် မြန်မာအမျိုးသမီးက ကိုယ်လွတ်ရုန်းကာ ထွက်ပြေးသည့်အချိန်တွင် အလုပ်သမားများထဲမှ လူတစ်ဦးက ကျောက်ခဲဖြင့်ပစ်ပေါက်ခဲ့ကြောင်း သိရသည်။

ထိုသို့ ကျောက်ခဲဖြင့် ပစ်ပေါက်ခဲ့သည့်အတွက် ထိုင်းနိုင်ငံသားမှာ နေရာမှာတင် မူးဝေကာ မေ့လဲသွားသည်ကို သေဆုံးပြီအထင်ဖြင့် မြေမြှုပ်ထားလိုက်ခြင်းဖြစ်ကြောင်းသိရသည်။

ကိုသိန်းထွန်းက “ဒီ အမျိုးသား နှစ်ယောက်နဲ့ ပြန်ပေးဆွဲခံရတဲ့ အမျိုးသမီး တစ်ယောက်။ ဒီ သုံးယောက်ကို အမှုကနေပြီးတော့ အမှုနဲ့မသက်ဆိုင်ဆိုတဲ့အကြောင်းကို မနေ့ကပေါ့လေ တရားရုံးကနေပြီးတော့ တာဝန်ရှိတဲ့ ပုဂ္ဂိုလ်တွေရောက်လာပြီးတော့ အမှုတွဲမှာ မှတ်ချက်တွေလာယူတယ်။ အဲဒီမှာ ကျ‌နော်တို့လူတွေရှိတယ်။ ဒီ သုံးယောက်ကနေပြီးတော့ အမှုနဲ့ လုံးဝကို လွတ်ကင်းဖို့ အတိုင်းအတာ ရှိတယ်ပေါ့လေ။ ဒါပေမယ့် ဒီ လက်ဗွေ မိတဲ့သူကတော့ လုပ်ရတာ နည်းနည်းခက်မယ်ပေါ့။ အခု ဒီ ၄ ယောက်လုံးက အမှန်တကယ် လူသတ်မှု ကျူးလွန် တဲ့တရားခံကို မိမယ်ဆိုလို့ရှိရင် ရှာလို့ရမယ်ဆိုရင် ဒီ ၄ယောက်လုံးက အကြွင်းမဲ့လွတ်မှာပါတဲ့။ ဒီ လက်ဗွေ အတွက်ကို သူတို့က မှတ်ချက်မပေးသေးဘူး။ သူတို့ ပြန်ပြီးတော့ သုံးသပ်ရဦးမယ်ပေါ့။ လွှတ်ပေးမယ်ဆိုတာ တော့ မဖြစ်နိုင်သေးဘူးပေါ့လေ။ ဒီလိုမျိုးပြောသွားတယ် မနေ့ကနေပြီးတော့” ဟု ပြောသည်။

ထိုင်း-မလေးရှားနယ်စပ်၊ ထိုင်းဘက်အပိုင် တောထဲတွင် ထိုင်းနိုင်ငံသားတစ်ဦး၏ အလောင်းကို မေလ ၃၁ ရက်က တွေ့ရှိခဲ့သဖြင့် ဇွန်လ ၂ ရက်နေ့မှ စတင်ရှာဖွေခဲ့သည်။ အဲဒီနောက် မလေးရှားသို့ တရားမဝင် ခိုးဝင်မည့် မြန်မာ ၄၀၀ ကျော်အား တွေ့ရှိကာ ဖမ်းဆီးထိန်းသိမ်း၍ စစ်ဆေးမေးမြန်းနေခြင်းဖြစ်ပြီး ၎င်းတို့အား ခေါ်ဆောင်လာသည့် ပွဲစားကိုလည်း ဖမ်းဆီးထားကြောင်းသိရသည်။

အဆိုပါ မြန်မာ ၄၀၀ ကျော်တို့သည် ပွဲစားဖြင့် မလေးရှားနိုင်ငံသို့ ထိုင်းနိုင်ငံမှတဆင့် တရားမဝင် ခိုးဝင်ရန်အတွက် ရောက်ရှိနေသူများဖြစ်ကြောင်းသိရသည်။

CNI News

၂၀၂၂ ခုနှစ်၊ ဇွန်လ ၇

ထိုင်း-မလေးရှား နယ်စပ်တွင် ထိုင်းနိုင်ငံသားတစ်ဦး အသတ်ခံရမှုကြောင့် ထိုင်းအာဏာပိုင်များက မြန်မာ အလုပ်သမား ၃၀၀ ကျော်ကို ဖမ်းဆီးစစ်ဆေးကာ ၎င်းထဲကမှ သံသယရှိသူအဖြစ် ၉ ဦးအား စစ်ဆေးမည် ဖြစ်ကြောင်း ရွှေ့ပြောင်းအလုပ်သမားအခွင့်အရေးကွန်ယက်(MWRN) က သိရသည်။

ထိုကိစ္စအား ကူညီဆောင်ရွက်ပေးနေသည့် MWRN မှ မြန်မာအလုပ်သမားတာဝန်ခံ ကိုသိန်းထွန်းက ၎င်း သံသယရှိသူ ၉ ဦးမှာ ရခိုင်ပြည်နယ်မှဖြစ်ကြောင်း၊ အဆိုပါ မြန်မာများအားလုံးသည် မလေးရှားနိုင်ငံသို့ တရားမဝင် ခိုးဝင်ရန် ရောက်ရှိနေသူများဖြစ်ကြောင်း CNI သတင်းဌာနသို့ ပြောသည်။

“အကုန်လုံးကို ဘာသာပြန်နဲ့စစ်ဆေးပြီးသွားပြီ။ စစ်ဆေးပြီးတော့ ဒီ ၉ ယောက်က သူတို့က သံသယဖြစ်တယ် ဆိုပြီးတော့။ သံသယဖြစ်တဲ့သူ ၉ ယောက်က သူတို့က ထပ်အစစ်ခံရဦးမယ်။ နည်းနည်းတော့ ကြာမယ်ပြောတယ်။ စစ်ဆေးပြီးမှ ပြန်လွှတ်ပေးလို့ရမယ်ပေါ့လေ အမှုနဲ့မသက်ဆိုင်ဘူးဆိုရင်တော့။ ဒီ လူ ၉ ယောက်ကိုလည်း ကျနော် က အသေးစိတ်မေးတယ်။ မင်းတို့ ဒီအမှုနဲ့ပတ်သက်ပြီးတော့ ကိုယ်တိုင်ပတ်သက်နေတာလား၊ ဒါမှမဟုတ် မျက်မြင် မြင်ခဲ့တာလားပေါ့လေ။ သူတို့က မြင်လည်းမမြင်ခဲ့ဘူး၊ ဒီအမှုနဲ့ပတ်သက်ပြီး ကိုယ်ထိလက်ရောက် လုပ်ခဲ့တာလည်းမရှိဘူးပေါ့။ သူများပြောတဲ့ဟာမှ သူတို့ကကြားရတာတဲ့ ဘာမှကို မသိပါဘူးတဲ့။ သူတို့က ထိုင်းကို လာတဲ့လူတွေမဟုတ်ဘူး။ မလေးကို သွားတဲ့လူတွေဖြစ်တယ် အကုန်လုံးက။ ဒီ ၉ ယောက်အပါအဝင် ဖမ်းခံထားရ တဲ့သူတွေ အကုန်လုံးက မလေးရှားကို ဝင်မယ့်သူတွေပါ”ဟု ပြောသည်။

အဆိုပါ သံသယဖြစ်သူ ၉ ဦးတို့မှာ ရခိုင်ပြည်နယ် ကျောက်တော်၊ ပုဏ္ဏားကျွန်း၊ စစ်တွေ၊ မြောက်ဦး စသည်တို့မှ ဖြစ်ပြီး ၎င်းတို့သည် လိပ်ကျွန်းလူသတ်မှုမှ ဝင်းနှင့် ဇော်ကဲ့သို့ အပြစ်မရှိဘဲ သေဒဏ် သို့မဟုတ် တစ်သက် တစ်ကျွန်း ကျခံရမည်ကို များစွာစိုးရိမ်နေကြကြောင်း သိရသည်။

ဖမ်းဆီးထိန်းသိမ်းခံထားရသည့် မြန်မာအလုပ်သမားများအား တွေ့ရစဉ်

ထိုင်း-မလေးရှားနယ်စပ်၊ ထိုင်းဘက်အပိုင် တောထဲတွင် ထိုင်းနိုင်ငံသား အလုပ်သမားတစ်ဦး၏ အလောင်းကို မေလ ၃၁ ရက်က တွေ့ရှိခဲ့သဖြင့် ဇွန်လ ၂ ရက်နေ့မှစတင်ကာ ယခုကဲ့သို့ မလေးရှားသို့ တရားမဝင် ခိုးဝင်မည့် မြန်မာ ၃၀၀ ကျော်အား ဖမ်းဆီးကာ စစ်ဆေးမေးမြန်းခဲ့ခြင်းဖြစ်ကြောင်းသိရသည်။

လက်ရှိတွင် အဆိုပါ မြန်မာအလုပ်သမား ၃၀၀ ကျော်အား အချုပ်ခန်း ၅ နေရာတွင် ထားရှိထားကြောင်း သိရသည်။

လက်ရှိ ၎င်း ထိုင်းနိုင်ငံသား သေဆုံးမှုနှင့်ပတ်သက်၍ သံသယရှိသူဟု သတ်မှတ်ခံထားရသည့် မြန်မာနိုင်ငံသား ၉ ဦးအား မြန်မာနိုင်ငံမှ သက်ဆိုင်ရာဌာနဆိုင်ရာများအနေဖြင့် ညှိနှိုင်းမှုများ ပြုလုပ်ပေးစေချင်ကြောင်း MWRN မှ မြန်မာအလုပ်သမားတာဝန်ခံ ကိုသိန်းထွန်းက ပြောသည်။

လက်ရှိတွင် မြန်မာနိုင်ငံသား ၃၀၀ ကျော်အား အချုပ်ခန်းများတွင်သာ ထားရှိကာ စားသောက်ရေးနှင့် နေထိုင် ရေးတို့မှာ အဆင်မပြေကြောင်း သိရသည်။

ဖမ်းဆီးထိန်းသိမ်းခံထားရသည့် မြန်မာအလုပ်သမားများအား တွေ့ရစဉ်

ကိုသိန်းထွန်းက “အကုန်လုံးကတော့ ပြန်ပို့မယ်။ ပြန်ပို့မယ့်အထဲမှာ ဒီ ၉ ယောက်က သံသယနဲ့ဖြစ်တယ်ဆိုတော့ သူတို့က အစစ်ဆေးခံရမယ်။ ရဲချုပ်ပြောတာက လ.ဝ.ကနဲ့ပဲ သက်ဆိုင်တယ်။ သူတို့နဲ့မသက်ဆိုင်ဘူး။ သူတို့ ခန့်မှန်းထားတာက တစ်ပတ် နှစ်ပတ်လောက်ဆိုရင်တော့ ပြန်ပို့ဖြစ်မယ်လို့ သူတို့ ယူဆတာပေါ့လေ။ တရားရုံး တွေဘာတွေလည်း မပို့တော့ဘူးပေါ့လေ။ ဒီ ၉ ယောက်ကို စစ်ဆေးမှာက သူတို့က ဖမ်းတဲ့နေ့ကတည်းက အချက် အလက်တွေ အကုန်ယူထားပြီးပြီ။ ဒါပေမယ့် အသေးစိတ် လူသတ်မှုနဲ့ ပတ်သက်၊ မပတ်သက်ဆိုတာ စစ်ဆေးမှာ ကတော့ ဘယ်နေ့ ဘယ်ရက်မှာ စစ်ဆေးမယ်ဆိုတာကတော့ အတိအကျမသိဘူး”ဟု ပြောသည်။

ထို အဖမ်းခံထားရသည့် မြန်မာ ၃၀၀ ကျော်သည် မလေးရှားသို့ သွားရောက်အလုပ်လုပ်ကိုင်ရန်အတွက် ပွဲစား များအား တစ်ဦးလျှင် မြန်မာကျပ်ငွေ ၂၆ သိန်းမှ သိန်း ၃၀ အထိ ပေးခဲ့ကြရကြောင်း သိရသည်။