CNI News

၂၀၂၃ ခုနှစ်၊ ဖေဖော်ဝါရီ ၂၄

တရုတ်-မြန်မာနယ်စပ်တစ်လျှောက် တိုက်ပွဲမဖြစ်ပွားရေး ထိန်းထိန်းသိမ်းသိမ်း လုပ်ဆောင်ရန် တရုတ်ဘက်က ပြောကြားခဲ့ကြောင်း ကချင်လွတ်မြောက်ရေးတပ်မတော် (KIA) မှ ပြန်ကြားရေးတာဝန်ခံ ဗိုလ်မှူးကြီးနော်ဘူ က CNI သတင်းဌာနသို့ ပြောသည်။

ပြီးခဲ့သည့် ရက်ပိုင်းက တရုတ်-မြန်မာ နယ်စပ်တစ်လျှောက်ရှိ တိုင်းရင်းသား လက်နက်ကိုင် အဖွဲ့အစည်းများနှင့် တရုတ်ပြည်သူ့သမ္မနိုင်ငံ၊ နိုင်ငံခြားရေးဝန်ကြီးဌာန၊ အာရှရေးရာအထူးကိုယ်စားလှယ် H.E Mr. Deng Xijun (ဒင်ရှီကျန်)တို့ တွေ့ဆုံစဉ် ပြောကြားခဲ့ခြင်း ဖြစ်သည်။

ဗိုလ်မှူးကြီးနော်ဘူက “ကျနော်ကြားတာကတော့ အဲဒါက‌တော့ ဒါပေမယ် ခုနပြောသလိုပေါ့၊ ကျနော်တို့ ဒီ တရုတ် နယ်စပ်ဖက်မှာ တိုက်ပွဲမဖြစ်အောင်၊ တည်ငြိမ်အေးချမ်းရေးဆိုတာ အဲဒါတွေတော့ ထိန်းထိန်းသိမ်းသိမ်း လုပ်ပါ ပြောတာတော့ ရှိပါတယ်” ဟု CNI သတင်းဌာနသို့ ပြောသည်။

တရုတ်နိုင်ငံအတွင်း တိုက်ပွဲရှောင်များ ရောက်ရှိလာမှာကို စိုးရိမ်ကြောင်း၊ ထို့ကြောင့် မြန်မာ့တပ်မတော်နှင့် တိုင်းရင်းသား လက်နက်ကိုင်များကို ထိန်းထိန်းသိမ်းသိမ်း လုပ်ဆောင်ရန် ပြောဆိုနေကြောင်း တရုတ်အရေး ကျွမ်းကျင်သူ ဒေါက်တာလှကျော်ဇောက ပြောသည်။

 တရုတ်အထူးကိုယ်စားလှယ် ဒင်ရှီကျန်နဲ့ NDAA တွေ့ဆုံစဉ်

၎င်းက “ဟုတ်တယ်၊ ဟုတ်တယ်၊ အဲဒါကတော့ KIA တင်ပြောတာ မဟုတ်ဘူး။ စစ်တပ်ဖက်လည်း ပြောတယ်၊ တောက်လျှောက်ပြောနေတာ တတ်နိုင်သမျှ ထိန်းထိန်းသိမ်းသိမ်းနဲ့ တိုက်ပွဲတွေ အထူးသဖြင့် သူ့နယ်စပ်ကို ကျွံကျမလာဖို့ ပေါ့ဗျာ၊ သူ့ဘက်ကို စစ်ဘေးဒုက္ခသည်တွေ ရောက်လာမှာကိုလည်း စိုးရိမ်ပုံရတယ်၊ အဲဒါတော့ ဟုတ်တယ် ပြောတယ်၊ ထိန်းထိန်းသိမ်းသိမ်းလုပ်ကြဖို့၊ စစ်တပ်ကိုလည်း ပြောပါတယ်။ စစ်ကောင်စီကိုလည်း ပြောတယ်၊ နှစ်ဖက်စလုံးကိုလည်း သူပြောနေတာပဲ၊ ဟုတ်တယ် အဲဒါတော့” ဟု CNI သတင်းဌာနသို့ ပြောသည်။

တရုတ်အထူးကိုယ်စားလှယ်သည် ကချင်လွတ်မြောက်ရေးတပ်မတော် (KIA) ၊"ဝ"ပြည် သွေးစည်းညီညွတ်ရေး တပ်မတော် (UWSA)နှင့် အမျိုးသား ဒီမိုကရေစီ မဟာမိတ်တပ်မတော် (NDAA) တို့ တွေ့ဆုံခဲ့ကြကြောင်း သိရသည်။

တရုတ်-မြန်မာနယ်စပ်တွင် ကိုဗစ်ကူးစက်မှု အခြေအနေများ၊ တိုက်ပွဲရှောင်ပြည်သူများ၏ စားဝတ်နေ‌ရေးများ စသည်တို့ကို ဆွေး‌နွေးသွားကြောင်း ဗိုလ်မှူးကြီး နော်ဘူက ပြောသည်။

 တရုတ်အထူးကိုယ်စားလှယ် ဒင်ရှီကျန် မိုင်းလားကိုရောက်လာစဉ်

၎င်းက “ဒီနယ်စပ်က မိတ်ဆွေဟောင်းတွေပေါ့နော်၊ KIO အဖွဲ့အစည်းတွေကိုလည်း သူလာတွေ့တာပေါ့၊ ဒါ တစ်ချက်ပါတယ်။ နောက်တစ်ခု ရှိတာက‌တော့ နယ်စပ်ဒေသမှာ ကိုဗစ်ရောဂါ အခြေအနေ ဆွေးနွေးသွားတာ ဥပမာ ဂိတ်ပေါက်တွေ ပိတ်လို့ရမလား ဆွေး‌နွေးသွားတာ နောက်တစ်ခုရှိတာကတော့ နယ်စပ်ဒေသမှာ ရှိတဲ့ တည်ငြိမ်အေးချမ်းရေးနဲ့ ပတ်သက်လို့ နောက်တစ်ခုရှိတာကတော့ ကိုဗစ်‌ရောဂါ ပြည်သူလူထုရဲ့ ကျန်းမာရေး အခြေအနေတွေ ဘယ်လို ဆောင်ရွက်သင့်တာလဲပေါ့၊ အဲဒါတွေ ဆွေးနွေးသွားတာ၊ နောက်တစ်ခု ရှိတာကတော့ ကျနော်တို့ လိုင်ဇာပတ်ဝန်းကျင်မှာ ရှိနေတဲ့ စစ်ရှောင်ပြည်သူလူထုတွေရဲ့ စားဝတ်နေရေးတွေ ဘယ်လို အခက် အခဲ ရှိလဲဆိုတာ ကြည့်သွားတာ အဲဒီခေါင်းစဉ်တွေနဲ့ပဲ ပြောသွားတာ ကျနော်တို့ ကြားသိရပါတယ်” ဟု ပြော သည်။

တရုတ် - မြန်မာ နှစ်နိုင်ငံနယ်နိမိတ်မှာ မိုင်ပေါင်း ၁၃၀၀ ကျော် ထိစပ်လျက်ရှိပြီး နယ်စပ်အနီးတွင် KIA၊ UWSA၊ NDAA၊ ရှမ်းပြည် ပြန်လည် ထူထောင်ရေး ကောင်စီ (RCSS/SSA)၊ ရှမ်းပြည်တိုးတက်ရေးပါတီ (SSPP/SSA)၊ မြန်မာနိုင်ငံ အမှန်တရားနှင့် မျှတမှု အမျိုးသားပါတီ (MNDAA)၊ ပလောင်ပြည် လွတ်မြောက်ရေးတပ်ဦး (PSLF/ TNLA) စသည့် လက်နက်ကိုင် အဖွဲ့အစည်းများ လှုပ်ရှားလျက်ရှိသည်။

CNI News

၂၀၂၃ ခုနှစ်၊ ဖေဖော်ဝါရီ ၂၃

အရေးပေါ် အခြေအနေ သက်တမ်းကာလကို ၆ လ ထပ်မံတိုးခဲ့စဉ်မှာ တွေ့ရှိခဲ့ရာမှာတော့ ပြည်သူလူထုသည် အချက် ၃ ချက်ကို ဆောင်ရွက်ပေးရန် အဓိက တောင်းဆိုကြသည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင် လှိုင်က ပြောသည်။

နစက၏ ၂/၂၀၂၃ အစည်းအဝေးကို ဖေဖော်ဝါရီ ၂၃ ရက်နေ့က ကျင်းပစဉ် ၎င်းက အထက်ပါ အတိုင်း ပြောကြား ခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “အရေးပေါ် အခြေအနေ သက်တမ်းကာလကို ၆ လ ထပ်မံတိုးခဲ့ရာ တွေ့ရှိရ သည့် ဝေဖန်မှုများ၊ တုန့်ပြန်ချက်များနှင့်လိုအင်ဆန္ဒများကို လေ့လာဆန်းစစ်ခဲ့ကြောင်း၊ တွေ့ရှိချက်များအရ ရွေး ကောက်ပွဲ ပြန်လည် ဆောင်ရွက်ပေးရန်၊ တည်ငြိမ်အေးချမ်းမှုရှိအောင် ဆောင်ရွက်ပေးရန်နှင့် ကုန်ဈေးနှုန်းကျ ဆင်းမှုရှိအောင် ဆောင်ရွက်ပေးရန်ဟူသည့် အချက် ၃ ချက်သည် အဓိကဖြစ်တယ်”ဟု ပြောသည်။

ထို့နောက် တည်ငြိမ်အေးချမ်းမှုရှိရန်အတွက် အချို့သော မြို့နယ်များတွင် စစ်အုပ်ချုပ်ရေး အမိန့်ကို ထုတ်ပြန်ခဲ့ ကြောင်း၊ တပ်မတော်အနေဖြင့် တည်ငြိမ်အေးချမ်းမှုရှိအောင် ဆောင်ရွက်ရာတွင် ယခင်ကြုံတွေ့ခဲ့ရသည့် အတွေ့ အကြုံများအရ ဥပဒေနှင့်အညီသာ ထိန်းသိမ်းဆောင်ရွက်လျက်ရှိကြောင်း၊ လက်ရှိ အခြေအနေတွင် စစ်မှန်သည့် ဒီမိုကရေစီဖြစ်စေရေးနှင့် ဒီမိုကရေစီစနစ် ခိုင်မာစေရေး တပ်မတော်မှ ထိန်းသိမ်း ဆောင်ရွက် လျက်ရှိကြောင်း ၎င်းက ပြောသည်။

ရန်ကုန်မြို့တွင်းက ဈေးသည်ကိုတွေ့ရစဉ်

ဗိုလ်ချုပ်မှူးကြီးမင်းအောင်လှိုင်က “ဒီမိုကရေစီနှင့်လူ့အခွင့်အရေး အမည်ခံသူများအနေဖြင့် မဲစာရင်းမှားယွင်းမှု များအပေါ် ဥပဒေအရဖြေရှင်း ဆောင်ရွက်ခြင်းမပြုဘဲ အကြမ်းဖက်လမ်းစဉ်ကို ဆောင်ရွက်ခဲ့ခြင်းသည် မှားယွင်း သည့် နည်းလမ်းဖြစ်ကြောင်း၊ ထိုသို့ ထပ်မံ မဖြစ်ပွားစေရေး ဆောင်ရွက်ရန်လိုကြောင်း၊ ရွေးကောက်ပွဲသည် တိုင်းပြည် တစ်ခု၏ သိက္ခာပင်ဖြစ်သဖြင့် သိက္ခာရှိသည့် ရွေးကောက်ပွဲ တစ်ရပ်ဖြစ်ပေါ်စေရေး ကြိုးပမ်းဆောင် ရွက်သွားရမည်ဖြစ်ကြောင်း၊ မဲစာရင်းများ မှန်ကန်မှုရှိစေရေးအတွက် လိုအပ်သည်များကို ဆောင်ရွက်ရန် အချိန် လိုအပ်နေသေးတယ်”ဟု ပြောသည်။

နိုင်ငံ့ဝင်ငွေတိုးတက်စေရေးအတွက် ပြည်တွင်းကုန်ထုတ်လုပ်မှုများ တိုးတက်စေရေး အားပေးဆောင်ရွက်လျက် ရှိကြောင်း၊ သို့မှသာ ကုန်ဈေးနှုန်းများ ကျဆင်းလာမည် ဖြစ်ကြောင်း၊ မိမိတို့အနေဖြင့် ကုန်ဈေးနှုန်းများ ကျဆင်း စေရေး တတ်နိုင်သမျှ ဆောင်ရွက်လျက်ရှိကြောင်း ၎င်းက ပြောသည်။

တပ်မတော် ဖြုတ်ချရေး ကြိုးပမ်းနေသော NUG ၀န်ကြီးချုပ်မန်း၀င်းခိုင်သန်းနဲ့ PDF များကိုတွေ့ရစဉ်

လက်ရှိ မြန်မာနိုင်ငံတွင် အမျိုးသားဒီမိုကရေစီအဖွဲ့ချုပ်(NLD)မှ ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ တပ်မတော်က ၂၀၂၁ ခုနှစ်၊ ဖေဖော်ဝါရီ ၁ ရက်၌ နိုင်ငံတော်ကို အရေးပေါ် ကြေညာ၍ အုပ်ချုပ်ခဲ့သည်။

ထို့နောက် ဆန့်ကျင် ဆန္ဒပြမှုများ ပေါ်ပေါက်လာသလို လက်နက်ကိုင် တိုက်ခိုက်ခြင်းဖြင့် တပ်မတော်ကို ဖြုတ်ချ ရေး ကြိုးပမ်းမှုများ ဖြစ်ပေါ်လာခဲ့သည်။

အဆိုပါ အခြေအနေများကြောင့် မြန်မာနိုင်ငံတွင် နိုင်ငံရေး၊ စီးပွားရေး၊ လူမှုရေး၊ ပညာရေး၊ ကျန်းမာရေး၊ လုံခြုံ ရေး၊ ကုန်ဈေးနှုန်း တည်ငြိမ်ရေး စသည့် အခန်းကဏ္ဍများ နိမ့်ကျလျက်ရှိသည်။

CNI News

၂၀၂၃ ခုနှစ်၊ ဖေဖော်ဝါရီ ၂၃

ကရင်အမျိုးသားအစည်းအရုံး (KNU) တပ်မဟာ ၄ နှင့် ကောင်သူးလေတပ်မတော် (KTLA) တို့အကြား အချင်းချင်း ရန်မူ တိုက်ခိုက်နေမှုများ အမြန်ဆုံး အဆုံးသတ်ပေးရန် နိုင်ငံတကာကရင်အဖွဲ့အစည်း (IKO) က တောင်းဆိုခဲ့ သည်။

KNU တပ်မဟာ ၄ နယ်မြေအတွင်း KTLA နှင့် KNLA တို့ တပ်ဖွဲ့အကြား တိုက်ပွဲများ ဖြစ်ပွားနေသည်ကို ကြားသိရ ၍ စိတ်မချမ်းမြေ့ ဖြစ်ရကြောင်း၊ စစ်အစိုးရကို ပြည်သူတစ်ရပ်လုံးက တော်လှန်တိုက်ပွဲဝင်နေသည် အချိန်တွင် ကရင်တပ်ဖွဲ့များအကြား အချင်းချင်း တိုက်ခိုက်နေကြခြင်းမှာ မဖြစ်သင့်ကြောင်း ထုတ်ပြန်ချက်တွင် ဖော်ပြထား သည်။

လက်ရှိမှာ ပြည်သူတစ်ရပ်လုံး၏ စစ်အုပ်စု အမြစ်ပြတ် ဖြုတ်ချရေးအတွက် တော်လှန်တိုက်ပွဲ ဝင်နေခြင်းသည် အဖိနှိပ်ခံ ပြည်သူလူထု တစ်ရပ်လုံးအတွက် အခွင့်အခါကောင်းဖြစ်ပြီး လက်မလွှတ်သင့်ကြောင်း၊ ကရင်အချင်းချင်း တိုက်ခိုက်နေမည့်အစား သေနတ်ပြောင်းဝကို စစ်အုပ်စုဘက်သို့ လှည့်ကြရန် IKO က တိုက်တွန်းထားသည်။

 IKO ၏ ထုတ်ပြန်ချက်ကိုတွေ့ရစဉ်

ပြီးခဲ့သည့် ဖေဖော်ဝါရီ ၂၀ ရက်က KNU တပ်မဟာ ၄ နှင့် ကော်သူးလေတပ်မတော်(KTLA)တို့အကြား တိုက်ပွဲဖြစ် ပွားခဲ့ကြောင်း၊ ထိုတိုက်ပွဲအတွင်း ကော်သူးလေတပ်မတော် တပ်ရင်း ၁ ကို သိမ်း ပိုက်နိုင်ခဲ့ ကြောင်း KNU တပ်မဟာ ၄ ဘိတ်-ထားဝယ်အုပ်ချုပ်ရေးရုံးက ထုတ်ပြန်ခဲ့သည်။

ထို့အတူ တိုက်ပွဲအတွင်း ကော်သူးလေတပ်မတော်မှ တပ်ဖွဲ့ဝင် ၂ ဦးသေဆုံးကာ KNU တပ်မဟာ ၄ ဘက်မှ ၁ ဦး ဒဏ်ရာ ရရှိခဲ့ကြောင်း ထုတ်ပြန်ချက်တွင် ဖော်ပြထားသည်။

KNLA သည် KNU ၏ လက်နက်ကိုင်တပ်ဖွဲ့ဖြစ်ပြီး ကော်သူးလေတပ်မတော်(KTLA)ကတော့ KNU ၏ လက်အောက်ခံ ကရင်အမျိုးသားကာကွယ်ရေးအစည်းအရုံး(KNDO)မှာ စစ်ဦးစီးချုပ်အဖြစ်ကနေ ရပ်ဆိုင်းခံ လိုက်ရသော စောနယ်ဒါးမြက ဦးဆောင် ဖွဲ့စည်းထားသည့် လက်နက်ကိုင် အဖွဲ့ဖြစ်သည်။

CNI News

၂၀၂၃ ခုနှစ်၊ ဖေဖော်ဝါရီ ၂၃

လက်ရှိ နိုင်ငံရေးအခင်းအကျင်းအရ ငြိမ်းချမ်းရေးဆွေးနွေးမှုများ ရှေ့သို့တက်လှမ်းနိုင်ခြင်း မရှိသေးကြောင်း ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) မှ ပြောခွင့်ရပုဂ္ဂိုလ် ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။

သက်ဆိုင်သူများ အားလုံး ပါဝင်သည့် နိုင်ငံရေး တွေ့ဆုံဆွေးနွေးမှု အခင်းအကျင်း ဖြစ်ပေါ်လာရေး ကြိုးပမ်းမှုတွင် အခက်အခဲများ၊ စိန်ခေါ်မှုများ ရှိနေကြောင်း ၎င်းက ပြောသည်။

PPST ဗိုလ်မှူးကြီးစောကျော်ညွန့်က “ငြိမ်းချမ်းရေး တွေ့ဆုံဆွေးနွေးပွဲ ဆိုတာကလည်း ကျနော်တို့ ပြောနေတဲ့ ပြည်ထောင်စုငြိမ်းချမ်းရေးဆိုတာ ကျနော်တို့ နိုင်ငံကို ဖက်ဒရယ်နဲ့ဒီမိုကရေစီစနစ်ကို အခြေခံတဲ့ ပြည်ထောင်စုကို တည်ဆောက်ရမှာ ဖြစ်တဲ့အတွက်ကြောင့်မို့ ဖက်ဒရယ်ဆိုရင်လည်းပဲ ဖက်ဒရယ်နဲ့ သက်ဆိုင်တဲ့ အင်အားစုတွေ အားလုံး ဒီမိုကရေစီ ဆိုရင်လည်းပဲ ပြည်သူကို ကိုယ်စားပြုမှု အားကောင်းတဲ့ ဒီမိုကရေစီ အင်အားစုတွေ အားလုံး ကျနော်တို့က စကားပြောနိုင်ဖို့ အချင်းချင်း တိုင်ပင်ညှိနှိုင်းနိုင်ဖို့ ကျနော်တို့ တစိုက်မတ်မတ် ကြိုးပမ်း ဆောင်ရွက် မှု ရှိခဲ့တာတော့ အမှန်ပါပဲ။ သို့သော်လည်းပဲ ခုနပြောပြောနေတဲ့ ငြိမ်းချမ်းရေး ဆွေးနွေးပွဲ ဆိုတာကတော့ ကျနော် တို့ တက်လှမ်းနိုင်ခြင်း မရှိသေးပါဘူး” ဟု ပြောသည်။

NSPNC နှင့် DKBA၊ KNU/KNLA-PC ခေါင်းဆောင်များတွေ့ဆုံစဉ်

လက်ရှိမှာလည်း နစကနှင့် တစ်ဖွဲ့ချင်း သွားရောက်တွေ့ဆုံနေပြီး အစုအဖွဲ့အားလုံးနှင့် တွေ့ဆုံနိုင်ရေး ကြိုးပမ်း နေသလို လက်နက်ကိုင် ပဋိပက္ခကို ဖြေရှင်းနိုင်ရေးအတွက် လုပ်ဆောင်နေကြောင်း ၎င်းက ပြောသည်။

ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က မြန်မာ့တပ်မတော်မှ အာဏာရယူပြီးနောက် ဆန့်ကျင်မှုနှင့်အတူ လက်နက်ကိုင် ပဋိက္ခများ ဖြစ်ပွားခဲ့ပြီး ပြည်ထောင်စုအဆင့် ငြိမ်းချမ်းရေးဆွေးနွေးမှုများ ပြုလုပ်နိုင်ခဲ့ခြင်း မရှိ တော့ကြောင်း သိရသည်။

သို့သော် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)ထိုးထားသည့် RCSS/SSA(ရှမ်း)၊ DKBA (ကရင်)၊ KNU/KNLA-PC (ကရင်)၊PNLO (ပအိုဝ်း)၊ ALP (ရခိုင်)၊ LDU(လားဟူ)၊ NMSP(မွန်) စသည့် လက်နက်ကိုင် အဖွဲ့များ အပြင် NCA မထိုးရသေးသော UWSA(ဝ)၊ NDAA(မိုင်းလား)၊ SSPP/SSA(ရှမ်း) တို့နှင့် ငြိမ်းချမ်းရေး လုပ် ငန်းစဉ်များ ဆွေးနွေးလျက်ရှိသည်။

NSPNC နှင့် PPST  အဖွဲ့၀င်များတွေ့ဆုံစဉ်

ဗိုလ်မှူးကြီးစောကျော်ညွန့်က “ဒီ ၂၀၂၁ ဖေဖော်ဝါရီလ ၁ ရက်နေ့ အာဏာသိမ်းမှု မတိုင်မီအချိန်က ကျနော်တို့ လုပ်ဆောင်ခဲ့တဲ့ ငြိမ်းချမ်းရေးဆွေးနွေးပွဲတွေက NCA ပြဋ္ဌာန်းချက်အရ ကျနော်တို့က အတိုင်းအတာ တစ်ခုအထိ အဆင်ပြေပြေ လုပ်နိုင်ခဲ့တယ်ဆိုပေမယ့် ဒီနောက်ပိုင်းမှာ ဖြစ်ပေါ်လာခဲ့တဲ့ နိုင်ငံရေး အခင်းအကျင်းအရ သော် လည်းကောင်း၊ Stakeholders (သက်ဆိုင်သူများ) တွေအနေနဲ့ အပြောင်းအလဲ မပြည့်မစုံ အခြေအနေအရ လည်း ကောင်း ကျနော်တို့ ငြိမ်းချမ်းရေး ဆွေးနွေးပွဲမှာကတော့ အရင်ကထက် စာလို့ရှိရင်တော့ အများကြီး အခက်အခဲ တွေ စိန်ခေါ်မှုတွေ ဖြစ်ခဲ့တယ်၊ ဖြစ်ဆဲလည်း ဖြစ်တယ်ဆိုတာကိုတော့ ဒါက ပကတိအရှိတရားပဲ ဆိုတာကိုတော့ ကျနော့်အနေနဲ့ အဲဒီလိုပဲ နားလည်မှုရှိပါတယ်” ဟု CNI သတင်းဌာနသို့ ပြောသည်။

PPST ကို NCA လက်မှတ်ထိုးထားသော တိုင်းရင်းသား လက်နက်ကိုင် အဖွဲ့များဖြင့် ဖွဲ့စည်းထားသည်။

NCA ကို ရှမ်းပြည်ပြန်လည်ထူထောင်ရေးကောင်စီ(RCSS)၊ ကရင်အမျိုးသားအစည်းအရုံး(KNU)၊ ပအိုဝ်း အမျိုး သား လွတ်မြောက်ရေးအဖွဲ့ချုပ်(PNLO)၊ ဒီမိုကရေစီအကျိုးပြု ကရင်တပ်မတော်(DKBA)၊ ကရင်အမျိုးသား အစည်းအရုံး/ ကရင်အမျိုးသားလွတ်မြောက်ရေးတပ်မတော်(KNU/KNLA-PC)၊ ချင်းအမျိုးသားတပ်ဦး (CNF)၊ ရခိုင်ပြည်လွတ်မြောက်ရေးပါတီ(ALP)၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး (ABSDF)၊ မွန်ပြည်သစ်ပါတီ(NMSP)၊ လားဟူဒီမိုကရက်တစ် အစည်းအရုံး(LDU)တို့ လက်မှတ် ရေးထိုးထားသည်။

CNI News

၂၀၂၃ ခုနှစ်၊ ဖေဖော်ဝါရီ ၂၂

နိုင်ငံကူးလက်မှတ် (ပတ်စပို့)ကို ၂၀၂၃ ခုနှစ်၊ ဖေဖော်ဝါရီ ၂၄ ရက်နေ့မှ စတင်၍ Online Booking စနစ်ဖြင့် လျှောက်ထားပြီ ဖြစ်ကြောင်း နစက၏ လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာနက ထုတ်ပြန် ကြေညာခဲ့သည်။

Online Booking စနစ်ကို မြန်မာနိုင်ငံကူးလက်မှတ် ထုတ်ပေးရေးရုံး(ရန်ကုန်)၌သာ ကျင့်သုံးမည်ဖြစ်ပြီး ပြည်နယ်/တိုင်းဒေသကြီးများရှိ ရုံးခွဲများ၌ ယခင် လျှောက်ထားမှု လုပ်ငန်းစဉ်အတိုင်း ဆောင်ရွက်ပေးသွားမည် ဟု ထုတ်ပြန် ကြေညာချက်တွင် ဖော်ပြထားသည်။

ပတ်စပို့လျှောက်နိုင်ကြောင်း ကြေညာချက်ကိုတွေ့ရစဉ်

ထို့နောက် Online Booking ရယူရာတွင် အချိန်အကန့်အသတ်မရှိဘဲ အလွယ်တကူ လျှောက်ထားနိုင်ပြီး ကုန်ကျစရိတ်ကို သတ်မှတ် နှုန်းထားအတိုင်း တစ်ပါတည်း ပေးချေရမည်ဖြစ်ကြောင်း၊ Online Booking လျှောက်ထားရန် အခက်အခဲရှိသူများအနေဖြင့် သက်ဆိုင်ရာမြို့မရဲစခန်းများတွင် အကူအညီ တောင်းခံ၍ လျှောက်ထားနိုင်ကြောင်း လ.ဝ.က ဝန်ကြီးဌာနက ထုတ်ပြန်ခဲ့သည်။

မည်သူမဆို လွယ်ကူစွာ လျှောက်ထားနိုင်ရန် စီစဉ်ထားရှိပြီး ကြားခံပွဲစားများဖြင့် အခကြေးငွေ ပေးဆောင်၍ လျှောက်ထားခြင်းများ မပြုရန် အသိပေးနှိုးဆော်ပါသည်ဟုလည်း ၎င်းက ပြောသည်။

CNI News

၂၀၂၃ ခုနှစ်၊ ဖေဖော်ဝါရီ ၂၂

ပလောင်ပြည်နယ်လွတ်မြောက်ရေးတပ်ဦး/ တအာင်းအမျိုးသားလွတ်မြောက်ရေးတပ်မတော်(PSLF/TNLA)၏ ဗဟိုကော်မတီဝင်၊ ဒုတိယစစ်ဦးစီးချုပ် ဗိုလ်မှူးကြီး တားအလှော်(ခ) တားမူစယ်သည် ၂၀၂၃ ခုနှစ်၊ ဖေဖော်ဝါရီ ၂၁ ရက်နေ့ နံနက် ၄ နာရီ ၁၆ မိနစ်က ကွယ်လွန်သွားပြီး ဖြစ်ကြောင်း သိရသည်။

ဗိုလ်မှူးကြီး တားအလှော်(ခ) တားမူစယ် ကွယ်လွန်သည့် အချိန်တွင် အသက် ၆၄ နှစ်ရှိပြီးဖြစ်ကြောင်း သိရသည်။

ဗိုလ်မှူးကြီး တားအလှော်(ခ) တားမူစယ် ကွယ်လွန်ခြင်းနှင့်ပတ်သက်ပြီး ရက္ခိုင့်တပ်တော်(AA)က ဝမ်းနည်းကြောင်း သဝဏ်လွှာပေးပို့ခဲ့သည်။

AA ရဲ့ ဝမ်းနည်းကြောင်း သဝဏ်လွှာကိုတွေ့ရစဉ်

PSLF/TNLA ဒုစစ်ဦးစီးချုပ် ဗိုလ်မှူးကြီး တားအလှော်(ခ) တားမူစယ်သည် ၁၉၇၉ ခုနှစ်မှ ၂၀၀၅ ခုနှစ်အထိ PSLO/PSLA တွင် စစ်ဦးစီးချုပ်၏ ကိုယ်ရေးအရာရှိတာဝန်၊ ဗဟိုလုံခြုံရေးတာဝန်၊ အမျိုးသားဒီမိုကရေစီ တပ်ပေါင်းစု(NDF)၏ တာဝန်၊ အထူးတပ်ဖွဲ့တာဝန်၊ ထောက်ပို့တာဝန် စသဖြင့် တာဝန်ထမ်းဆောင်ခဲ့သူ ဖြစ်သည်ဟု AA ၏ သဝဏ်လွှာမှာ ဖော်ပြထားသည်။

ထို့နောက် PSLF/TNLA တွင် ဗျူဟာမှူးတာဝန်၊ တပ်မဟာမှူးတာဝန်၊ စစ်ဦးစီးမှူးတာဝန်၊ ဒုတိယစစ်ဦးစီးချုပ် တာဝန်တို့ကို အသီးသီး တာဝန်ထမ်းဆောင်ခဲ့ကြောင်း သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၂၂

လက်ရှိ ၂၀၂၃ ခုနှစ်ကို အဆုံးအဖြတ်နှစ်ဟု အမျိုးသားညီညွတ်ရေးအစိုးရ(NUG)၏ ယာယီသမ္မတ ဒူဝါလရှီးလက ပြောကြားခဲ့ပြီးနောက် လက်တွေ့တွင် တကယ့်အဆုံးအဖြတ်နှစ် ဖြစ်/မဖြစ်ဆိုသည့်အပေါ် မြန်မာ့နိုင်ငံရေး အသိုင်းအဝိုင်းကြား သုံးသပ် ဆွေးနွေးလျက်ရှိနေသည်။

လက်နက်ကိုင် လမ်းစဉ်ဖြင့် ဆုံးဖြတ်မှုမှာ ကြာရှည်သွားနိုင်သည်ဟု သုံးသပ်မှုများ ရှိနေသည့်တိုင် တဖက်မှာလည်း ယခုနှစ်ကို အဆုံးအဖြတ်နှစ်ဟု ယုံကြည်ကာ တော်လှန်ရေးကို အရှိန်မြှင့်တင်လျက်ရှိကြောင်း သိရသည်။

လက်ရှိမှာ အဖွဲ့အစည်းပေါင်းများစွာ ရှိ‌နေသည့် ဒေသကာကွယ်ရေးတပ် (PDF) များအနေဖြင့် စစ်ရေး၊ နိုင်ငံရေး အရ စုစုစည်းစည်း လှုပ်ရှားမှုများ မတွေ့ရှိရသေးကြောင်း မြန်မာ့နိုင်ငံရေးလေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။

၎င်းက “NUG ဘက်မှာတော့ အဓိက ပြဿနာက အဲဒါပဲ၊ ကျနော်တို့ အရင် မြန်မာ့သမိုင်းကို လေ့လာကြည့်မယ် ဆိုရင်လည်း အရင် ဦးနုက အဲဒီလိုပဲ ဒီမိုကရေစီပါတီဆိုပြီးတော့ တည်ထောင်ပြီးတော့ နယ်စပ်ကနေပြီးတော့ KNU ဒေသကို အခြေပြုပြီးတဲ့ အခါကြတော့ အစိုးရကို ဆန့်ကျင်ဖို့ ပြည်ချစ်တပ်မတော် တစ်ခုထောင် ဖူးတယ်၊ တပ်က တော်တော်လေး အင်အားကြီးလာပါတယ်၊ လက်နက်ခဲယမ်း မီးကျောက်လည်း ပြည့်ပြည့်စုံစုံ ရတယ်၊ ဒါပေမဲ့ အဓိကအားဖြင့် စည်းလုံးညီညွတ်ရေး ပြဿနာတွေ ရှိလာပြီးတော့ အချင်းချင်း တိုက်ကြခိုက်ကြ၊ ကိုယ့်အချင်းချင်း သူ့ပါတီထဲမှာရော သူ့တပ်ဖွဲ့ အချင်းချင်းမှာရော၊ KNU နဲ့ရောပေါ့နော်၊ တိုက်ကြခိုက်ကြပြီးတဲ့ အခါကြတော့ ပြိုကွဲသွားတာပေါ့၊ အခု ဒီဟာကလည်း ပြဿနာက အဲဒါပဲ၊ အခုဟာက တချို့အောက်က လက်နက် ကိုင် အဖွဲ့အစည်းတွေက ကိုယ်ထူကိုယ်ထ စပြီးတော့ ထူထောင်ရတာဆိုတော့ ဗမာပြည်ကွန်မြူနစ်ပါတီ လိုတော့ သိပ်ပြီး စုစုစည်းစည်း အတွေးအခေါ်အရရော၊ လှုပ်ရှားမှုအရရောပေါ့နော်၊ စစ်ရေး၊ နိုင်ငံရေး လှုပ်ရှားမှုတွေ အရ ရော စုစည်းညီညွတ်တာမျိုးတော့ မတွေ့ရသေးဘူး” ဟု ပြောသည်။

NUG ၀န်ကြီးချုပ် မန်း၀င်းခိုင်သန်းနဲ့ PDF တပ်ဖွဲ့ကိုတွေ့ရစဉ်

စစ်ရေးဆိုင်ရာမှာ အပြောင်းအလဲ တစ်ခုဖြစ်သွားရန် လုပ်ဆောင်နိုင်သော်လည်း အဆုံးအဖြတ်နှစ်ကို မရောက်ရှိ သေးကြောင်း မြန်မာ့နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “ကျနော်ကတော့ အဆုံးအဖြတ်ပေးတဲ့ အနေအထားကို ရောက်ရှိသွားပြီလို့တော့ ကျနော်တော့ မပြောနိုင် ပါဘူး။ ဘာကြောင့်လဲဆိုတော့ ပထမအကြောင်း အချက်တစ်ခုက အခု ကိုယ်ထူကိုယ်ထ PDF တွေ ဖွဲ့စည်းမှုမှာ တပ်ရင်းပေါင်း ၅၀၀ ကျော်လောက်ရှိတဲ့ အထဲမှာ တပ်ရင်းပေါင်း ၂၀၀ ကျော်လောက်က ကိုယ့်အစီအစဉ်နဲ့ကိုယ် NUG ရဲ့ ဦးဆောင်မှု‌အောက်ကို ခံယူမှု မရှိဘဲနဲ့ ကိုယ့်အစီအစဉ်နဲ့ကိုယ် တိုက်ခိုက်နေတဲ့ အခြေအနေ ဖြစ်ပါတယ်။ နောက်တစ်ခုက ဒီအင်အားစုတွေကို အမြဲတမ်းတပ်အဖြစ် ဖွဲ့စည်းတဲ့ ဖြစ်စဉ်တွေလည်း မပြီးဆုံးသေးပါဘူး။ တချို့ က ဒေသခံ ကာကွယ်ရေး အဖွဲ့အစည်းအဆင့်ပဲ ရှိပါသေးတယ်၊ အဲဒါတွေ စုစည်းပြီးတော့ ကျနော်တို့ ကြီးမားတဲ့ တပ်မဟာတွေ၊ တပ်မဟာတွေ ဖွဲ့စည်းနိုင်တဲ့ အနေအထား မရှိသေးပါဘူး၊ နောက်ပြီးတော့ လက်နက်တပ်ဆင်မှု အရ ပြောလို့ရှိရင်လည်း အခုချိန်မှာ ယေဘုယျ ပြောရလို့ရှိရင် ၆၀ ရာခိုင်နှုန်းလောက် လက်နက်တပ်ဆင်မှု အနေ အထားတော့ ရောက်ရှိနေပါပြီ။ သို့သော်ငြားလည်း ပြန်လှန်ထိုးစစ်ဆင်မှုအတွက် လိုအပ်တဲ့ လက်နက်ကြီးတွေ သုံးစွဲနိုင်မှု အနေအထားက အကန့်အသတ် ရှိနေပါတယ်” ဟု ပြောသည်။

လက်ရှိ နွေဦးတော်လှန်ရေးကို ပူးပေါင်းပါဝင်နေသည့် တိုင်းရင်းသား လက်နက်ကိုင် အဖွဲ့အစည်းများ ရှိနေသလို အခြားတစ်ဖက်မှာလည်း နစကနှင့် ငြိမ်းချမ်းရေး တွေ့ဆုံဆွေးနွေးနေသည့် အဖွဲ့အစည်းများ၊ ငြိမ်းချမ်းရေး မဆွေး နွေးသော်လည်း ယာယီအပစ်အခတ် ရပ်စဲထားသည့် တိုင်းရင်းသား လက်နက်ကိုင် အဖွဲ့အစည်းများလည်း ရှိနေ သည်။

မြန်မာ့တပ်မတော်ကိုတွေ့ရစဉ်

တိုင်းရင်းသား လက်နက်ကိုင် အဖွဲ့အစည်းများ မပါဝင်ဘဲ အဆုံးအဖြတ်နှစ် မဖြစ်နိုင်ကြောင်း ကချင်နိုင်ငံရေး သမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။

၎င်းက “NUG တစ်စုံလုံး အနေနဲ့တော့ ဖြစ်ဖို့တော့ မလွယ်လောက်ဘူးထင်တယ်၊ ဘာဖြစ်လို့လဲဆိုတော့ လက်နက် လက်ရှိ ရှိနေတာ EAO တွေဖြစ်တယ်၊ ပထဝီအနေအထားတွေ သူတို့ပဲ ထိန်းချုပ်နေတဲ့ အပိုင်းတွေ ဖြစ်တယ်၊ EAO တွေ တိုင်းရင်းသား လက်နက်ကိုင် အဖွဲ့အစည်းတွေ မပါဘူးဆိုရင် ဒီဟာတော့ ဖြစ်ဖို့တော့ နည်းနည်းတော့ ခက်မယ်လို့တော့ မြင်ပါတယ်၊ ဒါပေမဲ့ တခြားနိုင်ငံ ဥရောပတို့၊ အမေရိကန်တို့ ဂျပန်တခြားပေါ့ အာဆီယံတို့ကနေ ထောက်ပံ့ပြီးမှ ထောက်ပံ့တဲ့ လမ်းကြောင်းတွေ ရှိလာတယ်ဆိုရင်တော့ မပြောတတ်ဘူးပေါ့ဗျာ၊ ဒါပေမဲ့ အခုလက် ရှိ အခြေအနေမှာတော့ NUG တစ်ဖွဲ့ထဲနဲ့တော့ မလွယ်လောက်ဘူးလို့ပဲ မြင်ပါတယ်၊ တိုင်းရင်းသားတွေပါမှပဲ ဆုံးဖြတ်နိုင်မယ်လို့ ကျနော်တော့ ဒီလိုပဲ မြင်ပါတယ်” ဟု ပြောသည်။

လက်ရှိမှာ မြန်မာ့တပ်မ‌တော်နှင့် တိုင်းရင်းသား လက်နက်ကိုင် အဖွဲ့အစည်းအချို့နှင့် ဒေသကာကွယ်ရေးတပ် (PDF) ပူးပေါင်းတပ်အကြား ကရင်ပြည်နယ်၊ ကယား(ကရင်နီ)ပြည်နယ်၊ ချင်းပြည်နယ်၊ စစ်ကိုင်းတိုင်းဒေသ ကြီးနှင့် မကွေးတိုင်းဒေသကြီးတို့တွင် တိုက်ပွဲများ ဖြစ်ပွားလျက်ရှိနေသည်။

CNI News

၂၀၂၃ ခုနှစ်၊ ဖေဖော်ဝါရီ ၂၁

တရုတ်နိုင်ငံခြားရေးဝန်ကြီးဌာန အာရှရေးရာအထူးကိုယ်စားလှယ် H.E.Mr. Deng Xijun သည် အမျိုးသားဒီမိုကရေစီ မဟာမိတ်တပ်မတော်-မိုင်းလား(NDAA) ထိန်းချုပ်နယ်မြေ၏ မြို့တော်ဖြစ်သည့် မိုင်းလားသို့ ရောက်ရှိ လာကြောင်း ဖေဖော်ဝါရီ ၂၀ ရက်နေ့က သိရသည်။

ထို့နောက် ရှမ်းပြည်နယ်(အရှေ့ပိုင်း) အထူးဒေသ(၄) မိုင်းလား၏ ငြိမ်းချမ်းရေးနှင့်စည်းလုံးညီညွတ်ရေး ကော်မတီ ဒုဥက္ကဋ္ဌများဖြစ်သည့် ဦးစန်ပေ့၊ ဦဆမ်လူ တို့နှင့်တွေ့ဆုံ ဆွေးနွေးခဲ့သည်။

အဆိုပါ တွေ့ဆုံမှုတွင် မည်သည့် အကြောင်းအရာများကို ဆွေးနွေးခဲ့သည်ကိုတော့ မသိရသေးပေ။

တရုတ်အထူးကိုယ်စားလှယ် Mr. Deng Xijun နှင့် NDAA ခေါင်းဆောင်များတွေ့ဆုံစဉ်

NDAA သည် "ဝ"ပြည်သွေးစည်းညီညွတ်ရေးတပ်မတော်(UWSA)၊ ရှမ်းပြည်တိုးတက်ရေးပါတီ(SSPP)၊ ကချင် လွတ်လပ်ရေး တပ်မတော်(KIA)၊ ရက္ခိုင့်တပ်တော်(AA)၊ တအာင်း(ပလောင်)အမျိုးသား လွတ်မြောက်ရေး တပ်မတော်(TNLA)၊ မြန်မာနိုင်ငံဆိုင်ရာ အမျိုးသားဒီမိုကရက်တစ် တပ်မတော်(MNDAA) တို့ ပါဝင်သည့် ပြည်ထောင်စု နိုင်ငံရေး ဆွေးနွေးညှိနှိုင်းရေးကော်မတီ(FPNCC)အဖွဲ့ဝင်ဖြစ်သည်။

လက်ရှိမှာလည်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့်လည်းကောင်း၊ နစက၏ ငြိမ်းချမ်းရေး ဆွေးနွေးရေး အဖွဲ့နှင့်လည်းကောင်း တွေ့ဆုံ၍ ငြိမ်းချမ်းရေးလုပ်ငန်းစဉ်များကို ဆွေးနွေးလျက်ရှိသည်။

 တရုတ်အထူးကိုယ်စားလှယ် Mr. Deng Xijun မိုင်းလားမြို့ကို ရောက်လာစဉ်

Mr. Deng Xijun သည် မစ္စတာ ဆွန်ကော်ရှန်၏ နေရာမှာ အစားထိုးခန့်အပ်ခံရပြီးနောက် မြန်မာနိုင်ငံသို့ ၂၀၂၂ ခုနှစ်၊ ဒီဇင်ဘာ ၂၉ ရက်နေ့က နေပြည်တော်မှာ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံ ခဲ့သေးသည်။

Mr. Deng Xijun သည် ၁၉၈၅ ခုနှစ်က စစ်သံမှူးအဖြစ် ရောက်ရှိခဲ့ဖူးသည်။ ထို့နောက် ၁၉၉၀ ပြည့်နှစ်မှ ၂၀၁၇ ခုနှစ်အထိ အရှေ့တောင်အာရှနှင့်တောင်အာရှတွင် အလှည့်ကျ တာဝန်များ ထမ်းဆောင်ခဲ့သည်။

၂၀၁၇ ခုနှစ်မှ ၂၀၁၉ ခုနှစ်တွင် အာဖဂန်နစ္စတန်ရေးရာ အထူးကိုယ်စားလှယ်ဖြစ်လည်းကောင်း၊ ၂၀၂၀ ပြည့်နှစ် မှ ၂၀၂၂ ခုနှစ်အထိ အာဆီယံဆိုင်ရာ သံအမတ်ကြီးအဖြစ်လည်းကောင်း တာဝန်ထမ်းဆောင်ခဲ့ကြောင်း သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၂၁

ကရင်လက်နက်ကိုင်များ သမိုင်းစဉ်ဆက် ညီညွတ်မှု မရှိဘဲ စည်းလုံးနိုင်ရေးအတွက် ရုန်းကန်နေရကြောင်း ကရင်အမျိုးသားဒီမိုကရက်တစ်ပါတီ ဥက္ကဋ္ဌ မန်းအောင်ပြည်စိုးက CNI သတင်းဌာနသို့ ပြောသည်။

လက်ရှိတွင်လည်း ကရင်လက်နက်ကိုင်တပ်ဖွဲ့ အချင်းချင်းကြား သဘောထားများ ကွဲလွဲနေကြောင်း၊ အတတ် နိုင်ဆုံး ပြန်လည် ညှိနှိုင်းသင့်ကြောင်း ၎င်းက ပြောသည်။

မန်းအောင်ပြည်စိုးက “ကရင်တို့ရဲ့ စည်းလုံးညီညွတ်ရေးအတွက် ကရင်တို့ မဆုံးတဲ့ ရုန်းကန်ခြင်းများ လုပ်နေ ရတယ်၊ သမိုင်းအစဉ်အဆက် ကရင်တွေက ညီညွတ်စည်းရုံးမှု မရှိဘူး။ အခုအခြေအနေ ဆိုလို့ရှိရင်လည်း ကျော် မကောင်း ကြားမကောင်းပေါ့ဗျာ၊ ပြောရမယ်ဆိုလို့ရှိရင် ကရင်အချင်းချင်းတိုက်ကြ၊ ခိုက်ကြတယ်ဆိုတော့ ကျနော် ကတော့ ဘယ်လိုမှ မလိုလားဘူး။ အကြောင်းအမျိုးမျိုးကြောင့် သဘောထား ကွဲခဲ့ကြတယ် ဖြစ်ရင်တောင်မှ အတတ်နိုင်ဆုံး ပြန်လည်ညှိနှိုင်းကြဖို့ လိုတာပေါ့နော်” ဟု CNI သတင်းဌာနသို့ ပြောသည်။

ထားဝယ်-ထီးခီးလမ်းကိုတွေ့ရစဉ်

ကရင်အမျိုးသားအစည်းအရုံး (KNU) တပ်မဟာ ၄ နှင့် ကော်သူးလေတပ်မတော်(KTLA)တို့အကြား ဖေဖော်ဝါရီ ၂၀ ရက်နေ့ နံနက်ပိုင်းက တိုက်ပွဲဖြစ်ပွားခဲ့ကြောင်း၊ ထိုတိုက်ပွဲအတွင်း ကော်သူးလေတပ်မတော် တပ်ရင်း ၁ ကို သိမ်း ပိုက်နိုင်ခဲ့ကြောင်း KNU တပ်မဟာ ၄ ဘိတ်-ထားဝယ်အုပ်ချုပ်ရေးရုံးက ထုတ်ပြန်ခဲ့သည်။

ထို့အတူ တိုက်ပွဲအတွင်း ကော်သူးလေတပ်မတော်မှ တပ်ဖွဲ့ဝင် ၂ ဦးသေဆုံးကာ KNU တပ်မဟာ ၄ ဘက်မှ ၁ ဦး ဒဏ်ရာရရှိခဲ့ကြောင်း ထုတ်ပြန်ချက်တွင် ဖော်ပြထားသည်။

ဖက်ဒရယ်ဒီမိုကရေစီပြည်ထောင်စု ရရှိရေး ဆောင်ရွက်နေသည့်အချိန် တိုင်းရင်းသားအချင်းချင်း မညီညွတ်မှု အတွက် ရင်လေးစရာဖြစ်နေကြောင်း မန်းအောင်ပြည်စိုးက ပြောသည်။

၎င်းက “ကျနော်တို့ ဖက်ဒရယ်ဒီမိုကရေစီပြည်ထောင်စု ရရှိရေးအတွက် နိုင်ငံတော်အစိုးရနဲ့ ကျနော်တို့ တိုင်းရင်းသားတွေအားလုံး ညှိနှိုင်းဖို့ ကိစ္စမှာလည်း ခက်ခက်ခဲခဲနဲ့ ပြောကြဆိုကြရမယ်ဆိုတဲ့ အထဲမှာ တိုင်းရင်းသား မျိုးနွယ်စု တစ်ခုအချင်းချင်းက အဲဒီလို မညီမညွတ် ဖြစ်နေတယ်ဆိုရင်တော့ ကျနော်တို့ အင်မတန် ရင်လေးစရာပဲ ကြားရတာလည်း စိတ်မကောင်းဘူး။ ဖြစ်လည်း မဖြစ်စေချင်ဘူးပေါ့ဗျာ၊ ကျနော် အဲဒီလောက်ပဲ ပြောပါရစေ” ဟု ပြောသည်။

ပြီးခဲ့သည့် ဖေဖော်ဝါရီ ၇ ရက်က KNU တပ်မဟာ ၄ နှင့် ကော်သူးလေတပ်မတော်(KTLA) တို့သည် တစ်ဖက်နှင့် တစ်ဖက် ဆက်ဆံရေး ပိုတင်းမာလာသည်ကို တွေ့ရကြောင်း၊ ကရင်လက်နက်ကိုင် အချင်းချင်းအကြား ဖြစ်ပေါ် သော ပဋိပက္ခများကို ဖြေရှင်းရာမှာ လက်နက်ဖြင့် ဖြေရှင်းခြင်းသည် ကရင်လူထုအနေဖြင့် လုံးဝလက်ခံနိုင်သည့် အရာ မဟုတ်ကြောင်း တနင်္သာရီတိုင်းဒေသကြီးအတွင်းရှိ ကရင်လူထုများမှ သဘောထား ထုတ်ပြန်ခဲ့သည်။

KNU တပ်ဖွဲ့ကိုတွေ့ရစဉ်(KNU-fb)

ထို့နောက် နှစ်ဖက် အချင်းချင်းကြား ပဋိပက္ခများ ပိုမို ကြီးထွားလာပြီး လက်နက်ကိုင်နည်းလမ်းဖြင့် ဖြေရှင်းမှုများ ပါ ပါဝင်လာ၍ နှစ်ဖက်အပြန်အလှန် ပစ်ခတ်မှုများ၊ ခြိမ်းခြောက်ပြောဆိုမှုများ၊ စွပ်စွဲပြောဆိုမှုများ ရှိလာခဲ့ကြောင်း၊ လက်ရှိတွင် နှစ်ဖက်တိုက်ပွဲများ ဖြစ်ပွားခဲ့ခြင်း ဖြစ်ကြောင်း သိရသည်။

ကော်သူးလေတပ်မတော်ကို ပြီးခဲ့သည့် ၂၀၂၂ ခုနှစ်၊ ဇူလိုင်လအတွင်းက ကရင်အမျိုးသားကာကွယ်ရေးအဖွဲ့ (KNDO) ၏ စစ်ဦးစီးချုပ် တာဝန်မှ ရပ်ဆိုင်းခြင်း ခံခဲ့ရသည့် ဗိုလ်မှူးချုပ် စောနယ်ဒါးမြက ဖွဲ့စည်းခဲ့ပြီး KNU တပ်မဟာ ၄ နယ်မြေတွင် လှုပ်ရှားလျက်ရှိကြောင်း သိရသည်။

လက်ရှိတွင် ကရင်လက်နက်ကိုင် တပ်ဖွဲ့များအနေဖြင့် ကရင်အမျိုးသားအစည်းအရုံး (KNU)၊ ဒီမိုကရေစီ အကျိုးပြု ကရင့်တပ်မတော် (DKBA)၊ ကရင်အမျိုးသားအစည်းအရုံး/ ကရင်အမျိုးသားလွတ်မြောက်ရေးတပ်မတော်/ ငြိမ်းချမ်းရေးကောင်စီ (KNU/KNLA/PC)၊ ကော်သူးလေတပ်မတော်(KTLA)နှင့် ကရင်ပြည်နယ်ခြားစောင့်တပ် (BGF) စသဖြင့် အသီးသီး လှုပ်ရှုားလျက်ရှိနေသည်။