CNI News

၂၀၂၂ ခုနှစ်၊ ဧပြီ ၂၆

UPDJC နိုင်ငံရေးပါတီများ အစုအဖွဲ့ ရွေးချယ်မှုကို တစ်ပါတီလျှင် တစ်မဲစနစ်ဖြင့် ရွေးချယ်ရန် သတ်မှတ်ထားချက်အပေါ် နိုင်ငံရေးပါတီများ သဘောထားကွဲလွဲနေကြသည်။

ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ (UPDJC)၏ နိုင်ငံရေးပါတီများ အစုအဖွဲ့ ရွေးချယ်မှုကို ဧပြီ ၂၇ ရက် တွင် ကျင်းပမည်ဖြစ်ကြောင်း သိရသည်။

ဦးရွှေမင်းက “ကျနော်တို့ လိုချင်တာတော့ ကြိုတင် စည်းကမ်းသတ်မှတ်ချက် မရှိဘဲနဲ့ ညှိနှိုင်းဆွေးနွေးပြီးတော့ အဖြေရှာပြီးတော့မှပဲ ဆောင်ရွက်ရင်တော့ ပိုသင့်တော်တာပေါ့ဗျာ၊ အဲလိုလေး မြင်တယ်ခင်ဗျ၊ သူတို့ကတော့ တစ်ပါတီကို တစ်မဲစနစ်နဲ့ ပြောနေတာတော့ ကြားပါတယ်၊ အကယ်၍ အဲဒါသာ သွားမယ်ဆိုရင် ကျနော်တို့ UPDJC Political party ပုံစံမသွားဘဲနဲ့ YP များ ဖြစ်သွားမလားပေါ့၊ YP ဆိုတာ ရန်ကုန်ပါတီပေါ့နော်၊ အဲပုံစံများ ဖြစ်သွားမလား၊ ပြီးရင် ကျနော်တို့ စဉ်းစားရမှာက လက်တွေ့ ဖြစ်ပေါ်နေတဲ့ ပဋိပက္ခဖြစ်ပေါ်နေတဲ့ ဒေသတွေနဲ့ ပတ်သက်တဲ့ တကယ့်ကို လုပ်ဆောင်နိုင်တဲ့ ပုဂ္ဂိလ်တွေကို ပါဝင် ခိုင်းစေချင်တယ်၊ ဥပမာ ကျနော်တို့က ဟိုနေရာ၊ ဒီနေရာ ယူထားပြီးတော့ လက်တွေ့ ဆောင်ရွက်နိုင်မှုမှာ စွမ်းဆောင်နိုင်မှုမှာ အားနည်းတယ်ဆိုရင် ကျနော်တို့ အဲ impact ကို ဖြစ်ပေါ်လာမှာ မဟုတ်ဘူး”ဟု ပြောသည်။

ထို့နောက် မဲစနစ်ဖြင့် ရွေးချယ်မှုသည် လူဦးရေများသည့် လူမျိုးများနှင့် ပါတီများ၏ မဟာမိတ်များက အနိုင်ရရှိသွားနိုင်ပြီး လူမျိုးစု ပါတီများအတွက် အခက်အခဲဖြစ်နိုင်သည်ဟု ၎င်းက ပြောသည်။

ဦးရွှေမင်းက “အခု မဲစနစ်နဲ့ကြတော့ လူဦးရေများတဲ့ လူမျိုးတွေ၊ ပါတီတွေက ခုနပြောသလိုပေါ့၊ မဟာမိတ်တွေကပဲ အနိုင် ရရှိသွားမယ်၊ ကျနော်တို့က ပါဝင်နိုင်ခြင်းမရှိတဲ့အတွက် ပြောနေတာ မဟုတ်ပါဘူး၊ ပါဝင်နိုင်ခြင်း ရှိ၊မရှိက အရေးမကြီးဘူး၊ ပါဝင်မှုက အရေးမကြီးဘူး၊ လုပ်ဆောင်နိုင်မှုက အရေးကြီးတယ်၊ အဲတော့ တိုင်းရင်းသားဒေသတွေမှာ ဖြစ်နေတဲ့ စစ်ရေး ပဋိပက္ခကို လျော့ချနိုင်ဖို့အတွက် အဲဒီတိုင်းရင်းသားဒေသတွေ လက်နက်ကိုင် EAO တွေနဲ့ ချိတ်ဆက် ဆောင်ရွက်ပြီးတော့ ကျနော်တို့ ကြားခံသဘော၊ အပြုသဘော ဆောင်ရွက်နိုင်တဲ့ ပုဂ္ဂိုလ်တွေ ပါဝင်လာဖို့ အရေးကြီးတယ်လို့ ကျနော် ဒီအတိုင်း သုံးသပ်တယ်”ဟု ပြောသည်။

အဆိုပါ UPDJC နိုင်ငံရေးပါတီများ အစုအဖွဲ့ ရွေးချယ်မှုကို နိုင်ငံရေးပါတီ ၉၂ ပါတီအနက် ပါတီ ၄၀ ကျော်မှ ကိုယ်စားလှယ် များ တက်ကြမည် ဖြစ်ကြောင်း သိရသည်။

UPDJC နိုင်ငံရေးပါတီ ရွေးချယ်ပွဲတစ်ခုကို ၂၀၁၅ ခုနှစ်က ကျင်းပနေစဉ်

မြန်မာနိုင်ငံတွင် မျှတမှုမရှိသည့် အလွှမ်းမိုးခံ နိုင်ငံရေးကြောင့်၊ လက်နက်ကိုင်ပဋိပက္ခများ ပေါ်ပေါက်ခဲ့ကြောင်း၊ လက်ရှိ UPDJC ရွေးချယ်မှုကို ညီမျှမှုရှိရန် ဖြစ်သင့်ကြောင်း ရခိုင်အမျိုးသားပါတီ (ANP)မှ မူဝါဒရေးရာဦးဆောင်ကော်မတီဝင် ဦးထွန်းအောင်ကျော်က ပြောသည်။

၎င်းက “ညီမျှမှုရှိအောင်တော့ တန်းတူရည်တူနဲ့ စေတနာကို ထင်ဟပ်ပေါ်လွင်တဲ့ ရွေးချယ်တင်မြောက်မှုကတော့ ဖြစ်သင့် တာပေါ့ ခင်ဗျား၊ အဲဒါကိုလည်း ကျနော်တို့ ညီကို တိုင်းရင်းသားပါတီတွေ အနေနဲ့ကတော့ ဒီကိစ္စကို ကြိုပြီးတော့ မြင်ရမယ်၊ ကြည့်ကြမယ်၊ အဲဒါကြောင့်လည်း ကြိုတင်ပြီးတော့ ပြင်ဆင်လိမ့်မယ်လို့ လေးလေးနက်နက် ကျနော် ယူဆပါတယ်၊ အဲဒါ ကြောင့် အကောင်းဆုံးတစ်ခုတော့ ဖြစ်အောင်တော့ ကြိုးစားကြမှာပဲ အဲဒီတော့ မြန်မာနိုင်ငံရဲ့ အကျိုးစီးပွားအတွက် မြန်မာ နိုင်ငံသူ၊ နိုင်ငံသား အားလုံးရဲ့ အကျိုးစီးပွားနဲ့ တိုင်းရင်းသား နိုင်ငံရေးပါတီတွေရဲ့ အခန်းကဏ္ဍ ပျောက်ကွယ် မသွားဖို့အတွက် အလွှမ်းမိုး မခံရဖို့ အတွက်ကတော့ ရိုးရိုးသားသားနဲ့ စေတနာရှေ့ထားပြီး လုပ်ကြလိမ့်မယ်လို့ ကျနော်တို့ ယူဆပါတယ် ခင်ဗျ၊ မဟုတ်ရင်ကတော့ တော်တော်ကို အခြေအနေဆိုးတဲ့ နိုင်ငံရေး အကျပ်အတည်းတစ်ခု ပေါ်ပေါက်လိမ့်မယ်လို့ ယူဆ ပါတယ်”ဟု ပြောသည်။

UPDJC နိုင်ငံရေးပါတီများ အစုအဖွဲ့ကို တရားဝင် မှတ်ပုံတင်ထားသည့် နိုင်ငံရေးပါတီ ၉၂ ပါတီထဲကနေ အမြဲတမ်းကော်မတီ ဝင် ၁၆ ဦးနှင့် အရန်ကော်မတီဝင် ၁၆ ဦးကို ရွေးချယ်မည်ဖြစ်ကြောင်း သိရသည်။

UPDJC နိုင်ငံရေးပါတီ အစုအဖွဲ့ ပြန်လည်ရွေးချယ်ပွဲ မဲခွဲရွေးချယ်မှုကို ကန့်သတ်ချက်ဖြင့် မလုပ်သင့်ကြောင်း၊ တိုင်းရင်းသား ပါတီနှင့် အင်အားကြီးပါတီများ အချိုးကျပါဝင်မှုကို ညှိနှိုင်းသင့်ကြောင်း မွန်ညီညွတ်ရေးပါတီ(MUP)မှ ဒုဥက္ကဋ္ဌ (၂) နိုင်တလညီ က ပြောကြားခဲ့သည်။

လက်ရှိ ယာယီဖွဲ့စည်းထားသည့် UPDJC နိုင်ငံရေးပါတီ အစုအဖွဲ့

လက်ရှိ UPDJC နိုင်ငံရေးပါတီများ အစုအဖွဲ့ကို ပြည်သူများ စိတ်ဝင်စားမှု မရှိကြောင်း၊ သံတမန် အသိုင်းအဝိုင်းမှလည်း စိတ်ဝင်စားမှု မရှိသလိုဖြစ်နေကြောင်း ပြည်သူ့ပါတီ(PP)မှ ဥက္ကဋ္ဌ ဦးကိုကိုကြီးက ပြောသည်။

ဦးကိုကိုကြီးက “အဲဒီ UPDJC နိုင်ငံရေးပါတီ အစုအဖွဲ့က (၁)အချက် အများပြည်သူရဲ့ ယုံကြည်မျှော်လင့်မှု တည်ဆောက်နိုင် ရမယ်၊ နောက်တစ်ခုကတော့ ကျနော်တို့က တစ်နိုင်ငံတည်း နေလို့မရဘူး၊ အခုဆိုရင် အာဆီယံ အထူးကိုယ်စားလှယ်၊ ကုလ သမဂ္ဂ အထူးကိုယ်စားလှယ်၊ EU၊ တရုတ်၊ ဂျပန် အစရှိသဖြင့် အထူးကိုယ်စားလှယ်တွေရှိတယ်၊ ကျနော်တို့ အာဆီယံ သူတို့ တွေရဲ့ ယုံကြည်မျှော်လင့်မှု ဖြစ်လာဖို့လိုတယ်၊ ဒါကြောင့်မို့လို့ ဒီ UPDJC နိုင်ငံရေးပါတီ အစုအဖွဲ့ ရွေးချယ်တဲ့ နေရာမှာ လက်ရှိ ဒီလောက် ခက်ခဲပင်ပန်းနေတဲ့၊ အကျပ်အတည်းဖြစ်နေတဲ့ ကာလမှာ အဖြေထုတ်နိုင်မယ့် မျှော်လင့်ချက် ဖြစ်လာဖို့လိုမယ်၊ အဲဒီ UPDJC ရဲ့ နိုင်ငံရေး ဥပတိရုပ် တိုးတက်လာဖို့ လိုတယ်၊ ဒါကြောင့်မို့လို့ ရွေးချယ်တင်မြောက်ပွဲမှာ အခုနိုင်ငံရေးပါတီတွေ လာကြမယ်၊ ရွေးချယ်ကြမယ် ဆိုတဲ့အခါမှာ ကျနော်ကတော့ ဖြစ်စေချင်တာ ဘယ်သူ၊ ဘယ်ဝါလို့ ကျနော်မပြောဘူး၊ ဒီ UPDJC ကနေပြီးတော့ နိုင်ငံရေးပြဿနာကို၊ လက်ရှိ အကျပ်အတည်းကို ကျော်လွှားနိုင်မယ့် အများပြည်သူ ယုံကြည် မျှော် လင့်မယ့်၊ နိုင်ငံတကာက ယုံကြည်မျှော်လင့်မယ့် ပုဂ္ဂိုလ်၊ အဖွဲ့အစည်းများ ပါလာမှ UPDJC ရဲ့ နိုင်ငံရေး ဥပတိရုပ်တက်လာ မယ်လို့ ကျနော်က မြင်တယ်” ဟု ပြောသည်။

UPDJC ကို အစိုးရ၊ လွှတ်တော်နှင့် တပ်မတော် ကိုယ်စားလှယ် ၁၆ ဦး၊ NCA ထိုးထားသည့် လက်နက်ကိုင် အဖွဲ့အစည်းများမှ ကိုယ်စားလှယ် ၁၆ ဦး၊ နိုင်ငံရေးပါတီများ အစုအဖွဲ့မှ ကိုယ်စားလှယ် ၁၆ ဦးတို့ဖြင့် ဖွဲ့စည်းရန် NCA စာချုပ်တွင် ပြဋ္ဌာန်းထား သည်။

လက်ရှိတွင် UPDJC နိုင်ငံရေးပါတီ အစုအဖွဲ့ကို ၂၀၂၁ ခုနှစ်၊ နိုဝင်ဘာလက ယာယီ ၄ လတာ ကာလအနေဖြင့် ဖွဲ့စည်းခဲ့ရာ မတ်လက ပြည့်သွားသည့်အတွက် နောက်ထပ် ၂ လသက်တမ်းတိုးပေးထားကြောင်း၊ ထို့နောက် ဧပြီ ၂၇ ရက်တွင် စုဖွဲ့မှု အသစ်ကို ပြန်လည်ရွေးချယ်ကြမည်ဖြစ်သည်။

CNI News

၂၀၂၂ ခုနှစ်၊ ဧပြီ ၂၆

နစက-၏ ငြိမ်းချမ်းရေးဆွေးနွေးရန် တိုင်းရင်းသား လက်နက်ကိုင်အဖွဲ့များကို ဖိတ်ခေါ်မှုက နိုင်ငံရေး ရည်ရွယ်ချက်နှင့် ဟန်ပြ ဖိတ်ခေါ်မှု မဖြစ်ရန်လိုအပ်ကြောင်း လွှတ်တော်ကိုယ်စားလှယ်ဟောင်း ရခိုင်နိုင်ငံရေးသမား ဦးဖေသန်းက CNI သတင်းဌာနသို့ ပြောသည်။

နစက-ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်မှ ဧပြီလ ၂၂ ရက်က တိုင်းရင်းသား လက်နက်ကိုင်အဖွဲ့များကို ငြိမ်းချမ်းရေး အတွက် ဖိတ်ခေါ်ကြောင်း နိုင်ငံပိုင်ရုပ်သံလိုင်းမှ တစ်ဆင့် မိန့်ခွန်းပြော၍ ကမ်းလှမ်းခဲ့ခြင်း ဖြစ်သည်။

အဆိုပါ ကမ်းလှမ်းချက်မှာ ယေဘုယျဆန်သည့် ကမ်းလှမ်းချက်ဖြစ်ကာ နိုင်ငံရေးအရ နှစ်ဖက်အားပြိုင်၍ တိုင်းရင်းသား လက်နက်ကိုင်များကို စည်းရုံးနေသည့် ဟန်ပြဆွေးနွေးမှု မဖြစ်ရန် လိုသည်ဟု ဦးဖေသန်းက ပြောသည်။

ဦးဖေသန်းက “အရင်တုန်းကလို ပုံစံမျိုးတော့ ရတော့မှာ မဟုတ်ဘူး၊ တော်လှန်ရေးက တော်တော် ဇာတ်ရှိန်မြင့်လာပြီ၊ အဲဒီ တော့ ပေးနိုင်တဲ့ဟာကို သူတို့ဘက်က ချပြလိုက်မယ်ဆိုရင် တိုင်းရင်းသားတွေလည်း ဈေးညှိဖို့ လွယ်သွားတာပေါ့ဗျာ၊ အစ ကတည်းက နိဒါန်းတို့ မာတိကာတို့ သွားလုပ်နေလို့ကတော့ အချိန်တွေလည်း ကြာတယ်၊ ဖြစ်လည်းဖြစ်လာမှာ မဟုတ်ဘူး၊ နောက်ဆုံးတော့ ဘယ်လိုမြင်လာမလဲ၊ ငါတို့ကို အသုံးချတယ်၊ အဲဒီလို တိုင်းရင်းသားတွေက မြင်သွားလိမ့်မယ်၊ အဲဒီ သံသယ တွေကလည်း ရှိပြီးဖြစ်တယ်၊ ဆိုတော့ လက်တွေ့ကျကျ လုပ်ကြပါ၊ ဆွေးနွေးတာ ကောင်းတယ်၊ ဒါပေမယ့် အပျက် သဘော မျိုးနဲ့ တိုင်းရင်းသားတွေကို ငါတို့ ဘက်ပါအောင်၊ သူ့ဘက်ပါအောင် အဲဒီလို နိုင်ငံရေးကစားကွက်မျိုး လုပ်တာမဟုတ်ဘဲနဲ့ တကယ့် လက်တွေ့ကျကျ လုပ်မယ်ဆိုရင်တော့ တိတိကျကျ ကမ်းလှမ်းပြီးတော့ ဆွေးနွေးဖို့လိုတယ်လို့ ပြောချင်ပါတယ်”ဟု ပြောသည်။

အမျိုးသားညီညွတ်ရေးအစိုးရ(NUG) အနေနှင့်လည်း ရက္ခိုင့်တပ်တော်(AA)ကို အလွတ်သဘော တွေ့ဆုံဆွေးနွေးလိုကြောင်း ပြီးခဲ့သည့် မတ်လ ၂၄ ရက်နေ့က အကြောင်းကြားစာ ပေးပို့ခဲ့သော်လည်း လက်ရှိအချိန်ထိ တရားဝင် တွေ့ဆုံနိုင်ခြင်းတော့ မရှိသေးပေ။

ဗိုလ်ချုပ်မှူးကြီးမင်းအောင်လှိုင်

လက်ရှိ နစက-၏ ငြိမ်းချမ်းရေး ကမ်းလှမ်းလာမှုအပေါ် တက်ရောက်မည် မတက်ရောက်မည်ကို ရက္ခိုင့်တပ်တော်(AA) အနေ နှင့် မြောက်ပိုင်းမဟာမိတ်အဖွဲ့(FPNCC)၏ ဆုံးဖြတ်ချက်အတိုင်း ဆုံးဖြတ်သွားရန် ရှိသော်လည်း တောင်းဆိုချက်များမှာ တူညီနိုင်မည် မဟုတ်ကြောင်း ဦးဖေသန်းက ပြောသည်။

ဦးဖေသန်းက “ကျနော်ထင်ပါတယ် အစည်းအဝေး တက်၊မတက်ကတော့ မဟာမိတ်အဖွဲ့တွေနဲ့ ဆုံးဖြတ်မယ်လို့ ပြောတယ်၊ ဒါပေမယ့် တောင်းဆိုချက်ကတော့ တူနိုင်မှာ မဟုတ်ဘူး၊ မဟာမိတ်အဖွဲ့တွေနဲ့ တလေသံတည်းတော့ ဖြစ်မှာမဟုတ်ဘူး၊ ဘာလို့လဲဆိုတော့ ကိုယ့်အခြေအနေနဲ့ ကိုယ်ပေါ့နော်၊ ဒါကတော့ ကိုယ့်ရပိုင်ခွင့် ကိုယ်တောင်းဆိုတဲ့ အခါမှာ မိမိဒေသရဲ့ ပထဝီနိုင်ငံရေးအပေါ်လည်း စကားပြောပါလိမ့်မယ်၊ နောက်ပြီးတော့ မိမိဒေသရဲ့ ပြည်သူလူထုထောက်ခံမှု၊ အဲဒါလည်း စကားပြောမှာပေါ့၊ မိမိအင်အားကလည်း စကားပြောမှာပေါ့၊ တောင်းဆိုချက်ကတော့ တစ်ဖွဲ့နဲ့တစ်ဖွဲ့ မတူနိုင်ဘူး၊ ဒါပေမယ့် အစည်းအဝေး တက်မတက်ကတော့ အကုန်လုံး ညှိနှိုင်းပြီး ဆုံးဖြတ်မယ်လို့ ပြောထားတာ ဖြစ်ပါတယ်”ဟု ပြောသည်။

ဗိုလ်ချုပ်မှူးကြီးမင်းအောင်လှိုင်က ၂၀၂၂ ခုနှစ်ကို ငြိမ်းချမ်းရေးနှစ်ဟု သတ်မှတ်ထားသည့်အတွက် တိုင်းရင်းသား လက်နက် ကိုင်အဖွဲ့ ခေါင်းဆောင်များအား တွေ့ဆုံ ဆွေးနွေးနိုင်ရေး ဖိတ်ခေါ်ပါကြောင်း၊ တွေ့ဆုံ ဆွေးနွေးမှုကို မိမိကိုယ်တိုင် တွေ့ဆုံ ဆွေးနွေးမည်ဖြစ်ကြောင်း၊ ငြိမ်းချမ်းရေး ဆွေးနွေးပွဲကို တက်ရောက်မည့် လူပုဂ္ဂိုလ်များ အနေဖြင့် မေလ ၉ ရက်တွင် နောက် ဆုံးထား စာရင်းပေးပို့ စေလိုပါကြောင်း ဧပြီလ ၂၂ ရက်နေ့က ပြောကြားခဲ့ခြင်းဖြစ်သည်။

CNI News

၂၀၂၂ ခုနှစ်၊ ဧပြီ ၂၅

သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီးအဖြစ် တာဝန်ယူခဲ့သူ သူရဦးအောင်ကိုအား ပြစ်ဒဏ် ၁၂ နှစ် ကျခံစေရန် ရန်ကုန်တိုင်းဒေသကြီးတရားလွှတ်တော်က အမိန့်ချခဲ့ရာ ၂၀၂၂ ခုနှစ်၊ မတ်လ ၁၄ ရက်တွင် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်မှ ပြစ်ဒဏ်ထက်ဝက် လွတ်ငြိမ်းခွင့်ပေးကြောင်း ထုတ်ပြန်ကြေညာခဲ့သည်။

အဆိုပါ ထုတ်ပြန် ကြေညာချက်ကို မြန်မာနိုင်ငံပြန်တမ်းမှာ တွေ့ရသည်။

ထိုထုတ်ပြန်ချက်တွင် နစကဥက္ကဋ္ဌသည် အင်းစိန်ဗဟိုအကျဉ်းထောင်တွင် အကျဉ်းကျခံနေရသည့် ဦးအောင်ကို(ဘ) ဦးဘဇံအား ရာဇဝတ်ကျင့်ထုံးဥပဒေပုဒ်မ ၄၀၁၊ ပုဒ်မခွဲ(၁)အရ ၎င်းကျခံရမည့် ပြစ်ဒဏ်များ၏ ထက်ဝက်ကာလအား လွတ် ငြိမ်းသက်သာခွင့်ပြုလိုက်သည်ဟု ဖော်ပြထားသည်။

ရန်ကုန်တိုင်းဒေသကြီးတရားလွှတ်တော်က ၂၀၂၂ ခုနှစ်၊ မတ်လ ၁၄ ရက်နေ့တွင် ပြည်ထောင်စုဝန်ကြီးဟောင်း သူရဦးအောင် ကိုအား ရာဇဝတ်ကြီးမှု အမှတ် ၅/၂၀၂၁၊ ၆/၂၀၂၁၊ ၇/၂၀၂၁ နှင့် ၃၂/၂၀၂၁ တို့အတွက် အလုပ်နှင့် ထောင်ဒဏ် ၃ နှစ်စီဖြင့် စုစု ပေါင်း အလုပ်နှင့်ထောင်ဒဏ် ၁၂ နှစ် ကျခံစေရန် အပါအဝင် Ford Everest Titanium မော်တော်ယာဉ် တစ်စီး၊ ငွေကျပ် သိန်း ၁၀၀ နှင့် ရွှေပန်းကန်ပြားတို့အား ပြည်သူ့ဘဏ္ဍာအဖြစ် သိမ်းဆည်းစေရန် အမိန့်ချမှတ်ခဲ့သည်။

သူရဦးအောင်ကိုသည် အမျိုးသားဒီမိုကရေစီအဖွဲ့ချုပ်(NLD) အစိုးရလက်ထက်တွင် သာသနာရေးနှင့်ယဉ်ကျေးမှုဝန်ကြီး ဌာန ပြည်ထောင်စုဝန်ကြီးအဖြစ် တာဝန်ထမ်းဆောင်ခဲ့သူဖြစ်သည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့ NLD အစိုးရ ဖြုတ်ချခံရပြီးနောက် ဖမ်းဆီးခံထားရသည်မှာ ယနေ့အထိ ဖြစ်သည်။

ဆက်စပ်သတင်း----https://cnimyanmar.com/index.php/political-2/politics-local/4935-2022-03-14-15-34-34

CNI News

၂၀၂၂ ခုနှစ်၊ ဧပြီ ၂၅

ပြိုင်ဘက်များ၏ တပ်တွင်းကိုဖြိုခွဲနိုင်မှ တော်လှန်ရေး အောင်မြင်မည်ဖြစ်ကြောင်း ရှမ်းပြည်တိုးတက်ရေးပါတီ (SSPP/SSA) မှ ပြောခွင့်ရပုဂ္ဂိုလ် ဗိုလ်မှူး စိုင်းဖုန်းဟန်က ပြောသည်။

၂၀၂၂ ခုနှစ်၊ ဧပြီ ၂၄ ရက်နေ့သည် SSPP တည်ထောင်ခြင်း ၅၈ နှစ်ပြည့်ဖြစ်ကာ ယင်းနေ့ ထုတ်ပြန်ချက်တွင် မိဘပြည်သူနှင့် တပ်မတော် စည်းလုံးညီညွတ်ရေး၊ တပ်မှူးတပ်သားများ စည်းလုံးညီညွတ်ရေး၊ ပြိုင်ဘက်များကို စည်းရုံးနိုင်ရေး စသည့် အောင်ပွဲခံနိုင်ရေးများကိုလည်း အစဉ်တစိုက် လုပ်ဆောင်ရမည်ဖြစ်ကြောင်း ဖော်ပြထားသည်။

ဗိုလ်မှူး စိုင်းဖုန်းဟန်က “ကျနော်တို့ တော်လှန်ရေးအောင်နိုင်ဖို့က ပါတီ၊ တပ်မတော်၊ တပ်ပေါင်းစု ရှိတယ်လေဗျာ၊ ဒီဟာက အဓိက အားဖြင့်တော့ Directions (လမ်းညွန်ချက်များ) ၃ လုံးပေါ့၊ ဒါလည်း လက်ကိုင်ထားပြီးမှ ကျနော်တို့ ပီပီပြင်ပြင် ကျင့် သုံးနိုင်မှ ဟိုဟာဖြစ်တယ်၊ နောက်တစ်ခုက ပြည်သူလူထုနဲ့ တော်လှန်ရေး အဖွဲ့အစည်း ကျနော်တို့ တပ်မတော်ပေါ့လေ၊ စည်း လုံး ညီညွတ်ဖို့လိုတယ်၊ နောက်ပြီးတော့ ကျနော်တို့ တပ်မှူး၊ တပ်သားတွေ စည်းလုံးဖို့လိုတယ်၊ ပြီးတော့ အဓိက အားဖြင့် တော့ ရန်သူရဲ့ တပ်တွင်း ဖြိုခွဲနိုင်ရေးပေါ့လေ၊ ဒါက အဓိကကျတယ်၊ ဒီဟာကို လုပ်နိုင်မှ ကျနော်တို့ တော်လှန်ရေးရဲ့ အဓိက ရည်မှန်းချက်ကို ကျနော်တို့ ရောက်နိုင်မှာ ဖြစ်တယ်၊ အဓိက ဒီဟာကို ဆိုလိုတာ ဖြစ်တယ်ဗျ၊ ဒါပေမဲ့ ကျနော်တို့က အမျိုးသား ညီညွတ်ရေးကို ရည်ညွန်းသောအားဖြင့် ရန်သူလို့ သုံးမယ်ဆို သိပ်အဆင်မပြေဘူးလေ၊ အဲဒါကြောင့်မို့ ကျနော်တို့က ပြိုင်ဘက် ကို စည်းရုံးနိုင်ဖို့က၊ ဖြိုခွဲစည်းရုံးနိုင်ဖို့က လိုတယ်ဆိုတဲ့ဟာ ကျနော်တို့ ရည်ညွန်းတာ ဖြစ်တယ်ဗျ”ဟု ပြောသည်။

SSPP ခေါင်းဆောင်များကိုတွေ့ရစဉ်

SSPP သည် ပြည်သူအတွင်းမှ ပေါက်ဖွားလာသည့် တပ်မတော် ဖြစ်သည့်အလျောက် ပြည်သူများ၏ အကျိုးစီးပွား ကာကွယ် ရန်နှင့် အလုပ်အကျွေးပြုရမည့် တာဝန်ရှိကြောင်း ဆိုသည်။

ရှမ်းပြည်ပြန်လည် ထူထောင်ရေးကောင်စီ (RCSS/SSA) မှ ဗိုလ်ကြီးအဆင့်ရှိသူ နှစ်ဦး SSPP ထံ လာရောက် ခိုလှုံခဲ့ကြောင်း သိရသည်။ ထို့အပြင် RCSS မှ တပ်ဖွဲ့ဝင် ၃၀၀ ကျော် SSPP ထံ လာရောက် ပူးပေါင်းခဲ့ကြောင်း သတင်းမီဒီယာများတွင် ရေးသားဖော်ပြခဲ့ကြသည်။

အဆိုပါ ကိစ္စနှင့် ပတ်သက်၍ SSPP မှ သွားရောက်စည်းရုံးခြင်း မဟုတ်ကြောင်း၊ ၎င်းတို့၏ သဘောထားအတိုင်း လာရောက် ပူးပေါင်းခြင်းဖြစ်ကြောင်း ဗိုလ်မှူးစိုင်းဖုန်းဟန်က ပြောသည်။

SSPP တပ်ဖွဲ့ကိုတွေ့ရစဉ်

ဗိုလ်မှူး စိုင်းဖုန်းဟန်က “လောလောဆယ်တော့ ကျနော်တို့ ထုတ်ပြန်ကြေညာချက် ထုတ်ပြန်ထားတဲ့ အတိုင်းပါပဲ၊ ဘယ်လို ပြောပြော တော်လှန်ရေး တစ်ရပ်အနေနဲ့ လုပ်ရမယ် ဆိုလို့ရှိရင်တော့ ဒီဟာတွေက အဓိက လိုအပ်ချက်တွေ ဖြစ်တယ်၊ ဒီဟာ ကို အကောင်အထည်ဖော်မှပဲ ကျနော်တို့ ရည်မှန်းထားတဲ့ ရည်မှန်းချက်ကို ရောက်နိုင်မှာ ဖြစ်တဲ့အတွက်မို့လို့ ကျနော်တို့ အကောင်အထည်ဖော်ဖို့ လိုပါတယ်၊ ပြီးတော့ ပိုပြီးတော့ ကျစ်လစ်အောင်လုပ်ဖို့ လိုပါတယ်ဆိုတဲ့ဟာလေ၊ ကျနော်တို့ ထုတ် ပြန် ကြေညာချက်ထားတဲ့အတိုင်း ရှင်းရှင်းလင်းလင်း၊ တိတိကျကျ ရှိပြီးသား ဖြစ်တယ်ဗျ” ဟု ပြောသည်။

မြန်မာနိုင်ငံ၏ ပထမဆုံးသမ္မတ ညောင်ရွှေစော်ဘွားကြီး စဝ်ရွှေသိုက်၏ မဟာဒေဝီ စဝ်မယ်နန်းဟိန်းခမ်းက ၁၉၆၄ ခုနှစ်၊ ဧပြီ ၂၄ ရက်တွင် ရှမ်းပြည်တပ်မတော်(SSA)ကို စတင် တည်ထောင်ခဲ့ပြီးနောက် ၁၉၇၁ ခုနှစ်၌ ရှမ်းပြည်တိုးတက်ရေးပါတီ (SSPP) အား တည်ထောင်ခဲ့သည်။

ထို့နောက် ၁၉၈၉ ခုနှစ်တွင် တပ်မတော်နှင့် ငြိမ်းချမ်းရေး ရယူခဲ့သလို ဦးသိန်းစိန်အစိုးရလက်ထက် ၂၀၁၂ ခုနှစ်၊ ဇန်နဝါရီ ၁ ရက်က ပြည်နယ်/ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးသဘောတူစာချုပ်(Bilateral) လက်မှတ်ရေး ထိုးထား သည်။

CNI News

၂၀၂၂ ခုနှစ်၊ ဧပြီ ၂၅

နစက၏ တိုင်းရင်းသား လက်နက်ကိုင်အဖွဲ့များကို ငြိမ်းချမ်းရေး ဆွေးနွေးရန် ကမ်းလှမ်းချက်တွင် အမျိုးသား ညီညွတ်ရေး အစိုးရ (NUG)၊ ပြည်သူ့ကာကွယ်ရေးတပ် (PDF) များ မပါဝင်သည့်အတွက် မအောင်မြင်နိုင်ဟု ကရင်နီအမျိုးသား တိုးတက် ရေးပါတီ(KNPP)မှ အတွင်းရေးမှူး (၁) ခူဒန်နီရယ်က CNI သတင်းဌာနသို့ ပြောသည်။

လက်ရှိ ဖြစ်ပွားနေသည့် တိုက်ပွဲများနှင့် ပဋိပက္ခများ ဖြေရှင်းနိုင်ရန် NUG၊ PDF များနှင့် ဆွေးနွေးမှသာ ငြိမ်းချမ်းရေး ရနိုင်မည် ဖြစ်ကြောင်း ၎င်းက ပြောသည်။

ခူဒန်နီရယ်က “PDF မကဘူးပေါ့၊ အခု NUG တို့က အဓိကဖြစ်နေတာက NUG နဲ့ ပေါ့နော်၊ အရင်တုန်းကတော့ NLD ပြောလို့ ရတယ်ပေါ့၊ NLD ကနေ CRPH ပြီးတော့ အခုက NUG ဖြစ်လာတော့ ဒါတွေ မပါဘဲနဲ့က မပြီးနိုင်ဘူး၊ လက်နက်ကိုင်တဲ့ အဖွဲ့ အစည်းတွေက အများကြီးရှိတယ်၊ တဖွဲ့ဖွဲ့ ကျန်နေလို့ ကတော့ ဖြစ်လာမှာ မဟုတ်ဘူး၊ အားလုံးကိုတော့ ခေါ်သင့်တယ် ပေါ့ လေ၊ တိုင်းရင်းသားတွေလည်း အားလုံးပါဝင်ရမယ်၊ ပြီးတော့ လက်နက်ကိုင်တဲ့ လူထုဘက်ကနေ တက်လာတဲ့ လက်နက်ကိုင် တွေ အားလုံးပါဝင်မှသာလျှင် ငြိမ်းချမ်းရေးဆိုတာ ဖြစ်လာနိုင်မယ်”ဟု ပြောသည်။

KNPP သည် ကယားပြည်နယ်နှင့် ရှမ်းပြည်နယ်တောင်ပိုင်း ဒေသတို့တွင် ကယားပြည်သူ့ ကာကွယ်ရေးတပ်များဖြင့် ပူးပေါင်း ၍ တပ်မတော်နှင့် တိုက်ပွဲများဖြစ်ပွားနေသော တိုင်းရင်းသားလက်နက်ကိုင်အဖွဲ့ ဖြစ်သည်။

ဖက်ဒရယ်စနစ်ကို အာမခံရေးအတွက်လည်း လူထုတစ်ရပ်လုံး ယုံကြည်ရမည့် နိုင်ငံရေးလမ်းကြောင်း တစ်ခုဖြစ်ရန် လိုအပ် ကြောင်း ခူဒန်နီရယ်က ပြောသည်။

၎င်းက “လောလောလတ်လတ်ကတော့ ဘယ်လိုမှ အယုံအကြည်မရှိဘူး၊ သူခေါ်မယ်ဆိုရင်လည်း တိုင်းရင်းသားတွေပဲ ခေါ်လို့ မရဘူး ပေါ့လေ၊ ပြည်မမှာ တိုက်ပွဲဝင်နေတဲ့ PDF တို့ လူထုတစ်ရပ်လုံး နောက်ပြီးမှ ပါတီနိုင်ငံရေးတွေကလည်း ပါတယ်၊ အဲဒါ တွေ အားလုံး နိုင်ငံရေးလမ်းကြောင်း တစ်ခုပေါ်မှာ သေချာခိုင်မာတဲ့ ကျောရိုးတစ်ခုပေါ်မှာ ရှိနေရမယ်၊ အဲဒါမှသာ ဖြစ်မယ် ပေါ့”ဟု ပြောသည်။

လက်ရှိတွင် NUG ၊ PDF များမှာ အကြမ်းဖက် အဖွဲ့အစည်းများအဖြစ် သတ်မှတ်ထားသည့်အတွက် နစကမှ တွေ့ဆုံဆွေးနွေး လိမ့်မည် မဟုတ်ကြောင်း သေနင်္ဂမဟာဗျူဟာလေ့လာရေးအဖွဲ့မှ အမှုဆောင်ဒါရိုက်တာ ဒေါက်တာနိုင်ဆွေဦးက ပြောသည်။

ဒေါက်တာနိုင်ဆွေဦးက “ကျနော်မြင်တာက ဒီအဖွဲ့အစည်းတွေသည် NUG ၊ CRPH တို့သည် မတရားအသင်း ကြေညာခံထားရ တဲ့ အဖွဲ့တွေ ဖြစ်တယ်ပေါ့၊ နောက်ပြီးတော့မှ သူ့ရဲ့ PDF အဖွဲ့တွေသည်လည်း အကြမ်းဖက် အဖွဲ့အစည်းအဖြစ် ကြေညာထား တာ၊ လက်ရှိသူတို့ လုပ်ဆောင်နေတဲ့ဟာ ကြည့်မယ်ဆိုရင်လည်း သာမန်ပြည်သူတွေ သူတို့က သတ်ဖြတ်နေတာတွေ မြင်ရတဲ့ အခါ အကြမ်းဖက် အဖွဲ့အစည်း ဖြစ်နေတယ်၊ ဒီလိုမျိုး အဖွဲ့အစည်းနဲ့ လက်တွေ့မှာ တွေ့ဆုံဖို့ ဆိုတာကတော့ မဖြစ်နိုင်ဘူးလို့ ကျနော်ကတော့ မြင်တယ်၊ အကြမ်းဖက် အဖွဲ့အစည်းနဲ့ တွေ့ဆုံမှု မရှိဘူးဆိုတာ မူဝါဒတွေ ရှိပြီးသားပဲ၊ ဆိုတော့ ဒါကြီးက လုံးဝ မဖြစ်နိုင်ဘူး”ဟု ပြောသည်။

ဗိုလ်ချုပ်မှူးကြီး မင်းအောင်လှိုင်က ၂၀၂၂ ခုနှစ်ကို ငြိမ်းချမ်းရေးနှစ်ဟု သတ်မှတ်ထားသည့်အတွက် တိုင်းရင်းသား လက်နက် ကိုင်အဖွဲ့ ခေါင်းဆောင်များအား တွေ့ဆုံ ဆွေးနွေးနိုင်ရေး ဖိတ်ခေါ်ပါကြောင်း၊ တွေ့ဆုံ ဆွေးနွေးမှုကို မိမိကိုယ်တိုင် တွေ့ဆုံ ဆွေးနွေးမည်ဖြစ်ကြောင်း၊ ငြိမ်းချမ်းရေး ဆွေးနွေးပွဲကို တက်ရောက်မည့် လူပုဂ္ဂိုလ်များ အနေဖြင့် မေလ ၉ ရက်တွင် နောက် ဆုံးထား စာရင်းပေးပို့ စေလိုပါကြောင်း ဧပြီလ ၂၂ ရက်နေ့က ပြောကြားခဲ့သည်။

အဆိုပါ နစက၏ ဖိတ်ခေါ်မှုမှာ တိုင်းရင်းသား လက်နက်ကိုင်အဖွဲ့များကိုသာဖြစ်ပြီး NUG နှင့် PDF များ မပါဝင်ကြောင်း ထုတ်ပြောထားသည်။

CNI News
၂၀၂၂ ခုနှစ်၊ ဧပြီ ၂၄

ရှမ်းပြည်တပ်မတော်(SSA)တည်ထောင်ခြင်း ၅၈ နှစ်မြောက် အခမ်းအနားကို ရှမ်းပြည်တိုးတက်ရေးပါတီ/ ရှမ်းပြည် တပ်မတော်(SSPP/SSA)၏ ဌာနချုပ် ဝမ်ဟိုင်းမှာ ယနေ့(ဧပြီ ၂၄ ရက်)နံနက်ပိုင်းက ကျင်းပခဲ့သည်။

ရှမ်းပြည်တပ်မတော်(SSA)ကို မြန်မာနိုင်ငံ၏ ပထမဆုံးသမ္မတ ညောင်ရွှေစော်ဘွားကြီး စဝ်ရွှေသိုက်၏ ဇနီး မဟာဒေဝီ ဦးဆောင်၍ ၁၉၆၄ ခုနှစ်၊ ဧပြီ ၂၄ ရက်တွင် ဖွဲ့စည်းထူထောင်ခဲ့သည်။

ထို့နောက် ရှမ်းပြည်တိုးတက်ရေးပါတီ(SSPP)ကို ၁၉၇၁ ခုနှစ်တွင် ဖွဲ့စည်းခဲ့ပြီးနောက် ၁၉၈၉ ခုနှစ်၊ စက်တင်ဘာလတွင် တပ်မတော်နှင့် အပစ်အခတ်ရပ်စဲရေး လုပ်ကာ ငြိမ်းချမ်းရေးယူခဲ့သည်။

၂၀၁၀ ခုနှစ်အရောက်မှာတော့ တပ်မတော်က SSPP/SSA ကို ပြည်သူ့စစ်အဖွဲ့(ပသစ) သို့မဟုတ် နယ်ခြားစောင့်တပ်ဖွဲ့(BGF) အသွင်ပြောင်းရန် ဖိအားပေးခဲ့ခြင်းကြောင့် SSPP/SSA ထဲက တပ်မဟာ ၃ နှင့် ၇ မှာ ခွဲထွက်၍ ပြည်သူ့စစ်အဖွဲ့ အသွင်ပြောင်းသွားခဲ့သည်။

သို့သော် တပ်မတော် ၁ မှ ဗိုလ်မှူးကြီး ပန်ဖဦးဆောင်သော အဖွဲ့က ပြည်သူ့စစ်အဖွဲ့ကို လက်မခံဘဲ တပ်တည်ဆောက်ရေးကို ပြန်လည် ဆောင်ရွက်ခဲ့ရာ လက်ရှိ အင်အား ၈၀၀၀ ကျော်အထိရှိလာခဲ့သည်။

ထို့နောက် ၂၀၁၂ ခုနှစ် သမ္မတ ဦးသိန်းစိန် လက်ထက်မှာတော့ ပြည်နယ်-ပြည်ထောင်စုအဆင့် ပဏာမ အပစ်အခတ်ရပ်စဲရေးစာချုပ်(Bilateral)ကို လက်မှတ်ရေးထိုးခဲ့သလို တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA) လက်မှတ်ထိုးနိုင်ရေးကိုလည်း ညှိနှိုင်းလျက်ရှိနေသည်။

CNI News

၂၀၂၂ ခုနှစ်၊ ဧပြီ ၂၄

မြဝတီ-ကော့ကရိတ် အာရှလမ်းမကြီးပေါ်တွင် သွားလာ ပြေးဆွဲနေသော ခရီးသည်တင် မော်တော်ယာဉ်များ၊ အရပ်သား ကားများ၊ ကုန်တင်မော်တော်ယာဉ်များအား အကြောင်းမဲ့နှောင့်ယှက်ပစ်ခတ်ခြင်း၊ မီးရှို့ဖျက်ဆီးခြင်းများ မပြုလုပ်ရန် KNLA တပ်မဟာ၊ တပ်ရင်းများသို့ KNLA စစ်ဦးစီးချုပ် ဗိုလ်ချုပ်ကြီး စောဂျော်နီက ညွှန်ကြားချက်ပေးပို့ခဲ့သည်။

အဆိုပါ ညွှန်ကြားချက်ကို KNLA စစ်ဦးစီးချုပ် ဗိုလ်ချုပ်ကြီးစောဂျော်နီမှ ဧပြီ ၂၃ ရက်နေ့က ပေးပို့ခဲ့ခြင်းဖြစ်ကြောင်း၊ KNU ကရင်အမျိုးသားအစည်းအရုံး ဗဟိုအလုပ်အမှု ဆောင်ကော်မတီ၏ ဆုံးဖြတ်ချက်အရ ပေးပို့ခြင်းဖြစ်ကြောင်း သိရသည်။

ထိုညွှန်ကြားချက်ကို သက်ဆိုင်ရာ မိမိတို့ တပ်မဟာ၊ တပ်ရင်းအတွင်းရှိ အောက်ခြေအဆင့်ရှိ တပ်မှူးတပ်သားများသို့ ထပ်မံညွှန်ကြားရန်နှင့် ဤညွှန်ကြားချက်အား လိုက်နာမှုမရှိပဲ ဖောက်ဖျက်ကျူးလွန်ပါက လိုအပ်သလို အရေးယူဆောင် ရွက်ခြင်း ခံရမည်ဟု ဖော်ပြထားသည်။

KNU မှ ခေါင်းဆောင်တစ်ဦးက “အဲဒါကတော့ တကယ် သူ့ရဲ့ ညွှန်ကြားချက် အစစ်အမှန်ပဲ၊ ပြီးတော့ နောက်တစ်ခုက အလုပ်အမှုဆောင် ကော်မတီ အစည်းအဝေးမှာ သူတို့ ဆုံးဖြတ်ချက်နဲ့အညီ စစ်ဦးစီးချုပ်က အောက်ခြေတပ်တွေကို ညွှန်ကြားလိုက်တဲ့စာပါပါတယ်။ အဲဒါကတော့ အမှန်အကန်ပဲ”ဟု CNI သို့ ပြောသည်။

ကရင်ပြည်နယ်၊ မြဝတီ-ကော့ကရိတ် အာရှလမ်းမကြီးပေါ်တွင် တပ်မတော်နှင့် KNLA ၊ PDF ပူးပေါင်းအဖွဲ့ တိုက်ပွဲများ ဖြစ်ပွားခဲ့ပြီး ခရီးသည်တင်ကားများ၊ အရပ်သားကားများ၊ ကုန်တင်မော်တော်ယာဉ်များ ပစ်ခတ်ခံရခြင်းကြောင့် သေဆုံး ခြင်း၊ မီးရှို့ခံရခြင်းများ ဖြစ်ပွားခဲ့သည်။

ထို့နောက် ထိုင်း-မြန်မာ ကုန်စည် စီးဆင်းမှုများ ရပ်တန့်သွားခဲ့သလို ခရီးသည်တင် မော်တော်ယာဉ်များ ပြေးဆွဲနိုင်ခြင်း လည်း မရှိဘဲဖြစ်ပေါ်ခဲ့သည်။

CNI News
၂၀၂၂ ခုနှစ်၊ ဧပြီ ၂၄

ကရင်ပြည်နယ် မြဝတီမြို့၊ မြန်မာ-ထိုင်း ချစ်ကြည်ရေးတံတား အမှတ် (၁)ထိပ်တွင် ဧပြီ ၂၃ ရက် ည ၁၀ နာရီက ပေါက်ကွဲမှုတစ်ခု ဖြစ်ပွားခဲ့ကြောင်း သိရသည်။

အဆိုပါ ပေါက်ကွဲမှုကြောင့် ကားနှင့် မော်တော်ဆိုင်ကယ်များ မီးလောင် ပျက်စီးခဲ့သလို အနီးအနားရှိ နေအိမ် တချို့၏ ပြတင်းပေါက်များ ကွဲခဲ့ကြောင်း၊ ပေါက်ကွဲမှုမှာ ပြင်းထန်ကြောင်း၊ လူထိခိုက်မှု ရှိ/မရှိကိုတော့ အတိ အကျ မသိရသေးကြောင်း သိရသည်။

လက်ရှိတွင် မီးသတ်တပ်ဖွဲ့က ပေါက်ကွဲမှုကို တည်ငြိမ်အောင် မီးများ ငြိမ်းသတ်လျက်ရှိသည်။

၂၀၂၂ ခုနှစ်၊ ဧပြီ ၂၃ ရက် မြန်မာ-ထိုင်း ချစ်ကြည်ရေးတံတား အမှတ်(၁)ထိပ် ပေါက်ကွဲမှုဖြစ်

၂၀၂၂ ခုနှစ်၊ ဧပြီ ၂၃ ရက် မြန်မာ-ထိုင်း ချစ်ကြည်ရေးတံတား အမှတ်(၁)ထိပ် ပေါက်ကွဲမှုဖြစ်

CNI News

၂၀၂၂ ခုနှစ်၊ ဧပြီ ၂၃

ရေစကြို-ချောင်းဦး ကားလမ်းမကြီးပေါ်မှာ ဖြတ်သန်းသွားလာသည့် ကားများကို ရေစကြိုပြည်သူ့ကာကွယ်ရေး တပ်ဖွဲ့က စစ်ဆေးလျက်ရှိကြောင်း ရေစကြိုပြည်သူ့ကာကွယ်ရေးတပ်ဖွဲ့မှ ယနေ့ (ဧပြီ ၂၃ ရက်)ထုတ်ပြန်ခဲ့ သည်။

ပြည်သူ့ကာကွယ်ရေးတပ်ဖွဲ့(ရေစကြိုမြို့နယ်)မှ ရေစကြိုမြို့နယ်တွင်း လမ်းမကြီးများအား လိုအပ်လျင် စစ်ဆေး မှုများ ပြုလုပ်သွားမည်ဖြစ်သောကြောင့် ခရီးသွားကားများအနေဖြင့် ပူးပေါင်းပါဝင်ပေးကြပါရန် မေတ္တာရပ်ခံ ကြောင်း ထုတ်ပြန် ပြောကြားခဲ့သည်။

ပြည်သူ့ကာကွယ်ရေးတပ်ဖွဲ့(ရေစကြိုမြို့နယ်)က ကားများကို စစ်ဆေးနေစဉ်

ထို့နောက် စစ်ရေးလိုအပ်ချက်၊ လုံခြုံရေးလိုအပ်ချက်များအရ ရေစကြိုမြို့နယ်တွင်း လမ်းများအား ပိတ်သွား မည်ဖြစ်ကြောင်း၊ ကြိုတင်သတင်းထုတ်ပြန်ပေးသွားမည်ဖြစ်ကြောင်း ပြည်သူ့ကာကွယ်ရေးတပ်ဖွဲ့(ရေစကြို) က ထုတ်ပြန်ချက်တွင် ဖော်ပြထားသည်။