CNI News

၂၀၂၃ ခုနှစ်၊ နိုဝင်ဘာ ၁၆

ကိုးကန့်ပြည်သူ့စစ်ခေါင်းဆောင်ဟောင်းလည်းဖြစ် ကိုးကန့်ကိုယ်ပိုင်အုပ်ချုပ်ခွင့်ရဒေသ ဦးစီးဥက္ကဋ္ဌဟောင်း လည်း ဖြစ်သူ ဦးပယ်စောက်ချိန်၏သား ပယ်ရင်ချန်ကို နစက-က ဖမ်းဝရမ်းထုတ်လိုက်သည်။

ပယ်ရင်ချန်သည် ရှမ်းပြည်နယ်၊ ကိုးကန့်ကိုယ်ပိုင်အုပ်ချုပ်ခွင့်ရဒေသအတွင်း အွန်လိုင်း လိမ်လည်မှုများ၊ ထိုအမှု များနှင့် ဆက်စပ် ကျူးလွန်သည့် လူကိုသွေးဆောင် ဆွဲခေါ်မှုများ၊ လူပြန်ပေးဆွဲမှုများ၊ တရားမဝင် ချုပ်နှောင်မှု များ၊ ခြောက်လှန့် တောင်းယူမှုများ ကျူးလွန်ခြင်း၊ ကျူးလွန်ရန် အားထုတ်ခြင်း၊ အားပေးကူညီခြင်းများကို ကျူးလွန်နေခြင်းကြောင့်ဟု နစက-က ထုတ်ပြန်ခဲ့သည်။

လက်ရှိတွင် ရှမ်းပြည်နယ်အတွင်းက မိုင်းလားဒေသ၊ ကိုးကန့်ဒေသ၊ “ဝ”ဒေသများတွင် အွန်လိုင်းလိမ်လည်မှု များနှင့် အွန်လိုင်းလောင်းကစားလုပ်ငန်းများကို နှိမ်နင်းလျက်ရှိနေသည်။

တရုတ်အစိုးရကလည်း ထိုအွန်လိုင်းလိမ်လည်မှုနှင့်အွန်လိုင်း လောင်းကစားလုပ်ငန်းများ လုပ်ကိုင်နေသူ များကို ဖမ်းဆီးပေးရန် နစက အပါအဝင် လက်နက်ကိုင်အဖွဲ့အစည်းများကို ဖိအားပေးလျက်ရှိသည်။

ထို့ကြောင့် “ဝ”ပြည်သွေးစည်းညီညွတ်ရေးတပ်မတော်(UWSA)မှ လူငယ် ခေါင်းဆောင်များ၊ ကိုးကန့်ဒေသမှ သူဋ္ဌေးကြီးများ၊ ကိုးကန့်ပြည်သူ့စစ်ခေါင်းဆောင်ဟောင်းများကိုပါ ဖမ်းဝရမ်းထုတ်ထားသည်။

CNI News

၂၀၂၃ ခုနှစ်၊ နိုဝင်ဘာ ၁၆

လက်ရှိ မြန်မာ့တပ်မတော်၏ စစ်ရေးမဟာဗျူဟာ အပြောင်းအလဲသည် မည်ကဲ့သို့ ပြောင်းလဲ လုပ်ဆောင်နေသလဲ ဆိုသည့်အပေါ် နိုင်ငံရေး၊ စစ်ရေးကျွမ်းကျင်သူများက သုံးသပ်လျက်ရှိနေသည်။

လက်ရှိ မြန်မာနိုင်ငံတွင် ဖြစ်ပွားနေသော တိုက်ပွဲများအတွင်း အင်အားနည်းသော ကင်းစခန်း၊ ရဲစခန်းများကို နယ်မြေခံ တပ်ရင်းများဖြင့် ပူးပေါင်းကာ တုန့်ပြန်တိုက်ခိုက်လျက် ရှိနေသည်။

တိုက်ပွဲဖြစ်ပွားလာပါက အင်အားနည်းသော စခန်းအချို့ကို စွန့်ခွာပြီး အင်အားများသည့်စခန်းသို့ ပူးပေါင်းခြင်းက လုပ်ဆောင်သင့်ကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြော သည်။

၎င်းက “ဟိုးတုန်းက အားလုံးက စခန်းတွေမှာ ဖြန့်ခွဲထိုင်တာပေါ့နော်၊ ဖြန့်ခွဲထိုင်တဲ့အခါကြတော့ စခန်းတစ်ခန်းက ဥပမာ ၁၀ ယောက်ထိုင်တယ်၊ အဲဒီ ၁၀ ယောက်မှာ ခွင့်သွားတာနဲ့ဘာနဲ့ ဘာလုပ်တယ်၊ ညာလုပ်တယ်ဆိုလို့ရှိရင် နည်းသွားတယ် ထားပါတော့ နည်းတဲ့အခါကြတော့ အခုတကယ်အရေးအကြောင်း ဖြစ်လာတဲ့အခါကြတော့ အဲဒါ မျိုးကို ကိုယ်ကကြိုပြီးတော့ ပြင်မထားဘူး။ မပြောင်းထားဘူးဆိုရင် စခန်းတစ်ခု စွန့်ခွာဖို့ဆိုရင်လည်း အမိန့် တောင်းရတာကိုး တချို့က မတောင်းချင်တဲ့ အခါကြရင်တော့ ဟိုတုန်းကတော့ အတိုက်ခံရတဲ့ ပြဿနာရှိတာပေါ့ နော်၊ ခွာလည်း မခွာဘူးဆိုတဲ့ အခါကြတော့ လူနည်းလေးနဲ့ ခံရတာပေါ့၊ အခုက အဲဒီလို မခံရအောင်ဆိုပြီးတော့ အင်အားများတဲ့ဘက်ကို စုလိုက်တာပေါ့နော်၊ ဒါကတော့ ခံစစ်ရှင် ခေါ်တာပေါ့၊ အဲဒါတော့ လုပ်သင့်လုပ်ထိုက်တဲ့ အပြုအမှုတစ်ခုပါ၊ လောက်ကိုင်ဘက်မှာ လက်နက်ချလိုက်ရတယ်ဆိုတာက ကလေးတွေဆိုတော့ မိသားစုတွေဆို တော့ ကျန်တဲ့ဖခင်လုပ်တဲ့ သူတွေက ဒါကတော့ အလျော့ပေးလိုက်တာပေါ့နော်၊ ဒီသဘောပါပဲ၊ ဒါကတော့ သိပ် တော့ ကြီးကြီးကျယ်ကျယ်တော့ မဟုတ်ပါဘူး” ဟု ပြောသည်။

MNDAA ထံ မြန်မာ့တပ်မတော်မှ တပ်ဖွဲ့၀င် တချို့ လက်နက်ချခဲ့စဉ်

ပြီးခဲ့သည့် နိုဝင်ဘာ ၁၂ ရက်နေ့က လောက်ကိုင်ရှိ တပ်ရင်းတစ်ခုဖြစ်သော ခမရ ၁၂၉ တပ်ရင်းတစ်ခုလုံးနှင့် တပ် မိသားစုဝင်များမှ ညီနောင်မဟာမိတ် ၃ ဖွဲ့ထံ အလင်းဝင်ခဲ့ကြောင်း သိရသည်။

အဆိုပါ တပ်ရင်းတစ်ခု လက်နက်ချခြင်းက အမှန်တကယ်ဖြစ်ကြောင်း၊ တပ်မိသားစုဝင်များ၏ အသက်အန္တရာယ် အရ လုပ်ဆောင်ခြင်းဖြစ်ကြောင်း မြန်မာ့နိုင်ငံရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြော သည်။

၎င်းက “အဲဒါက လက်နက်က အမှန်တကယ်ချတာ၊ ဟန်ဆောင်ချလို့ မရဘူး။ သူတို့ စစ်ကူမရဘူး။ (၁) က စစ်ကူ မရဘူး။ (၂) က ကတိမတည်ဘူး။ နောက်အချင်းချင်းတွေအပေါ်မှာ မယုံဘူးပေါ့ဗျာ၊ ချနင်းတယ်ပေါ့၊ အဲဒါတွေ တွေ့လာရတဲ့အခါမှာ သူအသက် အသေမခံနိုင်တော့ဘူးလေ၊ ပြီးတော့ မိသားစုတွေ မိသားစုတွေ အသက်တွေ ရှိတယ်လေ၊ အဲဒါတွေခင်ဗျ” ဟု ပြောသည်။

ပြီးခဲ့သည့် နိုဝင်ဘာ ၁၄ ရက်က အိန္ဒိယ-မြန်မာနယ်စပ် ချင်းပြည်နယ်၊ ဖလမ်းမြို့နယ်၊ ရိဒ်ခေါဒါရ်မြို့ကို တော်လှန်ရေး အင်အားစုများက သိမ်းပိုက်ခဲ့ကြောင်း ထို့နောက် လုံခြုံရေးတပ်ဖွဲ့ဝင်များမှာ အိန္ဒိယနိုင်ငံအတွင်း သွားရောက်ခိုလှုံမှုများ ရှိခဲ့သည်။

မြန်မာ့တပ်မတော်က တိုက်လေယာဉ်များကို တွေ့ရစဉ်

ထို့အတူ ကယားပြည်နယ်၊ လွိုင်ကော်မြို့တိုက်ပွဲအတွင်း လုံခြုံရေးတပ်ဖွဲ့ဝင် ၃၂ ဦး လက်နက်ချ အလင်းဝင်ခဲ့ ကြောင်း  ကရင်နီအမျိုးသားများ ကာကွယ်ရေးတပ် (KNDF) က နိုဝင်ဘာ ၁၅ ရက်မှာ သတင်းထုတ်ပြန်ခဲ့သည်။

လက်ရှိတွင် မြန်မာ့တပ်မတော်နှင့် တိုင်းရင်းသားလက်နက်ကိုင် အဖွဲ့အစည်းအချို့၊ တော်လှန်ရေး အင်အားစုများ နှင့် ကရင်ပြည်နယ်၊ ကယားပြည်နယ်၊ ချင်းပြည်နယ်၊ ရှမ်းပြည်နယ် (မြောက်ပိုင်း)၊ ရခိုင်ပြည်နယ်၊ စစ်ကိုင်းတိုင်း ဒေသကြီးနှင့် မကွေးတိုင်းဒေသကြီးတို့တွင် တိုက်ပွဲများ ဖြစ်ပွားလျက်ရှိနေသည်။

အဆိုပါ တိုက်ပွဲများ ဖြစ်ပွားနေခြင်းနှင့်အတူ မြန်မာ့တပ်မတော်သည် စစ်ရေး မဟာဗျူဟာ အပြောင်းအလဲများ မကြာခင် ပြုလုပ်လာနိုင်ကြောင်း၊ စစ်ရေး မဟာဗျူဟာ မပြောင်းလဲပါက မြန်မာ့တပ်မတော် အနေဖြင့် စစ်ရေးနှင့် နိုင်ငံရေး အကျပ်အတည်းကို ပိုမို ရင်ဆိုင်ရနိုင်သည်ဟု စစ်ရေးကျွမ်းကျင်သူများက ပြောကြသည်။

CNI News

၂၀၂၃ ခုနှစ်၊ နိုဝင်ဘာ ၁၅

အွန်လိုင်း ငွေကြေး လိမ်လည်မှုနှင့် အွန်လိုင်းလောင်းကစား လုပ်ငန်းများ လုပ်ကိုင်နေသော တရုတ်နိုင်ငံမှ အလိုရှိနေသူ ကိုးကန့်သူဋ္ဌေး မိသားစုအား နစက-က နိုဝင်ဘာ ၁၅ ရက်နေ့မှာ ဖမ်းဝရမ်းထုတ်လာခဲ့သည်။

နစက-က ဖမ်းဝရမ်းထုတ်လိုက်သူများမှာ မြီရှောက်ချန်း(Ming Xuechang)၊ မြီကော်ဖျင်း(Ming Guoping) ခေါ် မြီရှောက်ဖျင်း(Ming Xiaoping)၊ မြီကျွီလန်(Ming Julan)၊ မြီကျိန်းကျိန်း(Ming Zhenzhen)တို့ ဖြစ်သည်။

၎င်းတို့ လေးဦးသည် ရှမ်းပြည်နယ်၊ ကိုးကန့်ကိုယ်ပိုင်အုပ်ချုပ်ခွင့်ရဒေသအတွင်း အွန်လိုင်း လိမ်လည်သူများ၊ လူကို သွေးဆောင်ဆွဲခေါ်မှုများ၊ လူပြန်ပေးဆွဲမှုများ၊ တရားမဝင် ချုပ်နှောင်မှုများ၊ ခြောက်လှန့်တောင်းယူမှုများ ကို ဂိုဏ်းဖွဲ့ကျူးလွန်ခြင်း၊ ကျူးလွန်ရန် အားထုတ်ခြင်း၊ အားပေးကူညီခြင်းများ ကျူးလွန်လျက်ရှိသည်ဟု နစက ၏ ထုတ်ပြန်ချက်တွင် ဖော်ပြထားသည်။

အဆိုပါ ကိုးကန့်သူဋ္ဌေး မိသားစုကို တရုတ်အစိုးရ ဖမ်းဝရမ်း ထုတ်ထားသည်။ ထို့နောက် နစက-ကလည်း ထပ်ဆင့် ဖမ်းဝရမ်း ထုတ်လာခြင်း ဖြစ်သည်။

မြီကော်ဖျင်းသည် မြီရှောက်ချန်း၏ သားဖြစ်ပြီး မြီကျွီလန်မှာ သမီးဖြစ်ကာ မြီကျိန်းကျိန်းသည် မြေးဖြစ်သည်။

CNI News

၂၀၂၃ ခုနှစ်၊ နိုဝင်ဘာ ၁၅

ရှမ်းပြည်နယ်မြောက်ပိုင်းအတွင်းမှာ မြန်မာ့တပ်မတော် စစ်စခန်းများအား တိုက်ခိုက်နေသော ညီနောင်မဟာ မိတ် ၃ ဖွဲ့ (MNDAA-AA-TNLA)တို့ကို ဆန့်ကျင်ပြီး မြန်မာ့တပ်မတော်အား ထောက်ခံကြောင်း ဧရာဝတီတိုင်း ဒေသကြီးအတွင်းမှာ ယနေ့ (နိုဝင်ဘာ ၁၅ ရက်)က ဆန္ဒထုတ်ဖော်ခဲ့ကြသည်။

အဆိုပါ တပ်မတော် ထောက်ခံခြင်းနှင့် မြောက်ပိုင်းမဟာမိတ်သုံးဖွဲ့အား ဆန့်ကျင်သည့် ဆန္ဒထုတ်ဖော်ပွဲကို မည်သည့် အဖွဲ့အစည်း သို့မဟုတ် လူပုဂ္ဂိုလ်များက ဦးဆောင်သည်ကိုတော့ မသိရပေ။

မြောက်ပိုင်းမဟာမိတ်သုံးဖွဲ့သည် ရှမ်းပြည်နယ်မြောက်ပိုင်းမှာ အောက်တိုဘာ ၂၇ ရက်နေ့က ၁၀၂၇ စစ်ဆင် ရေးကို ဖော်ဆောင်၍ မြို့သိမ်းတိုက်ပွဲများ လုပ်နေသည်။

CNI News

၂၀၂၃ ခုနှစ်၊ နိုဝင်ဘာ ၁၅

ရခိုင်ပြည်နယ်မှာ မြန်မာ့တပ်မတော်နှင့် ရက္ခိုင့်တပ်တော် (ULA/AA) တို့ကြား တိုက်ပွဲမှာ ကြာရှည်ဖြစ်ပွားလာနိုင် ကြောင်း စည်းလုံးညီညွတ်သော တိုင်းရင်းသားလူမျိုးများ မဟာမိတ် (UNA) မှ ပြောရေးဆိုခွင့်ရှိသူ ဦးမျိုးကျော်က CNI သတင်းဌာနသို့ ပြောသည်။

ပြီးခဲ့သည့် ၂၀၂၂ ခုနှစ်၊ နိုဝင်ဘာလအတွင်းက နှစ်ဖက်တိုက်ပွဲအတွင်း ဂျပန်အထူးကိုယ်စားလှယ် မစ္စတာဆာဆာ ကာဝါ၏ ကြားဝင်စေ့စပ်မှုကြောင့် နှစ်ဦးသဘောတူ ရပ်တန့်ခဲ့ကြောင်း၊ သို့သော်လည်း လက်ရှိ အနေအထားအရ ရပ်တန့်မည့် အနေအထား မတွေ့ရကြောင်း ၎င်းက ပြောသည်။

ဦးမျိုးကျော်က “အခုက အဲဒီလိုမျိုး စေ့စပ်ရင်တောင်မှ ကျနော်ထင်တယ် မဖြစ်နိုင်တော့ဘူးလို့ မှန်းတယ်၊ ဘာဖြစ်လို့လဲဆိုတော့ အခုစစ်ဖြစ်တာက ရခိုင်တစ်ခုတည်း မဟုတ်ဘူးလေ၊ နိုင်ငံအနှံ့မှာကိုကနေပြီးတော့ ဖြစ်နေ တဲ့ ဟာမျိုးလေ၊ ဒီတော့ ပြီးခဲ့တဲ့နှစ်က ဖြစ်တယ်ဆိုတဲ့ဟာက ရခိုင်မှာပဲ အဓိက တည်ပြီးဖြစ်တဲ့ ဟာမျိုးဆိုတဲ့ အခါ တော့ ပုံစံက တစ်မျိုးလေ၊ ကျန်တဲ့နေရာတွေမှာက ဖြစ်တယ်၊ တိုက်ပွဲလေးတွေ ကြိုးကြားကြိုးကြားလောက်ပဲရှိ တယ်၊ အခုက နိုင်ငံအနှံ့မှာကိုက အပြင်းအထန်ကို ဖြစ်နေတယ်၊ အခုဆိုရင် ကျနော်တို့ ကြားနေရတာပေါ့နော်၊ ဥပမာ ကယားပြည်နယ်၊ လွိုင်ကော်လို ကရင်နီဒေသမှာဆို လွိုင်ကော်လို မြို့တော်အထိ တက်သိမ်းတယ်ဆိုတဲ့ အနေအထားတွေ ဖြစ်တယ်၊ နောက်ပြီးတော့ ရှမ်းမြောက်ကနေပြီးတော့ စစ်ကိုင်းတိုင်း မြောက်ပိုင်း၊ ချင်းပြည်နယ်၊ ရခိုင်ပြည်နယ်ဆိုတဲ့ဟာမျိုးပေါ့၊ ရခိုင်ပြည်ဆိုတဲ့ဟာမျိုးတွေအထိ အကုန်လုံးက ဆက်စပ်နေတဲ့အခါမျိုးမှာ ဒါက တော့ တစ်နိုင်ငံလုံး အပစ်ရပ်ပြီးတော့ မအလကိုယ်တိုင် လက်နက်ချရင်တော့ တမျိုးပေါ့ဗျာ” ဟု ပြောသည်။

မြန်မာ့တပ်မတော်ကို တွေ့ရစဉ်

ပြီးခဲ့သည့် နိုဝင်ဘာ ၁၃ ရက်နေ့က စတင်ပြီး ရခိုင်ပြည်နယ်အတွင်းက ရသေ့တောင်၊ ကျောက်တော်နှင့် မင်းပြား မြို့နယ်ရှိ ရဲစခန်း၊ နယ်ခြားစောင့်တပ်စခန်းများကို AA ဘက်က တိုက်ခိုက်ခဲ့ပြီးနောက် နှစ်ဖက်တိုက်ပွဲများ ပြန်လည် ဖြစ်ပွားခဲ့သည်။

ရခိုင်ပြည်နယ်အတွင်းရှိ အင်အားနည်း ရဲစခန်းများကို လာရောက်တိုက်ခိုက်မှုများရှိနေကြောင်း၊ မိမိတို့ အနေဖြင့် လည်း စစ်နည်းဗျူဟာအရ ရဲတပ်ဖွဲ့စခန်းများကို ပေါင်းစည်းမှုများ ပြုလုပ်နေကြောင်း နစက သတင်းထုတ်ပြန်ရေး အဖွဲ့ခေါင်းဆောင် ဗိုလ်ချုပ်ဇော်မင်းထွန်းက ထုတ်ပြန်ပြောကြားထားသည်။

၎င်းက “ရခိုင်ပြည်နယ်ဖက်မှာတော့ ပလက်ဝရဲ့ မြောက်ဖက် နှုံးဘူးကို မနက် ၁၁ နာရီ ၄၅ လောက်မှာ လာရောက် တိုက်ခိုက်ခဲ့တာ ရှိတယ်၊ ပြီးရင် ရန်သူအနေနဲ့ အကျအဆုံးများစွာနဲ့ ပြန်လည်ဆုတ်ခွာ သွားတာမျိုး ရှိတယ်၊ တချို့ သော ရခိုင်ပြည်နယ်ထဲက အင်အားနည်းတဲ့ ရဲတပ်ဖွဲ့ လုံခြုံရေး ယူနေတဲ့ စခန်းတွေကို ပြန်ပြီးတော့ ပေါင်းထား တာရှိတယ်၊ ဒါတွေကိုလည်း သူတို့အနေနဲ့ တိုက်ခိုက်သိမ်းပိုက် ရမိပြီဆိုပြီးတော့ ဝါဒဖြန့်တာတွေ ရှိတယ်၊ ကျနော် တို့ အနေနဲ့ကတော့ အင်အားနည်း စခန်းလေးများကို စစ်နည်းဗျူဟာအရ ပြန်လည်ပေါင်းစည်းမှု လုပ်နေတာ ရှိတယ်” ဟု ပြောသည်။

ပြီးခဲ့သည့် ၂၀၂၂ ခုနှစ်၊ နိုဝင်ဘာ ၂၆ ရက်နေ့က မြန်မာ့တပ်မတော်နှင့် AA တို့သည် ရခိုင်လူထု၏ ဆုံးရှုံးနစ်နာမှုကို ထောက်ထားပြီး နှစ်ဖက်အဖွဲ့အစည်းကြား သဘောတူညီမှုယူကာ အပစ်ရပ်စဲခဲ့သည်။

မြန်မာ့တပ်မတော်ရဲ့ တိုက်လေယာဉ်အုပ်စုကိုတွေ့ရစဉ်

လက်ရှိ အနေအထားအရ နှစ်ဖက်အဖွဲ့အစည်းအနေဖြင့် ငြိမ်းချမ်းရေး ဆွေးနွေးမည် မဟုတ်ကြောင်း မြန်မာ့နိုင်ငံ ရေး လေ့လာသုံးသပ်သူ ဦးကြီးမြင့်က CNI သတင်းဌာနသို့ ပြောသည်။

၎င်းက “ပြောလို့တော့ မရဘူးဗျ၊ ပြောလို့တော့ မရဘူးဆိုတာ တိုက်ပွဲက နိုင်နိုင်တဲ့သူက အပေါ်စီးပြောတာပဲ၊ ရှုံးမယ့်သူက သိပ်အခြေအနေ မကောင်းမယ့်သူက ငြိမ်းချမ်းရေး ကမ်းလှမ်းတာပဲ နှစ်ဖက်စလုံးက အားနည်းနေ ပြီဆိုရင် ငြိမ်းချမ်းရေး ပြန်လက်ခံကြတာပဲ၊ အဲဒီတော့ အခုချိန်မှာတော့ ကျနော်ထင်တယ် AA ကလည်း အရှိန်ရှိ နေပြီဆိုတော့ အဲဒီအရှိန်နဲ့ သွားနေလိမ့်ဦးမယ်ထင်တယ်လေ” ဟု ပြောသည်။

လက်ရှိတွင် ရခိုင်ပြည်နယ်အတွင်းရှိ ရသေ့တောင်၊ ကျောက်တော်၊ မင်းပြား၊ မြောက်ဦး၊ မောင်တောမြို့နယ် အပါအဝင် ချင်းပြည်နယ် ပလက်ဝမြို့နယ်အတွင်း မြန်မာ့တပ်မတော်နှင့် ရက္ခိုင့်တပ်တော် (AA) တို့ အကြား တိုက်ပွဲများ ဖြစ်ပွားလျက်ရှိနေသည်။

တခြားတစ်ဖက်မှာလည်း စစ်ကိုင်းတိုင်းဒေသကြီးနှင့် ရှမ်းပြည်နယ်မြောက်ပိုင်းတွင် AA သည် တခြားသော လက်နက်ကိုင်အဖွဲ့များဖြင့် ပူးပေါင်း၍ မြန်မာ့တပ်မတော်ကို တိုက်ခိုက်လျက်ရှိနေသည်။

CNI News

၂၀၂၃ ခုနှစ်၊ နိုဝင်ဘာ ၁၅

ကော်သူလေးအစိုးရ (ကရင်ပြည်နယ်အစိုးရ)ဖွဲ့စည်းကြောင်း စာတစ်စောင် တော်လှန်ရေး အင်အားစုများကြား ထွက်ပေါ် လျက်ရှိသည်။

အဆိုပါ ကော်သူလေးအစိုးရ ဖွဲ့စည်းကြောင်း စာတွင် ကော်သူလေးအစိုးရအဖွဲ့တွင် သမ္မတအဖြစ် စောနယ်ဒါးဘိုမြ၊ ဒုသမ္မတများအဖြစ် စောဘဝါးနှင့် စောဆာဂေးဖိုးတို့ဖြစ်သည်။

စောနယ်ဒါးဘိုမြဆိုသူမှာ ကရင်အမျိုးသားအစည်းအရုံး(KNU) လက်အောက်ရှိ ကရင်အမျိုးသားကာကွယ်ရေးတပ်ဖွဲ့(KNDO)၏ စစ်ဦးစီးချုပ် အဖြစ် ထုတ်ပယ်ခံရပြီးနောက် ခွဲထွက်၍ ကော်သူလေးတပ်မတော်(KTLA)ကို ဖွဲ့စည်းကာ မြန်မာ့တပ်မတော်ကို တိုက်ခိုက်လျက်ရှိသူဖြစ်သည်။

CNI News

၂၀၂၃ ခုနှစ်၊ နိုဝင်ဘာ ၁၄

ရခိုင်ပြည်နယ်၊ မင်းပြားမြို့နယ်အတွင်းမှာ ဖြစ်ပွားခဲ့သော တိုက်ပွဲ ၂ ပွဲတွင် စစ်တွေအခြေစိုက် ခမရ(၃၄၄) တပ်ရင်းမှ ဒုတပ်ရင်းမှူး ဗိုလ်မှူးသန့်ဇင်ထွန်း အပါအဝင် စစ်သည် ၁၀ ဦးကို ဖမ်းဆီးရမိခဲ့သည်ဟု ရက္ခိုင့်တပ် တော်(AA)က နိုဝင်ဘာ ၁၄ ရက်တွင် သတင်းထုတ်ပြန်ခဲ့သည်။

ရခိုင်ပြည်နယ်အတွင်းက ရသေ့တောင်၊ မောင်တော၊ မင်းပြားမြို့နယ်တို့တွင် မြန်မာ့တပ်မတော်နှင့် AA ကြား နိုဝင်ဘာ ၁၃ ရက်နေ့က  နေရာ ၅ နေရာမှာ တိုက်ပွဲဖြစ်ပွားခဲ့သည်။

အဆိုပါ တိုက်ပွဲများအနက် မင်းပြားမြို့နယ်အတွင်း ဖြစ်ပွားခဲ့သော တိုက်ပွဲတွင် ခမရ ၃၄၄ တပ်ရင်းမှ ဒုတပ်ရင်း မှူး ဗိုလ်မှူး သန့်ဇင်ထွန်း၊ ဗိုလ်ကြီး ဖြိုးဇေယျာလှိုင် တို့အပါအဝင် ၁၀ ဦးကို ဖမ်းဆီးရမိခဲ့ခြင်းဖြစ်သည်ဟု AA ၏ ထုတ်ပြန်ချက်တွင် ဖော်ပြထားသည်။

ဖမ်းခံထားရသော အပေါက်ဝ ရဲစခန်းမှ ရဲတပ်ဖွဲ့ကိုတွေ့ရစဉ်

ထို့နောက် အပေါက်ဝမြို့နယ်ရှိ “အပေါက်ဝ ရဲစခန်း”မှ ရဲတပ်ဖွဲ့ဝင် ၂၂ ဦးသည် AA ထံ လက်နက်များနှင့်အတူ အဖမ်းခံခဲ့ရကြောင်း သိရသည်။

နိုဝင်ဘာ ၁၃ ရက်နေ့က ရခိုင်ပြည်နယ်အတွင်းရှိ လုံခြုံရေး ဆောင်ရွက်နေသော လုံခြုံရေးတပ်ဖွဲ့ တချို့သည် နယ်ခြားစောင့်တပ်၊ ရဲစခန်း စုစုပေါင်း စခန်းပေါင်း ၄၀ နီးပါးကို စွန့်လွှတ်ခဲ့ပြီး နီးစပ်ရာ တပ်မတော် စစ်စခန်းများ သို့ သွားရောက် ပူးပေါင်းခဲ့ကြကြောင်း သိရသည်။

CNI News

၂၀၂၃ ခုနှစ်၊ နိုဝင်ဘာ ၁၄

ကယားပြည်နယ်၊ လွိုင်ကော်မြို့နယ်မှာ ကရင်နီအမျိုးသားကာကွယ်ရေးတပ်ဖွဲ့(KNDF)၏  မြို့သိမ်းတိုက်ပွဲ စတင်ပြီးနောက် လူထုအများစု ပိတ်မိနေကြောင်း လွိုင်ကော်မြို့ခံတစ်ဦးက CNI သတင်းဌာနသို့ ပြောသည်။

ပြီးခဲ့သည့် နိုဝင်ဘာ ၁၁ ရက်နေ့က စတင်ခဲ့သော ထိုတိုက်ပွဲမှာ လက်ရှိအချိန်ထိ ပြင်းထန်နေကြောင်း၊ လက်နက် ကြီး၊ လေကြောင်းပစ်ခတ်မှုများ ရှိနေကြောင်း ၎င်းက ပြောသည်။

လွိုင်ကော်မြို့ခံတစ်ဦးက “စစ်ပွဲကတော့ စဖြစ်နေတာ ၂ ရက်၊ ၃ ရက်လောက်ရှိပြီပေါ့။ နေ့မနား၊ ညမနားပဲ၊ လက်နက်ကြီး လက်နက်ငယ်တွေရော၊ ပစ်နေတာ အခုထိပဲဗျ။ ကျနော်တို့ ထွက်ဖို့လမ်းကလည်း မလွယ်ဘူး။ ထွက်ပေါက် ပိတ်နေကြတယ်ဗျ။ ထွက်ပေါက် ပိတ်နေတယ်ဆိုတာက ထွက်မယ့် လမ်းမှာလည်း တိုက်ပွဲဖြစ်နေ တာဆိုတော့ မြို့ခံလူထုအတွက်ကတော့ တောင်ဖက်ပြေး၊ မြောက်ဖက်ပြေး၊ အရှေ့ဖက်ပြေး၊ အနောက်ဖက်ပြေး အဲဒီလိုပဲ ပတ်ပြေးပြီးတော့ ဟိုဖက်ရှောင်၊ ဒီဖက်ရှောင် နေနေရတယ်ဗျ” ဟု CNI သတင်းဌာနသို့ ပြောသည်။

KNDF ဥက္ကဋ္ဌ ခွန်းဘီထူးက လက်ရှိ အခြေအနေမှာ တစ်နိုင်ငံလုံးက ဖက်ဒရယ်ဒီမိုကရေစီအရေးအတွက် တိုက်ပွဲများ ဆင်နွှဲတိုက်ခိုက်နေကြကြောင်း၊  ကရင်နီပြည်မှာ အာဏာရှင်ဖြုတ်ချရေးနှင့် ကိုယ်ပိုင်ပြဋ္ဌာန်းခွင့် တည်ဆောက်ရေး ဖော်ဆောင်နိုင်ရန်အတွက် လွိုင်ကော်မြို့က နစကအုပ်ချုပ်ရေးကို ဖြိုချရမည်ဖြစ်ကြောင်း နိုဝင်ဘာ ၁၃ ရက်က ပြောကြားထားသည်။

လွိုင်ကော်မြို့ အ၀င်ကိုတွေ့ရစဉ်

ထို့အတူ ယခုကဲ့သို့ မြို့သိမ်းတိုက်ပွဲများမှာ ပျက်စီးနစ်နာမှု များနိုင်သည်ဆိုသည်ကို သိထားသော်လည်း အာဏာရှင်စနစ် အမြစ်တွယ်မှာကို ပိုကြောက်မိသည့်အတွက် ယခုကဲ့သို့ စစ်ဆင်ရေးကို အားလုံးက ချမှတ် လိုက်ခြင်းဖြစ်ကြောင်း၊ ပြည်သူပြည်သားများအနေဖြင့် ဘေးကင်းလွတ်ရာများကို ယာယီရွှေ့နေပေးကြရန်လည်း တောင်းဆိုကြောင်း ပြောကြားထားသည်။

ကုန်စည်စီးဆင်းမှုများ မရှိတော့သည့်အတွက် စားသောက်ကုန်များ နည်းပါးနေပြီဖြစ်ပြီး၊ အရပ်သား ထိခိုက် သေဆုံးမှုများလည်းရှိနေကြောင်း လွိုင်ကော်မြို့ခံ တစ်ဦးက ပြောသည်။

၎င်းက “ထိခိုက်သေဆုံးတာတော့ သတင်းကတော့ အတိအကျတော့ မကြားဘူး။ ဟိုစပ်စပ်၊ ဒီစပ်စပ်တော့ ကောလာဟလလား၊ ဘာလားတော့ မသိဘူး။ အတိအကျတော့ မပြောတတ်ဘူး။ လေယာဉ်ကတော့ မနေ့ ညလည်း ပစ်တယ်၊ ဒီမနက် အစောကြီးကလည်း ၆ နာရီလောက်ကတည်းက လေယာဉ်ဝဲနေပြီ အခုလည်း ဗုံးကြဲနေပြီဗျ” ဟု CNI သတင်းဌာနသို့ ပြောသည်။

စစ်ဆင်ရေး စတင်ခဲ့သော နိုဝင်ဘာ ၁၁ ရက်နေ့မှ ၁၃ ရက်နေ့အထိ ဖယ်ခုံမြို့နယ်၊ မိုးဗြဲနှင့် လွိုင်ကော်မြို့များတွင် လက်နက်ကြီးထိ၍ သေဆုံးသူ (၂၀)ဦး ရှိခဲ့သည်။

ထိုသေဆုံးမှုထဲတွင် အမျိုးသမီး ၄ ဦး၊ အမျိုးသား (၁၃)ဦး ပါဝင်ပြီး ကျန် (၃)ဦးမှာ အတိအကျ မသိရသေးကြောင်း ကရင်နီလူ့အခွင့်အရေးအဖွဲ့က ယနေ့ (နိုဝင်ဘာ ၁၄ ရက်) မှာ ထုတ်ပြန်ခဲ့သည်။

လက်ရှိတွင် လွိုင်ကော်မြို့အထွက် လမ်းများဖြစ်သော လွိုင်ကော် - ဖယ်ခုံလမ်း ၊ လွိုင်ကော် - ဆီဆိုင်လမ်း၊ လွိုင်ကော် - ဒီးမော့ဆို လမ်းများကိုလည်း လတ်တလော အသုံးမပြုသေးကြရန် တော်လှန်ရေးတပ်ဖွဲ့များက အသိပေးထားသလို တိုက်ပွဲကြောင့် လွိုင်ကော်မြို့တွင် လေကြောင်း ခရီးစဉ်များလည်း ရပ်တန့်ထားကြောင်း သိရသည်။

CNI News

၂၀၂၃ ခုနှစ်၊ နိုဝင်ဘာ ၁၄

စစ်ကိုင်းတိုင်းဒေသကြီးအထက်ပိုင်း၊ ဗန်းမောက်မြို့ကို ကချင်လွတ်လပ်ရေးတပ်မတော်(KIA)၊ ဗန်းမောက် PDF တို့ ပူးပေါင်း၍ ယနေ့ (နိုဝင်ဘာ ၁၄ ရက်)နံနက်ပိုင်းမှ စတင်ကာ တိုက်ခိုက်လျက်ရှိသည်။

KIA-PDF ပူးပေါင်းတပ်ဖွဲ့သည် ဗန်းမောက်မြို့ သိမ်းပိုက်နိုင်ရေးအတွက် တိုက်ခိုက်လာခြင်းကြောင့် ရှမ်းနီအမျိုး သားများတပ်မတော်(SNA)နှင့် တိုက်ပွဲများ ဖြစ်ပွားနေသည်။

ဗန်းမောက်မြို့ လုံခြုံရေးအတွက် ဆောင်ရွက်နေသော SNA တပ်ဖွဲ့ကို KIA-PDF ပူးပေါင်းတပ်ဖွဲ့က အင်အား ၂၀၀ ကျော်ဖြင့် ဗန်းမောက်မြို့ အနောက်မြောက်ဘက်မှ စစ်ကြောင်း တစ်ကြောင်း၊ ဗန်းမောက်မြို့ တောင်ပိုင်း မြစ်သေးချင်းရွာဘက်မှ စစ်ကြောင်း တစ်ကြောင်း၊ ဗန်းမောက်အရှေ့မြောက် ကိုင်းကြီးတုံးလှော်ဘက်မှ စစ် ကြောင်း တစ်ကြောင်း စသည့် စစ်ကြောင်း သုံးကြောင်းဖြင့် တိုက်ခိုက်လျက်ရှိနေကြောင်း ဒေသခံများက ပြော သည်။

SNA   ရဲဘော်ကိုတွေ့ရစဉ်

KIA သည် စစ်ကိုင်းတိုင်းဒေသကြီးအတွင်းမှာ ဗန်းမောက်မြို့ကို ဗဟိုပြု၍ စစ်ရေး ဖော်ဆောင်ရေး၊ ထီးချိုင့်မြို့ အား ဗဟိုပြုပြီး စစ်ရေးဖော်ဆောင်ရေး၊ ကသုံးလုံး (ကသာ-ကောလင်း-ကန့်ဘလူ) စစ်ဆင်ရေး စသည့် စစ်ဆင် ရေး သုံးခုကို ရက္ခိုင့်တပ်တော်(AA)၊ PDF၊ မြန်မာနိုင်ငံလုံးဆိုင်ရာကျောင်းသားများ ဒီမိုကရက်တစ်တပ်ဦး (ABDSF)၊ ကူးကီးအမျိုးသားတပ်မတော်-မြန်မာ(KNA Burma)တို့ဖြင့် ပူးပေါင်းပြီး ဖော်ဆောင်နေသည်။

အဆိုပါ စစ်ဆင်ရေး သုံးခု အောင်မြင်ပါက ချင်းပြည်နယ်၊ မကွေးတိုင်းဒေသကြီး၊ ရခိုင်ပြည်နယ် တို့မှာ တဆက်တည်း စစ်ရေး ဖော်ဆောင်နိုင်ရန်အတွက် AA၊ CNF ၊ CNDF၊ PDF စသည့် လက်နက်ကိုင်များဖြင့် ချိတ်ဆက်ထားသည်။

ထို့ကြောင့် KIA သည် စစ်ကိုင်းတိုင်းဒေသကြီးအထက်ပိုင်း ဗန်းမောက်၊ ဟုမ္မလင်း၊ ကောလင်း၊ ကသာ၊ ပင်လည်ဘူး၊ ထီးချိုင့်၊ ကန့်ဘလူ စသည့် ဒေသများကို သိမ်းပိုက်နိုင်ရေး အပြင်းအထန် ကြိုးပမ်းလျက်ရှိနေ သည်။